VOAL

Rajon

Bosnja arreston pronarin e një banke dhe dy ndihmësit e tij

Autoritetet në Bosnjë e kanë arrestuar pronarin e një banke private dhe dy ndihmësit e tij, nën dyshimin se kanë kryer veprën penale të pastrimit të parave.

Prokuroria, përmes një deklarate të lëshuar sot, pavarësisht arrestimit të pronarit të Bankës Ndërkombëtare Pavloviq, Slobodan Pavlovic, dhe dy ndihmësve të tij, ka thënë se autoritetet janë duke i vazhduar kërkimet për kapjen e të dyshuarve të tjerë.

Vitin e kaluar, një parti opozitare ka parashtruar padi penale kundër presidentit serb të Bosnjës, Milorad Dodik, me pretendimin se ai e ka blerë një vilë në Beograd të Serbisë, me çmim prej 750 mijë eurosh dhe se e ka marrë një kredi me të njëjtën shumë një vit më vonë në bankën Pavloviq.

Sipas një deklarate të mëhershme nga Partia Demokratike Serbe, Pavloviq asokohe ia ka paguar kredinë Dodikut, në këmbim të favoreve që nuk janë specifikuar.

Dodik në vazhdimësi i ka mohuar akuzat.

Zëvendëskryeministrit rus i ndalohet hyrja në Mal të Zi

Zëvendëskryeministri i Rusisë, Dmitry Rogozin

Autoritetet në Mal të Zi kanë njoftuar sot se zëvendëskryeministrit rus, Dmitry Rogozin, ia kanë ndaluar hyrjen në vendin e vogël të Ballkanit.

Ministria e Jashtme malazeze ka njoftuar sot se Rogozin është në mesin e 50 politikanëve dhe biznesmenëve rusë, të cilët e kanë të ndaluar që të hyjnë në Malin e Zi.

Kombi i cili i ka rreth 600 mijë banorë, i cili është duke kërkuar anëtarësimin në Bashkimin Evropian dhe në NATO, ka miratuar sanksione perëndimore kundër Rusisë për shkak të rolit të saj në krizën në Ukrainë.

Ministria e Jashtme tha se Milani Knezeviq, udhëheqës i partisë pro-ruse, Partia Demokratike Popullore, e kishte ftuar zëvendëskryeministrin rus, Dmitry Rogozin, pa u konsultuar me autoritetet e Malit të Zi.

Gjenerali serb i Bosnjës vdes në burgun e Hagës

Gjenerali serb i Bosnjës Zdravko Tolimir

Gjenerali serb i Bosnjës, Zdravko Tolimir, ka vdekur mbrëmë në burgun e Hagës, ku ai po e vuante dënimin e përjetshëm për gjenocid.

Udhëheqësi serb i angazhuar për bashkëpunim me Tribunalin e Hagës për krimet në ish-Jugosllavi, Rasim Ljajiq, i ka thënë televizionit serb RTS se Tolimir ka vdekur mbrëmjen e së hënës, në qendrën e paraburgimit të gjykatës së OKB-së.

Vdekja e tij është konfirmuar sot edhe nga Tribunali i Hagës.

“Ai është marrë i sëmurë nga qendra e paraburgimit të gjykatës mbrëmë rreth orës 09.00. Ai ka marrë përkujdesje mjekësore, por ai vdiq”, ka thënë sot zëdhënësi i Tribunalit të Hagës, Nenad Golqevski.

Tolimir, 67 vjeçar, konsiderohet të ketë qenë krahu i djathtë i shefit të ushtrisë serbe në Bosnjë, Ratko Mladiq, i cili aktualisht është duke u gjykuar në Hagë.

Zdravko Tolimir është dënuar në vitin 2012 me burg të përjetshëm për rolin e tij në gjenocid, për krime kundër njerëzimit dhe për krimet e luftës të kryera gjatë viteve 1992-1995 në Bosnjë.

Gjatë luftës në Bosnjë kanë vdekur rreth 100 mijë persona.

Dënimi ndaj Zdravko Tolimir e ka marrë mbështetjen e dhomës së apelit në vitin 2015.

Shkarkohet njëzëri ministri serb i Mbrojtjes për shkak të komenteve seksiste

Kuvendi i Serbisë ka shkarkuar nga detyra ministrin e Mbrojtjes, Bratisllav Gashiq.

Votimi me 195 vota për, aq sa edhe ka qenë numri i deputetëve të pranishëm në sallë, ka ardhur pas kërkesës së kryeministrit të Serbisë, Aleksandar Vuçiq, që Kuvendi të mbështesë propozimin e tij për shkarkimin e Gashiqit për shkak të komenteve seksiste.

Në një konferencë më 7 dhjetor, Gashiq ka parë një gazetare duke u gjunjëzuar, për të mos penguar pamjet e kamerave, dhe ka thënë: “Më pëlqen kur gazetaret gjunjëzohen kaq lehtë”.

Komentet e tij kanë shkaktuar disa protesta nga gazetarët në Serbi

Birn – Këshilltari presidencial pushohet nga puna për amnistimin e mikut të vet – Nga Sven Milekic

Në foto Kolinda Grabar Kitarovic (majtas) dhe Tihomir Oreskovic (djathtas). | Foto: Zyra e Presidentit

Voal – Një këshilltar i presidentes kroate u detyrua të japë dorëheqjen pasi u zbulua se duke përdorur postin e tij u përpoq të siguronte një amnisti të pjesshme për një mik të djalit të tij të ndarë nga jeta.

Presidentja e Kroacisë Kolinda Grabar Kitarovic detyroi këshilltarin e saj kushtetues dhe ligjor Vladimir Seks, të japë dorëheqjen të mërkurën, pasi u zbulua se ai kishte synuar të siguronte falje presidenciale për një person të njohur prej tij.

Seks, një anëtar me ndikim i partisë në pushtet, Bashkimi Demokratik Kroat, HDZ, të cilës Grabar Kitarovic i përkiste para se të bëhej presidente, u bë këshilltar i presidentit në prill të këtij viti pasi la detyrën si deputet i parlamentit.

Seks ka qenë një nga hartuesit e Kushtetutës së Kroacisë në vitin 1990, komandant i bazës së krizës gjatë mbrojtjes së Kroacisë lindore në vitin 1991, prokuror i përgjithshëm më 1992 dhe zëvendës kryeministër mes viteve 1992-94. Ai ka qenë kryetar i parlamentit mes viteve 2003 dhe 2007.

Zyra e presidentit njoftoi të mërkurën se Seks është liruar nga detyra. Më pas, Seks tha se ai dha dorëheqjen pasi një gjë e tillë iu kërkua nga Presidentja kur u zbulua se ai po kërkonte të falej dikush që ai njihte.

“Unë kërkova falje për çështjen e Vanja Goldberger për shkak se e ndjeja si përgjegjësi morale… unë pata mbështetur sigurimin e një faljeje presidenciale për të dhe presidentja ndjeu se kjo qe diçka e gabuar, duke pasur parasysh marrëdhënien time speciale me të,” tha Seks.

“Unë e respektoj këtë opinion dhe firmosa dorëheqjen,” tha ai.

Komisioni presidencial për faljet, i cili përbëhet nga ekspertë ligjorë me eksperiencë, propozon emrat e njerëzve që mund të përfitojnë reduktim të masës së dënimit nga autoriteti i presidentit.

Seks dha dorëheqjen pasi u zbulua se Goldberger, i dënuar për dy vjet e gjysmë burg me akuzat për posedim droge dhe armëmbajtje pa leje, pati qenë mik i ngushtë i djalit të tij të vdekur Domagoj.

Domagoj Seks, i cili u gjet i vdekur në Plazhin Goa në Indi në vitin 2005, e njihte Goldberger nga koha kur ata drejtonin Qendrën Autonome të Kulturës Atak, një Organizatë Jofitimprurëse që promovonte kulturën alternative.

Goldberger ka vuajtur deri tani një vit e dhjetë muaj burg nga dënimi i tij.

Rasti i tij nuk është i vetmi rast i një faljeje presidenciale që krijon habi në Kroaci.

Grabar Kitarovic ka falur gjithashtu Leon Sulic, një nga ish pronarët e kompanisë së transportit Croatia Bus, i cili ka pasur disa dënime për përvetësim gjatë viteve 1990.

Gjykata e Lartë e pati dënuar atë dy herë: pesë vjet në vitin 2010 për përvetësimin e mbi 2 milionë eurove dhe një vit e dhjetë muaj më 2014 për përvetësimin e 75 mijë eurove.

Nga çasti që Sulic u dënua në mars 2014, Sulic nuk u paraqit të vuajë dënimin duke pretenduar se qe i sëmurë. Një gjykatë vendosi se ai qe në gjendje fizike për të vuajtur dënimin dhe policia e arrestoi atë më dhjetor 2014, kur nuk iu përgjigj thirrjeve për t’u paraqitur vetë në burg.

Me ligj, presidenti nuk ka nevojë të shpjegojë arsyet për reduktimin e një dënimi. Gjithsesi, në këtë rast, komisioni deklaroi se “kushtet e tij veçanërisht të vështira shëndetësore” si dhe “koha e konsiderueshme” që kishte kaluar nga kryerja e krimit, përbënin bazë për falje. Sulic raportohej si donator i partisë HDZ gjatë viteve të fundit.

Grabar Kitarovic fali gjithashtu juristin Danko Seiter, i burgosur më 2015 me një vit burg për abuzim me detyrën si anëtar i bordit të bankës private Karlovac.

Seiter u dënua pasi miratoi një kredi të paligjshme prej 145 mijë eurosh në vitin 1998 për sipërmarrësin Nikola Hanzel, i cili qe donatori më i madh i fushatës për president të Grabar Kitarovic ku pati dhuruar 26 mijë euro. Hanzel po pret rigjykim.

Dënimi me burg i Seiter do të zëvendësohet me dy vjet liri me kusht. Komisioni argumentoi sërish se baza për lirinë me kusht qe “gjendja e keqe shëndetësore” e të dënuarit./reporter.al

Zagrebi nuk e lejon presidentin serb të vizitojë Kroacinë

Kroacia ka vendosur të mos ‘ia japë dorën’ Serbisë deri sa të zgjidhen disa probleme të mbetura që nga koha e luftës.

Së fundi presidenti serb Tomislav Nikoliç kishte vendosur të vizitonte Kroacinë, por kjo e fundit ia ka ndaluar diçka të tillë.

Sipas gazetës serbe ‘Blic’, shkak i kësaj ndalese kanë qenë të pagjeturit e luftës dhe kthimi i pasurive, të cilat Zagrebi i ka vendosur si kusht për marrëdhënie normale mes dy shteteve.

Ka qenë vetë kabineti i presidentes kroate, Kolinda Grabar, ai që e ka konfirmuar diçka të tillë për gazetën serbe.

‘Kushtet e presidentes së Kroacisë për t’u takuar me homologun e saj serb janë zgjidhja e çështjes së të zhdukurve gjatë luftës, kthimi i pasurive, kthimi i thesareve kulturore e lëndëve arkivore si dhe zgjidhja e problemit kufitar në Danub’, ka thënë një nga anëtarët e kabinetit të presidentes kroate.

Senati rumun votoi për t’ia hequr imunitetin Opreas

Senati rumun votoi sot për t’ia hequr imunitetin ish zëvendës kryeministrit Gabriel Oprea duke i hapur rrugën një hetimi kriminal lidhur me akuzat se ai ka porositur makina të paautorizuara për vete dhe për zyrtarë të tjerë. Rumania shihet si një nga vendet më të korruptuara të Bashkimit Evropian dhe sistemi i saj i drejtësisë është nën vëzhgim të posaçëm nga BE-ja, megjithëse prokurorët e saj kanë marrë vlerësime nga ekzekutivi i BE-së për shtimin e përpjekjeve kundër rryshfeteve dhe abuzimeve të pushtetit.

Prokurorët anti-korrupsion e akuzuan muajin e kaluar ish zëvendës kryeministrin Oprea, i cili ka qenë edhe ministër i brendshëm, se ka porositur makina të paautorizuara për vete dhe për kryeprokurorin Tiberiu Nitu.

“Unë mendoj se nuk e kam abuzuar pushtetin si ministër, se nuk kam përfituar përtej privilegjeve të pakta të funksionit. Kështu që e konsideroj veten të pafajshëm”, tha zoti Oprea para se deputetët të votonin.

Senati, dhoma e lartë e parlamentit rumun, votoi 102-30 për heqjen e imunitetit të Gabriel Opreas. Ai dhe kryeprokurori Nitu i mohojnë akuzat.

Tiberiu Nitu dha dorëheqjen të martën ndërsa Oprea në nëntor përkrah kryeministrit Victor Ponta pas një zjarri vdekjeprurës në një klub nate që solli protesta masive. Ponta përballet tani me akuza për fallcifikime dhe pastrim parash.

Çështja e zotit Oprea doli në pah në tetor pasi një nga oficerët e tij të policisë vdiq kur motoçikleta e tij u përplas në një gropë në qendër të Bukureshtit.

Sipas ligjit rumun, vetëm presidenti, kryeministri dhe dy kryetarët e parlamentit mund të kenë makina shoqërimi, ndërsa ministrat mund t’i përdorin ato vetëm për raste emergjente.

Prokurorët e anti-korrupsionit kanë ndërmarrë disa hetime ndaj zyrtarëve të lartë gjatë viteve të fundit në përpjekje për të goditur korrupsionin e gjerë që ka irrituar njerëzit në Rumani.

Kitaroviç – Oreshkoviç: Politika e jashtme dhe diplomacia ekonomike në mesin e prioriteteve

Theksi është vënë në mbrojtjen dhe sigurinë kombëtare, politikën e jashtme dhe diplomacinë ekonomike

SARAJEVË – Presidentja e Republikës së Kroacisë, Kolinda Grabar Kitaroviç dhe kryeministri i këtij vendi, Tihomir Oreshkoviç realizuan takimin e parë të punës në të cilin biseduan për një sërë temash aktuale.

Theksi është vënë në mbrojtjen dhe sigurinë kombëtare, politikën e jashtme dhe diplomacinë ekonomike.

Është dakorduar vazhdimi i takimeve të rregullta të punës me qëllim të harmonizimit të aktivitetit politik dhe ruajtjen e stabilitetit dhe sigurisë në Republikën e Kroacisë.

Leme Xhema nënkryetare e Medvegjes, në koalicion me partinë e Vuçiçit

Ish-drejtoresha e përgjithshme e PTK-së, Leme Xhema është zgjedhur nënkryetare e Komunës së Medvegjës në Serbi

Partia e Leme Xhemës, Partia për Veprim Demokratik e Riza Halimit, në këtë Komunë, ka arritur marrëveshje koalicioni me partinë e kryeministrit të Serbisë, Aleksandër Vuçiç, raporton portali Infokusi.
Përpos pozitën e nënkryetares, PVD ka fituar edhe pozitën e nënkryetarit të Kuvendit Komunal.

Turqia: Një avion ushtarak rus shkeli hapësirën tonë ajrore

ANKARA – Autoritetet turke pretendojnë se një avion rus ka shkelur hapësirën ajrore të Turqisë, një ditë më parë. Ministri i Jashtëm turk deklaroi se një avion ushtarak rus SU-34 ka shkelur hapësirën ajrore turke të premten, pavarësisht paralajmërimeve nga radari.

Ministria e Jashtme turke ka thirrur për sqarime ambasadorin rus në Ankara. Sipas Turqisë, shkelja e hapësirës ajrore është shenjë e pastër se Rusia dëshiron që marrëdhëniet mes dy vendeve të përkeqësohen.

Në muajin nëntor, Turqia rrëzoi një aeroplan luftarak rus, me pretendimin se shkeli hapësirën ajrore, incident ky që u pasua me sanksione dhe prishje të raporteve mes dy vendeve.

Mbyten së paku 33 emigrantë në brigjet turke

Së paku 33 persona kanë vdekur si rezultat i përmbysjes së anijes së tyre në brigjet turke, teksa po përpiqeshin të shkonin në Greqi.

Zyrtarët nga Turqia kanë thënë se 75 persona të tjerë janë shpëtuar, por kanë frikë se mund të ketë edhe viktima të bllokuara brenda në anijen që është fundosur.

Organizata Ndërkombëtare për Migrim thotë se më shumë se 250 persona kanë vdekur vetëm në muajin janar duke u përpjekur të hyjnë në Evropë.

Kjo organizatë thotë se gjatë tërë vitit 2015, 805 persona kanë vdekur si rezultat i përmbysjes së anijeve apo barkave në brigjet turke apo greke.

Më shumë se një milion emigrantë kanë hyrë përmes detit, gjatë vitit të kaluar në Evropë.

Migrantët vijnë kryesisht nga Siria e shkatërruar nga lufta, por edhe nga Iraku dhe Afganistani.

Në Turqi aktualisht gjenden rreth 2.5 milionë refugjatë nga Siria.

Kryeministri Gjukanoviç e fitoi votëbesimin

Pamje nga punimet e djeshme të Kuvendit të Malit të Zi

Kryeministri Millo Gjukanoviç, e ka fituar votëbesimin në Kuvendin e Malit të Zi, pas mospajtimeve që u paraqitën në koalcionin qeverisës, për shkak të marrjes së ftesës për pranim në NATO.

Por, Gjukanoviçit i është dashur të mbështetet në një parti opozitare, pasi një partner i koalicionit e braktisi partinë e zotit Gjukanoviç.

Në kuvendin me 81 deputetë, 42 votuan për, 20 ishin kundër, ndërsa mungonin 19 deputetë.

Ky votim praktikisht paraqet fund të aleancës politike, prej vitit 1998, që ka ekzistuar ndërmjet Partisë Demokratike të Socialistëve të Gjukanoviçit dhe Partisë Socialdemokrate.

Zëri i Amerikës: Përfundoi raundi i ri i bisedimeve Kosovë – Serbi

Shefja e politikës së jashtme të Bashkimit Evropian, Federica Mogherini, tha se ato u zhvilluan në një atmosferë të mirë dhe janë diskutuar cështjet që kanë të bëjnë me zbatimin e marrëveshjeve të arritura deri tash.

“U konfirmua se njohja e ndërsjellë e diplomave dhe certifikatave shkollore po bëhet realitet. Mbi këtë bazë studentët do të jenë në gjendje të vazhdojnë studimet e tyre ndërsa ata me diploma profesionale do të jenë në gjendje të përmirësojnë aftësitë e tyre të punës edhe në Serbi edhe në Kosovë. Ne kemi përparur ndjeshëm edhe në zbatimin e marrëveshjes për lirinë e lëvizjes, posacërisht në fushën e përdorimit të targave të regjistrimit”, thuhet në një komunikatë të zyrës së zonjës Mogherini.

Diskutimet, thuhet më tej, u përqëndruan edhe në përkushtimin e të dyja palëve për të punuar në zbatimin e marrëveshjes për asociacionin e komunave me shumicë serbe.

Të dyja palët janë pajtuar që të fillojnë diskutimet për lidhjet ajrore dhe hekurudhore ndërmjet Kosovës dhe Serbisë, thuhet në njoftim.

Zonja Mogherini vlerëson përkushtimin e të dy kryeministrave për normalizimin e marrëdhënieve, ndërsa thekson se takimi i sotëm dëshmon vullnetin e tyre për të ecur përpara me një qasje konstruktive.

Palët kanë qëndrime krejt të ndryshme rreth marrëveshjes për asociacionin e komumave me shumicë serbe.

Kryeministri i Kosovës, Isa Mustafa tha se asociacioni mund të zbatohet “vetëm në suaza të vendimit të Gjykatës Kushtetuese të Kosovës të marrëveshjes së parë dhe të ligjit të ratifikimit të marrëveshjes së parë. Asgjë nuk do të funksionojë në Kosovë nëse nuk është në suaza të Kushtetutës së Republikës së Kosovës. Kjo është e qartë edhe për palën serbe”, tha ai duke nënviizuar se palët nuk janë pajtuar për asnjë afat kohor për formimin e Asoaciacionit.

Gjykata Kushtetuese e Kosovës, vlerësoi në dhjetor të vitit të kaluar se marrëveshja për asociacionin e arritur me 25 gusht të vitit 2015, nuk është në përputhje me Kushtetutën e Kosovës.

Kryeministri serb Aleksandër Vuçiç, tha gjatë mbrëmjes së të mërkurës se nuk pranon asnjë vendim të, siç ka thënë ai, të ashtuquajturës Gjykatë Kushtetuese të Kosovës.

Marrëveshja për krijimin e asociacionit të komunave me shumicë serbe, çoi në një krizë të rëndë politike në Kosovë.

Opozita bllokoi punën e parlamentit dhe u hodh në protesta edhe në rrugë për të kundërshtuar mërrveshjen që u jep më shumë autonomi serbëve në veriun e Kosovës.

Ajo i kërkon qeverisë dorëheqjen në dritën e vendimit të Gjykatës Kushtetuese të Kosovës.

Qeveria i ka bërë thirrje opozitës për dialog politik ndërsa është zotuar se do të zbatojë në tërësi vendimin e Gjykatës Kushtetuese në procesin e mëtejmë të hartimit të dokumenteve mbi asociacionin.

Opozita ngulë këmbë për zgjedhje të parakohshme.

Bisedimet ndërmjet Kosovës dhe Serbisë mund të ndëpriten më pas për shkak të zgjedhjeve të paralajmëruara të parakohshme parlamentare në Serbi, që pritet të mbahen në muajin prill.

Ato zgjedhje dhe situata aktuale në Kosovë, mund të zgjasin periudhën e “heshtjes” se bisedimeve.

Të ndërmjetësuara nga Bashkimi Evropian, bisedimet ndërmjet të dyja palëve për normalizimin e marrëdhënieve ndërmejt tyre, i siguruan Kosovës, Marrëveshjen e Stabilizim Asocimit, që u nënshkrua në tetor të vitit të kaluar ndërsa javën që lamë pas u miratua nga Parlamenti Evropian.

Ato i siguruan Serbisë hapjen e negociatave për anëtarësim në BE, kapitujt e parë të të cilave u hapën me 14 tetor.

Synimi për integrime evropiane, bëri që Serbia të ulet në tryezën e bisedimeve ndonëse vazhdon të kundërshtojë pavarësinë e Kosovës e cila më 17 shkurt shënon përvjetorin e tetë të saj.

Deklaratat e Nikoliçit nga pozita injorante dhe raciste – tejet të rrezikshme

Deklarata e kryetarit të Serbisë, Tomisllav Nikoliçi, me rastin e vënies së gur-themelit të Qendrës së Përsosmërisë në Universitetin e Kragujevcit në Serbi, në kuadër të së cilës do të jetë edhe Qendra për hulumtimin e qelizave amë, se duhet ruajtur “kodi serb”, ka nxitur reagime dhe komente të ndryshme në Serbi.

Bashkëbiseduesit e Radios Evropa e Lirë, të cilët kanë reaguar ndaj deklaratës së Nikoliqit, e kanë klasifikuar këtë deklaratë si pjesë të korpusit të argumenteve të paditurisë elementare të kryetarit të shtetit serb.

Por, ja çfarë ka thënë Nikoliq.

“Për të pasur fëmijë, çifti bashkëshortor, nganjëherë ose shpesh, duhet t’i drejtohet mjekut. Nganjëherë apo shpesh, kërkon zgjidhje jashtë shtetit. Kjo zgjidhje duhet të jetë këtu dhe ata fëmijë duhet të jenë fëmijë serbë, me material gjenetik serb, me kod serb, me të kaluar dhe të ardhme serbe”, ka thënë kryetari i Serbisë, Nikoliq.

Biljana Stojkoviq, eksperte e gjenetikës dhe profesoreshë në Katedrën për evolucion dhe gjenetikë në Universitetin e Beogradit , vlerëson se kjo deklaratë e Nikoliqit, për të, si pedagoge, është qesharake.

Por, duke e analizuar nga prizmi i një qytetareje, Stojkoviq thotë se kjo është deklaratë e rrezikshme për shoqërinë.

“Kemi folur mjaft rreth asaj se nuk ekzistojnë gjene serbe, kroate , spanjolle, etj… “.

“Të gjithë njerëzit, të gjithë popujt janë përzierje e një numri të madh të varianteve gjenetike, gjatë historisë së evolucionit të njerëzimit. Kjo për ne është mjaft e qartë. Por, pavarësisht që biologjia flet mjaft për këtë, në mendjet nacionaliste edhe më tutje flitet për esencën gjenetike të këtij apo atij populli dhe kjo po shpërfaqet edhe përmes kësaj deklarate të kryetarit Nikoliq”, ka thënë profesoresha Stojkoviq.

Dimitrije Kaleziq, profesor në pension i Fakultetit Teologjik në Beograd, thotë se botëkuptimi i tillë, siç e ka shpërfaqur kryetari serb Nikoliq, nuk është në përputhje me mësimet kishtare.

“E dini pse? Njerëzimi, apo njerëzia, nuk është vetëm biologji. Nuk është vetëm atome, neutrone e të tjera, por është personaliteti i kompletuar”.

“Fundja, e dimë nga historia dhe kemi shembuj që persona të caktuar fillimisht i kanë takuar një populli e më pas një tjetri dhe çfarë kanë bërë dhe çfarë kanë mësuar. Sipas mësimeve ortodokse, familja ortodokse mund të adoptojë fëmijë nga cilido popull dhe ta pranojë dhe edukojë atë si fëmijë të vetin”, ka theksuar Kaleziq.

Profesori i dramaturgjisë, Nenad Prokiq vlerëson se, fillimisht, qelizat amë nuk kanë të bëjnë me lindjen e fëmijëve (për faktin se, në kuadër të Qendrës për qelizat amë në Kragujevc, nuk është paraparë ndërtimi i qendrës për mbarsim artificial).

Ndërkaq, sipas tij, përmendjen e “Kodit serb” nga ana e Nikoliqit, ai e radhit në matricën ideologjike, pasuesi më famëkeq i së cilës ishte Dr. Mengele.

“Deklaratat e kryetarit janë përzierje e kobshme e mosdijes dhe një ideologjie, e cila bredh nga gjenocidi deri te qelizat amë. Nuk kemi aq nevojë për qelizat amë sa kemi nevojë për një politikë të ndershme, e cila do t’u jepte shansin edhe fëmijëve të shëndoshë, por edhe të sëmurë, që të mjekohen në Serbi dhe që të ardhmen ta realizojnë këtu, e jo në qarkun polar të Suedisë”.

“Kjo është ideologji e Dr.Mengeles. ‘Kodi serb’, ‘e ardhmja serbe’, ‘fëmijët serb’, ‘populli serb’… Kësaj po i mungon vetëm edhe ‘raca serbe’.Unë shpresoj që me ato qeliza amë të shërohen, për shembull, edhe hungarezët në Serbi. Kryetari Nikoliq vazhdimisht po harron se ai është kryetar i qytetarëve serbë e jo i popullit serb ose kombit serb”, ka theksuar Prokiq.

Ndërsa profesoresha Stojkoviq ka theksuar se deklaratat e tilla të dëmshme për shoqërinë, nuk do të duhej të kalonin pa reagime të gjera, të cilat do t’i bënin ato të pakuptimta.

Në Bruksel po mbahet raundi i ri i bisedimeve Kosovë – Serbi

Në takimin që filloi në orët e vona të pasitës së të mërkurës ndërmjet kryeministrit të Kosovës, Isa Mustafa dhe kryeministrit serb Aleksandër Vuçiç, që po ndërmjetësohet nga shefja e politikës së jashtme të Bashkimit Evropian, Federica Mogherini, palët do të diskutojnë zbatimin e marrëveshjeve të arritura deri tash dhe rrugën përpara në bisedime.

Takimi i së mërkurës ndodhë pas marrëveshjes së arritur ndërmjet palëve më 25 gusht të vitit të kaluar për krijimin e asociacionit të komunave me shumicë serbe, që coi në një krizë të rëndë politike në Kosovë.

Opozita bllokoi punën e parlamentit dhe u hodh në protesta edhe në rrugë për të kundërshtuar mërrveshjen që u jep më shumë autonomi serbëve në veriun e Kosovës.

Ajo i kërkon qeverisë dorëheqjen në dritën e vendimit të Gjykatës Kushtetuese të Kosovës, e cila vlerësoi në dhjetor të vitit të kaluar se marrëveshja për asociacionin nuk është në përputhje me Kushtetutën e Kosovës.

Opozita ngulë këmbë për zgjedhje të parakohshme.

Bisedimet ndërmjet Kosovës dhe Serbisë mund të ndëpriten më pas për shkak të zgjedhjeve të paralajmëruara të parakohshme parlamentare në Serbi, që pritet të mbahen në muajin prill.

Ato zgjedhje dhe situata aktuale në Kosovë, mund të zgjasin periudhën e “heshtjes” se bisedimeve.

Ato i siguruan Serbisë hapjen e negociatave për anëtarësim në BE, kapitujt e parë të të cilave u hapën me 14 tetor.

Ndërhyri në gjykimin e Naser Kelmendit, arrestohet Radonçiçi, politikan boshnjak

Një pasanik boshnjak njëherësh udhëheqës i njërës nga partitë e koalicionit qeverisës në Bosnjë e Hercegovinë, Fahrudin Radonçiç, është arrestuar nën dyshimin për “pengim të drejtësisë”, pak javë para se vendi ballkanik të shtrojë kërkesën për anëtarësim në Bashkimin Evropian.

Fahrudin Radonçiç, ish pronar pronar i gazetës më të madhe në Bosnjë, Dnevni Avaz, drejton Bashkimin për një të Ardhme më të mirë, një nga partitë e koalicionit qeverisës.

Më herët gjatë këtij muaji, dy pjesëtarë të kësaj partie janë arrestuar nën dyshimin për frikësimin e një dëshmitari në procesin gjyqësor që po zhvillohet në Kosovë, kundër të akuzuarit Naser Kelmendi, që konsiderohet si një nga shefat e drogës në Ballkan.

naserkelmendi

Një vit më parë, në Prishtinë filloi procesi gjyqësor kundër Naser Kelmendit, shtetas boshnjak me prejardhje nga Kosova, i cili ndodhet në listën e Shteteve të Bashkuara si një nga bosët ndërkombëtarë të drogës.

Akuza e ngarkon atë me veprat penale krim i organizuar, vrasje e rëndë,blerje, posedim,shpërndarje dhe shitje të paautorizuar të narkotikëve të rrezikshëm dhe substancave psikotropike.

Akuza e ngarkon atë si drejtues të një grupi të organizuar kriminal, për vrasjen në vitin 2007 të myslimano-boshnjakut, Ramiz Dalaliç, i cili qe bërë një figurë kryesore në krimin e organizuar pas luftës, përfshirë edhe prodhimin dhe përpunimin e 100 kilogramëve drogë të tipit heroinë, 150 mijë tabletave “ecstasy”, etj.

Naser Kelmendi i lindur në vitin 1958 në Pejë, në Kosovën perëndimore u arrestua më 6 maj të vitit 2013, në bazë të urdhër arrestit ndërkombëtarë, të lëshuar nga autoritet boshnjake.

Bosnja, ku ai ishte hetuar për për një kohë të gjatë, kishte kërkuar dorëzimin e tij pas arrestimit, por kjo ishte pamundësuar meqë ajo nuk e njeh pavarësinë e Kosovës dhe rrjedhimisht nuk ka një marrëveshje të tillë. Rastin e mori përsipër Misioni i Bashkimit Evropian për sundimin e ligjit.

Mediet në disa vende Ballkanike e cilësojnë Naser Kelmendin atë si një prej njerëzve kryesor të krimit të organizuar në rajon, ndërsa në listën amerikane emri i i tij radhitet përkrah atij të kreut të kartelit meksikan të drogës, Hoze Antonio Sota Gastemula, dhe atij të tregtarit afgan, Sajed Vazir Shah në një listë prej 97 personash.

Më 1 qershor të vitit 2012, nga Departamenti i Thesarit, të Shteteve të Bashkuara të Amerikës, Naser Kelmendi është identifikuar nën aktin për Bosët e Narkotikëve të Jashtëm, si një trafikant i lëndëve narkotike.

Krimi i organizuar vazhdon të jetë një prej sfidave më të mëdha me të cilat përballen vendet e Ballkanit perëndimorë, por dënimet janë të pakta. Disa zyrtarë të lartë të Bosnjës dhe Hercegovinës janë hedhur ne gjyq për krim të organizuar dhe korrupsion, por deri tash nuk ka pasur të dënuar për këto vepra.

Zyrtarët e partisë sëFahrudin Radoniçiçit, thanë se arrestimi i tij dhe dy zyrtarëve të tjerë të kësaj partie janë veprime të “mafias juridike”.

Gjuriçi: Zgjedhjet parlamentare të Serbisë edhe në Kosovë

Zgjedhjet parlamentare të Serbisë do të mbahen edhe në Kosovë, në mjediset e banuara me serbë, ka deklaruar drejtori i Zyrës për Kosovën në Qeverinë e Serbisë, Marko Gjuriçi, gjatë një vizite në komunën e Ranillugut, e banuar me popullatë shumicë serbe në Kosovë.

“Zgjedhjet parlamentare do të mbahen në tërë territorin e vendit tonë, përfshirë edhe Kosovën, gjegjësisht, mjediset në të cilat jetojnë serbët këtu. Konsideroj që rreth kësaj nuk do të duhej të kishte probleme”, ka theksuar Gjuriq.

Ai ka shtuar se pret që, në frymën e normalizimit të marrëdhënieve, të mos ketë çfarëdo obstruksionesh.

“Madje edhe ata që kanë pikëpamje tjetër për statusin e Kosovës, pra, ata që mendojnë se Kosova është shtet i pavarur, duhet ta kenë parasysh faktin që edhe në shtetet e pavarura mbahen zgjedhjet parlamentare, kur aty janë pjesëtarët e popullit që i takon shtetit fqinj”, ka thënë Gjuriq.

Sipas tij, Prishtina nuk ka arsye që të hidhërohet për këtë shkak.

Përurohet në Saraj të Shkupit shtatorja e Isa Boletinit

Sot bëhen 100 vite nga vrasja në Podgoricë e komandantit të forcave shqiptare, Isa Boletini, nga malazezët

SHKUP – Në Komunën e Sarajit të Shkupit, me një ceremoni solemne u inaugurua shtatorja e heroit kombëtar shqiptar, Isa Boletinit. Shtatorja është donacion nga shoqata “Vatra” e Dërvenit, ndërsa është punuar në Shqipëri nga skulptori Idriz Balani).

Kryetari i Komunës së Sarajit, Bekim Murati, tha se është nder dhe kënaqësi që shtatorja e Isa Boletinit është vendosur në komunën që drejton ai. Ai theksoi se është obligim për gjeneratat e sotme të nderojnë këto figura heroike kombëtare.

“Padyshim se kjo është një ditë shumë e veçantë…, por është një ditë që shënon gjithë historinë dhe gjeografinë shqiptare për të cilën baca Isë luftoi deri në frymën e fundit të jetës së tij”, tha ai.

Kryetari i Bashkimit Demokratik për Integrim (BDI), Ali Ahmeti, tha se armiqtë heroin kombëtar e vranë fizikisht, por nuk mundën t’i shesin ëndrrat, qëllimet dhe idealet e Isa Boletinit. Ai shtoi se Isa Boletini sot është bashkë me të gjithë heronjtë e tjerë të kombit, të cilët gjithmonë do të nderohen.

Në ceremoninë e inaugurimit të shtatores, të pranishëm ishin krerë të lartë shqiptar të vendit, kryetarë të komunave të Kosovës dhe të ftuar të tjerë.

Sot bëhen 100 vite nga vrasja e komandantit të forcave shqiptare, Isa Boletini, i cili u vra më 23 janar të vitit 1916 në Podgoricë nga malazezët. aa

isa valle

Bisedime Biden-Erdogan pas akuzave për autoritet absolut në Turqi

STAMBOLL – Kryeministri turk, Ahmet Davutoğlu është takuar sot me zëvendëspresidentin e SHBA-ve, Joe Biden.

Takimi i cili nisi në orën 11.20 sipas orës lokale në zyrën kryeministrore në Dolmabahçe të Stambollit është realizuar me dyer të mbyllura për median.

Në takim kanë qenë të pranishëm edhe ministri i Jashtëm turk, Mevlüt Çavuşoğlu, nënsekretari i Ministrisë së Punëve të Jashtme, Feridun Sinirlioğlu dhe kreu i Shërbime Inteligjente të Turqisë, Hakan Fidan.

Joe Biden do të takojë sot edhe presidentin Rexhep Tajip Erdogan për bisedime, në fokus lufta kundër grupit të Shtetit Islamik dhe konflikti sirian, një ditë pas deklaratave me tone kritike të zëvendëspresidentit amerikan kundër shkeljes së lirisë së shprehjes në Turqi.

Në ditën e parë të vizitës së tij zyrtare në Stamboll, Biden kritikoi regjimin islamiko-konservator të Erdogan-it duke e paraqitur si një shembull aspak të denjë në këtë aspekt.

Ai shfrytëzoi një takim me një grup intelektualësh dhe gazetarësh mbështetës të opozitës për të ngritur zërin së bashku me ta, se në Turqi si një nga kryeqytetet më të rëndësishme është mjaft shqetësues fakti i domethënies politike autoritare të presidentit, personi më me influencë në vend.

“Në një periudhë kur mediat janë penguar ose gazetarët janë arrestuar për botime kritike dhe më shumë se 1.000 akademikë janë akuzuar për tradhëti, thjesh sepse kanë nënshkruar një peticion, ky nuk është shembulli më i miri që duhet dhënë”, u shpreh ai.

Davutoglu vizitë në Gjermani, takon kancelaren Merkel

Pas ceremonisë së pritjes, Davutoglu dhe Merkel kaluan në ndërtesën e Kancelarisë Federale për të realizuar takimet kokë më kokë dhe mes delegacioneve

BERLIN – Kryeministri turk, Ahmet Davutoglu, pas takimeve në Davos është nisur drejt Gjermanisë ku është pritur nga kancelarja gjermane, Angela Merkel me një ceremoni zyrtare.

Pas dy himneve të dy vendeve në ambientin ceremonial në selinë e qeverisë, kryeministri Davutoglu ka përshëndetur skuadrën ceremoniale dhe më pas janë prezantuar delegacionet përkatëse.

Gjithashtu në ceremoni kanë qenë të pranishëm edhe zëvendëskryeministri turk, Yalçın Akdogan, ambasadori i Turqisë në Berlin, Hüseyin Avni Karslıoglu dhe disa deputetë.

Pas ceremonisë së pritjes Davutoglu dhe Merkel kanë kaluar në ndërtesën e Kancelarisë Federale për të realizuar takimet kokë më kokë dhe mes delegacioneve.

Partitë në Preshevë dhe Bujanoc e shqyrtojnë çështjen e zgjedhjeve

Pamje nga Bujanoci

Kryetari i Unionit Demokratik të Shqiptarëve në Preshevë, Rahmi Zylfiu, ka deklaruar sot se ka marrë ftesë nga Partia për Veprim Demokratik për bisedime për pjesëmarrjen e përbashkët në zgjedhjet e parakohshme parlamentare, që priten të mbahen në Serbi, por kjo parti ende nuk ka vendosur se a do t’i përgjigjet thirrjes.

Zoti Zylfiu ka thënë se qëndrimi përfundimtar se a do të merret pjesë në zgjedhjet e jashtëzakonshme parlamentare në Serbi, do të merret në organet e partisë, por konsideron se për këtë çështje nuk ka nevojë të ketë nguti, pasi ende nuk është caktuar data e zgjedhjeve, raporton agjencia Beta nga Presheva.

Partia për Veprim Demokratik e udhëhequr nga Riza Halimi, u ka dërguar ftesë për pjesëmarrje të përbashkët në zgjedhjet e parakohshme, të gjitha partive politike shqiptare që veprojnë në Preshevë, Medvegjë dhe Bujanovc, ndërsa theksohet se bisedimet duhet të nisin më së largu deri më 1 shkurt.

Serbia lejon katër libra leximi në gjuhën shqipe në Preshevë

PRESHEVË – Ministria serbe e arsimit, pas kërkesës së Komisionit për Arsim fillor dhe të mesëm të Këshillit Nacional Shqiptar, ka lejuar për përdorim katër libra për shkollat e mesme të gjuhës dhe letërsisë shqipe në Preshevë të botuara në Republikën e Shqipërisë.

Librat janë të shkruara nga autorë të Shqipërisë dhe ata kosovarë dhe do të shërbejnë për vitin e parë, të dytë, të tretë dhe vitin e katër, për gjimnazet e reformuara. Këto janë librat e vetëm, të cilat, pas më se dy dekadave, do të mund të shënohen zyrtarisht në ditarët shkollorë.

Zejni Fejzullahu, përfaqësues për arsim i Këshillit Nacional Shqiptar, vendimin e Ministrisë serbe të Arsimit e sheh shpresëdhënës edhe për lejimin e teksteve tashmë të bllokuara e që janë të dhuruara nga Ministria Arsimit të Kosovës.

Ndërkaq, Ragmi Mustafa, Kryetar i Preshevës, vendimin e Ministrisë së Arsimit të Sërbisë e ka quajtur vendim politik, që, sipas tij, për arsyetim para botës se Serbia po ua mundëson shqiptarëve furnizim me tekste nga Shqipëria, ndërsa në anën tjetër, bllokon, për më se katër muaj, librat e dhuruara nga Republika e Kosovës.

Për më se dy dekada nxënësit shqiptar në Luginë, në mungesë të librave mësimore, mësojnë me metoda klasike të diktimit, si pasojë e moslejimit të autoriteteve serbe, që tekstet mësimore të importohen nga Kosova e Shqipëria. Katër librat e lejuar pritet që të hynë në përdorim gjatë këtij viti shkollor.

Daçiçi: Dënimi i Ivanoviçit – provë se politika e udhëheq drejtësinë

Pamje e gjykatës në Mitrovicë

Ministri i Jashtëm i Serbisë, Ivica Daçiçi, ka deklaruar sot se vendimi për dënimin e liderit të Nismës Serbia, Drejtësia, Demokracia, Oliver Ivanoviçi, është dëshmi se politika e udhëheq drejtësinë dhe vlerësoi se ky epilog u jep “erë në shpinë ekstremistëve” në të dy anët.

“Për fat të keq dënimi për Oliver Ivanoviçin është edhe një dëshmi se politika udhëheq edhe drejtësinë dhe të drejtën në botë”, tha Daçiq në një dekaratë të shkruar.

Sipas tij, “ky dënim në asnjë mënyrë nuk kontribuon vazhdimit të procesit të stabilizimit në Ballkan”.

Gjykata Themelore në pjesën veriore të Mitrovicës sot e ka dënuar Oliver Ivanoviçin, me nëntë vjet burg, për kryerjen e krimeve të luftës kundër shqiptarëve në fund të viteve të 90-ta.

Ivanoviçi i kishte hedhur poshtë akuzat.

Ai mund të ankohet ndaj vendimit të sotëm të gjykatës.

Kroacia zyrtarisht kandidon një femër për shefe të OKB-së

Kroacia zyrtarisht e ka nominuar ministren e Jashtme, Vesna Pushiç, për postin e sekretares së përgjithshme të Kombeve të Bashkuara, duke u bërë shteti i parë qe e ka paraqitur një femër për këtë post, i cili gjithnjë ishte mbajtur nga meshkujt, raporton agjencia DPA nga Nju Jorku.

Në letrën dërguar Asamblesë së Përgjithshme të Kombeve të Bashkuara dhe Këshillit të Sigurimit të OKB-së, që u ishte shpërndarë vendeve anëtare të Kombeve të Bashkuara, kryeministri i Kroacisë, Zoran Milanoviç, e ka nominuar zonjën Pushiç, e cila është edhe zëvendëskryeministre e parë e Kroacisë.

“Zonja Pushiç e ka një karrierë të shquar kombëtare dhe ndërkombëtare, si politikane dhe anëtare e akademisë, që e bënë atë plotësisht të përgatitur për kryerjen e këtij posti të udhëheqjes dhe përgjegjësisë globale”, ka shkruar kryeministri Milanoviç.

Më herët edhe Maqedonia e ka paraqitur kandidatin e vet, Sërgjan Kerim, që është diplomat dhe biznesmen.

Mandati i sekretarit të përgjithshëm të tashëm të OKB-së, Ban Ki-moon, i kalon gjatë këtij viti.

Dështojnë bisedimet, thellohet më tej kriza në Maqedoni

Kanë dështuar bisedimet ndërmjet partive politike në Maqedoni për datën e zgjedhjeve, duke e thelluar edhe më shumë krizën politike në vend.

Pas bisedave maratonë që kanë përfunduar në mesnatën mes së premtes dhe së shtunës, lideri i Lidhjes Social-Demokrate, Zoran Zaev, ka thënë se pa pastrimin e listës zgjedhore, opozita nuk do të marrë pjesë në zgjedhjet e 24 prillit.

“Nëse zgjedhje të tilla, pa këto kushte, mbahen më 24 prill, ne nuk do të marrim pjesë. Përkundrazi, do të vazhdojmë të luftojmë për kushte korrekte për mbajtje zgjedhjesh. Do vazhdojmë të luftojmë për një Maqedoni të lirë. Negociatat dështuan, të shtunën do njiheni me detajet”, ka deklaruar Zaev.

Kryetari i VMRO-DPMNE-së, Nikolla Gruevski, fajin për dështimin e bisedimeve ia hodhi opozitës, pasi, sipas tij, komisionari Johannes Hahn, që ndërmjetësoi negociatat, pas takimeve që kishte me drejtuesit e KSHZ-së, kishte dhënë garanci se nuk ka pengesa për mbajtjen e zgjedhjeve.

“Ka kohë që të përgatitet gjithçka që zgjedhjet të mbahen më 24 prill. Vetëm një njeri angazhohet që të vazhdojë ta thellojë krizën politike me sjelljen e tij”, ka deklaruar Gruevski, duke akuzuar opozitës për përkeqësimin e gjendjes në vend.

Edhe partitë shqiptare janë shprehur për mbajtjen e zgjedhjeve më 24 prill.

Komisionari Hahn ka shprehur keqardhjen e tij për dështimin e bisedimeve.

“Vendi ndodhet në një gjendje shumë të rëndë. Ajo që e pamë në vitin 2015 vazhdon edhe në vitin 2016. Pres që të gjitha partitë t’i përmbahen marrëveshjes së arritur më 2 qershor dhe 15 korrik. Dëshiroj t’i siguroj të gjithë qytetarët se pa marrë parasysh epilogun, ne do të ndihmojmë procesin”, ka deklaruar Hahn.

Dështimi i bisedimeve nënkupton edhe tërheqjen e dorëheqjes së kryeministrit Nikolla Gruevski, pasi ajo ishte kushtëzuar me datën e mbajtjes së zgjedhjeve të parakohshme.

Të premten tjetër Merkel takon kryeministrin turk

Të premten e javës tjetër, kancelarja gjermane, Angela Merkel, do ta presë në takim kryeministrin e Turqisë, Ahmet Davutoglu, ka njoftuar sot zëdhënësi i qeverisë gjermane.

Në qendër të bisedimeve, sipas zëdhënësit Steffen Seibert, do të jetë sulmi i 12 janarit në Stamboll, ku kanë mbetur të vdekur dhjetë persona, shumica nga ta gjermanë.

Të dy udhëheqësit do të diskutojnë edhe për luftën e vendeve të tyre ndaj terrorizmit, si dhe për fluksin e refugjatëve nga Siria dhe Iraku, si në Gjermani, ashtu edhe në Turqi.

Bisedimet zhvillohen në kuadër të konsultimeve të qeverisë gjermane me qeveritë e disa vendeve, duke përfshirë edhe atë të Kinës dhe Indisë .

Në takimin e 22 janarit pritet të marrin pjesë edhe ministrat e brendshëm, ata të jashtëm, si dhe ministrat e mbrojtjes të të dyja vendeve.

Turqia ka një marrdhënie të veçantë me Gjermaninë, si vend me ekonominë më të madhe në Evropë.

Gjermania është shtëpi për rreth tre milionë njerëz me origjinë turke.

Zaev: Dorëheqja e Gruevskit, fillim i fundit të pushtetit të korruptuar

Partia Maqedonase në opozitë, Lidhja Social Demokrate e Maqedonisë, dorëheqjen e mbrëmshme të Nikolla Gruevskit nga posti i kryeministrit të Republikës së Maqedonisë, e ka quajturi fillim i fundit të pushtetit të korruptuar dhe jo demokratik.

Kryeministri i Maqedonisë Nikolla Gruevski e ka parqitur dorëheqjen të enjten në mbrëmje gjatë një paraqitje televizive para opinionit.

Por, aktin e dorëheqjes Gruevski do ta paraqes edhe në Kuvend, i cili edhe duhet ta miratoj.

“Deklarata e Gruevskit është pranim se për shkak të tij dhe partisë së tij nuk janë zbatuar çështjet kryesore të Marrëveshjes së Përzhinos. Që të zbatohet Marrëveshja e Përzhinos plotësisht, është e domosdoshme që listat zgjedhore të jenë kristal të pastra dhe procesi parazgjedhor. Njeriu i cili ka vendosur për jetë a vdekje, vendosi që kush mund të jetojë i lirë në Maqedoni e kush jo”, është shprehur mbrëmë për mediat në Maqedoni lideri i LSDM-së Zoran Zaev.

Ai iu ka bërë thirrje të gjithë qytetarëve, që siç ka thënë ai, “bashkërisht ta kthejmë demokracinë, lirinë dhe vlerat evropiane të vendit tonë”.

2015 për Kroacinë një tjetër vit rekord i turizmit

VOAL – ZAGREB, 12 JANAR – Për Kroacinë 2015 ishte një tjetër vit rekord në sektorin turistik, me rritje të madhe, tej çdo parashikimi, të ardhjeve dhe prenotimeve, duke e shndërruar këtë vend në një nga destinacionet verore më të parapëlqyera të Mesdheut, shkruan Voice Of Albanians – voal.ch.

Sipas të dhënave të ministrisë kroate të Turizmit, vitin e shkuar u regjistruan mbi 14 milionë turistë, 8,3 për qind krahasuar me vitin 2014, me pothuaj 79 milionë prenotime, duke shënuar një rritje vjetore 6,8 për qind. Shumica dërrmuese, plot 12 milionë (+8,1%) ishin turistë të huaj.

Bregdeti istrian zë vendin e parë, duke qenë se është zgjedhur nga një e katërta e atyre që verën e shkuar ishin në Kroaci. Pasojnë plazhet dalmate e Dubrovniku i mrekullueshëm (Raguza e lashtë).
Rritja më e madhe shënohet gjithsesi në kryeqytetin Zagreb (+13 për qind) i cili, edhe pse ndodhet në kontinent hyrjes së vendit në BE më 2013 po bëhet gjithnjë e më interesant si destinacion turistik. ansa

Erdogani: Sulmuesi vetëvrasës në Stamboll, me origjinë siriane

Shpërthim në qendër të Stambollit

Së paku 10 persona janë vrarë dhe 15 të tjerë janë plagosur si rezultat i shpërthimit në një lagje në qendër të Stambollit, që është e populluar me turistë.

Pamjet televizive nga vendi i ngjarjes i kanë paraqitur disa trupa të shtrirë në tokë. Raportet nga Turqia bëjnë me dije se turistë të huaj, duke përfshirë gjermanë, norvegjezë dhe koreanë të jugut, janë në mesin e të plagosurve nga shpërthimi që ka ngjarë paraditen e së martës.

Presidenti i Turqisë, Recep Tayyip Erdogan ka thënë se në mesin e të vrarëve ka të huaj dhe turq.

“Unë e dënoj fuqishëm sulmin terrorist në sheshin Sultanahmet të Stambollit, i cili është kryer nga një sulmues vetëvrasës me origjinë siriane”, ka thënë presidenti Erdogan.

“Caku i parë i të gjitha grupeve aktive terroriste në këtë rajon është Turqia, ngase Turqia i lufton të gjithë ata me vendosmëri të njëjtë”, ka shtuar presidenti turk.

Zëvendëskryeministri i Turqisë, Numan Kurtulmus ka thënë se sulmuesi vetëvrasës është një sirian i lindur në vitin 1988.

Ai ka shtuar se shumica e viktimave janë të huaj dhe se dy nga të plagosurit janë në gjendje të rëndë.

Shpërthimi ka ndodhur pak pas orës 10 të mëngjesit, sipas kohës lokale, në lagjen historike Sultanahmet, pranë Xhamisë së Kaltër.

Zyra e kryeministrit Ahmed Davutoglu, ka ndaluar transmetimin e shpërthimit, duke u thirrur në një ligj i cili lejon masa të tilla kur siguria kombëtare ose rendi publik janë nën kërcënim. Ky veprim, megjithatë, ka shkaktuar kritika.

Davutoglu gjithashtu e ka thirrur një takim të jashtëzakonshëm të sigurisë me zyrtarët dhe ministrat kryesorë. Në mesin e atyre që po marrin pjesë në takim, sipas agjencisë së lajmeve Anatolia, është edhe Ministri i Brendshëm i Turqisë, Efkan Ala dhe shefi i inteligjencës turke, Hakan Fidan.

Ministria e Jashtme e Norvegjisë ka njoftuar se një burrë norvegjez është plagosur gjatë sulmit, ndërsa Gjermania ka kërkuar nga qytetarët e saj që t’iu shmangen turmave dhe vendeve turistike në Stamboll.

Duke folur në Berlin, kancelaria gjermane, Angela Merkel tha se “ndoshta” shtetas gjermanë ka në mesin e viktimave.

“Ne ende nuk i kemi të gjitha informatat,… por druajmë se qytetarë gjermanë mund të jenë në mesin e të vrarëve, e gjithashtu në mesin e të plagosurve”, ka thënë ajo para gazetarëve.

Militantët kurdë, majtistë dhe islamistë kanë kryer disa sulme në Turqi në muajt e fundit.

Lagjja Sultanahmet është atraksioni kryesor turistik i Stambollit, që përfshin Pallatin Topkapi, muzeun Hagia Sophia dhe Xhaminë e Kaltër.

Policia e ka mbyllur zonën ndërsa auto-ambulancat kanë nxituar për në vendin e shpërthimit. Një polic në vendin e ngjarjes tha se autoritetet po i marrin masat paraprake ndaj një shpërthimi të dytë të mundshëm.

Sulmi i së mërkurës vjen pak më shumë se një vit që kur një sulmuese femër e shpërtheu eksplozivin vetëvrasës në të njëjtën zonë, duke lënë të vdekur një polic dhe duke plagosur një tjetër.

Një grup i majtë fillimisht kishte pretenduar se qëndron prapa këtij sulmi, por zyrtarët më vonë kanë thënë se sulmuesja vetëvrasëse kishte lidhje me militantët islamistë.

Turqia mbetet në gatishmëri të lartë pas një seri sulmesh, që sipas autoriteteve turke, janë kryer nga grupi militant Shteti Islamik.

Në tetor të vitit të kaluar, si rezultat i dy shpërthimeve vetëvrasëse në kryeqytetin turk, Ankara, patën mbetur të vdekur 103 njerëz. Prokurorët thanë se sulmet ishin kryer nga militantët.

Dhuna ka përshkallëzuar edhe në juglindje të Turqisë pas rënies së marrëveshjes dy-vjeçare të armëpushimit, në muajin korrik. Marrëveshja në mes të qeverisë turke dhe Partisë së Punëtorëve të Kurdistanit (PPK) ishte prishur pas një sulmi vetëvrasës që kishte lënë të vdekur së paku 30 persona në qytetin Suruc, në kufi me Sirinë.

Sulmi e kishte cak një qendër kulturore, vend në të cilin një grup politik kurd, po e mbante një konferencë për media në ditën e shpërthimit.

Partia e Punëtorëve të Kurdistanit, e cila për tri dekada lufton për autonomi të kurdëve, i akuzoi forcat turke të sigurisë se kanë bashkëpunuar me grupin militant Shteti Islamik.

Në Maqedoni një antishqiptar në krye të komisionit antidiskriminim

Profesori maqedonas, i njohur për bindjet e tij antishqiptare, Toni Naunovski është zgjedhur anëtar i Komisionit për Mbrojtjen nga Diskriminimi, në Maqedoni. Përbërja e komisionit, ku ai bën pjesë, është mbështetur edhe nga anëtari i BDI-së, në Komisionin parlamentar për Zgjedhjet dhe Emërimet.

Antishqiptari Toni Naunovski, në mediat proqeveritare maqedonase ka shprehur hapur urrejtjen ndaj shqiptarëve, madje duke i quajtur ata “fashistë, njerëz të egër dhe armiq të vendit”. Në një shkrim të tijin, ai u ka sugjeruar shqiptarëve të Maqedonisë të shpërngulen në Shqipëri, nëse nuk u pëlqen pozicioni që kanë në vendin fqinj.

Partia maqedonase në opozitë, LSDM e ka quajtur një vendim skandaloz të VMRO-DPMNE-së dhe BDI-së, zgjedhjen e përbërjes së Komisionit për Mbrojten nga Diskriminimi, ku bën pjesë edhe antishqiptari Toni Naunovski, raporton TCH.

Nga ana tjetër, deputeti i opozitës shqiptare Orhan Ibrahimi, për këtë vendim akuzoi partinë e Ali Ahmetit, BDI, e cila – sipas tij, – është e pafuqishme për të penguar vendimet antishqiptare të qeverisë.

“Është subjekti shqiptar, ai që duhet t’i ndalë propozimet e VMRO-së që janë kundër bashkëjetesës në Maqedoni. Por, meqë Bashkimi Demokratik për Integrim ka shkelur ditë më parë mbi marrëveshjen e garantuar nga faktori ndërkombëtar, me të cilën parashikohej që sekretari i Komisionit Shtetëror të Zgjedhjeve të ishte shqiptar, vendimi i sotëm nuk i bën fare përshtypje BDI-së, pasi nuk e ka problem emërimin e këtij individi”, tha Orhan Ibrahimi, deputet i PDSH-së.

Profesori me bindje antishqiptare, Toni Naunovski është emëruar në Komisionin për Mbrojtjen nga Diskriminimi me propozim të partisë maqedonase, VMRO-DPMNE. Komisioni përbëhet nga 7 anëtarë gjithsej, 5 prej të cilëve maqedonas dhe dy shqiptarë, këta të fundit të propozuar nga BDI-ja.

Mediat ‘ndezin’ debatin Beograd-Zagreb mbi blerjen e armëve Nga Ivana Nikoliç

Ndërsa Serbia dhe Kroacia shkëmbejnë akuza për blerjen e re të armëve, ekspertët paralajmëruan se mbulimi provokues që media po i bën këtij debati po ringjallte një retorikë agresive, e cila mund të dëmtojë marrëdhëniet mes dy vendeve.

Gazetat e Beogradit ditën e hënë rritën më shumë mbulimin e tyre sensacional të debatit midis zyrtarëve serbë dhe atyre kroatë që nisi pas lajmërimit të fundit të Zagrebit se ai ka ndërmend të blejë raketa balistike nga Shtetet e Bashkuara.

Faqja e parë e tabloidit “Vecernje Novosti” paraqiti një fotografi të artilerisë serbe, e cila shoqërohej me titullin: “ ‘Nora’ jonë është më e fortë se ‘Panzeri’ kroat” – duke iu referuar obusëve “Nora” dhe tankeve që Kroacia bleu nga Gjermania vitin e kaluar.

Tabloidi “Informer” ndërkohë pohoi se në përgjigje të “provokimeve” kroate dhe të NATO-s, presidenti rus Vladimir Putin ishte i gatshëm të dërgonte dy sisteme raketash në Serbi, “që do ta bënin Serbinë forcën më e madhe ushtarake në rajon”.

Kryeministri serb Aleksandër Vuçiç gjithashtu hyri në debat të hënën pas takimit me zv/kryeministrin rus Dmitry Rogozin – një vazhdim i bisedimeve të armëve që Vuçiç pati me Putinin në Moskë në nëntor.

Vuçiç tha se Serbia do të rriste prodhimin e saj të armatimeve këtë vit, por mbetej e përkushtuar për paqe dhe marrëdhënie të mira me fqinjët e saj.

“Raketat balistike dhe platformat e hedhjes së armëve që Kroacia planifikon të blejë kanë një rreze nga 300 deri në 350 kilometra. Mund të shënjestroni nga Zagrebi ose çdo qytet tjetër, çdo qytet që dëshironi në Serbinë qendrore,” tha Vuçiç për agjencinë e lajmeve Tanjug.

“Serbia nuk do të sulmojë kurrë asnjë, por duhet të jetë e aftë të mbrojë territorin dhe qytetarët e saj në çdo moment. Ne po rrimë të qetë, nuk po bëjmë agjë në lidhje me kërcënimet e të tjerëve, të cilët nuk po heqin dorë në blerjen e armëve tepër të fuqishme,” shtoi ai.

Daçiç dhe Vuçiç akuzuan ministrin kroat në largim të mbrojtjes për deklarata ‘skandaloze’.

Debati u përshkallëzua javën e kaluar pasi Ministri i Mbrojtjes në largim në Kroaci Ante Kotromanoviç tha se Vuçiç nuk duhet të nervozohet në lidhje me faktin që Zagrebi po armatoset.

Ministria e jashtme e Serbisë u përgjigj duke shprehur tronditje që Kroacia ishte përfshirë në riarmatosjen “e pakontrolluar”, “duke i dërguar kështu kërcënime të drejtpërdrejta Serbisë”.

Kotromanoviç më pas akuzoi Vuçiçin dhe Ministrin e Jashtëm të Serbisë Ivica Daçiç se ishin zyrtarë të lartë të një qeverie e cila nisi konflikte në Slloveni, Kroaci, Bosnjë dhe Kosovë në vitet 1990.

Ministria e jashtme e Serbisë e mohoi këtë, ndonëse Daçiç ishte zëdhënës i Sllobodan Millosheviçit në Partinë Socialiste në pushtet dhe Vuçiç ishte Ministër i Informacionit nga viti 1998 deri në vitin 2000 nën regjimin e Millosheviçit.

Shefi i Ushtrisë Serbe Ljubisa Dikoviç u përfshi gjithashtu në debat të dielën, duke thënë se Beogradi po planifikonte të blinte helikopterë, obusë dhe makina të blinduara.

“Edhe ne po armatosemi. Dikush mund të thotë se Serbia po armatoset në mënyrë që ajo mund të kërcënojë sigurinë e disa vendeve të rajonit, por nuk është ky rasti,” tha ai.

Dinko Gruhonjiç, nga Shoqata e Gazetarëve të Pavarur të Vojvodinës, tha për BIRN se zyrtarët serbë po ringjallnin armiqësitë e vjetra për të larguar vëmendjen e publikut nga situata e përkeqësuar ekonomike në vend.

“Kroacia për këtë arsye është gjithmonë një armik në krye të detyrës. Kryeartikulli i gazetës “Vecernje Novosti” nuk erdhi krejt papritur, sepse ata gjithmonë presin raste të tilla për të bërë punën e tyre luftënxitëse,” tha Gruhonjiç.

Por ai paralajmëroi se pasoja kryesore e një retorike të tillë mund të jetë “nxitja e mëtejshme e paragjykimeve ndaj kroatëve, sidomos nga të rinjtë e Serbisë”.

Jelena Miliç, nga Qendra për Studime Euro-Atlantike me bazë në Beograd, CEA, tha për BIRN se deklaratat nga zyrtarët në Beograd nuk ishin në përputhje me “qëndrimin zyrtar të Serbisë – angazhimin e saj për paqen dhe stabilitetin në rajon, që ata kanë një vit që e shtyjnë tashmë”.

“Përveç kësaj, kjo është përsëri e njëjta retorikë e vjetër luftënxitëse”, tha ajo./reoprter.al

Arrestohet një zyrtar boshnjak për ndikim në rastin e Naser Kelmendit

Naser Kelmendi

Një zyrtar i Bosnjës dhe gruaja e tij, janë arrestuar nën dyshimet se kanë bërë përpjekje të ndikojnë në një rast të profilit të lartë, kundër bosit të drogës në Ballkan, Naser Kelmendi.

Bakir Dautbashiq dhe gruaja e tij, Bilsena Sahman, janë arrestuar në Sarajevë, ka bërë të ditur Zyra e Prokurorit.

Sipas njoftimit, Dautbashiq dyshohet për ndërhyrje në gjykimin e Kelmendit, shqiptar nga Kosova, i cili ka edhe shtetësi të Bosnjës.

Dautbashiq është sekretar i shtetit në Ministrinë e Sigurimit të Bosnjës.

Naser Kelmendi është arrestuar në Kosovë në vitin 2013, me urdhërarrest të Bosnjës.

Ai akuzohet për përfshirje në krim të organizuar dhe gjykimi ndaj tij ka nisur në janar të vitit të kaluar, në Gjykatën Themelore të Prishtinës.

Albulena Haxhiu: Sot është mundësia t’i largojmë shkelësit e Kushtetutës

Deputetja e Vetëvendosjes, Albulena Haxhiu, edhe sot bënë thirrje për protestë, duke thënë se pavarësisht bindjeve politike, qytetarët duhet të dalin në protestë. Haxhiu në postimin në Facebook ka thënë se sot është koha të ju tregojmë shkelësve të kushtetutës se ata nuk mund të na përfaqësojnë.

Postimi i plotë i Albulena Haxhiut:

“Të dashur miq,
Pavarësisht bindjeve politike që keni, SOT është mundësia të ju tregojmë atyre që shkelën Kushtetutën se nuk kanë në vend në institucionet e Republikës së Kosovës. SOT është koha që të ju tregojmë shkelësve të Kushtetutës që ata nuk mund të na përfaqësojnë më dhe se ata nuk mund të marrin vendime më për ne! SOT le të ju tregojmë qeveritarëve se nuk i lejojmë të bëjnë pazare me Republikën dhe territorin. SOT nëse jo për vete, le ta bëjmë për të ardhmën e fëmijëve tanë. Le tua lëmë atyre një Republikë me sovranitet dhe një shtet që ju garanton mirëqenie, drejtësi, liri dhe barazi!
SOT në orën 14:00”, shkruan ajo.

Athinë, fillon takimi i ministrit Kotzias me kreun e BDI-së Ahmeti

Ministria e Jashtme greke në ueb faqen e saj zyrtare ka postuar një foto në të cilën thuhet se ministri kryediplomati i Greqisë ka filluar një takim pune me kryetarin e Bashkimit Demokratik për Integrim, Ali Ahmeti

SHKUP – Kryetari i Bashkimit Demokratik për Integrim, Ali Ahmeti, i shoqëruar nga zëvendës kryeministrat e Maqedonisë, Musa Xhaferri dhe Fatmir Besimi, dhe deputeti Artan Grubi ka filluar takimin e punës me ministrin e Jashtëm të Greqisë, Nikos Kotzias, në Athinë.

Ministria e Jashtme greke në ueb faqen e saj zyrtare ka postuar një foto në të cilën thuhet se kryediplomati i Greqisë ka filluar një takim pune me kryetarin e Bashkimit Demokratik për Integrim, Ali Ahmeti që është pjesë e koalicionit qeveritar në Maqedoni, dhe se është shoqëruar nga zëvendës kryeministrat Musa Xhaferi dhe Fatmir Besimi.

Para takimit, zyra për informim e BDI-së njoftoi se Ahmeti dhe Kotzias, do të shkëmbejnë mendime dhe ide rreth marrëdhënieve ndërfqinjësore, çështjeve të hapura midis dy vendeve dhe integrimit Euro-atlantik të Maqedonisë.

Kroaci: Kapiteni serb Dragan akuzohet për krime lufte

Kapiten Dragani në korrik të vitit 1991

Një gjykatë në Kroaci e ka akuzuar ish-komandantin e forcave paraushtarake serbe, Dragan Vasilkoviq, për kryerje të krimeve të luftës gjatë periudhës 1991-95.

Aktakuza u paraqit sot, 6 muaj pasi ky person, i njohur edhe si Kapiten Dragan, e humbi betejën e tij nëntëvjeçare juridike për ta bllokuar dorëzimin e tij nga Australia në Kroaci.

Vasilkoviq është i akuzuar për torturim dhe vrasje të ushtarëve dhe policëve të zënë kroatë në bazën serbe në Knin, në vitin 1991, dhe në Brushka në vitin 1993, dhe për hartimin e planeve për sulm në stacionin e policisë në Glinë dhe fshatrat përreth, në korrik të vitit 1991.

“Gjatë sulmit, ndërtesat civile ishin dëmtuar ose shkatërruar, popullata ishte detyruar të largohet, pasuria ishte plaçkitur dhe civilët ishin vrarë ose plagosur”, ka thënë një prokuror i Kroacisë.

Vasilkoviq është arrestuar në vitin 2006 në Australi, ku ai ka punuar si instruktor i golfit.

Gjykata dënon me katër vjet burg për korrupsion vëllain e ish-presidentit rumun Basescu

BUKURESHT- Vëllai i ish-presidentit rumun, Traian Basescu u dënua sot me katër vjet burg për trafik influence, njoftoi Gjykata e Apelit e Konstancës.

“Mircea Basescu është akuzuar për përfitimin e 250 000 eurove, në vitin 2011, për të ndërhyrë pranë gjykatësve në favor të personit të njohur të krimit të organizuar, Sandu Anghel, i quajtur ndryshe Bercea Mondial”, tha gjykata e sipërcituar.

Sipas prokurorëve të antikorrupsionit, Mircea Basescu, 62 vjeç, kishte shfrytëzuar cilësinë si vëlla i presidentit për t’i dhënë Anghelit një dënim të lehtë në gjykatë.

Ky i fundit, i akuzuar për tentativë vrasje, u dënua me tetë vite dhe nëntë muaj burg. Ndërkohë, Mircea Basescu njoftoi se do të apelonte vendimin e gjykatës.

Gjuriç e quan Kosovën Jeruzalemi i Serbisë

MITROVICË – Drejtori i të ashtuquajturës Zyrë për Kosovën në Qeverinë e Serbisë Marko Gjuriç, në Natën e Buzmit në Mitrovicë ka thënë se “në ditën e kremtimit të Kërshëndellave jo vetëm që kujtojmë se jemi të lindur serbë ortodoksë, por duhet që këtë emër tingëllues çdo ditë ta arsyetojmë me punën dhe veprat tona”, njofton B92.

“Që të jemi tamam serbë dhe ortodoksë të Shën Savës dhe të Stefan Deçani, duhet që edhe me veprat tona gjatë vitit të jemi të denjë për këtë. E kjo, ndër të tjera, do të thotë të mësojmë për historinë tonë, traditën e fenë, të mësojmë si kanë jetuar paraardhësit, carët e shenjtë dhe mbretërit tanë, cilat vlera i kanë udhëhequr në jetë dhe i kanë shtyrë ata për të mbijetuar në kushte të vështira të cilat kanë bërë që ne serbët sot të kemi rastin të mburremi me faktin se e kemi Jerusalemin tonë e ai është Kosova jonë”, ka thënë Gjuriq për të shtuar se “ ka shumëçka që secili nga ne mund dhe duhet të bëjë si serb e ortodoks për ta ruajtur Kosovën tonë edhe në vitin e ardhshëm”, transmeton Koha.net.

Në këtë festim, pos ipeshkvit Teodosije kanë marrë pjesë edhe kryetari i të ashtuquajturit organ të përkohshëm të komunës së Mitrovicës Aleksandar Spiriq, prefekti i Mitrovicës veriore Goran Rakiq, ministrat për Kthim e Komunitete dhe të Pushtetit lokal në Qeverinë e Kosovës Dalibor Jevtiq e Ljubomir Mariç.

Daçiç: Kroacia po blen raketa për ta sulmuar Serbinë

Ministri i Punëve të Jashtme të Serbisë, Ivica Daçiç, ka deklaruar se Kroacia është duke u furnizuar me raketa balistike, të cilat ndoshta do t’i përdorë kundër Serbisë.

Gjatë një interviste dhënë televizionit serb N1, të cilën e kanë transmetuar edhe mediat kroate, Daçiç ka thënë se “supozohet se armët të cilat Kroacia është duke i siguruar mund të përdoren vetëm kundër Serbisë”, transmeton Telegrafi.

“Nuk besoj se do të qëllojnë, Austrinë, Italinë, Bosnjën dhe Hercegovinën, por ndoshta Republikën e Serbisë. Nuk e di se për çfarë do t’iu nevojiten ato”, ka shtuar Daçiç.
Përndryshe, Kroacia ka porositur nga Shtetet e Bashkuara, 16 lançues të raketave që mund të ndezin raketat balistike.

Faqja 74 prej 84« Fillimi ‹ Prapa 70 71 72 737475 76 77 78 Para ›Fundi »

Ish-drejtoresha e përgjithshme e PTK-së, Leme Xhema është zgjedhur nënkryetare e Komunës së Medvegjës në Serbi

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL