Ilir Deda, deputet i deritashëm i Lëvizjes Vetëvendosje, ka dhënë dorëheqje nga kjo parti politike. Dorëheqjen, Deda e ka bërë publike përmes një konference për media në selinë e partisë, ku ishte i pranishëm edhe sekretari organizativ i Vetëvendosjes, Dardan Molliqaj, i cili ka falënderuar Dedën për kontributin që ka dhënë deri më tani në këtë subjekt politik.

Deputeti Ilir Deda, i cili tash e tutje vazhdon si i pavarur, ka paralajmëruar se në një të ardhme prej pak muajsh, do të angazhohet në një organizim të ri politik në Kosovë. Tërheqjen nga Vetëvendosja, Deda e ka arsyetuar me faktin që ai dhe partia kanë dallime konceptuale.

Kurse Molliqaj ka thënë se “ne po ndahemi, kushtimisht, por jemi bashkë kundër regjimit aktual”.

Partitë në pushtet dhe ato në opozitë nuk kanë vendosur ende dialogun e ndërsjellë me qëllim të tejkalimit të mospajtimeve dhe funksionalizimit të Kuvendit të Kosovës.

Kryesia e Kuvendit, është mbledhur të hënën dhe ka caktuar seancën e radhës, por aty nuk ka marrë pjesë deputetja e Lëvizjes Vetëvendosje, Aida Dërguti, e vetmja që përfaqëson opozitën në këtë organ.

Kryetari i Kuvendit, Kadri Veseli ka thënë se opozita duhet të rikthehet në Kuvend në mënyrë që t’i merr përsipër përgjegjësitë që i takojnë. Deri më tani, sipas tij, kishte disa komunikime, por jo në nivel të liderëve.

“Ata duhet të jenë pjesë e vendimmarrjes në Kuvendin e Kosovës dhe duhet të kthehen sa më shpejt. Pak ka rëndësi se cilat janë raportet aktuale mes tyre, ata duhet të kthehen si opozitë dhe t’i marrin përgjegjësitë në vendimmarrje të cilën e kemi të përbashkët”.

“Oferta vazhdon të jetë e njëjta. Ne kemi disa komunikime mes nesh, por të cilat nuk e atakojnë drejtpërdrejtë lidershipet e partive”, ka thënë Veseli.

Përderisa kryetari i Kuvendit Kadri Veseli, njëherësh ushtrues detyre i kryetarit të Partisë Demokratike po i përsëritë ftesën opozitës të kthehet në Kuvend, dy subjekte opozitare Aleanca për Ardhmërinë e Kosovës dhe Nisma, tashmë kanë marrë vendime që të mos jenë pjesë e seancave të kësaj legjislature.

Vendimet e tyre mbështeten në vlerësimet politike se ky kuvend dhe këto institucione e kanë humbur legjitimitetin.

Ndërkaq subjekti më i madh opozitar, Lëvizja Vetëvendosje, praninë në seanca e ndërlidhë më agjendën e Kuvendit.

Por, si do që të jetë, opozita, pas ndarjes ndërmjet AAK-së dhe Nismës në njërën anë dhe Vetëvendosjes në anën tjetër, sot ka pësuar edhe një ndryshim të ri.

Deputeti Ilir Deda, ka konfirmuar edhe zyrtarisht se është tërhequr nga Lëvizja Vetëvendosje, për shkak të dallimeve konceptuale që ka me këtë subjekt politik. Dorëheqjen nga Vetëvendosja, Deda e ka bërë publike në selinë e kësaj partie politike gjatë një konference të përbashkët me sekretarin organizativ të Vetëvendosjes, Dardan Molliqaj.

Ky i fundit ka thënë se pa Ilir Dedën, Vetëvendosje dobësohet, por sipas tij, e përbashkëta e tyre mbetet kundërshtimi i qeverisë aktuale të Kosovës.

Kurse Ilir Deda, ka paralajmëruar se brenda një kohe do të angazhohet në një organizim të ri politik.

“Unë do ta fillojë një angazhim në muajt e ardhshëm. Të jemi të qartë, jo në javët, por muajt e ardhshëm për krijimin e një organizimi të ri politik”, ka thënë Deda.

Ri-rreshtimet në skenën politike në Kosovë tashmë janë një praktikë e zakonshme. Edhe në të kaluarën, deputetët apo zyrtarët e ndryshëm të partive politike kalojnë nga një subjekt në tjetrin.

Një lëvizje e tillë, së fundi ishte ajo e ish shefes së Grupit Parlamentar të Aleancës për Ardhmërinë e Kosovës Donika Kadaj Bujupi e cila kaloi në Lëvizjen Vetëvendosje.

Por, në rastin e deputetit, Ilir Deda, ai vet ka konfirmuar se nuk e sheh si zgjidhje bashkimin në ndonjë subjekt politik, por krijimin e një organizimi të ri.

ZUBIN POTOK – Persona të paidentifikuar kanë sulmuar me armë zjarri banesën e kandidatit për deputet në Parlamentin e Serbisë, Sllavisha Ristiç.

Ngjarja është shënuar mbrëmjen e djeshme, rreth orës 22:00 në fshatin Jagnjenicë, afër Zubin Potokut në veri të Kosovës. Sipas mediave kosovare, mësohet se nga të shtënat fatmirësisht nuk ka të plagosur.

Lajmi është bërë i ditur nga Ristiç, ndërsa ai pohoi se gjatë kohës që ndodhi ngjarja në banesë ndodheshin 12 persona, përfshi 6 fëmijët e tij. Ndër të tjera, kandidati për deputet theksoi se nga të shtënat janë goditur dritaret e shtëpisë së Ristiç. Sakaq, policia e Kosovës po vijon hetimet për identifikimin dhe kapjen e autorëve.

Zyra e Punëve të Jashtme dhe Komonuelthi në Britaninë e Madhe e ka publikuar një hartë të re, duke i radhitur 18 vendet më të rrezikshme dhe 45 vendet pjesërisht të rrezikshme për t’i vizituar, në të cilën Kosova konsiderohet si pjesërisht e rrezikshme për t’u vizituar nga britanikët.

The Sun e ka publikuar lajmin, duke e cituar Zyrën e Jashtme Britanike, e cila ju bën thirrje qytetareve të vet që të mos i vizitojnë për pushime këto vende, në mesin e tyre dhe Kosovën.

Ja 18 vendet më të rrezikshme të botës që duhet shmangur:

Afganistani

Burundi

Republika e Afrikës Qendrore

Çadi

Republika Dominikane e Kongos

Guineja

Irani

Libia

Mauritania

Nigeri

Territoret palestineze

Sierra Leone

Somalia

Somalilandi

Sudani Jugor

Siria

Tunizia

Jemeni

Ndërsa këto janë vendet që konsiderohen pjesërisht të rrezikshme:

Algjeria

Angola

Armenia

Azajbergjani

Bangladeshi

Burkina Faso

Burma

Kamboxhia

Kameruni

Kolumbia

Djibuti

Ekuadori

Egjipti

Eritrea

Etiopia

Gjeorgjia

Haiti

India

Irani

Izraeli

Bregu i Fildishtë

Japonia

Jordania

Kenia

Kosova

Libani

Madagaskari

Malajzia

Mali

Nepali

Nigeria

Pakistani

Filipinet

Republika e Kongos

Rusia

Arabia Saudite

Sudani

Tajkistani

Tajlanda

Turqia

Uganda

Ukraina

Venezuela

Sahara Perëndimore.

Ish-ushtari i UÇK-së Bekim Curri, i gjetur i vrarë mbrëmë në fshatin Korreticë të Drenasit, besohet se ka qenë dëshmitar në Gjykatën Speciale, raporton ‘Insajderi’. 37-vjeçari ka qenë ushtar i UÇK ‘së në zonën që është kontrolluar nga Ajvaz Berisha, i njohur si komandant Tigri.

Burime të afërta me hetimet për krime lufte i kanë thënë Insajderit se Curri, ka qenë dëshmitar për zonën e Berishës.

Një gjë të tillë e kanë thënë edhe burime nga Policia e Kosovës, bazuar në deklaratat e familjarëve të të ndjerit.

Policia , nëpërmjet një njoftimi për media, ka bërë të ditur se rasti është cilësuar si vrasje dhe trupi i pajetë i viktimës është dërguar për obduksion.

I ndjeri, prej pasluftës ka jetuar në Zvicër.

Ndërkohë Xhavit Doberdolani e gjeti kufomën e tij derisa po shkonte në arë për të punuar derisa thotë se derisa ka ardhur policia, nuk e kishte njohur fare viktimën.

Simbolet e një shteti nuk janë gjë krejt e parëndësishme siq e kualifikojnë disa nga handikapët politik dhe qytetarët e pakujdesshëm të shtetit të Kosovës. Simbolet kombëtare (himni dhe flamuri) përveq identitetit kombëtar të një shteti, përcaktojnë të kaluarën historike, kulturën dhe traditën popullore.
Përgjatë këtyre tetë viteve të pas”pavarësisë”, gjatë festave kombëtare dhe shtetërore, më ka rënë shpesh të dëgjojë nga bashkatdhetarët naiv të thonë; “E rendësishme është që e kemi shtetin tonë,…simbolet e shtetit (flamuri lara-lara dhe hymni pa tekst) janë gjëra të imponuara nga ndërkombëtarët,…ne në zemër kemi simbolet e lashta kombëtare”
Ky, është më tepër se vetmashtrim që disa i bëjnë vetës dhe opinionit të gjërë. Përveq aspektit vizuel dhe fonik, simbolet shtetërore (himni dhe flamuri) duhet të prekin thellë në ndjenjat e qytetarëve,…që për fatin e keq, të 93 % të popullatës (shqiptare) të Kosovës, jo vetëm që nuk sensibilizojnë ndjenjat e tyre, e bëjnë të kundërtën, provokojnë ato në mënyrën më të keqe, duke ua mohuar identitetin e lashtë kombëtar.
Akoma më i shëmtuar se dizajni i flamurit të shtetit, është përmbajtja e dokumenteve personale, në veqanti e atyre të udhëtimit, ku nuk është i përcaktuar fare nacionaliteti i personit fizik që bartë me vete pasaportën e Kosovës.
Politikanët kosovar, të dalldisur pas pushtetit, e pranuan në “Pako të mbyllur” planin diskriminues, apo më mirë të themi shkombëtarizues (për shqiptarët) të Ahtisarit, pasojat e të cilit i ndjejmë tani tani  e sa vite ne mërgimtarët në shtetin italian.
Se vërtet simbolet shtetërore, jo vetëm që janë akronim i shtetit, janë bazë fundamentale për trajtimin e qytetarëve jasht kufinjëve shtetëror. Këtë që e themë e dëshmon trajtimi i shtetasve kosovar nga autoriteteve italiane nga 17 i vitit 2008-të e deri në ditët e sotme.

Mërgimtarët, qytetarët e shtetit pa identitet!

Mospërcaktimi i identitetit kombëtar në Pasaportë, ua ka dhënë mundësinë e keqpërdorimit me (pa) qëllim të autoriteteve italiane me shtetasit kosovar. Edhe pse kanë kaluar tetë vite nga njohja ndërkombëtare e shetit të Kosovës, Italia vazhdon të tallet me shtetasit kosovar, me rastin e lëshimit të Lejëve të Qëndrimit (Permesso di Soggiorno), duke ua vënë siglën YUG, herë në vend të nënshtetësisë e herë në atë të vendlindjes,…ndërsa akoma më keq se kaq, në vend të kodit fiskal të Kosovës (160), e vën atë të Jugosllavisë (118) !
Ky është identifikimi më paradoksal që shteti italian është duke u bërë shtetasve, të cilëve ua ka njohur shtetin tetë vite më parë!
Vënja e  siglës “YUG” për shqiptarët e Kosovës paraqet fyerje të rëndë dhe poshtëruese për shumë arsye;
-e para, për faktin se jemi të vetmit emigrant nga ish Jugosllavia që na ndodhë një gjë e tillë. Këtë dëshiroj ta ilustroj me një shembull konkret; emigrantëve të  Bosnjës, në Lejët e Qendrimit ua vëjnë vetëm siglën B e H, ndërsa nacionalitetin sipas përkatësisë etnike; serb, kroat apo boshnjak,
-e dyta, Jugosllavia është një krijesë e cila nuk ekziston më (nga viti 1995),
-e treta, më kryesorja, pas 17 shkurtit 2008, shteti i Kosovës është njohur juridikisht nga mëse 110 shtete gjithandej globit tokësor.
Andaj kthimi prapa në kohë i autoriteteve italiane, përveqse tendencioz dhe me prapavijë politike është shumë i dëmshëm sa i përket identitetit të shqiptarëve në Ballkan.
Në këtë rast, vetvetiu shtrohet pyetja për pushtetarët në Prishtinë; jemi apo s’jemi shtet, kemi apo s’kemi Qeveri, kemi apo s’kemi Ministri të Punëve të Jashtme, kemi apo s’kemi Ambasadë në shtetin italian, kemi apo s’kemi Polici Kufitare?!
Në veqanti mbetët i pashpjegueshëm fakti i këtyre të fundit (PK), se si sigla YUG në Lejët e Qëndrimit të shtetasve kosovar në Itali nuk ua ka ngacmuar akoma syrin e diplomatëve dhe “vigjilentëve” të sovranitetit të shtetit,…ngase kjo përbën  një nga format e shkeljes juridike të sovranitetit të shtetit.
Pikërsht me këtë çështje, në radhë të parë do duhej të mirrej  Ambasada e Republikës së Kosovës në Romë, si përfaqësuese diplomatike e shtetit dhe mbrojtëse e të drejtave të bashkombasve të tyre në shtetin italian.
Megjithatë pyetja e parë i shtrohet kryeministrit të vendit; “Zoti Mustafa, a e keni  fuqinë politike, guximin njerëzor dhe intelektual, që në bisedimet e radhës me Vuçiqin në Bruksel ta parashtroni hapur këtë çështje brengosëse të bashkatdhetarëve tuaj,…nëse jo, atëhere gjatë përqafimit të radhës me ndërmjetësuesën italiane të bisedimeve me palën serbe, zonjën Federica Mogherinin, t’ia thotë fshehurazi në vesh; “kujdes zonja Mogherini, mos m’i trajtoni shtetatasit e mi si jugosllav…”
Trajtimi paradoksal i shtetasve kosovar si jugosllav nga ana e shtetit italian, në njërën anë po vë në pahë identitetin artificial të shtetit, ndërsa në tjetrën dukurinë e mosfunksionimit të aparatit shtetëror, e në veqanti të Ministrisë së Punëve të Jashtme.
Mbase, ky duhet të jetë shqetësim për të gjitha shoqatat dhe veprimtarët e shumtë në Itali, për reagimin e menjëhershëm ndaj autoriteteve italiane, për ndaljen e kësaj dukurie sa absurde po aq të dëmshme të trajtimit të shtetasve kosovar si “YUG”!

Një person me inicialet B. C., nga Korrotica e Lartë e Drenasit është gjetur i vrarë në orët e mbrëmjes të së enjtes.

“koha.net”, raporton se ky është personi që është vrarë sonte në orët e mbrëmjes në Drenas.

Policia e Kosovës ende nuk është bërë e qasshme, për të mësuar më shumë detaje rreth këtij rasti.

Voa – Trupat ushtarake ruse, e kanë nderuar flamurin e Kosovës, siç shihet edhe në këtë fotografi, të siguruar nga Zëri.

Në fakt, Majlinda Kelmendi e fitoi medaljen e artë në Kampionatin Evropian të xhudos, i cili po mbahet në Kazan, prandaj rusët, si organizatorë, u desh ta nderonin edhe flamurin e Kosovës, të cilin fillimisht nuk dëshironin ta linin të shfaqej. Madhështore.

https://www.facebook.com/sharer/sharer.php?u=https%3A%2F%2Fwww.facebook.com%2Fsovrani.info%2Fvideos%2F1709483992598204%2F&display=popup&ref=plugin&src=video

Kryesuesi i Komisionit Qeveritar për Persona të Pagjetur, Prenk Gjetaj, gjatë konferencës së sotme ka ripërsëritur kërkesën që çështja e të pagjeturve të bëhet pjesë e bisedimeve Kosovë – Serbi, në Bruksel

PRISHTINË – Familjarët e personave të zhdukur gjatë luftës në Kosovë, së bashku me gjitha shoqatat dhe Komisionin Qeveritar për Persona të Pagjetur të Kosovës, sot kanë zyrtarizuar fillimin e “Javës së të Pagjeturve në Kosovë”.

Duke vendosur lule tek Memoriali për të Zhdukurit në oborrin e Kuvendit të Kosovës, familjarët e personave të zhdukur dhe përfaqësuesit e Komisionit Qeveritar kanë shënuar fillimin e aktiviteteve për të kujtuar më shumë se 1600 persona të vrarë dhe pastaj të zhdukur nga forcat serbe, për fatin e të cilëve edhe sot e kësaj dite, 17 vjet pas përfundimit të luftës në Kosovë, nuk dihet asgjë.

Gjatë kësaj jave, nga sot e deri më 27 prill kur edhe shënohet “Dita e të Pagjeturve në Kosovë”, komisioni së bashku me familjarët dhe shoqatat, do të kërkojnë që kjo çështje e ndjeshme mos të mbahet më peng nga politika e cila, sipas tyre, po bllokon procesin e zbardhjes së fatit të të zhdukurve.
Kjo kategori e shoqërisë kosovare që cilësohet si një nga më të prekurat nga lufta, insiston tek institucionet dhe udhëheqësit e shtetit që t’i kushtojnë rëndësi shumë më të madhe çështjes së ndriçimit të fatit të personave të zhdukur, duke kërkuar nga bashkësia ndërkombëtare që të bëjë trysni më të madhe tek Qeveria e Serbisë për të bashkëpunuar në këtë aspekt.

Kryesuesi i Komisionit Qeveritar për Persona të Pagjetur, Prenk Gjetaj, gjatë konferencës së sotme ka ripërsëritur kërkesën që çështja e të pagjeturve të bëhet pjesë e bisedimeve Kosovë – Serbi, në Bruksel.

Përfaqësuesi i familjarëve të personave të pagjetur, Bajram Qerkini, thekson se ata janë të vetëdijshëm që institucionet e Kosovës i kanë duart e lidhura në këtë proces, por ka theksuar se pala kosovare duhet të jetë më këmbëngulëse në kërkesën e saj që Serbia të bashkëpunojë më tepër në zbardhjen e fatit të personave të zhdukur.

Nga sot e deri më 27 prill, Komisioni Qeveritar për Persona të Pagjetur së bashku me shoqatat, për shtatë ditë rresht, do të vizitojnë familjet dhe monumentet përkujtimore, për ta ndarë dhimbjen së bashku me familjarët e 1666 personave të zhdukur, për fatin e të cilëve edhe pas 17 vjetëve nuk dihet asgjë. aa

Tryeza e diskutimit me temën “Si ta shndërrojmë Marrëveshjen e Stabilizim Asociimit (MSA) në një proces për reforma thelbësore në Republikën e Kosovës” të cilën e kanë organizuar Grupi për Studime Juridike dhe Politike, si dhe Instituti për Studime Politike i Prishtinës, ka bërë që drejtuesit e institucioneve të larta dhe përfaqësuesit e partive opozitare, pas muajve të tërë, të ulen në një tavolinë.

Samuel Zhbogar, përfaqësues special i Bashkimit Evropian në Kosovë, i ka bërë thirrje gjithë spektrit politik për bashkëpunim në procesin e integrimit evropian të Kosovës.

Ai ka theksuar se e ardhmja evropiane e Kosovës fillon pikërisht me MSA-në, e cila sipas tij, do ta avancojë pozitën e Kosovës në tregun ndërkombëtar.

Zhbogar ka theksuar se sa më shumë që Kosova e zbaton këtë marrëveshje, për aq ajo do të jetë më afër standardeve të vendeve anëtare të Bashkimit Evropian.

“Marrëveshja është testament që anëtarët e Bashkimit Evropian dhe vet Bashkimi Evropian kujdesen për Kosovën dhe që nuk ka dyshime në zotimin tonë për Kosovën dhe avancimin e saj. Zbatimi i MSA-së kërkon mbështetje nga i gjithë spektri politik dhe nga shoqëria civile, sid he aktorët tjerë që luajnë rol në mbikëqyrjen e këtij procesi”, ka theksuar Zhbogar.

Kryeministri i Kosovës, Isa Mustafa, ka theksuar se MSA është dokumenti më i rëndësishëm i nënshkruar që nga nënshkrimi i pavarësisë së vendit.

“Por, marrëveshja nënkupton edhe angazhimin e gjithë spektrit politik kosovar, Parlamentit të Kosovës, Qeverisë së Republikës së Kosovës, institucioneve të drejtësisë, partive politike, shoqërisë civile, bizneseve dhe shoqatave të tyre, si dhe qytetarëve të Republikës së Kosovës. Për realizimin e MSA-së na nevojitet një energji e përbashkët, sepse objekti dhe përcaktimi i ynë është përcaktim i përbashkët proevropian”.

Ai ka theksuar se përkushtimi i Qeverisë së Kosovës për zbatimin e kësaj marrëveshje është i madh dhe bërë thirrje për unitet, për shkak se, siç ka thënë ai, në këtë mënyrë arritjet mund të jenë më të mëdha.

Në anën tjetër, kryetari i subjektit opozitar Lëvizja Vetëvendosje, Visar Ymeri, deputete në Kuvendin e Kosovës, ka kritikuar diskursin politik në Kosovë që ndërlidhet me rrugën e Kosovës për në Bashkimin Evropian.

Sipas tij, Kosova nuk ka perspektivë evropiane derisa sa atë nuk do ta njohin pesë anëtaret e Bashkimit Evropian, të cilat ende nuk e kanë njohur. Siç ka thënë ai, rruga e Kosovës për në BE është e lidhur ngushtë me zbatimin e marrëveshjeve me Serbinë, që nënkupton se BE-ja po e trajton Kosovën si entitet dhe jo si një shtet të pavarur.

“Kemi dëgjuar disa herë të thonë, përfaqësuesit institucional të kësaj qeverie dhe të qeverive të kaluara, që BE-ja nuk ka alternativë dhe se BE-ja do të jetë shpëtimi ynë. Kjo nënkupton se me aderimin e Kosovës në Bashkimin Evropian, atëherë të gjitha problemet që ne i kemi këtu, do të rregullohen”.

“Pra, në këtë drejtim, BE-ja më shumë e merr karakterin e një parajse. Kështu, parajsa na premtohet pas aderimit në BE dhe që në njëfarë mënyre i suspendon plotësisht detyra, përgjegjësitë tona që i kemi karshi ngritjes së cilësisë së jetesës në republikën tonë dhe për qytetarët e Republikës”.

Ardian Gjini, nënkryetar i parë i Aleancës për Ardhmërinë e Kosovës, ka thënë se problemi kryesor në Kosovë është humbja e besimit ndërmjet partive politike, ndërmjet institucioneve, si dhe humbja e besimit të qytetarëve ndaj institucioneve. Sipas tij, ndërtimi i besimit, duhet të jetë prioritet.

“Procesi i integrimit në Bashkimin Evropian është i pamjaftueshëm për ta nxjerrë Kosovën nga kriza politike, posaçërisht meqenëse e ka një shpejtësi kështu si e ka. Për Aleancën, procesi i integrimit është jetik dhe Kosova kurrsesi nuk guxon ta humbë shpresën se një ditë do të jetë pjesë e Bashkimit Evropian”.

“Por, në të njëjtën kohë, nuk guxojmë të mos themi se në momente të caktuara ky proces po shndërrohet në konflikt ose po krijon logjika konfliktuoze. Kosova ose duhet të provoj që të zhvillohet më shpejt, në mënyrë që të integrohet më shpejtë në BE ose duhet ta gjejë një rrugë të integrimit më të shpejtë e që pastaj eventualisht të zhvillohet , sikurse që ka ndodhur me disa vende të Ballkanit. Në këtë fazë, nuk po ndodhë asnjëra”.

Kryetari i Kuvendit të Kosovës, Kadri Veseli, ka shprehur mendimin se Kosovës i nevojitet dialogu i brendshëm, nga i cili varen mjaft çështje brenda vendit.

“Agjenda jonë evropiane është një prioritet nacional. Fatmirësisht, për këtë çështje kemi konsensus të përbashkët, pavarësisht nëse jemi pushtet apo opozitë. Ne e vlerësojmë jashtëzakonisht shumë të gjithë përkrahjen, të cilën e kemi marrë gjatë gjithë këtij procesi nga partnerët tanë”.

“Por, në të njëjtën kohë, nuk mundemi të mos kërkojmë, veçanërisht nga 5 shtetet, të cilat ende nuk e kanë njohur shtetin tim, Republikën e Kosovës, që të mos e bëjnë atë”.

Marrëveshja për Stabilizim Asociim e nënshkruar nga Kosova dhe Bashkimi Evropian ka hyrë në fuqi më 1 prill të këtij viti.

Marrëveshja për Stabilizim Asociim paraqet kornizën e marrëdhënieve të Bashkimit Evropian me vendet e Ballkanit Perëndimor, në këtë rast me Kosovën.

Kjo marrëveshje është e përshtatur me situatën specifike të secilit vend partner në Bashkimin Evropian, mbi vendosjen e tregtisë së lirë ndërmjet Bashkimit Evropian dhe Kosovës, në këtë rast. Marrëveshja gjithashtu identifikon qëllimet e përbashkëta politike dhe ekonomike dhe nxit bashkëpunimin rajonal.

Në kontekstin e qasjes për në Bashkimin Evropian, kjo marrëveshje shërben si bazë për zbatimin e procesit të qasjes./Bekim Bislimi

Arilena Shala dhe Yll Dalladaku do të jenë studentët e parë nga Kosova që do të shkollohen në akademinë më prestigjioze ushtarake amerikane West Point.

Lajmin për këtë e ka bërë të ditur ish- presidentja e Kosovës Atfiete Jahjaga, përmes një njoftimi në profilin e saj zyrtar në rrjetin social “Facebook”.

Jahjaga thotë se ndjehet jashtëzakonisht krenare për këtë të arritur dhe falenderuese për mundësinë që West Point ua ofroi kadetëve të FSK-së si rezultat i bisedave me udhëheqësit e kësaj akademie gjatë vizitës time atje në vitin 2014, transmeton “zeri.info”.

Njoftimi i plotë i Jahjagës:

Arilena Shala dhe Yll Dalladaku do të jenë studentët e parë nga Kosova që do të shkollohen në akademinë më prestigjioze ushtarake amerikane West Point.

I përgëzoj ata dhe Forcën e Sigurisë së Kosovës për suksesin në përmbushjen e kritereve rigoroze akademike, i cili do të hapë mundësi të reja për profesionalizimin dhe avancimin e kuadrove të ushtrisë tonë.

Ndjehem jashtëzakonisht krenare për këtë të arritur dhe falenderuese për mundësinë që West Point ua ofroi kadetëve të FSK-së si rezultat i bisedave me udhëheqësit e kësaj akademie gjatë vizitës time atje në vitin 2014.

Të premten në mënyrë ilegale qëndroi në Kosovë Marko Gjuriçi, Shef i Zyrës për Kosovën në Qeverinë e Serbisë.

Gjuriçi përkundër vendimit që kishin marrë institucionet e Kosovës për ndalim e hyrjes së tij, arriti të futej dhe madje qëndroi gati gjithë ditën.

Derisa institucionet e cilësonin shkelje të rendit kushtetues hyrjen e Gjuriçit, ai shoqërohej nga dy zyrtarë kosovarë. Njëri ishe zëvendëskryeministri Branimir Stojanoviq ndërsa tjetri, ministri Ljubomir Mariq.

Hyrja ilegale në territorin e një vendi të huaj cilësohet vepër penale, njëjtë si në vendin tonë çështje kjo të cilën e rregullon Ligji për të Huajt.

Megjithëse, zëvendëskryeministri Stojanoviq dhe ministri Mariq shpërfillen urdhrat e qeverisë pjesë të së cilës janë, qeveria e kryeministrit Isa Mustafa nuk ka asnjë koment. Në pyetjet e “zeri.info” nuk është përgjigjur zëdhënësi i qeverisë, Arban Abrashi e as zëvendësministri i pushtetit lokal, Bajram Gecaj.

Ndërkohë Ligji për të Huajt parasheh:

Neni 32

Kalimi ilegal i kufirit

1. Kalimi ilegal i kufirit shtetëror konsiderohet atëherë kur i huaji:

1.1. nuk i plotëson kushtet e përcaktuara në nenin 5 të këtij ligji.

1.2. tenton të kalojë kufirin shtetëror jashtë pikës së kalimit kufitar apo kohës të

caktuar për kalimin e kufirit shtetëror;

1.3. shmanget apo tenton t’i shmanget kontrollit kufitar;

1.4. gjatë kalimit të kufirit shtetëror përdor dokumentin e udhëtimit jo të vlefshëm, te

falsifikuar si dhe dokumente udhëtimi autentike te personave të tjerë të përdorura në

mënyrë abuzive;

1.5. jep të dhëna të rrejshme zyrtarëve të autorizuar për kontrollin e kalimit të kufirit

shtetëror;

1.6. hynë në Republikën e Kosovës ndërkohë që urdhri për largim me ndalesë për rihyrje

është në fuqi.

Me qëllim normalizimin e marrëdhënieve Kosovë – Serbi, sot tre vjet këto dy shtete hodhën nënshkrimin e parë në Bruksel, tekstin e së cilës e kishte ofruar ish-shefja për politikë të jashtme e BE-së, Catherine Ashton.

Hashim Thaçi, atëkohë kryeministër i vendit së bashku me homologun e tij serb, Ivica Daqiq, nënshkruan marrëveshjen prej 15 pikësh, marrëveshje kjo që u cilësua si historike, raporton lajmi.net.

Ndonëse kryeministri serb këtë marrëveshje e kishte konsideruar si shumë më të favorshme për palën serbe, për Thaçin arritja e kësaj marrëveshjeje ishte njohje e Kosovës, e subjektivitetit ndërkombëtar, sovranitetit dhe integritetit territorial.

Por pavarësisht se kanë kaluar tre vjet që kur është bërë nënshkrimi mes dyja palëve, zbatimi i saj shihet dështues.

Këtë mendim ndan Drejtor i Institutit Kosovar për Qeverisje Lokale, Besnik Tahiri i cili në një prononcim për lajmi.net e quajti këtë marrëveshje si një fatkeqësi të madhe.

“Është një fatkeqësi e madhe që një marrëveshje që konsiderohet të jetë bilaterale, mirëpo edhe me karakter ndërkombëtar të çalojë në zbatim në veçanti në integrimin e pjesës veriore të Kosovës dhe, për më shumë do të thotë me nisje të zbatimit të kësaj marrëveshje. Ju kujtohet që problemi themelor i përmendur gjatë asaj kohe, ka qenë ura në Mitrovicë tek lumi Ibër”, shpjegoi Tahiri.

Madje ai thotë se, përderisa marrëveshjet tjera që janë dashur ta lehtësojnë integrimin e pjesës veriore të Kosovës, siç është shprehur, vetëm që e kanë çalu këtë problem dhe këtë ai e cilësoi si një dështim.

Tahiri sqaroi edhe punën e Asociacionit për të cilin siç vlerëson ai janë bërë shkelje kushtetuese.

“Ndërsa çështjen e Asociacionit unë e shoh: gjykata kushtetuese ka evidentu mbi 20 nene, dmth mospërputhshmëri me kushtetutën respektivisht shkelje të kushtetutës, kjo nënkupton që duhet të merren shumë seriozisht, e dyta asociacioni i komunave me shumicë serbe në asnjë formë nuk guxon t’i ketë tri elemente, pra kompetencat ekzekutive, sepse duket që edhe në formë edhe në përmbajtje, por edhe në statut që është nivel i dytë i qeverisjes dhe mbi të gjitha do të thotë mos ta prek parimin e multietnicitetit, sepse kur është themelu është bazu në parimet e multietnicitetit edhe pse shoqnia nuk është multietnike, meqenëse është kështu, të gjitha këto parime duhet të merren parasysh”, tha ndër tjerash Tahiri.

Se mundësitë për të arritur nga kjo marrëveshje nuk janë shfrytëzuar, e thotë edhe analisti i vendit Nexhmedin Spahiu.

Ai për lajmi.net tha se, ndonëse dialogu është një interes nacional dhe i rëndësishëm i Kosovës, arritjet e delegacionit kosovarë kanë lënë për të dëshiruar.

“Mendoj që ka qenë hap me rëndësi, marrëveshje që është bo para tri viteve por arritjet e delegacionit të Prishtinës, përgjatë këtyre viteve, kanë lënë shumë për të dëshiruar. Mundësitë kanë qenë shumë të mëdha ndërsa arritjet shumë të vogla”, tha Spahiu.

Tutje, ai tha se është bërë progress në këtë aspekt, por progres që siç shpjegon ai, në krahasim me kohën që ka shkuar dhe mundësitë që kanë qenë tregon për paaftësinë e klasës politike të Kosovës.

“Tri vjet janë goxha shumë dhe, kjo është një kohë shumë e madhe e humbur”, përfundoi ai.

Ndryshe, sot tre vjet, përkatësisht me datë 19 prill të vitit 2013, Kosova dhe Serbia me ndërmjetësim të Bashkimit Europian nënshkruan marrëveshjen.