VOAL

Maqedoni

Tetova në ditë zie – pas stuhisë vdekjeprurëse

Në Tetovë sot është ditë zie në nderim të viktimave të vërshimeve vdekjeprurëse që goditën të hënën territorin e kësaj komune.

Ekipet e shpëtimit vazhdojnë përpekjet për gjetjen e një vajze të zhdukur, ndërkohë që raportohet edhe për një person tjetër që po ashtu konsiderohet i zhdukur, ditën e përmbytjeve që goditën zonën si pasojë e reshjeve të rrëmbyeshme dhe stuhisë shkatërruese.

Nga shtabet e krizave të formuara në çdo fshat thonë se po bëjnë përpjekje për të normalizuar gjendjen, por ato po hasin në vështirësi të shumta për shkak të mbetjeve të mëdha të dheut dhe gurëve nëpër rrugë dhe depërtimit të tyre nëpër shtëpitë e banimit.

“Kemi dëme që nuk mund të përshkruhen, janë dëme në njerëz, katër persona e kanë humbur jetën, kurse një ende nuk e kemi gjetur, jemi në kërkim e sipër. Kemi të lënduar rreth 20 persona, kurse sa i përket emocioneve nuk mund t’i përshkruaj, gjendja vazhdon të jetë kaotike“, thotë Nijazi Kadriu nga Shtabi i krizës në Shipkovicë të Tetovës.

Reshjet shkatërruese në Tetovë

Banorët, ndërkohë shprehen të pakënaqur nga ndërhyrja e institucioneve, që, sipas tyre, edhe kësaj here kanë dështuar në menaxhimin e situatës gjatë fatkeqësisë natyrore.

“Ne kërkojmë ndihmën e institucioneve dhe ato duhet të na ndihmojnë pasi ne nuk jemi fajtorë për këtë që ka ndodhur. Çfarë të bëjmë? Ne nuk mundemi me duar të largojmë gjithë këtë baltë dhe gurët që ka sjellë era dhe shiu i rrëmbyeshëm“, thotë një banore e Tetovës, ndërsa një tjetër thekson se disa herë kanë alarmuar komunën për nevojën e ndërhyrjes në pastrimin e shtratit të lumit, nga i cili edhe kanë ardhur dëmet më të mëdha.

“Disa herë ua kemi kemi kërkuar nga komuna që të pastrojë shtratin e lumit por kërkesat tona kanë hasur në vesh të shurdhër. Përveç që shtrati nuk është pastruar, edhe shumë pjesë pranë lumit janë uzurpuar me ndërtime pa leje, që tani kanë vështirësuar edhe më shumë gjendjen e përmbytjeve“, thotë Goran Ilievski, banor e Tetovës.

Ekspertët thonë se institucionet duhet të ndërmarrin masa urgjente për të ndërhyrë në pikat që vlerësohen kritike për të parandaluar përmbytjet e përmasava shkatërruese, siç ndodhi tani me reshjet e shiut.

“Institucionet duhet ti shfrytëzojnë kapacitetet më shkencore të fakulteteve të ndërtimtarisë të Universiteteve të Shkupit dhe Tetovës që t’i përcaktojnë jo dëmet, por objektet që duhet t’i nënshtrohen një rikonstruksioni të mirëfilltë dhe të mirëmbahen për të përballuar fatkeqësi të tilla natyrore. Në veçanti nevojitet rikonstruimi i digave pranë lumit Shkumbin dhe te lumi i Porojit, që në rast të përsëritjes së vërshimeve, të jenë të gatshme të përballojnë rrjedhat e ujit, apo fuqinë natyrore“, thotë Shefki Aliti, inxhinier i ndërtimtarisë.

Nga komuna e Tetovës thonë se kanë ndërmarrë të gjitha masat në ndihmë të popullatës ndërsa në ndihmë i kanë ardhur edhe komunat tjera .

“Qëllimi parësor ka qenë që rrugët të hapen me qëllim të lëvizjes së lirë dhe emergjencat e ndryshme që mund të kishte nevojë popullata të trajtohen. Dëmtimet më të mëdha në njerëz dhe dëme tjera materiale janë në rajonin e Shikpovicës, prandaj edhe është e rëndësishme prania jonë në këtë zonë me ndihma të mëtejme“, ka deklaruar kryetarja e komunës, Teuta Arifi, duke njoftuar edhe vendimin e komunës që familjeve të prekura nga vërshimet t’u ndahen nga një mijë euro ndihmë.

Edhe qeveria në një mbledhje të jashtëzakonshme vendosi si ndihmë të parë, nga rreth 30 mijë denarë për familjet e prekura, ndërkohë që banorëve që pësuan nga përmbytjet t’iu shpërndahen ushqime, ujë dhe ilaçe.

Në ndihmë të popullatës ka dalë edhe Kryqi i Kuq, ndërsa operatorët telefonikë kanë hapur linja të posaçme telefonike për donacione.

Maqedoni: Dita e Ilindenit, sërish anashkalohen shqiptarët

Republika e Maqedonisë të dielën, më 2 gusht, shënoi 112-vjetorin e Kryengritjes së Ilindenit dhe 71-vjetorin e Mbledhjes së parë të Kuvendit antifashist të çlirimit popullor të Maqedonisë, ku u konfirmua pozita shoqëroro-juridike e Maqedonisë si shtet i barabartë federal në korniza të Federatës së ish-Jugosllavisë.

Në shënimin e dy festave tërëndësishme për pavarësinë e Maqedonisë, ku rol të veçantë kanë luajtur dhe qytetarët shqiptarët, nuk ishte i pranishëm asnjë përfaqësues shqiptar, qoftë nga politika apo nga jeta shoqërore.

Në fjalimet e tyre në Krushevë, Shkup dhe Prohorpcinki të Kumanovës, presidenti i Maqedonisë, Gjorgje Ivanov, kryeministri Nikolla Gruevski dhe kryetari i Parlamentit të Maqedonisë, Trajko Veljanovski, kryesisht u fokusuan në luftën e vazhdueshme për ruajtjen e identitetit maqedonas, duke e hedhur fajin për bllokimin e proceseve integruese vetëm te pala greke.

Kryeministri Gruevski në fjalimin e tij festiv u fokusua në zhvillimin ekonomik, rëndësinë e përforcimit të kapaciteteve shtetërore për luftën ndaj terrorizmit, madje dhe valën e emigrantëve nga lindja e afërt, por pa ipërmendur qoftë dhe me një fjalë të vetme të drejtat e shqiptarëve.

“Bllokimi nga ana e Greqisë tashmë shtatë vjet të plota, na kushton me mosanëtarësimin në NATO dhe lirisht mund të them dhe bllokimin e vendit për t`u anëtarësuar edhe në BE, sepse sikur të mos ishte bllokimi që i përket fillimit të bisedimeve për anëtarësim në BE gjatë vit 2009, Maqedonia si shtet tani do të ishte pjesë e familjes evropiane. Dëshirojmë që fqinji ynë sa më parë t’i tejkalojë sfidat ekonomike dhe të fokusohet në problemin tonë bilateral dhe bllokimin që bën ndaj nesh”, deklaroi Gruevski, para përmendores së Metodija Andonov Cento në Shkup.

Gruevski tha se terrorizmi po troket në prag të derës në Maqedoni duke folur për aksionin policor në Kumanovë.

“Patjetër t’i forcojmë kapacitetet tona në ballafaqimin me to dhe t’i menaxhojmë. Ngjarjet e paradokohshme në Kumanovë dhe hedhjet e kohëpaskohshme të bombave, ose granatave, janë vetëm një alarm se ky lloj kërcënimi nuk është diku larg nesh, në Francë, Belgjikë, Norvegji, Amerikë, në Irak ose Siri. Ata mund të vijnë edhe në rrugët tona, para hyrjes ose shtëpisë sonë dhe ta rrezikojnë jetën tonë dhe të afërmit tanë”, theksoi Gruevski.

Njohësit e çështjeve ndërkombëtare konsiderojnë se për aq kohë sa Maqedonia nuk arrin të bëjë hapa drejt integrimit të vendit në strukturat euroatlantike, autoritetet shtetërore shërbehen me retorikë nacionaliste, ndjellje të frikës dhe adresimin e fajit te të gjithë, pos vetes, duke dëmtuar, siç thonë ata, interesat shtetërore.

“Sforcimi i nacionalizmit, si dhe ai patriotizmi luftarak duke i thënë JO çfarëdo lloj zgjidhjeje që ka të bëjë me kontestin me Greqinë, e që nënkuptojnë ndryshimin e emrit, tani e tutje do të jetë gjithnjë e më i pranishëm në fjalimet e kryeministrit Gruevski,si dhe të të gjithë zyrtarëve të lartë të partisë së tij”.

“Kjo sepse fitorja e tij, gjithmonë është garantuar përmes kartës nacionaliste, përkushtimit të tij për ruajtjen e emrit kushtetues të shtetit dhe identitetit, edhe pse më duhet të theksoj se këto dy çështje jo rrallë herë i ngatërrojnë. Sido që të jetë gjatë kësaj periudhe deri në mbajtjen e zgjedhjeve pres që të sforcohet edhe më shumë nacionalizmi në radhët e VMRO DPMNE-së”, konsideron Nano Ruxhin, ish-ambasador i Maqedonisë në NATO.

Ndërsa për Ismet Ramadanin, kryetar i Këshillit Euroatlantik në Maqedoni, ajo që rrënon raportet ndëretnike dhe funksionimin e shtetit mbi parime demokratike është anashkalimi i shqiptarëve në shënimin e një feste kaq të rëndësishme për Maqedoninë si shtet. Kjo bëhet edhe më e theksuar kur faktet historike dëshmojnë se shumë figura të ndritura shqiptare kanë kontribuar në pavarësinë e Maqedonisë dhe më pas ngritjen e institucioneve shtetërore.

“Kjo që po ndodh gjatë shënimit të festës së Ilindenit, në fakt pasqyron gjendjen reale kur bëhet fjalë për shqiptarët, pra injorim i tërësishëm nga ana e institucioneve të shtetit. Mund të konstatojmë se sot këto dy festa shqiptarët pothuajse nuk i ndjejnë aspak si festat e tyre, për faktin se statusi juridik i tyre, nuk është i barabartë me atë të maqedonasve dhe një injorim dhe poshtërim që po e bën qeveria e kryeministrit Nikolla Gruevski vetëm se po e verifikon këtë”, thekson Ramadani.

Pezullohet gjyqi për rastin e Kumanovës – Prokuroria nuk i ka dorëzuar provat

Procesi dëgjimor në rastin e nëntë personave të akuzuar për rastin e Kumanovës në Maqedoni, i cili filloi të martën, u pezullua pezullua, thotë avokati Naser Raufi, i cili përfaqëson të pandehurit në këtë rast.

Më 9 dhe 10 maj, autoritetet e rendit në Maqedoni ndërmorrën një aksion policor në Kumanovë. Përleshja e armatosur la 18 të vrarë, 8 policë dhe 10 pjesëtarë të grupit të armatosur.

Sipas tij, pezullimi pason shkeljen e ligjit për Procedurë Penale…

“Po ende nuk kemi përgjigje nga Prokuroria, konkretisht për thyerjen e nenit 206, pika 5, e ligjit për Procedurë Penale, me atë që të akuzuarve nuk u prezantohen provat që posedon prokuroria, e që është parakusht për marrjen e deklaratave nga të akuzuarit”.

“Sipas këtij neni, para se të merren deklarata nga të akuzuarit, Prokuroria e ka të patjetërsueshme të prezantojë të gjitha provat që i posedon.
Kemi reaguar te Këshilli i Prokurorëve, kryeshefi i Prokurorisë së krimit të organizuar, te Prokurori Publik, te të gjitha institucionet kompetente për këtë çështje; njëherësh e kemi njoftuar dhe misionin e OSBE-së në Shkup”, thekson avokati Raufi.

Ai thekson se procesi dëgjimor do të bllokohet edhe për të akuzuarit të cilët mbahen në burgun e Prilepit dhe atë të Manastirit, proces ky i cili pritet të realizohet gjatë javës së ardhshme.

“Sa jam i informuar unë, nuk është bërë as obduksioni i policëve të vrarë në aksionin policor dhe ndoshta kjo është arsyeja pse nuk na prezantohen provat neve, po sido që të jetë, ne do të insistojmë në prezantimin e tyre”, thotë zoti Raufi.

Ndërkohë, Prokuroria në Maqedoni, përmes një reagimi me shkrim dërguar Radios Evropa e Lirë, shkurtimisht ka theksuar se seancë dëgjimore është realizuar bazuar në një nen tjetër, atë 302, pika 2, e ligjit për Procedurë Penale, në bazë të të cilit “prokuroria mund t`i marë në pyetje të akuzuarit nëse këtë se ka bërë parapakisht”.

Por, avokatët mbrojtës thonë se neni 302 vlen pasi te ketë përfunduar faza e hetuesisë, kurse tani procesi ende është në fazë të hetuesisë.

Avokati Raufi njëhërësh thotë se dëshmitë që posedojnë klientët e tij paraqesin prova të pakontestueshme se ngjarjet e 9 dhe 10 majit ishin, siç thotë ai, “të inskenuara”…

“Në këtë periudhë të procedimit të lëndës nuk dua të flas, përkatësisht nuk dua t’i komentoj dëshmitë, të cilat i kemi ne si palë mbrojtëse, përkatësisht që i disponojnë klientët e mi. Megjithëse në bazë të asaj që posedoj mendoj se shërbimet sekrete, edhe atë jo një por më shumë shërbime sekrete janë të involvuara në këtë rast . Pra ky skenar nuk është i inskenuar nga ana e të akuzuarve, por nga ana e shërbimeve sekrete, dhe të akuzuarit janë viktimë e këtyre shërbimeve sekrete”, thotë zoti Raufi.

Njohësit e çështjeve juridike dhe shumë organizatat joqeveritare kishin theksuar se vetëm një hetim ndërkombëtar mund të shmang dilemat rreth këtij rasti dhe do të mund të garantojë një proces gjyqësorë të drejtë dhe njëkohësisht të besueshëm.

Por, ministri i punëve të brendshme i Maqedonisë Mitko Çavkov gjatë këtij muaji tha se një kërkesë e tillë nuk është dorëzuar asnjëherë në adresë të autoriteteve të Maqedonisë.

Zoran Zaev – Përgjimet për rastin Monstra ia dorëzoj prokurorit special

Zaev, për mediat maqedonase, ka deklaruar se edhe përkundër marrëveshjes politike, e vërteta për rastin “Mostra” do të shpaloset.

“Askush nuk ka të drejtë të fshehë të vërtetën, edhe e vërteta për këtë rast, si edhe të vërtetat tjera që kemi paralajmëruar, do të arrijnë deri te opinioni publik”, ka pohuar Zaev, raporton Tch.

Kreu i opozitës ka paralajmëruar se prokurorit special do t’i dorëzohen të gjitha materialet nga përgjimet.

“Prokurori special do të ketë legjitimitetin e plotë për të vepruar. Ashtu që përmes këtij institucioni të pavarur do të dihet e vërteta”, ka deklaruar Zaev.

Kryetari i partisë opozitare maqedonase LSDM, Zoran Zaev kishte paralajmëruar se do t’i publikojë edhe bisedat e përgjuara telefonike që kanë të bëjnë me rastin “Monstra”.

Por, ai nuk e bëri këtë gjë dhe me marrëveshjen e fundit politike për daljen e Maqedonisë nga kriza, është vendosur që të ndërpritet publikimi i mëtejmë i këtyre përgjimeve.

Mospublikimi i “bombës” më të përfolur për rastin “Monstra”, ka nxitur shumë debate dhe ka irrituar shqiptarët e Maqedonisë. Nuk kanë munguar as vlerësimet e opinionistëve shqiptarë se Zaev ka manipuluar me ndjenjat e shqiptarëve dhe se rastin “Monstra” e ka përdorur për t’i bërë shantazhe koalicionit qeverisës DPMNE-BDI.

Polici që luftoi më 9 maj: Për Kumanovën fajtore është Jankullovska

SHKUP – Dy muaj e gjysmë pas aksionit policor në Lagjen e Trimave në Kumanovë, vazhdojnë dilemat dhe pyetjet e shumta për atë që ndodhi në të vërtet më 9 maj. Këto dilema tanimë kanë filluar t’i ndajnë me opinionin edhe pjesëtarë të Policisë të cilët kanë qenë pjesë e këtij aksionit. Duke mos zbuluar identitetin e tij, një pjesëtar i njësitit special ‘Tigrat’, përmes një letre ka bërë të ditur se ish-ministren e brendshme, Gordana Jankullovska, në mënyrë brutale e kanë larguar nga Spitali gjatë vizitës që ajo i kishte bërë pjesëtarëve të plagosur të Policisë dhe se pikërisht atë e konsiderojnë fajtore për bilancin e viktimave në Kumanovë.

“Pas çdo aksioni kemi bërë analizë çfarë ka ndodhur, por pas këtij në Kumanovë komandanti ynë Sllavço Petrushevski po hesht. Gojë ka, gjuhë nuk ka! Po presim diçka, nuk e dimë çka po presim. Para çdo aksioni përgatisnim plan, ndërsa para këtij në Kumanovë nuk kishte plan. Vetëm na mblodhën dhe na futën në aksion. Veçanërisht dhemb fakti se Jankullovska dokumentin e fundit që e ka firmosur si ministre, trajtohet si sekret shtetëror dhe ka të bëjë me shpërblimin e personave të njohur e panjohur në këtë aksion. Sekret është ky dokument, që mos të shihet çfarë fundërrinash janë shpërblyer me nga 10 mijë euro. Përveç këtij dokumenti, neve pjesëtarëve të forcave speciale ‘Tigrat’ na intereson edhe një dokument tjetër: Urdhri për aksionin në Kumanovë. Kush e ka firmosur dhe çka ka parashikuar në analizën e rrezikut!? Çfarë ka parashikuar e çfarë ka ndodhur? Për këtë duhet të përgjigjet para nesh dhe para opinionit. Tetë familje presin përgjigje. Bilanci tetë të vrarë, 37 të plagosur, pesë invalidë të përjetshëm. Edhe dy aksione të këtilla në regji të këtyre diletantëve dhe Maqedonia nuk do të ketë forca speciale”, shkruan pjesëtari i tigrave në letrën e tij anonime.

Aksioni në Kumanovë vazhdon të mbetet pezull: kush e organizoi dhe kush në të vërtet qëndron pas gjithë kësaj që ndodhi. Të premten për herë të parë rreth aksionit u prononcua edhe prokuroria publike e cila bëri të ditur se me asistencë ndërkombëtare, pas me shumë se dy muaj ka grumbulluar dëshmitë për rastin e konfliktit të Kumanovës që ndodhi më 9 dhe 10 maj në Lagjen e Trimave.

Sipas informatave jozyrtare, nuk përjashtohet mundësia që Prokuroria të nisë edhe padi për persona konkretë, që do të konsideroheshin përgjegjës për mos parandalimin e asaj që ndodhi në Kumanovë. Atë që deri tani e di opinioni i gjerë është se persona të Agjencisë së Inteligjencës kanë qenë në kontakt permanent me udhëheqësit e grupit të Kumanovës, por enigmë mbetet roli i tyre konkret në këtë rast.

Publikisht, të vetmit që nuk duan hetim të pavarur ndërkombëtar për Kumanovën janë ministri aktual i Punëve të Brendshme Mitko Çavkov, i cili më 9 dhe 10 maj ka komanduar aksionin në Kumanovë, dhe shefi i tij Nikolla Gruevski. Në konfliktin e Kumanovës humbën jetën tetë policë dhe dhjetë pjesëtarë të grupit të armatosur, ndërsa mbetën të plagosur dhjetëra të tjerë. 30 prej grupit të armatosur u dorëzuan, ndërsa janë ngritur padi ndaj 33 personave.

Xhelal Neziri: Ali Ahmeti është përgjegjës për vrasjet në Maqedoni

SHKUP – Dy vrasjet e fundit në Maqedoni të zyrtarëve të Bashkimit Demokratik për Integrim, ajo e pretendentit për kryetar dege në Kumanovë, Xhemail Rexhepi – Komandant Shqiponjës, me 23 korrik, dhe vrasja e Artan Musliut, zyrtar i BDI-së në Strugë, ka rikthyer problemet e kahmotshme ndërshqiptare e ndërpartiake në Maqedoni.

Siç u bë e ditur, të dyja vrasjet erdhën pas konflikteve brendapartiake në BDI.
Për analistin dhe njohësin e rrethanave politike në Maqedoni, Xhelal Nezirin, faji kryekëput i shkon një njeriu.
“Përgjegjës për këtë situatë është lideri partiak, Ali Ahmeti, që ushqeu politikën e fraksionizimit horizontal të BDI-së, me qëllim që të ketë kontroll mbi strukturën e subjektit që drejton”, tha Neziri në prononcimin e tij për Klan Kosovën.

Neziri vrasjen e zyrtarëve të BDI-së e cilëson si një pavetëdije politike dhe mendësi klienteliste, e cila gjithçka e nënkupton si interes vetjak dhe grupimin politik e sheh si mundësi për përfitime të ngushta.

“Vrasjet janë rezultat i mungesës së kapacitetit të BDI-së për të zhvilluar një proces normal të demokratizimit dhe reformimit të brendshëm”.
“Zgjedhjet brendapartiake kanë shkaktuar nervozë dhe frustracione te themeltarët e partisë, të cilët kërkojnë që subjektin që e formuan pas një konflikti të armatosur, ta kthejnë prapa nga kontrolli i një fraksioni që politikën dhe pushtetin e shohin vetëm nga prizmi i biznesit”.

Strugë, vritet zëvendësdrejtori i të Ardhurave Publike Argëtim Hasani

SHKUP – Zëvendësdrejtori i të Ardhurave Publike Argëtim Hasani humbi jetën si pasojë e plagëve të marra me armë zjarri nga një makinë në lëvizje në afërsi të hotelit “Drim” në Strugë, raporton Anadolu Agency (AA).

Incidenti është konfirmuar edhe nga zëdhënësi i Sektorit për Punë të Brendshme të Ohrit, Stefan Dimovski. “Reth orës 13:20 në rrugën ‘Marks-Engels’ në Strugë është qëlluar mbi një banor të Strugës i lindur në vitin 1973. Ai është qëlluar nga një makinë në lëvizje të markës Golf. Policia nën udhëheqjen e Prokurorit publik kryen hetimet në vendin e ngjarjes dhe janë duke u ndërmarë të gjitha masat për gjetjen e automjetit. Policia e qytetit të Strugës është duke zhvilluar hetime të gjera për të gjetur autorët e krimit”, deklaroi Dimovski për AA.

Kujtojmë se para dy ditëve në lagjen Bedinjë të Kumanovës u vra Xhemail Rexhepi i njohur si komandant Shqiponja, si dhe u plagosën dy persona të tjerë. Ministria e Punëve të Brendshme për rastin në fjalë njoftoi se dy të dyshuar janë dorëzuar policisë dhe se rasti po procedohet.

Incident ndërpartiak – vritet një tjetër zyrtar i BDI-së

STRUGË – Në një incident tjetër të armatosur, sot u vra një zyrtar tjetër i BDI-së, Artan Musliu, mbi të cilin është qëlluar me 5 plumba. Sipas mediave maqedonase, vrasja ka ndodhur në kontekstin e një incidenti ndërpartiak.

Artan Musliu konsiderohet njeri i afërt i zëvendëskryeministrit Musa Xhaferi. Policia ka filluar hetimet për ngjarjen, por ende nuk është dhënë ndonjë pistë zyrtare nga ana e saj.

PSE NDODHI VRASJA NË BDI-në E KUMANOVËS

Incidenti i përgjakshëm në Kumanovë lidhet me Bashkimin Demokratik për Integrim.

Zgjedhja në degën e kësaj partie çuan në këtë incident të përgjakshëm, që përfundoi me vrasjen e Xhemail Rexhepit të njohur si komandant Shqiponja, dhe plagosjen e dy të tjerëve.

Tensionet dhe zënkat në këtë parti kanë nisur vite me radhë. Dega e kësaj partie ishte mollë sherri dhe se gjithmonë ajo është shoqëruar me tensione, grupe të caktuara dhe klane partiake.

Pakënaqësitë e krijuara me ish-strukturën e degës për çështje dhe vendime të ndryshme partiake për punësime, emërime, dhe pakënaqësi për anashkalimin dhe mosrealizimin e projekteve për Kumanovën, nxorri në sipërfaqe një grup të ish-ushtarëve të pakënaqur të ish UÇK-së, të cilët u udhëhoqën nga Xhemail Rexhepi.

Ata kishin pakënaqësi ndaj degës e cila në kundërshtim me gjitha vendimet dhe statutin partiak, udhëhiqej nga ushtrues detyre, Ulusi Beqiri.

Ky grup doli me propozim në një periudhë kur ishin organizuar zgjedhjet nëpër degët e BDI-së, përfshirë edhe Kumanovën.

Më 12 shtator 2014, Xhemail Rexhepi u nominua si kandidat i vetëm nga forume partiake në Kumanovë për kryetar të degës. Në këtë mbledhje kanë qenë edhe strukturat e tjera të degës.

Por, edhe përkundër këtij nominimi si kandidat të vetëm, nga kreu i BDI-së nuk ka pasur asnjë reagim apo miratim, dhe se ka vazhduar zvarritja dhe anashkalimi i procedurave.

Acarimi i situatës pasoi edhe me një incident midis përkrahësve të Xhemail Rexhepit dhe ish-udhëheqësve të degës.

Janar 2015/Rexhepi: Pse po vonohen zgjedhjet në Kumanovë

Në fillim të janarit të 2015, kandidati i vetëm për kryetar të Degës së BDI-së në Kumanovë, Xhemail Rexhepi përmes një konference me mediat kishte pyetur se pse vonohen zgjedhjet brenda partiake. Rexhepi shtoi se faji për ngecjen e proceseve në Kumanovë, e ka struktura e vjetër e degës.

“Struktura e vjetër, vetëm ikin qosheve. Ikin qosheve, i bëjnë listat, marrin emrat e njerëzve që duhet punësuar, ata emra nuk shkojnë dhe punësohet emra të tjerë. Nuk e di cila është arsyeja e kësaj, qytetarët kërkojnë sqarim, ndërsa ne nuk dimë çfarë t’i themi. Komandant Shqiponja, për çështjen e Kumanovës, për asnjë çast dhe asnjë milimetër nuk ka kthim mbrapa. Këtë le ta din të gjithë”, kishte deklaruar Xhemail Rexhepi.

Edhe mbështetësit e Rexhepit shprehin shqetësimin e tyre për përfaqësimin e dobët dhe injorimin e kësaj dege.

“Të vetëdijshëm për vështirësitë në periudhën e kaluar, anashkalimin e familjeve të dëshmorëve, invalidëve të luftës dhe ish ushtarëve të UCK-së, nga strukturat maqedonase por edhe nga mos serioziteti i disa funksionarëve nga njësia numër 2, është interes i përgjithshëm kombëtar por edhe i BDI-së që procesi të përcillet me reforma dhe rritje të kualitetit dhe përfaqësimit.Fakti që jemi në muajin e 4 të zgjedhjeve, pa u respektuar datat e dhëna nga vetë koordinatori i njësisë zgjedhore, vështirëson funksionimin e mirëfilltë të degës”, kishte theksuar Ferat Begu, invalid i luftës.

Si ndodhi papritur emërimi i Bajram Limanit për u.d kryetar dege

Pakënaqësitë dhe kaosi në këtë parti u ndërpre përkohësisht me ngjarjet e 9 dhe 10 majit në Kumanovë. Por vetëm disa javë pas kësaj ngjarje, Ali Ahmeti me vendim të tij emëroi Bajram Limanin për ushtrues detyre të degës së BDI.

“Limani dhe ekipi i zgjedhur nga ai do të vijojnë me strukturimin e degës së Kumanovës nëpërmjet të zgjedhjeve partiake në degë. Ky vendim i përkohshëm është në shërbim të strukturimit të mirëfilltë dhe të fuqishëm të BDI-së në Kumanovë gjer në mbajtjen e kuvendit të rregullt zgjedhor.” njoftuan nga kjo parti.

Po kush ishte njeriu që papritur erdhi në krye të degës dhe që nuk ishte i njohur për shumë qytetarë në Kumanovë, përfshirë edhe strukturat e BDI-së.

Bajram Limani ka lindur më 10 nëntor 1958. I burgosur politik, i arrestuar në vitin 1985, ndërsa i dënuar në vitin 1986 me 12 vjet burg. Nga burgu u lirua në korrik të vitit 1991, prej ku vazhdon me aktivitet politike dhe kombëtare. Limani ka vijuar studimet në fakultetin e mjekësisë në Shkup dhe në Prishtinë, ndërsa është anëtar i Bashkimit Demokratik për Integrim që nga themelimi.

Çka kishte deklaruar anëtari i komisionit komunal të BDI-së në Kumanovë lidhur me kaosin në këtë degë

Anëtari i komisionit komunal në Bashkimin Demokratik për Inegrdim, Lulzim Aliti në fillim të këtij muaji kishte shprehur shqetësimet e tij në lidhje me funskionimin brenda partiak të kësaj partie.

Ja se çfarë kishte shkruar Aliti në reagimin e tij:

“Si anetar i komisionit komunal per zgjedhjet brenda partiake te BDI-se .Ju beje pyetje te hapur deputeteve, keshilltareve komunal,drejtoreve dhe te gjithe atyre qe gezojn funksione ne kete parti. Si funksiononi pa pasur dege pa pasur kryesin e deges me te cilen per cdo veprim duhet te konsulltoheni?

Si eshte e mundur qe pa pelqimin e deges te emerohet sekretaresh ne drejtorin e çerdheve? Si i beni veprimet te cilat nese nuk konsultoheni me degen ne fjal mund te jene ne dam te shqipetareve te Kumanoves? Baza e cila emeron funksione ose ben punesime eshte dega,ndersa çuditerisht 1 vite u be nga shpallja e zgjedhjeve brenda partiake. Koordinatori i zones nr2 Bekir Asani ende nuk i realizoi kto zgjedhje tash shtrohet pyetja se pse kandidati i vetem per kryetar dege Xhemail Rexhepi-Shqiponja ende nuk emerohet kryetar a mos valle nuk i kovenon koordinatorit apo ndoshta koordinatori nuk deshiron ta emeron kryetarin e zgjedhur nga populli tash a deshiron ta ndeshkon popullin apo kandidatin e vetem ne fjal… Bej thirrje deri te te gjithe organet partiake te BDI-se qe ky fenomen i vetvendosjes nga individ te cilet duan ta shtrin doren mbi Kumanove te nderpritet. Mjaft mbeti Kumanova pa zot shpije.

Rezultat i gjith ketyre ndodhive te cilat i ndodhin Kumanoves eshte ajo se ne kemi mbet jetim…” thuhet kështu në reagimin e Lulzim Alitit.

Porositë e fundit të Shqiponjës

Xhemail Rexhepi – Komandant Shqiponja – kohëve të fundit kishte denoncuar për INA të bëmat që sipas tij po ndodhnin me BDI-në dhe sidomos shqetësimet e tij për Kumanovën dhe shqiptarët.

Ja dy postimet e këtij muaji, që kishte ndezur alarmin Shqiponja:

“Po dëgjoj zëra nga disa karrieristë, nga disa fotelashë, nga disa që veç postet dhe paranë e njohin se: Shqiponja i ka prish punët me Ali Ahmetin. Kur është ne pyetje Kumanova, unë çdo herë do të jem në kundërshtim ndaj çdo veprimi qe s’është në vullnet të qytetarëve të Kumanovës. Unë kam qenë bartës kyç me shumë shokë i betejave më të lavdishme të 2001, ku kemi qëndruar deri në fitore. Shpresoj dhe jam plotësisht i bindur që nga kjo rrugë që kemi marrë unë dhe shumë shokë të UÇK-së dhe aktivistë të BDI-së, në fund do të fitojë Kumanova. Lus All-llahun në këtë natë që çdo njeri që i është afruar kësaj partie me qëllime jo të pastërta, ishalla i ndërrohet mendja dhe mendon për të mirë dhe vetëm për të mirë”, ka thënë ai në Natën e Kadrit.

Postimi 2:

“Eshte perhap nje dukuri ne popullaten Shqipetare te Kumanoves shume njerz muajin e fundit me kan pyetyr valle pse BDI nuk i perfill luftaraket pse nuk i lejon te jene ne poste ku munden te punojn dhe te ndihmojn popullaten e Kumanoves pasi qe ne kemi mbet shum larg nga qytetet e tjera asgje nuk eshte punuar ne komunen e Kumanoves respektivisht ne pjesen ku shumica eshte e banuar me Shqipetar. Kjo me ka merzitur shume sepse nuk kam pergjigje te pershtatshme, nga qe ata me thuan pasi qe BDI doli nga lufta pse sjeni ju ata qe do te na udheheqni.

Tash dua tu tregoj popullat e Kumanoves se ne asnje menyr nuk na jepet hapesir neve te cilet organizuam luften udheheqem luften te cilet luftuam pa u kursyer per kete komb nuk na lejohet qe te kontribojm per te miren e Shqipetareve te Kumanoves. Jemi duke u ndje shume te shkelur.Xh R Shqiponja” (sic.)”, ka shkruar Shqiponja.

Përçarjet dhe problemet në BDI nga viti 2002

Një nga themeluesit e kësaj dege thotë për INA se problemet datojnë që pas përfundimit të konfliktit të vitit 2001, kur nisën skenaret për përçarje, imponimet dhe vendimet nga qendra, që u krijuan si pasojë e përçarjes.

“BDI në Kumanovë funksionon përmes disa rrymave apo klaneve, që disa prej tyre nuk flasin mes njëri tjetrit, janë në konflikte dhe nuk kanë debat komunikimi. Gjithë kjo situatë kontrollohet nga lartë, ashtu që Ahmeti ka mbajtur komunikimet me gjitha grupet për të shmangur largimin e tyre nga partia. Menjëherë pas themelimit të degës së BDI-së u krijuan përçarjet dhe se kjo ndodhi pas emërimeve të disa zyrtarëve që nxitën reagime të brendshme sidomos në radhet e ish-ushtarëve të UÇK-së.

Këto probleme dhe skenare bënë që dega e BDI-së në Kumanovë dhe Likovë të humb peshën e saj si zonë kyçe e luftës së UÇK-së dhe se këtë e keqpërdorën disa individë brenda kësaj partie, që gëzuan poste përmes klaneve të tyre. Kjo situatë bëri që Kumanova të humbas edhe postin e zëvendëskryeministrit për Marrëveshjen e Ohrit, që duhej t’i takonte këtij bastioni të luftës dhe jo degës së Kërçovës. Me vazhdimin e viteve, Kumanova nisi të humbas ndikimin e saj pas përçarjeve të mëdha dhe se kjo u reflektua edhe në ndarjen e posteve qeveritare, ku gjithmonë ky rajon u përfaqësua me ministri apo drejtori më të dobëta. /INA/

Incident i armatosur në BDI-në e Kumanovës, dyshohet për një vrasje dhe të dy të plagosur

Një përleshje e armatosur ka ndodhur sot në një nga lokalet e Kumanovës, ku ka mbetur i vrarë si mësohet jozyrtarisht Xhemail Rexhepi – i njohur si komandant Shqiponja. Përleshja e armatosur ka ndodhur midis anëtarëve të BDI-së dhe sherri ka plasur për kreun e degës së kësaj partie.

Akoma nuk është informuar zyrtarisht se a është i vdekur ose jo Xhemail Rexhepi, i njohur si Shqiponja. Në këtë incident kanë ngelur të plagosur edhe dy persona të tjerë.

Sipas gazetës Lajm, grupi ka pësuar nga përkrahës të Bajram Limanit, që para një muaji u emërua kryetar dege drejtpërdrejtë nga kryetari i BDI-së Ali Ahmeti.

Në këtë aksident lëndime më të rënda në zemër ka marrë ish ushtari i UÇK-së, Shefki Rexhepi, i cili ka qenë bashkë me komandant Shqiponjën. Ai është transferuar në qendrën klinike në Shkup.

Incidenti ka ndodhur në një lokal afër fakultetit të USHT-së në Kumanovë, ku Rexhepi është dashur të takohet me Bajram Limanin, që të koordinohen lidhur e zgjedhjen e kryetarit.

Në këtë incident është plagosur edhe Gani Demiri, i cili ka marrë plagë në krah dhe në shpinë.

Sulejman Rexhepi – Nuk ka lëvizje radikale të cilat mund ta prishin paqen tonë

Kryetari i Bashkësisë Islame në Maqedoni, Sulejman Rexhepi thotë në një intervistë për Radion Evropa e Lirë se në Republikën e Maqedonisë nuk ka hapa, përkatësisht veprime radikale të cilat e shqetësojnë shoqërinë në terësi, jo vetëm Bashkësinë Islame këtu dhe myslimanët, por tërë shoqërinë.

Radio Evropa e Lirë: Zoti Rexhepi, fillimisht do të ndalem tek festa e Fitër Bajramit që simbolizon faljen, mëshirën… Sa reflektohet kjo frymë, këto vlera edhe në harmoninë ndërfetare, madje edhe në stabilitetin e vendit në një shtet multietnik siç është Maqedonia?

Sulejman Rexhepi: Porosia jonë është në këtë drejtim, të gjithë besimtarët myslimanë masivisht të përcjellin uratat e veta, gëzimin dhe ndjenjat në shenjë respekti së pari ndaj familjes, ndaj fqinjëve dhe gjithsesi ndaj të gjithë të tjerëve, të gjithë dashamirëve. Unë kam bindje se ky manifestim, festa e Fitër Bajramit si festë është shumë e gjallëruershme këtu në Republikën e Maqedonisë, për arsye se të gjithë besimtarët gjatë një muaji kanë agjëruar dhe i janë përkushtuar Allahut fuqiplotë.

Ndonëse sfidë për Ballkanin mbetet terrorizmi në rrafshin global, madje edhe në kumtesën me shkrim të BDI-së pas takimit me ndihmës-sekretaren amerikane të shtetit Viktoria Nuland theksohej se të dy kanë biseduar “rreth shqetësimit të përbashkët, atë të luftëtarëve nga rajoni në luftërat në Siri dhe Irak”.

Radio Evropa e Lirë: Cili është qëndrimi i Bashkësisë Fetare Islame në Maqedoni (BFI-së) si dhe angazhimi i juaj për të parandaluar këtë fenomen siç jeni shprehur disa herë të pa papranueshëm për besimtarët e fesë islame këtu dhe gjetiu?

Sulejman Rexhepi: Sa i përket lëvizjes radikale islamike e cila jo vetëm në Ballkan, por në tërë botën nga e cila ndjehen përkatësisht përjetohen momente dhe trauma të ndryshme të mëdha, Bashkësia Fetare Islame e Maqedonisë, si institucion shpirtëror, fetarë, institucion që përfaqëson islamin me parimet e veta është gjithmonë vigjilente e përcjell situatën hap pas hapi dhe gjithmonë ka qenë në krye të detyrës, këtë mendoj se tërë opinioni e din jo vetëm në Ballkan, por edhe më gjerë.

Jo rastësisht ne dolëm edhe me një projekt përmes së cilit kërkuam që me ne të solidarizohen të gjithë ata të cilët janë dashamirë të paqes, qetësisë si dhe ata të cilët janë kundër dhunës, kundër radikalizmit, përkatësisht janë për mirëkuptim, bashkëjetesë dhe unë mendoj se ky projekt i yni ende është aktiv, ecë, edhe pse mendoj se ky projekt ka pasur mundësi të ecë edhe më shpejtë dhe më fuqishëm, por një gjë është e sigurt se nga ai projekt nuk heqim dorë.

Me vet faktin që ne ofrojmë një projekt konkretet për parandalimin e kyçjes së luftëtarëve nga Maqedonia në luftërat në lindjen e afërt do të thotë se BFI e Maqedonisë e ka shqetësim luftën kundër të gjitha lëvizjeve radikale.

Me siguri edhe subjektet dhe faktorët e ndryshëm relevant qofshin ata në kuadër të Bashkimit Evropian, apo në kuadër të Shteteve të Bashkuara të Amerikës, këtë shqetësim e kanë preokupim dhe ne në këtë drejtim gjithmonë kemi kërkuar që me të gjithë faktorët relevant të kemi bashkëpunim të mirëfilltë, kontakte të përditshme që të këmbejmë informata në mes veti.

Radio Evropa e Lirë: Do të ndalem edhe pak në këtë çështje, a ka Maqedonia ekstremizëm fetar, dhe vendi a është i rrezikuar në këtë drejtim?

Sulejman Rexhepi: Kohëve të fundit është një realitet i pamohueshëm, të gjithë atë të cilët kanë menduar madje edhe ne si institucion kemi pasur disa vërejtje më duhet të theksoj se viteve të fundit gjendja është më e qetësuar në rajon.

Lirisht mund të them dhe për këtë mbaj përgjegjësi, në Republikën e Maqedonisë nuk ka hapa përkatësisht veprime radikale të cilat e shqetësojnë shoqërinë në terësi, jo vetëm Bashkësinë Islame këtu dhe myslimanët, por tërë shoqërinë, pra dua të them se nuk ka lëvizje radikale e cila prish atmosferën e paqes qetësisë dhe sigurisë në vend.

Në të kaluarën në shtrirjen Ballkanike janë marrë disa masa. Unë nuk mund të bindem se duhet dikush nga Maqedonia apo Ballkani më gjerë, Evropa apo bota të jetë pjesëtarë i një lufte të çmendur që po ndodh në Siri dhe në Irak, por de fakto ne nga këtu kemi njerëz të cilët gjinden atje, kemi njerëz nga këto vise që kanë dhënë jetën atje, motivet e tyre mbeten të fshehta, por më duhet të theksoj se ne e kemi thënë fjalën tonë, duke qenë gjithmonë transparent se në pyetje ka qenë interesi material dhe rekrutimi.

Si Bashkësi Islame këtu në Republikën e Maqedonisë nuk kemi informata për ndonjë lëvizje rekrutimi e cila vepron përkatësisht funksionon këtu, por më duhet të theksoj se ka organe të cilat janë edhe më kompetente për këtë çështje dhe nëse ata konstatojnë se këtu veprojë lëvizje të tilla dhe njëkohësisht ne bindemi si institucion në bazë të fakteve dhe argumenteve sigurisht se do të kenë dhe mbështetjen tonë në luftën kundër çdo lëvizje anti-islame, do të thosha sepse unë radikalizmin dhe ekstremizmin e quaj si veprim anti-islam.

Radio Evropa e Lirë: Ndonëse institucioni që drejtoni ishte pjesë e trazirave pak para fillimit të muajit të shenjtë të agjërimit, dhe pas kësaj ju thatë se ky institucion është më i fortë pas goditjeve, ku e bazoni këtë ndërkohë që grupi i quajtur “Nisma për reforma në BFI” edhe më tej kërkon largimin tuaj nga ky institucion?

Sulejman Rexhepi: Sa u përket trazirave dhe tendencave për goditje të BFI-së para muajit të bekuar të Ramazanit, ato ishin tendenca përkatësisht bëhet fjalë për një iniciativë nga disa individë të caktuar të cilët numërohen në gishta.

Të gjithë ata të cilët janë larguar nga BFI përfshi këtu katër ose pesë persona të cilët me siguri se kanë qenë pjesë e projekteve të huaja, sepse askush nuk mund të më bindë mua se nuk kanë qenë pjesë përkatësisht mbështetjen dhe gajretin (kurajën) e kanë marrë nga sigurimi shtetëror i Republikës së Maqedonisë.

Unë jam i gatshëm që me faktorët e sigurimit shtetëror të ballafaqohem para medieve. Njëkohësisht ua kam bërë me dije se veprimin e këtillë duhet ta harrojnë, ti shmangen dhe asnjëherë të mos e mbështesin sepse nuk është në interes të shtetit, nuk është në interes të qytetarëve këtu në Maqedoni, sepse ne jemi shtet multietnik dhe çdo trazirë që tentohet të bëhet nga struktura brenda një besimi, apo institucionit siç është BFI e Maqedonisë, 100 për qind do të reflektohet edhe në besimet e tjera, etnitetet e tjera.

Deshi Zoti që ne këtë situatë ditëm ta menaxhojmë me mençuri, përmes të gjithë dashamirëve të cilët ia deshën të mirën këtij institucioni dhe këtë çështje ta mbyllim në formën më të mirë, formën institucionale.

Maqedoni: Bankat t’i tërheqin paratë nga Greqia

Kjo lëvizje nga Banka Qendrore e Maqedonisë u bë dje, pasi Athina ka shpallur se do të ndërmarrë kontroll të kapitalit dhe do t’i mbyllë bankat, meqë kreditorët ndërkombëtarë refuzuan ta vazhdojnë kredinë, ndërsa kursimtarët janë rreshtuar për tërheqjen e parave të tyre të gatshme, raporton Reuters nga Shkupi.

Banka Qendrore e Maqedonisë në Shkup tha se masat e saj janë “të karakterit të përkohshëm, që kanë për qëllim shqyrtimin e rrezikut të një rrjedhjeje më të maadhe të kapitalit nga Maqedonia te fqinji jugor, që mund të shkaktoj shkatërrim të konsiderueshëm të bilancit të pagesave dhe të stabilitetit të sistemit financiar”.

Bankat në pronësi greke i kanë afro 20% të pasurive bankare të përgjithshme në Maqedoni dhe kanë aksione të rëndësishme në bankat e Bullgarisë, Rumanisë, Serbisë dhe Shqipërisë. Kjo gjë e ka shtuar mundësinë që qeveritë mbase duhet t’i ndihmojnë ato nëse sistemi bankar i Greqisë shkatërrohet.

NEW YORK TIMES: OPOZITA KËRKON NJË QEVERI TRANZICIONI PA NDIKIMIN E GRUEVSKIT NGA JOANNA BERENDT

Foto nga Georgi Licovski/European Pressphoto Agency

Qeveria e Maqedonisë fajësohet për skandalin e përgjimeve

Zoran Zaev ka thënë gjatë një interviste për një stacion televiziv se opozita është e vendosur të ketë qeveri kalimtare pa ndikim të Gruevskit. Nëse kryeministri nuk jep dorëheqje deri në fund të muajit, opozita, është zotuar Zaev, do të marrë parasysh «radikalizimin» e veprimeve të protestës, shkruan «New York Times».

——–

Shërbimi i sigurisë kombëtare, duke vepruar me urdhra të Qeverisë konservative dhe gjithnjë e më autoritare të Maqedonisë, ishte prapa skandalit të përgjimeve që e ka vënë në dyshim qëndrueshmërinë e vendit, bëhet e ditur në një raport të ri.

Publikimi i raportit prej Komisionit Evropian të premten ka pasur një raund të ri të pasuksesshëm negociatash në kryeqytetin Shkup, me qëllim të kapërcimit të krizës, më e madhja që ka përjetuar shteti me dy milionë banorë prej se fitoi pavarësinë më 1991. Katër krerë politikë, bashkë me ambasadorët e Bashkimit Evropian dhe Shtetet e Bashkuara, kanë dështuar të premten të arrinin marrëveshje për formimin e një qeverie kalimtare që do ta përgatiste vendin për zgjedhjet e parakohshme në prill të vitit të ardhshëm.
«Tingëllon qesharake që elita politike e një shteti të zhvilluar evropian nuk ka aq integritet moral, saqë është e domosdoshme ndërhyrja nga BE-ja dhe SHBA-ja për të zgjidhur problemet e veta», ka deklaruar Albert Musliu nga Komiteti i Helsinkit, grup për të drejtat e njeriut. «Por fatkeqësisht, kjo është e vërtetë», ka deklaruar gjatë një interviste ai.

Megjithatë, negociatorët – Nikola Gruevski, që është kryeministër që nga viti 2006, Zoran Zaev i Lidhjes Socialdemokrate të Maqedonisë në opozitë; dhe krerët e dy partive më të vogla që përfaqësojnë minoritetin shqiptar të vendit – janë pajtuar të bëjnë pa asnjë vonesë ndryshimet e nevojshme që janë propozuar nga Johannes Hahn, komisionar i Bashkimit Evropian.

«Tani nuk ka hapësirë për kompromis», ka deklaruar Musliu. «Të gjithë krerët duhet të veprojnë sa më shpejt që është e mundshme për të rikthyer besimin e shoqërisë në institucionet publike që është reduktuar në minimum në muajt e fundit».

Raporti, rezultat i hetimit të 670 mijë bisedave të përgjuara ilegalisht nga më shumë se 20 mijë numra telefonash, ka vënë në pah brishtësinë e strukturës demokratike në Maqedoni, që monitorohet nga afër prej qeverive perëndimore, sepse është në udhëkryq të Ballkanit.

Sipas dokumentit, të përgatitur prej ekspertëve të pavarur, Qeveria nën kryesimin e Gruevskit ka keqpërdorur shërbimet e sigurisë kombëtare «për të kontrolluar zyrtarët më të lartë në administratën publike, prokurorët, gjykatësit dhe kundërshtarët politikë».

Raporti gjithashtu thekson «përfshirjen e dukshme të drejtpërdrejtë të zyrtarëve të lartë qeveritarë dhe partiak në kurdisje të zgjedhjeve, korrupsion, abuzim të pushtetit dhe autoritetit, konflikt të interesit, shantazh, zhvatje, dëmtim kriminal», si dhe «në përfshirje të papranueshme politike në nominim/emërim të gjykatësve».

Gruevski, që nuk ka çelur gojën gjatë 24 orëve pas publikimit të rezultateve të raportit, as i ka shkuar ndërmend të shprehë keqardhje, teksa ka folur gjatë shënimit të një përvjetori të partisë së tij të mbajtur të shtunën mbrëma. Ai ka akuzuar një organizatë pa përmendur emrin, mbase një shërbim të huaj inteligjence, se kishte paguar «shumë para një numri njerëzish që mund të bëjnë një numër përgjimesh» me qëllimin e «shkatërrimit brutal» të partisë së tij dhe «për të futur frikën në mesin e popullit». «Por në vend se t’ia dilte me sukses në këtë drejtim, ata do të shkatërrojnë veten, duke rënë në kurthin e zgjedhjeve të parakohshme, në të cilat do të fitojmë ne», ka deklaruar Gruevski.

Xhabir Deralla, themelues dhe president i Civil, organizatë për të drejtat e njeriut në Maqedoni, e ka përshkruar fjalimin si «eksploziv, kërcënues dhe popullist». «Gruevski i ka prirë Qeverisë në një mënyrë jashtëzakonisht kriminale», ka deklaruar Deralla gjatë një interviste. «Bisedat e përgjuara zbulojnë krimet për të cilat në një vend normal, ai dhe shumë anëtarë të Qeverisë së tij do të duhej të dërgoheshin në burg për goxha do vite».

Kriza që po thellohet ka shkaktuar jo vetëm frustrim në mesin e popullsisë së gjerë, me protestat e fundit ku morën pjesë dhjetëra mija maqedonas duke u shndërruar në të dhunshme, por edhe me dëmtim të aspiratave të Maqedonisë për t’u anëtarësuar në Bashkimin Evropian dhe NATO.

Sipas raporteve të medieve, Gruevski është i gatshëm të pranojë çfarëdo zgjidhje, përfshirë krijimin e qeverisë kalimtare, derisa ai të vazhdojë të mbetet në pushtet. «Çdo ditë është kritike», thekson Deralla. «Dhe makineria e Gruevskit e di fort mirë këtë punë dhe punon me zell të madh për të mbetur në pushtet».
Por Zaev ka thënë gjatë një interviste dhënë të enjten për një stacion televiziv se opozita është e vendosur të ketë qeveri kalimtare pa ndikim të Gruevskit. Nëse kryeministri nuk jep dorëheqje deri në fund të muajit, opozita, është zotuar Zaev, do të marrë parasysh «radikalizimin» e veprimeve të protestës.

BASHKIMI EVROPIAN – MAQEDONIA TË KRYEJË NDRYSHIME RRËNJËSORE

Këshilli i Ministrave të Jashtëm të Bashkimit Evropian u ka këruar të marten drejtuesve politikë të Maqedonisë që t’i japin fund krizës politike dhe të gjejnë një zgjidhje të qëndrueshme, në bazë të marrëveshjes së 2 qershorit.

Këshilli ka miratuar konkluzionet për Maqedoninë, duke kërkuar realizimin e shpejtë të reformave dhe hetime mbi veprimet e mundshme kriminale që dalin nga skandali i përgjimeve.

Ministri i Jashtëm i Letonisë, Edgars Rinkēvičs, vendi i të cilit është kryesues i radhës me Bashkimin Evropian, ka thënë se shpreson që mesazhi i Këshillit të Ministrave do të dëgjohet në Shkup, “por nëse gjendja nuk ndryshon atëherë BE do të shikojë se ç’farë masash mund të ndërmarrë”, është shprehur ai.

Ministri letonez ka shtuar se marrëveshja e 2 qershorit do të kthente vlerat demokratike në vend, përfshirë marrëdhëniet e mira ndëretnike përmes zbatimit të plotë të Marrëveshjes së Ohrit dhe forcimin e marrëdhënieve të mira mes vendeve fqinjë. Ministri Rinkēvičs ka nënvizuar nevojën për reforma në fushën e sundimit të së drejtës, pavarësinë e gjyqsorit, median, reformat zgjedhore, çështjen e korrupsionit dhe atë të politizimit të institucioneve shtetërore.

Kryeministrat e vendeve anëtare të Bashkimit Evropian pritet që t’i miratojnë këto konkluzione ditën e enjte dhe të premte.

Katër drejtuesit e partive kryesore në Maqedoni do të takohen sërish më 29 qershor, në pritje të një marrëveshjeje për formimin e një qeverie të përkohëshme, e cila do të përgatiste zgjedhjet e parakohëshme të planifikuara për muajin prill të vitit 2016.

Burime të afërta me dy partitë rivale maqedonase, VMRO dhe Lidhja Social Demokrate thonë se kryeministri aktual Nikolla Gruevski mund të largohet nga detyra gjashtë muaj para zgjedhjeve të parakohshme. za

Çavkov – Nuk do të ketë hetim ndërkombëtar për Kumanovën

VOAL – SHKUP – Sulmi i 9 majit mes forcave të rendit në Kumanovë dhe një grupi të armatosur të pjesëtarëve të ish-UÇK-së, nuk do të bëhet pjesë e hetimeve ndërkombëtare. Ministria e Brendshme e Maqedonisë ka hedhur poshtë zërat për një hetim ndërkombëtar për ngjarjen e 9 dhe 10 majit në Kumanovë.

Kjo u bë e ditur dje nga ministri i Brendshëm, Mitko Çavkov, gjatë qëndrimit të tij në Kumanovë ku zhvilloi një takim me përfaqësuesit e bashkësisë lokale të “Lagjes së Trimave”.“Ne si MPB pjesën tonë të aktiviteteve e mbaruam. Me realizimin e ekspertizës në vendin e ngjarjes të cilën e kryesonte prokuroria publike janë ngritur dhe siguruar të gjitha gjurmët si dëshmi për zhvillimet dhe ngjarjet. E tani, pritjet tona, si edhe tuajat, janë që prokuroria publike përmes një procedure transparente dhe efektive gjyqësore të qartësojë të gjitha rrethanat e zhvillimeve në Kumanovë. Nuk ka kërkesa dhe sipas bindjes sime të thellë nuk ka nevojë për hetim ndërkombëtar lidhur me këtë rast”, deklaroi ministri Çavkov.

Shpenzimet marramendëse për ‘Shkupin 2014’ vazhdojnë

Ndërtimi përmendoreve dhe objekteve të ndryshme, të cilat janë pjesë përbërëse eprojektit “Shkupi 2014”, nuk ndalet, pavarësisht krizës politike dhe aferës së përgjimeve, për të cilën opozita thotë se ka nxjerr në sipërfaqe “veprimet kriminale të pushtetit aktual”.

Drejtoresha e organizatës joqeveritare Transparencë për Maqedoninë, Ana Janevska – Delleva, thotë se është e pakuptimtë që të vazhdojë hapja e më shumë tenderëve për realizimin e projektit “Shkupi 2014”, ndërkohë që i njëjti duhej të përfundonte që në vitin e kaluar.

Sipas Dellevës, hapësirë për dyshime lë ndarja e 500 mijë eurove plotësuese për enterierin e brendshëm të Muzeut të VMRO DPMNE-së, të cilat nuk ishin paraparë gjatë tenderimit të parë.

Për të mbetet e diskutueshme në bazë të çkaje rritet kostoja për ndriçimin e përmendoreve dhe monumenteve kulturore që janë pjesë përbërëse të këtij projekti nga 96 mijë euro sa ishin paraparë në marrëveshjen e qytetit të Shkupit me firmën që duhej të realizojë këtë projekt për 38 mijë euro më shumë, duke rritur koston e ndriçimit të objekteve në 134 mijë euro.

“Mbetet për t’u shqyrtuar rritja e kostos së ndërtimit të rrethores së urës para ‘Holidej In’, për të cilën rrethore gjatë vitit 2014 ishin paraparë një milion e 150 mijë euro, dhe tani qyteti i Shkupit ka nënshkruar një marrëveshje plotësuese dhe harxhimet rreth realizimit të këtij projekti rriten për 260 mijë euro plotësuese”, thekson Delleva, duke shtuar se duhet bërë e qartë sa ka kushtuar projekti “Shkupi 2014”, ku është fokusuar qeveria aktuale për të investuar.

“Është koha e fundit që kryeministri Nikolla Gruevski, si inspirues politik i këtij projekti, përfshirë këtu dhe ministren e Kulturës, Elizabeta Kanceska -Milevska, dhe kryetarin e Qytetit të Shkupit, Koce Trajanov, si realizues kryesorë të këtij projekti, të na kumtojnë kur do të përfundojë ky projekt , dhe një e herë e përgjithmonë të bëhet publik konstrukti financiar i realizimit të këtij projekti”, vlerëson Delleva.

Margarita Caca – Nikollovska, ish-gjykatëse në Gjykatën për të drejtat e njeriut në Strasburg, konsideron se me zgjidhje juridike të krizës politike në vend, nënkuptohet dhe veprim i menjëhershëm i organeve kompetente.

Kjo, sepse nëse ekzistojnë dëshmi të caktuara, të cilat kanë dalë në pah përmes bisedave të përgjuara telefonike, duhet të fillojë menjëherë mbledhja e dëshmive të tjera që do të dëshmonin fajësinë ose pafajësinë e udhëheqësve të caktuar të apostrofuar nga opozita maqedonase se janë të përfshirë në afera të ndryshme korruptive.

“Nga mosveprimi i organeve gjyqësore me kohë, krijohet mundësi që dëshmitë e paraqitura nga bisedat e përgjuara të publikuara nga opozita,thënë kushtimisht ‘të humbasin’, dhe nesër kush do të përgjigjet? Për këtë duhet të mendojnë mirë të gjithë pjesëmarrësit, qoftë në mënyrë aktive ose joaktive, duke filluar nga përfaqësuesit e qeverisë dhe duke përfunduar me organet e sistemit gjyqësor, sepse veprat kriminale nuk vjetrohen si lëndë”, konsideron Margarita Caca Nikollovska.

Nga ana tjetër, Visar Ademi, ekspert i ekonomisë, thotë se të gjithë qytetarët duhet të jenë të shqetësuar për harxhimet marramendëse rreth projektit “Shkupi 2014”, sepse në fund të fundit kostoja e këtij projekti ka impakt të drejtpërdrejtë në cilësinë e jetës së tyre.

“Mund të them se ne do të mbytemi në rërën tonë të ekonomisë së brendshme, të cilën vetë po e krijojmë, sepse lejojmë të subvencionohen nga qeveria ato degë, të cilat absolutisht nuk kanë perspektivë ose nuk sjellin kurrfarë benificioni, siç është realizimi i projektit ‘Shkupi 2014’”, thekson Visar Ademi.

Së fundmi, Qyteti i Shkupit nga buxheti komunal vetëm për zbukurimine hapësirave ku është vendosur përmendorja e Filipit II, para Ministrisë së Transportit dhe Lidhjeve, ka ndarë 318 mijë euro. rel

GJORGJI SPASOV – ALI AHMETI ËSHTË SHPËTIMTARI I GRUEVSKIT

VOAL – MAQEDONI- Kryeministri Nikolla Gruevski ka bashkëpunuar me kompani dhe biznesmenë të cilët tani kanë përfunduar në burg dhe u është ndaluar veprimtaria nga organizatat ndërkombëtare, për shkak të veprimeve të tyre kriminale.

Kështu ka pohuar për mediat njohësi i situatës politike në Maqedoni, Gjorgji Spasov, duke numëruar disa prej biznesmenëve të cilët, siç tha, Gruevski i ka pasur partnerë edhe në projekte të qeverisë.

Duke komentuar bisedimet për zgjidhjen e krizës dhe kërcënimet e Ahmetit ndaj Zaevit se, nëse nuk pranon marrëveshje do të iniciojë zgjedhje të parakohshme, Spasov ka thënë se Ahmeti edhe në të kaluarën ka marë vendime për të shpëtuar partnerin e tij, Nikolla Gruevski.

“Në vitin 2011, Cërvenkovski e dinte se popullariteti i Gruevskit po binte për shkak të aktiviteteve të tij ndaj televizionit A1, ndaj e luste Ahmetin që të shtyheshin zgjedhjet deri në shtator, meqë në shtator mendonte se do të fitonte opozita. Por, Ali Ahmeti, për ta shpëtuar Gruveskin, asokohe urgjentisht i shpalli zgjedhjet në muajin maj”, ka pohuar Gjorgji Spasov.

FOTO E DITËS – ALI AHMETI SHKËLQYER NË MAQEDONISHT, DOBËT NË SHQIP

SHKUP- Një deftese e fillores së kreut të BDI¬së, Ali Ahmetit që po qarkullon në rrjetet sociale, dëshmon se ai fëmijë ka qenë një nxënës shumë i dobët i gjuhës shqipe, ndërkohë që ka shkëlqyer në njohjen e maqedonishtes.

Së fundi, në rrjetet sociale po qarkullon një foto që pretendohet të jetë dëftesa e Ali Ahmetit në shkollën fillore “Marshall Tito”, raporton “lajmpress.com”. Njohja e shkëlqyeshme e gjuhës maqedonase vërehet edhe në vlerësimet e mësuesve të Titos, të cilët Ahmetin e kanë vlerësuar me notë maksimale 5, ndërsa në lëndën e gjuhës shqipe atë e kanë vlerësuar me notën mjaftueshëm 2, vetëm që të kalojë e mos të shkojë në provimet e vjeshtës.

Këto fotografi po qarkullojnë pas publikimit të bombës 38 nga Zaevi ku dëgjohet Ali Ahmeti duke folur në gjuhën maqedonase, edhe përkundër faktit se publikisht ka kundërshtuar një gjë të tillë, duke kërkuar zyrtarizimin e gjuhës shqipe.

Eliot Engel i pakënaqur me trajtimin e shqiptarëve në Maqedoni

Kongresisti amerikan Eliot Engel deklaroi për INA se është i pakënaqur nga mosrespektimi i të drejtave të shqiptarëve në Maqedoni.

“Jam i pakënaqur me mosrespektimin e Qeverisë së Maqedonisë së Marrëveshjes së Ohrit. Unë mendoj se ka shumë punë për të bërë, ngaqë mendoj se Maqedonia, është një vend i rëndësishëm, dhe aleat i Shteteve të Bashkuara. Ne kemi mbështetur këtë vend që të bëhet pjesë e strukturave euroatlantike. Por dua që të gjithë qytetarët e këtij vendi, duke përfshirë edhe shqiptarë, duhet të trajtohen në mënyrë të drejtë dhe të jenë të barabartë”, deklaroi për INA, kongresisti Engel, pas një takimi që zhvilloi në Uashington me kryetarin e Lëvizjes për Reforma të PDSH-së, Ziadin Sela.

Ai ka theksuar se ka qenë i shqetësuar për ngjarjet e 9 dhe 10 majit në Kumanovë dhe për ngecjen në planin e dialogut politik. I pyetur për gjendjen e shqiptarëve në Maqedoni, Engel ka theksuar se ata duhet të kenë të drejta të barabarta.

“Së fundi jam edhe i shqetësuar me atë se çfarë po ndodh me komunitetin shqiptar në Maqedoni. Unë dëshiroj t’ju siguroj me këtë rast që shqiptarët në Maqedoni, duhet të trajtohen njësoj si të gjithë qytetarët, të jenë me të drejta të plota dhe të pa nëpërkëmbura”, deklaroi Engel, duke premtuar se gjatë disa javëve të ardhshme do të qëndrojë për vizitë në Maqedoni.

“Pas disa javëve do të jem në Maqedoni, duke shpresuar se mund të takohemi dhe të flasim për disa probleme, edhe me liderët e tjerë shqiptarë”, deklaroi kongresisti demokrat, që është edhe anëtar i Dhomës Përfaqësuese të Kongresit Amerikan.

SHBA : U mbajtë protesta e shqiptarëve në Nju Jork: Edhe ne jemi Kumanovë! Nga Beqir Sina

-Meqënse shteti i Kosovës nuk është antar i OKB-së kërkojmë që Shqiperia të padisë Qeverinë e Maqedonisë tek Gjyqi Ndërkombëtar i Krimeve ‘ICC’. Mbasi, sipas ligjit internacional çdo shtet fqinjë apo mik i një shteti, që nuk është antar i OKB-së, mund të padis në emër të atij shteti “ON BEHALF”. “Kështuqë, Shqipëria është më shumë se nji shtet mik apo fqinje, është shteti Amë dhe nuk duhet të toleroi Maqedoninë, të bëj terror mbi shqiptarët e me këtë edhe të nxit destabilitet në rajon.

“Daghammarskjold Plaza”- New York : Dje, me datën 15 qershor 2015 ne New York para ndërtesës së OKB-së, komuniteti shqiptare organizoj një protestë ne përkrahje Iliridës dhe shqiptarëve në qytetin shqiptarë të Kumanovës. Në këtë protestë u ngrit zëri ndaj represionit të shtetit sllavo maqedonas qeverisë së kryeministrit Gruevski, dhe u dënua ashpër vrasja tinëzare e luftëtareve te lirisë, më 9 dhe 10 maj në Lagjen e Trimave në Kumanovë.

Mbi dhjetra shqiptarë nga të gjitha trojet shqiptare të disaporës së bashku me disa anëtarë të familjeve të të rënëve, kanë protestuar dje, në sheshin e protestave”Daghammarskjold Plaza”, në mbeshtetje të popullates civile shqiptare nga Kumanova.
Protestuesit u mblodhën për të protestuar kundër pushtetit maqedonas me rastin e ngjarjeve të 9-10 majit, sulmit brutal të forcave të policisë ndaj një grupi shqiptarësh që rezultojë të jenë 9 shtetas të Kosovës të vrarë dhe 21 të arrestuar mes tyre edhe banorë civilë të Lagjes së Trimave në Kumanovë.
Protesta e Nju-Jorkut, tuboi shqiptarët nga disa shtete të SHBA-ve, të cilët kish udhëtuar nga Detroiti, Çikago, Uiskonsin, Nju Xhersi, Kenetktiket, Uashingtoni e tjer. Protestuesit mbanin në duar flamuj shqiptarë dhe amerikan, fotografi të viktimave të Kumanovës, dhe pankarta me simbolin “Jemi Kumanova”, “Liri për luftëtarët shqiptarë” – “Liri për luftëtarët – Burg për tradhëtarët” -“Politikan shqiptarë mos shkelini mbi gjakun e luftëtarëve të lirisë” – “Referndum për bashkim Kombëtar”.
Gjatë protestave u dëgjuan edhe thirrje edhe kundër udhëheqësve politik shqiptarë në Maqedoni, duke kërkuar edhe deri në largimin e tyre nga politika.
Kjo protestë në Nju-Jork, u mbështet me një mesazh të veçantë edhe nga kryebashkëjaku i qytetit të Waterburyt në Connecticut, Majori, Neil O’Leary edhe nga përfaqësues të komuniteteve të tjera në Shtetet e Bashkuara të Amerikës.
Protesta u organizua nga Shoqata “Hasan Prishtina” në Waterbury, Organizata e Komunitetit Dibran, në Staten Island, dhe Fondi i Përbashkët i Patersonit në Nju Xhersi, me përkrahje të shoqatatve të tjera të komunitetit, ish luftëtarët e Batalionit Atlantiku, dhe Fondacionit Vendlindja Thërret, si dhe nga aktivistë dhe veprimtarë që veprojnë në zonën e Tri-Shteshit.
Mizafer Sadiku – Hoxha, sekretar i qendrës kulturore Hasan Prishtina në Waterbury, udhëheqës teknik i programit të protestës, tha se qëllimi i kësaj proteste është që gjithë shqiptaret nga gjitha trojet shqiptare të bashkuar ta mbeshtesim popullatën civile, e të pa fajshme shqiptare në Kumanove. Njikohesishtë, tha ai t’u bëjmë thirrje autoriteteve maqedonase që ta ndalin dhunën ndaj popullatës së pa fajshme shqiptare, sepse, simbas tij, kjo nuk mund të tolerohet në asnji mënyrë, edhe është në kundërshtim në bazë të kushtetutës së shtetit Maqedonas”.
Më pas folën edhe Rakip Etemi kryetar i komunitetit Hasan Prishtina, professor Esat Ahmeti për Fondin e Përbashkët të Patersonit, New Jersey. Profesor, Esat Ahmeti, i cili është nga Kumanova, veç të tjerash tha: “Jemi mbledhur sot këtu në mbeshtetje të popullatës civile në Kumanovë, dhe bëri thirrje për të qenë të gjithë shqiptarët, me Kumanovën”.

Aktivisti i komunitetit zoti Naim Balidemaj , kujtojë se Maqedonia, është një shtet i cili krenohet me Nëna Terezen dhe Aleksadrin e Madh, ose me “fundërrinat” tartaro – bullgare, të ardhura në hapsirat shqiptare, të cilët nuk kan të bëjnë asgjë me nacionalitetin maqedonas.

“Maqedonia, tha ai është një shtet mustruoz i krijuar nga ish- Jugosllavia e Titos, për të mos lejuar ekspasionin serb në rajon, i cili ne shqiptarëve po na kushton sot shumë, sepse edhe kasta politike shqiptare nuk është e përcaktuar për zgjedhjen e problemit gjithë shqiptar në Ballkan, i cili do të ketë qetësi vetëm atëhere, simbas Balidemajt, kur ky shtet Maqedonia të shpërbëhet dhe të gjitha trevat shqiptare t’i bashkohen shtetit tonë Shqipërisë. Dhe, kjo duhet të ndodh sa më parë, në një shtet “inegzistet” i dyzuar serbo – bullgar”, tha Balidemaj.
Kurse, Hadije Jashari-Ukshini, kunata e Sami Ukshinit, Komandant Sokolit, gjatë fjalës se rastit, si përfaqesuese e familjes Ukshini nga Morina-Gjakovë, u shpreh se i madh është ai njeri që i shikon të gjithë njësoj, që vepron pa anuar e që mendon për të gjithë.. I tillë, tha ajo është edhe Sami Ukshini /Komandant Sokoli, kur është në pyetje çështja kombëtare.
“Dëshmi e gjallë e vlerave të larta njerëzore, është komandant Sokoli e Sokolët tjerë, tha më tej kunata e Sami Ukshinit, të gjithë ata që ranë e u burgosën në Betejën e Kumanovë. “Ata i vrau e i burgosi tradhëtia. Tradhtia e përgatitur mjeshtërisht, për të vrarë trimat që sollën Lirinë. U vranë djemtë më të mirë të Kombit, shqiptar, u arrestuan e u torturuan deri në vdekje, çka nuk ndodh askund në shtetet demokratike”, tha ajo.
Në emër të familjes së Komandant Sokolit, zonja Hadije Jashari-Ukshini, shpalosi disa kërkesa:

“Kështuqë, tha ajo Shqipëria është më shumë se nji shtet mik apo fqinje, është shteti Amë dhe nuk duhet të toleroi Maqedoninë, të bëj terror mbi shqiptarët e me këtë edhe të nxit destabilitet në rajon.
Padinë në emër të Kosovës tek Gjyqi Ndërkombëtar për krime “ICC” mund ta bëjnë edhe shtetet tjera mike siq është, Kroacia apo SHBA, por i takon Shqipërisë si shtet Amë të bëj këtë” , tha zonja Hadije Jashari-Ukshini, kunata e Sami Ukshinit, Komandant Sokolit, gjatë fjalës se rastit, si përfaqesuese e familjes Ukshini nga Morina-Gjakovë.
Myslim Rruci, i cili foli për shoqatën dibrane, tha se Shqiptarët janë autoktonë në këto troje, asnjëherë nuk kan luftuar ose sulmuar fqinjët e tyre, në këto treva etnike shqiptare, por kan dashur të jetojnë si fqinjë të mirë me këdo në këto rajon të trazuar nga luftërat e përgjakshme ” Në emër të paqes, demokracisë kërkojmë vetëm drejtësi për kauzën tonë” tha ai.
Para protestuesve për përkrahjen e popullatës civile shqiptare në Kumanovë, folën edhe perfaqësues të ardhur nga shetet e tjera. Ata në fjalën e tyre bënë thirrje për bashkim kombëtar dhe solidarizim me Kumanovën, folën nga bina veprimtari Gazmend Leshi nga Illinois, Gani Ahmeti nga Wisconsin, dhe Destan Aliu, nga Kërçova.

Ndërkohë, nëpërmjet linjës telefonike, Avdyl Zeka, vëllai i njërit prej të burgosurve nga Peja, familjes Zeka, tregojë për keqtrajtimin e të burgosurve shqiptar, që mbahen në burgjet e tmershme të Maqedonisë. Gjithashtu, edhe vëllai i njërit prej të burgosurve të tjerë, foli nga bina dhe kërkojë që të gjithë të protestojmë deri në lirimin e tyre dhe të bëhet një hetim ndërkombëtar, për krimet e policisë maqedonase ndaj shqiptarëve.
Musa Paçuku , kryetari i Shoqatës Atdhetare “Dibra” në Staten Island, tha se :”Mesazhi i kësaj proteste , pikërisht para selisë së OKB-së, është që bashkësija ndërkombëtare të bëjë trysni mbi Qeverin e Maqedonisë, për ta ndaluar dhunën mbi shqiptarët në Kumanovë e Maqedoni . Vetëm të bashkuar kështu siç jemi sot ne shqiptarët, do jemi më të fort në iedalet tona”, perfundoi z.Paçuku.
Kryetari i Akedemisë Shqiptaro Amerikane të Shkencave, Skender Kodra, profesori i psikologjisë klinike që jeton në New York, kërkoi reagim për të ndihmuar banorët e kësaj lagje, dhe premtoi para masë së protestuesve, se ai dhe një staf i tij do të bëjnë kërkimet mbi traumat e pasluftës – terrorizimit të qytetarëve dhe keqtratimin e të burgosurve shqiptar.
“Shteti duhet të mbajë përgjegjësi dhe të kompensojë çdo familje për këtë vuajtje nga PTSD (Post Traumatic Stress Disorder). Duhet të sigurohen mjekë të specializuar dhe avokatë që të hapin dosjen, sepse në gjithë ato pamje që kemi ndjekur, bëhet fjalë për tmerr të përjetuar, për dëme të mëdha dhe sulme me armë të rënda. Dikush duhet të mbajë përgjegjësi nga shteti për këtë vuajtje psikike dhe shpirtërore që kanë pësuar këta banorë”, tha profesor Kodra.
“Në rast se kjo nuk bëhet brenda një kohe të shkurtër nga institucionet përgjegjëse, apeloj që të ndërmarrim diçka diaspora, që të përgatisin një staf profesional. Jam i gatshëm të jem në shërbim të këtij misioni së bashku me koegët e mi”, thekson ai, duke shtuar se dëmet materiale edhe mund të kompensohen, por jo dëmet shpirtërore, dhe mendore që janë krijuar si pasojë e terrorit policor.
Ndërsa, z. Shefki Mexhuani, i cili ka të vrarë në këtë ngjarje, në Lagjen e Trimave, një nipin e tij,(djalin e motrës, tha se :” Nipi i tij nuk është vetëm fatlumi i tij, por të gjithë ju jeni “dajat” e atyre që ranë për liri, si fatlumi, Valoni, Mirasadi,,Turgaj Begaj,, Samiti, Nusreti, Xhaferii dhe Arbeni këta janë djemtë ma të mirë të Shqiptarisë, përcjellsit e amanetit të Adem Jasharit. Por, shtoi Mexhuani, ne jemi të gatshëm së bashklu me bashkëluftëtarët, e mi të futemi në atë rrugë të vështirë, që po na e imponon vetë regjimi i Gruevskit “tha ai.

Protesta u mbyll me leximin e mesazhit të përcjell nga kjo protestë paqësore, nga gazetari Qazim Doda, i cili tha se :” Kjo protestë u mbajtë në shenjë përkrahje dhe respekti për të burgosurit dhe dëshmorët e rënë në Betejën e Kumanovës, një protestë kjo gjithëshqiptare, për zgjidhjen e çështjes Shqiptare në Maqedoni dhe Lirimin e të burgosurbve Shqiptar”.
Në mesazh thuhej ndër të tjera se “ Faktori ndërkombëtar dështoi të reagojë në ngjarjet e Kumanovës, duke shkelur edhe Konventën e Gjenevës, për robërit e luftës mbasi disa prej tyre janë vrarë në qeli, tha ai duke shtuar :” Kemi, ardhur këtu të protestojmë kundra padrejtësisë që po i bëhet popullit shqiptar në trojet e veta, dhe të pushtuar nga sllavo-maqedonasit. Mos implemntimi i Marrveshjes së Ohrit solli vetëm një “garanci”, se në Maqedoni, mun të filloi luftë e re për konfederalizimin e Maqedonisë, ose ndarjen në mes sllaveve dhe shqiptarëve,. Edhe pse faktori ndërkombëtar u bë grant në implemtnimin e asaj marrëveshje, deri tani ajo ka dështuar, për të sjell në jetë një marrëveshje të tillë, siç qe ajo e arritur në Ohër me ndërmjetësimin e faktorit ndërkombëtar”, tha mes të tjerave z. Doda.
Protestuesit u shpërndan të qetë duke brohoritur Kumanovë jemi me ju, Shqiperi Etnike, Ndalni dhunës ndaj Shqiptarëve, Liri të burgosurve në Kumanovë.

Sela në Nju Jork, takoi kongresistin amerikan Eliot Engel

Engel pas disa javëve në Maqedoni

Engel : Mbas disa javëve do të jemë në Maqedoni – duke shpresuar se mund të takohem dhe të flasin për disa probleme, edhe me liderit e tjerë shqiptarë”

NEW YORK : Në kuadër të vizitës së tij në Shtetet e Bashkuara të Amerikës,Kryetari i Lëvizjes për Reforma në PDSH, z.Ziadin Sela , ka takuar në zyrën e tij kongresistin Eliot Engel, duke realizuar kështu një takim të rëndësishëm me Anëtarin e Dhomës së Përfaqësuesve të Kongresit amerikan, kongresist demokrat i qarkut të 16-të të New Yorkut.

Sela në fillim të takimit me kongresistin Engel, ka shprehur një mirënjohje të thellë për Shtetet e Bashkuar, kontributin e madh historik të SHBA, për Shqipërinë dhe çështjen shqiptare, duke filluar prej presidentit Uillson, Bush dhe Klinton, si dhe ka falenderuar me këtë rast kongresistin Engel – për përkrahjen e vazhdueshme që i ka dhënë ai dhe po i jep shqiptarëve, çështjes shqiptare kudo në Shqipëri, Kosovë dhe viset shqiptare.

Në këtë kontekst zoti Sela, ka thënë se Engel, mbetet përherë mik i përhershëm dhe i dëshmuar i shqiptarëve. “Kongresisti Engel, njëherit është i njohur për opinionin edhe si zëri i fuqishëm i çështjes shqiptare në Capitol Hill të Washington D.C”, tha Sela.

Më pas kreu i lëvizjes për reforma në PDSH, zoti Sela, ka njoftuar kongresistin Engel me zhvillimet politike në Maqedoni, veçanërisht, ai foli gjatë për ngjarjet 9-10 majit në Kumanovë. Ai bëri gjithashtu edhe një prezantim të gjerë edhe Lëvizjes për Reforma në PDSH, për të cilën Sela, tha se është e vetmja që mundet t’a ndryshojë situatën politike në Maqedoni, simbas tij.

Kryetari Sela, e njohu gjerësisht kongresistin Engel me qëndrimet e Lëvizjes për Reforma, rreth situatës politike në Maqedoni, për daljen nga kriza aktuale, si dhe tha se çfarë kontributi mund të jap lëvizja tij që të zgjidhen problemet dhe të përshpejtonin integrimin e Maqedonisë në strukturat euro-atlantike, NATO dhe BE.

Kreu i Lëvizjes për Reforma në PDSH, e siguroi kongresitin Engel, se lëvizja e tij, edhe më tej do të jet e fokusuar për të bërë një politik konstruktive dhe të përgjegjshme, për të dhënë kontributin e saj maksimal në çdo proces politik në Maqedoni.

Nga ana e tij kongresisti amerikan Eliot Engel, mik i përhershëm dhe i dëshmuar i shqiptarëve, u shpreh i lumtur për t’u takuar me Selën, për të mësuar më shumë rreth situatës aktuale në Maqedoni, për të cilën premtojë se do t’a vizitojë së shpejti

“Jam i lumtur gjithmonë, që po përpiqem për të ndihmuar, tha Engel, dhe i shqetësuar me atë se çfarë po ndodh me komunitetin shqiptar në Maqedoni. Unë dëshirojë t’ju sigurojë me këtë rast që shqiptarët në Maqedoni, duhet të trajtohen njësojë si të gjithë qytetarët, të jenë me të drejta të plota dhe të pa nëpërkëmbura”.

Më tej kongresisit demokrat i Nju Jorkut, Eliot Engel pohojë se ka qenë shumë i shqetësuar dhe nuk e ka kuptuar ende atë se çfarë ka ndodhur dhe pse ndodhi në Maqedoni.

“Jam i pa kënaqur me mosrespektimin e Qeverisë së Maqedonisë së Marrëveshjes së Ohrit. Unë mendoj se ka shumë punë për të bërë, ngaqë mendoj se Maqedonia, është një vend i rëndësishëm, dhe aleat i Shteteve të Bashkuara, duke e mbështur Maqedoninë dhe shpresuar se Maqedonia do të bëhet pjesë e BE-së, por, shtoi ai dua që të gjithë qytetarët e Maqedonisë, duke përfshirë edhe shqiptarë, duhet të trajtohen në mënyrë të drejtë dhe të jenë të barabartë.”

Kongresisti amerikan Eliot Engel, për gazetën tonë u shpreh i kënaqur për të shkëmbyer mendime me Selën, për të dëgjuar se çfarë tha kreu i Lëvizjes për Reforma në PDSH , dhe deklarojë se shpreson që mbas disa javëve të jetë në Maqedoni – duke shpresuar se ata mund të takohen dhe të flasin për disa probleme të tjera atje, edhe me liderit e tjerë shqiptarë./Beqir Sina

ANALISTËT – VETËM SHBA MUND TA ZGJIDHIN KRIZËN NË MAQEDONI

VOAL – SHKUP – Partitë politike kanë vazhduar me akuzat lidhur me dështimin e bisedimeve në Bruksel, ndërkohë që organet e tyre drejtuese po forcojnë pozicionet duke thelluar edhe më shumë dallimet dhe rrjedhimisht duke pakësuar gjasat për zgjidhjen e krizës së rëndë në të cilën ndodhet vendi.

VMRO DPMNE-ja e kryeministrit Nikolla Gruevski, në mbledhjen e Komitetit Ekzekutiv që ka përfunduar punimet të dielën vonë, për dështimin e bisedimeve edhe njëherë ka fajësuar Lidhjen Social-Demokrate të opozitës.

“Ne si shtet kemi ardhur në situatë që një parti e cila vazhdimisht humb në zgjedhje të shantazojë tërë shtetin dhe të nxis krizë politike duke shpresuar në marrjen e pushtetit, pa zgjedhje, pa marr mandatin e popullit, pa mbajtur llogari për çështjet më të rëndësishme të vendit, apo interesat e qytetarëve”.

“Ajo po rrënon imazhin e shtetit para faktorit ndërkombëtar, po rrënon ekonominë e vendit me qëllim që dështimet t’i mvishen qeverisë. Është e qartë se ajo tenton të prish marrëveshjen e dy qershorit, të prish gjithçka që është arritur deri më tani. Pavarësisht kësaj, ne jemi të gatshëm në çdo kohë të përballemi me ta në zgjedhje”, ka deklaruar Ilija Dimovski nga VMRO DPMNE-ja.

Nga Lidhja Social-Demokrate në mbledhjen e së hënës që pritet të zgjasë deri në orët e vona do të vendosin për hapat e mëtejmë.

Opozita ndërkohë ka paralajmëruar nisjen e publikimit të dëshmive të reja nga ajo që njihet si aferë e përgjimeve. Zaev pretendon se posedon edhe shumë fakte tjera për siç shprehet, punën kriminale të pushtetit aktual të cilin e akuzon për dështimin e bisedimeve të fundit në Bruksel.

Nga LSDM-ja thonë se janë të gatshëm për vazhdimin e bisedimeve dhe formimin e një qeverie kalimtare, por pa kryeministrin aktual, Nikolla Gruvski.

“Zgjedhjet e reja nuk mund ti organizoj një qeveri me një kryeministër i cili është fajtori kryesor për të gjitha veprimet kriminale që kanë ndodhur vite më radhë në Maqedoni”, thonë nga LSDM-ja e cila ka marrë mbështetjen e të gjitha partive të vogla opozitare si dhe të dhjetëra organizatave joqeveritare për të udhëhequr bisedimet eventuale me kryeministrin, Nikolla Gruevski.

Por, bazuar në qëndrimet e partive bisedimet vështirë se do të nisin ndërkohë që në opinion janë shtuar kritikat edhe ndaj përfaqësuesve ndërkombëtar, në veçanti ndaj komisionerit Johanes Hahn se gjoja mban anën e kryeministrit, Nikolla Gruevski.

Ismet Ramadani nga Këshilli Euroatlantik dhe njohës i çështjeve politike thotë se dyshimet janë rritur kur Hahn doli me qëndrimin se zgjedhjet e kaluara kanë qenë kryesisht të mira në kohën kur opozita çdo ditë publikon dëshmi për falsifikimin e tyre.

“Me deklaratat e tyre lanë mjaft dyshime në opinion se janë të përcaktuar të ndihmojnë njërën palë. Johanes Hahn kur ishte në SHBA dha një deklaratë duke vlerësuar raportin e OSBE-së, sigurisht se pa e lexuar, pra në mënyrë paushall”, tha Ramadani duke ngritur nevojën për kyçje serioze dhe në një nivel shumë të të lartë të diplomacisë amerikane në zgjidhjen e krizës politike.

Ai thotë se ndërhyrja amerikane ka qenë vendimtare në shumë raste të krizave në Maqedoni, ndërsa veçon atë të konfliktit të vitit 2001.

“Unë mendoj se duhet një kyçje e nivelit më të lartë të SHBA-ve, me një përfaqësues dhe ndërmjetësim në stilin e tyre të njohur. Ata janë shumë pragmatikë dhe praktikë. Për të identifikuar shumë shpejtë dhe qartë fajtorin, këtë mund ta bëjë vetëm politika amerikane andaj vlerësoj se kjo është më se e domosdoshme”, thotë Ismet Ramadani, Kryetar i Këshilli Euroatlanik të Maqedonisë.

BDI ‘E PËRFSHIRË NË VEPRIMTARI KRIMINALE’

Bashkimi Demokratik për Integrim (BDI), parti në Qeverinë e Maqedonisë, dhe zyrtarët e saj, përfshirë edhe kreun e partisë, Ali Ahmeti, janë të përfshirë në veprime të shumta kriminale, ka thënë lideri i opozitës në Maqedoni, Zoran Zaev, teksa ka publikuar biseda të shumta telefonike të përfaqësuesve të kësaj partie nga ajo që njihet si “aferë e përgjigjimeve”.

Zaev ka publikuar biseda të përgjuara telefonike, të zhvilluara mes kryetarit të BDI-së, Ali Ahmeti, me zëvendëskryeministrin, Musa Xhaferi, ministra dhe zyrtarë tjerë të partisë, për atë se si merren vesh për tenderë të ndryshëm, ndarjen e posteve dhe përfitime materiale.

Në bisedën në vazhdim, gjithnjë sipas Zaevit, kryetari të BDI-së, Ali Ahmeti, dhe kryetari i degës partiake në Çair të Shkupit, Beqir Asani, merren vesh për çmimin e një parcele që do t’i shitej një afarist të interesuar.

(Biseda është transkriptuar në origjinal)

“A.A-Për një metër katror me mujt me ia qit 1 mijë mirë është, nëse s’mundeni…

B.A-Do të folmi na pak me to se ishte në Turqi, ai që ishte i interesum, dhe në qoftë se ja del mirë, nëse jo unë mendoj se nuk ja vlen me majt.

“A.A– Për 1 mijë hiç mos vet.

B.A– Ok, shef.

A.A– Futja.

B.A- U bë.

A.A- E shomim pastaj, kryesorja llogaria është e mirë.

B.A- Ia vlen.

A.A- Ia vlen, ia vlen

B.A- Nuk janë edhe pak.

A.A-Po mundesh t’ia hidhesh, hidhja.

B.A- U bë shef”.

Kreu i opozitës, Zoran Zaev, ka thënë se nga bisedat telefonike dëshmohet qartë, sipas tij, “përfshirja e zyrtarëve të BDI-së në krime të renda“.

Ai ka publikuar edhe biseda ku dëgjohen kërcënime me likuidime dhe presione tjera mes përfaqësuesve të partisë.

“Përgjegjësia e tyre në gjithë atë që po ndodh në Maqedoni është më se e qartë. Arsyet për qëndrimin e BDI-së në pushtet edhe kur kanë qenë të nënçmuar, nuk kanë qenë interes i qytetarëve, por fuqia, interesi dhe paraja. Gjithë atë që e ka bërë Gruevski, krimin, korrupsionin, presionet dhe shkeljet e tjera të shumta, e ka bërë me dijen edhe të BDI-së“, ka deklaruar Zaev.

Një bisedë telefonike mes Ahmetit dhe kryemistrit Nikolla Gruevski flet edhe për ndërtimet pa leje, ku përfshihet edhe ish-ministrja e Brendshme, Gordana Jankullovksa, e cila sërish fyen shqiptarët duke i quajtur “indianë“ dhe me epitete tjera ofenduese.

Zaev ka thënë se nga bisedat dëshmohet qartë se “BDI-ja ka partizuar në skajshmëri Universitetin Shtetëror të Tetovës dhe institucione tjera“.

Pretendimet e kreut të opozitës, përmes një komunikate, janë hedhur poshtë nga Bashkimi Demokratik për Integrim.

Partia e Ahmetit vlerëson se pohimet për krime nga BDI-ja janë konstatime të Zaevit që nuk mund të vërtetohen në bisedat e publikuara.

“BDI mbetet në qëndrimin që të publikohen të gjitha materialet që opozita disponon për BDI-në, por kërkon që të mos të bëhen interpretime qëllimisht të gabuara për ta lajthitur opinionin. BDI, gjithashtu, mbetet në qëndrimin që të njëjtat të procesohen nëpër institucione sipas dëshirës së opozitës”, thuhet në kumtesën e BDI-së

Ndryshe, publikimi i bisedave telefonike të zyrtarëve të qeverisë aktuale ishte pezulluar nga ana e liderit të opozitës për gati dy javë, për shkak të negociatave për zgjidhjen e krizës politike, por pas dështimit të tyre, Zaev ka vendosur me prezantimin e dëshmive të reja, ndërkohë që paralajmëron edhe masa tjera kundër pushtetit aktual, nëse deri nga fundi i këtij muaji nuk arrihet zgjidhje për qeverinë kalimtare, e cila do të kishte mandat për organizimin e zgjedhjeve të parakohshme parlamentare.

“Nëse deri atëherë nuk arrijmë zgjidhje, ne do t’i vëmë në dispozicion të gjithë mekanizmat demokratikë, përfshirë protestat kundër regjimit aktual“, ka deklaruar Zaev.

Në 100 vjetorin e Josif Bagerit, shqiptarët ortodoksë në Maqedoni kërkojnë kujdes

VOAL – SHKUP – Në Shkup u shënua 100 vjetori i vdekjes së Rilindasit të njohur shqiptar, Josif Bageri, organizuar nga shoqata Josif Bageri.

Kjo ceremoni pati rëndësinë e saj për shkak të pranisë së dy personaliteteve të mirënjohura shqiptarëve ortodoksë, Branislav Sinadinovski dhe Branko Manojlovski, raporton ina.

Ata përmes kësaj ceremonie kanë përcjellë mesazhe të rëndësishme lidhur me komunitetin ortodoks shqiptarë në Maqedoni dhe të kaluarën e tyre të pasur që nga figura e rilindasit Josif Bageri, që i takon Rekës së Epërme, zona që nxori personalitete të shquara nga radhët e shqiptarëve ortodoks.

Profesori i mirënjohur Branislav Sinadinovski theksoi se ata po vazhdojnë rrugëtimin e Bagerit, një figurë emblematike e shqiptarëve në Maqedoni, i cili ka dhënë kontribut mbarëshqiptarë për kombin, gjuhën dhe shkollën shqipe.

“Duhet që sa më shpejt të ndërtojmë një muze mbi themelet e shtëpisë së tij, në Nistrovë, ku do të përkulen të gjithë shqiptarët dhe më pas atë pak që mundemi të bëjmë si shtet është të formojmë fondacion me emrin e tij dhe t’u jepen stipendi studentëve më të mirë, si dhe të sillet ligj për ndarjen e çmimit shtetëror me emrin Josif Bageri”, deklaroi Sinadinovksi.

Ai më tej theksoi se Josif Bageri dhe shumë veprimtarë të tjerë që trashëguan veprën dhe misionin e tij kombëtar ndihmuan në përhapjen e arsimit shqip ndër masat popullore.

Në këtë ceremoni fjalime përshëndetëse pati edhe Branko Manojlovski, një figurë e shquar e komunitetit shqiptar ortodoks, që ishte ndër të parët që shpalosi rrënjët kombëtare dhe misionin e zbardhjes së të vërtetës për shqiptarët ortodoks në Maqedoni. “Shqiptarëve ortodoksë duhet t’i njihni të gjithë, sepse ata janë fshehur, t’u jepni pozita dhe punë dhe t’i lironi, sepse ata nuk lirohen me muhabete dhe llafe”, theksoi Manojlovksi.

Në këtë ceremoni nuk lanë pa folur edhe kryetari i BDI-së, Ali Ahmeti dhe kryetari i Shoqatës së Veteranëve të Luftës së UÇK-së, Fazli Veliu, ndërsa fjalime rasti patën edhe personalitete universitare dhe akademike që evokuan për veprimtarinë e Josif Bagerit.

RADIO EVROPA E LIRË – MIJËRA VETA MBRËMË NË SHKUP KËRKUAN DORËHEQJEN E QEVERISË

Mijëra vetë kanë protestuar mbrëmë në Shkup të Maqedonisë duke kërkuar dorëheqjen e qeverisë, në periudhën kur negociatat e ndërmjetësuara ndërkombëtarisht për kapërcimin e krizës së thellë politike, duket se gjenden në një rrugë pa krye.

Në protestën e organizuar nga lëvizja Besa, ku kryesisht kanë marrë pjesë shqiptarët nga të gjitha viset e Maqedonisë, është kërkuar edhe dorëheqja e Ali Ahmetit, lideri i Bashkimit Demokratik për Integrim, që është pjesë përbërëse e kaolicinit qeverisës, që udhëhiqet nga kryeministri, Nikolla Gruevski, lideri i partisë WMRO-DPMNE.

Agjencia AP raporton se protestuesit shqiptarë kanë marshuar të qetë në Shkup.

Organizuesit e protestës, po ashtu, kanë kërkuar hetime të reja për disa raste gjyqësore ku janë dënuar shqiptarët, duke konsideruar se ka dyshime se ato procese ishin të motivuara politikisht.

NË SHKUP U ZHVILLUA PROTESTA GJITHËSHQIPTARE E ORGANIZUAR NGA LËVIZJA POLITIKE ‘BESA’

VOAL – SHKUP – Disa mijëra shqiptarë sot protestuan në Shkup në organizimin të lëvizjes politike “BESA”.

Protesta ka nisur nga parku i Çairit duket përfunduar në urën “Goce Dellçev” disa metra larg Qeverisë.

Protestuesit brohorisnin “Stop dhunës ndaj shqiptarëve”, “Ali tradhtari”, “Besa –Besë besën e kemi dhënë!, “UÇK” , etj në shoqërimin edhe të këngëve patriotike.

Marshi protestues u sigurua edhe nga dhjetëra aktivistë të Lëvizjes “BESA” dhe shoqatave të tjera pjesëmarrëse në protestë.

Anëtari i Këshillit Koordinues të Lëvizjes BESA, Skender Rexhepi deklaroi se prania e një numri kaq të madh dëshmon se Këshilli Organizativ e bëri mirë punën duke treguar se shqiptarët dinë të bashkohen për të mbrojtur të drejtat e tyre.

“Këshilli organizativ e ka bërë këtë protestë sepse nuk do të ketë më shkelje të shqiptarëve. Mjaft më me vrasje burgosje, pse mos jemi bashkë dhe të jemi me popullin. Deri sa do përmbushen kërkesat tona ne nuk do të ndalemi. Ky shtet duhet të formatohet dhe të jetë i barabartë”, deklaroi Rexhepi në skenën e ngritur pranë urës disa metra larg Qeverisë.

Në këtë protestë me moton “Protestoj Shqip” u kërkua dorëheqja e Qeverisjes aktuale, zbardhja e të gjitha të vërtetave për shqiptarët dhe kërkesa për një marrëveshje të re në Maqedoni.

Protesta u vlerësua tejet masive nga organizatorët dhe se në përkrahje të saj ishin dhjetëra shoqata dhe thirrje të personaliteteve publike shqiptare. Protestës nuk i`u bashkëngjitën dy partitë e tjera RDK dhe Lëvizja për Reforma në PDSH e Ziadin Selës, për shkak të mosmarrëveshjeve midis tyre. kp

NË SHKUP PO ZHVILLLOHET MARSHI PROTESTUES GJITHËSHQIPTAR ‘PROTESTOJ SHQIP’

VOAL – SHKUP -Në kryeqytetin e Maqedonisë vazhdon marshi protestues gjithëshqiptar nën organizim të Lëvizjes “BESA”, me moton “Protestoj Shqip”.

Në këtë protestë kërkohet dorëheqja e Qeverisë aktuale, zbardhja e të gjitha të vërtetave për shqiptarët dhe kërkesa për një marrëveshje të re në Maqedoni.

Protestuesit në lagjen Çair kanë brohoritur me parullat: “Ali Ahmetin e japim, lirinë s’e japim”, “Menduh Thaçin e japim, lirinë s’e japim”.

Sipas këshillit organizativ, protesta nis nga Parku i Çairit dhe do të përfundojë para urës “Goce Dellçev” që është afër Qeverisë së Maqedonisë. rel

Radio Evropa e Lirë – RIKTHEHEN PROTESTAT NË MAQEDONI

Rikthehen protestat në Maqedoni kundër qeverisë aktuale.

Nga lëvizja politike Besa, organizatore e protestës së të shtunës, thonë se pushteti aktual është fajtor për gjendjen e rëndë në të cilën ndodhet vendi.

Kritika në veçanti drejtohen ndaj dy partive kryesore politike shqiptare, Bashkimi Demokratik për Integrim në Qeveri dhe Partia Demokratike Shqiptare e opozitës, të cilat fajësohen, jo vetëm për moszgjidhjen e çështjeve të hapura të shqiptareve, por edhe për, siç thonë, “përkeqësimin e statusit të shqiptarëve në vend dhe rastet e montuara si “Monstra”, “Sopoti” dhe së fundi ai në Lagjen e Trimave në Kumanovë”.

Afrim Gashi nga lëvizja Besa thotë se dy partitë shqiptare janë peng i politikave të pushtetit aktual.

“Shqiptarët e Maqedonisë nuk mund të jenë peng të disa figurave politike andaj mendoj se kjo protestë do të jetë zëri i shqiptarit të Maqedonisë. Konsideroj se BDI-ja dhe PDSH-ja për momentin nuk përfaqësojnë shqiptarët dhe interesat e tyre, por edhe për maqedonasit është ky një mesazh se nuk mund ta zgjidhin çështjen shqiptare duke hipotekuar disa figura politike”.

“Nëse dëshirohet që të zgjidhen problemet në Maqedoni, të ketë gjendje më stabile dhe afatgjate, është e nevojshme që maqedonasit ta kuptojnë saktë se cili është interesi i shqiptarëve dhe cilat janë kërkesat e tyre”, thotë Gashi duke paraqitur më pas kërkesat e protestuesve.

“Kërkesa e parë është dorëheqja e Qeverisë VMRO-BDI, pastaj zbardhja e të gjitha rasteve të montuara siç është rasti Monstra, rasti Sopoti, Brodeci, por edhe rasti i fundit në Lagjen e Trimave në Kumanovë. Kërkesa e tretë dhe shumë e rëndësishme është që të dëgjohet zëri i shqiptarëve se ata kërkojnë një sistem tjetër shtetëror, ridefinimin e Maqedonisë”, shpjegon Gashi.

Protesta e lëvizjes Besa dhe e dhjetëra organizatave joqeveritare që dolën në mbështetje të saj ka karakter një-etnik, edhe pse drejtuesit e saj bën thirrje që asaj t’i bashkëngjiten edhe pjesëtarë të bashkësive tjera etnike.

Nga lëvizja “Protestoj”, organizatore e protestave të ndryshme kundër pushtetit aktual thonë se partitë apo kushdo qoftë tjetër duhet të mbajnë llogari që protestat të mos i drejtohen vetëm një etniteti, por të kenë karakter shumetnik, pasi Maqedonia përballet me probleme të shumta që prekin të gjithë qytetarët, pa marrë parasysh përkatësinë e tyre etnike.

“Të gjithë jemi të goditur nga gjendja, në të cilën ndodhemi. Të drejtat themelore të qytetarëve janë shkelur andaj edhe mendoj se më mirë do të ishte që së bashku të luftojmë kundër kësaj gjendjeje dhe të mos dalim me kërkesa të ndara. Këtu nuk duhet të përfshihen vetëm se kërkesat etnike, pasi ka edhe shumë probleme tjera, si ato ekonomike, sociale e kështu me radhë”, thotë Jordan Shishovski nga lëvizja “Protestoj”.

Lidhur me krizën politike si pasojë e asaj që njihet si aferë e përgjimeve, janë mbajtur edhe protesta tjera. Ajo e opozitës u mbajt më 18 maj para qeverisë me pjesëmarrjen e bashkësive të ndryshme etnike, që shënoi njëherë edhe protestën e parë shumetnike në vend.

Një ditë më vonë, partia VMRO-DPMNE e kryeministrit Nikolla Gruevski organizoi para Kuvendit një kundër-protestë për siç u tha, mbrojtjen e demokracisë në Maqedoni.

Dy partitë politike që nga këto dy protesta kanë vendosur kampe, njëra para Qeverisë dhe tjetra para Kuvendit duke organizuar manifestime të ndryshme, njëra kundër Qeverisë dhe tjetra në mbrojtje të saj.

SOT NË SHKUP MARSHI PROTESTUES GJITHËSHQIPTAR – PROTESTOJ SHQIP

VOAL – SHKUP – Protestoj shqip”, është moto e marshit protestues gjithëshqiptar që do të mbahet sot në Shkup. Protestuesit do të kërkojnë dorëheqjen e qeverisë antishqiptare, të inkriminuar dhe të korruptuar Gruevski & Ahmeti; zbardhjen e të gjitha të vërtetave shqiptare në Maqedoni dhe do të parashtrojnë kërkesën për një marrëveshje të re për Maqedoninë.

Organizatorët thonë se ky është marsh shqiptar, pa emblema partiake dhe për këtë arsye edhe një herë i kanë ftuar të gjithë shqiptarët e Maqedonisë, që të dalin bashkë me familjet e tyre për t’i shprehur fuqimisht kërkesat e kësaj proteste.

“Duam të shpjegojmë se kjo protestë është shqiptare, sepse kriza në për të cilën kalon ky shtet nuk e ka dëgjuar vetëm zërin shqiptar, nuk e ka dëgjuar vetëm mendimin e shqiptarëve. Sipas nesh, shqiptarët janë të hapur të diskutojnë edhe për shtet qytetar, edhe për deetnizimin të shtetit, por para së gjithash duhet të merremi vesh t’i përmbyllim çështjet ndëretnike. Derisa ne diskriminohemi si shqiptarë, nuk mund të veprojmë si qytetarë”, thuhet në njoftimin e Këshillit Organizativë.

Marshi do të fillojë në parkun e Çairit në orën 17.00 dhe do të lëvizë nëpër rrugën Cvetan Dimov, deri te semaforët e qendrës tregtare “Mavrovasja”, ku do të kthejë djathtas dhe do të drejtohet te Qeveria e Republikës së Maqedonisë. Meqë para Qeverisë tashmë janë ngujuar një grup protestuesish, ne do të ndalojmë te ura “Goce Dellçev”. Aty do të jetë e vendosur një skenë, në të cilën do të lexohet mesazhi i marshit protestues dhe do të mbahen disa fjalime rasti.

MINISTRIA E JASHTME E MAQEDONISË KONFIRMON SE BEG RIZAJ E MIRSAD NDRECAJ ISHIN TË ARRESTUAR

Ministria e Jashtme e Maqedonisë e konfirmoi autenticitetin e dokumentit të publikuar nga televizioni Alsat M para 3 ditësh, përmes të cilit MPJ-ja e kishte njoftuar ambasadën e Kosovës se mes personave të arrestuar nga policia gjenden edhe Mirsad Ndrecaj dhe Beg Rizaj, të cilët më vonë rezultuan të vdekur.

“Ajo ishte listë preliminare, e të gjithëve në identifikim dhe ne si Ministri e Jashtme e kemi marrë për përdorim të mëtutjeshëm. Atë e përcollëm edhe deri tek Ambasada e Kosovës në Shkup”, thuhet në përgjigjen e zëdhënësit të Ministrisë së jashtme për televizionin Alsat M.

Në këtë listë preliminare që e quan MPJ nuk figurojnë emrat e 8 personave të tjerë që humbën jetën gjatë aksionit por qëndrojnë ata të Mirsad Ndrecajt dhe Beg Rizajt.

Nga dikasteri i Nikolla Poposkit nuk japin asnjë shpjegim për fatin e dy kryesuesve të grupit të Kumanovës. Alsat M iu drejtua sot me të tjera pyetje Ministrisë së Jashtme, se si ka ndodhur që në momentin e shkresës zyrtare të dërguar institucioneve kosovare, Shkupi zyrtar ka thënë se Rizaj dhe Ndrecaj janë të gjallë dhe të arrestuar, ndërsa vetëm pak ditë më vonë Ministria e Brendshme njoftoi se të dy gjenden në mesin e viktimave.

Alsat M pyet gjithashtu MPJ-në se pse në këtë listë preliminare që është dërguar 3 ditë pas aksionit në Kumanovë nuk figurojnë emrat e 8 personave të tjerë që kanë humbur jetën gjatë aksionit, Xhafer Zymeraj, Valon Kabashi, Turgaj Gashi, Arben Rexhaj, Sami Kastrioti, Hisen Rushiti, Fatlum Vishesela dhe Nusret Kaloshi.

Deri në këtë moment nuk kemi marrë përgjigje plotësuese nga Ministria e Jashtme edhe pse premtuan se do të përgjigjen brenda ditës. Ambasadori i Kosovës në vend Ylber Hysaj nga ana tjetër vazhdon të heshtë dhe të mos bashkëpunojë me mediat për të zbardhur të vërtetën e plotë rreth dokumentit të adresuar për të nga institucionet e Shkupit.

Për të tretën ditë me radhë Alsat M kërkon qëndrim prej tij, por kjo është përgjigjja e vetme që morëm sot.

Hysa si duket për fundjavë ka zgjedhur të qëndrojë në Greqi, ndërsa ne do të vazhdojmë të presim kthimin e tij dhe përgjigjen e tij lidhur me këtë rast. Dokumenti i Ministrisë së Jashtme drejtuar ambasadës së Kosovës ku thuhet se Komnadant Nato dhe Komandant Begu janë të arrestuar, mban datën 12 maj, ndërsa vetëm një ditë më vonë, Ministria e Brendshme përmes një komunikate zyrtare për mediat i shpalli të vrarë të dy kosovarët.

Zbardhja e të vërtetës për rastin e Kumanovës mund të bëhet vetëm me hapjen sërish të një hetimi mbi ngjarjet e 9 dhe 10 majit. Deri tani zyrtarisht një gjë të tillë nuk e ka kërkuar askush. Hetim të ri mund të kërkojnë autoritet e Kosovës por edhe ato të vendit, të cilët deri tani nuk kanë treguar gatishmëri për një gjë të tillë.

AKADEMIKJA E QUAN ‘KRIM KULTUROR’ MËSIMIN E SHQIPES NGA FËMIJËT MAQEDONAS

Akademikja maqedonase Katica Gjullakova në një deklaratë për gazetën maqedonase “Veçer” ka theksuar se asnjëherë gjuha shqipe nuk mund të mësohet nga maqedonasit nëpër çerdhe, shkolla fillore dhe ato të mesme të Maqedonisë.

Gjullakova këto komente i bëri pas paralajmërimit të liderit të opozitës maqedonase Zoran Zaev se nuk ka asgjë kundër që edhe fëmijët maqedonas të mësojnë gjuhën shqipe nëpër çerdhe edhe shkolla.

“Askush nuk ka të drejt maqedonasit t`i obligojë të mësojnë gjuhën shqipe. Ky është krim kulturor që të detyrohen maqedonasit që të obligohen të përdorin një gjuhë tjetër. Sot shumë lehtë premtojmë masa ekstreme radikale të cilat e kërcënojnë në tërësi pasqyrën identitare të shtetit maqedonas”, ka deklaruar akademikja Gjullakova, transmeton zhurnal.mk.

UASHINGTONI MBËSHTET PËRPJEKJET E KOMISIONERIT HAHN PËR MAQEDONINË

Shtetet e Bashkuara shprehën sot mbështetje për përpjekjet e Komisionerit të Bashkimit Evropian Johannes Hahn për të ndërmjetësuar për zgjidhjen e krizës politike në Maqedoni.

Sipas zëdhënëses të Departamentit të Shtetit, Shtetet e Bashkuara përshëndesin udhëheqësit politikë të Maqedonisë që më 2 qershor ranë dakort që vendi të zhvillojë zgjedhje të reja deri në prill të vitit të ardhshëm për të dalë nga kriza e tanishme.

Sipas zëdhënëses rruga nuk do të jetë e lehtë, por Shtetet e Bashkuara dhe Bashkimi Evropian do ta ndihmojnë Maqedoninë drejt përballimit të sfidave dhe realizimit të synimit të saj për t’u integruar në institucionet Euro-Atlantike.

Ndërkohë udhëheqësi i opozitës në Maqedoni, Zoran Zaev tha të premten se po largohet nga bisedimet e planifikuara për javën tjetër në Bruksel, që synojnë t’i japin fund krizës politike, e cila vazhdon prej shumë muajsh. Ai iu referua komenteve të bëra të enjten nga Komisioneri i Bashkimit Evropian për çështjet e Zgjerimit, Johannes Hahn, komente, që sipas tij përmbanin elementë të njëanshëm.

Komisioneri i Bashkimit Evropian për çështjet e Zgjerimit, Johannes Hahn, tha dje gjatë një konference në Uashington se përsa i përket zgjedhjeve të ardhshme në Maqedoni, janë të nevojshme disa përgatitje, të cilat kërkojnë kohë.

Zoti Hahn arriti të martën një marrëveshje në parim mes udhëheqësit të opozitës, Zoran Zaev dhe Kryeministrit Nikolla Gruevski për zgjedhje të parakohshme në prill të vitit të ardhshëm.

Komisioneri i BE-së tha dje se zgjedhjet e prillit të kaluar u vëzhguan nga OSBE-ja dhe, megjithë disa mangësi, në përgjithësi ka patur një raport pozitiv rreth tyre.

Udhëheqësi i opozitës, Zoran Zaev reagoi sot duke thënë se përshkrimi që zoti Hahn u bëri zgjedhjeve të kaluara përmban elementë të njëanshëm, prandaj ai nuk do të marrë pjesë në negociatat e planifikuara për më 10 qershor në Bruksel me ndërmjetësimin e BE-së.

Opozita në Maqedoni thotë se zgjedhjet e kaluara u manipuluan. Ajo e ka bojkotuar parlamentin që nga ajo kohë.

Një çështje me rëndësi kritike për bisedimet e ardhshme me ndërmjetësimin e BE-së është se kush do t’i organizojë dhe monitorojë zgjedhjet.

Zoti Hahn tha dje se për zgjedhjet e ardhshme, që ai ka thënë se mund të mbahen në fund të prillit 2016, do të duhet të modifikohet kodi zgjedhor dhe të shqyrtohen listat e zgjedhësve.

Qeveria e Kryeministrit Gruevski ka qenë nën trysni që nga janari i këtij viti lidhur me një skandal përgjimesh të zyrtarëve të lartë. Përgjimet u bënë publike nga zoti Zaev dhe qeveria thotë se ato janë organizuar nga një shërbim i huaj zbulimi në bashkëpunim me zotin Zaev për të rrëzuar qeverinë.

Në komentet e djeshme, komisioneri Hahn tha BE-ja po i bën thirrje opozitës të kthehet në parlament për ta trajtuar çështjen e përgjimeve përmes debatit. Nga ana tjetër, sipas zotit Hahn, kjo është një çështje penale, që duhet trajtuar në bazë të standardeve ndërkombëtare dhe evropiane.

Ai tha se të gjitha palët kanë rënë dakord të pranojnë rekomandimet e Komisionit Evropian, sidomos për çështjet e sundimit të ligjit dhe pavarësinë e gjyqësorit. za

QËNDRIMET E KOMISARIT HAHN E REVOLTOJNË OPOZITËN MAQEDONASE

Komisari i BE për Fqinjësinë dhe Zgjerimin, Johannes Hahn në Këshillin Alantik në Uashington ka deklaruar: nëse kriza politike në Maqedoni nuk zgjidhet, ky vend mund të humbasë rekomandimin për hapjen e bisedimeve me BE.

Sipas Komisarit të BE, Johannes Jahn, në Maqedoni ka një skandal të madh, që askush nuk mund ta injorojë. “Ka mbi 22 mijë inçizime dhe të mos flasim për përmbajtjen e tyre që është diçka tjetër. Ne mendojmë se duhet të ketë një reagim të dyfishtë në gjithë këtë. Njëra është politike dhe për këtë kemi kërkuar që opozita të kthehet në parlament. Ndaj gjithë kësaj situate duhet që të ketë një qasje sipas standardeve evropiane”, ka thënë Hahn.

Sipas tij, Evropa ka përgjegjësi morale që të sigurojë perspektivën evropiane të Maqedonisë në interes të stabilitetit të rajonit. “Jam i vetëdijshëm për krizën në Maqedoni dhe ka pasur bisedime mes opozitës dhe qeverisë për kohën më të përshtatshme për mbajtjen e zgjedhjeve, sepse është e domosdoshme përgatitja”, ka deklaruar Hahn.

Opozita maqedonase bojkoton takimin e Brukselit

Komisioneri i BE Johannes Hahn gjatë një fjalimi në Uashington ka theksuar se edhe pse zgjedhjet e kaluara adresonin defekte të shumta, ato u vlerësuan përgjithësisht pozitive nga OSBE-ja. Ky vlerësim për zgjedhjet në Maqedoni ka hasur në reagim të ashpër tek opozita maqedonase. Kryetari i LSDM-së Zoran Zaev nuk do të marë pjesë në bisedimet e filluara mes 4 liderëve të partive politike dhe me ndërmjetësimin e euro-komisarit Johannes Hahn, që ishin planifikuar të vazhdonin më 10 qershor në Bruksel. Vendimi radikal i opozitës vjen pas deklaratës së komisarit Hahn të bërë gjatë vizitës në Uashington, ku theksoi se proceset zgjedhore në Maqedoni janë vlerësuar pozitivisht nga misioni mbikëqyrës i OSBE-së. Zaev vlerëson se qëndrimi i tillë i euro-komisarit është i njëanshëm dhe tendencioz, për shkak se edhe OSBE-ja, por edhe bisedat e përgjuara konfirmojnë, se proceset e fundit zgjedhore kanë qenë të manipuluara: “Bëj me dije se nuk do të marr pjesë në mbledhjen e caktuar me eurokomisarin Hahn, më 10 qershor në Bruksel. Deklarata në Uashington e Johannes Hahnit, komisarit për zgjerim të BE-së, përmban elemente tendencioze dhe është e papërshtatshme për periudhën përgatitore, para mbledhjes vendimtare në Bruksel”, deklaroi Zoran Zaev, kryetar i LSDM-së.

Kryetari i LSDM-së Zoran Zaev

Zaev tha gjithashtu se arsye shtesë për të mos marë pjesë në takimin e Brukselit janë edhe veprimet e fundit të Prokurorisë, por edhe dhuna që ishte evidentuar periudhën e fundit, ndaj disa kritikuesve të pushtetit. “Pas bisedimeve më 2 qershor në Shkup, është ngritur një tjetër aktpadi kundër meje për marrje ryshfet, edhe pse padia penale nga policia kundër meje ishte për tentim për marrje ryshfeti. Është bërë diversion i veturës së djalit të Zoran Verushevskit-i akuzuar për përgjimet, janë bërë bastisje të reja në shtëpitë e të paraburgosurve, janë djegur vetura, janë sulmuar kritikët e pushtetit”, ka thënë Zoran Zaev.

Komisioni i BE hedh poshtë mediat pro-qeveritare

Disa media pro-qeveritare në Shkup kanë shtrembëruar deklaratën e komisarit Hahn në Uashington, duke pretenduar në raportimine tyre, sikur komisasri Hahn ka deklaruar që qeveria aktuale do t’i organizojë zgjedhjet e reja, prillin e ardhshëm. Komisioni Evropian reagon duke i kundërshtuar spekulimet. “Komisari nuk ka thënë se qeveria aktuale duhet t’i organizojë zgjedhjet e parakohshme. Komisari Hahn vetëm ka përsëritur atë çfarë u ra dakord në takimin në Shkup. Kjo është se do të ketë zgjedhje të reja në prill 2016, do të ketë një përforcim të rregullave zgjedhore dhe që duhet të identifikohen parregullsitë e zgjedhjeve të mëparshme. Komisioni Evropian do të lehtësojë reformat ligjore dhe se palët kanë treguar gatishmëri që javën e ardhshme të vendosin se kush do ta bëjë organizimin e qeverisë, e cila duhet të përgatisë zgjedhjet”, thuhet në reagimin e Komisionit Evropian. dw

ZAEV – LARGOHEM NGA BISEDIMET

Udhëheqësi i opozitës në Maqedoni, Zoran Zaev tha se po largohet nga bisedimet e planifikuara për javën tjetër në Bruksel, që synojnë t’i japin fund krizës politike, e cila vazhdon prej shumë muajsh. Ai iu referua komenteve të bëra dje nga Komisioneri i Bashkimit Evropian për çështjet e Zgjerimit, Johannes Hahn, komente, që sipas tij përmbanin elementë të njëanshëm.

Komisioneri i BE-së tha dje se zgjedhjet e prillit të kaluar u vëzhguan nga OSBE-ja dhe, megjithë disa mangësi, në përgjithësi ka patur një raport pozitiv rreth tyre.

Opozita në Maqedoni thotë se zgjedhjet e kaluara u manipuluan. Ajo e ka bojkotuar parlamentin që nga ajo kohë.

Një çështje me rëndësi kritike për bisedimet e ardhshme me ndërmjetësimin e BE-së është se kush do t’i organizojë dhe monitorojë zgjedhjet.

Zoti Hahn tha dje se për zgjedhjet e ardhshme, që ai ka thënë se mund të mbahen në fund të prillit 2016, do të duhet të modifikohet kodi zgjedhor dhe të shqyrtohen listat e zgjedhësve.

Ai tha se të gjitha palët kanë rënë dakord të pranojnë rekomandimet e Komisionit Evropian, sidomos për çështjet e sundimit të ligjit dhe pavarësinë e gjyqësorit. za

IGFM: TË NDIHMOHET KUMANOVA, TË ZBARDHET E VËRTETA

VOAL – Forumi Ndërkombëtar për të Drejtat e Njeriut (IGFM) me zyrën e saj në Maqedoni apelon tek organizatat ndërkombëtare që të zbardhin të vërtetën e 9 dhe 10 majit në Kumanovë, përmes një hetimi ndërkombëtarë.

“Nga ana tjetër shprehim shqetësimin e madh për heshtjen e institucioneve për qindra fëmijët, gratë dhe pleqtë e traumatizuar në këtë zonë, që përbën terror dhe një formë gjenocidi ndaj popullatës civile. Në këtë drejtim institucionet shtetërore përgjegjëse në Maqedoni si ato shëndetësore, rehabilituese dhe sociale nuk kanë ndërmarrë asnjë veprim për rikthimin e normalitetit jetësor dhe ndihmën e dhënë për banorët e kësaj zone, që kanë probleme traumatike”, thekson IGFM, një organizatë që ka degët e saj në gjithë botën lidhur me të drejtat e njeriut.

Kjo organizatë gjithashtu kërkon që edhe organizatat dhe shoqatat për të drejtat e njeriut si Komiteti i Helsinkit, UNICEF, OSBE dhe disa organizata tjera ndërkombëtare për çudi akoma po heshtin për të vërtetën e Kumanovës dhe pasojat që ka lënë ajo ngjarje.

“Apelojmë që këto organizata sa më shpejt të reagojnë dhe ti vijnë në ndihmë banorëve lokal, që në këtë kohë kanë më shumë nevojë për rehabilitim dhe ndihmë sociale dhe shëndetësore se sa materiale. Të mos heshtin sepse fëmijë e gra çdo natë po përjetojnë dhe rikujtojnë tmerrin dhe po jetojnë ditët në ankth duke mos iu rikthyer jetës normale. Me këtë apel i drejtohemi edhe përfaqësive diplomatike të vendeve të Bashkimit Evropian, SHBA-ve dhe disa vende tjera mike që të ndihmojnë në këtë aspekt sepse shteti dhe institucionet përgjegjëse janë vënë në heshtje dhe janë të fokusuar në fshehjen e të vërtetës dhe pasojave që kanë ndodhur në Lagjen e Trimave në Kumanovë”, thekson kjo organizatë.

IGFM alarmon edhe gjendje të paraburgosurëve për rastin e Kumanovës, të cilët janë të torturuar dhe maltretuar brutalisht nga periudha e arrestimit të tyre e deri në burgun e Shutkës. Një pjesë e tyre kanë mbetur me pasoja të pashërueshme jetësore dhe askush nuk mund t’ia kthejë shëndetin. Maqedonia në këtë rast u dëshmua se nuk njeh dhe respekton standardet evropiane, edhe pse në anën tjetër pretendon se është një shtet që synon BE-në.

IGFM nënvizon se një pjesë e të arrestuarve janë familjarë dhe persona të pafajshëm që nuk kanë pasur asnjë lidhje me grupin e armatosur dhe se ata janë gjetur dhe janë kapur atë ditë në shtëpitë e tyre dhe se është e çuditshmë dhe skandaloze se si ky shtet cilindo qytetarë që kap në rrugë e shpallë terrorist.

Në fokus të së vërtetës është e domosdoshme edhe ndriçimi i vrasjeve të 10 civilëve që ishin pjesë e grupit, se në çfarë rrethana kanë ndodhur ato dhe duhet të ketë një proces të plotë transparent si nga ana e organeve hetimore të Maqedonisë , ashtu edhe të atyre kosovare.

MESILA DODA: JANULLOVSKA NJË PRIKOPATE VRASËSE I SHTYP SHQIPTARËT

VOAL – Deputetja demokrate në Shqipëri, Mesida Doda ka theksuar se ish-ministrja e brendshme e Maqedonisë Gordana Jankullovska është një psikopate vrasëse.“Jankullovska është një psikopate vrasëse që shtyp shqiptarët. Shqiptarë të pafajshëm vuajnë dënime që janë intriga të politikës maqedonase. Shteti jonë nuk hap gojë. Nuk mund të sillemi ne sikur kemi respekt për qëndrueshmërinë e Maqedonisë, por të kujdesemi për bashkëkombësit tanë”, deklaroi deputetja e Partisë Demokratike të Shqipërisë.Ajo theksoi se janë parë deportime të Çamëve, të Kosovës, por sot sipas saj kemi një tragjedi të re që siç tha “Nuk mund të ekzistojë dot një shtet që kthen 30 për qind të policisë në pakicë. Nuk mund të ekzistojë një shtet që vret njerëzit e vetë dorëzuar. Kjo është dhunim i të drejtës njerëzore”.“Veç një bashkëpunim real midis nesh mund të na forcojë nga albanofobët. Duhet lobim për bashkëpunim. Nuk duhet lejuar cenimi i jetës së bashkëkombësve tanë. Kjo ngjarje do hetim ndërkombëtar. Duhet hetim transparent nga persona të painfluencuar nga Gruevski. Nuk duhet të jetë stabiliteti i Maqedonisë shqetësimi ynë por të drejtat e Shqiptarëve. Ju nuk përmendët në asnjë moment faktorin shqiptar.
Na përket neve të merremi me të drejtat e bashkëkombësve tanë. Duhet të jemi të gjithë në një front”, deklaroi deputetja Doda.

DISA NGA TË ARRESTUARIT NË KUMANOVË – TË REKRUTUAR NGA SHËRBIMET SEKRETE

Disa prej kosovarëve të arrestuar nga grupi i Kumanovës para autoriteteve kompetente maqedonase deklaruan se kanë pasur kontakt me të paktën dy njerëz nga Agjencia e Inteligjencës dhe me dy nga DSK-ja, mëson jo-zyrtarisht Alsat M nga burimet e hetimit

Sipas informatave të pakonfirmuara tani për tani, në një pjesë të deklaratave zyrtare të të arrestuarve është përmendur agjenti me inicialet SH.M identiteti i të cilit u publikua nga disa mediume në vend dhe në Kosovë.

Personi tjetër i përmendur nga njëri prej të arrestuarve në Kumanovë, thuhet se është këshilltar i sigurisë te Presidenti, i cili së bashku me SH.M është shfaqur në regjistrim që në telefonin e vet e ka pasur njëri nga të vdekurit në aksion. Cila ka qenë natyra e këtyre komunikimeve dhe çfarë janë marrë vesh, tani për tani nuk dihet.

Alsat M edhe sot kërkoi përgjigje nga Agjencia e Inteligjencës për takimet mes zyrtarëve të Agjencisë dhe liderëve të grupit të Kumanovës. Në pyetjen nëse është e vërtetë se pjesëtarë të agjencisë kanë pasur kontakte të tilla, dhe nëse kanë pasur me çfarë karakteri ishin ato, nuk morëm përgjigje.

Publiku është i njohur tashmë vetëm me qëndrimin e institucionit. E ai është paralajmërimi se do të ngrenë procedurë për përgjegjësi penale për ata që e zbuluan identitetin e agjentit të tyre të fshehtë. Nga Agjencia nuk u përgjigjën ende se sa persona fizikë ose juridikë janë të dyshuar në denoncimin e tyre.

Për denoncimin Alsat ka pyetur në Prokurorinë publike. Ata konfirmuan se e kanë pranuar, por nuk u përgjigjen se sa njerëz janë subjekt i hetimeve të mundshme.

“Për momentin mund të konfirmojmë se ka arritur Iniciativa nga Agjencia e inteligjencës e cila është marrë në shqyrtim nga një prokuror kompetent. Për detajet e procedurës do të informoheni me kohë”.

Zyrtarisht, deri më tani vetëm nga MPB-ja njoftuan se agjentë të tyre nga DSK-ja, së paku zyrtarisht nuk kanë pasur kontakt me anëtarët e grupit të Kumanovës, para ngjarjeve të 09 dhe 10 majit. Ndonëse jozyrtarisht, në deklaratat e të arrestuarve është theksuar se njëri nga udhëheqësit e grupit ka qenë në kontakt me dy nga punonjësit e tyre njëri me inicialet B.D. tjetri B.N.

Në njoftimin e Agjencisë së inteligjencës nuk kishte asnjë konfirmim apo mohim, por dënim për zbulimin e identitetit të pjesëtarit të tyre dhe paralajmërim për kallëzim penal. Në publik, tashmë spekulohet se si cak i hetimeve mund të jenë mediat dhe gazetarët me qëndrime kritike. kp

LËVIZJA BESA THËRRET SHQIPTARËT NË MARSH PROTESTE NË SHKUP MË 13 QERSHOR

Lëvizja BESA në konferencën e sotme të shtypit shpalli thirrjen për marshin protestues për gjendjen e shqiptarëve në Maqedoni. Protesta do të mbahet në Shkup më 13 qershor (të shtunën e ardhshme) me fillim në ora 17:00.

Marshi do të niset nga lagjja e Çairit dhe do vazhdojë deri te Qeveria e Republikës së Maqedonisë, ku do të lexohen mesazhet e protestës.

Kryetari i Këshillit Koordinues së Lëvizjes BESA, Bilall Kasami, shpjegoi se marshi do të ketë karakter gjithëshqiptar dhe se Lëvizja BESA vetëm e inicon atë.

”Për këtë arsye marshi nuk do të ketë emblemën e Lëvizjes BESA. Madje, edhe motoja qendrore e këtij marshi është lënë të vendoset me konsensus të të gjithë organizatorëve”, tha Kasami.

Lëvizja BESA u bën thirrje publike subjekteve politike shqiptare, Rilindjes Demokratike Kombëtare dhe Lëvizjes për Reforma në PDSH, si dhe organizatave joqeveritare, intelektualëve, artistëve, gazetarëve, dhe personaliteteve të tjera shqiptare që ta formojnë bashkërisht një këshill për organizimin e marshit protestues.

Kasami i paraqiti 18 pikat e deklaratës me të cilën kërkojnë:

– dorëheqjen e menjëhershme të qeverisë Gruevski & Ahmeti, sepse kjo qeveri e ka partizuar shtetin, i ka keqpërdorur institucionet, ka dështuar në rrugën e integrimit dhe në thelb është antishqiptare;

– hetimin dhe ndëshkimin e të gjitha krimeve të politikanëve të inkriminuar;

– që Zaev t’i publikojë të gjitha materialet që kanë të bëjnë me të vërtetat shqiptare, e veçmas ato që kanë të bëjnë rastet e montuara, siç është “Monstra” – ndryshe do ta konsiderojmë pjesëmarrës në fshehjen e krimeve;

– Do të deklarojmë se pas publikimeve të përgjimeve, si dhe pas dështimit në mbrojtjen e ndonjë agjende shqiptare, BDI dhe PDSH nuk janë më përfaqësuese të shqiptarëve të Maqedonisë dhe ato nuk kanë të drejtë të vendosin për shqiptarët në asnjë negociatë të mundshme;

– lirimin e të burgosurve të rasteve të montuara “Monstra”, “Sopot” dhe “Brodec”;

– zbardhjen e vrasjes së Harun Aliut dhe shokëve të tij;

– ndriçimin e plotë të rastit të Lagjes së Trimave në Kumanovë, përgjegjësinë e autorëve dhe organizatorëve të atij skenari dhe zgjidhjen urgjente të dëmtimeve të vendbanimeve shqiptare të shkatërruara padrejtësisht;

– dorëheqjen e zv. kryeministrit për implementimin e Marrëveshjes së Ohrit, sepse 11 vjet pas skadimit të afatit për realizimin e asaj marrëveshjeje nuk ka më asnjë kuptim të flitet për implementim të saj;

– dorëheqjen e zv. kryeministrit për Integrime Evropiane, sepse Maqedonia tashmë është prapakthyer nga agjenda euro-integruese;

– dorëheqjen e ministrit të Drejtësisë dhe të Prokurorit Publik, për shkak të drejtësisë së partizuar dhe antishqiptare në Maqedoni;

– dorëheqjen e ministrit të Mjedisit Jetësor për shkak të dështimit në zgjidhjen e çështjes së ajrit të ndotur në Tetovë;

– dorëheqjen e ministrit të Arsimit për skandalet e shumta në arsim, si ai i fundit i racizmit ndaj shqiptarëve;

– dorëheqjen e ministrit të Ekonomisë, sepse vendbanimet shqiptare në Maqedoni vazhdojnë të jenë zonat më të varfra në vend dhe, rrjedhimisht, emigrimi vazhdon të jetë marramendës;

– dorëheqjen e zv. ministrit të Punëve të Brendshme për shkak të skenarit të Kumanovës;

– dorëheqjen e kryetarit të Kuvendit të Republikës së Maqedonisë për shkak të qasjes së tij raciste ndaj shqiptarëve;

– zyrtarizmin e gjuhës shqipe në gjithë territorin e Maqedonisë;

– ndarjen e drejtë të buxhetit të Republikës së Maqedonisë;

– marrëveshje të re për RIDEFINIMIN e Maqedonisë si shtet i përbashkët konsensual i shqiptarëve dhe maqedonasve.

Lëvizja Besa është subjekti më i ri politik i i shqiptarëve të Maqedonisë, e formuar nga fundi i vitit të kaluar dhe ka orientim opozitar ndaj dy partive më të mëdha – BDI-së së Ali Ahmetit dhe PDSH-së së Menduh Thaçit. Pas disa komunikatave, me të cilat ka reaguar ndaj ngjarjeve aktuale në Maqedoni, organizimi i promovuar sot paraqet aktivitetin e saj të parë më konkret në publik. kp

DIPLOMATI PITER FEITH NË SHKUP PËR MARRËVESHJEN E OHRIT

Pa i lajmëruar aspak gazetarët, diplomati Piter Feith ka ardhur dje në Shkup dhe i ka ftuar për t’i dëgjuar përfaqësues të partive politike në Maqedoni rreth implementimit të Marrëveshjes së Ohrit.

Debatin e kishte organizuar Sekretariati për çështje evropiane dhe instituti europian për paqe, por bisedat kanë qenë të mbylluara për publikun. Organizatorët theksojnë se në këtë fazë vetëm është biseduar për raportin e implementimit të Marrëveshjes së Ohrit.

Në hotelin “Holidei Inn” kanë qëndruar Musa Xhaferri dhe Fatmir Besimi nga BDI-ja, Ilia Dimovski nga VMRO DPMNE-ja dhe nga LSDM_ja Frosina Remenski.

Por askush prej tyre ska dashur të japë ndonjë deklaratë se për çfarë po bisedohet me Feithin.

Diplomati Feith është mediator senior në Inastitutin europian për paqe. Instituti është partner i pavarur i BE-së dhe Europës, i cili e zbaton agjendën globale të paqes nëpërmjet ndërmjetësimit dhe dialogut joformal. Instituti udhëheqë edhe multi-diplomaci dhe vepron si mjet i jashtëm, si mbështetës i BE-së, atje ku unioni ka ndikim të kufizuar.

Por emri i Piter Feithit ka shkaktuar shumë interes në Maqedoni, pasi ai ishte i kyçur direkt për ndërprerjen e Konfliktit të vitit 2001. Ai është një diplomat me përvojë, ishte përfaqësues i BE-së në Kosovë, kurse ka qenë edhe në funksione të larta në BE dhe NATO.

Piter Feith u fol se mund të jetë një ndër ndërmjetësuesit e BE-së për krizën politike në Maqedoni, por Qeveria e Maqedonisë dhe kryeshefi i diplomacisë Poposki ishin kategorikë kundër që ai të marrë një rol të tillë.

Faqja 25 prej 30« Fillimi ‹ Prapa 21 22 23 242526 27 28 29 Para ›Fundi »

VOAL – SHKUP – Maqedonia i urdhëroi bankat e veta që t’i tërheqin paratë e tyre nga bankat e Greqisë dhe të ndërmarrin “masa parandaluese” për ta kufizuar largimin e kapitalit në fqinjin e saj jugor, që kërcënohet nga një krizë me thellë financiare.

Foto nga Georgi Licovski/European Pressphoto Agency

Qeveria e Maqedonisë fajësohet për skandalin e përgjimeve

Kongresisti amerikan Eliot Engel deklaroi për INA se është i pakënaqur nga mosrespektimi i të drejtave të shqiptarëve në Maqedoni.

Engel pas disa javëve në Maqedoni

VOAL – SHKUP – Në Shkup u shënua 100 vjetori i vdekjes së Rilindasit të njohur shqiptar, Josif Bageri, organizuar nga shoqata Josif Bageri.

Akademikja maqedonase Katica Gjullakova në një deklaratë për gazetën maqedonase “Veçer” ka theksuar se asnjëherë gjuha shqipe nuk mund të mësohet nga maqedonasit nëpër çerdhe, shkolla fillore dhe ato të mesme të Maqedonisë.

Pa i lajmëruar aspak gazetarët, diplomati Piter Feith ka ardhur dje në Shkup dhe i ka ftuar për t’i dëgjuar përfaqësues të partive politike në Maqedoni rreth implementimit të Marrëveshjes së Ohrit.

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL