VOAL

VOAL

Copyright © 2022

VOAL

Kosovë

Kosovë – Kushtet higjienike në markete, alarmante

Kushtet higjienike sanitare në shumicën e marketeve në Kosovë ku shiten produktet ushqimore, nuk i plotësojnë kushtet adekuate në të cilat do të duhej të ruhen ato produkte.

Këto vlerësime i kanë dhënë për Radion Evropa e Lirë përfaqësues të organizatës që merren me mbrojtjen e konsumatorit.

Sipas tyre, nga mos mirëmbajtja në kushte adekuate të produkteve ushqimore, po rrezikohet jeta e konsumatorit.

Kryetari i Organizatës Joqeveritare “Konsumatori” Selatin Kaçaniku, në një prononcim për Radion Evropa e Lirë ka theksuar se gjendja higjienike sanitare në marketet në Kosovë është nën nivelin e dëshiruar dhe mjaft shqetësuese.

“Ka vite të tëra që në disa markete të Kosovës ku shiten produktet ushqimore kemi zogj, kemi brejtës, kemi maca në afërsi kemi edhe qenë dhe kjo le të kuptosh se kemi të bëjmë me një menaxhim të dobët dhe me një ruajtje jo adekuate të produkteve që shiten për konsumatorët. Para të gjitha këtyre parregullsive autoritetet kompetente sikur i kanë mbyllur sytë dhe po lejojnë të ndodhin këto gjëra”, shprehet Kaçaniku.

Sipas tij, produktet që qytetari i Kosovës i blen në këto markete bën që ai te jetë i rrezikuar nga ndonjë helmim apo shfaqjen e ndonjë sëmundjeje që do të rrezikonte shëndetin e konsumatorit.

Ai tregon se në organizatën e tij kanë arritur mjaft ankesa nga qytetarët të cilët kanë treguar raste të ndryshme që ata kanë hasur në produktet që i kanë blerë.

“Para disa muajve ne kemi marrë një ankesë nga një qytetare nga Podujeva të cilës një brejtës i kishte dalë në suxhuk. Nëse kësaj ja shtojmë edhe rastin e helmimit të një qytetari i cili pësoi me jetë unë mendoj se nuk ka nevojë për koment. Por, mendoj se autoritetet e Kosovës duhet të veprojnë karshi kësaj çështje dhe të marrin masa adekuate në përmirësimin e kushteve higjienike sanitare në marketet tona”, shton ai.

Me qëllim të vënies së bazës ligjore për rregullimin e kualitetit të ushqimit, zbatimin e masave për pengimin dhe eliminimin e sëmundjeve ngjitëse, si dhe kontrollimin e kushteve higjenike sanitare të këtyre subjekteve afariste, Kosova ka në fuqi Ligjin për Inspektoratin Sanitar.

Sipas këtij Ligji, në rastet kur evidentohet se një subjekt afarist nuk plotëson kushtet adekuate për mirëmbajtjen e ushqimeve iu ndërpritet veprimtaria.

Derisa, gjobat për kundërvajtjet sanitare sipas Ligjit mbi Inspektoratin Sanitar të Kosovës janë nga 1000 deri në 35 mijë euro, varësisht nga shkeljet që Inspektorati konstaton se janë bërë.

Përgjegjësinë kryesore për kontrollin e ushqimit në Kosovë e ka Agjencia e Veterinarisë dhe Ushqimit, si autoritet shtetëror.

Zëdhënësi ikëtij mekanizmi Lamir Thaçi në një prononcim për Radion Evropa e Lirë, ka bërë të ditur se inspektimet janë të vazhdueshme dhe se në momentet kur hasin diçka të dyshimtë merren masat adekuate.

“Në secilën ankesë të konsumatorit ne realizojmë inspektimet brenda 24 orëve dhe në secilin rast kur hasim në produkte që janë duke u shitur në mënyrë jo të drejtë ne marrim masat, konfiskojmë produktet bëjmë asgjësimin e tyre dhe për operatorin e biznesit iniciojmë procedurë gjyqësore”, sqaron Thaçi.

Edhe Thaçi tregon se gjatë inspektimeve, inspektorët kanë hasur në produkte të cilat nuk janë ruajtur në kushte çfarë kërkon produkti.

Ndryshe, jo rrallëherë në tregun e Kosovës është evidentuar se qytetarët e Kosovës kanë hasur në produkte me cilësi të dyshimtë dhe jo të sigurta për t’i konsumuar.

Kosovë: Militantët e IS-it synojnë mbjelljen e frikës

Gjyqtari i procedurës paraprake në Gjykatën Themelore të Prishtinës, ua ka caktuar masën e paraburgimit në kohëzgjatje prej 30 ditësh Besnik Latifit, Enis Latifit, Milazim Haxhisë, Gazmend Halitit dhe Fehmi Musës.

Të pesë të apostrofuarit janë të dyshuar për terrorizëm dhe janë arrestuar me 11.07.2015, te liqeni i Badovcit.

Masa e paraburgimit ndaj të pandehurve është caktuar “për arsye se ekziston dyshimi i bazuar se të njëjtit kanë kryer veprat penale ‘Përgatitja e veprave terroriste ose veprave penale kundër rendit Kushtetues dhe Sigurisë së Republikës së Kosovës”.

Në anën tjetër, deputetët e Kuvendit të Kosovës dhe njohës të rrethanave të sigurisë në Kosovë, vlerësojnë se institucionet e sigurisë, Policia e Kosovës, Agjencia Kosovare e Intelegjencës dhe institucionet tjera për zbatimin e ligjit, duhet të jenë syhapur, të përgatitura dhe të punojnë më shumë në parandalimin e rasteve të ekstremizmit në Kosovë.

Nuredin Ibishi, anëtar i Komisionit Parlamentar për Punë të Brendshme dhe Siguri në Kuvendin e Kosovës, duke folur për Radion Evropa e Lirë, thotë se institucionet e Kosovës tashmë kanë ndërmarrë edhe masat parandaluese, por edhe të ndëshkimit për kërcënimet që vijnë nga individ apo grupe ekstremiste.

“Do t’i veçoja arrestimet e mëhershme që ishin në këtë vazhdë, por edhe këtë të fundit, që ende nuk ka marrë epilogun, që ndodhi para 3 ditësh, ku u bë arrestimi i personave të dyshuar afër liqenit të Badovcit”.

Skënder Perteshi, analist nga Qendra Kosovare për Studime të Sigurisë, thotë për Radion Evropa e Lirë, se Kosova është e orientuar drejt integrimeve evropiane dhe në NATO, ndërkohë që këto të fundit, nga grupi militant Shteti Islamik shihen si armike.

Megjithatë, kërcënimet eventuale nga ky grup për Kosovën, sipas tij, më shumë kanë të bëjnë me propagandë.

“Kjo është vetëm një pjesë, një propagandë e organizatave ekstremiste, në mënyrë specifike prej IS-it, që pak a shumë të mbretërojë në diskursin publik emri IS (Shteti Islamik) dhe emri ektremizëm dhe në anën tjetër, që të mbjellin frikë, pasiguri dhe shqetësim tek qytetarët dhe opinioni publik”.

Lidhur me rastin e arrestimit të pesë qytetarëve të Kosovës të dyshuar për terrorizëm, Perteshi vlerëson se ende mungojnë informatat e sakta, lidhur me synimet që këta persona kanë pasur.

Megjithatë, sipas tij, shndërrimi i temave mbi terrorizmin dhe rrezikun nga terrorizmi, në tema dite në opinion, si dhe plasimi i informatave jo të plota nga institucionet dhe mediet, janë veprime që e shqetësojnë opinionin dhe si të tilla, ai i vlerëson të gabuara.

“Plasohet një informacion që është totalisht i pakonfirmuar dhe i pa verifikuar mirë. Vet qëllimi i organizatave ekstremiste është që ato të mbizotërojnë në diskursin publik, të mbizotërojnë mendjet e qytetarëve dhe të shkaktojnë një lloj frike dhe shqetësimi tek qytetarët e Kosovës”.

“Këto operacione shteti duhet t’i bëjë në mënyrë më të fshehtë. Do të thotë, emrat e personave që involvohen, mënyra e arrestimit dhe qëllimi pse bëhet, shteti duhet t’i bëjë në mënyrë më të fshehtë, ashtu sikurse edhe hetimet, sepse pak a shumë ndikon që edhe opinioni publik të mos shqetësohet për rastet që po ndodhin”.

Megjithëkëtë, deputeti Ibishi vlerëson se të gjitha rastet duhet të zbardhen për opinionin, pavarësisht faktit se në raste të caktuara edhe mund ta shqetësojnë atë.

“Mendoj që duhet opinioni ta dijë realitetin, sepse nuk ka më asgjë sekrete që të mbetet, sikurse aksionet e fshehta apo diçka të tillë, për arsye se edhe policia do të jetë transparente në ndërmarrjen e veprimeve, së bashku me prokurori dhe gjyqësi”.

“Mendoj se këtu nuk ka asgjë të keqe, pa marrë parasysh që realisht kjo ngritë shqetësime në opinion. Por, në qoftë se nuk ka transparencë, atëherë lindin dyshime tjera se çfarë po ndodhë. Atëherë, mendoj se shqetësimi është edhe më i madh i opinionit”.

Deri para arrestimeve të fundit, të ditës së shtunë, Policia e Kosovës kishte raportuar se ka hapur hetime dhe ka ushtruar kallëzime penale për mbi 130 persona, lidhur me pjesëmarrjen në organizata terroriste, organizimin, rekrutimin nxitjen dhe financimin e individëve për t’iu bashkangjitur organizatave terroriste dhe për të gjitha këto raste është duke u bashkëpunuar ngushtë me Prokurorinë Speciale.

Në lidhje me këtë fenomen, sipas Policisë së Kosovës, deri në rastin e fundit, janë arrestuar mbi 80 persona dhe janë bastisur mbi njëqind lokacione të personave të dyshimtë. rel

‘Mabetex’ konfirmon vdekjen e tre punëtorëve kosovarë në Kazakistan

 

“Mabco Construction”, përmes një komunikate për media, ka konfirmuar lajmin e raportuar para pak minutash nga Koha.net se sot, rreth orës 11:00 në Astana të Kazakistanit, ka ndodhur një tragjedi ku për fat të keq kanë humbur jetën punëtorët Blerim Kadriu (1981), Bekim Durmishi (1983) dhe Luan Bakia (1976) si dhe janë lënduar Hajrush Hoti (1969), Isuf Bekolli (1956) dhe Avni Maksuti (1979).

“E gjithë familja e Mabetex shpreh ngushëllimet më të sinqerta për këtë tragjedi dhe lutemi për ata në këtë natë të madhe të muajit të shenjtë. Janë duke u marrë masat e nevojshme për tu kthyer kufomat e të ndjerëve në Kosove dhe tre të tjerët janë duke u trajtuar në mënyrën më dinjitoze në spitalet e Astanas”, thuhet në komunikatën e “Mabco Construction”.

Kosovë-Mal i Zi: Haradinaj ia përplas hartën në fytyrë kreut të komisionit të demarkacionit

 

Ramush Haradinaj, në cilësinë e anëtarit të Komisionit për Punë të Jashtme, i ka përplasur në fytyrë hartën, kryetarit të Komisionit Shtetëror për Demarkacion me Malin e Zi, Murat Meha.

Mësohet se Haradinaj as nuk e ka lënë Mehën të përfundojë raportimin, duke përplasur një hartë që kishte në dorë dhe më pas ka lënë mbledhjen, shkruan Gazeta Express.Ngjarja ka ndodhur në hapësirat e Kuvendit të Kosovës ku po mbahet mbledhja e Komisionit për Politikë të Jashtme dhe po raporton Komisioni Shtetëror për Demarkacion me Malin e Zi.

ILIR SHALA – TAKIM ME DEPUTETIN E REPUBLIKËS SË KOSOVËS ANTON QUNI

VOAL – PRISHTINË –  Ilir Shala, kandidat për deputet në zgjedhjet nacionale në Zvicër nga radhët e partisë CVP, ne kuader te vizites zyrtare ne Kosove u takua me Anton Qunin, deputet i Parlamentit te Republikes se Kosoves.

Ilir Shala, në shënimin e tij në facebook, shkruan: ‘Ne takim u bisedua per tema te rendesishme te skenes politike ne Kosove si dhe per diasporen kosovare ne Zvicer. Z. Quni perkrahu fuqishem kandidaturen time per Deputet ne Parlamentin Zviceran dhe me inkurajoj te vazhdoj ne avanicimin tim ne skenen politike Zvicerane. Poashtu Z. Quni u zotua se do te mbeshtes kandidaturen time nepermjet nje lobimi te strukturat partiake te LDK ne Zvicer si dhe ne pergjithesi te diaspora shqiptare ne Zvicer. Z.Quni shprehu kenaqesi per gjeneratat e reja shqiptare qe po ngriten intelektualisht dhe profesionalisht ne diaspore.
Faleminderit z. Anton Quni’

Ilir Shala është zëvendës-kryetar i Forumit Rinor të CVP-së në Kantonin e Bernit dhe në moshë mjaft të re është kandidat serioz për t’u zgjedhur deputet në zgjedhjet nacionale.

Ilir Shala nga Smaqi i Gjakovës, 20 vjeçar, është i gatshëm për të përfaqësuar interesat e shqiptarëve në Zvicër, sikurse edhe interesat e të rinjve, zviceranë dhe të të banorëve tjerë që jetojnë aty.

Mbështetja unike e shqiptarëve në Kantonin e Bernit për kandidatin për deputet Ilir Shala është mbështetje e sukseseve të shqiptarëve në Zvicër.

Suksesi i Ilir Shalës dhe të rinjve nga Kosova në Zvicër është sukses yni i përbashkët.

Lista Serbe e Kosovës – në delegacionin e Serbisë në Bruksel

Pavarësisht që përfaqësuesit e Listës Serbe janë pjesë e institucioneve të Republikës së Kosovës të nivelit qendror dhe lokal, në dialogun ndërmjet Kosovës dhe Serbisë në Bruksel, ata janë pjesë e delegacionit të Serbisë.

Këtë e ka konfirmuar edhe Goran Rakiq, nënkryetar i Komunës së Mitrovicës së veriut nga Lista Serbe, i cili së fundmi ka qenë i pranishëm në dialogun ndërmjet Kosovës dhe Serbisë në Bruksel.

“Unë kam qenë anëtar i delegacionit të Beogradit edhe me ftesën e Bashkimit Evropian dhe qëllimi im është që të gjejmë një zgjidhje të qëndrueshme dhe një kompromis. Ndërkaq, definicioni i kompromisit është zgjidhja e problemit me pakënaqësi të të dyja palëve”, tha Rakiq.

Por, kjo situatë, ku në dialogun Kosovë- Serbi, serbët që janë pjesë e institucioneve të Kosovës, në fakt janë pjesë e delegacionit të Serbisë në Bruksel, sipas analistit të çështjeve politike, Halil Matoshi, është më shumë se paradoksale.

“Jo vetëm që është paradoksale, por është rast unik në historinë e marrëdhënieve ndërkombëtare, që përfaqësuesit politik, ministrat, zëvendëskryeministra, të një shteti, të përfaqësojnë një shtet tjetër ose së paku, të deklarohen se përfaqësojnë një shtet tjetër. Por, kjo mund të ndodhë vetëm në Ballkan dhe vetëm në Kosovë”.

Por, Rakiq, nuk e sheh këtë situatë si paradoksale. Sipas tij, është e parëndësishme se kush në cilin delegacion është, në qoftë se dëshirohet të gjendet zgjidhja e problemeve.

Megjithatë, sipas tij, është e dukshme që autoritetet e Kosovës i shohin problemet skajshmërisht ndryshe nga Serbia.

“Nëse ata konsiderojnë që veriu dhe katër komunat e veriut janë pjesë e Kosovës, atëherë pse ata duhet të bisedojnë me Beogradin? Pse nuk thonë se ‘kjo është e jona dhe nuk kemi çfarë të bisedojmë’? Në qoftë se Prishtina po përpiqet që peshën e problemit ta bartë në veri, duke i fshehur problemet e veta që i ka në tërë territorin e Kosovës, atëherë nuk do të arrijmë kurrë deri te një rezultat konkret”, tha Rakiq.

Por, me gjithë insistimin që të marrim përgjigje lidhur me pyetjet që ka ngritur Rakiq, zyrtarët e Qeverisë së Kosovës, nuk janë prononcuar.

Në anën tjetër, analisti Matoshi, vlerëson se Qeveria e Kosovës është e pa aftë dhe pafuqishme që t’i bindë përfaqësuesit e serbëve të Kosovës që t’ia dëshmojnë besnikërinë.

Sipas tij, situata e tanishme nuk i pengon përfaqësuesit e institucioneve të Kosovës që të bisedojnë me Listën Serbe.

“Të bisedosh me qytetarët tu, nuk është kurrfarë tërheqje apo zmbrapsje, por pikërisht dëshmohet fuqia për t’i zgjidhur problemet me debat demokratik. Prandaj, edhe Prishtina zyrtare nuk është krejtësisht e pafajshme që nuk ka hyrë në dialog të vazhdueshëm me serbët e Kosovës, para se të krijohej Lista Serbe, e cila dihet se është krijuar nga Beogradi zyrtarë dhe e cila praktikisht, i mbanë fuqishëm ende qëndrimet e Beogradit zyrtar për sa i përket Kosovës”.

Por, Rakiq, vlerëson se tash për tash nuk është gati se e pamundur që përfaqësuesit e serbëve të Kosovës të bisedojnë vetëm me Prishtinën zyrtare për zgjidhjen e problemeve, pa praninë e Serbisë, si dhe faktorit ndërkombëtarë, që sipas tij, mund t’i garantojë marrëveshjet eventuale.

“Natyrisht që nuk dëshiroj të bisedojmë në këtë mënyrë, sepse nuk është arritur mirëbesimi ndërmjet Prishtinës dhe veriut. Ky mirëbesim nuk ekziston. Në momentin kur ky mirëbesim do të arrihej, ne do të ishim të gatshëm të bisedojmë. Por, Prishtina nuk i përmbahet marrëveshjeve në qoftë se këtë nuk e garanton bashkësia ndërkombëtare” , u shpreh Rakiq.

Analisti Matoshi ka theksuar se kjo situatë reflekton mungesën e një presioni nga Bashkimi Evropian ndaj Beogradit zyrtarë, që t’i lë të lirë serbët e Kosovës që t’i përfaqësojnë interesat e tyre dhe jo t’i nxisë në armiqësi me palën shqiptare të Kosovës.

Prizreni organizon sot marsh për Srebrenicën

Në Prizren do të organizohet një marsh për nder të 20 vjetorit të masakrës së Srebrenicës. Marshi organizohet nga dy organizata jo qeveritare të boshnjakëve në Prizren, e përkrahur edhe nga Drejtoria për Kulturë e kësaj komune.

Sipas një njoftimi dërguar mediave nga OJQ-ja e quajtur “Boshnjak KS”, “Marshi i Paqes për Srebrenicën” do të fillojë sot në ora 17:00, pranë qendrës sportive “Sezai Surroi” në Prizren, për të vazhduar në Bazhdarhane pranë “Shtëpisë e Bardhë” si dhe rrugës drejt Shadërvanit ku do të organizohet performansa “Lulja e Srebrenicës”.

“Marshi i paqes është manifestim këmbësorësh i cili mbahet në kuadër të përvjetorit të gjenocidit ndaj boshnjakëve të Srebrenicës dhe të rrethinës së saj me qëllim të përkujtimit të viktimave të gjenocidit dhe rikujtimin e krimeve të tmerrshme të kryera nga forcat ushtarake të Republikës së Srpskës, të ndihmuar nga forcat e Serbisë, ndaj popullit boshnjak në muajin qershor të vitit 1995. Marshi i paqes organizohet në gati të gjitha vendet e botës, posaçërisht këtë vit kur mbushen njëzet vjet nga gjenocidi në Srebrenicë. Kolona e pjesëmarrësve numëron me mijëra njerëz nga të gjitha anë të botës dhe për çdo vit kjo kolonë është më e madhe”, thuhet në njoftim.

Organizatorët bëjnë thirrje të gjithë qytetarët që të marrin pjesë, për t’u bashkuar me të gjithë botën në përkujtimin e gjenocidit në Srebrenicë, ku janë vrarë mbi 8 mijë njerëz.

Kosova shkatërron sot 1 742 armë

Kosova i është bashkuar Ditës Ndërkombëtare të Shkatërrimit të armëve të vogla më 9 korrik.

Kjo ditë kujton botën që armët e akumuluara, të siguruara në mënyrë jo adekuate dhe armët e paligjshme paraqesin rrezik për sigurinë.

Kosova do të marrë pjesë në këtë ngjarje duke shkatërruar 1 742 armë të vogla dhe të lehta, me mbështetjen e Bashkimit Evropian dhe Programit të Kombeve të Bashkuara për Zhvillim (UNDP)/SEESAC.

Në këtë ceremoni do të marrin pjesë: ministri i Punëve të Brendshme të Kosovës, Skender Hyseni, zëvendës-përfaqësueseja e UNDP Alessandra Roccasalvo dhe zëvendësdrejtori i Përgjithshëm i  Policisë së Kosovës, Naim Rexha.

Shkatërrimi do të organizohet nga Policia e Kosovës dhe do të mbahet sot në Janjevë tek shkritorja.

Armët e shënuara për shkatërrim janë konfiskuar nga Policia e Kosovës gjatë punës së tyre të hetimit të krimit.

BE nxit ngritjen e Gjykatës së Posaçme në Kosovë

Zyrtarë të BE-së të shqetësuar me dështimin e parlamentit të Kosovës që të votojë ngritjen e Gjykatës së Posaçme që do të trajtojë pretendimet për krime lufte

Drejtori për Ballkanin Perëndimor në Komisionin Evropian, Jean-Eric Paquet, u shpreh i shqetësuar me dështimin e parlamentit të Kosovës që të votojë ngritjen e Gjykatës së Posaçme që do të trajtojë pretendimet për krime lufte. Komentet e tij u bënë gjatë një takimi në kuadër të procesit të stabilizim asociimit të Kosovës me Bashkimin Evropian. Ai tha se është e qartë se një proces i tillë nuk është i lehtë, por shfaqi shpresën se kjo çështje të rishikohet dhe të zgjidhet.

“Nuk besoj se mund ta theksoj mjaftueshëm rëndësinë që ka ngritja e Gjykatës për Kosovën dhe pozitën e saj në komunitetin ndërkombëtar si dhe besueshmërinë e përkushtimit politik që është bërë në këtë proces”, tha ai, duke nënvizuar se gjykata do të vendosë  drejtësi për viktimat dhe do të ndihmojë në forcimin e sundimit të ligjit në Kosovë.

Më 26 qershor parlamenti i Kosovës dështoi të miratojë ndryshimet kushtetuese që do t’i hapnin rrugë themelimit të Gjykatës. Institucionet e Kosovës thanë se po përpiqen të gjejnë rrugën për të hedhur sërish në debat këtë çështje si një detyrim ndërkombëtarë ndërsa opozita ka bërë thirrje që të respektohet vendimi i deputetëve të parlamentit dhe të hiqet dorë nga themelimi i saj në formën si është ofruar në parlament.

Debati për gjykatën është përcjellë më shumë reagime dhe protesta ne Kosovë, ku pohohet se në këtë mënyrë po bëhet barazimi me mizoritë e forcave serbe gjatë luftës së viteve 1998 1999.

Por, zyrtarët perëndimorë pohojnë se Gjykata do të ndihmojë heqjen e reve të zeza mbi Kosovën. Ata thonë po ashtu se dështimi i Kosovës për të ngritur gjykatën mund të çojë çështjen në Këshillin e Sigurimit të Kombeve të Bashkuara dhe kjo do të jetë e dëmshme për shtetin e ri. Dështimi i Kosovës do të mund të pasqyrohej edhe në proceset integruese të saj në Bashkimin Evropian, përfshirë edhe marrëveshjen e stabilizim asocimit, të cilën Kosova e përfitoi në shkëmbim të angazhimit në bisedimet për normalizimin e marrëdhënieve me Serbinë.

Zoti Paquet, tha se ka shqetësime edhe me mungesën e përparimit në këto bisedime, ndërsa bëri thirrje për vazhdimin e shpejtë të tyre.

“Kjo është shumë me rëndësi për normalizimin por është me rëndësi edhe për të ardhmen e Kosovës dhe sjellë përfitime për Kosovën në ekonomi dhe në ardhmërinë e saj evropiane”, tha ai.

Bisedimet i mundësuan Serbisë hapjen e negociatave për anëtarësim në Bashkimin Evropian, por hapja e kapitujve të këtyre negociatave varet nga zbatimi i marrëveshjeve.

Kjo çështje pritet të jetë temë e vizitës në Beograd të kancelares gjermane Angela Merkel, e cila ngulë këmbë në qëndrimin se hapja e kapitujve të negociatave për anëtarësim duhet të pasojë një marrëveshje gjithëpërfshirëse dhe detyruese për normalizimin e marrëdhënieve ndërmjet Kosovës dhe Serbisë. za

Zhbogar – Ministrja Bajrami largon nga puna njerëz profesionistë dhe me rezultate të larta

Shkarkimet dhe emërimet e reja në sektorin e resurseve njerëzore dhe në administratën brenda Ministrisë së Tregtisë dhe Industrisë në Kosovë, kanë nxitur reagime në zyrën e Bashkimit Evropian në Kosovë.

Shefi i zyrës së BE-së në Prishtinë, Samuel Zhbogar, ka kritikuar ministren Hikmete Bajrami se ka larguar nga puna njerëz profesionistë me performancë të shkëlqyeshme.

Për më shumë, ai ka theksuar se me këto veprime, ministrja Bajrami ka rrezikuar edhe mbarëvajtjen e procesit të negociatave për Marrëveshjen e Stabilizim Asociimit dhe proceset e tjera të integrimeve evropiane në të cilat gjendet Kosova.

“Bashkimi Evropian është jashtëzakonisht i shqetësuar për këtë rrjedhë të ngjarjeve e cila jo vetëm që vë në pikëpyetje aftësinë e Ministrisë së Tregtisë dhe Industrisë për qëndrueshmërinë dhe implementimin e projekteve për të cilat jemi dakorduar, por gjithashtu vë në pikëpyetje hyrjen në fuqi të Marrëveshjes së Stabilizim-Asociimit”, thuhet në letrën e Samuel Zbogar dërguar ministres së Tregtisë dhe Industrisë Hikmete Bajrami.

Këtyre kritikave iu është përgjigjur ministrja e Tregtisë dhe Industrisë Hikmete Bajrami, duke thënë se me këto veprime po lufton korrupsionin në ministri.

“Asnjë presion, asnjë shantazh, asnjë kërcënim, asnjë veprim i kujtdo qoftë nuk më largon nga ideja për t’i ndalë keqpërdorimet, krimin, korrupsionin edhe të njerëzve që janë të lidhur me çfarëdo faktori vendor apo ndërkombëtar”, ka theksuar Bajrami.

Shkarkimet dhe emërimet e reja në sektorin e resurseve njerëzore dhe në administratën e Ministrisë së Tregtisë dhe Industrisë po kritikohen edhe nga përfaqësues të shoqërisë civile dhe ish ministri i Tregtisë dhe Industrisë Bujar Dugolli.

Ish ministri Dugolli në një prononcim për Radion Evropa e Lirë ka theksuar se këto ndërrime që po bëhen po dëmtojnë proceset ekonomike.

Ai ka kujtuar se në këtë ministri vazhdimisht ka pasur ndërrim të pozitave, varësisht nga partia e cila ka udhëhequr me këtë dikaster.

“Në kohën kur kam qenë ministër më ndihmën e donatorëve ndërkombëtarë kemi kualifikuar dhe aftësuar stafin që të jenë adekuat për çështje të ndryshe që janë në domenin e Ministrisë së Tregtisë dhe Industrisë. Por, me ndërrimin e pushtetit vjen ministri pasues dhe i largon nga detyra ata njerëz të cilin ishin profesionistë e që ne kishim investuar në përgatitjen e tyre, dhe ky trend vazhdojë edhe me ministrat tjerë të kësaj ministrie”, tregon Dugolli.

Dugolli kujton se që nga viti 2004 deri në vitin 2008 shumë kuadro ishin përgatitur për të kryer punë të rëndësishme në Ministrinë e Tregtisë dhe Industrisë që shumë prej këtyre personave më janë më pjesë e kësaj ministrie.

“Në rast se po bëhen emërimet e reja dhe shkarkimet për të rehatuar militantët partiak është një gjë e gabuar dhe shumë e dëmshme për shtetin, por që nëse ndodh si rezultat i performancës së dobët ose aferave korruptive unë mendojë se askush nuk duhet t’i mbrojë ata as komuniteti ndërkombëtarë por as edhe zyrtarët qeveritarë”, shton Dugolli.

Përfaqësues të shoqërisë civile, në anën tjetër e kanë quajtur të pakuptimt ndërhyrjen e shefit të zyrës së BE-së në Prishtinë, në punët e ministres Bajrami.

“Zhbogar nuk do të duhej të ndërhynte në këtë mënyrë tek disa vendime brenda Ministrisë së Tregtisë nga ana e ministres Bajrami, pasi që nuk besoj që Zhbogar e njeh më mirë administratën brenda sesa vet ministrja”, ka theksuar Petrit Zogaj nga Lëvzija Fol.

Megjithatë, Zogaj ka kërkuar nga ministrja Bajrami që nëse ajo po deklarohet se me këto vendime të shkarkimeve dhe emërimeve të reja po lufton korrupsionin, të tregon ne detaje se për çfarë vepra të korrupsionit bëhet fjalë dhe se kush janë ata persona. rel

Vritet në Siri kikboksieri kosovar, dy herë Kampion Bote, Valdet Gashi

 

KOSOVË –  Valdet Gashi, kampion i botës dy herë në kick-boks është vrarë gjatë luftimeve në Siri përkrahë ISIS-it.

Lajmin e ka dhënë një portal zviceran, i cili ka bërë të ditur se Gashi është vrarë të shtunën, teksa lajmin për të e konfirmoi edhe vëllai i Valdetit. Vëllai i Gashit përmes një postimi në rrjetet sociale ka njoftuar se kikboksieri është vrarë në betejë. Gashi, 28-vjeçar ishte i famshëm në sportin e tij në Zvicër, duke qenë edhe trajner te Winterthur.

Ai ishte shpallur dy herë kampion bote në kick-boks dhe kampion i Gjermanisë në tai-boks ndërsa i ishte bashkuar ISIS, tetorin e vitit të kaluar.

I rritur në Oberpfalz, Gashi kishte thënë se do të shkonte në Tajlandë për të marrë frymë dhe për të bërë trajnim. Këtë version e kishte besuar edhe familja e tij, por nuk e kishte menduar se ai do të shkonte në Siri.

Përmes postës elektronike, Gashi kishte treguar për një gazetë gjermane se ishte pjesë e ISIS, “Po unë jam pjesë e sistemit. Nuk marr pjesë në luftë, por jam duke ndihmuar në rajonin Membij/Jartablus në mbikëqyrjen e kufirit pranë lumit Eufrat”, kishte thënë ai.

Gashi ka treguar se çfarë ndodhte atje ku ndodhej ai, madje duke pohuar se kishte qenë dëshmitar i prerjes së kokave.

Sipas Gashit, qëllimi i heqjes së kokës publikisht ka për qëllim frikën, dhe se ai patrullonte në lokalitete të ndryshme dhe kujdesej që të respektoheshin ligjet islame, siç konsideron ISIS.

Po ashtu ai ka treguar se qëllimi i tyre ishte që të shihnin nëse kishte kontrabandistë, që sillnin ilegalisht mallra, për shembull cigare, alkool dhe drogë. “Këto janë të ndaluara plotësisht këtu”, shkruante Gashi.

“Nëse më njihni vërtetë mua, ju do të duhet ta dini se unë nuk do të bëj diçka të keqe. Por gjithsesi…. mbani këtë mendim për mua, nëse kjo ju bën të lumtur”, shkruante Gashi. bw

vg2

EKSPERTËT – SPECIALEN NUK E DO PDK-ja

Vetëm një javë pasi që ishte rrëzuar amandamenti kushtetues për themelimin e Gjykatës Speciale për krime lufte, institucionet e Kosovës ndodhen para sfidës së rikthimit të këtij amandamenti për miratim në Kuvend.

Mesazhet e kancelares gjermane Angela Merkel, të kongresistit amerikan Eliot Engel dhe të drejtorit të Zyrës për çështjet e Evropës Jugore dhe Qendrore në Departamentin Amerikan të Shtetit, Thomas Yazdgerdi janë se Kosova duhet ta themelojë këtë gjykatë.

Abstenimi, mungesa dhe votimi kundër i 13 deputetëve të Partisë Demokratike të Kosovës, besohet se ishin shkaktarët kryesor të rrëzimit të amandamentit për Gjykatën Speciale.

Përderisa opozita, ishte dhe mbetet kundër themelimit të saj.

Gjatë një vizite që po i bën Kosovës, zyrtari nga Departamenti i Shtetit, Thomas Yazdgerdi, ka thënë se Shtetet e Bashkuara janë të zhgënjyera me votimin kundër themelimit të Gjykatës Speciale të premten e kaluar.

“Ne shpresojmë që qeveria e Kosovës, veçanërisht koalicioni qeverisës, do të rikthej kërkesën për ta themeluar gjykatën në Kuvend, në mënyrë që qeveria të angazhohet për të themeluar atë”, ka deklaruar ai.

Tashmë, Qeveria është zotuar se do ta kthej amendamentin në Kuvend për votim të sërishëm. Por, aktualisht PDK-ja, si faktori kyç në këtë proces mbetet në heshtje.

Një veprim të tillë, analistët politik e shohin vetëm si një taktizim politik të kësaj partie dhe besojnë se në fund, Kuvendi me votën e shumicës së deputetëve të PDK-së do t’i arrijë dy të tretat e votave për të miratuar amandamentin kushtetues.

Analisti Imer Mushkolaj, pret që partitë politike dhe institucionet t’i lënë anash kalkulimet politike dhe të votojnë në interes të vendit.

“Për ne, absolutisht është e panevojshme që të bëhet kjo lojë politike ose partiake për interesa të kujt do qoftë. Thjeshtë është një lojë që po e shohin të gjithë, por edhe ata e dinë se nuk do të kenë zgjidhje tjetër pos që në fund ta votojnë Gjykatën Speciale”, ka thënë Mushkolaj.

Në përgjithësi, tek opinionistët mbizotëron bindja se në fund, Kuvendi i Kosovës bashkë me qeverinë do të gjejnë një zgjidhje dhe do ta formojnë këtë gjykatë, e cila po potencohet si kërkesë e veçantë e faktorit ndërkombëtar.

Në këtë vijë, analisti Artan Muhaxhiri thotë se Kosova nuk duhet të përsëris më episodin e 26 qershorit, i cili, sipas tij, mund t’i kushtojë shtrenjtë në arenën ndërkombëtare.

“Ishte neglizhencë e liderëve kosovar dhe episod i pakëndshëm në raportet mes Kosovës dhe partnerëve ndërkombëtar. Shteti i Kosovës nuk e ka luksin që ta përsëris atë gabim të së premtes i cili do t’i kushtojë shumë në arenën ndërkombëtare”, ka thënë Muhaxhiri.

Themelimi i Gjykatës Speciale me seli jashtë Kosovës dhe me prokurorë e gjykatës ndërkombëtar, pason raportin e Këshillit të Evropës ku ishin ngritur pretendime se pjesëtarë të Ushtrisë Çlirimtare të Kosovës kanë kryer krime lufte gjatë periudhës së viteve 1998 – 2000.

Për këto pretendime, një task-forcë ndërkombëtare kishte zhvilluar edhe një hetim të gjerë.

Mirëpo kjo gjykatë nuk po mund të themelohet për shkak se opozita dhe sidomos disa deputetë të PDK-së në pushtet, nuk po e votojnë atë duke e konsideruar se ajo do të shihej si një gjykatë që gjykon luftën e UÇK-së.rel

Haradinaj: Gjykatën e bëjmë vet, amandamenti çështje e vdekur

“Dyshimet për kinse krime të kryera në Kosovë gjatë luftës së fundit janë ndërkombëtare, por ato duhet të shqyrtohen në Kosovë”, thotë në një intervistë për Radion Evropa e Lirë, kryetari i Aleancës për Ardhmërinë e Kosovës Ramush Haradinaj.

Radio Evropa e Lirë: Zoti Haradinaj, themelimi i Gjykatës Speciale për krime lufte tashmë është bërë një temë e pashmangshme. Subjekti juaj politik është pozicionuar kundër kësaj gjykate. Cilat janë arsyet kryesore që nuk e mbështetni atë?

Ramush Haradinaj: Ne jemi për Gjykatë për krime lufte, vendore jo selektive. Jemi që kjo Gjykatë për krime lufte, vendore jo selektive e Kosovës, të këtë edhe një dhomë të posaçme që do të trajtonte në mënyrë sepcifike dyshimet e raportit të zotit Dick Marty dhe të gjeturat e hetimeve të zotit ëiliamson.

Por, nuk kemi përkrahur një monstrum ligjor me mënyrën se si i është prezantuar Kosovës, i cili nga ajo nisja e vet, si letërkëmbim është kthyer në një sistem krejtësisht paralel gjyqësor.

Kjo e qet jashtë funksionit sistemin tonë kushtetues e ligjor dhe si i këtillë është i pa absorbueshëm për Kosovën. Por, ne nuk jemi kundër gjykatës, kundër hetimit e shqyrtimit të hetimeve, por jemi që kjo të ndodhë në një gjykatë vendore në Kosovë, ashtu siç ka ndodhur me vendet e tjera të rajonit, Serbinë e vendet e tjera në konflikt.

Këtë e kërkojmë pasi i kemi dhënë mundësinë për shqyrtim të gjithë asaj që ka ndodhur gjatë periudhës së luftës, OKB-së përmes UNMIK-ut, Tribunalit për ish-Jugosllavi do të thotë në Hagë, dhe EULEX-it.

Pra, 16 vite më vonë pas këtyre tri mundësive që ja kemi dhënë bashkësisë ndërkombëtare, ne kërkojmë të drejtën vet ta vendosim një gjyqësor për krime lufte në Kosovë, me një dhomë të posaçme që trajton këto dyshime dhe të gjetura të hetimeve të zotit ëiliamson që do të mund të përballej edhe prej ekspertëve ndërkombëtarë.

Radio Evropa e Lirë: Kongresisti Eliot Engel ju ftoi juve dhe të gjithë deputetët ta mbështesin themelimin e Gjykatës Speciale, duke potencuar se alternativa tjetër do të ishte që kjo gjykatë të bëhet nga Kombet e Bashkuara. Konsideroni se Kuvendi po rrezikon me këtë mospërfillje të thirrjeve ndërkombëtare?

Ramush Haradinaj: E para, ne e kuptojmë ndjeshmërinë e situatës. Pra, nuk është fare pozicioni i Kosovës i tillë që t’i ikë shqyrtimit të çfarëdo dyshimi apo hetimeve. Ajo që ne po bëjmë është nuk po i japim edhe një mundësi OKB-së. Ne ja kemi dhënë dy herë OKB-së mundësinë, një përmes UNMIK-ut 9 vjet, përmes tribunalit për ish-Jugosllavi aq sa ka ekzistuar.

Pra, nuk e kuptojmë fare logjikën si mundet edhe një herë OKB-ja të interesohet për Kosovën, kur i ka pasur dy mundësi për të ndihmuar në rend dhe ligj. Është tejet jo e logjikshme tejet e papranueshme që OKB fare të merret me këtë temë. Kjo është temë ekskluzive e Kosovës, dyshimet janë ndërkombëtare, por duhet të shqyrtohen në Kosovë.

Radio Evropa e Lirë: Si i shihni thirrjet e faktorit ndërkombëtar që vet institucionet e Kosovës duhet ta formojnë këtë gjykatë?

Ramush Haradinaj: Të gjithë këta që zakonisht kërkojnë që ne të veprojmë, janë miq të Kosovës dhe ne e kuptojmë shqetësimin e tyre është edhe shqetësim i yni, por mënyra se si të zgjidhjet ky shqetësim, nuk është më involvimi i OKB-së e i mekanizamave të përbashkët të shumë shteteve sepse edhe ata nuk po janë imun as prej korrupsionit, as prej standardit jo kredibil të ligjit.

Përvojat në të kaluarën për këto 16 vjet nuk na bindin ne në Kosovë se gjithçka është në rregull. Për këtë arsye ne duhet t’i marrim përgjegjësitë dhe duhet të fillojmë një ditë dhe unë jam për. Këtë pozicion timin e forcon vendimi i parlamentit.

Parlamenti i ka hedhur poshtë të gjitha angazhimet e Kosovës deri në atë ditë rreth kësaj teme. Pra, çdo gjë që e ka krijuar një materie deri në votim është hedhur poshtë.

Parlamenti e ka mundësinë e rinisjes jo të vazhdimit të kësaj teme, pra kjo nuk mund të vazhdohet, mundet të rinisë, mundet të prodhojë një produkt të ri Kosova, por nuk mundet të insistojë me dhunimin e demokracisë së vet dhe të krijojë destabilitet në vend, që të rikthejë ta zëmë një lëndë që ka vdekur në bazë të demokracisë.

Radio Evropa e Lirë: Qeveria ka paralajmëruar se do ta riprocedojë amendamentin kushtetues, tashmë të rrëzuar nga Kuvendi më 26 qershor, për këtë gjykatë. Si e shihni ju këtë nismë të everisë tash?

Ramush Haradinaj: Nuk e di qeveria a e ka seriozisht, por është gabim nuk mundet me vepru kështu. Do të thotë qeverisë i ka dhënë përgjigje parlamenti për materien me të cilën është prezantuar. Qeveria mund ta nis një propozim të ri, por nuk mundet të vazhdojë ta riprocedojë atë e cila ka vdekur. Parlamenti e ka kthyer në piken zero këtë proces.

Radio Evropa e Lirë: Nëse mund të kalojmë në një çështje tjetër. Kohët e fundit po vërehet një koordinim i disa veprimeve politike të opozitës. Cilat janë qëllimet kryesore që tri partitë opozitare synojnë t’i arrijnë në këtë periudhë, karshi një koalicioni mjaft të gjerë që kanë dy partitë në pushtet?

Ramush Haradinaj: Ky është një drejtim i yni, ndryshimi në Kosovë. Ne mendojmë se nëse nuk ndodh ndryshimi në vend, në Kosovë po përkeqësohet gjendja. Pra qeverisja e zotit Thaçi e keqësoj gjendjen në vend.

Bashkimi me LDK-në dhe qeverisja e zotit Mustafa, po e përkeqëson një gjendje që veç ishte e keqe. Ne i ballafaqojmë këta dhe synojmë ndryshimin, pra synojmë daljen nga kjo gjendje e qeverisjes. Si dalje nga kjo gjendje që është në përkeqësim e sipër e në vështirësim për qytetarët, i mendojmë zgjedhjet.

Radio Evropa e Lirë: Ju kërkoni zgjedhje të reja, edhe pse nuk ka kaluar asnjë vit nga fillimi i mandatit të institucioneve të reja?

Ramush Haradinaj: Ky vit si parametër tregon se çfarë e pret Kosovën nëse vazhdojmë me këtë qeverisje. Për ne është tepër e papranueshme vazhdimi me një kualitet të tillë qeverisës.

Mendojmë se humbjet e Kosovës do të thellohen enorm, edhe humbjet për qytetarët do të thellohen çdo ditë. Ende s’ka një model të qartë, mirëpo vetvetiu një reflektim politik nga të gjithë ne duhet të ndodhë, besoj edhe nga ata që qeverisin sot, duhet ta vlerësojnë se sa gjatë duan të vazhdojnë me këtë situatë, e cila po e përkeqëson gjendjen në vend.

Pra, do të ishte edhe në interesin e atyre që janë në qeverisje sot me marrë një vendim sa më të shpejtë.

Radio Evropa e Lirë: Për fund zoti Haradinaj, ju morët edhe një mandat të ri për të udhëhequr AAK-në. Çfarë ndryshime, çfarë forma mund të presim në AAK?

Ramush Haradinaj: Ajo që dje kam insistuar shumë është që ne shqiptarët kemi shpirt, kemi ndjenja, kemi vlera. Kosova është ndjenjë, është vlerë është shpirti ynë, e subjekti politik AAK, duhet të punojë me shpirt, me ndjenjë, me vlera, që sistemit politik në Kosovë t’ia kthejë besimin, dhe që njerëzit e Kosovës, qytetarët e Kosovës, BE-në me e bë në Kosovë, NATO-n me e bë në Kosovë, me e thellu miqësinë me SHBA-në jo duke shkuar në SHBA, por duke arritë standard të jetës, standard demokracie në Kosovë, si në SHBA, të cilën e aspirojmë. Meqë jemi në prag të 4 korrikut, uroj pavarësinë e SHBA-së.

Kush do ta themelojë Gjykatën Speciale, Kosova, OKB, apo ndonjë mekanizëm tjetër?

Në Kosovë përmenden disa alternativa sesi do të mund të themelohet Gjykata Speciale për krime lufte, pas dështimit të kuvendit për ta themeluar atë. Votimi për gjykatën mund të riprocedohet në kuvendin e Kosovës.

Reagimi i parë i përfaqësuesve të bashkësisë ndërkombëtare në Kosovë pas dështimit që pati parlamenti ta miratojë themelimin e Gjykatës Speciale për krime lufte, ishte që ata ndjehen të zhgënjyer, por paralajmëruan se Kosova nuk ka alternativë tjetër pos që t’i trajtojë supozimet serioze për krime lufte që dalin nga raporti i vitit 2011 i Këshillit të Evropës. “BE-ja është njoftuar për votimin negativ lidhur me ndryshimet kushtetuese, të cilat do ta kishin mundësuar krijimin e Dhomave Speciale të Kosovës dhe Zyrës së Prokurorit Special. Kosova nuk ka alternativë tjetër përpos që t’i trajtojë supozimet serioze që dalin nga raporti i vitit 2011 të Këshillit të Evropës”.

Ky ishte reagimi i parë i përfaqësuesit të BE-së në Kosovë, Samuel Zhbogar, pas dështimit që kuvendi ta mundësojë themelimin e Gjykatës Speciale. Reagime të ngjashme kishte edhe nga shumë ambasadorë në Kosovë të vendeve më të industrializuara, të cilat thanë se Kosova nuk ka alternativë, pos që duhet ta mundësojë themelimin e Gjykatës, sepse në të kundërtën këtë do ta bëjë KS-it i OKB-së.

Isa Mustafa

Obligim ndërkombëtar

Tash për tash akoma nuk ka njoftim nga kryesia e kuvendit nëse votimi për ndryshimet kushtetuese që do ta mundësojë themelimin e Gjykatës Speciale do të riprocedohet në kuvend. Kryeministri i Kosovës Isa Mustafa, paralajmëroi se orientim i qeverisë së tij është që çështja e votimit të gjykatës speciale të riprocedohet në në kuvendin e Kosovës, duke bërë përpjekje që të bisedohet me grupet parlamentare dhe me secilin deputet veç e veç në mënyrë që të arrihen dy të tretat e votave që mundësojnë themelimin e Gjykatës Speciale. Kryeministri Mustafa tha se ky është obligim ndërkombëtare që Kosova duhet ta përmbushë.

Në anën tjetër analistët politik dhe njohësit e çështjeve juridike, thonë se mosmiratimi i formimit të Gjykatës Speciale për krime lufte nga Kuvendi i Kosovës do të ndikojë negativisht në proceset e integrimeve evropiane të Kosovës, ndonëse këto dy procese nuk ndërlidhen drejtpërdrejt njëra me tjetrën. Sipas analistëve, Kosova është dëmtuar, por kjo ndoshta edhe mund të korrigjohet.

Blerim Burjani, njohës i çështjeve juridike, i tha DW-së, se mos votimi për Gjykatën Speciale në Kuvend është një paralajmërim i keq për Kosovën për ditët në vijim. Sipas tij, ka tendenca tjera të ngritjes se ndonjë alternative me qëllim të arritjes së qëllimit të bashkësisë ndërkombëtare. “Përpjekjet do te jenë në drejtim të gjetjes se ndonjë modeli tjetër për themelimin e një gjykate të tillë me kompetenca të veçanta”. Analisti Blerim Burjani, thotë se nuk ka pas nevojë që Kosova të acarojë raportet me miqtë ndërkombëtar. “Politika vendore është e stresuar me pak informata me shumë presione se sa shpjegime adekuate se çfarë do të ndodhë edhe pse kjo gjykatë punën pret ta bëjë në Kosovë, për disa raste është thënë se zhvillimi i procedurave mund të bëhet në ndonjërin nga shtetet e BE e që më së shumti përmendet sërish Haga.

Imazhi i Kosovës dëmtohet

Analisti Blerim Burjan thotë se nuk ka rëndësi se si ka ardhur puna deri këtu, “por kjo gjykatë duhet të fillojë punën, pa marrë parasysh se a ka fakte a nuk ka fare, ideja ishte që të zbardhen raste gjatë luftës në Kosovë në vitin 1999 nga raporti i Dick Martit.” Sipas tij nuk do të ishte mirë që rasti të hapet në OKB. “Kjo do t’i sillte një dëm të madh imazhit të Kosovës, andaj një pjesë e historisë së OKB do të mbetej në sirtarët ndërkombëtar për rastet e gjykuara në Kosovë, andaj më mirë kjo çështje të përmbyllet në Kosovë pa zhurmë dhe pa ndonjë publicitet ndërkombëtar.”

Naim Rashiti Analisti Naim Rashiti

Një njohës tjetër i zhvillimeve politike në Kosovë Naim Rashiti, hulumtues nga Grupi Ballkanik për Politika, (BPRG) thotë për DW, se krijimi i Gjykatës Speciale është një zotim që Kosova e ka bërë qysh vitin e shkuar në këmbimin e letrave ndërmjet presidentes Atifete Jahjaga dhe ish-shefes së diplomacisë evropiane, Catherinë Ashton. Prandaj sipas analistit Naim Rashiti, mosmiratimi i këtyre zotimeve dëmton thellë marrëdhëniet e Kosovës me BE-në dhe SHBA-së. Ai thotë se nëse gjykata votohet në kuvend, ruhet sovraniteti i shtetit dhe subjektiviteti i rendit kushtetues të Kosovës, si dhe kontrollohet jetëgjatësia dhe mandati i gjykatës.

“Nëse partitë politike janë serioze në krijimin e gjykatës brenda vendit, ato duhet të veprojnë shpejt, të krijojnë gjykatën speciale, buxhetin e saj dhe të ftojnë BE-ne ta menaxhojë gjykatën në tëresi. Në këtë rast, Kosova duhet t’i bindë partnerët e saj se do të respektojë autonominë e gjykatës. Po ashtu Kosova do të duhet të arrinte marrëveshje ndërkombëtare për vendosjen e dëshmitarëve të mbrojtur. Ndoshta kështu do të mund të arrihej qëllimi i hetimeve të raportit të Senatorit Marti dhe ruajtjes se koncensusit në Kosovë e njëkohësisht përmbushjes së kushteve të BE-së. Me siguri se po te ishte bërë më herët do të ishte arritur qëllimi”, thotë Naim Rashiti.

Mundësi për Gjykatën Speciale

Analisti Naim Rashti, pas dështimit që kuvendi ta themeloje Gjykatën Speciale, numëron një varg mundësish që Gjykata të jetë funksionale, mundësi këto që që në fakt janë më të dëmshme sesa votimi të bëhej në kuvendin e Kosovës. “Vetë shkëmbimi i letrës mes presidentes Jahjaga dhe Ashton të lejojë që misioni EULEX të fillojë krijimin e kësaj gjykate, dëgjimi i rasteve të bëhet në një vend jashtë Kosovës. I mbetet Gjykatës kushtetuese të Kosovës të vlerësoj kushtetutshmërinë e marrëveshjes Ashton-Jahjaga. Por, disa muaj më herët kjo gjykatë e ka njohur shkëmbimin e letrave si marrëveshje ndërkombëtare, me vazhdimin e mandatit të gjykatësve ndërkombëtarë”.

Dick Marty Abgeordneter des Europarats Flash-GalerieSenatori zviceran Dick Marty pretendon se pjesëtarë të UÇK-së kanë kryer krime lufte gjatë luftës në Kosovë

Mundësia e dytë sipas analistit Naim Rashiti është që “Bashkimi Evropian të krijojë gjykatën në Bruksel apo diku tjetër në bazë të marrëveshjes së vitit 2008 ndërmjet sekretarit të përgjithshëm të OKB-së, Ban Ki Moon dhe Havier Solana, ku OKB (UNMIK) transferon kompetencat e rendit dhe ligjit tek BE misioni (EULEX) në kuadër të rezolutës 1244 të KS-it”.

Dhe mundësia e fundit sipas Naim Rashitit është që shtetet anëtare të KS-it të OKB-se të pranojnë propozimin rus për miratimin e gjykatës speciale për Kosovën nga OKB. Kjo mundësi e fundit është përmendur edhe nga ambasadorja e SHBA-së në Kosovë, Tracy An Jacobson e cila ka thënë se SHBA-së nuk do ta pengojnë themelimin e Gjykatës Speciale nga OKB, nëse Kosova nuk e themelon vetë këtë gjykatë.

Ideja për themelimin e Gjykatës Speciale doli pas një rezolute në Këshillin e Evropës që kërkonte hetime mbi supozimet e një senatori zviceran Dick Marty, i cili pretendonte se pjesëtarë të UÇK-së kanë kryer krime lufte dhe kanë trafikuar organeve të serbëve të vrarë gjatë luftës në Kosovë. Një prokuror amerikan Clint Williamson, tashmë ka kryer një hetim të gjerë rreth këtyre pretendimeve. Kjo gjykatë do të merret me të paktën 10 raste të dyshuara për krime lufte. Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.

KOSOVA NDERON PERSONALITETIN DHE VEPRIMTARIN E SHQUAR HARRY BAJRAKTARI

Një nga personalitetet më të shquara të komunitetit shqiptaro-amerikan, Harry Bajraktari, i cili më shumë se tri dekada ka dhënë kontributin në promovimin dhe afirmimin e çështjes së Kosovës, u nderua në një solemnitet të mbajtur sonte në Prishtinë nën patronazhin e ministrit të Diasporës, Valon Murati.

Në këtë ceremoni, ku morën pjesë edhe presidentja e Republikës, Atifete Jahjaga, ministra të kabinetit qeveritar, deputetë të Parlamentit të Kosovës, akademikë e personalitete të tjera të shquara nga jeta shoqërore dhe kulturore shqiptare, Bajraktari u konsiderua si një nga figurat kryesore të lirisë së Kosovës.

Me këtë rast, ministri Murati, tha se Bajraktari nuk kurseu asgjë për t’ia siguruar popullit të vet lirinë. Sipas tij, falë angazhimit të tij dhe bashkëkombësve të tjerë, Kosova sot është e lirë nga shtypja e një regjimi të dhunshëm të cilin e kishte përjetuar për një shekull”, tha Murati.

Murati: Vlerëtimet më të larta për Harry Bajraktarin

Ai punës së rëndë dh e të pandalshme për një standard më të lartë të jetës së tij ia shtoi edhe përpjekjet e vështira për t’ia siguruar popullit të vet lirinë. Nuk kurseu asgjë nga vetja e tij për këtë qëllim. Punën intelektuale, shkathtësitë bindëse, pozitën shoqërore, mjetet financiare dhe gjithçka kishte në dorë. Falë angazhimit të tij dhe bashkëkombësve të tjerë, Kosova sot është e lirë nga shtypja e një regjimi të dhunshëm të cilin e kishte përjetuar për një shekull”, tha Murati.

Ceremoninë e nderoi edhe prania e mysafirit special, mikut te shqiptarëve për më shumë se 25 vjet në Kongresin Amerikan dhe mik personal i Bajraktari, kongresmeni Eliot Engel. Në një fjali rasti ai foli gjatë për miqësinë e ngushtë dhe të përzemërt që e ka me Bajraktarin.

Engel: Gjatë punës sonë të përbashkët kemi punuar që Kosova dhe SHBA të jenë mike

Harry është dëshmia e gjallë se një person i vetëm mund të bëj ndryshime dhe ai me të vërtet e ka bërë këtë ndryshim. Dhe gjatë tërë asaj pune të përbashkët ne gjithmonë kemi punuar që Kosova dhe Shtetet e Bashkuara të qëndrojnë si mike dhe aleate të njëra tjetrës. Dhe gjatë këtyre 7 viteve të mia në Kongres gjithmonë kemi punuar që SHBA dhe Kosova të jenë miq të mirë dhe të afërt, tha Engel.

Ambasadori i Shqipërisë në Kosovë, Qemal Minxhozi, tha se Bajraktari me angazhimet e tija, ka arritur që ta kthejë dinjitetin e Kosovës.

Minxhozi: Bajraktari e zbatoi në praktikë thënien e John Kennedy

Herry Bajraktari, shkoi në Amerik ë në atë kohë kur në rininë e vet dëgjoi fjalët e presidentit John Kennedy, i cili tha: “mos kërko ç’do të bëjë vendi për ty, por çfarë do të bësh ti për vendin”. Dhe Herry Bajraktari këtë e zbatoi në praktikë duke u bërë një njeri i suksesshëm në të gjitha fushat. Është e vështirë të ndash ekonominë nga politika, është e vështirë të ndash Kosovën nga Amerika, është e vështirë të ndash të gjitha përpjekjet që ai bëri, që Kosova të marrë vendin, dinjitetin edhe në arenën ndërkombëtare”, tha Minxhozi.

Ai shtoi se kontributi i tij nuk ka qenë vetëm për Kosovën, por për mbarë kombin shqiptar, duke marrë nderimet më të larta nga shteti i Shqipërisë.

Vetë Harry Bajraktari në fjalën e tij të rastit e kujtoi rrugëtimin e vet për në SHBA, që në moshën 12 vjeçare, duke bërë edhe falënderime ndaj prindërve të tij dhe popullit Amerikan.

Bajraktari: Jeta ime deri këtu ka qenë rrugëtim i gjatë

“Kjo histori e rrugëtimit të familjes sime për në SHBA, para 46 vjetësh, kishte shpresën e besimit të madh, në një kohë kur Kosova i vuante të gjitha të këqijat nën sundimin e ish-Jugosllavisë dhe Serbisë. Ky udhëtim i gjatë me babanë, nënën dhe tri motrat, kur i kisha vetëm 12 vjet, më ka shoqëruar gjatë gjithë jetës… Nga këtu dëshiroj t’i falënderoj prindërit e mi për sakrificën e vullnetin që patën, sidomos SHBA-të që jo vetëm që na pranuan dhe na bënë pjesë të tyre, por na ndihmuan për të arritur qëllimet tona për lirinë dhe pavarësinë e Kosovës, që aq gjatë vuajtëm dhe pritëm”, tha Bajraktari.

Në këtë ditë, po ashtu u shënua edhe fillimi i “Muajit të Diasporës”. Me këtë rast, ministri Murati thekso i rëndësinë e hartimit të regjistrit të diasporës dhe mërgatës, duke u bërë thirrje të gjithë bashkatdhetarëve që t’i përgjigjen thirrjes për regjistrim.

harry1

harry2

harry3



Zëri i Amerikës: Takim Merkel-Mustafa në Berlin

Kancelarja gjermane Angela Merkel, tha të martën se një prej detyrimeve  më të rëndësishme të Kosovës është që të çojë deri në fund bisedimet me Serbinë.

Ajo i bëri këto komente pas takimit në Berlin me kryeministrin e Kosovës Isa Mustafa.

Zonja Merkel radhiti edhe luftën kundër krimit të organizuar dhe korrupsionit si dhe ngritjen e Gykatës së Posaçme në mesin e mesazheve për kryeministrin Mustafa me të cilin ka diskutuar edhe çështjen e emigruesve nga Kosova. Kancelarja gjermane Angela Merkel bëri thirrje për marrëveshje të drejta ndërmjet Kosovës dhe Serbisë, si dhe ngritjen e Gjykatës së Posaçme në Kosovë, që do të trajtojë pretendimet për krime lufte. Ajo i bëri këto thirrje gjatë takimit me kryeministrin e Kosovës Isa Mustafa, i cili po qëndron në Berlin, pak orë pasi delegacioni i drejtuar prej tij dhe ai i Serbisë, dështuan të arrijnë marrëveshje në bisedimet e ndërmjetësuara nga Bashkimi Evropian në Bruksel.

Kancelarja Merkel, e cila javën e ardhshme do të qëndrojë në Beograd, për të nxitur përparime në këtë proces, tha se ky është kusht për përparimin e të dyja palëve drejt integrimeve evropiane.

“Natyrisht, ne kemi një interes shumë të madh që të arrihen marrëveshje të drejta dhe kjo vlen për të dyja palët. Kompromise duhet të bëjnë të dyja palët, jo vetëm Kosova, por natyrisht edhe Serbia. Unë i nxisë të dyja, sepse vetëm nëse shënojnë përparime në bisedime, do të arijnë përparime edhe në rrugën evropiane. Kjo vlen edhe për Serbinë edhe për Kosovën”, tha zonja Merkel, e cila deri tash ka ngulur këmbë që hapja e kapitujve të negociatave me Serbinë për anëtarësim në Bashkimin Evropian, të paraprihen nga një marrëveshje gjithpërfshirëse dhe detyruese për normalizimin e marrëdhënieve me Kosovën.

Kryeministri i Kosovës, Isa Mustafa, tha se me kancelaren Merkel është biseduar për çështjet zhvillimore, integrimin evropian dhe përmbushjen e kritereve për këto integrime, përfshirë luftën kundër krimit të organizuar e korrupsionit por edhe përmbushjen e kritereve për liberalizimin e vizave. Ai u shpreh i përkushtuar edhe ndaj detyrimeve ndërkombëtare të Kosovës.

“Kancelarja na ka dhënë përkrahjen por edhe edhe kërkesën e saj që ne të intensifikojmë dhe të përparojmë edhe më tutje procesin e dialogut me Serbinë dhe po ashtue që të përmbushim obligimet tona dhe detyrimet sa i përket themelimit të Gjykatës Speciale si një prej detyrimeve që ne kemi marrë”, tha ai.

Të dy zyrtarët e lartë thanë se kanë diskutuar edhe për cështjen e migruesve të paligjshëm nga Kosova të cilët, sic u tha nuk kanë asnjë mundësi që të përfitojnë nga politikat e strehimit.

Takimi me kryeministrin Mustafa i paraprinë një turneu të kancelaresë Merkel në Serbi, Shqipëri e Bosnjë, që sipas saj dëshmon se Gjermania ësthë e interesuar për qëndrueshëmri në rajonin e Ballkanit që ende përballet me pasojat e së kaluarës që ka lënë pas vetes cështje të pazgjidhura.

KOSOVA – KËRCËNIMI NGA IS NUK DUHET NEGLIZHUAR

Që prej publikimit të një videoje propagandistike nga grupi militant Shteti Islamik (IS) për disa vende të Ballkanit, përfshirë këtu edhe Kosovën, masat e sigurisë në vend duket se janë shtuar ndjeshëm.

Policia e Kosovës, përmes një komunikate për medie, ka thënë se “në vazhdimësi është duke e bërë vlerësimin e rreziqeve të mundshme të sigurisë në vend dhe në këtë kuadër edhe vlerësime për rreziqet që mund të vijnë nga terrorizmi, grupet terroriste apo individ që ndërlidhen me këto aktivitete”.

Haxhi Shala, kryetar i Komisionit Parlamentar për Mbikëqyrjen e Agjensionit Kosovar për Intelegjencë, thotë për Radion Evropa e Lirë, se institucionet e sigurisë së vendit kanë shqyrtuar kërcënimet e mundshme dhe sipas tij, ato kanë ndërmarrë masat e sigurisë.

“Edhe Kosova ka ngritur gjendjen e gatishmërisë. Ka dy javë që këtë e ka bërë Policia e Kosovës. Njëkohësisht, edhe AKI është duke i vëzhguar në çdo hap individët që kanë lëshuar mesazhe kërcënuese. Kështu që, besoj që gjithçka e kanë nën kontroll institucionet e sigurisë”, tha Shala.

Florian Qehaja, drejtori i Qendrës Kosovare për Studime të Sigurisë, thotë për Radion Evropa e Lirë se video propagandistike nga grupi militant Shteti Islamik për disa vende të Ballkanit, është në kuadër të fushatës që ky grup e bën për të mbjellë frikë dhe pasiguri tek popujt në Evropë, e sidomos te shtetet e Evropës perëndimore, që kanë ndikim në marrëdhëniet ndërkombëtare.

Sipas tij, shtetet e Ballkanit perëndimor nuk kanë ndonjë relevancë në këtë drejtim dhe ato nuk janë caku kryesor i grupit militant Shteti Islamik.

“Unë nuk e shoh nivelin e kërcënimit në atë masë që qytetarët e Kosovës – në këtë rast po flas për Kosovën – të shqetësohen. Mirëpo, nuk duhet neglizhuar si kërcënim, për vet faktin që qytetarët tonë veprojnë atje dhe ata potencialisht mund të përdoren apo keqpërdoren për të arritur ndonjë qëllim të caktuar, që në fund të fundit, në fokus ka mbjelljen e frikës dhe pasigurisë”.

Shala, nuk konsideron se grupi militant Shteti Islamik mund të kërcënojë seriozisht sigurinë e vendit.

“Vendi nuk është i rrezikuar nga ideologjia e IS-it apo individët që kërcënojnë. Nuk është kërcënim serioz dhe gjithçka është nën vëzhgim, përfshirë ata persona që kërcënojnë ose mendojnë diçka të tillë”, tha Shala.

Policia e Kosovës, përmes komunikatës gjithashtu ka theksuar se në fushën e parandalimit të ekstremizmit të dhunshëm dhe terrorizmit, “ka bashkëpunim shumë të ngushtë edhe me institucionet tjera të sigurisë në vend, duke përfshirë edhe institucionet relevante ndërkombëtare në rajon dhe më gjerë”.

Por, Qehaja vlerëson se për sa i përket bashkëpunimit rajonal në sferën e policisë dhe intelegjencës, Kosova çalon, për shkak se, sipas tij, ajo nuk ka qasje në iniciativat rajonale të sigurisë, sidomos kur flitet për bashkëpunimin në këtë drejtim me Serbinë dhe Maqedoninë.

“Konsideroj që asnjë shtet nuk mundet që me forcat vetanake të parandalojë një rrezikshmëri të tillë, për arsye se është vështirë të identifikohen njerëzit që kanë qëllime të tilla. Armiku nuk ka adresë dhe mund të gjendet në mesin tonë, por mund të vij edhe nga jashtë”.

“Kur them ‘në mesin tonë’, atëherë mendoj se qytetarët e Kosovës duhet të bashkëpunojnë me organet e sigurisë dhe ta ndajnë me ta çdo indikacion, sado të vogël, si dhe çdo informacion të mundshëm, që shpien në drejtim të parandalimit të ndonjë qëllimi të keq të mundshëm”.

Qehaja ka shtuar se në rast se vlerësohet që kërcënimi potencial vjen nga jashtë, atëherë institucionet e sigurisë duhet ta rritin kontrollin kufitar, sidomos në aeroport, si dhe të shtojnë masat e kontrollimit dhe verifikimit të pasagjerëve që hyjnë në territorin e Kosovës.

Policia e Kosovës, ka theksuar se është duke mbikëqyrur “çdo aktivitet të personave fizik dhe juridik për të cilët siguron informata se mund të paraqesin rrezik për rendin kushtetues në të ardhmen apo mund të kryejnë ndonjë vepër penale” dhe se “e gjithë kjo bëhet me qëllim të parandalimit dhe zbulimit të ndonjë vepre penale të mundshme, duke përfshirë veprat e terrorizmit dhe ekstremizmit fetar”.

Opozita në Kosovë: Votimi për Gjykatën, proces i pakthyeshëm

Opozita në Kosovë insiston se amendamenti kushtetues për Gjykatën Speciale për Krime Lufte nuk mund të kthehet në Kuvendin e Kosovës për votim të sërishëm.

Ky reagim i opozitës pason deklaratat e kryeministrit Isa Mustafa dhe zëvendësit të parë të tij, Hashim Thaçi, për riprocedimin e amendamentit kushtetues, të cilin Kuvendi e rrëzoi gjatë votimit më 26 qershor.

Liderët e tri partive opozitare, Visar Ymeri i Lëvizjes Vetëvendosjes, Ramush Haradinaj i Aleancës për Ardhmërinë e Kosovës dhe Fatmir Limaj i partisë Nisma, kanë zhvilluar një takim të përbashkët, gjatë të cilit kanë konstatuar se votimi në Kuvendin e Kosovës kundër themelimit të Gjykatës Speciale më 26 qershor është vendim i pakthyeshëm.

“Qeveria e Republikës së Kosovës duhet t’i nënshtrohet këtij vendimi. Çdo tentativë për ta përmbysur këtë vendim të deputetëve të Kuvendit të Republikës, të shprehur lirshëm me votë të lirë, gjoja në emër të procedurave, është tendencë për ta përmbysur rendin institucional dhe demokratik në vend”, thuhet në qëndrimin e opozitës. rel

HASHIM THAÇI: DY OPSIONE – TA KRIJOJMË VETË GJYKATËN SPECIALE OSE TA KRIJOJNË KUNDËRSHTARËT E PAVARËSISË TË KOSOVËS

VOAL – Zv kryeministri dhe Ministri i Jashtëm i Kosovës Hashim Thaçi tha në Parlament: “Ne kemi dy opsione: ta krijojmë këtë gjykatë veten, së bashku me BE-në dhe SHBA-së, dhe për t’i dhënë fund këtë çështje një herë e përgjithmonë në tre deri në pesë vjet; ose ne dështojmë dhe kjo çështje do të shkojë në Këshillin e Sigurimit të OKB-së, ku gjykata do të krijohet nga kundërshtarët e pavarësisë së Kosovës dhe do të zgjasë 15 deri në 20 vjet. ”

DANIEL SERWER: NËSE NUK VOTOHET GJYKATA SPECIALE, KOSOVA HUMBET MBËSHTETJEN E SHBA DHE BE

VOAL – Eksperti për çështjet e Ballkanit, profesori Daniel Serwer i ka dhënë një intervistë Gazetës të përditshme Express në lidhje me mosvotimin e Gjykatës Speciale nga Parlamenti i Kosovës. Pyetjet i ka drejtuar Shpend Limoni.
PYETJE: Kosova e ka refuzuar krijimin e Gjykatës Speciale sipas votimit të djeshëm në Parlament. Ambasadorja ei SHBA Samantha Power disa ditë më parë, tha se kjo çështje do të jetë një test për kredibilitetin lidershipit të Kosovës. A ka ndonjë pasojë që Kosova do të përballet në të ardhmen pas këtij votimi?
DANIEL SERWER: Po. Më së paku, Kosova do të shihet si e pagatshëm për administrimin e drejtësisë për ata që kanë njollosur reputacionin e Ushtrisë Çlirimtare të Kosovës duke kryer krime lufte, krime kundër njerëzimit dhe vrasje. Për një vend që kërkon njohje dhe pranim ndërkombëtar, kjo nuk është e mirë.

Nuk ka asgjë patriotike për këto krime. Çdo patriot i Kosovës duhet të dojë t’i shohë autorët e krimeve të sillen para drejtësisë.

Unë po ashtu shtoj se kjo nuk është e lehtë për t’u bërë. Është ende shumë e vështirë për sistemin gjyqësor të Kosovës, e cila në çdo rast nuk ka juridiksion për krimet e kryera në Shqipëri. Nuk ka ende asnjë mundësi reale për një ndjekje penale serioze në Kosovë.

PYETJE:: Kryeministri Mustafa dhe zëvendësi i tij Hashim Thaçi kanë thënë se çështja e Gjykatës Speciale do të jetë shpejt në agjendën e Kuvendit të Kosovës për të refuzuar krijimin e Gjykatës nga ana e OKB-së. A është tepër vonë për Mustafa dhe Thaçi?
DANIEL SERWER: Sipas mendimit tim është se amendamenti kushtetues që kërkohet, i cili nuk arriti të marrë një shumicë prej dy të tretave vetëm me pesë vota, kjo mund të ndryshojë nesër në qoftë se vullneti politik mund të gjendet.

PYETJE: Ambasadorja amerikane në Prishtinë Tracey Ann Jacobson në reagimin e saj të parë këtu, tha se Shtetet e Bashkuara nuk do të vënë veton kundër iniciativave për krijimin e një Tribunali nën mandatin e OKB-së. A mendoni se një Tribunal i tillë do të kundërshtohet?
DANIEL SERWER: Ministri i Jashtëm Thaçi e tha mirë në Parlament: “Ne kemi dy opsione: ta krijojmë këtë gjykatë veten, së bashku me BE-në dhe SHBA-së, dhe për t’i dhënë fund këtë çështje një herë e përgjithmonë në tre deri në pesë vjet; ose ne dështojmë dhe kjo çështje do të shkojë në Këshillin e Sigurimit të OKB-së, ku gjykata do të krijohet nga kundërshtarët e pavarësisë së Kosovës dhe do të zgjasë 15 deri në 20 vjet. ”

Fakti i trishtuar është se Kosova në të ardhmen do ta ketë të vështirë që të ketë mbështetjen e nga SHBA dhe BE, nëse ky vendim qëndron./EB

SOT MUSTAFA TAKOHET ME KANCELAREN MERKEL

Kryeministri i Kosovës, Isa Mustafa, pritet që sot të udhëtojë nga Brukseli për në Berlin, ku do të takohet me kancelaren gjermane Angela Merkel.

Kryeministri Mustafa pritet që me kancelaren të bisedohet rreth nënshkrimit të MSA-së dhe procesit të liberalizimit të vizave.

Mustafa, tregoi se do të kërkoi përkrahje nga Gjermania për këto procese.

Senati amerikan konfirmon Greg Delawie ambasador në Kosovë

VOAL – UASHINGTON – Senati ka konfirmuar diplomatin Greg Delawie në postin e Ambasadorit të SHBA në Kosovë javën e kaluar.

Delawie nga shteti i Virginia-s do ta zëvendësojë në këtë pozitë ambasadoren Tracey Ann Jacobson e cila i jep fund mandatit të saj trevjeçar si kryediplomate e Amerikës në Kosovë.

Delawie ishte propozuar nga Presidenti Amerikan Barack Obama për ta drejtuar Ambasadën në Kosovë në fund të marsit të këtij viti.

Ndërsa Ambasadorja në largim, Tracey Ann Jacobson ka nisur tashmë takimet e fundit. Një të tillë ajo e ka zhvilluar dje me Atin Sava Janjiç të Manastirit të Deçanit.

Thaçi thyen heshtjen rreth asociacionit të komunave serbe

Çështja e formimit të Asociacionit apo Bashkësisë së komunave me shumicë serbe, pritet të jetë një nga temat, për të cilat do të bisedohet në takimin e radhës, më 29 qershor në Bruksel, ndërmjet kryeministrit të Kosovës, Isa Mustafa, dhe atij të Serbisë, Aleksandar Vuçiq.

Pas takimit të 23 qershorit, të dy kryeministrat kanë theksuar se lidhur me çështjen e Asociacionit është arritur përparim gjatë bisedimeve, por ata nuk kanë dhënë ndonjë sqarim se në ç’masë është ai përparim.

Për më tepër, të dy kryeministrat kanë theksuar se janë marrë vesh që të mos ketë deklarata për medie lidhur me atë se në cilat pika është arritur pajtimi ose jo lidhur me formimin e Asociacionit të komunave me shumicë serbe.

Dy ditë më parë, kryeministri i Kosovës, Isa Mustafa, në mbledhjen e ekzekutivit, ka theksuar se bisedimet do të vazhdojnë, por nuk ka ofruar detaje lidhur me këtë temë.

“Jemi marrë vesh që të vazhdojmë kësaj të hëne, për arsye se dialogu është lënë të vazhdohet për të njëjtat tema dhe të mos dalim publikisht dhe të themi se kush çka i tha kujt, sepse kjo nuk na ndihmon që ne të zhvillojmë një dialog konstruktiv”, ka deklaruar Mustafa .

Deklaratë të ngjashme, lidhur me çështjen e Asociacionit, pati dhënë edhe kryeministri i Serbisë, Aleksandar Vuçiq, menjëherë pas takimit të 23 qershorit.

“Disa çështje të rëndësishme kemi arritur t’i zgjidhim, por për këtë nuk mund të flas dhe marrëveshja është që për to të mos flasim në publik”, pati theksuar Vuçiq.

Megjithatë, Hashim Thaçi, zëvendëskryeministër dhe ministër i Jashtëm i Kosovës, në një intervistë dhënë medieve vendore, e cila është publikuar edhe në faqen zyrtare të internetit të Ministrisë së Jashtme të Kosovës, ka theksuar se në takimin e 23 qershorit “është arritur përparim i rëndësishëm edhe në çështjet e ndjeshme si ajo e formimit të Asociacionit të Komunave”.

“Mund të themi se e kemi çimentuar qëndrimin tonë se Asociacioni duhet të formohet në përputhje me Kushtetutën e Kosovës, me Ligjin për qeverisje lokale të Republikës së Kosovës, si dhe dokumentet tjera relevante evropiane për qeverisjen lokale”, ka theksuar zëvendëskryeministri Thaçi.

Në anën tjetër, Goran Rakiq, kryetar i komunës së Mitrovicës së veriut, i cili ka qenë i pranishëm së fundmi në Bruksel, në kuadër të dialogut Kosovë – Serbi, thotë për Radion Evropa e Lirë se marrëveshja për të mos diskutuar në publik lidhur me atë që është biseduar në Bruksel, është shkelur nga zëvendëskryeministri i Kosovës Hashim Thaçi.

“Kësaj marrëveshje i përmbahet vetëm kryeministri Vuçiq, ndërkaq që zoti Thaçi e ka shkelur këtë marrëveshje. Ai ka dalë në opinion me disa deklarata, për të cilat me përgjegjësi mund të them se nuk janë të sakta”, thotë Rakiq.

Ai shton se nuk mund të flasë për atë se për cilat çështje janë arritur përafrime të qëndrimeve ndërmjet Kosovës dhe Serbisë, lidhur me çështjen e formimit të Asociacionit të komunave me shumicë serbe. Por, sipas tij, pritjet e serbëve të Kosovës që ky asociacion të ketë edhe pushtet mbi disa segmente, janë reale.

“Unë pres që kjo Bashkësi të ketë pushtet konkret. Normalisht, ne nuk kërkojmë kompetenca që prekin diçka që nuk është ingerencë e një komune. Pra, kërkojmë kompetenca konkrete për sa i përket planifikimit hapësinor, arsimit, shëndetësisë. Do të thotë, bashkëpunimet lokale reciproke, të këtij lloji. Nuk kërkojmë asgjë më tepër dhe nuk po kërkojmë diçka të pamundur dhe të parealizueshme”, thekson Rakiq.

Në takimin e 29 qershorit, ndërmjet kryeministrave, Mustafa dhe Vuçiq, të ndërmjetësuar nga shefja e politikës së jashtme të Bashkimit Evropian, Federica Mogherini, pritet të vazhdojnë bisedimet për temat, për të cilat tashmë është diskutuar, siç janë: krijimi i Asociacionit të komunave me shumicë serbe, energjia, telekomi, dhe liria e lëvizjes.

Kryeministri Mustafa, pati theksuar se, në takimin e 29 qershorit në Bruksel, do të bëhen përpjekje për përmbylljen e disa marrëveshjeve. rel

Vuçiq: Duhen kompromise, por këtë duhet ta kuptojë edhe Prishtina

Kryeministri i Serbisë, Aleksandar Vuçiq, tha sot se në Bruksel, në vazhdimin e dialogut me Prishtinën, pala beogradase udhëton me besim të mirë dhe shpreson në arritje të zgjidhjeve.

“Shkojmë në Bruksel me besim të mirë, shpresojmë në zgjidhje, por a do të arrihen ato, nuk varet çdoherë nga ne”, u tha sot gazetarëve Vuçiq.

Mëtutje ai ka theksuar se janë të nevojshme kompromiset.

“Kompromiset janë të nevojshme, por këtë duhet ta kuptoj edhe pala tjetër”, tha Vuçiq, duke shtuar se “nuk është i kënaqur për shkak të faktit se Prishtina i ka shkelur marrëveshjet, edhe ato të para shtatë ditëve, që për marrëveshjet individuale të mos flitet publikisht”.

Për nesër në Bruksel është paraparë edhe një takim i nivelit të kryeministrave ndërmjet Kosovës dhe Serbisë, në kuadër të dialogut për normalizim, që ndërmjetësohet nga Bashkimi Evropian. rel

KOSOVA IMPORTON 80 PËR QIND TË MALLRAVE TË KONSUMIT TË PËRDITSHËM

VOAL – PRISHTINË – Pjesa dërmuese e të hyrave për arkën e buxhetit të shtetit të Kosovës vazhdon të mblidhet nga Doganat, kjo pasi Kosova vazhdon të importojë mbi 80 për qind të produkteve konsumuese.

Por, me rastin e rritjes së nivelit të integrimit të Kosovës në mekanizmat evropianë, këto të hyra do të zvogëlohen dhe disa prej tyre, madje edhe do të eliminohen.

Megjithatë, sipas ekspertëve të çështjeve ekonomike dhe atyre doganore, hendeku që do të krijohet sa i përket taksës doganore që është 10 për qind për importin e produkteve nga Bashkimi Evropian, nuk do të ketë efekte të mëdha.

“Efektet e saj nuk do të jenë jashtëzakonisht të mëdha. Sipas disa përllogaritje që janë bërë, janë 25 milionë euro në vit, e ato do të mbulohen përmes investimeve, të cilat do t’i bëjë Bashkimi Evropian nëpërmjet instrumenteve të para-anëtarësimit dhe nëpërmjet tyre do të bëhet kompensimi i atyre ‘humbjeve’ që do t’i pësojë arka e buxhetit të shtetit të Kosovës”.

“Ne, si shoqëri dhe si ekonomi, nuk duhet t’u frikësohemi integrimeve evropiane se vetëm ato gjenerojnë zhvillim”, thotë për Radion Evropa e Lirë, eksperti i çështjeve ekonomike Naim Gashi.

Pjesa dërmuese e të hyrave për arkën e buxhetit të shtetit të Kosovës, të cilat grumbullohen në pikat kufitare, nuk janë vetëm taksë doganore, shumica prej tyre janë Tatim mbi Vlerën e Shtuar në import dhe akciza.

Të gjitha këto taksa, sqaron Gashi, do të mbeten edhe pasi Kosova të nënshkruajë Marrëveshjen e Stabilizim-Asociimit dhe pasi që të bëhet pjesë e Bashkimit Evropian.

Në anën tjetër, ish-drejtori i Doganave të Kosovës, Naim Huruglica, thotë për Radion Evropa e Lirë se mbledhja e të hyrave për arkën e shtetit nga Doganat, aktualisht, është mënyra e vetme.

“Realisht, kjo ka qenë zgjidhja e vetme. Në një rrethanë ku 80 për qind e asaj që ne e konsumojmë janë mallra nga importi, nuk ka pasur një zgjidhje tjetër vetëm se të bëhet kjo. Gjithsesi, kjo ka qenë më e lehtë sepse shtrirja apo mbledhja e tatimeve në brendi, është shumë më e komplikuar sesa ajo që bëhet nga autoriteti doganor në kufi”, sqaron Huruglica.

Por, sipas Huruglicës, gradualisht duhet të ketë një shtrirje tatimore në brendi dhe jo shteti të varet aq shumë nga të hyrat që futen në kufi.

Fuqizimi i Administratës Tatimore të Kosovës, shton Huruglica, është thelbi i një shtrirje më të mirë të kontrollit tatimor.

“Duhet të gjendet një mundësi që përmes masave stimuluese të nxitet zhvillimi ekonomik i vendit, punësimi dhe duke i nxitur këto, gradualisht do të krijohet një bazë më e mirë tatimore në brendi. Po ashtu, duhet të luftohet informaliteti, sepse vlerësohet se ka informalitet në brendi nga shërbimet ose nga veprimtaritë e caktuara, ku nuk paguhen tatimet e mjaftueshme”, thekson Huruglica.

Edhe eksperti i çështjeve ekonomike, Naim Gashi, thekson faktin se Kosova duhet të investojë në kapacitetet prodhuese dhe shërbyese, që të jetë konkurrente fillimisht me rajonin dhe pastaj me vendet tjera të Bashkimit Evropian.

“Ne mund të jemi konkurrent me prodhime bujqësore, ne mund të jemi konkurrent me prodhimin e energjisë elektrike, pasi  kemi kapacitete të mëdha, mund të jemi konkurrent me miniera dhe minerale dhe ne duhet ta gjejmë atë sektor ekonomik ku nuk është konkurrenca e ashpër nga vendet e Bashkimit Evropian”, shton Gashi.

Buxheti i Kosovës, i cili mbushet nga Doganat dhe Administrata Tatimore e Kosovës për vitin 2015 është 1.5 miliardë euro.

A po lëkundet toleranca ndërfetare në Kosovë

Ndryshku ka shlyer shkronjat e mbiemrit dhe vitin e rënies në kryqin e varrit të dëshmorit Gjokë Ndrecaj. Ende shihet emri dhe viti i lindjes shkruar me të bardhë në pjesën e sipërme vertikale dhe të djathtën horizontale të simbolit të sakrificës të të krishterëve.

Tri herë janë zhvarrosur eshtrat e të rënit nga Biteshi i Gjakovës para se të varroseshin pranë bashkëluftëtarit Shaban Ukë Sejfijaj, nga Gramaqeli i Deçanit.

“Kanë qenë si vëllezër edhe në luftë. Shqiptarë”, thekson babai i Shabanit, Ukë Sejfijaj, para varreve të ushtarëve të shtabit të Gramaqelit. Në homazhe i janë bashkuar të mërkurën edhe shtatë burrat e Ndrecajve, të gjithë ish-ushtarë të Ushtrisë Çlirimtare të Kosovës, përfshirë dy vëllezërit Martin e Mark, si dhe nipin Pal Ndrecaj të Gjokës, shkruan sot “Koha Ditore”.

Gjoka ishte plagosur para shtëpisë së Ukës. “E kanë zënë të plagosur në xhami”, thekson Martini, në duart e të cilit ka dhënë shpirt Shabani, i plagosur nga një granatë në shkollën e fshatit.

“Te na kurrë nuk kemi pas kurrfarë dallimi, a është katolik a mysliman. Krejt shqiptarë”, thekson Uka. “Kemi hi e kemi dalë. Gjithmonë dyert çelë i kanë”.

Rrugës për te varrezat, Pali kujton një rast të para dy javësh kur një bashkëfshatar i krishterë “ka ikë” një vajzë myslimane nga Peja. “Por fill të nesërmen janë pajtu”, rrëfen Pali.

Rreziku prej “erërave të ndryshme”

Debati për tolerancën ndërfetare të shqiptarëve është rikthyer së fundi me tone goxha të ashpra pas protestave të së hënës para Komunës së Drenasit, që rezultuan me pezullimin e punimeve për ngritjen e rrethojës në një hapësirë të shpronësuar për varreza të shqiptarëve të besimit katolik në Llapushnik, ku synohet të ngrihet një kishë.

Pos që i kontestohet ligjshmëria vendimit të Komunës për shpronësimin e këtij lokacioni, në Llapushnik, ky lokacion ka simbolikë, ngaqë 16 vjet më parë aty ishte zhvilluar një betejë, në të cilën pati të rënë. Ata që kundërshtojnë vendimin, thonë se nuk janë edhe kundër kishës.

Prandaj kanë kërkuar që për ngritjen e varrezave dhe të kishës të përcaktohet një hapësirë tjetër. Besimtarët katolikë e kanë pritur me frikë këtë. E kanë interpretuar si kërkesë për shpërnguljen e tyre. KMDLNJ-ja ka kërkuar hetim për shkelësit e lirive fetare në Llapushnik.

James Hooper: Dështimi i votës për Gjykatën dëmton rëndë marrëdhëniet me SHBA

Një ekspert i çështjeve të Ballkanit thotë se dështimi i miratimit të legjislacionit për Gjykatën e Posaçme për Krime Lufte në Kosovë, dëmton rëndë marrëdhëniet dyplaëshe me Shetet e Bashkuara. James Hooper, Drejtor Menaxhues i Grupit për të Drejtën Ndërkombëtare Publike dhe Politikat, i tha dje në një intervistë Zërit të Amerikës se hapat e Kosovës drejt integrimit euro-atlantik rrezikohen nga ky dështim. Ai i tha koleges Keida Kostreci se shpreson që Kosova të gjejë një mënyrë për ta votuar përsëri legjislacionin, pasi sipas tij në të kundërt do të fillonte destabilizimi i Kosovës.

Zëri i Amerikës: Zoti Hooper, sot parlamenti i Kosovës nuk arriti të miratojë legjislacionin për ndryshimet kushtetuese që do të bënin të mundur ngritjen e Gjykatës së Posaçme për Krimet e Luftës. Çfarë do të thotë kjo, sipas mendimit tuaj?

James Hooper: Kjo i dëmton rëndë marrëdhëniet dypalëshe mes Shteteve të Bashkuara dhe Kosovës. Mendoj se kjo është shumë serioze dhe shpresoj që tani të mbizotërojnë mendjet më të ftohta. E kuptoj që ishte një vendim jashtëzakonisht i vështirë që u duhej të merrnin kosovarët dhe nuk dua ta minimizoj. Ishte një nga vendimet më të rëndësishme që u është dashur të merrnin që kur mbaroi lufta në vitin 1999, sepse gjykata është konsideruar nga shumë vetë në Kosovë si një proces që ngre pyetje për legjitimitetin e luftës, legjitimitetin e Ushtrisë Çlirimtare të Kosovës dhe kjo ka shkaktuar një ankth dhe pakënaqësi të konsiderueshme mes ish-anëtarëve të UÇK-së dhe mes qytetarëve të Kosovës në përgjithësi, të cilët e kanë parë këtë si një kërcënim për të ardhmen e tyre, që vë në pikëpytje legjitimitetin e të qenurit shtet. Ajo që mund të them është se Kosova ka ndërmarrë kaq shumë hapa pozitivë, si fitorja e luftës me NATO-n si partnere në vitin 1999, shpallja e pavarësisë, vendimi i Gjykatës Ndërkombëtare. Gjatë gjithë këtyre hapave Shtetet e Bashkuara kanë qenë gjithnjë në krah të Kosovës.  Është bindja ime që Kosova ka grumbulluar shumë kapital përsa i takon vullnetit të mirë nga komuniteti ndërkombëtar. Mund të thuhet që kjo u konsolidua nga marrëveshja e para dy viteve në Bruksel mes Serbisë dhe Kosovës që krijoi mundësinë për hedhjen e hapave përpara. E gjithë kjo e ka vënë Kosovën në një situatë që nuk i duhet të shqetësohet për lirinë e tyre, për pavarësinë e tyre, nuk kërcënohet nga ndonjë sulm, që mund të përqendrohen tani tek ndërtimi i vendit, i shoqërisë së tyre, zgjidhja e problemeve të shoqërisë. Por kjo (ky vendim) do të ishte një kthim prapa, sepse e kthen debatin – dhe mendoj në një mënyrë emocionale për Kosovën – tek legjitimiteti i saj si shtet tek pavarësia dhe (shqiptarët e Kosovës) do të kërkojnë mbështetjen e shqiptarëve në gjithë rajonin për këtë çështje.

Unë u befasova vërtet që me gjithë inkurajimin që Shtetet e Bashkuara i dhanë Kosovës për ta ndihmuar që të arrinte të merrte një vendim që gjithkush në Uashington e kuptonte sesa i vështirë ishte, pra pavarësisht nga kjo Asambleja nuk arriti të siguronte shumicën e nevojshme prej dy të tretash.

Zëri i Amerikës: Në këtë pikë, a mendoni se mund të bëhet diçka për të ndryshuar vendimin e sotëm dhe cili do të ishte sugjerimi juaj?

James Hooper: Nuk besoj se është vonë. Ky nuk duhet të jetë votimi i fundit dhe përfundimtar për këtë çështje i banorëve të Kosovës përmes deputetëve që i përfaqësojnë. Unë do t’u bëja thirrja autoriteteve të gjejnë një mënyrë për të patur një votim të ri. Të mos nxitohen, ta shqyrtojnë edhe një herë situatën, të analizojnë dëmin që do t’i shkatonin marrëdhënieve me Shtetet e Bashkuara. Ky votim në këtë formë, do t’u shkaktonte dëm serioz marrëdhënieve dypalëshe me Shtetet e Bashkuara në se nuk do të korrigjohej. Kosova duhet të gjejë një rrugë, të gjejë një zgjidhje që Gjykata të krijohet dhe në të njejtën kohë të ruhen marrëdhëniet me Shtetet e Bashkuara. Nuk dua në asnjë mënyrë të minimizoj rrezikun që vendimi i së premtes përmban për marrëdhëniet e Shteteteve të Bashkuara me Kosovën. Ky ishte një vendim serioz që do të shkaktonte dëme të mëdha.

Zëri i Amerikës: Më konkretisht, cilat mendoni se do të jenë pasojat jo vetëm në marrëdhëniet dypalëshe me Uashingtonin, por edhe me kryeqytetet evropiane që e kanë mbështetur Kosovën dhe tek e ardhmja e saj?

James Hooper: Dhe sidomos Gjermania, mes vendeve mike evropiane. Gjermania ka ndërmarrë përpjekje serioze dhe të vazhdueshme, për të ndërmjetësuar marrëdhënie më të mira mes Serbisë dhe Kosovës, që marrëveshja për Veriun të zbatohet në mënyrë konstruktive dhe për të inkurajuar Serbinë të pranojë hyrjen e Kosovës në Kombet e Bashkuara, gjë që unë mendoj se është diçka me rëndësi kritike që duhet të ndodhë. Nëse ky votim do të lejohet të qëndrojë në fuqi, kjo do të ishte një hap i madh prapa për marrëdhëniet me Evropën, pa folur për SHBA. Siç e kam përmendur, ky do të ishte një hap prapa në marrëdhëniet me SHBA, do të ishte një humbje e besimit në këto marrëdhënie dhe sidomos në Kongres. Do të ishte më e vështirë për miqtë e Kosovës në Kongres ta mbështesnin atë me të njëjtën forcë si në të kaluarën. Por në Evropë, kjo do të dëmtonte përpjekjet për ta sjellë Kosovën më afër Bashkimit Evropian dhe për të krijuar shtegun drejt anëtarësimit. Është gjithashtu një hap prapa për marrëdhëniet e Kosovës në përpjekjet për të hyrë në NATO, gjë që mendoj se ka rëndësi kritike. Prandaj mendoj se për hir të marrëdhënieve të Kosovës me SHBA dhe me Evropën, për hir të së ardhmes së saj në NATO dhe në BE, është e nevojshme që ajo të ndërmarrë një votim të ri dhe ta miratojë ligjin.

Zëri i Amerikës: Alternativa tjetër, për të cilën Kosova ishte paralajmëruar që të mos ta lejonte të ndodhte, është ngritja e një gjykate të tillë nga Këshilli i Sigurimit, sipas një propozimi rus. Çfarë do të thoshte kjo – nëse nuk zgjidhet çështja e alternatives që dështoi dje – dhe alternativa e Këshillit të Sigurimit mbetet e vetmja mbi tryezë?

James Hooper: Ky do të ishte një skenar edhe më i keq se sa ta miratonin krijimin e gjykatës. Kjo do të thotë në fakt që Shtetet e Bashkuara të bëhen partnere me Rusinë për një Gjykatë të krijuar nga Këshilli i Sigurimit të OKB-së, që nuk do të shihej si legjitim nga banorët e Kosovës. Ndërsa Gjykata  që do të krijohej nga vetë parlamenti, do të gëzonte mbështetjen e plotë të Shteteve të Bashkuara duke u siguruar që ajo do të ishte një gjykatë e drejtë përsa u përket procedurave dhe jo një gjykatë politike. Mendoj se Shtetet e Bashkuara duhet të besohen për këtë. Ndërsa krijimi i gjykatës nga Këshilli i Sigurimit do të ishte fillimi i një procesi që shënon kthim pas, ku gjerat përkeqësoshen dhe alternativat për Kosovën do të keqësohen. Në se kjo Gjykatë, që mbështetet nga Shtetet e Bashskuara nuk pranohet, si do ta shikonin kosovarët gjykatën e mbështetur nga Këshilli i Sigurimit….

Zëri i Amerikës: Ndoshta ata nuk duan krijimin e asnjë gjykate, por ç’do të ndodhte në se Gjykata krijohet pa dëshirën e tyre (Kosovës)?

James Hooper: Në se Gjykata nuk miratohet, në se kosovarët këmbëngulin që të mos pranojnë asnjë gjykatë,  as atë të tanishmen, as atë të Këshillit të Sigurimit, e cila po ashtu do të mbështetej nga Shtetet e Bashkuara por në të cilion Shtetet e Bashkuara nuk do të luanin dot më një rol konstruktiv, pasi kur gjerat kalojnë në Këshillin e Sigurimit,  ka edhe aktorë të tjerë të përfshirë, sidomos Rusia, kjo do të shënonte kthim pas për Kosovën dhe në vend që të gjendeshin forma për t’i çuar përpara marrëdhëniet me Evropën, me NATO-n, forcimin e ekonomisë, atëhere do të kishim një skenar kur lufta për pavarësinë do të hynte në kanale ligjore, emocionet do të shtoheshin, njerëzit do të kërkonin gjeste simbolike, vendime simbolike, do ta vishnin veten me flamur, nacionalizmi do të shtohej në Kosovë dhe në situata të tilla, nuk ka ecje përpara, ka kthim pas. Në se situata nuk ndryshon unë shoh fillimin e destabilizimit të Kosovës. Dhe kjo do të ishte një pasojë shumë serioze.

Vrasja pa gjyq e Ramiz Hoxhës dhe arrestimi i aktivistëve të LDK-së

Ramiz Hoxha është ekzekutuar pa gjyq “në emër të popullit”. Fletekzekutimi i tij është shkruar me dorë, shkruan sot Koha Ditore. Përgjegjësinë e ka marrë Ushtria Çlirimtare e Kosovës.

“Ushtria Çlirimtare e Kosovës, Drejtoria e Shërbimit të Policisë Sekrete, në emër të popullit shpall këtë fletekzekutim: për shkak të bashkëpunimit me okupatorin, ndjelljes së frikës, panikës dhe urrejtjes, në emër të popullit shqiptar dhe në emër të luftës tonë çlirimtare dënohet me vdekje Ramiz Hoxha – Bellanicë si tradhtar i kombit. Fati i tillë do t’i pret çdo tradhtar tjetër”, shkruan në fletekzekutimin që i jepte fund jetës së Ramiz Hoxhës më 2 tetor 1998.

I ndjeri ishte arrestuar në xhaminë e fshatit të tij në Bellanicë nga persona të maskuar dhe me uniforma të UÇK-së. Ishte dërguar në një vend tjetër dhe ishte ekzekutuar si bashkëpunëtor i kryetarit të Lidhjes Demokratike të Kosovës, Dega në Malishevë, Jakup Kastrati, dhe i nënkryetarit Cenë Desku.

Pak ditë më vonë ishin arrestuar edhe këta dy aktivistë të LDK-së.

ISA MUSTAFA – DO TA THEMELOJMË GJYKATËN SPECIALE

VOAL – PRISHTINË – Pavarësisht dështimit për ta votuar dje në Kuvend themelimin e Gjykatës Speciale, kryeministri Isa Mustafa është zotuar se Kosova do të përmbushë detyrimet ndërkombëtare.

Kreu i Qeverisë, nëpërmjet një postimi në Facebook, ka thënë se Kosova do ta themelojë patjetër Gjykatën Speciale.

“Qeveria e Republikës së Kosovës do të angazhohet që të përmbushim detyrimet ndërkombëtare që kanë të bëjnë me themelimin e Gjykatës Speciale. Jemi përcaktuar që të ndërtojmë një shtet me perspektivë evropiane dhe euroatlantike. Në këtë proces ne do të tregojmë seriozitetin tonë për përmbushje të marrëveshjeve ndërkombëtare të aprovuara në Kuvendin e Kosovës, e të cilat kanë fuqi të veçantë kushtetuese. Pas konsultimeve me ekspertë juridikë, për sot kam ftuar mbledhjen e Qeverisë për të proceduar me zgjidhje të caktuara”- ka shkruar Mustafa në Facebook.

Mustafa fton deputetët të votojnë Gjykatën Speciale

Kryeministri i Kosovës, Isa Mustafa, ka ftuar deputetët e Kuvendit që të votojnë ndryshimin kushtetues për themelimin e Gjykatës Speciale për Krime Lufte në Kosovë.

Mustafa ka thënë se gjykata do të gjykojë individët dhe “jo luftën e drejtë të Ushtrisë Çlirimtare të Kosovës”.

Kuvendi ka nisur tashmë seancën për miratimin e ndryshimit kushtetues.

Gjykata në fjalë do të hetojë dyshimet që ka ngritur një raport i Këshillit të Evropës për krime lufte të disa ish-pjesëtarëve të UÇK-së ndaj disa civilëve serbë, gjatë luftës së fundit.

Në seancë raportohet se po marrin pjesë edhe delegacionet e ambasadave të huaja.

 

DASH – PROBLEMATIKAT DHE SFIDAT E SHUMTA TË GJENDJES SË TË DREJTAVE TË NJERIUT NË KOSOVË

Raporti i Departamentit amerikan të Shtetit për të drejtat e njeriut në botë gjatë vitit 2014 përmban edhe pjesën për Kosovën. Në vijim, një përmbledhje e çështjeve kryesore.

Raporti vë në dukje se gjatë vitit 2014 ka vazhduar Dialogu i Brukselit ndërmjet Beogradit dhe Prishtinës, për çështje si menaxhimi i kufijve, doganat, tatimet, lëvizjen e lirë, njohja reciproke e diplomave, përfaqësimi dhe bashkëpunimi rajonal, përfshirja e ish-forcës policori të ministrisë së brendshme serbe në policinë e Kosovës, zgjedhjet, rrjetet e transmetimit energjitik, regjistrat civilë dhe të dhënat e kadastrave. Strukturat administrative në veri të Kosovës u integruan pjesërisht me administratën kombëtare, ndërkohë që mbeten në pritje marrëveshjet për Shoqatën e Bashkive Serve, telekomunikacionit dhe integrimin e sistemit të drejtësisë.

Problemi më i madh i të drejtave të njeriut konsiderohen veprime të caktuara për të bllokuar normalizimin, si p.sh. vendosja e barrikadave në Mitrovicë nga zyrtarë lokalë serbë të Kosovës, si dhe kufizimi i të drejtave të lirisë së lëvizjes dhe të lirisë së besimit të pelegrinëve të kishës ortodokse serbe.

Aspekti i dytë më shqetësues është dhuna sociale dhe diskriminimi ndaj minoriteteve etnike, personave me aftësi të kufizuara, anëtarët e komuniteteve lezbike, gei, biseksualë dhe transgjinorë (LGBT).

Problemi i tretë që theksohet është dhuna në familje ndaj grave.

Kosova pati edhe probleme të tjera me të drejtat e njeriut, si p.sh. dhunë policore të ushtruar ndaj personave nën arrest, kushte të këqija fizike në burgje, korrupsion në sistemin e burgjeve dhe periudha të gjata paraburgimi dhe paefektshmëri  të gjyqësorit, intimidim të mediave nga zyrtarët publikë dhe elementë kriminalë, kufizime në lirinë e besimit dhe vandalizim i pronave fetare, progres të kufizuar në rikthimin e personave të zhvendosur nga shtëpitë e tyre, trafikimi i qenieve njerëzore, kushte të dobëta në objektet e kujdesit për shëndetin mendor, tensione sporadike etnike, dhe punësim të të miturve.

Megjithë hapat e ndërmarrë nga qeveria për të hetuar dhe ndëshkuar zyrtarët abuzues në shërbimet e sigurisë ose gjetiu në qeveri, nga shumë njerëz mendohet se zyrtarë të lartë u përfshinë në korrupsion pa u ndëshkuar.

Raporti përmend vrasjet në muajin janar të Dimitrije Janicijevic, anëtar i asamblesë komunale të Mitrovicës, dhe në muajin qershor të Elvis Pista, kandidat për parlament në Rahovec. Gjithashtu, autoritetet kryen gjatë vitit arrestime në lidhje me vrasjen e vitit 2011 të oficerit të policisë Enver Zymberi, dhe fillimin e proçesit përkatës gjyqësor. Në muajin maj EULEX-i arrestoi për terrorizëm dy të dyshuar për vrasjen në vitin 2004 të një oficeri të UNMIK-ut dhe të një oficeri të policisë gjatë trazirave të shqiptarëve të Kosovës që protestuan kundër serbëve të Kosovës. Në muajin korrik një prokuror i task-forcës së posaçme hetimore njoftoi se ka prova të mjaftushme për të ngritur akuza ndaj disa ish-zyrtarë të lartë të ish-UÇK-së për krime lufte dhe për krime ndaj njerëzimit të kryera në vitin 1999. Për ngritjen e akuzave pritet ngritja e një gjykate të posaçme, siç parashikohet në dokumentat që zgjasin mandatin e EULEX-it. Ndërkohë, EULEX dhe prokurorët vendas vazhduan të hetojnë raste të konfliktit 1999-2000. Deri në muajin tetor, zyra e prokurorit të posaçëm po hetonte 164 raste krime lufte, prej të cilave për 130 raste hetimi drejtohet nga EULEX-i dhe 34 nga prokurorë vendas. Raporti përmend gjithashtu arrestimin e Oliver Ivanovic dhe katër personave të tjerë për krime të kryera në 1999-2000, të cilët vazhdojnë të jenë në proçes gjyqësor për krime lufte. Në muajt maj dhe qershor, u arrestuan 17 anëtarë të ashtuquajturit grupi Drenica, ish-anëtarë të UÇK-së, me akuza për vrasje dhe terrorizëm. Ndër të arrestuarit janë zyrtarë të lartë qeveritarë me lidhje të ngushta me PDK-në. EULEX-i gjithashtu ngriti akuza për intimidim të dëshmitarëve dhe shkelje të sekretit hetimor ndaj gazetarit të RTK-së, Milaim Zeka. Në muajin shtator, anëtari i parlamentit Fatmir Limaj dhe nëntë persona të tjerë u paraqitën në Gjykatën e Apelit pasi prokurorët e EULEX-it apeluan shfajësimin e tyre të shtatorit 2013 në lidhje me krime lufte të kryera në vitin 1999. Në tetor dhe në nëntor disa serbë të Kosovës u shpallën të pafajshëm për krime të ndryshme lufte, dhe një gjykatës i EULEX-it u citua të jetë shprehur se shkaku ishte dështimi i hetimit të duhur.

Sipas Kryqit të Kuq, deri në muajin nëntor, numri i personave të zhdukur gjatë konfliktit 1998-99, ishte 1655, nga të cilët mendohet se 70% janë shqiptarë të Kosovës dhe 30% serbë të Kosovës dhe minoritete të tjera. Në muajt gusht-shtator, EULEX-i mori eshtrat e 52 personave tl zhvarrosur nga një varr masiv në Raska, të Serbisë, dhe prokuroria serbe urdhëroi gërmime të reja në ish-stacion policor në një lagje të Beogradit, ku janë gjetur më parë eshtrat e 900 shqiptarëve të Kosovës. Një verifikim i kryer në një fshat të Gjakovës, në prani të ekspertëve të EULEX-it dhe të qeverisë së Serbisë, rezultoi negativ për prani eshtrash.

Raporti njofton për rritje të përgjithshme të keqtrajtimit fizik dhe verbal të të burgosurve në burgun e Dubravës, dhe se pavarësisht arritjes së standarteve ndërkombëtare, shumë burgje vazhdojnë të kenë probleme domethënëse. Gjithashtu, qendra të paraburgimit, si në Gjilan dhe në Prishtinë, nuk plotësojnë standardet minimale, dhe ku të paraburgosurit, përfshirë gra dhe të mitur, qëndrojnë së bashku.

Sistemi hetimor dhe gjyqësor vazhdon të përjetojë përpjekje për të inflencuar proçeset, ndërkohë që korrupsioni ka vazhduar të jetë i përhapur dhe sistemi gjyqësor të jetë në përgjithësi i paefektshëm, me më shumë se 100 mijë raste në pritje gjykimi, 100 mijë të tjera në pritje ekzekutimi vendimesh, dhe 200 mijë të tjera në pritje vendimi.

Individë të ndryshëm, zyrtarë publikë, politikanë dhe biznesmenë u përpoqën gjatë vitit të frikësojnë përfaqësuesit e mediave, ndërkohë që mediat patën vështirësi të merrnin informacion nga qeveria. Vazhdoi të ketë raste dhune ndaj gazetarëve, si plagosja me thikë në muajin tetor e një gazetari të Klan Kosova TV, apo plagosja në muajin qershor e tre gazetarëve të AFP-së dhe një gazetari të Koha Ditore gjatë protestave në Mitrovicë. Autoritetet vazhduan të hetojnë kërcënime të raportuara ndaj gazetarëve kritikë ndaj islamit radikal.

Raporti përmend gjithashtu çështjen shqetësuese të të zhvendosurve, dhe njofton se deri në muajin se gjatë vitit ishin rikthyer 440 persona në Kosovë, ndërkohë që buxheti i caktuar për strehimin e tyre konsiderohet i pamjaftueshëm.

Kosova vazhdon të jetë pikë tranziti për azilkërkues, ndërkohë që në gjysmën e parë të vitit 2014 u ripranuan 2147 azilkërkuesish të deportuar nga Evropa Perëndimore.

Zgjedhjet e 8 qershorit vlerësohen se patën nivelin më të ulët të manipulimeve që nga pavarësia e Kosovës. Në përgjithësi, niveli i përfaqësimit të grave dhe minoriteteve mbetet nën nivelin e duhur në pozicione vendimmarrëse të strukturave lokale, dhe se gjithashtu nuk janë shpërbërë krejtësisht institucione paralele të paligjshme në enklavat me popullsi serbe. Në përgjithësi, minoritetet përballen me nivele të ndryshme diskriminimi institucional dhe shoqëror për sa i përket punësimit, shërbimeve sociale, përdorimit të gjuhës, lirisë së lëvizjes etj. Rastet e dhunës ndaj serbëve të rikthyer kanë vazhduar. Romët e Kosovës, dhe komunitetet ashkali dhe egjiptiane e vuajnë më shumë këtë diskriminim, dhe madje shpesh nuk kanë akses në kushte bazë higjienike, në kujdes shëndetësor, dhe në arsim. za

POEMË KUSHTUAR BARDHYL AJETIT – KUR VJEN QERSHORI VRITET BARDHYL AJETI – NGA ELIDA BUÇPAPAJ

Më 3 qershor të vitit 2005, ndërsa kthehej rrugës për në shtëpi, i bënë atentat gazetarit të Bota Sot BARDHYL AJETI. I plagosur rëndë, Bardhyl Ajeti vdiq në Milano të Italisë më 25 qershor 2005. Vrasësit dhe ideatorët e krimit vazhdojnë ta sfidojnë lirinë e shprehjes dhe fjalës në Kosovë. Edhe kjo vrasje politike sikur të tjerat ende nuk është zbardhur. Politikanët premtojnë sa herë që ka zgjedhje, por harrojnë fill, sa fitojnë kolltukun duke mashtruar popullin.

Kur vjen qershori
ikin mëritë,
groposen
dyshimet,
varrosen
pezmet

kur vjen qershori
gjumi bëhet zgjim
zgjimi
ngjizje dashurie
që merr me fluturim
fushat e mbjella
dhe bëhet grurë
për bukën e bardhë
që mbush tavolinat
e shtëpive
për të ngopur
barkun e atyre fëmijëve
që Helàs,
nuk i lanë
të lindin kurrë

kur vjen qershori
zemrat puqen
si sqepat
e dallandysheve
që ndërtojnë folenë
në strehën e shtëpisë
ku të pret
nëna
kur ikim dhe kthehemi
sa herë herë që vjen Qershori…

kur Qershori vjen
mendimet e zeza
marrin arratinë
duke i ikur msheftas
rrugës plot
metafora
që të afrojnë
pragun e derës të shtëpisë
ku si Shën Mari
qëndron përjetësisht
Nëna

kur vjen qershori
fëmijët shumohen si
fijet e barit që ndrisin
prej xixëllojve
të syve të njeriut
gjatë një përqafimi dehje
me trupin e jetës
në çastin më të bukur
që nuk guxon ta prekë askush
qoftë ky edhe vetë djalli

kur vjen qershori –
askush nuk beson se vjen vdekja
me shkëmbinj shiu –
sepse në qershor shiu është
lot gëzimit i agut të manushaqtë
që i bën menjëherë nuset nëna
dhe reinkarnon jetën

askush nuk dyshon
se mund të vdesë në qershor
sepse në qershor
dyshimet zhduken
si jehonat e zërit
që përplasen
si krah zogjsh nëpër
foletë e fshehura degëve
të rilindura të pyllit…
tutje larg nëpër shpatullta e malit…

aq më pak Bardhy Ajeti
nuk besonte kurrë
se mund të vdiste në qershor
se mund t’i vinte vdekja
në qershor
me sytë e zgavërta të djallit
në sfurkun e vetmisë
sepse ishte besimtar i lirisë
dhe liria nuk të lë kurrë vetëm,
se liria të shpëton,
futet në zjarr për ty vetëm
të të heqë
prej thonjve të vdekjes…

gjithçka mund të bënte në qershor Bardhyl Ajeti
vetëm gjëra që e lidhnin
pazgjidhshmëerisht me jetën
por të vdiste jo,
vetëm për të vdekur
nuk i shkonte mendja kurrë
Bardhyl Ajetit
aq më tepër kur qershori
për shqiptarët e shumëzon si fëmijët
dëshirën
për ta jetuar jetën

Bardhyl Ajeti mendonte
se nuk ishte koha e tij për të vdekur
kur posa kishte jetuar dehjen e 27 qershorëve
dhe ishte në hyrje
në qershorin e 28  të jetës së tij
që mbeti i vrarë –
pa stinën e verës,
vjeshtën dhe dimrin,
që mbeti i varë
në mes të rrugës,
kur metaforat e shpresës
si gurë kilometrikë
ia largonin vetminë
që e la të vritet në mes të rrugës
që e çonte tek shtëpia
kur e pret nëna
edhe sot e kësaj dite
e mbuluar
nga velloja e pikëllimit
kur dëgjon krakitjen
e cfurkut të djallit
që edhe sot e kësaj dite
në mënyrë të llahtarëshme
hedh vallen
mbi njollat e gjakut të Bardhylit
që nuk i lan dot shiu i fajit…

kur vjen Qershori…
ajme
vritet Bardhyl Ajeti

2006

Shpend Balija: Investitorët ka rrezik të ikin nga Kosova

“Mungesa e qasjes serioze ndaj investitorëve të huaj të cilët e kanë shtrirë kapitalin e tyre në Kosovë ka rrezik largimin e tyre nga vendi ynë. Largimi i këtyre investitorëve do ta degradojë edhe më tutje nivelin e rritjes ekonomike që Kosova e ka pasur deri tani”, thotë në një intervistë për Radion Evropa e Lirë, drejtori Ekzekutiv i Këshillit të Investitorëve Evropian, Shpend Balija.

Radio Evropa e Lirë: Zoti Balija, autoritetet në Kosovë në fokus kanë tërheqjen e investitorëve të huaj, por çfarë është duke bërë qeveria për të mbajtur këta investitorë që tani më e kanë të shtrirë kapitalin e tyre në Kosovë?

Shpend Balija: Ekziston çdo herë një diskutim i imagjinuar në kuptimin se flasin për investitorë potencial, t’i joshin investitorët e huaj, mirëpo këtu në vendin tonë kemi kompani shumë serioze, shumë kredibile, të cilat kanë sjellë me qindra miliona euro kapital dhe gjithashtu punësojnë mijëra njerëz e të cilat po ballafaqohen me probleme shumë të mëdha.

Kërkesat e tyre ne po mundohemi përmes Këshillit të Investitorëve Evropian t’i adresojmë te qeveria dhe të jemi më afër qeverisë që të bashkëpunojmë dhe t’i kalojmë këto sfida.

Por, sa e kam vërejtur unë deri më tani, nuk ka një qasje serioze të qeverisë për investitorët aktual që janë në Kosovë. Ata po vazhdojnë të ballafaqohen me probleme dhe askush nuk i dëgjon problemet e tyre. Në deklaratat e krerëve të institucioneve të Kosovës ka interes që të joshin investitorët e huaj, por ambasadori më i mirë që mund të dërgojë një mesazh pozitiv janë kompanitë që janë këtu duke operuar tani e sa vite.

Nëse ato janë profitabile dhe kanë sukses, atëherë edhe investitorët tjerë do të vinë në Kosovë të investojnë.

Radio Evropa e Lirë: Mosinteresimi i Qeverisë së Kosovës në njëfarë mënyrë për investitorët e huaj që tani janë në Kosovë, a mund të ndikojë që këto kompani të largohen nga Kosova?

Shpend Balija: Sigurisht kjo do të ndikojë dhe është një pikë e rëndësishme që e cekët, për shkak se largimi i këtyre investitorëve e degradon më tutje nivelin e rritjes ekonomike që e kemi pasur, një rritje pozitive, por megjithatë Kosovës i duhet një rritje ekonomike shumë më e madhe.

Sipas Bankës Botërore ne kemi nevojë për rritje dyshifrore për disa vite, vetëm të jemi të barabartë me vendet e rajonit. Prandaj një rritje dy apo tre për qind nuk i mjafton Kosovës, dhe kompanitë vendore nuk mund ta zhvillojnë vendin pa investimet e huaja kapitale të cilat vinë nga vendet tjera, prandaj largimi i tyre është mjaft shqetësues.

Mendoj se ministritë relevante, trupat rregullativ dhe organizatat tjera nuk janë të koordinuara mes vete. Nëse Ministria e Tregtisë dhe Industrisë thotë që kemi rënie të investimeve të huaja dhe po dëshirojmë t’i joshim investitorët, atëherë Ministria e Financave çfarë po bën që t’ju krijojë kushte investitorëve këtu?

Tani kemi pakon fiskale që do të hyjë në fuqi, ndoshta në këtë vit apo vitin tjetër dhe problemi ekziston që një rritje e Tatimit mbi Vlerën e Shtuar prej 16 përqind në 18 përqind dhe një zbritje e TVSH-së për disa produkte bazë në 8 për qind nuk krijon kushte të favorshme për bizneset.

Radio Evropa e Lirë: Cilët janë ata investitorë evropian që tani janë në Kosovë?

Shpend Balija: Investitorët që ne i përfaqësojmë si Këshill i Investitorëve Evropian, janë kompani shumë kredibile si IPKO, Pro Credit Bank, NLB, Raiffeisen Bank, kompani tjera që merren me prodhim si Ferronikel, Sharrcem, kompani të sigurimeve, kompani farmaceutike nga Zvicra, kompani të shërbimeve financiare.

Të gjitha këto kompani dhe shumë të tjera janë të përfshira në Këshillin e Investitorëve Evropian. Kjo është një platformë ku Qeveria përmes nesh mundet ta dëgjojë zërin e këtyre investitorëve.

Radio Evropa e Lirë: Shihet qartë se investimet e huaja në Kosovë kanë shënuar rënie gjatë viteve të fundit, nga afër 500 milion euro sa kanë qenë në vitin 2007 në afër 200 milion euro në vitin 2014. Ku po qëndron problemi?

Shpend Balija: Sfidat kryesore të cilat çdo herë theksohen, siç është mungesa e sundimit të ligjit, mosefikasiteti i gjykatave në trajtimin e lëndëve ekonomike, korrupsioni, janë natyrisht probleme.

Por, unë do ta potencoj se përkundrazi këtyre problemeve Kosova mund të zhvillohet. Në asnjë shtet nuk ka pasur ndalje të korrupsionit të menjëhershëm, por çka është e rëndësishme, institucionet qeveritare, agjencitë dhe mekanizmat e pavarura të jenë të koordinuara.

Politikat fiskale duhet të jenë stimuluese në kuptimin ta nxisin prodhimin, ta nxisin zhvillimin e këtyre kompanive dhe ato pastaj do të paguajnë tatim në të ardhurat e tyre, por mos t’i tatojmë fillimisht, kur ata kanë kosto të mëdha të investimit.

Unë i bëj apel qeverisë dhe ministrive në përgjithësi, të jenë të koordinuara në mënyrë që të mbrojmë investitorët që i kemi dhe t’u krijojmë ambient afarist të favorshëm.

Radio Evropa e Lirë – Lokacioni “problematik” i varrezave katolike në Llapushnik

Punimet për rrethimin e një vendi për varreza të komunitetit të besimit katolik në fshatin Llapushnik të komunës së Drenasit janë pezulluar, pas reagimeve të disa banorëve të kësaj ane.

Në ketë fshat, i cili ndodhet rreth 30 kilometra larg Prishtinës, janë afërsisht 20 shtëpi me mbi 50 banorë që i takojnë komunitetit katolik.

Ky komunitet pohon se ende nuk ka një vend për të kryer ritet fetare.

Pavarësisht faktit se autoritetet e komunës së Drenasit, kanë lejuar fillimin e ndërtimit të një vendi për varrezat e këtij komunitet dhe me vonë, siç thuhet, edhe të një kishe, banorët tjerë, të besimit islam, kanë protestuar dhe kanë ndërprerë punimet në vendin e quajtur “Boka”.

Në shenjë kundërshtimi, ata kanë rrëzuar murin në pjesën e ndërtuar, i cili kufizon 5 hektarët e tokës së ndarë nga komuna dhe kanë prerë shufrat e hekurit të vendosura në themel që nevojiten për ndërtim.

Komuniteti katolik, përkatësisht Famullia “Nënë Tereze” në Llapushnik, në vitin 2009, por edhe në vitin 2010, kishte kërkuar nga komuna e Drenasit që në vendin e quajtur “Gradina-Fusha”, respektivisht “Boka”, të ketë një hapësirë të caktuar për varreza. Përfaqesuesit e këtij komuniteti pohojnë se në të kaluarën, në atë lokacion, kanë qenë dikur varrezat katolike.

Kërkesa e komunitetit katolik ishte aprovuar nga Komuna e Drenasit në vitin 2010, sipas Ligjit për Vetëqeverisje Lokale dhe Ligjit për Shpronësimin e Pronës se Paluajtshme.

Kryetari i komunës së Drenasit, Nexhat Demaku, tha për Radion Evropa e Lirë, se kërkesa e komunitetit katolik nga fshati Llapushnik për ndarjen e një hapësire për varrezat ka qenë e arsyeshme dhe, siç thotë ai, është nevojë elementare për atë komunitet në Llapushnik.

“E drejta dhe liritë fetare janë të garantuara me Kushtetutë dhe ligjet e Kosovës, pa marrë parasysh atë se sa është përbërja e katolikëve apo e myslimanëve. Është e drejtë, që i garantohet secilit”, tha Demaku.

Ditë me parë, para Komunës së Drenasit, janë zhvilluar edhe protesta në kundërshtim të vendimit të komunës [të vitit 2010] lidhur me ketë çështje.

Kryetari i komunës tha se protestat e tilla nuk mund të ndikojnë në vendimet e marra nga komuna, e që janë votuar nga shumica absolute e asamblistëve.

Demaku konfirmoi se në protestën e fundit kanë marrë pjesë edhe imamë të xhamive të fshatrave të Drenasit.

“Fatkeqësisht ka segmente të caktuara, një pjesë e tyre janë të Bashkësisë Islame të Kosovës, të cilët në forma të ndryshme kanë tentuar dhe po tentojnë të manipulojnë opinionin dhe komunitetin se gjoja vendimi është i kundërligjshëm, se gjoja kjo është e papranueshme dhe që është një kërkesë, e cila sipas tyre nuk duhet të realizohet”, tha Demaku.

Sekretari i Ipeshkvisë së Kosovës, Dom Fatmir Koliqi tha se që nga viti 2010, e deri më tash nuk ka pasur asnjë kundërshtim nga askush lidhur me vendimin e komunës për ndërtimi e një vendi për varrezat e komuniteti katolik në Llapushnik dhe ndërtimit të një kishe.

Duke shprehur befasinë e tij me çfarë po ndodhë ditët e fundit në këtë drejtim, Koliqi tha se askush nuk po e kupton kundërshtimin e komunitetit mysliman në fshatin Llapushnik.

“Tashmë kanë kaluar pesë vjet dhe asnjëherë nuk kemi dëgjuar shqetësime të tilla. E tash që po ndodhin këto [zhvillime], nuk po e dimë pse, sepse ende nuk janë të qarta ato kërkesat e tyre. Diçka e tillë nuk është e pëlqyer për vendin tonë. Në të gjitha pikat ku ne kemi filluar të ndërtojmë diçka, krejt në mënyrë të ligjshme, ka njerëz të cilët kundërshtojnë”, tha Koliqi për Radion Evropa e Lirë.

Në Këshillin e Bashkësisë Islame të Kosovës në Drenas, thonë se qëndrimi i Këshillit lidhur me ketë çështje është se të gjitha komunitetet fetare kudo qofshin ato, duhet të kenë objektet e tyre fetare për të kryer ritet.

Por, sipas Eset Bajraktarit, sekretar i Këshillit të Bashkësisë Islame në Drenas, komuniteti mysliman në Llapushnik është kundër vendimit të Komunës së Drenasit për vendin e ndarë për varrezat e komunitetit katolik dhe ndërtimit të kishës.

“Jemi të gjithë për, që ta kenë objektin e vet të kultit, edhe komuniteti katolik në Llapushnik. Krejt kundërthënia është te vendi, lokacioni po kundërshtohet, jo objekti dhe qëllimi i objektit”, tha Bajraktari për Radion Evropa e Lirë.

Sipas tij, zona ku kanë nisur punimet ka qenë e njohur si një zonë e mbrojtur për banorët, pasi aty “janë zhvilluar beteja të luftës ndërmjet ish- Ushtrisë Çlirimtare të Kosovës dhe forcave serbe gjatë kohës së luftës së fundit në Kosovë”.

Për më tepër, Bajraktari thotë se “është e pakuptimtë që lokacioni i zgjedhur të jetë larg komunitetit”.

“Edhe ne kur i ndërtojmë xhamitë, kemi dëshirë që t’i shërbejnë atij komuniteti sa më afër. Ata disi kanë shkuar shumë larg“, thotë zoti Bajraktari.

Por, lidhur me përcaktimin e asaj zone si të mbrojtur për banorët, një pjesëtari i komunitetit katolik në Llapushnik, i cili kërkoi të mos i publikohet emri, tha se pretendimet se aty është zhvilluar luftë ndërmjet UÇK-së dhe forcave serbe nuk qëndrojnë.

“Ata po thonë se ‘nuk jemi kundër kishës’, atëherë për çka po protestohet pra? Këta po thonë po ashtu se aty është një hapësirë ku është zhvilluar luftë. Aty kurrë nuk ka pasur mundësi të zhvillohet betejë, sepse është hapësirë e hapur”, tha ai.

Banorët e besimit islam në këtë komunë kanë mendime të ndryshme në raport me këtë çështje.

Ragip Hyseni, i cili me profesion është taksist, thotë se secili komunitet fetar ka të drejtat e veta fetare dhe nevojën si për xhami, ashtu edhe për kishë.

“Ndarja e atij vendi për varreza është e drejtë. Edhe ata jenë pjesë e një komuniteti fetar dhe janë shqiptarë”, tha Hyseni.

Kurse Kadriu, një pensionist nga Drenasi thotë se me aq sa di, në fshatin Llapushnik nuk ka pasur banorë të besimit katolik…

“Fshati Llapushnik…Unë i bëra 70 vjet dhe nuk mbaj mend që ka pasur fe katolike. Tash kanë nisur të kthehen [konvertohen]”, tha Kadriu.

Sidiqoftë, e gjithë kjo çështje ka mbetur e hapur deri në përfundim të muajit të shenjtë të Ramazanit. Vendimi për pezullimin e punimeve është marrë nga kryetari i Komunës së Drenasit, pas disa takimeve me përfaqësuesit e komuniteteve fetare në Llapushnik.

Deri në vendimin e radhës, në vendin e përfolur, sigurinë po e garantojnë forcat e rendit.

BANORËT – DO TË KETË LUFTË, NËSE QEVERIA E KOSOVËS E PRANON KUFIRIN ME MALIN E ZI

KOSOVE- Banorët e zonave kufitare me Malin e Zi kanë paralajmëruar “luftë”, në rast se institucionet e Kosovës pranojnë vijën teknike të kufirit në mes të Kosovës dhe Malit të Zi, që është prezantuar nga Republika e Malit të Zi, e që, sipas tyre, cenon më shumë se 12 mijë hektarë tokë të Kosovës, që shtrihen kryesisht në Komunën e Pejës, Istogut dhe atë të Deçanit, shkruan sot Koha Ditore.

Në diskutimin “Demarkacioni Kosovë – Mali i Zi: sfidat, komunikimi dhe transparenca”, që është organizuar nga Qendra për Promovimin e Zhvillimit, fondacioni “Friedrich Ebert” dhe kolegji evropian “Juridica”, banorët kanë kërkuar ndërrim të anëtarëve të Komisionit Shtetëror për shënjimin dhe mirëmbajtjen e kufirit shtetëror, të cilët, sipas organizatorëve, nuk i janë përgjigjur ftesës për pjesëmarrje në këtë diskutim.

Ndërkohë që njëra nga konkluzionet e kësaj tryeze ka qenë që nëse çështja e demarkacionit me Malin e Zi nuk zgjidhet me pajtueshmi, atëherë çështja të dërgohet në Gjykatën e Arbitrazhit.

Kroacia arreston Drashkoviqin, i dyshuar për vrasjen e Enver Hadrit

 

Aleksander Drashkoviq u arrestua nga policia kroate në aeroportin e Splitit, gjersa po kthehej nga Hvara me partnerët e biznesit.

“Në kontrollin kufitar në aeroportin e Splitit, u konstatua se u lajmërua një qytetar 51-vjeçar serb kundër të cilit ishte ngritur një urdhër-arrest ndërkombëtar”, shkruan në njoftimin e policisë kroate, transmeton Telegrafi.

Drashkoviq akuzohet për vrasjen e veprimtarit shqiptar, Enver Hadri, përkatësisht kryetarit të Lëvizjes për të Drejtat e Njeriut, i cila u likuidua në fund të shkurtit vitit 1990 në Bruksel, raporton portali kroat Index.

Draskoviq, siç ka mësuar Index, kur u morr në pyetje në Gjykatën e Qarkut të Splitit, ka mohuar lidhjet e tij me rastin e likuidimit të Hadrit.

Bastisje në pesë OJQ me orientime fetare në Kosovë

Prokuroria e Posaçme e Kosovës bëri të ditur se në bashkëpunim me Policinë e Kosovës janë bastisur pesë organizata joqeveritare, në Prishtinë dhe në Prizren, nën dyshimet për përfshirje në veprën penale: “shpëlarja e parave”, përkatësisht në bazë të Ligjit për Parandalimin e Pastrimit të Parave dhe Parandalimin e Financimit të Terrorizmit.

Tri nga Organizatat Joqeveritare veprojnë në Prishtinë dhe dy të tjera në Prizren.

Në njoftimin e prokurorisë thuhet se gjatë bastisjeve janë sekuestruar përkohësisht sende që mund të jenë prova gjatë procedurës penale.

“Aksioni i sotëm është njëri nga veprimet e ndërmarra në një rast që është duke u hetuar nga Prokuroria e Posaçme Republikës së Kosovës, me qëllim të parandalimit dhe luftimit të terrorizmit në Kosovë”, thuhet në njoftim

Kosova është përballur me sfidën e pengimit të përfshirjes së qytetarëve të saj në luftërat në Lindjen e mesme. Javën e kaluar Departamenti amerikan i shtetit tha se kërcënimi i ekstremizmit të dhunshëm islamik ka ardhur duke u rritur gradualisht në Kosovë, që pas konfliktit të vitit 1999, i ndihmuar pjesërisht edhe nga financimi i organizatave të huaja, që predikojnë ideologji ekstreme.

Rreth 150 – 200 luftëtarë të huaj terroristë nga Kosova, kanë shkuar në Siri dhe Irak për të luftuar përkrah grupit Shtetit Islamik dhe Frontit al-Nusrah. Nga këta, rreth 20 janë vrarë.

Grupet e dhunshme ekstremiste përdorin aktivisht rrjetet sociale për të përhapur propagandën e tyre dhe për të rekrutuar njerëz. Në Kosovë nuk kanë ndodhur deri tani incidente terroriste.

Në vitin 2014, autoritetet e Kosovës arrestuan rreth 70 individë nën dyshimet për terrorizëm, rreth 40 prej të cilëve ishin luftëtarë të huaj që ishin kthyer në Kosovë.

Në muajin mars, Parlamenti i Kosovës miratoi ligjin që synon parandalimin e qytetarëve të Kosovës që t’u bashkohen luftërave jashtë vendit. Ligji parasheh dënime prej 6 muaj deri në 15 vjet heqje lirie për të gjitha ata që marrin pjesë, nxisin apo ndihmojnë përfshirjen në luftërat e huaja. za

Niue njeh Kosovën

 

Ministri i Punëve të Jashtme i Kosovës Hashim Thaçi përmes Facebookut bën me dije se një shtet i ri e ka njohur Kosovën.

Ky shtet është Niue dhe gjendet në Oqeanin Paqësor.

Niue ka 260 kilometra katrorë dhe 1190 banorë. GDP e këtij vendi është afër 10 milionë dollarë.

Lidhur me këtë njohje Thaçi ka shkruar në Facebook:

Mbrëmë mora notën verbale nga Toke Talagi, kryeministri dhe ministri i jashtëm i shtetit Niue që gjendet në Oqeanin Paqësor, për njohjen e Kosovës dhe themelimin e marrëdhënieve diplomatike në mes dy shteteve tona.

Vota sovrane e Niue në agjencitë si UNESCO, OBT, OBSH, etj. paraqet edhe një ndihmesë në mbledhjen e shumicës së duhur për anëtarësinë e Kosovës në agjenci të OKB.

Mustafa – Dialogu me Serbinë vazhdon më 29 qershor

Kryeministri i Kosovës Isa Mustafa, përmes një njoftimi të postuar në ‘Facebook’, ka folur për takimin e djeshëm me homologun e tij serb, Aleksandër Vuçiq.

Ai ka thënë se është përmbyllur një ditë e ngjeshur e dialogut me Serbinë në Bruksel.

Me këtë rast, kryeministri Mustafa ka bërë të ditur edhe datën se kur do të zhvillohet takimi tjetër me homologun e tij serb Vuçiq.

Lexoni të plotë postimin e Mustafës:

Për shumë tema që i trajtuam është punuar gjatë nga ekspertet tanë, të cilët me përgjegjësi të plotë po mbulojnë fushat e tyre.

Këtu nuk ka orar, punohet ne orën dy të mëngjesit, sikurse në dhjetë të ditës. Ekziston përkushtimi i të gjithëve që të zgjidhim problemet, të cilat na mbajnë peng gjatë ketyre gjithë viteve të pas luftës e ti kthehemi perspektives tonë zhvillimore dhe integruese.

Do të vazhdojmë më 29 qershor kur, pas punës së eksperteve në sqarimet ligjore e kushtetuese të shumë çështjeve të hapura karshi orientimeve të qarta politike, do të bëjmë përpjekje të përmbyllim disa nga marrëveshjet, përkatësisht parimeve të përgjithshme për disa çështje kapitale për vendin tonë.

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend