Sekretari amerikan i Shtetit e ka paralajmëruar presidentin e zgjedhur, Donald Trump kundër pezullimit të marrëveshjes bërthamore me Iranin, duke thënë se ajo e ka bërë botën më të sigurt duke e ia pamundësuar Teheranit ndërtimin e armës bërthamore.

Presidenti i zgjedhur, Trump e ka kritikuar marrëveshjen me akuzën se ajo i ka dhënë shumë hapësirë Iranit, derisa ka sygjeruar se ai mund të heq dorë prej saj.

“Askush nuk mund të parashikojë se çfarë vendimet (Trump) do marrë”, ka thënë Kerry me 5 janar, por Shtetet e Bashkuara ka pasur vetëm “zgjedhje shumë të këqija” të një Irani me armë bërthamore apo një konflikt në Lindje të Mesme, para se marrëveshja të nënshkruhej, vitin e kaluar.

Marrëveshja kërkon nga Irani që të frenojë ambiciet e saj bërthamore në këmbim të lehtësimit të sanksioneve ndërkombëtare ekonomike.

“Që të jemi shumë të qartë, ndërprerja e marrëveshjes tani do të na linte me ato zgjedhje shumë të këqija”, ka thënë Kerry.

Teherani tani ka vetëm 300 kilogramë të uraniumit të pasuruar, që është shumë më pak se sa 12 mijë kg që i kishte më parë, ka thënë më tej ai.

Marrëveshja në fakt ia ka bllokuar çdo mënyrë Iranit që të ndërtojë armë bërthamore”, ka thënë Kerry.

Rex Tillerson, i nominuari i presidentit të zgjedhur amerikan, Donald Trump për postin e Sekretarit të Shtetit ka arritur të marrë përkrahjen e disa senatorëve republikanë, por demokratët thonë se ata duan më shumë kohë që të hulumtojnë rreth lidhjeve të kompanisë së tij, Exxon Mobil dhe Rusisë.

Udhëheqësi i Komisionit të Senatit për Marrëdhënie me Jashtë, Bob Corker, e ka përshkruar Tillersonin si “shumë në ngjarje” me mënyrën e të menduarit të politikës së jashtme amerikane.

Corker, komisioni i të cilit më 11 janar do e mbajë një seancë për konfirmimin e këtij nominimi, ka thënë se ai beson që Tillerson do e udhëheqë një politikë të fuqishme amerikane drejt Rusisë.

Ish shefi ekzekutiv i kompanisë, Exxon Mobil e ka zgjeruar praninë e kompanisë së tij në Rusi duke u bërë mik me presidentin rus, Vladimir Putin, ndërsa ka kundërshtuar sanksionet amerikane ndaj Rusisë për shkak të aneksimit të gadishullit ukrainas të Krimesë.

Disa prej ligjvënësve amerikanë, prej të dy partive kanë shprehur shqetësim rreth lidhjeve të Tillersonit me Moskën.

I pyetur nëse ai mund ta përkrahë Tillersonin, udhëheqësi i Komisionit të Senatit për Shërbimet e Armatosura, John McCain ka thënë “sigurisht”.

Demokratët kanë kërkuar shtyerjen e seancës për konfirmimin e Tillersonit, duke përmendur lidhjet e Exxonit me Rusinë si arsye.

Në përpjekje për të zbutur kritikat, Rex Tillerson ka shkëputur çdo lidhje me Exxon me qëllim që të evitojë konfliktin e interesit.

Mbi 10 milionë fëmijë në Shtetet e Bashkuara nuk jetojnë afër një anesteziologu pediatrik, apo mjeku i cili është i specializuar në mpierjen e fëmijve gjatë operacionit.

Të dhënat e këtij studimi të ri janë raportuar nga Reuters.

Anestiozologët pediatrik iu japin fëmijve medikamente që janë të nevojshme për mpirje lokale apo edhe për t’i vënë në gjumë në tërësi derisa i nënshtrohen operacioneve dhe procedurave të tjera mjekësore.

Ata gjithashtu i monitorojnë të rrahurat e zemrës dhe gjëra të tjera rreth shëndetit të fëmijve gjatë kohës së ata janë në operacion.

Derisa kanë mbetur më pak se tri javë deri në inaugurimin e presidentit të zgjedhur amerikan, Donald Trump, ai dje e ka bërë një sulm të ri ndaj komunitetit të inteligjencës së Shteteve të Bashkuara.

Zoti Trump në rrjetin Twitter ka shkruar se një takim me përfaqësues të inteligjencës, që është dashur ta ketë lidhur me ndërhyrjen ruse në zgjedhjet presidenciale të vitit të kaluar, është shtyrë deri më 6 janar.

“Duket se nevojitet më tepër kohë për ta ndërtuar rastin. Shumë e çuditshme” ka shkruar Trump në Twitter.

Nga ana tjetër, zyrtarët e inteligjencës së Shteteve të Bashkuara janë cituar duke thënë se nuk ka vonesë në orarin e takimeve për njoftime të inteligjencës.

Agjencitë e inteligjencës së Shteve të Bashkuara besojnë se Rusia i ka udhëhequr sulmet kibernetike kundër Partisë Demokratike dhe fushatës së kandidates së kësaj partie, Hillary Cinton, duke publikuar informacione nëpërmjet faqes në Internet, WikiLeaks, dhe mediave të tjera, për ta ndihmuar Donald Trumpin që të fitoj në zgjedhje.

Presidenti i zgjedhur amerikan Donald Trump, ka paralajmëruar mbrëmë se më 11 janar në Qytetin e Nju Jorkut, do ta mbajë konferencën e parë të përgjithshme me gazetarë, para se më 20 janar të inaugurohet në postin e poresidentit të Shteteve të Bashkuara.

Pritet që në këtë paraqitje, zoti Trump do t’i shpallë planet për evitimin e konfliktit të interesit ndërmjet postit të tij në Shtëpinë e Bardhë dhe kompanive në perandorinë biznesore të tij.

Deri tash, Donald Trump më tepër ka preferuar që me mediat dhe publikun të komunikojë nëpërmjet shpalljeve joformale në rrjetin Twitter.

Kongresi i 115 i SHBA bëri të martën betimin në Uashington. Republikani Paul Ryan u zgjodh pa vështirësi kryetar i Dhomës së Përfaqësuesve. Në Senat, republikanët kanë paraqitur një projektligj që do t’i paraprijë përpjekjes së tyre për të shfuqizuar reformën e kujdesit shëndetësor të Presidentit Obama.

Ndërkaq, kryetari republikan i Komisionit të Senatit për Politikën e Jashtme tha se seancat e konfirmimit për kandidaturën e zotit Rex Tillerson si Sekretar i Shtetit do të fillojnë javën tjetër dhe pritet të zgjasin dy ditë. Komisioni do të marrë shumë shpejt një deklaratë të hollësishme financiare nga zoti Tillerson, i cili ka punuar për firmën Exxon Mobil prej 43 vjetësh.

Presidenti i zgjedhur Donald Trump do ta fillojë mandatin e tij me një Kongres të kontrolluar nga republikanët. Por megjithë zotimet ambicioze që bëri gjatë fushatës për reforma në kujdesin shëndetësor, në politikat fiskale si dhe për shkurtime buxhetore, asgjë nuk është e garantuar për presidentin e ardhshëm:

Në fillim të dhjetorit u pa një moment uniteti pas takimit të Kreut të Dhomës së Përfaqësuesve, Paul Ryan dhe presidentit të zgjedhur Donald Trump.

“Jemi shumë entuziastë për mundësinë që kemi t’i futemi menjëherë punës për ta vënë vendin në rrugën e duhur,” tha zoti Ryan.

Për presidentin e ardhshëm suksesi do të matet nga disa reforma të rëndësishme:

“Donald Trumpi do të përpiqet të sigurojë ulje masive taksash, ndërkohë që ka premtuar shtimin e shpenzimeve për mbrojtjen, dhe ka propozuar projekte në infrastrukturë me shpresën se do të mund të deklarojë fitore në këto përpjekje për reforma brenda 100 ditëve të para,” – thotë analisti Norm Ornstein.

Për amerikanët, të cilët me votën e tyre sollën këtë qeverisje republikane në Uashington, suksesi matet me reforma në politikat e imigracionit, me ekonominë dhe shkurtime në programet qeveritare. Edhe pa ardhur zoti Trump në Shtëpinë e Bardhë, Kongresi është mobilizuar për të anuluar ligjin e Presidentit Obama për kujdesin shëndetësor.

Por republikanët kanë vetëm një shumicë të ngushtë në Senat dhe do të duhet të tregohen të kujdesshëm dhe të mos anulojnë elementë të ligjit që gëzojnë popullaritet, në mënyrë që të mos humbin kapital të nevojshëm politik.

“Do të ketë një numër të mjaftueshëm demokratësh në Senat që mund ta pengojnë procesin, por çfarë do të nxjerrin në atë mënyrë?” pyet udhëheqësi i shumicës republikane në Senat, Mitch McConnell.

Kandidaturat e zotit Trump për poste kabineti kërkojnë konfirmim në Senat. Pritet që të dyja partitë të ngrenë pyetje të forta për këta kandidatë, shumë prej të cilëve nuk kanë eksperiencë në qeveri.

Në Dhomën e Përfaqësuesve, demokratët do t’u bëjnë rezistencë planeve të kryetarit Paul Ryan, për të reduktuar programet qeveritare të asistencës.

“Demokratët në Kongres dhe miliona amerikanë në të gjithë vendin do ta bëjnë shumë të qartë se nuk duan shkurtime në programin e kujdesit shëndetësor për të moshuarit”, thotë Nancy Pelosi, Udhëheqëse e demokratëve në Dhomën e Përfaqësuesve.

Shkurtimet do të binin ndesh me premtimet e zotit Trump për të mos i prekur këto programe. Ndërsa për tregtinë ai mund të ndeshë kundërshtime të forta nga vetë republikanët:

“E dimë që shumë nga ato që premtoi Trumpi nuk janë gjëra që i duan republikanët. Lind pyetja, sa do ta përdorë Trumpi autoritetin e tij për urdhra ekzekutivë, i acaruar që Kongresi nuk po bën ato që i kërkon ai,” thotë analisti Norm Ornstein.

Përgjigja që do të marrë kjo pyetje mund të diktojë nëse uniteti mes republikanëve do të vazhdojë, edhe pas 100 ditëve të para të presidencës Trump.

Presidenti i zgjedhur amerikan, Donald Trump, përmes profilit të tij në Twitter ka thënë se Koreja e Veriut nuk do të ketë mundësi të ndërtojë armë bërthamore që do të mund të arrinin disa pjesë të territorit të Shteteve të Bashkuara.

Mirëpo, Reuters shkruan se ka mundësi që Koreja komuniste tashmë vetëm e ka këtë armë.

Disa prej ekspertëve që e kanë përcjellë programin bërthamor dhe atë raketor të Koresë së Veriut, thonë se pas disa testeve të kryera gjatë vitit 2016, ky shtet mund të ketë raketa me rreze të shkurtëra dhe të mesme që përmbajnë koka bërthamore.

Kjo së paku mund t’ia jap mundësinë Koresë komuniste të kërcënojë forcat amerikane të stacionuara në Azi.

Cicërima e Trumpit e publikuar të hënën merret si përgjigje ndaj pretendimit të liderit koreano verior, Kim Jong Un i cili gjatë fjalimit për Vitin e Ri ka thënë se vendi ka arritur fazën finale të ndërtimit të raketave inter-kontinentale balistike.

Reagimi i presidentit të zgjedhur amerikan ishte kështu: “Koreja Veriore thotë se është në fazën finale të zhvillimit të armëve bërthamore që mund të arrijnë disa pjesë të SHBA-së. Kjo nuk do të ndodhë!”

Zëdhënësi i presidentit të zgjedhur amerikan, Donald Trump, ka thënë se nuk ka asnjë dëshmi që tregon se hakerët rusë kanë ndikuar në zgjedhjet presidenciale të nëntorit.

“Mënyra se si mediat kryesore po raportojnë është rritja e idesë se (Rusia) ka ndikuar në zgjedhje. Nuk ka fare dëshmi se ata kanë ndikuar në zgjedhje”, ka thënë Sean Spicer për Fox News më 2 janar.

Spicer, i cili do të bëhet Sekretari për Media i Shtëpisë së Bardhë kur Trump të nis detyrën më 20 janar ka thënë se “hakimi është i gabuar” dhe se “njerëzit nuk duhet të ndërhyjnë”. Por, ai i ka dhënë jehonë paralajmërimit të Trumpit gjatë fundjavës kundër ngutjes së bërjes së Rusisë fajtore për sulmet kibernetike.

Presidenti Barack Obama ka thënë se dëshmitë e përfshirjes ruse janë të mëdha dhe për këtë ai ka dëbuar 35 diplomatë rusë derisa ka vendosur sanksione të reja kundër Rusisë gjatë javës së kaluar. Ligjëvënësit e të dy partive amerikane i kanë përpkrahur këto vendime.

Por, Trump rregullisht ka hedhur dyshime mbi akuzat për përfshirjen ruse në këto sulme.

Përgjatë fundjavës, Trump, i cili tash merr informacione të njëjta sekrete me Obamën, ka thënë se ai “din gjëra që të tjerët nuk i dijnë” dhe se ai do i zbulojë këto informacione më 3 apo 4 janar.

“Ai do të flasë rreth konkludimeve të tij dhe për atë se si mendon ai se qëndrojnë gjërat”, i ka thënë Spicer CNN-së më 2 janar dhe ka shtuar: “Ai nuk do të zbulojë asgjë që është sekrete apo që është ndarë në mënyrë sekrete me të”.

Sean Spicer, zëdhënësi i ardhshëm i Shtëpisë së Bardhë paralajmëron publikun të mos ushqejë shumë shpresa se presidenti i zgjedhur Donald Trump do të bëjë të ditur informata të reja lidhur me të dhënat që kanë grumbulluar shërbimet e zbulimit mbi piraterinë kibernnetike gjatë fushatës zgjedhore. Administrata aktuale akuzon Rusinë për ndërhyrje në kompiuterat e fushatës së zonjës Clinton, duke e fajësuar për ndikim në zgjedhjet presidenciale që dëmtuan rivalen e zotit Trump në zgjedhje.

“Nuk bëhet fjalë për nxjerrjen e ndonjë informate të re,” tha zoti Spicer për rrjetin mediatik CNN të hënën. “Ai do të flasë për përfundimet që do të nxjerrë pasi të informohet. Por nuk do të nxjerrë informata sekrete që do të mësojë gjatë seancës së informimit. Mendoj se ai mund të diskutojë publikisht konkluzionet e tij dhe këndvështrimin e tij mbi situatën”.

Zoti Trump tha në komentet për shtyp më 31 dhjetor se është në dieni të më shumë hollësive se sa janë bërë të ditura për publikun lidhur me piraterinë kibernetike për të cilën akuzohet Moska. Ai premtoi se njerëzit do të informohen mbi ato që di ai “të martën ose të mërkurën”.

Presidenti i zgjedhur ka ngritur dyshime mbi përfundimin e arritur nga shërbimet e zbulimit se Moska kishte autorizuar pirateri kibernetike në kompiuterat e rivales së zotit Trump, kandidates demokrate Hillary Clinton dhe kishte lejuar nxjerrjen e informatave përmes faqes elektronike WikiLeaks për të dëmtuar shanset e zonjës Clinton në zgjedhje. Përfundimet e shërbimeve të zbulimit u bënë shkas për masa ndëshkimore nga administrata Obama kundër Rusisë, ndër të cilat dëbimin e 35 diplomatëve rusë nga Shtetet e Bashkuara, të cilët Uashingtoni i cilësoi si agjentë rusë.

Presidenti Barak Obama tha se do të mbajë një fjalim lamtumire në Çikago më 10 janar, ku do të reflektojë mbi sukseset gjatë dy mandateve dhe do të ofrojë mendimet e tij se në ç’drejtim po shkon vendi, ndërkohë që presidenti i zgjedhur Donald Trump vjen në Shtëpinë e Bardhë më 20 janar.

Presidenti Obama largohet pas 8 vitesh me shkallën më të lartë të miratimit se çdo president tjetër i periudhës moderne, rreth 59 për qind. Republikani Trump ka premtuar se do të zhbëjë shumë prej politikave themelore të parardhësit të tij.

Fjalimi i zotit Obama ndjek një traditë të gjatë të presidentëve amerikanë, duke filluar me George Washingtonin më 1796, për t’iu drejtuar vendit para largimit nga Shtëpia e Bardhë.

Presidenti Obama u kthye sot në Uashington nga pushimet e Krishtlindjeve në Hawai, ku ai ka lindur dhe ka kaluar kohën më të madhe të rinisë. Ndihmësit thonë se në javët e fundit në detyrë, zoti Obama ka mundësi të falë më shumë të burgosur për drogë, që ai mendon se kanë marrë dënime tepër të ashpra dhe ndoshta të nxjerrë më shumë urdhra ekzekutivë, në përpjekje për të mbajtur në fuqi disa politika që ai favorizon dhe që kundërshtohen nga zoti Trump.

Megjithëse demokrati Obama, ka kërkuar të lehtësojë tranzicionin e administratës Trump, ai ka ndërmarrë gjithashtu veprime që e kanë nervozuar presidentin e ardhshëm. Ai ka lëshuar urdhra ekzekutivë për të bllokuar shpimet për naftë në oqean pranë brigjeve amerikane, ka shpallur parqe të reja kombëtare dhe ka zbrazur më tej burgun amerikan në Gjirin Guantanamo të Kubës, ku mbahen terroristë të dyshuar.

Zoti Obama po ashtu për herë të parë urdhëroi ambasadoren e tij në Kombet e Bashkuara për të lejuar miratimin e një rezolute të Këshillit të Sigurimit që kritikon vendbanimet izraelite në Bregun Perëndimor dhe në Jerusalemin Lindor. Ai vendosi sanksione ndaj Rusisë lidhur me ndërhyrjet e dyshuara kibernetike të Moskës gjatë fushatës presidenciale në SHBA. Të dyja këto veprime janë në konflikt të drejtpërdrejtë me presidentin e zgjedhur Trump.

Presidenti Obama do të takohet të mërkurën me demokratët në Kongres në përpjekje për të hartuar një strategji për të mbrojtur arritjen e tij më të madhe në politikën e brendshme, reformën e kujdesit shëndetësor që zoti Trump dhe ligjvënësit republikanë kanë deklaruar se do ta shfuqizojnë, edhe pse ata ende nuk kanë rënë dakord mbi një plan që do ta zëvendësonte atë.

Kur të bëhet qytetar privat, zoti Obama dhe zonja e parë Michelle do të banojnë në Uashington jo shumë larg nga Shtëpia e Bardhë dhe kanë në plan të qëndrojnë atje deri sa vajza e tyre e vogël Sasha të mbarojë shkollën e mesme në vitin 2019. Ai është presidenti i parë në gati një shekull që do të vazhdojë të qëndrojë në Uashington pas largimit nga detyra.

Presidenti i zgjedhur Donald Trump po shpreh përsëri dyshime për konkluzionin e agjencive amerikane të zbulimit se Rusia ndërhyri në zgjedhjet presidenciale përmes piraterisë kibernetike.

Ky konkluzion solli si rezultat shpalljen e sanksioneve ndaj shërbimeve sekrete ruse nga Presidenti Barack Obama dhe dëbimin e 35 diplomatëve që ai tha se ishin spiunë.

Zoti Trump, u tha gazetarëve në Florida, ku po kalon pushimet e fundvitit, se do që burimet amerikane të zbulimit të jenë të sigurta, sepse kjo është një akuzë shumë serioze dhe se ai do që ata të jenë të bindur.

Ai tha se do të ishte e “padrejtë” të bëheshin akuza kundër Moskës, nëse ka paqartësi.

Presidenti i zgjedhur tha se ai ka më shumë njohuri për akuzën e Uashingtonit kundër Rusisë, se sa ç’është bërë publike.

“Pirateria kibernetike është shumë e vështirë të provohet. Kështu që mund të jetë dikush tjetër. Unë gjithashtu di gjëra që të tjerët nuk i dinë, prandaj nuk mund të jenë të sigurtë për situatën”, tha zoti Trump.

Shtëpia e Bardhë e ka publikuar sot video mesazhin javor të presidentit amerikan, Barack Obama, përmes së cilës ai ka folur për dy mandatet e tij si udhëheqës i shtetit më të fuqishëm në botë.

“Në kohën kur e përfundojmë një vit dhe shikojmë drejt të ardhmes, dua të shfrytëzojë pak kohë që t’iu falenderojë për gjithçka që keni bërë për të bërë Amerikën më të fuqishme gjatë këtyre tetë viteve të fundit. Vetëm tetë vjet më parë, kur bëhesha gati të fillojë detyrën, ekonomia jonë lëkundej. Rreth 800 mijë amerikanë e humbisnin vendin e tyre të punës çdo muaj. Në disa komunitete, pothuajse një në pesë persona nuk kishte vend pune. Rreth 180 mijë trupa po shërbenin në Irak dhe Afganistan, ndërsa Osama bin Laden ishte ende në arrati”, ka thënë Obama në video mesazhin e publikuar nga Shtëpia e Bardhë.

Presidenti Obama i cili mbetët lideri i botës së lirë deri më 20 janar kur këtë detyrë e merr presidenti i zgjedhur, Donald Trump, ka treguar për ato që janë arritur nga SHBA-të gjatë udhëheqjes së tij.

“Ne kemi kthyer 165 mijë trupa nga Iraku dhe Afganistani, ndërsa e kemi hequr qafe edhe Osama bin Ladenin. Përmes diplomacisë, ne i kemi dhënë fund programit të armëve bërthamore të Iranit, kemi hapur një kapitull të ri me popullin e Kubës, ndërsa kemi bërë bashkë rreth 200 kombe përmes një marrëveshje rreth ambientit që mund të shpëtojë planetin për fëmijët tanë”, ka thënë më tej Obama.

“Ne kemi arritur progres të jashtëzakonshëm si shtet gjatë tetë viteve të kaluara. Dhe, ja ku po e them: asnjë prej tyre nuk ishte e sigurt se do të arrihej. Kjo ishte si rezultat i vendimeve të rënda që janë marrë, dhe si rezultat i punës së fuqishme”, ka thënë Obama.

Presidenti i parë me ngjyrë i Shteteve të Bashkuara të Amerikës ka thënë se nga janari i vitit të ardhshëm, ai do i kthehet rolit gjithashtu të rëndësishëm të qytetarit amerikan, ndërsa ai do të vazhdojë angazhimin e tij që zotimi mbi të cilin është ndërtuar shteti amerikan, të ruhet.

“Ka qenë privilegj i jetës sime që të shërbej si presidenti i juaj. Dhe, derisa bëhem gati që të nis rolin po aq të rëndësishëm të qytetarit, ta dini se do të jem me ju për çdo hap për tu siguruar t’i përmbahemi zotimit mbi të cilin është krijuar vendi – që të gjithë jemi të barabartë, dhe të gjithë e meritojmë çdo mundësi për të jetësuar ëndërrat tona. Nga familja Obama tek familjet tuaja, viti 2017 uroj të jetë vit i lumtur dhe i bekuar”, ka uruar presidenti Obama.

Presidenti i zgjedhur amerikan, Donald Trump, thotë se ka informacione të pazbuluara rreth sulmeve të dyshuara kibernetike ruse gjatë fushatës zgjedhore presidenciale në SHBA të cilat planifikon t’i tregojë gjatë javës së ardhshme.

Duke folur shkurtimisht para gazetarëve derisa shkonte në ndejën e Vitit të Ri në Florida, Trump është përgjigjur në një pyetje rreth këtyre sulmeve për të cilën ka thënë, “unë dij gjëra që të tjerët nuk i dijnë” dhe “ju do i zbuloni ato të martën apo të mërkurën (më 3 apo 4 janar)”.

Ai gjithashtu ka thënë se beson që ndërhyrja në emailat e zyrtarëve të Partisë Demokratike tmund të jetë kryer nga “dikush tjetër” e jo Rusia. Ai ka thënë se ai di shumëçka rreth harkimit të kompjuterëve dhe se kjo “është një gjë që shumë vështirë verifikohet”.

Javën e kaluar, qeveria amerikane ka dëbuar 35 diplomatë rusë dhe ka vendosur sanksione ndaj zyrtarëve të sigurisë dhe agjencive të inteligjencës ruse si masë ndëshkuese ndaj sulmeve kibernetike. Agjencitë e inteligjencës amëerikane thonë se ata besojnë që Moska ka urdhëruar sulmet me qëllim që Trump të fitojë zgjedhjet.

I pyetur nëse ai do të takohet me presidenten e Tajvanit nëse ajo udhëton drejt Shteteve të Bashkuara, Trump nuk e hodhi poshtë këtë duke thënë: “Të shohim”.

SHBA-ja nuk e njeh Tajvanin, të cilën Kina e konsideron krahinë të saj.

Trump ka thënë se nën udhëheqjen e tij, Shtetet e Bashkuara do të kenë marrëdhënie të mrekullueshme me shumë shtete, përfshirë Rusinë dhe Kinën.

Ai gjithashtu ka thënë se Izraeli është “shumë, shumë i rëndësishëm për mua.”

Presidenti i zgjedhur amerikan, Donald Trump ka sulmuar “armiqtë e shumtë” në mesazhin e tij për Vitin e Ri.

“Urime Vitin e Ri të gjithëve, përfshirë armiqëve të shumtë dhe atyre që më kanë luftuar dhe kanë humbur keq”, ka shkruar Trump në profilin e tij në “Twitter”.

Ai ka shtuar se kundërshtarët e tij “thjeshtë nuk e dijnë se çfarë duhet të bëjnë” ndërsa urimin e ka përfunduar me fjalën: “Dashuri!”.

Trump është përballur me rezistencë nga establishmenti republikan derisa ai ka mundur mbi 12 kandidatë të partisë gjatë garës për të siguruar nominimin për zgjedhjet presidenciale.

Ai arriti të fitojë edhe zgjedhjet e 8 nëntorit ndaj rivales demokrate, Hillary Clinton, e cila pritej që të fitonte.

Presidenti i zgjedhur amerikan, pritet të festojë sonte së bashku me qindra persona të tjerë në klubin e tij në Palm Beach të Floridas, një prej të cilëve pritet të jetë edhe aktori Sylvester Stallonte.

Senatori John McCain tha se SHBA-ja nuk do të bëjë “pazar faustian” me presidentin e Rusisë, Vladim Putin, pavarësisht spekulimeve se presidenti i zgjedhur, Donald Trump, mund të heqë sanksionet me qëllim të përmirësimit të marrëdhënieve

Duke folur në një intervistë ekskluzive për Radion Evropa e Lirë, Shërbimi i Ukrainës, në Kiev, më 30 dhjetor, së bashku me dy senatorë amerikanë, McCain, tha se çfarëdo marrëveshje me Putinin do të “pengonte dhe minonte lirinë dhe demokracitë që ekzistojnë sot”.

Kongresi i SHBA-së ka vendosur sanksione ndaj Moskës menjëherë pasi Rusia e aneksoi me forcë Gadishullin Krime të Ukrainës në mars të vitit 2014 dhe për mbështetjen e vazhdueshme të separatistëve pro-rusë në Ukrainën lindore.

Senatori Lindsey Graham, një republikan nga Karolina Jugore, tha se Kongresi do të vazhdojë në vitin 2017 sanksionet kundër Rusisë, me objektiv energjinë dhe sektorin banker si dhe “Putinin dhe qarkun e tij të brendshëm”.

“Ne do të bëjmë dy gjëra; do ta ndalojmë Putinin me sanksione më të fuqishme dhe do të jemi më të dobishëm për miqtë tanë, sikundër këtu në Ukrainë”, tha Graham.

McCain, Graham dhe Amy Klobuchar, një demokorate nga Minesota thanë se ka një mbështetje të fuqishme në Kongres për t’i ofruar Ukrainës “armë mbrojtëse vdekjeprurëse” pë rtë ndihmuar Kievin në luftën e tij kundër separatistëve të mbështetur nga Rusia në lindje

Të pyetur nëse Trump mund ta njohë Krimenë si pjesë të Rusisë, Graham tha se Kongresi do ta bllokojë një lëvizje të tillë.

“Vetëm presidenti nuk mnd ta bëjë këtë. Dhe arsyeja pse Kongresi do ta refuzonte një ide të tillë, është sepse minon sundimin e ligjit”, theksoi Graham.

McCain bëri thirrje për veprime më të fuqishme ndaj Moskës për përfshirjen e dyshuar të saj në hakerimin e postës elektronike të Partisë Demokratike përpara zgjedhjeve presidenciale të nëntorit.

Presidenti i SHBA-së, Barack Obama më 29 dhjetor urdhëroi dëbimin e 35 diplomatëve rusë dhe vendosi sanksione ndaj dy agjencive ruse të intelegjencës për, sic tha administrata, përfshirjen e tyre në hakim.

Putin tha më 30 dhjetor se Moska nuk do t’i kundërpërgjigjet me të njëjtën masë dhe nuk do të dëbojë asnjë amerikan nga Rusia, duke akuzuar administratën e SHBA-së për, siç u shpreh, “diplomaci të papërgjegjshme.”

Më 30 dhjetor, Trump e ka lavdëruar Putinin në Twitter për përmbajtje nga veprimet hakmarrëse duke e cilësuar “si shumë të mençur”.

Senatori McCain ka bërë thirrje për veprime më të ashpra ndaj Moskës për shkak të përzierjes në hakerim të partisë Demokratike para zgjedhjeve presidenciale,

“Mund t’i bëjmë edhe më të rënda – nga udhëtimi deri tek identifikimi i atyre që janë përzier në këto hakime dhe organizatat e posacme. Ka masa më të ashpra që duhet të ndërmarrim. Në fund të fundit ishte një sulm mbi SHBA, sulm në themelet e demokracisë sonë. Nëse shkatërroni zgjedhjet atëherë keni shkatërruar demokracinë”, tha McCain.

Senatorja Amy Klobuchar tha se me sulme kibernetike nuk është goditur vetëm SHBA-ja.

“Gjatë këtij udhëtimi, pas vizitës në Estoni dhe Lituani, dhe duke dëgjuar për sulmet kibernetike në Ukrainë, kemi mësuar se se kjo po ndodh me vite të tëra. Dhe kjo është teknika që mudn të jetë përdorur edhe në zgjedhjet francize ose gjermane”, tha Klobuchar, duke iu referuar dy zgjedhjeve të rëndësishme që pritet të organizohen në vitin 2017.

Përgatiti: Arbër Vllahiu

Diplomatët rusë janë larguar pa zhurmë nga dy objekte pushimi që i kanë shfrytëzuar në periferi të Uashingtonit dhe qytetit të Nju Jorkut, në pajtim me urdhërin e dhënë nga Shtëpia e Bardhë.

Rusët, që janë akuzuar se kanë përdorur këto objekte për spiunim, kanë pasur afat deri në mesditë që të largohen nga objekti që gjendet në Centreville të Merilendit dhe tjetri në ishullin Long të Nju Jorkut.

Afër mesditës, disa kamionë të vegjël, autobusë dhe automjete të blinduara me regjistrim diplomatik janë larguar nga aty.

“Hapësirat janë liruar dhe tani janë nën kontrollin e qeverisë”, ka thënë Elliot Conway, kryetari i Upper Brookville.

Shtëpia e Bardhë ka thënë se këto objekte janë shfrytëzuar për mbledhje të informacioneve sekrete. Mbyllja e tyre është pjesë e masave kundër Rusisë për dyshimin se kanë ndërhyrë në zgjedhjet presidenciale të nëntorit përmes sulmeve kibernetike.

Ambasadori rus në OKB, Vitaly Churkin, këtë vendim e ka quajtur “skandaloz”, veçanërisht pasi është marrë gjatë pushimeve të Krishtlindjeve, kur ka pushim nga shkolla ndërsa familjet kanë planifikuar që të shfrytëzojnë ato objekte për relaksim gjatë festave.

Presidenti i zgjedhur amerikan, Donald Trump, ka bëtë thirrje që Shtetet e Bashkuara “të lëvizin” mëtutje, pasi Shtëpia e Bardhë e goditi Rusinë me sanksione të reja madhore për ndërhyrje në zgjedhjet e nëntorit nëpërmjet sulmeve kibernetike.

“Është koha që vendi ynë të lëvizë në gjëra më të mëdha dhe më të miraa”, tha mbrëmë Trump, derisa për të parë herën ka indikuar se i merr më tepër seriozisht akuzat për ndërhyrje ruse të dokumentuar nga agjencitë e inteligjencës së Shteteve të Bashkuara.

Më parë, gjatë fushatës zgjedhore, ai shpeshherë i ka hedhur poshtë akuzat për ndërhyrje ruse.

“Në interes të vendit tonë dhe të popullit të madh të tij, unë do të takohem me liderët e komunitetit të inteligjencës javën e ardhshme me qëllim që të njihem me faktet për këtë situatë”, tha Trump.

Gatishmëria e re e zotit Trup për ta shqyrtuar dëshminë e paraqitur nga Shtëpia e Bardhë, sugjeron se ai po përgjigjet ndaj presionit të liderëve republikanë, të cilët kanë bërë thirrje për qëndrim të ashpër kundër Rusisë, për ta dekurajuar Moskën nga ndërhyrja e tillë politike në të ardhmen.

Shefi i ri i OKB-së e ka shprehur dëshirën të takohet me presidentin e zgjedhur amerikan, Donald Trump edhe pse ky i fundit ka bërë thirrje për ndryshime të mëdha të organizatës botërore.

Sekretari i Përgjithshëm i OKB-së, i cili e nis detyrën më 1 janar, Antonio Guterres, ka thënë se ai dëshiron të “vendosë dialog konstruktiv” me Trumpin sa më shpejtë që është e mundur.

“Është padyshim interesi im ta vizitojë sa më shpejtë që është e mundur”, ka thënë ai dhe ka shtuar: “SHBA-ja nuk është vetëm donatori më i madh i OKB-së, por edhe elementi fundamental në veprimet e tij”.

Dje, Trump ka lënë të kuptohet SHBA-të do i perdorin fondet që ja japin OKB-së për të nxitur ndryshime të mëdha, ndonëse ai nuk e ka qartësuar për çfarë është fjala.

“OKB ka potencial të jashtëzakonshëm. Nuk po e përdor potencialin që e ka”, iu ka thënë Trump reporterëve në Florida.

“Kur keni parë që Kombet e Bashkuara kanë zgjidhur problem? Ata nuk ia arrijnë. Ata shkaktojnë probleme”.

“Pra, nëse arrijnë ta përdorin potencialin, kjo do të ishte gjë e mirë. Nëse nuk ia arrin, është humbje kohe dhe parash”, ka thënë më tej Trump.

Donald Trump do të betohet si president i SHBA-së më 20 janar.

Presidenti i zgjedhur i Shteteve të Bashkuara, Donald Trump, i bëri thirrje Izraelit që “të qëndrojë i fortë” derisa ai të marrë detyrën, muajin e ardhshëm.

Me një postim në Twitter, Trump tha se SHBA nuk mund të lejojë që Izraeli “të trajtohet me përbuzje totale dhe mungesë respekti”.

Trump i është referuar marrëveshjes bërthamore me Iranin dhe votimit, javën e kaluar, në Këshillin e Sigurimit të OKB-së kundër ndërtimit të vendbanimeve hebreje në Bregun e pushtuar Perëndimor dhe në Jerusalemin Lindor.

SHBA nuk ka marrë parasysh thirrjet e Trumpit për t’i vënë veto rezolutës.

Trump shkroi të mërkurën në Twitter se “Izraeli e ka pasur mike të madhe SHBA-në, por jo më”.

Trump tha se marrëveshja që kufizon programin atomik të Iranit, në këmbim të lehtësimit të sanksioneve kundër tij, ka qenë “fillimi i fundit”.

Komentet e Trumpit vijnë në kohën e tensioneve në rritje midis SHBA-së dhe Izraelit, pasi Uashingtoni ka abstenuar nga votimi në Këshill të Sigurimit.

Po ashtu të mërkurën, Sekretari amerikan i Shtetit, John Kerry, përsëriti se zgjidhja me dy shtete është thelbësore për paqen midis palestinezëve dhe izraelitëve. (REL)

Edhe para inaugurimit të zotit Donald Trump si presidenti i ardhshëm më 20 janar, Senati do të fillojë shqyrtimin e kandidaturave të tij për postet kryesore të administratës. Siç njofton korrespondenti i Zërit të Amerikës Michael Bowman, demokratët kanë shprehur mosbesim të madh lidhur me përzgjedhjet e zotit Trump, por pa përkrahjen e republikanëve, ata nuk kanë fuqinë e duhur për të bllokuar emërimet.

“Mendoj se do të jetë një prej kabineteve më të mira ndonjëherë”

Në zgjedhjen e këshilltarëve të tij të ngushtë, zoti Trump u mbështet tek drejtuesit e korporatave, ushtria dhe radhët e nëpunësve publikë me prirje konservatore, pro-biznesit.

Ndoshta asnjë i emëruar nuk ka tërhequr më shumë vëmendje se sa drejtori i kompanisë Exxon Mobile, Rex Tillerson, si kandidat për sekretar shteti.

“Mardhëniet e mia me Vladimir Putinin datojnë rreth 15 vite më parë, ai e kupton se unë jam biznesmen. Kompania ime ka investuar shumë para në Rusi.”

Ligjvënësi demokrat Chris Coons thotë:

“Do të bëjmë shumë pyetje dhe të shohim se çfarë përgjigjesh do të japë zoti Tillerson.”

Senatori Chris Coons shërben në Komisionin e Senatit për Mardhëniet me Jashtë, që do të shqyrtojë kandidaturën e zotit Tillerson.

“Ka republikanë dhe demokratë që do të bëjnë pyetje në lidhje me konflikte të mundshme interesi të zotit Tillerson, rreth miqësisë së tij të gjatë dhe të ngushtë me Vladimir Putinin dhe Rusinë. Në lidhje me aftësitë e tij për të balancuar kërkesën e të qënit diplomat dhe për të luftuar për interesat e Amerikës, me përvojën e tij të gjatë në drejtimin e një kompanie energjitike.”

John Hudak është me Institutin Brookings.

“Seancat e konfirmimit, të paktën disa prej tyre, do të jenë shumë të ashpra. Si të thuash kjo do të jetë prova e parë e zotit Trump në marrëdhëniet me kongresin.”

Shumica e senatorëve republikanë po shprehin mbështetje mbi përzgjedhjet e zotit Trump. Senatori republikan Mitch McConnell:

“Emërimet deri tani kanë qënë mbresëlënëse. Jam optimtist se ata do të konfirmohen.”

Republikanët kanë një shumicë të vogël në Senat dhe nëse mbeten të bashkuar, ata mund t’i konfirmojnë emërimet e zotit Trump.

“Senatorët e kuptojnë se atyre u duhet të punojnë me presidentin

gjatë viteve të ardhshme. Mënyra më e lehtë për të dëmtuar marrëdhëniet me shefin e partisë tënde është që t’ia vështirësosh konfirminin e të emëruarve të tij”, thotë analisti John Hudak.

Ndërkohë, demokratët do të shfrytëzojnë seancat e konfirmimeve për të bërë pyetje të vështira ndaj të emëruarve me shpresën për të ndikuar tek opinioni publik dhe tek disa republikanë. Në bazë të kushtetutës, senatorët ofrojnë “këshilla dhe japin pëlqimin” për të emëruarit – detyrë që demokratët thonë se e marrin seriozisht.

“Një prej karakteristikave të demokracisë amerikane është ndarja e pushteteve mes ekzekutivit dhe legjislativit”, thotë senatori demokrat Chris Coons.

“Demokratët në senat nuk mund të bëjnë gjë pa mbështetjen e dy apo tre republikanëve”, thotë analisti Hudak.

Aktualisht, zoti Trump po ngre lart të emëruarit e tij, duke e cilësuar zotin Tillerson si “mbështetës të fortë të interesave amerikane në botë”.

Liderët e Shteteve të Bashkuara dhe të Japonisë, që ishin armiq gjatë luftës, e kanë bërë një vizitë të përbashkët prekëse në Pearl Harbor, mbrëmë vonë, duke paraqitur deklarata simbolike për fuqinë e pajtimit dhe kanë tërhequr vërejtjen kundër luftës.

Kryeministri i Japonisë, Shinzo Abe, dhe presidenti amerikan, Barack Obama, kanë bërë një vizitë historike në vendin e sulmit shkatërrues e befasues të Japonisë, që i përfshiu Shtetet e Bashkuara në Luftën e Dytë Botërore.

“Si kryeministër i Japonisë, unë ofroj ngushëllime të sinqerta dhe të përjetshme për ata që i kanë humbur jetët e tyre këtu dhe për shpirtërat e të gjithë atyre burrave dhe grave, që jetët e tyre u morën nga lufta, që filloi në këtë vend”, tha Shinzo Abe.

Ai nuk ka kërkuar falje për sulm por tha se “ne nuk duhet kurrë t’i përsërisim tmerret e luftës”, raporton agjencia AP.

Presidenti amerikan, Barack Obama, e falënderoi mysafirin e tij duke thënë se “ju mirëpres juve këtu në frymën e miqësisë” dhe shtoi se “shpresoj se së bashku ne dërgojmë mesazh në botë se më tepër duhet të fitohet në paqe se në luftë, se pajtimi bartë me vete më tepër përfitime se ndëshkime”.

Senatorët republikanë John McCainn dhe Lindsey Graham po vizitojnë shtetet balltike në përpjekje për të shuar shqetësimin e tyre lidhur me politikat e mbrojtjes që do të zbatojë administrata e presidentit Trump në kuadër të NATO-s. Dy senatorët i kanë bërë thirrje presidentit të zgjedhur amerikan Donald Trump të mbajë një linjë të ashpër ndaj Rusisë nisur nga qëndrimet e saj ndaj Ukrainës.

Senatorët republikanë John McCain dhe Lindsey Graham mbrritën sot në Estoni, vizitë që shihet si përpjekje për t’u dhënë sigurime shteteve baltike, të shqetësuara se presidenti i zgjedhur Donald Trump nuk do të jetë i angazhuar sa duhet në mbrotjen e tyre.

Gjatë fushatës, zoti Trump shkurajoi shumë njerëz në Estoni, Lituani dhe Letoni kur u shpreh se do të shohë kontributet e secilit vend në NATO përpara se të garantojë ndihmë.

Përfshirja e ushtrisë ruse në Ukrainë dhe Gjeorgji ka ushqyer frikën në Baltik se ish padroni i tyre sovjetik, mund të provojë diçka të ngjashme në këto shtete.

Senatorët McCain dhe Graham, që shquhen për një politikë mbrojtjeje agresive, i kanë kërkuar zotit Trump të mbajë një linjë të ashpër ndaj Rusisë, për shkak të asaj që e cilësojnë si “kapje territori” nga ana e Rusisë në Ukrainë.

“Kur shohim gjëra të tilla, si sulme kibernetike, që drejtohen nga Rusia, Kina dhe shtetë të tjera, kur shohim agresionin e vazhdueshëm mbi Krimenë dhe Ukrainën lindore, kur shohim kërcënim të vazhdueshëm mbi Gjeorgjinë, marrëdhënia jonë është ndoshta më e rëndësishme se sa ka qenë më parë”, tha senatori McCain gjatë një konference për shtyp.

“Mënyra më e mirë për të ndalur sjelljen e keqe të Rusisë është të kesh një ushtri të besueshme e të fortë dhe një aleancë të fortë në kuadër të NATO-s, pjesë e rëndësishme e së cilës është edhe Estonia”, shtoi ai.

Dy senatorët bënë thirrje për një panel dy palësh që të hetonte sulmet kibernetike kundër Shteteve të Bashkuara, përfshirë përpjekjet që mendohet se ka bërë Rusia për të ndikuar në zgjedhjet presidenciale amerikane.

“ Nuk ka dyshim që rusët kanë kryer sulm kibernetik. Por ka dyshime nëse kjo ka patur ndikim në rezultatin e zgjedhjeve. Nuk ka asnjë të dhënë deri tani se sulmi kibernetik rus dhe rrjedhja e informacionit, patën një efekt të prekshëm në rezultatin e zgjedhjeve”, tha senatori McCain.

Dy senatorët do të shkojnë të mërkurën në Letoni dhe të enjten në Lituani ku do të takohem me zyrtarë të lartë të këtyre vendeve.

Presidenti i zgjedhur i Shteteve të Bashkuara, Donald Trump, ka vënë në pyetje efikasitetin e Kombeve të Bashkuara, duke thënë se organizata është vetëm një klub për njerëzit që të kalojnë kohë të mirë.

“OKB ka potencial aq të madh, por është bërë vetëm një klub për njerëzit që të mblidhen, të bisedojnë dhe të kalojnë kohë të mirë”, ka shkruar Trump në Twitter.

Komentet vijnë pasi Këshilli i Sigurimit i OKB-së ka votuar javën e kaluar për rezolutën që dënon vendbanimet e Izraelit në Bregun Perëndimor dhe Jerusalemin Lindor.

Administrata Obama ka abstenuar nga votimi i kësaj rezolute, përkundër kërkesave të Trumpit që SHBA të ushtrojë të drejtën e vetos.

Presidenti dhe Zonja e parë e Shteteve të Bashkuara, Barack dhe Michelle Obama, i kanë uruar besimtarët katolikë për festën e Krishlindjeve.

Në fjalimin vjetor me rastin e Krishtlindjeve, të publikuar sot, presidenti Obama tha se për të dhe bashkëshorten e tij Michelle, dhurata më e madhe ishte që “gjatë tetë viteve të fundit kanë shërbyer si president dhe Zonja e parë”.

Mëtutje, zoti Obama, theksoi:

“Derisa ne e presim Vitin e Ri, të lejojmë me vendosmëri ta ripërkushtojmë vetveten për vlerat që ne i ndajmë. Në emër të gjithë familjes sime – me fat Krishtlindjet”, tha Barack Obama.

Ka uruar edhe Michelle Obama:

“Ne ju urojmë juve dhe familjeve tuaja lumturi dhe shëndet në vitin 2017. Faliminderit dhe Zoti nga bekoftë”, tha Michelle Obama.

Në gjithë botën, besimtarët katolikë sonte i shënojnë Krishtlindjet.

Një video e grupit ekstremist, Shteti Islamik (IS), e publikuar mbrëmë nga agjencia e militantëve, Amaq, ku shihet i dyshuari për sulmin në Berlin, Anis Amri, duke shprehur lojalitet ndaj IS-it, është komentuar ashpër nga presidenti i zgjedhur amerikan, Donald Trump.

Zoti Trump, që kishte shprehur përkushtim për “eliminimin” e grupeve terroriste, e ka shfrytëzuar këtë video për të kërkuar nga shoqëritë perëndimore që të përgjigjen “me luftë” kundër ekstremizmit të dhunshëm islamik.

“Terroristët që i kanë vrarë aq shumë njerëz në Gjermani, pak para krimit thanë se – me vullnet të Zotit ne do t’ju vrajmë juve derra”, ka shkruar zoti Trump në rrjetin Twitter, dhe ka shtuar se “ky është kërcënim i pastër fetar, që u shndërrua në realitet”.

“Kaq urrejtje…kur Shtetet e Bashkuara dhe të gjitha vendet do të përgjigjen me luftë?”, pyetet Trump.

Autoritetet thonë se Anis Amri, personi i dyshurar për sulmin në Berlin më 19 dhjetor, nga i cili janë vrarë 12 vetë, është vrarë nga policia italiane.