Ambasadori i Shteteve të Bashkuara të Amerikës në Beograd, Kyle Scott, ka thënë se është shumë e rëndësishme që të dihet se ku është kufiri, ku është Serbia e ku është Kosova.

Këto deklarata Scott i ka bërë në një intervistë në emisionin e mëngjesit në Tv Prva, duke shtuar se vija e kufirit ndërmjet dy shteteve duhet të jetë e qartë.

“Është e qartë që kufijtë duhet të jenë të qartë, ky është një element i marrëveshjes gjithëpërfshirëse, përveç çështjes së menaxhimit të burimeve, të drejtave të komunitetit serb, çështjes së pagesave, personave të humbur dhe krimeve të luftës”, ka thënë ambasadori amerikan.

Sipas tij, një gjë duhet ditur qartë se ku është Serbia dhe ku është Kosova.

“Harta e Serbisë në SHBA dhe harta e Serbisë në Serbi janë të ndryshme”, ka potencuar Kyle Scott, transmeton Gazeta Express.

Ndër të tjera në këtë intervistë Scott ka folur edhe për shkëmbimin e letrave ndërmjet Aleksander Vuçiqit dhe presidentit amerikan, Donald Trump.

“Pajtohem plotësisht me Vuçiqin, është e rëndësishme që të dy palët t’i kthehen dialogut prej të cilit do të vijë një marrëveshje gjithëpërfshirëse”, është shprehur Scott.

Ai, gjithashtu, ka cekur se taksa e vendosur nga Qeveria e Ramush Haradinajt ndaj produkteve serbe është një pengesë për vazhdimin e dialogut.

Sipas ambasadorit amerikan në Beograd, çfarëdo marrëveshje ndërmjet Kosovës dhe Serbisë kërkon kompromis nga të dyja palët.

“Kjo marrëveshje nuk mund të imponohet nga jashtë, duhet të jetë një marrëveshje që është e qëndrueshme dhe e realizueshme, jo vetëm në letër, por që duhet realizuar. Ne nuk mund të bëjmë një marrëveshje që në interesit të Serbisë dhe të Kosovës të arrijë një marrëveshje. Ata duhet të kthehen në dialog, dhe mendoj se vërtetë duan të vazhdojnë dialogun”, ka thënë ndër të tjera ambasadori amerikan në Beograd, Kyle Scott. /GazetaExpress/

Në konferencën për gazetarë, së bashku me presidentin e Serbisë, Aleksandar Vuçiq, Dodik tha se në të gjitha bisedat që kanë zhvilluar të martën në Bruksel anëtarët e Presidencës së Bosnjës, është thënë se zgjidhjet për Kosovën nuk duhet të reflektojnë në Bosnje.

“E kam thënë dje, pardje, e them tani se kjo është e pamundur. Nëse dikush i ka ato të drejta, përse ne të mos i kemi? Ky është qëndrimi im”, tha Dodik, raportojnë mediat serbe.

Ai tha se kolegët e tij në Presidencën e Bosnjës kanë “një qasje ndryshe ndaj problemit të Kosovës”.

“Kam vënë re se ka presione gjithnjë e më të mëdha, të brendshme dhe të jashtme, për të destabilizuar pozicionin negociator të Serbisë. U bëj thirrje të gjithëve që të largohen nga çështjet e politikës ditore, t’i përkushtohemi kësaj çështjeje me rëndësi strategjike dhe të forcojmë pozitën negociuese të ekipit serb”, tha Dodik.

Më herët, Dodik, i cili ka lidhje të ngushta me Rusinë, u ka bërë thirrje serbëve të Bosnjës që të ndahen, duke thënë se Bosnja ka dështuar.

BEOGRAD – Presidenti i Serbisë, Aleksandar Vuçiç sot i ka dërguar një letër presidentit të SHBA-ve Donald Trump, në të cilën falënderoi Trumpin për mbështetjen e përpjekjeve të Serbisë për ruajtjen e paqes dhe stabilitetit në Ballkanin Perëndimor.

Siç njoftohet nga Presidenca serbe, Vuçiç i shkroi Trumpit se presidenti i SHBA-ve me “letrën miqësore” edhe një herë theksoi gatishmërinë e SHBA-ve që të ndihmojnë në dialogun mes Beogradit dhe Prishtinës, për të gjetur zgjidhje për Kosovën.

“Më besoni, president i nderuar, se askush nuk e ka më me rëndësi zgjidhjen se sa vendi im, sepse problemi i Kosovës është një barrë e rëndë, para së gjithash, për Serbinë dhe popullin serb. Ne jemi të përkushtuar për dialog dhe i qasemi me guxim dhe realitet, duke menduar për të ardhmen e të gjithë neve në Ballkanin Perëndimor. Ne i kemi përmbushur të gjitha detyrimet tona sipas Marrëveshjes së Brukselit”, theksoi Vuçiç.

Megjithatë, vlerësoi Vuçiç, Serbia nuk mund ta zgjidh këtë problem të rëndë vet, pa marrë parasysh vullnetin dhe besimin, duke përkujtuar se Serbia është e gatshme për vazhdimin e dialogut sapo të hiqet taksa ndaj produkteve të Serbisë.

“Dua që me këtë letër të theksoj edhe një herë vendosmërinë time të fuqishme për të pasuruar marrëdhëniet e dy vendeve tona me forca të përbashkëta. Jam krenar që vendi im në dy luftërat botërore ka luftuar në anën e drejtë dhe të drejtësisë dhe se ne ishim aleatë. Vitin e kaluar shënuam shekullin që kur flamuri serb u valëvit mbi Shtëpinë e Bardhë, në nder të guximit të Serbisë dhe viktimave të dhëna në Luftën e Parë Botërore”, thotë presidenti i Serbisë, Vuçiç në letrën e tij.

Ai i bëri thirrje Trumpit që të vizitojë Serbinë, si presidenti i parë amerikan pas, “pothuajse 40 vitesh”.

“Me përshëndetjet e ngrohta, pranoni, ekselenca juaj, urimet më të mira për përparimin e mëtejshëm të vendit tuaj dhe mirëqenien e qytetarëve amerikanë dhe shprehjet e respektit tim të thellë”, shkruan në letrën e presidentit Vuçiç drejtuar presidentit të SHBA-ve, Donald Trump. aa

Presidenti i Sllovenisë, Borut Pahor (majtas) dhe presidenti i Serbisë, Aleksandar Vuçiq. Beograd, 28 janar 2019.

Presidenti i Serbisë, Aleksandar Vuçiq, tha se vendi i tij duhet t’i kuptojë edhe interesat e shqiptarëve dhe të bëjë përpjekje të arrijë marrëveshje kompromisi me Kosovën.

“E di se askush nuk dëshiron ta dëgjojë këtë fjali, por është thelbësore që t’i shohim edhe interesat e tjetrit dhe të bëjmë përpjekje të arrijmë kompromis”, tha Vuçiq në një konferencë për media në Beograd me homologun slloven, Borut Pahor.

Vuçiq tha se në Davos, ku së voni ka marrë pjesë në Forumin Ekonomik Botëror, kancelarja gjermane, Angela Merkel, ka theksuar se kompromisi është fitore dhe jo humbje.

Ai po ashtu tha se druan se Serbia dhe Kosova janë ende larg marrëveshjes.

Vuçiq i bëri komentet pasi gazetarët e pyetën Pahorin se si e sheh zgjidhjen e mundshme të mosmarrëveshjeve midis Kosovës dhe Serbisë dhe si e komenton ndryshimin e mundshëm të kufijve midis dy vendeve.

Pahor tha se procesi nuk mund të sjellë dëme kolaterale për vendet e tjera në rajon.

“Është një mendim shumë i guximshëm, nuk do ta refuzoja, por do të isha shumë, shumë i kujdesshëm në lidhje me të”, tha Pahor.

Ideja për ndryshimin e kufijve midis Kosovës dhe Serbisë është shpalosur nga presidentët e të dyja vendeve si mundësi për zgjidhjen e problemeve midis tyre.

Këtë ide, disa e kanë mbështetur, të tjerë e kanë kundërshtuar.

NOVI SAD – Presidenti i Serbisë, Aleksandar Vuçiç, ka thënë se është i përkushtuar për zgjidhjen e çështjeve të hapura midis Beogradit dhe Prishtinës dhe se nuk mbështet politikën e konfliktit të ngrirë.

Duke folur për takimin me Kancelaren gjermane Angela Merkel në Davos, ku ndër të tjera u diskutua dhe për zgjidhjen e problemit të Kosovës, ai kujtoi se 22 nga 27 vendet e Bashkimit Evropian tashmë e kanë njohur pavarësinë e Kosovës brenda kufijve të asaj.

“Por, në njëfarë mënyre ne rrallë e kujtojmë atë. Besoj se Gjermania do të shikojë jo vetëm dialogun, por edhe në arritjen e një zgjidhjeje kompromisi. Por a do të jemi në gjendje ta bëjmë këtë, nëse do të mund t’ia dalim, mbetet të shohim”, tha Vuçiç.

Siç theksoi ai, nuk është e mundur të mbahet i ngrirë konflikti i Kosovës, sepse ka interesa të shqiptarëve, por edhe interesa të disa fuqive të mëdha që duan të zgjidhin problemin. Vuçiç tha se përfaqësuesit e shqiptarëve të Kosovës haptazi thonë se ata përfundimisht kanë shtetin e tyre “dhe ata për këtë do të paguajnë çfarëdo çmimi”.

“Ja tani i pyes qytetarët e Serbisë, sa jemi ne të gatshëm të paguajmë këtë çmim, sa kemi paguar në të kaluarën për këto politika të gabuara që kemi ndjekur”, ka thënë presidenti i Serbisë, duke shtuar:

“Mendoj se është koha të fillojmë të mendojmë për njerëzit, natyrisht duke ruajtur interesat tona dhe duke fituar më së shumti që mundemi për Serbinë dhe popullin serb. Nëse këta njerëz nuk duan të kuptojnë, atëherë çfarë mundem unë. Më vjen keq për këtë, por një gjë të tillë nuk mund të ndryshoj, sikur që nuk do të ndryshoj politikën e cila është racionale, serioze dhe përgjegjëse dhe e cila deri më sot i ka sjellë rezultate shumë të mira Serbisë”.

Duke komentuar ratifikimin e marrëveshjes midis Greqisë dhe Maqedonisë për emrin Republika e Maqedonisë së Veriut, Vuçiç tha se Serbia nuk ndërhyn në punët e brendshme të vendeve të tjera, por se do të jetë një nga vendet e para që do ta njohë fqinjin e saj jugor me emrin e ri kushtetues – Maqedonia e Veriut.

“Ne duam marrëdhëniet më të mira si me njërin ashtu edhe me tjetrin vend dhe përgëzoj Tsipras dhe Zaev për këtë”, vuri në dukje Vuçiç.

Ai gjithashtu theksoi se mosmarrëveshja mes dy vendeve ishte vetëm për emrin e shtetit, ndërsa marrëdhëniet e Serbisë me Prishtinën janë “dhjetëfish më të vështira”.

“Këto janë probleme të ndryshme në aspektin e peshës së tyre dhe të pasojave që ato bartin dhe në çdo gjë tjetër, por ajo që është politika e Serbisë dhe ajo që mendoj se na sjellë të ardhmen më të mirë është politika e stabilitetit rajonal dhe politika e hapjes së kufijve sepse ne në aspektin ekonomik nuk kemi frikë nga të tjerët”, theksoi presidenti i Serbisë, Vuçiç. aa

Mijëra protestues u mblodhën të dielën në Sheshin Sintagma të Athinës për të demonstruar kundër marrëveshjes për ndryshimin e emrit të Maqedonisë në Maqedonia e Veriut. Disa protestues u përleshën me policinë deri në shkallët e ndërtesës së parlamentit.

Përleshjet midis protestuesve dhe policisë u shkallëzuan të dielën në një tubim kundër marrëveshjes së emrit të Maqedonisë së Veriut.

Ndryshimi i emrit është rezultat i mosmarrëveshjeve mes Maqedonisë dhe Greqisë mbi historinë dhe identitetin kombëtar që zgjati 27 vjet.

Protesta po organizohet jashtë Parlamentit të Greqisë, i cili pritet të fillojë një debat për ratifikimin e marrëveshjes të hënën dhe të votojë mbi të deri të premten.

Protestuesja Natasha Afanasiadou thotë se nuk shihte “asnjë mënyrë” që të mos shkonte në demonstratë:

“Nuk është e drejtë të rrija në shtëpi kur ndodhin gjëra të tilla. Kam një fëmijë dhe nuk dua të shikoj prapa dhe të mendoj se nuk kam protestuar për këtë çështje”.

“Referendumi do të ishte zgjidhja më e mirë. Le të vendosin njerëzit. Kjo marrëveshje u miratua pa i kërkuar mendimin njerëzve dhe pa informuar parlamentin. Kryeministri dhe ministri i Jashtëm vepruan vetë pa pyetur popullin grek”, thotë protestuesi Dimitrious Oppas.

Greqia dhe Maqedonia ranë dakord qershorin e kaluar për një marrëveshje që do të ndryshonte emrin e fqinjit verior të Greqisë në Maqedonia e Veriut. Në këmbim, Greqia do të heqë dorë nga kundërshtimet e saj ndaj vendit që të bashkohet me aleancën e NATO-s.

Kjo është vizita e katërt e Putinit në Serbi, ndërsa e para ishte në vitin 2001. Për këtë vizitë, ku do të diskutohet edhe për Kosovën, Vuçiq i ka përgatitur si dhuratë presidentit rus edhe një qen Sharri.

Madje atij, sipas portalit serb “Blic” i është bërë gati edhe pasaporta për udhëtim në Moskë.

Ndryshe Qeni i Sharrit që njihet ndryshe edhe si Deltari Ilir, është qen autokton i trojeve shqiptare. Ky qen njihet prej shumë kohësh, dhe përmendet në historinë e Ilirisë ku njihet me emrin Qeni Dardan.

Putin është dashamir i qenve ndërsa në shtëpinë e tij ka 3 të tillë. Shefi i shtetit rus do të mbërrijë nesër në Beograd nën masa të rrepta sigurie. Atë do ta presin në qendër të Beogradit rreth 70 mijë njerëz. Për sigurinë e tij ndërkohë do të kujdesen rreth 5000 policë serbë. /GazetaExpress/

Ministri i Tregtisë së Jashtme dhe i Marrëdhënieve Ekonomike i BeH, Mirko Sharoviq ka konfirmuar sot se pala kosovare, me kërkesë të Bosnjës e Hercegovinës ka pranuar negociata bilaterale për shfuqizimin e vendimit për vendosjen e taksës 100 për qind në mallrat nga ky shtet, raporton klix.ba.

Sipas këtij burimi, tashmë janë në zhvillim e sipër përgatitjet për takime bilaterale në nivel ekspertësh për gjetjen e zgjidhjeve adekuate dhe për pengimin e pasojave më të mëdha të shkaktuara nga masat e marra nga Kosova.

“Nuk mund ta parashohim rrjedhën, por është me rëndësi se ia kemi dalë të hapim negociatat në nivel ekspertësh. Në vend se të aplikojmë kundërmasa, që askujt nuk do t’u shërbenin, kemi krijuar kushte që problemet të zgjidhen në nivel profesional, meqë qëllim ynë parësor është të mbrojmë bizneset vendore të cilat gjatë muajve të fundit nuk mund të eksportojnë në përputhje me rregullat e tregtisë së lirë dhe që të pengojmë dëmet”, citohet të ketë deklaruar Sharoviq.

Bosnja e Hercegovina është dëmtuar së paku për 4,5 milionë dollarë pas vendosjes së taksës në prodhimet e BeH nga ana e Prishtinës.

Citohet po ashtu ministri i Jashtëm i Kosovës, Behgjet Pacolli, i cili të mërkurën ka deklaruar se nuk mund të refuzohet kërkesa e SHBA për heqjen e taksës në prodhimet nga Bosnja e Hercegovina dhe Serbia.

Qeveria e Kosovës në fillim të nëntorit ka vendosur masa mbrojtëse ndaj importit të të gjitha prodhimeve nga Serbia e BeH.

Ministri serb i Tregtisë, Turizmit dhe Telekomunikacionit, Rasim Lajiq ka thënë se dëmi i drejtpërdrejtë në Serbi nga vendosja e taksës nga Kosova kap 34,6 milionë euro, ndërsa dëmi i tërthorët është shumë më i madh, shkruan klix.ba, transmeton Koha.net.

ANKARA – Marrëveshja e Dejtonit detyrimisht duhet të rishikohet meqë është bërë e qartë se në periudhën e deritanishme nuk arriti të sjellë zgjidhje për ardhmërinë e Bosnjë e Hercegovinës, porositi në Ankara presidenti i Republikës së Turqisë, Recep Tayyip Erdoğan, pas takimit me presidenten kroate Kolinda Grabar Kitaroviç.

Erdoğan u adresua në konferencën për gazetarë pas takimit me Grabar – Kitaroviç, e cila sot qëndron për vizitë në Turqi.

Një nga temat që interesoi gazetarët është edhe komenti i Erdoğanit në kontekst të zgjedhjes së Zheljko Komshi për anëtar të Presidencës së Bosnjë e Hercegovinës nga radhët e popullit kroat, në zgjedhjet e tetorit, temë mbi të cilën edhe Zagrebi zyrtar shpalosi pakënaqësinë e saj duke e përcjellë madje edhe në Parlamentin Evropian.

“Respektojë vullnetin zgjedhor të qytetarëve të BeH-së dhe dëshiroj të theksoj rëndësinë e unitetit të të gjithë popujve në këtë vend”, porositi Erdoğan.

Erdoğan shtoi se popujt në BeH duhet të shikojnë njëri-tjetrin me sytë e paqes, si të jetë vendi i tyre, Turqia në këtë po ndihmon.

Presidenti turk ka folur edhe për takimin trilateral Turqi-BeH-Kroaci dhe tha se për këtë takim trilateral do të jetë i mundur të flitet hollësisht pas krijimit të qeverisë në BeH.

“Marrëveshja e Dejtonit detyrimisht duhet të rishikohet. Është shumë e qartë se Marrëveshja e Dejtonit në periudhën e deritanishme nuk ka sjellë zgjidhje për ardhmërinë e Bosnjë e Hercegovinës”, nënvizoi Erdoğan.

Lidhur me këtë, Erdoğan theksoi se nevojitet përfshierja aktive e OKB-së lidhur me BeH-në dhe Marrëveshjen paqësore të Dejtonit, gjegjësisht revizionin e saj. aa

Pamje gjatë incidentit në Beograd më 2008.

Një gjykatë në Serbi ka liruar të dyshuarit për sulmin e vitit 2008 në Ambasadën e Shteteve të Bashkuara në Beograd.

Gjykata e Apelit në Beograd ka thënë më 16 janar se ka përmbysur dënimin e pezulluar me burgim për katër persona të dyshuar dhe ka konfirmuar lirimin e tre personave të tjerë nga një gjykatë më e ulët.

Prokurorët kanë dështuar që të ofrojnë të dhëna të mjaftueshme për të mbështetur padinë, është thënë në deklaratë.

Protestuesit kanë tentuar të hyjnë në Ambasadën e SHBA-së në Beograd dhe i kanë vënë zjarrin një pjese të ndërtesës në shkurt të vitit 2008, teksa dhjetëra mijëra persona patën dalë në kryeqytetin serb për të protestuar pavarësinë e Kosovës.

Një 20 vjeçar ka vdekur në këtë incident, ngjarje që ka tensionuar për vite marrëdhëniet në mes të Uashingtonit dhe Beografit.

Dhjetëra persona të tjerë janë plagosur në dhunën që ka përfshirë sulme edhe në ambasada tjera evropiane, mirëpo me më pak dëme.

Presidenti serb Aleksandër Vuçiç ka deklaruar se konsultohet shpesh me udhëheqësin rus Vladimir Putin për çështje të ndryshme dhe madje “kërkon” këshilla nga ai. Të dy ata pritet të takohen në Beograd të enjten.

Politikani serb tha se ai e informon Putinin për “çfarë po ndodh” dhe kurrë nuk e gënjen gjatë takimeve të tyre.

Në një intervistë me agjensinë e lajmeve TASS, Vucic rrëfeu se i thotë Presidentit rus të vërtetën edhe kur atij nuk i pëqejnë gjërat që ai thotë.” Dhe unë besoj se është një nga gjërat që Putini respekton shumë”, u shpreh ai.

Rusia dhe Serbia tradicionalisht gëzojnë marrëdhënie të mira pasi të dyja kombet kanë lidhje të forta historike dhe kulturore.

Aleksandar Vuçiç shpjegoi se është e rëndësishme për atë që Putin ta trajtojë Serbinë si një partner të barabartë. “Ai është një udhëheqës i një vendi të madh, ndërsa unë jam një udhëheqës i një vendi të vogël dhe ai respekton një vend të tillë, për të cilin unë jam përgjithmonë mirënjohës”.

Presidenti gjithashtu theksoi se Putin “respekton” pavarësinë e vendit ballkanik.

Ai e kupton se (Serbia) i është nënshtruar presionit ndërkombëtar për t’u larguar nga Rusia, për t’u bashkuar me NATO dhe për të marrë pjesë në fushata të ndryshme kundër Rusisë. Por Serbia nuk ka bërë asnjë nga këto.

Një gjykatë në Malin e Zi e ka dënuar me një vit e gjysëm burg gazetarin hulumtues, Jovo Martinoviq, përmes një procesi gjyqësor, të cilin, organizatat ndërkombëtare të mediave e kanë dënuar duke e quajtur si “padrejtësi të tmerrshme” dhe “prapakthim shqetësues” për lirinë e mediave në vend.

Gjykata në Podgoricë e dënoi Jovo Martinoviqin më 15 janar nën akuzat për trafikim droge dhe lidhje kriminale.

Martinoviq, i cili rregullisht ka raportuar për krimin vendor dhe ndërkombëtar, i kundërshtoi akuzat duke thënë se ato paraqesin hakmarrje për raportimet e tij.

Në Paris, organizata “Reporterët pa Kufij” tha se vendimi është shqetësues dhe pengesë “për një vend që thotë se dëshiron të anëtarësohet në Bashkimin Evropian” ndërkaq Komiteti për Mbrojtjen e Gazetarëve me seli në New York, e quajti burgimin e Martinoviqit si një “padrejtësi të tmerrshme që do të ketë efekte të frikshme në lirinë e shtypit në Malin e Zi”.

Martinoviqi ishte duke hulumtuar për trafikimin e armëve në Ballkan për një produksion televiziv francez kur u arrestua në tetor të vitit 2015. Më pas, ai u mbajt në një paraburgim për 15 muaj derisa iu dha një lirim me kusht.

Gazetari ka mohuar akuzat kundër tij dhe ka thënë se kontaktet e tij me qarqet kriminale ishin strikte profesionale në kontekstin e raportimit të tij. “Jam dënuar pasi jam gazetar”, tha Martinoviç pas vendimit të gjykatës, duke shtuar se ai do të apelojë ndaj aktgjykimit.

Presidenti rus Vladimir Putin me siguri do të sjellë një mesazh që do të inkurajojë të gjithë serbët në Kosovë, tha ministri serb i Inovacionit dhe Zhvillimit Teknologjik Nenad Popoviq.

Ai thotë se ‘Putin me siguri do të thotë se Kosova është një pjesë e pandashme e Serbisë për Rusinë dhe do të vazhdojë të mbështesë Rezolutën 1244 të Këshillit të Sigurimit të OKB-së’.

“Unë jam i sigurt se do të hapen çështje shumë të rëndësishme politike për të vazhduar dialogun, sepse Serbia është për dialog. Rusia ka shprehur tashmë gatishmërinë e saj disa herë, nëse ka një ndryshim në formatin e dialogut dhe duhet të vijë pasi marrëveshja e Brukselit dështuar,” tha Popoviq për Tanjug.

Tutje është deklaruar se anëtarët e Ministrisë së Brendshme do të marrin masat maksimale të sigurisë, të cilat poashtu do të ndikojnë në ndryshime të shumta në trafik, në pjesë të caktuara të Beogradit.

Përveç kësaj edhe 250 forca speciale elite ruse dhe një pjesë e sigurimit personal të presidentit rus tashmë kanë arritur në Beograd.

Pjesëtarët rusë do të bëjnë kontrollimin e rrugëve në të cilat do të lëviz Putin, vendet e takimit, kondicionerët, ushqimet, internetin e shumë gjëra të tjera si dhe do të vendosin snajperët në kulmet më të lartë të ndërtesave në Beograd, transmeton Indeksonline.

Inteligjenca ruse njashtu ka bërë të ditur se do të këtë teknologjinë më të zhvilluar për të parandaluar ndonjë sulm të mundshëm përmes dronëve, e që sipas ‘Politika’ është pajisje të cilën Serbia nuk e ka

Ushtria e Serbisë gjithashtu do të marrë pjesë në sigurinë e Putin-it, duke ndjekur planin e presidentit rus që nga momenti që ai hy në hapësirën ajrore të Serbisë.

Ministri i punëve të Jashtme të Serbisë, Ivica Daçiq, tha sot se dy prioritetet më të rëndësishme të Serbisë për vitin 2019 janë ruajtja e interesave në Kosovë dhe anëtarësimi në Bashkimin Evropian.

“Nuk do të heqim dorë nga angazhimi ynë për dialog dhe për kompromis në mënyrë që të gjejmë një zgjidhje gjithëpërfshirëse dhe të qëndrueshme. Serbia mbetet e përkushtuar ndaj parimeve të së drejtës ndërkombëtare” ka thënë Daçiq në një paraqitje para mediave.

“Ne jemi për marrëveshje me Prishtinën mirëpo ndaj çdo veprimi të tyre të njëanshëm ne do të reagojmë me forcë për të mbrojtur interesat tona” tha shefi i diplomacisë serbe.

Kryetari i Lëvizjes për Ringjalljen Serbe (SPO), Vuk Drashkoviç, nuk mbështet pikëpamjet e opozitës serbe që janë kundër marrëveshjes mes Kosovës dhe Serbisë, sepse vlerëson që janë kundër interesave jetike të Serbisë dhe popullit të saj.

Nacionalisti serb, i njohur për deklaratat e tij antishqiptare, i ka thënë “TV Pink” se sa më parë duhet arritur një marrëveshje ligjërisht obligative mes Kosovës dhe Serbisë.

“Nuk kemi çfarë të presim. Konflikti i ngrirë është ngrirje e agonisë dhe shkatërrimit të Serbisë. Ky problem duhet të zgjidhet”, vlerëson Drashkoviç.

Ai vuri në dukje se ekziston një propozim nga BE-ja se në çfarë mënyrë të zgjidhet kjo çështje dhe të respektohet qëndrimi i Serbisë të mos e njohë pavarësinë e Kosovës, por njëkohësisht kjo të zgjidhet sipas modelit të dy Gjermanive, të cilat nuk e kanë njohur njëra-tjetrën, por kanë mbajtur marrëdhënie të gjithanshme dhe të dyja ishin në organizatat ndërkombëtare, përcjell Telegrafi.

“Së pari duhet të heqim dorë nga përdorimi nga tregimi se nuk mund të bëjmë demarkimin me vetveten. Kjo tingëllon mirë për vesh, por është larg realitetit”, tha ai.

Ai theksoi se nuk mund të mbështesë qëndrimet e opozitës serbe që në asnjë rrethanë, kurrë, dhe me asnjë kusht të mos vijë deri te marrëveshja ligjërisht obligative mes Serbisë dhe Kosovës.

“Kjo është kundër interesave jetike të këtij vendi dhe popullit tonë. Mendoj se për shumë gjëra mund të arrihet shumë shpejt marrëveshje”, tha Drashkoviç.

Sipas tij, nëse nesër shpërthen në Kosovë, kjo mund të ndikojë në Bosnjë dhe Maqedoni dhe ekziston vetëm një forcë që mund të shuajë flakën dhe kjo është NATO.

Drashkoviç angazhohet që Serbia të anëtarësohet në NATO dhe paralajmëron se shumica e qytetarëve nuk e dinë se rreziku më i madh për sigurinë biologjike dhe zhvillimore të Serbisë është injorimi i realitetit gjeopolitik.

“Serbia është sot një ishull i vogël në oqeanin e BE-së dhe NATO-s dhe Serbia nuk ka krahë për të fluturuar deri në Rusi dhe të inkuadrohet në aleancë ekonomike dhe ushtarake me Rusinë”, tha Drashkoviç, duke vlerësuar se qytetarët janë fuqimisht kundër NATO-s kryesisht për shkak të mosdijes dhe për shkak të inatit dhe urrejtjes.

ATHINË – Ministri grek i Mbrojtjes dhe kryetari i partnerit të vogël të qeverisë, Partisë Grekët e Pavarur (ANEL), Panos Kammenos, njoftoi se do të largohen nga qeveria e koalicionit.

Kamenos pas takimit rreth gjysmë ore me kryeministrin grek, Alexis Tsipras, ka bërë një deklaratë për gazetarët para ndërtesës së Kryeministrisë së Greqisë.

Duke bërë të ditur se rreth 4 vite kanë nxjerrë vendin nga memorandumet duke marrë pjesë në “qeverinë e bashkimit kombëtar”, Kammenos, tha se “I shpreha kryeministrit se nuk mund të vazhdojmë bashkëpunimin në lidhje me çështjen e emrit të Maqedonisë. Nuk mund të qëndrojmë në qeveri”.

Duke i shprehur falënderimet kryeministrit Tsipras për bashkëpunimin, Kammenos theksoi se “Grekët e pavarur largohen nga qeveria”.

KOMOTINI – Në Greqi një grup mësuesish që kundërshtonin projektligjin e përgatitur nga qeveria për emërimet e mësuesve kanë hyrë në ndërtesën e institucionit të Televizionit Shtetëror Grek (ERT) dhe kanë pushtuar studion gjatë kohës kur buletini i lajmeve ndodhej në transmetim direkt.

Pasi grupi me rreth prej 50 persona ka bastisur studion e lajmeve në kanalin televiziv shtetëror ERT1, bëhet e ditur se fillimish janë ndërprerë lajmet dhe janë vendosur reklamat.

Prezantuesi pas një pauze prej rreth gjysëm ore fjalën ia kanë lënë në studio mësuesve të cilët mbushën ambientin duke mbajtur në duar parrulla si “Kryesore të jenë të drejtat e punonjësit”, “Nuk ka tolerim për terrorizmin”.

Zëdhënësi i grupit ka vënë theksin se protestojnë projektligjin që Ministria greke e Arsimit ka përgatitur në lidhje me emërimet e mësuesve dhe gjtihashtu në trasmetim direkt ka njoftuar kërkesat e mësuesve.

Pas ngjarjes ku policia nuk ka ndërhyrë, theksohet se televizioni ERT1 ka vazhduar normalisht transmetimet dhe po ashtu mësuesit janë larguar nga ndërtesa nën shoqërimin e brohoritjeve.

Në Greqi, mësuesit me thirrjen e bërë nga sindikata të ndryshme kanë protestuar në kryeqytetin Athinë projektligjin që ndryshon kriteret e emërimit të mësuesve. aa

Ish-presidenti i Serbisë, Boris Tadiç, ka komentuar marrëveshjen e Kosovës dhe Serbisë. Në një intervistë për ‘blic.rs’, Tadiç është shprehur se nëse problemi i Kosovës do të zgjidhej në atë mënyrë që njëra palë do të fitonte gjithçka dhe pala tjetër do të humbte gjithçka, me shumë mundësi do të lindë një konflikt i ri.

“Të gjitha zgjidhjet tjera na dërguan në një situatë ku një palë merr gjithçka dhe një tjetër humb gjithçka, gjë që mund të dërgojë në një shpërthim të një konflikti të ri në të ardhmen. Është e vështirë për të llogaritur se cili opsion është më i keq. Absolutisht nuk pajtohem me ata që mendojnë që duhet të vazhdohet konflikti i ngrirë, e as me ata që besojnë që duhet hequr dorë nga Kosova sa më parë të jetë e mundur, pasi asnjë prej tyre nuk i kuptojnë implikimet e qasjeve të tilla”, është shprehur Tadiç.

Ai ka shtuar se konflikti i ngrirë nuk do të mund të vazhdojë edhe për një kohë të gjatë për shkak të rritjes ekonomike dhe demografike të Serbisë.

“Të ashtuquajturit zëra modernistë të cilët thonë se duhet të tërhiqemi nga Kosova sepse konsiderojnë se tashmë ajo pjesë është e humbur, e pengon zhvillimin tonë të mëtejshëm ekonomik, pasi një vend që heq dorë aq lehtë nga pjesë të territorit të saj i dërgon sinjale të tjera se është në gjendje ta bëjë këtë edhe me pjesët e saj të tjera, dhe do të jepte një mesazh për investitorët se është një vend i paqëndrueshëm”, ka thënë ndër të tjera Boris Tadiç.

Ai ka thënë se partia e Aleksander Vuçiçit ka qenë një nga partitë e cila e ka sjellë këtë gjendje në raport me Kosovën, pasi sipas tij që nga vitet e 90-ta kanë bërë veprime të cilat e kanë ngushtuar hapësirën vepruese për zgjidhjen e problemit të Republikës së Kosovës.

Tadiç thotë se për të mbuluar këto dështime, tashmë ata akuzojnë qeverisjen paraprake në Serbi.

BEOGRAD – Ministria e Drejtësisë e Serbisë ka përcjellë në Prishtinë një raport të gjerë duke iu përgjigjur procesverbaleve me persona të marrë në pyetje lidhur me vrasjen e liderit të Iniciativës Qytetare “Serbia, Demokracia dhe Drejtësia”, Oliver Ivanoviç, deklaroi ministrja e Drejtësisë e Serbisë, Nela Kuburoviç.

Kjo është bërë në bazë të kërkesës së fundit nga Prishtina për të marrë në pyetje persona të caktuar në lidhje me hetimin e vrasjes së Ivanoviçit, tha Kuburoviç për TV Pink.

Siç vlerësoi ajo, kjo flet se Beogradi është ende gati të bashkëpunojë dhe t’u përgjigjet të gjitha kërkesave që vijnë nga Prishtina.

“Komunikim të tillë të dyanshëm nga Prishtina nuk kemi”, tha Kuburoviç, duke shtuar se për fat të keq nuk ka ardhur deri te vendosja e bashkëpunimit më të afërt në këtë rast, meqë “Prishtina refuzoi zbatimin e përbashkët të hetimit”.

“Besoj se pikërisht kjo është arsyeja pse nuk ka rezultate konkrete në procedurën parahetimore”, shtoi ajo.

Ajo shprehu bindjen e saj se rezultatet e hetimit do të ishin më të suksesshme nëse menjëherë do të ishin të kapshme të gjitha informatat e kërkuara nga Zyra e Prokurorisë për Krimin e Organizuar në janar dhe shkurt të vitit të kaluar, duke kujtuar se ende nuk ka përgjigje nga Prishtina.

Kuburoviç shtoi se spekulime janë ato se Beogradi kurrë nuk ka bërë një kërkesë të tillë dhe vuri në dukje se ekzistojnë dëshmi të pakundërshtueshme që ata iu drejtuan Prishtinës.

“Komunikimi kalon përmes Zyrës së Delegacionit të Bashkimit Evropian në mënyrë që të keni prova të dyfishta se diçka është dorëzuar, por edhe pas thirrjeve, ende nuk kemi gjithçka që është kërkuar në janar të vitit të kaluar”, tha Kuburoviç. aa

Politikani i opozitës serbe Nenad Canak ka akuzuar kryesuesin e Presidencës të (BiH), Milorad Dodik “një tradhtar i Bosnjes.”

Dhe për këtë arsye Dodik është “eksponenti i presidentit rus në Ballkan,” tha Çanak, lideri i partisë LSV të martën, tha Canak për faqen e internetit të Radiosarajevo.ba në Sarajevë.

Sipas tij, “është shumë e qartë se Dodik nuk mund ta bëjë këtë pa një mbështetje shumë të fortë në Moskë”.

“Si është ajo punë që Vladimir Putin takohet aq shpesh me dikë që deri dje çfarë presidenti i vetëm një etniteti dhe jo shteti i madh më i madh në Ballkan? Unë nuk e shoh një tjetër logjikë nëse Rusia ka interesat e saj. Ajo është e ligjshme për Rusia të ketë interesat e saj. Por kjo nuk është e ligjshme për njerëzit që jetojnë në një vend  dhe që unë do të them atë saktësisht, tradhëtojnë vendin e tyre për interesa private, dhe për të mirën e shtetit rus! Për mua, duke qënë i butë është të them i pandershëm “, – tha Canak.

Ai shtoi se beson se lufta në BiH është ndërprerë nga Marrëveshja e Dejtonit, por nuk ka përfunduar, sepse, siç tha ai, në fund të luftës do të thotë fillimin e paqes.

“Dhe paqja kurrë nuk erdhi” Vrasja u ndal, por nuk filloi Për më tepër, duke hipur mbi interesin e dikujt, natyrisht, kjo do të thotë Rusia, “tha Canak.

Ai tha se partia e Milorad Dodik, Aleanca e Social Demokratëve të Pavarur, ka “një emër cinike” dhe e pyeti se si është e mundur që demokracia sociale mund të bazohet në diçka “thellësisht nacionaliste, klerike dhe fund të fundit anti-qytetërues.”

Canak si kryetar i Komisionit për Integrime Evropiane në Kuvendin e Serbisë, tha se parakusht për paqe të qëndrueshme në rajon është “përfshirja urgjente e Ballkanit tërë në Bashkimin Evropian.”

“Vetëm një hapaje e kufijve mund t’i japë fund në mënyrë përfundimtare lojës për ndryshimin e kufijve”, vlerësoi Canak./b92/

Presidenti serb, Aleksander Vuçiç mori pjesë në edicionin festiv të krishtlindjeve ‘Kurira’. Vuçiç foli edhe për kompromisin në dialogun me Kosovën me Serbinë.

“Kompromisi në politikë nuk është një humbje por një fitore” u shprehë ai.

Presidenti serb vazhdoi duke thënë se e di që serbët nuk do ta pranojnë këtë por pati një mesazh për ta.

“E them këtë, edhe pse e di që serbët nuk do ta pranojnë . Nuk do ta pranojnë sepse është më lehtë të jetosh në mite dhe lavdërime sesa në realitet. Ne duhet të ndryshojmë shumë”- vazhdoi Vuçiç.

Në fjalim kritikoj ata që mbështesin një konflikt të ngrirë me Kosovën.

Ai tregoi se cili është qëllimi dhe detyra e tij në Kosovë.

“Detyra jonë është të parandalojmë që Kosova të mbetet pa serbë”, u shpreh ai.

KALOFER – Burrat nga qyteti bullgar Kalofer, edhe këtë vit si në vitet e kaluara të shoqëruar me daulle, u futën duke vallëzuar në ujërat e akullta të lumit Tunxha, për të vazhduar traditën e tyre 200 vjeçare.

Banorët në fjalë, gjatë festës së tyre të Epifanisë erdhën mëngjesin e sotëm në lumin Tunxha, ku disa prej tyre hynë në lumë për ta thyer akullin i cili kishte ngrirë lumin, për t’u mundësuar të tjerëve që të futen në ujërat e tij.

Edhe pse temperatura e ajrit ishte tetë gradë Celsius nën zero, dhjetëra burra nga qyteti Kalofer hynë në ujin e ftohtë të lumit ku dhe vallëzuan për rreth gjysmë ore.

Sipas besimit që kanë vendasit e kësaj zone, vallëzimi në ujë sjell shëndet dhe mirëqenie për familjet, por është i mirë edhe si një ofertë turistike.

Në mesin e të pranishmëve ishte kryebashkiaku i Kaloferit, Rumen Stojanov, i cili tha se të gjitha hotelet në atë zonë janë rezervuar disa muaj më parë.

“Sado që është e ftohtë Tunxha, askush nga ata që vallëzuan nuk është ftohur”, tha Stojanov.

Mijëra serbë kanë protestuar të shtunën kundë presidentit Aleksandar Vuçiq dhe partisë së tij Progresive në Beograd.

Protestuesit kanë kërkuar liri të mediave dhe kanë kërkuar fundin e sulmeve ndaj gazetarëve si dhe opozitarëve, gjatë protestave që po shënojnë javën e katërt.

Ata mbanin banerët me thirrjet “Nuk do të mbyll gojën”, “Pse po luftojmë me të gjitha shtetet fqinje”.

Më 29 dhjetor, në një intervistë në mediat vendore, Vuçiq tha se është i gatshëm të diskutojë kërkesat e opozitës.

“Jam i gatshëm të shikojë se cfarë po shkakton pakënaqësi tëk njerëzit”, shtoi ai.

Demonstratat ishin nxitur muajin e kaluar kur një grup personash kanë rrahur liderin opozitar Borko Stefanovic.

Mali i Zi planifikon të dëbojë më shumë se 30 murgj dhe priftërinj të Kishës Ortodokse serbe. Me anëtarët e familjeve të tyre, janë rreth pesëdhjetë qytetarë që punojnë në këtë vend.

Partia e Veprimit Demokratik e Sanxhakut ka paralajmëruar mbajtjen e një marshi protestues në Novi Pazar për sot.

Presidenti i Rusisë, Vladimir Putin, do të vizitojë Serbinë më 17 janar të vitit të ardhshëm, ka bërë të ditur presidenti i Serbisë, Aleksandar Vuçiç.

Siç shkruajnë mediat serbe, ndërsa zgjidhja përfundimtare e problemit të Kosovës afrohet, dy fuqitë më të mëdha, Shtetet e Bashkuara dhe Rusia po luftojnë për dominim në rajon.

Pas letrës së presidentit amerikan Donald Trump, në të cilën iu bën thirrje Hashim Thaçit dhe Aleksandar Vuçiçit për të arritur marrëveshje historike, presidenti rus nuk dëshiron të humbë kohë.

“Pasi marrëveshja në Paris më 11 nëntor nuk është arritur përkundër pritjeve, Trump ka parë si shans që të marri një rol kyç dhe mentorimin e negociatave”, citon burimet e veta nga qarqet diplomatike, media serbe “Blic.rs”.

Prandaj, në një letër drejtuar Thaçit ai tha se ai është i gatshëm për të pritur atë dhe Vuçiçin në Shtëpinë e Bardhë, për të festuar për zgjidhjen e problemit.

Në një letër dërguar presidentit të Kosovës, Hashim Thaçit, presidenti amerikan Donald Trump, ka kërkuar nga liderët në Kosovë që të shfrytëzojnë këtë moment të cilin ai e ka quajtur unik, të flasin me një zë dhe të arrijnë një marrëveshje gjithëpërfshirëse me Serbinë.

Në këtë drejtim, ndër tjerash Trump, i ka shkruar presidentit Thaçi se SHBA-të janë të gatshme që të ndihmojnë në përpjekjet për të arritur një marrëveshje, e cila reflekton në mënyrë të balancuar interesat e Kosovës dhe të Serbisë.
Madje, siç është thënë më tej, një marrëveshje e tillë është e arritshme.

Në fund, ajo që bie gjithashtu në sy është fakti se Trump ka shkruar se pret që në Shtëpinë e Bardhë të mirëpres presidentin Thaçi dhe homologun e tij serb, Aleksandar Vuçiç, për “të festuar atë që do jetë një marrëveshje historike”.

Dhe këtë “ngutje” të Putinit, media serbe e quan “panik”, për të cilën gjë shkruan se edhe ka vendosur që së shpejti të vizitojë Serbinë.

Rusia njihet si mbështetëse e aspiratave të Serbisë. Këtë së fundmi e dëshmoi edhe ambasadori rus në OKB Vasily Nebenzja i cili mbështeti presidentin serb Vuçiç dhe Serbinë në seancën e Këshillit të Sigurimit të OKB-së të mbajtur me propozimin e Serbisë, për shkak të formimit të ushtrisë së Kosovës.

Ai tha se ndau shqetësimin e shprehur nga presidenti serb dhe theksoi se transformimi i FSK-së në Ushtri të Kosovës është shkelje e Rezolutës 1244 dhe se kërcënon paqen dhe sigurinë në rajon. Ai gjithashtu vlerësoi se KFOR-i ishte selektiv në përmbushjen e mandatit të tij.

Presidenti i Serbisë, Aleksandar Vuçiç i ftuar në një emisionin e mëngjesit në televizionin “TV Pink” foli dhe analizoi tema të rëndësishme të aktualitetit, por si çështje më kryesore ishte përplasja mes Serbisë dhe Kosovës.

Ai u ndal edhe tek deklarata e presidentit të Shteteve të Bashkuara të Amerikës , Donald Trump, i cili deklaroi ditë më parë se është koha për një marrëveshje historike mes të dyja vendeve. Presidenti serb theksoi faktin se nuk e ka kuptuar mirë porosinë që dha shefi i shtëpisë së bardhë për frazën “Jemi afër përfundimit të dialogut”.

Krahas pikave dhe problemeve të tjera, Vuçiç ka shprehur edhe një dëshirë. Sipas tij, vitin e ardhshëm është koha për të shtuar lindjet tek serbët që jetojnë në Kosovë si strategji për të patur një të ardhme më të mirë.

“Për kompromis kërkohet shumë energji, mund të dëshirë, nuk jam i sigurt nëse dikush në Prishtinë është i gatshëm për këtë. Më së tepërmi më brengos fakti se më askush nuk dëshiron të flasë rreth kësaj, për taksat dhe problemet e tjera. Ato përdoren vetëm kur duhet të sulmohem unë ose Qeveria, edhe pse situata në Kosovë është gjithnjë e më e rëndë. Do të ndihmojnë në të gjitha mënyrat dhe do të mundohemi që vitin tjetër t’i rrisim lindjet në Kosovë në mënyrë që të kemi më shumë fëmijë dhe njerëzit atje të kenë të ardhme. Tri ditë njerëzit këtu flasin për Kosovën, pastaj diçka tjetër u bëhet më e rëndësishme. Por, populli ynë mund të mbështes në shtetin e tyre, Serbinë”, tha ai.

Gjithashtu ai pohoi se është i gatshëm të bisedojë me Kosovën, por më parë kjo e fundit sipas tij duhet të rishikojë vendimin për tarifat e vëna për mallrat serbe.

“Sa do që mund të jetë e dhimbshme, ne jemi të gatshëm të bisedojmë. Unë jam i gatshëm të jap të gjitha që kam arritur në politikë, edhe besimin që e kam fituar, sondazhet tregojnë se në dy muajt e fundit e kemi besimin më të madh se kurrë më parë. Por, jam i gatshëm që të gjitha këto t’i humb në mënyrë që të sigurojë një të ardhme më të mirë për fëmijët tanë. Haradinaj ka thënë se do të më rrëzojë deri te Shen Nikola. Unë i kuptoj dëshirat e tij dhe shumë të tjerëve. Shumëkujt në regjion nuk u intereson Serbia të jetë e fortë, në mënyrë që si më parë, ta shpalosin shumëkush, dhe në këtë formë të krijojnë shtete dhe kombet e tyre”, theksoi Vuçiç.

Mijëra veta morën pjesë në një protestë në Beograd kundër politikave të presidentit Aleksandër Vuçiç dhe kërkuan që t’i jepet fund dhunës politike si dhe raportim të më të drejtë nga televizioni publik.

Protesta e së shtunës ishte e treta me radhë që kur ndodhi një sulm mbi Borislav Strefanoviçin, udhëheqës i partisë së vogël E Majta serbe.

Stefanoviç ishte sulmuar nga një grup burrash me maska të zeza më 23 nëntor në Krushevc, një qytet në jug të Serbisë dhe kishte pësuar plagë të lehta.

Protesta me sloganin “Një nga pesë milionë”, sipas organizatorëve mblodhi 35 mijë deri në 40 mijë veta, ndërsa ministri i Brendshëm serb, Nebojsha Stefanoviç, tha se ishin më së shumti pesë mijë.

Në mesin e atyre që folën në protestë ishte edhe gazetari Milan Jovanoviç i cili pohon se për shkak të shkrimeve mbi korrupsionin i është djegur shtëpia.

Veprimtarët e opozitës thonë se presidenti Vuçiç është një autokrat dhe e cilësojnë partinë e tij të korruptuar. Ata thonë se presidenti Vuçiç, kontrollon pjesën më rë madhe të medieve në Serbi, gjë që i siguron atij përparësi të padrejtë.

Mbështetja për presidentin Vuçiç ka shënuar një rënie të vogël pas fitores së tij të thellë në zgjedhjet presidenciale të vitit 2016, por ai mbetet udhëheqësi politik më popullor dhe koalicioni i tij në pushtet ka një shumicë të qëndrueshme prej 160 deputetësh në parlamentin me 250 vende.

Protestat e opozitës janë të rralla në Serbi që nga trazirat popullore të vitit 2000 që rrezuan ish presidentin Slobodan Milloseviç, i cili më pas vdiq në vitin 2006 në Hagë derisa po gjykohej për krime lufte dhe gjenocid në hapësirat e ish Jugosllavisë.

Aleksandër Vuçiç, një nacionalist i zjarrtë gjatë shkatërrimit të dhunshëm të ish-Jugosllavisë në vitet e 90-ta, më vonë përqafoi vlerat evropiane dhe vendosi anëtarësimin e Serbisë në Bashkimin Evropian si qëllimin strategjik të vendit. Ai gjithashtu mban lidhje të ngushta me Rusinë dhe Kinën. za

Mbështetur në raportimet e agjencive të lajmeve

Ramush Haradinaj ua ka treguar serbëve “recetën” për marrëveshje, njohjen reciproke dhe fqinjësinë e mirë mes dy shteteve.

Por, sipas mediave serbe, plani që ka propozuar Haradinaj është i pamundur pasi Serbia do të humbiste me miliarda dollarë.

Plani me 30 faqe, me një preambulë dhe 16 kapituj, sipas mediave të Beogradit, ka për qëllim kapitulimin e Serbisë, raporton Indeksonline.

Plani i Haradinajt sipas mediave serbe kërkon që Serbia të paguaj dëmet e luftës, pensionet e papaguara, rikthimin e kursimeve nga bankat jugosllave si dhe kompensim për përfitime sociale, shtesa për fëmijë dhe transmetim të energjisë elektrike.

Në bazë të llogarive serbe, këto do të kapnin shifrën e 22 miliardëve euro. Mediat serbe thonë se Haradinaj në planin e tij këmbëngul me çdo kusht në kompensimin e dëmeve ekonomike.

Tensione te forta mes Greqise dhe Turqise. Mes zyrtareve te larte ka pasur shkembim te ashper replikash edhe kercenmime.

Vetem pak pasi ministrit grek i Mbrojtjes Panos Kamenos, paralajmeroi Turqine ka ardhur reagimi i homologut turk.

“Nëse bëjnë qoftë lëvizjen më të vogël, ne do t’i shtypim. Greqia do paqe dhe harmoni, por nuk do të lëshojë asnjë centimetër të tokës së saj”- tha Kamenos.

Nderkohe qe kreu i Shtabit të Përgjithshëm të Greqisë ishte edhe me i ashper, teksa tha: “Nëse turqit zbarkojnë në një ishull të vogël, ne do ta shuajmë nga faqja e dheut. Ajo është vija e kuqe”.

Pergjigje kercenimeve u ka dhene ministri turk i Mbrojtjes, Hukusi Akar, duke folur për zhvillimet në Egje, Mesdhe dhe Qipro.

“Të gjithë duhet ta dinë se do ta paguajnë shtrenjtë. Kjo është këshilla që u japim fqinjëve tanë. Nuk do të lejojmë asnjë sfidë në Egje dhe Mesdhe. Nuk do të lejojmë asnjë vendim kundër Republikës Turke të Qipros Veriore”- tha ai, duke shtuar se Turiqa eshte per miqësi, paqe dhe stabilitet.

“Ne nuk do të tolerojmë për të drejtat tona me çfarëdo kosto. Çmimi do të jetë shumë i shtrenjtë. Nuk duhet të bëjnë llogaritje të gabuara“, tha ai.