Këto ditë televizionet e Serbisë kanë filluar që në edicionin e lajmeve të shfaqin më të zgjeruar hartën e Serbisë. Tashmë, në ekrane, Serbisë i është bashkuar Republika Serbe dhe Veriu i Kosovës. Ky duket të jetë hapi i parë i implementimit të idesë së liderëve serbë dhe presidentit Hashim Thaçi, për t’i lëvizur kufijtë.

Në seancën e sotme është vendosur që të formohen komisione për të përcaktuar vuajtjet e të gjitha popujve në rajonin e Srebrenicës dhe të serbëve në Sarajevë

BANJA LLUKË – Qeveria e Republikës Srpska në një seancë të veçant sot shfuqizoi raportin e Komisionit për Hetime të Ngjarjeve brenda dhe rreth Srebrenicës nga 10 deri 19 korrik të vitit 1995, të përpiluar në Banja Llukë në qershor dhe 15 tetor të vitit 2004 dhe nga përfundimi i Qeverisë së RS nga seanca e 16-të e posaçme e mbajtur më 29 tetor 2004.

Gjithashtu janë shfuqizuar edhe raportet e Grupit të Punës të Qeverisë së RS të miratuar më 30 mars dhe 30 shtator të vitit 2005 për të zbatuar konkluzionet e raportit përfundimtar të komisionit të Srebrenicës me të gjitha propzimet dhe përfundimin e Qeverisë së RS nga 31 marsi i vitit 2005.

“Me qëllim të rishikimit të sakt të ngjarjeve në rajonin e Srebrenicës dhe në Srebrenicë gjatë periudhës 1992-1995, si dhe për forcimin e besimit dhe tolerancës mes popujve në BeH, pajtimit përfundimtar dhe bashkëjetesës të brezave të tanishëm dhe të ardhshëm, qeveria e RS formon një komision të pavarur ndërkombëtar e cila në mënyrë objektive dhe të paanshme do të përcakton vuajtjet e të gjithë popujve në rajonin e Srebrenicës në periudhën 1992-1995. Përbërja dhe detyrat e Komisionit do të përcaktohen me vendim të veçantë”, u konstatua sot në mbledhjen e Qeverisë së RS.

Përveç kësaj, qeveria e RS vendosi të formojë një komision të pavarur ndërkombëtar për të hetuar dhe për të bërë një raport mbi vuajtjet e serbëve në Sarajevë në periudhën nga viti 1991 deri 1995, përbërja dhe detyrat e të cilit do të përcaktohen me një vendim të veçantë. aa

Ministri turk i Financave, Berat Albayrak ka thënë se Qeveria ka përgatitur “planin e veprimit” për të ulur shqetësimet në tregje, teksa valuta kombëtare vazhdon të zhvlerësohet edhe si pasojë e sanksioneve

amerikane.

“Nga 13 gushti, institucionet tona do të marrin hapat e nevojshëm dhe do të bëjnë publike njoftimet e duhura për tregjet”, është cituar të ketë thënë Albayrak sipas gazetës turke, The Hurriyet.

“Planet tona të veprimet janë të gatshme”, ka shtuar ai, pa dhënë më shumë detaje.

Një ditë më parë, presidenti turk, Recep Tayyip Erdogan ka përsëritur thirrjet ndaj turqve që të shesin dollarin dhe euron në mbështetje të lirës, vlera e së cilës ka rënë dukshëm, duke shtuar shqetësimet për ekonomi dhe përkeqësim të marrëdhënieve me Shtetet e Bashkuara.

Lira ka prekur rënie rekorde prej 6.97 ndaj dollarit më 13 gusht, që nënkupton humbje të vlerës së kësaj valute në këtë vit për 46 përqind.

Në deklaratat e bëra një ditë më parë, Erdogan ka thënë se është fatkeqësi që Shtetet e Bashkuara po zgjedhin pastorin amerikan, Andrew Bruson që aktualisht po gjykohet në Turqi ndaj aleatit të tyre të NATO-s.

Presidenti amerikan, Donald Trump ka kërkuar lirim të pastorit dhe ka njoftuar për dyfishim të tarifave në importet turke të çelikut dhe aluminit.

Brunson, i cili është burgosur nga viti 2016, mund të përballet me 35 vjet burgim pas akuzave se u ka ndihmuar separatistëve kurdë, të cilët Erdogan i fajëson për tentimet e dështuara për puç më 2016. rel

Kryetari i Partisë Popullore të Serbisë, Vuk Jeremiç deklaroi se nëse ndryshohen kufijtë, Kosova do të bashkohet me Shqipërinë. Në një prononcim për mediat serbe ish-ministri i Jashtëm serb tha se përcaktimi i vijës kufitare me Kosovën, për të cilin po angazhohet presidenti serb, Aleksandër Vuçic, paraqet një ridefinim të kufijve.

“Kjo parqet një tjetërsim të përhershëm dhe me paramendim të një pjese të territorit të Serbisë. Përcaktimi i kufijve paraqet Kosovën si anëtare e OKB-së brenda gjashtë muajve, kurse brenda pak vitesh – ‘Shqipërinë e Madhe’. Një nënshkrim ndryshon gjithçka”, tha ai.

Po ashtu Jeremiç komentoi edhe deklaratën e Vuçiç se për demarkacionin e kufirit me Kosovën, ndërsa tha para gazetarëve se “demarkacioni është jo kushtetues dhe thellësisht i dëmshëm dhe përbën një diktaturë të përshpejtuar, e cila vjen nga fashizmi në Serbi”.
(BalkanWeb)

BEOGRAD – Drejtori i të ashtuquajturës Zyra për Kosovën, Marko Gjuriç, sot tha se marrëveshja mes Beogradit dhe Prishtinës do t’u sillte serbëve të Kosovës pozitë më të mirë.

Ai tha se Beogradi dhe Prishtina “me milje janë larg nga marrëveshja”.

“Mos lejoni t’ju gënjejë askush se me marrëveshjen, prej së cilës jemi me milje larg, do të keni më pak se që keni. Serbia me atë marrëveshje, ndërsa të mëdha janë gjasat të mos vjen deri te ajo, por nëse vjen, serbët e Kosovës me të mund të kenë vetëm më shumë”, tha Gjuriç në konferencën për gazetarët në Qeverinë e Serbisë.

Ai shtoi se serbët me një marrëveshje të tillë do të kishin më shumë territor, pronë, fuqi institucionale dhe ndihmë financiare.

“Nëse vjen deri te marrëveshja, ajo doemos duhet të jetë zgjidhje e cila do të zgjidh çështjen e pronës sonë, pozitës së kishës sonë, të drejtave tona. Ndryshe, zgjidhje nuk do të ketë. E njëjta vlen për Gazivodën, Valaçin dhe Trepçën. Por, të mos gënjehemi se kemi diçka, që nuk i kemi me dekada”, tha Gjuriç.

Ai u bëri thirrje serbëve që askush të mos i gënjejë se me nënshkrimin e marrëveshjes për ta do thotë më pak ndihma ose “Serbi më të vogël” dhe përsëriti se asnjë vendim nuk do të merret pa to.

Gjuriç tha se Serbia tani për tani asgjë nuk ka ofruar dhe se publikisht do të bisedojë kur do të ketë ndonjë propozim.

“Do të dalim t’ju përgjigjemi konkretisht kur të kemi diçka të pranueshme”, tha Gjuriç.

Ai shtoi se do të jetë e vështirë të arrihet deri te përgjigjja dhe se ka shumë mundësi që të mos ketë, ndërsa kjo është një lajm i keq për Serbinë. aa

Propozimi për ndarjen e territorit të Kosovës ndërmjet serbëve dhe shqiptarëve është shprehje e vullnetit për gjetjen e një zgjidhjeje kompromisi për Kosovën dhe nuk duhet interpretuar si dobësi, ka thënë sot në Beograd shefi i diplomacisë serbe, Ivica Daçiç.

“Si nuk kanë turp ata që flasin se nuk duhet të ketë tash ndryshim kufijsh, ata që na kanë bombarduar ne, për të rrënuar kufijtë tanë? Si nuk keni turp, hipokritë? Kjo vlen edhe për Maqedoninë, e cila e ka njohur pavarësinë e Kosovës dhe tash thotë se nuk ka ndryshim kufijsh”, ka thënë Daçiq gjatë një takimi me gazetarë në Beograd.

Ai gjithashtu ka thënë se gjithmonë ka folur hapur për ndarjen si zgjidhjen e vetme për Kosovën.

Këto komente Daçiq i bëri pasi takoi zëdhënësen e ministrisë së jashtme ruse, Maria Zakharovan. Sipas tij, për Rusinë është e pranueshme çdo gjë që është e pranueshme për Serbinë.

Presidenti i Serbisë, Aleksandër Vuçiç, ka thënë se ka për qëllim që Serbia të bëhet me kufij të qartë e jo të mbetet provizorium siç është tani gjendja, e cila, tha ai, krejtësisht ndryshe përshkruhet, ndërsa krejtësisht ndryshe është në terren, raporton Koha.net, duke cituar median serbe “Novosti”.

Duke shpjeguar qëndrimin e tij mbi “lajmin” e caktimit të kufijve me Kosovën, presidenti serb tha se nuk ka thene asgjë të re dhe se ai mbron opsionin e demarkacionit qe ka shprehur për vite me rradhë.

Vucic nder te tjera ka theksuar se Kosova është territori që nuk dihet kush si e trajton, kujt çfarë i takon në të dhe si e tillë gjithmonë burim i konflikteve të mundshme, transmeton Koha.net.

“Kam folur për një demarkacion me shqiptarët dhe kjo është politika që unë përfaqësoj dhe nëse do të kemi sukses në këtë, nuk varet nga ne. Tango ka nevojë për dy persona. Zgjidhja për Kosovën dhe Metohinë, nëse vjen, duhet të jetë gjithëpërfshirëse, jo e thjeshtuar, siç e imagjinojnë disa”, ka thene Vucic.

“Duam shtetin kufijtë e të cilit i dimë, shtetin e përcaktuar që e ruajmë dhe e mbrojmë. Kam folur shumë herë për këtë, kjo nuk është ndonjë gjë e re, e që dikush në mendjen e vet e sheh këtë si habi me imagjinatën e vet të prishur, këtë s’e kuptoj”, citon “Novosti” të ketë thënë Vuçic.

“Se a do ta ketë përkrahjen e popullit kjo politikë, nuk e di por unë përpiqem për kufij me shqiptarët”, ka thënë Vuçic.

Ai ka shtuar se nuk dëshiron të flasë për detajet e bisedimeve rreth kësaj çështjeje.

“Unë nuk jam i papërgjegjshëm dhe nuk do të dal me “deklarata madhështore patriotike”. E njoh punën time dhe e bëj atë në interesin më të mirë të Serbisë dhe pa dyshim do të them atë që mendoj kur vjen puna afër një zgjidhjeje të prekshme”, tha Vucic.

Presidenti i Serbisë, Aleksandër Vuçiç, deklaroi sot se angazhohet për ridefinim të kufijve me shqiptarët.

“Unë angazhohem dhe kjo është politika ime, për ridefinimin e kufijve me shqiptarët. Kështu që ne ta kemi territorin për të cilën nuk dihet se kush si e trajton dhe çfarë i takon dikujt dhe ky është gjithmonë potencial për trazira”, tha Vuçiç, shkruan Telegraf.

Ai ka shtuar se nuk mund të flasë se për çfarë po bisedon me shqiptarët e Kosovës, por ka sqaruar se marrëveshja ndërmjet Kosovës dhe Serbisë do të jetë një pako gjithëpërfshirëse, e cila nuk është e lehtë sa disa e mendojnë.

ANKARA – Ministri i Jashtëm turk Mevlüt Çavushoglu ka zhvilluar një bisedë telefonike me homologun e tij amerikan Mike Pompeo, njoftuan burimet diplomatike.

Sipas burimeve, në bisedën telefonike Çavuşoğlu dhe Pompeo kanë diskutuar për marrëdhëniet mes SHBA-ve dhe Turqisë dhe për zgjidhjen e problemeve aktuale mes dy vendeve.

Ministri Çavuşoğlu më 3 gusht ishte takuar kokë më kokë me homologun e tij amerikan në kuadër të takimit të 51-të të ministrave të Punëve të Jashtme të Asociacionit të Kombeve të Azisë Juglindore (ASEAN).

Në një deklaratë pas takimit, Çavuşoğlu ishte shprehur se palët kanë rënë dakord për të bashkëpunuar dhe zhvilluar dialog në të ardhmen për zgjidhjen e problemeve.

Ndërkaq, Popmeo kishte deklaruar se SHBA dhe Turqia janë partnerë të vlefshëm pavarësisht tensioneve të shkaktuara rreth çështjes së pastorit amerikan Andrew Craig Brunson i cili ndodhet nën arrest me akuzat se ka kryer krim në emër të organizatave terroriste PKK dhe FETO.

Ndërkohë, është njoftuar se një delegacion nga Turqia nën kryesimin e zv/ministrit të Jashtëm turk, Sedat Önal, do të niset së shpejti drejt SHBA-ve për bisedime. aa

BEOGRAD – Presidenti i Serbisë, Aleksandër Vuçiç, deklaroi se Beogradi dhe Prishtina janë larg nga zgjidhja, dhe se nuk do të ketë marrëveshje sekrete, por nëse arrihet, do të informojnë qytetarët.

Në një konferencë për mediat mbi bisedimet me Kosovën, ai tha se Beogradin zyrtar e presin ditë të vështira në shtator, për kur është caktuar raundi i ri i bisedimeve me Prishtinën zyrtare.

“Është vështirë të arrihet një zgjidhja e kompromisit, është pothuajse e pamundur”, tha Vuçiç.

Ai tha se nevojitet një zgjidhje sa më e shpejtë rreth çështjes së Kosovës, pasi siç u shpreh, nevojitet një paqe afatgjate mes serbëve dhe shqiptarëve.

“Patjetër të gjejmë zgjidhje e cila do të nënkuptonte njëfarë sigurie për qytetarët tanë”, tha Vuçiç, për të shtuar se vendi i tij do të këmbëngul për zgjidhjen e raporteve me Kishën Ortodokse Serbe (KOS) në Kosovë, dhe zgjidhjen e pronës së serbëve atje.

Për sa i përket KOS-it, Vuçiç tha se nevojitet formimi i zonave të mbrojtura, dhe se prona e kishës duhet ti mbesë KOS-it, selia e së cilës është në Beograd.

Lidhur me pronat e serbëve në Kosovë, presidenti serb kërkoi zgjidhjen e pronave private, pronën e KOS-it, dhe të subjekteve afariste të cilat janë të regjistruara në Serbinë qendrore, përfshirë edhe pronën shtetërore dhe shoqërore të Serbisë në Kosovë.

“Deri në vitin 1999, asetet kanë figuruar në kadastrën e tokës në Kosovë. Posedojmë pikat dhe të dhënat e detajuara dhe të sakta”, tha presidenti serb.

Vuçiç tha se tashmë për 1.930 ditë, Prishtina nuk po përmbush detyrimin për të formuar Bashkësinë e Komunave Serbe (BKS), për çka sipas tij serbët janë privuar nga shumë të drejta që duhet t’i gëzojnë.

“Sipas Marrëveshjes së Brukselit, BKS, është subjekti i cili propozon komandantin e policisë rajonale në veri. BKS propozon katër kandidatë, njërin prej të cilëve Prishtina e përzgjedh. Këtë nuk mund ta bëjmë sepse nuk ka një BKS, për çka komandantin e zgjedh Prishtina”, tha ai.

Ai tha se serbët mund të formojnë vetë Bashkësinë, mirëpo siç tha, kjo do të përdorej nga Prishtina e cila me përkrahjen e bashkësisë ndërkombëtare do të hynte në Veri, për të marrë resurset vitale, prandaj Serbia do të ndjekë zhvillimet për të gjetur momentin e duhur për veprim.

Numri një i shtetit serb, tha se do të donte të merrte barrën e zgjidhjes së çështjes së Kosovës, por se kjo nuk është e mundur sipas Kushtetutës, prandaj vendimi duhet të jetë i qytetarëve.

“Populli do të mund qartë dhe të saktë të shprehet për një marrëveshje të mundshme një ditë”, tha Vuçiç, duke shtuar se çështja e referendumit nuk do të konceptohet në atë mënyrë që anëtarësimi në BE të ndërlidhet me marrëveshjen me Kosovën. aa

President i Serbisë Aleksandër Vuçiç tha se tash është koha më e mirë për të gjetur një zgjidhje me Kosovën dhe se vendi i tij është i interesuar për paqe dhe jo te ketë vrasje për territor.

“Zgjidhja e problemit të Kosovës duhet të bëhet sa më shpejt, si dhe serbët e shqiptarët duhet të deklarohen a kemi nevojë për paqe apo të vazhdojmë të vritemi për territor?”, tha presidenti serb, Aleksandër Vuçiq, në një konferencë për shtyp në Beograd.

Vuçiq u shpreh se marrëveshja, për të cilën ai ka dyshime se do të arrihet, nuk do t’i bëjë serbët të festojnë, por as shqiptarët nuk do të festojnë.

“Ne kemi nevojë për paqe të qëndrueshme ndërmjet serbëve dhe shqiptarëve, zgjidhje kjo, që do të krijonte njëfarë sigurie për qytetarët tanë”, deklaroi Vuçiq.

“A mundet Serbia të marrë më shumë se sa që ka sot? Pozicioni im si president është i qartë: zgjidhja e problemit është e domosdoshme, sa më parë. Ne kemi nevojë për paqe të qëndrueshme në mes të serbëve dhe shqiptarëve, është e rëndësishme që të krijojmë siguri për qytetarët tanë, sa më parë. Por është e rëndësishme gjithashtu që kur të arrijmë një paqe të tillë, t’i kushtojmë vetes rëndësi në zhvillimin ekonomik dhe të mos lejojmë faktorë të tjerë të dalin në rrugën tonë”, tha tutje presidenti serb.

Presidenti serb, gjithashtu tha se serbët nga Kosova nuk do të jenë të vetëm në formimin e Asociacionit të komunave me shumicë serbe.

“Do të punoj nga afër për të përcjellë dhe monitoruar zhvillimet në bashkësinë ndërkombëtare dhe do të insistoj për të drejtat tona”, tha Vuçiq, duke theksuar se kanë kaluar 1930 ditë nga dita kur ishte dashur të formohej Asociacioni i komunave me shumicë serbe në Kosovë.

Vuçiq po ashtu tha se politika e Beogradit ka bërë shumë gabime dhe se një nga gabimet më të mëdha ka qenë edhe kërkesa ndaj Gjykatës Ndërkombëtare të Drejtësisë nëse Kosova kishte të drejtë ta shpallë pavarësinë. Vendimi ishte se Pristina kishte të drejtë ta shpallte pavarësinë, dhe sipas Vuçiqit, ky vendim e ka bërë shumë të vështirë për atë që t’i bindë të tjerët se Kosova është pjesë e Serbisë.

Presidenti i Serbisë, Aleksandër Vuçiçi u është drejtuar me një letër të hapur qytetarëve serbë të Kosovës, përmes së cilës u ka thënë se përderisa ai të jetë në krye të shtetit të Serbisë, nuk do të lejojë dhunë të organizuar mbi serbët dhe shenjtërit e tyre, as përndjekjen e tyre.

Këtë letër, Vuçiq ua ka drejtuar serbëve një ditë para kalimit të afatit për draftimin e statutit të Asociacionit të komunave me shumicë serbe, duke thënë se “as kësaj here Prishtina nuk do të lëvizë as gishtin për të formuar Asociacionin e komunave serbe”.

Ai ka lutur qytetarët serbë që të mos ndërmarrin asgjë, ngase sipas tij, këtë do të mund ta shfrytëzonin shqiptarët ose një pjesë e bashkësisë ndërkombëtare si pretekst për të ndërmarrë çfarëdo aksioni ndaj tyre.

Ai ka thënë se ruajtja e paqes në Kosovë është detyrë parësore e NATO-s prej të cilës pret dhe kërkon që “ta ruajnë paqen në atë mënyrë që të pengojnë çfarëdo tentimi eventual të kujtdo dhe me çfarëdo preteksti që ta marrin dhe ta grabisin hidro-elektranën ‘Gazivoda’ (Ujman) dhe trafo-stacionin ‘Vallaç’ ose cilindo objekt kyç infrastrukturor prej të cilit varet mbijetesa e serbëve”.

Vuçiq është shprehur po ashtu se për hir të paqes e stabilitetit do të angazhohet për zgjidhje paqësore dhe kompromisi të marrëdhënieve në Kosovë dhe nuk do të ndalet derisa serbëve të mos u sigurohen të drejta më shumë sesa që kanë sot.

Kryeministrja e Serbisë, Ana Brnabiç, tha se administrata e tanishme amerikane “është e gatshme të dëgjojë qëndrimin e Serbisë në lidhje me zgjidhjen e çështjes së Kosovës”.

“Shumë herë kam pasur përshtypjen se kam para vetes një bashkëbisedues që nuk është i gatshëm të dëgjojë – sikur të flasësh me murin. Tani kemi bashkëbisedues që është i gatshëm të dëgjojë”, tha Brnabiq për Radio-Televizionin e Serbisë.

Duke komentuar synimin e Briatnisë së Madhe që të mos e fusë Kosovën në planin e punës gjatë kryesimit të këtij vendi me Këshillin e Sigurimit të OKB-së, në gusht, Brnabiq tha se fjala është për “qëllim të pasinqertë politik”.

“Realisht nuk ekzistojnë shumë gjëra që mund t’i bëjmë direkt, por do të vazhdojmë luftën diplomatike. Kombet e Bashkuara do të duhet të diskutojnë për situatën në Kosovë, siç kanë bërë deri tash”, tha Brnabiq.

Drejtori i Zyrës për Kosovën në Qeverinë e Serbisë, Marko Gjuriç, tha se zyrtarët kosovarë mund të vizitojnë Serbinë qendrore nëse thirren në marrëveshjet për vizita dhe me kusht që funksioni i tyre ekziston sipas rregulloreve ndërkombëtare.

“Të gjithë zyrtarët që ekzistojnë sipas normave ndërkombëtare mund të thirren lirisht në marrëveshjet për vizita dhe të lëvizin në territorin e vendit të tyre. Por të tillë nuk janë i ashtuquajturi ministër i Jashtëm i Kosovës apo i ashtuquajturi ministër i Forcës së Sigurisë së Kosovës, sepse krahina e jugut nuk ka funksione të tilla”, tha Gjuriq duke iu refereuar Kosovës.

Ai i bëri këto komente për gazetën serbe Veçernje Novosti.

Autoritetet në Serbi, së voni, nuk i kanë lejuar hyrjen ministrit të Jashtëm të Kosovës, Behxhet Pacolli, i cili ka kërkuar të vizitojë Novi Pazarin, me ftesë të Këshillit Kombëtar Boshnjak.

Është qëlluar për vdekje në Beograd një avokat që dikur ka qenë pjesë e ekipit mbrojtës të ish-liderit serb, Sllobodan Millosheviç gjatë gjykimit të këtij të fundit për krime lufte.

Dragoslav Ognjanoviç, 57-vjeç, është vrarë jashtë ndërtesës ku jetonte në Beograd në orët e vona të 28 korrikut, ka njoftuar Ministria e Brendshme serbe.

Kjo Ministri, përmes një deklarate, ka thënë se edhe djali 26-vjeçar i avokatit Ognjanoviq, është plagosur me armë zjarri në krahë.

Policia ende është duke kërkuar për sulmuesin dhe nuk ka informacione për motivin e këtij sulmi.

Ognjanoviq kishte qenë pjesë e ekipit mbrojtës të Millosheviqit gjatë gjykimit të tij në Tribunalin për Krime Lufte në ish-Jugosllavi.

Ish-presidenti serb ishte arrestuar më 2001 dhe ishte dërguar për gjykim në Hagë, nën akuzat për gjenocid dhe krime të tjera të kryera gjatë shpërbërjes së Jugosllavisë në vitet e 90-ta.

Por Millosheviq vdiq përpara se të shpallej një vendim nga gjykata në Hagë.

Ognjanoviq ka qenë avokat në një numër të madh të rasteve të profilit të lartë të mafias në Serbi dhe Mal të Zi.

Disa pjesëtarë të njohur të rrjeteve kriminale serbe dhe malazeze janë vrarë në Beograd vitet e fundit.

Policia i ka përshkruar këto vrasje si pjesë e një lufte bandash mbi tregun e paligjshëm të drogës.

Në një deklaratë të përbashkët, të Shoqatës së Avokatëve të Serbisë dhe Shoqatës së Avokatëve të Beogradit, thuhet se vrasja e Ognjanoviq është “e fundit në serinë e sulmeve ndaj avokatëve”.

“Ne do të ushtrojmë presion maksimal karshi autoriteteve kompetente shtetërore për të gjetur autorët e këtij krimi sa më shpejt që të jetë e mundur”, thuhet në deklaratë.

ATHINË – 5 ditë pas zjarrit vdekjeprurës që i mori jetën 87 personave në Athinë, kryeministri grek Alexis Tsipras mori përgjegjësinë politike për katastrofën kombëtare.

Kreu i qeverisë helene u bëri thirrje edhe ministrave që tani për tani të fokusohen në zhdukjen e çdo problemi dhe kthimin e normalitetit në vend, por sapo çdo gjë të ketë përfunduar duhet të merren përgjegjësitë.

“Unë dua të marr përgjegjësinë politike përpara kabinetit e popullit për këtë ngjare të rëndë. E gjithë qeveria duhet të marrë përgjegjësinë e plotë për tragjedinë. Nuk u shmangëm kur morëm as vendin e falimentuar pas zgjedhjeve, në momente të vështira. Ne po qeverisim një vend që për vite me radhë ka pasur shtrembërime. Të gjitha komplekset e banimit janë ndërtuar pa asnjë dispozitë për sigurinë e banorëve. Por ky shtet tani qeveriset nga ne,” tha Tsipras.

Rreth 87 persona humbën jetën nga flakët e mëdha në Athinë, ndërkohë që qindra të tjerë janë plagosur apo zhdukur.

Autoritetet greke po punojnë për gjetjen e trupave të shuar nga zjarri.

Historia e dy motrave të vogla është një prej rasteve që i ka prekur të gjithë pas zjarreve në Greqi. Prindërit deklaruan se i panë në varkë në pamjet e transmetuara në televizion por një çift tjetër reagoi dhe tha se janë vajzat e tyre.

Ndërkohë, prindërit vijojnë kërkimet dhe shprehen ende të sigurt se vajzat që panë në pamje janë fëmijët e tyre dhe se mund të jenë rrëmbyer.

Familja Filipoupolos ka pajtuar një hetues privat për të kërkuar vajzat. Ai deklaroi se ka shpresë që ato janë gjallë.

Në një dëshmi, një grua ka thënë se ka parë dy vajza binjake në një varkë shpëtimi që ngjasojnë me motrat Filipopoulos.

“Është në fakt një situata tepër e paqartë, por ne nuk duam që të mendojmë skenarin më të keq. Ka një informacion të fundit nga një zonjë, e cila ishte në det bashkë me një grup, ku ishin edhe dy vajza binjake të vogla. Ne duam të shpresojmë, ndaj dua të jem optimist”, tha hetuesi.

Vuçiç theksoi se është shumë mirënjohës që Izraeli nuk e ka njohur Kosovën, kështu që Serbia gjithmonë do të kultivojë marrëdhënie miqësore me shtetin e Izraelit dhe popullin hebre

BEOGRAD – Historia nuk duhet harruar, as viktimat hebreje dhe ato serbe gjatë Luftës së Dytë Botërore, shprehën sot në Beograd mendimin e përbashkët të dy presidententët, ai izraelit, Reuven Rivlin dhe ai i Serbisë, Aleksandar Vuçiç.

Presidenti izraelit në konferencën e përbashkët për media me homologun e tij serb, tha se të dy vendet kanë shumë gjëra të përbashkëta, se të dyja janë përballur, por se ende janë duke luftuar për të mbrojtur pavarësinë e tyre.

“Marrëdhëniet midis popullit hebre dhe popullit serb janë duke u përballur me të kaluarën, por historia nuk duhet të harrohet. Ne si pjesëtarë të popullit hebre që vuajtën gjatë Holokaustit, jemi të vetëdishëm për vuajtjet e popullit serb. Shpresojmë se në të ardhmen do të shohim një vend ku do të nderohen viktimat e Luftës së Dytë Botërore, ku gjeneratat e reja do të mësojnë për vuajtjet e popullit hebre dhe atij serb”, tha ai.

Rivlin shprehu shpresë se vizita e tij e sotme do të ndihmojë në intensifikimin e marrëdhënieve midis dy vendeve dhe dy popujve.

“Komuniteti hebraik në Serbi është një urë shumë e rëndësishme midis dy kombeve”, tha ai.

Ai falënderoi Vuçiçin se Serbia miratoi Ligjin mbi Kthimin e Pronës së Viktimave të Holokaustit, duke theksuar se kjo duhet të jetë një model për vendet e tjera.

“Jam krenar që jam presidenti i parë i Izraelit që ka vizituar Serbinë dhe me të vërtetë do të jem i nderuar që presidenti i Serbisë Vuçiç të vij në Kuds”, tha ai.

Sipas tij, Izraeli sot është një ekonomi e fortë.

“Ne jemi krenar për numrin e madh të investimeve izraelite në Serbi, është detyra jonë dhe dëshira që të jemi partnerë të atyre që duan të ecin përpara”, tha presidenti izraelit.

Ndërkaq, presidenti serb theksoi se është shumë mirënjohës që Izraeli nuk e ka njohur Kosovën, kështu që Serbia gjithmonë do të kultivojë marrëdhënie miqësore me shtetin e Izraelit dhe popullin hebre.

“Pres përmirësimin e marrëdhënieve nëpërmjet marrëdhënieve ekonomike, nëpërmjet shkëmbimit tregtar”, tha ai, duke shprehur shpresë se më shumë turistë nga Izraeli do të vijnë në Serbi, si dhe një numër më i madh turistësh serb do të shkojnë në Izrael.

Presidenti serb gjithashtu tha se është rënë dakord që të krijohet një Komitet i Përzier Bashkëpunimi, i cili pritet të krijojë një ambient biznesi edhe më të sigurt në të dy anët. aa

ATHINË – Është rritur në 81 numri i personave që kanë humbur jetën si pasojë e zjarreve pyjore në afërsi të kryeqytetit të Greqisë, Athinë, të cilat shkaktuan një nga fatkeqësitë më të mëdha të zjarrit në historinë e Greqisë.

• Maqedonia dhe Shqipëria ndihma Greqisë për dëmet e shkaktuara nga zjarret

Zjarret pyjore të cilat veçanërisht ndodhin shpesh në muajt e verës, shndërrojnë mijëra dynymë toke në hi dhe shkaktojnë vdekjen e shumë personave.

Zjarret që shpërthyen në fushat pyjore në afërsi të rajoneve Rafina dhe Penteli, 20 kilometra në verilindje të Athinës u përhapën edhe në rajonet e banuara, duke shkaktuar një nga fatkeqësitë më të mëdha të zjarrit në historinë e Greqisë ndërsa shkaktuan vdekjen e më shumë personave deri tani.

Dhjetra persona humbën jetën pasi mbetën të bllokuar në shtëpitë dhe automjetet e tyre meqë zjarret u përhapën në një rajon të gjerë për shkak të erërave të forta që ndryshuan vatrat e zjarreve. Ndërsa disa prej tyre janë mbytur pasi kanë hyrë në det për t’i shpëtuar flakëve.

Mbi 100 persona llogariten si të zhdukur në mesin e të cilëve edhe turistë të huaj. Nga zjarret mijëra dynymë zonë pyjore si dhe mbi 1.000 shtëpi dhe qindra automjete janë në gjendje të papërdorshme.

– Zjarret më të mëdha në 20 vitet e fundit

Në zjarrin që ndodhi në vitin 2000 në ishullin Samos janë prekur shumë vendbanime. Në atë zjarr u dogjën 145 mijë dynymë tokë, ndërsa ishin dëmtuar 47 shtëpi. Të njëjtin vit në zjarrin përreth qytetit Korinth janë djegur 200 mijë dynymë tokë.

Ndërsa në zjarrin e muajit gusht të vitit 2007 në qytezën Zacharo të Gadishullit Mora humbën jetën 63 persona. Të njëjtin vit në zjarret në rajone të ndryshme qindra mijëra dynymë tokë ishin djegur, ndërsa gjithsej humbën jetën 84 persona.

Në zjarrin në ishullin Rhodos në vitin 2008 janë djegur 110 mijë dynymë tokë. Ndërsa më 21 gusht 2009 në Pandeli ishin djegur 175 mijë dynymë tokë.

Hulumtimet tregojnë se zjarret pyjore që ndodhin shpesh herë në Greqi shkaktohen nga neglizhenca dhe pakujdesia.

Autoritetet në Bullgari kanë paralajmëruar Greqinë dhe Turqinë se mund të përballen me vërshime pas reshjeve të mëdha që priten të përshkallëzojnë lumenjtë Arda dhe Maritsa.

Ky njoftim erdhi pas luftës për shuarjen e zjarrit në Greqi që la të vdekur të paktën 74 persona. Lumi Arda në lindje të Rhodope Mountains mund të dal nga shtrati në ditët e ardhshme për shkak të reshjeve që priten të ndodhin, deklaroi Ministria e Jashtme e Bullgarisë.

Lumi Arda mund t’i bashkohet lumit Maritsa në lindje të Greqisë në kufij me Turqinë. Autoritetet e Bullgarisë kanë shpallur gjendje të jashtëzakonshme. Një person ka vdekur të martën si pasojë e rrëmbimit nga vërshimet që kapluan qytetin Teteven.

UPDATE/ Situata në zonën e Atikës në Greqi është ende shumë e rrezikshme, ndërsa deri tani raportohet për të paktën 60 viktima dhe më shumë se 160 të lënduar.

Gazetarja Ira Londo raportoi nga Greqia për “News 24” se fatkeqësisht është konfirmuar se ka tre viktima shqiptarë, të cilët kanë qenë punonjës të një restoranti. Gjithashtu mësohet se janë djegur edhe disa shtëpi të shqiptarëve ne Greqi.

Ndërsa disa prej shqiptarëve qe jetojnë dhe punojnë atje kanë përfunduar në spital nga asfiksia. Një çift shqiptarësh, të cilët shkuan për ndihmë mjekësore në spital, folën për Top Channel:

“Përfunduam në spital nga tymi i tepërt. Bashkëshortja nuk merrte dot frymë. Pësoi akth. Nuk merrnim dot frymë”.

Gazetarja e News24 u shpreh se kjo zonë është shumë e populluar nga shqiptarët, dhe gjatë këtyre orëve ajo ka pasur kontakt me disa prej tyre.

Gazetarja tha se brenda makinës së një shqiptari është gjetur një viktimë, por ende nuk dihet nëse është trupi i një të riu nga Tepelena.

Ndërkohë, ajo është shprehur se nga dëshmitë që ka pasur nga shqiptarët që kanë mundur t’u shpëtojnë flakëve, i është pohuar se favori që ata kanë pasur, ka qenë njohja e mirë e zonës, pasi jetojnë aty edhe gjatë dimrit, dhe kjo i ka ndihmuar që të largohen përmes rrugicave dhe të dalin më shpejt në det.

Pjesa më e madhe e viktimave janë gjetur të shkrumbuar në makina, duke mos pasur mundësi të largohen.

Ndërkohë, “Report Tv” ka marrë një dëshmi nga një emigrant shqiptar, Mondi Sinaj, i cili në një lidhje telefonike nga Athina shprehet se në zonën që ka rënë zjarri kishte shumë shqiptarë që punonin në banesat që janë djegur, ndërsa nga informacionet e para janë 13 të lënduar.

Përsa i përket shqiptarit që dyshohet se ka humbur jetën, ai është nga Tepelena dhe sipas Sinajt, nuk arriti që të dalë nga makina, pas zjarrit.

“Në fakt në zonën e zjarreve ka pasur shumë shqiptarë të cilët punojnë nëpër shtëpitë e grekëve. Kemi informacion se 13 shqiptarë janë lënduar nga flakët. Kam folur me shumë prej tyre. Flitet edhe për një djalë nga Tepelena që dyshohet se është djegur në makinën e tij, por nuk e dimë 100% të saktë.

Kemi pasur shumë ndihmë nga ambasada. Janë interesuar deri vonë në orët e mbrëmjes. Zjarret kanë rënë kudo në Athinë në të gjitha anët. Kam parë gra dhe fëmijë që vuajnë dhe digjen, është diçka që nuk përshkruhet me fjalë, kam parë masakër me sy.

Ato që hoqëm dje nuk mund të përshkruhen dot. Njerëzit u hodhën në det për të shpëtuar. Është diçka e tmerrshme. Unë isha në shtëpi dhe u interesova për njerëzit që njihja. Zjarri ishte me shpejtësi për shkak të erës”, është shprehur ai.

Një tjetër emigrante shqiptare nga Athina, Drita Bushi në një lidhje telefonike për Report Tv thotë se janë djegur 10 banesa të shqiptarëve, ndërsa situata është mjaft e rëndë.

“700 banesa janë djegur, shumë njerëz humbën jetën, pashë një fëmijë dy muajsh, që humbi jetën nga zjarri. 10 banesa të shqiptarëve janë djegur nga zjarri. Një familje shqiptare erdhi më kërkoi ndihmë dhe më tha u dogj cdo gjë. Ajo tha u futëm në det dhe erdhën anijet na morën. Një burrë më tha po rrija në ballkon, u hodha në det për të shpëtuar. Në një party u dogjën 25 persona. Shqiptarë nuk e dimë akoma a ka të vdekur, nuk e kemi marrë vesh akoma. Skenat janë si në filma. Situata nuk është aspak e mirë, po gjenden shumë njerëz të vdekur. Thonë që janë 50 të vdekur, por numri është më i lartë. Nuk kemi kontakte me ambasadën shqiptare, nuk e di numrin e telefonit, po ndihmojmë njerëzit me ushqime dhe strehim ketu”, është shprehur ajo.

Panorama