VOAL

Rajon

Podgoricë- protesta anti-NATO me thirrjet “Kosova është zemra e Serbisë”, “Nuk e japim Kosovën”

Në Podgoricë është zhvilluar një protestë nga Fronti Demokratik kundër anëtarësimit të Malit të Zi në NATO. Tubimi ka nisur para Kuvendit të Malit të Zi, prej ku protestuesit janë nisur të qetë deri tek monumenti i Shën Pjetrit.

Portali “Vijesti” i Malit të Zi ka raportuar se protestuesit kanë ndezur dhjetë pishtarë dhe kanë thirrur “Nuk e japim Kosovën” dhe “Kosova është zemra e Serbisë”. Në tubim ndërkaq nuk është parë askund flamuri i Malit të Zi, por është parë një pllakat me mbishkrimin “NATO është organizatë satanike”, transmeton Koha.net.

Një pjesë e të tubuarve kanë kënduar edhe “Himnin e heronjve të Kosovës”, këngë patriotike serbe.

“TV Vijesti” ka thënë se sipas organizatorit, në tubim kanë marrë pjesë rreth 5 mijë protestues, ndërsa vet gazetari ka thënë se nuk kanë qenë mbi 1.500.

Organizatorët, veç banerit që e shpallnin NATO-n organizatë satanike, kanë thirrur edhe “Rusia, Rusia”, “Putin, Putin”…

Si pasojë e protestës, raportohet se janë shtuar forcat e sigurisë para Ambasadës Amerikane në Podgoricë, sikurse që edhe para Ambasadës së Shqipërisë që janë duke qëndruar së paku shtatë policë të armatosur.

Podgoricë, nesër protestë kundër hyrjes së Malit të Zi në NATO

Protestën në fjalë e organizon partia Demokracia e Re Serbe, një nga anëtarët e Frontit Demokratik, që kundërshton hyrjen e Malit të Zi në NATO

PODGORICË – Në Podgoricë nesër do të mbahet protesta kundër NATO-s, dhjetë ditë pasi që Mali i Zi zyrtarisht mori ftesën për të qenë anëtarë me të drejta të plota i Aleancës.

Protestën në fjalë e organizon partia Demokracia e Re Serbe, një nga anëtarët e Frontit Demokratik, që kundërshton hyrjen e Malit të Zi në NATO. Përveç Demokracisë së Re Serbe, në tubimin e planifikuar pritet të marrin pjesë edhe disa lëvizje të tjera.

“Konstatojmë se ky është çasti ku është mjaft e rëndësishme që të gjithë ata që kundërshtojnë anëtarësimin e Malit të Zi në NATO të jenë të bashkuar në ofrimin e rezistencës të një qëllimi të rrezikshëm, i cili kryetarit të Partisë Demokratike të Socialistëve, Millo Gjukanoviçit, i shërben vetëm për të zgjeruar pushtetin e pakontrolluar. Kryetari i PDS-së dhe promotorët e NATO-s duan që vendimi për këtë çështje të rëndësishme të merret pa konsultimin e qytetarëve, dhe ne nuk e pranojmë këtë”, kanë thënë nga Demokracia e Re Serbe.

Nga kjo parti është porositur se “vendimin duhet të marrin qytetarët në një referendumin të drejtë dhe të ndershëm, sepse çdo gjë tjetër mund të ketë pasoja të mëdha për Malin e Zi”.

Është planifikuar që protesta të fillojë në orën 18:00 para Kuvendit të Malit të Zi, pas së cilës është planifikuar shëtitja deri në monumentin e Shën Pjetrit të Cetinjës. aa

Republikanët serbë e njohin Kosovën

BEOGRAD – Për herë të parë po ndodh një takim mes dy partive politike të dy shteteve fqinje, Kosovës dhe Serbisë. Partia Republikane e Kosovës, ka pranuar ftesën e Partisë Republikane të Serbisë, që të jetë e ftuar e një takimi të përbashkët në mes të këtyre dy subjekteve politike, që po mbahet në Beograd.

Vizita e drejtuesve të Partisë Republikane të Kosovës në Beograd – Faton Kurti, kryetar dhe Selver Xhelili, nënkryetar – për të cilën janë njoftuar edhe institucionet relevante ndërkombëtare, po ndodhë me kusht që Republikanët e Serbisë, së pari ta njohin publikisht shtetin e Kosovës, pastaj, me ardhjen e republikanëve serbë në pushtet, Serbia dhe Kosova të bashkëpunojnë si dy shtete fqinje të pavarura, raporton rajonipress.

Partia Republikane e Serbisë, udhëhiqet nga Nikolla Sandullovic, mbi të cilin ishin bërë dy atentate në Serbi për shkak të kundërshtimit të politikave radikale serbe. Kjo parti, faktikisht e pranon realitetin e ri në Kosovë – Pavarësinë e Kosovës, duke kërkuar nga shteti serb dhe qeveria e Serbisë që ta njohë shtetin e Kosovës, dhe të njëjtën kohë, t’i kërkojë falje publike popullit të Kosovës për atë që bëri Serbia gjatë luftës së fundit në Kosovë dhe të normalizojë raportet si dy shtete fqinje dhe të pavarura.

Udhëheqësit e Partisë Republikane të Kosovës, Faton Kurti dhe Selver Xhelili, nën masa të sigurisë nga Partia Republikane e Serbisë, arritën në Beograd.

Në fjalën e tij, kryetari Kurti, ka thënë se, Partia Republikane e Kosovës, do të bashkëpunojë me Partinë Republikane të Serbisë, të Shqipërisë, si shtete fqinje, dhe të gjitha partitë si motra të vendeve tjera në rajon e më gjerë, duke i harmonizuar planet e përbashkëta, në interes të shteteve tona të pavarura, sovrane e demokratike dhe qytetarëve tanë.

Ndërkaq, nënkryetari i PRK, Selver Xhelili, në paraqitjen e tij sot në Beograd, kërkoi nga drejtuesit e Partisë Republikane të Serbisë, që të insistojnë për zbulimin sa më të shpejt të të pagjeturve të luftës.

“Duhet që Serbia të jetë fqinj i mirë, ta pranojë fajësinë dhe të ecim bashkë me popujt e përparuar të vendeve tjera demokratike, drejt Evropës”, ka thënë ndër të tjera Xhelili, i cili në vazhdim, ka kërkuar nga shteti serb, avancimin e të drejtave të shqiptarëve të Luginës së Preshevës, të barabarta me serbët e Republikës së Kosovës.

“Duhet të thuhet realiteti i ri, këtu në Beograd se, me ardhjen e republikaneve në pushtet, përmes projekteve tona të përbashkëta në interes të qytetarëve tanë, në Ballkan do të ketë stabilitet për gjithë rajonin”, ka theksuar Xhelili.

Ndërkaq, kryetari i republikaneve të Serbisë Nikolla Sandullovic, si mikpritës i këtij takimi, ka përsëritur se Partia Republikane e Serbisë e njeh Kosovën shtet të pavarur e demokratik, si shtet fqinj.

“Me ardhjen tonë në pushtet, do t`i kërkojmë falje popullit shqiptar të Kosovës, për atë që bëri Serbia mbi popullin e pafajshëm shqiptar, duke hapur kështu rrugët e bashkëpunimit si dy shtete fqinje. Ne, republikanët do t’i japim të drejta të barabarta shqiptarëve që jetojnë në Serbi, ashtu siç i kanë serbët në Kosovë”, ka spikatur ndër të tjera ai, duke shpreh edhe kundërshtimin kundër gjithë këtyre “kriminelëve”, siç është shpreh ai, që sollën Serbinë në këtë izolim, thuhet në njoftimin e delegacionit të PRK-së, transmeton rajonipress.

Republika Serbe ndërpret bashkëpunimin me institucionet e Bosnjës

Qeveria e RS-së ka kërkuar mbajtjen e një seancë të posaçme të Asamblesë Kombëtare të RS në të cilën do të diskutohen këto konkluzione

BANJALUKË – Qeveria e Republikës Serbe në seancën e sotme të jashtëzakonshme ka vendosur që Qeveria e RS-së dhe të gjitha institucionet e këti entiteti të BeH-së, të ndërpresin bashkëpunimin me Prokurorinë, Gjykatën dhe SIPA-n (Agjencia Shtetërore për Hetime dhe Siguri) e BeH-së, tha Dragan Lukaç, ministri i Brendshëm i RS.

Përveç kësaj qeveria e RS urdhëroi MPB-në e RS-së të ndaloj çdo hyrje dhe bastisje të institucioneve lokale dhe shtetërore të institucioneve të RS.

Në seancën e sotme të Qeverisë së RS është informuar për sjelljen e anëtarëve të SIPA në Novi Grad, kontrollit të ndërtesës së policisë, ndërtesën e administratës komunale dhe kompanitë e shërbimeve komunale në Novi Grad.

“Veprimi i pjestarëve të SIPA-s me kërkesë të Prokurorisë së BeH-së me urdhër të gjykatës së BeH-së përbën një shkelje të rëndë të bashkëpunimit ndërpolicorë, sepse me të njëjtin vihet në pikë-pyetje besimi në MPB, e cila deri më tani ka bashkëpunuar gjithmonë me agjencitë e sigurisë, Gjykatën dhe Zyrën e Prokurorisë së BeH-së”, tha Ministri i Brendshëm Lukaç.

Ai duke lexuar konkluzionet e seancës së jashtëzakonshme të qeverisë së RS tha se “Gjykata ka shprehur mosbesim të madh duke deklaruar se ekziston shqetësimi se objektet e hetimit mund të jenë shkatërruar ose fshehur edhe pse ata kishin mundur të bënin kërkesë që MPB e RS t’ju siguroj dokumentacionin në lidhje me këtë temë ose të dërgonin inspektorët e tyre për të inspektuar dokumentet”.

“Qeveria e RS thotë se sjellja e institucioneve kushtetuese të Gjykatës, Prokurorisë dhe SIPA është në kundërshtim me Kushtetutën e BeH-së dhe Kushtetutën e RS”, tha Lukaç.

Qeveria e RS-së ka kërkuar mbajtjen e një seancë të posaçme të Asamblesë Kombëtare të RS në të cilën do të diskutohen këto konkluzione.

Me urdhër të Prokurorisë së BeH-së në Novi Grad është zbatuar deri më tani operacioni më i gjërë për ndjekjen penale të krimeve të luftës në këtë rajon, kundër boshnjakëve në vitin 1992.

Janë arrestuar pesë të dyshuar, dhe janë kryer bastisje në katër lokacione. Është bastisur edhe ndërtesa e MPB-së, e cila po ruhet dhe kontrollohet nga SIPA. Siç u tha nga Prokuroria, nga liria janë privuar pesë të dyshuar: Ljuban Babiç (1962), Ranko Balaban (1959), Rajko Kralica (1968), Mirko Odzhiç (1960) dhe Milenko Brçin (1963).

Ata janë nën hetime dhe dyshohet se kanë kryer veprën penale të krimeve kundër njerëzimit. Aktivitetet po kryehen në kuadrër të lëndës në të cilën Prokuroria e Shtetit po kryen hetime për krimet e luftës të kryera në këtë rajon.

Shqiptarët dhe pluralizmi në Mal të Zi, 1990-2015 – Nga NAIL DRAGA*

Pikërisht ne ditën sotme 25 vjet më parë me 9 dhjetor 1990 janë mbajtur zgjedhjet e para pluraliste në Mal të Zi. Ishin këto zgjedhjet e para ku qytetarët për të parën herë zgjodhen në mënyrë të drejtpërdrejt përfaqësuesit e tyre përmes votës së lirë si përfaqësues të subjekteve të ndryshme politike.

Zgjedhjet u mbajten ne të dy nivelet ate lokal dhe qendror ku më pas u be konstituimi i kuvendeve përkatëse, duke zgjedhur përfaqësuesit e tyre në organet ekzekutive.

Ne këto zgjedhje morën pjesë edhe shqiptarët në Mal të Zi, duke u bërë pjesë e mozaikut pluralist. Por, para se të mbahën këto zgjedhje shqiptarët varësisht prej rrethanave shoqërore ne sistemin monist, hezituan ne formimin e subjektit të tyre politik. Tubimi i parë pluralist te shqiptarët u mbajt në Ulqin me 26 gusht 1990, në sallën e madhe të Komunës së Ulqinit, duke themeluar Forumin Demokratik të Shqiptarëve në Mal të Zi.Ishte ky një moment dhe ngjarje e veçantë për shqiptarët sepse për të parën herë morën guxim dhe formuan një subjekt jopartiak për të parën herë jasht strukturave të pushtetit të kohës.Po ashtu atë ditë një grup qytetarësh pjesëmarres ne këtë takim me pas ne një shtëpi private në Kodra(Ulqin) themeluan këshillin inicues për themelimin e subjektit politik te Shqiptarëve në Mal të Zi. Ndërsa ditë më pas pikërisht me 9 shtator 1990 në Tuz u mbajt kuvendi themelues i këti subjekti politik me emrin Lidhja Demokratike në Mal të Zi, qe ishte subjekti i parë politik i shqiptarëve në Mal të Zi.

Dhe është pikërisht ky subjekt politik qe u votu në mënyrë plebishitare nga shqiptarët në zgjedhjet e 9 dhjetorit 1990 në të gjitha vendvotimet në viset shqiptare në Mal të Zi. Kështu në zgjedhjet parlamentare shqiptarët në koalicion me partinë e boshnjakëve(SDA) nga gjithsej 11 deputet, fituan 4 deputetë, ndërsa në Ulqin fituan pushtetin me shumicë absolute. Po ashtu fituan këshilltarë ne komunat tjera ku shqiptarët janë popullsi e konsiderueshme.Me pas janë formuar edhe subjekte të tjera politike të shqiptarëve duke vendosur pluralizmin politik brenda komunitetit të shqiptarëve në Mal të Zi. Janë pikërisht këto subjekte politike (UDSH, PPD, FORCA, BDSH, IQ, ASH, PD etj.) qe kanë marrë pjesë në zgjedhjet e tjera lokale e parlamentare në këto 25 vite në mënyrë të vetme apo ne koalicione.Ndërsa themelimi i shumë subjekteve politike në një popullsi numërikisht të vogëkl dëshmon qasjen karerieriste dhe atavizmin politik te disa individeve qe është në kundërshtim me interesat e shqiptarëve ne këtë mjedis.

Varësisht prej rezultateve të arritura disa subjekte politike ende janë në skenën politike ndërsa disa janë tkurrur e madje larguar nga skena politike.

Por, me të drejt bëhet pyetja si qendron gjendja me realizimin e të drejtave nacionale e qytetare të shqiptarëve në Mal të Zi ne këto 25 vite të pluralizmit.Pra kemi të bëjmë me një periudhë kohore të mjaftueshme për analiza shumëdimensionale.

Janë pikërisht këto çështje të cilat do të trajtohen ne ketë tryezë të rrumbullakët nga pjesëmarrësit. Eshtë përshtypje e përgjithshme se nëse përjashtojmë disa ndryshime kozmetike, statusi i shqiptarëve pothuaj ka mbetur ne statuskuo, e në disa aspekte është nën nivelin e kohës së monizmit.Duke analizuar këtë periudhë kohore del qartë se pjesëtarët e popullit shqiptarë në Mal të Zi janë duke u rrudhosur territorialisht e po ashtu duke u zvogluar numërikisht.

Emigrimi i shqiptarëve nga Mali i Zi nuk është më dukuri por fenomn shqetësues qe nuk ka te ndalur, ku nuk do të kaloj shumë kohë ku shqiptarë nga Mali i Zi me shumë do te ketë në botën e jashtme se sa në viset tona autoktone.

Andaj çështje parësore për të gjithë ne duhet te jetë mbijetesa jonë në hapësirën etnogjegrafike shqiptare tash e në të ardhmen, si qytetarë të barabartë me identitet duke kriuar kushte optimale për jetë e jo politizimi i raporteve shoqërore për interesa personale, partiake e klanore.

Përvoja e deritashme është e mjaftueshme për të kuptuar se punët tona nuk na i kryejnë të tjerët, andaj nevoitet angazhim konkret me kuadra profesionale dhe të guximshëm për të avancuar çështjet të cilat janë preokupuese për shqiptarët në këtë mjedis. Nuk ka dilemë se koha prej 25 vitesh është e mjaftueshme për të parë si ishim, si jemi dhe si duhet të jemi, ne raport me vetën dhe me të tjerët.

Gjatë kësaj periudhe 25 vjeçare shqiptarët kanë dhënë kontribut ne demokratizimin e skenës politike në Mal të Zi. Madje shqiptarët ishin vendimtar me votën e tyre në pavarësinë e Malit të Zi me 21 maj 2006, por ky kontribut ende nuk është shpërblyer në avancimin e pozitës se tyre ne ketë mjedis.

Andaj, ju të pranishëm qe do të merrni pjesë me diskutime ne lidhje me temen bosht të kësaj tryeze te rrumbullakët pres qe te jeni kontribues të çështjeve qe do të trajtoni. Ndërsa botimi i tyre materialeve ne një botim të veçantë do të jetë dëshmi autentike e një periudhe kohore të cilën e kemi përjetuar të gjithë, qe flet ne mënyrë transparente ne lidhje me pozitën dhe statusin e shqiptarëve ne një mjedis multinacional dhe multikulturor sikurse është Mali i Zi.

Dr.Nail Draga

(Fjala përshëndetëse në Tryezën e rrumbullakët, mbajtur në Ulqin me 9.12.2015)

Turqi, ndërtohet taraca më e lartë prej xhami, priten ta vizitojnë 100 mijë turistë në vit

Taraca me hapësirë prej 50 metrash katrorë është e vendosur në shkëmbin Sikildim, e cila ofron pamje spektakolare të luginës së Parkut Kombëtar Hatila

ANKARA – Në Turqi është ndërtuar taraca më e madhe prej xhami, në shkëmbinjtë e rajonit Sikildim të Artvinit në verilindje të vendit, kurse pas hapjes vitin e ardhshëm pritet që çdo vit panoramën spektakolare nga taraca ta shijonë rreth 100 mijë turistë.

Terraca në kanjonin e Parkut Kombëtar Hatila është ndërtuar nga Drejtoria e Mbrojtjes së Mjedisit dhe Parqeve Kombëtare, e cila vepron nën ombrellën e Ministrisë turke të Pyjeve dhe Administrimit të Ujërave.

Ministri përkatës turk, Vejsel Eroglu njoftoi se taraca për vizitorët do të hapet në fillim të vitit të ardhshëm dhe se do të sjellë një impuls shtesë të rëndësishëm për zhvillimin e turizmit në këtë rajon.

Taraca me hapësirë prej 50 metrash katrorë është e vendosur në shkëmbin Sikildim, e cila ofron pamje spektakolare të luginës së Parkut Kombëtar Hatila përmes së cilës rrjedh lumi i vogël me të njëjtin emër.

Ajo është e vendosur në një lartësi mbidetare prej 490 metrash dhe 220 metra mbi lumin Hatila.

“Vet ardhja në terracë, të montuar në shkëmb shkakton shpërthim të adrenalinës që është karakteristikë e sporteve ekstreme. Presim që pas hapjes së terracës, Parkun Kombëtar të vizitojnë 100 mijë turistë në vit. Ne do të vazhdojmë të investojmë në bukuritë natyrore të vendit tonë. Duhet të ruajmë vendet e tilla, pa ndotjen e mjedisit, dhe kjo do të sjellë më shumë të ardhura nga turizmi”, tha Eroglu. aa

Mali i Zi: Nuk duam të kemi kurrfarë mospajtimesh me Kosovën

Ndërtesa e qeverisë së Malit të Zi në Podgoricë

Qeveria e Malit të Zi thotë se me Marrëveshjen për demarkacionin kufitar ndërmjet Kosovës dhe Malit të Zi janë “zyrtarizuar kufijtë administrativë në harmoni me Kushtetutën e ish-Jugosllavisë të vitit 1974”.

Mëtutje, zyra për marrëdhënie me publikun e qeverisë në Podgoricë thekson se “nëse ekziston dyshimi se kjo nuk është punuar kështu dhe se është bërë gabim, jemi të gatshëm që këtë ta shqyrtojmë, sepse nuk dëshirojmë çfarëdo mospajtimesh me fqinjët, duke pasur parasysh intersat shtetërore dhe kombëtare të Malit të Zi”.

Mëtutje në njoftimin për media theksohet se kryeministri i Malit të Zi, Millo Gjukanoviç, këtë porosi ia ka transmetuar kryeministrit të Kosovës, Isa Mustafa, dhe zyrtarëve të tjerë të Kosovës.

Personalitetet e Ballkanit që mund të ndryshojnë Europën

Nga Marian Chiriac, BIRN

Një avokate, një politikane e re dhe një shpikës nga Ballkani janë përfshirë në listën e disa prej personaliteteve më me ndikim në Bashkimin Europian.

Disa nga njerëzit që mund t’i japin Europës tjetër formë sipas Politico.

Një avokate rumune, një politikane bullgare dhe një shkencëtar kroat janë listuar si tre nga 28 njerëzit nga shtetet e BE-së që po “formësojnë, tronditin dhe trazojnë Europën” në një artikull të publikuar nga uebsajti Politico të mërkurën.

Rumania përfaqësohet në listë nga Laura Codruta Kovesi, një grua që po drejton betejën e vendit kundër korrupsionit.

Kovesi, 42 vjeçe, është kreu i Drejtorisë Kombëtare Anti-Korrupsion, DNA, që u krijua në vitin 2006 për të luftuar korrupsionin te funksionarët e lartë kur Rumania po përgatitej t’i bashkohej BE-së.

Një avokate e qetë dhe shumë punëtore, Kovesi po drejton një agjenci që ka hetuar me sukses vetëm vitin e shkuar 24 kryebashkiakë, pesë deputetë, dy ish-ministra dhe një ish-kryeministër.

DNA aktualisht po heton anëtarë të ndryshëm të parlamentit, por edhe ish-kryeministrin Ponta dhe kryebashkiakun e Bukureshtit Oprescu.

Bullgaria u përfaqësua nga deputetja më e re në Partinë Popullore Europiane, grupi më i madh në Parlamentin Europian.

“Si një anëtare e komitetit të Parlamentit, Paunova… po e nxit Europën që të bëhet më mbështetëse për sipërmarrjet e reja dhe udhëzime për të krijuar një mjedis ku të rinjtë të mund të fillojnë biznese, veçanërisht në botën dixhitale,” thotë Politico.

Në Bullgari, ajo ka ndihmuar fillimin e programeve edukative përfshirë një skemë për të lidhur të rinjtë me punëdhënësit.

“Vij nga një vend që ka thënë shumë por ka bërë pak,” raporton Politico të ketë thënë Paunova.

Kroacia prezantohet në Politico me një shkencëtar, Mate Rimac, i moshës 27 vjeç.

Rimac është ndoshta një nga të rinjtë shpikës më të njohur në Kroaci, i cili ka tashmë patentat e veta në fushën e elektronikave që nga mosha 18-vjeçare.

Ai ka shpikur motorë për makina elektronike dhe ka formuar kompaninë e tij në vitin 2009.

Tani ka 150 të punësuar dhe vlen rreth 70 milionë euro, ku ka prodhuar tetë supermakina elektrike që vlejnë nga 900.000 euro secila.

Politico tha se i ka zgjedhur njerëzit e kësaj liste në bazë të potencialit të tyre për të ndikuar në vitet e ardhshme.

“Ata që gjenden në listën tonë kanë aftësinë të formësojnë ndikimin e tyre në një vend, në një aktivitet, në një sistem ligjor, në referendum, fe, krizë apo madje mund të ndikojnë edhe në vetë thelbin e identitetit europian,” tha Politico./ reporter.al

Bosnja arreston një ish-komandant mysliman

Sakib Mahmuljin, 2005

Policia në Bosnje ka arrestuar një ish-komandant të ushtrisë myslimane, nën akuzat se nuk ka arritur të parandalojë krimet e kryera nga luftëtarët e huaj islamikë kundër ushtarëve serbë të Bosnjës, të zënë robër gjatë luftës së viteve 1992-1995.

Sakib Mahmuljin, 63 vjeç, është arrestuar me urdhër të prokurorit të shtetit për krime lufte.

“I dyshuari është nën hetime sepse ka vepruar në kundërshtim me të drejtën ndërkombëtare humanitare dhe Konventat e Gjenevës, derisa ka shërbyer si komandant i Korpusit të Tretë të Ushtrisë së Bosnjës”, thuhet në deklaratën e Zyrës së Prokurorit.

Shumë luftëtarë islamikë, ose “muxhahedinë”, kanë shkuar nga Afrika Veriore dhe Lindja e Mesme për të ndihmuar myslimanët e Bosnjës të luftojnë kundër serbëve dhe kroatëve gjatë luftës.

Mbi 100,000 veta janë vrarë gjatë luftës në Bosnje.

Ambasadorja e SHBA vizitoi Ulqinin

Ali Salaj

Ambasadorja e SHBA në Mal të Zi, Margaret Ann Uyehara zhvilloi të martën një vizitë në Ulqin.

Ajo vizitoi Kriporen e Ulqinit dhe Ullishten e Valdanosit, të cilat shihen si dy nga burimet më të njohura të këtij qyteti, për të vazhduar me vizitën në Xhaminë e Krythës pastaj në Qytetin e Vjetër të Shasit dhe në zyrën e përbashkët të Biznes Klubit Ana e Malit me Diasporën shqiptare në SHBA.

Kryetari i Komunës së Ulqinit, Fatmir Gjeka, e njohu ambasadoren me aktivitetet e pushtetit vendor por edhe me atë që ai e quajti “krizë të këtij pushteti” si pasojë e mosmarrëveshjeve në koalicionin qeverisës të forcave politike shqiptare.

Në zyrën e përbashkët me Diasporën shqiptare, kryetari i Biznes Klubit, Kabil Kurti e njohu ambasadorenme format e bashkëpunimit dhe të organizimit.

Ambasadorja Uyehara foli për mundësitë më të mëdha të bashkëpunimit dhe të investimeve nga diaspora dhe bëri thirrje për lehtësimin e procedurave për investitorët e mundshëm.

Soufan Group: Nga Ballkani, janë 875 luftëtarë të huaj

Militantë në Alep të Sirisë, foto arkivi

Në qershor të vitit 2014, Grupi Soufan [TSG] pati publikuar një raport mbi luftëtarët e huaj në Siri, i cili kishte identifikuar rreth 12,000 luftëtarë të huaj nga 81 vende. Sot, 18 muaj më vonë, në raportin e fundit të këtij grupi thuhet se numri i luftëtarëve të huaj, të cilët i janë bashkuar grupit militant Shteti Islamikdhe grupeve tjera salafiste në Siri dhe Irak, sillet nga 27,000 deri në 31,000 dhe vijnë nga 86 vende të ndryshme botërore.

Prej tyre, 875 thuhet se vijnë nga shtetet e Ballkanit; rreth 800 prej tyre nga Bosnja e Hercegovina, Kosova, Shqipëria dhe Maqedonia.

Në Kosovë, TSG vlerëson se të dhënat zyrtare numrin e vënë në 232 aktualisht, në Shqipëri 90, në Bosnjë e Hercegovinë 330 dhe në Maqedoni 146.

“Në qershor të vitit 2014, ka pasur relativisht pak informacion për numrin e militantëve të cilët kanë udhëtuar nga Ballkani për në Siri, duke e bërë të vështirë përcaktimin e rritjes proporcionale të luftëtarëve nga ky rajon”.

“Megjithatë, bazuar në të dhënat aktuale, duket se numri i luftëtarëve të huaj nga vendet e Ballkanit është dyfishuar, në mos trefishuar, që nga qershori i vitit 2014”, thuhet mes tjerash në raportin e Grupit Soufan.

Nga vendet e Evropës Perëndimore thuhet se numri i lufëtarëve të huaj në Siri dhe Irak arrin në 5,000, nga ish republikat sovjetike 4,700, nga Amerika veriore 280, nga Maghrebi 8,000, nga Lindja e Mesme 8,240 dhe nga Azia juglindore 900.

Grupi Soufan është një institut hulumtimesh, i cili ofron shërbime mbi strategjitë e sigurisë për qeveri të ndryshme në botë dhe organizata shumëkombëshe.

Gjashtë fëmijë afganë u fundosën afër bregdetit turk

Pamje e refugjatëve duke lundruar në det

Nga Stambolli i Turqisë raportohet se 6 fëmijë afganë, përfshirë një foshnje 6 muajshe, kanë humbur jetën, pasi anija me refugjatë u fundos sot herët në mëngjes në Detin Egje, afër bregdetit perëndimor të Turqisë.

Autoritetet thanë se tetë vetë, që ishin në anije, janë shpëtuar afër qytetit Izmir, përfshirë edhe një djalosh 12 vjeçar.

Më se 500 mijë refugjatë, shumica prej tyre nga Siria, Afganistani dhe Pakistani, udhëtojnë nëpër Turqi dhe e rrezikojnë jetën e tyre duke lundruar me anije të vogla dhe jopërkatëse gjatë vitit 2015, për të arritur në ishujt e Greqisë, që është ndalja e parë në Bashkimin Evropian, para se të vazhdojnë për në vendet më të pasura të BE-së, në veri dhe perëndim.

Më 29 nëntor, Turqia e ka nënshkruar një marrëveshje me BE-në, duke shprehur përkushtim për të ndihmuar në ndaljen e fluksit të migrantëve në Evropë, në këmbim për ndihmë financiare në vlerë prej 3 miliardë dollarësh për t’i mbajtur refugjatët.

Paraqitet aktakuza në “rastin Kumanova”

Kumanovë, 11 maj 2015

Në Shkup, prokurori që ka ndërmarrë atë që njihet si “rasti i Kumanovës” ka paraqitur të hënën aktakuzën para Këshillit të Gjyqtarëve, i cili duhet të marrë vendim nëse aktakuza ka bazë për t’u proceduar në seancë gjyqësore.

Në rastin e Kumanovës është i përshirë një grup nga Kosova, i cili gjatë 9 dhe 10 majit të këtij viti, në Lagjen e Trimave në Kumanovë, u përlesh me forcat e policisë së Maqedonisë. Përleshjet përfunduan me vrasjen e 8 policëve dhe 10 pjesëtarëve të grupit të armatosur.

Në bankën e të akuzuarve ishin ulur 29 persona, të dyshuar për veprën “terrorizëm dhe pjesëmarrje për 28 orë në luftime në lagjen e Trimave në Kumanovë”.

Pala mbrojtëse akuzat i ka cilësuar si të pabaza, kurse të akuzuarit kanë deklaruar se janë të pafajshëm..

Seanca pritet të vazhdojë të hënën e ardhshme.

Gani Krasniqi, familjar i Muhamed Krasniqit, të njohur si komandant Malisheva, i cili është pjesë e grupit të akuzuar për rastin e Kumanovës, shprehet i indinjuar me vendimin që familjrarëve të mos u lejohet pjesëmarrja në seancën gjyqësore.

“Asnjë përgjigje nuk na jipet nga organet e Maqedonisë, na e kanë vendosur këtu policinë për të mos na lejuar, e shihni gjithandej. Ne këtu kemi ardhur për të parë të afërmit tanë, për të realizuar një të drejtë që na takon, po askush nuk jep përgjigje. Presim këtu, gra, fëmijë, pleq…”, thotë zoti Krasniqi.

Indinjatë për vendimin e autoriteteve që të mos lejojë kontaktin me të akuzuarit, e ka shprehur edhe prof.dr.Skender Kodra, neuro psikiatër, i cili thotë se lejen për ta ndjekur nga afër procesin si palë e pavarur e ka marrë edhe nga misioni i OSBE-së dhe Organizatës së Kombeve të bashkuara.

“Nuk më është lejuar të kem kontakt me të paraburgosurit, edhe pse kam autorizim nga OKB dhe OSBE, ta ndjek këtë proces”, thotë zoti Kodra.

Veç familjarëve për të marrë pjesë në seancën gjyqësore nga ana e policisë është penguar edhe ambasadori i Kosovës në Maqedoni, Ylber Hysa.

Muhamed Shehu nga Juniku, familjar i të akuzuarit Demë Shehu, vlerëson se rasti i Kumanovës paraqet një proces të montuar politik, “për qëllime të politikës ditore në favor të qeverisë së Maqedonisë”.

“Shteti i Maqedonisë udhëhiqet nga shërbimet sekrete informative në njërën anë, edhe pse thonë se kanë pas njohuri për veprimin e grupit të armatosur dhe në anën tjetër nuk kanë ndërmarrë masa preventive, por në formë brutale, përkatësisht më 9 maj të këtij viti sulmohet një lagje shqiptare, me qëllim të likuidimit të këtij grupi dhe fshihen të gjitha dëshmitë dhe video incizimet për realitetin e kësaj ngjarjeje”, thotë zoti Shehu.

Më 4 nëntor 2015, Prokuroria Publike e Maqedonisë kishte ngritur akuzë për terrorizëm kundër 29 personave, lidhur me luftimet në Lagjen e Trimave në Kumanovë, më 9 dhe 10 maj.

“Në bazë të dëshmive të deritanishme nga hetimet e kryera lidhur me ngjarjet në Kumanovë, prokurori publik kompetent ka paraqitur padi kundër 29 personave pranë prokurorisë publik të Shkupit”.

“Të akuzuarit akuzohet për vepra penale “organizata terroriste” në bazë të nenit 394-a dhe “terrorizëm” në bazë të nenit 396-b të ligjit penal”, thuhej në njoftimin e prokurorisë.

Tensionime në Bosfor, turqit kërcënojnë se do t’i godasin luftanijet ruse

Vazhdojnë shkëndijat mes Ankarasë dhe Moskës.

Pamjet e një anije luftarake të armatosur dhe me lëshuesit e predhave në pozicion qitje ka tërbuar turqit.

Anija duket sikur është në gjendje lufte teksa kalon ngushticën e Bosforit.

Ministri i Jashtëm turk Cavusoglu e ka cilësuar si provokim nga pala ruse.

Ai tha se vendi i tij do të përgjigjet në rast të shkëndijës më të vogël.

Televizonet vendase kanë transmetuar pamje të anijes ku shihej edhe një ushtar me kundërtank në krah.

Sipas mediave turke anija “Caesar Kurnikov” ajo ka kaluar dje në Bosfor dhe ka kaluar vetëm për të provokuar turqit.

Pas takimit të pak ditëve më parë me homologun rus Lavrov, Cavusoglu u duk optimist për rihapjen e dialogut mes dy vendeve, por lëvizja e fundit e rusëve duket se ka rikthyer tensionin e lartë që ekziston prej ditësh mes Rusisë dhe Turqisë.

Nobelisti Aziz Sancar: E sëmura sot është Rusia, populli rus ta shpëtojë veten nga Putini

“Periudha e 1880, periudha e carit ka kaluar. Tashmë njeriu i sëmurë nuk është Turqia, por Rusia. Të gjitha çmenduritë e bëra dëmtojnë edhe Rusinë edhe Turqinë. Uroj që populli rus ti vendosë gishtin kokës dhe të bëjë ndonjë gjë rreth Putinit”

STOKHOLM – Shkencëtari turk, Prof. Dr. Aziz Sancar, i cili është nderuar me çmimin Nobel në Kimi nga Akademia Shkencore të Mbretërisë së Suedisë u shpreh se “Sikur ta dija që populli turk do të gëzohej kaq shumë këtë çmim, e kisha marrë 20 vite më parë”.

Prof. Dr. Sancar pas pjesëmarrjes në një seminar të Akademisë Shkencore të Mbretërisë së Suedisë iu është përgjigjur pyetjeve të gazetarit të AA-së. Ai duke vënë në dukje se është i lumtur që ka fituar këtë çmim u shpreh se ka dëshirën që edhe të rinjtë turq të fitojnë çmime Nobel në fushat e shkencës.

“Po ta dija se që populli turk do të gëzohej kaq shumë këtë çmim e kisha marrë 20 vite më parë. Shpresoj që ky të jetë një shembull për të rinjtë turq. Dëshiroj shumë që edhe të rinjtë turq të fitojnë çmime Nobel në fushat e shkencës dhe gjithashtu i dërgoj urimet e përzemërta për popullin turk dhe vëllezërit e mi. Ajo që më bën të mendoj më shumë për popullim tim janë zënkat politike në Turqi. Shpresoj që të lënë mënjanë këto zënka dhe të zhvillojnë atdheun tonë” ka pohuar Sancar.

Aziz Sancar duke kritikuar qëndrimin e Rusisë pas rrëzimit të avionit rus që shkeli hapësirën ajrore turke ka deklaruar se: “Allahu e udhëzoftë në një mendje të shëndoshë Putinin (Presidentin rus Vladimir Putin). Periudha e 1880, periudha e carit ka kaluar. Tashmë njeriu i sëmurë nuk është Turqia, por Rusia. Të gjitha çmenduritë e bëra dëmtojnë edhe Rusinë edhe Turqinë. Uroj që populli rus ti vendosë gishtin kokës dhe të bëjë ndonjë gjë rreth Putinit”.

Ai duke shprehur falënderimet për portierin legjendar Turgay Şeren i cili i ka dërguan një uniformë të firmosur tha se: “Në fëmijërinë time fotografitë e Turgay i vendosja në mur, ndërsa tani jam anëtar i Galatasaray që e kam përemër. Gjithashtu edhe tifozët e ekipeve të Fenerbahçe dhe të Beşiktaş mos të ma marrin për keq, por ekipi i Galatasaray është ekipi i parë që unë kam dashur dhe që kam qenë tifoz”.

Sancar ka shtuar më tej se kërkimet e tij ku dhe është vlerësuar me çmimin Nobel në Kimi janë një hap i rëndësishëm për kurimin e kancerit. Sipas tij brenda 5-10 vitesh këto kërkime do të jenë të mundura të përdoren edhe për trajtimin e ADN.

Prof. Dr. Aziz Sancar, në saj të kërkimeve se si riparohen qelizat e dëmtuara të ADN‘së dhe se si “hartat” ruajnë të dhënat gjenetike pati marrë çmimin Nobel 2015 në Kimi.

“Fshesa” greke ktheu në nëntor 1352 shqiptarë të tjerë

Shteti grek vijon largimet nga vendi të emigrantëve të paligjshëm, ku për muajin nëntor ka kthyer pas 1604 shtetas të huaj, që kishin hyrë apo qëndronin ilegalisht në Greqi. Sipas njoftimit të Ministrisë së Mbrojtjes së Qytetarëve, shtetasit e kombësive të ndryshme u kthyen në vendet e tyre përmes programit të kthimeve vullnetare.

Ministria bën me dije se çdo ditë në Greqi hyjnë të paktën 400 emigrantë të paligjshëm. Njësoj si edhe muajin e kaluar, numri më i madh i emigrantëve të paligjshëm janë shqiptarët. Duke iu referuar njoftimit zyrtar të autoriteteve greke, për muajin nëntor u dëbuan nga shteti fqinj 1352 shqiptarë. Pas këtyre renditet shtetas nga vende të Lindjes së Mesme por edhe nga Evropa, që qëndronin në Greqi me dokumente jo të rregullta. Kështu, u riatdhesuan në vendet e tyre të origjinës 80 shtetas nga Pakistani, 25 nga Turqia, 22 shtetas nga Serbia, 20 nga Bullgaria, 17 nga Iraku, 15 persona nga Irani dhe 8 shtetas nga Gjeorgjia.

Athina në protestë për shkak të sekretarit Kerry

Përballja zgjati për disa orë nëpër rrugicat e Athinës dhe bilanci i natës së dhunshme ishte gjashtë të arrestuar dhe disa makina dhe vitrina të shkatërruara. Kryeqyteti grek Athina është kthyer sërish në arenë përleshjesh midis policisë dhe grupimeve anarkiste të cilat protestuan gjatë mbrëmjes së të premtes kundër vizitës së sekretarit amerikan të Shtetit, John Kerry.

Në përfundim të protestës disa qindra anarkistë u grumbulluan sërish, këtë herë në lagjen Eksarqia, prej nga lëshuan një valë sulmesh me koktej molotovi dhe gurë ndaj forcave të shumta të policisë që ndodheshin në zonë.

Përballja zgjati për disa orë nëpër rrugicat e lagjes rebele dhe bilanci i natës së dhunshme ishte gjashtë të arrestuar, disa makina dhe vitrina të shkatërruara. Dy persona u dërguan në spital për të marrë ndihmën e shpejtë.

Autoritetet greke thanë se janë në alarm të kuq gjatë tre ditëve në vazhdim, për shkak të përvjetorit të vrasjes së 16-vjeçarit Aleksis Grigoropullos 7 vjet më parë prej forcave të policisë, njofton Top Channel.

Për shmangien e incidenteve gjatë protestave që do të zhvillohen në Athinë gjatë këtyre ditëve, policia thotë se ka në shërbim në rrugët e kryeqytetit më tepër se 6.000 policë të cilët patrullojnë 24 orë në rrugët e qytetit helen.

Policia thotë se forcat e rendit kanë marrë urdhër të shmangin përballjen me protestuesit, por nëse tentohet të përsëriten aktet e dhunës të ndodhura gjatë viteve të kaluara, atëherë forcat e rendit do të ndërhyjnë për vënien e qetësisë.
Mes objekteve të rëndësisë së veçantë që janë vendosur nën ruajtjen e policisë është Politekniku i Athinës, Parlamenti, ambasadat e huaja dhe kompani shumëkombëshe që operojnë në vend. Masa shtesë do të merren edhe në Selanik dhe qytete të tjera të mëdha të vendit.

Autoritetet greke thanë se kanë dyshime të bazuara në përgjime dhe informacione të mbledhura në rrugë operative, se ekstremistët anarkistë po tentojnë të krijojnë akte dhune në protestat që do të zhvillohen në përkujtim të vrasjes së Grigoropullos.

Davutoglu: Ne nuk kërkojmë falje për ruajtjen e kufijve tanë

Kryeministri i Turqisë Ahmet Davuttoglu, gjatë vizitës së tij zyrtare në Baku, ka deklaruar se ‘Nëse Armenia dëshiron të afrohet me aleancën e Turqisë, Gjeorgjisë dhe Azerbajxhanit duhet ti japë fund pushtimit të Karabakut të Sipërm’

BAKU – Kryeministri i Turqisë Ahmet Davuttoglu, gjatë vizitës së tij zyrtare në Baku, ka deklaruar se ‘Nëse Armenia dëshiron të afrohet me aleancën e Turqisë, Gjeorgjisë dhe Azerbajxhanit duhet ti japë fund pushtimit të Karabakut të Sipërm’.

Në vazhdim të fjalës së tij Davutoglu tha: ‘Dua të theksoj edhe një herë që Turqia do të jetë pranë Azerbajxhanit vëlla deri sa territori i këtij shteti të çlirohet nga pushtimi i Armenisë. Dua ti bëj një thirrje Armenisë nga këtu. Nëse filloni një proces paqeje për të rikthyer territoret të cilat nuk ju përkasin ju, mund të bashkoheni me vizionin e paqes së aleancës së Turqisë, Gjeorgjisë dhe Azerbajxhanit. Ne nuk mbajm një qendrim dhe nuk jemi në kërkim të armiqësisë, por çdo pëllëmbë toke e Azerbajxhanit është e shenjtë dhe ky territor i pushtuar patjetër që një ditë do të çlirohet.

Kryeministri Davutoglu në vijim të fjalës së tij u ndal edhe në krizën mes Rusisë dhe Turqisë të dalë pas rrëzimit të një avioni rus i cili shkeli hapsirën ajrore të Turqisë.

”Nuk ka dhe nuk do të ketë asnjë porblem mes popullit rus dhe atij turk. Dëshiroj ti drejtohem Moskës dhe të gjithë Rusisë nga këtu. Nuk kemi asnjë pikë dyshimi, ndjenje negative apo hezitim ndaj popullit rus. Turqit dhe rusët janë dy popuj që i kanë dhënë formim historisë së Europës dhe Azisë. Populli rus është një popull me nder dhe ne e rrespektojmë këtë fakt, por duhet të tihet mirë që edhe populli turk është një popull me nder dhe duhet të rrespektohet nga popujt që rrespekton”, tha ndër të tjera Davutoglu.

Kryeministri turk në fjalën e tij gjithashtu i ka bërë thirrje liderëve politik të Rusisë për ta zgjidhur këtë problem duke u takuar, por siç thekson ai jo duke përdorur fakte të paqena për të fajsuar njëri tjetrin siç ishin deklaratat e pak ditëve më parë se gjoja ‘Turqia ndihmon ISIS-in’.

Ndërsa në lidhje me rrëzimin e avionit rus i cili shkeli hapsirën ajrore të Turqisë, Davutoglu tha:

”Ne përdorëm rregullat e mbrojtjes sonë në bazë të angazhimeve, rregull ky që dihet nga të gjithë duke rrëzuar një avion identiteti i të cilit nuk dihej. Askush nuk mund të akuzojë ose fajsojë Turqinë për një gjë të tillë. Askush të mos presë ndjesë nga kjo gjë. Ne nuk kërkojmë falje për ruajtjen e kufijve tanë. Llogarinë i’a japim vetëm popullit i cili na zgjodhi më 1 nëntor”. aa

Lavrovi takon homologun turk në Beograd

Ministri i Jashtëm i Rusisë, Sergei Lavrov, dhe homologu i tij turk, Mevlut Cavusoglu, janë takuar sot në margjina të një konference të Organizatës për Siguri dhe Bashkëpunim në Evropë (OSBE) në Beograd.

Takimi 40-minutësh është i pari në nivel të tillë midis Rusisë dhe Turqisë, prejse forcat turke kanë rrëzuar një avion ushtarak rus, në kufi me Sirinë, më 24 nëntor.

Detaje të takimit nuk janë bërë të ditura.

Marrëdhëniet midis Ankarasë dhe Moskës kanë rënë në nivelin më të ulët për shkak të incidentit.

Rusia ka thënë se Turqia duhet të kërkojë falje.

Turqia ka thënë se Rusia duhet të pranojë se aeroplani i saj ka shkelur hapësirën ajrore turke.

Ankaraja ka thënë se nuk do të kërkojë falje për mbrojtje të territorit të saj.

Dy vendet po ashtu kanë akuzuar njëra-tjetrën se blejnë naftë nga grupi militant Shteti Islamik.

Mogherini në Serbi: Kapitulli 35 për hapjen e bisedimeve

Komisionarja e Lartë e BE-së, Frederica Mogherini, gjatë qëndrimit në Serbi, ka thënë se data kur mund të hapen bisedimet për kapitujt 32 dhe 35, është 14 dhjetor.

“Disa muaj më parë, kam thënë në Beograd se kapitujt duhet të hapen para fundit të vitit, dhe tash po them se më 14 dhjetor mund t’i hapim. Bashkëpunim më intensiv na pret përpara dhe kjo është e rëndësishme si për Serbinë ashtu edhe për BE-në”, ka thënë Mogherini në një konferencë të përbashkët shtypi me kryeministrin serb, Aleksander Vuçiq, transmeton Koha.net.

Mogherini më tej në lidhje me dialogun Prishtinë-Beograd u ka thënë serbëve që mund të llogarisin në të dhe Bashkimin Evropian se ata garantojnë zbatimin e marrëveshjeve të arritura nga të dy palët në Bruksel dhe vazhdimin e Dialogut Prishtinë-Beograd.

Ndërsa kryeministri serb, Aleksander Vuçiq, ka thënë se Serbia dëshiron vazhdimin e dialogut, sepse, sipas tij, ai ka shumë gjera dhe çështje konkrete që duhet të adresohen, e të cilat ndikojnë direkt në jetën e serbëve dhe shqiptarëve në Kosovë.

Kapitulli 35 ka dal të jetë kafshatë vështirë e kapërdishme për palën serbe sepse në këtë kapitull parashihet që Beogradi të heq dorë nga Kosova, se siç thuhet në të, Serbia të heqë dorë nga të gjitha elementet e veta të shtetësisë në Kosovë.

Ozilhani: Turqia do të gjejë tregje të reja

Ai ka shpjeguar se Grupi Anadolu në Rusi realizoi investime të rëndësishme të cilat llogariten në disa miliarda dollarë

ANKARA – Kryetari i Këshillit të biznesit Turqi-Rusi në Këshillin e Marrëdhënieve Ekonomike me Jashtë Tuncay Ozilhan, në lidhje me sanksionet që Rusia ka ndërmarrë ndaj Turqisë pas rrëzimit të vionit rus i cili shkeli hapësirën ajrore turke tha se vendi do të gjejë tregje të reja.

“Ashtu siç e ka shprehur edhe kryeministri ynë do të gjenden tregje të reja. Edhe sikur të jetë problem për një periudhë të shkurtër ndoshta më pas do të lind një mjedis i përshtatshëm për të shpërndarë rreziqet”, ka deklaruar Ozilhan.

Ozilhan, në një deklaratë për gazetarin e AA-së komentoi mbi zhvillimet ndërmjet Rusisë dhe Turqisë.

Ai ka shpjeguar se Grupi Anadolu në Rusi realizoi investime të rëndësishme të cilat llogariten në disa miliarda dollarë. “Kemi afërsisht 5 mijë punonjës. Kemi fabrika. Jemi një prej ivestitorëve më të rëndësishëm në vend. Gjithashtu paguajmë taksë të rëndësishme. Kemi marka shumë të rëndësishme”, ka thënë ai.

Duke vënë në dukje se janë nga të parët që kanë vajtur në Rusi për investime Ozilhan thotë se në Rusi janë të pranishëm që nga viti 1998.

“Në Rusi kemi vajtur në vitin 1998, dhe që nga ajo kohë kemi kryer punë të suksesshme. Ashtu siç edhe kryeministri Ahmet Davutoglu ka shprehur se problematika duhe të zgjidhet në tryezë, me mënyra diplomatike dhe se investitorët dhe biznesmenët nuk duhet të dëshpërohen. Sepse përfundimisht në këto vende turqit do të qëndrojnë si investitorë. Rusët vijnë në këtë vend, u krijohen mundësitë e turizmit, dhe sërish ashtu siç kryeministri Davutoglu ka shprehur se jemi të ndërthurur me njëri tjetrin, dhe aq shumë të ndërthurur sa të gjithë burimin e energjisë e marrim nga kjo. Dëshiroj dhe dua që këto tensione të ulen dhe të zgjidhen duke u ulur në tryezë. Në emër të njerëzve të të dy vendeve, dhe në emër të investitorëve uroj që të tregojnë përkushtim dhe të ulen në tryezë”, thekson Tuncay Ozilhan.

– “Në kohën kur të gjithë iknin nga Rusia ne bënim investime”

Ozilhan duke përmendur investimet e realizuara nga investitorët turq në Rusi ka thënë se “në kohën kur të gjithë iknin nga Rusia ne bënim investime”.

Ai shprehu dëshirën se mes dy vendeve do të fitojë logjika dhe se reaksioni do të kalojë. Özilhan tha se Rusia dhe Turqia janë dy vende mike.

Qeveria Rajonale Kurde në Irak përgënjeshtron akuzat që bën Rusia ndaj Turqisë

Zëdhënësi i Qeverisë Rajonale Kurde të Irakut, Sefin Dizayi, në lidhje me pretendimet e Ministrisë së Mbrojtjes së Rusisë që nafta e ISIS-it kalon në Turqi nëpërmjet linjës Zho-Silopi, ka pohuar se kundërshtojnë pretendimet e Rusisë

ERBIL – Zëdhënësi i Qeverisë Rajonale Kurde të Irakut, Sefin Dizayi, në lidhje me pretendimet e Ministrisë së Mbrojtjes së Rusisë që nafta e ISIS-it kalon në Turqi nëpërmjet linjës Zho-Silopi, ka pohuar se kundërshtojnë pretendimet e Rusisë.

Dizayi në një deklaratë për gazetarin e AA-së duke theksuar se i shohin me shqetësime pretendimet e Rusisë për naftën e ISIS-it u shpreh se “akuzat e një shteti si Rusia që pretendon se nafta e ISIS-it dërgohet në Turqi nëpërmjet rajonit të Kurdistanit na ka dëshpëruar. Informacionet e publikuara nga Rusia nuk janë të drejta”.

“Si qeveri e Kurdistanit ne kundërshtojmë këto pretendime të Rusisë. Linjat e tubacioneve, nga Zaho dhe deri në pikën kufitare Ibrahim Halil janë pronë e rajonit të Kurdistanit. Ministria e Burimeve Natyrore në kudër të marrëveshjeve me kompanitë e huaja menaxhon procesin. Një pjesë të madhe të naftës së nxjerrë në rajonin Duhoj dhe Badinan me linjat e tubacionit e dërgon në Turqi. Ndërsa një pjesë tjetër të naftës e dërgon me tankerë” ka shtuar ndër të tjera Dizayi.

Duke vënë në dukje luftën kundër ISIS-it të Rajonit kurd dhe Peshmergëve Dizayi ka vlerësuar se: “Nafta që rajoni i Kurdistanit shet nuk ka lidhje me ISIS-in. Rajoni i Kurdistanit lufton më shumë se çdo kush me DAESH-in, është forca primare që mbështet Peshmergët në luftën kundër kësaj organizate. Peshmergët të cilat janë forcat që kanë thyer dhe prishur mitin e ISIS-it. A mund të shesë drejtpërdrejtë apo tërthorazi rajoni i Kurdistanit naftë e cila ofron përfitime për ISIS-in? A mund të ndërmjetësojë Kurdistani në tregtinë e ISIS-it? Këtë pretendim nuk i pranon as mendja as arsyetimi”.

“Rusia po bën deklarata të gabuara mbi burimet e naftës. Shpresojmë që edhe palët e tjera nëpërmjet informacioneve të gabuara të mos hedhin hapa të tilla” ka deklaruar ndër të tjera Diyazi.

Duke u shprehur se nafta që shkon drejt Turqisë nga Qeveria Rajonale Kurde në çdo fazë të sajë është transparente Dizayi ka shprehur pikëpamjet se: “Nafta e ISIS-it, në asnjë mënyrë nuk ka kaluar nëpër kufijtë e kontrolluara nga Kurdistani. Kundërshtojmë me forcë këto pretendime të Rusisë dhe nuk pranojmë asnjë akuzë kundrejt nesh. Sepse linjat e tubacionit nga rajoni Zaho drejt Turqisë nuk janë të fshehta, por janë të qarta se ku ndodhen. Kjo është tërësisht pa lidhje”.

Dizayi ka vënë në dukje se Rusia ka konsullatë në Erbil dhe se në lidhje me këtë çështje ata presin shpjegime u shpreh më tej se: “Marrëdhëniet mes Rajonit të Kurdistanit dhe Rusisë janë të mira dhe miqësore. Edhe kompanitë ruse të naftës kanë aktivitete në rajonin e Kurdistanit. Shpresojmë që Rusia ti rishikojë informacionet në këtë temë. Rusia duhet të rregullojë informacionet që askush të mos hyjë në një rrugë të gabuar”.

Edhe Abdullah Barzani, Shefi i Policisë së Pikës Kufitare mes Turqisë dhe Irakut të Veriut, Ibrahim Halil duke kundërshtuar pretendimet e Ministrisë së Mbrojtjes së Rusisë tha se: “Këto janë pretendime të pabaza që janë hedhur për të dëmtuar imazhin e rajonit të Kurdistanit. Është e qartë dhe e përcaktuar se në çfarë mënyrë dhe në cilat rrugë eksporton naftën Rajoni i Kurdistanit. Dërgesat e naftës janë bërë në mënyrë transparente dhe të hapur”.

Ndërsa ministri i Burimeve Natyrore të Qeverisë Rajonale të Irakut, Ashti Hawrami në një fjalim të mbajtur në “Konferencën Nafta dhe Gazi i Rajonit Kurdistanit” të mbajtur në Londër kishte theksuar se ISIS ka krijuar një pengesë në eksportin e naftës të Rajonit të Kurdistanit . Ai pati deklaruar se: “Po të mos ishte i pranishëm ISIS deri tani eksportet tona të përditshme të naftës do të ishin në 1 milionë fuçi”.

Akuzat e Rusisë se “Turqia bën tregti të naftës me ISIS-in” dolën në pah pas rrëzimit të avionit rus i cili shkeli hapësirën ajrore turke. Këto pretendime të shpërndara intensivisht nga mediat nën kontrollin e qeverisë së Kremlinit, nuk u gjendën të besueshme në opinion publik ndërkombëtarë.

Një avion luftarak i prodhimit rus me nacionalitet të papërcaktuar me 24 nëntor nga hapësira ajrore e Sirisë pati kaluar në anën turke dhe u rrëzuar nga avionët turq F-16 për shkak se vazhdoi shkeljen pavarësisht 10 paralajmërimeve të bëra. Pas ngjarjes Rusia deklaroi se avioni i përkiste asaj. NATO konfirmoi saktësinë e informacioneve të paraqitura nga Turqia në lidhje me shkeljen e hapësirës ajrore të avionit. Edhe në fillim të muajit tetor avionët luftarakë të Rusisë patën shkelur hapësirën ajrore të Turqisë, ku pas ngjarjes autoritetet ruse duke kërkuar falje kishin njoftuar se të njëjtat situata nuk do të përsëriteshin. Ndërsa Turqia kishte ripërsëritur se ndaj shkeljeve të hapësirës ajrore do të zbatonte rregullat e angazhimit që përfshijnë kundërpërgjigjen ushtarake.

Erdogani: Kam prova se Rusia merr naftë nga ISIS-i

Presidenti rus Vladimir Putin ka akuzuar Turqinë ditët e fundit se furnizohet me naftë nga i ashtuquajturi Shtet Islamik.

Rusia tregoi edhe pamje satelitore për naftën që qarkullonte. Por, ndërkohë, Presidenti i Turqisë, Recep Tayyip Erdogan, në një reagim këtë të enjte, tha se Ankaraja ka prova se Rusia është e përfshirë në tregti të paligjshme të naftës me grupin ekstremist Shteti Islamik në Siri.

“Kemi prova në duart tona. Do t’ia zbulojmë botës”, ka thënë Erdogan në një fjalim televiziv, por duke mos dhënë detaje të tjera.

Ai i ka përshkruar si “të pamoralshme” akuzat e Rusisë, të bëra një ditë më herët, se familja e Erdoganit importon naftë nga militantët e Shtetit Islamik.

Atentat në Shkup – vriten dy shqiptarë

Një incident i armatosur ka ndodhur mbrëmjen e së mërkurës në fshatin Gërçec në afërsi të Shkupit, në të cilin dy persona kanë humbur jetën, ndërsa një i tretë ka marr plagë të rënda.

Siç informon policia maqedonase, rreth orës 23:00, persona ende të paidentifikuar kanë hapur zjarr në drejtim të makinës tip “Mercedes” me targa të Shkupit, në të cilën kanë qenë duke udhëtuar viktimat dhe personi i plagosur, që aktualisht po kurohet në qendrën klinike të Shkupit.

“Prokurori publik menjëherë pas incidentit ka dalë në vendin e ngjarjes dhe ka kryer ekspertizën e duhur. Autorët që kanë kryer këtë vepër janë në arrati dhe policia është në kërkim të tyre”, ka deklaruar për mediat një zyrtar nga Ministria e Punëve të Brendshme.

Njëri prej viktimave është Nebush Nuhishi, afarist i njohur në Shkup, i cili veprimtarinë e tij e ka mbështetur në tregtinë me mish dhe që njihet edhe si organizator i garave tradicionale në mundje të lirë. Ndërkaq, identiteti i dy personave tjerë në këtë incidentet ende është i panjohur.

Erdogan: Në rast se reagimet do të vazhdojnë, jemi të detyruar të marrim masat tona

Presidenti turk Recep Tayyip Erdogani ka deklaruar sot, gjatë një vizite në Katar, se qëllimi i Turqisë nuk është një zmadhim i ngjarjeve në lidhje me rrëzimin e avionit ushtarak rus, dhe se “nuk është në favorin e askujt të luaj me zjarrin”

ANKARA – Presidenti turk, Recep Tayyip Erdogani, ka deklaruar sot gjatë një vizite në Katar, se qëllimi i Turqisë nuk është një zmadhim i ngjarjeve në lidhje me rrëzimin e avionit ushtarak rus, dhe se “nuk është në favorin e askujt të luaj me zjarrin”.

Erdogani në lidhje me problemet mes Turqisë dhe Rusisë ka deklaruar se: “Nuk kemi si synim të përshkallëzojmë situatën. Un besoj se po të vëmë në pah dialogun dhe diplomacinë do të fitojë mirëkuptimi dhe toleranca. Rusia dhe Turqia kanë projekte shumë të mëdha përpara dhe ne për këtë arsye nuk jemi sjellë duke përdorur ndjenjat dhe nuk do ta bëjmë një gjë të tillë. Ne do të veprojmë ashtu sikurse e kërkon diplomacia ndërkombëtare. Nuk duam të dëmtojmë më shumë marrëdhëniet tona dhe nuk dëshirojmë përshkallëzimin e problemit”.

Presidenti Erdogan ka shtuar se “po ndjekim me dëshpërim reagimet e joproporcionale që Rusia po jep në një çështje ku e gjithë bota e pranon se kemi të drejtë. Në rast se këto reagime do të vazhdojnë sigurisht edhe ne do të mbetemi të detyruar të marrim masat tona. Nuk ka asnjë vend tjetër që të ndërmarrë një luftë kaq gjithëpërfshirëse sa Turqia kundër ISIS”

Presidenti Erdoğan duke theksuar se në luftën kundër ISIS asnjë vend tjetër në botë nuk ndërmerr një luftë gjithëpërfshirëse dhe rezultatdhënëse sa Turqia u shpreh se: “Teksa dikush nën pretekstin e ISIS po realizon në Siri projektet e tij, Turqia edhe pse përballet drejtpërdrejtë me sulmet e organizatës terroriste ka zgjedhur të marrë pjesë në anë të vëllezërve të saj të shtypur”. aa

Xhamia e Re në Manastir shndërrohet në Galeri të Arteve, BFIM kërkon pronësinë e saj

SHKUP – Xhamia e Re me dekada të tëra pret të rikthehet në pronësi të Bashkësisë Fetare Islame të Maqedonisë (BFIM). Mirëpo, ajo tashmë është shndërruar në Galeri të Arteve, për të cilën nuk pajtohet as BFIM-ja e as Muftinia e Manastirit.

Në një deklaratë për Anadolu Agency (AA), Muftiu i Manastirit, Pëllumb Veliu, foli lidhur me shqetësimet për fatin e xhamisë në këtë qytet. Ai tha se në mënyrë të padrejtë dhe antiligjore shteti po bën uzurpimin e xhamisë. Sipas tij, xhamia duhet të kthehet në pronësi të BFIM-së dhe më pas ky institucion ta vendosë në shërbim të besimtarëve myslimanë dhe faljes së namazit.

Nga ana tjetër Sekretari shtetëror në Ministrinë e Kulturës, Behixhudin Shehapi pohon se ka patur shkelje të ligjit sa i përket Jeni Xhamisë. Mirëpo, ai zgjidhjen e këtij problemi e sheh në tek vullneti i mirë politik.

Muftiu ,Veliu thotë se për fat të keq tashmë jemi në fazën e gati përfundimit total të uzurpimit të përhershëm, të përgjithmonshëm të Jeni Xhamisë në Manastir nga ana e shtetit aktual, një situatë që nuk është e re, por ka filluar që nga viti 1945, gjegjësisht që nga viti 1948.

“Në këtë periudhë deri në vitin 1970 Jeni Xhamia gjithmonë ka shërbyer si ndonjë depo për drithëra apo depo të ndryshme, derisa nuk u mor vendimi që ajo të shndërrohet në Galeri të Artit modern. Ngec problemi aty ku vendimi për kthimin e xhamisë merret në vitin në vitin 1960 kurse në vitin 1967-68 përsëri merret një vendim tjetër nga pushteti i atëhershëm dhe përsëri ‘de jure’ i merret xhamia BFI-së”, thekson Veliu.

Sipas tij, kjo situatë ka vazhduar deri në vitin 2003 dhe xhamia shërben si Galeri e Arteve edhe pse BFIM-ja gjithmonë ka reaguar dhe asnjëherë nuk është pajtuar me statusin e Jeni Xhamisë.

– Nuk janë të vërteta pohimet për themele të kishës-

Duke folur për gërmimet në Jeni Xhami, Muftiu i Manastirit mohon pretendimet e disa konservuesve maqedonas për gjoja themele të Kishës Shën Gjorgjia.

“Kudo që të gërmoni në Manastir, në Shkup apo në qendrën më të ngushtë të qyteteve do të gjeni tre gur një mbi një ose do të gjeni ndonjë themel që nuk është aspak as argument as fakt se aty ka patur kishë ose ndonjë ndërtim tjetër. Nuk ka patur për arsye se tanimë ia gjetën edhe emrin kinse qenka kisha e Shën Gjorgjit”, thotë në deklaratën për AA, Veliu.

Ai thekson se prej vitit 2011 e këtej gati në të gjitha materialet apo dokumentet e shkruara në komunikim ndërmjet Ministrisë së Kulturës ose Drejtorisë për mbrojtje të trashëgimisë kulturore dhe të Entit të për mbrojtje kulturore të Manastirit gjithmonë shkruhet Jeni Xhami – Kisha Shën Gjorgji.

“Domethënë emri i xhamisë nuk është Jeni Xhami, por është emër i dyfishuar që mban edhe atë edhe emrin tjetër dhe nesër pasnesër emri i Jeni Xhamisë do të fshihet nga aspekti i të vërtetës. Gjetëm edhe tapinë e Jeni Xhamisë, por për fat të keq ajo tapi nuk është e verifikuar ose nuk është e vulosur. Për çfarë arsye ne nuk kemi njohuri”, thotë ai.

– Kërkuam drejtësi në gjykatat e vendit, por pa sukses –

Lidhur me këto peripeci Muftiu, Pëllumb Veliu thotë se kishin vendosur që drejtësinë për kthimin e Jeni Xhamisë ta kërkojnë në gjykatat e vendit, por pa sukses.

“Vendosëm që problemin tonë ose lëndën tonë ta japim në gjyq dhe të kërkojnë zgjidhjen e këtij problemi në organet gjyqësore të Republikës së Maqedonisë dhe filluam procedurën e cila zgjati prej vitit 1998 deri në vitin 2009, pra plot 11 vite. I vetmi shkak që u refuzuam ishte ajo se gjyqi kërkonte dëshmi të pronësisë, sikur vetë xhamia nuk mjaftonte si dëshmi e pronësisë”, thekson Veliu.

Ai mbetet me shpresë se ky problem do të zgjidhet në kuadër të së vërtetës e jo sipas qejfit të dikujt dhe xhamia t’i kthehet BFI-së dhe të jetë në shërbim të besimtarëve muslimanë.

“Besoj se ky problem do të zgjidhet në saje të së vërtetës e jo në saje të qejfit të dikujt, por të vendoset ashtu sikurse e kërkon drejtësia dhe Jeni Xhamia ti kthehet menjëherë BFI-së e cila menjëherë duhet ta vendosë në shërbim të xhematit, në shërbim të faljes së namazit, pra në shërbim të asaj edhe për çka edhe është ndërtuar”, tha Muftiu Veliu.

Ndërsa drejtori i Qendrës Kombëtare për Konservim, Mehmet Selmani për AA thotë se është bërë shkelje e procedurës.

“Mendoj se ka shkelje, sepse ne si Qendër kombëtare amë e trashëgimisë së patundshme në Republikën e Maqedonisë, qendrat lokale janë të obliguara që projektet e këtyre objekteve t’i dorëzojnë në revizon tek ne. Deri tani nuk kemi pasur asnjë kërkesë qoftë nga Drejtoria për Trashëgimi Kulturore, qoftë nga Muzeu i Manastirit. Dhe nëse kemi aty leje, dhe sigurisht se ka leje mbase në pllakatën e shohim se ka leje për konservim. Ka dy leje, leja plotësuese e vitit 2014 dhe leja e sivjetme për konservim”, deklaroi Selmani.

Sipas tij, kjo do të thotë se leja për konservim jepet në bazë të raportit të komisionit për revizion që i bëhet projektit. “Kompetent jemi ne sipas nenit 86 dhe nëse është dhënë leja për revizion nga ndonjë komision tjetër unë mendoj se është shkelje”, thotë ai.

Nga ana tjetër Sekretari shtetëror në Ministrinë e Kulturës, Behixhudin Shehapi, në një deklaratë për Anadolu Agency (AA) u shpreh se ndonëse nuk ka patur njohuri mbi mosmiratimin e vendimit për revizion në Qendrën kombëtare për konservim thekson se projekti duhet të rishikohet në këtë institucion dhe më pas institucioni i cili është i autorizuar për zbatimin e projektit restaurues të godinës së xhamisë, Enti për mbrojten e monumenteve dhe Muzeu i Manastirit t’i fillojë aktivitetet e veta.

– Procedura duhet të ridefinohet nga fillimi-

“Mbi vete kompetencat i ka marrë Enti për mbrojtjen e monumenteve dhe Muzeu i Manastirit, me ç’rast është shkelur Ligji. Në këtë rast grupi i qytetarëve ose inspektorët Drejtorisë për mbrojtjen e trashëgimisë kulturore mund të dalin në terren ta informojnë Ministrinë se ajo leje është jovalide se nuk e ka kaluar, sipas vërtetimeve që marrim nga Qendra kombëtare për konservim, asnjë ekspertizë dhe në këtë rast inspektorët duhet të ndalin këtë punë dhe procedura duhet të ridefinohet nga fillimi”, u shpreh Shehapi.

Ndërkohë Shehapi mohoi akuzat se ai ka firmosur programin e Ministrisë së Kulturës për vitin 2011, ku është ndërruar emri i Jeni Xhamisë në Kisha Shën Gjorgji, duke u shprehur se drejtori i atëhershëm i Qendrës kombëtare për konservim nuk ka patur kompetenca ligjore që të ndërrojë emrin e xhamisë ose të miraton program.

Ai tha se qeveria duhet të respektojë trashëgiminë osmane në vend dhe thekson se duhet pasur zgjidhje politike mbi këtë çështje.

– Duhet të ketë zgjidhje politike –

“Në këtë shtet, në këtë qeveri nuk ekziston vullnet i mirë. Rasti më eklatant se nuk ka vullnet të mirë, nuk ka respekt ndaj trashëgimisë kulturore osmane dhe njëherit nuk ka respekt ndaj shtetit turk prej ku ka ardhur ajo trashëgimi në këto treva Duhet të ketë zgjidhje politike. Mendoj se në këtë rast Qeveria e Maqedonisë duhet të marrë parasysh edhe kërkesat nga shteti i Turqisë, duhet të marrë parasysh koshiencën që e ka Turqia ndaj kësaj qeverie”, deklaroi sekretari shtetëror Shehapi.

Ndonëse siç shprehet ai në këtë shtet po kultivohen ato vlera dhe respektohet periudha osmane, por dy rastet në Manastir dhe Prilep duhet të gjendet një zgjidhje, ajo është me një vullnet politik.

“Jeni Xhamia duhet të funksionojë si xhami dhe t’i kthehet BFIM-së dhe duhet të ndërpriten tendencat për asgjësimin e xhamisë apo shndërrimin në diçka tjetër”, tha Shehapi.

Ndërkohë, Jeni Xhamia është ndërtuar në vitet 1552-56 dhe deri pas Luftës së Dytë Botërore ka funksionuar për nevojat e besimtarëve muslimanë, ndërsa menjëherë pas Luftës së Dytë Botërore kjo xhami është uzurpuar nga ana e shtetit të atëhershëm jugosllav komunist. aa

Stoltenberg: Ftesa e NATO-s për Malin e Zi, e rëndësishme për integrimin e gjithë Ballkanit Perëndimor

BRUKSEL – Vendimi i sotëm i ministrave të Punëve të Jashtme të NATO-s, që të ftohet Mali i Zi për anëtarësim, sjell që ky vend edhe zyrtarisht të fillojë procesin e negociatave për t’u bashkuar me aleancën ushtarake.

“Kjo është një ditë e mirë për Malin e Zi, një ditë e mirë për Ballkanin Perëndimor dhe Aleancën”, tha sekretari i përgjithshëm i NATO-s, Jens Stoltenberg me rastin e vendimit.

Që nga viti 2009, NATO-ja dhe Mali i Zi janë duke punuar intensivisht në Programin e Veprimit për anëtarësim të plotë – MAP, që u kurorëzua sot me dërgimin e ftesës.

“Ka edhe shumë punë para nesh”, u shpreh Sekretari i Përgjithshëm i NATO-s, dhe shtoi se: “Mali i Zi duhet të vazhdojë më intensivisht rrugën e reformave, duke i përshtatur kapacitetet e saj mbrojtëse, duke punuar për reformuat e përgjithshme të shoqërisë, sidomos kur bëhet fjalë për sundimin e ligjit dhe luftën kundër korrupsionit, si dhe për të siguruar mbështetje tek masa e tyre për t’u bashkuar me aleancën ushtarake”.

Negociatat me Malin e Zi për anëtarësim në NATO duhet të fillojnë në ditët e para të vitit të ardhshëm. Pas përfundimit të tyre, aleanca ushtarake dhe Mali i Zi do të nënshkruajnë dokumentin e anëtarësimit, i cili do të hyjë në fuqi pas miratimit të 28 parlamenteve të vendeve anëtare të NATO-s. Pas përfundimit të këtij procesi, Mali i Zi do të bëhet zyrtarisht anëtari i 29 i Aleancës. aa

Davutoglu: Kriza siriane nuk është mes Rusisë dhe NATO-s

Kryeministri i Turqisë tha se marrëdhëniet Turqi-Rusi kanë të bëjnë me interes të ndërsjellë

ANKARA – Kryeministri i Turqisë, Ahmet Davutoglu, deklaroi sot në Ankara se kriza në Siri nuk është krizë turko-ruse as krizë mes Rusisë dhe NATO-s.

“Nuk është e mundur të fshihet shkelja e hapësirës ajrore të Turqisë me pohime të pabaza të llojit se Turqia blenë naftë nga ISIS-i, ose me diçka tjetër. Kriza në Siri nuk është krizë turko-ruse, e as që është krizë mes Rusisë dhe NATO-s. Interpretimi i tillë, për fat të keq u shndërrua tash në krizë mes Rusisë dhe Turqisë”, tha Davutoglu në një deklaratë në Ankara para nisjes për vizitë në Republikën Veriore të Qipros.

Kryeministri i Turqisë tha se marrëdhëniet Turqi-Rusi kanë të bëjnë me interes të ndërsjellë.

“Nuk duhet kontribuar për prishje të këtyre marëdhënieve, por nuk duhet pritur nga Turqia që të bëjë koncesione kur kemi të bëjmë me mbrojtjen e hapësirës ajrore, ose kufirit tokësor dhe detar”, tha Davutoglu sipas të cilit rregullat mbi të cilat veprojnë forcat e armatosura janë të njëjta siç kanë qenë më parë dhe do të mbeten të tilla.

“Detyra kryesore e ushtrisë është të mbrojë kufirin”, ka përfunduar Davutoglu.

Thellohen tensionet Turqi-Rusi

Turqia ka kërkuar nga Rusia që të sjellë prova për pohimet e saj se Ankaraja ka rrëzuar avionin ushtarak rus, në kufi me Sirinë, për të mbrojtur tregtinë e saj të naftës me grupin militant Shteti Islamik (IS).

“Nëse pretendoni diçka, duhet të sillni prova”, ka thënë presidenti turk, Recep Tayyip Erdogan.

Ai u është përgjigjur akuzave të presidentit rus, Vladimir Putin, i cili po ashtu ka thënë se incidenti i javës së kaluar ka qenë “gabim i madh”.

Qeveria e Turqisë ka refuzuar të kërkojë falje për incidentin.

Një pilot rus është vrarë dhe një tjetër ka shpëtuar kur avioni rus Su-24 është rrëzuar nga avionët turq, më 24 nëntor.

Turqia thotë se avioni ka hyrë në hapësirën e saj ajrore, por ky pretendim hidhet poshtë nga Moska.

Departamenti amerikan i Shtetit ka thënë se provat nga burime të Turqisë dhe të Shteteve të Bashkuara tregojnë se avioni ka shkelur hapësirën ajrore turke.

Turqia ka mohuar çdo lidhje me militantët e Shtetit Islamik dhe është pjesë e koalicionit të udhëhequr nga SHBA-ja, i cili kryen sulme ajrore kundër grupit terrorist.

Davutoglu: Turqia nuk do t’i kërkojë falje Rusisë

Kryeministri i Turqisë, Ahmet Davutoglu tha sot se vendi i tij nuk do të kërkojë falje për rrëzimin e një avioni luftarak rus javën e kaluar përgjatë kufirit Turqi-Siri. Zoti Davotuglu i bëri këto komente pas një takimi në Bruksel me Sekretarin e Përgjithshëm të NATO-s Jens Stoltenberg, i cili theksoi se Turqia ka të drejtë të mbrojë hapësirën e saj ajrore.

Kryeministri turk, Ahmet Davutoglu u tha gazetarëve pas një takimi me shefin e NATO-s, Jens Stoltenberg në Bruksel, se forcat turke bënë “detyrën” e tyre për të mbrojtur hapësirën ajrore të vendit. Zoti Davutoglu tha se Turqia nuk do t’i kërkojë falje Rusisë pasi kjo është një çështje kombëtare për vendin e tij.

“Asnjë vend nuk mund të kërkojë nga ne që të kërkojmë falje për incidentin sepse ne bëmë detyrën tonë. Veprimi ynë ishte mbrojtës. Kjo është më shumë një çështje dinjiteti për ne. Ushtria jonë bëri detyrën e saj të mbrojtjes së kufijve tanë”.

Rusia nuk pajtohet me vlerësimin turk dhe thotë se avioni i saj luftarak ishte në territorin sirian kur u qëllua nga forcat turke. Presidenti rus Vladimir Putin ka thënë se Turqia duhet të kërkojë falje për incidentin.

Duke folur para gazetarëve pas takimit me zotin Davutoglu, Sekretari i Përgjithshëm i NATO-s Jens Stoltenberg tha se NATO-ja është zotuar ta mbështesë Turqinë në përpjekjet për të mbrojtur kufijtë e saj.

“Turqia ka të drejtë të mbrojë veten dhe hapësirën e saj ajrore”, tha zoti Stoltenberg.

Kryeministri turk Davutoglu dhe Sekretari i Përgjithshëm i NATOs Jens Stoltenberg paralajmëruan gjithashtu se incidente të tilla janë të rrezikshme për aq kohë sa Rusia dhe koalicioni i udhëhequr nga Shtetet e Bashkuara vazhdojnë sulmet ndaj militantëve të Shtetit Islamik.

Turqia rrëzoi një avion rus të martën e kaluar pasi, sipas autoriteteve turke, avioni rus nuk përfilli paralajmërimet për shkeljen e hapësirës ajrore të Turqisë.

Ky është incidenti i parë i këtij lloji që nga mbarimi i Luftës së Ftohtë dhe ka dëmtuar marrëdhëniet mes Ankarasë dhe Moskës, dy fuqi të përfshira në luftën në Siri.

Turqia është pjesë e koalicionit të vendeve të udhëhequra nga Shtetet e Bashkuara që po sulmojnë pozicionet e Shtetit Islamik në Siri dhe Irak, Ajo ka bërë thirrje për largimin e Presidentit sirian Bashar Al-Assad.

Rusia, e cila mbështet zotin Assad, gati dy muaj më parë filloi një fushatë ajrore ndaj kundërshtarëve të presidentit sirian. Megjithëse sulmet ruse kanë në shënjestër pozicionet e Shtetit Islamik, shumica e sulmeve të saj ajrore janë përqëndruar ndaj kundërshtarëve të zotit Assad, përfshirë grupet që mbështet Turqia.

Duke komentuar për sanksionet e Rusisë ndaj Turqisë në përgjigje të rrëzimit të avionit rus, kryeministri turk Davutoglu tha se ai shpreson se Rusia do t’i rishikojë sanksionet ekonomike ndaj Turqisë.

Sanksionet e njoftuara nga Presidenti rus Vladimir Putin kufizojnë importet ruse të disa produkteve turke, ndalojnë zgjatjen e kontratave për turqit që punojnë në Rusi dhe ndikojnë në operacionet e kompanive turke në Rusi.

Aeroplani rus u rrëzua në një zonë të kontrolluar nga rebelët në veri të Sirisë të martën e kaluar. Turqia dhe Rusia nuk pajtohen rreth vijës së tij të fluturimit, Turqia thotë se avioni rus shkeli hapësirën ajrore të vendit ndërsa Rusia këmbëngul se avioni i saj ishte në territorin e Sirisë.

Njëri nga pilotët e avionit rus u vra nga forcat kryengritëse kur po zbriste me parashutë, ndërsa piloti tjetër u shpëtua nga forcat ruse dhe ato siriane. Ankaraja ktheu sot në Rusi trupin e pilotit të vrarë.

Erdogani: Për takimin me Putinin ende jemi duke pritur përgjigje

Presidenti i Turqisë i cili iu përgjigj pyetjeve të gazetarëve turq në lidhje me takimin me Putinin tha se “Ne si Turqi ditën e parë e kemi bërë kërkesën tonë, jemi duke pritur përgjigje”

PARIS – Presidenti turk, Recep Tayyip Erdoğan, në lidhje me një takim me presidentin rus Vladimir Putin në Paris ka deklaruar se “Ditën e parë e kemi bërë kërkesën tonë, jemi duke pritur përgjigje”.

Erdoğan në kuadër të Samitit të 21-të për Ndryshimet Klimatike pranë OKB-së (COP21) vazhdon kontaktet.

Gazetarët turq dhe të huaj të cilët treguan një interes të madh ndaj presidentit Erdogan, u fotografuan me kërkesën e disa delegatëve të shteteve të huaja. aa

Trupi i pajetë i pilotit rus nga Hataja dërgohet në Ankara

Trupi i pajetë i pilotit rus u soll mbrëmë nga Siria në morgun në Hatajë që më vonë gjatë ditës së sotme të dërgohet në Ankara, ku gazetarëve nuk iu lejua xhirimi

HATAJË – Trupi i pajetë i pilotit rus i cili humbi jetën gjatë rrëzimit të avionit pas shkeljes së hapësirës ajrore turke, është transportuar me një avion të ushtrisë së Turqisë, nga Hataja në Ankara.

Trupi i pajetë i pilotit u soll mbrëmë nga Siria në morgun në Hatajë që më vonë gjatë ditës së sotme të dërgohet në Ankara, ku gazetarëve nuk iu lejua xhirimi.

Pas pranimit të trupit të pilotit mbrëmë në spitalin në Hatajë është kryer edhe ceremoniali fetar të cilin e drejtoi kreu i kishës ortodokse në Ataki, Fadi Hurigil.

Kryeministri i Turqisë, Ahmet Davutoglu mëngjesin e sotëm tha se piloti i cili humbi jetën pas rrëzimit të avionit rus që shkeli hapësirën territoriale të Turqisë iu është dorëzuar autoriteteve turke rreth orës 01:45 të natës.

“Pas pritjes nga klerikët ortodoksë rusë në Hatajë të Turqisë sipas bisedimeve trupi i pajetë i pilotit do ti dorëzohet Rusisë”, tha kryeministri turk.

Avionët luftarakë rusë kanë cenuar hapësirën ajrore turke edhe në fillim të tetorit të këtij viti. Pas këtyre dy rasteve, zyrtarët rusë kanë kërkuar falje dhe janë zotuar se incidentet nuk do të përsëriten.

Turqia po ashtu ia tërhoqi vërejtjen Rusisë lidhur me rregullat e angazhimit të saj në kufijtë jugorë të Turqisë, përfshirë edhe reagimin e mundshëm ushtarak. aa

Tiranë: Kujtohen dëshmorët e luftës

Shqipëria nderoi sot dëshmorët e saj të Luftës së Dytë Botërore gjatë ceremonive të organizuara sot në përvjetorin e çlirimit të saj nga pushtuesit nazifashistë.

Presidenti i Republikës, Bujar Nishani, kryeministri Edi Rama, dhe autoritetet të tjera shtetërore vendosën kurora me lule në Varrezat e Dëshmorëve të Kombit pranë monumentit Nënë Shqipëri.

Më pas kryeministri Rama dha një pritje me rastin e Ditës së Çlirimit të Atdheut. Ai tha se 29 Nëntori është “një thirrje për të luftuar për paqen dhe qytetërimin, të cilit paraardhësit tanë zgjodhën t’i përkasin kur nisi Lufta e Dytë Botërore dhe ne kemi zgjedhur t’i përkasim sot kur ka nisur një luftë e pangjashme me të dhe me tjetrën përpara saj”.

Zoti Rama përmendi ngjarje si ajo e 7 dhjetorit 1941 mbi flotën amerikane në Pearl Harbor dhe Kartën e Atlantikut si koalicioni më i madh kundër ideologjisë nazifashiste.

“Komunistë, nacionalistë, shumica thjesht patriotë, pjesa dërrmuese të reja e të rinj, me vështrim të kthjellët dhe kurajë të posaçme, e angazhuan kombin tonë në anën e duhur të historisë dhe bënë histori me luftë, gjak, sakrifica dhe mundime të denja për mirënjohjen dhe respektin e gjithë brezave të ardhshëm” – tha zoti Rama.

Ai shtoi se sot njerëzimi kërcënohet haptas nga diçka edhe më e errët se sa nazizmi, se lufta kundër terrorizmit nuk është vetëm lufta e shteteve kundër terroristëve, por dhe lufta e çdo qytetari kundër frikës që terroristët duan të kallin në çdo familje.

“29 Nëntori na përçon ndjenjën e krenarisë dhe respektit, për çka bënë shqiptarët, duke e shpëtuar dhe e nderuar Shqipërinë, por dhe kurajën e forcën e madhe të shembullit që na nevojitet për të përballuar armikun e ri të jetës sonë prej njerëzish të lirë. Armikun e përbetuar të Europës ku ne jetojmë dhe duam të rritemi për t’u bërë anëtarë të denjë të BE” – shtoi kryeministri Rama.

BE jep 3.2 miliardë dollarë për Turqinë

Bashkimi Evropian ra sot dakort për një ndihmë prej disa miliardë dollarësh për Turqinë, për të përballuar fluksin e emigrantëve të larguar prej shtëpive të tyre për shkak të konflikteve dhe luftërave.

Samiti i mbajtur në kryeqytetin e Belgjikës, Bruksel, mblodhi së bashku udhëheqës të Turqisë dhe të BE-së për të diskutuar rreth një pakete ndihme me vlerë 3.2 miliardë dollarë. Shumica e emigrantëve sirianë që kanë mbërritur në Evropë gjatë këtij viti kanë kaluar përmes Turqisë drejt Greqisë ose Bullgarisë.

Gjatë një konference të përbashkët për shtyp me Kryeministrin e Turqisë Ahmet Davutoglu dhe Presidentin e Komisionit Evropian Jean-Claude Juncker, Presidenti i Këshillit Evropian Donald Tusk u tha mediave se “marrëveshja jonë e përbashkët përcakton një plan të qartë për një rikthim të rregullit në kufirin tonë të përbashkët”.

Zoti Tusk tha gjithashtu se do të “rigjallërohen” bisedimet për anëtarësimin e Turqisë në Bashkimin Evropian.

Turqia është shpallur se përmbush kriteret për anëtarësim në BE që në vitin 1997 dhe ka filluar zyrtarisht proçesin e anëtarësimit në vitin 2005

Kosova rrezikon të shndërrohet në vend autokratik

Që nga fillimi i krizës politike në Kosovë, e cila kishte nisur me sulme retorike ndërmjet pushtetit dhe opozitës, e më pas veprimet e opozitës përmes hedhjes së vezëve ndaj zyrtarëve të Qeverisë së Kosovës, hedhjes së gazit lotsjellës në Kuvendin e Kosovës, e deri tek intervenimi i ashpër i Policisë së Kosovës ditën e shtunë në selinë qendrore të Lëvizjes Vetëvendosje, tregojnë se të dyja palët kanë qasje destruktive ndaj bllokimit të punës në Kuvendin e Kosovës, vlerësojnë njohësit e zhvillimeve politike në vend.

Artan Muhaxhiri, analist i çështjeve politike, duke folur për Radion Evropa e Lirë, vlerëson se pas ditës së shtunë, hendeku ndërmjet pushtetit dhe opozitës në Kosovë, do të jetë edhe më i madh se deri më tash.

Sipas tij, për këtë hendek kanë investuar edhe pushteti, por edhe opozita. Kosova tashmë, siç thotë ai, po përjeton krizën më të madhe politike që nga viti 1999.

“Një bllokadë të tillë, një gjuhë kaq të ashpër dhe një përdorim kaq të shpeshtë të mjeteve eksplozive, por edhe të forcës policore, nuk e kemi parë asnjëherë deri më tash”.

“Kjo është kriza më e madhe dhe për fat të keq, përveç krizës e cila është aktualisht, kjo e paralajmëron edhe një krizë më të madhe që mund të ndodhë në të ardhmen. Kjo, sepse me këtë spektër politik, me këso qëndrimesh, me këtë ideologji të pushtetit dhe opozitës, shteti i Kosovës do të ketë probleme shumë të mëdha në ecurinë e tij”, thekson Muhaxhiri.

Dren Doli, analist nga Grupi për Studime Juridike dhe Politike, thotë për Radion Evropa e Lirë se ngjarjet e fundit politike në vend deri tek intervenimi i Policisë së Kosovës dhe arrestimi i ish-kryetarit të Lëvizjs Vetëvendosje Albin Kurti, duke vënë në zbatim fletarrestin e lëshuar kundër tij, për hedhje të gazit lotsjellës në Kuvend, reflektojnë faktin se problemi aktual i Kosovës është se si të ruhet demokracia, që është vendosur nga ndërkombëtarët dhe e cila tashmë u është lënë në dorë institucioneve të Kosovës.

“Këto të fundit po tentojnë që me mjetet e para të dhunës që i kanë në dorë, ta shkatërrojnë atë. Pra, çështja mbi krizën politike, pas veprimeve të së shtunës të policisë, nuk ka të bëjë tashmë me gjetjen e një zgjidhjeje politike”.

“Por, ka të bëjë me mënyrën se si pushteti në Kosovë duhet të reflektojë mbi atë se çfarë dëshiron të ndërtojë në Kosovë, nëse dëshiron ta ndërtojë Kosovën si një demokraci apo nëse dëshiron ta shndërrojë Kosovën në një vend autokratik, të ngjashëm me Rusinë”, konsideron Doli.

Analisti Muhaxhiri vlerëson se kriza politike, e cila tash e sa muaj po zgjat në Kosovë, ka nxjerrë në pah faktin se politikanët e Kosovës nuk kanë kapacitete politike, e as morale që të vetëdijesohen për faktin se kur është mjaft.

Sipas tij, dërgimi dhe përdorimi i forcave të shumta policore ndaj një subjekti opozitar, është shenjë shumë e keqe për shtetin e Kosovës dhe spektrin politik të saj.

“Tash, pasi që pesë liderët kosovarë nuk po duan dhe nuk kanë as minimumin e vullnetit politik që ta kërkojnë një zgjidhje për këtë bllokadë, atëherë duhet që në skenë të dalë një fuqi politike, e cila është më e madhe sesa pozita dhe opozita kosovare”.

“Ata janë partnerët ndërkombëtarë, Uashingtoni, Brukseli dhe Berlini dhe të bëjnë presion ndaj lidershipit kosovar që ta kërkojnë një zgjidhje. Çdo vazhdim i kësaj bllokade, mund të shkaktojë pasoja edhe në njerëz, por edhe në ndonjë nivel tjetër të konfliktit të armatosur”, shprehet Muhaxhiri.

Analisti Doli vlerëson se secili pushtet e ka të lehtë që krizën politike të tentojë ta zgjidhë nëpërmjetdhunës. Por, sipas tij, edhe për partitë opozitare është e lehtë që duke njohur kapacitetin e dhunës të pushtetit, ta provokojnë atë.

“Problemi në Kosovë është nëse liderët politikë, të cilët kanë detyrimin kryesor për të menaxhuar në baza ditore me institucionet e Kosovës dhe që janë: zoti Thaçi, zoti Mustafa dhe zoti Veseli, janë në gjendje ta kuptojnë rëndësinë e partive politike opozitare dhe ta kuptojnë rëndësinë e demokracisë në Kosovë. Duke e kuptuar këtë rëndësi, t’i japin një shans dialogut politik, duke u ulur me opozitën për të diskutuar çështjet, të cilat këta të fundit po i ngritin”, thotë Doli.

Njohësit e çështjeve politike në vend vlerësojnë se arrestimi i deputetit Kurti ditën e shtunë, duke vënë në zbatim fletarrestin e lëshuar kundër tij, për hedhje të gazit lotsjellës në Kuvendin e Kosovës, por edhe arrestimi i deputetes së Aleancës për Ardhmërinë e Kosovës Donika Kadaj-Bujupi për të njëjtat veprime, vetëm sa i kanë dhënë opozitës shkak që të barrikadohet edhe më fuqishëm në pozicionin e saj kundrejt pushtetit në vend.

Toka bujqësore në Kosovë po degradohet

Kultivimi i lakrës nga një fermer në Kosovë…

Nga degradimi i tokës bujqësore, përfaqësues të sindikatave të bujqve në Kosovë thonë se Kosova po vihet në një pozitë mjaft të vështirë sa i përket sektorit të bujqësisë.

Ata tregojnë se në vit, deri në 1 mijë hektarë tokë bujqësore shndërrohen në zona industriale, në banesa kolektive apo objekte afariste e komerciale.

Rajonet më të prekura nga ky fenomen, thuhet të jenë përgjatë rrugës Prishtinë – Shkup.

Kryetari i Federatës Sindikale të Bujqve, Tahir Tahiri, në një bisedë për Radion Evropa e Lirë, kritikon autoritetet e vendit se nuk janë duke ndërmarrë masat e nevojshme për parandalimin e kësaj dukurie.

“Të gjithë kanë vërejtje, të gjithë konstatojnë se toka bujqësore po uzurpohet, po degradohet, por kjo po vazhdon. Kosova edhe ashtu nuk ka shumë tokë, dhe ne po mbesim pa atë pak tokë bujqësore që kemi. Në shumë prej këtyre tokave janë ndërtuar objekte të ndryshme. Edhe aty ku Ligji i mbron tokat bujqësore, ku është e ndaluar të ndërtohet rreptësisht, edhe aty është ndërtuar”, tregon Tahiri.

Kosova që nga viti 2005 ka në fuqi Ligjin për tokën bujqësore, i cili ka për qëllim krijimin e bazës ligjore për shfrytëzimin, mbrojtjen dhe rregullimin e tokës bujqësore.

Sipas këtij ligji, pronari apo shfrytëzuesi i tokës bujqësore është i detyruar që tokën bujqësore ta shfrytëzojë në mënyrën, e cila u përshtatet vetive natyrore të tokës, duke mos e zvogëluar vlerën e saj dhe duke përdorur masat agroteknike përkatëse.

Ky ligj parasheh edhe dënime për personat fizikë apo juridikë, të cilët ndërrojnë destinimin e tokës bujqësore apo e shfrytëzojnë për qëllime jobujqësore.

Dënimi, sipas ligjit, parasheh një shumë prej 1.000 euro deri në 10.000 euro.

I gjithë ky degradim që i është bërë tokës bujqësore, shton Tahiri, do ta sjell Kosovën në një situatë mjaft të vështirë.

“Kjo do të sjellë varfëri, kjo gjendje e tokës bujqësore në të ardhmen do të shtojë nevojën për importimin e të gjitha produkteve bujqësore, si: gruri, qumështi, misri. Përveç që nuk kemi kushte për t’i punuar këto toka, tash uzurpimi i tokave bujqësore do të ndikojë në zvogëlimin e sipërfaqes të tokës bujqësore, në rënien e kapaciteteve për prodhime bujqësore. Çdo ditë e më shumë po bëhemi të varur nga importi”, potencon Tahiri.

Ditë më parë Agjencia e Statistikave të Kosovës publikoi të dhënat e regjistrimit të bujqësisë.

Sipas të dhënave të fundit të Regjistrimit të bujqësisë, tokë bujqësore llogariten të jenë 413, 635 hektarë apo 41.9 për qind e gjithsej sipërfaqes së tokës në Kosovë.

Prej gjithsej sipërfaqes së shfrytëzuar të tokës bujqësore, pjesa më e madhe i takon livadheve dhe kullotave, me 54.3 për qind.

Numri i përgjithshëm i personave të angazhuar në bujqësi në Kosovë është 362 700.

Në anën tjetër, ekspertë të politikave bujqësore në Kosovë, vazhdimisht kanë kërkuar të bëhet investim në sektorin e bujqësisë.

Halim Gjergjizi, profesor në Fakultetin e Bujqësisë në Universitetin e Prishtinë, në një prononcim për Radion Evropa e Lirë, kishte deklaruar se bujqësia paraqet një ndër mundësitë kryesore të zhvillimit ekonomik, ngase janë resurset.

“Kosova, fatmirësisht, ka një traditë të gjatë në prodhimtari, ka një klimë mjaft të përshtatshme dhe janë disa parakushte shumë të mira dhe ka kërkesa të vazhdueshme për ushqim. Tregu kosovar është i pangopur me produkte bujqësore, ku edhe shumicën e produkteve bujqësore i importojmë”, shprehet Gjergjizi.

Ndryshe, në programin e Qeverisë së Kosovës, i është dhënë një rëndësi e veçantë zhvillimit të bujqësisë.

Luljeta Krasniqi – Veseli

[email protected]

Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

Mitrovicë: Shpërthim në veri, një shqiptar i plagosur

Një qytetar shqiptar është plagosur dhe tetë makina janë dëmtuar nga shpërthimi që ka ndodhur sot në pjesën veriore të Mitrovicës.

“Incidenti ka ndodhur rreth orës 13:00”, ka thënë për Radion Evropa e Lirë zëdhënësi i Policisë së Kosovës, Besim Hoti.

Sipas tij, shpërthimi është shkaktuar pas aktivizimit të një mjeti shpërthyes.

Ngjarja ka ndodhur në lagjen multietnike Tre Rrokaqiejt në veri të Mitrovicës.

Hetimet në lidhje me rastin janë duke vazhduar.

Situata aktuale në Mitrovicë është e qetë. rel

Turqia kthen trupin e pilotit të vrarë rus

Turqia po e kthen trupin e pilotit që vdiq pas rrëzimit të avionit rus që u qëllua me raketë nga forcat turke. Ministri i Jashtëm turk Ahmet Davutoglu tha se trupi u mor të Turqi të shtunën dhe u trajtua sipas traditës orthodokse. Piloti tjetër që ndodhej në avion, i cili doli gjithashtu me parashutë, mundi të shpëtohej. Gjesti i kthimit të trupit të pilotit ndodh ndërsa gjendja e tensionuar tashmë mes Rusisë dhe Turqisë duket se po keqësohet më tej.

Presidenti rus Vladimir Putin ka vendosur sanksione ekonomike ndaj Tuqisë, disa ditë pasi Tuqria qëlloi me rakerë, duke rrëzuar avionin luftarak rus, preanë kufirit mes Turqisë dhe Sirisë.

Zoti Putin nënshkroi të shtunën një dekret, që vendoste sanksione ndaj importit të disa produkteve turke, si dhe pezullimin e rinovimit të kontratave për turqit që punojnë në Rusi.

Por analisti Ahmet Kasim Han thotë se sansionet nuk do të zgjasin shumë:

“Varësia e ndërsjellë mes të dy vendeve është shumë e thellë, prandaj, unë besoj se sanksionet nuk do të zgjasin. Pasi tensioni politik të qetësohet, mendoj se sanksionet do të hiqen.”

Presidenti turk Recep Tayyip Erdogan shprehu të shtunën keqardhje për rrëzimin e avionit rus, duke thënë se vendi i tij ndjente dëshpërim të thellë për këtë incident dhe do të dëshironte që ai të mos kishte ndodhur.

Por fakti që Turqia nuk kërkoi ndjesë në mënyrë të drejtpërdrejtë, duket se e ka zemëruar Rusinë.

“Përsa kohë që nuk shkelen të drejtat tona sovrane, lufta jonë do të vazhdojë përmes kanaleve diplomatike, duke respektuar ligjet dhe marrëveshjet ndërkombëtare.”

Zoti Erdogan tha në një konferencë shtypi se ai shpreson që tensionet mes Turqisë dhe Rusisë të mos shkallëzohen, duke çuar në pasoja ekstreme.

Presidenti turk, po ashtu përsëriti kërkesën për një takim ballë për ballë me zoti Putin në Paris, ku të hënën fillon Takimi Global për Klimën.

Presidenti rus Putin nuk ka dhënë ende përgjigje pozitive për zhvillimin e bisedimeve. za

Erdogani dhe Putini mund të takohen në Paris

Zyra e Presidentit të Republikës së Turqisë të martën kishte kërkuar të biseonte përmes telefonit me Zyren e Presidentit të Rusisë, por Kremlini nuk ishte përgjigjur

ANKARA – Presidenti i Republikës së Turqisë, Recep Tayyip Erdogan dhe presidentit rus, Vladimir Putin mund të takohen në Samitin për Ndryshimet Klimatike në Paris, sipas burimeve nga Zyra e Presidentit të Turqisë.

Të njëjtat burime thanë se oraret e dy presidentëve ende nuk janë përcaktuar.

Zyra e Presidentit të Republikës së Turqisë të martën kishte kërkuar të biseonte përmes telefonit me Zyren e Presidentit të Rusisë, por Kremlini nuk ishte përgjigjur.

Samiti për Ndryshimet Klimatike në Paris do të mbahet më 30 nëntor.

Faqja 76 prej 84« Fillimi ‹ Prapa 72 73 74 757677 78 79 80 Para ›Fundi »

Në Podgoricë është zhvilluar një protestë nga Fronti Demokratik kundër anëtarësimit të Malit të Zi në NATO. Tubimi ka nisur para Kuvendit të Malit të Zi, prej ku protestuesit janë nisur të qetë deri tek monumenti i Shën Pjetrit.

Vazhdojnë shkëndijat mes Ankarasë dhe Moskës.

Komisionarja e Lartë e BE-së, Frederica Mogherini, gjatë qëndrimit në Serbi, ka thënë se data kur mund të hapen bisedimet për kapitujt 32 dhe 35, është 14 dhjetor.

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL