VOAL

VOAL

Copyright © 2022

VOAL

Kosovë

Haradinaj, peng politik apo peng i Interpolit!? – Nga Florim Zeqa

Pas ndalimit të Ramush Haradinajt në Kolmar të Francës, në shkrimin tim autorial të datës 9 janar 2017-të, me titull: “Arrestimi i Haradinajt, eksperiment i koordinuar politik!”, pata ngritur shqetësimin, mos vallë në këtë lojë të koordinuar të Serbisë dhe Francës, është implikuar edhe ndonjëri nga liderët shtetërorë të Kosovës, me qëllim të eksperimentimit politik për mënjanimin e pengesës më të madhe (Haradinajt) në realizimin e projekteve shtetshkatërruese të Kosovës, siç janë: cenimi i rendit kushtetues në vend, tkurrja territoriale e vendit dhe ndarja e sovranitetit të shtetit në dysh-mes serbëve dhe shqiptarëve. Për fat të keq ky shqetësim imi doli të jetë 100 % i saktë. Sikur të ishte ndryshe, liderët shtetërorë të Kosovës nuk do të mjaftoheshin vetëm me prononcime për medie dhe “keqardhje” publike, por do të ndërmerrnin hapat e duhur për lirimin e menjëhershëm të tij, siç janë: ndërprerja e dialogut me Serbinë në Bruksel, ndërprerja e kontakteve me zyrtarët e Ambasadës Franceze në Prishtinë dhe dërgimi i notës së protestës shtetërore ndaj autoriteteve franceze në Paris,…dhe jo vetëm kaq, kërkesa për lirimin e Ramush Haradinajt duhej të dërgohej në Këshillin e Sigurimit në OKB, Bruksel, Vjenë e Berlin…etj.
Heshtja dhe hipokrizia politike e pushtetarëve në Prishtinë në raport me ndalesën e padrejtë të Haradinajt në Francë, përveçse vërtetoi implikimin e tyre në pengmbajtje, i ka tejkaluar të gjitha limitet e eksperimentit politik. Të lihet për dy muaj rresht një qytetar i Kosovës në mëshirën e aleancës serbo-franceze, e aq më tepër të një lideri partiak, komandantit të luftës çlirimtare dhe ish-kryeministrit të vendit është pak më tepër se kapitullim shtetëror përballë Serbisë armiqësore. Shteti në të cilin përkohësisht qëndroj, pra Italia nuk do ta lejonte as 24 orë një lider partiak të zënë peng nga autoritetet e ndonjë shteti e lërë më dy-tre muaj siç po ndodh me Haradinajn. Aktakuzat e fletë-arrestit serb ndaj Haradinajt mbeten letra të pa vlera pas verdiktit (dy herë radhazi) të Gjykatës së Hagës për krime lufte. Vazhdimi i ndalimit të padrejtë i Haradinajt nga një gjykatë lokale franceze në Francë, i vërtetoi dy gjëra: miqësinë e vjetër serbofranceze dhe hipokrizinë politike të liderëve shtetërorë të Kosovës, të cilët përveç “lotëve të krokodilit” nuk e bënë asnjë veprim politik për lirimin e tij.
Siç po duket, mosprezenca e Ramush Haradinajt i ka bërë të ndihen komod liderët shtetërorë dhe koalicionin qeverisës bashkë me Listën serbe në prag të votimit të Demarkacionit me Malin e Zi dhe themelimit të Asociacionit të komunave serbe në veri. Andaj vendimin për mbajtjen e mëtutjeshme të Ramush Haradinaj në Francë nuk duhet shikuar me “syze partiake”, por kombëtare dhe shtetërore. Ky është abuzim i thellë me drejtësinë, shkelje e të drejtave universale të njeriut, fyerje dhe provokim i rëndë ndaj qytetarëve dhe shtetit tonë, në të cilin përveç Serbisë gjakatare, pjesëmarrëse tashmë është bërë edhe Franca “mike”, për të cilën shqiptarët anembanë globit u solidarizuan pas sulmeve terroriste të janarit 2015 në Paris, duke u identifikuar me flamurin francez në rrjetet sociale dhe ndezjen e qirinjve në nderim të viktimave të sulmit terrorist. Së paku deri më tani, nuk më ka rënë të dëgjoj për ndonjë protestë apo reagim mediatik të shoqërisë civile franceze për ndalimin e padrejtë të zotit Haradinaj në Kolmar. Andaj pas vazhdimit të ndalimit të Haradinajt në Francë, kërkohet një mobilizim më i fuqishëm mbarëkombëtar, duke filluar nga institucionet shtetërore në Prishtinë dhe Tiranë, që urgjentisht të kërkohet lirimi pa asnjë kusht i Haradinajt, për të vazhduar me protestat e pandërprera pranë ambasadës franceze në dy shtetet shqiptare.
Institucionet tona shtetërore menjëherë duhet t’i ngrijnë të gjitha proceset e filluara për normalizimin e marrëdhënieve me Serbinë, në radhë të parë dialogun në Bruksel dhe nismën paradoksale të presidentit Thaçi për pajtim me Serbinë, përderisa kjo e fundit të heqë dorë nga të gjitha obstruksionet politike ndaj shtetit të Kosovës dhe të mos i tërheqë të gjitha akuzat e montuara ndaj pjesëtarëve të UÇK-së dhe vlerave të luftës çlirimtare në përgjithësi. Lirimit të Ramush Haradinajt nuk i ndihmojnë maskaradat mashtruese të pushtetarëve, as vizitat sa për sy e faqe të oponentëve politikë dhe vizitat individuale të interesit personal në Kolmar të Francës, atë e ndihmon e vërteta dhe përkushtimi me shpirt dhe zemër i çdo qytetari të Kosovës pa dallime partiake, ideologjike apo fetare. Përderisa të gjithë sot po e themi se ndalesa e Haradinajt në Francë është e padrejtë, të vërtetën rreth kësaj çështjeje duhet ta thonë ekspertët juridikë, gjykatësit dhe avokatët shqiptarë me qëllim të përshpejtimit të proceduarave ligjore dhe përkufizimin e ndalesës – A është Haradinaj peng politik apo peng i Interpolit!?

Evcit: “Ngjarjet e fundit bënë që komunitetet në Prizren të jenë edhe më të bashkuar”

Duke folur për përbërjen multi-etnike të qytetit të Prizrenit, Evcit tha se në këtë qytet njerëzit e komuniteteve të ndryshme flasin gjuhën turke dhe sipas saj kjo gjuhë është një element bashkues i komuniteteve në këtë

PRISHTINË – Konsullja e përgjithshme e Republikës së Turqisë në Prizren, Selen Evcit foli për aktivitetet e zhvilluara në kuadër të kësaj konsullate gjatë pothuajse një viti që nga hapja e saj, si dhe për sulmet që ndodhën në kohët e fundit ndaj konsullatës dhe flamurit turk në Kosovë.

Në një intervistë për Anadolu Agency (AA), konsullja Evcit tha se që nga dita e hapjes së kësaj konsullate kanë organizuar aktivitete të shumta socio-kulturore dhe letrare, për bashkëatdhetarët turq në Kosovë, si dhe për të gjithë ata që e duan kulturën dhe gjuhën turke.

Evcit po ashtu theksoi se gjatë kësaj periudhe kanë kushtuar një rëndësi të veçantë për organizimin e ditëve të rëndësishme për popullin turk, si 19 Majin Festën e Rinisë dhe Sportit, 29 Tetorin Ditën e Republikës së Turqisë si dhe 10 nëntorin, përvjetorin e ndarjes nga jeta të themeluesit të Republikës së Turqisë, Mustafa Kemal Ataturk. Ajo shtoi se në të ardhmen do të vazhdojnë me aktivitete letrare, festivalin e teatrit dhe të kinemasë turke, si dhe seminare të ndryshme për zhvillimin personal të të rinjve.

Përpos këtyre aktiviteteve, Evcit njoftoi se në muajin prill në konsullatë, njëkohësisht me Ambasadën Turke në Prishtinë do të hapen edhe kutitë e votimit për referendumin mbi ndryshimet kushtetuese për të cilët janë të regjistruar në listën e votuesve jashtë vendit. Pas kësaj, ajo tha se do të fillojnë edhe me shërbime konsullore.

“Pas tejkalimit të procesit të referendumit, dua të jap lajmin e mirë se do të fillojmë edhe me shërbime konsullore. Pra, së bashku me aktivitetet kulturore dhe sociale të zhvilluara për bashkatdhetarët tanë, parashikojmë se duke filluar nga muaji prill do të fillojmë të ofrojmë edhe shërbime konsullore”, tha Evcit.

Ajo po ashtu foli për sulmet që ndodhën ndaj konsullatës dhe flamurit turk më 28 nëntor, kur po festohej Dita e Flamurit në Kosovë, si dhe për sulmin ndaj flamurit më 17 shkurt, në Ditën e Pavarësisë së Kosovës.

Sipas saj, zgjidhja e kësaj situate mund të bëhet me edukimin jo nacionalist dhe me njoftimin e gjeneratave të reja për historinë e vërtetë të periudhës osmane. Përkundër asaj që familjet e autorëve të sulmit ndaj Konsullatës kanë kërkuar falje, Evcit tha se këta persona duhet të marrin dënimin e duhur, në mënyrë që rastet e tilla të mos përsëriten.

“Këto janë gjëra që nuk i kemi pritur fare sidomos në Kosovë ku kemi një histori të thellë, në gjeografinë e zemrës sonë ku jetojnë bashkatdhetarë tanë si dhe komunitetet mike, si shqiptarët dhe boshnjakët. Kur ne themi se këtu po jetojnë të afërmit tanë, ngjarjet e tilla na bëjnë që të mërzitemi. Por ne si çdo herë themi se këto janë sulme personale, pra ato janë bërë nga disa të rinj dhe për fat të kaq të paarsimuar. Ne sigurisht që këto sulme nuk ia atribuojmë gjithë popullit të Kosovës dhe nuk mendojmë se as tek shqiptarët e as tek komunitetet tjera të cilët jetojnë këtu ka ndodhur ndonjë ndryshim në mendimet e tyre rreth Turqisë”, tha Evcit.

Duke folur për përbërjen multi-etnike të qytetit të Prizrenit, Evcit tha se në këtë qytet njerëzit të komuniteteve të ndryshme flasin gjuhën turke dhe sipas saj kjo gjuhë është një element bashkues i komuniteteve në këtë vend.

“Ne kemi jetuar me qytetarët e Prizrenit qindra vite së bashku, kemi një histori të përbashkët dhe këtu turqisht flasin edhe shqiptarët, boshnjakët, goranët. Pra, gjuha turke është bërë një element bashkues, dhe natyrisht që të gjithë shprehën solidaritetin dhe dëshirat që kjo të qoftë e kaluar sa më shpejtë. Ndoshta këto ngjarje bënë që popujt e komuniteteve të Prizrenit të jenë edhe më të bashkuar”, tha Evcit.

Ajo së fundmi u shpreh se Kosova dhe Turqia kanë marrëdhënie shumë të mira, të cilat rrjedhin nga një histori e përbashkët, dhe se ato nuk do të dëmtohen, por edhe do të avancohen në periudhat e ardhshme.

Ndryshe, më 23 prill të vitit të kaluar, përkatësisht në ditën e festës zyrtare të Turqve në Kosovë, në qytetin e Prizrenit u hap Konsullata e Përgjithshme e Republikës së Turqisë, në prani të Zv/kryeministrit turk, Numan Kurtulmuş, kryeministrit të Kosovës, Isa Mustafa si dhe një numri të madh të qytetarëve.

Prizreni ndodhet në pjesën jugperëndimore të Kosovës dhe njihet si një qytet kulturo-historik. Qyteti ka një përbërje multietnike, me shumicë të popullsisë shqiptare.

Lirohet deputetja Donika Kadaj-Bujupi

Deputetja nga radhët e Lëvizjes Vetëvendosje, Donika Kadaj- Bujupi është liruar pas arrestimit të sotëm në kufi me Maqedoninë.

Lajmin e ka konfirmuar Tinka Kurti, zëdhënëse për media në Vetëvendosje.

“Sapo është liruar Donika”

“Ka pas shumë shkelje gjatë procedurave, përfshirë atë se nuk i kanë caktuar avokat siç është paraparë me ligj”.

“Nuk ka pas thirrje për paraqitje në gjykatë por direkt i kanë lëshuar fletë-arrest”.

Hoxhaj e quan turist Jeremiqin që erdhi për fushatë në Kosovë

Ministri i Punëve të Jashtme i Kosovës, Enver Hoxhaj e ka quajtur turist kandidatin për President të Serbisë, Vuk Jeremiq, i cili sot vizitoi Patrikanën e Pejës.

Ironinë, kryediplomati kosovar e ka shprehur në Twitter duke e quajtur madje një vizitë turistike dhe uruar t’i kenë pëlqyer bukuritë natyrore të Kosovës.

“Shpresoj që Jeremiqi të jetë kënaqur me vizitën e tij turistike në Kosovë, me diellin dhe me pamjet e trashëgimisë kulturore të Kosovës. Numri i turistëve nga Serbia po rritet”, ka shkruar Hoxhaj në Twitter.

Paraditen e së premtes është raportuar se ish-ministri i Jashtëm i Serbisë, Vuk Jeremiq e ka vizituar Patrikanën e Pejës duke thënë se serbët po diskriminohen në Kosovë.

Zgjedhjet presidenciale në Serbi mbahen më 2 prill. Kandidat është edhe Aleksandar Vuçiq.

Kosova importon pothuaj gjithçka, eksporton pothuaj asgjë

Në mungesë të një industrie të zhvilluar të prodhimtarisë, Kosova vazhdon të importojë gati të gjitha produktet, duke filluar nga ato të konsumit, deri te produktet strategjike.

Vlera totale në vit e mallrave të importuara në Kosovë sipas të dhënave zyrtare arrin shifrën në mbi 2.5 miliardë euro, derisa eksporti i produkteve të Kosovës në vendet e rajonit dhe Evropës nuk arrin vlerën mbi 300 milionë euro në vit.

Ky debalanc tregtar, për ekspertin e çështjeve ekonomike, Naim Gashi tregon gjendjen e rëndë të sektorit të prodhimit në vend.

“Kosova është një vend i cili i importon 2.6 miliardë euro produkte brenda vitit dhe këtu mendojë që ka hapësirë të madhe për bizneset vendore edhe biznese të huaja që të investojnë të krijojnë prodhime dhe shërbime në mënyrë që të shkurtohet hendeku i importit të madh që po vie nga bota e jashtme”, thotë Gashi.

Të dhënat e Agjencisë të Statistikave të Kosovës tregojnë se Serbia vazhdon të jetë importuesi kryesor në Kosovë.

Shumica e këtyre produkteve të cilat importohen nga Serbia apo edhe nga shtetet tjera, thotë eksperti i i ekonomisë Naim Gashi mund të prodhohen edhe në Kosovë me një kosto më të lirë.

“Për të krijuar biznese, afaristët duhet të shkojnë në Doganat e Kosovës dhe t’i marrinë listat se cilat janë produktet të cilat importohen më së shumti në Kosovë dhe të investojnë në ata sektorë, për arsye se nëpërmes investimeve të tyre në Kosovë do të jenë më konkurrent sesa produktet e jashtme, pasi që nuk do ta kenë koston e transportit dhe do të kenë një fuqi të lirë punëtore brenda tregut vendor”, theskon Gashi.

Për të rritur prodhimtarinë autoritetet e Kosovës janë në përfundim e sipër të një pako të re fiskale.

Zyrtarë qeveritarë i kanë thënë Radios Evropa e Lirë se me pakon e re fiskale e cila pritet të hyjë në fuqi në muajin maj të këtij viti, procesi zhvillimor i prodhimtarisë do të shënojë hapa pozitiv.

Ata kanë thënë se ‘Kosova ka kapacitete për të zëvendësuar disa produkte të cilat importohen dhe jo vetëm të zëvendësohen, por të krijohen edhe potenciale për pjesëmarrje në tregun ndërkombëtarë nëpërmjet Marrëveshjes së Stabilizim Asocimit’.

Në anën tjetër, përfaqësues të bizneseve në Kosovë thonë se prodhuesit vendor janë të penguar nga konkurrenca që vjen nga jashtë.

Kryetari i Aleancës Kosovare të Biznesit Agim Shahini, thotë se politikat fiskale nuk janë në favor të prodhuesve.

“Qeveria vazhdon që të bënë përpjeke për ndryshime kozmetike të politikave fiskale e që këto janë të pamjaftueshme për të rritur fuqinë konkurruese të prodhuesit vendor. Prodhuesit vendor edhe më tutje janë të sfiduar nga këto politika të këqija dhe nga këto politika të shtrenjta fiskale e që janë më të shtrenjta në Ballkanin perëndimorë”, thekson Shahini.

Importi i madh i produkteve vlerësohet si mjaft shqetësuese nga ekspertë të fushës dhe përfaqësues të bizneseve pasi që po shkakton përveç tjerash edhe largimin e parasë së gatshme nga tregu i Kosovës. (REL)

Kosova anëtarësohet në Organizatën Botërore të Doganave

Autoritetet në Prishtinë thanë të premten se Kosova është anëtarësuar në Organizatën Botërore të Doganave.

Zyrtarët e qeverisë thanë se anëtarësimi në këtë organizatë është shumw i rëndësishëm pas anëtarësimit në Bankën botërore dhe Fondin Monetar Ndërkombëtar, që lidhet me fushën e zhvillimit ekonomik.

Kryeministri i Kosovës, Isa Mustafa, tha se anëtarësimi në këtë organizatë hapë rrugë të reja për zhvillimin e Kosovës.

“Ky hap ka rëndësi shumë të madhe për zhvillimin e gjithëmbarshëm të vendit, për fuqizimin e subjektivitetit ndërkombëtar, për përparimin e raporteve ekonomike dhe tregtare të Kosovës me të gjitha shtetet e botës, anëtare të kësaj konvente si dhe për shumë aspekte që lidhen me shtetësinë dhe me përparimin e Kosovës”, tha ai.

Kryeministri Mustafa tha se nëpërmjet kësaj organizate Kosova do të mund të luftojë dukuritë negative.

“Anëtarësimi në konventa dhe organizata tjera ndihmon në tregti me shtetet tjera, ndihmon shkëmbimin e informative dhe përvojave, përforcon sigurinë kufitare, përmirëson dhe ndihmon tregtinë e jashtme të Kosovës, lufton piraterinë, ekonominë jo formale, në luftimin e terrorizmit dhe shumë përfitime tjera të cilat ndihmojnë në arritjen e objektivave për të luftuar dukuritë negative nëpërmjet kësaj organizate”, tha kryeministri Mustafa.

Organizata Botërore e Doganave është themeluar në vitin 1952 dhe përbëhet nga 180 vende të botës. Selia e saj qendrore ndodhet në Bruksel.

Kosova shpalli pavarësinë e saj në shkurt të vitit 2008, ndërsa edhe më tej përballet me vështirësi në anëtarësim në organizata ndërkombëtare, pasi që Serbia që nuk e njeh pavarësinë e saj, kundërshton çdo anëtarësim të Kosovës në këto organizata.

Shoqëria civile: Zyrtarët publikë të Kosovës e fshehin pasurinë

Zyrtarët e lartë publikë të Kosovës në deklarimet e rregullta vjetore të pasurisë së tyre, në të shumtën e rasteve bëjnë deklarim të rrejshëm të pasurisë, thonë përfaqësues të shoqërisë civile.

Nga deklarimet e pasurisë ndër vite që kanë bërë zyrtarët e lartë publikë në Agjencinë Kosovare Kundër Korrupsionit, figuron se ata kanë pasuri të paluajtshme, pasuri të trashëguar nga familja, para të gatshme dhe vetura luksoze.

Deklarimi i pasurisë i zyrtarëve publikë në Kosovë është një obligim ligjor dhe shmangia ose fshehja e të dhënave, thonë zyrtarë të Agjencisë Kundër Korrupsion, mund të çojë drejt padisë në gjykata.

Drejtori i Agjencisë, Shaip Havolli, i tha Radios Evropa e Lirë se në rastet kur ka deklarime të rrejshme të pasurisë, bëhen hetime dhe rastet e tilla dërgohen në gjykata.

“Sa i përket asaj se sa janë real në deklarimin e pasurisë, bazuar në Ligj ne kemi të drejtë të bëjmë kontrollin e pasurisë dhe prejardhjen, në rast se hasim në mospërputhje ose nëse kemi informacion se një zyrtar nuk e ka deklaruar pasurinë e tij në formularin e deklarimit, fillojmë hetime dhe nëse ka elemente të veprës penale atëherë në këto raste i dërgojmë në prokurorinë përkatëse”, tha Havolli.

Mosdeklarimi apo deklarimi i rrejshëm i pasurisë nga ana e zyrtarëve të lartë publikë përbën vepër penale që sanksionohet me dispozitat e Kodit Penal dhe që mund të rezultojë me gjobë, burgim deri nga gjashtë muaj deri në pesë vjet, si dhe konfiskim të pasurisë së fituar në kundërshtim me ligjin.

Në shënimet zyrtare të AKK-së thuhet se janë dhjetëra raste kur Agjencia i është drejtuar gjykatave me padi për mosdeklarim ose deklarim të “pasaktë” të një numri të zyrtarëve, qoftë komunalë apo edhe ata të institucioneve të tjera. Gjykatat në raste të caktuara kanë liruar një numër të zyrtarëve “për shkaqe procedurale”.

Organizatat joqeveritare thonë se deklarimet e një numri zyrtarësh të lartë publikë po bëhen qëllimisht të “pasakta”.

Arton Demhasaj nga Organizata për Demokraci, Anti-Korrupsion dhe Dinjitet “Çohu”, në një prononcim për Radion Evropa e Lirë, thotë se nga hulumtimet e bëra kanë gjetur numër të konsiderueshëm të zyrtarëve të cilët nuk kanë bërë deklarim real të pasurisë.

“Ne si organizatë disa herë kemi bërë hulumtime dhe kemi vënë në pah pasuria që deklarohet nga zyrtarët publikë nuk është pasuria reale nga ajo që ata e kanë. Ajo pasuri që ata e deklarojnë është thjesht falë vullnetit që ata e kanë, dhe nuk e parqet realitetin. Kemi evidentuar disa herë biznese të zyrtarëve të lartë publikë që nuk i kanë deklaruar bizneset e tyre”, ka theksuar Demhasaj.

Demhasaj përveç tjerash thotë se zyrtarët e lartë publikë nuk deklarojnë pasurinë që kanë jashtë vendit dhe prejardhjen e saj. Problem themelor thotë ai janë mungesa e mekanizmave që kontrollojnë vërtetësinë e deklarimeve të pasurisë.

“Duhet të ndryshohet Ligji për Deklarimin e pasurisë dhe vendosen mekanizma që të obligohen zyrtarët që të deklarojnë pasurinë që e kanë jashtë shtetit dhe përveç kësaj të krijohen mekanizma brenda agjencisë që të kenë mundësi të verifikojnë këtë pasuri që mund të jetë jashtë shtetit”, thekson ai.

Për fuqizimin e mandatit të Agjencisë Kundër Korrupsion flet edhe drejtori i këtij institucioni, Shaip Havolli.

“Pritet që Agjencia të ketë mandat më fuqiplotë në aspektin e kontrollit dhe prejardhjes së pasurisë së zyrtarëve të lartë publikë”, thekson Havolli.

Zyrtarisht procesi i deklarimit të rregullt vjetor të pasurisë së zyrtarëve të lartë publikë, fillon nga data 1 mars dhe përfundon më 31 mars.

Deklarimit të pasurisë i nënshtrohen të gjithë zyrtarët e lartë publikë, me përjashtim të atyre që kanë deklaruar pasurinë me rastin e marrjes së detyrës pas datës 1 janar të këtij viti.

Naser Kelmendi dërgohet nga paraburgimi në arrest shtëpiak

Naser Kelmendi, i akuzuar për tregti me drogë, krim të organizuar, si dhe vrasjen e personit Ramiz Delaliq, shtetas i Bosnjë Hercegovinës, është dërguar nga paraburgimi në arrest shtëpiak.

Vendimin për dërgimin e tij në arrest shtëpiak e ka marrë gjyqtarja Ana Adamska Gallant. Lajmin e ka konfirmuar nga avokati i tij, Besnik Berisha.

Kelmendi i lindur në Pejë, aktualisht shtetas i Bosnjë Hercegovinës, është arrestuar më 6 maj, 2013, nga Policia e Kosovës, në bazë të urdhër-arrestit ndërkombëtar, të lëshuar nga autoritetet boshnjake dhe që nga ajo kohë është në paraburgim në Kosovë.

Më 1 qershor, 2012, nga Departamenti i Thesarit të Shteteve të Bashkuara të Amerikës, Naser Kelmendi është identifikuar nën Aktin për Bosët e Narkotikëve të Jashtëm si një trafikant i lëndëve narkotike.

Kosovë, aktakuzë ndaj Imamit Shefqet Krasniqi

Prokuroria e Posaçme e Kosovës ngriti të hënën aktakuzë kundër imamit Shefqet Krasniqi për vepra penale që ndërlidhen me terrorizmin.

Në një njoftim të Prokurorisë së Posaçme thuhet se ish Imami i Xhamisë së Madhe në Prishtinë Shefqet Krasniqi, akuzohet për veprat penale që lidhen me “shtytje për kryerjen e veprave terroriste, nxitje e urrejtjes, përçarjes ose mos durimit kombëtar, racor, fetar apo etnik, dhe shmangie nga tatimi”.

Sipas aktakuzës “i pandehuri në cilësinë e imamit të xhamisë se madhe “Mehmet Fatih” në Prishtinë, në vazhdimësi dhe me dashje ka shpërndarë mesazhe për publikun, përmes paraqitjeve të tij të drejtpërdrejta para publikut përmes ligjëratave të ndryshme, si dhe duke shfrytëzuar rrjetet sociale dhe mjetet tjera të informimit, përmes gjuhës së vrazhdë dhe interpretimit të ajeteve kuranore jashtë kontekstit kohor dhe frymës parimore islame, ka shtyrë të tjerët ta marrin rrugën drejt zonës së konfliktit në Siri dhe Irak e më pas të kryejnë akte terroriste, si dhe ka cilësuar disa grupe fetare si armiq të myslimanëve-sunit, duke nxitur dhe përhapur urrejtje, përçarje dhe mosdurim ndaj grupeve tjera fetare, të cilat jetojnë edhe në Republikën e Kosovës”,thuhet në njoftimin e Prokurorisë.

Po ashtu, sipas prokurorisë ish Imami i Xhamisë së Madhe. si tatimpagues dhe pronar i biznesit “Portat”, ka fshehur dhe shmangur tatimet.

Ish imami i Xhamisë së Madhe në Prishtinë, që është xhamia më e madhe nën juridiksionin e Bashkësisë Islame të Kosovës, ishte shoqëruar nga policia e Kosovës në shtator të vitit 2014, gjatë një operacion të zhvilluar në vazhdimësi të operacioneve të muajit gusht të atij viti për arrestimin e të dyshuarve për përfshirje në luftërat në Siri e Irak dhe nxitje për t’ju bashkuar atyre luftërave.

Imami, Shefqet Krasniqi, është përfolur shpeshherë për fjalime e qëndrime nxitëse, madje emri i tij qe përmendur edhe në raportin e Departamentit Amerikan të Shtetit mbi liritë fetare në botë.

Veton Surroi në NZZ: «Duhet ta çlirojmë edhe njëherë Kosovën»

Nëntë vjet pas shpalljes së pavarësisë Kosova stagnon, shkruan gazeta «Neue Zürcher Zeitung» (NZZ). Mbi gjendjen në vend e përditshmja zvicerane ka biseduar me Veton Surroin, publicist i njohur kosovar, i cili «gjatë gjysmës së jetës së tij ka luftuar për pavarësi». Sipas Surroit nuk ka të ngjarë që liria të vijë në trajtën e revolucionit, por ai do të dëshironte një fitore të një fronti të gjerë popullor të përbërë nga partitë politike dhe grupet e shoqërisë civile. Pastaj, sipas tij, hap pas hapi shteti duhet të pastrohet – «nga ata kriminelë që e kapën shtetin pas pavarësisë dhe që nga atëherë e adminsitrojnë si të ishte pronë e tyre».

Gazeta përkujton se gjatë «çlirimit të parë» Surroi ishte i involvuar dukshëm: më 1999 në negociatat në Rambouillet, më 2007 në diskutimet për Planin e Ahtisaarit në Vjenë. NZZ shkruan se pas luftës Surroi u tregua shumë i giximshëm kur kritikoi ashpër vrasjet sistematike të serbëve kryesisht te moshuar. Sipas Surroit nuk bëhej fjalë për hakmarrje të verbër për padrejtësinë e përejtuara, por për spastrime të kalkuluara. Kjo fushaë u zhvillua me dijen e krerëve të UÇK-së. Surroi sot thotë: «Është indikative se vrasjet u ndalën kur Thaçi mori pushtetin».

«Kosova është një shtet i ri, i cili që nga fillmi është drejtuar nga një grup kriminal», insiston Surroi. Sipas tij partitë në pushtet keqpërdorin shtetin për të plaçkitur resurset e vendit dhe për t’i ndarë ato mes vete. Mungesa e plotë e transparencës dhe e llogaridhënies e bëjnë demokracinë të duket si farsë, thotë ai. Serbia, sipas tij, po ashtu është një shtet autokrat, por ajo për këtë ka pëlqimin e qartë të shumicës së popullit. «Në Kosovë nuk ekziston ky konsenzus me qytetarët. Ai ekziston mes pushtetarëve dhe një pjese të bashkësisë ndërkombëtare», thotë Surroi. Kjo pjesë e bashkësisë ndërkombëtare, sipas tij, e toleron Thaçin për aq kohë sa ai garanton stabilitetin politik dhe vazhdimin e «normalizimit» të raporteve me Serbinë.

Por cilat janë gjasat për «çlirimin e dytë» të Kosoveës? Surroi e pranon se parakushtet sot janë shumë më të pafavorshme se në vitet ’90. Në Europë nuk ndihet më asnjë puhizë e frymës së dikurshme të lirisë, amerikanët po tërhiqen gjitnjë e më shumë. Vetëm Gjermania, shton Surroi, mbetet shpresëdhënëse për ata që duan demokraci liberale. «Jemi vetëm. Kësaj here nuk vjen aviacioni luftarak amerikan për të na ndihmuar».

Surroi apelon që negociatat me Serbinë duhet të zhvillohen me një format të ri. Debatet për letrat ngjitëse në targa të veturave apo mbi gjatësinë e murit në Mitrovicë, «ky mikromenaxhment», largon vëmendjen nga çështjet thelbësore. Surroi: «Me Serbinë ne duhet të flasim mbi luftën dhe pasojat e saj. Bëhet fjalë për sovranitetin tonë dhe një rend të drejtë të pasluftës». Sipas tij ka qenë gabim që pas vendimit të Gjykatës Ndërkombëtare të Drejtësisë, e cila tha se shpallja e pavarësisë nuk ishte në kundërshtim me të drejtën ndërkombëtare, të pranohen negociata me Serbinë. Kështu në negociatat e Brukselit Kosova duket si territor i kontestuar. Edhe më keq: Thaçi lejon që Beogradi të përcaktojë se si duhet të aranzhohen serbët e Kosovës me shtetin e ri kosovar. Surroi tha se Bashkësia e Komunave Serbe është kundërkushtetuese dhe nuk do të arrihet të zbatohet kurrë në praktikë.

Sipas Surroit Thaçi është bërë akter i të ashtuquajturit «proces normalizimi» me Serbinë me qëllim që të duket si partner konstruktiv i bashkësisë ndërkombëtare dhe ndoshta për shkak se ka përshtypjen se mund të jetë njëri nga të akuzuarit kryesorë të Gjykatës Speciale. Surroi pret që aktakuzat e Gjykatës Speciale të shkundin dukshëm skenën politike të Kosovës. Por shpresa të tilla në Kosovë ka pasur edhe kur u stacionua EULEX-i. Surroi thotë se në fund të fundit «asnjë institucion ndërkombëtar nuk do t’ia dalë ta pastrojë shtëpinë tonë. Duhet ta bëjmë vetë». Megjithatë, shton Surroi, është shumë problematike kur shihen përfaqësues të bashkësisë ndërkombëtare, të cilët në Kosovë tolerojnë rrethana që në vendet e tyre nuk do t’i toleronin kurrë. Përkundër situatës së zbehtë politike Surroi thotë se me shpalljen e pavarësisë «ne kemi një strehë mbi kokë, kemi shtetin tonë». (-lli)/dp

Beriane Mustafa flet për «USA Today»: Shpresoj drejtësi për të gjitha krimet e kryera këtu Nga Valerie Plesch

 

Kur Beriane Mustafa po kthehej nga shkolla në shtëpi gjashtëmbëdhjetë vite më parë, pa një turmë njerëzish para banesës së saj dhe u trondit kur e mori vesh se babai i saj, gazetar dhe këshilltar i njohur politik, ishte vrarë.

Vrasja e Xhemajl Mustafës nuk e lë rehat as ditëve të sotme. «Zgjoheni në mëngjes me pyetjen që të sillet përherë nëpër mend: “Kush dhe pse e vrau?”, thekson Beriane Mustafa, 35 vjeçare. «Dhe kjo nuk të lë rehat përditë dhe të vret».

Beriane Mustafa shpreson se, më në fund, vrasësit e babait të saj do të dalin para drejtësisë. Një gjykatë është themeluar në qytetin holandez, në Hagë, dhe gjatë muajve të ardhshëm pritet të nisë gjykimin e krimeve që dyshohet se janë kryer nga komandantët e Ushtrisë Çlirimtare të Kosovës – përfshirë edhe presidentin aktual të Kosovës, Hashim Thaçi – gjatë dhe pas luftës në Kosovë për pavarësi prej Serbisë në fund të viteve nëntëdhjetë.

Bashkimi Europian u ka kërkuar zyrtarëve të Kosovës ta zhvendosin Gjykatën Speciale në Hagë për shkak të shqetësimeve se mund të kërcënohen dëshmitarët. Gjykata, e themeluar më 2016, do të operojë sipas ligjeve të Kosovës dhe do të financohet prej Bashkimit Europian, dhe do të përbëhet prej gjykatësve dhe prokurorëve ndërkombëtarë. Zyrtarët e Gjykatës Speciale do të publikojnë afatet kohore të procedurave në javët e ardhshme.

Gjykata Speciale do të përqendrohet në krimet e kryera gjatë luftës që pasoi shkatërrimin e Jugosllavisë dhe që u desh ndërhyrja e NATO-s, prirë prej amerikanëve, për nxjerrjen e forcave serbe jashtë Kosovës. Ish-krahina shpalli pavarësinë më 2008, por ende nuk njihet si shtet i pavarur prej Serbisë dhe aleates së saj, Rusisë.

Prokurorët ndërkombëtarë ia kanë dalë me sukses të sjellin raste kundër krerëve serbë. Vjet, Gjykata Ndërkombëtare për Krime Lufte në ish-Jugosllavi e shpalli fajtor Radovan Karaxhiqin, lider politik i serbëve të Bosnjë, për gjenocid në masakrën e Srebrenicës, ku shumica prej viktimave ishin myslimanë boshnjakë. Ai po e vuan dënimin prej dyzet vitesh burgim.

Babai i Berane Mustafës, Xhemajl Mustafa, ishte anëtar i Lidhjes Demokratike të Kosovës dhe këshilltar i presidenti të parë të Kosovës, Dr.Ibrahim Rugova. Ai ishte një prej njerëzve shumë të afërt të Rugovës, i cili vdiq pas luftës.

«Nuk mund të thoni se konflikti mbaroi në qershor 1999 kur NATO-ja hyri në Kosovë», ka deklaruar Nora Ahmetaj, hulumtuese e të drejtave të njeriut në Qendrën për Kërkim, Dokumentim dhe Publikime në Prishinë.

Ende nuk dihet se kush do të akuzohet. Në një raport të vitit 2011 të Këshillit të Europës thuhet se presidenti Thaçi dhe anëtarë të tjerë të lartë të Ushtrisë Çlirimtare të Kosovës trafikuan organe, kryen rrëmbime dhe torturuan e vranë serbë, romë dhe shqiptarë të Kosovës, të cilët dyshohej se kishin bashkëpunuar me Serbinë.

Thaçi i ka hedhur poshtë akuzat dhe zyra e tij ka refuzuar ta komentojë këtë.

Tomë Gashi, i cili ka qenë këshilltar i Thaçit, ka thënë se pret se presidenti dhe politikanët e tjera do t’i rezistojnë hetimeve dhe dënimit. «Nuk kanë gatishmëri të qëndrojnë në një qeli prej gjashtë metrash katrorë në një shtet të huaj rreth tre mijë kilometra pa askënd», ka deklaruar ai. «Ata kanë jetë të mirë këtu dhe ishin në pushtet për shtatëmbëdhjetë vite, dhe e trajtojnë Kosovën si monarki. Jetojnë si mbretër. Ata përnjëmend janë të frikësuar».

Serbët e Kosovës, pakica më e madhe etnike në vend, shpresojnë se dorasit, më në fund, do të përfundojnë në bankën e të akuzuarve. «Është e rëndësishme, jo vetëm si serbë, por edhe si qenie njerëzore», thekson Nenad Maksimoviq, drejtor i Qendrës për Paqe dhe Tolerancë. Faton Klinaku, sektar i organizatës së veteranëve të UÇK-së, ka deklaruar se Gjykata Speciale duhet të ketë selinë në Kosovë për t’u marrë me krimet. Ai gjithashtu nuk beson se Serbia ndonjëherë ka dhënë llogari për krimet e saj në Kosovë. «Pjesa më e keqe prej gjithë kësaj është se askush nuk po merret me krimet e shkaktuara prej Serbisë në Kosovë», deklaron Klinaku.

Beriane Mustafa shpreson se gjykata e re e krimeve të luftës do ta zbardhë vrasjen e babait të saj, dhe se do ta çojë drejtësinë në vend, «jo vetëm për shkak të rastit të babait, por për të gjitha krimet e luftës që janë kryer këtu».

Lista Serbe e quan kriminel Haradinajn

Lista Srpska ka komentuar për takimin e ish-presidentit kroat, Stipe Mesiç, i cili qëndroi në Kosovë dhe u takua edhe me pjesëtarët e AAK’së. Mesic ka thënë se miku i tij, Ramush Haradinaj duhet të lirohet, ndërsa Lista Srpska thotë se Mesic po e quan mik kriminelin e luftës

Lista Srpska ka komentuar deklaratën e Stipe Mesicit, ish-presidentit kroat, i cili ka thënë se shpreson në lirimin sa më të shpejtë të Haradinajt, duke e quajtur mik. Kjo parti ka thënë se ish-presidenti kroat po i quan miq kriminelët e luftës.

Lista Srpska që është pjesë e Qeverisë së Kosovës, ka thënë për Tanjug se me dëshirën e Mesicit për lirimin e Ramush Haradinajt, ish-kryeministri kroat po e tregon fytyrën e vërtetë, transmeton Gazeta Express.

“Mesiq është rrënues i shteteve dhe pjesëmarrës krenar në nxitjen e luftës vëllavrasëse, njeriu i cili është krenar me rolin e tij në shkatërrimin e shtetit që shpërbërjen e tij e shtyri në luftë, ku si pasojë u vranë miliona serbë, myslimanë dhe kroatë”, ka theksuar kjo parti.

Sot prezantohet Instituti që do të hetojë vdekjen e dyshimtë të Astrit Deharit

Prindërit e Astrit Deharit, aktivistit të Vetëvendosjes që vdiq në Qendrën e Paraburgimit në Prizrenit, bashkë edhe me avokatin Tom Gashi, do të prezantojnë sot Institutin e Bashkimit Evropian, i cili do të angazhohet për hetime dhe ekspertiza të pavarura për vdekjen e Deharit.

Ata do të flasin në një konferencë për media, e cila do të mbahet në zyrën e avokatit Gashi, duke filluar nga ora 12:00.

Kuvendi i Republikës së Kosovës më 20 dhjetor 2016, ka miratuar rezolutë, me të cilën ka autorizuar familjen Dehari për përzgjedhjen e këtij ekipi të eksperteve.

Kosova ende pa vendimin për aplikim në UNESCO dhe KE

Mbetjet e qytetit të lashtë romak Ulpiana, afër Prishtinës. Pjesa e gërmimeve.

Institucionet e Kosovës janë duke punuar në vazhdimësi për të aplikuar për anëtarësim në organizatat ndërkombëtare, sikurse Agjencia për Kulturë, Shkencë dhe Arsim e Kombeve të Bashkuara (UNESCO) dhe Këshilli i Evropës, konfirmojnë zyrtarët e Qeverisë së Kosovës. Mirwpo, por ata nuk kanë precizuar ndonjë afat të caktuar se kur do ta bëjnë këtë.

Zëvendësministri i Punëve të Jashtme i Qeverisë së Kosovës, Valon Murtezaj, thotë për Radion Evropa e Lirë, se institucionet e Kosovës, në radhë të parë Ministria e Jashtme, po punon me intensitet të shtuar për avancimin e dosjes së aplikimit për anëtarësim në UNESCO. Por, sipas tij, kjo nuk nënkupton që Kosova domosdo do të aplikojë për anëtarësim në këtë organizatë, gjatë këtij viti.

“Ende ne nuk kemi ndonjë vendim përfundimtar se kur do të aplikojmë. Janë plot rrethana, të cilat do të analizohen me kujdes. Janë zhvillimet brenda UNESCO-s, janë zhvillimet në Kosovë, rajonale etj. Pra, të gjitha këto kanë ndikim në gjithë procesin. Prandaj, ne do të jemi të kujdesshëm që mos të përsëritet një situatë e re, në të cilën ne nuk do të mund të kishim sukses. Në aplikimin e dytë, ne patjetër duhet të jemi me gjasa të sigurta për t’u anëtarësuar”, thotë Murtezaj.

Trashëgimia Kulturore dhe Fetare e Kosovës

Zëvendësministri Murtezaj thekson se mjaft rrethana nuk varen detyrimisht nga Kosova, për ta determinuar saktësisht se kur do të merret vendimi për të aplikuar për anëtarësim në UNESCO. Ngjashëm, sipas tij, është situata edhe për aplikimin për anëtarësim të Kosovës në Këshillin Evropian.

“Nuk ka afat kohor, por esenca e gjithë kësaj është që Kosova ka shumë nevojë për t’u anëtarësuar në këtë institucion, i cili merret me segmente të rëndësishme të jetës për qytetarët e Kosovës, siç janë: të drejtat e njeriut, sundimi i ligjit, lufta kundër korrupsionit, të drejtat e minoriteteve. Të gjitha këto bëjnë që Kosova të ketë një interesim edhe më të theksuar dhe përkushtim për t’u anëtarësuar në Këshillin e Evropës. Natyrisht që edhe prej momentit të aplikimit, procesi zgjat. Pra, nuk është një proces që mund të përmbyllet brenda një apo dy vjetëve”, sqaron Murtezaj.

Por, deputetja e Kuvendit të Kosovës nga radhët e Lëvizjes Vetëvendosje, Puhie Demaku, anëtare e Komisionit Parlamentar për Punë të Jashtme, duke folur për Radion Evropa e Lirë, shpreh mendimin se institucionet e Kosovës janë vonuar për t’u integruar në organizatat ndërkombëtare, përfshirë këtu edhe UNESCO-n dhe Këshillin e Evropës.

“Po e them shumë e vonuar, për shkak se, mos të harrojmë se organizatat ndërkombëtare përbëhen prej shteteve anëtare, politikat e të cilave dirigjohen nga politika e brendshme e secilit shtet anëtar. Sa më shumë që po ndryshon politika nëpër botë, në kuptimin që po fiton më shumë përkrahje rryma ekstreme e djathtë në shtetet anëtare, aq më e ashpër dhe më e vështirë do të jetë për Kosovën situata për anëtarësim në organizma multilateral”, thotë ajo.

Deputetja Demaku, shpreh mendimin se Qeveria e Kosovës nuk është duke punuar mjaftueshëm dhe me seriozitetin e nevojshëm, në mënyrë që të bëhen aplikimet e duhura në organizatat ndërkombëtare.

“Sa më shumë që e shtyjmë procesin, gjendja do të vijë duke u përkeqësuar, për sa i përket kushteve, dhe jo duke u përmirësuar. Kështu që, nëse nuk aplikojmë, ne domosdo e diskualifikojmë veten”, konsideron Demaku.

Më 9 nëntor të vitit 2015, Kosova kishte dështuar të bëhet anëtare e UNESCO-s, duke mos arritur që të marrë më shumë se dy të tretat e votave të nevojshme të vendeve anëtare të kësaj organizate, të pranishme në punimet e konferencës së përgjithshme të saj.

Kosovës i munguan edhe 3 vota “për”. Paraprakisht, Kosova ishte ballafaquar me një fushatë agresive të Serbisë, e cila kishte kundërshtuar anëtarësimin e Kosovës në UNESCO.(REL)

Hoxhaj: Vuçiç po zhvillon luftë informative ndaj Kosovës

Ministri i Punëve të Jashtme, Enver Hoxhaj në një intervistë dhënë revistës Tageblatt, në Gjermani ka thënë se kryeministri serb Vuçiç se po zhvillon luftë informative të stilit rus. Hoxhaj tha se duke i përdorur mediat të cilat ai i kontrollon, Vuçiç ka nisur një luftë informative, me qëllim keqinformimin e opinionit në lidhje me Kosovën, provokimin e Kosovës dhe nxitjen e tensioneve të reja.

“Ne nuk duam ta ngrisim asnjë retorikë luftarake. Por në anën tjetër, Aleksander Vuçiç po zhvillon një luftë informative të stilit rus. Unë nuk dëshiroj ta ndërtoj politikën tonë të jashtme mbi gjuhë të rëndë, por mbi parime. Në gjashtë muajt e fundit ka pasur një zinxhir të ndodhive, me anë të të cilave Kosova është provokuar me vetëdije nga ana e Serbisë”, ka thënë Hoxhaj. Në këtë intervistë, Hoxhaj ka theksuar se Serbia ende nuk ka treguar asnjë interesim për të kërkuar falje për ngjarjet në Kosovë, apo në Bosnje dhe Kroaci.

“Edhe 17 vite që nga përfundimi i luftës, Serbia nuk ka treguar asnjë interesim për të kërkuar falje për atë që ka ngjarë ne Kosovë, por edhe në Bosnje dhe Kroaci. Unë e kuptoj zemërimin e njerëzve, të cilët ende kanë dike të afërm të zhdukur. Ne jemi të detyruar të ndërtojmë një urë në mes të një të kaluare të rëndë dhe një të ardhmeje më të mirë. Ne duhet të shohim përpara, por pa harruar se çfarë ka ndodhur”, ka thënë Hoxhaj.

Qytetarët shpenzojnë rreth 150 milionë euro në vit për shërim jashtë Kosovës

Qytetarët e Kosovës shpenzojnë rreth 150 milionë euro në vit për trajtime mjekësore jashtë vendit.

Këto shifra i ka dhënë kryetari i Federatës Sindikale të Shëndetësisë, Blerim Syla, duke u thirrur në statistikat e bankës Botërore. Sipas tij, shërbimet mjekësore në vend vazhdojnë të mbesin të mangëta, andaj edhe qytetarët kërkojnë trajtime jashtë Kosovës.

“Konsiderojmë se për shkak të politikave që i kemi dhe mos marrjes së shërbimeve shëndetësore, shpenzohen 120 deri 150 milionë euro në vit nga qytetarët në spitale private (jashtë Kosovës). Sikur këto të holla të investoheshin brenda vendit, shërbimet do të ishin të mira. Këto shifra i ka publikuar Banka Botërore”, ka thënë Syla.

Përveç rasteve individuale të kërkimit të shërbimeve mjekësore jashtë vendit, një pjesë e tyre referohen për shërim jashtë edhe nga vend institucionet e Kosovës.

Ministria e Shëndetësisë në Qeverinë e Kosovës, gjatë vitit 2016, ka ndarë rreth 6 milionë euro për programin e dërgimit të pacientëve jashtë institucioneve publike shëndetësore.

Lulzim Uka, zyrtar për informim tha për Radion Evropa e Lirë se ka pasur 1958 aplikime për shërbime shëndetësore jashtë vendit, të formave të ndryshme. Prej tyre, kanë përfituar 1100 pacientë. Kurse shpenzimet për mbulimin e këtyre rasteve kapin shifrën prej 8 milionë euro.

“Buxheti ka qenë 6 milionë euro, derisa pjesa tjetër është bartur si borxh për këtë vit, gjë që dëshmon se ky buxhet nuk mjafton. Ministria e Shëndetësisë në baza ditore po punon në ngritjen e infrastrukturës në mënyrë që të ketë sa më pak nevoja për trajtim jashtë vendit”, ka thënë Uka.

Në anën tjetër, zyrtari për informim në Qendrën Klinike Universitare të Kosovës, Shpend Fazliu, ka thënë se rastet që nuk trajtohen brenda kësaj qendre, si institucion terciar referent për tërë Kosovën, referohen për trajtim jashtë vendit.

“Në kuadër të secilës klinikë brenda Qendrës Klinike Universitare të Kosovës, ekziston konsiliumi prej tre anëtarësh dhe drejtorit të klinikës, që shqyrtojnë sëmundjet që duhet trajtuar jashtë institucioneve publike shëndetësore. Sëmundjet ndërlidhen kryesisht me leukeminë, por edhe me transplantet që nuk mund të kryhen (këtu)”, ka thënë Fazliu.

Sidoqoftë, sipas zyrtarëve të Ministrisë së Shëndetësisë, interesimi më i madh për trajtime jashtë vendit, është në citostatik me 187 aplikime, brakiterapi me 34, kardiologji me 637 aplikime.

Po ashtu, interesim për trajtim jashtë ka edhe për kardiokirurgji me 36 , kirurgji me 45, leukemi me 35, nefrologji me 23 aplikime, neurologji me 49, oftalmologji me 341, onkologji me 12, ORL me 42, ortopedi me 299, pediatri me 132 dhe të tjera, ku përfshihen 21 pacientë që kanë aplikuar për trajtim jashtë Kosovës. (REL)

Grupi i ekspertëve paralajmëron për nesër publikim të fakteve të reja për demarkacionin

Në emër të Grupit të ekspertëve të pavarur, në profilet zyrtare në Facebook është shpërndarë njoftimi se nesër do të publikohen fakte të reja që dëshmojnë që demarkacioni i Kosovës me Malin e Zi u bë në dëm të kësaj të parës.

Gjeografët Florim Isufi e Shprejtim Bulliqi, ky i dyti edhe deputet në Kuvendin e Kosovës e kanë postuar njoftimin.

“Njoftojmë të gjitha mediat dhe të interesuarit e tjerë se nesër në hotelin Sirius në Prishtinë në orën 10:00, do të prezantohen fakte të reja shkencore mbi demarkimin e vijës kufitare Kosovë – Mali i Zi. Grupi i ekspertëve të pavarur”, thuhet në njoftim.

Ambasadori serb: Ja pse Turqia po lobon për hyrjen e Kosovës në UNESCO

Ambasadori i Turqisë në UNESCO, Darko Tanaskoviq, ka deklaruar se Turqia është ndër vendet me të zëshme që po lobon për anëtarësimin e Kosovës në UNESCO.

Siç thotë ai, kjo është pjesë e strategjisë së tyre të neo-osmanizmit.

“E gjithë kjo nuk po ndodh rastësisht, pasi që Serbia në vitet e fundit është vendi më stabil në rajon, respektivisht në hapësirën e ish Jugosllavisë. Për shumë kë kjo nuk është situatë normale dhe për këtë për shkak të agjendave personale, problemeve apo opozitës në vendet e tyre, tentojnë që të krijojnë destabilizim në rajon”, ka thënë Tanaskoviq për mediat serbe, transmeton lajmi.net.

Sipas tij, është gati e pamundur që në mbledhjen e prillit të Këshillit Ekzekutiv të UNESCO-s të propozohet anëtarësimi i Kosovës në këtë organizatë.

“Nëse do të vije deri tek ky anëtarësim, Kisha Ortodokse serbe, manastiret, vendet e saj të adhurimit, varret do të gjendeshin në probleme të mëdha, pasi që do të përballeshin me presion të paparë”, thotë ai.

Duke folur për rolin e Vatikanit për anëtarësimin e Kosovës në UNESCO, Tanaskoviq ka thënë se “ka shumë arsye se pse nuk kanë pranuar”, pasi siç ka thënë ai, “Vatikani vlerëson se nuk është UNESCO vendi në të cilin duhet afirmuar pavarësia e dikujt, dhe për këtë ekzistojnë OKB apo BE”.

Mesiç nesër në AAK

Në partinë e Ramush Haradinajt nesër do të qëndrojë një mysafir i veçantë. Ish-Presidenti i Kroacisë, Stipe Mesiç do të vizitojë AAK’në në ora 11:45.

“Ish-Presidenti kroat, Stipe Mesic, nesër do të vizitojë AAK-në. Ai do të takohet me zyrtarët e Kësaj Partise, në Selinë Qendrore të AAK-së, në ora 11:45”, thuhet në një njoftim për media të dërguar nga Aleanca për Ardhmërinë e Kosovës.

Demarkacioni nuk i garanton Kosovës heqjen e vizave

Luftimi i korrupsionit mund të paraqitet si kusht edhe më i rëndësishëm sesa demarkacioni i kufirit me Malin e Zi, në procesin liberalizimit të vizave për Kosovën, thonë njohës të çështjeve të integrimeve evropiane.

Sipas tyre, demarkacioni i kufirit më Malin e Zi, nuk i garanton Kosovës liberalizimin e vizave. Deri te ky konstatim, ata vijnë duke u ndërlidhur me kushtin tjetër të vënë nga Komisioni Evropian, i cili kërkon rezultate të prekshme nga institucionet e Kosovës që dëshmojnë luftimin e krimit të organizuar dhe korrupsionit.

Komisioni Evropian në fillim të muajit maj të vitit të kaluar, në një raport të tij, pati propozuar liberalizimin e vizave për Kosovën me kushtin e ratifikimit të marrëveshjes për demarkacionin e kufirit me Malin e Zi dhe rezultate konkrete në luftën kundër korrupsionit dhe krimit të organizuar.

Profesori i së Drejtës Evropiane, Avni Mazreku në një prononcim për Radion Evropa e Lirë, thekon se kriteret e vendosura nga Komisioni Evropian në rastin e liberalizimit të vizave janë kritere ekstra të shpikura për shkak të problemeve të hapura e të pazgjidhura që i ka Kosova.

“Ne duhet të kuptojmë se Kosova nuk mund të ketë raporte normale më Bashkimin Evropian dhe nuk mund të merret asnjë vendim për Kosovën derisa ekzistojnë pesë mosnjohje, sepse sistemi i marrjes së vendimeve në BE është i tillë që në shumicën e rasteve sa i përket politikës së zgjerimit dhe politikës së jashtme kërkohet konsensus nga 28 shtete anëtare të Bashkimit Evropian”, thekson Mazreku.

Tutje, Mazreku sqaron se sa i përket liberalizimit të vizave përdoret një sistem tjetër i votimit që quhet ‘sistem i shumicës së kualifikuar dhe qëndrimi i shteteve është esencial’.

Sipas tij, edhe nëse Kosova e fiton atë shumicë të votave ende ekziston mundësia që në Këshillin e Bashkimit Evropian “katër shtete ta përdorin mekanizmin e minorancës bllokuese”, që sipas tij, “nënkupton që së paku katër shtete mund të thirren në emër të këtij mekanizmi, e të cilat shtete duhet të përfaqësojnë 35 për qind të popullsisë të BE-së”.

“Kjo do të thotë që askush, as në Bruksel dhe as në Prishtinë, nuk mund të paragjykojë vendimin final për liberalizimin e vizave dhe çështjeve tjera që kanë të bëjnë me Kosovën, pasi që kemi të bëjmë me qëndrim të shteteve, e qëndrimi i shteteve nuk mund të paragjykohet dhe rasti që këto pesë shtete nuk e kanë njohur Kosovën e dekompozon atë që unë e quaj raport normal me Kosovës dhe BE-së”, thekson Mazreku.

Përveç, demarkacionit të kufirit me Malin e Zi, si njëri nga kriteret për liberalizimin e vizave, rezultatet konkrete në luftën kundër korrupsionit dhe krimit të organizuar, sidomos të nivelit të lartë, është një kusht tjetër për Kosovën nga ana e Komisionit Evropian, për liberalizim të vizave.

Përfaqësues të institucioneve të Kosovës thonë të kenë marrë masa konkrete në përmbushjen e këtij kriteri.

Zëdhënësi i Qeverisë së Kosovës, Faton Avdullahu në një prononcim për Radion Evropa e Lirë tha se janë arritur rezultate korrekte në luftën kundër korrupsionit dhe ky kriter nuk do të pengojë liberalizimin e vizave për qytetarët e Kosovës.

Ai thekson se parimisht për të marrë liberalizimin e vizave mbetet vetëm ratifikimi i marrëveshjes së demarkacionit me Malin e Zi.

“Konsiderojmë se për aq sa luftimi i korrupsionit është një çështje procesi, një çështje që nuk e ka një datë të caktuar, por kërkohet një luftim i vazhdueshëm i kësaj të keqe. Ajo si e tillë nuk është kusht që do ta pengonte liberalizmin e vizave për qytetarët e Kosovës. I japim të drejtë vetës të konstatojmë kështu për shkak se Qeveria Mustafa që nga paslufta është më e pakorruptuara dhe ka bërë shumë në luftimin e kësaj dukurie të keqe”, ka theksuar Avdullahu.

Megjithatë, profesori i së drejtës evropiane Avni Mazreku, konsideron se qasja e institucioneve në luftën kundër korrupsionit është më tepër deklarative sesa konkrete.

Gjatë vitit të kaluar, sipas të dhënave të Policisë së Kosovës, dërguar Radios Evropa e Lirë, janë trajtuar 41 raste të korrupsionit të nivelit të lartë, duke ngritur aktakuza në 12 raste, me gjithsej 129 persona të profileve të ndryshme të përfshirë në këto aktakuza.

Policia e Kosovës dhe drejtoria për krime ekonomike, brenda të njëjtës periudhë kohore kanë arrestuar 40 persona të dyshuar për raste të korrupsionit dhe qindra kallëzime penale i kanë ngritur pranë institucioneve hetuese. (REL)

Rexhep Selimi: Ndihemi të rrezikuar nga Specialja!

Deputeti i Lëvizjes “Vetëvendosje”, Rexhep Selimi, ka paralajmëruar se rikthimi i Demarkacionit do ta rikthejë gazin lotsjellës në Parlament. Gjatë një interviste ai ka folur edhe për Gjykatën Speciale, duke thënë se pasi kjo e fundit “është një gjykatë e padrejtë” kushdo që ka luftuar për lirinë e Kosovës do të duhej të ndihej i rrezikuar 

Lëvizja “Vetëvendosje” do ta kundërshtojë deri në zhbërje Marrëveshjen për Demarkacionin me Malin e Zi dhe aktivitetet në këtë drejtim do të koordinohen edhe me subjektet e tjera opozitare për të mos e lejuar kalimin e kësaj Marrëveshjeje në Kuvend.

Kështu ka deklaruar gjatë një interviste për gazetën Zër deputeti i subjektit më të madh opozitar, Rexhep Selimi, duke shtuar se nuk e përjashtojnë as mundësinë e hedhjes së gazit lotsjellës në Kuvend për të mos e lejuar kalimin e Demarkacionit.

Ish-eprori i lartë i UÇK-së, Rexhep Selimi, gjatë kësaj interviste ka folur edhe për mundësinë e ngritjes së aktakuzave nga Gjykata Speciale, duke thënë se personalisht asnjëherë nuk është ndier i rrezikuar nga drejtësia, por, siç ka thënë ai, nga padrejtësia ndihet i rrezikuar edhe tani.

“Përderisa Gjykata Speciale është e padrejtë, do të duheshit të ndiheshit të rrezikuar edhe ju, edhe të gjithë qytetarët e Kosovë, në veçanti kushdo që ka luftuar për lirinë e Kosovës. Po të kishte drejtësi, unë nuk do të ndihesha i rrezikuar. Nga padrejtësia rreziku vjen për të gjithë”, ka deklaruar Selimi

Racat njerëzore dhe kafshët – Vështrim nga Skënder MULLIQI

Zhvillimi e një bashkësie mundet të bazohet në dy premisa kryesore ,në etikë dhe në racën njerëzore.Shpesh ajo qe është moralizuese konsiderohet jo moralizuese.Dhe, secilit do të kishte hije që të përqafon ate që përfaqëson moralin . Edhe e dyta , puna jo morale të cilën po e bëjnë ata të cilët gjenden në krye të shtetit , po e konsiderojnë si punë morale dhe normale ?!Ky është egoizimi dhe kjo është jo etika e këtij pusheti . Te kthehemi pak qasjës së racës njerëzore dhe gjithë asaj e cila na dallon nga kafshet.Meqenëse dija nuk është e krahasueshme midis njeriut dhe kafshëve , sjelljet mund të korrespondojnë më njera- tjetrën apo mund të kene ngjashmeri! Eshte racionale shikimi në faktin dhe mendimin së qka e dallon njeriun nga majmuni. Edhe pse duhet të kemi konsideratë për majmunët në krahasim më disa grupe njerëzish të cilët me punën , veprimet por edhe më sjelljet e tyre ua kalojnë majmunëve . Me shumë këtu termi majmun përdorët për diqka te keqe . Majmunët mund të shkaktojnë dëme të vogla karshi llojit të vet . Kastat në pushtetin e Kosovës të formës autokratike gjithëqka e cila është e keqe dhe e dëmshme për shoqërinë demokratike po na e zbukurojnë sipas dëshirës së tyre. Ky pushtet jo që po punon keq secilen ditë e më shumë , por nuk po i mbron as vlerat nacionale dhe vlerat shtetërore . Na janë mbushur institucionet e shtetit më antivlera dhe më shund. Dhe, nuk është aspak e rastësishem sot kur në bisedë e siper i ndëgjon njerëzit duke thënë ” O fat të keq pat ky milet më këta njerëz të cilët erdhën në pushtet”. Erdhen vetëm për tu pasuruar , e për kullon kusurin punë e madhe”. Vendi ynë po i ngjanë njeriut të plagosur, të cilit në vend që ti ndihmojmë për tia shëruar plagën, ne ia lëndojmë edhe më shumë duke i rënë pikërisht në plagë. Nese vazhdojmë këtë rrugë nuk mund të themi së populli është I krejt i pa fajshem .Nese lejohet një marshim I tillë makabër karshi shtetit të ri të Kosovës , automatikisht mund të klasifikohemi si komb i qmendur. Kjo vlenë edhe për Shqipërinë , e cila ka rënë në dorë të klikës rrënuese të Edi Ramës. Ky regjim i Tiranës dhe regjimi i Prishtinës janë dy regjimet më të dëmshmet e pas luftës në Kosovë dhe pas rrëzimit të komunizmit në Shqipëri. Me kontrabanda , me krim politik dhe krim ekonomik, me kultivimim të hapur të kanibist nuk mundemi të flasim së jemi afër Evropës së Bashkuar .Kjo qorbë e keqe nuk ka mundësi që rregullisht të na servohet si qorbë e mirë. Kështu si janë duke shkuar punet keq jemi largë trendeve zhvillimore dhe demokratike , dhe jemi largë emancipimit të përgjithshem . Çka mund tju themi gjeneratave të cilat po vijnë kur të japim llogari të gjithë para tyre ? Çka kemi punu, cilat janë të arriturat dhe qka po iu lëmë mbrapa ?Pak osë asgjë. Po iu lëm një Kosovë me gjendje te rendë ekonomike, dhe një Kosovë .e cila po humb territore në të katër anët,. Po humb territore më Maqedoni , po humb territior në veri të Mitrovicës , po humb territor më Mal të Zi!!!Është pikëlluese kur ata të cilët konsiderohen elitë e kombit , si akademyku ynë ,Hivzi Islami i cili është plakur duke mos bërë asgjë të hajrit , ti shihet sherri para së të shkon në botën e amshuar, duke shitur tokën e shenjtë të Kosovës. Bukur shumë edhe qehren e kishe të keqe , së qehra dhe pamja fizike e fletë shumë edhe për karakterin e njeriut.Po ia mundësojmë Serbisë realizimin e dëshirave të saja në kushtet të paqës. Akedmiket servilë të Thaqit , Mustafës dhe Veselit siq je edhe Ti z. Islami nuk i duhen Kosovës. Besoj së nga ky labirint në të cilën është futur Kosova ka një rrugëdalje, e rrugëdalja është që sa më parë të mbahën zgjedhjet nacionale bashkë më ato locale në vjeshten e këtij viti. Dhe , zgjedhja tjeter janë gjenerata e re e cila po prêt të dera. Ka ardhur koha që gjenerata e re të marrë përgjegjësinë për të ardhmën tonë .Politikanët e etabluar pa asnjë kualitet e kan zymtësuar të ardhmën tonë.Të kompremetuarit e kesaj skene politike , e kan kompremetuar edhe informimin e drejtë public.Kjo kastë politike janë promotorët e rrënimit të demokracisë së brisht në Kosovë…Vetëm të rinjët mund të rigjallerojnë qdo gjë , së garniturat e vjetra dhe të kompremetuara politike, është evidente së nuk kan mundësi dhe as dije të veprojnë mirë. Na duhet lufta për vlera sepse vetëm kështu mund të lindë një jetë e re në Kosovë dhe në Shqipëri…

Përballë Sali Berishës! Nga Arbana Xharra

 Më duhet t’i përgjigjem Sali Berishës, për shkak të respektit që kam për lexuesit e gazetës dhe të atyre mijëra qytetarëve të shtetit tim, të cilët në faza të ndryshme të jetës së tyre kanë besuar te ai. Është e pazakontë që një ish-president, i larguar nga pushteti duke djegur vendin e tij, dhe një ish-kryeministër i larguar nga pushteti me një bilanc të rëndë të vrasjeve nga korrupsioni dhe pushkatimeve politike në mes të Bulevardit të replikojë publikisht për statusin e një gazetareje si unë. Unë nuk jam personalitet politik kombëtar apo ndërkombëtar që t’u kushtohet rëndësi edhe postimeve në rrjetet sociale. Unë jam gazetare dhe është normale që të reagohet ndaj shkrimeve të mia dhe jo ndaj mendimeve të mia. Ky është një mbivlerësim që, megjithatë, nuk e meritoj. Ajo që nuk kemi merituar si gazetë “Zëri” është padia, të cilën djali i Sali Berishës ia ka bërë disa vjet më parë, rreth një shkrimi hulumtues për linjën e interkoneksionit Shqipëri – Kosovë, ndërhyrja e të cilit kishte detyruar Sali Berishën të anulonte tenderin që nuk po shkonte tek kompania, të cilën ai e dëshironte. Ka pasur për këtë shqetësim zyrtar dhe nga qeveria gjermane dhe në një letër të ish-ambasadores gjermane në Tiranë që, sipas shtypit, ka përmendur dhe ndërhyrjet e djalit të Sali Berishës për këtë tender. Djali i Sali Berishës na ka paditur dhe nuk e ka fituar këtë gjyq ndaj gazetës, të cilën unë e drejtoj. Ky është i vetmi ballafaqim imi me të. Përtej kësaj, përgojimi që Sali Berisha ia bën gazetës “Zëri” duke e quajtur “Zëri i Popullit” në analogji me gazetën e ish-komunistëve shqiptarë, dua t’i them se “Zëri” është një gazetë e pavarur dhe shumë rëndësishme e Kosovës. Sa për të qenë komuniste si gazetare, dua t’i them Sali Berishës se unë punoj prej 16 vjetësh si gazetare, gati sa gjysma e kohës që ju keni qenë komunist i Partisë së Punës së Shqipërisë. Edhe sikur “Zëri” të ishte vërtet komuniste, nuk do të mundë të krahasohesha me ju. Sa i përket raporteve të mia me Edi Ramën, për ato i di më mirë lexuesi i gazetës i cili lexon qëndrimet tona kritike për të dhe sidomos për qëndrimin e fundit të tij në takimin e Nishit me Aleksandër Vuçiqin. Madje shkrimet e mia i kanë botuar në ballinë ato që quhen “Portale të Shkëlzenit” në Tiranë, duke më cituar si “gazetarja që ka dekoruar Obama kundër Edi Ramës”. Të lutem ki mirësinë të mos e quash tash dhe Michelle Obamën “Ndrikull” të Sorosit vetëm pse më ka dekoruar dhe ka dalë në foto me mua, edhe pse dëshira juaj për të qenë edhe unë aleati i një armiku tuaj, më bën të qesh dhe të kuptoj çdo të thotë të kesh qenë tridhjetë vjet komunist, stalinist në Shqipëri. Me logjikën tënde unë jam agjente e Sorosit, me logjikën e mikut tënd Erdogan jam e Gylenit, me logjikën e Vuçiqit jam ushtare e Thaçit, ndërsa për këta krerët shqiptarë të ISIS-it jam agjente e SHBA-së. Kjo është mënyra si mendojnë udhëheqës paranojakë, të cilët urrejnë lirinë e shtypit dhe njerëzit e lirë. Unë argëtohem me tipa të tillë. Sa i përket drogës në kohën tuaj, në Shqipëri, gazeta ime ka një reportazh të gjatë nga Lazarati, me fakte konkrete nga terreni dhe me deklarata mallëngjyese të prodhuesve për parajsën tuaj politike atje. Kjo nuk e nderon Edi Ramën që ka humbur kontrollin mbi territorin pas mbylljes së Lazaratit, por nuk ju bën aspak të besueshëm. Më së paku më dukesh si një investitor i dëshpëruar i industrisë së drogës. Në fund, por jo e fundit për nga rëndësia, dua të flas pak edhe për rolin tuaj lidhur me nevojën për t’i përdorur politikisht lidhjet me botën myslimane. Ne jemi të dy nga krahina e Gjakovës, pavarësisht se na ndan një kufi shtetëror. Emri juaj në Kosovë ka qenë si shpresë në fillim të viteve ’90-të kur ne kërkonim ndihmë nga Perëndimi për t’i shpëtuar Serbisë. Shqipëria nuk kishte shumë mundësi të na ndihmonte fizikisht dhe materialisht, por mund të na ndihmonte politikisht duke tentuar të bëhej një vend proevropian, me standarde perëndimore. Pesë vjetët e qeverisjes suaj ia hoqën Shqipërisë shanset për të qenë një vend perëndimor, e përfshin atë në listën e zezë të vendeve që kontrabanduan naftë për regjimin nën embargo të Millosheviqit, siç vetë edhe e ke pranuar, deformove demokracinë në Shqipëri dhe u armiqësove me Shtetet e Bashkuara të Amerikës dhe në fund kur e pa vetë se nuk kishe ku të shkoje, ke bërë dy gjëma të mëdha për kombin shqiptar. E para, ke dashur të eksportosh krizën tënde politike në Kosovë, duke tentuar të minosh autoritetin e presidentit Ibrahim Rugova me qëllim destabilizimin e Kosovës dhe e dyta, ju dorëzove ushtarëve të Allahut të Bin Ladenit, duke pajisur me pasaportë të shtetit shqiptar vëllanë e Al Zawahrias, pasuesit të Bin Ladenit në krye të “Al Qaeda”-s dhe dhjetëra drejtuesve të logjistikës kriminale të asaj organizate. Ke tentuar sipas dëshmive të bashkëpunëtorëve të tu të lidhesh në vitin e zi – 1997 me krahun radikal të “Al Qaeda”-s për të shpëtuar nga humbja e pushtetit dhe bash për këtë ke qenë duke e varrosur Kosovën. Ikja jote nga pushteti ka qenë fati i Kosovës dhe izolimi juaj deri në çlirimin e Kosovës dhe disa vite më pas ka qenë nevojë për të shpëtuar nga një ngatërrestar ballkanik. Ibrahim Rugova nuk ta hapi derën në vitin 2000 për të ardhur në Kosovë në përpjekje për të dalë nga izolimi ndërkombëtar dhe kjo nuk ka qenë hakmarrje për çfarë i ke bërë, por një vendim i një lideri properëndimor të kombit shqiptar që e ndante nga ty, përpjekja për ta djegur Shqipërinë dhe Kosovën që të shpëtoje karrigen tënde. Kjo është historia jote e vërtetë me Kosovën dhe shqiptarët. Unë nuk jam e sigurt nëse ajo fjala e urtë “si nena e Zeqos në maje të thanës” që ju e përdorni për mua është korçare apo jo, por jam gati ta quaj edhe gjakovare kur shikoj çfarë degradimi ka njeriu që 25 vjet më parë ngjallte shpresa në Kosovë dhe në Shqipëri. Zoti e ka ruajtur Shqipërinë dhe Kosovën nga udhëheqës si ju. Dhe shpresoj se do ta ruajë edhe në të ardhmen.

Veseli: Kam takuar Trumpin, Kosova ka mbështetjen e SHBA

Kadri Veseli është lideri i parë shqiptar që e takon Presidentin Trump.

Në një postim të tij në Facebook, ai nuk ka dhënë shumë shpjegime për këtë takim.

Foto është realizuar gjatë një takimi që ai pati me presidentin amerikan ditë më parë.

Sipas Veselit, kjo foto dëshmon se Amerika gjithmonë mbetet mik i mirë i Kosovës.

“Të dashur miq, sapo pranova fotografinë zyrtare nga takimi që pata ditë më parë, në Washington, me Presidentin e Shteteve të Bashkuara të Amerikës, Donald Trump.

Kosova është e bekuar që ka mbështetjen amerikane dhe ky takim konfirmoi besimin tim dhe tuajin për aleancën e përjetshme në mes të Amerikës dhe Republikës sonë”.

Kadaj-Bujupi paralajmëron tensione nëse Demarkacioni shkon në Kuvend

Donika Kadaj-Bujupi, deputetja e Vetëvendosjes ka thënë se rezistencën për Demarkacionin do ta vazhdojnë, sepse sipas saj nëse marrëveshja për Demarkacionin implementohet do të ketë rrezik për vendin.

“Ju e patë se janë tre anëtarë të këtij Komisioni që e kundërshtuan këtë marrëveshje”.

“Rrjedhimisht rezistenca jonë do të vazhdojë, rezistenca jonë do të jetë edhe më e organizuar edhe më e fuqishme, që kjo çështje të mos kalojë në Kuvendin e Kosovës”.

Këto komente Kadaj-Bujupi, i ka bërë në Ballë për Ballë të Orës së Fundit në KlanKosova.

“Bashkë me qytetarët do të vazhdojmë tutje që pavarësisht se çfarë ata nënshkruajnë nuk kanë të drejt të nënshkruajnë marrëveshje kapitulluese për vendin”.

Kadaj-Bujupi, ka folur edhe për atë se si do të veprojnë nëse Demarkacioni shkon të enjten në Kuvend.

“Nuk besoj se do të ishte veprim i matur nëse përpiqen që këtë variant tashmë të konfirmuar si të gabuar ta sjellin në Kuvend, sepse kjo do të risjellë tensione të reja dhe rezistencë më të fuqishme”.

“Nuk do të flas se si do të rezistojmë do të shihet”.

“Ne jemi kundër këtij versioni të gabuar dhe të dëmshëm që na e dëmton territorin”.

“Përgjigja jonë do të jetë e fuqishme edhe jashtë edhe brenda Kuvendit, ne do të jemi me popullin”.

“Demarkacioni nuk kalon – për çfarëdo shantazhi për blerje ose shitje të votave do të ketë pasoja”.

Berisha e quajti “ndrikull sorosiane portalesh”, Arbana Xharra i përgjigjet(Foto)

Pas akuzave të bëra nga ish-Kryeministri Sali Berisha, ka reaguar edhe gazetarja shqiptare nga Kosova Arbana Xharra.

Në akuzat e tij, ish-Kryeministri Berisha e quajti gazetaren “ndrikull sorosiane” dhe simpatizante të kryeministrit Edi Rama.

Por në postimin e saj gazetarja Xharra shprehet se përgjigjen e plotë për ish-Kryeministrin do ta japë të nesërmen me argumenta dhe dëshmi të gjitha akuzat.

“Qenka marr me mua “Doktori”, sot s’kam vakt me u marr me ty. Nesër t’i numëroj argumentet me dëshmi”, shkruan Xharra.

Prishtina: Ndikimi rus po rritet edhe në Kosovë

Autoritetet në Prishtinë kanë tërhequr vërejtjen për, siç thonë, ‘rritjen e ndikimit rus në rajon’ dhe rrjedhimisht, sipas tyre, ‘edhe në territorin e Kosovës’.

Një paralajmërim të tillë e ka bërë gjatë punimeve të një konference të Komisioneve të Punëve të Jashtme të vendeve evropiane, ministrja për dialog në Qeverinë e Kosovës Edita Tahiri, duke theksuar se ‘Rusia ka shfaqur hapur ambiciet për të rritur ndikimin në rajon’.

Rritja e ndikimit rus në rajonin e Ballkanit, sipas zyrtarëve në Prishtinë, po bëhet në kohën e, siç thonë, ‘problemeve të brendshme të BE-së dhe paqartësisë së perspektivës evropiane për vendet e rajonit”.

Zëvendësministri i Punëve të Jashtme i Qeverisë së Kosovës, Valon Murtezaj, duke folur për Radion Evropa e Lirë, tha se “aktivitetet destruktive të cilat po ndodhin në rajon kanë prapavijë politike dhe tendenca ruse”.

Treni nga Beogradi që ishte nisur për Mitrovicë

Sipas tij, “përpjekja për hyrjen në Kosovë e trenit të nisur nga Beogradi” pak javë më parë, ‘ka shenjat e ndikimit rus’.

“Ne kemi të drejtë të besojmë për një involvim më të madh, për një prani të aktiviteteve destruktive në Kosovë dhe rreth Kosovës. Kjo duke pasur parasysh edhe të dhënat e fundit që lidhen me zhvillimet në Malin e Zi, pra me përpjekjet për atentat ndaj kryeministrit pak muaj me parë”.

“Po ashtu edhe këtu në Kosovë – lidhur me raportimet e ndryshme, prezencën e disa medieve me fondacione ruse, po që lidhen pastaj me zhvillime rreth UNESCO-s, aplikacionin e mundshëm të Kosovës e të tjera. Të gjitha këto na bëjnë të besojmë që kemi një prani të shtuar të aktiviteteve dhe ndikimit rus në këtë pjesë të Evropës”, tha Murtezaj.

Prej afro 18 vjetësh, Kosova është vënë nën mbikëqyrjen ushtarake të NATO-s dhe aktualisht një numër prej mbi 5 mijë trupash, përfshirë edhe disa qindra nga SHBA-ja, vazhdojnë të ofrojnë sigurinë për vendin.

Zyrtarët e NATO-s kanë deklaruar se “misioni paqeruajtës në Kosovë vazhdon të garantojë një mjedis të sigurt për të gjithë qytetarët, pa dallim”.

Kosova ka hyrë në një marrëdhënie kontraktuale me BE-në përmes nënshkrimit të Marrëveshjes së Stabilizim Asociimit dhe autoritetet në vend thonë se ‘janë të përkushtuara në rrugën e integrimeve evropiane’.

Megjithëkëtë, analistët politikë kanë deklaruar se vonesat në proceset integruese për vendet e Ballkanit Perëndimor paraqesin rrezik nga ndikimet e tjera.

Analisti Artan Muhaxhiri, thotë se Rusia po përpiqet të ketë ndikimin e saj në disa vende të Ballkanit të cilat tradicionalisht kanë qenë të lidhura me Rusinë dhe rrjedhimisht të ketë më shumë ndikim në Evropë.

“Është edhe ndikimi i madh i Rusisë e cila edhe përmes Ballkanit dëshiron që të faktorizohet edhe në Evropë edhe me shumë, prandaj dihet se aleati kryesor i Rusisë është Serbia”, tha Muhaxhiri.

Ndërkohë, njohësi i çështjeve ushtarake dhe sigurisë Naim Maloku, tha për Radion Evropa e Lirë se ‘deklaratat e politikanëve në Kosovë se Rusia po përpiqet të ndikojë në Ballkan dhe edhe në Kosovë’ po bëhen vetëm për konsum të brendshëm.

“Unë mendoj se Kosova është shumë e vogël për të dhënë vlerësime të tilla. Politikanët këto deklarata po i japin për konsum të brendshëm, për t’u paraqitur përpara qytetarëve të Kosovës se janë ndonjë faktor që mund të japin edhe vlerësime të tilla. Rusia, zgjerimi i ndikimit të saj në Ballkan, këto janë çështje që të tjerët merren me to [NATO -SHBA- RUSIA] këto janë fuqi të mëdha që merren me to“, tha Maloku.

Që prej shpalljes së pavarësisë së saj më 2008, Kosova nuk është njohur nga 5 vende anëtare të BE-së dhe njëkohësisht edhe nga Rusia, një anëtare e përhershme e Këshillit të Sigurimit të OKB-së, dhe aleate e ngushtë e Serbisë.

Presidenti i Kosovës, Hashim Thaçi ndërkaq, të hënën i bëri thirrje Moskës zyrtare “që ta njoh pavarësinë e Kosovës’ duke e cilësuar këtë hap “si lehtësim edhe për vet Serbinë”.

JEMI TË PARËT – Nga Faton MEHMETI

Pothuaje ska mbetur asgjë pa u thënë, është shkruar dhe vazhdon të shkruhet shumë. Vlerësohet se është rregull i pashkruar, aty ku nuk lexohet shkruhet shumë, mbase për të mbushur boshëllekun e leximit. Sdo mend se për kokë banori jemi të parët në shumë fusha, kryesisht në ato që sduhej të ishim . Të parët në korrupsion, krim të organizuar, të parët për nga optimizmi, ndonëse punët i kemi më keq se çdo popull tjetër. Jemi të parët dhe mbase të vetmit që festojmë 1 majin, atë ditë kur bota proteston, si për ironi populli me numrin më të lartë të të papunëve, ne festojmë ditën e punëtorëve. Festojmë çdo festë që përmendet, edhe pse disa nuk i kuptojmë, ska rendësi përmbajtja, me rëndësi të kemi arsyje për të festuar. Satisfaksioni i të qenit i varfur është lumturia, sa më i varfur aq me i gëzuar është shqiptari, kjo shpikej e popullit tone ska pse mos të konkuroj për kuriozitetin e shekullit. Festojmë 14 shkurtin, jo për ndonjë gjë por për t’iu versul moteleve, duke anashkaluar motivin e saj të vërtetë për dashuri, e shtrtati me dashurinë nuk janë edhe aq të përafërtë. Mjafton një trëndafil,

një përfqafim për të bërë të lumtur dike, pa qenë nevoja e motelit.

Nuk harrojmë rutinën e përditshme : të zgjohemi në ora 12 të drekës, të iu vëruslemi kafeneve, të përgojojmë të gjithë nga i madhi e më i vogli, e në mbrëmje duke shar politikën . Jo që politika është e mirë, por asnjë kontribut nuk e jep askush që këta ( politikanët) të shporrën nga pushteti. Më kujtohet kur dikush doli në protestë kundër varfërisë, dhe askush nuk iu bashkangjit, të tjerët bënin sehir dhe shtremëronin lugën e makiafove nën tymin helumes të cigareve.

Pas kafeneve destinacion i dytë mbetet fakulteti, kryesish privatë, aty ku është dendur rinia, sa për të thënë se po kryejmë dicka. Duke mbartur mbi vete mëkatin e politikës së gabuar shtetërore, të rinjtë ashtu sic hyjnë edhe mbarojnë fakultetin, dhe në fund marrin një diplomë sikur legjitimon analfabetizim e tyre. Pataj ata zën vende pune ( ata që japin lekë ose kanë të njohur ),marrin paga, sikur i shpërblejmë për padijen e tyre, pastaj PISA na nxjerr në vendin e parë për cilësi të dobët. Sikur jemi të betuar që vendin e parë mos ta lëshojm ë dot, sikur ngrehim kokën lartë e themi : shikoni kush jemi.

Mos dhashte Zoti të sëmurësh, pasi duhet ta kesh xhepin me para ndryshe do vdesësh nëpër korridore të spitaleve. Mantilbardhët më parë të sjellin vdekjen së të shpëtojnë jetën, disa nga padituria e disa nga mosngopësia me korrupsion. Edhe këtu jemi të parët për nga cilësia e dobët, vendi i parë në Evropë për vdekje të foshnjeve, dhe të rritureve nga mungesa e shërimit.

Po i them edhe nja dy fjalë për art, aty ku padyshim jemi të parët. Jo për ndonjë cilësi, por për kokë banori jemi të parë në Evropë ( mbase edhe ne botë ) që 10 % e popullësisë janë artista, VIPA, njerëz që skenën e gjeten si vatër strehimi . Njerëz qe smunden të gjejne veten askund, e shkolla “ nuk iu eci ” u përplasën në skenë, me fjalë banale dhe me veshje skandaloze prodhojne “art ”.

Në këtë vend tallava, ska rëndesi që jemi të varfur, të izoluar e të mjerë, mjafton që po kënaqemi që jemi të parët.

Opozita nuk i pranon gjetjet e Komisionit, vazhdon kundërshtimin e demarkacionit

Prezantimi i gjetjeve të Komisionit shtetëror për matjen e territorit, sipas të cilave, Kosova nuk ka humbur territor me marrëveshjen për demarkacionin e kufirit me Malin e Zi, nuk i ka zbutur tensionet pushtet – opozitë në lidhje me këtë çështje.

Komisioni shtetëror, paraqiti të gjeturat, të cilat ende nuk janë finale, por që konstatojnë se me demarkacionin e kufirit me Malin e Zi, territori i Kosovës nuk është zvogëluar për 8 mijë hektar, siç pretendon opozita.

Kryetari i Komisionit, Hivzi Islami, njëherësh kryetar i Akademisë së Shkencave dhe Arteve të Kosovës tha se në vitin 1981, Kosova kishte 10.887 km2. Kurse nga viti 1982 – 2007, territori ishte 10.908 km2.

Mirëpo në bazë të obligimeve ndërkombëtare dhe Planin e Ahtisaarit, pas demarkacionit të kufirit me Malin e Zi dhe sidomos me Maqedoninë, kanë ndodhur ndryshime në zonat kadastrale në kufirin me Maqedoninë, çka ka sjell si përfundim se Kosova ka sot një madhësi tjetër, por nuk bëhet fjalë për humbje të territorit.

“Madhësia territoriale e Republikës së Kosovës sot është, 10.905.25 km2”, ka thënë Islami.

Një nga argumentet e vazhdueshme të opozitës ishte pika e kufirit me Malin e Zi ndodhet në Çakor.

Por, Komisioni, bazuar në agjencitë pjesëmarrëse, pastaj në disa libra e harta të vjetra historike erdhi në konkludim se Çakori dhe Bjellua janë jashtë territorit të Kosovës, që nënkupton se i takojnë Malit të Zi.

Zëdhënësi i këtij Komisioni Tomor Çela, tha se të gjitha gjetjet dëshmojnë se Çakori ndodhet në Mal të Zi.

“Çakori gjendet në pjesën, jashtë kufirit, pra jashtë territorit të Kosovës… . Pjesa burimore e Lumbardhit të Pejës, Bjelluha, gjendet jashtë territorit, apo i takon hapësirës administrative të Malit të Zi”’, ka thënë Çela.

I menjëhershëm ka qenë edhe reagimi i opozitës. Deputetja Albulena Haxhiu nga radhët e Lëvizjes Vetëvendosje i tha Radios Evropa e Lirë se Komisioni ishte i njëanshëm dhe ishte në shërbim të qeverisë aktuale.

Ajo ka kundërshtuar gjetjet e Komisionit, sipas të cilave, Çakori është pjesë e Malit të Zi. Njëherësh, Haxhiu ka thënë se nëse qeveria provon ta kalojë marrëveshjen për demarkacionin me Malin e Zi në Kuvend, do të përballet me kundërshtimet e ashpra të opozitës.

“Zellin për të falur territor ne do ta kundërshtojmë fuqishëm, si brenda Kuvendit ashtu edhe jashtë tij. Nëse qeveria tenton që të riprocedojë marrëveshjen e njejtë, që është një mashtrim i radhës, atëherë ne natyrisht që do t’i përgjigjemi me konsistencë në kundërshtim, sikurse edhe në seancat e kaluara”.

“Natyrisht që kjo do të prodhojë tensione në vend, por për këtë përgjegjëse do të mbahet qeveria e Mustëfës”, ka thënë Haxhiu.

Edhe anëtari i kryesisë së Aleancës për Ardhmërinë e Kosovës, Muharrem Nitaj ka kundërshtuar gjetjet e prezantuara, duke thënë se rezultatet ishin ato që i kishte kërkuar kryeministri Isa Mustafa kur e kishte emëruar këtë Komision.

“Nuk ka asnjë lloj legjitimiteti rezultati i këtij Komisioni. Aleanca për Ardhmërinë e Kosovës nuk ka ndryshuar qëndrimet e veta dhe do ta kundërshtojë normalisht versionin aktual të demarkacionit me Malin e Zi”, ka thënë Nitaj.

Gjetjet e Komisionit, pritet të vihen edhe në debat publik para se t’i procedohen qeverisë.

Më pas, qeveria pritet që të riprocedojë Marrëveshjen për demarkacionin e kufirit me Malin e Zi në Kuvendin e Kosovës për ratifikim.

Pak kohë para se Komisioni të dilte me gjetjet, njëri nga anëtarët e tij, Fitim Humolli, është dorëhequr. Ai ishte i vetmi gjeograf në këtë Komision.

Dorëheqjen e tij, Humolli e kishte arsyetuar me metodologjinë e punës që bëhej në këtë Komision.

Humolli e arsyetoi dorëheqjen me, siç tha, “anashkalim të institucioneve profesionale në punën e komisionit”.

Po ashtu, gjetjet e prezantuara nga Komisioni, nuk janë pranuar as nga anëtari tjetër, Agron Luta, i cili i ka quajtur ato si joprofesionale.

Prishtina dhe Podgorica, nënshkruan Marrëveshjen për shënjimin e vijës më 25 gusht të vitit 2015 në prani të faktorit ndërkombëtar.

Por, menjëherë pas, kjo marrëveshje pati nxitur kundërshtimin e fuqishëm të opozitës. Ky reagim dhe kundërshtim opozitar në Kosovë u shtri brenda Kuvendit të Kosovës dhe nëpër rrugë, përmes protestave.

Opozita, pretendon se me këtë marrëveshje, Kosova po humbë 8 mijë hektarë tokë.

Po ashtu, edhe një grup i deputetëve nga partitë në pushtet dolën kundër kësaj marrëveshjeje. Përderisa Qeveria nuk siguroi votat as të Listës Serbe, subjekt ky në përbërjen e koalicionit aktual që përfaqësohet në Kuvend me 11 deputetë.

Në rrethana të tilla, koalicioni qeverisës u detyrua që të heq dorë përkohësisht nga ratifikimi i kësaj marrëveshje dhe pati formuar Komisionin shtetëror për matjen e territorit.

Përderisa kundërshtimet në Prishtinë vazhdojnë, Komisioni Evropian i ka përcaktuar Kosovës demarkacionin e kufirit me Malin e Zi si kushtin kryesor për heqjen e vizave.

Riprocedimi i demarkacionit për ratifikim në Kuvend është paralajmëruar të ndodhë gjatë muajit mars. (REL)

Islami: Kosova ka 10 mijë e 906.25 kilometra katrorë, nuk kemi humbur territor

Kryetari i Komisionit për Matjen e Territorit të Kosovës ka konstatuar se Kosova nuk ka humbur territor si pasojë e Marrëveshjes së Demarkacionit të kufirit me Malin e Zi.

Zëdhënësi i këtij Komisioni Tomorr Qelaj, gjatë prezantimit u është referuar dhjetëra dokumenteve, duke konstatuar se Çakorri nuk i takon Kosovës, por Malit të Zi. Në përmbyllje të prezantimit të të gjeturave, Hivzi Islami ka thënë se Kosova ka 10. 906.25 km2, nga matjet që janë bërë.

“Nga prezantimi që bëmë del ky konkludim si pjesë e draft-raportit. Në mbështetje të të dhënave, e argumenteve dhe gjetjeve profesionale që u ofruan nga institucionet përkatëse në procesin e matjes si dhe verifikimit të mbulueshmërisë me dokumentacion administrativ e hartografik, Komisioni i ekspertëve për Matjen e Territorit e njofton Qeverinë e Kosovës se madhësia territoriale e Republikës së Kosovës para 25 gushtit 2015 përkatësisht nga vitit 1962 deri më 1981 është 10 mijë e 887 km katrorë. Në bazë të obligimeve ndërkombëtare që ka marrë shteti ynë, në demarkacionin e kufirit në mes të Republikës federative të Jugosllavisë. Prandaj madhësia territoriale e Republikës së Kosovës sot është 10 mijë e 905.25 km katrorë”, ka thënë Islami.

Kërcënohet me jetën e fëmijëve gazetarja Arbana Xharra

Gazetarja Arbana Xharra ka marrë kërënime përmes profilit të saj në rrjetin social.

Kërcënuesi me emrin Ebu Duxhane i ka dërguar kërcënim për fëmijët në shqip të ilustruar me foto të ekzekutimeve të ISIS.

Arbana Xharra i është përgjigjur:

“Sa trimin e kish pase ky vend. Ani kercenojne me femije. Edhe jane t’u me tute, ethet ne bark mi kane shti. Shume zor e ki me me gjete. Cka te bone shperlarja e trurit. Matrapaz!”

NYT: Rusia po nxit tensione në Kosovë

Rusia po nxit mosmarrëveshje në Ballkan, teksa NATO-ja po ruan një paqe të vështirë, shkruan sot The New York Times, në një artikull që flet për ndikimin negativ të Moskës në Kosovë gjatë kohëve të fundit.

“Në pyjet e dendura përgjatë kufirit të kontestuar ndërmjet Serbisë dhe Kosovës, një patrullë e ushtarëve amerikanë të NATO-s ecin me mundim nëpër dëborë dhe baltë, duke vëzhguar për kontrabandistë apo dikë tjetër që mund të bëjë përpjekje për kalimin e kufirit. Duke pasur parasysh trashëgiminë e përgjakshme të kësaj zone, situata është e qetë, të paktën deri tani”, shkruan gazeta njujorkeze.

Sipas NYT, “Rusia po ushqen tensione në një zonë që dikur konsiderohej si triumf i diplomacisë amerikane”.

“Në Serbi e Kosovë, inatet e vjetra po rishfaqen, teksa rajoni i Ballkanit që ka përjetuar aq shumë vuajtje gjatë shekullit të kaluar po bëhet përsëri i rrezikshëm. Edhe një herë, Rusia është duke ushqyer tensionet, teksa kërkon të shfrytëzojë situatën politike në një zonë që konsiderohej dikur si një triumf i diplomacisë amerikane – por që tani mbetet një sfidë në rritje e NATO-s dhe Bashkimit Evropian”, thuhet në shkrimin e NYT.

“Rusia sheh që Perëndimi kërkon të ndërhyjë në oborrin e shtëpisë së saj, dhe presidenti Vladimir V. Putin dëshiron të tregojë se edhe ai mund t’ia kthejë. Ata e shohin Ballkanin si pjesë të lënë pas dorës së Perëndimit, dhe ata e përdorin atë për shtuar fuqinë rreth këtij projekti”, ka thënë për NYT, Dimitar Bechev, një ekspert i Rusisë dhe Ballkanin dhe kreu i Institutit të Politikës Evropiane në Sofje të Bullgarisë.

Në mungesë të ushtrisë së tyre, shkruan NYT, shumica e Shqiptarëve etnikë shohin trupat e NATO-s si mbrojtës të shtetit të tyre në Kosovë.

“Ata janë këtu për të na mbrojtur neve nga serbët kur ata duan të kthehen prapë,” është shprehur për të përditshmen amerikane Belkiza Sahatqiu, 46 vjeçe, nënë e tre fëmijëve, e cila punon në një dyqan këpucësh në pjesën serbe të Mitrovicës.

“Por, shumë serbë që jetojnë në Kosovë i përshkruajnë forcat aleate më shumë si okupues se sa mbrojtës, ka thënë për NYT Lilijana Miliç, e cila ka një fermë përgjatë rrugës magjistrale Mitrovicë – Prishtinë.

“Ata nuk po mbrojnë askënd, pa dyshim jo neve,” tha ajo. “Ata kanë ardhur të okupojnë këtë tokë, dhe tani qëndrojnë në bazat e saj. Ku ishin ata kur njerëzit u ndiqën nga shtëpitë e tyre në pikë të ditës?”, ka thënë Miliç.

Në të njëjtën kohë, Miliç i fajëson politikanët serbë në Beograd për fatkeqësinë e serbëve të Kosovës. “Ata vetëm flasin, flasin, flasin, flasin për të na mbrojtur neve,” ka thënë ajo për NYT, “por e gjithë çfarë ata bëjnë është të merren me interesat e tyre”.

Më 20 shkurt 1989 minatorët e Trepçës nisën grevën historike

Më 20 shkurt 1989 minatorët e Trepçës kishin filluar grevën e urisë në mbrojtje të Kosovës nga synimet e errëta të regjimit i Sllobodan Millosheviqit, duke shënuar kështu në fakt fillimin e zhbërjes së Jugosllavisë.

Ishin rreth 1,300 minatorë që kishin zbritur në galeritë e minierës, ku do të qëndronin deri më 28 shkurt të vitit 1989, të vendosur të flijonin jetët e tyre për një të ardhme më dinjitoze të brezave që do të vinin.

Greva e minatorëve të Trepçës sensibiloi të gjithë shqiptarët në Kosovë, të cilët iu bashkuan atyre në revoltën e arsyeshme, që tërboi regjimin e Beogradit, i cili do të fillonte marrjen e hapave represivë ndaj tyre dhe shqiptarëve, që përfundoi me luftën e UÇK-së dhe mbështetjen e NATO-s, duke ndjekur përfundimisht më 1999 forcat serbe nga Kosova.

Mbi 1200 minatorë u dënuan me nga 30-60 ditë burgim, ndërsa ndaj 14 të tjerëve, bashkë me udhëheqjen e Kombinatit Trepça dhe Azem Vllasin, si figurë politike, u zhvillua një proces monstruoz politik.

Greva historike e minatorëve të “Trepçës” e vitit 1989 qe shndërruar në rezistencë gjithëpopullore demokratike e paqësore kundër presioneve të Serbisë për ta ripushtuar Kosovën. Ajo ngjalli interesimin e botës për Kosovën dhe e bëri të njohur se kishte një problem shqiptar të pazgjidhur.

KRYETARI I AKADEMISË SË SHKENCAVE TË KOSOVËS HIVZI ISLAMI – 55 PYETJE AKUZA PËR ‘ATIN’ E KOMBIT REXHEP QOSJA

Kryetari i Akademisë së Shkencave dhe Arteve të Kosovës, Dr. Hivzi ISLAMI, ka parashtruar 55 pyetje, në fakt, akuza për Rexhep Qosjen. Kreu i Akademisë përdorë termat nga më të rëndat për Qosjen. Express sjell të plot shkrimin e plot të Islamit.

I vetëquajturi At i kombit; i vetëshpalluri mendja e kombit; i vetëproklamuari I Madhi dhe më I Madhi i kombit; egocentristi i kompleksuar, halucinanti e linçuesi; psikopati për skena e prapaskena; megalomani, narcisoidi, frikacaku, gënjeshtari, hipokriti, shpifësi monstruoz dhe intriganti i kombit; ndotësi i mjedisit kulturor, kombëtar dhe shoqëror; i sëmuri i botës shqiptare; përçarësi më i madh i kombit; kacagjeli nihilist; denoncuesi i të gjitha personaliteteve të rëndësishme të letërsisë, të kulturës, të shkencës dhe të politikës shqiptare andej e këndej kufirit; anti Kadare dhe anti Rugovë i tërbuar; projektuesi paranoik i fushatave; mjeshtri për t’i projektuar të zezat e veta te të tjerët; servili e shërbetori i të gjitha pushteteve; moralisti i pamoralshëm; mësuesi pa kredibilitet; ndërgjegja e përbaltosur; pushti i kombit; njeriu pa miq dhe shokë; shkatërruesi i çdo raporti njerëzor; njeriu pa asnjë ndjenjë humane; trimi pas betejës së fituar nga të tjerët; denoncuesi policor i Akademisë; shkruesi zgjërdhishëm i ”Morfologjisë…”; nga institucionet shkencore e kulturore denoncuesi i parë i demonstratave të vitit 1981; hedhësi i benzinës në zjarr në kohën e ”revolucionit të vonuar demokratik” në Shqipëri; migranti i rruar e i maskuar; vajtuesi më i madh i Josip Broz Titos në ish-Jugosllavi; bolsheviku dhe enveristi më i devotshëm; bartësi i botimit të pamfleteve politike, të rënda 288.000 euro; humbësi më i madh i zgjedhjeve në historinë e zgjedhjeve në rruzullin tokësor; fituesi i çmimit 7 Korriku i Serbisë, që nuk e ktheu kurrë…!

Pas këtij portretimi, e dini kush është ky njeri? Nëse nuk e dini, ky është REXHEP QOSJA, i vetëquajturi “At” i kombit.

PYETJET:

1. Thua se e jep kokën për të vërtetën, po pse nuk e dhe deri tash kur pate shumë raste?
2. ”Mendje e kombit”, pa mendje për vetveten, a ke probleme më shumë me vetveten apo me të tjerët?
3. A po i vuan akoma pasojat e patologjisë së një mentaliteti mesjetar-fisnor?
4. Nga buron kënaqësia dhe paranoja që t’i ofendosh të gjitha personalitetet e mëdha në fushën e shkencës, letërsisë, kulturës, politikës shqiptare në Shqipëri dhe në Kosovë?
5. A shkove prej lektorit të zakonshëm të Radio-Prishtinës drejt hulumtues shkencor në Institutin Albanologjik, pa magjistraturë shkencore?
6. Pse nuk munde t’i jepje provimet në shkallën e tretë në Beograd? Cilat ishin pengesat?
7. A shkove pa magjistraturë shkencore drejt në doktoratë?
8. A të mbështeti më së shumëti prof. Fehmi Agani për paraqitjen e doktoratës pa magjistraturë, kundër të cilit më vonë e zhvillove fushatën më të egër?
9. A u bëre drejtor i Institutit Albanologjik pa konkurrencë dhe a u zgjodhe tre mandate rresht në atë funksion, që ishte përjashtim në gjithë ish-Jugosllavinë?
10. A e kërcënove me revole drejtorin legjitim të Institutit Albanologjik dhe a ia shave nënë e babë, ndërsa në opinion thoshe që ai të ka sharë e kërcënuar?
11. A pate ndonjë arsye të madhe që të japësh propozim e mendim pozitiv dhe së fundi ta votoje Sinan Hasanin për anëtar të ASHAK-ut?
12. A pate arsye plotësuese ta vajtoje me aq sentimentalitet Titon?
13. Po Enver Hoxhën, pse vazhdon ta konsiderosh personalitetin më të madh të kombit?
14. Pse nuk ke kurajo qytetare dhe intelektuale të japësh dorëheqje nga ASHAK kur e denoncon çdo ditë dhe e urren patologjikisht?
15 . A është e moralshme ta merrësh “rrogën kombëtare”, si e quan kur i akuzon anëtarët tjerë të Akademisë, kur nuk e ke shkelur pragun e saj tash e 15 vjet?
16. A ishe i pari drejtor i një institucioni kulturor e shkencor që i denoncove demonstratat e studentëve të vitit 1981? A është gazeta “Rilindja” dëshmi për këtë denoncim?
17. Sa herë e takove kryetarin e Jugosllavisë së Zhablakut (1992-1993), “babain” e kombit serb, Dobrica Qosiqin, në Manastirin Prohor Pçinjski?
18. Çka bisedove me Qosiqin? Për ndarjen e Kosovës?
19. Në vitin 1989, kur derdhej gjaku në Kosovë dhe rrënohej autonomiteti i saj, a u takove me shokun Vidoje Zharkoviq në Beograd, politikan nga Mali i Zi dhe funksionar i lartë në ish-Federatën Jugosllave dhe përgjegjës për KOS? Nëse po, çka bisedove me të?
20. Po me Dushko Ristiqin dhe Mihaillo Zvicerin kishe raporte të ngushta?
21. Pas rrënimit të autonomisë së Kosovës, kur u derdh gjaku, a i deklarove gazetës sarajevase “Oslobodjenje” se je qytetar lojal i Jugosllavisë?
22. Si drejtor a pranove me vetëdije në punë në Institutin Albanologjik njerëz të UDB-së dhe të KOS-it?
23. A bëre divorc me gjyq nga gruaja legjitime dhe faktike vetëm për ta mbajtur banesën shoqërore, së bashku me shtëpinë luksoze? A vazhdove jetën normalisht me gruan “e divorcuar” në këtë banesë dhe në këtë shtëpi derisa ajo ishte gjallë?
24. A bëje orgji me gratë e huaja, të qarqeve të njohura të Kosovës në hotel “Dajti” e gjetiu në Shqipëri? Po orgjitë në Maqedoni, në motelet e atëhershme, poashtu me gratë e e këtyre qarqeve?
25. A erdhi në krizë bashkëpunimi midis dy universiteteve – UP-së dhe UT-së për këto sjellje tuaja amorale?
26. A kishe sjellje të tillë edhe në zyrën tende në Institutin Albanologjik?
27. A humbe me vota të fshehta për anëtarë të Pleqësisë së Institutit Albanologjik pasi përfundove tre mandate si drejtor?
28. A humbe me vota të fshehta për anëtarë të Kryesisë së KMDLNJ-së?
29. A humbe katastrofalisht në zgjedhjet e para menjëherë pas luftës (2000) dhe pas Rambujesë (1999)?
30. A i more në komunën e Prishtinës, bile në koalicion me një parti, vetëm 155 vota?
31. Me këtë rezultat të votimeve, a ishe jolegjitim në Konferencën e Rambujesë dhe në emër të kujt e nënshkrove “paqen e përgjakur”, siç e quan vetë?
32. Në vitin 2000 t’u nda çmimi “Nderi i Kombit”, por gjysma e kombit me votë të lirë nuk ta pranojë. A do ta kthesh këtë çmim?
33. A është e vërtetë se u mundove ta përjashtoje nga puna dr. Ibrahim Rugovën në Institut Alabanologjik sa ishe drejtor?
34. Por kur e mbrojtën anëtarët e tjerë të Pleqësisë, a është e vërtetë se ia ndale rrogën për disa muaj me pretekst se kishte qëndruar në Shqipëri më gjatë se sa duhej dhe nuk po i kthente librat e bibliotekës?
35. Është e vërtetë se krejt librat e zgjedhura të Institutit Albanologjik i ke bartur në shtëpi? Po pikturat e Akademisë, i ke në shtëpi?
36. A është e vërtetë se pas mbylljes së kufirit me Shqipërinë në vitet 1981-1991, vetëm ti i merrje librat e Shqipërisë përmes rrugëve që vetëm ti i di?
37. A është e vërtetë se shumë botime tua janë të kompiluara e të vjedhura nga librat e Shqipërisë dhe librat e leksionet e Beogradit? Po disa përkthime dhe disa harta a i përvetësove dhe nga botimet e mia?
38. A është e vërtetë se për botimin e pamfleteve tuaja Qeveria e Kosovës i dha 238.000 euro, ndërsa honorar i more 137 euro?
39. A është e vërtetë se disa vjet më parë edhe MASHT-i i Kosovës ia dha “Toenës” së Tiranës 50.000 euro për botimin e pamfleteve tua në 22 vëllime? A mund ta dimë sa komplete të pamfleteve të ”Toenës” dhe të Qeverisë së Kosovës janë shitur?
40. A është e vërtetë se je i vetmi shqiptar që i urren edhe të vdekurit, të cilët i ke urrejtur për së gjalli?
41. Pse e urreje kaq shumë Presidentin historik, dr. Ibrahim Rugovën sa ishte gjallë? Nuk shkove as në varrim, po as familjen nuk e ngushëllove?
42. Po pse e urren tash Rugovën kur nuk është më në mesin e të gjallëve?
43. Pse aq shumë e urreje poetin tonë të madh Ali Podrimjen sa ishte i gjallë? Pse e urren kaq shumë Podrimjen edhe për së vdekuri?
44. A mund ta dimë pse nuk erdhe në asnjë mbledhje komemorative të anëtarëve të vdekur të Akademisë dhe nuk i shprehe ngushëllime asnjë familjeje, nga vdekja tragjike e akad. Fehmi Aganit më 1999 e deri te vdekja akad. dhe poetit Ali Podrimja më 2012;
45. Kur erdhi i ringjallur Skënderbeu në Kosovë, me një pritje madhështore nga populli, pse popullin e quajte qenë dhe kudra?
46. A është e vërtetë se dy ditë para bombardimeve (e hënë, më 22 mars 1999), të caqeve serbe nga NATO-ja e thirre popullin që të mos e braktisë Kosovën, sepse ne atdhe tjetër nuk kemi dhe në këtë mënyrë po i përmbushen synimet armikut?
47. A është e vërtetë se i pari, i rruar e i maskuar, ike nga Kosova në mars 1999?
48. A është e vërtetë se në Bllacën katastrofike (1999), ashtu të tebdylosur, të thirren njerëzit e Qeverisë probullgare? A gumlloi megafoni: Rexhep Qosja le të dalë? A dole?
49. A është e vërtetë se si ”Baba” i kombit, e le popullin në mëshirën e barbarisë, popullin në të cilin thirreshe gjithë jetën dhe vazhdon të thirresh?
50. Deri sa të doli mjekërra, sa ditë qëndrove në Maqedoni dhe ku ishe i fshehur?
51. Pasi të doli mjekërra, a është e vërtetë se në Tiranë deklarove se shqiptarët që kanë mbetur në Prishtinë janë lojalë ndaj regjimit serb?
52. A është e vërtetë se në një TV të Kosovës pas luftës serbëve të Kosovës u garantove të drejtën e vetëvendosjes, me Graçanicën shtet të tyre? Në emër të kujt e bëre këtë?
53 A ishe i pari që kërkoje të shkonte veriu i Kosovës në Serbi? Në emër të kujt fole?
54. Gjithë jetën, a e hidhje gurin dhe e fshehje dorën?
55. Gjithë jetën përdore e keqpërdore shumë njerëz, i gënjeve, i mashtrove, i shantazhove, i kërcënove, po edhe sa lakej të kanë mbetur sot, 2-3 apo më pak?/Botuar për herë të parë më 20 shkurt 2014

Haradinaj: Të më presin familja dhe qytetarët, s’kam nevojë për pritje shtetërore

Ramush Haradinaj, në një intervistë me Adi Krastën për Top Channel – të transmetuar sot pasdite – ka përjashtuat çdo mundësi që vendimi i Francës të mos jetë i favorshëm për të.

Ai tha po ashtu se këtë herë nuk ka nevojë për pritje shtetërore, sepse mjafton ta presin familja dhe qytetarët, transmeton “Zeri.info”.

“Skenari më i keq në rastin tim ka ndodhur. Dëmi është shkaktuar, sepse jam ndaluar pa asnjë arsye e në bazë të fletarresteve pa asnjë fuqi juridike të Serbisë. Më shumë se kaq nuk mund të ndodhë. Unë do t’i kthehem Kosovës shpejt, sepse jam në të drejtën time. Unë kam zbatuar ligjet edhe të vendit tim e edhe ato ndërkombëtare, e skam borxh ndaj Serbisë. Udhëheqësit e shtetit të Kosovës, për fat të keq, nuk e kanë forcuar Kosovën, por më shumë e kanë harxhuar atë. Kur të kthehem nuk dua pritje shtetërore. Kjo është e panevojshme. Mjafton të më presin Anita me fëmije dhe qytetarët e vendit tim”, ka thënë ai. /Zeri.info/

Haradinaj tregon kush ka gisht në ndalimin e tij në Francë

Lideri i AAK-së, Ramush Haradinaj ka thënë se shqiptarët s’kanë gisht në ndalimin e tij në Francë. Ai ka thënë se këto goditje po i merr prej Serbisë, e cila ka kryer gjenocid në Kosovë.

Haradinaj ka thënë se Presidenti Thaçi dhe as kundërshtarët tjerë politikë, nuk kanë gisht në ndalimin e tij në Francë.

“Në e kemi garën politike në Kosovë. Jemi oponentë, mirëpo, këto goditje vijnë prej Beogradit. Ata janë sponsorë të këtyre goditjeve. S’mund të jap kësi mendime të pabazuara”, ka thënë Haradinaj në një intervistë për “Lajmin” e Maqedonisë.

Ai ka thënë se Serbia nuk do të mund të përçajë duke shpifur kundër shqiptarëve.

Ish-kryeministri i Kosovës ka thënë se ka pasur interesim nga shqiptarët kudo që janë për të kontribuar në lirimin e tij derisa pret që shpejt të kthehet në Kosovë.

Haradinaj ka thënë se më së shumti për ndalimin e tij po brengosen prindërit e tij.

Ideja e Thaçit për pajtim me Serbinë, veprim skandaloz politik! – Nga Florim Zeqa

Është hera e parë në historinë e njerëzimit, kur një president i një populli të gjakosur del haptas t’i kërkoj falje dhe pajtim një pushtuesi shekullor. Është hera e parë në histori të dëgjosh viktimën duke i kërkuar pajtim xhelatit apo agresorit barbar serb i cili përveq krimeve gjenocidale ndaj popullatës civile, dogji dhe shkatërroi çdo pasuri shqiptare mbi faqen e dheut, siq e thotë populli; na i shkrumboi edhe gurët e thëmeleve të shtëpive tona.
Nuk është vetëm lufta e fundit, me Serbinë pushtuese e kemi një histori të gjatë dhe tepër të dhimbshme shekullore. Vrasjet dhe gjenocidi serb ndaj shqiptërëve nuk ka ndodhur vetëm në luftën e fundit çlirimtare të viteve 1998/99.
Pothuajse nuk është rritur dhe mplakur asnjë gjeneratë në Kosovë, pa e provuar mbi kurrizin e saj dhunën dhe kërrbaçin, helmimet dhe dhunimet, vrasjet dhe masakrat e përmasave gjenocidiale të barbarisë serbe.
I ashtuquajturi “president” i vendit, zoti Hashim Thaçi, pas përuljes pushtëruese pranë lapidareve të varrezave serbe me mbishkrimin “viktima të terrorit shiptar”, pasoi me hapa tjerë edhe më skandaloz, të kërkesës për pajtim me Serbinë gjakatare,…pa u konsultuar fare me spektrin e gjërë politik vendor, familjet e dëshmorëve, invalidvëve dhe viktimave të luftës, e para së gjithash me familjarët e rreth 1700 personave të zhdukur dhe rreth 20 mijë nënave e motrave shqiptare të dhunuara nga policët, ushtarët dhe paramilitarët serb në luftën e fundit.
Andaj, “presidenti” nuk e ka të drejtën morale dhe politike të kërkojë pajtim me Serbinë, dhe atë së paku për dy arsye;
E para, Hashim Thaçi nuk është president i zgjedhur me votën e lirë të qytetarëve të vendit, por është produkt i pazareve të pista politike mes klanit “Pronto” dhe nëntokës politike të LDK-së, pra është produkt i kontrabandimit të vullnetit të rreth 70 % të qytetarëve të Kosovës, të cilët në zgjedhjet nacionale të vitit 2014 kishin votuar kundër keqqeverisjes së tij 7 vjeqare, gjegjësisht kishin votuar për ndryshimin e kursit politik në vend.
E dyta, është aspekti moral që nuk e lejon “presidentin” t’i kërkoj falje dhe as pajtim Serbisë, ngase gjatë luftës së fundit çlirimtare, ai dhe familja e tij nuk kanë pësuar dhe as dëmtuar Serbinë.
Këtë  e ka vërtetuar disa herë njeriu më kontravers i kohë s sonë, i vetëzgjedhuri “president”, i ngritur në karrierën politike si udhëheqës politik i luftës çlirimtare,…duke u deklaruar para mediave dhe zyrtarëve ndërkombëtar; “Nuk kam qenë pjesë e luftës çlirimtare”.
Degradimin  e tij nga një lider i krahut të luftës për çlirim, e dëshmoi edhe në Seancën Solemne të Kuvendit të Republikës së Kosovës për nderë të 9 vjetorit të rishpalljes së Pavarësisë së Republikës së Kosovës, ku në asnjë rast nuk ia nxuri goja tri shkronjat e arta-UÇK, familjen legjendare Jashari dhe asnjë nga masakrat gjenocidiale të Serbisë në Kosovë. Vërtetë, fjalimi i tij patetik, i pashije dhe antikombëtar, më bëri të ndjejë dhembshuri për pozicionin  e tij, sa turpërues aq edhe qyqarë,…duke i humbur në masë të madhe karakterin festiv të seancës solemne të kuvendit.
Gjithnjë, kur është në pyetje konsumi i brendshëm politik, del i pari në marrjen e primatit të meritave, duke u thirruar në vlerat e luftës, ndërsa sa herë që i ngushtohet rrethi nga ndërkombëtarët për llogaridhënje rreth përgjegjësisë, si udhëheqës politik i luftës çlirimtare,  atyre ua thotë të kundërtën; “Nuk kam qenë në vijat e frontit…”!
“Presidentit” i ka humbur busolla orientuese, rrëshqitja dhe katandisja e tij politike nuk kanë të ndalur, i ka humbur guximi nga kërcënimet e ndërkombëtarëve, kur këta të fundit, deri dje e përdorën si figurë shahu në tabelën politike kosovare, ndërsa tani po e përdorin edhe si lodër nëpër  varrezat serbe gjithandej Kosovës.
Nuk jemi në shekullin e 18-19, kur përhapja e lajmit dhe së vërtetës ka kërkuar kohë të gjatë dhe sfida të panumërta. Tani jemi në shekullin 21, ku shpejtësia e përhapjes së lajmit krahasohet me shpejtësinë  e dritës, dhe falë zhvillimit të hovshëm teknologjik është e pamundur të shtrëmbërohen faktet dhe fshihet e vërteta.
Prandaj, ideja e Thaçit për pajtim me Serbinë, përveqse e pamoralshme, politikisht është veprim i gabuar dhe devijim i skajshëm kombëtar, përderisa Serbia të mos e njohë  Republikën  e Kosovës shtet të pavarur dhe sovran, t’i kthejë Kosovës rreth 1700 të zhdukur, të bëjë dëmshpërblimin e pasurive shqiptare të shkatërruara dhe plaçkitura gjatë luftës, të pasuar me kërkimfaljen publike për gjenocidin shekullor ndaj shqiptarëve.
I ashtuquajturi dhe vetëzgjedhuri “president”, llogaritë  e tija personale nuk guxon t’i ndërlidhë me fatin dhe ndjenjat e popullatës së përgjakur nga terrori serb.
Mallkimi i popullit, do të jetë i ashpër dhe i pamëshirshëm ndaj gjithë atyre që shkelin gjakun e derdhur për lirinë e atdheut.
Gjaku nuk bëhet ujë zoti “president”, viktimat kërkojnë drejtësi dhe ndëshkim për kriminelët e jo pajtim siq jeni duke e kërkuar ju!

Kosovës po i ikin kuadrot mjekësore

Institucionet e shëndetit publik në Kosovë po përballen me fenomenin e ikjes së mjekëve specialistë nga vendi.

Kuadri specialist mjekësor po tregon interesim për punësim në vende të ndryshme të botës, ku pagesat janë shumë më të mira. Edhe infermierët, në shumë raste, kanë ndjekur rrugën e mjekëve specialistë.

Ndryshe, nevoja për mjekë e infermierë në Kosovë, konsiderohet e madhe. Vetëm në Qendrën Klinike Universitare, janë më shumë se 30 mijë vizitorë gjatë ditës.

Radio Evropa e Lirë ka kontaktuar me Gertruda Dylën, mjeke specialiste e kardiologjisë, e cila ka vendosur që karrierën e saj prej kardiologe ta zhvillojë në Gjermani. Ajo, që nga viti 2011 punon në një spital privat për kardiologji.

“Në Gjermani kam filluar punën duke iu falënderuar referencave ose rekomandimeve të profesorëve gjermanë, me të cilët kam pasur bashkëpunim. Një ndër ta është Prof. Dr. Eberhard Von Hodenberg, shef i Klinikës Kardiologjike, ose origjinal ‘Herzzentrum Lahr Schwarzwald’ në Gjermani. Ai ligjëron edhe në SHBA”.

“Në Kosovë kam punuar në spitalin e Gjakovës. Nga viti 2001 deri në vitin 2011 kam ligjëruar si asistente në Fakultetin e Mjekësisë në Institutin e patologjisë. Kam shërbyer edhe në Afganistan si mjeke”, ka treguar Dyla.

Arsyet pse ka ikur nga Kosova, sipas zonjës Dyla, kanë qenë të shumta. Por, para së gjithash ajo mendon se largimi nga vendi, vjen si zgjidhje në momentin kur vendlindja, shteti yt, nuk të ofron vendin e merituar. Në këso raste, duhet gjetur alternativa tjera, thotë ajo.

“Të vendosësh që ta lësh vendlindjen, nuk është e aspak e lehtë. Mirëpo, nëse vendlindja nuk të ofron një jetë të qetë, të dinjitetshme, me shpresë dhe perspektivë për veten tënde dhe familjen tënde, atëherë mendoj se secilit prej nesh, kur na jepet mundësia, pavarësisht sfidave e vështirësive që na presin në vendin e huaj, vendos ta lëshojë Kosovën”, thotë Dyla.

Në Ministrinë e Shëndetësisë thonë se fenomeni i ikjes së stafit profesional nuk po e godet vetëm Kosovën. Sipas tyre me situatën e ikjes së stafit nga vendi përballen edhe shtetet më të zhvilluara, përfshirë edhe Gjermaninë.

Por, ashtu nuk mendon edhe kryetari i Federatës Sindikale të Shëndetësisë Blerim Syla. Ai thotë se në anketën e fundit që është bërë, prej 1 mijë studentëve të anketuar, 73 për qind e tyre kanë deklaruar se do të ikin jashtë vendit.

“Në Kosovë kemi nevojë për 5 mijë punëtorë shëndetësorë më shumë se sa që aktualisht i kemi. Në anën tjetër, vetë Qeveria e përkrah ikjen e tyre jashtë vendit. Ne i shkollojmë, i përgatisim dhe më pas i dërgojmë të gatshëm në shtetet e Bashkimit Evropian”, kishte thënë Syla kohë më parë për Radion Evropa e Lirë.

Sidoqoftë, në Qendrën Klinike Universitare të Kosovës, si qendër referente për tërë Kosovën, janë të punësuar rreth 613 mjekë dhe 1,882 infermierë. Paga e mjekëve specialistë është rreth 600 euro në muaj, derisa infermieri, për punën që kryen, paguhet rreth 300 euro në muaj. (REL)

Jusuf Buxhovi: “SHBA – të duhet të parandalojnë rrezikimin e shtetit të Kosovës nga brenda! “

– Kështu deklaroi historiani dhe shkrimtari Jusuf Buxhovi në Çikago me rastin e ngritjes së flamurit të Kosovës para bashkësisë së qytetit

Në sheshin kryesor të Çikagos, para bashkësisë së qytetit, sot u ngrit flamuri i Kosovës. Kjo ngjarje u organizua nga Komuniteti shqiptar i Çikagos si dhe bashkësia e qytetit. Në ngritjen solemne të flamurit të Kosovës në Çikago, si ftuar i veçantë, mori pjesë edhe shkrimtari dhe historiani Jusuf Buxhovi, i cili këto ditë po mban ligjerate në disa universite amerikane.

Historiani Buxhovi, në fjalën e rastit përkujtoi rolin e madh të SHBA-ve në jetësimin e projekti të shtetit të Kosovës nga themelimi i Lidhjes Demokratike të Kosovës në dhjetorin e vitit 1989 e deri sa u shpall, para nëntë vitesh.

Historiani Buxhovi tha se ishte pikërisht kongresmeni Bob Doll, në vitin 1990, kur, me rastin e vizitës së parë të delegacionit të shqiptarëve të Kosovës në Uashington, në një bisedë me dr Rugovën, ngriti çështjen e pavarësisë po qe se do të shpërbëhet ish Jugosllavia ndërsa shqiptarët do t’i përmbaheshin një përcaktimi demokratik dhe propërendimor. Nga ajo kohë e tutje kongresmenët dhe senatotët e shumtë amerikanë, të nxitur nga llobi i fuqishëm shqiptaro-ametikan, u vunë në mbështetje të lëvizjes kombëtare shqiptare si dhe projektit të saj për pavarësi, që kaloi nëpërmes rezistencës institucionale paqësore e deri te lufta e armatosur.

Buxhovi theksoi se ishte kërcënimi i kërshëndellave i vitit 1992 që iu drejtua Millosheviqit nga presidenti Bush si dhe vendosmëria e presidentit Klienton që erdhi më pas, që parandaluan kasapin e Ballkanit të hap frontin e Kosovës. SHBA-të, po ashtu ndikuan, që pas Detjtonit, çështja e Kosovës të ngritet në një problem ndërkombëtar, gjë që, kthimi i luftës së diplomacisë në diplomaci të luftës, mundësoi edhe fushatën ajrore të NATO -s në marsin e vitit 1999, me të cilën Kosova u vu nën protektoratin tetëvjeçare ndërkombëtar, që i parapriu edhe pavarësisë që erdhi më 17 shkurt 2008.

Pasi që iu falemenderua SHBA – ve për rolin e madh në këtë zhvillim historik, historiani Buxhovi drejtoi shumë fjalë kritike në adresë të politikanëve të Kosovës, të cilët, sipas tij, idealin për konsolidimin e shtetit të Kosovës – shtet të lirë dhe demokratik të një përkatësie perëndimore për të cilin u derdh shumë mund dhe gjak, e kthyen në preokupim të zhvatjes për qëllime kriminale.

KjO solli zhgënjim të madh, gjë që një pjesë e mirë e qytetarëve të saj kanë filluar ta humbin shpresën në të dhe të aleatët tanë, meqë disa prej tyre keqpërdorën edhe besimin e ndërkombëtarëve.

Me këtë rast, Buxhovi apeloi te SHBA – të që mos të përkrahin politikanët mafiozë, por të bëjnë çmos që ata dhe strukturat e ngritura kriminale të marrin fund duke u sjellë para përgjegjësisë ligjore, qoftë edhe në ndonjë tribunal ndërkombëtar, ngaqë të tillët po e rrezikojnë shtetin e Kosovës si projekt perëndimor.

“Shtetet e Bashkuara të Amerikës, si ideatorët kryesor të shtetndërtimit të Kosovës kanë përgjegjësi historike që politikanët që e kanë sjellë këtë gjendje të eliminohen sa më parë nga skena politike. Vendin e tyre duhet ta zënë patriotët e njëmend me krijimin e një force të re politike në vend te zëvendësimit të të këqijave me të këqinj të ngjashëm nga lloji i njëjtë,siç po kërkohet prej tyre. Kjo ndërhyrje bëhet edhe më e domosdoshme në rrethanat kur kjo politikë, prej më shumë se një viti duke e kthyer parlamentin në një skenë tragjiko-komike kunder interesave vitale të vendit, me hapjen e kauzave të rreme dhe marifeteve të ngjashme, po ia hap dyert edhe ndërhyrjes së Beogradit dhe të Rusisë, gjë që do të rrezikonte edhe interesat strategjike amerikane dhe ato perëndimore në rajon.”

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend