VOAL

VOAL

Copyright © 2022

VOAL

Maqedoni

Ljubço Georgievski: Maqedonia s’ka asnjë rrënjë që lidhet me historinë antike

SHKUP– “Maqedonia s’ka asnjë rrënjë dhe gjurmë, që ndërlidhet me historinë antike”, ka thënë ish-kryeministri i Maqedonisë, Ljubço Georgievski, në një intervistë për të përditshmen “Utrinski Vesnik”, duke shtuar se “rrënjët e popullit maqedon, janë sllave”, duke e akuzuar qeverinë për propagandë dhe për antikuizim, shkruan Zhurnal.

“Argumenti kryesor i pushtetit aktual është se nëse do t’i vëmë një parashtresë emrit të shtetit, të tipit “e epërme” ose “veriore”, do ta ndrysojmë identitetin e popullit maqedonas. Nuk ka ndryshim më të madh për identitetin e njeriut, nga ky që i është bërë popullit maqedonas nga ana e OBRM-PDUKM-së. Ndrryshimi i parë i identitetit u bë me ndërhyrjen e parë në historinë për antikuizicion që u bë pakurrfarë baze… As që ka gjurmë dhe rrënjë që ndërlidhen me historinë antike. Momenti i dytë për ndryshimin e identitetit është invazioni masiv nëpërmjet mediave që tërësisht kontrollohen nga OBRM-PDUKM të cilat emitojnë program paradoksal që e ndryshon kodin e identitetit”, thotë ish-kryeministri dhe ish-lideri i partisë OBRM-PDUKM, Ljubço Georgievski.

Shkup: Akademikët shqiptarë të ASHAM-it distancohen deklarata e kryetarit për Nënën Terezë

Anëtarët shqiptarë të Akademisë së Shkencave dhe Arteve të Maqedonisë (ASHAM) distancohen nga fjalimi i kryetarit, Taki Fiti, i cili në kuadër të akademisë solemne kushtuar shenjtërimit të Nënës Terezë, tha se Gonxhe Bojaxhiu rrjedh nga një familje e përzier etnike.

“Ne, anëtarët e Akademisë së Shkencave dhe të Arteve të Maqedonisë; Luan Starova nënkryetar, Alajdin Abazi anëtar i kryesisë, Abdylmenaf Bexheti anëtar i rregullt dhe Izet Zeqiri anëtar korrespondent, në mënyrë kategorike distancohemi nga fjalimi i Kryetarit të Akademisë së Shkencave dhe Arteve të Maqedonisë Taki Fiti në tendencën e kontestimit të përkatësisë kombëtare të Shën Terezës si dhe vazhdimësinë e tendencës për përvetësimin e figurës së saj”, thuhet në deklaratën e përbashkët të dërguar në redaksinë e Portalb.

Sipas tyre, askush nuk mundet të paracaktojë përkatësinë etnike të kujtdo qoftë, e “aq më pak të figurës së Shën Terezës kur ajo vetë në testamentin e saj përcakton për nga gjaku përkatësinë shqiptare”.

“Fatkeqësisht nuk është hera e parë që ASHAM vihet në shërbim të politikës ditore”, shkruajnë akademikët shqiptarë.

Dy vëllezër me mbiemrin Begaj viktima nga rrëzimi i aeroplanit në afërsi të Shkupit

Dy vëllezër me mbiemrin Begaj, kanë vdekur nga rrëzimi i aeroplanit në afërsi të Shkupit, raporton Alsat.

Dy vëllezërit kanë humbur jetën së bashku me katër shtetas italianë. Sipas të dhënave të siguruara deri më tani, njëri prej vëllezërve quhet Visar Begaj, dhe të dy janë investitorë.

Qëllimi i udhëtimit, ka qenë iniciativa e dy vëllezërve investitorë kosovarë, të cilët kanë dashur të hapnin një klub për fluturime në Istog.

Mediat italiane raportojnë se Aeroplani ishte destinuar të ulej në Shkup, për të bërë një kontroll teknik.

Nga kontrolli i fluturimeve vlerësojnë se avioni mund të jetë humbur për shkak të motit të keq, megjithatë ende nuk është konfirmuar arsyeja e vërtetë e humbjes së avionit.

Për momentin sipas informatave jozyrtare bëhet fjalë për avion me mbishkrim gjerman i cili është dashur të ulet në Shkup për të marr lëndë djegëse. Ende nuk ka informata nëse është gjetur avioni dhe ku ka qenë destincioni final i fluturimit.

Shkup: Avioni i zhdukur është rrëzuar – në bord dyshohet se ishin edhe dy kosovarë

Prokuroria publike në Maqedoni, në një njoftim për media, ka bërë të ditur nisjen e hetimeve për zbardhjen e tragjedisë ajrore që ndodhi në afërsi të Shkupit.

“Pas informave të marra, Prokuroria publike, në koordinim me institucionet kompetente ka ndërmarrë masa për përcaktimin e vendit të fatkeqësisë, sigurimin e lokalitetit dhe nisjen e hetimeve. Po grumbullohen informata dhe fakte relevante për të përcaktuar shkaqet e fatkeqësisë”, thuhet në komunikatën e Prokurorisë Publike të Maqedonisë.

Një avion italian me gjashtë pasagjerë në bord, që u zhduk nga radarët, njoftohet të jetë rrëzuar afër Katllanovës në jug të Shkupit.

Sipas informatave jozyrtare policore, në bordin e avionit të vogël gjendeshin katër shtetas italian dhe dy shtetas të Kosovës.

Ekipet e shpëtimit kanë njoftuar për gjetjen e një trupi të djegur, ndërsa janë në kërkim edhe të personave të tjerë që gjendeshin në bord.

Avion u zhduk nga radarët e kontrollit të fluturimeve të aeroportit të Shkupit rreth orës 17 e 40.

Banorët e një lokaliteti rreth10 kilometra në jug të Shkupit kishin njoftuar qendrën e fluturimeve se kanë dëgjuar shpërthime të fuqishme dhe zjarr, duke pretenduar se bëhet fjalë për një avion të rrëzuar.

Sipas të dhënave zyrtare, avioni i zhdukur fluturonte nga Trevizo e Italisë, që ishte zhdukur nga radarët menjëherë pasi kishte njoftuar drejtuesit e aeroportit se do të ulej për t’u furnizuar me kerozinë.

Destinacioni i fundit i avionit supozohet të ketë qenë Prishtina. (REL)

Humbja në Shkodër e tërbon gazetarin maqedonas: shqiptarëve do t’ua bëjmë si më 2001

Gazetarit maqedonas, Milenko Nedellkovski, i ka djegur fort humbja e kombëtares së tij nga Shqipëria në “Loro Boriçi”. Nedellovski i cili njihet për gjuhën e tij të urrejtjes ndaj shqiptarëve, e ka quajtur stadiumin e Shkodrës “Arena e Sllobodan Millosheviçit”, ndërsa i ka paralajmëruar shqiptarët për vazhdimin e konfliktit armatosur të vitit 2001.

“Arena Sllobodan Millosheviç na solli fat dhe federata e Shqipërisë sonte dha një propozim që arena të riemërohet te Stojançe Angellov. Shiu i rrëmbyeshëm e detyroi arbitrin që ta ndërpresë lojën në 20 minutat e fundit për të vazhduar loja sot, ku edhe fitoi Shqipëria ndaj Maqedonisë me rezultat 2:1. Ajo e natës së fundit do të luhet sot. Ajo e vitit 2001 do të luhet së shpejti…’, ka shkruar gazetari maqedonas.

Si duket me gjasë këto statuse ndoshta janë si ‘hakmarrje’ ndaj gazetarit të SuperSport dhe Digitalb, Dritan Shakohoxha, për shkak se arenën ”Filipi i Dytë” (“Filip Vtori”) në Shkup e ka quajtur si arena ”Adem Jashari”./Syri.net/

Akademia e Maqedonisë: Nënë Tereza nuk është shqiptare

Akademia e Shkencave dhe Arteve e Maqedonisë konteston prejardhjen shqiptare të Nënë Terezës. Gjatë një eventi përkujtimor të ASHAM-it kushtuar shenjtërimit të Terezës nga Vatikani, kryetari i saj Taki Fiti deklaroi se Nënë Tereza rrjedh nga një familje me prejardhje të përzier etnike.

“Ngjarja e jetës së Nënë Terezës, dëshmon se në hapësirat tona kanë jetuar në paqe, tolerancë dhe mirëkuptim të ndërsjellë, njerëzit me përkatësi të ndryshme fetare dhe etnike. Ajo rrjedh nga një familje me prejardhje të përzier nacionale. Mesazhet e thella humane nga vepra dhe angazhimi i Nënë Terezës sot duhet të jenë të thurura në të gjitha segmentet dhe poret e jetës sonë, në jetën e zakonshme, në shkencë, kulturë, politikë e kështu me radhë”, deklaroi Fiti.

Ministrja e Kulturës Elizabeta Kancevska–Milevska theksoi se të gjithë popujt në Maqedoni janë trashëgimtarë të Nënë Terezës dhe duhet ndjekur shembullin e saj për t’u bërë njerëz më të mirë.

“Sot lirisht mund të themi se të gjithë ne jemi trashëgimtarë krenarë të Nënë Terëzës dhe kemi detyrë historike që ta vazhdojmë veprën e saj, misionin e saj për paqe dhe dashuri për vendin dhe barazi në mes popujve në mbarë botën”, deklaroi ministrja e Kulturës, Elizabeta Kançevska–Milevska, shkruan Alsat-M.

Ndërkaq, Anton Sereçi, studiues i jetës dhe veprës së Nënë Terezës ka shfaqur revoltën e tij që edhe pas kanonizimit të saj si e shenjtë nga Vatikani, në Maqedoni shfaqen akoma dilema se kush ishte Nënë Tereza. Vetë Papa Francesku gjatë ceremonisë së shenjtërimit e potencoi prejardhjen e saj etnike.

“Kur vij nga Vatikani dhe dëgjoj fjalët që u thanë në gjuhën shqipe, thanë se Nënë Tereza është Gonxhe Agneze Bojaxhiu, e lindur në Shkup në familje shqiptare. Vetë Papa Francesku i thotë ato fjalë. Dhe vij këtu në Akademinë e Shkencave të Maqedonisë, i dëgjoj personat të cilët nuk dinë as vetë për atë se kush është Nënë Tereza, çfarë ka qenë dhe çfarë ka bërë dhe e potencojnë tërë kohën Nënë Tereza shkupjania. Përkatësia kombëtare askund nuk përmendet askund nuk përmendet sepse ajo i takon mbi të gjitha botës, por të gjithë e din se ajo është shqiptare, këtë nuk e konteston askush. Vetëm në këtë shtet ku jetojmë mjerisht merremi me ato gjëra t’i shtrembërojmë gjërat, jo vetëm rastin e Nënë Terezës por edhe shumë gjëra të tjera”, deklaroi Anton Sereçi, studijues i jetës dhe veprës së Nënë Terezës.

Vetë Nënë Tereza në deklaratën e saj të dhënë për mediat globale pati thënë:
Me gjak jam shqiptare,
Me shtetësi jam indiane,
Nga besimi jam murgeshë katolike,
Nga thirrja i përkas botës,
Me zemër i përkas plotësisht Zemrës së Krishtit!

Sipas Sereçit, as në Muzeun e Nënë Terezës në Shkup nuk ka të punësuar asnjë shqiptar ndërsa ato të punësuar që janë maqedonas dhe serb, nuk thonë asnjëherë se Nënë Tereza ka prejardhje shqiptare. Por për këtë ai akuzon partitë politike shqiptare që lejojnë të ndodhin këto lëshime në sy të tyre. Në akademinë e sotme përkujtimore të ASHAM-it kushtuar figurës së Nënë Terezës, nuk pati asnjë politikan shqiptar, as nga pushteti e as nga opozita. Alsat kërkoi sqarim nga BDI se a kanë pasur ftesë apo jo për pjesëmarrje në këtë eveniment, por nuk morëm përgjigje.

Ja pse s’morën pjesë liderët e shqiptarëve të Maqedonisë në shenjtërimin e Nënë Terezës

Asnjë nga liderët e partive politike shqiptare në Maqedoni nuk mori pjesë në ceremoninë e sotme të shenjtërimit të humanistes shqiptare Nënë Tereza në Vatikan.

Presidenti maqedonas Gjorge Ivanov ka ftuar kryetarin e BDI-së Ali Ahmeti dhe ate të PDSHçsë Menduh Thaçi në këtë ceremoni, por Ahmeti nuk ka shkuar me arsyen se nuk e njeh Ivanovin si president, ndërsa në PDSH nuk ka asnjë përgjigje.

LSDM e udhëhequr nga Zoran Zaev dhe anëtari i kryesisë së saj shqiptari katolik Bartolomej Kajtazi janë pjesë e delegacionit në Vatikan.

Në Vatikan nuk kanë udhëtuar as edhe liderët e partive më të vogla politike.

Ndërkohë, shumë shoqata dhe aktivistë nga Maqedoni, përfshirë edhe një delegacion të diasporës nga SHBA sot po morën pjesë në ceremoninë në Vatikan, shkruan INA.

Më 13 gusht 2001 u nënshkrua Marrëveshja e Ohrit – Çfarë është Marrëveshja e Ohrit?

Marrëveshja Kornizë e Ohrit, që u nënshkrua më 13 gusht 2001, është një kontratë shqiptaro-maqedonase për raportet e reja shoqëroro-politike dhe ndërtimin e mëtutjeshëm të shtetit të quajtur, Ish-Republika Jugosllave e Maqedonisë.

Kjo kontratë e të dy popujve u bë e mundshme pas konfliktit të armatosur, që ndodhi në vitin 2001. Marrëveshja u realizua me ndihmën e Bashkësisë ndërkombëtare, e cila dha kontributin e vet për zgjidhje politike të krizës ndëretnike në IRJM.

Roli i Bashkësisë Ndërkombëtare për ndërprerjen e konfliktit dhe arritjen e marrëveshjes politike ishte i pazëvendësueshëm. Qysh gjatë zhvillimeve luftarake në IRJM, Unioni Evropian dhe SHBA, dërguan përfaqësuesit e tyre: Francois Leotard dhe James Perdew, si ndërmjetësues për arritjen e paqes.

Pas negociatave të mundimshme me palët e konfrontuara, ata përgatitën dokumentin e ashtuquajtur “Versioni Draft i Dokumentit Kornizë”, të cilin më 7 korrik, 2001, ua dorëzuan katër liderëve, pjesëmarrës në Qeverinë e Ish Republikës Jugosllave të Maqedonisë dhe presidentit Trajkovski.

Gjatë zhvillimit të negociatave në Ohër, faktori politik shqiptar startoi me pozicione euro-perëndimore. Ai nuk doli me kërkesa për ndarje territoriale, por për barazi të plotë etnike, që ishte në harmoni me parimet europerëndimore. Në fakt, kërkohej që karakteri multietnik i shoqërisë maqedonase të pasqyrohet në rregullimin shtetëror.

Ndërkaq, pala maqedonase mbante pozicion ekskluziv duke refuzuar kërkesën që pasqyronte diversitetin objektiv të shoqërisë në konceptin e shtetit. Ose me fjalë tjera, përderisa pala maqedonase synonte të kontrollojë të drejtat kombëtare të shqiptarëve, pala shqiptare nuk ndërhynte në korpusin e të drejtave të maqedonasve. Fundi i negociatave shqiptaro-maqedonase ishte Marrëveshja Kornizë e Ohrit.

Në momentin kur pritej që negociatat e Ohrit të marrin fund, qarqe të caktuara nacionaliste, qeveritare dhe joqeveritare maqedonase filluan të japin deklarata të pamatura, të cilat shkaktuan reagime të ashpra të përfaqësuesve ndërkombëtarë.

Këto deklarata përpiqeshin të minojnë procesin politik dhe projektin e marrëveshjes të hartuar nga ekspertët ndërkombëtarë. Por, qendrat e vendosjes ndërkombëtare ia bënë me dije palës maqedonase, se: “Rrugëdalje më të mirë, pos pajtimit dhe nënshkrimit të këtij dokumenti nuk ka”.

Negociatat shqiptaro-maqedonase, në Ohër, zgjatën rreth dhjetë ditë dhe përfunduan më 13, gusht, 2001. Nën trysninë ndërkombëtare, konflikti shqiptaro-maqedonas u mbyll me Marrëveshjen Kornizë të Ohrit.

Ajo u nënshkrua në Shkup, nga përfaqësuesit shqiptarë dhe maqedonas, që merrnin pjesë në koalicionin e zgjeruar qeveritar: Lupço Georgievski, Arbën Xhaferi, Branko Cërvenkovski dhe Imer Imeri. Këtë marrëveshje e nënshkroi edhe kryetari i shtetit, Boris Trajkovski dhe ndërmjetësuesit evro-amerikanë, Leotard dhe Perdew.

Por çfarë përmban kjo marrëveshje, që edhe 14 vjet më pas sa herë flitet për situaten në Maqedoni, referimi është pikërisht tek ky akt?

Marrëveshja është e ndërtuar mbi 5 parimet themelore, të cilat u bashkëshoqeruan me ndryshimet kushtetuese, të cilat konfirmuan shoqërinë shumë-etnike maqedonase dhe ku u sanksionua se shqiptarët janë etni shtetformuese.

Marrëveshja kornizë synonte zhvillimin e qetë dhe harmonik të shoqërisë maqedonase duke respektuar njëkohësisht identitetin etnik dhe interesat e të gjithë qytetarëve të Maqedonisë.

Kjo garantohej përmes përmbajtjes së saj, ku decentralizimi ishte ndër pikat kryesore, pasi siguronte qeverisjen e tyre nga bashkësia më e madhe e popullatës që e përbën .

“Marrëveshja e Ohrit detyron autoritetet e qeverisjes qendrore të garantojnë përfaqësimin e drejtë dhe mosdiskriminimin.” E reflektuar në ligj kjo pikë e marrëveshjes kërkonte që në punësimet në administratën publike të sigurohej përfaqësimi i drejtë i bashkësive në të gjitha organet qendrore dhe lokale publike dhe në të gjitha nivelet e punësimit në këto organe.

Përfaqësimi në Gjykatën Kushtetuese kërkohet të bëhet mbi propocionin e përfaqësimit në Kuvend sipas etnive. Shqiptarët që përbëjnë mbi 30 % të popullsisë maqedonase përmes Marrëveshjes së Ohrit iu garantohej e drejta e përdorimit si gjuhë zyrtare, krahas gjuhës maqedonase edhe ajo shqip. Simbolet kombëtare gjithashtu.

Ndërsa Marrëveshja e Ohrit ishte një kontratë juridike, kapitujt e të cilës parashihnin afate konkrete, shqiptarët atje, faktori politik shqiptar, raportet ndërkombëtare, përfaqësuesit e vendeve perëndimore, mediat në mënyrë të vazhdueshme kanë denoncuar se asnjë prej angazhimeve të ndërmarra 14 vjet më parë nuk është realizuar plotësisht.

Punësimet, përfaqësimi në institucione, pushteti vendor, gjuha dhe simbolet kombëtare dhe aq më pak ndalimi i diskriminit nuk u arritën as në mënyrë të kënaqëshme, shkaqe për të cilat shqiptarët janë shpesh në rrugën e protestës, pasi Marrëveshja e Ohrit nuk iu siguroi atë që synonte, qytetarë të barabartë me maqedonasit.

Parimet themelore te Marreveshjes se Ohrit

1. Nderrimi i pushteteve vetem permes zgjedhjeve te lira dhe demokratike

2. Garantohet sovraniteti dhe integriteti territorial i Maqedonise.

3. Konfirmohet karakteri shumetnik i shoqërisë maqedonase

4. Ndertim i shtetit demokratik

5. Zhvillimi i pushtetit vendor

Permbajtja e Marreveshjes se Ohrit

1. Ndërprerja e armiqësive

2. Zhvillimi i pushtetit të decentralizuar

3. Mosdiskriminimi dhe përfaqësimi i drejtë

4. Perfaqesim ne gjyqesor ne propocion me popullsine

5 Gjuhe zyrtare eshte edhe gjuha amtare kur popullata eshte mbi 20%

6 Shprehja e identitetit (perdorimi i simboleve te bashkesise ne zonat ku ata perbejne shumicen). /Top Channel/

‘Rasti i Kumanova’, keqtrajtimi i të akuzuarve alarmon ndërkombëtarët

Njoftimet për keqtrajtimin e të akuzuarve në rastin e Kumanovës kanë tërhequr vëmendjen edhe të faktorit ndërkombëtar. Avokati mbrojtës Naser Raufi konfirmoi se ambasadat e huaja në vend, veçanërisht ajo amerikane e kontaktojnë shpesh herë për të mësuar të vërtetën rreth informatave për brutalitetin policor që ushtrohet ndaj të akuzuarve në këtë rast, njofton Alsat M.

Raufi njoftoi se një ditë më parë kishte kërkuar edhe ndërrimin e trupit gjyqësor pasi e kishte penguar që ti parashtronte pyetje dëshmitarit të koduar. Sipas Raufit, mënyra e vetme për zbardhjen në tërësi të këtij rasti është kalimi i tij te Prokuroria Speciale.

Nga ana tjetër Prokuroria Speciale, nuk e ka konfirmuar, por as e mohoi mundësinë që ky Institucion të hetojë rastin e Kumanovës.

Komiteti i Helsinkit: Para zgjedhjeve shtohet dhuna dhe urrejtja nacionale në Maqedoni

Numri i rasteve të dhunës nga urrejtja është në rënie por mbetet dominues numri i rasteve të dhunës sipas përfaqësimit etnik. Sipas raportit të ri të Komitetit të Helsinkit, vitin e kaluar është regjistruar ulje e rasteve të dhunës nga urrejtja, por praktika ka treguar se ato janë në rritje gjatë periudhës para zgjedhjeve.

“Së këndejmi ne vlerësojmë se partitë politike në luftën për vota si nga pala maqedonase po ashtu edhe nga ajo shqiptare, qëllimisht nxisin vepra të këtilla penale nga urrejtja, që më pastaj të tregohen si mbrojtjes të popullit të tyre, gjegjësisht bashkësisë etnike dhe kështu, ata fitojnë pikë dhe vota gjatë kohës së zgjedhjeve”, ka deklaruar Vojislav Stojanovski nga Komiteti i Helsinkit për të drejtat e njeriut.

Statistikë zyrtare për vepra penale të iniciuara nga urrejtja nuk ka. Ndërsa hulumtimet e Komitetit bazohen në komunikim me policinë dhe informimin e mediave për këto vepra. Sipas këtyre të dhënave në vitin 2013 ka pasur 110 vepra kriminale nga urrejtja, në vitin 2014 – 80 vepra, ndërsa në vitin 2015 vetëm 44.

Sipas Komitetit të Helsinkit, vitin e kaluar numri më i madh i dhunës nga urrejtja është regjistruar ndaj emigrantëve. Si shembull më pozitiv ku jetojnë grupe të ndryshme etnike e që deri më tani nuk ka pasur vepër penale që është iniciuar nga urrejtja përmendet qyteti i Dibrës.

Polici maqedonas e pranon se Mirsad Ndrecaj u kap i gjallë

Rryma elektrike nuk ka qenë shkaku i vërtetë për ndërprerjen e seancës së djeshme gjyqësore për “Grupin e Kumanovës”, mëson ekskluzivisht Gazeta Lajm nga burime të afërta me mbrojtjen e të akuzuarve.

Edhe pse zyrtarisht rryma dhe defektet teknike u përmendën si shkak për ndërprerje, burimet tona thonë se shkaku i vërtetë ka qenë dëshmia e një polici pjesëmarrës në aksionin te “Lagja e Trimave”, i cili para gjykatës ka dhënë një dëshmi tronditëse. Ai ka pranuar para gjykatës se Mirsad Ndrecaj është arrestuar i gjallë prej policisë.

“Gjatë marrjes së kryqëzuar në pyetje, njëri prej avokatëve i bëri dëshmitarit të mbrojtur një pyetje me ‘sherr’. Avokati e pyeti policin se a e ka arrestuar ai Mirsad Ndrecajn, apo kolegu i tij, polici u përgjigje se Mirsadin e ka arrestuar një kolegë i tij. Kjo shkaktoi tollovi në gjykatë, reagoi trupi gjykues, duke kërkuar që të ndërpritet seanca dhe të fshihet dëshmia e policit”, thonë burimet e gazetës “Lajm”.

Sipas tyre, kjo dëshmi e policit (dëshmitar i mbrojtur), konfirmon dyshimet që ekzistonin në opinion që nga 10 maji.

“Dal ngadalë po del në shesh e vërteta se Mirsad Ndrcaj, por ndoshta edhe ndonjë pjesëtar tjetër i Grupit të Kumanovës është likudiar pasi është arrestuar”, thonë burimet e Gazetës Lajm.

Gazeta Lajm kontaktoi edhe me avokatët mbrojtës të pjesëtarëve të Grupit të Kumanovës, mirëpo ata zyrtarisht as nuk e konfirmuan e as e demantuan informacionin tonë. Marrim vesh se ditët në vijim ata do të dalin dhe do të flasin publikisht për shkaqet e vërteta për ndërprerjen e seancës së ditës së premte gjyqësore.

Ndryshe dëshmia e policit (dëshmitar i mbrojtur), përputhet edhe me audio-dëshminë e Sulejman Osmanit i cili në një bisedë të incizuar me Xhezair Shaqirin, ka thënë se me sytë e tij ka pa duke u arrestuar të gjallë Mirsad Ndrecaj dhe Beg Rizaj. Sulejman Osmani në këtë dëshmi mes tjerash ka thënë se përmes një bisede telefonike, pjesëtarët e Grupit të Kuanovës kanë marrë garanci nga kryetari i BDI-së Ali Ahmeti, se nëse dorëzohen, nuk do të arrestohen prej policisë, por se do të pranohen nga ekipe të OSBE-së por se janë tradhtuar, duke rënë në dorë të policisë maqedonase.

Miëpo kjo dëshmi e policit, tani i jep një dimension të ri dhe shumë më të bazuar akuzave për “Tradhtinë e madhe në Kumanovë”, si dhe jep një profil më të qartë të atyre që kanë tradhtuar.

Ndryshe, zyrtarisht seanca u ndërpre për shkak të problemeve me korrentin në Gjykatë,. Deri në ndërprerjen e seancës kishte dëshmuar vetëm një dëshmitar i mbrojtur. Pala mbrojtëse beson se në pesë seancat e ardhshme pritet të përfundojnë të gjithë dëshmitarët e mbrojtur. Avokatët thanë se sot asnjëri nga pjesëtarët e grupit të Kumanovës nuk është ankuar për keqtrajtim nga ana e policisë. Për keqtrajtimin e deritanishëm të pjesëtarëve të grupit të Kumanovës kanë reaguar edhe nga Komiteti i Helsinkit. “Ne menjëherë kërkuam t’i vizitojmë këta të paraburgosur, për të cilët kishte pohime se kishin qenë të lënduar, madje lëndime serioze si p.sh: thyerje e nofullës , njolla nëpër trup e të ngjashme. Kërkuam leje për vizitë në burg, në kushte normale Gjyqi çdo herë na ka lejuar t’i vizitojmë të burgosurit , por në këtë rast nuk na u lejua një gjë e tillë. Me këtë nuk mundëm të vërtetojmë se çfarë ka ndodhur në të vërtetë , por duke i lexuar raportet e Avokatit të popullit , ne mendojmë se ka pasur sulme ndaj atyre njerëzve”, deklaroi Voislav Stojanovski, Komiteti i Helsinkit. Deri tani më të keqtrajtuar nga ana e policisë, sipas avokatëve kanë qenë Andi Krasniqi, i njohur si komandant Malisheva, Demë Shehu e Ekrem Arifi. Për keqtrajtimin e pjesëtarëve të grupit të Kumanovës së fundmi u përplasën ministri i brendshëm Çavkov i cili hodhi poshtë pohimet e avokatëve dhe zëvendësi i tij Agim Nihiu i cili pohonte të kundërtën. Seanca e radhës për Kumanovën mbahet më 28 korrik

Studentët shqiptarë grisin diplomat e kolegjit të Gylenit

SHKUP- Një grup i ish-nxënësve të kolegjit ‘Jahja Kemal’, ku pronar është Fetullah Gyleni, kanë protestuar para Ministrisë së Arsimit në Shkup, ndërsa nuk kanë nguruar që të grisin edhe diplomat e tyre.

Ky reagim vjen fill pas tentativave të djeshme për grusht shteti në Turqi. Muhamed Tahiri u bëri apel gjithë prindërve që të mos i regjistrojnë fëmijët e tyre në këtë kolegj, që të mos e bëjnë gabimin e njëjtë që e kanë bërë ata.

“Si pasojë e ngjarjeve të mbrëmshme të organizuara nga grupi terrorist i Fetullah Gylenit, në territorin e Republikës së Turqisë, ne sot shprehim shqetësimin tonë të thellë ndaj këtij institucioni arsimor i cili është i dirigjuar po nga ky grupacion. Prandaj ne si studentë të diplomuar nga kolegji Jahja Kemal sot gjendemi këtu për ta shprehur revoltën tonë ndaj këtij institucioni arsimor. U bëjmë apel të gjithë qytetarëve të Republikës së Maqedonisë që të jenë më të kujdesshëm se kujt ia lënë amanet fëmijët e tyre.
Fjala e fundit që ne duam tua përcjellim qytetarëve tanë është kjo. Ne dje gabuam, ju nesër mos gaboni. Ndaj sot revoltën tonë do ta shprehim me grisjen e diplomave tona”, deklaroi Muhamed Tahiri, ish-nxënës i këtij kolegji, shkruan shenja.

Vazhdon sot seanca gjyqësore për grupin e Kumanovës

Në gjykatën e Shkupit sot vazhdon seanca e radhës për të akuzuarit në rastin e Kumanovës për ngjarjet e 9 dhe 10 majit të vitit të kaluar. Alsat-M njofton se seanca zhvillohet me dyer të mbyllura dhe se të akuzuarit janë sjellë në gjykatë nën masa të rrepta sigurie.

Procesit të 29 të akuzuarve për terrorizëm në lagjen e trimave në Kumanovë, me 4 maj iu bashkua edhe lënda e grupit të logjistikës me 8 persona të akuzua për mbështetje logjistike për grupin të armatosur gjatë incidentit të armatosur më 9 dhe 10 maj të vitit të kaluar në Kumanovë.

Policia maqedonase e vazhdon torturën ndaj Grupit të Kumanovës

SHKUP – Edhe përkundër reagimeve të trupit gjykues për të ndaluar torturën ndaj të akuzuarve në rastin “Lagja e Trimave” brutaliteti policor ndaj tyre ende vazhdon. Për nesër në Shkup është caktuar seanca e radhës, por ajo vështirë se do të mbahet, pasi avokati mbrojtës Naser Raufi kërkon me ngulm dënimin e autorëve që kanë bërë deliktin e torturës. Në të kundërtën, nuk ka kuptim të zhvillohet seanca, kërcënon ai.

“Rrugëdalja e vetme është që të pritet që të sanksionohen këto veprues e mandej të vazhdojë seanca pasi që këta të akuzuar nuk janë në gjendje të vazhdojnë me gjykimin”, tha avokati mbrojtës Naser Raufi. Ndërkohë zëvendës-ministri i policisë Agim Nuhiju nuk e konsideroi të udhës për t’u përgjigjur në pyetjen e Alsat-M se deri ku është arritur me hetimin lidhur me keqtrajtimin e të akuzuarve për rastin “Lagja e Trimave”.
“Sot jemi vetëm për të promovuar zyrat, drejtouni një herë tjetër, do të keni informatë zyrtare”, u shpreh Nuhiju. Më së shumti torturë është ushtruar ndaj të akuzuarve Demë Shehu dhe Andi Krasniqit gjatë sjelljes së tyre në gjykatë nga burgu i Prilepit. Deri më tani akoma nuk ka asnjë garanci se kallëzimet penale që janë dërguar në Prokurorinë themelore nga ana e MPB-së dhe Avokatit të Popullit do të përmbyllen me marrjen e dënimit të merituar për dhunuesit ndaj të dyshuarve.

ltr1ltr3ltr4

Akademia Shqiptare Amerikane e Shkencave dhe Arteve kundërshton demarkacionin me Malin e Zi

(Lidhja: Marrëveshja për demarkacionin e kufirit shtetëror mes Republikës së Kosovës dhe Republikës së Malit të Zi, e nënshkrua më 27 gusht 2015, në Vjenë, kryeqytetin e Austrisë.

Kjo marrëveshje, për palën kosovare u nënshkrua nga zëvendëskryeministri dhe ministri i Punëve të Jashtme, Hashim Thaçi, dhe ministri i Punëve të Brendshme, Skënder Hyseni, ndërsa për palën malazeze, zëvendëskryeministri dhe ministri i Punëve të Jashtme, Igor Llukshiq, dhe ministri i Punëve të Brendshme, Rashko Konjeviq. Dëshmitarë të nënshkrimit të saj ishin, kryeministri i Kosovës, Isa Mustafa, kryetari i Malit të Zi, Filip Vujanoviq, si dhe ministri i Punëve të Jashtme i Austrisë, Sebastian Kurz.)

AKADEMIA SHQIPTARE AMERIKANE E SHKENCAVE DHE ARTEVE – NJU JORK

AKADEMIA SHQIPTARE AMERIKANE E SHKENCAVE DHE ARTEVE – SHKUP  

Duke marrë parasysh se, 

Marrëveshja për demarkacionin e kufirit shtetëror mes Republikës së Kosovës dhe Republikës së Malit të Zi, e negociuar që nga viti 2009, me ndërmjetësim ndërkombëtar të Bashkimit Evropian, e nënshkruar gjatë samitit për Ballkanin Perëndimor, më 27 gusht 2015, në Vjenë të Austrisë, ka krijuar pakënaqësi, revoltë dhe kundërshtime në popullin e Kosovës, në qarqet akademike, në Kosovë, Shqipëri, Maqedoni, Luginë të Preshevës dhe në diasporën shqiptare, si dhe në partitë politike opozitare të Kosovës, të cilat gati një vit protestojnë fuqishëm kundër kësaj marrëveshje, bashkë me banorët e Komunës së Pejës, të Rugovës dhe Podgurit, të cilët protestojnë sidomos për mënyrën e imponimit të kësaj marrëveshje, me kushte të padrejta dhe poshtëruese ndaj qytetarëve të Kosovës, duke kërkuar për shkëmbim të liberalizimit të vizave për qarkullim të lirë në zonën e Shengenit, t’i falin shtetit fqinj, Malit të Zi, një territor prej afërisht 82 kilometër katrorë.      

Përderisa, pala malazeze është shprehur se marrëveshja është shembull për rajonin dhe paraqet konfirmim se rajoni është i përkushtuar në procesin e integrimit në BE dhe NATO, ndërsa pala kosovare nënshkruese e marrëveshjes konsideron se ajo është në përputhje me Kushtetutën e vitit 1974, Dokumentin e Ahtisarit dhe Kushtetutën e Republikës së Kosovës, duke konsideruar se Kosova tanimë e ka përmbyllur procesin e demarkacionit të kufirit me Shqipërinë, Maqedoninë dhe tani me Malin e Zi, me shpresë që së shpejti kjo çështje do të përmbyllet edhe me Serbinë, në anën tjetër, pakënaqësia e popullit të Kosovës, përmes subjekteve politike dhe qarqeve akademike vazhdon të rritet, me tendencë të përshkallëzimit të situatës dhe cenimit të sigurisë dhe rendit kushtetues të vendit.

Me faktin se, ratifikimi i kësaj marrëveshjes për demarkacionit është caktuar nga BE-ja si kriteri i fundit për liberalizimin e vizave për Kosovën, ndërsa shefja për Politikë të Jashtme dhe Siguri, Federica Mogherini ka kërkuar që të bëhet ratifikimi i kësaj marrëveshje, si kusht i fundit për lëvizje të lirë të qytetarëve të Kosovës, opozita kosovare disa muaj me radhë është duke e bojkotuar punën e Kuvendit, duke konsideruar se një kusht të tillë nuk e ka pasur asnjë shtet tjetër për liberalizim të vizave, madje as Kroacia, e cila akoma ka probleme me Slloveninë për demarkacionin e kufirit mes tyre, ku çështja është dërguar në Gjykatën e Arbitrazhit. Prandaj, konsiderojmë se, edhe për demarkacionin e kufirit mes Kosovës dhe Malit të Zi mund të veprohet në këtë mënyrë, me formimin e një komisioni të ri, të përmirësohet ky version dhe pastaj të ratifikohet në Kuvend, apo në rast të mospajtimit mes palëve të dërgohet në Gjykatën e Arbitrazhit.

Mbetemi me shpresë se, Bashkimi Evropian nuk mendon seriozisht që ta përdor këtë çështje si kusht për zvarritjen e mëtutjeshme të liberalizimit të vizave, pavarësisht se Komisioneri për Politikë Evropiane të Fqinjësisë dhe Negociata për Zgjerim, Johannes Hahn, konsideron se pa zgjidhjen e çështjes së demarkacionit të kufirit me Malin e Zi nuk do të ketë liberalizim të vizave për qytetarët e Kosovës.

Duke marrë parasysh se, kundër ratifikimit të marrëveshjes së demarkacionit në këmbim të liberalizimit të vizave, qytetarët e Pejës kanë organizuar protesta masive, ndërsa është nënshkruan edhe një peticion nga qytetarët e Kosovës, ku mbi 200 mijë qytetarë janë deklaruar kundër kësaj marrëveshje, edhe shumë organizata joqeveritare, akademikë, profesorë dhe intelektualë janë deklaruar kundër saj, të cilët i kanë drejtuar apele Qeverisë, Parlamentit dhe Presidentit të Kosovës që kjo marrëveshje të mos ratifikohet nga Parlamenti. Edhe deputetët e partive opozitare janë deklaruar se nuk do të kthehen në Kuvend derisa të mos hiqet nga rendi i ditës ratifikimi i kësaj marrëveshje.

Shefja për Politikë të Jashtme dhe Siguri, Federica Mogherini ka thënë se marrëveshja e demarkacioni duhet të ratifikohet patjetër, por nuk ka thënë që të bëhet pikërisht siç e ka vendosur komisioni qeveritar, duke i falur afërsisht 82 kilometër katror tokë Malit të Zi.

Duke u bazuar në argumentet e paraqitura, ekspertët e kësaj çështje konsiderojnë se kjo kërkesë nuk ka ardhur nga Bashkimi Evropian, por nga vetë klasa politike kosovare, e cila me dinakëri mundohet ta mashtrojë popullin dhe t’i falë Malit të Zi pjesë nga territori i Kosovës, pa kushte të njohura për opinionin e vendit dhe atë ndërkombëtar. Madje, disa zyrtarë të lartë të vendeve anëtare të BE-së nuk janë në dijeni se si ka rrjedhur që kjo marrëveshje të jetë kusht për liberalizimin e vizave, përderisa nuk ka qenë kusht për asnjë shtet tjetër.

Duke marrë parasysh se, marrëveshja për demarkacionin me Malin e Zi ende nuk është sjellë në Kuvend për ratifikim, dhe në ndërkohë vazhdon të jetë kusht për liberalizim të vizave, shumica e kosovarëve mendojnë se BE-ja duhet ta kuptojë që Kosova nuk mund të bëhet gjithmonë kurban i Ballkanit, për faljen e territoreve të veta shteteve fqinje.

Ekspertë të kësaj çështje theksojnë se, pikërisht tek vendkalimi i Kullës, në rrugën Pejë–Rozhajë, kufiri është i vendosur pesë kilometra brenda territorit të Kosovës dhe me këtë rast Kosovës i janë marrë 12 mijë hektarë tokë, të cilat i takojnë me kadastër Komunës së Pejës.

Njohës të së drejtës ndërkombëtare konsiderojnë se kjo marrëveshje ndërshtetërore nuk e ka statusin e marrëveshjes ndërkombëtare, si dokument që e cakton vijën kufitare ndërmjet Kosovës dhe Malit të Zi, dhe nisur nga ky fakt, edhe Kuvendi i Kosovës nuk e ka të qartë se me çfarë procedure duhet ta bëjë ratifikimin e saj.

Duke konsideruar se, ekspertët parashohin dy rrugë kushtetuese përmes të cilave mund të bëhet ratifikimi i marrëveshjeve ndërkombëtare, edhe atë: e para, është nëpërmjet votimit në Kuvend, ku pa votën ,,për” të dy të tretave të deputetëve nuk mund të ratifikohet asnjë marrëveshje ndërkombëtare, që ka të bëjë me territorin e shtetit. Por, ka marrëveshje për një listë çështjesh të tjera, në të cilën nuk bën pjesë çështja e territorit, të cilat ratifikohen pas nënshkrimit nga presidenti i shtetit.

Qytetarët e Kosovës, subjektet politike opozitare dhe shumica e ekspertëve të kësaj çështje konsiderojnë se marrëveshja për demarkacionin me Malin e Zi nuk do të prodhojë paqe, dhe se kushti i BE-së për Kosovën është i padrejtë, duke qenë kërkesë vetëm për Kosovën, që të ratifikohet kjo marrëveshje e demarkacionit si kusht që qytetarët e Kosovës të lëvizin të lirë në zonën e Shengenit.

Disa akademikë, intelektualë, profesorë, studiues dhe profesionistë të kësaj çështje, nga një tubim shkencor i organizuar në Tiranë, janë bashkuar në thirrjen drejtuar Qeverisë së Kosovës dhe Qeverisë së Shqipërisë lidhur me marrëveshjen e demarkacionit mes Kosovës dhe Malit të Zi, duke apeluar që t’i thuhet Jo dhënies së territoreve për viza!

Këto forca intelektuale, duke e ndjekur me shqetësim vendosjen e një kushti të paprecedent për popullin e Kosovës, sa i takon përfitimit të lëvizjes së lirë në zonën Shengen, konsiderojnë se, pasi që Republika e Kosovës i plotësoi të gjitha kushtet dhe kriteret e vendosura, edhe pse ato qenë ndryshe dhe më shumë se për të gjitha shtetet e tjera që morën liberalizimin e vizave, BE vendosi një kusht shtesë, që t’i jepet Malit të Zi një pjesë e territorit të Kosovës, të cilin e konsiderojnë si një kusht i padrejtë, i paarsyeshëm dhe denigrues për çdo shqiptar.

Ju përkujtojmë se,

Pozita gjeografike e trojeve shqiptare, me pasuri të mëdha nëntokësore dhe mbitokësore, përherë ka qenë tragjike për popullsinë autoktone shqiptare, e cila përjetoi pushtime të njëpasnjëshme përgjatë shekujve, sidomos pas Paqes së Shën Stefanit, Kongresit të Berlinit, Konferencës së Londrës, kësaj radhe edhe Samitit të Vjenës, ku shembulli i trojeve shqiptare mund të jetë i vetmi në botë, ku kushtëzohet vetëm pala shqiptare, edhe pse harta politike e shtetit të tyre kufizohet nga të katër anët me trojet e veta etnike të grabitura nga shtetet fqinje.

Ashtu siç ndodhi në mënyrë të dhunshme copëtimi i territoreve në fund të shekullit nëntëmbëdhjetë dhe përgjatë shekullit njëzet, me ndikimin dhe vendimin e Fuqive të Mëdha, pavarësisht kundërshtimeve të popullsisë autoktone shqiptare, me ndikimin e Rusisë dhe luajtjen e rolit të e viktimës nga popullsia sllave e gadishullit Ballkanik, duke i shpërblyer me toka shqiptare, drejtpërsëdrejti ndikuan në formimin e shteteve të reja sllave në territoret etnike shqiptare, në këtë rast edhe formimin e shtetit të Malit të Zi dhe atë të Maqedonisë.

Mali i Zi synim kryesor përgjatë historisë ka pasur zgjerimin në territoret shqiptare, siç kërkoi nga Kongresi i Berlinit, aneksimin e Plavës dhe Gucisë. Mbasi ushtria e Malit te Zi nuk mundi ta pushtojë me luftë Plavën dhe Gucinë kërkoi nga Kongresi i Berlinit që t’i jepen Hoti dhe Gruda, por pasi nuk arriti ta pushtoi as Hotin e Grudën, Mali i Zi kërkoi nga Kongresi i Berlinit që t’i jepet një zonë tjetër, Ulqini dhe Tivari.

Me gjithë vendimet e Fuqive të Mëdha për aneksimin e këtyre territoreve Malit të Zi, populli shqiptar asnjëherë nuk u pajtua më këtë ndarje dhe gjatë gjithë kohës bëri rezistencë të armatosur dhe kurrë nuk e njohu pushtimin malazez.

Populli shqiptar nga Plava, Gucia, Ulqini, Tivari, Ana e Malit, Hoti, Gruda, Trieshi, Koja e Podgorica gjithmonë qëndruan të rreshtuar në ballë të luftërave për çlirimin e këtyre territoreve të aneksuara. Mbas përfundimit të Luftës së Dytë Botërore, si republikë e ish federatës jugosllave, Malit të Zi iu dha edhe Rozhaja, e cila ishte nën administrimin e Pejës deri në vitin 1945.

Duke konsideruar se, demarkacioni i kufirit mes Kosovës dhe Malit të Zi nuk duhet të konsiderohet si çështje formale dhe teknike, por si çështje politike që e cenon sovranitetin shtetëror dhe tërësinë e trojeve etnike shqiptare, si e tillë nuk është vetëm çështje e Kosovës, por edhe çështje e tërë kombit shqiptar, duke marrë parasysh luftën dhe përpjekjet shekullore për mbrojtjen dhe ruajtjen e tërësisë tokësore të trojeve etnike. 

Edhe pse ekspertët kanë ofruar shumë fakte për këtë çështje, siç është Kushtetuta e Malit te Zi e vitit 1947, e cila e përshkruan saktë vijën kufitare, ku shihet qartë se vija kufitare ka qenë Çakorri dhe Kulla, por këto fakte të ofruara më herët Qeveria e Kosovës nuk i ka marrë parasysh, prandaj, apelojmë që Kuvendi i Republikës së Kosovës ta rishikojë edhe një herë këtë çështje dhe të sjell vendim të drejtë, duke pasur parasysh përherë sovranitetin dhe integritetin territorial të shtetit të Kosovës.

Duke pasur parasysh këto fakte, u bëjmë thirrje Qeverisë së Republikës së Kosovës të mos pranojë kushte që e vendosin vendin në pozicione të pafavorshme krahasuar me vendet tjera të rajonit, duke konsideruar se Qeveria e Kosovës nuk është e detyruar të pranojë kushte të padrejta dhe të pabarabarta, krahasuar me shtetet tjera, në dëm të integritetit territorial.

Ndërsa, Qeveria e Republikës së Shqipërisë të mos jetë indiferente ndaj copëtimit të mëtejshëm të territoreve shqiptare, por t’i përdorë të gjitha mundësitë për eliminimin e këtij kushti të padrejtë dhe të dëmshëm për lëvizjen e lirë të qytetarëve të Kosovës në shtetet e Bashkimit Evropian.  

Demarkacioni i kufirit është çështje midis dy vendeve sovrane, Kosovës dhe Malit të Zi dhe nuk mund të bëhet peng për marrëveshje ndërkombëtare që Kosova lidh me palë të treta, në këtë rast me vendet anëtare të marrëveshjes Shengen të BE-së.

Qeveria e Republikës së Kosovës, Qeveria e Republikës së Shqipërisë dhe shqiptarët kudo që janë, duhet ta ndalojnë krijimin e precedentit që për çdo të drejtë anëtarësimi në marrëveshjet evropiane të detyrohen t’u japin territore fqinjëve të tyre ballkanikë.

U bëjmë thirrje Qeverisë dhe Kuvendit të Republikës së Kosovës, TA RISHIKOJNË MARRËVESHJEN PËR DEMARKACIONIN E KUFIRIT SHTETËROR MES KOSOVËS DHE MALIT TË ZI, dhe të sjellin vendime të drejta, në interes të qytetarëve të Kosovës, të ruajtjes së sovranitetit dhe integritetit territorial të shtetit, paqes dhe sigurisë ndërkombëtare, vlerave të demokracisë perëndimore për qarkullimin e lirë të njerëzve, ideve dhe kapitalit, si dhe kultivimin e fqinjësisë së mirë mes vendeve dhe popujve të Ballkanit.      

Nju Jork-Shkup, 11 korrik 2016                             

Akademia Shqiptare Amerikane e Shkencave dhe Arteve – Nju Jork

Kryetari, Prof. Dr. Skender Kodra

Akademia Shqiptare Amerikane e Shkencave dhe Arteve – Shkup

Kryetari, Prof. Dr. Abdulla Mehmeti 

Gazetari maqedonas: Do ta djegim Ambasadën dhe ambasadorin amerikan (fotot dhe video)

Një ndër megafonët më të zëshëm të qeverisë së VMRO-së së Nikolla Gruevskit, “gazetari” Milenko Nedelkovski, ka kërcënuar publikisht Ambasadën amerikane në Maqedoni dhe ambasadorit Xhes Bejli.

Ai ka shkruar se herën e parë kur i është vënë flaka ambasadës, kanë shpëtuar lehtë, ndërsa kësaj radhe do të jetë shumë më keq, duke u kërcënuar se do t’i djegin të gjallë ambasadorin dhe stafin tjetër në ambasadë, transmeton Fakte.

postimmm

Në kohën e bombardimeve të caqeve serbe nga NATO për shkak të genocidit ndaj shqiptarëve të Kosovës, një grup qytetarësh të Maqedonisë, ndër të cilët edhe gazetarë (Dragan Pavloviq Llatas dhe të tjerë), i vunë flakën Ambasadës amerikane në Shkup. Fatmirësisht nuk pati të lënduar dhe viktima.

“Atëherë shpëtuan b.thën. Kësaj radhe (…) të dhier do të shkojnë në atë botë”, ka shkruar Nedelkovski, duke shtuar se kështu do të jenë “shembull për të gjithë ata që duan ta rrënojnë shtetin”./GazetaExpress/

djegia-e-ambasades-ne-shkup-1999_1468153292-3831059

protesat-anti-nato-dhe-anti-shba-ne-shkup-me-1999_1468153506-9558250

Maqedonia përdor standarde të dyfishta për bashkësitë fetare dhe etnike

Kryetari i Bashkësisë Fetare Islame në Maqedoni, Sulejman Rexhepi, në një bisedë me Radion Evropa e Lirë, ka thënë se “feja dhe njëkohësisht edhe bashkësitë etnike në Maqedoni nuk trajtohen në mënyrë të barabartë”.

Ai tha se në vend përdoret një ‘drejtësi selektive’, që, sipas tij, “thellon hendekun e ndasive etnike dhe fetare” dhe e pamundëson ndërtimin e “një shoqërie të sigurt dhe demokratike në përputhje me standardet e vendeve të zhvilluara demokratike, ku ligji vlen për tëgjithë njëlloj”.

Deklaratat e kryetarit të Bashkësisë Islame të Maqedonisë u bënë pikërisht në ditën e festimit të Bajramit të Madh nga besimtarët e fesë islame gjithandej Maqedonisë.

“Maqedonia për momentin është në një krizë të thellë politike dhe kjo krizë e thellë politike nuk është e rastësishme. Sigurisht se është rrjedhojë e mosveprimit të shtetit juridik. Veprimi i shtetit ka qenë dhe është me dy kute të ndryshme. Përdoren standarde të dyfishta në mes bashkësive të ndryshme fetare dhe etnike në Maqedoni”, tha Rexhepi, duke nënvizuar të mos ketë besuar se që prej pavarësimit ‘Maqedonia mund të vijë në një gjendje të rëndë’.

“Gjendje ku shteti në formë të barabartë nuk i trajton të gjitha përkatësitë etnike dhe ato fetare. Gjendja në Maqedoni është e mjerueshme, por me vullnetin e Zotit, shpresojmë që Maqedonia, me ndihmën e faktorit ndërkombëtar, të orientohet kah e mira, kah perspektiva e këtij shteti multietnik dhe multifetar”, ka thënë kryetari i Bashkësisë Fetare Islame në Maqedoni, Sulejman Rexhepi.

Sipas tij, politikat diskriminuese të Qeverisë janë të dukshme edhe në kthimin e pronave të Bashkësisë Fetare Islame, sikur edhe në përkujdesjen ndaj institucioneve fetare islame, të cilat veprojnë në Maqedoni, përfshirë medresenë Isa Beu dhe Fakultetin e Shkencave Islame, që nuk kanë mbështetje nga institucionet e shtetit.

Duke folur për rëndësinë që ka feja, zoti Rexhepi ka thënë se askush nuk duhet të ketë frikë nga besimtarët myslimanë në Maqedoni, sepse ata duhet shikuar si shtyllë kyçe për stabilitetin e shtetit të Maqedonisë.

“Kurani si libër i shenjtë, e që njëherësh llogaritet si Kushtetuta e të gjithë myslimanëve në botë, në tekstin e vet 33 herë përmend paqen, vetëm dy herë e përmend luftën dhe në asnjë rast nuk e përmend armën – shpatën. Kjo do të thotë se të gjitha janë insinuata, që në vazhdimësi, trillohen për Islamin”, ka deklaruar Rexhepi.

Kryetari i Bashkësisë Fetare Islame në Maqedoni, në festën e Bajramit të Madh, ka përcjellë porosi paqeje dhe mirëkuptimi ndërmjet njerëzve.

“Në këtë ditë festive po përcjell mesazhet si kryetar i Bashkësisë Fetare Islame në Maqedoni, që të kultivojmë sa është e mundur dashurinë e ndërsjellë, respektin, tolerancën dhe të binden të gjithë se Maqedonia nuk ka të ardhme tjetër përvec ndërtimit të bashkëjetesës së sinqertë”, ka thënë Sulejman Rexhepi, kryetar i Bashkësisë Fetare Islame në Maqedoni.

Kumanova kërkon drejtësi për Almirin, i cili u godit qëllimisht me veturë

Bekon Limani nga organizata “Zani” kërkoi që organizatorët të distancohen nga çdo veprim politik apo partiak, ndërsa partitë politike të mos keqpërdorin këtë proteste për qëllime personale

KUMANOVË – Në organizim të Organizatës Joqeveritar “Zani” me sloganin “Me Almirin! Për Drejtësi” qytetarët e Kumanovës marshuan rrugëve të qytetit për të kërkuar drejtësi për fëmijën 4 vjeçar Almir Aliu nga Kumanova, i cili ndërroi jetë ditë më parë si pasojë e goditjes me veturë qëllimisht, pas një zënke banale mes të atit të tij dhe të dyshuarit për vrasje.

Organizatorët e protestës apeluan deri tek autoritetet kompetente që vrasësi të marrë dënim maksimal, pasi që siç porosisin ata, e ardhmja e çdo shoqërie janë fëmijët dhe kur të cenohet jeta dhe integriteti i tyte, atëherë cenohet edhe ekzistenca e tërë shoqërisë.

Bekon Limani nga organizata “Zani” kërkoi që organizatorët të distancohen nga çdo veprim politik apo partiak, ndërsa partitë politike të mos keqpërdorin këtë proteste për qëllime të përfitimeve personale. Ai shtoi se me anë të kësaj proteste kërkojnë mbrojtjen, qetësinë, paqen dhe prosperitetin që ju mungon qytetarëve.

“Shpresojmë dhe besojmë se të gjitha institucionet të cilat janë të involvuara në procesin e zbatimit të drejtësisë, do të jenë konstruktive në dhënien e dënimit të merituar, dënimin maksimal. Maqedonia edhe njëherë i ka në test institucionet e veta dhe sundimin e ligjit për të gjithë njësoj dhe pa diskriminim. I japim përkrahje maksimale gjyqit që të kalojë këtë test. Nëse Boban del i çmendur, edhe ne të gjithë do të çmendemi”, deklaroi Limani.

Protestuesit u tubuan para gjimnazit “Sami Frashëri” dhe marshuan drejt Gjykatës Themelore të Kumanovës, ku dhe përfundoi protesta në mënyrë paqësore.

Ndryshe, fëmija 4 vjeçar Almir Aliu ndërroi jetë të premten në klinikën e Shkupit, si pasojë e plagëve të marra nga goditja me veturë qëllimisht nga i dyshuari Boban Iliq të cilit Gjykata Themelore e Kumanovës i ka caktuar 30 ditë paraburgim dhe i cili akuzohet për veprën penale “Vrasje me paramendim”. aa

Publikohet videoja me pamjet ku makina përplas 4-vjeçarin në Kumanovë

KUMANOVE– Mediat maqedonase kanë publikuar momentin kur makina përplas për vdekje fëmijën 4-vjeçar në Kumanovë. Varrimi i Almirit 4-vjeçar u bë ditën e shtunë ndërsa sot pritet të mbahen protesta në të cilat do të kërkohet drejtësi dhe dënim maksimal për atë që kishte bërë shkeljen e tij, maqedonasin Boban Iliç, i cili tanimë gjendet në paraburgim.

Për vrasjen e Almirit 4-vjeçar kanë reaguar qytetarët, subjektet nga Maqedonia dhe nga jashtë, institucionet, por edhe i gjithë opinioni i gjerë.

Sedat Aliu, babai i Almirit 4-vjeçar i cili u vra mizorisht pak ditë më parë nga një shtetas maqedonas në spitalin e Kumanovës, ka rrëfyer për “Telegraf”, ngjarjen e rëndë që i mori jetën të birit.

“Ishim në spitalin e Kumanovës duke pritur radhën për t’i dhënë djalit një injeksion. Në ato momente erdhi një rast urgjent dhe ne i dhamë përparësi. Këtë gjest njerëzor nuk e mirëpriti B.I., i cili po priste njëjtë në radhë. Madje ai, i revoltuar thirri në telefon përforcime për të më sulmuar mua me familjen”, – ka thënë Aliu.

“Në këto rrethana m’u desh edhe mua të thërras vëllaun dhe nipin tim. Pasi dolëm jashtë, ata kishin qenë duke na pritur të armatosur. Morën hov dhe na goditën së pari me makinë të tipit ‘Mercedes C200’. Na mbështetën për muri. Djalin tim e bëri copa, gruas dhe mua na shkaktoi lëndime të rënda, ndërsa më pas dolën nga vetura duke na rrahur me shkopinj bejsbolli. Këtu e pësuan rëndë edhe vëllai im A.A. dhe nipi im S.D., të cilët gjendet njësoj në gjendje të rëndë në Spitalin e Shkupit”, – është shprehur babai i 4-vjeçarit, vdekja tragjike e së cilit ka shkaktuar një zemëratë të përgjithshme veçanërisht te shqiptarët e Maqedonisë.

“Pikë së pari, ju faleminderit të gjithë shqiptarëve që kanë qenë masivisht në varrim, ju faleminderit të gjithëve! Për momentin kemi përkrahjen e gjithë familjes, shokëve, dashamirëve. Nuk di si ta përshkruaj, po Zoti deshti kështu, dhe ashtu edhe u bë!” – tha Sedat Aliu, babai i katërvjeçarit Almir Aliu. Sedat Aliu thotë se kjo ishte një vrasje e qëllimshme, ndaj pret që Boban Iliç të marrë dënimin maksimal. “Ne presim prej organeve, institucioneve të shtetit që krimineli të marrë dënimin e merituar, maksimalisht”, – thekson prindi i Almirit, Sedat Aliu.

Mijëra qytetarë përcollën dy ditë më parë në banesën e fundit Almirin e vogël, në varrezat e qytetit në Kumanovë. Miq, dashamirës e bashkëqytetarë trokitën në derën e familjes Aliu, në ditën e parë të pritjes, për të ndarë dhimbjen së bashku dhe për t’u shprehur ngushëllime për humbjen e pakompensueshme.

Në rrjetet sociale, qytetarë të thjeshtë kanë bërë postime nën hashtagun #WhoIsAlmir4, në të cilat shprehin sensibilizimin e tyre për ngjarjen e rëndë, e cila fillimisht u përcoll si një aksident dhe më pas rezultoi se mund të kishte sfond etnik. Vrasja mizore e Almirit 4-vjeçar nga Kumanova nga maqedonasi Boban Iliç ka shkaktuar reagime të shumta dhe revoltë në Maqedoni. Në disa fletushka që po shpërndahen në Kumanovë dhe në rrjetet sociale, paralajmërohen protesta ditën e sotme në Kumanovë. Marshi protestues do të fillojë para gjimnazit “Sami Frashëri” dhe do të mbarojë me bllokimin e rrugës ku ndodhen institucionet e gjykatës, komunës dhe stacionit policor.

Vdekja e Almirit – Anulohet koncerti tradicional i Fitër Bajramit në Kumanovë

“Si rezultat i tragjedisë që ndodhi në qytetin e Kumanovës, respektivisht vdekjes së katërvjeçarit Almir Aliut që vdiq pas plagëve të marra nga shkelja e qëllimshme me makinë nga një bashkëqytetar maqedonas, me keqardhje ju njoftojmë se anulojmë organizimin dhe mbajtjen e koncertit tradicional të Fitër Bajramit”, njoftojnë nga Forumi Rinor Islam – Kumanovë dhe Shoqata për Edukim Vllaznia – Kumanovë.

“Ne si organizata të poshtëshënuara shprehim indinjatën tonë të thellë për humbjen e Almirit, por edhe ngushëllimin tonë ndaj familjes Aliu dhe të gjithë qytetarëve të Kumanovës, duke u solidarizuar me familjen dhe gjithë ata që ndjenë dhimbje me rastin e humbjes së bashkëqytetarit tonë katër vjeçar. Le të jetë kjo një shenjë proteste ndaj atij akti vandal, dhe thirrje që organet gjegjëse të marrin hapat e duhura dhe autori i kësaj vepre jonjerëzore të marrë denimin maksimal për vrasje me paramendim”, thuhet në njoftim.

Shkup – Gjykata Kushtetuese nuk shqyrton kushtetutshmërinë e Kryqit në Butel

Është shtyrë seanca e sotme e Gjykatës Kushtetuese në të cilën duhej të shqyrtohej kushtetutshmëria e propozimit për vendosjen e një kryqi me përmasa të mëdha në komunën e Butelit në Shkup

SHKUP – Është shtyrë për të mërkurën e ardhshme seanca e sotme e Gjykatës Kushtetuese në të cilën duhej të shqyrtohej kushtetutshmëria e propozimit për vendosjen e një kryqi me përmasa të mëdha në komunën e Butelit në Shkup, iniciativë kjo e parashtruar në muajin mars nga kryetari i Lëvizjes për Reforma – PDSH, njëherësh kryetar i komunës së Strugës, Zijadin Sela.

Shtyrja e sotme, siç njoftoi kryetarja e Gjykatës Kushtetuese, Elena Gosheva është bërë me kërkesë të gjykatësit Sali Murati i cili nuk ishte i pranishëm për të dhënë sqarime rreth arsyes së propozimit të tij për shtyrje të kësaj pike.

Në muajin shkurt, komuna e Butelit miratoi vendimin që në hyrje të saj nga drejtimi i komunës së Çairit të vendos një kryq në përmasa prej 55 metrash.

Propozimi siç thanë atëherë nga komuna ka qenë i Kongresit Maqedonas.

Ky vendim rezultoi me protesta të organizuara nga partia shqiptare në pushtet, Bashkimi Demokratik për Integrim (BDI) me arsyetimin se një vendim i tillë do t’i prishë marrëdhëniet ndërfetare, me potencial të lartë për të krijuar konflikt permanent mes qytetarëve.

Protestat në disa momente ishin tejet të tensionuara dhe përfunduan me prishjen e bazamentit i cili ishte ndërtuar për vendosjen e kryqit.

Seanca e ardhshme e Gjykatës Kushtetuese është më 29 qershor.

Tensione në Shkup – përplasje e protesuesve me policinë

Protesta masive në Shkup

Protesta masive janë mbajtur në Shkup të hënën në mbrëmje në organizim të revolucionit shumëngjyrësh ndërsa në to kanë marrë pjesë edhe drejtuesit e opozitës së bashkuar të udhëhequr nga Lidhja Social-Demokrate. Protestat që kanë zgjatur deri pak para mesnatës janë përshkruar me tensione të shumta.

Policia ishte në shënjestër të protestuesve që hodhën gjësende të forta, në momentin kur ka ndaluar protestuesit të rrëzojnë një përmendore para Kuvendit të Maqedonisë. Protestuesit hodhën ngjyrë dhe thyen xhamat e ndërtesës së Ministrisë së Drejtësisë dhe të disa objekteve tjera qeveritare.

Protestat kanë pasuar një ultimatum të shoqërisë civile, i cili ka skaduar të shtunën, drejtuar institucioneve për plotësimin e kërkesave të saj për krijimin e kushteve për prokurorinë speciale që të punojë pa pengesa në hetimin e zyrtarëve të dyshuar për vepra të rënda penale, për mos ndjekjen e aktivistëve të saj si dhe krijimin e kushteve për zgjedhje të lira. Pas injorimit të këtyre kërkesave nga qeveria, protestuesit kanë dalë me kërkesa të reja.

“Qytetarët duhet të jenë pjesë e zgjidhjes së krizës, jo që të vendosim, jo që të jetë pjesë e politikave, jo që të luftojmë për pushtet, por që të sigurohemi se në tavolinën e bisedimeve do të zhvillohen negociata transparente që çdo qytetar i Maqedonisë të dije se çfarë po ndodh prapa dyerve”, ka deklaruar Dejan Stojkovski, një nga drejtuesit e shoqërisë civile, e cila po proteston tani e dy muaj.

Ai tha se revolucioni shumëngjyrësh kërkon gjithashtu nga Gjykata Kushtetuese që sa më parë të vendos mbi nismën e ngritur për vlerësimin e kushtetutshmërisë së ligjit për prokurorinë speciale, që puna e saj të mos mbetet peng e kësaj nisme që mbahet nga pushteti si armë për shuarjen e prokurorisë në rast rreziku nga ndjekja e mëtejmë e zyrtarëve të saj.

Nënkryetarja e LSDM-së, Radmilla Sheqerinska tha se qeveria i ka ditët e numëruara. Përgjegjësia për krimet e bëra dhe zgjedhjet e lira tha Sheqerinska janë alternativa e vetme për dalje nga gjendja e rëndë në të cilën ndodhet vendi.

“Kjo krizë ka vetëm një dalje, përmes drejtësisë, përgjegjësisë, ata që kanë vjedhur, ata që kanë mashtruar, duhet të përgjigjen. Kjo qeveri duhet të jap dorëheqje dhe të organizohen zgjedhje të lira dhe demokratike që qytetarët të vendosin se kujt i japin besimin për të qeverisur me vendin. Zgjidhje tjetër nuk ka”,ka deklaruar Shekeqinska.

Por, nga ana tjetër janë mbajtur edhe kundër protesta të organizuara nga mbështetësit e qeverisë. Ata kanë protestuar para gjykatës penale, e cila kishte vendosur masën e arrestit shtëpiak për një kryetar komune që po hetohet nga prokuroria speciale.

“Kësaj radhe në ndërtesën e gjykatës do të hyjnë vetëm disa njerëz për t’i dorëzuar një deklaratë, por ata duhet ta kenë të qartë se herën tjetër do të hyjnë shumë më tepër njerëz dhe atëherë duhet të japin llogari se pse punojnë nën presion dhe pse tolerojnë që në punën e tyre të përzihen njerëz të dëshmuar me vepra të ndryshme kriminale”, ka deklaruar Alekandar Pandov nga Shoqata për Mbrojtjen e Maqedonisë.

Protesta dhe kundër protesta po mbahen një kohë të gjatë dhe në disa raste policia evituar përplasjen mes dy grupeve. Kriza politike në Maqedoni duket pa zgjidhje përkundër presioneve të fuqishme nga jashtë. Apeleve të shumta për ulje në bisedime partitë i janë përgjigjur javën e kaluar, por pa ndonjë marrëveshje konkretet.

Pastrimi i listës zgjedhore, reformat në media dhe para se gjithash puna e prokurorisë speciale, janë disa nga pikat për të cilat partitë politike nuk po mund të merren vesh.

Mbahet protesta e madhe në Shkup pas skadimit të ultimatumit të Revolucionit të Larmë (fotot)

Protestuesit para PSP-së brohorasin “Nikolla Nikolla, shutka nuk të ik Nikolla!”. Më herët në rrjetin social ‘Revolucioni Laraman’ ka bërë thirrje për protesta masive.

“Sonte në 19 ne do të mblidhemi para Prokurorisë Speciale, simbolit të drejtësisë! Ne do të jemi të e bashkuar, të fortë, vendimtarë dhe të përgjegjshëm! Ne kërkojmë që qytetarët të jenë pjesë e zgjidhjes së krizës dhe të vijnë për të siguruar pjesëmarrjen tonë! Ne kërkojmë që kriminelët të përgjigjen dhe do t’i vëmë në presion institucionet për të treguar se vjedhja dhe shtypja nuk mundet të jetë me aktivitete të paguara! Ne kërkojmë qeveri kalimtare dhe nuk tërhiqemi derisa të jemi të sigurt se qeveria do të sigurojë zgjedhje të lira dhe votim të lirë! Qytetarët nga e gjithë Maqedonia, shihemi! “, thuhet mes tjerash në profilin ‘Revolucioni Laraman’ në Facebook.

“Ne nuk falim! Ne nuk do të lejojmë që bisedimet për të ardhmen tonë dhe të fëmijëve tanë të udhëhiqen pas dyerve të mbyllura! Jemi të  hidhëruar dhe të zemëruar me elitat politike të cilët një kohë të gjatë na mbajnë status quo-së me negociata të dështuara dhe bisedime jotransparente pa pjesëmarrjen e qytetarëve! Mjaft e kemi pasur nga negociatat në të cilat ne jemi vëzhgues të heshtur dhe pasiv! Zëri ynë duhet të dëgjohet nga qeveria, dhe opozita! Dhe kjo do të dëgjohet! Nëse jo në atë dhomë të vogël për negociata, ju do të na dëgjoni nga rrugët dhe sheshet e këtij vendi! “, apelojnë aktivistët nga lëvizja ‘Protestoj’.

Protestës i është bashkangjitur edhe lideri i LSDM-së Zoran Zaev, si dhe politikanë të tjerë opozitarë.

protesta2vvprotesta3vvv

Maqedonia: Dështojnë bisedimet, paralajmërohen protesta

Foto nga protestat e kaluara

Për të hënën janë paralajmëruar protesta, nga ana e organizatorëve të “Revolucionit shumëngjyrësh”, pasi të dielën në mesnatë skadon ultimatumi i sektorit civil që Gjykata Kushtetuese e Maqedonisë,të prononcohet rreth kushtetutshmërisë së Prokurorisë Speciale Publike.

Organizatorët e lëvizjes “Protestoj” dhe “Revolucionit shumëngjyrësh”, që përfaqëson mbi 80 organizata joqeveritare, kërkojnë formimin e një qeverie teknike në nivel ekspertësh, e cila do të ketë për detyrë që ta përgatisë vendin për zgjedhje të besueshme, përfshirjen e sektorit civil në bisedimet që zhvillojnë partitë politike për dalje nga kriza, si dhe dorëheqjen e presidentit të Maqedonisë, Gjorgje Ivanov.

Zëdhënësi i partisë më të madhe maqedonase në opozitë, Lidhjes Social Demokrate, Petre Shilegov, ka thënë për Radion Evropa e Lirë se partia e tij i mbështet protestat e qytetarëve, sepse ato paraqesin një bosht të rëndësishëm për ngritjen e institucioneve të shëndosha në përputhje me standardet që vlejnë në vendet anëtare të Bashkimit Evropian.

“Në këtë moment, vetëm nëpërmjet protestave mund të krijohet një klimë e shëndoshë për realizimin e zgjedhjeve fer dhe demokratike, andaj i ftojmë qytetarët që sa më masivisht të dalin në protesta për t’u thënë jo politikave të pushtetit, të cilat i kanë robëruar institucionet e shtetit duke i vënë në funksion të interesave të partive në pushtet”, ka thënë Shilegov.

Protestat e qytetarëvetë “Revolucionit shumëngjyrësh” janë mbështetur edhe nga Lëvizja “Besa”, e cila ka konfirmuar se mbetet në qëndrimin e saj tashmë të deklaruar disa herë, se i mbështet të gjitha aksionet qytetare që kanë për qëllimin, siç janë shprehur, rrëzimin e këtij regjimi anti-demokratik, anti-qytetar, por edhe anti-shqiptar.

“Rrjedhimisht, te ne nuk ka ndryshuar asgjë në këtë pikëpamje. Ajo që ka ndryshuar është opinioni publik në Maqedoni: pas protestës së 9 majit tashmë te shqiptarët partia më e madhe opozitare është pikërisht Lëvizja ‘Besa’, ndërsa këtë e pohoi edhe një institucion relevant amerikan siç është IRI”.

“Andaj është e pakuptimtë dhe e padrejtë që ne të mos jemi pjesë e bisedimeve për dalje nga kriza dhe shqiptarët të mos jenë të përfaqësuar në ato bisedime, sepse, siç e kemi thënë disa herë, dy partitë shqiptare të asaj tryeze, janë vetëm përkthimi maqedonisht i qëndrimit të VMRO DPMNE-së”, ka deklaruar Zeqiria Ibrahimi, zyrtar i lartë i Lëvizjes “Besa.

Pastrimi i listës së votuesve dhe reforma në media janë dy pikat për të cilat partitë politike nënshkruese të Marrëveshjes politike të Përzhinos nuk arrijnë të përafrojnë qëndrimet e tyre në përpjeke për të nxjerrë vendin nga kriza e thellë politikë, në të cilën ndodhet.

“Bisedimet janë ndërprerë, sepse VMRO-DPMNE nuk shpreh vullnet të mirë për të zgjidhur dy çështjet kyçe për sigurimin e kushteve minimale që të organizohen zgjedhje të besueshme siç është pastrimi i listës së votuesve dhe reformat në media, përkatësisht duke zvarritur zgjidhjen e tyre që nga nëntori i vitit të kaluar”.

“Bëhet fjalë për 330 mijë votues kontestues të cilët figurojnë në listën zgjedhore. Tashmë është e qartë për të gjithë,se VMRO-DPMNE i ka fituar zgjedhjet përmes fushatave të rrejshme të realizuara me mjetenga arka e shtetit në media të caktuara dhe një liste zgjedhore, e cila nuk përket me realitetin”, është shprehur Shilegov.

Ndërkohë, VMRO-DPMNE përmes një deklarate me shkrim ka theksuar se është pikërisht Lidhja Social Demokrate e Maqedonisë ajo që bën politikë destruktive në kundërshtim me interesat e qytetarëve.

“Lidhja Social Demokrate është ajo që iu shmang bisedimeve në Vjenë dhe tashmë dy herë i shmangi zgjedhjet dhe ballafaqimin me popullin. VMRO ka qenë dhe mbetet konstruktive në këtë situatë, pasi si parti ofruam dhe kemi për të ofruar edhe më shumë projekte në të mirë të qytetarëve”, theksohet në komunikatën për media të VMRO DPMNE-së të udhëhqur nga ish-kryeministri Nikolla Gruevski.

Ndërkaq, partia shqiptare në pushtet, Bashkimi Demokratik për Integrim zhbllokimin e procesit të bisedimeve e sheh në shtytjen që mund t’i bëjë këtij procesi bashkësia ndërkombëtare.

“Në kuadër të bisedimeve në nivelet e dyta, shpresojmë që me përkrahjen e faktorit ndërkombëtar të arrihet të dilet nga kjo krizë, e cila zgjatë tanimë më shumë se një vit e gjysmë në vend”, ka theksuar Teuta Arifi, nënkryetare e partisë shqiptare në pushtet, Bashkimit Demokratik për Integrim.

Mbrëmë aksident në Tetovë, humbin jetën dy të rinj shqiptarë

TETOVË – Një aksident me pasojë dy të vdekur ka ndodhur mbrëmë ne afërsi të një karburanti në Tetovë. Aksidenti ka ndodhur rreth orës 20:00 në autostradën Tetovë- Shkup, në afërsi të Zonës së Lirë Ekonomike.

Sipas mediave vendase dy të rinjtë që kanë humbur jetën lëviznin me një motoçikletë e cila ka dalë nga rruga dhe është përplasur me një mur.

Viktimat janë A.B dhe H.H, 25 dhe 20 vjeç të dy shqiptarë nga Tetova. Autoritetet kanë nisur hetimet për ngjarjen.

Maqedoni – Bastardimi institucional i gjuhës shqipe

Gabimet gjuhësore te mbishkrimet në gjuhën shqipe në Maqedoni

Përdorimi i gjuhës shqipe në Maqedoni po merr përmasa shqetësuese, duke marrë parasysh gabimet e shumta gjuhësore që vërehen nëpër mbishkrimet e atyre pak institucioneve që kanë nisur përdorimin e saj zyrtar. E njëjta gjë ndodh me gjuhën edhe në tabelat udhëzuese, transportin publik, faturat e ndërmarrjeve publike, e kështu me radhë.

Në bazë të ndryshimeve kushtetuese të paskonfliktit të vitit 2001, gjuha shqipe u bë gjuhë e dytë zyrtare në Maqedoni, por përdorimi i saj vazhdon të hasë në pengesa të shumta, ndërsa edhe në ato vende ku zbatohet, përdoret me bastardime të shumta.

“Mendoj se ka një papërgjegjësi totale ndaj përdorimit të gjuhës shqipe, veçmas nga institucionet publike, nuk funksionon asnjë lloj mbrojtje institucionale. Domethënë duhet të ekzistojnë sanksione për çdo gabim që i bëhet gjuhës shqipe, sepse këto çoroditje gjuhësore, jo vetëm gabime ortografike, por edhe gabime sintaksore nëpër dokumentacionet zyrtare, thjesht e cenojnë atë që ne e quajmë kështjellë e gjuhës”.

“Mendoj se para së gjithash, duhet të funksionojë sanksionimi për të gjithë ata që i lejojnë këto bastardime të gjuhës shqipe”, thotë Salajdin Saliu, profesor i gjuhës shqipe në Universitetin e Tetovës.

Dervish Halimi, përkthyes i autorizuar gjuhësor, thotë se përkthimet nga gjuha shqipe bëhen nga njerëz jo profesionistë, të cilët marrin guximin t’i hyjnë një pune që nuk ka asgjë të përbashkët me profesionin e tyre. Sipas tij, kjo mundësohet nga drejtuesit maqedonas të institucioneve, të cilët neglizhojnë gjuhën shqipe duke ia lënë çështjen e përkthimeve kuadrit joadekuat.

“Moskujdesi ndaj zbatimit të gjuhës bie normalisht mbi ata që e përfaqësojnë vullnetin politik të shqiptarëve. Ata, nëpërmjet funksionarëve që i kanë aty, duhet të kontaktojnë profesionistët e gjuhës dhe të gjitha botimet para se të dalin në opinion, t’i filtrojnë në aspektin profesional”, konsideron Halimi.

Ai thekson rëndësinë e mbrojtjes me ligj të çështjes së përdorimit të drejtë të gjuhës shqipe, ashtu siç është rregulluar edhe për gjuhën maqedonase.

“Në qoftë se duam që gjuhët të kenë të njëjtin nivel, atë fillimisht duhet të barazohen me ligj dhe pastaj të kujdesemi edhe për zbatimin e tyre në praktikë. Pra, kjo duhet të realizohet përmes një marrëveshjeje politike që kjo çështje të marrë formën e ligjit dhe më pas, edhe ne si intelektualë, si shkencëtarë, si profesionistë, të mundemi nesër të kemi përgjegjësi nëse nga pakujdesia bëjmë gabime të tilla”, thekson Halimi.

Qemal Musliu, këshilltar në Kuvendin e Shkupit thotë se çështja e përdorimit zyrtar të gjuhës shqipe, si dhe e zbatimit të saj të drejtë, disa herë është ngritur nga këshilltarët e BDI-së që përfaqëson, por deri më tani nuk është arritur ndonjë rezultat konkret.

Edhe pse çështja e përdorimit zyrtar të shqipes rregullohet me akte ligjore të veçanta nga Kuvendi i Shkupit, Musliu thotë se çështja duhet të rregullohet me një ligj të ri nga Kuvendi i Maqedonisë.

“Kohët e fundit kemi një ngritje të nivelit të përdorimit të gjuhës shqipe, por me gabime gjuhësore sa të duash, si në autobusët urban dhe në tabelat udhëzuese nëpër qytet. Për këtë arsye kam kërkuar që Kuvendi i Shkupit të ngrejë një iniciativë për formimin e një organi, i cili do ta mbikëqyrë edhe përdorimin e gjuhës shqipe, por edhe drejtshkrimin e gjuhës shqipe që të mos bëhen gabime gjatë përdorimit të saj, Por, fatkeqësisht kjo punë duhet të rregullohet me ligj, e ligjet dihet se miratohen në Kuvendin e Maqedonisë”, thotë Musliu.

Probleme me zbatimin e gjuhës shqipe ka edhe në shumë sfera tjera, si në tekste shkollore, botimin e ligjeve, por edhe në shumë ndërmarrje tjera private, të cilat përkthimet kryesisht i bëjnë nga interneti, që në të shumën e rasteve e humbin edhe kuptimin e vetë prodhimit.

Gjuha shqipe edhe pse është gjuhë e dytë zyrtare në Maqedoni, ajo deri më tani ka gjetur zbatim të pjesshëm vetëm në Kuvend, si dhe në komunat ku shqiptarët përbëjnë mbi 20 për qind të numrit të popullatës të përgjithshme. REL

BDI kërkon dorëheqjen e Ivanovit – opozita maqedonase votë mosbesimi

Presidenti Ivanov në Kuvendin e Maqedonisë

Deputetët e opozitës në Maqedoni, Lidhjes Social Demokrate të Maqedonisë, thanë në Kuvend se me aktet për faljen e politikanëve që hetohen nga Prokuroria Speciale, presidenti Ivanov ka shkelur Ligjin për falje dhe Kushtetutën e Republikës së Maqedonisë.

Ata kanë nisur një propozim për votën e mosbesimit për presidentin e Maqedonisë Gjorgje Ivanov pas vendimit të tij për faljet.

“Gjorgje Ivanov si president i shtetit duhej të ishte sot këtu dhe hapur të thotë se kush e urdhëroi ta marrë një vendim të tillë edhe përkundër asaj se qytetarët në vazhdimësi janë shprehur kundër këtij vendimi duke protestuar për çdo ditë. Por, gjithsesi dhe bashkësia ndërkombëtare qartë është shprehur se përpara drejtësisë të gjithë duhet të jenë të barabartë”, ka thënë Goran Misovski deputet i LSDM-së.

Partia shqiptare në pushtet, Bashkimi Demokratik për Integrim, vlerëson se për t’u zgjidhur kriza politike Gjorgje Ivanov duhet të japë dorëheqje nga detyra e presidentit të shtetit.

“Ne si parti mendojmë se si akt moral Gjorgje Ivanov duhet sa më parë të ofrojë dorëheqje. E themi këtë sepse mendojmë se Ai ka rrënuar imazhin e vendit njëherësh duke nxitur revoltë tek qytetarët për çka ata kanë dalë dhe në rrugë për të protestuar. Mendojmë se dorëheqja e Ivanovit do t’i hapte rrugë Maqedonisë që të dal nga kiza”, tha për Radion Evropa e Lirë Rafiz Haliti nga BDI.

Por, deputetët e VMRO DPMNE-së në pushtet të udhëhequr nga ish kryeministri Nkolla Gruevski në foltoren e Parlamentit të Maqedonisë thanë se kërkesa për votën e mosbesimit është tërësisht e paqëndrueshme dhe nuk bazohet në argumentet ligjore.

Vlatko Gjorcev deputet i VMRO DPMNE-së ka mbrojtur qëndrimin se përmes kërkesës për përgjegjësi synohet të goditet personaliteti i Gjorgje Ivanovit si president i shtetit.

“Gjorgje Ivanov si president i këtij shteti përgjigjet vetëm para qytetarëve të Maqedonisë dhe në momentin që ata kanë mundur të votojnë kanë shprehur besimin e tyre ndaj Ivanovit me një dallim të thellë ndaj konkurrentëve të tij për dy mandate radhazi”, ka theksuar deputeti i VMRO DPMNE-së Vllatko Gjorcev.

Për të filluar proceduara para Gjykatës Kushtetuese për konfirmim e përgjegjësisë së presidentit, nevojitet që paraprakisht pro votës së mosbesimit të deklarohen 82 deputetë.

Iniciativën për votën e mosbesimit për presidentin e Maqedonisë e ka ngritur partia maqedonase në opozitë Lidhja Social Demokrate e Maqedonisë dhe e njëjta është mbështetur dhe nga deputetët shqiptarë, ata të Bashkimit Demokratik për Integrim dhe Partisë Demokratike Shqiptare pas vendimit të presidentit Ivanov për faljen e 56 personave.

Presidenti i Maqedonisë, Gjorgje Ivanov nën presionin e bashkësisë ndërkombëtare më 27 maj tërhoqi një pjesë të vendimit të tij për faljen e politikanëve për ta tërhequr plotësisht vendimin më 6 qershor.

Ish kryeministri Gruevski merret në pyetje

Ish kryeministri Gruevski merret në pyetje

Ish kryeministri, Nikolla Gruevski, është marrë në pyetje nga Gjykata penale e Shkupit lidhur me përfshirjen e tij në rrënimin e një objekti të një afaristi, rast ky që ishte pjesë e asaj që njihet si aferë e përgjimeve.

Gruevski në pyetje është marrë nga prokurorët e prokurorisë speciale e themeluar për hetimin e dhjetëra zyrtarëve të përfshirë në vepra të rënda penale, ku bën pjesë ai së bashku me disa ministra të kabinetit të tij.

Ish kryeministri ka hedhur poshtë akuzat ndaj tij duke thënë se janë konstruktime të opozitës.

Hetimet ndaj Gruevskit dhe zyrtarëve kanë rifilluar pas anulimit të plotë të vendimin për faljen e tyre nga presidenti Gjorgje Ivanov.

Prokuroria Speciale ka nisur hetime për pesë raste ku janë përfshirë 56 zyrtarët të lartë të akuzuar për mashtrime zgjedhore, presione ndaj pushtetit gjyqësor, afera korruptive dhe vepra tjera.

Nesër prokuroria tregon cilët politikanë shqiptarë e maqedonas arrestohen

Jo zyrtarisht mësohet se PSP do të del me aktakuzë ndaj disa politikanëve të cilët gjatë 10 viteve të fundit kanë bërë vepra penale dhe kanë dëmtuar buxhetin shtetëror, nuk perjashtohet mundesia te jene shqiptarë.

Ende nuk duhet se vallë bëhet fjalë për politikanë maqedonas apo shqiptarë. Zhurnal neser me fillim në ora 11:00 do të ua sjell informacionet më të reja nga press-konferenca e jashtëzakonshme e PSP.

Deri më tani PSP ka publikuar aferat, “Titanik”, “Fortesa”, “Tortura” dhe “Transporter”.

Jozyrtarisht mesohet se ka te beje me keqperdorimet e disa tenderave ne disa ministri dhe institucineve tjera shteterore.

Prokuroria kërkon nga Ivanovi tërheqjen e plotë të faljeve

Më shumë se 60 zyrtarë po hetohen nga prokuroria speciale për përfshirje në vepra të rënda penale, kryesisht të kriminalitetit financiar, kanë bërë të ditur përfaqësuesit e kësaj prokurorie, në paraqitjen e parë që nga tërheqja e pjesshme e vendimit të presidentit për faljen e zyrtarëve.

Procedura kundër këtyre personave, por edhe të tjerëve që mund të jenë objekt hetimi, nuk është ndërprerë, edhe pse është vështirësuar me vendimin selektiv të presidentit të shtetit, ka deklaruar prokurorja Lençe Ristevska.

“Vendimi për falje dhe më pas ai për tërheqjen e pjesshme të faljeve më duhet të them se kanë vështirësuar zbatimin e sundimit të së drejtës në vend, pasi kemi qasje selektive. Duhet të na mundësohet qasje e barabartë, jo selektive, të kemi duar të lira për të vepruar, për të hetuar të gjitha rastet që kemi ngritur, por edhe të tjerat që mund të hapim, varësisht hetimeve që kanë për bazë materialet e përgjuara telefonike”, ka deklaruar Ristevska.

Ajo tha se prokuroria speciale ende nuk ka marrë përgjigje lidhur me shumë pyetje që i janë drejtuar presidentit e ndër më kryesorja se nga i ka marrë emrat e personave që ka falur, kur për ta askush nuk ishte në dijeni përveç prokurorisë speciale.

Ajo ka pranuar se prokuroria nuk i është përmbajtur afateve për nisjen e proceseve gjyqësore ndaj të dyshuarve, por kjo, sipas Ristevskës, është pasoja e angazhimit të madh që ka prokuroria në grumbullimin e provave të shumta.

Veç kësaj, sipas prokurorisë speciale, punën e ka penguar edhe vendimi i presidentit, nga i cili ka kërkuar që sa më shpejt të jetë e mundur të tërheq edhe vendimet tjera të faljes dhe të gjitha personat e dyshuar për vepra të ndryshme penale të përgjigjen para drejtësisë. Përveç nga presidenti, Ristevska tha se pengesa dhe refuzimi bashkëpunimi ka edhe nga institucionet tjera.

“Kur jemi të mosbashkëpunimi me organet shtetërore më duhet të them se kemi probleme të shumta, që nga refuzimi i dorëzimit të dokumenteve të kërkuara nga ana jonë, apo edhe nga interpretimi i ndryshëm i ligjeve që zvarrisin procedurat që kemi nisur”, tha Ristevska, duke refuzuar ndërkohë të komentojë akuzat e zyrtarëve se prokuroria speciale punon në mënyrë selektive dhe se është vënë në shërbim të opozitës.

Në shënjestër të prokurorisë janë zyrtarët më të lartë të partisë në pushtet, VMRO DPMNE, kryetari i saj, Nikolla Gruevski, ish-ministrat Gordana Jankullovksa dhe Mile Janakisevsi, ish-kreu i drejtorisë për zbulim dhe kundërzbulim, Sasho Mijallkov dhe shumë zyrtarë të tjerë të dyshuar për keqpërdorime të shumta, afera financiare, presione ndaj gjykatave, mediave, mashtrime zgjedhore, konfrontim fizik me kundërshtarët politik dhe vepra tjera.

Të gjitha këto personalitete të larta u gjenden në listën e faljeve të presidentit, për t’i pamundësuar prokurorisë speciale ndjekjen e tyre. Por, pas reagimeve të shumta të bashkësisë ndërkombëtare dhe protestave të opozitës, që po zgjasim më shumë se një muaj, presidenti me ndihmën e ndryshimeve ligjore të miratuara nga partitë në pushtet, tërhoqi vendimet për falje, por jo të tërat duke lënë sërish pengesa në punën e prokurorisë.

Ndryshe, nga prokuroria speciale sërish paralajmëruar nisjen e hetimeve edhe për rastin “Monstra”, të vrasjes së pesë të rinjve maqedonas, e për të cilët me burgim të përjetshëm janë dënuar gjashtë shqiptarë. Nga prokuroria thonë se nuk do të kursehet askush ndaj ndjekja penale dhe të gjithë shkelësit e ligjit do të nxirren para drejtësisë. (REL)

Protestat në Maqedoni përshkallëzojnë format e veprimeve

Protestat në Shkup, 2 qershor 2016

Lëvizja Protestoj në Maqedoni ndryshon dinamikën dhe formën e protestave. Nga hedhja e ngjyrave mbi objektet qeveritare, protestuesit po bllokojnë tani edhe udhëkryqet.

Protestat e organizuara nga rrjeti i organizatave joqeveritare “Protestoj” kanë hyrë në javën e tetë. Drejtuesit e “revolucionit shumëngjyrësh” thonë se protestat, përpos ngjyrosjes së institucioneve shtetërore, do të shtrihen në më shumë dimensione, siç edhe bënë gjatë ditës së mërkurë kur bllokuanudhëkryqet kryesore në kryeqendrën e Maqedonisë Shkup, duke paralizuar tërësisht trafikun. Aleksandar Donev thotë se qëllimi është që pushteti të detyrohet të dëgjojë kërkesat e qytetarëve.

“Bëhet fjalë për një ri-formatimtë protestave me atë që do të bllokohet jeta normale në kryeqytet dhe jo vetëm, sepse në këtë gjendje të thellë krize nuk mundet të mbyllim sytë para realitetit dhe të bëjmë sikur jetojmë në një shoqëri normale, meqë në këtë situatë asgjë s’është normale. Institucionet janë vënë në mbrojtje të krimit dhe jo ta luftojnë atë…”, thotë Aleksandar Donov.

Ndërkaq, Hasan Jashari, ligjërues i sociologjisë në Universitetin e Evropës Juglindore në Tetovë, konsideron se nuk mund të priten efekte të menjëhershme nga shprehja e pakënaqësisë së qytetarëve kundrejt politikave të qeverisë, përderisa strukturat udhëheqëse të qeverisë kanë shtrirë rrënjët thellë në çdo pore të shoqërisë.

“Këtu nuk flitet për një garniturë njerëzish që përfshin pesë ose gjashtë ministra, dhjetëra deputetë, udhëheqës të dy ose tre partive politike, por flitet për një strukturë jashtëzakonisht të madhe të përbërë nga më shumë politikanë, deputetë, ministra, drejtorë të institucioneve shtetërore. Këtu kemi dhe përfshirjen e bankave , institucioneve të ndryshme financiare.”

“Gisht ka edhe policia sekrete dhe e gjithë kjo rezulton me atë se kjo strukturë udhëheqëse e qeverisjes aktuale, e cila kontrollon kaq shumë para, ka pas mundësi të ushtrojë kaq shumë pushtet është shumë vështirë të demontohet thënë kushtimisht lehtë përmes protestave”, vlerëson Hasan Jashari, sociolog.

Megjithatë, Aleksandar Donev, nga lëvizja “Protestoj”, shpreh bindjen e tij se presioni që bën revolucioni shumëngjyrësh ka dhënë frytet e para.

“E dini se presidenti i shtetit, Gjorge Ivanov, u detyrua të tërheqë një pjesë të vendimit të tij për falje edhe pse më duhet të theksoj se ne nuk jemi të kënaqur me tërheqjen e pjesshme të këtij vendimi. Kjo sepse të gjithë duhet të jenë të barabartë dhe këtu nuk do të lejojmë asnjë kompromis deri në tërheqjen e plotë të vendimit për falje. Gjithashtu kërkojmë dhe dorëheqjen e presidentit të shtetit, Gjorge Ivanov.”

“Nga Gjykata Kushtetuese kërkojmë që të prononcohet sa më parë rreth kushtetutshmërisë së funksionimit të Prokurorisë Speciale, duke larguar çfarëdo qoftë presioni juridik gjatë funksionimit të këtij institucioni, formimin e një qeverie teknike e cila do ta përgatisë Maqedoninë të futet në një proces të besueshëm zgjedhor”, thotë Alsandar Donev.

Protestat e organizatave joqeveritare kundër politikave të qeverisë, përveç partisë më të madhe në opozitë, Lidhjes Social-demokrate të Maqedonisë, janë mbështetur dhe nga disa parti shqiptare, të cilat nuk janë të përfaqësuara në parlament.

Ndryshe, protestat e organizuara nga Lëvizja “Protestoj” për çdo ditë fillojnë në orën 18-të, para godinës së prokurorisë speciale, për t’i dhënë mbështetje këtij institucioni, dhe vazhdojnë me ngjyrosjen e objekteve të Shkupit 2014, si dhe institucioneve të shtetit. (REL)

Ekspertët: Mbi 50 mijë shqiptarë të Maqedonisë pa shtetësi

Mijëra shqiptarë vazhdojnë të jenë pa nënshtetësinë e Maqedonisë dhe ky problem vazhdon të heshtet, edhe para diplomatëve të lartë të BE-së, me pretendimet se është harmonizuar ligji për shtetësi sipas standardeve evropiane.

Mbi 50 mijë shqiptarë vazhdojnë të jenë pa shtetësi dhe kryesisht pa te kanë ngelur të gjithë ata që janë lindur në Maqedoni dhe jetojnë me dekada të tëra, ndërsa pas periudhës së shpërbërjes së ish-Jugosllavisë dhe në fillimet e pavarësimit të Maqedonisë janë gjetur jashtë vendit. Kjo kategori e qytetarëve përbëhet kryesisht nga shqiptarë që për mbi 50 vite e më tepër jetojnë në Maqedoni, por që kanë origjinë nga zonat e tjera shqiptare nga Kosova, Lugina e Preshevës apo ish-republikat e tjera jugosllave. Një shifër e tillë e përafërt jepet edhe nga ekspertë dhe avokatë që janë marrë me lëndë të tilla, të cilët theksojnë se kjo problematikë po ndjek dhe ka vënë në hallë shumë familje shqiptare, por që tashmë ato janë lënë në harresë totale, njofton agjencia e lajmeve INA.

Eksperti për çështje juridike, i njohur si ish-avokat që është marrë me problematikën e tillë, prof.dr. Osman Kadriu ka theksuar kohë më parë se për shqiptarët në Maqedoni çështja e nënshtetësisë është e politizuar, ndërkohë që sipas tij edhe Ligji mbi shtetësinë i takon grupit të ligjeve diskriminuese, meqenëse parashikon shumë kushte dhe formalitete për rregullimin dhe fitimin e nënshtetësisë së Maqedonisë.

“Bie në sy se prej gjithë kushteve dhe formaliteteve që kërkon Ligji për shtetësinë, një prej tyre është tepër rigoroz. Fjala është se në procedura administrative për fitimin e shtetësisë e cila zhvillohet në MPB, në procedurë involvohet edhe sigurimi shtetëror i cili duhet të jep mendim paraprak”, ka theksuar eksperti Osman Kadriu.

Sigurimi shtetërorë sipas tij, për shumë kandidatë shqiptarë ka dhënë mendim negativ në procedurë duke shfrytëzuar të drejtën e tij për të dhënë një mendim dhe vlerësim.

”Në atë procedurë kemi pasur raste që të kemi edhe shpërdorim të pozitës dhe tejkalim të autorizimit zyrtarë” thotë eksperti i jurisprudencës Kadriu.

Një pjesë e qytetarëve shqiptarë që jetojnë jashtë vendit vijnë në pushime me pasaporta të huaja, gjermane apo belge, të cilët thonë i marrin pa asnjë problem, pas plotësimit të kushteve të vendqëndrimit prej tre deri në 7 vite. “Këtu është diktaturë e egër dhe nuk të ndihmon askush. Ne i tregojmë gjermanëve se si ndodh që të refuzohemi për shtetësi, ata çmenden për dukuri të tilla”, thekson Iljasa Nebiu, një mërgimtarë, i cili ka hequr dorë tashmë nga shtetësia e Maqedonisë, edhe pse ai thotë se është i lindur dhe familja e tij jeton më shumë se 60 vite në këtë vend.

Qytetarët e pyetur që nuk kanë shtetësi theksojnë se janë të zhgënjyer nga të gjitha institucionet, të pyetur edhe për Avokatin e Popullit. “Po kot kemi bërë ankesa të ndryshme, ndërsa MPB nuk merr në dorë askënd”, thekson Avdiu, një kryefamiljar kumanovarë që po ashtu nuk posedon shtetësinë. Ai pohon se edhe të moshuarat 70-80 vjeçare që jetojnë në Maqedoni nuk kanë shtetësi dhe nuk u jepet ajo.

Shekerinska: Duan të më arrestojnë

Zëvendëskryetarja e Lidhjes Socialdemokrate të Maqedonisë Radmilla Shekerinska ka bërë të ditur se policia dëshiron ta thërrasë  edhe atë në bisedë informative për shkak të pjesëmarrjes në protestat e “Revolucionit të Larmë”. Këtë informacion Shekerinka e ka publikuar në facebook, raporton “Lajm” i Maqedonisë.

“Dëgova që më keni thirrë në bisedë informative. Mos dërgoni isharete, më thirrni! Nuk është rëndë të më gjeni: çdo ditë ora 6, para PSP-së”, ka shkruar Shekerinka, duke bërë me dije se nuk frikohet prej policisë.

Menduh Thaçi: Mund të përsëritet ‘Lagjja e Trimave’

Voal – Lideri i Partisë Demokratike Shqiptare (PDSH) Menduh Thaçi në një intervistë për “Al Jazeera Balkans”, ka vlerësuar se është e mundur të përsëriten ngjarjet e 9 dhe 10 majit të vitit 2015 në Kumanovë. Sipas tij, në këtë situatë të turbullt politike gjithçka është e mundur, por shqiptarët nuk guxojnë që të bien pre dhe të zgjedhin një rrugë të tillë fatale për veten e tyre.

“Në një situatë të këtillë të paqartë, gjithçka është e mundur. Por, në mënyrë të përgjegjshme them se partia ime dhe unë personalisht asnjëherë nuk do të marrim pjesë në një skenar të këtillë. Jo pse jam altruist i madh dhe e dua Maqedoninë, por nga përvoja politike them se kjo gjë do të ishte një rrugë fatale për shqiptarët.

Unë flas për shqiptarët, pasi që jemi parti etnike. Do të ishte një rrugë fatale. Duhet që të mësojmë nga kjo përvojë serioze dhe të zgjedhim një rrugë paqësore dhe precize. Rruga jonë është NATO dhe Bashkimi Evropian”, deklaroi kryetari i PDSH-së, Menduh Thaçi.

Prokuroria do ta ndjekë penalisht edhe Thaçin

Nga lista e 56 gjithsej e të të falurve presidentit George Ivanov, sot ka tërhequr nga abolimi 22 persona.

Në press konferencën e sotme presidenti George Ivanovi theksoi se tërheq për abolimin e 22 personave, por nuk tha emrat e tyre.

Nga kabineti i presidentit kanë shpjeguar se emrat zyrtarisht do të jenë të njohur për opinionin, kur të publikohen në Gazetën Zyrtare.

Kjo është lista që Ivanovi sot vendosi të tërheqë abolimin, kështu duke i hapur rrugën Prokurorisë Speciale t’i hetojë rastet për këta persona:

Irena Misheva, kryetare e Këshillit të Qytetit të Shkupit

Mile Janakieski, ish-ministri i Transportit

Gordana Jankullovska, ish ministre e Brendshme

Lupço Dimovski, ish-ministër i Bujqësisë

Martin Protugjer, shef i kabinetit të ish-kryeministrit Nikolla Gruevski

Menduh Thaçi, kryetar i PDSH-së

Bedredim Ibrahimi, anëtar i KSHZ nga PDSH-ja

Kiril Bozhinovski, Sekretari i Përgjithshëm i Qeverisë

Nikola Gruevski, ish-kryeministër, krye tar i VMRO-DPMNE-së

Toni Trajkovski, kryetar i Gazi Babës

Zoran Zaev, lideri i LSDM-së

Trajko Veljanoski, kryetar i Kuvendit

Koce Trajanovski, kryetar i Qytetit të Shkupit

Vladimir Todoroviq, ish-kryetari i komunës Qendër

Edmond Temelko, Kryetari i Pustecit të Shqipërisë

Vladimir Taleski, kryetar i komunës së Manastirit

Branko Palifrov, i punësuar në komunën e Strumicës

Branko Crvenkovski, ish-kryetar i LSDM-së, president dhe ish kryeministri i Republikës së Maqedonisë

Ismet Guri, ish-anëtar i Komisionit Komunal të Zgjedhjeve në Çair

Sasho Mijalkov, ish-drejtor i DSK-së

Lupco Todorovski Radnik, ish-drejtor i Byrosë për siguri publike

Zoran Verushevski, ish-drejtor i DSK-së

Më 25 maj 2001 ra në fushën e betejës dëshmori Fadil Nimani, Komandant Tigri

Sot dita kur e rënies e dëshmorit Fadil Nimani, i njohur ndryshe si “Komandant Tigri”. Fadil Nimani ishte nga fshati Gërgoc i Gjakovës, një ushtarë shqiptar dhe dëshmor i luftës në Maqedoni.Komandant Tigri, iu bashkua forcave shqiptare, që luftonin edhe më tutje pas çlirimit të Kosovës për lirinë e shqiptarëve në territoret e administruara nga Maqedonia, gjatë viteve 2000.Më 25 maj të vitit 2001 bie dëshmor në Vaksincë të Kumanovës, duke komanduar Brigadën e 113-të “Ismet Jashari-Kumanova”.Në çdo përvjetor të rënies për liri, Fadil Nimanin e përkujtojnë duke u mbledhur me mijëra shqiptar në fshatin Vaksincë, ku edhe iu ngrit përmendorja.Fadil Nimani “Komandant Tigri”, nga fshati Gërgoc i Gjakovës, Kosovë ushtarak shqiptar, dëshmor i luftës në Maqedoni. Fadil Nimani ndryshe i njohur edhe me nofkën “Komandant Tigri” iu bashkua forcave Shqiptare, që luftonin edhe më tutje pas çlirimit të Kosovës për lirin e shqiptarëve në territoret e administruara nga Maqedonia gjatë viteve 2000.Më 25 maj të vitit 2001 bie dëshmor në Vaksincë të Kumanovës duke komanduar Brigadën e 113-të “Ismet Jashari-Kumanova”.Sot në çdo pervjetor te renies per liri, Fadil nimanin e perkujtojne duke u mbledhur me mijera shqiptare ne fshatin Vaksince, ku edhe iu ngrit përmendorja.

Deshmore ose jo, si te doni me quani, por amanetin per liri, vellezer ma ruani.(Fadil Nimani)

Gjate historise qindvjeçare te popullit tone,rajoni i Dugagjinit dhe veçmas te Gjakoves është i njohur per lufera te rrepta kunder pushtuesve te ndryshem. Ne fshatin Gergoc te ketij rajoni per trimeri,bujari dhe per atdhetarizem është e njohur familja Nimani, qe nga gjiri i vet ka nxjerre trima dhe atdhetare , por edhe deshmore…. Nga kjo familje është i njohur edhe emri i Fazli Mete Nimanit, i njohur per rezistencen e tij kunder pushtuesve sllave, qe denohet dhe mbahet ne burgun famkeq te Goli Otokut.Por, gjurmeve te te pareve te tij, do te shkoje edhe Fadil Bajram Nimani, i cili sikur te paret e tij, dikur edhe ai nuk u pajtua me okupimin dhe nenshtrimin e shqiptareve nen thundrren sllave. Fadil Nimani lindi me 07.04.1967 ne fshatin Gergoc te komunes se Gjakoves.Shkollen fillore e kreu ne vendlindje ,kurse te mesmen dy vjet ne Gjimnazin e Cermjanit, kurse dy vjet te tjera per te vazhduar ne shkencat matematiko-natyrore ne Gjakove. U shqua per vyrtytet me te larta te bujarise , trimerise,atdhedashurise.Pas mbarimit te shkolloes se mesme behet studenent ne SHLP “Bajram Curri” ne Gjakove,drejtimi i histori gjeografi ku diplomoi dhe mori titullin e arsimtarit. Gjithnje i vetedijshem se vetem zjarri i pushkes do ta çlironte Kosoven, ai pa ngurrim ne vitin 1996 futet ne radhet e UÇK-se per te marre pjese ne shum aksione te asaj kohe qe kryente UÇK-ja.Duke pare aftesite e tij intelektuale dhe ato ushtarake e emertuan komandant te njesitit TIGRAT, njesit qe operonte ne rajonin e Dushkajes. Fadilin nuk mundte ta pengonte propaganda e eger, qe bente Beogradi dhe qe se bashku me kete e benin edhe disa “politikan shqiptar” qe gjithnje thirreshin ne emrin e popullit, se jan per lirine dhe pavarsine e Kosoves, por ne anen tjeter ,ata ishin nenshtruar perveç roberise, edhe poshterimit ne tersi. Fillimi i luftes frontalete vitit 1998 shtronte nevoje te furnizimit me arme per luftetaret e UÇk-se, prandaj Fadili qindra here do te kaloje kufirin shqiptaro-shqiptar, per t’u sjelle arme shokeve te tij qe luftonin ne vijat e fronit.Ne qershor te vitit 1998 Komanda e Zones Operative te Dugagjinit Komandant TIGRIN e emeroi Komandant te Policise Ushtarake, mirepo ne kete kohe ai komandonte edhe batalionin “Rrufeja”. Ky battalion ishte stervitur ne Shqipëri nga oficere te Armates Shqiptare dhe ishte i gatshem per çdo perballje me armikun. Por, fundi i luftes nuk erdhi ashtu siq e kishte menduar Komandant Tigri dhe shume bashkeluftare te tij, ende nuk kishte permuhuar betimi i dhene para flamurit. Ne thundrren sllave ende rrenkonin tokat shqiptare. Kosova Lindore kishte mbetur nen regjimin serb, shqiptaret e Ilirides te njejtin fat, andaj shum liridashes nuk mund ta duronin kete.Nje ndihme te madhe dhe ne furnizim per te drejtat e tyre te IJRM nuk mundi t’a pengonte asgje dhe ai menjehere iu bashkangjite shokeve te tij atje.

Keshtu fillimisht formacionet te Ushtrise Çlirimtare Kombetare Fadili iu bashkangjite si ushtare, por duke pare aftesite e tij ushtarake ai emertohet Komandant i Brigades 113, qe mbante emrin e deshmorit qe ra ne lufte per lirine e Kosoves Ismet Jashari-Kumanova. Detyre te cilin e krey me nder dhe pergjegjsi te larte deri ne renien e tij heroike me 25 maj 2001 ne Vaksince te Kumanoves.

Poezi kushtuar Fadil Nimanit

»“KOMANDANT TIGRI”

Kush po ia çon flakën Ballkanit?

Kush po ia zbraps ushtrinë tiranit?

Yll’ i rrallë Fadil Nimani,

Në ballë të luftës zemërluani!

Dhe ndër më të parët Çlirimtarë,

Tigri* ësht kur ngritet zjarrë.

Me tre përkrenaret ngjeshur n’ballë,

Të dorëzohet s’di sa është i gjallë.

Penë e pushkë i kthen sllavit,

Shpirt Shkëlzeni* me zemër luftëtari

Dhe armikut i kallet data,

Kur po u shkon tankseve flaka.

Nga Kosova përsëri në beteja,

Me forcat serbe, n’luftime të reja.

Nga Presheva n’kala të Tetovës,

Çlirimtarë në zemrën e Kumanovës.

Lamtumirë Gërgocit të Gjakovës,

I thotë trimi i lirisë së Kumanovës.

N’Vaksincë i falet legjendarit,

Ia fal amanetin Ismet Jasharit

Autor i poezisë: Fejzulla Duraku

15 vjet nga rënia e komandant Tigrit

SHBA për Maqedoninë: Hoyt Brian Yee: Të tërhiqet plotësisht falja !

Voal – “Ligji për falje duhet urgjentisht të tërhiqet ngase pengon sundimin e së drejtës”, ka porositur zyrtarët e Maqedonisë zëvendës-ndihmës sekretari për çështje Evropiane dhe Euro-aziatike i SHBA-së, Hoyt Brian Yee, duke kërkuar nga partitë politike dhe liderët t’i japin mbështetje të plotë institucioneve që janë përgjegjëse për zbatimin drejtësisë, duke përfshirë këtu edhe Prokurorinë Speciale.

“Nëse liderët tërheqin abolicionin pjesërisht ose në mënyrë selektive kjo do të kontribojë në krijimin e ndjesisë për mosndëshkim dhe mungesë përgjegjësie në shtet. Përderisa nuk ka llogaridhënie dhe ballafaqim me drejtësinë për keqpërdorimet e mundshme në lidhje me skandalin e përgjimeve dhe krimeve të tjera, Maqedonia do të mbetet e ngujuar në këtë krizë politike dhe nuk do të mundet të ecë përpara NATO-s dhe BE-së. “ ka theksuar për mediat zyrtari i lartë amerikan Hoyt Brian Yee pas takimeve intensive që ka realizuar gjatë dy ditëve në Shkup me liderët e katër partive politike nënshkruese të marrëveshjes së Përzhinos, duke theksuar se në të gjitha takimet në fokus ka qenë cështja e abolimit nga presidenti Gjorgje Ivanov.

Yee njëherësh u ka bërë thirrje partive politike dhe qeverisë së Maqedonisë “që me vepra dhe jo me fjalë” të angazhohen në zbatimin marrëveshjes politike, të njohur si marrëveshja e Përzhinës.

“Qeveria përmes veprave duhet ta dëshmojë përkushtimin e saj për të pasur një demokraci të fuqishme dhe pluralizëm, gjithashtu për të zbatuar reformat që u përcaktuan me Marrëveshjen e Përzhinës që nënkupton inkuadrimin e opozitës dhe sektorit civil në procesin e reformimit të vendit”.

“U bëjmë thirrje liderëve të Maqedonisë të zbatojnë reformat e Përzhinës, t’i forcojnë institucionet për të ndërtuar një Qeveri përfshirëse dhe me përgjegjësi”, ka theksuar zyrtari i lartë amerikan Hoyt Brian Yee.

Ai tha se nëse liderët veprojnë me përkushtim në drejtim të realizimit të obligimeve që dalin nga marrëveshja politike atëherë dhe Shtetet e Bashkuara të Amerikës do të vazhdojnë përkrahjen e saj të fuqishme për vendin.

“Institucionet e fuqishme dhe të pavarura janë nevojë urgjente e Maqedonisë. Ato duhet të jenë të lira për ta kryer punën e vet, pa ndërhyrje partiake dhe të kenë resurset e duhura, posaçërisht ato që zbatojnë drejtësinë. SHBA mbështet demokracinë dhe vendet ku ka sundim të ligjit“, ka deklaruar Hoyt Brian Yee.

Në funksion të zgjidhjes së krizës politike në Maqedoni të enjten dhe të premten në Shkup do të qëndrojë edhe i dërguari i posaçëm gjerman Johannes Haindl.

Në komunikatën e lëshuar nga ambasada gjermane në Shkup nuk jepen shumë detaje, ndërkohë që theksohet se diplomati gjerman Johannes Haindl, do të takohet edhe kësaj radhe me liderët e katër partive kryesore nënshkruese të marrëveshjes politike të Përzhinos duke futur në agjendë dhe presidentin e shtetit Gjorgje Ivanov dhe kryetarin e parlamentit Trajko Veljanovski.

Ardhja e sërishme e të dërguarit të posaçëm gjerman, Johannes Haindl në Maqedoni, koincidon me vizitën e zëvendësndihmës sekretarit shtetëror të Shteteve të Bashkuara të Amerikës Hoyt Brian Yee.

Shkaku i krizës politike në Maqedoni edhe Holanda si shtet që për momentin kryeson me Këshillin e Bashkimit Evropian, ka nisur drejtorin gjeneral për Bashkëpunim Evropian, Robert de Groot, për t’u takuar me zyrtarët e lartë të vendit./REL

Gjykata Kushtetuese i pezullon aktivitetet zgjedhore në Maqedoni

Gjykata Kushtetuese e Maqedonisë ka pranuar të debatojë nismën e BDI-së për vlerësimin e Kushtetushmërisë të vendimit për shpërndarjen e Kuvendit të Maqedonisë, më 18 janar.

Gjykata gjithashtu ka vendosur që deri në vendimin përfundimtar të pezullojë të gjitha aktivitetet zgjedhore.

Vendimi është miratuar me konsesus mes 9 anëtarëve të gjykatës. Gjykata vendimin për të debatuar për këtë nismë e ka arsyetuar me ndjeshmërinë e situatës në të cilën ndodhet Maqedonia.

Një nismë të tillë ajo e kishte hedhur poshtë në muajin janar me arsyetimin se nuk ka bazë ligjore meqë vendimi, sipas saj, ishte në përputhje me Kushtetutën.

Nisma e Bashkimit Demokratik për Integrim ka pasuar vendimin e VMRO-DPMNE-së, së Nikolla Gruevkit që e vetme të shkojë në zgjedhjet e 5 qershorit.

Kryetari i Bashkimit Demokratik për Integrim, Ali Ahmeti, ka përshëndetur vendimin e Gjykatës Kushtetuese që mundëson rikthimin e Kuvendit si hap të parë për zgjidhjen e krizës së rëndë politike.

“Ftoj të gjithë liderët, mediat si dhe shoqërinë civile që të veprojnë me përgjegjësi të plotë përballë gjendjes në të cilën gjindet vendi dhe të kontribuojnë për rikthimin e sigurisë, stabilitetit si dhe të përkushtohemi fuqishëm për një agjendë serioze reformuese”, ka shkruar kreu i BDI-së, Ahmeti në rrjetin social Facebook.

Shtyhet seanca gjyqësore për ‘Lagjen e Trimave’

Është anuluar seanca e sotme për procesin gjyqësor “Lagja e Trimave” për shkak të mungesës së hapësirave të nevojshme.

Në sallën e gjyqit ku deri më tani janë realizuar seancat e këtij procesi gjyqësor duhet që të sillen edhe të akuzuarit tjerë që ishin pjesë e një lënde tjetër.

Gjykata Themelore e Shkupit ka vendosur që lënda për mbështetësit e Grupit të Kumanovës të bashkohet me lëndën tjetër për të cilën 29 persona tashmë akuzohen për veprën terrorizëm. Për veprën e mbështetjes logjistike akuzohen tetë persona.

Avokatët vlerësojnë se Gjykata nuk ka prova se këta presona kanë kryer veprën penale terrorizëm.

Artene Ademi thotë se në bazë të një gjykimi të drejtë, pala mbrojtëse do të dëshmojë se 8 personat e akuzuar deri tani për logjistikë, janë të pafajshëm, raporton Alsat M.

Sipas këtij vendimi i gjithë gjykimi do të fillojë nga e para, edhe pse gjykimi për 29 të akuzuarit për terrorizëm në rastin “Kumanova” kishte arritur tashmë në gjysmën e tij.

Kjo domethënë se të akuzuarit përsëri do të deklarohen për fajësinë apo pafajësinë e tyre, si dhe gjithë dëshmitarët do të duhet të ridëgjohen, përfshirë edhe dëshmitarët e fshehur që deri më tani pengonin gazetarët që të ndjekin seancën.

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend