VOAL

Maqedoni

AMBASADA AMERIKANE – MAQEDONIA KA NEVOJË PËR REFORMA TË THELLA

Ambasada Amerikane në Shkup duke përshëndetur marrëveshjen e arritur dje nga qeveria dhe opozita thekson se Maqedonia ka nevojë për reforma të thella në të ardhmen për të përmirësuar klimën demokratike.

Përmes një deklarata të lëshuar të mërkurën, Ambasada Amerikane në Shkup thekson se katër drejtuesit e partive ranë dakort për forcimin e institucioneve të vendit dhe ripohuan angazhimin e tyre drejt procesit të integrimeve Euro-Atlantike, përmes forcimit të marrëdhënieve ndëretnike dhe atyre të fqinjësisë së mirë.

Rruga drejtë së ardhmes nuk do të jetë e lehtë dhe do të kërkojë bashkëpunimin e gjithë udhëheqësve të Maqedonisë, thekson Ambasada Amerikane në Shkup. za

ALI AHMETI – DALJA E BDI-së NGA QEVERIA NUK DO TA ZGJIDHTE KRIZËN

Kryetari i Bashkimit Demokratik për Integrim, Ali Ahmeti, në një intervistë dhënë Zërit të Amerikës thotë se pret që marrëveshja e arritur dje midis katër drejtuesve politikë, në bisedimet e ndihmuara nga Komisioneri për Zgjerim i Bashkimit Evropian Johanes Hahn të respektohet nga të gjitha palët. Ai bën të ditur se kërkesa e tij kryesore ka qenë respektimi dhe zbatimi i Marrëveshjes së Ohrit. Zoti Ahmeti thotë se lagimi i partisë së tij nga qeveria, nuk do të zgjidhte krizën. Ai flet edhe për rastin e Kumanovës, si dhe për çështje që shqetësojnë shqiptarët e Maqedonisë.

Zëri i Amerikës: Z. Ahmeti, çka nënkupton marrëveshja për zgjedhje deri në muajin prill të vitit të ardhshëm dhe a do të thotë “periudha e tranzicionit” se do të ketë një qeveri të përkohshme e cila do ta përgatiste kushtet për këto zgjedhje?

Ali Ahmeti: Pa dashur të paragjykoj të gjithë procesin, në këto zhvillime kanë dhënë një kontribut të madh Brukseli dhe Uashingtoni. Ky dialog ka filluar me inkurajim të ambasadorit të BE-së dhe të SHBA-së. Fillimet e këtij dialogu janë në Shkup, për të vazhduar në Strasburg me ndërmjetësimin e tre deputetëve të Parlamentit Evropian dhe gjithashtu me angazhimin shumë të fortë edhe të Komisonerit për Zgjerim Johanes Han. Tani, për t’u rrumbullakësuar të gjitha këto takime, është 2 qershori në prani të zotit Han. Të gjitha palët kemi pranuar një axhendë për dalje nga kriza dhe për t’i futur të gjitha dallimet në kuadër të normalitetit në binarë drejt zgjidhjeve të problemeve me të cilat ballafaqohet vendi. Me këtë marrëveshje detajohet që në prill të vitit 2016 do të kemi zgjedhje të parakohshme dhe në kuadër të kësaj marrëveshjeje, sigurisht që në Bruksel do të flitet për hollësitë dhe zbatimin e saj. Këtu kemi kodin zgjedhor, pastrimin e listave zgjedhore, funksionimin e organeve të jurisprudencës, marrëdhëniet me fqinjët, Marrëveshja e Ohrit, proceset euroatlantike. Partitë politike kanë marrë obligime nga takimi dhe për mendimin tim, kjo marrëveshje është obligative për të gjitha palët me qëllim që vendi ta kapërcejë krizën.

Zëri i Amerikës: A do të thotë kjo se do të ketë një qeveri teknike apo të përkohshme deri para mbajtjes së zgjedhjeve të parakohshme?

Ali Ahmeti: Të gjitha çështjet janë të hapura; me rëndësi është që ka vullnet të mirë tek të gjitha palët për kapërcimin e situatës. Besoj se asnjëra palë nuk do të luajë rolin e të mallkuarit, sepse nuk është mirë për vendin, as për proceset dhe axhendën e rëndësishme që kemi ne dhe të gjitha partitë politike. Shpresoj që palët të mos nxjerrin imtësira, por të merremi me gjërat për të cilat jemi marrë vesh në prani të Komisionerit Hahn dhe të ambasdorëve të SHBA-së dhe BE-së. Mendoj që kjo aspak nuk duhet të nënvlerësohet nga partitë politike, sepse nuk do të krijojë një imazh të mirë për vendin por as për vetë partitë politke, kështu që duhet t’i qëndrojnë fjalës së dhënë dhe ajo që kemi nënshkruar dje, të respektohet nga të gjitha palët.

Zëri i Amerikës: A do të thotë se krizës disamujore po i afrohet fundi?

Ali Ahmeti: Mendoj se të gjithë kemi punuar dhe investuar për ta mbyllur këtë kapitull. Vendi po ballafaqohet me situata jo të mira, pas aferës së përgjimeve, ka protesta, procese gjyqësore ende të pahapura dhe të pambyllura; me shumë të panjohura dhe mendoj që të gjithë duhet të marrin përsipër përgjegjësitë që sa më shpejtë kjo situatë të kapërcehet sepse është një ngërç i madh në të gjitha institucionet e vendit duke filluar që nga qeveria deri te drejtoritë; nuk funksionon si duhet shteti, nuk ka vullnet nga administrata. Të gjithë janë në pritje se ç’do të ndodhë nesër, se si mund të tejkalohet kjo gjendje dhe vendi të hyjë në binarë dhe në rrugën e duhur.

Zëri i Amerikës: Z. Ahmeti, si iu përgjigjeni kritikëve të cilët kërkojnë largimin e BDI-së nga qeveria?

Ali Ahmeti: Bashkimi Demokratik për Integrim ka përgjegjësi përpara shqiptarëve, përpara elektoratit të vet; ka përgjegjësi për zgjidhjen e problemeve dhe jo për krijimin e tyre dhe ne e kemi vlerësuar si të dobishme pjesëmarrjen tonë në institucione, edhe pse sikur të braktisnim institucionet kohë më parë, sigurisht që mund të ndodhte efekti euforik, ja psh: “bravo, BDI braktisi institucionet e tash do të krijohet ndoshta një tjetër situatë…”. Unë nuk dua të merrem as me paragjykime dhe as nuk dua t’i mbush mendjen atyre të cilët nuk e dinë as strategjinë, as projektet e platformën e BDI-së, por vendimet që ne kemi marrë, i kemi bërë në mënyrë kolegjiale. Është diskutuar në Këshillin e Përgjithshëm, në Kryesinë e partisë dhe të gjithë veprimtarinë që e kemi bërë e kemi bërë duke analizuar të gjitha rrethanat dhe mbi bazë të tyre kemi vepruar. Nuk kemi vendosur në radhë të parë, interesin e Bashkimit Demokratik për Integrim, por interesat e të gjithë qytetarëve të Maqedonisë dhe nuk kemi dashur të bëhemi pjesë e shtimit të problemeve, por kemi dashur të jemi pjesë konstruktive e zgjidhjes së problemeve me të cilat po ballafaqohet vendi.

Zëri i Amerikës: Cilat kanë qenë kërkesat tuaja, nëse mund t’i bëni publike, në bisedimet e lehtësuara nga komisioneri Hahn?

Ali Ahmeti: Sigurisht që në të ardhmen do të shpaloset e gjithë korniza për të cilën kemi biseduar, por qasjen më serioze ne e kemi pasur tek Marrëveshja e Ohrit, që palët duhet të marrin përgjegësi edhe më tej për këtë marrëveshje me peshë kombëtare e ndërkombëtare. Gjithashtu marrëdhëniet me fqinjët; kemi pasur parasysh edhe proceset euro-atlantike që janë me rëndësi të jashtëzakonshme jo vetëm për Maqedoninë por dhe për të gjithë rajonin, si dhe probleme të tjera me të cilat ballafaqohet vendi, si Kodi zgjedhor, pastrimi i listave zgjedhore, media, gjyqësori, procesest gjyqësore kanë qenë me interes, por të gjitha një nga një do të marrin drejtim për zgjidhje deri në prill të vitit 2016, me çka vendi duhet të jetë i gatshëm për zgjedhje.

Zëri i Amerikës: Çka fitojnë konrektisht shqiptarët, përveç kthimit të qëndrueshmërisë eventualisht, nga marrëveshja. A janë ngritur çështje të tjera që kanë të bëjnë me shqiptarët në Maqedoni?

Ali Ahmeti: Këtu fitojnë të gjithë. Edhe shqiptarët edhe maqedonasit. Paqja, siguria dhe stabiliteti dhe proceset euro-atlantike janë vlerë dhe dobi për të gjithë qytetarët e Repubikës; gjithashtu Kodi zgjedhor, hapja e negociatave me Bashkimin Evropian për anëtarësim të vendit, sigurisht që është në dobi të të gjithëve.

Zëri i Amerikës: A besoni se kushtet që janë paraqitur ose që do të dalin gjatë procesit të bisedimeve do të plotësohen nga palët e përfshira?

Ali Ahmeti: Obligime për të respektuar fjalën e dhënë kemi që të gjithë. Obligim për paqe, stabilitet në vend kemi që të gjithë dhe jemi të detyruar t’i japim përparësi, në radhë të parë stabilitetit dhe që të mos shikojmë interesat e ngushta grupore apo partiake. Dhe unë u bëj thirrje të gjithë nënshkruesve të marrëveshjes në prani të miqve tanë ndërkombëtarë, që të jemi korrekt dhe t’i qëndrojmë fjalës së dhënë. Të mos i ndërlikojmë gjërat që edhe ashtu janë të ndërlikuara, por t’iu japim drejtim të gjitha problemeve për zgjidhje përfundimtare që vendi të hyjë në kuadër të normalitetit, sepse përndryshe ne do të humbasim imazhin dhe do të na e kthejë shpinën edhe Evropa edhe Shtetet e Bashkuara të Amerikës dhe do të ballafaqohemi me vështirësi të jashtëzakonshme, sepse çdo pengesë dhe tendencë për ta anashkaluar këtë marrëveshje të arritur më 2 qershor, mund të reflektojë negativisht dhe të ketë pasoja në Republikën e Maqedonisë. Unë kërkoj që kjo marrëveshje të respektohet dhe të zbatohet me përkushtim.

Zëri i Amerikës: Po çështja e emrit të Maqedonisë, a është pjesë e këtij procesi?

Ali Ahmeti: Përderisa në këtë marrëveshje përfshihet si pikë e veçantë procesi euro-atlantik, sigurisht që ka të bëjë edhe me zgjidhjen e çështjes së emrit, por pa u futur si problem i veçantë, sepse kuptohet që për arritjen e anëtarësimit të vendit tonë në Nato, ne duhet të kemi një zgjidhje të kësaj çështjeje.

Zëri i Amerikës: Si i përgjigjeni kritikave në lidhje me Marrëveshjen e Ohrit, për mungesën e zbatimit të saj në praktikë, për mangësitë në lidhje me gjuhën shqipe dhe simbolet?

Ali Ahmeti: Marrëveshja e Ohrit ka qenë në qendër të debatit dhe të vëmendjes të të gjithë nënshkruesve, përfshirë Naton, Brukselin dhe Uashingtonin. Ne kemi punuar me përkushtim që kjo Marrëveshje të zbatohet dita ditës dhe të avansohet. Kemi dallime për sa i përket ligjit për përdorimin e gjuhës shqipe, edhepse në këtë drejtim janë bërë disa hapa të vegjël. Ka interesim, si nga faktori i brendshëm, në veçanti ai shqiptar, por edhe në rajon, ndërsa kujdes të veçantë kanë treguar Brukseli dhe Uashingtoni. Këtyre ditëve në Shkup kemi njeriun më të thirrur, si njohësin më të mirë të Marrëveshjes së Ohrit, sepse ka qenë i përfshirë drejtpërsëdrejti në arritjen e kësaj marrëveshjeje, Z. Piter Fejth, i cili është këtu me nismën e institucioneve evropiane për një ekspertizë të hollësishme të marrëveshjes së Ohrit; për një raport të detajuar se sa është bërë, ç’ka mbetur për t’u realizuar nga kjo marrëveshje. Ai është njeriu i cili do ta bëjë këtë ekspertizë për t’i raportuar BE-së dhe institucioneve të tjera. Kjo është një punë e mirë që do të bëhet nga një institucion i pandikuar dhe një analizë për përgjegjësit kryesorë si BE-në, SHBA-të dhe Naton, sepse pikërisht ato janë garantues të kësaj marrëveshjeje.

Zëri i Amerikës: Z. Ahmeti, në lidhje me Kumanovën, vazhdon të ketë mjaft paqartësi si për motivet e gjithë ngjarjes, poashtu edhe për mënyrën e reagimit dhe ndërhyrjes së forcave maqedonase. A ndjeni përgjegjësi, duke qenë pjesë e kësaj qeverie, për atë që ndodhi atje?

Ali Ahmeti: Nuk di çfarë përgjegjësie kërkohet nga Bashkimi Demokratik për Integrim… përgjegjësi morale, apo përgjegjësi institucionale. Unë kam folur publikisht, shumë hapur, që kam qenë i angazhuar jashtëzakonisht shumë që të mos ndodhin gjëra të tilla, jo vetëm këtë vit por që nga viti 2002, në vazhdimësi kam kontaktuar me njerëz të pakënaqur, me grupe të caktuara, dhe kam bërë të pamundurën që këto gjëra të mos ndodhin. Por, kam kërkuar që për këto situata të komunikojmë dhe të vendosen kontakte të drejtpërdrejta në mes dy qeverive, institucioneve të Maqedonisë dhe të Kosovës, sepse është në interes të të dy shteteve, por edhe më gjerë, që kjo ngjarje të ndriçohet deri në fund dhe të mos u lihet hapsirë teorive të konspiracioneve të ndryshme. Ne jemi vende fqinje dhe të gjitha gjërat duhet të pastrohen deri në fund dhe këto probleme të mos ndikojnë për ftohjen dhe acarimin e raporteve. Uroj që sa më shpejtë dy qeveritë tona të takohen dhe besoj që veçmë këtë muaj kjo duhet të ndodhë. Jo vetëm me Kosovën, por të vazhdohet edhe me Shqipërinë dhe me vende të tjera të rajonit, sepse bashkëpunimi me fqinjët është mjaft me rëndësi për të gjitha vendet e Ballkanit perëndimor, qoftë për proceset politike ose për zhvillimin ekonomik; gjërat janë të ndërvarura dhe duhet të shfrytëzohen të gjitha mundësitë që të gjitha energjitë pozitive t’i vëmë në funksion dhe në dobi të rajonit dhe të qytetarëve.

Zëri i Amerikës: Sidoqoftë, atje pati, nëse pajtoheni, një përdorim të tepruar të forcës dhe ata banorë atje kanë pësuar vuajtje, padyshim edhe shpirtërore…

Ali Ahmeti: Unë nuk jam pjesë e operativës. Ne jemi parti politike dhe unë nuk kam bërë programin operativ për izolim të grupit. Dëme materiale ka. Mbi të gjitha duhet patur parasysh se nuk ka banorë civilë të vrarë dhe kjo duhet të theksohet. Dëmet materiale duhet të kompensohen. Tashmë qeveria ka formuar komisione dhe ato kanë qenë në vend për verifikimin e tërësishëm të gjendjes dhe kostos së dëmeve materiale. Të gjithë qytetarët e dëmtuar kanë marrë ndihmë nga shteti sa për të kaluar ditët në fillim dhe të shohim kur do të fillojë puna për riparimin e dëmeve të shkaktuara në atë lagje.

EKSPERTËT – MARRËVESHJA NË SHKUP HAP POZITIV, POR I PAMJAFTUESHËM

Marrëveshja preliminare e arritur në takimin e së martës mes liderëve të partive politike me ndërmjetësimin e faktorit ndërkombëtar, shihet si hap pozitiv drejt zgjidhjes së krizës së rëndë politike në të cilën ndodhet Maqedonia.

Detajet e marrëveshjes nuk janë kumtuar, përveç faktit se zgjedhje të parakohshme parlamentare do të ketë deri në prill të vitit 2016.

Partitë, sipas Komisioneri të BE-së për Zgjerim dhe Fqinjësi të Mirë, Johannes Hahn, mbetet që marrëveshjen ta finalizojnë në takimin e radhës në Bruksel, më 10 qershor.

Çështja kryesore ka të bëjë me atë se kush do të drejtojë qeverinë gjatë periudhës kalimtare, a do të ketë qeveri të ekspertëve apo koalicion të gjerë nga partitë politike?

Nga Lidhja Social-Demokate, e udhëhequr nga opozita, kanë bërë të ditur se marrëveshja e arritur një ditë më parë, nuk do të ketë vlerë nëse në krye të qeverisë do të jetë, kryeministri aktual Nikolla Gruevski.

Sipas opozitës, “nga qeveria e re duhet të përjashtohen të gjithë ministrat, apo zyrtarët e përfshirë në krime të rënda, e të cilat janë dëshmuar me publikimin e bisedave të përgjuara telefonike“.

Edhe njohësit e çështjeve politike, thonë se marrëveshja nuk do të kishte kuptim, nëse qeveria vazhdon të drejtohet nga Nikolla Gruevski.

Analisti, Mersel Bilalli thotë për Radion Evropa e Lirë se ekzekutivi i ri do të drejtohet nga ekspertët, të cilët, përkundër vështirësive që do të kenë, do të arrijnë të nxjerrin vendin nga kriza.

“Kjo para-marrëveshje është hap serioz drejt zgjidhjes dhe sanimit të krizës politike në Maqedoni. Vlerësoj se taktika e bisedimeve dhe fleksibiliteti politik kërkon që të afrohen çështjet që janë më pak kontestuese, siç është për shembull data e bisedimeve; megjithatë thellë jam i bindur se do të ketë ndryshime serioze, jo vetëm në përbërjen e qeverisë, të cilat jam i sigurt se nuk do ta drejtojë Gruevski”.

“Por [do të ketë ndryshime] edhe në të gjitha strukturat tjera, veçënërisht në gjykata, prokurori, në sistemin e mediave, administratë publike e kështu me radhë. Konsideroj se është një proces i cili do të jetë shumë i mundimshëm, por që domosdo do të ndodhë“, thotë Bilalli.

Ndërkohë, edhe Stojan Andov, ish Kryetar i Kuvendit të Maqedonisë, thotë për Radion Evropa e Lirë, se kryeministri Nikolla Gruevski dhe të gjithë anëtarët e tjerë të qeverisë nga partia e tij duhet të braktisin qeverinë.

Sipas tij, zgjidhje të krizës nuk mund të ketë nëse ai do të jetë pjesë e qeverisë së re, nëse eventualisht vjen deri te një zgjidhje e tillë.

“Mendoj se Gruevksi duhet të largohet nga të gjitha funksionet shtetërore dhe politike. Vetëm kështu mund të bisedohet për mënyrat e zgjidhjes së krizës politike. Por, jo vetëm kaq, mendoj se duhet të largohen edhe të gjithë bashkëpunëtorët e tij, me të cilët ka ndërtuar këtë politikë. Pa largimin e tyre nuk do të ketë zgjidhje të krizës, këtë duhet të gjithë ta kemi të qartë“, thotë Andov.

Sipas tij, marrëveshja e një dite më parë tregon se Gruevski ka hequr dorë nga qëndrimi i mëparshëm se nuk do të ketë zgjedhje të parakohshme, ndërsa mbetet të shihet nëse do të heqë dorë edhe nga qëndrimi kundër qeverisë kalimtare.

Ish kreu i Kuvendit, thotë se në pozitë jo të mirë ndodhet edhe kreu i opozitës, Zoran Zaev, pasi ka pranuar zgjedhje të parakohshme pa u definuar pjesa tjetër e çështjeve të hapura, se kush do të udhëheqë vendin deri në zgjedhje, apo se çfarë do të ndodhë gjatë periudhës kalimtare?

Nga ana tjetër, mbi 80 organizata joqeveritare përmes një letre drejtuar komisionerit për zgjerim të BE-së, Johannes Hahn, kanë kërkuar formimin e një qeverie kalimtare, si mënyrë e vetme për dalje nga kriza.

Sektori civil kërkon kthimin e lirisë dhe demokracisë në Maqedoni, e cila, siç thuhet, mund të arrihet përmes një qeverie të re, por pa kryeministrin aktual, Nikolla Gruevski dhe anëtarët e tjerë të përfshirë në atë që njihet si aferë e përgjimeve.

“Përbërja e saj duhet ‘ti përjashtojë të gjithë anëtarët e përbërjes së qeverisë aktuale, pasi të gjithë janë të komprometuar seriozisht përmes fjalëve dhe veprave të tyre në bisedat e regjistruara dhe të publikuara nga opozita”.

“Pjesëmarrja e cilitdo anëtar nga përbërja aktuale në qeverinë kalimtare do ta cenonte seriozisht besueshmërinë e procesit dhe të qytetarëve ndaj zgjidhjes së drejtë të krizës politike”, thuhej në letrën e sektorit civil. rel

ERMIRA MEHMETI: ZGJEDHJET NË PRILL 2016 NËNKUPTON SE QEVERIA E MAQEDONISË NISUR NGA SOT ËSHTË NË DORËHEQJE

VOAL – Maqedonia do të zhvillojë zgjedhje të përgjithshme në prill të vitit 2016. Njoftimi u bë sot i ditur nga Komisioneri për Politikat e Fqinjësisë dhe Zgjerim të Bashkimit Evropian Johanes Hahn i cili u takua në Shkup me drejtuesit e katër partive kryesore. Duke njoftuar marrëveshjen mes partive komisioneri evropian tha se vendi do të ketë një periudhë tranzicioni prej 10 muajsh. Javën e ardhshme pritet të ketë një takim të ngjashëm në Bruksel.

Nga ana e saj deputetja Ermira Mehmeti, e cila i ka kërkuar Ali Ahmetit që BDI të largohet nga qeveria e Gruevskit, shkruan në faqen e saj zyrtare të Facebook-ut. “Marreveshja per zgjedhje ne prill 2016 nenkupton se Qeveria, duke nisur nga sot, eshte ne doreheqje.”

SHKUP – GJYKATA PENALE SHQYRTON AKUZAT E QEVERISË NDAJ ZAEVIT

Gjykata Penale në Shkup për disa orë ka diskutuar të hënën në lidhje me kërkesën e drejtuesit opozitar Zoran Zaev për hedhjen poshtë të akuzave kundër tij. Prokuroria maqedonase e akuzon zotin Zaev për përdorim të dhunës kundër përfaqësuesve të organeve më të larta të shtetit ndërsa bashkëpunëtorët e tij – për spiunazh. Pala mbrojtëse e zotit Zaev thotë se veprimet e tij nuk përbëjnë vepër penale kundër shtetit. Gjykata pritet të marrë një vendim brenda ditëve që vijnë.

Zoran Zaev dhe opozita për disa muaj rresht kanë publikuar biseda të përgjuara telefonike ku pretendohet se zyrtarë të lartë qeveritarë flasin për manipulime dhe shpërdorime.

Rasti i njohur si “Puç” nga organet hetuese dhe në opinionin publik të Maqedonisë, ku akuzohet drejtuesi opozitar Zoran Zaev dhe katër persona të tjerë, ka vënë në sprovë gjyqësorin e vendit. Në këtë vend ku sa vjen e shtohen vërejtjet e institucioneve ndërkombëtare mbi kontrollin nga pushteti të gjyqësorit, por dhe për shkallën e lartë të korrupsionit, akuzat për dhunë dhe spiunazh kundër personaliteteve politike, për një numër analistësh por dhe ekspertësh ligjorë, nuk paraqesin ndonjë të papritur, në një kohë kur Maqëdonia po prballt me skandalin e madh të përgjimeve.

Zoran Zaev akuzohet për dhunë kundër përfaqësuesve të organeve më të larta shtetërore; ish-drejtori i Agjensisë së Sigurisë dhe Kundërzbilimit, Zoran Verushevski akuzohet për spiunazh, për përgjim të paligjshëm dhe dhunë kundër përfaqësuesve të organeve më të larta shtetërore dhe së bashku me gruan e tij ndodhen në paraburgim për akuzat e njejta. Poashtu një bashkëpunëtor i zotit Zaev ndodhet në burg në pritje të vendimit gjyqsor, ndërsa një pjesëtar i policisë sekrete ka pranuar akuzat kundër tij dhe është dënuar me procedurë të shpejtë me tre vjet burg. Ky i fundit është kthyer në dëshmitar të këtij procesi.

Ndërkohë, drejtuesi opozitar Zaev vëren se në aktakuzë nuk qëndrojnë fjalët “shërbime të huaja sekrete”, ndërsa një person është dënuar për spiunazh, që është e palogjikshme sipas tij, sepse spiunazhi, sipas ligjit, ndërlidhet me një institucion a shërbim të huaj sekret.

Nga ana tjetër, kryeministri maqedonas Nikolla Gruevski vazhdon ta akuzojë rivalin e tij Zoran Zaev si bashkëpunëtor të shërbimeve të huaja sekrete, por pa saktësuar ndonjë shërbim konkret dhe për montazhin, prerjen dhe ngjitjen e shiritave të bisedave telefonike të zyrtarëve të lartë qeveritarë.

Opozita për katër muaj ka publikuar biseda të përgjuara telefonike ku pretendohet se dëgjohen zërat e kryeministrit, disa ministrave dhe zyrtarëve të tjerë të lartë shtetërorë duke folur për manipulime të ndryshme të zgjedhjeve, gjyqsorit, medias e biznesit.

Kriza politike, si pasojë e gjithë kësaj, nuk po mund të gjejë ende një zgidhje. Të marten në Shkup do të vijë Komisioneri për Politikat e Fqinjësisë dhe Zgjerim të Bashkimit Evropian, Johanes Hahn dhe tre deputetët e Parlamentit Evropian në cilësinë e lehtësuesve, siç thuhet këtu, të bisedimeve ndërmjet katër drejtuesve të partive më të mëdha. Megjithatë, analistët nuk presin ndonjë përparim të madh drejt zgjidhjes së krizës.

Opozita maqedonase ngul këmbë për formimin e një qeverie të përkohshme pa Nikolla Gruevskin në krye të saj, ndërsa ky i fundit thotë se qeverinë mund ta formojë vetëm ajo parti e cila fiton votat në zgjedhje.

Partitë shqiptare, Bashkimi Demokratik për Integrim dhe Partia Demokratike duket se mbështesin qëndrimet e VMRO-DPMNE-së dhe Nikolla Gruevskit në lidhje me këtë. za

HAH NESËR NË SHKUP PËR T’IA KËRKUAR GRUEVSKIT DORËHEQJEN

Komisioneri i Bashkimit Europian për Zgjerimin, Johanes Hahn, do të vizitojë nesër Shkupin me qëllim zgjidhjen e krizës politike mes katër partive kryesore politike atje.

Me detyrën e ndërmjetësuesit, Hahn thuhet se do t’i kërkojë Gruevskit dorëheqjen dhe të krijojë më tepër hapësira për partitë shqiptare në qeveri.

Ajo që parashikohet është qëndrimin i palëkundur i kryeministrit Gruevski për të mos dhënë dorëheqje.

Në një intervistë për mediat vendase, Gruevski tha se ka një plan për daljen nga kriza dhe këtë do t’ia parashtrojë të dërguarit të BE-së gjatë takimit mes tyre. Por , ai tha se kreu i opozitës Zoran Zaev nuk do të ketë kurrë mundësi të vendosë për kreun e ri të qeverisë maqedonase.

“LSDM-ja duhet të mësojë se kryeministër dhe ministër zgjidhesh vetëm atëherë kur fiton shumicën në zgjedhje dhe ke mbështetjen e pjesës më të madhe të Maqedonisë. Deri atëherë, ata nuk do të kenë mundësi të zgjedhin asgjë”, tha Gruevski.

Në takimin e të martës, Hahn shoqërohet edhe nga eurodeputetët, Ivo Vajgël, Eduard Kukan dhe Riçard Houit, të gjithë të pranishëm në dialogun e zhvilluar në Strasburg dy javë më parë me Gruevskin dhe Zaevin pa praninë e dy liderëve shqiptarë, Ali Ahmeti dhe Menduh Thaçi.

Ndryshe nga takimet e tjera, ai i nesërmi do të mbahet në rezidencën e ambasadorit të Bashkimit Europian, Aivo Orav, ku do të jetë gjithashtu i pranishëm edhe ambasadori amerikan në Shkup, Xhes Bejli.

NUK I TREMBEN TË FTOHTIT AS SHIUT – TË VENDOSUR DERI NË RRËZIMIN E GRUEVSKIT

Kampuesit para qeverisë dhe para Kuvendit nuk i tremb as i ftohti as shiu, thonë se do mbeten deri në fund. Njëra palë derisa kryeministri nuk jep dorëheqje, të tjerët do të qëndrojnë para parlamentit, derisa të ketë nevojë të jenë atje. Edhe pse ata kanë pritje të ndryshme janë unik në një gjë, shpresojnë në zgjidhje të shpejtë të krizës.

Një pjesë e kampuesve para Kuvendit nuk e di se pse ata janë aty, por siç thonë i kanë pëlqyer kolltuqet prej kashte.“Që kur i keni? Që nga dje. Prej dje? Nuk e di unë nuk isha këtu.Por ju erdhën mirë? Po. Mirë është. Tani patjetër të rrimë ulur. Pse patjetër? E pra tani çfarë të them, nuk e di. Cilat janë kërkesat tuaja pse jeni këtu? Nuk e di, vetëm të të gënjej, nuk e di. Nuk di asgjë”.“Ne i mbrojmë qëndrimet e Kryeministrit tonë të zgjedhur në zgjedhje legjitime dhe ne e dimë se në anën tjetër ata që shtrihen para qeverisë duan vullnetin e popullit ta ndryshojnë me forcë me shërbimit e huaja dhe populli maqedonas me këtë nuk pajtohet. Gjendja politike nuk varet prej nesh por nga pala tjetër që e shkaktoi këtë. A nuk varet nga kryeministri? Nga kryeministri nuk varet asgjë, sepse kryeministri u zgjodh në zgjedhje legjitime dhe është përfaqësues i popullit dhe ai qëndron prapa kryeministrit dhe ne nuk shohim asnjë faj tek ai”.“Flasim për bombat dhe nuk kërkojmë kush ka përgjuar, mua shumë më irriton kjo. Një nga momentet që jam këtu është ajo se kush mund t’i ketë bisedat e mia në telefonin e tij, ndërsa flasim dhe brengosemi për atë që është folur. Le së pari, të shohim kush na ka përgjuar. Nuk Ju vjen inati që tenderë janë kurdisur? Për çfarë tenderë flitni? Të lutem. Unë nuk dëgjova një gjë të këtillë në televizion. Ja dëgjoj dhe shoh televizion, një punë e këtillë nuk kam dëgjuar, se ky pushtet ka bërë krim më serioz”.

Kampuesit para Qeverisë thonë se kampi zgjerohet çdo ditë e më shumë.

“A keni shëtitur në atë dhe në këtë kamp që të shihni se si populli është bashkuar, jo vetëm maqedonasit, por edhe shqiptarët? Këtu ka flamuj nga të gjitha kombësitë, kjo është ajo bukuri që e ka te ne. Nuk ka dallim. Atje janë vetëm njëlloj”.

“Ndoshta nuk do të jetë shpejt, por jam i sigurt se deri në gjysmën e qershorit do të ketë epilog. Edhe po të binte borë edhe po të binte shi, ne mbetemi këtu derisa diktatori i fundit në këto hapësira nuk jep dorëheqje. Ai na shkurtoi lirinë, sigurinë, rendin juridik, demokracinë dhe mbetemi këtu derisa nuk e kthejmë atë që ai na ka marrë”.

“Mendojmë se së shpejti do të zgjidhet situata, Gruevski do të japë dorëheqje. Shpresoj se do të ketë dhe do të duhej të kishte zgjidhje. Me kaq bomba dhe skandale të cilat e ndjekin Gruevskin dhe qeverinë e tij, në kohën më të afërt duhet të ketë dorëheqje”.

Kampet u vendosën menjëherë pas protestave masive të opozitës para qeverisë dhe tubimit të VMRO-së para Kuvendit. /AlstaM/

TAKTIZIMET E ZAEVIT NDAJ RASTIT ‘MONSTRA’

Që nga nisja në muajin shkurt e publikimit të bisedave të përgjuara telefonike të zyrtarëve qeveritar, nga ajo që njihet si aferë e përgjimeve, kreu i opozitës, Zoran Zaev kishte paralajmëruar zbardhjen edhe të rastit “Monstra“, të vrasjes se pesëfishtë në Smillkovcë.

Por, deri më tani, përveç paralajmërimeve, ai nuk ka zbardhur asnjë dëshmi, përkundër pritjeve të shumta në opinion, te i cili ka dyshime se i gjithë rasti është i montuar nga struktura të caktuara për qëllime politike dhe destabilizuese.

Zoran Zaev, disa herë ka thënë se rasti është shumë i ndjeshëm, me paqartësi e dilema të shumta, nëse vërtetë të dënuarit për këtë rast, janë autorët e vërtetë të krimit.

Por, kreu i Lidhjes social-demokrate të opozitës këtë nuk e ka thënë ende publikisht në konferencat e shumta për media që mbanë për “shkeljet e paligjshme të bëra nga zyrtarët“.

Vonesat në publikimin e bisedave të zyrtarëve për këtë rast kanë nxitur debate nëse Zaev taktizon për qëllime tjera, apo për mos nxitje të trazirave të mundshme.

“Ajo që tani përmendet si rast shumë sensitiv për marrëdhëniet ndëretnike, rasti Monstra është me siguri rast nga i cili do të preken dy partitë që tani përbëjnë koalicionin qeveritar, VMRO-në dhe BDI-në dhe duket qartë se ky rast përdoret nga ana e liderit të LSDM-së për të arritur deri te ndonjë pikë e bisedimeve tek e cila ne si opinion nuk kemi qasje”.

“Paralajmërimi se do të publikojë gjithë atë që posedon rreth këtij rasti të mistershëm dhe zbardhjen e tij deri në fund, sikur u hesht pas takimit të fundit të liderëve, andaj ka hapësirë që të dyshojmë se ka ndodhur diçka brenda apo se ky rast është përdorur për të bërë një presion, apo për të shtyrë para procesin negociues në kuadër të takimit të liderëve“, thotë analisti Xhelal Neziri.

Nga ana tjetër, Sonja Stojadinoviq, njohëse e çështjeve politike, beson se taktizimet e kreut të opozitës më tepër kanë të bëjnë me përgatitjen e opinionit shqiptar me atë që mund të publikohet, për të mos u përshkallëzuar situata, ashtu siç ndodhi me rastin e Martin Neshkovskit, kur u zbardhën bisedat lidhur me vrasjen e tij, e që u përshkallëzuan në dhunë mes policisë dhe protestuesve.

“Paralajmërimet e para të zotit Zaev lidhur me rastin ‘Monstra’ ishin se dëshmitë e publikuara për këtë rast do të jenë ‘bombat’ më të fuqishme që do të zgjidhin problemin me diktaturën në Maqedoni, por ku u panë reagimet dhe protestat për rastin e vrasjes së Neshkovskit, atëherë kreu i opozitës bëri një hap pas duke parë se sa mund të jetë i ndjeshëm rasti Monstra”.

“Besoj se kalkulimet e tij kanë të bëjnë me përgatitjen e popullatës shqiptare me atë se çka do të publikohet në opinion, të mos ketë përshkallëzim të gjendjes dhe në anën tjetër të pastrojë dilemat që kanë të bëjnë me këtë rast, në njërën anë t’i njoftojë familjarët e viktimave se kush në të vërtetë janë vrasësit e bijve të tyre dhe në anën tjetër të nxjerr në dritë të vërtetën për atë që po mbahen në burg“, thotë Stojadinoviq.

Ajo shton se kreu i opozitës e ka për obligim që të zbardh gjithçka që posedon për kërë rast që të mos humb besimin dhe pritjet e shumë njerëzve lidhur me këtë rast.

Por, ndryshe vlerëson analisti, Xhelal Neziri. Ai thotë se publikimi i të vërtetës për rastin “Monstra”, jo që nuk do të lëkund raportet ndëretnike apo të shkaktojë trazira, por do të forcojë edhe më shumë besimin ndaj njëri tjetrit, pasi qytetarët, qofshin shqiptar apo maqedonas, siç thotë ai do ta kenë të qartë një herë e përgjithmonë se kush janë nxitësit e vërtetë të tensioneve ndëretnike.

“Zbardhja e së vërtetës sikur edhe të mos jetë në favor të ndonjë bashkësie etnike në Maqedoni nuk do të përkeqësojë raportet ndëretnike, por përkundrazi do të përfocojë besimin mes tyre”.

“Edhe bisedat që janë zbardhur deri më tani nga lideri i opozitës përmbanin fjalor fyes apo përmbajtje të urrejtjes për shqiptarët, por reagim nga ana e shqiptarëve nuk pati, pasi të gjithë ne dëshirojmë të dimë se çfarë në të vërtetë ndodhi ditën kur u vranë pesë personat në Smillkovcë, në atë që njihet si rasti ‘Monstra’ dhe a janë në të vërtetë fajtor njerëzit që po mbahen në burg“, thotë Neziri.

Vrasja e pesë të rinjve maqedonas në afërsi të liqenit të Smillkovcës kishte ndodhur më 11 prill të vitit 2012.

Ky krim, i cilësuar si rasti “Monstra”, pati shkaktuar tensione dhe trazira ndëretnike në Maqedoni, meqë vepra ishte klasifikuar si terroriste nga qeveria. Për këtë vepër, gjashtë shqiptarë janë dënuar me burg të përjetshëm. rel

ZAEV: SHQIPTARËT E RASTIT “MONSTRA” JANË TË PAFAJSHËM

Kreu i Lidhjes Socialdemokrate opozitare të Maqedonisë Zoran Zaev, lidhur me vrasjen te Liqeni i Smilkovës, ka dalë me një pohim të drejtpërdrejtë, që për shumëkënd mund të jetë shokues, por edhe mund të shkaktojë trazira etnike në vend.

Shtatë shqiptarët e Maqedonisë që janë dënuar për rastin, në të ashtuquajturin proces “monstra”, janë të pafajshëm, ka thënë Zaevi në një intervistë për gazetën gjermane “Die Zeit”, të publikuar sot.

“Ata padrejtësisht po qëndrojnë në burg”, ka thënë Zaevi.

Lideri i opozitës maqedonase ka theksuar se zbulimi i së vërtetës për vrasjen e pesësfishtë të para tri viteve, mund të nxisë përplasje në Maqedoni, që “mund të ketë edhe viktima”.

Për këtë arsye për momentin po zhvillojmë biseda intensive me komunitetin shqiptar, që të gjejmë një mënyrë për ta penguar atë reagim. Duhet që të jemi të vëmendshëm me të vërtetën. Duhet që ta ruajmë unitetin e popullit”, tha Zaevi. Në pyetjen nëse vërtet frikësohet se gjendja mund të dalë nga kontrolli, Zaevi përgjigjet: ”Po, deri në një shkallë të caktuar jam i shqetësuar. Duhet që t`i përrgatisim njerëzit për të vërtetën, duhet që të jemi të përgjegjshëm”.

Ai, megjithatë, nuk pret që të përsëritet konflikti i vitit 2001 dhe vlerëson se populli është i bashkuar.

“Qytetarët tanë janë rojtarët më të mirë të paqes. Ajo është porosia më e mirë. Kam frikë se individë të caktuar megjithatë mund të nxisin dhunë”, thotë Zaevi.

MAQEDONIA – NJË PENG I RI NË ARENËN GJEOPOLITIKE TË RUSISË

Maqedonia s’ka qenë kurrë pjesë e rëndësishme e politikës së jashtme ruse. Por zhvillimet e fundit tërheqin vëmendjen e Moskës. Disa analistë besojnë se për kryeministrin Gruevski është e mirëseardhur mbështetja ruse.

“Anëtarësimi në BE dhe në NATO mbetet prioritet ynë më i lartë”, deklaroi kryeministri Nikola Gruevski gjatë manifestimit të partisë së tij VMRO-DPMNE më 18 maj në Shkup, ndërkohë që dhjetra përkrahës të tij në radhët e para të demonstruesve mbanin t-shirts me portretin e Putinit dhe valëvisnin flamuj rusë.

Shumë mendojnë se kontradikta mes fjalëve të Gruevskit dhe folklorit pro-rus në radhët e përkrahësve të tij reflekton skizmën aktuale të shoqërisë së Maqedonisë, e cila është përfshirë muajt e fundit nga një krizë e thellë politike, e shoqëruar me incidente të rënda sigurie, që u përshkallëzuan së fundi me ngjarjen në Kumanovë, ku gjetën vdekjen 18 vetë.

Por ajo që në dukje është një konflikt tipik i brendshëm Ballkanik, shumë shpejt mori trajtat e një shkalle të re të konfrontimit mes Rusisë dhe Perëndimit. Së fundi Moska zyrtare deklaroi se “ngjarjet në Maqedoni janë orkestruar duke ushtruar presion nga jashtë”, me këto fjalë u shpreh ministri i Jashtëm i Rusisë Sergei Lavrov më 20 maj duke marrë në mbrojtje qeverinë konservatore në Shkup. Kjo ishte deklarata e fundit në një varg pozicionimesh zyrtare nga Rusia gjatë këtij muaji, gjë që i ka befasuar shumë në vendin e varfër ballkanik me dy milionë banorë. Qëkurse ka marrë fund konflikti i armatosur mes forcave maqedionase të rendit dhe guerrilasve shqiptarë në vitin 2001, komentet nga Ministria e Jashtme e Rusisë lidhur me situatën e brendshme politike në Maqedoni kanë qenë të rralla. Ndryshe nga vendet fqinjë Serbia dhe Greqia, që kanë lidhje të ngushta historike me Rusinë, Maqedonia asnjëherë nuk ka tërhequr vëmendjen e Moskës.

“Maqedonia nuk është dhe asnjëherë nuk ka qenë pjesë aktive e politikës së jashtme ruse”, thotë për DW Julija Brsakoska-Bazerkoska, profesore në fushën e marrëdhënieve ndërkombëtare në Universitetin e Shkupit.

Gazsjellësi “Turkish Stream”

Sipas Lavrovit, refuzimi i Gruevskit për t’iu bashkuar sanksioneve kundër Rusisë dhe vullneti i tij për të bashkëpunuar në ndërtimin e linjës gazsjellëse “Turkish Stream”, janë arsyeja e trazirave të nxitura, sipas tij nga “Perëndimi”.

Sergej Lavrov dhe John Kerry

“Nëse shihni pozitën gjeografike të rajonit, Maqedonia ka pozicionin më të përshtatshëm për të ndërtuar zgjerimin e projektit më të ri të infrastrukturës së energjetikës në rajon, të ashtuquajturin ‘Turkish Stream”, tha në një intervistë për televizionin Bloomberg, Vladimir Chizhov, ambasadori rus në BE.

Por disa analistë dyshojnë se ‘Turkish stream’ do të ndërtohet. Nikola Kjurchiski nga akademia presidenciale në Moskë, thotë në intervistë për DW, se ka shumë arsye të besosh, që ky projekt do të përfundojë në Turqi, sepse në rast të kundërt ai do të binte ndesh me rregullat e tregut të brendshëm të BE-së. Për më tepër, siç shpjegon më tej Kjurchiski, Rusia ndërkohë ka mjaft linja për ta sjellë gazin në Europë, të cilin është duke e shitur me çmim gjithnjë e më të ulët, kësisoj ajo nuk ka nevojë për një linjë tjetër.

“Turkish stream është një projekt mjaft i kushtueshëm dhe jo rentabël. Vlera e tij NVP (Net Present Value) është kalkuluar me një kurs negativ në miliona dollarë e në këto rrethana vështirë se mund të realizohet njëproket i tillë”, vëren Kjurchiski.

Nisur nga fakti që kriza politike në Maqedoni nuk ka shenja që të marrë fund së shpejti, reagimi i Rusisë duket më shumë si një përpjekje e Moskës për të forcuar influencën në Ballkan, me ose pa projektin e premtuar për energjinë.

Duke folur në mbledhjen e një komisioni të senatit më 24 shkurt, sekretari i Shtetit për Marërdhëniet me Jashtë, John Kerry, theksoi se SHBA mendon, që një numër vendesh europiane, përfshirö edhe Maqedoninë, ndodhen në “linjën e zjarrit”, kur është fjala për marrëdhëniet mes Uashingtonit dhe Moskës.

Gruevski nën presion në rritje

Nikola Kjurchiski

Kryeministri i Maqedonisë Gruevski e gjen veten nën presion të madh prej opozitës në vend dhe pas skandalit të krizës në Kumanovë duket se ai e ka humbur mbështetjen nga BE-ja dhe SHBA-ja. Nëntë vjet në pushtet ai rëndom përshkruhet prej medias vendase dhe asaj perëndimore si dhe analistëve politikö si një njeri autoritar. Pikëpamje të tilla nuk gjejnë hapësirë në median pro-qeveritare dhe analistët e saj në Maqedoni, të cilët shprehin entuziazëm për stilin e qeverisjes sipas modelit Putin e veçanörisht qëndrimit të këtij të fundit ndaj medias dhe OJQ-ve. Ndërkohë që opinioni publik në Maqedoni e kërkon mbështetjen e gjerë dhe integrimin e qytetarëve në BE dhe NATO, disa analistë besojnë se Gruevski e mirëpret mbështetjen nga Rusia dhe është duke u përpjekur ta pozicionojë veten në mesin e lojës së madhe gjeopolitke për ta nxjerrë veten nga kriza.

“Qëkurse ka humbur mbështetjen e BE-së dhe të SHBA-së, Gruevski është duke kërkuar i dëshpëruar mbështetje nga fuqitë botërore, e kjo është arsyeja, përse ai i është drejtuar Rusisë. Ai nuk ka alternativë tjetër”, thotë Kjurchiski.

Burime të pakonfirmuara bëjnë me dije, se së fundi Moska e ka shtuar dukshëm stafin e ambasadës ruse në Shkup. dw

QUN LAJQI: ENVER ROBELLI, PAQ FAQEN E ZEZË

VOAL – Aktori Qun Lajqi ka reaguar ashpër ndaj gazetarit, Enver Robelli, i cili i cilësoi të vrarët në Kumanovë si kriminelë e njerëz që e meritojnë burgun e jo nderimin e popullit.Quni në Facebook ka shkruar:

Robel Rrebeli!
KUMANOVA ASHT E JONA DHE E DJEMVE TANË QË DHANË JETËN ATJE PËR LIRINË E VËLLEZËRVE TË TYRE ooooooo ROBEL E SHKUAR RREBELI!!!!!……!
ATA S’ISHIN BANDA POR HEROJ TË KOMBIT OR PAQ FAQËN E ZEZË TI E TË GJITHË ATA QË E KANË KËT MENDIM!!!

GRUEVSI EMËRON DREJTORIN E SHËRBIMIT SEKRET DHE DREJTORIN E SIGURISË PUBLIKE

Qeveria e Maqedonisë emëroi të martën dy drejtorë të rinj në postet e sigurisë. Pas dorëheqjes së Sasho Mijallkovit dy javë më parë nga posti i drejtorit të shërbimit sekret, qeveria ka emëruar në këtë post Lupço Andonovskin, i cili deri tani ishte shef i kundërzbulimit për rajonin e Shkupit.

Qeveria ka emëruar gjithashtu Gorançe Savevskin si drejtor të sigurinë publike, pas largimit të Mitko Çavkovit, i cili mori detyrën e ministrit të Punëve të Brendëshme.

Ndryshimet bëhen në klimën e krizës që ka përfshirë Maqedoninë për shkak të skandalit të përgjimeve dhe ngjarjeve të përgjakshme në Kumanovë.

Ish-shefi i sigurimit Sasho Mijallkov, i cili ka lidhje të ngushta familjare me kryeministrin Nikolla Gruevski, shihet si figurë e debatueshme, me një histori jo të qartë në veprimtaritë e tij të biznesit. Emri i tij është një nga më të përfolurit në skandalin e përgjimeve.

Ndërkohë, katër drejtuesit e partive më të mëdha në vend, nuk arritën ndonjë marrëveshje as të martën, për t’i dhënë fund krizës.

Nikolla Gruevski, kryeministër dhe kryetar i VMRO-DPMNE-së dhe Zoran Zaev, kryetar i Lidhjes Social-Demokrate të opozitës informuan kryetarët e dy pative shqiptare, Ali Ahmetin e Bashkimit Demokratik për Integrim dhe Menduh Thaçin e Partisë Demokratike Shqiptare, si dhe ambasadorët e SHBA-së dhe BE-së Jess Baily dhe Aivo Orav lidhur me takimin që mbajtën në Strasburg para pak ditësh me tre deputetë të Parlamentit Evropian, me Komisionerin e BE-së Johanes Hahn.

Por, asnjë hollësi tjetër nuk ka dalë nga takimi i katër drejtuesve politikë. Ata do të mbajnë një raund të ri bisedimesh nga fillimi i javës së ardhshme.

Opozita maqedonase ngul këmbë për dorëheqjen e kryeministrit Gruevski dhe për formimin e një qeverie të përkohshme, një kërkesë e papranueshme për zotin Gruevski dhe partinë e tij. za

ANALISTËT – PRISHTINA E NDROJTUR NDAJ RASTIT TË KUMANOVËS

Incidenti i armatosur në Kumanovë, ku u përplasën organet e rendit të Maqedonisë dhe një grup i armatosur, po përdoret nga kundërshtarët e pavarësisë së Kosovës për ta dëmtuar imazhin e vendit, vlerësojnë njohësit e zhvillimeve politike dhe të sigurisë në Kosovë.

Sipas tyre, në mjaft raste, qarqe të caktuara në vendet e rajonit dhe më gjerë, e kanë quajtur Kosovën, si “eksportuese të konfliktit”, duke përdorur edhe termin “terrorizëm”.

Në incidentin e Kumanovës, mbetën të vrarë 18 persona, 8 policë dhe 10 pjesëtarë të grupit të armatosur. Nga personat e vrarë, 9 prej tyre janë nga Kosova, si dhe të arrestuar 19 të tjerë.

Halil Matoshi, analist i çështjeve politike, thotë se institucionet e Kosovës vazhdojnë të heshtin lidhur me informatat eventuale që mund t’i kenë rreth incidentit në Maqedoni, ashtu sikurse edhe për trajtimin e shtetasve të saj, të vrarë në këtë incident.

“Ata mund të kenë qenë luftëtarë të denjë të luftërave në vitin ’99, përkatësisht të vitit 2001 në Maqedoni dhe duhet të respektohen si të tillë, pa marrë parasysh që kanë mundur që këtë herë të bien ndesh me ligjet dhe parimet e moscenueshmërisë së kufijve të shteteve të Ballkanit. Kështu që, secilit duhet dhënë meritat për punët e mira dhe të mbara, por edhe secili duhet të ndëshkohet për punët e mbrapshta”, ka thënë Matoshi.

Njohësi i rrethanave të sigurisë, Nuredin Ibishi, ish pjesëmarrës në luftën e Ushtrisë Çlirimtare të Kosovës dhe aktualisht deputet në Kuvendin e Kosovës nga radhët e Lidhjes Demokratike të Kosovës, vlerëson se ndërmjet dy shteteve, Kosovës dhe Maqedonisë duhet të ekzistojë aspekti i këmbimit të informacioneve.

Ndryshe, ai e ka vlerësuar si të drejtë angazhimin e institucioneve të Kosovës dhe interesimin e tyre për shtetasit e saj të përfshirë në incidentit në Kumanovë.

Megjithatë, sipas tij, institucionet e Kosovës është dashur të interesohen më shumë për shtetasit e vet që janë të arrestuar dhe janë në paraburgim në Maqedoni.

“Në këtë rast është dashur që institucionet të angazhohen në aspektin e ftesës për mbikëqyrje, sidomos nga Kryqi i Kuq Ndërkombëtar, por edhe Human Rrights Watch dhe të tjerëve, që në njëfarë formë ta mbikëqyrin trajtimin në fazën e paraburgimit atje”.

“Mirëpo, përgjithësisht, mendoj që institucionet përgjegjëse, në këtë rast, duhet të jenë më transparente dhe të japin informacion, sepse krijon qetësi në opinion, ne këtë situatë”.

Por, analisti Matoshi, thotë se heshtja e institucioneve të Kosovës, ndaj asaj se si duhet qasur dhe trajtuar personat e përfshirë në incidentin në Kumanovë, nënkupton, siç i ka quajtur ai, “brishtësinë” e këtyre institucioneve.

Sipas tij, institucionet “nuk kanë guxim” dhe mbi të gjitha, siç thotë ai, “nuk e kanë kontrollin mbi popullin dhe grupet e ndryshme të interesit, përkatësisht edhe grupet paraushtarake”.

“Definitivisht, një grup me uniforma, me emblema dhe me armatime, nuk ka se si të konsiderohet ndryshe. Por, Isa Mustafa [kryeministër] me Skënder Hysenin [ministër i Brendshëm] nuk i kontrollojnë këto grupe, ish- UÇK-në, veteranët e luftës dhe të tjerë. Këtu është problemi. Këta as nuk kanë guxim që të distancohen, përderisa angazhohen për mbrojtjen e Maqedonisë si shtet unik. Këta, në njëfarë mënyre edhe po e thonë, por me “gjysmë goje’”, thotë Matoshi.

Edhe Ibishi vlerëson se institucionet duhet të jenë më transparente lidhur me rastin, sepse sipas tij, asgjë nuk duhet të jetë, siç e quan ai “top sekret”.

“Unë nuk dua të futem në spekulime se a kanë frikë apo duan të presin informacione shtesë, për ta rrumbullakuar tërësinë. Por, sido që të jetë, edhe për ato informacione që i kanë duhet të jenë më transparente. Nuk ka sot diçka që mund të jetë top sekrete dhe që s’mund të thuhet”.

Ndryshe, tetë nga nëntë shtetasit e Kosovës, të cilët janë vrarë në incidentin e Kumanovës, do të varrosen sot në Prishtinë, në Varrezat e Dëshmorëve.

ZËRI I AMERIKËS – KRIZA NË MAQEDONI KËRKON MASA TË RËNDËSISHME E TË SHPEJTA – Nga ISABELA ÇOÇOLI

Kriza politike në Maqedoni ka qenë një shkak shqetësimi për Shtetet e Bashkuara dhe interesat e tjera ndërkombëtare. Komuniteti ndërkombëtar u ka bërë thirrje udhëheqësve në Maqedoni që të marrin masa konkrete në mbështetje të demokracisë për t’i dhënë fund krizës.

Senatori Amerikan Chris Murphy (D-CT) , në një intervistë me Shërbimin maqedonase të Zërit të Amerikës, tha se ishte shumë i shqetësuar nga “kthimi mbrapsht” i Maqedonisë” , “kur është fjala për respektimin e sundimit të ligjit, të drejtave të njeriut, lirisë së shtypit”. Duke iu referuar skandalit të përgjimeve që shpërtheu në fillim të këtij viti, Senatori Murphy tha se qeveria duhet të ndërmarë një “një angazhim absolut për të respektuar të drejtat e qytetarëve të saj, për riparimin e dëmeve të dhimbshme që janë zbuluar dhe që ka lidhje me sjelljen e tyre.”
Skandali përfshin raporte ku është zbuluar se qeveria e Maqedonisë ka përgjuar telefonat e më shumë si 20.000 peraonave, duke përfshirë dhjetëra gazetarëve për gjatë disa viteve. “Shtetet e Bashkuara nuk duhet të mjaftohen me faktin se Ballkani është një rajon paqësor sot, tha ai, por duhet të luajë një rol më aktiv se ai që është në të vërtetë duke luajtur, për të parandaluar përshkallëzimin e tensioneve dhe përhapjen e tyre në vendet fqinje. Tensionet që shpërthyen në luftë rajonale pak më shumë se një dekadë më parë janë duke zjerë, nuk janë fashitur,” tha Senatori Murphy.

Rajon kyç

“Ka shumë punë mbetur të papërfunduara në Ballkan, tha Luka Coffey, një bashkëpunëtor i Margaret Thatcher nga Fondacioni Heritage. “Kjo do të ishte një tragjedi për Shtetet e Bashkuara, ose për Evropën që të kthejnë shpinën ndaj rajonit që nuk është vetëm i rëndësishme për historinë e Evropës, por edhe për stabilitetin e Evropës.”

“SHBA ka nevojë për të përdorur situatën aktuale si një mundësi “për të ri-aktivizuar debatin për Maqedoninë brenda Evropës, duke bashkuar strukturat Euro-Atllantike, si NATO dhe Bashkimin Europian,” tha Coffey ..” Nëse Maqedonia do të kishte qenë në gjendje që t’i bashkohej këtyre institucioneve vite më parë, shumë probleme politike me të cilat vendi po përballet sot nuk do të ishin më një çështje për t’u disktuar, pra do të ishin mbyllur, “shtoi Coffey.

“Është e qartë, Maqedonia është në një krizë,” tha Daniel Serwer, profesor i menaxhimit të konflikteve në Shkollën Johns Hopkins të Studimeve të Avancuara Ndërkombëtare (SAIS). Edhe pse vendi është një demokraci, për momentin , “nuk funksionon si demokraci normale,” tha ai. “Ndërkombëtarët e kanë përcaktuar atë që Maqedonia duhet të bëjë për të dalë nga gjendja aktuale ku ndodhet, tha Serwer. Vendi duhet të ndërmarrë veprime konkrete në mbështetje të demokracisë, për të nxitur shtypin e lirë, gjykatat e pavarura dhe për t’i dhënë fund abuzimit me pushtetin“ tha ai. “Largimi i dy ministrave të qeverisë dhe e kreut të shërbimit të inteligjencës është në drejtimin e duhur, por masa më konkrete duhet të merren”, shtoi Serwer.

Kriza e rëndë

“Maqedonia është në një krizë të rëndë, tha Edward Joseph, Drejtor Ekzekutiv i Institutit të Çështjeve Aktuale Botërore. “Ky është demonstrim i tmerrshëm i gjendjes të demokracisë, jo vetëm në Maqedoni, por në tërë rajonin, kur situata vjen deri tek ky lloj konfrontimi. Ne duhet të shohim se çfarë do të bëjë qeveria ndaj pretendimeve serioze në adresë të saj.”
“Për t’i dhënë fund krizës, tha Joseph, qeveria e Maqedonisë duhet të pranojë përgjegjësinë e saj për të gjitha pyetjet e ngritura në lidhje me përgjimet e bisedave telefonike.” “Në qoftë se këto përgjime janë të vërteta dhe vërtetohen ato që thuhen, kjo është jashtëzakonisht serioze dhe një padi për veprimet e qeverisë ndaj demokracisë “. Një hetim i plotë ndaj akuzave është një domosdoshmëri, sipas Joseph.

“Kryeministri Nicola Gruevski duhet të marrë në konsideratë veprimin për të dhënë dorëheqjen menjëherë, tha Joseph, duke shtuar se Maqedonia është një sistem parlamentar dhe “kjo është një mungesë e plotë, e hapur dhe masive e besimit ndaj qeverisjes së tij.”

Skandali i përgjimit nxiti pyetje në lidhje me mënyrën se si qeveria kontrollon mediat, gjykatësit, dhe zgjedhjet gjatë kohës kur Gruevski ka nëntë vjet në pushtet.
Përleshjet midis personave të armatosur dhe policisë që e ndezën në qytetin e Kumanovës në fillim të këtij muaji patën si pasojë 22 të vdekur.

Shërbimit VOA maqedonas ka kontribuar në këtë raport

PËR MASAKRËN NË KUMANOVË E DINË SASHA MIJALLKOVI DHE ARGATËT E TIJ – Opinion nga BARDHYL MAHMUTI

Politologu Bardhyl Mahmuti ka thënë se në Kumanovë u përsërit në një shkallë më tragjike, Masakra e Brodecit dhe kush ka pasur gisht në masakrën e Kumanovës e dinë Sasha Mijallkovi dhe argatët e tij.

Ai në një opinion ka shkruar se shpreson se njerëzit që i kanë shpëtuar kësaj masakre do të hedhin dritë për të ndriçuar këtë krim të shëmtuar.

Ja opinioni i plotë:

Reagimet e shumta për heshtjen e dy udhëheqësve të partive politike shqiptare që kanë qenë, herë njëra e herë tjetra, në pushtetet antishqiptare të Maqedonisëbëri që më në fund t’i drejtohen opinionit publik shqiptar lidhur me Masakra e Kumanovës.

Pas dy intervistave televizive të Kryetarit të BDI-së në Alsat M dhe TV Klan, për të cilat dhashë një pjesë të qëndrimeve të mia në artikullin «Besa kanunore dhe përgjegjësia institucionale, opinionit publik shqiptar iu drejtua edhe Kryetari i PDSH-së.

Më 22 maj, në intervistën për Klan Kosova, Menduh Thaçi u përpoq të shfajësohet nga implikimi i tij në këtë tragjedi. Megjithatë, jo brejtja e ndërgjegjes por ndërdija e tradhtoi keq Menduh Thaçin i cili zbuloi disa elemente domethënëse për këtë situatë. E shoh të rëndësishme t’u kthehem këtyre elementeve që mbetën pa u sqaruar për teleshikuesin e kësaj interviste.

Elementi kyç në këtë intervistë ishte lënia në heshtje e faktit se publikimi i përgjimeve të telefonatave në Maqedoninxori në shesh BETIMIN e Menduh Thaçit se Sasha Mijallkovitdo t’i qëndroj besnik deri në vdekje! Por, Menduh Thaçi sqaroi se raporti i besueshmërisë ndaj Sasha Mijallkovit ishte për shkak të pozitës kyçe që kishte ky person në strukturat e VMRO-së dhe pushtetit të Maqedonisë. Sikur Menduh Thaçi të ishte një qytetar i thjeshtë i Maqedonisë askush nuk do t’ia kontestonte të drejtën që t’i betohej kujt të ketë qejf dhe t’i qëndrojë besnik sa të ketë qejf. Por, është skandaloze në aspektin kombëtar kur një udhëheqës partie, që kërkon vota prej qytetarëve shqiptarë për të realizuar aspiratat e tyre politike, në vend të betimit se do t’u qëndrojë besnik premtimeve të dhëna para elektoratit shqiptar i betohet shefit të aparatit represiv të shtetit që shtyp shqiptarët. Edhe më keq se kaq. Përderisa Menduh Thaçi i betohet Sasha Mijallkovit se do t’i qëndrojë besnik deri në vdekje, në intervistën për TV Klan Kosova,Kryetari i PDSH-së përmendi qëndrimet e tij në raport me Kosovën dhe udhëheqësin e AAK-së, Ramush Haradinajn. Në këto raporte Menduh Thaçi theksoi se “besueshmëria e tij është vdekjeprurëse”. Nuk ishte një llapsus! Ai e përsëriti dy herë se “besueshmëria e tij ndaj Kosovës dhe Ramush Haradinajt është vdekjeprurëse”. Madje herën e dytë ai shtoi se kjo “besueshmëri vdekjeprurëse është në kuptimin pozitiv”!

Teleshikuesve të vëmendshëm u imponohet të shikojnë se a mundet të ketë mbiemri «vdekjeprurës» edhe kuptim pozitiv! Definicioni i këtij mbiemri përfshin personat dhe aktet “që sjellin vdekjen, që janë shumë të rrezikshëm, që janë shumë të dëmshëm… që sjellin shkatërrim, shkatërrimtar, asgjësues… Politikë vdekjeprurëse. Pasoja vdekjeprurëse…” . Shkurt, në asnjë rast, në asnjë formë dhe në asnjë kuptim figurativ mbiemri «vdekjeprurës» nuk ka kuptim pozitiv.

Ajo që është pozitive në këtë intervistë del nga nëndija e Menduh Thaçit: besnik deri në vdekje ndaj Sasha Mijallkovit ndërsa besnikëria ndaj Kosovës dhe Ramush Haradinajt është vdekjeprurëse!

A thua ndërdija e tij nxori në shesh edhe atë që Menduh Thaçi u mundua ta lërë në heshtje gjatë intervistës?!

Nuk mund të harrohen faktet se gjatë pushtetit diktatorial të VMRO-së dhe PDSH-së 2006-2008 forcat policore dhe ushtarake maqedonase ndërmorën aksione vdekjeprurëse për të terrorizuar Malësinë e Karadakut në përgjithësi, ndërsa fshatarët e Tanushës në veçanti;

Nuk mund të harrohen faktet se në aksione vdekjeprurëse u vranë shqiptarë në fshatin Vaksincë, në Haraçinë, në Shkup, në Rrafshin e Pollogut …

Nuk mund të harrohen faktet se në aksione vdekjeprurëse të masakrës në fshatin Brodec të Malësisë së Tetovës gjatë operacioneve ushtarako-policore maqedonase, u vranë, u plagosën dhe u arrestuan me dhjetëra shqiptarë;

Nuk harrohen fjalimet e Zv. Ministrit të Punëve të Brendshme (anëtarë i PDSH-së) dhe deputetëve të PDSH-së në Parlamentin e Maqedonisë kur mburreshin se kishin qenë “shumë efikas në aksionet vdekjeprurëse në Brodec kundër kosovarëve që kishin ardhur të destabilizonin Maqedoninë!”

Bombardimet e Malësisë së Tetovës dhe Masakra e Brodecit ishte paralajmërim se pushteti terrorist i Maqedonisë nuk zgjedh mjete për të terrorizuar shqiptarët.

Në Kumanovë u përsërit, në një shkallë më tragjike, Masakra e Brodecit dhe ajo që kemi parë nga politika vdekjeprurëse e deriatëhershme. Kush ka pasur gisht në këtë masakër e dinë Sasha Mijallkovi dhe argatët e tij. Shpresojmë se njerëzit që i kanë shpëtuar kësaj masakre do të hedhin dritë për të ndriçuar këtë krim të shëmtuar. Kam bindjen e plotë se një ditë do të ndriçohen krimet e diktaturave “multietnike” në Maqedoni.

Por, nuk duhet të harrojmë se Çështja shqiptare në përgjithësi dhe ajo e shqiptarëve të Maqedonisë në veçanti kanë bartur mbi kurrizin e vet pasojat e betimeve për t’i qëndruar besnik deri në vdekje armiqve të popullit shqiptar siç i ka bartur edhe pasojat e politikës vdekjeprurëse antishqiptare.

Njerëzit e tillë nuk largohen vullnetarisht nga politika sepse, deri sa të jenë gjallë, ata janë betuar të jenë besnik ndaj armiqve tanë. Unë nuk ua dëshiroj vdekjen. Por, ata që dëshirojnë të çlirohen nga barra e njerëzve të tillë këtë gjë mund ta arrijnë përmes mobilizimit politik dhe votës për opsion tjetër. Veprimi i këtillë i votuesve shqiptarë në Maqedoni do t’i çlironte edhe njerëzit e tillë sepse do t’ua bënte të pavlefshëm betimin: nuk do t’i duheshin as Sasha Mijallkovit dhe pasardhësve të tij!

NË DEÇAN PO BËHEN HOMAZHE PËR BEG RIZAJN

VOAL – Në Pallatin e Kulturës “Jusuf Gërvalla” në Deçan kanë filluar homazhet në nderim të të të rënit në Kumanovë Beg Rizaj.

Para arkivolit të Beg Rizajt të mbuluar me flamurin kombëtar po bëjnë roje nderi bashkëqytetarë të tij të veshur me uniforma të UÇK-së.

Ata janë bashkëluftëtarët e tij nga njësiti i UÇK-së “Shqiponjat e Zeza”, ku Begu ishte epror gjatë luftës në Kosovë.

Në ndërkohë shumë qytetarë të Deçanit kanë filluar të bëjnë homazhe para arkivolit të ish – luftëtarit të UÇK-së.

Sot në orën 14 pritet të mbahet tubimi mortor në sheshin e Deçanit ndërsa Rizaj do të varroset në Varrezat e Dëshmorëve në Gllogjan.

Beg Rizaj nga fshati Prekolluk i Deçanit u vra më 9 maj në Kumanovë gjatë përleshjeve të armatosura me policinë maqedonase.

Në këtë përleshje janë vrarë edhe tetë shtetas tjerë të Kosovës që pritet të varrosen të martën në Varrezat e Dëshmorëve në Prishtinë.

KUMANOVA DO TË KETË PASOJA TË RËNDA PËR EKONOMINË E MAQEDONISË

Ngjarja që ndodhi në Kumanovë dhe kriza politika që ka përfshirë Maqedoninë ka nisur të jap efektet e para negative.

Në Strugë dhe Ohër, turistët kanë nisur të anulojnë rezervimet që kishin bërë në hotelet e këtyre dy vendeve.

Dhje kjo si duket do të jetë fatale për ekonominë e vendit. Për këtë biznesmen dhe njohës të kësaj fushe kanë paralajmëruar edhe pushtetin.

Por përveç kësaj, ekspert thonë se shumë shpejt do të shihen edhe efektet për rënien e investimeve të huaja dhe uljen e konsumit personal.

Siç transmeton TopChannel, përfaqësuesit e tri dhomave të tregtisë në vend kanë bërë thirrje ndaj përfaqësuesve politikë për zgjidhje sa më të shpejtë të krizës politike, për të shpëtuar ekonominë e vendit, që sipas tyre po rrezikon të falimentojë.

OKB – HETIM NDËRKOMBËTAR PËR KUMANOVËN

Ndihmëssekretari i Përgjithshëm i Organizatës së Kombeve të Bashkuara, Ivan Shimonoviç, ka kërkuar hetim ndërkombëtar për konfliktin e Kumanovës, ku mbetën të vrarë 22 persona. Gjatë vizitës së tij dyditore në Maqedoni, Shimonoviç mori pjesë në një konferencë, ku nënvizoi nevojën e ndihmës ndërkombëtare.

“Duhet të bëhet një hetim i menjëhershëm dhe i pavarur për rastin e Kumanovës, si dhe për rastin e përgjimeve. Kam biseduar me prokurorin për rastin e Kumanovës dhe ai më tha se disa prej hetimeve janë në progres. Por mendoj se për këtë do të jetë e nevojshme që të ketë një ndihmë ndërkombëtare. Ky hetim ka dimensionin e tij ligjor por ka edhe dimension politik. Më rëndësi është që rezultatet e hetimit të jenë të besueshme për të gjithë”, theksoi Shimonovic.

Një çështje për të cilën Shimonoviç shprehu interes është edhe afera e skandalit të përgjimeve. Sipas tij, Në Maqedoni janë rrënuar të drejtat e njeriut përmes përgjimeve masive , por edhe në përmbajtjen e regjistrimeve zbulohet mosrespektimi i të drejtave të njeriut. Shimonovic bëri thirrje për tejkalimin e krizës politike dhe inkurajoi bisedimet që po zhvillohen mes faktorëve politikë me ndërmjetësim ndërkombëtar.

“Përshëndes bisedimet e partisë në pushtet dhe opozitës por kjo duhet patjetër të përfshijë edhe sektorin civil, në mënyrë që të kthehet besimi publik. Gëzohem që ka filluar dialogu politik, si dhe faktin që i pranishëm në to ka qenë edhe komisionari Han. Besoj se ka mundësi për zgjidhje të krizës por nëse kjo bëhet në korniza të të drejtave të njeriut. Zgjidhja e krizës me ndërmjetësimin e ndërkombëtarëve përveçse në Strasburg, më së shumti duhet të bëhet brenda në shtet”, theksoi Shimonovic.

BEG RIZAJ VARROSET TË DIELËN NË KOMPLEKSIN MEMORIAL NË GLLOGJAN

Beg Rizaj, që u vra në luftimet e fundit në Kumanovë të Maqedonisë, do të varroset të dielën në Kompleksin Memorial në Gllogjan të Deçanit.

Lajmin e ka bërë me dijet kryetari i Komunës së Deçanit, Rasim Selmanaj i AAK-së.
“Qytetarë të nderuar gjithë andej trojeve etnike, ju njoftojmë se varrimi i luftëtarit e komandantit Beg Rizaj i rënë në Kumanovë do bëhet të dielën më 24 maj, në ora 16:00 në Kompleksin Memorial në Gllogjan të Deçanit.

Ndërsa tubimi mortor mbahet në Sheshin e Deçanit para Objektit të Komunës së Deçanit, duke filluar nga ora 14:00”, ka shkruar Selmanaj në profilin e tij në Facebook, teksa ka shtuar se për detaje të tjera opinioni do të informohet nesër pas takimit të Këshillit Organizativ. kp

OVL-UÇK – TË VRARËT NË KUMANOVË TË VARROSEN NË VARREZAT E DËSHMORËVE NË PRISHTINË

OVL-UÇK dhe disa nga familjet e kosovarëve të vrarë në Kumanovë janë pajtuar dhe kërkojnë që trupat e 9 të vrarëve në Lagjen e Trimave të varrosen në Varrezat e Dëshmorëve në Prishtinë. Megjithatë ende nuk dihet nëse do të ndodh diçka e tillë.

OVL-UÇK po presin që rëndësinë e kërkesës së tyre që të vrarët në konfliktin e Kumanovës ta kuptojnë të gjitha familjet e të vrarëve dhe të pranojnë që djemtë e tyre të varrosen si dëshmorë në varrezat e tyre në kryeqytet. Kështu ka thënë për Gazetën Express u.d. i OVL-UÇK’së, Smajl Elezaj.

Ai ka treguar se për këtë do të merret vendimi përfundimtarë në ditët në vijim, kur edhe të përfundoj ekspertiza e viktimave që po kryet në Kosovë.

“Ata duhet të varrosen në varrezat e dëshmorëve. Për këtë janë pajtuar një pjesë e familjeve. Presim që edhe familjet tjera të kuptojnë rëndësinë e kësaj. Ne ata duhet ti respektojmë ata djem si heronj dhe luftën e atyre trimave në Kumanovë e vlerësojmë si luftë kombëtare dhe do ta quajmë “Beteja e Kumanovës””, tha Elezaj për Gazetën Express.

Në Kumanovë, dy javë më parë u vranë nëntë kosovarë që kishin nisur një konflikt të armatosur me forcat maqedonase në Lagjen e Trimave. Deri me sot ka shumë dilema dhe paqartësi për konfliktin e ndodhur atje, ku në total u vranë 14 dhe u arrestuan edhe rreth 30 shqiptarë të tjerë.

Trupat e nëntë kosovarëve të vrarë atje janë sjellë në Kosovë të enjten, në orët vona të mbrëmjes dhe pritet të varrosën më ditët në vijim.

Menduh Thaçi – Nuk kam gisht në inskenimin e konfliktit në Kumanovë

Lideri i PDSH’së, Menduh Thaçi ka thënë se ka qenë në dijeni për konfliktin në Kumanovë. Ai ka thënë se ka qenë i informuar shumë më parë për këtë situatë. Thaçi tregon se ka pasur takime edhe me njerëzit që kanë marr pjesë në këtë konflikt.

Por, ai mohon se ka pasur gisht inskenimin e konfliktit shqiptaro-maqedonas.

” Realisht kemi pasur informacione paraprake”, thotë ai.

Thaçi ka treguar se është i gatshëm të ulet dhe te bisedoj me liderin e BDI’së, Ali Ahmetin.

” Po i bëjë ftesë publike që ne të dy të takohemi një ditë”, thotë ai në një intervistë në Klan Kosova.

Por, ai thotë se kjo është e vështirë të arrihet. Pasi sipas tij Ahmeti po flet për gjera të tjera dhe jo për situatën aktuale.

KJO ËSHTË FOTOGRAFIA E FUNDIT BASHKË E KOSOVARËVE QË U VRANË NË KUMANOVË

Kjo fotografi është e fundit që shihen bashkë 6 nga nëntë kosovarët e vrarë në Kumanovë.

Fotografia e bërë në momentet kur këta djem kaluan kufirin maqedonas do të mbetet si kujtim i fundit i tyre dhe ‘luftës’ së tyre në Kumanovë, shkruan Gazeta Express.

Fotografia është shpërndarë shumë shpejt nëpër rrjetet sociale nga të afër të këtyre të vrarëve në konfliktin e 9 dhe 10 majit në Lagjen e Trimave.

EKSPERTËT – KRIZA POLITIKE E PARALIZON EKONOMINË E MAQEDONISË

Ekspertët e ekonomisë të shqetësuar nga pasojat e krizës në Maqedoni. Gjendja e pasigurisë ka frenuar investitorët dhe bizneset po hasin në mungesën e qarkullimit të kapitalit si pasojë e rënies së aktivitetit ekonomik.

Gjendja e rëndë politike në Maqedoni po influencon negativisht ekonominë e veçanërisht investimet e huaja dhe vendase në sektorin e turzimit. Po ashtu për shkaqe sigurie rrezikohet dhe kthimi i mërgimtarëve gjatë periudhë së verës në atdhe, vë në dukje Menderes Kuçi, kryetar i Odës Ekonomike të Maqedonisë Veriperendimore OEMVP, duke analizar ndikimin e krizës politike në ekonominë e Maqedonisë. “Gjendja e rëndë politike në vend, ka ndikim negativ. Rrezikohet dhe kthimi i mërgimtarëve tanë në periudhën e verës, e që janë stimul i veçantë për rritjen e konsumit të përgjithshëm në Maqedoni, si dhe në mënyrë shtesë dhe rreziku nga zvogëlimi i depozitave të tyre, që në masë të madhe kontribojnë për stabilitetin makroekonomik të vendit dhe sigurojnë stabilitet të një pjesë të rezervave devizore”, vlerëson Menderes Kuçi.

Vazhdimi i krizës politike do të ketë ndikim negativ në ekonominë e vendit, e sidomos në investimet e huaja.“Pasojat e gjithë kësaj do t’i bartin kompanitë dhe qytetarët, ndërsa qeveria këtë do ta ndjejë pasi arka shtetërore do të jetë e zbrazur, indikacione të cilat tashmë dhe kanë filluar të ndjehen. Vazhdimi i krizës politiko-ekonomike do t’i zbeh mundësitë për ta mbrojtur Maqedoninë nga falimentimi”, thotë kryetari i OEMVP-së, Menderes Kuçi

Përfaqësuesit e odave ekonomike që përfaqësojmë interesin e komunitetit të biznesit, kanë paralajmëruar iniciativa të përbashkëta, të cilat do t’i dorëzohen qeverisë në drejtim të stabilizimit dhe normalizimit të krizës politike dhe ekonomike në vend.

Biznesmenët kërkojnë ndihmë

Kriza politike po reflektohet negativisht në sferën e ekonomisë, ndërsa pasojat më së shumti po i ndjejnë kompanitë e mëdha, por pa anashkaluar edhe konsumatorët e thjeshtë, thonë biznesmenët, duke kërkuar siguri politike që të mund të realizojnë parashikimet e tyre investuese në vend.“Kriza politike para së gjithash po ndihet tek oligarkët, apo tek kompanitë e mëdha ku ka ngecje në qarkullimin e kapitalit. Ngecjet në zhvillimin ekonomik po i ndiejnë edhe konsumatorët e thjeshtë, por edhe ndërmarrjet e vogla pasi në situatën e krijuar kemi ulje të kërkesave dhe rritje të shpenzimeve“, thotë biznesmeni Zore Temelkovski.

Ministri i financave, Zoran Stavreski, pranon se biznesmenëve u nevojitet stabilitet i qëndrueshëm që të mund të realizojnë projektet e planifikuara. Stavreski vlerëson se një zgjidhje e krizës politike do të ishte e mirëseradhur për bizneset vendase, por edhe për kompanitë e tjera që hezitojnë për të investuar në Maqedoni.

“Pres që rezultatet në ekonomi tani për tani nuk do të përkeqësohen, por gjithçka varet nga ajo se sa shpejtë do të tejkalohet kriza politike. Vlerësoj se është mirë që të dilet nga kjo situatë dhe bizneset të fillojnë me realizimin e parashikimeve të tyre në ekonomi“, thotë Ministri i financave, Zoran Stavreski.

Ekspertët e ekonomisë të shqetësuar nga pasojat e krizës

Profesori i ekonomisë në Universitetin e Shkupit, Zoran Ivanovski, thotë se për shkak të uljes së aktiviteteve ekonomike si pasojë e krizës politike, është reale që të pritet rritja e deficiteti buxhetor, apo të mos realizohet mbushja e buxhetit sipas parashikimeve të qeverisë.“Vlerësoj se nuk do të ketë ndryshime të theksuara sa i përket politikës ekonomike në krahasim me periudhën e deritanishme. Konsideroj se është reale që të presim rritje të deficitit buxhetor“, thotë Ivanovski.

Sipas njohësit të çështjeve ekonomike Visar Ademi kriza ekonomike do të manifestohet në dy aspekte, e para duke e ulur fuqinë blerëse të qytetarëve dhe e dyta duke ngrirë investimet e huaja në vend.“Investitorët e brendshëm duke e pasur të ulur konsumin e brendshëm do të kenë shumë më pak para në dorë që të investojnë tek kapacitetet ekzistuese të kompanive të tyre dhe do të ketë shumë më pak vende të reja pune. Kjo do të ndikojë shumë ndjeshëm në ekonomi dhe mendoj se do të ketë një lloj krize ekonomike që do të reflektohet pas pushimeve verore”, thotë Visar Ademi.

Eksperti Zoran Vitanov thotë se tanimë është i dukshëm ndikimi i krizës politike në ekonomi përmes anulimit të marrëveshjeve dhe bllokimit të investimeve nga jashtë. “Prodhimet vendase kanë mbetur të ngujuara në tregun e brendshëm. Blerësit e prodhimeve tona, të njëtet produkte i marin nga shtetet e tjera, sepse nuk kanë guxim të rezikojnë dhe të presin se çka po ndodh në Maqedoni “, deklaron Zoran Vitanov.

Sipas të dhënave të Bankës Popullore të Maqedonisë në muajin shkurt të këtij viti janë regjistruar vetëm 12.6 milionë Euro investime të huaja, investimet e huaja mesatarisht kanë qenë mbi 30 milionë Euro. dw

ZAEV – FLAMURIN SHQIPTAR DO TA VENDOS TE SELIA E LSDM-së

Lideri i LSDM-së, Zoran Zaevi në një intervistë për emisionin ”Jeta në Kosovë”, ka thënë se flamuri shqiptar do të jetë prezent në selinë e LSDM-së, kur ta kërkojnë anëtarët shqiptarë.

“Flamuri shqiptar do të jetë këtu në selinë e LSDM-së, kur të na kërkojnë anëtarët shqiptarë”, tha Zaev.

Ai më tej tha se shqiptarët duhet ta ndjejnë veten si të barabartë në Maqedoni dhe duhet së bashku të punojmë për një ardhme më të mirë./Alsat/

BEQIRI – SHKELJE BRUTALE TË LIGJEVE NDAJ GRUPIT TË PARABURGOSUR TË KUMANOVËS

Arrestimi i grupit të armatosur në Kumanovë ka shtuar zërat për shkelje ligjore, dyshime për torturë dhe veprime tjera antiligjore.

Prof.dr. Mitasin Beqiri, profesor universitar i kriminologjisë dhe penologjisë dhe ish-drejtor i përgjithshëm i Burgjeve në Maqedoni përgjigjet në INA mbi procedurat dhe të vërtetën se çfarë kanë ndodhur me grupin e Kumanovës, pas shqetësimeve të avokatëve për tortura, brutalitet dhe shkelje ligjore gjatë procedurave nga privimi i tyre.

Ngjarja me grupin e dorëzuar në rastin e Kumanovës, ka nxitur shumë zëra dhe dyshime për shkelje ligjore dhe të procedurave, dyshime për torturim dhe akte tjera antiligjore. Çfarë mund të na thoni në këtë drejtim se si është trajtuar sipas jush ky rast?

Beqiri: Sipas analizave të bëra nga ajo që publikohet dhe shqetësimet e shprehura nga avokatët mbrojtës dhe Avokati i Popullit, mund të them se nuk janë respektuar ligjet dhe ka shkelje të mëdha ligjore dhe të procedurave.
Është e habitshme se si nuk respektohet imuniteti i ambasadorit që ka kërkuar vizitë dhe që nuk i është dhënë leje. Familjarët kanë qëndruar me shumë vuajtje, nënçmime para dyerve të burgut të Shutkës dhe një pjesë e tyre mezi kanë kryer vizita e shkurtëra. Kjo u pa edhe në fotot dhe deklaratat e familjarëve. Personat e privuar janë rrahur prej Kumanove deri në Shkup dhe kjo shihet në pamjet e MPB-së. Kjo ka ndodhur edhe kur kanë shkuar në pyetje tek gjykatësi i procedurës paraprake. Nga vendi i arrestimit deri tek gjykatësi personat e privuar mbahen në stacion policor deri në 72 orë. Kjo është faza më e errët e mbajtjes së personave të privuar në stacionet policore. Këtu rrihen, maltretohen, nënçmohen dhe pësojnë të zezat e ullirit. Më pas pason dërgimi tek gjykatësi hetues, i cili ka për detyrë që në ate gjendje të rrahur dhe maltretuar, të cakton masën e shërimit të detyrueshëm në spital e jo masën e paraburgimit, siç ka ndodhur me këtë grup. Me këtë duhet të nxjerrim në pah se organet policore vihen në pozitë mbi prokurorinë dhe gjykatën, ndërsa në fakt duhet të jenë në shërbim të këtyre institucioneve.
Gjykatësi i procedurës paraprake me kryetarin e Gjyqit Themelor Shkupi 1, e kanë për obligim që të shkojnë në paraburgim ti shohin personat e paraburgosur.
Në këtë fazë, personat e privuar kanë të drejtë t’i shohin përfaqësuesi i ambasadës së vendit përkatës, Kryqi i Kuq Ndërkombëtarë, Komiteti për Torturë dhe Sjellje çnjerëzore dhe nëse shihet se është tejkalu sjellja e organeve të rendit duhet të merren masa ndaj policëve përgjegjës, por edhe gjykatësit të procedurës paraprake, se pse ka lejuar këtë gjendje të burgosurëve deri në 11 herë në alivanosje dhe me probleme shëndetësore.

Pra ju përmendni këto shkelje dhe se shkelësit e ligjit tashmë dihen. Por a është koha që për këtë dikush të bartë përgjegjësi, sepse këto praktika po përsëriten ?

Beqiri: Po sigurisht se kjo mund të identifikohet shumë lehtë nga organet e rendit, duke u ditur fillimisht se kush ka qenë në operacion. Edhe gjykatësit që kanë marrë në pyetje në këtë gjendje dhe të marrin masa. Andaj apeloj që kjo të zbardhet dhe pikërisht hetimi i gjërë që po kërkohet sidomos nga faktori ndërkombëtar duhet të përfshijë edhe këtë pjesë më të errët, e cila është aplikuar dhe po aplikohet ashpër në Maqedoni, edhe përkundër pretendimeve për anëtarësim në NATO dhe BE.

Ditëve të fundit është hasur edhe heshtja e ministrit të Drejtësisë, Adnan Jashari. Ndërsa si e komentoni deklaratat e Avokatit të Popullit ?

Beqiri: Ministri i Drejtësisë nga ajo çka po flasim duhet të ndërmarrë iniciativë nëpërmjet Këshillit Gjyqësor Republikan të shkarkojë gjykatësit e procedurës paraprake, që u kanë caktu paraburgim personave të rrahur dhe maltretuar. Ndërkohë, duhet shkarkuar drejtoreshën e ekzekutimit të sanksioneve dhe drejtorin e burgut të Shuktës, se pse i kanë pranuar personat në këtë gjendje shëndetësore.

Avokati i Popullit duhet të jetë më zëshëm dhe mos të mbrojë gjykatësit e procedurës paraprake, se janë rrahur ata prej gjyqi deri në burg. Ndoshta janë rrahur edhe në këtë rast, por ata janë rrahur edhe nga Kumanova për në stacionin policor, edhe kur janë dërguar tek gjykatësi, por edhe nga gjykata deri në burgun e Shutkës. Avokati i Popullit duhet qartë ta sqarojë gjendjen faktike që është me të paraburgosurit në burgun e Shutkës. Për këtë ai duhet të përgadis raport për në Parlament dhe jo këtë ta thotë vetëm përmes mediave.

Nuk është mjaft të prononcohet ai se nuk i lejohet vizita. Atëherë shtrohen pyetjet dhe shumë dilema se edhe kësaj radhe kush cilët i rrahin? apo Kush janë të privuar, rrahur, shkallmuar, pra shqiptarët!?.

Pse nuk u jepet leje anëtarëve të familjes për vizitë, pse nuk i lejohet ambasadorit që të vizitojë, pse nuk i jepet leje Avokatit të popullit, pse heshtën Ministri i Drejtësisë. Këto dhe shumë dilema tjera janë shqetësuese për gjendjen e mjerueshme të shqiptarëve në Maqedoni. Nuk duhet të heshtim, por këto çështje duhet të alarmohen.

Me gjithë këtë po shtohen faktet dhe e vërteta se ky vend nuk respekton ligjet dhe aplikon padrejtësi të mëdha?

Beqiri: Me rastin e fundit të Kumanovës, u pa se ky shtet nuk respekton të drejtat dhe liritë e njeriut. Nuk respektohet demokracia. Rasti i Kumanovës na kujton si rastin e Lubotenit. Kjo tregon se akoma nuk ndryshojnë gjërat këtu në këtë aspekt. Këto i themi që të mos përsëriten më dhe shqiptarët të mos jenë viktima. Këtu kemi të bëjmë me mosrespektim të plotë të standardeve evropiane dhe ligjeve për të drejtat e personave të privuar dhe personave të burgosur. Këto dhe shumë çështje tjera tregojnë gjendjen faktike në Maqedoni.

Pas gjitha këtyre shkeljeve skandaloze të ligjeve në sferën penale dhe kushtetutës, shihet qartë se ky shtet nuk po funksionon. A duhet reviduar disa çështje dhe ngritjen e pozitës dhe rolit shqiptar si faktor i barabartë në Maqedoni?
Beqiri: Edhe pse ligjet janë mirë, përsëri duhet reviduar, edhe ate shumë prej tyre sepse janë sjellë në mënyrë të njëanshme.

Pikë së pari duhet reviduar Kushtetutën e vendit, për të rregulluar sferën e të drejtave kolektive të shqiptarëve.

Kjo nënkupton një model federalizimi me Parlament dydhomësh, buxhet koncensual, me respektimin e të drejtave kolektive dhe duhet ndryshuar në bindjen dhe psikologjinë e njerëzve, sepse mund të sillen ligje të mira, por nëse ato nuk respektohen apo abuzohen, atëherë kjo nuk ka efekt apo nuk respektohet, duke sjellë njërën palë në pozitë inferiore.

ZIJADIN SELA – TË KRIJOHET BLLOKU SHQIPTAR NË MAQEDONI

Terrori” policor dhe “montimi” i proceseve politike sikurse ai i Kumanovës mund të përsëriten në qytetet e tjera të Maqedonisë, nëse Bashkimi Demokratik për Integrim vazhdon të jetë pjesë e Qeverisë Gruevski, ka thënë kryetari i Strugës, njëherësh kryetar i Lëvizjes për reforma në Partinë Demokratike Shqiptare, Ziadin Sela, në një intervistë për “Kohën Ditore”.

Ai ka kërkuar formimin e bllokut politik shqiptar dhe negocimin e një marrëveshjeje të re në Bruksel me palën maqedonase, pasi, siç ka thënë Sela, Marrëveshja e Ohrit është e dështuar. Sipas tij, shqiptarët kanë fuqinë që nëse nuk përmbushen kërkesat e tyre, ta bojkotojnë sistemin në Maqedoni dhe të protestojnë në rrugë.

Sela, po ashtu, ka kritikuar udhëheqësit e Kosovës dhe ata të Shqipërisë. Sipas tij, Prishtina dhe Tirana deri tani kanë shërbyer si vend ku udhëheqësit maqedonas kanë larë mëkatet e tyre, pas padrejtësive dhe dhunës që kanë ushtruar ndaj shqiptarëve të Maqedonisë.

TRUPAT E 9 TË VRARËVE SILLEN NË PRISHTINË NGA KUMANOVA PËR EKZAMINIM TË SËRISHËM

Fotografi nga homazhet për të vrarët në Kumanovë

Trupat e pajetë të 9 shtetasve të Kosovës, të vrarë në incidentin e armatosur në Kumanovë, me 9 dhe 10 maj, janë sjellë në Kosovë, në orët e para të mëngjesit të ditës së premte.

Familjarët e personave të vrarë i kanë marrë trupat e pajetë të të afërmve të tyre nga autoritetet e Maqedonisë rreth orës 3 e 15 , ndërkohë që kortezhi ka hyrë në territorin e Kosovës, në orën 4: 10, përmes pikës kufitare në Han të Elezit.

Shtetasit e Kosovës të identifikuar si të vrarë në incidentin e Kumanovës janë: Xhafer (Hysen) Zymeraj, Beg (Miftar) Rizaj, Mirsad (Osman) Ndrecaj, Valon (Selim) Kabashi, Turgaj (Mehmet) Gashi, Samid (Bajram) Kastrioti, Hysen (Latif) Rushiti, Fatlum (Kadri) Vishesella dhe Arben (Qerim) Rexhaj.

Familjarët që kanë marrë të afërmit e tyre të pajetë në Maqedoni, që nga dita e enjte, gjatë gjithë kohës janë shoqëruar nga drejtori i Departamentit të Mjekësisë Ligjore të Kosovës, Arsim Gërxhaliu.

Gërxhaliu, menjëherë pas hyrjes së kortezhit në territorin e Kosovës, i ka thënë Radios Evropa e Lirë se pas procedurave, që i quajiti të zgjatura burokratike nga autoritetet maqedonase, trupat e pa jetë janë identifikuar nga familjarët dhe ata ishin në rrugë drejt morgut të Departamentit të Mjekësisë Ligjore në Prishtinë

“Paksa i stërzgjatën procedurat, ndoshta edhe më tepër se që duhet. Por, marrë në përgjithësi që numri ishte prej nëntë personash, secili drejtim i punës priste ta përfundonte punën një sektor, për ta marrë pastaj sektori tjetër. Kjo ishte paksa e mundimshme, mirëpo meqenëse u arrit që familjarët të bëjnë identifikimin e 9 personave, arritëm që t’i marrim në këto orë të vona. Në orën 4 e 10 minuta kemi hyrë në kufi dhe tash jemi rrugës. Po i dërgojmë në morgun e Prishtinës”, tha Gërxhaliu.

Ai ka shtuar se gjatë pritjes për identifikimin dhe marrjen e trupave të pajetë, kanë pasur mbështetje dhe ndihmesë mjaft të madhe nga ambasadori i Kosovës në Maqedoni, Ylber Hysa.

Gërxhaliu, ka theksuar se vetë familjarët e shtetasve të Kosovës, të vrarë në incidentin e Kumanovës, kanë insistuar që të përsëritet ekspertiza mjeko-ligjore dhe sipas tij, një gjë e tillë edhe do të bëhet..

“Po, ata e kanë thënë këtë gjatë gjithë kohës dhe ne kemi qëndruar bashkë më shumë se 12 orë. Ata janë duke ardhur drejt morgut që të bëjnë kërkesat e tyre dhe dëshirojnë që gjithsesi të bëhen ri-autopsitë edhe në departamentin tonë”, ka theksuar Gërxhaliu.

Në anën tjetër, edhe Këshilli për Mbrojtjen e Lirisë dhe të Drejtave të Njeriut, ka bërë thirrje ndaj familjarëve të personave, shtetas të Kosovës, që kanë humbur jetën në incidentin e Kumanovës, si dhe ndaj institucioneve të Kosovës, që të përsëritet ekzaminimi i trupave të pajetë.

Behxhet Shala nga Këshilli për Mbrojtjen e të Drejtave dhe Lirisë së Njeriut, thotë për Radion Evropa e Lirë se ky këshill insiston që trupat e pajetë që janë sjellë nga Maqedonia, të mos varrosen para se t’i nënshtrohen edhe një herë ekspertizës.

“Insistimi ynë është që ka mundësi edhe forenzika, por edhe mjekësia ligjore – në qoftë se është nevoja, shteti duhet të investojë edhe në ekspert të jashtëm- në mënyrë që të bëhet një super-ekspertizë, në mënyrë që të vërtetohen shkaqet e vdekjes. Vetëm atëherë kur të bëhet një super-ekspertizë dhe të dihen shkaqet e vdekjes, atëherë mund të bëhet varrimi. Në qoftë se e bëjnë varrimin tash, atëherë shumë gjëra do të mbeten mister dhe të pasqaruara”, tha Shala.

Ai ka shtuar se KMDLNJ, insiston që të zbardhen faktet nëse personat që kanë humbur jetën në incidentin në Kumanovë janë vrarë gjatë luftimeve apo pasi ata janë dorëzuar.

“Këtu ka shumë gjëra për të cilat mund të dyshohet, sepse dëshmitarët që kanë marrë pjesë në luftime, tregojnë se disa prej tyre kanë qenë të plagosur e pastaj ata figurojnë në listën e të vrarëve. Mjekësia ka shkuar aq larg sa që mund të konstatohet edhe koha, por edhe mënyra e vdekjes”, ka theksuar Shala.

Ndryshe, Gërxhaliu ka theksuar se ekipet për ekzaminimin e trupave të pajetë janë të gatshme në Departamentin e Mjekësisë Ligjore dhe se pritet qe ky proces te përfundojë brenda dy apo tre ditësh.

KTHEHEN NË KOSOVË TRUPAT E 9 TË VRARËVE NË KUMANOVË

Morgu në Shkup

Në orën tre të mëngjesit të së premtes, është bërë transferimi nga Morgu i Shkupit për në Kosovë, i trupave të pajetë të 9 shtetasve të Kosovës të vrarë në përleshjen e armatosur më 9 dhe 10 maj në Kumanovë, në Lagjen e Trimave.

Identifikimi I tyre paraprakisht u bë nga ana e të afërmve të tyre, në pranitë ambasadorit të Kosovës në Shkup, Ylber Hysa dhe të drejtorit të Departamentit të Mjekësisë Ligjore të Kosovës Arsim Gërxhaliu.

Ambasadori i Kosovës në Shkup Ylber Hysa të enjten në mbrëmje është shprehur se procedura e identifikimit i trupave të pajetë në morgun e Shkupit nga të afërmit e tyre që ka zgjatur më shumë se 12 orë, ka qenë për arsye të procedurës së komplikuar të mbledhjes së dokumentacionit.

“Po arsyet janë të natyrës teknike. Janë ligjet e vendit (Maqedonisë) të cilat nuk janë dhe aq të thjeshta sepse nuk bëhet fjalë për vdekje të natyrshme por rrethana të tjera. Disa nga dokumentet që është dashur të sigurohen, si certifikata e lindjes të atyre të cilët i identifikojnë kufomatnuk, duhet të jetë më vjetër se gjashtë muaj dhe disa procedura të tjera të cilat varen nga institucionet maqedonase”.

“Siç e shihni, ne po e bëjmë punën tonë në mënyrën më të shpejtë të mundshme dhe presim kjo çështje të kryhet dhe sipas të gjisa gjasave kthimi i trupave do të bëhet sot”, ka deklaruar ambasadori i Kosovës në Maqedoni Ylber Hysa duke bërë të ditur se autoritet maqedonase,autoriteteve të Kosovës dhe familjarëve, të cilëve u kanë dorëzuar dhe raportin e autopsisë të realizuar nga Mjeksia Ligjore e Maqedonisë.

“Ne kemi kërkuar nga autoritetet maqedonase të na dorëzohet raporti i autopsisë dhe kjo na është lejuar, kështu që do ta kemi edhe këtë raport”, ka bërë të ditur zoti Hysa.

Përleshja e armatosur në Kumanovë la 18 të vrarë, 8 policë dhe 10 pjesëtarë të grupit të armatosur. Fillimisht, autoritetet maqedonase kishin thënë se numri i viktimave është 22, 14 nga të cilët ishin pjesëtarë të vrarë të grupit të armatosur. rel

PSE NDRYSHOI NUMRI I TË VRARËVE NË KUMANOVË?

Prokuroria Publike e Maqedonisë, për Radion Evropa e Lirë thotë se në vendin e ngjarjes janë gjetur 10 trupa të vrarë, 9 shtetas të Kosovës dhe një shtetas i Maqedonisë, por ajo nuk e ka komentuar faktin pse është ndryshuar numri i të vrarëve nga radhët e grupit të armatosur, nga 14 në 10.

Nga ana tjetër, Ivo Kotevski nga Ministra e Punëve të Brendshme e Maqedonisë thotë se infomacioni se kanë mbetur të vrarë 14 pjesëtarë të grupit të armatosur është bazuat në të dhënat e para jozyrtare, të mbledhura nga terreni, nga pjesëtarët e forcave maqedonase të sigurisë.

“Informacionet të cilat i plasuam si Ministri e Punëve të Brendshme ishin informacione të cilat ne i morrëm nga terreni, përderisa aksioni ishte ende në rrjedhë, kështu që është e kuptueshme se ndonjë pjesëtar i policisë i ka emëruar dy here trupat e pajetë. Ato [trupat] nuk kanë qenë në një hapësirë të vetme, por kanë qenë në më shumë lokalitete, andaj edhe thamë se këto janë informacionet e para jozyrtare nga terreni”, thotë zoti Kotevski.

Numri prej 22 viktimash gjithsejt, ishte komunikuar më 10 maj nga ana e MPB-së maqedonase, për t’u ndryshuar me datën 18 maj nga ana e prokurorisë, në numrin e përgjithshëm prej 18 viktimash.

Njohësit e sistemit të sigurisë thonë se gabimi është bërë për qëllime populliste dhe jo mungesë informacioni.

“Nuk bëhet fjalë për gabim, por për atë se politikanë të caktuar dëshiruan që në frymën populliste të tregojnë se forcat policore maqedonase kanë kryer një operacion të suksesshëm, me atë që kanë asgjësuar një numër shumë më të madh të terroristëve, kundrejt humbjeve në njërëz që kanë pësuar forcat e njësitit special të policisë maqedonase”.

“Pra, thjesht ishte popullizëm nga ana e autoriteteve maqedonase, ajo më pas krijoi shumë huti, si në opinion ashtu edhe gjatë komunikimit me autoritetet e Republikës së Kosovës”, thekson Vlladimir Pivovarov, ish zyrtar i lartë i shërbimeve të zbulimit në Maqedoni.

Pivovarov thotë se procedura e stërzgjatur e verifikimit dhe plasimit të informacioneve në opinion reth më shumë çështjeve që lidhen me rastin e Kumanovës, paraqet një sinjal të qartë se bashkëpunimi i ministrive të brendshme në Maqedoni dhe Kosovë nuk është në nivel të kënaqshëm, me gjithë prononcimet e udhëheqësve të tyre se kanë një bashkëpunim dhe komunikim të ngushtë. rel

EKSPERTËT PERËNDIMORË – SITUATA POLITIKE NË MAQEDONI

Dhjetra mijëra banorë në Maqedoni kanë protestuar këtë javë për të kërkuar dorëheqjen e qeverisë, ndërkohë që kjo e fundit organizoi një tubim në mbështetje të saj me pjesëmarrjen e po dhjetra mijëra vetëve. Shtimi i tensioneve politike është shkaktuar pjesërisht edhe nga pakënaqësia e vendeve të Ballkanit me periudhën e zgjatur drejt një anëtarësimi të mundshëm në Bashkimin Evropian. Maqedonia ka edhe problemin e shtuar me Greqinë që këmbëngul për ndryshimin e emrit të këtij vendi.

Ekspertët thonë se kryeministri Nikolla Gruevski është bërë gjithnjë e më autokratik pas rizgjedhjes disa herë në këtë post, i ndihmuar pjesërisht prej imponimit nga BE-ja të një proçesi jashtëzakonisht të ngadaltë për Maqedoninë dhe vendet e tjera të Ballkanit drejt anëtarësimit.

James Ker-Lindsay është me Universitetin “London School of Economics”:

“Qeveria nuk është përpjekur të bëjë ndryshime pasi nuk ka qënë e detyruar të kryejë reformat e duhura për ta afruar vendin më shumë NATO-n dhe BE-në dhe madje tashmë po lëviz sërish kundër idesë së një anëtarësimi në BE. Mendoj se kjo e bën edhe më të rrezikshme.”

Ish-përfaqësuesi i posaçëm i BE-së në Maqedoni, Erwan Fouere, është edhe më kritik ndaj qeverisë:

“Regjimi aktual ka humbur të gjithë kredibilitetin që kishte dhe legjitimitetin për të qenë në pushtet. Mendoj se e vetmja mënyrë që mund të rikthehet një proçes paqësor është me dorëheqjen e qeverisë dhe me hapjen e rrugës për një proçes tranzicioni.”

Disa prej protestuesve opozitarë kanë ngritur tenda për të vazhduar protestën. Por, shanset e tyre për t’ia dalë me sukses nuk janë të qarta. Zoti Ker-Lindsay thotë se nuk kanë gjasa të tërheqin vëmendjen që tërhoqën protestuesit në Ukrainë vitin e kaluar.

“Vendi nuk udhëton në atë vijë të ndërmjetme midis Lindjes dhe Perëndimit, si Ukraina.”

Megjithatë, ai thotë se politikat e BE-së kanë krijuar një hapësirë që Rusia të mundohet të shtojë ndikimin e saj në rajon.

Erwan Fouere nuk ka një shqetësim të ngjashëm:

“Nuk ka asnjë interes strategjik për Rusinë në këtë mes, përveçse të bezdisë Perëndimin dhe të thotë se Perëndimi nuk po përmbush siç duhet angazhimet ndaj Ballkanit.”

Angazhimi është për të sjellë vendet e Ballkanit në Bashkimin Evropian. Vonesat kanë të bëjnë me nevojën për reforma dhe shqetësimet për emigracion drejt vende aktuale të BE-së.

Zoti Ker-Lindsay thotë se BE-ja duhet të balancojë shqetësimet e saj me një mesazh të fortë që do të garantojë anëtarësimin e vendeve të Ballkanit, megjithëse nuk ka gjasa që ky anëtarësim të ndodhë edhe për disa vite të tjera. za

BEG RIZA DHE SHOKËT E TIJ LYPIN DREJTËSI

Beg Riza dhe shokët e tij lypin drejtësi, kësaj here nuk do të shkojë si herët e tjera, vrit shqiptarë dhe akuzoi pastaj shqiptarët si terroristë!

Çun Lajçi me poezi për komandantin Beg Riza

Për rënien e komandantit, Beg Rizaj në Kumanovë gjatë përleshjeve mes policisë maqedonase dhe grupit të armatosur, ka shkruar edhe Çun Lajçi.
Ai i ka kushtuar komandantit të rënë një poezi.
Lajçi këtë poezi e ka shkruar në profilin e tij në Facebook.

Ja vargjet e tij:

Rrjedhë lumi
( Beg Rizes)
Mi ktheni rrugët andej
Lumin ma leni të rrjedhë
Zemrës sime pa dallgë,
Ëndërrat e bardha ua le
Juve që ëndërroni lule.
Dallandyshet nëse ikin
Foletë mos ua prishni.
Ju mjaftojnë mbase dy gur
Tri dërrasa e një grusht Dhé
Të ma bëni një shtëpi!

ZAEVI – PARTITË SHQIPTARE BASHKËPUNOJNË ME GRUEVSKIN

Kreu i opozitës maqedonase, Zoran Zaev ka akuzuar partitë shqiptare, BDI-nw qw wshtw në qeveri dhe PDSH-nw opozitare, se që të dyja bashkëpunojnë me kryeministrin Gruevkski.

Në një intervistë që ka dhënë për “Capital”, ai ka thënë se nuk është momenti i duhur që BDI të largohet nga qeveria, pasi përveç që Ali Ahmeti ka frikë nga Gruevski, edhe PDSH është partnere e qeverisë dhe mund të bashkëpunojë për formimin e një qeverie të re.

“Mendoj se për momentin nuk është zgjidhje që BDI-ja ta lëshojë qeverinë. Partia tjetër shqiptare PDSH, është gjithashtu partner i qeverisë. Është fakt se partitë parlamentare të shqiptarëve janë bashkëpunëtore me Gruevskin dhe shohim se si janë të lidhur me Sasho Mijallkovin. Prandajm nga partitë parlamentare shqiptare nuk mund të presim diçka që është në kundërshtim me qeverinë. Kështu që për momentin nuk është zgjidhje dalja e BDI-së nga qeveria, qw nuk do të thotë se në të ardhmen një prej zgjidhjeve të mundshme nuk do të jetë edhe ajo. E di që secili e mban dikë me diçka, në një mënyrë, me kërcënime ose të ngjashme, por nga ajo që e kam si informacion, e di që Ali Ahmeti nuk është i varur nga Gruevski dhe nuk frikësohet nga ai. Kështu që, edhe pse, edhe nga BDI kanë vepra kriminale, vepra jashtëligjore, të cilat do të publikohen, megjithatë ata janë reprezentw të etnisë të dytë më të madhe dhe sigurisht që kjo do t’iu ndikojë në të ardhmen. Ata mund të ndihmojnë me deklarata, me qëndrime, dalje në opinion etj,”, është shprehur Zaev.

Ditë më parë edhe analisti amerikan Daniel Serwer tha se nuk është moment i i duhur që BDI të dalë tani prej qeverie

“Me sa kuptoj unë, edhe nëse Ali Ahmeti do të largohej nga Qeveria, Gruevski përsëri do të kishte mundësinë që të krijojw një shumicë. Dhe, edhe nëse Gruevski bie, ai mund të dalw mirë në zgjedhjet e ardhshme. Atëherë, çfarë arrihet me daljen? Bile mund të rezultojë me hyrjen në Qeveri të një partie tjetër shqiptare. Pa marrë parasysh se sa nuk janë të lumtur me situatën politike, shumica e liderëve do të përpiqen që të përfitojnë, jo të humbasin”, ka thënë Serwer./Alsat-M/

ZIADIN SELA – ALIU TË IKË NGA QEVERIA

Liderët e pozitës dhe opozitës, Nikolla Gruevski dhe Zoran Zaev, përfaqësojnë vetëm interesat e maqedonasve, por jo edhe të shqiptarëve. Kjo u pa me rastin e vizitës së tyre të fundit në Bruksel, ku shqiptarët nuk ishin të përfaqësuar atje. Kështu ka deklaruar gjatë një interviste ekskluzive për gazetën “Zëri” kryetari i Komunës së Strugës, Ziadin Sela, njëherësh kryetar i Lëvizjes për reforma në PDSH.

Sipas Selës, Maqedonia aktualisht është në krizën e saj më të thellë politike në 24 vjetët e mëvetësisë së saj. Ai ka shtuar se partia shqiptare në Qeveri, BDI-ja, e cila udhëhiqet nga Ali Ahmeti, urgjentisht duhet të dalë nga koalicioni me partinë e kryeministrit Gruevski, VMRO-DPMNE, sepse, siç thotë ai, çdo moment që qëndron ajo në ekzekutiv e rrit rrezikun në përpjesëtim të drejtë për procesin e montuar politik të radhës që Qeveria do ta bënte, në mënyrë që të dalë nga skandali i përgjimeve.

KËRKOHET QË TË VRARËT NË KUMANOVË TË PËRCILLEN ME NDERIME USHTARAKE

Kosovarët e vrarë në Kumanovë kanë qenë veteranë të Ushtrisë Çlirimtare të Kosovës (UÇK) dhe Ligji obligon që secili veteran të përcillet me nderime ushtarake dhe që shpenzimet e varrimit të tyre të mbulohen nga buxheti i shtetit. Në Ministrinë e Forcës së Sigurisë (FSK) nuk kanë treguar nëse do të përmbushin këtë obligim.

Megjithëkëtë, varrimi nuk do të bëhet pa ceremoni e pa nderime. Shoqata e Veteranëve të Luftës së UÇK-së për rajonin e Dukagjinit është mobilizuar për të organizuar një ceremoni të përbashkët për të nëntë të vrarët, shkruan sot “Koha Ditore”.

Por kështu, ka në plan t’ia nisë FSK-së një kërkesë për nderime ushtarake gjatë varrimit. Dhe, nëse do të ketë përgjigje negative, vetë veteranët kanë në plan t’i nxjerrin nga sirtarët uniformat e UÇK-së dhe të ofrojnë nderimet.

“Ne do t’ia bëjmë një kërkesë ushtrisë sonë. Nëse nuk përgjigjet, ne i kemi veteranët që do t’i veshim me uniforma dhe pa nderime nuk do t’i përcjellim”, i ka thënë gazetës Avdyl Mushkolaj, kryetar i Shoqatës për rajonin e Dukagjinit. “Ata që u vranë në Kumanovë, janë veteranë, sepse kanë marrë pjesë në tri luftërat. Do të organizojmë ceremoni të përbashkët, në Prishtinë apo kudo, sepse kanë qenë shokë të një ideali dhe mendoj që duhet organizuar ceremoni e përbashkët” .

MONSTRA QË DUHET VRARË – Nga DRITAN HILA

Takimi i së dielës së fundit ndërmjet Edi Ramës, Ilir Metës dhe përfaqësuesve të partive politike të shqiptarëve të Maqedonisë, ishte skena e fundit që tregoi mungesën e përgatitjes së palës shqiptare përballë zhvillimeve në vendin fqinj dhe degjenerimit politik që ka arritur faktori shqiptar matanë kufirit. Nuk ndihmuan në riparimin e situatës së rënduar as njohjet e Metës me ngjarjet dhe personazhet e jetës së Maqedonisë, as këshilltarët e importuar nga ish-Jugosllavia të Ramës me analizat edhe më të vonuara se ato të shtypit, e as shërbimi i jashtëm që është larg konceptit të një shërbimi i cili do të ishte faktor në zhvillimet në Maqedoni. Ndërkohë, Ali Ahmeti dhe Menduh Thaçi janë dy gangsterë politikë. I kanë bërë të gjitha: luftën, trafiqet e njerëzve dhe drogave, eliminimin politik e fizik të kundërshtarëve, bashkëpunimin me të huajt, tradhtimin e bashkëpunëtorëve e të votuesve kur ua ka dashur interesi. Asnjëri prej tyre nuk impresionohet nga prezenca e Ramës apo Metës. Ajo që kanë frikë, është dosja e pisllëqeve të tyre mbi tavolinë, prezenca e një alternative politike që i eliminon politikisht, rreziku i një përplasjeje që i eliminon fizikisht. Dhe të gjitha këto realizohen nga bashkëpunimi ndërinstitucional i shërbimit inteligjent shqiptar, i cili me sa duket duhet shkrirë dhe ristrukturuar i gjithi; shërbimet e informacionit financiar, që te ne nuk ekziston; shërbimi i jashtëm, të cilit nuk i kanë lënë tagër dhe erz. Por, me sa duket, mbi tavolinë ishte vetëm pjata me koran. Por kjo ishte më e pakta. Pyetja që vlen, është se çfarë do të bëhet me shqiptarët e Maqedonisë?

Që shteti ynë nuk ka një platformë për shqiptarët e Maqedonisë, që çështja shqiptare ka kohë që ecën nga fryn era, që përballë fqinjëve tanë të organizuar në institucione dhe me platforma të qarta nacionale ne jemi orkestër që luan me vesh, nuk do mund të kuptohet. Por kjo nuk është më e keqja nëse fillon riformatimi. Kryesorja është të përcaktohet qëllimi. Dhe tashmë pas ngjarjeve të Kumanovës, nuk ka kuptim të flasësh për bashkëjetesë. Aq më shumë kur kjo bëhet me skemat e vjetra të “bashkim-vëllazërimit”. Nuk ka kuptim të humbasësh në qerthullin gazetaresk nëse komandoja shqiptare ishte një “flamur fals” i shërbimit sekret maqedonas, ishin mercenarë të thjeshtë apo idealistë. Ngjarja ishte e fundit në historinë e vrasjeve, shtypjes politike, shpërnguljes masive dhe diskriminimit njëqindvjeçar të shqiptarëve nga maqedonasit. Është humbje kohe të mundohesh të argjinosh një eksperiment unikal si Maqedonia, ndërkohë që pala shqiptare është si peshku pa ujë në atë hapësirë, ndërsa ajo maqedonase si peshkaqeni në akuarium, ku preja e ka të sigurt vdekjen. Nuk ka pasur rezultat teoria e gjoja nacionalistëve shqiptarë që “me shtimin e lartë të popullsisë shqiptare, një ditë do jenë ata që do mbizotërojnë etnikisht”. Ka kaluar çerek shekulli, dhe shqiptarët kanë mbetur po 30% e Maqedonisë, jetojnë në po ato lagje pa infrastrukturë dhe shërbime, janë po aq të shtypur politikisht dhe po humbasin përditë komuna e hapësira që dikur ishin pastërtisht shqiptare. Shteti maqedonas është kujdesur që çorganizimin shqiptar, kolaboracionizmin e elitave të tyre, ta përkthejë në një dominim të maqedonasve edhe aty ku janë pakicë.

Ndërkohë shteti shqiptar, ajo që rëndom quhet Shqipëri, përpara se të jetë një hapësirë territoriale, është menduar nga themeluesit si bërthamë e idesë së bashkimit. Askush prej tyre kur ngriti flamurin në Vlorë, nuk mendonte se do të qeverisnin në gjithë trojet që banoheshin nga shqiptarët në ato mote, ashtu siç e kanë menduar, se më mirë një Shqipëri e vogël që do të shërbente si bërthama koaguluese e Shqipërisë etnike të së ardhmes, se pa atë. Por pasardhësit e tyre ishin mendjengushtë dhe të dështuar në këtë synim. Sot, pas më shumë se një shekulli, duhen platforma të qarta. Dhe duke iu kthyer rastit konkret të Maqedonisë, së pari kërkon një “Road Map”, që fillon nga puna këmbëngulëse ndaj faktorëve ndërkombëtarë vendimmarrës që t’i bindësh se ndarja e Maqedonisë është garanci paqeje afatgjatë në Ballkan. Pastaj, puna diplomatike me fqinjët dhe gjetja e aleancave rajonale, puna bindëse me ta se nga kjo ndarje dhe riformatim nuk ka rreziqe; organizimi i faktorit shqiptar “in loco” që mos të bëhen kashtë e koqe si deri më sot; evidentimin e trojeve shqipfolëse, pasi harta demografike e ofruar nga maqedonasit ka fshirë hapësira të tëra shqiptare në pjesën jugperëndimore të Maqedonisë. Kush ka qenë në Strugë dhe biseduar me shqiptarët e atjeshëm, e di se aty është qyteti që sipas besimit të tyre ndahet Gegëria (në veri të vijës) me Toskërinë (në jug). E pra, faktori dhe hapësira toske nuk paraqitet fare në hartat maqedonase. Ndërkohë, duhet gjetja e interlokutorëve maqedonas që të jenë të gatshëm për zgjedhje të tillë. Ndaj rreshtimi i shqiptarëve në krah të Zaev apo Gruevskit, të “X”-it apo “Y”-it, ka kuptim për aq sa këta pranojnë ndarjen me bisedime të krijesës së dështuar të quajtur Maqedoni. Mandej duhet evidentimi si banorë të Maqedonisë dhe shqiptarëve që janë në emigracion, të cilët nuk janë në asnjë statistikë, përcaktimin e piketave të qarta se si do të trajtohen minoritetet respektive me ndarjen eventuale, statuset e qyteteve historike për dy popujt, pasuria e trashëguar, dhe shumë faktorë të tjerë.

Shtatëdhjetë e pesë vjet Jugosllavi dhe njëzet e pesë Maqedoni treguan se maqedonas e shqiptarë nuk jetojnë dot bashkë. Ndarja mund të kërkojë dekada, duke kaluar në forma tranzitive. Por, atë që Zoti e bëri të ndarë, robi nuk mund ta bëjë bashkë! Ndaj është më racionale dhe praktike të shkosh në hullinë e gjërave siç i ka bërë natyra sesa të përpiqesh t’i modifikosh ato. Pasi, të modifikosh gjërat, shpesh pjell monstra. Të cilat, sado të dashura të jenë për krijuesit, janë diçka që duhen vrarë. Nuk i shërbejnë askujt.

WALTER KOLBOW – GRUEVSKI PO NXIT KONFLIKTIN ETNIK PËR TA MBAJTUR PUSHTETIN

Ish-sekretari i shtetit në Ministrinë e Mbrojtjes të Gjermanisë, Walter Kolbow, ka deklaruar se gjendja në Maqedoni lehtë mund të shndërrohet në flakë gjithëpërfshirëse. Po ashtu, tha ky politikan gjerman, ka shenja se pas Ukrainës Rusia po synon të pozicionohet edhe në Maqedoni për të futur një pykë në aleancën perëndimore.

Ashpërsimi i betejës politike në Maqedoni mes pozitës dhe opozitës për shkak të skandaleve të shkaktuara nga qeveria e kryeministrit Nikola Gruevski ka ngjallur shqetësime serioze në mesin e politikanëve gjermanë mbi stabilitetin në Ballkan. Presidenti i shoqatës gjermano-maqedonase dhe ish-sekretar shteti në Ministrinë e Mbrojtjes, Walter Kolbow, ka paralajmëruar në një intervistë me gazetën «Saarbrücker Zeitung» se në Maqedoni ekziston rreziku i një ashpërsimi të dhunshëm të situatës. «Kjo lehtë mund të shndërrohet në flakë gjithëpërfshirëse», tha Kolbow. Ai shtoi se kryeministri Nikola Gruevski po përpiqet të mbajë pushtetin duke nxitur ballafaqimet etnike. Në pyetjen nëse kjo gjendje mund të çojë në një luftë te re në Ballkan, Kolbow tha se rreziku është i madh. «Ky është një fitil që nuk po digjet pa flakë, por po digjet tashmë».

Duke përshkruar përleshjen e armatosur mes forcave maqedonase të sigurisë me një grup sulmuesish shqiptarë në Kumanovë Kolbow tha se shumëçka flet për atë se ky ishte «një aksion i inskenuar nga qeveria kundër gjoja separatistëve shqiptarë, një përpjekje për të ndezur një luftë të vogël për të larguar vëmendjen nga korrupsioni në radhët e veta». Po ashtu, tha ky politikan gjerman, ka shenja se pas Ukrainës Rusia po synon të pozicionohet edhe në Maqedoni për të futur një pykë në aleancën perëndimore. Politika ndërkombëtare duhet të përpiqet të arrijë një zgjidhje. Dorëheqja e Gruevskit dhe zgjedhjet e reja mund të ishin rrugëdalje, tha Kolbow.

LAVROV – PROTESTAT NË MAQEDONI TË ORKESTRUARA NGA JASHTË

VOAL – MOSKË – Ministri i jashtëm rus, Sergei Lavrov, ka thënë sot se kriza në Maqedoni është orkestruar nga jashtë.

“Kjo vërtetë na alarmon neve”, tha Lavrov dhe ka shtuar se “zhvillimet në Maqedoni janë qartas të kontrolluara nga jashtë”.

Mëtutje, në fjalimin e tij në Këshillin e Federatës, që është Dhoma e Epërme e Parlamentit të Rusisë, zoti Lavrov ka theksuar se zhvillimet janë të lidhura me refuzimin e kryeministrit të Maqedonisë, Nikolla Gruevski, që tu bashkohet sanksioneve kundër Rusisë për shkak të konfliktit në Ukrainë.

Në Shkup të Maqedonisë, afro 150 mbështetës të opozitës, që ende qëndrojnë në një kamp të ngritur afër kryeministrisë, kërkojnë që Gruevski të paraqes dorëheqje, derisa Gruevski dhe lideri i opozitës Zoran Zaev, kanë zhvilluar negociata në Strasburg në përpjekje për zbutjen e krizës.

Dhjetëra mijëra demonstrues kanë marrë pjesë në protestën kundër qeverisë më 17 maj në Shkup, ndërsa një ditë më vonë është mbajtur, po ashtu, një tubim masiv në mbështetje të Gruevskit.

Protestat kundër qeverisë u bënë pas zbulimit të incizimeve telefonike, në të cilat duket se dëgjohen ministrat e Maqedonisë duke përgatitur mashtrim në zgjedhje.

SHQIPËRIA DHE GJERMANIA – THIRRJE PËR TRANSPARENCË PËR KUMANOVËN

VOAL – BERLIN – Ministrat e Jashtëm të Gjermanisë dhe Shqipërisë bënë sot thirrje në Berlin për më shumë transparencë lidhur me rastin e konfliktit të armatosur në Kumanovë, ku humbën jetën 18 vetë, 8 policë dhe 10 persona të armatosur.

“Episodi i para dhjetë ditëve alarmoi Evropën, por po ashtu na bëri më të vëmendshëm. Shpresoj që ajo që pamë nuk është fillimi i një acarimi, por që autoritetet do të bëjnë të gjitha përpjekjet për të na sqaruar se çfarë ndodhi. Së dyti, shpresoj që do të marrin gjithë masat që episode të tilla të mos përsëriten më”, tha zoti Shtajnmajer.

Ministri i jashtëm i Shqipërisë, Ditmir Bushati u shpreh se është në interes të Maqedonisë të respektojë sa më mirë marrëveshjen e Ohrit.

“Gjykuar nga pikëpamja apo konteksti i kompozimit etnik dhe social që ka Maqedonia, i cili është disi unik për rajonin e Ballkanit Perëndimor, mendojmë që është në radhë të pare në interesin e Maqedonisë për të bërë një transparence më të plotë sic e tha edhe ministri Shtajnmajer në lidhje me zhvillimet në Kumanovë në mënyrë që kriza aktuale të ndalohet dhe të mos përshkallëzohet dhe rruga apo busulla orientuese e Maqedonisë si gjithë vendet e tjera të rajonit të vazhdojë të mbetet integrimi euroatlantik dhe integrimi euroatlantik që besojmë të gjithë bazohet në respektin për sundimin e të drejtës, në respektin për një marrëdhënie ndëretnike, harmonike siç parashikonte Marrëveshja e Ohrit dhe për një kohezion më të mire politik dhe social”, tha zoti Bushati. za

Dhjetë orë bisedime – pa ndonjë rezultat

Kryeministri i Maqedonisë Nikola Gruevksi dhe shefi i opozitës Zoran Zaev biseduan deri në mëngjesin e mërkurës në Strasburg, por ende nuk dihen hollësi të bisedimeve

VOAL – STRASBURG – Takimi midis dy drejtuesve politikë maqedonas në Strasburg ka zgjatur për dhjetë orë, në përpjekje të zgjidhjes së krizës politike në Maqedoni.

Takimi i ndihmuar nga deputetët e Parlamentit Evropian Ivo Vajgel, Eduard Kukan dhe Richard Houit, ka zgjatur deri pas orës tre të mëngjesit të së mërkurës, siç njofton media maqedonase nga Strasburgu, ndërsa nuk ka shumë hollësi për rezultatet e mundshme të tij.

Përfaqësuesit politikë, Nikolla Gruevski, kryeministër dhe kryetar i partisë VMRO-DPMNE dhe Zoran Zaev, kryetar i Lidhjes Social Demokrate kanë njoftuar, secili veç e veç, lehtësuesit evropianë të takimit, përfshirë edhe komisionarin për fqinjësi dhe negocim të zgjerimit të Bashkimit Evropian Johanes Hahn, me gjendjen e krijuar në Maqedoni pas skandalit të përgjimeve.

Lehtësuesit evropianë, pas takimit, kanë përshëndetur me anë të një komunikate, “përpjekjet e drejtuesve të partive për arritjen e një marrëveshjeje në pajtim me standardet evropiane, e cila do të zgjidhte sfidat që dalin nga kriza. Partitë e konfirmuan përcaktimin e tyre për integrim në Bashkimin Evropian dhe për parimet demokratike dhe ranë dakord që në rend të parë duhet t’i vendosin interesat e vendit”, thuhet në komunikatë.

Në këtë kuadër, sot Parlamenti Evropian do të debatojë mbi gjendjen në Maqedoni, por nuk pritet të dalë me ndonjë përfundim.

Ndërkohë, Sekretari i Përgjithshëm i Këshillit të Evropës Thorbjorn Jagland ka bërë thirrje të martën për një hetim të paanshëm dhe të besueshëm lidhur me akuzat e ngritura nga opozita maqedonase për përgjimin e paligjshëm të njëzet mijë njerëzve.

Në një konferencë të përbashkët shtypi edhe Sekretari i Përgjithshëm i OSBE-së Roberto Zannier ka shprehur shqetësim për “rritjen e polarizimeve ndërmjet aktorëve të ndryshëm politikë në Maqedoni”, ndërkohë që ka bërë thirrje për një angazhim të hapur politik.

Dy rivalët politikë kanë qëndrime tejet të kundërta për sa i përket zgjidhjes së krizës politike, që po zgjatë prej disa muajsh.

Zoran Zaev i opozitës ngulë këmbë për dorëheqjen e kryeministrit Gruevski dhe të qeverisë së tij, për t’i hapur rrugë një qeverie të përkohshme që do ta çonte vendin drejt zgjedhjeve të parakohshme.

Ndërkohë, zoti Gruevski në këtë fazë, e ka kundërshtuar propozimin, duke thënë se gëzon mbështetjen dhe vullnetin e popullit dhe të votuesve.

Pas një jave, bisedimet do të vazhdojnë në Shkup, me përfshirjen edhe të dy përfaqësuesve politikë shqiptarë, Ali Ahmeti dhe Menduh Thaçi.

Qeveria e vendit të vogël ballkanik pas përballjes me skandalin e përgjimeve, përjetoi edhe një konflikt të armatosur në Kumanovë mes policisë dhe disa shqiptarëve të armatosur, ku sipas autoriteteve humbën jetën 18 njerëz. za

Faqja 26 prej 30« Fillimi ‹ Prapa 22 23 24 252627 28 29 30 Para ›Fundi »

Beg Rizaj, që u vra në luftimet e fundit në Kumanovë të Maqedonisë, do të varroset të dielën në Kompleksin Memorial në Gllogjan të Deçanit.

OVL-UÇK dhe disa nga familjet e kosovarëve të vrarë në Kumanovë janë pajtuar dhe kërkojnë që trupat e 9 të vrarëve në Lagjen e Trimave të varrosen në Varrezat e Dëshmorëve në Prishtinë. Megjithatë ende nuk dihet nëse do të ndodh diçka e tillë.

Lideri i PDSH’së, Menduh Thaçi ka thënë se ka qenë në dijeni për konfliktin në Kumanovë. Ai ka thënë se ka qenë i informuar shumë më parë për këtë situatë. Thaçi tregon se ka pasur takime edhe me njerëzit që kanë marr pjesë në këtë konflikt.

Kjo fotografi është e fundit që shihen bashkë 6 nga nëntë kosovarët e vrarë në Kumanovë.

Arrestimi i grupit të armatosur në Kumanovë ka shtuar zërat për shkelje ligjore, dyshime për torturë dhe veprime tjera antiligjore.

Kryeministri i Maqedonisë Nikola Gruevksi dhe shefi i opozitës Zoran Zaev biseduan deri në mëngjesin e mërkurës në Strasburg, por ende nuk dihen hollësi të bisedimeve

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL