FBI-ja kishte siguruar vjet autorizim nga gjykata e shërbimeve sekrete për të përgjuar komunikimet e Carter Page, këshilltar për Donald Trumpin që në atë kohë ishte kandidat presidencial, siç thuhet në një artikull të gazetës Washington Post.

Duke cituar në kushte anonimiteti zyrtarë të rendit dhe të agjencive të tjera amerikane, gazeta shkruan se FBI-ja dhe Departamenti i Drejtësisë kishin arritur të merrnin autorizim nga gjykata për shërbimet sekrete pasi kishin bindur gjykatësin se “kishte vend për dyshime” se Page “po vepronte si agjent i një fuqie të huaj, në këtë rast i Rusisë”.

Muajin e kaluar, Drejtori i FBI-së James Comey pohoi se agjencia e tij kishte hapur hetime lidhur me dyshimet se pjesëtarë të fushatës Trump mund të kishin bashkëvepruar në fshehtësi me Rusinë për të ndikuar tek zgjedhjet presidenciale amerikane të 2016. Zyrtarë amerikanë të zbulimit besojnë se Moska ndërhyri për të influencuar tek rezultati në favor të Donald Trumpit.

Page është një ndër bashkëpunëtorët e zotit Trump që, siç njoftohet, ka qenë objekt i këtyre hetimeve. Në hetime janë përfshirë edhe ish-shefi i fushatës për zotin Trump, Paul Manafort, ish-këshilltari i sigurisë kombëtare, Mike Flynn dhe Roger Stone, një mik i vjetër i zotit Trump.

Page, i cili në mars 2016 filloi punë si këshilltar për politikën e jashtme në ekipin e zotit Trump, ka shprehur në të kaluarën lëvdata për Presidentin rus Vladimir Putin dhe ka kritikuar sanksionet amerikane kundër Rusisë. Ai këmbëngul se nuk ka kryer shkelje dhe gjatë muajve të fundit zyrtarë të Shtëpisë së Bardhë janë përpjekur të ulin rëndësinë e rolit që ka luajtur në fushatë.

“Ky fakt vërteton të gjitha dyshimet që kam pasur për përgjime qeveritare të pajustifikuara dhe me synime politike,” tha Page në një deklaratë për Washington Post-in. Ai e krahasoi rastin e vet me atë të udhëheqësit për të drejtat civile Martin Luther King, i cili ka qenë objekt përgjimesh dhe përndjekjesh nga FBI.

Carter Page, i cili më parë ka punuar në një bankë investimesh, nuk është akuzuar për vepër penale. Por, sipas gazetës Washington Post, në mënyrë që të siguronin autorizim nga gjykata, zyrtarët e rendit paraqitën “një deklaratë të gjatë që argumentonte përse autoritetete federale besonin se Page po vepronte në interes të qeverisë ruse dhe se me vullnet të plotë ai ishte angazhuar në aktivitete të fshehta për llogari të Moskës”.

Në deklaratë përmenden kontakte të zotit Page me “një operativ të shërbimeve sekrete ruse në Nju Jork në 2013” si dhe kontakte me “operativë rusë” që nuk ishin bërë të ditura më parë, thuhet në artikullin e gazetës. Sipas njoftimeve të muajit të kaluar, besohet se zoti Page është takuar me ambasadorin rus në SHBA ndërkohë që po zhvillonte punimet Kuvendi i Republikanëve në 2016.

Dokumenti i gjykatës që autorizon përgjimet është ri-aktivizuar më shumë se një herë, njofton gazeta. Po sipas Washington Post-it, Carter Page është “i vetmi amerikan që ka qenë direkt nën përgjim në bazë të urdhërit të gjykatës për shërbimet sekrete, në kuadër të hetimeve mbi ndërhyrjet ruse në procesin zgjedhor gjatë 2016”.

Rusia ka përgënjeshtruar njoftimet se është përpjekur të influencojë rezultatin e zgjedhjeve të 2016. Zyrtarët e administratës Trump këmbëngulin se çdo aludim për bashkëpunim të fshehtë me Moskën është pa baza dhe me motive politike, megjithëse kjo temë vazhdon të tërheqë vëmendjen e medias dhe të hedhë hije mbi administratën e re Trump.

Mjetet e hakerimit të përdorura nga Agjencia Qendrore e Zbulimit (CIA) mund të jenë përdorur në të paktën 40 sulme kibernetike në 16 shtete, sipas kompanisë së sigurisë kompjuterike Symantec.

Kompania “Symantek” thotë se raporti i saj, i publikuar të hënën, është bazuar mbi dokumente të CIA-s të bëra publike nga WikiLeaks muajin e kaluar. Raporti thotë se mjetet e publikuara nga WikiLeaks kishin lidhje me infiltrime elektronike në organizata ndërkombëtare, financiare, energjitike dhe hapësinore në mbarë botën.

Objekt sulmesh kanë qënë kompani, universitete dhe agjenci qeveritare, ku Lindja e Mesme duket se ka qënë objektiv kryesor.

Në raportin e kompanisë Symantec, nuk përmedet “CIA” me emër, por ka pak dyshime se nga kanë ardhur mjetet hakeruese në fjalë. Kur WikiLeaks filloi publikimin e tyre në fillim të marsit, ajo nxori detaje tëpashoqa se si ato ishin nxjerrë nga Qendra e Zbulimit Kibernetik të CIA-s.

CIA ka refuzuar të kometojë lidhur me raportin e firmës Symantec apo mbi autencitetin e dokumenteve të publikuara nga WikiLeaks. Nga ana tjetër, një zëdhënës ka mbrojtur përpjekjet e agjencisë për të grumbulluar të dhëna zbulimi, duke thënë se publiku amerikan duhet të ndihet tejet i shqetësuar nga veprimet e WikiLeaks.

“Diktatorët dhe terroristët nuk kanë aleat më të mirë në botë se Julian Assange, pasi privacia e tyre është e vetmja që ai ruan”, i tha zëdhënësi i CIA-s Jonathan Liu Zërit të Amerikës. Ai përsëriti se CIA e ka të ndaluar të mbledhë të dhëna për shtetasit amerikanë dhe se nuk e bën një gjë të tillë.

Mjetet e CIA-s të përshkruara nga WikiLeaks nuk përfshijnë survejime në masë dhe se të gjithë objektivat ishin subjekte qeveritare ose kishin vlera legjitime për sigurinë kombëtare për arsye të tjera, thotë kompania Symantec.

Në se dokumentet e publikuara nga WikiLeaks do të nxirrnin në pah ndonjë program aktiv zbulimi, kjo do ta vinte sërish në pozitë të vështirë komunitetin amerikan e zbulimit. Fakti që organizata evropiane, thuhet se ishin vënë në shënjestër, po ashtu ngre pikëpyetje të vështira për Shtetet e Bashkuara dhe agjencitë e saj të zbulimit lidhur me vënien në shënjestër të aleatëve.

Presidenti Donald Trump tha se i dha homologut të tij kinez Xi Jinping një ultimatum në takimin e javës së kaluar: nëse zgjidh krizën e Koresë së Veriut, do të përfitojë një marrëveshje të mirë tregtare me SHBA.

Zoti Trump komentoi sot në Tweeter: “I shpjegova Presidentit të Kinës se një marrëveshje tregtare me SHBA do të ishte shumë më me përfitim për ta nëse zgjidhin problemin e Koresë së Veriut!”

Në një koment të dytë në Twitter ai shkruante: “Koreja e Veriut po kërkon vetë telashe. Nëse Kina vendos të ndihmojë, atëherë shumë mirë. Nëse jo, ne do ta zgjidhim problemin pa të! SHBA.”

Presidenti e bëri të qartë se shpreson që Kina t’i bëjë presion fqinjit dhe aleatit të saj të ngushtë që të ndalë programin bërthamor.

Ai vazhdimisht e ka kritikuar Kinën se eksporton më shumë mallra në SHBA sesa importon.

Sekretari amerikan i Shtetit Rex Tillerson thotë se shpreson që Rusia nuk do ta mbështesë më presidentin sirian Bashar al-Assad, pas sulmit vdekjeprurës me armë kimike të javës së kaluar.

“Është e qartë për të gjithë ne që sundimit të familjes së Asadit po i vjen fundi”, tha zoti Tillerson në Itali, ku zhvilloi bisedime me ministrat e jashtëm të Grupit të Shtatëshes.

“Politika jonë është për një Siri të bashkuar, që qeveriset nga vetë populli sirian. Është e qartë për të gjithë ne se sundimit të Asadit po i vjen fundi. Tranzicioni në vetëvete është shumë i rëndësishem, qëndrueshmëria, stabiliteti brenda një Sirie të bashkuar” tha sekretari amerikan i shtetit.

“Rusia është rreshtuar përkrah regjimin të Asadit, Iranit dhe Hesbollahut. A janë këto aleanca që i shërbejnë interesit afatgjatë të Rusisë? Apo Rusia do të preferonte të rreshtohej me Shtetet e Bashkuara dhe me vendet e tjera evropiane si dhe ato të Lindjes së Mesme që kërkojnë zgjidhje për krizën siriane? Ne duam të çlirojmë popullin sirian nga vuatjet, duam të krijojmë një të ardhme të qëndrueshme dhe të sigurtë për Sirinë. Rusia mund të jetë pjesë e kësaj të ardhmeje e të luajë një rol të rëndësishëm ose të vazhdojë të ruajë aleancat e veta me këtë grup që ne besojmë nuk do t’i shërbejë interesit afatgjatë të Rusisë. Por vetëm Rusia mund t’i japë përgjigje kësaj pyetjeje“, u shpreh zoti Tillerson.

Siria ishte fokusi i bisedimeve përpara udhëtimit të sekretarit amerikan të shtetit drejt Moskës, ku pritet të takohet me zyrtarët rusë.

Zoti Tillerson bisedoi me homologët e tij nga Jordania, Katari, Arabia Saudite, Turqia dhe Emiratet e Bashkuara Arabe rreth reagimit të Shteteve të Bashkuara ndaj sulmit sirian me armë kimike të javës së kaluar.

Pas takimit të hënën me zotin Tillerson, sekretari i jashtëm britanik Boris Johnson tha se pas sulmit amerikan me raketa në një bazë ajrore siriane “loja tashmë ka ndryshuar.”

Zoti Johnson tha se aleatët do të diskutojnë mundësinë e vendosjes së sanksioneve të reja ndaj personaliteteve ushtarake siriane si dhe pjesëtarëve të ushtrisë ruse të cilët kanë koordinuar përpjekjet siriane dhe që, sipas zotit Johnson, “janë bërë pjesë e sjelljes së tmerrshme të regjimit të Asadit.”

Presidenti amerikan Donald Trump u ka kërkuar zyrtarëve t’i paraqesin alternativat për të eliminuar kërcënimin bërthamor nga Koreja e Veriut, tha të dielën këshilltari i tij për sigurinë kombëtare, H.R. McMaster. Komentet e zotit McMaster vijnë në një kohë kur Shtetet e Bashkuara janë të shqetësuara nga intensifikimi i provave me raketa balistike të Phenianit.

H.R. McMaster i bëri këto komente në kanalin televiziv Fox News, ndërkohë që aeroplanmbajtësja Carl Vinson u nis drejt Gadishullit Korean. Ai e quajit këtë një vendim “të matur” për të mbrojtur interesat e Shteteve të Bashkuara në Paqësorin perëndimor.

Një zëdhënës i Ministrisë së Mbrojtjes të Koresë së Jugut sot tha se dislokimi i aeroplanmbajtëses USS Carl Vinson dhe disa luftanijeve mbështetëse në rajon ishte në përgjigje të “situatës së rëndë” në gadishullin korean.

“Ne jemi duke vëzhguar me kujdes situatën që të jemi në gatishmëri për t’u përballur me provokimet e Veriut, pasi së shpejti ata do të kenë disa ngjarje politike dhe Pheniani mund të bëjë prova të reja bërthamore ose prova me raketa,” tha Moon Sang-kyun, zëdhënës i Ministrisë së Mbrojtjes së Koresë të Jugut.

Koreja e Veriut po përpiqet të prodhojë një raketë me rreze të gjatë veprimi, me mbushje bërthamore që mund të godas territorin e Shteteve të Bashkuara, një distancë prej rreth 8,000 kilometrash. Pheniani deri më tani ka bërë pesë prova bërthamore dhe mund të jetë duke u përgatitur për provën e gjashtë.

Kohët e fundit Pheniani bëri një provë me raketë balistike, duke shkelur rezolutat e Këshillit të Sigurimit të OKB-së që ndalojnë këto lloje provash.

H.R. McMaster tha se presidenti Trump dhe presidenti kinez Xi Jinping janë pajtuar në takimin e tyre në Florida javën e kaluar se “sjelljet provokuese” të Phenianit dhe përpjekjet e tij për të prodhuar armë bërthamore janë të papranueshme.

Presidenti Trump i ka bërë thirrje Kinës, aleatit kryesor të Koresë së Veriut, që të marrë masa më të forta për të frenuar ambiciet bërthamore të Phenianit.

Një avion ushtarak amerikan iu afrua të dielën mbrëma në distancë tepër të vogël avionit Air Force One me të cilin udhëtonte Presidenti Trump, para se ky të ulej në Bazën Ajrore Andrews në Merilend pranë Uashingtonit.

Avioni presidencial nuk u shmang dhe nuk ka shenja se ishte në ndonjë rrezik. Ai u ul pa probleme në bazën Andrews gjashtë minuta më vonë.

Disa gazetarë, duke përfshirë edhe një korrespondent të Zërit të Amerikës që ndodheshin në bord u bënë dëshmitarë të incidentit. Avioni ushtarak u vu re fillimisht nga një fotograf i Associated Press-it.

Presidenti Trump ishte duke u kthyer nga vendpushimi Mar-a-Lago në Florida, ku u takua me presidentin kinez Xi Jinping. Gjatë qëndrimit në Mar-a-Lago, Presidenti dha gjithashtu urdhër për goditjen me raketa të një aeroporti në Siri, nga i cili u nisën avionët që, sipas zyrtarëve amerikanë, ndërmorën sulmin kundër civilëve me gazin nervor sarin.

Presidenti Donald Trump u ka kërkuar zyrtarëve amerikanë t’i paraqesin opsione për të eliminuar rrezikun që paraqet militarizimi bërthamor i Koresë së Veriut, tha të dielën Këshilltari i Presidentit Trump për Sigurinë Kombëtare, H.R. McMaster.

Ndërkohë që një njësi luftarake e marinës amerikane ishte në lundrim drejt ujërave pranë Gadishullit Korean, zoti McMaster tha për rrjetin Fox News: “Ky është një regjim i papërgjegjshëm që tani ka kapacitete bërthamore. Presidenti na ka kërkuar t’i japim një gamë të plotë opsionesh për të eliminuar kërcënimin ndaj amerikanëve dhe aleatëve e partnerëve tanë në rajon”.

Zoti McMaster e cilësoi “një veprim të mençur” vendimin për të dërguar njësinë luftarake Carl Vinson për të mbrojtur interesat amerikane në Paqësorin Perëndimor.

Korea e Veriut vazhdon përpjekjet për të zhvilluar një raketë me rreze të gjatë veprimi, të aftë të pajiset me mbushje bërthamore, e cila të mund të godasë Shtetet e Bashkuara që ndodhen 8 mijë km larg. Deri tani Pheniani ka kryer pesë prova dhe mund të jetë në përgatitje për provën e gjashtë.

Pa përmendur Korenë e Veriut me emër, Këshilltari McMaster tha “Nëse shkel marrëveshjet ndërkombëtare, nëse nuk përmbush angazhimet që ke marrë, nëse bëhesh kërcënim për të tjerët, do të vijë një pikë kur mund të ndeshesh me një përgjigje”.

Njësia Sulmuese Carl Vinson kishte ankoruar në Singapor dhe më pas ishte nisur drejt Australisë, kur mori urdhër të lundronte drejt veriut.

Synimi i kësaj njësie është të mbrojë interesat amerikane në pjesën perëndimore të Paqësorit, tha një zyrtar i Pentagonit për Zërin e Amerikës.

Njësia sulmuese përfshin një aeroplanmbajtëse dhe tre destrojerë me raketa.

Presidenti Trump nuk ka shprehur një strategji të qartë në përgjigje të politikave koreano-veriore, por ai ka kritikuar qëndrimin e administrative të mëparshme që e ka cilësuar si “durim strategjik” ndaj militarizimit bërthamor që po ndjek Pheniani.

Presidenti Donald Trump ka pranuar një ftesë nga Presidenti i Kinës Xi Jinping për të zhvilluar një vizitë shtetërore në Pekin. Vizita do të zhvillohet këtë vit, por nuk është dhënë një datë e saktë.

Njoftimi u bë në kompleksin e pushimeve Mar-a-Lago në Florida, gjatë një sesioni informimi të tre sekretarëve të kabinetit të zotit Trump dhe u konfirmua nga media shtetërore kineze.

Sekretari i Shtetit Rex Tillerson tha se presidentët Trump dhe Xi kishin diskutuar mbi Korenë e Veriut dhe ishin të një mendjeje se rendja e Phenianit pas armatimit bërthamor është një problem shqetësues. Sekretari Tillerson tha se Shtetet e Bashkuara dhe Kina kanë një angazhim të përbashkët për çarmatosjen bërthamore të Gadishullit Korean dhe se do të bashkëpunojnë më ngusht për këtë synim.

Nuk është e qartë sa u fol gjatë takimit për çështjen e të drejtave të njeriut, një temë që është ngritur në takime të mëparshme mes udhëheqësve të dy vendeve.

Ndërkaq, Shtëpia e Bardhë tha se Presidenti Trump kishte ngritur “shqetësime serioze për ndikimin e politikave industriale, bujqësore, teknologjike dhe kibernetike të Kinës tek tregu i punësimit dhe vëllimi i eksporteve amerikane”.

Presidenti Donald Trump tha se ka shënuar “përparim madhor” me Presidentin e Kinës Xi Jinping në bisedimet e tyre në kompleksin Mar-a-Lago në Florida.

Presidenti Trump bëri komente për gazetarët pas takimit me zotin Xi, ku e përshkroi udhëheqësin kinez dhe përfaqësuesit e tij si “tepër interesantë” në bisedime dhe shprehu shpresën se të dyja palët do të vazhdojnë të shënojnë përparim për zgjidhjen e çështjeve mes dy vendeve.

“Mendoj se marrëdhënia që kemi zhvilluar unë dhe Presidenti Xi është e shkëlqyer. Mirëpresim takime të tjera në të ardhmen dhe besoj se shumë nga problemet shqetësuese do të sheshohen,” tha zoti Trump.

Sipas zyrtarëve, presidentët Trump dhe Xi do të vazhdojnë diskutimet mbi kërcënimin bërthamor nga Korea e Veriut, shkëmbimet tregtare dhe tema të tjera.

Gjatë takimit, zoti Xi bëri një koment në gjuhën kineze, në dialektin mandarin, por nuk kishte në atë moment ndonjë përkthyes aty pranë. Presidenti Trump me shaka, iu përgjigj: “Jam 100% dakord, zoti president, shumë faleminderit”.

Dje, Presidenti Trump dhe anëtarë të administratës së tij e bënë të qartë se shpresojnë t’i kërkojnë Pekinit të bëjë më shumë për t’i ushtruar presion Phenianit për programin bërthamor koreano-verior.

Në komentet për gazetarët që udhëtonin me të në avionin presidencial, zoti Trump tha se deficiti tregtar prej afro 310 miliardë dollarësh me Kinën është një ndër temat parësore në takim. Presidentit Trump i është bërë thirrje të trajtojë gjithashtu shkeljen e të drejtave të njeriut në Kinë.

Zoti Xi mbërriti në Florida dje pasdite. Presidenti Trump i bëri një pritje të ngrohtë homologut kinez, pavarësisht premtimeve të tij të mëparshme për t’u ballafaquar me Kinën për tregtinë dhe çështje financiare.

Kur mbërriti në Mar-a-Lago, Presidenti kinez u prit nga njerëz me banderola, por në rrugët pranë kompleksit ishin rreshtuar edhe protestues që kritikonin gjendjen e të drejtave të njeriut në Kinë. Protestuesit për çështje të ndryshme të Kinës ishin përgatitur mirë.

“Mbërritëm dy ditë më parë. E njohim vendin dhe do të jetë e vështirë me gjithë bllokimet e rrugëve. Por ne duam t’ia bëjmë të qartë shkeljet stafit të Presidentit kinez dhe të bëjmë thirrje për drejtësi”, thotë protestuesi Xianhua Ning.

Ligjvënësi nga Nju Xhersi, Chris Smith, i tha shërbimit në gjuhën kineze të Zërit të Amerikës se Presidenti Trump duhet ta ngrejë çështjen e të drejtave të njeriut me zotin Xi:

“Dimë se do të bisedohet rreth Koresë së Veriut dhe kjo është gjëja e duhur. Korea e Veriut kërcënon ekzistencën e Koresë së Jugut dhe vendeve të tjera në rajon. Por, Presidenti Trump duhet të ngrejë me forcë abuzimin me të drejtat e njeriut, siç nuk u veprua nga administrata Obama. Xi Jinping fatkeqësisht po konkuron me Korenë e Veriut në ushtrimin e torturës ndaj shtetasve të tij, në detyrimin e grave të abortojnë, si dhe në një sërë abuzimesh të tjera që janë krime ndaj njerëzimit.”

Ligjvënësi Smith tha se SHBA-ja është një treg shumë i madh për mallrat kineze, dhe Presidenti Trump mund ta shtrëngojë Pekinin të tregojë progres për të drejtat e njeriut.

Analistët thonë se Presidenti kinez ka ardhur i përgatitur për bisedime të vështira.

“Komuniteti kinez i politikës së jashtme është mobilizuar për ta furnizuar atë me informacion për mënyrat, llojin e çështjeve që mund të ngrejë, se si të nxisë një përqasje bashkëpunuese me zotin Trump. Në veçanti mendoj se kinezët e kanë dërguar këtu zotin Xi me një paketë bujare dhuratash”, thotë Yun Sun, eksperte për Kinën në Qendrën “Stimson”.

Analistja i tha Zërit të Amerikës se Presidentit Trump i duhet financim për përmirësimet në infrastrukturë që u ka premtuar votuesve dhe se kinezët mund të ndihmojnë me investime.

Vendimi i Presidentit Trump për të autorizuar goditjen e një baze ajrore të ushtrisë siriane gjeti mbështetje të gjerë në radhët e anëtarëve të Senatit amerikan nga të dyja partitë, megjithëse pati edhe anëtarë që shprehën shqetësim që presidenti nuk kërkoi autorizim nga Kongresi për një veprim të tillë ushtarak.

Disa nga kundërshtarët më të fortë politikë të presidentit e mbështetën sulmin. Udhëheqësi i pakicës demokrate, Senatori Chuck Schumer tha se goditja amerikane ishte veprimi i duhur pas sulmit shokues të ushtrisë siriane ku mendohet se janë përdorur armë kimike. Udhëheqësja e demokratëve në Dhomën e Përfaqësuesve, Nancy Pelosi e cilësoi si “përgjigjja e duhur”.

Udhëheqësi i shumicës republikane në Senat, Mitch McConnell tha se kjo goditje u dërgon një mesazh të fuqishëm miqve dhe kundërshtarëve të Amerikës.

“Sulmi siguron aleatët suni në vendet arabe se Amerika është aktive, se do të luajë një rol udhëheqës dhe se po përpiqet të jetë konstruktive në disa arena në botë, si dhe u përcjell një mesazh Iranit, Koresë së Veriut, dhe rusëve se Amerika synon të udhëheqë përsëri,” tha Senatori McConnell.

Ligjvënësit kishin mendime të ndryshme për rolin e Kongresit.

Administrata Obama si dhe administrata Trump janë mbështetur në autorizimin që ka dhënë Kongresi pas sulmeve të 11 shtatorit 2001, për të përdorur forcën për të goditur grupe terroriste si ISIS dhe al-Kaida. Por disa ligjvënës ngritën sot argumentin se goditja e trupave qeveritare siriane kërkon një akt të ri nga Kongresi për të autorizuar këto masa.

“Nëse presidenti ka në plan të shkallëzojë angazhimin ushtarak amerikan në Siri, ai duhet të vijë para Kongresit për të marrë Autorizim për Përdorim të Forcës Ushtarake. Kjo është një masë e nevojshme për të parandaluar hapjen e një konflikti të ri në Lindjen e Mesme,” tha udhëheqësja e demokratëve në Dhomën e Përfaqësuesve, Nancy Pelosi.

Republikani Rand Paul kritikoi sulmin në Siri, duke thënë se ndërhyrje të mëparshme amerikane në konflikte në Lindjen e Mesme “nuk kanë bërë asgjë për ta bërë Amerikën më të sigurtë”. Presidenti duhet të marrë autorizim nga Kongresi për veprime të tilla ushtarake. Këtë e kërkon Kushtetuta, tha Senatori Paul.

Zyrtarët amerikanë thanë se SHBA goditën me 50 raketa tomahok objekte të qeverisë siriane si kundërpërgjigje ndaj sulmit me armë kimike në Siri që la dhjetra të vrarë dhe qindra të plagosur.

Presidenti amerikan Donald Trump mbajti mbrëmë një fjalim të shkurtër përpara mediave në Florida, ku njoftoi se kishte dhënë urdhër për goditje ushtarake kundër një baze ajrore në Siri, nga e cila ishin ndërmarrë sulme me armë kimike. Ai tha se nuk ka diskutim që Siria përdori armë kimike, duke shkelur marrëveshjet ndërkombëtare.

Presidenti tha se “është në interesin jetik kombëtar të SHBA të parandalojnë dhe të frenojnë përhapjen dhe përdorimin e armëve kimike vdekjeprurëse.”

Bashar al-Assadi, tha zoti Trump, u mori jetën njerëzve të pashpresë.

Presidenti Trump tha se u bënte thirrje vendeve të qytetëruara të bashkoheshin në përpjekjet për të ndalur gjakderdhjen në Siri dhe për t’i dhënë fund grupit Shteti Islamik.

Sulmet amerikane u ndërmorën nga dy destrojerë të Marinës amerikane në Mesdheun lindor.

Kjo është goditja e parë e drejtpërdrejtë që SHBA ndërmarrin kundër qeverisë së Assadit që nga fillimi i luftës civile në Siri gjashtë vjet më parë.

Raketat goditën bazën ajore Shayrat dhe kishin si objektiv avionët luftarakë sirianë dhe objekte të infrastrukturës në këtë bazë. Sulmet u ndërmorën rreth orës 8:45 sipas kohës së Uashingtonit.

Sipas mediave që citonin një zyrtar të lartë ushtarak amerikan, përpara lëshimit të raketave tomahok Pentagoni kishte njoftuar zyrtarët ushtarakë rusë përmes kanaleve ekzistuese të çtensionimit.

Është e paqartë nëse sulmet kundër objektivave të Assadit do të vazhdojnë.

Përgatitjet në Pentagon

Një zyrtar i lartë ushtarak i SHBA tha të enjten se Pentagoni kishte paraqitur alternativa për një goditje në Siri, pas sulmit me armë kimike ku u vranë rreth 100 civilë dhe për të cilin është fajësuar presidenti Bashar al-Asad.

Zyrtari i tha Zërit të Amerikës se në Pentagon ishin zhvilluar takime me shefat e shtatmadhorisë lidhur me atë që ai e quajti synim verbal të Presidentit Donald Trump për të ndërmarrë veprime në Siri.

Gjatë rrugës në avion për në Florida për takimin me presidentin kinez Xi Jinping, Presidenti Trump u tha gazetarëve se ajo që ndodhi në Siri ishte “një turp për njerëzimin,” dhe se me Asadin në komandë … diçka duhet të ndodhë.”

“Ajo që bëri Assadi është e tmerrshme. Unë mendoj se ajo që ndodhi në Siri është një nga krimet me të vërtetë skandaloze; kjo nuk duhet të kishte ndodhur dhe nuk duhet të lejohet të ndodhë,” tha ai.

Zoti Trump shtoi se “në një moment të caktuar” ai mund të flasë për Sirinë me aleatin e saj më të madh ushtarak, presidentin rus Vladimir Putin.

Sekretari i Shtetit Rex Tillerson flet në konferencën e shtypit të enjten në Palm Beach, Florida. Ai tha se Assadi nuk ka rol në qeverisje në të ardhmen e Sirisë.

Tillerson: Assadi duhet të largohet

Dje, Sekretari amerikan i Shtetit Rex Tillerson bëri thirrje për rrëzimin e presidentit sirian Bashar al-Asad, për shkak të sulmit me armë kimike.

“Procesi me të cilin Assadi do të largohej nga pushteti është diçka që kërkon një përpjekje të komunitetit ndërkombëtar, për të mundur së pari ISIS-in në Siri, për të stabilizuar vendin e për të shmangur luftën e mëtejshme civile, dhe më pas për të punuar së bashku me partnerët tanë kudo në botë përmes një procesi politik që do të çonte në largimin e Assadit,” u tha gazetarëve në Florida zoti Tillerson.

Duke sinjalizuar një ndryshim të papritur në politikën amerikane për të ardhmen e Assadit, zoti Tillerson tha se “Assadi nuk do të ketë asnjë rol në qeverisjen e popullit sirian.”

Komentet e zotit Tillerson ishin në kontrast me ato të bëra në Shtëpinë e Bardhë javën e kaluar nga zëdhënësi Sean Spicer, i cili tha se administrata e Presidentit Donald Trump po largohej nga qëndrimi i ish-presidentit Barak Obama, i cili kishte bërë thirrje për rrëzimin e Asadit.

“Ka një realitet politik që ne duhet ta pranojmë nga aspekti i gjendjes ku jemi tani”, tha zoti Spicer të premten e kaluar. “Ne kemi humbur shumë raste gjatë administratës së fundit, në lidhje me Asadin,” shtoi ai. Edhe zoti Tillerson kishte komentuar, se fati i Assadit duhej të vendosej nga populli sirian. Komentet u kuptuan si një sinjal se Uashingtoni nuk e shihte si përparësi të lartë heqjen e Assadit nga pushteti.

“Ne po shqyrtojmë përgjigjen e duhur” për sulmin kimik në Siri, tha të enjten zoti Tillerson. Shtetet e Bashkuara, tha ai, janë konsultuar me vendet e tjera për të përcaktuar mënyrën më të mirë për t’u kundërpërgjigjur. “Kjo është një çështje serioze, që kërkon një përgjigje serioze,” tha Sekretari i Shtetit.

SHBA hedhin poshtën pretendimin rus dhe sirian

Diplomati i lartë amerikan tha se sulmi i së martës “na ka tronditur të gjithëve. … Nuk ka asnjë dyshim në mendjet tona, dhe informacioni që kemi e mbështet këtë, se Siria, regjimi sirian nën Asadin, është përgjegjës për këtë sulm. Dhe, unë mendoj, se është shumë e rëndësishme që qeveria ruse të rishikojë me kujdes mbështetjen e saj të vazhdueshme për regjimin e Asadit.”

Zyrtarët ushtarakë amerikanë thanë se ishin avionët luftarakë sirianë që sulmuan me bomba kimike qytetin e mbajtur nga kryengritësit.

“Njerëzit në terren u panë duke reaguar ndaj një agjenti nervor dhe ndërtesa e goditur ishte pa mëdyshje një spital”, tha një zyrtar ushtarak amerikan për Zërin e Amerikës.

Zyrtari tha se sulmi u krye nga avionë sirianë me krahë fiksë dhe hodhi poshtë pretendimet ruse dhe siriane se objektivi i goditur ishte një depo e kryengritësve për grumbullimin e armëve kimike.

This photo provided by the Syrian anti-government activist group Edlib Media Center, which has been authenticated based on its contents and other AP reporting, shows a Syrian man carries a child following a suspected chemical attack, at a makeshift hospital, in Khan Sheikhoun town, northern Idlib province, Syria. The suspected chemical attack killed dozens of people on Tuesday, Syrian opposition activists said, describing the attack as among the worst in the country’s six-year civil war. (Edlib Media Center, via AP)

4 prill, 2017. Foto e bërë nga një aktivist anti-qeveritar.

Syrian woman Aya Fadl, lies on a bed, with an oxygen mask to heal breathing difficulties following a suspected chemical attack on her town of Khan Sheikhoun, in the northern province of Idlib, Syria, Wednesday, April 5, 2017. Aya had ran from her house, with her 20-months old baby, and husband, thinking she could find safety from the toxic gas engulfing her town. Instead, on the street, she was confronted face to face by the horror of it. A pick-up truck piled with the bodies of the dead, including some of her own relatives. In all, she lost more than a dozen family members in the suspected chemical attack, including a twin babies. The death toll from a suspected chemical attack on a northern Syrian town rose to 72 on Wednesday as activists and rescue workers found more terrified survivors hiding in shelters near the site of the harrowing assault, one of the deadliest in Syria’s civil war. (AP Photo/Courtesy of Aya Fadl)

Viktimë e sulmit: Aya Fadl me maskë oksigjeni pas sulmit. Aya u largua nga shtëpia me nxitim bashkë me fëmijën dhe burrin, duke menduar se do të shpëtonte. Por kur doli në rrugë ajo u përball me gazin helmues.

Kremlini tha se presidenti rus Vladimir Putin, në një telefonatë me kryeministrin izraelit Benjamin Netanyahu, “theksoi se është e papranueshme të bësh akuza të pabaza pa një hetim ndërkombëtar të paanshëm”. Por një zëdhënës i zotit Putin tha gjithashtu se mbështetja ruse për Assadin nuk është e pakushtëzuar.

Britania, Franca dhe SHBA e dënuan me forcë Rusinë të mërkurën gjatë një sesioni të ngutshëm të Këshillit të Sigurimit të mërkurën.

Presidenti Donald Trump tha se sulmi me armë kimike në Siri ishte “një fyerje për njerëzimin”. Ai i bëri komentet ndërsa ulej për bisedime në Shtëpinë e Bardhë me mbretin e Jordanisë Abdullah.

I pyetur nga gazetarët nëse SHBA do të ndërmerrnin veprime, ai tha: “Këtë do ta shihni”, pa dhënë hollësi të tjera.

Një ditë më parë zoti Trump bëri një deklaratë me shkrim ku e denonconte sulmin si “akt i dënueshëm”, që “nuk mund të injorohej nga bota e qytetëruar.”

Në një konferencë të përbashkët shtypi me Mbretin Abdullah, zoti Trump tha se qëndrimi i tij rreth Presidentit të Sirisë Bashar al-Assad dhe Sirisë ka “ndryshuar shumë.”

Ai përsëriti akuzat se administrata Obama bëri një “kërcënim bosh” për qeverinë e Asadit, kur tha se përdorimi i armëve kimike do të rezultonte në pasoja.

Presidenti Trump tha se “nuk ishte një nga ditët tona më të mira për ne si vend”, kur administrata e mëparshme dështoi të vepronte.

Ai pohoi se tani “këtë përgjegjësi e kam unë” dhe se “unë do ta kryejë atë me krenari.”

Takimi me Mbretin Abdullah në Uashington

Axhenda e takimit në Shtëpinë e Bardhë me mbretin Abdullah përfshinte, veç sulmit me armë kimike në Siri edhe diskutime për mundësinë e rigjallërimit të bisedimeve izraelito-palestineze të paqes.

Monarku jordanez dhe presidenti i ri amerikan patën një takim të shkurtër gjatë mëngjesit të lutjes në Uashington në muajin shkurt, por bisedimet e sotme mes tyre pritet të jenë më thelbësore. Përveç diskutimeve private, dy udhëheqësit do të kenë një konferencë të përbashkët shtypi dhe një drekë pune.

Mbreti i Jordanisë, i cili luan rolin e një emisari të botës arabe, sjell mesazhin e një interesimi të ri për një marrëveshje paqeje me Izraelin, që do të përfshinte njohjen e shtetit hebre nga vendet arabe dhe myslimane, në shkëmbim të krijimit të një shteti të ri palestinez në Bregun Perëndimor, Gazë dhe Jeruzalemin Lindor.

Në një takim të nivelit të lartë javën e kaluar, udhëheqësit arabë ripërtërinë ofertën që i kishin bërë fillimisht Izraelit në vitin 2002, por Izraeli ka refuzuar të tërhiqet nga vendet e pushtuara në Luftën gjashtëditore të vitit 1967.

Presidenti Donald Trump hoqi nga Këshilli i Sigurisë Kombëtare strategun e tij kryesor politik, Stephen Bannon.

Me këtë hap ai anulon një vendim të mëparshëm që kishte shkaktuar zemërimin e ekspertëve të politikës së jashtme në Uashington.

Disa ligjvënës dhe zyrtarë të tjerë me përvojë në vendimmarrjet e politikës së jashtme amerikane, kishin thënë se ishte e papërshtatshme që të prishej tradita e kryeqytetit, duke emëruar zotin Bannon në Këshillin e Sigurisë Kombëtare, ku diskutohen çështjet më të mprehta të sigurisë së vendit.

Para se t’i bashkohej fushatës së zotit Trump vitin e kaluar, Bannon ishte themelues i portalit të ekstremit të djathtë Breitbart News.

Vendimi i Presidentit Trump gjithashtu rikthen dy zyrtarë të tjerë të rëndësishëm në grupin kryesor të udhëheqjes së Këshillit të Sigurimit – Drejtorin e Zbulimit Kombëtar Dan Coats dhe kryetarin e shefave të përbashkët, gjeneralin e Korpusit të Marinës, Joseph Dunford.

Këshilltarit të sigurisë kombëtare, gjeneralit H.R. McMaster, iu dha përgjegjësia për caktimin e rendit të ditës të mbledhjeve të Këshillit.

Presidenti amerikan Donald Trump po lë të kuptohet se Susan Rice, këshilltarja për sigurinë kombëtare e paraardhësit të tij, Barack Obama, kishte përgjuar bisedat e këshilltarëve të zotit Trump me shtetas të huaj vitin e kaluar dhe kishte kërkuar të zbulonte identitetet e tyre për përfitime politike, një akuzë që zonja Rice tha sot se ishte “absolutisht e rreme”.

Në një intervistë me televizionin MSNBC, zonja Rice tha se pretendimi i para një muaji se presidenti Obama kishte urdhëruar përgjimin e tij, nuk ishte i vërtetë. Akuza e tij është hedhur poshtë edhe nga ligjvënësit amerikanë dhe zyrtarët e zbulimit.

Por zoti Trump në një sërë postimesh në Twitter dy ditët e fundit, ka cituar njoftime mediash, sipas së cilave zonja Rice kishte “urdhëruar përgjimin e zotit Trump”.

Zonja Rice tha se në postin e saj në Shtëpinë e Bardhë, ajo shqyrtonte raporte zbulimi çdo ditë. Ajo shtoi se nuk ishte e pazakontë për të që t’u kërkonte zyrtarëve të zbulimit t’i tregonin emrin e individëve amerikanë që rezultonin nga përgjimet rutinë se kishin folur me agjentë të huaj.

Ajo tha se ky informacion u jepej më pas Sekretarëve të Shtetit dhe të Mbrojtjes dhe Drejtorit të Zbulimit Kombëtar, në kuadër të punës së tyre për mbrojtjen e sigurisë kombëtare.

Zonja Rice tha se asnjë nga informacionet nuk ishte përdorur në ndonjë kontekst politik kundër fushatës së zotit Trump në garën e tij për Shtëpinë e Bardhë vitin e kaluar.

Ajo e hodhi poshtë një njoftim në media, sipas së cilit ajo kishte hartuar një listë emrash të zyrtarëve të fushatës së zotit Trump, që mendohet se ishin regjistruar nga përgjimet.

Zonja Rice tha se nuk ekzistonte asnjë gjë e tillë, por se ishte “e mundur” që disa këshilltarë të zotit Trump mund të ishin përgjuar si pjesë e “një grumbullimi të rastësishëm” të të dhënave.

Presidenti i Shteteve të Bashkuara, Donald Trump, tha se nëse Kina nuk do ta zgjidhë problemin e Koresë së Veriut, SHBA do ta bëjë.

“Kina ka ndikim të madh mbi Korenë e Veriut”, i tha Trump gazetës britanike Financial Times. “Nëse Kina nuk na ndihmon, nuk do të jetë mirë për askënd”, shtoi ai.

I pyetur nëse mendon se mund të ketë sukses vetëm, Trump tha “plotësisht”.

Trump, të enjten, do të presë në Florida presidentin e Kinës, Xi Jinping.

Samiti i tyre dyditor padyshim se do të përqendrohet në Korenë e Veriut dhe programin e saj bërthamor. Kërcënimet dhe sanksionet kanë dështuar të pengojnë përpjekjet e Phenjanit për t’u bërë fuqi e armatosur bërthamore.

Ekspertët amerikanë paralajmërojnë se Koreja e Veriut po planifikon provën e gjashtë bërthamore.

Zëvendësja e këshilltarit të Trumpit për siguri kombëtare, K.T. McFarland, i tha po ashtu gazetës Financial Times se është e mundshme që Koreja e Veriut të ketë kapacitet për të goditur SHBA-në me raketë bërthamore deri në fund të administratës Trump, më 2021.

Duke folur për televizionin ABC, ambasadorja e SHBA-së në Kombet e Bashkuara, Nikki Haley, tha se është koha që Kina “të ndalojë së bëri justifikime, duke thënë se edhe ajo është e shqetësuar”.

“Duhet të na tregojë se sa e shqetësuar është. Duhet t’i bëjë presion Koresë së Veriut. Vendi i vetëm që mund të ndalojë Korenë e Veriut është Kina”, tha Haley.

Kina, e cila është aleatja e vetme ndërkombëtare e Koresë së Veriut, ka ndërmarrë disa veprime pas testeve të fundit bërthamore që ka bërë Phenjani.

Në muajin shkurt, ajo ka ndaluar të gjitha importet nga Koreja e Veriut, deri në fund të vitit 2017, duke i prerë Phenjanit një burim të madh të të ardhurave.

Trump pritet t’i bëjë presion homologut kinez që të bëjë edhe më shumë se kaq dhe la të kuptohet se çështja e tregtisë mund të jetë njëri nga mjetet.

Trump i tha gazetës Financial Times se “tregtia është stimul. E gjitha ka të bëjë me tregtinë”.

Analistët thonë se Kina e ka ruajtur mbështetjen për Phenjanin, pasi duran se rënia e regjimit verikorean mund të çojë në bashkimin e Koreve, ku ushtarët amerikanë do të ishin të pozicionuar në një vend me kufi tokësor me Kinën.

Mendohet se Kina është e shqetësuar edhe për mundësinë që miliona refugjatë verikoreanë të kalojnë kufijtë e saj.

Përgatiti: Valona Tela

Procesi gjyqësor kundër Donald Trumpit për nxitje dhune kundër protestuesve do të vazhdojë, pasi një gjykatës federal doli me vendimin se argumenti i zotit Trump për të drejtën e lirisë së fjalës nuk qëndron në këtë rast.

Gjykatësi federal David Hale në Luisville të Kentakut mundëson hapjen e procesit gjyqësor pas padisë së tre protestuesve ndaj zotit Trump, fushatës së tij presidenciale dhe tre përkrahësve të tij.

Akuzuesit thonë se u bënë objekt dhune fizike nga përkrahësit e zotit Trump, në një tubim në mars 2016 në Luisville, pasi zoti Trump kishte nxitur turmën me fjalët “Nxirrini jashtë”.

Avokatët e zotit Trump kanë ngritur argumentin se komentet e tij mbrohen nën amendamentin për lirinë e fjalës dhe se ish-kandidati presidencial nuk po i nxiste përkrahësit të përdornin forcë, por gjykatësi tha se komentet e zotit Trump ishin një udhëzim i qartë për protestuesit.