Pasi u ndalua dhe u mbajt për 90 minuta në aeroportin e Nju Jorkut, një ish-shef policie në SHBA thotë se “ndjehet i cënueshëm dhe i pasigurtë për të ardhmen e një vendi që ishte dikur madhështor”.

Hassan Aden është bërë shtetas amerikan që në moshën 10 vjeçare, dhe është djalë i një nëne italiane dhe një babai somalez. Ai u kthye në SHBA nga Parisi më 13 mars dhe tha se e veçuan ndërsa po kryente procedurat e hyrjes. Një zyrtar i tha se emri i tij ishte i njëjtë me emrin e përdorur nga dikush që figuronte në listën e personave nën vrojtim, dhe se informacioni do të verifikohej nga një agjensi tjetër përpara se të lejohej të hynte në vend.

Zoti Aden përshkroi në Facebook se shikoi të kalojnë të paktën 25 shtetas të huaj që u kontrolloheshin pasaportat për rreth 5 minuta dhe më tej lejoheshin të vazhdonin. Kur ai u ankua për kohëzgjatjen e ndalimit të tij, iu përgjigjën se nuk ishte i ndaluar.

“Ndodhesha në një dhomë pa celularin për të komunikuar me gruan dhe familjen për çfarë po ndodhte; isha i kufizuar në një karrige dhe më kishin mbajtur pasaportën… ndërkohë që kishin guximin të më thonin se nuk isha i ndaluar”, shkruajti zoti Aden.

Ai tha se meqë ka qenë vetë zyrtar i zbatimit të ligjit, e mirëkupton “një ndalim të arsyeshëm për hetim” nëse përmbushen disa kritere. Por, ai ngre pikëpyetje nëse “frika dhe ndalimi” janë misioni i ri i Agjensisë së Patrullimit të Kufirit dhe Doganave (CPB).

Agjencia thotë se ajo nuk komenton për raste individuale.

Eksperiencat e përjetuara në aeroportet amerikane janë vendosur veçanërisht në fokus pasi Presidenti Donald Trump nënshkroi një urdhër ekzekutiv duke ndaluar dhënien e vizave të reja personave nga shtatë vende, si dhe duke pezulluar programin amerikan të pranimin të refugjatëve. Një gjykatë federale i ndaloi qeverisë zbatimin e urdhërit, dhe pasi zoti Trump nënshkroi një urdhër të ri, një tjetër gjykatë e bllokoi edhe atë. Presidenti thotë se këto masa janë të nevojshme për të mbrojtur sigurinë kombëtare.

Urdhëri fillestar shkaktoi konfuzion në aeroporte pasi zyrtarët e kufirit nuk ishin të sigurtë se si t’i zbatonin rregullat, në veçanti për personat që kishin marrë tashmë një vizë. Një numër udhëtarësh u ndaluan, në disa raste duke u mohuar edhe të drejtën e takimit me një avokat.

Gjatë po këtij muaji, Muhammad Ali Jr., i biri i legjendës së boksit Muhammad Ali, njoftoi se ishte ndaluar dhe marrë në pyetje në dy aeroporte të ndryshme.

Në një aeroport në Florida, zoti Ali tha se zyrtarët e patën pyetur vazhdimisht “Nga e ke marrë emrin?” dhe “A je mysliman?”.

Ai u ndalua herën e dytë, vetëm një ditë pasi kishte dëshmuar në Kongres për incidentin e parë.

Turizmi i të huajve në Shtetet e Bashkuara, që mbështet miliona vende pune, është ngadalësuar, ndoshta për arsyen se presidenti Donald Trump kërkoi kufizimet e udhëtimeve nga disa vende me shumicë myslimane. Kërkimet në internet për fluturimet në Shtetet e Bashkuara janë ulur në shumicën e vendeve të mëdha, dhe jo vetëm në ato të goditura nga kufizimet. Disa ekspertë të udhëtimit thonë se përpjekjet e administratës Trump për të kufizuar emigracionin kanë bërë që disa turistë dhe studentë të huaj të tregohen më të matur për të vizituar Shtetet e Bashkuara.

Kufizimi i udhëtimeve shkaktoi protesta, mbulime kritike në media dhe një mori padish ligjore.

Një peticion grumbulloi firmat e mijëra përkrahësve të mësuesit britanik të matematikës, Juhel Miah, i cili u ndalua të hipte në një avion me destinacion Shtetet e Bashkuara ndërsa shoqëronte nxënës britanikë në një ekskursion për në Amerikë. Ai foli përmes Skype-it:

“Mendoj vërtet se u vura në shënjestër. A ndodhi kjo për shkak të emrit tim? A ndodhi për shkak të paraqitjes sime, për shkak të ngjyrës së lëkurës? Nuk e di,”– thotë ai.

Ai është një nga mijëra njerëzit e konfuzuar nga kufizimet e reja dhe mendon se përvoja si ajo e tij mund të sjellin një numër më të vogël turistësh dhe studentësh britanikë, që do të duan të vizitojnë Shtetet e Bashkuara.

“Mësues të tjerë më kanë thënë se, përsa kohë që kjo situatë është e pasigurtë, nuk do të jenë të gatshëm të shoqërojnë nxënësit e tyre në udhëtime në Amerikë”, thotë zoti Miah.

Ekspertë të fluturimeve thonë se shqetësimet rreth mikëpritjes në Shtetet e Bashkuara mund të dëmtojnë ardhjen e vizitorëve nga të gjitha vendet. Këto shqetësime vijnë në një kohë kur dollari i forcuar e bën Amerikën një destinacion më të shtrenjtë për vizitorët e huaj dhe ndërsa vendet e tjera po shtojnë përpjekjet për të tërhequr turistët.

Turizmi është një industri shumë konkurruese, thotë Patricia Rojas-Ungar me Shoqatën Amerikane të Udhëtimeve:

“Udhëtarët kanë një zgjidhje dhe nëse ndjejnë ndonjë shqetësim apo ankth rreth destinacionit ku duan të udhëtojnë, thjesht mund të zgjedhin një vend tjetër. ”

Nëse vizitorët shkojnë diku tjetër, kjo mund të dëmtojë një industri që është e rëndësishme për të gjitha shtetet amerikane.

“Udhëtimi dhe turizmi janë një nxitës i rëndësishëm e ekonomisë amerikane. Është një industri 2.1 trilion dollarëshe, që mbështet 15 milionë vende pune”, thotë Patricia.

Ajo shpreson se administrata Trump do t’i bëjë më të qarta politikat në të ardhmen dhe do të punojë për të siguruar një mikpritje më të ngrohtë për vizitorët.

Ndërkohë, mësuesi britanik Juhel Miah ka marrë inkurajime përmes letrave dhe email-ave nga amerikanë, përfshirë një prej një nxënësi të klasës së pestë në Atlanta. Ai thotë, se përsëri mezi pret t’i vizitojë Shtetet e Bashkuara.

Shërbimi sekret amerikan ka përforcuar përpjekjet e sigurisë pasi një person hyri me makinë deri tek një pikë kontrolli në Shtëpinë e Bardhë të shtunën në mbrëmje dhe tha se kishte një bombë.

Zyrtarët thonë se shoferi u arrestua menjëherë dhe automjeti iu konfiskua.

Një zëdhënës i Shërbimit Sekret tha se është ndërmarrë një “hetim penal”.

Nuk ishte menjëherë e qartë nëse kishte vërtet bombë në makinë.

Presidenti Donald Trump nuk ishte në Shtëpinë e Bardhë. Ai po kalon fundjavën në rezidencën e tij Mar-a-Lago në Florida, fundjava e tij e pestë atje që kur mori detyrën më 20 janar.

Incidenti ndodhi vetëm pak orë pasi Shërbimi Sekret kapi një person që hyri në perimetrin e sigurisë së Shtëpisë së Bardhë.

Sipas njoftimeve, oficerët e Shërbimit Sekret menjëherë e kapën dhe arrestuan personin.

Më 10 mars, një burrë nga Kalifornia përshkoi tre barriera rreth Shtëpisë së Bardhë, dhe ia doli të mos kapej për mbi 15 minuta para se të kapej pranë një dere që çonte në Shtëpinë e Bardhë. Presidenti Trump ishte në Shtëpinë e Bardhë në ato momente.

Megjithë një javë kundërshtimesh nga republikanët në Kongres, Shtëpia e Bardhë ka mbështetur akuzat e Presidentit Trump se ish-Presidenti Barack Obama përgjoi fshehurazi telefonatat e tij në Kullën Trump në Nju Jork. Ky debat e shtoi më tej interesin për seancën e nesërme dëgjimore të Komisionit të Zbulimit të Dhomës së Përfaqësuesve. Seanca do t’i japë për herë të parë mundësinë drejtorit të FBI-së, James Comey, për të folur publikisht rreth këtyre akuzave si dhe për hetimin nga agjensia e tij të konktateve me Rusinë të anëtarëve të fushatës Trump.

Ka shumë pyetje, por jo mjaftueshëm përgjigje, ndërsa Komisioni i Zbulimit i Dhomës së Përfaqësuesve përgatitet të trajtojë publikisht akuzat e Presidentit Trump.

“Ka shqetësim të madh nga pikëpamja e sigurisë kombëtare, që Presidenti të ketë vullnetin ta thotë një gjë të tillë”, u shpreh anëtari i Komisionit, ligjvënësi demokrat Adam Schiff.

Anëtarë të vetë partisë së Presidentit iu bashkuan demokratëve duke thënë se nuk kanë asnjë provë për pretendimet e tij në Twitter.

“Nuk kemi prova se ka ndodhur kjo gjë. Nuk mendoj se është përgjuar realisht Kulla Trump”, tha kryetari i Komisionit të Zbulimit, Devin Nunes.

Krerët e Komisionit të Zbulimit të Dhomës së Përfaqësuesve morën mbështetje dypartiake nga kolegët e tyre në Senat, vetëm një ditë pasi Senatori republikan Lindsey Graham kërkoi përgjigje nga FBI-ja rreth këtyre akuzave.

“Është një kërkesë krejt e thjeshtë – a pati urdhër të lëshuar nga ndonjë gjykatë amerikane për survejimin e fushatës Trump?” u shpreh Senatori Graham.

Ndërsa FBI-ja u premtoi senatorëve një seancë të klasifikuar informuese, drejtori Comey duhet të përballet në publik nesër me këto pyetje të vështira.

“Do ta pyesim nëse ekziston ndonjë provë që mbështet pretendimin e Presidentit. Më shqetëson thellësisht që Presidenti bën një akuzë të tillë pa patur baza, dhe mendoj se është në interesin e publikut që kjo çështje të trajtohet publikisht prej drejtorit të FBI-së”, tha ligjëvënësi demokrat Adam Schiff.

Presidenti u duk sikur dje u distancua nga akuza e tij.

“Nuk thamë asgjë, thjesht cituam një person shumë të talentuar për legjislacionin, që e tha këtë gjë në televizion”, tha Presidenti Trump.

Komisioni i Zbulimit i ka kërkuar FBI-së të paraqesë emrat e shtetasve amerikanë nën përgjim. Nëse emri i zotit Trump apo bashkëpunëtorëve të tij gjenden në atë listë, mund të kuptohet si shenjë se FBI-ja po heton kontaktet ndërmjet fushatës Trump dhe Rusisë.

“Është detyrë e tij të shpjegojë qartësisht natyrën dhe rrethanat e këtyre kontakteve”, mendon Susan Hennessey, nga Instituti Brookings.

Megjithëse në një dëgjesë të vetme nuk mund të trajtohen muaj të tërë pikëpyetjesh rreth ndërhyrjes së Rusisë në zgjedhjet amerikane, dëgjesa mund të shërbejë si një fillim.

“Mendoj se më domethënëse tashmë për popullin amerikan është që të sigurohet se kjo është diçka që Kongresi po e merr seriozisht”, thotë zonja Hennessey.

Pra, pas një jave pikëpyetjesh në Kongres, … ndizet shpresa për disa përgjigje.

Qeveria e Shteteve të Bashkuara ka njoftuar të premten se do ta apelojë vendimin e gjykatës për të bllokuar hyrjen në fuqi të urdhrit të presidentit Donald Trump për ndalimin e përkohshëm të udhëtimit.

Departamenti i Drejtësisë tha se do të apelohet vendimi i Gjykatës së Qarkut të shtetit të Merilendit, i cili nuk lejoi që të hynte në fuqi urdhri i 6 marsit, që ndalon hyrjen udhëtarëve nga 6 shtete me shumicë myslimane.

Vendimi i kësaj jave i gjykatës në Merliend, bër i që një pjesë e urdhrit të Trumpit, që ka të bëjë me ndalimin e hyrjes së refugjatëve për katër muaj, të mbeste në fuqi. Por, Gjykata e Qarkut në Havaji bllokoi që urdhri tërësisht të hynte në fuqi më 16 mars, ashtu siç ishte paraparë.

Urdhri i ri i Trumpit, gjithashtu, po sfidohet nga Gjykata e Qarkut në shtetin e Uashingtonit, por gjykata tha se nuk mund të lëvizë menjëherë për këtë rast, për shkak të “ruajtjes së burimeve” dhe për të shmangur vendimet e dyfishta, pasi gjykata të tjera tashmë kanë lëshuar vendime për këtë çështje.

Gjykata e Uashingtonit ka bllokuar urdhrin origjinal të ndalesës së udhëtimit të lëshuar në janar. Urdhri i ri ndalon hyrjen e vizitorëve nga Irani, Siria, Libia, Sudani, Somalia dhe Jemeni. Këtu është përjashtuar Iraku, shtetasit e të cilit ndaloheshin të udhëtonin për në SHBA, në urdhrin origjinal të Trumpit. Urdhri i ri, nuk prek qytetarët e këtyre vendeve, të cilat kanë dokumente valide dhe viza.

Gjykatësit në Merliend dhe Havaji, që bllokuan urdhrin këtë javë, kanë qenë shumë kritikë ndaj asaj që ata kanë thonë se, pas këtij urdhri, qëndrojnë motive të paligjshme racore dhe fetare.

“Dondal Trump është duke bërë thirrje për ndalimin e tërësishëm të hyrjes së myslimanëve në SHBA”, ka thënë gjykatësi në Havaji, Derrick Watson.

Gjykatësi Theodore Chuand nga Merliendi ka thënë se “historia e deklaratave publike [të Trumpit], vazhdon të ofrojë argumente se qëllimi urdhrit të ri ekzekutiv vazhdon të jetë ndalimi i gjatë i hyrjes ndaj myslimanëve”.

Ai, gjithashtu, ka vënë në pikëpyetje nëse urdhri i Trumpit është i jashtëligjshëm pasi prek njerëzit bazuar në kombësinë e tyre, duke shtuar se asnjë president në të kaluarën nuk ka ndaluar hyrjen e të gjithë qytetarëve të një shteti, e lëre më të 6 shteteve.

Kritikët e urdhrit thonë se ai diskriminon myslimanët dhe është në kundërshtim me Kushtetutën amerikane, sa i përket fesë. Kritikët e këtij urdhri përfshijnë prokurorë të Përgjithshëm të shteteve, organizata që përfaqësojnë refugjatët, Unionin Civil Amerikan dhe Qendrën Kombëtare për Ligj të Emigracionit.

Presidenti Trump thotë se kjo masë është e nevojshme për të mbrojtur vendin nga sulmet terroriste. Ai akuzon gjykatësit që kanë bllokuar urdhrin e tij për “mashtrim të paprecedentë gjyqësor” dhe është zotuar se do të apelojë vendimet deri në Gjykatën Supreme, nëse është e nevojshme.

“Ne do të fitojmë. Ne do të mbajmë qytetarët tanë të sigurt”, u ka thënë Trump mbështetësve të tij gjatë një tubimi më 16 mars. “Rreziku është i qartë. Ligji është i qartë. Nevoja për urdhrin tim ekzekutiv është i qartë”, ka thënë ai.

Zëdhënësi i Shtëpisë së Bardhë, Sean Spicer, ka thënë të premten se qeveria do të apelojë të gjitha vendimet që kanë bllokuar urdhrin, por nuk do të apelojë menjëherë vendimin e gjykatës në Havaji.

Analistët ligjorë kanë thënë se administrata mund të ketë zgjedhur që të apelojë së pari vendimin e gjykatës në Merilend, sepse Gjykata e Apeleve në Riçmond të Virgjinias ka më shumë gjykatës konservatorë sesa gjykatat e apelit në bregun perëndimor të Shteteve të Bashkuara.(REL)

Përgatiti: Mimoza Sadiku

Presidenti i Shteteve të Bashkuara, Donald Trump, fajësoi një gjyqtar të Gjykatës së Qarkut, i cili pezulloi urdhrin e rishikuar të udhëtimit, dhe e akuzoi atë për “humbje të paparë të ekuilibrit gjyqësor”.

Gjykatësi Derrick Watson lëshoi vendimin për bllokimin e urdhrit të mërkurën vonë, vetëm pak orë para se ai të hynte në fuqi. Gjykatësi tha se ka gjasa të mëdha që urdhri të jetë jokushtetues dhe të shkaktojë “dëme të pariparueshme” për shtetin e Havajit dhe qytetarët e tij.

Ka qenë e paraparë që me urdhrin ekzekutiv t’iu ndalohet hyrja përkohësisht në SHBA qytetarëve të gjashtë vendeve më shumicë myslimane. Urdhri është dashur të hyjë në fuqi më 16 mars.

Trump tha se pezullimi i urdhrit, të krijuar për të mbajtur “terroristët jashtë vendit”, e bën Amerikën të dukët e dobët.

Trump u zotua se do ta luftojë vendimin e gjykatësit dhe se do ta dërgojë atë në Gjykatën Supreme, nëse është e nevojshme. “Do ta fitojmë betejën ligjore”, tha ai në një tubiim në shtetin Tenesi.

“Kushtetuta i jep presidentit fuqinë për të pezulluar emigracionin, kur ai vlerëson se është në interesin kombëtar të vendit tonë”, tha Trump.

Urdhri i pezulluar, i nënshkruar më 6 mars, ka qenë rishikim i urdhrit fillestar të Trumpit, të nënshkruar më 27 janar, i cili ka ndaluar vizitorët nga shtatë vende me shumicë myslimane dhe individë me dokumente valide të qëndrimit dhe viza.

Vendet e prekura në urdhrin e rishikuar janë Irani, Siria, Sudani, Somalia, Libia dhe Jemeni, ndërsa është hequr Iraku. Edhe urdhri i rishikuar, edhe urdhri fillestar u kanë ndaluar hyrjen në SHBA të gjithë refugjatëve.

Gjykatësi i Havajit, i cili është emëruar nga ish-presidenti Barack Obama, tha se argumenti se ndalimi shkel Amandamentin e Parë të Kushtetutës për mbrojtje kundër diskriminimit fetar, pritet të ketë sukses në gjykata.

“Vëzhguesi objektiv do të konstatojë se urdhri ekzekutiv është lëshuar me qëllim që të diskreditojë një fe të caktuar”, tha gjykatësi Watson. Ai shtoi se duke sulmuar gjashtë vende të Lindjes së Mesme dhe të Afrikës, sulmohet edhe Islami, sepse popullsia e tyre është myslimane nga 90.7 përqind deri në 99.8 përqind.

Gjykatësi tha se Trump i formëson veprimet e tij mbi me gjuhë fetare dhe përmendi një intevistë të marsit 2016, në të cilën Trump ka thënë: “Mendoj se Islami na urren”.

Vendimi i gjykatësit Watson është i përkohshëm, derisa të dërgohen argumente të tjera më të gjera përpara gjykatës së tij. Urdhri i rishikuar është sfiduar edhe në disa shtete të tjera.

Kryetari i Dhomës së Përfaqësuseve, Paul Ryan, tha se ndalesa është e nevojshme për të përmirësuar verifikimin e njerëzve që hyjnë në SHBA dhe për të parandaluar sulmet terroriste. Ai tha se nuk ka dyshim se ajo do të vërtetohet nga gjykatat më të larta.

Përgatiti: Valona Tela

Drejtuesit kryesorë të Komisionit të Dhomës së Përfaqësuesve për Zbulimin thanë të mërkurën se pretendimi i presidentit Donald Trump se paraardhësi i tij, ish-presidenti Barack Obama, e ka përgjuar në javët para zgjedhjeve të nëntorit është i pabazë.

“Ne nuk kemi ndonjë dëshmi që kjo të ketë ndodhur,” tha kryetari i Komisionit, kongresmeni republikan Devin Nunes. “Nuk mendoj se ka pasur ndonjë përgjim të Kullës Trump,” tha zoti Nunes, duke iu referuar rezidencës së presidentit në Nju Jork.

Numri dy i Komisionit, demokrati Adam Schiff, përsëriti të njëjtën gjë: “Deri sot, nuk shoh asnjë dëshmi, nuk ka kurrfarë baze,” tha ai.

Kongresmenët Nunes dhe Schiff thanë se po presin informacione nga Departamenti i Drejtësisë deri të hënën e ardhshme, për të mësuar nëse agjencia ka dijeni rreth ndonjë përgjimi me urdhër gjykate për zotin Trump. Por ata shtuan se deri tani nuk kishin dijeni për ndonjë përgjim të tillë.

Hetimi nga ana e Kongresit ishte kërkuar nga Shtëpia e Bardhë pas deklaratave të bujshme të bëra në Twitter nga zoti Trump më 4 mars se telefonat e tij ishin përgjuar.

Komisioni i zbulimit po heton gjithashtu rreth lidhjeve të mundshme midis ndihmësve të fushatës Trump dhe zyrtarëve rusë përpara dhe pas zgjedhjeve të nëntorit.

Zoti Nunes tha se drejtori i Byrosë Federale të Hetimeve, James Comey, do të dëshmojë të hënën e ardhshme para komisionit të zbulimit rreth pretendimeve për përgjime si dhe rreth hetimeve të FBI-së mbi ndërhyrjen ruse në zgjedhje për të ndihmuar zotin Trump të fitonte zgjedhjet.

Ndërkohë, një senator i rëndësishëm amerikan, Lindsey Graham i Karolinës së Jugut, thotë se ai është i vendosur t’i shkojë deri në fund çështjes, për të gjetur nëse pretendimi i zotit Trump se atë e kanë përgjuar është i vërtetë.

Zyra e Buxhetit e Kongresit amerikan thotë se 14 milionë njerëz do të humbasin sigurimin shëndetësor në vitin e ardhshëm nëse Kongresi miraton planin republikan për të zëvendësuar ligjin aktual të kujdesit shëndetësor, të njohur si “Obamacare”.

Zyra e Buxhetit në Kongres, një grup ekonomistësh dhe analistësh buxhetorë jopartiakë, të hënën publikoi raportin e saj mbi koston e propozimit të presidentit Donald Trump, të mbështetur në premtimet e fushatës, për të riparuar sistemin shëndetësor të implementuar nga paraardhësi i tij, Barack Obama. Presidenti Trump dhe republikanët e tjerë thonë se sistemi i tanishëm është shumë i shtrenjtë dhe padrejtësisht i detyron njerëzit të blejnë sigurim shëndetësor.

Raporti thotë se në qoftë se plani republikan miratohet, numri i njerëzve të pasiguruar në vitin 2018 do të rritej me 14 milionë, duke e çuar totalin e tyre në 41 milionë. Deri në vitin 2026, ky numër do të arrinte në 52 milionë të pasiguruar, në krahasim me 28 milionë që do të ishin pa sigurime shëndetësore nëse do të mbetej në fuqi sistemi i Presidentit Obama.

Ligji i kujdesit shëndetësor i miratuar në vitin 2010 ishte një nga programet dhe arritjet kryesore të presidentit Obama, dhe mbuloi 20 milionë njerëz të cilët më parë nuk kishin sigurime.

Zyra e Buxhetit tha se plani i ri republikan do të shkurtonte defiçitin federal me 337 miliardë dollarë deri në vitin 2026. Duke bërë një krahasim me këtë vit, Zyra e Buxhetit përllogarit se në vitin 2017, qeveria federale do të shpenzojë 4 trilionë dollarë që do t’i shtojnë 559 miliardë dollarë defiçitit të tanishëm.

Sekretari i Departamentit të Shëndetit, Tom Price kritikoi raportin, duke u thënë gazetarëve para Shtëpisë së Bardhë se Zyra e Kongresit për Buxhetin kishte vlerësuar vetëm një pjesë të planit të ri të republikanëve për kujdesin shëndetësor. Ai tha se është “e pamundur” që plani të lërë 14 milionë njerëz pa sigurim shëndetësor, pasi në bazë të parimeve mbi të cilat është ndërtuar ligji, njerëzit mund të zgjedhin vetë sigurimin e tyre, në vend se qeveria të vendosë për planin e tyre.

Sekretari Price tha gjithashtu se Zyra e Buxhetit nuk ka marrë në konsideratë të gjithë elementët që do të jenë pjesë e planit, duke përfshirë edhe legjislacionin në pritje për reformimin e tregut të sigurimeve.

Raporti i Zyrës së Kongresit për Buxhetin thotë se në vitet e para kostoja e sigurimeve shëndetësore pritet të rritet, para se të bjerë duke filluar në vitin 2020. Sipas raportit, dispozitat e ligjit republikan do të lejojnë kompanitë e sigurimeve të faturojnë të moshuarit pesë herë më shumë se sa të rinjtë, në krahasim me tre herë më shumë që është në ligjin aktual.

Plani i ri do të eliminonte të ashtuquajturin mandat individual, i cili i detyron njërëzit të blejnë sigurim shëndetësor ose të përballen me gjoba ndëshkuese.

“Shumica e reduktimeve të numrit të atyre me sigurime shëndetësore në vitin 2018 dhe 2019 do të jetë pasojë e shfuqizimit të ndëshkimit që lidhet me mandatin individual”, thuhet në raportin e Zyrës së Buxhetit. “Disa nga ata njerëz do të vendosin të mos kenë sigurim, ndërsa aktualisht ata paguajnë për sigurm shëndetësor për të shmangur gjobën. Dhe disa njerëz të tjerë do të heqin dorë nga sigurimet për shkak të kostos së lartë.”

Udhëheqësja e demokratëve në Dhomën e Përfaqësuesve, Nancy Pelosi u bëri thirrje republikanëve që të tërheqin ligjin e tyre të kujdesit shëndetësor, duke thënë se kjo është “e vetmja gjë e mirë që mund të bëhet.” Udhëheqësi i demokratëve në Senat, Chuck Schumer, ka thënë: “Projekt-ligji i administratës Trump do të jetë një kokëçarje e madhe për popullin amerikan.” Ai thotë se ligji i republikanëve është në dobi të shtresës së pasur ndërsa i injoron të tjerët.”

Presidenti Trump ka premtuar se plani i tij shëndetësore do të “të mbulojë të gjithë” dhe do të ofrojë sigurime më të lira për individë dhe grupe të vogla të njerëzve që i blejnë vetë sigurimet në vend se t’i marrin ato përmes punëdhënësve.

Ligjvënësit republikanë duan të ruajnë dy nga klauzolat më të pëlqyera të ligjit Obamacare, t’u ndalojnë kompanive të sigurimit refuzimin e personave për shkak të gjendjes së tyre shëndetësore, dhe do të lejojë të rinjtë deri në moshën 26 vjeç të qëndrojnë në sigurimet shëndetësore të prindërve të tyre.

Administrata e presidentit Trump vazhdon të përballet me trysni për të ofruar prova se ish presidenti Barack Obama ka përgjuar telefonat e kullës Trump gjatë zgjedhjeve të vitit të kaluar. Të hënën ishte afati i fundit për dorëzimin e tyre, por departamenti i Drejtësisë i kërkoi komisionit për çështjet e zbulimit në Kongres më shumë kohë për të mbledhur informacion.

Ishte një akuzë e guximshme ajo e bërë në Twitter nga presidenti Trump ku shkruante “E tmerrshme! Sapo zbulova se Obama ka përgjuar telefonat në kullën Trump pak përpara fitores. Asgjë nuk u gjet!”.

Më shumë se një javë më pas administrata Trump ende nuk ka ofruar ndonjë provë se paraardhësi i tij ka vëzhguar në mënyrë të fshehtë biznesin dhe shtëpinë e tij.

Drejtori i Zbulimit Kombëtar gjatë presidencës Obama tha se nuk ka ndodhur asgjë nga ato çfarë pretendon zoti Trump.

“Nuk ka patur asnjë përgjim të kullës Trump gjatë fushtatës zgjedhore nga asnjë pjesë e komunitetit të zbulimit”, ka deklaruar James Clapper ish Drejtori i Zbulimit Kombëtar.

Por administrata Trump ka vazhduar t’i mbrojë pretendimet pa ofruar asnjë fakt.

“Nuk kam prova, por ndaj ka dhe një hetim në Kongres për këtë”, u shpreh Kellyanne Conwaye, këshilltare në Shtëpinë e Bardhë.

Të hënën, ndërkohë që presidenti trajtonte të tjera çështje, anëtarë të rëndësishëm të administratës së tij, dolën në mbrotje të pretendimeve. Sean Spicer sugjeroi se vëzhgimi mund të mos ketë qenë në mënyrë specifike përgjim i telefonave.

“Ai nuk mendon se presidenti Obama përgjoi personalisht telefonin e tij. Mendoj se nuk ka dyshim që kishte veprimeve vëzhgimi dhe aktivitete të tjera në zgjedhjet e 2016”, deklaroi Sean Spicer zëdhënësi i Shtëpisë së Bardhë.

Akuzat e zotit Trump do të jenë pjesë e hetimeve që komisioni i zbulimit në Kongres do të bëjë lidhur mbi ndikimin e Rusisë në zgjedhjet e vitit 2016. Seancat dëgjimore do të nisin të hënën që vjen.

Presidenti amerikan Donald Trump ka në plan ta pyesë Kancelaren gjermane Angela Merkel rreth eksperiencës së saj me presidentin rus Vladimir Putin, ndësa udhëheqësja gjermane do të vizitojë Shtëpinë e Bardhë këtë javë.

Takimi i parashikuar për të martën është shtyrë për të premten si rezultat i një stuhie bore që fillon mbrëmë në Uashington. Një zyrtar i lartë i administratës tha se presidenti amerikan “do të kishte shumë interes që të mësonte më shumë të dhëna nga Kancelarja gjermane Merkel” ndërsa ai përgatitet të angazhohet me udhëheqësin e Kremlinit.

Kritikët nga të dyja anët e Atlantikut kanë shprehur dyshimet rreth asaj që e shohin si naivitet nga ana e zotit Trump kur flitet për Putinin, kryesisht lidhur me përpjekjen e Kremlinit për të influencuar zgjedhjet presidenciale të vitit të kaluar.

Por katët zyrtarë në një takim me gazetarët në prag të takimit të 17 marsit, argumentuan se presidenti kërkon të tejkalojë dallimet e tij të theksuara me udhëheqësen gjermane dhe të formojë një pozitë të përbashkët të fuqishme për çështjet që nga tregtia, lufta kibernetike e Kremlinit e deri tek pushtimi i disa rajoneve të Ukrainës nga Rusia.

Gjatë fushatës presidenciale, zoti Trump akuzoi zonjën Merkel se po “e shkatërronte Gjermaninë” me politikat e saj për mirëpritëse për një numër të madh refugjatësh.

Kancelarja, e cila njihej për lidhjet e forta me ish-presidentin Barack Obama, ka kritikuar ndalimin e përkohshem të udhëtimit nga presidenti aktual, duke thënë se “nuk ka justifikim për vënien e njerëzve nga një origjinë e caktuar ose besimi fetar nën një dyshim të përgjithshëm.”

Stephen Szabo, drejtor ekzekutiv në “Akademinë Transatlantike” dhe studiues në “Fondin Marshall Gjerman të Shteteve të Bashkuara”, thotë se Merkel po viziton Shtëpinë e Bardhë nën shqetësimet se zoti Trump “mund të tregohet shumë i butë me Rusinë dhe të minojë sanksionet ndaj Moskës që ajo vuri pas ndërhyrjes ruse në Ukrainë”. Gjatë një interviste për Zërin e Amerikës, ai tha se gjëja më e keqe që mund t’i ndodhë solidaritetit perëndimor do të ishte për lojtarin kryesor në Perëndim, Shtetet e Bashkuara, që të lehtësojë sanksionet pa arritjen e përparimeve në Ukrainë. Zëdhënësi i Shtëpisë së Bardhë u përpoq të premten gjatë një konference shtypi që të zbuste këto shqetësime.

Komisioni i Dhomës së Përfaqësuesve për Zbulimin i ka bërë kërkesë presidentit Donald Trump të paraqesë prova deri të hënën se telefonat në Kullën Trump janë përgjuar gjatë fushatës presidenciale.

Presidenti akuzoi në Twitter një javë më parë ish-presidentin Barack Obama se kishte urdhëruar përgjimin e telefonave, por zoti Trump nuk ka ofruar asnjë provë.

Javën e kaluar presidenti shkruajti në Twitter “ E tmerrshme. Mësova se Obama më ka përgjuar në Kullën Trump pak para fitores. Asgjë nuk u gjet”.

Kryetari i Komisionit të Dhomës së Përfaqësuesve për Zbulimin Devin Nunes, një republikan nga Kalifornia, dhe Adam Schiff, demokrat nga Kalifornia, i dërguan një letër zotit Trump duke kërkuar prova për të mbështetur akuzat e tij mbi përgjimin.

Më herët kësaj jave, ligjvënësi Adam Schiff tha në një konferencë për shtyp:

“Presidenti i ka kërkuar komisionit tonë të bëjë hetimin. Dhe unë do të thoja: Zoti President, ne pranojmë. Ne pranojmë dhe do ta kryejmë hetimin. Presidenti ka thënë se ky është një skandal që e bën skandalin e Watergate-it të duket diçka e vogël, se paraardhësi i tij ka urdhëruar përgjim të paligjshëm të fushatës së tij. Ky është një skandal i mundshëm. Alternativa është një tjetër skandal. Është skandali i një presidenti amerikan në detyrë që akuzon paraardhësin e tij se ka vepruar në mënyrë të paskrupullt dhe të paligjshme. Edhe ky do të jetë skandal nëse këto pretendime dalin të jenë të rreme. Dhe ne duhet të jemi në gjendje ta gjejmë përgjigjen në një kohë mjaft të shkurtër nëse kjo akuzë është e vërtetë apo e rreme”.

Një zëdhënës i ish-presidentit Obama ka thënë se akuzat e zotit Trump janë “thjeshtë të rreme”.

Presidenti Trump nuk ka komentuar mbi përgjimet që kur shkruajti në Twitter javën e kaluar.

Sipas ligjit të Shteteve të Bashkuara, një president nuk mund të urdhërojë përgjimin e telefonit të dikujt tjetër. Ai do të duhet të ketë miratim nga një gjykatës federal dhe do të duhet të tregojë baza të arsyeshme se pse duhet të monitorohen telefonatat e një qytetari.

Akuzat e përgjimit ka të ngjarë të trajtohen në hetimin e Senatit mbi ndërhyrjen e dyshuar ruse gjatë zgjedhjeve dhe kontaktet e fushatës Trump me zyrtarët rusë.

Agjencitë amerikane të zbulimit kanë arritur në përfundimin se Rusia kreu sulm kibernetik në kompjuterin e shefit të fushatës Clinton, John Podesta, me grupin WikiLeaks dhe pastaj lëshuan mijëra e-maile të tij në javët para zgjedhjeve. Ajo ishte me sa duket pjesë e një përpjekjeje ruse për të ndihmuar zotin Trump të mundë demokraten Hillary Clinton në zgjedhjet presidenciale.