VOAL

Kosovë

Policia e Serbisë arreston drejtorin rajonal të Policisë së Kosovës – kërkohen sqarime nga Serbia

Policia serbe ka arrestuar drejtorin rajonal të Policisë së Kosovës të rajonit të Mitrovicës së Jugut, Nehat Thaqi, i ka konfirmuar lajmin Radios Evropa e Lirë, zëdhënësi i Policisë së Kosovës, Daut Hoxha.

Arrestimi, tha Policia e Kosovës, ka ndodhur pak pas mesnatës së 28 shtatorit në vendkalimin kufitar “Dheu i Bardhë” në magjistralen Gjilan-Bujanoc.

Zëdhënësi Hoxha tha se “Policia e Kosovës nuk ka asnjë sqarim nga autoritet serbe për arsyet e arrestimit të drejtorit rajonal të Policisë” dhe bëri me dije se “përmes autoriteteve kompetente të EULEX-it është kërkuar sqarim zyrtar për arsyet e arrestimit nga pala serbe”.

Sipas njoftimit të zëdhënësit Hoxha “drejtori rajonal Policisë, Nehat Thaqi, në momentin e arrestimit ishte jashtë detyrës së tij zyrtare dhe së bashku me një shokun e tij po udhëtonte për çështje private nëpër territorin e Serbisë për në shtetet perëndimore”. (REL)

Pse mungon Dita e Këpurdhave në Kosovë? Nga Florim Zeqa

Këtyre viteve të fundit qytetarët e vendit tonë, me të hapur televizionin, në emisionin e mëngjesit apo në lajmet e mbrëmjes dëgjojnë për “Ditën ndërkombëtare” të: tokës, ujit, rrushit, mollës dhe artikujve tjerë ushqimor,..ditën e demokracisë, ditën e paqës, ditën e viktimave,…e deri të shënimi i gjërave më banale që s’kanë të bëjnë fare me jetën e qytetarëve tonë.

Ditë më parë presidenti i vendit ishte në një fshat të komunës së Istogut (Kovragë) për shënimin e “Ditës së mollës”, me ç’rast, atë ditë nga pemëtarët e Kovragës i është ndarë mirënjohje presidentit Thaçi për “kontributin e tij për zhvillimin e sektorit të bujqësisë” në Kovragë dhe Istog,…përderisa në anën tjetër aktivistë të Levizjes Vetëvendosje e mirëpritën presidentin me pankartën; “Pushtetarët “Pronto”, mollët rritën më mirë e më shumë pa ju”!

Edhe pse deri më sot, askush nga pushtetarët nuk e permendi “Ditën e Këpurdhës”, shiu i parë që bie në muajin Shtator, është dita që më së shumti i gëzon banorët e varfër të fshtrave malore të Kosovës, e në veqanti të Rrafshit të Dukagjinit,…të cilët për disa ditë e javë rresht sigurojnë kafshatën e gojës nga mbledhja e këpurdhave nëpër luginat dhe majat e maleve më të ngjeshura me lloj-lloj drunjësh, ku në mesin e tyre ndodhen edhe lloj-lloj zvarranikësh të rrezikshëm për jetën e njeriut.

Për dallim nga Mollët e Kovragës, që janë produkt i punës së pemëtarëve të vyeshëm të asaj ane, Këpurdhat e Maleve janë kryekëput dhuratë e natyrës, të cilat mbijnë e rritën gjatë natës në malet tona, pa pasur nevojë për përkujdesje të askujt.

Edhe pse mbledhja e këpurdhave nuk është aq punë e lehtë dhe pa rreziqe, shkaku i prezencës së madhe të gjarpërnjëve,…të varfërit, të harruarit e shtetit, nga mëngjesi i hershëm e deri në mbrëmje vonë ia mësyjnë zonave malore ku llogaritin të gjejnë sa më shumë këpurdha.

Edhe puna e këpurdhave është sikurse puna e gjuetisë, dikujt i buzëqesh fati më shumë e kujt tjetër më pak. Me t’u kthyer në shtëpi, problem u mbetet shtitja e tyre, ngase nuk kanë ndonjë pikë të caktuar të shitjes. Si çdo herë mbetën në mëshirën e fatit, se kush do të vie i pari në fshat për blerjen e këpurdhave të tyre, ngase me kalimin e orëve këpurdhave u bie vlera, derisa edhe dëmtohen tërësisht.

Në mungesë të ndonjë pike të rregullt grumbulluese, këpurdhat e mbledhura me mund e me djersë shitën lirë,…për t’u kontrabanduar disa herë, deri sa të mbërrijnë tek destinacioni i fundit, i cili e fiton dhjetëfishin e çmimit të blerjes.

Mbase dikujt mund t’i duket banale çështja e këpurdhave, por biznesi profitabil me këpurdhat sikurse edhe bizneset tjera kanë ekzistuar vite më radhë para luftës, për të vazhduar edhe në ditët e sotme. Ky lloj biznesi është realizuar dhe realizohet në bashkëpunim me biznesmenët serb, që destinacion të fundit e kanë tregun evropian.

Nuk është se pushtetarët dhe policia e Kosovës nuk janë në dijeni për këtë lloj biznesi mjaftë profitabil, jo që nuk i dijnë dilerët dhe destinacionin e tyre,…e kanë zgjedhë heshtjen si mbulesë para një kontrabandimi të tillë të mundit dhe djersës së qytetarëve të varfër të këtij vendi.

Se sa është i lartë çmimi i këpurdhave në shtetet perëndimore, po ua ilistroj me një shembull të thjeshtë të tregut të shitjes në Itali; ku vetëm 10 gram këpurdha të terura në shitoret italiane kushton më shtrenjtë se 1 kg i blerjes së të njëjtave në Kosovë!

Andaj do të ishte mirë, që presidenti Thaçi dhe kryeministri Mustafa bashk me kryetarin e Mitrovicës zotin Bahtiri, t’i vizitojnë këto ditë banorët e fshatrave malore të rrafshit të Dukagjinit,…në mos “mirënjohje”, nga ta mund të marrin si shpërblim nga 1 kg këpurdha sa për ta shënuar “Ditën e Këpurdhës”, e munguar deri më tani në ditarin e atyre që mirren me shënimin e “ditëve” të veqanta në vendin e paradokseve më të mëdha në botë, të quajtur me emrin Kosovë.

Megjithatë kjo nuk ka gjasa të ndodhë, ngase se liderët e sipërpërmendur shtetëror, shkojnë aty ku flitet për miliona, e nuk e qajnë kokën për mirënjohje dhe as për hallet dhe peripecitë e qytetarëve të varfër të vendit të tyre.

U shitën apo jo këpurdhat, i shtijnë “turrshi” apo i hudhin të nesermën në plehëra prap mbetët problem i shtresave më të varfëra dhe më të pambrojtura të vendit tonë.

Vetëvendosje: Asosacioni sjell luftë të re

Sipas këndvështrimit të Lëvizjes Vetëvendosje, krijimi i Asociacionit të Komunave Serbe do të sjellë luftë të re në Kosovë.

“Krijimi i Zajednicës sjellë tensione të reja. Një luftë e re shumë shpejt është e pashmangshme. Do të ketë gjakderdhje. Ashtu siç gjeneratat tona ishin fëmijë në vitet 90 e u bënë ushtarë të UÇK-së në luftë, fëmijët tanë do të jenë ushtarë nesër”, kishte thënë deputeti Albin Kurti ditë më parë.

Ndërkaq, deklarata e Kurti ka ngjallur reagime të shumta në opinion.

Por, sipas Vetëvendosjes, Kurti ka thënë se “me shumë ka gjasa që të ketë luftë, sesa që të mos ketë luftë”.

Edhe anëtari i Lëvizjes Vetëvendosje, Ylli Hoxha ngjashëm si deputeti Albin Kurti ka thënë se do të ketë luftë në Ballkan.

Hoxha përmes një postimi në “Facebook” ka përmendur disa prej krizave që po ndodhin nëpër botë, me theks të veçantë, Evropën.

“Dhe deklarata e Albinit qe ne 5 vitet e ardhshme ka gjasa te këtë lufte te re ne Ballkan po ju duket e habitshme a? Kapni librat e lexoni pak aman, zaman”, ka shkruar ai. /ZERI/

Ngacmoi seksualisht të afërmen e deputetes, shkarkohet Zejdush Tahiri, këshilltari i ministrit

PRISHTINE – Mediat në Kosovë shkruajë se këshilltari i ministrit të Shëndetësisë, Imet Rrahmani, është shkarkuar para dy javësh nga detyra, që ka mbajtur për gati dy vjet.

“Koha Ditore” nga tri burime të ndryshme ka mësuar se këshilltari Zejdush Tahiri është shkarkuar për shkak të dyshimit për sjellje të pahijshme dhe ngacmim seksual të familjares së një deputeteje të Kuvendit të Kosovës. Vetë deputetja e ka njoftuar ministrin për rastin dhe i ka kërkuar që ta shkarkojë Tahirin nga detyra.

“Koha Ditore” e ka të njohur identitetin e deputetes dhe të familjares që e ka ngacmuar Tahiri, por për shkak të ndjeshmërisë së çështjes ka vendosur që të mos i bëjë publike emrat. Në një bisedë për gazetën deputetja nuk e ka mohuar se një situatë e tillë ka ndodhur.

“Në Siri ndodhen 27 fëmijë kosovarë”

Voal – Të dhënat e fundit të departamentit për anti terrorizëm në Policinë e Kosovës tregojnë se numri i kosovarëve në Siri është 70 deri në 75 meshkuj, 38 femra dhe 27 fëmijë.

Drejtori i këtij departamenti, Fatos Makolli, ka thënë në “KTV” se ky numër mund të jetë i lëvizshëm vetëm tek fëmijët, ndonëse për shkak të kohës së gjatë të qëndrimit ka ndodhur edhe shtimi i familjes.

“Sipas të dhënave të tanishme janë 70 deri 75 meshkuj të cilët konsiderohen që kryejnë funksione të ndryshme ndërsa janë 38 femra dhe 27 fëmijë në zonën e konfliktit mirëpo shifra e fëmijëve mund të mos jetë e saktë pasi ata janë atje për një kohë të gjatë dhe në ndërkohë ka ndodhur shtimi. Nëse ju referohemi shifrave kuptojmë që një pjesë e madhe e grave dhe fëmijëve kanë shkuar pa dëshirën e tyre”, ka thënë Makolli.

Makolli ka theksuar se nga shtatori i vitit të kaluar nuk është identifikuar asnjë rast ku një qytetar i Kosovës ka arritur të futët në zonën e konfliktit.

“Nga shtatori i vitit të kaluar nuk është identifikuar asnjë rast kur një qytetar i Kosovës ka arritur të futet në zonën e konfliktit”, ka thënë ai.

Ndonëse ai ka bërë të ditur se në përgjithësi numri i atyre që nisen për luftë është shumë më i vogël.

I pyetur nëse Policia e Kosovës ka informatorë në zonën e konfliktit, ai nuk e ka mohuar një gjë të tillë duke thënë se nuk mund të flasë më shumë mbi këtë çështje.

“Nuk mund ta konfirmoj apo mohoj këtë”, përfundoi ai.

Ishte në makinë me këngëtaren, deputetin Eduard Ndocaj e rrahën në Prizren, arrestohen autorët

Mediat në Kosovë raportuan sot se deputetit i PS-së i Qarkut Lezhë, Eduart Ndocaj i njohur ndryshe si “Kaubojsi” është rrahur keq nga dy persona në fshatin Landovicë, afër qytetit të Prizrenit. Kështu shkruante ndër të tjera portali Blic, që pretendon se autorët e agresionit kanë qenë dy trafikantë.

“Ndocaj ka qenë në Pejë dhe duke u kthyer nga Peja, është ndalur në Landovicë të Prizrenit. Aty e kanë rrahur dy persona, që janë të njohur për Policinë si persona të dyshuar për trafikim me narkotikë”, – tha ky burim i Gazetës Blic brenda Policisë.

“Personat që kanë sulmuar deputetin shqiptar janë të njohur për Policinë”, – shkruan Gazeta Blic.
“A.V nga Kukësi, me banim në Prizren dhe I.B nga Prizreni”, – tha burimi. Portali thekson se bashkë me deputetin Ndocaj, në veturë ka qenë edhe këngëtarja e njohur E.A., një personazh i njohur nga Shqipëria. Nga policia ende nuk e kanë konfirmuar zyrtarisht rastin.

Nga ana tjetër deputeti Ndocaj tha për “Balkanweb” se ka qenë në Kosovë, saktësisht në Pejë më 25 shtator dhe ka ndenjur gjysmë dite pasi i është dhënë çmimi ‘Politikani i vitit” në një spektakël. Por ai mohon çdo informacion tjetër dhe se mund të ketë pasur përplasje.

“Kam qenë në Kosovë por nuk kam pasur asnjë përplasje fizike. Kam marrë çmimin “Politikani i vitit” në Pejë në një spektakël. Kam pirë kafe me një gazetar dhe asgjë më tepër. Nuk më ka dalë asnjë person përpara, është mashtrim. Kam qenë me këshilltarin tim dhe shoferin”, – tha Ndocaj për “BalkanWeb”.

I pyetur nëse ky lajm ka sjellë ndonjë shqetësim në familjen e tij, Ndocaj tha se nuk ka pasur asnjë lloj reagimi pasi ky është një mashtrim. “Nuk kam pasur asnjë shqetësim nga familja sepse është mashtrim. Është sulm politik”, – deklaroi Ndocaj për “BalkanWeb”.

Drejtues të Gjykatës Speciale zbarkojnë në Prishtinë – kërkojnë bashkëpunim me institucionet

Ministrja e Drejtësisë Dhurata Hoxha, priti në takim informues Udhëheqësen e Zyrës Administrative të Dhomave të Specializuara, Fidelma Donlon, e shoqëruar nga udhëheqësi për Mbrojtje Juridike, David Hein, njofton zyra e saj për informim.

Në takim, sipas njoftimit, udhëheqësja e Zyrës Administrative të Dhomave të Specializuara, Donlon, informoi Ministren Hoxha rreth procesit të krijimit të Zyrës Administrative, funksionimit, gjetjes së mënyrave më të mira të bashkëpunimit me institucionet e Kosovës.

Po ashtu, Donlon shprehu nevojën për bashkërendim dhe komunikim në mes Zyrës Administrative dhe Ministrisë së Drejtësisë për çështjet administartive, për të siguruar transparencë, drejtësi dhe paanshmëri gjatë procesit, thekson njoftimi i MD’së.

“Ministrja Hoxha, shprehu zotimin e Ministrisë së Drejtësisë për bashkëpunim, komunikim dhe koordinimin me Zyrën Administrative për të siguruar që i tërë procesi do të jetë transparent dhe i paanshëm”, përfundon komunikata.

Qeveria e Kosovës – Policia largon mjetin e dyshuar shpërthyes – vazhdon kontrollin e terrenit

Policia e Kosovës ka larguar mjetin e dyshuar shpërthyes, i cili është gjetur të martën në oborrin e Administratës Pensionale të Kosovës. Lajmin e ka konfirmuar për Radion Evropa e Lirë, zëdhënësja e Policisë së Kosovës të rajonin e Prishtinës, Flora Ahmeti.

“Policia ka larguar mjetin shpërthyes, por po vazhdon ekzaminimin e mëtejmë të vendit të ngjarjes”, ka thënë Ahmeti.

Ajo ka shtuar se pas përfundimit të raportit për këtë ngjarje, Policia e Kosovës do të nisë hetimet lidhur me këtë rast.

Mjet shpërthyes te Administrata Pensionale e Kosovës

Zyrtarët e Policisë së Kosovës kanë njoftuar se në oborrin e Administratës Pensionale të Kosovës, është gjetur një mjet shpërthyes. Lajmin e ka konfirmuar për Radion Evropa e Lirë zëdhënësja e Policisë rajonale të Prishtinës, Flora Ahmeti.

“Rreth orës 11, Policia e Kosovës ka marrë njoftimin se në oborrin e Administratës së Pensionistëve të Kosovës është gjetur një mjet shpërthyes. Zyrtarët e Policisë së Kosovë dhe ekipet e deminimit kanë dalë në vendin e ngjarjes. Tash për tash janë duke verifikuar mjetin shpërthyes dhe duke shqyrtuar mundësitë nëse do të mund të çaktivizohet apo do të shpërthehet në mënyrë të kontrolluar”, ka thënë Ahmeti.

Zyrtarët e Policisë së Kosovës kanë larguar qytetarët nga vendi i ngjarjes dhe kanë bllokuar kalimin në afërsi të objektit të Administratës së Pensionistëve të Kosovës, siç kanë thënë, deri në kalimin e rrezikut.

Banka Botërore parasheh rënie të ulët të rritjes ekonomike në Kosovë

Banka Botërore ka parashikuar që rritja ekonomike për vitin 2016 në Kosovë të jetë 3.6 për qind, që paraqet një shkallë më të ulët me vitin paraprak, kur ishte 3.9 për qind. Ndërkaq, parashihet një rritje prej 3.7 për qind në vitin 2018,

“Masat rregulluese fiskale, të tilla si reformat e tatimeve dhe lufta kundër informalitetit, kanë vazhduar të rrisin performancën e të hyrave në gjysmën e parë të vitit 2016. Mirëpo, numri i madh i paparashikuar i përfituesve nga skema e transfereve sociale për veteranët e luftës ka shtuar presionet fiskale dhe ka shtyrë deficitin në rreth 2.5 për qind të Bruto Produktit Vendor”, thuhet në raportin e Bankës Botërore.

Këto të dhëna, janë publikuar në një konferencë për media në Prishtinë ku Banka Botërore ka prezantuar raportin për rritjen ekonomike në gjashtë vendet e Evropës Juglindore. Kjo rritje për këto vende, u tha sepritet të arrijë në 2.7 për qind në vitin 2016, nga 2.2 për qind sa ishte në vitin 2015.

Sipas raportit të fundit të Rregullt Ekonomik për Evropën Juglindore të Bankës Botërore thuhet se përshpejtimi i moderuar i rritjes është parashikuar të vazhdojë edhe gjatë viteve 2017 dhe 2018.

“Mbështetës i përshpejtimit të rritjes ishte Serbia, ekonomia më e madhe në rajon”, tha Barbara Cunha, ekonomiste e lartë e Bankës Botërore dhe autore kryesore e raportit.

“Serbia lëvizi nga rritja 0.7 për qind në vitin e kaluar si pasojë e përmbytjeve të vitit 2014 në rritjen e pritshme prej 2.5 për qind këtë vit”.

Ekonomitë e tjera në rajon pritet të mbajnë rritjen në mes 2.8 dhe 3.6 për qind në vitin 2016, me përjashtim të një ngadalësimi në Maqedoni.

Kosovarët, si verikoreanët, mund të udhëtojnë pa viza vetëm në 41 vende

Pasaporta e Kosovës renditet si e 85-ta në klasifikimin e pasaportave më të “fuqishme” në bazë të “Ranglistës së pasaportave botërore” , sipas një artikulli të publikuar kohëve të fundit në Forumin Botëror Ekonomik të Internetit.

Kosova renditet në të njëjtin nivel me Korenë e Veriut, duke marrë parasysh se qytetarët e të dy vendeve mund të udhëtojnë në 41 vende pa viza, transmeton rtk raportimin e mediumit ndërkombëtar “Global News Network”.

Kosova renditet poshtë shumë shteteve afrikane të tilla si Nigeria, Kongo, Liberia dhe Burundi.

Ndërsa vendet e rajonit janë renditur si më poshtë: Shqipëria (94 vende pa viza), Serbia (112), Kroacia (143), Maqedonia (107), Mali i Zi (103), dhe Bosnje dhe Hercegovina (98).

Në krye të listës janë Gjermania dhe Suedia, qytetarët e të cilit mund t’i vizitojnë 158 vende, pa pasur nevojë për të aplikuar për vizë.

Britania e Madhe renditet në vendin e dyte së bashku me Francën, Spanjën, Zvicrën dhe Finlandën.

Hoxhaj: Ekstremizmi i të rinjve në Ballkan vjen nga OJQ-të e huaja dhe klerikët

Enver Hoxhaj: prej vitit të kaluar askush nga Kosova nuk i është bashkuar IS-it

Ministri i Jashtëm i Kosovës, Enver Hoxhaj, thotë se vendet e tjera e kanë eksportuar ekstremizmin e dhunshëm në Ballkan, përfshirë Kosovën, ku është shënuar përqindje e lartë e shtetasve që luftojnë për grupin militant, Shteti Islamik (IS).

Autoritetet thonë se besojnë se afro 70 shqiptarë të Kosovës janë aktivë në Siri dhe Irak.

Enver Hoxhaj i tha mbrëmë agjencisë Associated Press, gjatë qëndrimit të tij në Asamblenë e përgjithshme të Kombeve të Bashkuara, se “radikalizimi i njerëzve të rinj në Ballkan, është eksportuar nga OJQ-të e ndryshme dhe klerikët” nga Lindja e Mesme.

Mëtuje, ai ka theksuar se “ne nuk mund t’i fajësojmë qeveritë e jashtme” për përhapje të radikalizmit në ballkan, pasi “ne nuk kemi dëshmi për këtë”.

Ministri i jashtëm i Kosovës, Enver Hoxhaj, theksoi se prej vitit të kaluar askush nga Kosova nuk i është bashkuar IS-it.

“Ne jemi shumë krenarë, që prej shtatorit të kaluar askush nuk është larguar nga Kosova për t’iu bashkuar Daeshit”, tha Hoxhaj, duke iu referuar IS-it me shprehjen arabe. rel

Diplomaticus – Visar Ymeri: Ndarja e shqiptarëve në futboll ka dashakeqësi

Kreu i lëvizjes Vetëvendosje, Visar Ymeri, ka komentuar mungesën e urimit për ekipin e futbollit të Kosovës, urimin që ai bëri vetëm për kombëtaren e Shqipërisë dhe komentet negative me të cilat është përballur më pas. Duke folur në emisionin “Diplomaticus” të gazetarit Erion Kaçorri në televizionin “News 24”, Ymeri deklaroi se qëndrimi politik që Vetëvendosje ka ndaj kësaj çështje është edhe i drejtë, edhe parimor, por është edhe i dobishëm.

“Në këtë drejtim ne do të mbetemi të vendosur. Ajo çfarë propozojmë ne është se Shqiptarët duhet t’i unifikojnë ligat Kosovë-Shqipëri dhe të kemi një kombëtare. Deri në qershor të këtij viti kishim një kombëtare dhe emocioni që u krijua gjithandej për sukseset e kombëtares tonë ka qenë i paçmueshëm dhe në këtë drejtim mendoj që ky projekti i ndarjes së shqiptarëve në futboll, aty ku ishim bashkë ka një dashakeqësi nga pas”, deklaron Ymeri.
Kreu i Vetëvendosjes bën një krahasim mes fushatës që Beogradi ka bërë kundër anëtarësimit të Kosovës në UNESCO, dhe fushatës për anëtarësimin e Kosovës në FIFA dhe UEFA, duke thënë se ato janë lehtësisht të krahasueshme.

“Serbia ka qenë shumë më e vendosur, me tone shumë më fashiste dhe raciste kundër pranimit të Republikës së Kosovës në UNESCO, sepse pranimi i Republikës së Kosovës në UNESCO do ta trajtonte trashëgiminë kulturore të Mesjetës në Republikën e Kosovës si një trashëgimi kulturore të Kosovës, e cila aktualisht është regjistruar si e Serbisë. Pra pranimi në UNESCO do të nënkuptonte ndarje nga Serbia në fushën e trashëgimisë kulturore, që është një fushë shumë e rëndësishme. Ndërkohë që pranimi në FIFA dhe UEFA realisht është ndarje nga Shqipëria. E ndau futbollin e Shqiptarëve në dysh. Nuk po them se krijon përçarje, por kjo ka rrezik të evoluojë në diçka që nuk na nevojitet”, thekon Ymeri.

I pyetur rreth pajisjes së drejtuesve dhe aktivistëve të Lëvizjes Vetëvendosje me pasaportat e Shqipërisë, ku qytetarët udhëtojnë pa viza në zonën Shengen ndryshe nga qytetarët e Kosovës, Ymeri e quan pajisjen me shtetësi të Shqipërisë një nder.

“Kjo është realizuar përmes presidentit Bujar Nishani. Mendoj se pajisja e disa prej zyrtarëve të lëvizjes Vetëvendosje me pasaportat dhe shtetësinë e Shqipërisë përveçse krenari është edhe një ndihmesë jashtëzakonisht e madhe, jo fort te udhëtimi pa viza sepse një gjë duhet ta dinë të gjithë se zyrtarët e lartë, qofshin ata deputetë apo zyrtare qeveritarë nuk është se kane pasur ndonjëherë problem për t’u pajisur me viza.

Kështu ne udhëtojmë në ato vende të cilat nuk e kanë njohur Kosovën dhe që nuk e pranojnë pasaportën e Kosovës. Një shembull shumë i thjeshtë është fakti se nuk mund të udhëtosh në Spanjë me pasaportën e Kosovës sepse Spanja nuk e njeh shtetin e Kosovës. Ju e dini që lëvizja Vetëvendosje është një subjekt politik i cili angazhimin e vet e ka vendosur në funksionin të arritjes së bashkimit të shqiptarëve në një shtet”, deklaron Visar Ymeri për “News 24”.

Kosova kandidon sërish për në UNESCO

Ulpiana

Kosova është duke i bërë të gjitha përgatitjet për të kandiduar sërish për anëtarësim në Agjencinë për Kulturë, Shkencë dhe Arsim të Kombeve të Bashkuara (UNESCO), konfirmojnë zyrtarët e Qeverisë së Kosovës.

Ndonëse ende nuk është konfirmuar ndonjë afat konkret se kur do të ndodhë kandidimi i Kosovës në këtë agjenci të Kombeve të Bashkuara, zëvendësministri i Punëve të Jashtme i Qeverisë së Kosovës, Valon Murtezaj, thotë për Radon Evropa e Lirë, se institucionet e Kosovës janë duke punuar në dy linja, duke forcuar koordinimin brenda institucioneve të Kosovës, por edhe koordinimin me faktorë të jashtëm, që kanë përvojë të madhe në fushat që i mbulon UNESCO, prej të cilave përvoja Kosova mund të mësojë.

“Institucionet e Republikës së Kosovës, Ministria e Jashtme, por edhe ministritë tjera që ndërlidhen me fushat që UNESCO i mbulon, janë duke bërë përparime në kuptimin e hartimit të dokumenteve shtesë qoftë legjislative apo strategjike, në mënyrë që të adresojë çështjet që lidhen me fushën e veprimtarisë të UNECO-s. Do të thotë, siç janë: kultura, trashëgimia kulturore, aspektet e edukimit, të komunikimit në përgjithësi, të diversitetit etj. Pra, në këtë kuptim, Qeveria e Republikës së Kosovës është duke punuar”, thotë Murtezaj.

Kandidimi i Kosovës për UNESCO, vitin e kaluar, ishte kundërshtuar mjaft fuqishëm nga Serbia, me pretendimin se Kosova dëshiron ta tjetërsojë dhe përvetësojë trashëgiminë kulturore dhe historike serbe në Kosovë. Në këtë pikë, kundërshtime ndaj anëtarësimit të Kosovës në UNECO, kishte bërë edhe Kisha Ortodokse Serbe.

Lidhur me atë se cili do të jetë reagimi i kësaj kishe përballë përpjekjes së sërishme të Kosovës për t’u anëtarësuar në UNESCO, përfaqësuesi i Kishës Ortodokse Serbe në Kosovë, igumeni Sava Janjiq, thotë se nuk dëshiron të flasë. Sipas tij, kjo kishë ende nuk e ka diskutuar këtë çështje për të nxjerrë qëndrimin e saj në opinion.

Por, megjithatë, igumeni Janjiq thotë për Radion Evropa e Lirë se respektimi i të gjitha besimeve, i lirive fetare, i objekteve dhe trashëgimive që u përkasin bashkësive fetare, duhet të tregohet me vepër.

“Të gjitha bashkësitë fetare dhe të gjitha objektet e tyre duhet të sigurohen në mënyrë të njëjtë. Ndërkaq, liria e besimit në të gjitha objektet fetare, duhet të jetë e garantuar me ligj, nëse dëshirojmë të shkojmë drejt të ardhmes”, shprehet Janjiq.

Ismajl Hasani, anëtar i Këshillit drejtues të Institutit për Mbrojtjen e Monumenteve të Kulturës në Kosovë, thotë për Radion Evropa e Lirë se Kosova e ka strategjinë për mbrojtjen e monumenteve të kulturës dhe monumenteve të tjera të kultit ose të kulturës materiale dhe të asaj shpirtërore.

“Është një kornizë e mjaftueshme, e cila garanton që në bashkëpunim me institucionet e sigurisë, në bashkëpunim me mekanizmat shtetëror në Republikën e Kosovës, të garantojë jo vetëm mbrojtjen, por edhe mirëmbajtjen, përkatësisht, përkujdesjen ndaj monumenteve kulturo-historike, qoftë ato të sferës materiale, qoftë ato të sferës shpirtërore”, thekson Hasani.

Ai shton se qeveritë e vendit, një pas një, kanë ndarë mjete të konsiderueshme për mbrojtjen e këtyre monumenteve dhe mbrojtjen e tillë e kanë bërë dhe po e bëjnë. Sipas Hasanit, Kosova edhe vitin e kaluar ka qenë e gatshme për t’u bërë anëtare e UNESCO-s, anëtarësim të cilin e pati kundërshtuar fuqishëm Serbia.

Hasani theksoi se kjo e fundit, edhe tash po bën fushatë në dëm të anëtarësimit të Kosovës në UNESCO dhe se politikës së Kosovës i takon që të lobojë edhe më tepër sa i takon përgatitjeve për raundin tjetër të anëtarësimit të saj në këtë agjenci të Kombeve të Bashkuara.

Zëvendësministri Murtezaj thotë se institucionet e Kosovës i kanë parasysh pengesat që Serbia përpiqet t’i bëj në rrugën e Kosovës drejt UNESCO-s.

“Po shihet që prapë politika dhe Qeveria e Serbisë po tregohet destruktive përmes aktiviteteve të ndryshme, me synim pengimin e Kosovës për t’u anëtarësuar në UNESCO. Por, në fund të fundit, ajo nuk do të ketë sukses”, shton Murtezaj.

Më 9 nëntor të vitit 2015, Konferenca e Përgjithshme e Organizatës së Kombeve të Bashkuara për Arsim, Shkencë dhe Kulturë (UNESCO), nuk votoi në favor të pranimit të Kosovës në këtë organizatë. Kosova nuk arriti të sigurojë votat e më shumë se dy të tretave të vendeve anëtare të kësaj organizate, të cilat ishin të nevojshme për pranimin e saj në UNESCO.(REL)

Analizë – Referendumi i proklamuar i Millorad Dodikut dhe hapja e Kutisë së Pandorës?! Nga Skënder MULLIQI

Më margjinalizmin e elitave intelektuale në shtetet e rajonit erdhën në shprehje elita të dobëta pushtetare . Në atë shtet ku nuk ka elita intelektuale në pushtet, populli nuk ka mundësi ti kontrollon rrjedhat shoqërore dhe rrjedhat politike . Nuk i kontrollon së vijnë në shprehje strukturat despotike . Vendet e Ballkanit kryesisht po udhëhiqën nga këto garnitura pushtetare më logjikë autokratike. Mentaliteti i këtyre liderëve shtetëror është mentalitet i kufizuar në kohë dhe në hapësirë.Më këta njerëz të politikes në pushtete nuk mund të presim ndonjë progres të proceseve demokratike . Qytetarët po jetojnë në konfuzion të plotë politikë dhe konfuzion të plotë edhe të rrjedhave ekonomike . Pa lirinë e cila prekët nuk kemi përparim të gjithëmbarshem .Regjimet diktatorile mbijetojne vetëm në saje të krizave , konflikteve të mbredshme dhe luftërave më ndonjë shtet fqinjë. Të kthehemi të tema e këtij shkrimi. Kryetari i “Republika Serpska’ Millorad Dodik ,referendumin moti të proklamuar për shkëputje nga Bosnja po mendon ta realizon më 25 shtator. Paralajmërimi për referendum ka ngritur shqetësime të reja në Ballkan edhe ashtu të pa stabilizuar për shkak të problemeve të pa zgjedhura etnike dhe problemeve të theksuara të natyrës ekonomike .Nese hapet Kutia e Pandorës, kjo do të hapët edhe në Maqedoni , në të cilin shtet nuk po realizohen të drejtat legjitime të shqiptarëve shtetformues në këtë banana republikë .Pushteti i deritashem i fashistit Nikolla Gruevskit mori shumë hapa të rrezikshem duke vrarë shqiptarë të pafajshem sa hërë që deshti, së gjeti shqiptarë servilë në pushtet. Kumanovën e shëndrroi në varrë të shqiptarëve etnik.Shqiptarët e ndarë pa drejtësisht nga trungu i lashtë ilirik nese fillon ndryshimi i kufijve, jo shumë i besueshem që do të lejohen , duhet të kanë një çasje shumë serioze për bashkimin e trojeve etnike. Të kthehemi pak të tema e referendumit në Bosnje. Edhe pse Beogradi zyrtar po bëhët sikur nuk e përkrahë referendumin , pak është kjo e besueshme . Dodik nuk do të kishte kurrfarë mundësish që krye në vete ti hynte kësaj pune të rrezikshme për paqën . Dodik nese nuk e tërheqë datën e referendumit mund të provokon një luftë të re të përmasave edhe më tragjike në këtë shtet dhe më gjerë.Për të kërkuar përkrahje në këtë synim udhëheqësi i serbeve në Bosnje,Millorad Dodik u takue më Vladimir Putinin në Kremlinë . Mbajtja eventuale e referendumit do ta kthente kohën e viteve të 90-ta , dhe do të ishte një tjetër avanturizëm i rrezikshem serbo-rusomadh në Ballkan. Duke pasur para sysh ende plagët e pa shëruara mirë në Bosnje nga pasojat e gjenocidit që shkaktuan forcat e regjimit kriminal të Millosheviqit, loja më zjarrë në këtë republikë , mund të sjellë një konflikt ushtarak ku do të përfshiheshin Rusia , shtetet evropiane bashkë më Amerikën .Viktima të një lufte eventuale prapë do të ishin qytetarët . Serbia e pa reformuar vetëm verbalisht po proklamohet kunder referendumit në Bosnje . Që 16 vite pas luftës në Kosovë , ky shtet më shërbimet e veta sekrete dhe më bandat e ndryshme nuk po pushon në planet për destabilizimin e Kosovës. Bashkësia Ndërkombëtare shumë e ka faktorizuar Serbinë karshi Kosovës . Me ngulm strukturat e BE-së po punojnë që Serbia të bëhët pjesë e saj, kurse Kosova ende ka mbetur e izoluar si në geto. Serbia nuk u dënua për gjenocid edhe pse la më mijëra viktima të pafajshme në Bosnje dhe në Kosovë. Synimi i Millosheviqit dhe Akademisë së Shkencave dhe të Arteve bashkë më Kishën Serbe ishte dhe ka mbetur krijimi i Serbisë së Madhe .Nese këtë synim nuk e arritën më luftë , po e vazhdojnë në kushte të paqës. Sinkronizimi i politikës së Beopgradit zyrtarë në Bosnje më Dodikun dhe në Kosovë më strukturat paralele serbe ,janë veprime të cilat flasin së Serbia nuk ka hequr dorë nga planet e saja ekspanzioniste .Ne këtë synim për Serbi të Madhe , është duke ua lehtësuar kur bëhët fjalë për Kosovën , kasta e pa përgjegjshme politike në pushtet.Gjithnjë e më shumë Serbia është duke e futur ndikimin e saj politik në Kosovë. Në këtë drejtim janë duke ua bërë argatin dashur ose pa dashur ,presidenti, Hashim Thaçi dhe kryeministri, Isa Mustafa , të cilët po nënshkruajnë marrveshje ku preket statusi politik i Kosovës. Të gjitha marrveshjët e deritashme asgjë të mirë nuk i sollën vendit , përpos premtimeve nga ana e BE-së. Nese kercënimet dhe shanatazhet e Serbisë pinë ujë , dhe janë duke pasur sukses , aq më afër do të kan edhe formimin e Serbisë së Madhe. Veriu ngadal po na del prej dorës , së nuk po ka kush e mbronë . Po cenohet seriozisht humbja e territorit edhe më Malin të Zi më rastin e shënimit të vijës kufitare .Ratifikimin në kuvend të Demarkacionit e pa mundësuan Opozita bashkë me qytetarët. Thaçi dhe Mustafa nënshkruan këto marrveshje pa i bërë transparente para opinionit të gjerë publik. Tash së fundi sikur kan vepruar rregullisht e zhvendosën vemendjën e opinionit më temën e Kishës së Millisheviqit të ndërtuar midis Prishitnës , e cila kishë është fund e krye e karakterit politikë pushtues në Kosovë. Lexues të ndëruar i përmenda këto fakte , por ka edhe shumë fakte të tjera të cilat nuk i kam theksuar , por ndoshta edhe i kam harruar ti përmend , të cilat flasin së Serbia po e vazhdon ofenzivën politike në Bosnjë e veqmas në Kosovë për realizmin e planeve të saja pushtuese. Më këtë kastë politike në pushtet rruga bukur shumë i është hapur …

Ministri i paedukatë i Arsimit! – Nga Florim Zeqa

Nëse nisemi nga parimi se; “Dita e mirë shifet në mëngjes”, atëherë seanca e parë vjeshtore e Kuvendit të Republikës së Kosovës lenë pak për të dëshiruar. Përveq mungesës së kryeministrit, munguan edhe zv.kryeministrat dhe gjysma e kabinetit qeveritar.

Si zakonisht, dy pikat e para të seancës nxitën polemika dhe reagime mes deputetëve të grupeve parlamentare të kundërta në kuvend. Megjithatë pika më e nxehtë ishte ajo e “Pyetjeve të deputetëve drejtuar kabinetit qeveritar”.

Kësaj radhe në thumb të kritikave ishte Ministri i (paedukatë) i Arsimit, zoti Arsim Bajrami, i cili nuk qe në gjendje të jepë përgjigje të duhur lidhur me tenderin skandaloz 7 milionësh për botimin e librave shkollor,…nuk qe në gjendje të arsyetoj as stoqet me libra të përdorueshëm nga vitet paraprake që rrijnë në sirtarët dhe bodrumet e shkollave fillore dhe të mesme gjithandej Kosovës.

Ministri Bajrami, përveqse nuk ishte në gjendje të jepë përgjigje në rritjen e tenderit nga 5 që ishte vitin e kaluar në 7 milion për këtë vit, nuk dha spjegime shtesë për mënyrën si u dha tenderi 7 milionësh për këtë vit shkollor.

Poashtu Ministri i Arsimit, ishte i paqartë dhe jo bindës edhe për shumë probleme të tjera që kanë të bëjnë me dërgimin e librave shkollor për nxënësit shqiptar në Luginën e Preshevës, anipse gjithnjë thirrej në “marrëveshjen” e reciprocitetit me Serbinë, përderisa kjo e fundit për çdo vit i futë në Kosovë tekstet diskriminuese dhe materiale tjera propaganduese antishqiptare në Kosovë.

Ministri i paedukatë Arsim Bajrami, në vend që ta ndjejë peshën e përgjegjësisë për pamundësinë e parandalimit të hyrjes së librave nga Serbia në Kosovë, si gjithnjë “topin” ua hudhke doganave dhe policisë kufitare, gjoja si “përgjegjës” kryesor të moszbatimit të reciprocitetit të arritur me marrëveshjet e Brukselit.

Në këtë rast, qëllimisht dhe pa ndonjë pendesë Arsim Bajrami mundohej të largohej nga përgjegjësia që i takon nga hierarkia qeverisëse, si ministër i Arsimit dhe si nënshkrues i marrëveshjes së reciprocitetit për tekstet shkollore me Serbinë në Bruksel.

Injorimi i mësimdhënësve të viteve ’90, veprim i turpshëm e ministrit Bajrami

Në pyetjen e një deputeti për njohjen e meritave dhe kontributit të mësimdhënësve përgjatë viteve të ’90-ta në Kosovë, ministri Bajrami ishte sa cinik po aq edhe fyes; “Ishin pjesë e rezistencës së përgjithsme popullore, andaj nuk u takon asnjë lloj dekorimi apo njohje e kontributit për ato vite”.

Përderisa në shtetin e ri të Kosovës, çdonjëri që ishte I burgosur qoftë për vëllavrasje, hajni apo involvim në vepra më të rënda kriminale dhe korruptive, çdo ditë nga pushtetarët aktual dekorohet në emër të “kontributit” për shtetin e Kosovës,…atëherë vetvetiu shtrohet pyetja; pse u dashka të privohen nga ajo e drejtë mësimdhënësit, ata që sakrifikuan vetën dhe familjet e tyre, vetëm e vetëm për të mbajtur gjallë arsimin shqip për rreth një dekadë nën rrethanat e okupimit barbar serb?

Në anën tjetër, u dekoruan me titullin “veteran” të luftës, njerëzit që nuk kanë qenë fare në Kosovë gjatë përiudhës së luftës çlirimtare, e lëre më që nuk i kanë parë me sy vijat e frontit të luftës,…titullin “veteran” e kanë marrë edhe ish bashkëpunëtorët dhe spiunët e Serbisë, apo edhe dezertorët e luftës për liri, madje edhe grupet minoritare kanë gëzuar të drejtën të shpërblehen dhe të lavdërohen si “kontribuues” për shtetbërjen e Kosovës, kurse ata që dhanë gjithçka patën, dhanë maksimumin për të mbajtur gjallë shtetësinë e Kosovës, duke mbajtur gjallë arsimin shqip në kohët më të vështira,…çuditërisht dhe paradoksalisht kanë mbetur të anashkaluar dhe harruar nga shteti dhe shoqëria!

Ndërsa ministri i paedukatë, Arsim Bajrami, pa fije turpi thotë se nuk meritojnë asgjë!

Unë si mësimdhënës i viteve të 90-ta e kam një pyetje të sinqertë për ministrin e paedukatë Arsim Bajrami; “Ku ishit ju zoti ministër nga viti 1990-1999, në cilin “kamp” të rezistencë popullore ishit dhe cilit komunitet i përkisnit atë kohë?”,… kur ne që sakrifikonim çdo ditë për mbrojtjen e arsimit shqip dhe nuk nënshtroheshim, ndiqeshim, rraheshim, burgoseshim dhe vriteshim nga regjimi okupues serb.

Ju zoti ministër Bajrami, për punën që bëni sot në shtetin e lirë të Kosovës,

përveq pagave të majme, që në atë kohë ne nuk i kishim,…ju sot merrni edhe meditje shtesë dhe benificione të panumërta në emër të “shërbimit” për shtetin e Kosovës, por që ju nuk i kualifikoni si shpërblim dhe as dekorata, por që në realitet janë zhvatje e përdithsme që i bëni shtetit të Kosovës.

A nuk janë shpërblime e dekorata, mëditjet dhe benificionet që marrin deputetët dhe ministrat, madje edhe pas përfundimit të mandateve,…ndërsa ju pa fije turpi injoroni kontributin e mësimdhënësve përgjatë viteve 1990-99.

Sot çdo kush ka të drejtë të përfiton në emër të “punës” dhe “angazhimeve” për shtetin e Kosovës, pos atyre që për një dekadë rresht dhanë çdo gjë për arsimin shqip dhe mos nënshtrimin ndaj okupatorit serb.

Seanca e parë vjeshtore e nxori edhe një të vërtetë të madhe, atë të pozicionit nënshtrues të kryeministrit të vendit ndaj grupit “Pronto”. Sikur të mos ishte kështu, ndaj deklaratës së ministrit të paedukatë të Arsimit kundër kontributit të mësimdhënësve shqiptar të viteve të ’90-ta, do duhej të raegonte menjëherë kryeministri Isa Mustafa, si ish ministër i Financave në Qeverinë në ekzil, apo siq e quajnë me të drejtë disa të tjerë, “Qeveria e Bukoshit”, nga e cila për çdo muaj ndaheshin nga 2 milion marka gjermane (donacione të mërgimtarëve) vetëm për financimin e sektorit të Arsimit.

Nëse e keni ndërgjegjën e pastër zoti kryeministër, fol dhe reago ndaj deklaratës skandaloze të ministrit Bajrami, pasi ai përveq që fyeu dhjetëramijëra mësimdhënës të viteve të ’90-ta, injoroi pjesën më të lavdishme të historisë së arsimit shqip në Kosovë.

Mbi 140 mijë punëkërkues të regjistruar në Zyrat për punësim, por numri i të papunëve është shumë më i madh

PRISHTINË – Papunësia vazhdon të mbetet fenomen shqetësues për shoqërinë, kurse sfidë për institucionet e Kosovës. Sipas shifrave zyrtare, tregu i punës në Kosovë vazhdon të jetë në gjendje më të rëndë krahasuar me vendet e Ballkanit Perëndimor.

Sipas shifrave zyrtare, papunësia në Kosovë thuhet se është 32.9 për qind, kurse sipas shifrave të përfaqësuesve të punëtorëve, thuhet se niveli i papunësisë është 45 për qind.

Për të përmirësuar tregun e punës në Kosovë, autoritetet kompetente vazhdimisht kanë kërkuar nga të papunët që të paraqiten në zyrat e punësimit, të cilat funksionojnë në kuadër të Ministrisë së Punës dhe Mirëqenies Sociale.

Numri i përgjithshëm i të regjistruarve në këto zyra, është rreth një qind e dyzet mijë punëkërkues.

Rreth tetë mijë është numri i punëkërkuesve me nivel të lartë të arsimimit.

Por, të dekurajuar nga mundësia e gjetjes së një vendi të lirë të punës nga regjistrimi në këto zyra, jo të gjithë të papunët kanë vendosur emrat në këto lista.

Arbeni, 27-vjeçar është i papunë dhe para dy vjetësh thotë se ka qenë i regjistruar në zyrtar e punësimit. Por, ai tregon se është çregjistruar për shkak se nuk ka arritur të sigurojë ndonjë vend pune nëpërmjet këtij departamenti.

“Kam qenë i regjistruar në zyrat për punësim, por ishte e pamundur për të gjetur një punë dhe më vonë jam çregjistruar nga ajo zyre, sepse është e kotë. Tash nuk kam punë të qëndrueshme. Punoj herë pas here në sektorin privat, çka ka nevojë”, thotë Arbeni.

Kurse, i riu tjetër, Besnik Thaçi, student në Fakultetin e Edukimit Fizik dhe i Sportit, tregon se edhe gjatë studimeve ka kërkuar punë jashtë profesionit të tij, por nuk ka arritur të sigurojë.

Ai thotë se nëse arrin të gjejë ndonjë punë, pas përfundimit të studimeve, do të regjistrohet në këto zyre.

“Punë kam kërkuar, jo në profesionin tim. Pasi dëshiroj të punoj edhe për përvojë pune, por edhe për mjete financiare”, tregon Besniku.

Edhe nënkryetari në Bashkimin e Sindikatave të Pavarura të Kosovës, (BSPK) Alush Sejdiu, për Radion Evropa e Lirë, thotë se jo të gjithë të papunët janë të regjistruar në zyrat e punësimit.

“Për arsye se edhe pritjet janë të gjata dhe zgjidhja e kërkesave të tyre. Kështu që njerëzit janë demotivuar nga pritjet dhe nuk janë regjistruar. Por, duhet të tregojmë edhe çështjet pozitive, zyra e punësimit ka bërë një avancim, ka një program të avancuar të evidentimit me financim të Bashkimit Evropian”, thotë Sejdiu.

Sidoqoftë, sipas Ministrisë për Punë dhe Mirëqenie Sociale, thuhet se numri i përgjithshëm i punëkërkuesve të ndërmjetësuar në punësim të rregullt përmes Zyrave të Punësimit për vitin 2016 është rreth 3.000 – prej tyre mbi 1.000 janë femra.

Kjo ministri, ndërkaq, bën të ditur se vitin e kaluar ka arritur të punësojë mbi 17 mijë persona.

Ndryshe, sipas rezultateve të anketës së fuqisë punëtore për vitin 2015, publikuar në muajin qershor të këtij viti, nga Agjencia e Statistikave të Kosovës, thuhet se dy të tretat e popullsisë së Kosovës nga 15 deri në 64 vjeç, është në moshë pune, por rreth 150 mijë persona të kësaj moshe vitin e kaluar kanë qenë të papunë.

Ekspertë për çështje ekonomike, konsiderojnë se shifrat zyrtare të punësimit nuk janë reale. Drejtori i Qendrës për Hulumtime Strategjike dhe Sociale, Ibrahim Rexhepi, shifrat e papunësisë në Kosovë i quan shifra kabinetike.

Rexhepi thotë për Radion Evropa e Lirë se ulja e papunësisë nuk mund të bëhet pa ndonjë zhvillim ekonomik, e në Kosovë nuk ka pasur ndonjë përmirësim që reflekton në uljen e shkallës së papunësisë.

“Prandaj, nëse kjo qeveri apo cilado qeveri tjetër, nuk nxit cikël investiv, nuk krijon ambient për një rritje shumë më të madhe ekonomike, atëherë problemet do të mbesin të njëjtat dhe ndoshta premtimet do të jenë të njëjta, meqenëse nuk po shoh dhe nuk po vërej një veprim konkret apo një vizion të qartë se si të nxitet zhvillimi ekonomik”, thotë Rexhepi.

Ai thotë se kohëve të fundit institucionet e Kosovës, kanë anashkaluar problemet ekonomike, duke u fokusuar në problemet politike.

“Mund të zgjidhet edhe problemi i demarkacionit, edhe problemi i Asociacionit të Komunave, dhe çfarëdo problemi tjetër mund të tejkalohet. Por, problemi i zhvillimit ekonomik dhe problemi i punësimit do të mbesin probleme akute që kërkojnë një konsensus dhe një fokusim afatgjatë, meqenëse nuk janë çështje që mund të përfundojnë me një vit pune apo me një mandat”, vlerëson për Radion Evropa e Lirë, Ibrahim Rexhepi.

Po, sipas anketës së Agjencisë se Statistikave të Kosovës, pjesa më e madhe e të papunëve u përket personave të moshës 15 deri në 34 vjeç, që përbëjnë 62 për qind të të papunëve.

Shkalla më e lartë e papunësisë paraqitet te personat me nivel të ulët të arsimimit, me rreth 74 për qind.

Po, gjatë vitit 2015, rreth 14 për qind e të papunëve, nuk kanë kërkuar punë, sepse nuk besonin se kishte punë në dispozicion dhe janë dekurajuar nga kjo çështje.

Papunësia, e vlerësuar nga organizatat vendore dhe ndërkombëtare si problem kryesor për shoqërinë, për çdo fushatë elektorale, nga partitë politike është shfrytëzuar si premtim kryesor.

Në zgjedhjet e fundit parlamentare, partitë politike kishin premtuar krijimin e 120, eventualisht 200 mijë vendeve të reja të punës. (REL)

Adem Salihaj: Vazhdoj të jem kundër koalicionit me PDK-në

Deputeti nga LDK-ja, Adem Salihaj, ka thënë se vazhdon të jetë prapa mendimit që koalicioni me PDK, nuk është dashur të ndodhte.

“Unë kam qenë kundër koalicionit, gjithmonë e kam pohuar nuk e kam ndryshuar këtë qëndrim, ne kemi fituar vota duke thënë se nuk do bëjmë koalicion me PDK-në”, tha Salihaj.

“Unë nuk kam simpati për këtë koalicion dhe qeverisje, sado që mund të themi të jemi real se korrupsioni nuk është sikur ka qenë në qeverisjen e Thaçit. Mustafa disa e ka ndaluar atë trend negativ, por aspekti negativ i gjithë kësaj është se ne ja kemi mundësuar një vazhdim të qeverisjes një strukture që sipas mendimi tim nuk i bënë mirë Kosovës dhe nuk është dashur të jetë në pushtet”.

Salihaj ka thënë se është i bindur se LDK-ja ka pësuar në elektorat pasi ka bërë koalicion me PDK-në.

Ai gjithashtu ka thënë se premtimet e fushatës natyrisht që nuk janë arritur, pasi për një mandat nuk mund të realizohen të gjithë ato premtime.

“Premtimet e fushatës nuk mund të bëhen asnjëherë në tërësi, nëse është premtuar të punësohen 200 mijë nuk është mundur në katër vite”.

Duke folur për vrasjet e pasluftës, Salihaj ka thënë se nuk beson se do zbardhen, raporton Klan Kosova.

“Natyrisht që deri më tani nuk janë zbardhur dhe unë nuk pres që të zbardhen”.

“Asnjë hap nuk ka mundur të bëhet sepse ato struktura që janë të involvuara në ato raste janë aty, e natyrisht që nuk do e zbulojnë vetveten. Këto raste mund të zbulohen kur në Kosovë qeverisë një forcë që nuk ka lidhje me krimin”.

Salihaj ka folur edhe për qëndrimin e tij lidhur për marrëveshjen e Demarkacionit.

“Tani për tani është një lloj qetësie, nuk e di kur do të jetë seanca e ardhshme por deri më tani nuk ka asnjë ndryshim në çështjen e Demarkacionit, tani për tani qëndrimet mbesin ato që i kemi pasur, unë vazhdoj ta kem qëndrimin që Demarkacioni nuk është në rregull dhe duhet të rishikohet si proces në mënyrë që të bëhet përpjekje së bashku me Malin e Zi”.

“Në këtë variant nuk do e votoj”, tha ai.

Salihaj, ka thënë se për çështjen e Demarkacionit ka biseduar me anëtarët e partisë së tij, mirëpo asnjëherë nuk ka pasur presion që ta votojë këtë formë të kësaj marrëveshje.

“Kemi pasur shumë biseda me strukturat e partisë në shumë nivele, bisedat kanë qenë korrekte, dashamirëse, nuk ka pasur shantazhe, ka pasur përpjekje që të na bindin që Demarkacioni është në rregull dhe faktet që janë marrë parasysh janë ato që janë të kadastrit”.

Ai ka thënë se asnjëra prej opsioneve, pra as miratimi e as mosmiratimi i kësaj marrëveshje nuk i bëjnë mirë Kosovës.

“Të dy variantet nuk janë të mira, edhe miratimi edhe mosmiratimi i sjellin dëme Kosovës. E keqja më e vogël është nëse nuk miratohet, se sa të miratohet”,tha Salihaj.

Gjuriq: Në ‘Luginën e diellit’ po vendosen serbë të Kralevës

Drejtori i Zyrës për Kosovën në Qeverinë e Serbisë, Marko Gjuriq, ka deklaruar në Kralevë se në vendbanimin “Lugina e diellit”, e cila është duke u ndërtuar në komunën e Zveçanit, fare pranë lagjes “Kroi i Vitakut” në veri të Mitrovicës, do të vendosen serbë që aktualisht jetojnë në Kralevë.

Sipas një komunikate të Zyrës për Kosovën në Qeverinë e Serbisë, të cilën e përcjellin mediet serbe në veri të Mitrovicës, Gjuriq ka thënë se në Kralevë aktualisht jetojnë më shumë se 20 mijë refugjatë nga Kosova, të cilët presin të kthehen në Kosovë, shkruan gazeta ‘Zeri’.

“Jemi marrë vesh që drejtuesit e Kralevës të kyçen në procesin e regjistrimit të familjeve të interesuara të kthehen në Kosovë dhe të jetojnë në lagjen ‘Sunca Dolina’, popullimi i së cilës do të fillojë pas përfundimit të ndërtimit të këtij vendbanimi, pas dy vjetësh.

‘Suncana Dolina’ do të përfundojë në vitin 2018. Do të thotë se në mesin e vitit 2017 ne duhet që njerëzve t’ua paraqesim se ku saktësisht dëshirojnë të kthehen, se si duken ato shtëpi, në të cilat secili prej nesh do të dëshironte të jetonte, sepse nuk bëhet fjalë për ndërtesa sociale, por objekte kualitative”, ka thënë Gjuriq në takimin me kryetarin e Kralevës, Predrag Terziq.

Mustafa e Vuçiçi pritet të dialogojnë në Nju Jork

Për nëntë muaj nuk kanë zhvilluar as edhe një takim mes tyre në Bruksel. Kryeministri i Kosovës, Isa Mustafa, e ai i Serbisë Aleksandër Vuçiçi, ua kanë lënë vartësve të tyre vazhdimin e dialogut në nivel teknik.

Në anën tjetër, e gjithë energjia e ministres për Dialog, Edita Tahiri, dhe drejtorit për Kosovë në Qeverinë e Serbisë, Marko Gjuriq është përqendruar në zbatimin e marrëveshjeve të arritura më herët.

Të dyja palët i vunë kushte njëra-tjetrës për zbatimin e marrëveshjeve. Madje, kjo periudhë u karakterizua me bisedime që zgjatën edhe mbi 20 orë, e në shumicën e rasteve përfunduan pa rezultate.

Se kur kryeministrat do të mund të takohen, këtë nuk e dinë në zyrën e Isa Mustafës.

Por, ata mund të takohen shumë shpejt, pasi vizitën në Shtetet e Bashkuara të Amerikës, Mustafa e Vuciq do ta shfrytëzojnë edhe për të biseduar për ecurinë e dialogut të filluar në vitin 2011.

Kosova larg anëtarësimit në INTERPOL

Kosova, me gjasë, do të duhet të presë anëtarësimin në dy organizatat ndërkombëtare të sigurisë, INTERPOL dhe EUROPOL, për të paktën edhe një vit tjetër, thonë njohës të mirë të rrethanave të sigurisë.

Sipas tyre, anëtarësimi i Kosovës në Interpol, së fundi, është zvarritur edhe për shkak të, siç thuhet, mos saktësimit të afatit kohor për shqyrtimin e kërkesës së saj nga mekanizmat që drejtojnë këtë institucion ndërkombëtar.

Në prillin e vitit të kaluar, Kosova aplikoi për anëtarësim me të drejta të plota në organizatën ndërkombëtare për siguri, INTERPOL.

Zyrtarë të Ministrisë së Punëve të Brendshme thonë se Kosova me mekanizmat e saj të sigurisë është e gatshme për të qenë pjesë e Interpolit dhe po bëhen përpjekje për të arritur këtë synim.

Shqipe Mjekiqi, këshilltare e lartë politike e ministrit të Punëve të Brendshme, i tha Radios Evropa e Lirë se institucionet e Kosovës janë duke zhvilluar aktivitete lobuese që Kosova sa më parë të jetë pjesë e INTERPOLIT dhemekanizmave të tjerë ndërkombëtarë të sigurisë.

“Aplikacioni i Kosovës në Interpol është marrë parasysh nga komiteti ekzekutiv, mirëpo komiteti ka vendosur sikur aplikacionin e Kosovës po ashtu edhe të Ishujve Solomon dhe të Palestinës të mos e fus në agjendë të Asamblesë së Përgjithshme për këtë vit, që do të mbahet në fillim të nëntorit. Ajo do të lihet për një rast tjetër, pasi që komiteti ekzekutiv të çojë misione vlerësimi në këto tri vende që kanë aplikuar, për të parë nëse ato janë të gatshme për anëtarësim”, tha Mjekiqi.

Sipas saj, nga mos anëtarësimi i Kosovës në INTERPOL dhe EUROPOL nuk dëmtohet vetëm Kosova dhe rajoni, por edhe vendet e tjera në Evropë dhe me gjerë.

“Në qasje, në informacione, një shkëmbim i drejtpërdrejt i informacioneve do të ishte kontributi më i madh që anëtarësimi i Kosovës do të jepte. Mirëpo, tash për tash, dëmtohet (Kosova) meqenëse policia nuk mund të shkëmbejë informacione të drejtpërdrejta me INTERPOL-in dhe nuk mund të marrë informata”, tha Mjekiqi.

Ndryshe nga INTERPOL-i, anëtarësimi i Kosovës në EUROPOL – një mekanizëm i sigurisë në Evropë – varet nga anëtarësimi i saj në BE, thotë Mjekiqi, duke shtuar se Kosova ka një lloj bashkëpunimi me këtë mekanizëm dhe do që të nënshkruajë me EUROPOL-in një marrëveshje strategjike.

Pavarësisht faktit se Kosova ka shpallur pavarësinë e saj, këtu e 8 vjet më parë, ajo nuk ka arritur të bëhet anëtare e një numri organizatash ndërkombëtare, përfshirë edhe dy mekanizmat e rëndësishëm të sigurisë, që sipas analistëve vendorë,e bën më të vështirë edhe punën e saj në luftimin e krimit të organizuar, krimit tejkufitar dhe mbi të gjitha ekstremizmin e dhunshëm.

Policia e Kosovës, që nga themelimi i saj, ka vendosur bashkëpunim me INTERPOL-in dhe EUROPOL-in, por shkëmbimi i informatave kryesisht bëhet përmes Zyrës së Administratës së Kombeve të Bashkuara, që ka trashëguar Misionin e OKB-së në Kosovë, pas ristrukturimit të tij.

Ministria e Punëve të Jashtme e Qeverisë së Kosovës thotë se institucionet përgjegjëse kanë kryer përgatitjet e nevojshme dhe infrastrukturën e brendshme për anëtarësim në INTERPOL dhe EUROPOL.

Zëvendësministri i Punëve të Jashtme në Qeverinë e Kosovës, Valon Murtezaj, i tha Radios Evropa e Lirë se anëtarësimi i Kosovës në mekanizmat ndërkombëtarë të sigurisë është në vizionin e fuqizimit të shtetit të Kosovës.

“Kosova plotëson standardet në masën me të madhe, por megjithatë janë edhe disa hapa të cilët duhet të koordinohen mirë, sepse kjo është çështje e votave dhe shpesh herë është e nevojshme që të kesh numrin e duhur të përkrahësve, në forumet vendimmarrëse, për t’u anëtarësuar. Kosova është në rrugë të mirë në këtë drejtim”, tha Murtezaj.

Por, për përfaqësuesit e organizatave joqeveritare që merren me çështje të sigurisë, anëtarësimi i Kosovës në mekanizmat e sigurisë do të ketë vështirësi për shkak të, siç thonë, ngecjes në fushën e lobimit.

Donika Emini, hulumtuese në Qendra Kosovare për Studime të Sigurisë, tha për Radion Evropa e Lirë se është më me rëndësi fushata e lobimit për anëtarësim sesa vetë aplikimi pa një mbështetje.

“Anëtarësimi në INTERPOL nuk është vetëm çështje teknike; është çështje plotësisht politike. Kosova këtu ka stagnuar plotësisht. Deri tani nuk është vërejtur që është bërë ndonjë lëvizje drejt lobimit më të fuqishëm të Kosovës në lidhje me ketë çështje”, tha Emini.

Dy institucionet ndërkombëtare të sigurisë, EUROPOL dhe INTERPOL, janë mekanizmat më të rëndësishëm dhe njëra nga detyrat e tyre shtrihet në fushën e bashkëpunimit ndërkombëtar të policisë në luftimin e krimit, të çdo lloji. (REL)

Rrahja e biznesmenit: Rama rrëfen bisedën në zyrë me Faadi Mitrin

Kreu i qeverisë Edi Rama, në reagimin e tij nga foltorja e Kuvendit për biznesmenin Faadi Mitri, që pasi u masakrua u largua me barrel bashkë me investimin nga vendi ynë, zbardhi detaje nga takimi që mes tyre.

Në përgjigje të akuzave të Berishës dhe opozitës, Rama deklaroi se fajtorë për gjithë sa ndodhi është gjykatësja e korruiptuar që lëshoi pa pritut e pa kuptuar vendimin për truall brenda zonës së investimit dhe gjithë sistemi i drejtësisë që la peshqesh opozita.

“Sali koha jote ka vdekur, lëre kohën tënde, se sa herë merr fjalën do të na cosh për vizitë në varrezën e kujtimeve të tua, ato thuaja vetës para pasqyrës, pasi sot para pasqyrës sipërmarrësi që u largua mund të shikojë plagët e sistemit që ngrite ti. Ai sipërimarrës që u largua ka ardhur në zyrën time pasi ne kemi marrë detyrën dhe më ka parashtruar nga a në zh të gjithë kalvarin e zvarritjeve dhe të tmerreve të viteve të tëra kur nuk merrte dot zgjidhje për problem që ishin thjesht e vetëm të natyrës administrative”- tha Rama.

Sipas Ramës, sikundër e ka nënvizuar vetë biznesmeni edhe në deklaratë, qeveria e tij ia zgjidhi një më një problemet.

“Pas zgjidhjes së tyre pa pritur e pa kujtuar del dhe i jep dajak një gjykatëse që kthen në mënyrën më abuzive dhe të paimagjinueshme pronë brenda zonës së investimeve, e kthen pronën në korrik të këtij viti, që bëhet shkaku i shpërthimit të konfliktit. Kjo është e vëretëta dhe atë goditje atij, ata që ia dhanë ia dhanë sepse fuqinë e morën nga gjykatat e tua Sali dhe nga gjykatësit e tu Sali dhe nga sistemi I drejtësisë që ngritët të gjithë bashkë e që me reformën në drejtësi duam ta përmbysim jo vetëm në letër, por një orë e më parë me vetingun, ku si ajo gjykatësja që bën kthim prone me motiovacionin që ata që e marin pronën kanë korrur barin, e si të tjerë të dalin e të japin llogari”- tha Rama.

“Si ka mundësi që barbarizohet një sipërmarrës dhe Saliu nuk flet”- vijoi më tej Rama, duke shtuar” Saliu flet për çdo gjë, nuk lë shpifës dixhital pa e promovuar në atë tabelën e tij të shpifje, por për këtë nuk flet. Goditja sipërmarrësit nuk i ka ardhur nga klima e biznesnesit që i ka krijuar qeveria, i ka ardhur nga gjykatësja që në korrik të këtij viti dha një vendim ku kositësi i barit bëhet pronar dhe i kthehet prona mu brenda ku do zhvillohej investimi. Nga kositës fiton të drejtën që si pronar i lëshohet sipërmarrësit. Saliu e njeh mirë atë gjykatëse. Në të njëjtën formë që ka operuar pushteti i Saliut me pronat, vazhdon të operojë edhe në rastin konkret. Qesh Sali sa të duash por je i vetëdenoncuar nga fakti që nuk e ke hapur gojën.

Autoritetet e Kosovës kthejnë Marko Gjuriqin në Serbi

Autoritetet e Kosovës kanë kthyer mbrapsht për në Serbi, shefin e Zyrës për Kosovën në Qeverinë e Serbisë, Marko Gjuriq, i cili po vizitonte komunën e Graçanicës.

Zëvendësministri i Punëve të Jashtme në Qeverinë e Kosovës, Valon Murtezaj, ka thënë për Radion Evropa e Lirë, si edhe hera tjera, Gjuriq, ndonëse kishte leje për këtë vizitë, ka treguar sjellje të pa disiplinuar që nuk i takojnë një politikani serioz.

Gjuriq, sipas Murtezajt e ka shkelur marrëveshjen për vizitat e zyrtarëve serb në Kosovë, e cila kërkon nga ta që të mos përçojnë mesazhe nxitëse politike, andaj konform procedurave është detyruar ta lëshojë Kosovën.

“Një gjë duhet të dihet se në Kosovë veprojnë apo qeverisin institucionet e Republikës se Kosovës. Këtë se pari duhet ta kuptoj vet Gjuriqi”, ka deklaruar Murtezaj.

Vendimi i autoriteteve të Kosovës për kthimin e Gjuriqit në Serbi nuk ishte i pari, pasi që veprime të tilla janë marrë edhe në të kaluarën ndaj zyrtarëve serb që nuk kishin përfillur marrëveshjen. rel

Prishtina: Nuk ka asnjë indikacion për luftë me Malin e Zi

Nuk ka asnjë indikacion për ndonjë konflikt të armatosur të mundshëm apo luftë ndërmjet Kosovës dhe Malit të Zi, pretekst i së cilës do të ishte Demarkacioni i kufirit ndërmjet dy shteteve, vlerësojnë zyrtarë të Qeverisë së Kosovës, si dhe njohës të zhvillimeve politike dhe të rrethanave të sigurisë në Kosovë.

Reagimet e tilla të zyrtarëve të Qeverisë, por edhe analistëve të çështjeve politike dhe të sigurisë, vijnë pas deklaratave të Albin Kurtit, deputet i Kuvendit të Kosovës nga radhët e subjektit më të madh opozitar Lëvizja Vetëvendosje, i cili nga mediet vendore është cituar të ketë thënë se “Demarkacioni i Murat Mehës (kryetar i Komisionit shtetëror për shënjimin e vijës kufitare) bën konfliktin, luftën dhe gjakderdhjet e reja me Malin e Zi”.

Bajram Gecaj, ministër i Administrimit të Pushtetit Lokal i Qeverisë së Kosovës, duke folur për Radion Evropa e Lirë, i quan deklaratat e deputetit Kurti si të papërgjegjshme, si dhe ka hedhur poshtë çdo pretendim se marrëveshja për Demarkacion me Malin e Zi, e formës së tanishme, prodhon situatë për ndonjë luftë të mundshme me Malin e Zi.

“Nuk ka kurrfarë indikacionesh dhe unë besoj, sepse ne jemi në kontakte të vazhdueshme me këtë shtet, sepse është shtet mik, është shtet fqinj, me të cilin kemi marrëdhënie jashtëzakonisht të mira. Nuk besoj që këto deklarata do të merren si deklarata serioze. Megjithatë, është plotësisht e papërgjegjshme që një lider i një lëvizje apo një subjekti politik, i cili është subjekt parlamentar, të bëj deklarata të tilla, deklarata, të cilat, fatkeqësisht, do ta orientonin Kosovën drejt një lufte me një shtet, me të cilin nuk kemi aspak dhe asnjë problem kontestues”, ka thënë ministri Gecaj.

Deklaratën e deputetit Kurti e e vlerëson si të papërgjegjshme edhe Halil Matoshi, analist i çështjeve politike.

Ai thotë për Radion Evropa e Lirë se pas një shekulli, në rajon ekziston një stabilitet i qëndrueshëm dhe askush i përgjegjshëm nuk do të ishte i gatshëm ta prishë këtë stabilitet, e posaçërisht duke dërguar mesazhe kërcënuese ndaj Malit të Zi, që sipas Matoshit, është një nga shtetet mike të Kosovës.

“Jo vetëm që e ka njohur shtetin e ri, por ia ka shtrirë edhe dorën e miqësisë, do të thosha. Dhe, duke qenë se është kandidat potencial për NATO, Mali i Zi, praktikisht duhet të ishte partner i Kosovës në integrimet euro-atlantike dhe jo dikujt t’i shkojë mendja që të kërcënojë me luftë një shtet fqinj. Prandaj, mendoj që zoti Kurti nuk është serioz në këtë deklaratë dhe mendoj që nga publiku nuk do të merret seriozisht”.

Ish deputeti i Kuvendit të Kosovës, Burim Ramadani, profesor i Sigurisë kombëtare në Kolegjin ISPE, thotë për Radion Evropa e Lirë se deklaratat dhe parashikimet e deputetit Kurti për një luftë të mundshme me Malin e Zi, nuk kanë asnjë bazë të qëndrueshme dhe asnjë argument me premisa reale.

Por, sipas tij, ato janë deklarime që me një dozë të madhe tentojnë ta nxisin dhe rikthejnë një gjuhë të urrejtjes ndërshtetërore, ndërkohë që një gjuhë e tillë është e papranueshme për integrimet euro-atlantike të Kosovës.

“Nëse e shohim mozaikun e gjerë pas kësaj deklarate të fundit për luftë me Malin e Zi, atëherë ne po japim një mesazh, i cili është mesazh i destabilitetit rajonal dhe i vendosjes së Kosovës në pozita armiqësore edhe me një fqinj tjetër, i cili deri më tash nuk ka pasur asnjë lloj indikacioni armiqësor ndaj Kosovës. Për bindjen time, zoti Kurti, si parashikues ose si analist ka dalë krejtësisht i gabueshëm dhe si politikan krejtësisht i papërgjegjshëm”.

Ramadani ka shtuar se çështja e Demarkacionit është problem krejtësisht i brendshëm i politikës së Kosovës dhe jo i Malit të Zi, me të cilin, siç thotë ai, Kosova ka marrëdhënie shumë të mira.

Se në Mal të Zi nuk ka pasur shumë polemika për çështjen e shënjimit të vijës kufitare me Kosovën, e ka konfirmuar edhe Nik Gjeloshaj, deputet i Alternativës shqiptare në përbërjen e deritanishme të Parlamentit të malit të Zi.

Në një intervistë për Radion Evropa e lirë, ai ka theksuar se “më shumë është diskutuar për atë se a do ta pranojë ose jo Kosova marrëveshjen” dhe ka shprehur mendimin se “dy shtetet fqinje, Kosova dhe Mali i Zi, duhet ta zgjidhin çështjen me gjyq ndërkombëtar, i cili do ta definonte saktë dhe nuk do të linte dilema”. (REL)

Studentët: Në Universitetin e Gjakovës ka favore seksuale

VOAL.ch – GJAKOVË – Parlamenti Studentor i Universitetit të Gjakovës “Fehmi Agani” thonë se kanë hulumtuar në bashkëbisedim me studentë dhe se me vetë deklarimet e tyre, kanë siguruar fakte dhe prova të mjaftueshme që t’i dërgojnë në Policinë e Kosovës, po ashtu edhe në Prokurori, për mitmarrje, favore seksuale, ryshfet, korrupsion dhe shantazhet në këtë Universitet.

“Jemi të shqetësuar për këtë gjendje të rëndë që po ngjanë në Universitetin e Gjakovës, kërkojmë që sa ma parë të ndërhyjnë organet kompetente në këtë mes, me qëllimin që t’i shpëtojnë motrat, vëllezërit tanë nga persona të pandërgjegjshëm, të cilat janë duke bërë skandale me mjete financiare nga studentët, kushtëzime për nota, për favore seksuale dhe regjistrime në Fakultet me mjete të konsiderueshme të të hollave. Në këtë skandal janë të përfshirë persona nga administrata e Universitetit, asistentë, shefa të programeve dhe dekanët, vlen të theksohet se këto histori prekëse të studentëve kanë ndodhur që nga viti 2015, ku për këtë bazohemi në fakte dhe prova të mjaftueshme, ku të gjitha do t’i dërgojmë në organet kompetente, në kuadër të këtij krimi të organizuar janë të përfshirë edhe disa studentë, të cilët do t’i dërgojmë me emra pranë këtyre organeve të drejtësisë, për ndjekje të tyre”, thuhet në komunikatën e tyre, raporton lajmi.net.

Parlamenti Studentor kërkon që kjo të mos heshtet, ngase sipas tyre është turp dhe diskriminim nëse një person kushtëzohet nga “X personi” për një notë, ose rasti tjetër për regjistrim në Fakultet. Ata thonë se kanë fakte, se si vitin e kaluar “X personi” kërkon shumë prej 1500 euro, shumë e shumë raste të tjera, ose rastin mbi asistentët për favore seksuale etj.

“Të gjitha dosjet, incizimet dhe fotografitë do t’i dërgojmë pranë organeve të ndjekjes!”, thotë Parlamenti Studentor i Universitetit të Gjakovës “Fehmi Agani”.

Kisha, mes legalizimit dhe “rrënimit” – Nga Florim Zeqa

Ditë më parë ishte ndërmarr një aksion për “pastrimin” e Kishës Ortodokse në kampusin e Universitetit “Hasan Prishtina”. Pjesë e këtij aksioni ishin priftërinjtë ortodoksë të Dioqezës serbe Rashkë-Prizren, të cilët gjetën përkrahjen e disa qytetarëve serbë dhe përfaqësuesve të Qeverisë së Kosovës nga Lista Serbe, më saktësisht të zavendës kryeministrit të Qeverisë së Republikës së Kosovës, Branimir Stojanoviq, i cili ndër të tjera atë ditë u shpreh kështu: “Kisha Ortodokse serbe do të jetë tempull për të gjithë serbët që jetojnë në Kosovë”!

Në anën tjetër studentët shqiptar të Universitetit të Prishtinës gjatë protestës së tyre u shprehën ndryshe nga zv.kryeministri Stojanoviq; “Hapësira në oborrin e Universitetit i takon vetëm studentëve dhe askujt tjetër”,..nuk jemi kundër institucionit të Kishës Ortodokse, por kundër uzurpimit të hapësirës sonë për të vendosur objekte fetare të cilës do fe”.

Paradoksalisht, disa prej deputetëve shqiptar në Kuvendin e Republikës së Kosovës, të ish nomenklaturës komuniste (titiste) i kanë dalë në mbrojtje kishës famëkeqe serbe me deklaratat e tyre të sëmuara; “Kisha s’duhet rrënuar, është dëshmi e gjenocidit…”!

Sikur këtyre mjeranëve politik nuk po u mjaftojnë me dhjetëra lapidare të masakrave gjenocidiale serbe ndaj shqiptarëve anë e kënd Kosovës,…ky soj i keq pas vendosjes së shtatores së Millutinit, Car Llazarit dhe legalizimit të kishës serbe, nuk do të ndalen me kaq, do kërkojnë vendosjen edhe të shtatorës së Millosheviqit në qendër të Prishtinës si “dëshmi e gjenocidit”.

Marrëzia nuk përfundon me kaq, në mbrojtje të kishës famëkeqe doli edhe presidenti i vendit, zoti Hashim Thaçi, ish udhëheqës politik i UÇK-së, duke e ndërlidhur kishën e paligjshme me integrimet evropiane.

Çuditërisht dhe paradoksalisht, si atëherë në kohën e ndërtimit të saj, edhe tani po dalin shqipfolës në mbrojtje të saj!

Në drejtësi thuhet; “Qëllimi e arsyeton mjetin”, fillimi i ndërtimit të kësaj kishe nuk ka qenë i rastësishëm, por i qëllimshëm dhe me prapavijë politike.

Ndërtimi i Kishës ortodokse serbe “Shën Nikolla” kishte filluar në vitin 1995, por ndërtimi i saj është ndërprerë gjatë luftës në vitin 1999.

Kisha Ortodokse Serbe “Sveti Nikolla” (Shën Nikolla) e ndërtuar brenda oborrit të Universitetit të Prishtinës në kohën e regjimit të Millosheviçit, përveqse ndërtim i paligjshëm, është objekt që paraqet gjenocidin dhe aparteidin e një regjimi antinjerëzor dhe antikombëtar për shqiptarët.

Pasi të gjithëve na është i njohur motivi dhe prapaskenat e ndërtimit të kishës ortodokse serbe në pronën e Universitetit të Prishtinës, mbetët e pajustifikuseshme, pse askush nga ajo kohë e deri në ditët e sotme nuk u muar me çështjen e ndërtimit të paligjshëm të saj.

Për fatin e kësaj kishe, jo që nuk u “përkujdes” askush nga komandatët gjatë periudhës së luftës, por edhe 17 vjet pas saj, u hesht fati i saj nga të gjitha pushtetet komunale dhe qendrore, thaujse të ishte një objekt i padukshëm!

Mbijetesa e kësaj kishe dhe shumë objekteve tjera me prapavijë të errët dhe destruktive nga koha e Millosheviqit, janë rezultat i pakujdesisë sonë kolektive dhe hapësirës ligjore që lejon ekzistencën e objekteve të paligjshme,…kur në të njëjtën kohë rrënohen objektet dhe shtëpitë e banimit të shqiptarëve nga pushteti komunal i Prishtinës dhe më gjërë në gjithë Kosovën.

Me lejën e kujt erdhën klerikët fetar nga Dioqeza serbe e Rashkës në Prishtinë për “pastrimin” e kishës, dhe me urdhër të kujt u ushtrua dhunë ndaj studentëve protestues që kundërshtuan ekzistencën e kultit fetar brenda tempullit të dijës?

Duhet t’i bëhet e qartë opinionit publik, ndodhi kjo me urdhër të Shpend Ahmetit apo Shpend Maxhunit, me urdhër të ministrit të Punëve të Brendshme, kryeparlamentarit, kryeministrit apo presidentit.

Përfundimisht, për sqarimet e sipërpërmendura dhe për fatin e kishës ortodokse serbe në pronën e Universitetit të Prishtinës, duhet të debatohet dhe vendoset në Parlamentin e Kosovës,…e assesi nuk guxon të mbetët kisha famëkeqe “mollë sherri” për shkaktim të dhunës mes policisë dhe qytetarëve.

Vendimi për rrënimin e kishës nga kampusi i univeristetit ose shndërrimin e destinacionit të saj në ndonjë lloj objekti i cili do t’u shërbente studentëve të Universitetit të Prishtinës për punët e tyre studimore, si për shembull bibliotekë, konvikt apo mensë studentore, duhet të mirret në Kuvendin e Republikës së Kosovës, e jo të mbetët çështje e hapur për konflikte të përhershme ndëretnike në hapsirat e universitetit.

Gecaj e quan Al-Bin deputetin Albin Kurti dhe i shpall luftë luftës ndaj Malit të Zi

Zëvendësministri i Administrimit dhe Pushtetit Lokal, Bajram Gecaj ka reaguar ndaj deklaratës së ish-liderit të Vetëvendosjes, Albin Kurti i cili ka shprehur se versioni aktual i Demarkacionit me Malin e Zi do të sjellë luftë.

Zyrtari i LDK-së Gecaj nëpërmjet Facebook-ut ka shkruar se nëse Kurti do të ishte një politikan i përgjegjshëm, tashmë duhej të kishte kërkuar falje publike.

“Nëse do të ishte politikan i përgjegjshëm, Al-Bin Kurti do të duhej që menjëherë të kërkonte falje publike dhe tërhiqte kërcënimin e tij me luftë drejtuar një shteti mik dhe fqinj, pra ndaj Malit të Zi.” shkruan Gecaj.

Hoxhaj: Autostrada Prishtinë – Nish ndër projektet më të rëndësishme rajonale

Në një njoftim zyrtar nga MPJ bëhet e ditur se gjatë ditës së sotme është mbajtur takimi i RCC –Këshillit Rajonal për Bashkëpunim, me ministrat e punëve të jashtme të vendeve të rajonit

PRISHTINË – Ministri i Punëve të Jashtme të Kosovës, Enver Hoxhaj, i cili po merr pjesë në punimet e Asamblesë së Përgjithshme të OKB-së në New York, vazhdon axhendën e takimeve bilaterale dhe multilaterale.

Në një njoftim zyrtar nga MPJ bëhet e ditur se gjatë ditës së sotme është mbajtur takimi i RCC – Këshillit Rajonal për Bashkëpunim, me ministrat e Punëve të Jashtme të vendeve të rajonit, ku Republika e Kosovës është anëtare.

Hoxhaj tha se raportet e shumta politike mes vendeve të rajonit janë të ndërlidhura me bashkëpunimin në aspektin ekonomik dhe infrastrukturor.

“Ballkani dhe BE jetojnë në një kohë të pasigurtë dhe përtej reformave politike, ne duhet të kemi më shumë projekte në fushën e infrastukturës rrugore, të mordernizimit të shoqërive, të rritjes ekonomike dhe krijimit të vendeve të reja të punës. Ne duhet të dijmë se as Kosova dhe as rajoni nuk mund të ketë rritje të shpejtë ekonomike, sepse tregjet janë të vogla, shoqëritë janë të fragmentarizuara dhe vendet janë në zhvillim e sipër. Ndër projektet më të rëndësishme për infrastrukturën rrugore të Ballkanit qendror është ndërtimi i rrugës Prishtinë-Nish, cili ka një dimension politik në procesin e normalizimit të marrëdhënieve ndërshtetërore Kosovë-Serbi”, tha ministri Hoxhaj.

Ai gjithashtu ka shtuar se integrimi i rajonit në aspektin energjetik varet nga marrëveshja e energjisë në mes të Kosovës dhe Serbisë, e cila sipas tij “nuk është zbatuar fare në pesë vitet e fundit”.

Edhe sot Syla piknik në gjykatë

Në Gjykatën Themelore në Prishtinë vazhdon sot seanca e mundësisë së veçantë hetuese në rastin e Azem Sylës dhe të tjerëve të dyshuar për krim të organizuar në rastin e njohur si “Pronat”.

Seanca e paraparë për të martën ndaj ish deputetit të Partisë Demokratike ishte anuluar pa ndonjë sqarim, raporton Radio Kosova.

Syla dhe rreth 50 persona të tjerë dyshohen për ndërmarrje të përbashkët kriminale në tjetërsimin e pronave shoqërore.

Ministri i Brendshëm Skënder Hyseni lëshon demonstrativisht konferencën në Bratislavë

Ministri i Punëve të Brendshme Skender Hyseni e lëshon demonstrativisht konferencën e tretë Ministrore të Procesit të Pragës në Bratislavë

PRISHTINË – Ministri i Punëve të Brendshme, Skender Hyseni e lëshon demostrativisht konferencën e tretë Ministrore të Procesit të Pragës në Bratislavë.

Në një njoftim zyrtar nga Ministria e Punëve të Brendshme (MPB) të Kosovës bëhet e ditur se ministri Hyseni i cili me ftesë të Robert Kalinak, zëvendëskryeministër dhe ministër i Punëve të Brendshme të Republikës Sllovake, aktualisht Kryesues i Këshillit të Bashkimit Evropian, kishte udhëtuar për në Bratislavë për të marrë pjesë në këtë konferencë, por që ai ka lëshuar tubimin në shenjë proteste me de nominimin që i është vendosur Kosovës (Kosovo/UNSCR 1244/1999).

“Ky de nominim është i papranueshëm”, ka theksuar ministri Hyseni, duke shtuar se “nëse i bëhet çfarëdo reference Rezolutës 1244, duhet t’i bëhet referencë e qartë edhe mendimit të Gjykatës Ndërkombëtare të Drejtësisë për Pavarësinë e Kosovës, në pajtim me marrëveshjen e arritur në Bruksel, pra në pajtim me fusnotën e cila është aplikuar edhe në MSA të nënshkruar midis Kosovës dhe BE-së”, thuhet në njoftim nga MPB.

Ministri Hyseni ka bërë të ditur se Republika e Kosovës do të kthehet në këtë nismë sapo të bëhen korrigjimet e nevojshme në pajtim me marrëveshjen e Brukselit për përfaqësimin e Kosovës.

Rezoluta 1244 e Këshillit të Sigurimit u miratua më 10 Qershor të vitit 1999, pas marrëveshjes për tërheqjen e trupave serbe nga Kosova. Kjo rezolutë e përcakton statusin politik të Kosovës si protektorat të OKBS-së dhe jep administrimin e Kosovës te kjo organizatë ndërkombëtare.aa

Sot zhvillohet manifestimi tradicional “Dita e Mollës”

VOAL.ch – KOVRAGË – Shoqata “Pema” nga fshati Kovragë i Komunës së Istogut organizon manifestimin tradicional të ditës së vjeljes së mollës.

Në këtë manifestim do të marrin pjesë, kreu i shtetit, Hashim Thaçi, Kryetari i Kuvendit Komunal të Istogut, Haki Rugova, Drejtori i Misionit të USAID-it në Kosovë, James Hope, zyrtarë nga Ministria e Bujqësisë, Pylltarisë dhe Zhvillimit Rural, pastaj Ramiz Kelmendi nga Elkos Group, ndërsa para koktejit dhe vizitës në pemishte, do të bëhet ndarja e Mirënjohjes për Pemëtarin e Vitit dhe Pemëtarët e zellshëm, transmeton Koha.net.

Në kuadër të kësaj dite, paralelisht do të zhvillohet një sesion me temën “Mundësitë e shitjes së Mollëve”, ku pjesëmarrës do të jenë pemëtarët, tregtaret dhe përfaqësuesit e institucioneve vendore dhe ndërkombëtare, sesion ky i moderuar nga zyrtarët nga Projekti “Agro” USAID dhe shoqata “PEMA KOVRAGË”.

Heqja e maskave pastron skenën politike – Nga Florim Zeqa

Edhe pse ka një kohë të gjatë që në Kosovë flitet për dekriminalizimin e politikës, asgjë pozitive nuk ka levizuar në atë drejtim. Shkaktarët e stagnimit të luftës ndaj korrupsionit, krimit të organizuar dhe dekriminalizimit janë oligarkët dhe partitë në pushtet, pasi janë të lidhura me korrupsionin dhe krimin e organizuar, mirëpo kjo nuk i anashkalon as partitë opozitare, pasi pothuajse të gjitha (me ndonjë përjashtim të vogël), në një mënyrë apo në një tjetër janë të lidhura në biznese të pista”.

Për nevojën e dekriminalizimit të politikës në vazhdimësi flasin presidenti Thaçi, kryeministri Mustafa, përfaqësues të partive politikë, analistë të (pa)varur, ekspertë, OJQ dhe shoqëria civile.

Është iluzive të presim, nga vetë ata që janë të involvuar në veprimtari të ndryshme, korruptive dhe kriminale t’i luftojnë këto dukuri. Ndërkombëtarët janë duke i shfrytëzuar politikanët, që siç thotë populli, ata qe e kanë “bishtin e zënë me derë”, për realizimin e agjendave të tyre, e që janë duke i kushtuar shtrenjtë Kosovës.

Natyrisht, në momentin kur nuk u nevojiten më tutje, ndërkombëtarët do t’ua kthejnë shpinën këtyre kusarëve politik, sa të mjerë po aq satanik për popullatën e vuajtur të Kosovës.

Dekriminalizimi, luftimi i korrupsionit dhe krimit të organizuar do të ndodhë, vetëm atëherë kur në pushtet të vie një klasë e re dhe pastër politike.

Deklarimet e rrejshme të krerëve shtetëror për dekriminalizimin janë farsë për marrjen e poenave politik nga vartësit e tyre (ndërkombëtarët), pasi ligji për dekriminalizimin e politikës pa dyshim se nuk do të ketë mëshirë ndaj askujt, qoftë ndaj ministrave, deputetëve apo edhe vetë krerëve të shtetit, sikurse që është e kaluara e tyre kriminale dhe përgjejgjësia për veprimtaritë e tyre të jashtligjshme.

Megjithatë, BE-ja dhe SHBA-ja, dy aleatë të fuqishëm të shtetit të Kosovës duan të shohin një sundim të fortë të ligjit në Kosovë, pavarësisht që procesi i dekriminalizimit mund të prekë edhe vetë kokat më të larta të shtetit.

Kjo kastë politike çdo herë e më shumë është duke faktorizur Serbinë në Kosovë

Qytetarët e Kosovës e kanë të vështirë t’u besojnë deklarimeve të Thaçit dhe Mustafës për dekriminalizimin e politikës, dhe atë për disa arsye.

I pari, Hashim Thaçi i kaloi dy mandate e gjysmë si kryeministër i vendit, nën premtimet për luftimin e krimit të organizuar dhe korrupsionit.

I dyti, Isa Mustafa, edhe më keq, duke e ndihmuar të parin (Hashim Thaçin) , erdhi në pushtet përmes intrigave dhe mashtrimeve deri në tradhëtimin e kauzës së përbashkët opozitare për largimin e kapësve të shtetit nga pushteti.

Andaj, për këto arsye, është rrezik që liderët shtetëror të vazhdojnë lojën me fjalë duke ndryshuar slloganin politik, nga krimi i organizuar dhe korrupsioni në dekriminalizim politik!

Që dekriminalizimi të mos përdoret vetëm si sllogan politik nga pushtetarët aktual, ndërkombëtarët duhet t’u vëjnë limite kohore liderëve tonë shtetëror në përmbushjen e premtimeve,…ndryshe mund t’i kalojnë mandatet politike pa bërë asgjë në atë drejtim, siq ndodhi përgjatë këtyre tetë viteve të fundit me korrupsionin në vend,…jo vetëm që nuk u luftua, muar përmasa alarmante duke u shndrruar në sindromë kancerogjene të shtetit tonë.

Prandaj, vetëm përmes një presioni të fuqishëm ndërkombëtar, mund të kemi përmirësime në sundimin e rendit dhe ligjit në Kosovë,…mund të filloj suksesshëm procesi i gjatë i dekriminalizimit të politikës dhe depolitizimit të institucioneve të pavarura të shtetit.

Dekriminalizimi i politikës dhe depolitizimi i i institucioneve të pavarura, janë dy procese të ndërlidhura me njëri-tjetrin,…për zbulimin e prejardhjes dhe konfiskimin e pasurisë së zyrtarëve të lartë shtetëror dhe partiak.

Të parët, që do duhej t’i ndjejnë efektet e dekriminalizimit janë oligarkët e pushtetit (uzurpatorët e shtetit), pastaj edhe klanet politike dhe grupet mafioze brenda disa partive opozitare në vend.

Prandaj akoma më i i paqartë mbetët dekriminalizimi i politikës, luftimi i korrupsionit dhe krimit të organizuar pa heqjen e maskave të politikës. Kjo është e mundur të ndoshë vetëm me bartjen e dosjeve të UDB-së nga Beogradi në Prishtinë, ngjajshëm sikur me ato të librave kadastral dhe të gjendjes civile.

Fajtorët kryesor në çalimin e këtyre proceseve janë janë bartësit e procesit të bisedimeve, në radhë të parë ish kryeministri Thaçi, i cili i filloi bisedimet me Serbinë pa u konsultuar paraprakisht me të gjitha subjektet dhe faktorët politik vendor.

Arsyeja pse deri tani asnjëherë pala kosovare në bisedimet e Brukselit nuk kërkoi bartjen dhe hapjen e dosjeve të UDB-së, është fakti se shumë prej etërve dhe gjyshërve të pushtetarëve aktual, në të kaluarën kanë qenë bashkëpunëtor dhe agjent të UDB-së jugosllave,…jo vetëm kaq, dyshohet se disa prej qeveritarëve të tanishëm ishin dhe janë akoma në shërbim të agjenturave të fshehta serbe që veprojnë në Kosovë.

Do të ishte në interes të vendit dhe qytetarëve të vendit të bëhet sa më parë zbulimi i emrave të atyre që kanë qenë ish-bashkëpunëtor dhe agjent të UDB-se, që kanë punuar në dëmë të interesave të vendit dhe bashkombasve të tyre,…pra të ndahet “shapi prej sheqeri” siq e thotë populli, në mënyrë që të bëhet diferencimi në bazë të fakteve e jo paragjykimeve, për tu liruar një herë e përgjithmonë nga njerëzit e pushtetit nën maskën e “patriotizmit”, të shndrruar në kanibal të popullatës së vet!

Heqja e dilemave dhe gjykimeve hipotetike ndaj disa personaliteteve me ndikim në politikën kosovare, është e mundur të bëhet vetëm përmes heqjes së maskave politikanëve, pra përmes hapjes së dosjeve të UDB-së,…e bërjes publike të emrave një nga një e të gjithë agjentëve shqipfolës të UDB-së, gjë e cila do të ndikonte në pastrimin e skenës politike nga gjakpirësit e rinjë të gjakut shqiptar.

Në të kundërtën, me pushtetarët e korruptuar dhe të dyshuar si bashkëpuntor të agjenturave serbe, jo vetëm që do të rinumërojmë, rrezikojmë të rrëshqasim edhe më keq në rrjetin e skenarëve antishtetëror dhe antishqiptar serb, pasi kjo kastë politike çdo herë e më shumë është duke faktorizuar Serbinë në Kosovë.

Serbia, si në të kaluarën, edhe sot është duke e përdorur të njëjtën maskë, si “gogol” për shantazhimin e fytyrave politike në Kosovë!

Studentët dhe drejtuesit e UP-së kërkojnë nga Kisha lirimin e hapësirës

Një grup studentësh i Universitetit të Prishtinës, kanë protestuar të hënën përpara objektit të Kishës Ortodokse Serbe brenda kampusit të Universitetit të Prishtinës, në kundërshtim të, sic thonë, funksionalizimit të këtij objekti fetar.

Përmes një aksioni simbolik, të leximit të librave, që thonë se e konsiderojnë si “armën e tyre më të fortë”, studentët kanë kërkuar kthimin e pronës, që sipas tyre, i takon Universitetit dhe studentëve.

“Ky aksion tenton ta përçojë mesazhin që kjo tokë është e studentëve, kjo hapësirë i përket studentëve, dhe do të shfrytëzohet nga studentët për nevojat e tyre, e assesi të bëhet funksionalizimi I një objekti i cili tenton të bëhet si Kishë Ortodokse Serbe, me ç’rast cenohet edhe sekularizmi I Universitetit të Prishtinës”, ka thënë Gramos Cërnaveri, një nga studentët protestues.

Aksioni i studentëve të UP-së, pason përplasjen e para dy ditëve me Policinë e Kosovës, kur kjo e fundit nuk lejoi vendosjen e një pankarte në objektin e Kishës në kampusin e UP-së.

Një polic u lëndua dhe një numër i studentëve “u neutralizuan” gjatë përplasjes që ngjalli reagime të shumta.

President i Kosovës, Hashim Thaçi, e cilësoi protestën e studentëve, të ditës së shtunë “të papranueshme”, dhe kërkoo zgjidhjen e cështjes përmes “rrugëve ligjore dhe jo me veprime të njënashme që nxisin urrejtje e dhunë”.

“Çdo objekt fetar në Kosovë është dëshmi e tolerancës dhe dialogut ndërfetar që vazhdojmë t’i kultivojmë dhe me të cilët mburremi të gjithë”, tha presidentit Thaçi.

Objekti i Kishës në kampusin e Universitetit të Prishtinës, u ndërtua gjatë viteve të 90-ta, në kohën e administrimit serb të Kosovës dhe u riaktualizua në vitet e fundit, kur drejtuesit e Kishës Ortodokse Serbe kërkuan funksionalizimin e saj.

Një grup murgjish dhe besimtarësh ortodoks javën e kaluar bënë përpjekje për të pastruar objektin por u ndaluan nga zyrtarët e komunës së Prishtinës që thanë se “punimet nuk mund të kryen pa një leje paraprake nga komuna”.

Objekti i Kishës në kampusin e Universitetit të Prishtinës ka nxitur menaxhmetin e UP-së i cili ka kërkuar nga institucionet e Kosovës që “përmes rrugëve politike dhe juridike të qartësojë situatën duke e kthyer pronën prapa”.

Profesori në Universitetin e Prishtinës, Bekim Lumi, pjesëmarrës në protestën e studentëve, thekson se kjo hapësirë I përket Universitetit të Prishtinës dhe nuk duhet të shfrytëzohet si diçka tjetër.

“Pretendimi ynë I vetëm është se kjo hapësirë u përket studentëve, i përket mësimdhënies dhe se nuk ka vend për politizim dhe fe, ka nevojë vetëm për mësim dhe hapësirë për studentët e këtij Universiteti”, tha Lumi.

Çështja e Kishës Ortodokse “Krishti shpëtimtar” në kampusin e UP-së, që prej vitit 2012 është duke u trajtuar nga gjykata, për të përcaktuar legjitimitetin e pretendimeve të Kishës Ortodokse Serbe dhe Universitetit të Prishtinës për pronësinë. (REL)

UP kërkon t’i kthehet prona ku është ndërtuar Kisha Ortodokse

VOAL.ch – PRISHTINË – Universiteti i Prishtinës “Hasan Prishtina”, me anë të një komunikatë publike ka shprehur shqetësim për zhvillimet e fundit lidhur me objektin e Kishës Ortodokse që gjendet në oborrin e këtij institucioni arsimor. Menaxhmenti i UP-së kërkon nga institucionet që përmes rrugëve politike dhe juridike, të qartësojnë situatën duke ia kthyer pronën.

“Menaxhmenti i Universitetit të Prishtinës, respektivisht gjithë profesorët dhe studentët e tij, janë të brengosur dhe po i përcjellin me shqetësim zhvillimet rreth objektit të Kishës Ortodokse të ndërtuar në pronën e Universitetit të Prishtinës. Është botërisht i ditur procesi i ndërtimit të këtij objekti në pronën tonë, sikundër që edhe baza juridike e këtij ndërtimi e ofruar nga një pushtet që për dekada promovoj dhe ushtroj dhunën dhe terrorin.” thuhet në komunikatë.

Më tej UP njofton se ” Sidoqoftë, neve shpresojmë që institucionet tona, përmes rrugëve politike dhe juridike, do qartësojnë situatën duke na kthyer pronën mbrapa, në mënyrë që neve bashkë me studentët të vazhdojmë rrugën e avancimit akademik, të lirë dhe njëjtë për të gjithë. Ky qëndrim në asnjë mënyrë nuk duhet të kuptohet si interferim në kontekst të lirive fetare dhe respektit të komuniteteve në Kosovë, të cilat duhet te mbrohen dhe respektohen.”

Të rrahen brutalisht studentët që të plotësohet egoja e sëmurë serbe, është më shumë se skandaloze – Nga Skënder MULLIQI

Shumë herë deri më sot në shkrimet tona i kemi numëruar të gjitha të metat dhe të gjitha dështimet e kësaj kaste politike e cila po shkon nga gabimi në gabimin tjeter edhe më të madh. Po bëjnë gabime dhe po bëjnë lëshime, pikërisht aty ku po prekët integriteti territorial i Kosovës. Le që na mbyti gjendja e keqe ekonomike , por gjithnjë e më shumë jemi duke sharruar në lloqë deri në fyt edhe politikisht.Të lëshohet pe aty kur bëhet fjalë për tërësinë territoriale, kjo nuk përthekohet nga mendja e shëndosh e njeriut. Si kurrë më parë na u dha rasti historikë të ndërtojmë shtet ashtu siq na ka hije, e jo tia falim dreqit në të katër anët. Edhe populli nuk mund të shfajësohet në asnjë mënyrë për gjendjën e keqe politike dhe të rrjedhave ekonomike , për gjendjën e moralit, dhe kapitulimin e tij para një kaste politike e cila heret apo vonë do të duhej të përgjigjët .Këta nese nuk ndalen pak asgjë nuk do të mbetet nga shtetësia e Kosovës. Ky grup i pa ndërgjegjshem politikë po e shesin Kosovën në të katër anët e saj.Dhanë territore më Maqedoninë,po e humbin ngadalë veriun e Mitrovicës më “Zajednicën” , kur Kosova e ka asociacionin e vet të komunave .Ky sherr i madh dhe hileqarë ku hisedarë është edhe bashkësia ndërkombëtare nuk do të vonon shumë shpejt e do të lakuriqësohet . Minoriteti serb dhe kjo farë Lista Serbe e futur në Kuvendin e Kosovës, gjithë ditën punojnë që veriu të ndahet. Thotë një fjalë e popullit” mos ia jep dikujt gishtin gjithkujt së ta merrë edhe dorën”. Kjo kastë politike në pushtet jo vëtem që kan dhënë gishtin por ia kan dhënë edhe dorën minoritetit serbë më të drejatat më të mëdha që I ka dikush nga minoritetet në botën demokratike. Po mos të ishte në pyetje politika e Beogradit nuk do ta kishim gjithë këtë përqarje të skenës sonë politike.Po mos të ishin ndërhyrjët e Beogradit zyrtarë nuk do të kishim këtë krizë përmanente politike dhe institucionale . Serbia gjithnjë e më shumë është duke e futur ndikimin e saj politikë në punët tona krejt të mbredshme. Në vend që këta njerëz të politikës të mësojnë nga pësimet e deritashme , këta nuk po i lënë pazarët politike . Tema e Demarkacionit të cilën temë pushteti e më gjasë edhe e futi si kusht për liberalizim të vizave, ende nuk po dojnë më e kuptuar së nese si e tillë sërish qitet në kuvend për ratifikim, ka mundësi që Kosova të futet në një situatë politike tepër të vështirë .

Dhe, për temën aktuale të Kishës së ndërtuar dhunshem midis qendrës së kryeqytetit dhe midis Univerzitetit të Prishtinës në vitin 1992, ka pasur mundësi që mos të bëhët kurrë temë qendrore. Këta që erdhen në pushtetet e pas luftës , harruan gjithqka tjetër , veq nuk harruan të vjedhin dhe të grabisin. Kjo kishë e shovenizmit serbomadh të kriminelit, Sllobodan Millosheviqit është dashtë të rrënohet moti së është ndërtuar pa asnjë destinim fetarë. Ndërtimi i saj ka pasur qëllim kolonizues dhe pushtues. Kjo kishë si simbol i fashizmit serbë nuk e ka vendin aty, dhe ardhja e klerikëve serbë për ta funksionalizuar, është bërë për qëllime krejtë politike. Serbët më poshtersitë e veta që i kan, dhe më kodin gjenetik të prishur, duke gjetur në mesin tonë budallallëkun , mos dijën, janë duke i shfryëtzuar mirë të gjithë dobësit tona , për ta pshtjelluar dhe përqarë edhe më shumë skenën tonë politike. Nuk besojë së ka dikund në botën demokratike Kishë në hapësirat univerzitare. Shqiptarët gjithmonë kanë qenë dhe janë tolerant karshi konfekcioneve të tjera fetare dhe objekteve të tyre të kultit. Kisha eshtë ndërtuar në kohën kur rrënohej nga Serbia gjithqka çka ishte shqiptare. Dihet së në vënien e gurthemelit të kësaj kishe të ndërtuar dhunshem ishte i pranishem edhe kryekrimineli, Arkan i cili bëri masakra të pa para mbi myslimanët në Bosnje dhe mbi shqiptarët e Kosovës .Të rrahen brutalisht studentet tanë që të plotësohet egoja e sëmuar e armikut tanë shekullor është më shumë së skandaloze . Policët tanë ndërhynë aq brutalisht , sa për një moment mu dukën sikur të kishin ardhur nga Serbia për të rrah shqiptarë, siq na rrahën dhe na vranë në të kaluarën jo të largët .Pamjet e tilla dhe veprimet e tilla policore nga urdhënësit e tyre në krye të shtetit nuk i shërbejnë qetësisë dhe as stabilitetit politik të Kosovës, aq më pak kur bëhët fjalë për një kishë e cila nuk ka lidhje më objekt të kultit. Klerikët serbë ishin dhe kan mbetur më logjikën e vjetër të tipit pushtues millosheviqian në tokat tona . Kryekleriku Pavale ishte promotori dhe përkrahësi më ia madh shpirtëror i kasapit Millosheviq. Më atë logjikë Kisha serbe bartë mbi supe mëkate të mëdha për mijera viktimat e civilëve të pa fajshem në Kosovë. Edhe kleriket tjerë sikurse para ardhësi Pavle , nuk hoqën dorë nga deklaratat fashiste , nuk hoqën dorë nga deklaratat që nuk kan as një lidhje më predikimet fetare .Partiarku në Kosovë, Irinej ishte më zëshmi në deklaratat antishqiptare , më deklartat luftë nxitëse, së gjoja Kosova është Jerusalemi serb etj. Shumë i nxituar dhe e pa matur politikisht si shumë herë deri më tash lidhur më protestat e disa studentëve para kishës, ishte deklarata e presidentit, Hashim Thaçit, i cili tha së “askush nuk guxon të prekë kishën”. Shumicës në Kosovë kurrë nuk u ka shkuar mendja , së përfaqësuesit tanë më të lartë të shtetit, do të bëjnë gabime të tilla trashanike politike , të cilat gabime po na kushtojnë secilën ditë e më shumë …

Referendumi nuk sjell ndryshime kushtetuese as themelim të ushtrisë

VOAL.ch – PRISHTINË – Ligji për referendumin nuk do të sjellë zgjidhje për çështjet që kërkojnë ndryshimin e Kushtetutës së Kosovës, thonë deputetë dhe njohës të çështjeve juridike. Ata ndajnë mendime të ndryshme nëse, Kosova ka nevojë apo jo të ketë ligjin për referendum, si formën më të drejtpërdrejtë të demokracisë që përfshin qytetarët në vendimmarrje.

Por, sido që të jetë, ky ligj, thuhet se nuk do të mund të prekë në dispozitat e Pakos së Presidentit Marti Ahtisaarit dhe as nuk do të mund të iniciojë ndryshimet kushtetuese.

Deputeti në Kuvendin e Kosovës, Arben Gashi, thotë se me Pakon e Ahtisaarit, i njohur si propozimi gjithëpërfshirës, mbi bazën e të cilit është shpallur pavarësia e Kosovës, është paraparë që për disa çështje që prekin Kushtetutën dhe nivelin qendror nuk mund të organizohen referendume, përderisa është përcaktuar qartë se për çfarë mund të dilet në referendum në nivelin lokal.

“Në rastin tonë, duke pas parasysh rrezikun e organizimit të referendumeve me qëllim të ndarjes së territorit apo bashkimit të pjesëve apo tërësisë të territorit me vendet tjera, atëherë me Pakon e Ahtisaarit është paraparë që për këto çështje të mos mund të organizohen referendume”.

“Me Ligjin për qeverisje lokale dhe me Kushtetutë, parashihet që mund të organizohen referendume lokale për çështje të karakterit specifik brenda kompetencave të komunave, por jo për çështje tjera”, thotë Gashi për Radion Evropa e Lirë.

Sa u përket referendumeve në nivelin qendror, deputeti Arben Gashi thotë se i takon Kuvendit që sa më shpejt ta specifikojë mënyrën e organizimit të referendumeve dhe funksionimit të tyre.

Në opinion, por edhe në debate politike, shpesh është ngritur çështja e bllokadës së krijuar në lidhje me ndryshimin e Kushtetutës së Kosovës, siç është rasti me transformimin e Forcës së Sigurisë së Kosovës në Forca të Armatosura. Por, Gashi thotë se ky transformim kërkon ndryshime kushtetuese, ndryshime këto që nuk mund të bëhen përmes referendumit.

“Kushtetuta e Kosovës nuk mund të ndryshohet me referendum. Të paktën ky ka qenë qëndrimi i deritanishëm i dalë si rezultat i pavarësisë së negociuar ose sipas propozimit të presidentit Ahtisaari. Për Forcën e Sigurisë së Kosovës duhet të ndryshohet Kushtetuta”.

“Por, si garant i mos ndryshimit të Kushtetutës, në mënyrë të lehtë, i kemi dy të tretat e dyfishta, që do të thotë se duhet të votojnë të gjithë deputetët e Kuvendit të Kosovës, plus dy të tretat e deputetëve të komuniteteve pakicë”, shpjegon Gashi.

Ndryshimi i Kushtetutës së Kosovës në konceptin e saj, sipas Arben Gashit, do të mundësohej vetëm përmes një aranzhimi të ri politik me faktorin ndërkombëtar, marrë parasysh se edhe vetë akti i shpalljes së pavarësisë ishte një akt i koordinuar me shtetet mbështetëse të pavarësisë së Kosovës.

Ndërkaq, Dastid Pallaska, njohës i fushave juridike, thotë se për demokracitë e brishta, siç është Kosova, ligji për referendumin mund të jetë jo shumë i favorshëm. Sipas tij, ekziston rreziku që referendumi të keqpërdoret nga liderët politikë për rastet kur ata do të duan të fshihen pas votës së popullit për vendimet e tyre.

“Tani kur kjo klasë e konsumuar politike nuk po arrin që vendimet e rëndësishme në këtë vend t’ua atribuoj aleatëve ndërkombëtar dhe gjithë jo popullaritetin që mund të shoqërohet për vendime me rëndësi për vendin, tash kjo elitë e konsumuar politike, ndoshta synon që nëpërmes referendumit të zhvishet nga përgjegjësia që i takon me ligj dhe me Kushtetutë për vendimet e rëndësishme që duhet të merren”, vlerëson Pallaska për Radion Evropa e Lirë.

Referendumi nuk do të mund të përdoret si instrument për zhbllokimin e disa vendimeve, qoftë për themelimin e Forcave të Armatosura të Kosovës, për Demarkacionin e kufirit me Malin e Zi apo themelimin apo jo të Asociacionit të komunave me shumicë serbe, thekson Pallaska.

Për dallim nga Arben Gashi, Pallaska mendon se për themelimin e forcës mbrojtëse, nuk ka nevojë të ndryshohet as Kushtetuta dhe as të organizohet referendumi.

“Krijimi i një ushtrie, e Forcës së Sigurisë në kuptimin kushtetues, nuk kërkon asnjë ndryshim në Kushtetutën e vendit dhe rrjedhimisht nuk mund ta paramendoj si një çështje që do t’i nënshtrohej referendumit. Për këtë arsye, unë mendoj se ushtria duhet të bëhet me veprime të caktuara, me fuqizim të kapaciteteve”, thotë ndër të tjera Pallaska.

Ndryshe nga Pallaska, njohësi tjetër i fushave juridike, Blerim Burjani, mendon se ligji për referendumin, nëse jo për ushtrinë, do të mund të shërbente si zgjidhje për të lehtësuar vendimmarrjen, sidomos për çështjen e Asociacionit apo Demarkacionit, si dy tema që nuk po mund të marrin përgjigje as vendim nga institucionet e shtetit.

“Referendumi është i nevojshëm për temat, për të cilat nuk ka konsensus politik, qoftë ndërmjet pushtetit dhe opozitës apo kur Kuvendi dështon në gjetjen e ndonjë zgjidhjeje për një temë, e cila është në interesin nacional, siç është çështja e Demarkacionit të kufirit me Malin e Zi apo Asociacionit të komunave me shumicë serbe, që kanë shpëtuar pa hyrë në filtrin e vullnetit të qytetarëve se çka mendojnë ata”, thekson për Radion Evropa e Lirë, Blerim Burjani.

Mungesa e ligjit për referendumin, sipas Burjanit, vjen si pasojë e mungesës së vullnetit politik, por edhe si rrjedhojë e bisedimeve të Brukselit ndërmjet Prishtinës dhe Beogradi, për shkak të drojës së disa marrëveshje të këtij dialogu do të mund të ngriheshin më pastaj për referendum në Kosovë.

Përveç për nivelin qendror Burjani e sheh si shumë të nevojshëm këtë Ligj edhe për nivelin lokal, të komunave.

“Referendumi është më se i domosdoshëm edhe në nivelin lokal të komunave. Qytetari i rëndomtë, në kuadër të pushtetit lokal, është ballafaquar me probleme elementare, me infrastrukturë e mungesë rrugësh, me çështjet e urbanizmit në përgjithësi dhe asnjëherë nuk është pyetur qytetari se ku dhe kah duhet të ndërtohet, ta zëmë, një lokalitet ose një qendër industriale. Për këto çështje, asnjëherë nuk është pyetur qytetari”, shton Burjani.

Ligji për referendumin, deri më tani më shumë ka qenë temë debati vetëm në ato momente politike kur institucionet nuk kanë ofruar zgjidhje për çështje të caktuara. Megjithatë, një draft-ligj për referendumin nuk është proceduar ende qoftë nga qeveria apo si nismë e deputetëve në Kuvendin e Kosovës.(REL)

Një grup studentësh të hënën shkojnë te kisha për lexim e diskutim

VOAL.ch – PRISHTINË – “Këtë hapësirë të kampusit tonë, kemi vendosur që të hënën ta shfrytëzojmë për të lexuar dhe diskutuar, duke dhënë kështu një mesazh simbolik”, thuhet në ftesën për të gjithë studentët e profesorët e UP-së, nga një grup studentësh që kundërshtojnë funksionalizimin e kishës në qytezën universitare.

Një nismë nga studentët, që janë mbledhur në një grup të quajtur “Uniteti”, parashikon funksionalizim e kishës së është ndërtuar gjatë masave të dhunshme të Serbisë në Kosovë të funksionalizohet në shërbim të studentëve, transmeton Koha.net.

“Uniteti”, përmes së cilës u kanë bërë thirrje studentëve që të hënën në orën 12:00, të lexojnë në këtë hapësirë, të bashkuar e në unitet, për Universitet.

“Një hapësirë brenda kampusit të universitetit tonë po rrezikohet nga e me politika jashtë universitare. Funksionalizimi i një objekti fetar, me gjithë vijimësinë e kundërshtisë nga studentët që nga fillimi i ndërtimit të saj, mbetet i papranueshëm për ne. Ne thellësisht besojmë se çdo cep i hapësirës universitare duhet të përdoret për të vetmet qëllime: nevojat e studentit, dijes e shkencës”, thuhet nga ata, që më tej shtojnë se “Hapësirat e universitetit duhet të përdoren nga studentët e për studentët”.

“Për këtë gjë, studentët kanë qenë gjithnjë në unitet: Universiteti si i tërë, i takon studentit, thuhet në ftesën e grupit të studentëvë të Universitetit të Prishtinës”, përfundojnë studentët.

Shpend Ahmeti: “Hashim Thaçi sponsorizon shkrime kundër Edi Ramës”

Ahmeti: Thaçi, pa bashkëpunimin me serbët, do të ishte veç një i akuzuar nga Gjykata Speciale

VOAL.CH – PRISHTINË – Kryetari i komunës së Prishtinës, Shpend Ahmeti ka akuzuar Presidentin e Kosovës, Hashim Thaçi se ka sponsorizuar shkrime kundër kryeministrit të Shqipërisë, Edi Rama.

Në një deklaratë të fortë në faqen e tij zyrtare në Facebook, Ahmeti thotë se Thaçi urdhëronte këshilltarët e tij, që të shkruanin kundër takimeve të Ramës dhe kryeministrin e Serbisë, Aleksandër Vuçiç. Ai i ul tërësisht vlerat presidentit kosovar, dikur komandant i UÇK, duke thënë se pa bashkëpunimin me serbët do të ishte veç një i akuzuar nga Gjykata Speciale.

“Hashim Thaçi është relevant para faktorit ndërkombëtar vetëm kur bën koncesione ndaj Serbise. Ai e di që pa Serbinë, pa pllaka përkujtimore, pa kisha e pa takime me Vucicin mbetet vetem i akuzuar potencial në Gjykatën Speciale. Si nënshkrues i demarkacionit tokëfalës, dhe premtues e nënshkrues i asociacionit tokëndarës, Thaçi krijon tema të tilla si kjo më poshtë, ku mund të duket i moderuar dhe relevant në Ballkan. Për këtë arsye këshilltaret e tij shkruajnë artikuj kundër Rames dhe takimeve me Vucicin sepse frigohet që dikush ja zë vendin tek koncesionet. Kosova do të mbetet edhe pas Thacit edhe pas gjithë neve. Nuk duhet lejuar që ky njeri dhe ekzistenca e tij të na lërë pasoja për shtetin tonë”, shkruan Ahmeti.

Kosovë: Vetëm 3 vrasje nga armët me leje

VOAL.CH – PRISHTINË – Nga rreth 1500 vrasje të cilat kanë ndodhur në Kosovë në 16 vitet e fundit, vetëm 3 kanë ndodhur nga armët me leje.

Kjo statistikë është treguesi më i mirë se janë armët pa leje dhe njohuritë e pakta të qytetarëve në përdorimin e tyre jo rrallë herë kanë përfunduar me pasoja fatale.

Për këtë arsye në Kosovë tash e disa vite kanë nisur të hapen institucione të specializuara për pajisen e qytetarëve me njohuritë mbi armë. Një prej tyre është qendra “Katana” në Obiliq, e emëruar në bazë të emrit të heroit të kombit, Agim Ramadani.

Atje një staf i specializuar e shoqëron qytetarin nëpër të gjitha procedurat e nevojshme të trajnimit për ta kualifikuar që ai të pajiset me leje dhe jo vetëm. Eliminimi i aksidenteve me armë, duke u njoftuar me to nënkupton edhe shpëtim i jetëve të qytetarëve, shkruan gazeta ‘Zeri’.

Vetë ekspertët e kësaj qendre thonë se mendimi i qytetarit rreth armëve të zjarrit nga momenti që ai hyn në këtë qendër deri në përfundimin e trajnimit ndryshon tërësisht.

Kosovë: Mbi 300 mijë armë pa leje në duart e qytetarëve

VOAL.ch – PRISHTINË – Vlerësohet se numri i armëve pa leje në duart e kosovarëve është mbi 300 mijë. Ndërsa si pasojë e kësaj, edhe numri i incidenteve dhe vrasjeve është shqetësues. Njohësit e fushës së sigurisë kërkojnë nga institucionet përgjegjëse ta zbatojnë ligjin ndaj armëmbajtësve pa leje. Gjithashtu, kërkohet që të shpallet një amnisti për dorëzimin e armëve

Nga janari deri në korrik të këtij viti janë vrarë 15 persona në Kosovë, ndërsa numri i incidenteve për shkak të armëve pa leje kanë shënuar rritje kohët e fundit. Madje vetëm këtë javë kanë ndodhë disa gjuajtje me armë në qendër të kryeqytetit, në mesin e të cilave edhe ajo ndërmjet këngëtarëve Ylber Abdullahu i njohur si Cozman dhe Rigels Rajku- Noizy, shkruan ‘Zeri’.

Vlerësohet se numri i armëve pa leje që ende janë në duart e qytetarëve të Kosovës është mbi 300 mijë. Njohësit e fushës së sigurisë thonë se Policia dhe organet e drejtësisë duhet të zbatojnë Ligjin për Armët dhe ligjet tjera respektive që kanë të bëjnë me armëmbajtësit pa leje.

Ata gjithashtu theksojnë nevojën që të shpallet amnisti për dorëzimin e armëve pa leje.

Faqja 142 prej 190« Fillimi ‹ Prapa 138 139 140 141142143 144 145 146 Para ›Fundi »

Ministrja e Drejtësisë Dhurata Hoxha, priti në takim informues Udhëheqësen e Zyrës Administrative të Dhomave të Specializuara, Fidelma Donlon, e shoqëruar nga udhëheqësi për Mbrojtje Juridike, David Hein, njofton zyra e saj për informim.

Pasaporta e Kosovës renditet si e 85-ta në klasifikimin e pasaportave më të “fuqishme” në bazë të “Ranglistës së pasaportave botërore” , sipas një artikulli të publikuar kohëve të fundit në Forumin Botëror Ekonomik të Internetit.

Zëvendësministri i Administrimit dhe Pushtetit Lokal, Bajram Gecaj ka reaguar ndaj deklaratës së ish-liderit të Vetëvendosjes, Albin Kurti i cili ka shprehur se versioni aktual i Demarkacionit me Malin e Zi do të sjellë luftë.

Në Gjykatën Themelore në Prishtinë vazhdon sot seanca e mundësisë së veçantë hetuese në rastin e Azem Sylës dhe të tjerëve të dyshuar për krim të organizuar në rastin e njohur si “Pronat”.

VOAL.ch – KOVRAGË – Shoqata “Pema” nga fshati Kovragë i Komunës së Istogut organizon manifestimin tradicional të ditës së vjeljes së mollës.

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL