PRISHTINË – Kryeministri i vendit, Zoran Zaev i shoqëruar nga bashkëshortja e tij, Zorica Zaev, ka realizuar një vizitë sot në Kosovë.

Vizita e Zaevit nuk ka qenë zyrtare, ai është takuar vetëm me kryeministrin e Kosovës Ramush Haradinaj në shtëpinë e këtij të fundit.

“Bashkë me Aniten, mirëpritëm në shtëpinë tonë mikun dhe homologun tim maqedon, Zoran Zaev, me bashkëshorten e tij, Zorica, me dëshirën që miqësia jonë të reflektojë në marrëdhëniet ndërmjet dy vendeve dhe popujve tanë”-ka shkruar Haradinaj në Facebook.

(BalkanWeb)

Kuvendi i Jashtëzakonshëm i Partisë Socialdemokrate të mërkurën zgjodhi me shumicë votash kryetar Shpend Ahmetin, nënkryetar Visar Ymerin dhe sekretare të përgjithshme Aida Dërgutin.

Shpend Ahmeti ka qenë zyrtari i lartë në Lëvizjen Vetëvendosje dhe kryetar aktual i komunës së Prishtinës.

Delegacioni prej 50 anëtarësh nga Iowa e Shteteve të Bashkuara të Amerikës në Kuvendin e Kosovës

Një delegacioni prej 50 anëtarësh nga Iowa e Shteteve të Bashkuara të Amerikës po qëndron në Kosovë.

Delegacioni i kryesuar nga Zach Nunn, përfaqësues në Komitet për Marrëdhënieve Ndërkombëtare nga Iowa dhe Timothy Orr, gjeneral i Gardës Kombëtare të Iowa-s, zhvilluan takime në Kuvendin e Kosovës, me kryetarin e këtij institucioni, Kadri Veseli si dhe me disa komisione parlamentare.

Veseli tha se Iowa ka luajtur rol të rëndësishëm në gjithë procesin e shtetndërtimit të Kosovës.

“Në këtë sallë para 10 vitesh, Kosova, shtëpia e juaj e dytë, shpalli pavarësinë e vet. Historia e pavarësisë që sjell 17 shkurtin e vitit 2008 është plot dhimbje e lavdi për popullin tonë, janë më shumë se 100 vjet përpjekje e brezave për liri e pavarësi, një ideal që nuk u shua për asgjë”, theksoi Veseli gjatë një fjalimi para këtij delegacioni.

Shteti i Kosovës është realitet, theksoi Veseli, sipas të cilit, për një dekadë pavarësi dhe dy dekada liri, Kosova ka bërë hapa gjigantë në konsolidimin e institucioneve të qëndrueshme.

“Po ndërton gradualisht një shtet ligjor ku secili qytetar është i barabartë. Këto nuk janë vetëm meritë e jona, janë kontribut i miqve tanë ndërkombëtarë, është kontribut i secilit prej jush që na keni ndihmuar për arsim cilësor, ushtri profesionale”, theksoi Veseli.

Ndërkaq, kryesuesi i delegacionit nga Iowa, Zach Nunn rikujtoi angazhimin dhe ndihmën e Iowa-s për Kosovën. Ai tha se ky bashkëpunim duhet të jetë i përhershëm.

“Është mirë kur shoh se sa keni përparuar. Ne duam të jemi partner i juaj. Kosova ka bërë partneritet me ne dhe se ne kemi edhe konsullatën tuaj atje me çka janë vendosur marrëdhëniet edhe më të forta reciproke”, tha Nunn. Ai sqaroi se nga delegacioni prej 50 anëtarëve që po vizitojnë Kosovën, shumica kanë ardhur me vetëfinancim me dëshirën që bëjnë diçka në të mirë të Kosovës dhe bashkëpunimit të ndërsjellë.

Delegacioni nga Shtetet e Bashkuara të Amerikës ka në agjendë edhe vizita e takime tjera me përfaqësues dhe institucione të Kosovës.

Good Government affairs, nje dere europiane e hapur per shqiptaret

Ndërsa Kosova është në momente vendimtare sa i takon procesit të liberalizimit të vizave me vendet e hapësirës Shcengen, dhe gjithashu në përpjekje për të shkuar më tej në rrugën e nisur për tju bashkëngjitur familjes së vendeve europiane, BE, nga Suedia vjen një lajm i mirë vjen për gjithë shqiptarët e Kosovës. Good Government Affairs, (GGA), me qendër në Stockholm ka ofruar mbështetjen e saj për qeverinë e Kosovës, duke premtuar bashkëpunim dhe ekspertizën më të kualifikuar për arritjen e këtyre qëllimeve vitale për shqiptarët. Lena Bäcker, njëra nga themeluesit e kësaj kompanie është tejet e vendosur dhe optimiste për të punuar shpejt dhe fort me qeverinë në Prishtinë për të arritur këto objektiva madhore. “Koha është pikërisht tani dhe jo më vonë”, thotë zonja Bäcker ndërsa shton se nëpërmjet Strategjisë së Ballkanit Perëndimor të Komisionit Evropian, një derë është hapur pak për Kosovën. “Ne në GGA mund të ndihmojmë që ta vendosim një këmbë në këtë derë për Kosovën dhe kështu kjo derë nuk do të mbyllet përsëri. Ne duam të mbështesim Kosovën për të forcuar imazhin dhe njohjen ndërkombëtare për Kosovën, për liberalizimin e vizave dhe anëtarësimin e saj në BE”, vijon zonja Bäcker, e cila është e entuziazmuar nga takimet që ka pasur në Kosovë me autoritetet, por edhe qytetarë të thjeështë dhe të rinj, që sipas saj janë të etur për Europën dhe vlerat e civilizimit të saj. E dashuruar vërtetë jo vetëm me bukuritë natyrore por edhe me karakterin e veçantë të popullit shqiptar, Bäcker këmbëngul se Kosova nuk ka kohë për të humbur, pasi imazhi që egziston në botë për Kosovën nuk është ashtu sikurse shumë prej nesh e mendojmë. Bota ende ka të ngulitura në mendje pamjet e masakrave të regjimit të Sllobodanit mbi popullsinë civile dhe imazhet e bombardimeve. “Kosova është ende mjaft e panjohur dhe shumë njerëz e mendojnë vendin siç ishte 20 vjet më parë. Ata ende mendojnë se Kosova është në luftë”, thotë me keqardhje Bäcker.

Po çfarë është Good Government Affairs, (GGA) dhe cilat janë format me të cilat synohet të mbështeten përpjekjet e Kosovës për prosperitet?

Good Government Affairs, (GGA) ose Qeveria e Punëve të Mira, është një kompani me bazë në Suedi në përbërje të së cilës janë ish ministra, zëvëndësministra, drejtorë të përgjithshëm të korporatave të njohura, ekspertë të fushave të ndryshme që ndihmojnë qeveritë nëpër botë për të krijuar një rritje të fortë dhe të qëndrueshme për vendet e tyre. Falë kapaciteteve dhe lidhjeve që kanë anëtarët e këtij bordi, GGA ka mundësinë të bashkëpunojë me Komisionin Evropian, Bankën Botërore, FMN, OKB, USAID, OECD, Bankën e Zhvillimit, IDEA dhe Sida.

“Ne po punojmë me integritetin më të lartë. Qëllimi ynë është të mbështesim rritjen dhe zhvillimin afatgjatë në Qeveri. Ne besojmë se njohja e praktikave më të mira dhe përvoja e dëshmuar është çelësi i reformës së suksesshme. Kjo është arsyeja pse ne hyjmë në një rrjet të individëve me kualifikim të lartë që kanë mbajtur pozitat më të larta të qeverisë për të identifikuar, korrigjuar dhe ndihmuar zbatimin e praktikave më të mira brenda qeverisë. Përvoja jonë kolektive dhe rrjeti shtrirë, në Suedi dhe jashtë vendit, të fituara përmes karrierave emocionuese dhe sfiduese, na lejojnë të jemi vizionarë në çështje me të cilat përballen qeveritë sot. Vizioni ynë është të ndihmojmë në zhvillimin dhe të kuptuarit se si një ekonomi e re mund të ndikojë në kushtet e suksesit afatgjatë. Ne jemi të bindur se suksesi bazohet në një kombinim të njohurive strategjike, ekspertizës dhe aftësisë për të analizuar sfidat dhe nevojat. Së bashku ne kemi një përvojë unike dhe të kualifikuar në dhënien e konsultimit të nivelit të lartë. Kompania jonë gjithashtu merret edhe me bashkëpunimin e ndërsjelltë të nivelit të lartë si dhe sa i takon investimeve midis qeverive dhe vendeve të ndryshme”, shpjegon zonja Lena Bäcker.

Nga takimet e zhvilluar kohët e fundit në Kosovë, vihet re se ka nevojë për ndihmë dhe ekspertizë nga BE dhe GGA lidhur me investimet, mbështetjen në sektorin e arsimit dhe edukimit, minierave, energjisë, bujqësisë, privatizimit të kompanive publike, rritjen e aftësisë së parlamentit sa i takon Integrimit Evropian, përmirësimin e kapaciteteve qeverisëse në nivel qendror dhe lokal, po ashtu ndihmë në fushën e legjislacionit dhe rishikimin e ligjeve, parandalimin e krimit, reformën në arsim dhe shëndetësi, bashkëpunimin rajonal, etj. Për të realizuar plotësimin e këtyre objektivave, kërkohen takime intensive me BE, UN, UNESCO, OSCE, Interpol, OECD, OBT, FMN, Banka Botërore, etj, takime që do të merren përsipër nga një ekip expertësh që do të punojnë posaçërisht për Kosovën.

Në përbërje të këtij grupi janë :

– Walburga Habsburg Douglas ish-Princesha dhe deputete e parlamentit suedez. Ajo është vajza e Otto Von Habsburg, princit i fundit i kurorës së Mbretërisë Austro-Hungareze, që sikurse njihet nga historia ka pasur një rol vendimtar për pavarësinë e shqiptarëve në vitin 1912.

– Mats Hellström Ministër i Suedisë për 10 vjet, në postet e Ministrit të Tregtisë së Jashtme, Ministrit të Bujqësisë, Ministritë të Punëve të BE-së, Ministrit të Bashkëpunimit Nordik, Deputet për 27 vjet si Kryetar i Komitetit të Jashtëm, Ambasadori i shtetit Suedez në Gjermani si dhe Guvernator i Stokholmit.

– Roger Mörtvik ish zëvendësministri i arsimit të Suedisë. Aktualisht, Kryetari i kërkimeve shtetërore për arsimin e të rriturve.

– Aurora Pirraku Eriksson, master në lidership dhe kriminalistikë, kryetare e socialdemokratëve për Besim dhe Solidaritet në rajonin Västmanland dhe anëtare e bordit së këtij formacioni në rang kombëtar. Në një botim për shqiptarët e Suedisë, roli i saj është cilësuar model sa i takon ndihmës së dhënë për shqiptarët në procesin e vështirë të integrimit në Suedi.

– Lena Bäcker ish Drejtoreshë ligjzbatuese (Përmbarimit) të Suedisë. Ajo ka qenë përgjegjëse për të ndjekur pjesën suedeze të paketës ndërkombëtare të shpëtimit në “Taskforce for Greece”. Ajo është ngarkuar gjithashtu me detyra të larta qeveritare në vende të ndryshme në Evropë, Lindjen e Mesme, BE, FN, OECD, etj.

Me qëllim përshpejtimin e proceseve integruese dhe zhvillimin e Shqipërisë, në Tiranë është nënshkuar një kontratë me GGA.

Blerim Shala thotë se më 1991 ka pasur rrezik real për nisjen e luftës edhe në Kosovë. E gjithë kjo thotë se nuk ndodhi për shkak të bisedimeve intensive mes Kosovës dhe SHBA-së.

“Unë jam i sigurt që sot nuk do të kishim diskutuar fare në Prishtinë sikur Kosova ta kishte filluar luftën në vitin 1991. Për fatin tonë të madh kemi pasur një udhëheqësi shumë të matur në atë kohë me Ibrahim Rugovën si lider të LDK-së. Nuk ka qenë vetëm Rugova mund të them se ka qenë një elitë politike shumë ma e matur shumë ma e pjekur dhe komunikimi jonë me Amerikën ka qenë intensiv’, thotë Shala.

Siç shkruan “INA”, ai ka shpjeguar se: “Mbi të gjitha ka qenë me rëndësi se ne kemi qenë në komunikim të vazhdueshëm me SHBA-të. Më kujtohet kur erdhën 7 senatorët në Kosovë, ka qenë gushti i vitit 1990. Kanë qenë Bob Doll, Alfonso D’Amato dhe senatorë të tjerë dhe D’Amato ishte i afishuar në atë kohë si një senator më pro shqiptarë se gjithë të tjerët”.

“D’Amato ishte brutalisht i qartë. Porosia ime dhe e Amerikës është: Nuk bëni të luftoni. Nuk bën të hyni në luftë sepse do të iu shfarosin si popull”, tregon Shala.

Presidenti i Kosovës, Hashim Thaçi, dekretoi Ligjin për ratifikimin e Marrëveshjes për kufirin shtetëror në mes të Republikës së Kosovës dhe Malit të Zi.

Dekretimi i këtij ligji pasoi vendimin e Gjykatës Kushtetuese, e cila ditë më parë ka vlerësuar se ratifikimi i Marrëveshjes për kufirin shtetëror në mes të Republikës së Kosovës dhe Malit të Zi, nuk ishte në kundërshtim me Kushtetutën e Kosovës.

“Presidenti i Republikës së Kosovës, Hashim Thaçi, duke u bazuar në kompetencat e tij kushtetuese dhe ligjore, ka dekretuar shpalljen e Ligjit për ratifikimin e Marrëveshjes për kufirin shtetëror në mes të Republikës së Kosovës dhe Malit të Zi. Ky dekret ka hyrë sot në fuqi, pas nënshkrimit nga presidenti i Republikës së Kosovës, Hashim Thaçi”, thuhet në një komunikatë për media të lëshuar nga Zyra e presidentit të Kosovës.

Marrëveshja e demarkacionit të kufirit me Malin e Zi ishte ratifikuar në mars të këtij viti, në Kuvendin e Kosovës.

Ekipi i zhytësve nga Kosova, bashkë me vullnetarë të tjerë, tashmë kanë gjetur njërin nga dy trupat e pjesëtarëve të policisë, të cilët kanë rënë në lumin Lepenc.

Policia e Kosovë ka konfirmuar për Radion Evropa e Lirë, se njëri nga policët është gjetur në lumë.

Agim Gashi, zëdhënësi i Policisë së Kosovës, tha se trupi u gjet në kilometrin e pestë nga vendi ku ka ndodhur aksidenti në drejtim të komunës së Hanit të Elezit.

Në një komunikatë për media nga Forca e Sigurisë së Kosovës, thuhet se “njësitë e kërkim-shpëtimit të FSK-së, Policisë së Kosovës dhe Agjencisë së Kosovës për Emergjenca, në kilometrin e pestë nga vendi i aksidentit, kanë gjetur trupin e pajetë të policit Malsor Dashi”.

Dy policët, Malsor Dashi e Armend Trena, mesnatën e së shtunës janë përfshirë në një aksident në magjistralen Kaçanik-Han i Elezit.

Arrestohet aktivisti i Vetëvendosjes Egzon Balaj. Lajmi është konfirmuar nga Lëvizja Vetëvendosje. Arrestimi ka ndodhur në kufirin me Republikën e Shqipërisë.

Vetëvendosje njofton se ai është dërguar menjëherë në paraburgim kurse i është thënë se arrestimi i tij është për shkak të pjesëmarrjes në një aksion të vitit 2015.

“Pushteti është duke vazhduar përndjekjen e aktivistëve derisa është krejt i pazotë përballë keqbërësve më të mëdhenj të vendit. Aktivistët e VETEVENDOSJE!-s dhe aksionet e organizatës gjithmonë janë në mbrojtje të së mirës publike. Asnjë gjyqi as policie nuk do të duhej t’i pengonte kjo. Sistemi gjyqësor e ka humbur orientimin duke e përndjekur VETËVENDOSJE!-n ose duke mbushur burgjet me njerëzit më të përjashtuar dhe të varfër e ndërkohë duke i mbyllur sytë krejtësisht para krimit e korrupsionit”, thuhet në njoftimin e Vetëvendosjes.

Grupi i Deputetëve të Pavarur, të larguar nga lëvizja Vetëvendosje thanë të martën se kanë hedhur hapat e parë për krijimin e një subjekti të ri politik.

Deputeti i këtij grupi, Visar Ymeri, shpalosi një deklaratë, që siç tha, është pikënisje për mënyrën e themelimit të subjektit të ri. Zoti Ymeri tha se deklarata përmbledhë pikënisjet ideore, synimet dhe strategjinë publike për angazhimin politik. Ai tha se ende nuk është vendosur për emrin e subjektit të ri, i cili pritet të ketë drejtim social demokrat.

“Qëllimi parësor i yni është avancimi i angazhimit publik për zhvillim shoqëror dhe shtegdalja nga një dekadë e keq-qeverisjes shtetërore”, tha ai duke shpalosur mënyrën se si subjekti i ri e sheh të ardhmen e vendit.

“Ne besojmë se liria është edhe kolektive edhe individuale, por angazhohemi njëkohësisht që këtë liri ta realizojmë si një shtet që është bashkësi qytetarësh i cili ka sovranitet popullor, që është shoqëri plurale dhe solidare e që kushtëzon e mirëmbanë zhvillim të qëndrueshëm ekonomik që prodhon drejtësi e barazi sociale te pjesëtarët e vet”, tha ai.

Zoti Ymeri tha se subjekti i ri do të angazhohet për siç tha një sistem politik e ekonomik i cili as nuk diskriminon e as privilegjon.

“Ne e pranojmë domosdoshmërisht konceptin e ekonomisë së tregut por njëkohësisht jemi të vetëdijshëm se ai e ka aftësinë e kufizuar që të krijojë bazë materiale e cila mundëson mirëqenien shoqërore dhe njëkohësisht nëse shoqëria dhe ekonomia vendosen nën diktatin e tregut atëherë shpërndarja dhe ri-shpërndarja e pasurisë pamundësohet dhe kështu krijohen anomaly shoqërore”, tha zoti Ymeri.

Grupi i Deputetëve të Pavarur përbëhet nga 12 deputetë në Parlamentin e Kosovës. Të gjithë këta kanë dhënë dorëheqje gjatë disa muajve të fundit nga strukturat e lëvizjes Vetëvendosje. Ata nuk përjashtuan bashkëpunimin me lëvizjen Vetëvendoje, në pikat që siç thanë mund t’i bashkojnë

Largimi i deputetëve pasoi krizën në lëvizjen Vetëvendosje, Pas publikimit të bisedave private të disa deputetëve të Vetëvendosjes në të të cilat ishte përvijuar edhe një shprehje fyese për themeluesin e lëvizjes, Albin Kurti.

Lëvizja Vetëvendosje u themelua në vitin 2004 nga Albin Kurti. Deri në vitin 2010 kur u përfshi për herë të parë në zgjedhjet për pushtetin qendror, kjo lëvizje nëpërmjet protestave dhe aksioneve kishte kundërshtuar misionet ndërkombëtare në Kosovë dhe qeverinë e vendit.

Në zgjedhjet e përgjithshme të 11 qershorit të vitit të kaluar, Vetëvendosje arriti të fitojë 32 vende në parlamentin e Kosovës duke u bërë subjekti i parë në Kosovë ndërsa në zgjedhjet për pushtetin komunal fitoi tri komuna përfshirë dy kryesoret Prishtinën dhe Prizrenin.

Dorëheqjet e lanë atë me 19 deputetë, duke e radhitur si forcën e tretë politike në parlamentin e Kosovës.

Strukturat administrative të katër komunave veriore të Kosovës do t’i ofrojnë mbështetje Ekipit menaxhues për formimin e Asociacionit apo Bashkësisë së komunave me shumicë serbe. Pajtimi për një gjë të tillë është arritur në mbledhjen e Ekipit menaxhues me kryetarët e katër komunave të veriut të Kosovës dhe dekanin e Fakultetit Juridik të Universitetit që funksionon në veri të Mitrovicës.

Vinka Radosavljeviq, koordinatore e Ekipit menaxhues, përmes një komunikate për medie, ka bërë të ditur se ky ekip ka mbajtur sot mbledhjen e parë me ekspertët ligjor të fushës së vetëqeverisjes lokale.

“Ekipi menaxhues do ta bazojë punën e tij vetëm mbi bazën e marrëveshjeve të arritura gjatë dialogut në Bruksel, ndërmjet Beogradit dhe Prishtinës, duke respektuar Kartën evropiane për vetëqeverisjen lokale dhe principet dhe vlerat tjera demokratike evropiane të kësaj fushe”, ka deklaruar Radosavljeviq.

Në komunikatë gjithashtu është thënë se në përputhje me kompetencat dhe mandatin e punës, Ekipi menaxhues do të konsultohet me përfaqësuesit e OSBE-së, lidhur me punën e mëtejme, si dhe me instancat kompetente të institucioneve në Prishtinë.

Sistemi Presidencial dhe zgjedhja e presidentit të shtetit drejtëpërdrejt nga populli (ide e kamotshme e presidentit historik Ibrahim Rugova) do t’u jepte fund bllokadave paszgjedhore dhe mënyrës së kontrabandimit të postit të presidentit të shtetit nga partitë politike.

Reforma e ashtuquajtur zgjedhore e filluar në vitin 2010, e bllokuar nga qeveritë e kaluara dhe e harruar së fundmi nga pushtetarët aktualë duhet të ri-inicohet nga deputetët e kësaj legjislature për të shpëtuar vendin nga katandisja e mëtutjeshme.
Ndryshimi i Kushtetutës, përkatësisht ligjit dhe akteve nënligjore që mundësojnë reformën e mirëfilltë zgjedhore për kalimin nga sistemi parlamentar në atë presidencial, përveqse imperativ i ngutshëm kohorë, ka si mbetur e vetmja zgjidhje për nxjerrjen e vendit nga kolapsi i një sistemi të dështuar qeverisës 19 vjeçarë
Ngjashëm, sikurse zgjedhja e presidentit nesër, zgjedhja e kryetarëve komunal me votë të drejtëpërdrejtë nga populli, është modeli më i mirë i kalimit në sistemin presidencial.
Sistemi presidencial paraqet çelësin e evitimit të ngërçeve politike dhe krizave artificiale paszgjedhore të paraqitura në mënyrë serike në Kosovën e pasluftës!
Sistemi presidencial automatikisht krijon premisat e dy blloqeve të forta parazgjedhore, respektivisht bipolarizimin e skenës politike, gjegjësisht krahun e djathtë dhe të majtë apo krahun e qëndres së djathtë kundrejt krahut majtist (social, socialdemokrat, pse jo dhe komunist të qëndres së majtë).
Përderisa në sistemin parlamentar mundësia e manipulimit me zgjedhjet është jashtëzakonisht e madhe, në sistemin presidencial zvogëlohet në minimum ajo mundësi, pasi vota e sovranit (qytetarit) është vendimtare në përcaktimin e kaheve qeverisëse të vendit.

Sistemet presidenciale janë forma të paraqitjes së demokracisë reprezentative që dallohen nga sistemet e regjimit parlamentarë, pasi që tek këto forma fuqia politike mbi anën ekzekutive nuk paraqitet nga parlamenti por nga presidenti i shtetit të pavarur i cili është (do të jetë) edhe komandant suprem i Forcave të Armatosura të Republikës së Kosovës.

E veçanta e sistemit presidencial është zgjedhja e presidentit nga ana e popullit. I zgjedhuri e lidhë në vete funksionin e kryetarit të shtetit dhe të kryetarit të regjimit dhe nuk mund të shkarkohet nga këto detyra nga ana e parlamentarëve, pasi nuk ka veto parlamentare në këto sisteme qeverisëse.

Presidenti edhe pse nuk ka të drejtë iniciative për nxjerrjen e ligjeve, e ka të drejtën e vetos kundër parashtrimit të ligjit nga ana e parlamentarëve. Asnjë anëtarë i anës ekzekutive nuk ka drejtë të i takojë anës legjislative të sistemit në të njëjtën kohë.
Presidenti është fuqiplotë në anën ekzekutive dhe kontrolluese të institucioneve shtetërore.

Modeli francez i sistemit presidencial, i përshtatshëm për Kosovën

Parlamenti i Francës është legjislaturë dydhomëshe e formuar nga Asambleja kombëtare (Assemblée Nationale) dhe Senati. Deputetët e Asamblesë Kombëtare zgjedhen me votë për një mandat 5 vjeçar. Asambleja ka fuqi që të shpërbëjë kabinetin, kështu që shumica në Asamble vendosin për zgjedhjen e Qeverisë.
Senatorët zgjedhen nga një komision zgjedhor për një mandat 6 vjeçar , dhe gjysma e ulëseve vendosen me zgjedhje çdo 3 vjet. Fuqitë legjislative të Senatit janë të kufizuara; në një mosmarrëveshje midis dy dhomave, Presidenti i Francës, i cili njëkohësisht është dhe President i Shoqëris Franceze, i zgjedhur nga populli, me shumicën e tij.
Po që se në përzgjedhjen e parë, kandidatët nuk e arrijn shumicën, atëherë për përzgjedhjen e dytë nxirren vetëm kandidatët që kanë fituar shumicën nga përzgjedhja e parë.
Presidenti është kryetar i shtetit, është gardian i kushtetutës dhe e siguron aktivitetin e punëve publike dhe kontinuitetin e shtetit nëpërmjet fjalës gjykuese të tij.
Presidenti në marrëveshje me kryetarin e këshillit të ministrave (kryeministrin) dhe kryetarin e parlamentit (kryeparlamentarin)- mund të shpërbëjë parlamentin. Presidenti është kryekomandant i forcave të armatosura, kryeson marrëveshjet dhe kontratat ndërkombëtare dhe në raste të gjendjes së jashtëzakonshme është me fuqi plotë në gjitha aspektet pa kufizim.

Funksionimi i parlamentit në sistemin presidencial

Modeli francez i sisteminit presidencial qeverisës, i adaptuar për rrethanat e Kosovës do të ishte model i suksesshëm, i cili do të garantonte stabilitet politik dhe mirëqeverisje të vendit.
Përfaqësimi në parlament bëhet sipas fuqisë elektorale, e jo si deri më tani (me kontrabandim të deputetëve në Kuvend). Kompetencat ekzekutive i merr presidenti bashk me politikën e jashtme, ndërsa kryeministri merret më shumë me çështjet e brendshme organizative, si; Ministrinë e Punëve të Brendshme, pastaj Ministrinë e Arsimit, të Shëndetësisë, Kulturës , etj.
Sistemi presidencial garanton më shumë stabilitet qeverisës dhe pavarësi më të madhe për institucionet e pavarura në vend; si bie fjala; sistemin e drejtësisë (pavarësimin e plotë të prokuorive dhe gjykatave,…si dhe ajo çka është më kryesorja garanton pavarësi më të gjërë të institucioneve shtetërore edhe në raport me bashkësinë ndërkombëtare, gjegjësisht përfaqësitë diplomatike të akredituara në vendin tonë.

Republika Parlamentare, dështim i demokracisë

Sisemi parlamentar, gjegjësisht Republikat parlamentare nuk janë treguar të suksesshme në zgjidhjen e krizave politike paszgjedhore shkaku i polarizimit të skajshëm të skenës politike.
Probleme të kësaj natyre janë shfaqur dhe po vazhdojnë të manifestohen kriza të thella paszgjedhore edhe në shtetet më të zhvilluara si; Gjermania, Italia, etj,…e të mos flasim për Kosovën me një demokraci të brishtë paralamentare.
Jo vetëm për zgjedhjen e presidentit drejtëpërdrejt nga populli, por edhe për shumë arsye të tjera, legjislatura aktuale e Kuvendit të Republikës së Kosovës e ka për detyrë të themelojë një komision të pavarur (jasht) parlamentar, të përbër nga ekspert të fushës juridike për të ridizajnuar kushtetutën e vendit konformë kërkesave të kohës, për çuarjen para të proceseve demokratike dhe përmbylljen e sovranitetit të shtetit me formimin e ushtrisë-Forcave të Armatosura të Republikës së Kosovës.
Kushtetuta aktuale e bazuar në të ashtuquajturën “Pako e Ahtisarit”, është bërë pengesë serioze e formimit të ushtrisë dhe pengesë e vendimarrjes në Kuvend. Ndryshimi i ligjit, përkatësisht rregullimi i një ligji për heqjen e votës së dyfisht (vetos) të serbëve në parlament, i cili i largon përfundimisht vargonjët serb nga qafa e Kosovës.
Për më shumë se kaq, përfundimisht Kosova, “De Jure” dhe “De Facto” e merr formën e shtetit sovran, me organizimin e ri të Sistemit Presidencial në njërën anë dhe Forcat e Armatosura të Republikës së Kosovës në anën tjetër, shteti ynë do të bëhej partner i fuqishëm politik dhe ushtarak i Aleancës Veriatlantike, përkatësisht NATO-s dhe SHBA-së, si garantuesin më të fuqishëm të lirisë dhe pavarësisë së shtetit tonë.
Përfundimisht, sistemi presidencial i qeverisjes së vendit, do ta nxirrte Kosovën nga “çarku i mbyllur” politik. Kjo, përveqse do të pamundësonte kontrabandimin e postit të presidentit nga partitë politike vendore, do të pengonte edhe ndërhyrjet e tmerrshme nga jashtë, siq ishte rasti i zgjedhjes së presidentes përmes zarfit në vitin 2011, dukuri kjo e paprecendent në vendet e lira dhe demokratike!

Kryeministri i Kosovës, Ramush Haradinaj ka shprehur shqetësimin e tij pas arrestimit të ushtarit të FSK-së me përkatësi serbe, Millosh Shoshiq në vendkalimin kufitar në Konçul.

Përmes një postimi në Facebook, kryeministri ka njoftuar se Shoshiq është arrestuar të premten nga Policia Serbe.

Haradinaj ka thënë se një praktikë e tillë është në ”kundërshtim të plotë me të gjitha angazhimet që Qeveria e Kosovës, bashkë me bashkësinë ndërkombëtare, ka pasur në dy dekadat e fundit për integrim të plotë të komunitetit serb në institucionet e Kosovës.

Ramush Haradinaj

2 hrs ·

Presidenti i Kosovës, Hashim Thaçi, ka qëndruar në të njëjtën tavolinë me homologun e tij nga Serbia, Aleksandër Vuçiç, në kuadër të një takimi të udhëheqësve rajonalë, në Shkup.

Megjithatë, mes tyre nuk ka pasur shtrëngim duarsh. Kështu ka bërë të ditur presidenti serb.

Vuçiq ka thënë se Thaçit sot nuk ia dha dorën në Shkup, ndryshe nga herët e kaluara.

Megjithatë, presidenti serb ka thënë se është e rëndësishme të flitet për të ardhmen, pavarësisht raporteve të hidhura, të manifestuara sot.

Takimi në Shkup, u ka thënë ai gazetarëve, nuk ka qenë i lehtë – dhe se çështja kryesore për të cilën është diskutuar ka qenë qëndrimi i Beogradit dhe i Prishtinës.

Vuçiq ka treguar se ka pasur polemika me Thaçin. I pari i Serbisë ka thënë se Thaçi ka pohuar se Serbia nuk po e zbaton marrëveshjen për energjinë, që, sipas Vuçiqit, nuk ekziston.

Ai po ashtu ka thënë se Thaçit nuk i beson për asgjë. Vuçiq ka thënë se e di që Thaçi ka qenë i informuar për vizitën e zyrtarit serb, Marko Gjuriq, për arrestimin e të cilit më pas dha urdhër.

Përkundër të gjithave, ka thënë Vuçiq, Serbia duhet të vazhdojë dialogun me Kosovën.

“Do të ishte marrëzi e madhe nëse do ta mbyllnim derën e dialogut dhe të prisnim që diçka do të zgjidhej”, është shprehur presidenti serb. /Express/

Dje gjatë ditës pati spekulime se kryeministri i Kosovës, Ramush Haradinaj është ftuar të vizitojë Preshevën. E ndaj kësaj ka reaguar ashpër ministri i Brendshëm në Serbi, Nebojsha Stefanoviç.

Ai ka paralajmëruar arrestimin e Haradinajt nëse hyn në Preshevë.
“Gjykata jonë është përgjegjëse për të. Urdhri mbetet në fuqi dhe ai patjetër që do të arrestohet”, ka thënë Stefanoviç për Kurir.

Haradinaj akuzohet nga Serbia për “krime lufte”, për çfarë është liruar dy herë nga Haga.
Kryeministri i vendit ishte arrestuar vitin e kaluar në Colmar të Francës, por më pas u lirua.

Kërcënimet për arrestimin e Haradinajt vijnë sidomos pas arrestimit të Gjuriçit në Kosovë.

Presidenti i Kosovës, Hashim Thaçi, ka thënë se çështja e personave të zhdukur duhet të diskutohet në Bruksel, në dialogun që po zhvillohet në mes Prishtinës dhe Beogradit zyrtar, me ndërmjetësimin e Bashkimit Evropian.

Ai ka shprehur përkushtimin e tij si president i vendit që kjo temë të adresohet.

“Nuk do të rreshtin përpjekjet tona që kjo plagë e luftës të mbyllet sa më parë për të gjetur paqen, qetësinë dhe pajtimin”.

“Autoritetet e Beogradit duhet të përgjigjen dhe të ofrojnë të dhëna për 1650 të pagjeturit. Kjo çështje duhet të shtrohet edhe ne Bruksel sepse nuk pret më tutje, “ ka thënë presidenti Thaçi, pasi ka bërë homazhe tek përmendorja dedikuar personave të zhdukur në Ditën e të Pagjeturëve.

Presidenti i Kosovës, Hashim Thaçi e ka emëruar kryetare të Komisionit Qendror të Zgjedhjeve, Valdete Dakën, edhe për një mandat.

“Deklaroj solemnisht se do t’i kryejë detyrat e mia si kryetare e Komisionit Qendror të Zgjedhjeve në mënyrë të ndershme, besnike, të paanashme, profesionale dhe të ndërgjegjshme”, ka thënë Daka gjatë betimit të saj.

Mandati i kryetarit të KQZ-së është shtatëvjeçar që nga dita kur emërohet nga presidenti i vendit.

Ceremoni e rivarimit të shqiptarëve të vrarë nga forcat serbe në Krushë të Vogël. Mars, 2014

Në Gjykatën Themelore të Prizrenit, është ngritur aktakuzë nga Prokuroria Speciale e Kosovës kundër Darko Tashiq për krime lufte.

Në aktakuzë thuhet se Tashiq ka qenë pjesë e forcave paramilitare serbe në fshatin Krushë e Vogël, më 25-27 mars të vitit 1999.

“Akuzat ndërlidhen me një sulm në fshatin Krushë e Vogël i cili filloi më 25 mars 1999 nga forcat serbe, përfshirë policinë dhe paramilitarët, gjatë të cilit popullata civile i ishte nënshtruar vrasjeve brutale dhe të paligjshme, trajtimit çnjerëzor, vuajtjeve të rënda, ndërrimit të lokacionit dhe zhvendosjes, ushtrimit të masave të frikësimit dhe terrorit, konfiskimit/grabitjes dhe plaçkitjes së pronës, përdhosjes dhe shkatërrimit të trupave të viktimave të agresionit serb, të gjitha këto të kryera gjatë një periudhe dy-ditore”, thuhet në një deklaratë të Prokurorisë Speciale të Kosovës.

Gjatë sulmit në Krushë të Vogël, i cili zgjati dy ditë, u vranë 113 civilë.

Në nëntor të vitit 2017, i akuzuari Tashiq është arrestuar në bazë të një udhër-arresti ndërkombëtar pasi kishte tentuar të kalonte kufirin nga Serbia për në Kosovë dhe që nga ajo kohë ai është në paraburgim.

Më 9 maj, presidenti i Kosovës, Hashim Thaçi, pritet ta realizojë njërin nga takimet më të rëndësishme të karrierës së tij politike. Në këtë datë, ai do të pritet në Berlin, nga kancelarja gjermane, Angela Merkel.

Siç shkruan “klan kosova”, takimi mbahet me kërkesë të kësaj të fundit, dhe realizohet diku rreth orës 17 e 50.

Mësohet se kryetemë e bisedimeve do të jetë “finalja”e dialogut mes Kosovës dhe Serbisë. Qëndrimi gjerman është se negociatat mes dy shteteve të Ballkanit duhet të përfundojnë patjetër më 2019.

Çështja tjetër me shumë rëndësi që do ta diskutojnë gruaja më e fuqishme në botë dhe Thaçi është themelimi i paaltnernativë i Asociacionit të komunave me shumicë serbe – temë kjo e “nxehtë” në Kosovë.

Vizita e presidentit në Berlin nuk është thjesht vetëm një takim për çështje bilaterale.

Merkel ka ftuar Thaçin si pjesë e nismës së saj për të kontribuar në stabilizmin e Ballkanit. Me këtë takim dhe takimet paraprake, Gjermania po tregon se kush janë liderët në të cilët duhet llogaritur për stabilitet në regjionin e Ballkanit.

Jo më larg se dje (të mërkurën) kancelarja gjermane u takua edhe me kryeministrin shqiptar, Edi Rama.

Pas bisedave, Merkel deklaroi se Tirana zyrtare ka bërë progres ndërsa shtoi që do të vendoset në ditët në vijim sa i përket negociatave.

Dialogu Kosovë-Serbi ishte një temë tjetër e takimit të djeshëm në Berlin.

Më herët gjatë prillit gjermania pati edhe një takim me presidentin e Serbisë, Aleksandar Vuçiq.

Pas këtij takimi, kreu i shtetit serb tha se ka analizuar me Merkel pikë për pikë marrëveshjen e Brukselit.

“Nuk do ta kemi të lehtë në të ardhmen në agjendën politike për shkak të Kosovës, por unë jam i kënaqur me mirëkuptimin që kam marrë në Berlin”, kishte deklaruar ai pas takimit në Berlin.

Në ndërkohë, kancelarja gjermane, Angela Merkel kishte thënë se Serbia luan një rol kyç si në aspektin e Kosovës ashtu edhe të Bosnjë e Hercegovinës.

PRISHTINË – Presidenti i Këshillit Evropian (KE), Donald Tusk, deklaroi se dialogu ndërmjet Kosovës dhe Serbisë nuk ka alternativë tjetër të qëndrueshme për normalizim të marrëdhënieve.

Presidenti i KE-së, i cili po qëndron sot në Kosovë në kuadër të udhëtimit të tij në vendet e Ballkanit Perëndimor zhvilloi një takim me Presidentin e Kosovës, Hashim Thaçi.

Tusk, në një konferencë të përbashkët për media me presidentin e Kosovës rikonfirmoi mbështetjen e Bashkimit Evropian (BE) për perspektivën evropiane të rajonit.

Ai foli për qëllimin e vizitës së tij që ka të bëjë me përgatitjen e Samitit BE-Ballkani Perëndimor që do të mbahet në Sofje më 17 maj, ku tha se samiti duhet të përmirësojë lidhjet e BE-së me rajonin dhe ato brenda rajonit sa i përket transportit, energjetikës apo lidhjet digjitale.

Tusk theksoi se Kosova ka bërë një hap të rëndësishëm me ratifikimin e marrëveshjes për shënjimin e kufirit me Malin e Zi, sipas tij, për të iu afruar regjimit të liberalizimit të vizave. Ndërsa ai kërkoi që të ketë angazhim ndërpartiak dhe konsensus politik për interesin e Kosovës edhe në luftën kundër korrupsionit dhe krimit të organizuar. Ai tha se BE-ja i çmon lartë të arriturat e Kosovës për të cilat u shpreh se mund të shërbejnë si model edhe për fqinjët.

Sa i përket normalizimit të marrëdhënieve me Serbinë, Tusk tha se pa normalizim gjithëpërfshirës dhe pa zbatimin e plotë të marrëveshjeve nuk mund të ndryshojnë dhe përmirësohen marrëdhëniet me BE-në.

“Unë e di që kjo është një çështje e ngarkuar emocionalisht dhe shumë e vështirë për të dyja palët, por nuk ka alternativë tjetër të qëndrueshme për normalizimin. Në fakt bëhet fjalë për një vendim strategjik për të cilin jam 100 për qind i bindur që do të shpaguhet në afat të gjatë”, tha Tusk.

– Thaçi: Kosova ka nevojë për konkretizim të perspektivës evropiane

Ndërsa, Presidenti i Kosovës, Hashim Thaçi, tha se pret që Samiti i Sofjes të nxisë edhe një reflektim për rëndësinë strategjike të integrimit të Kosovës në BE.

“Ajo që është e qartë është se Kosova ka një nevojë urgjente për të përshpejtuar hapat drejtë anëtarësimit në BE. Kosova është e bekuar sepse reflekton një mbështetje qytetare masive në raport me BE-në dhe vlerave perëndimore. Mirëpo Kosova ka nevojë për konkretizim të perspektivës së vetë evropiane. Aspirata jonë minimale është që në një periudhë sa më të shkurtër të marrim statusin e vendit kandidat për anëtarësim në BE, tha presidenti Thaçi.

Sa i përket procesit të dialogut për normalizimin e marrëdhënieve ndërmjet Kosovës dhe Serbisë të lehtësuar dhe udhëhequr nga BE-ja, Thaçi tha se Kosova është e përkushtuar për zbatimin e marrëveshjeve të arritura deri më tani. Ai theksoi se po ashtu janë të përkushtuar edhe për lëvizjen drejtë një marrëveshjeje përfundimtare të obligueshme ligjërisht që do të mundësojë njohje reciproke dhe integrim më të shpejtë edhe për Kosovën edhe për Serbinë në familjen evropiane.

Thaçi bëri të ditur që dialogu me Serbinë do të jetë një nga çështjet më të rëndësishme që do të diskuton në takimin me Kancelaren e Gjermanisë, Angela Merkel në Berlin, më 9 maj, në Ditën e Evropës.

Tusk vizitoi Prishtinën pas vizitave të tij në Beograd, Tiranë dhe Podgoricë me qëllim të përgatitjes së samitit BE-Ballkani Perëndimor që do të mbahet në Sofje më 17 maj.

Kryeministri i Kosovës, Ramush Haradinaj priti në një takim aktivisten për të drejtat e njeriut, Natasha Kandiq dhe e nderoi atë me një çmim.

“Të veprosh në një mjedis të pasigurt dhe të mos i ndash viktimat e dhunës sipas përkatësisë, por të kërkosh drejtësi për to, është jo vetëm humanizëm i pashoq, por edhe guxim qytetar e njerëzor”, ka thënë Haradinaj në një postim në Facebook pasi i ka dorëzuar asaj “Hartën e Artë të Kosovës”.

Kryeministri Haradinaj, ka falënderuar aktivisten Natasha Kandiq për punën e saj që ka bërë në lidhje me evidentimin e të vrarëve dhe të zhdukurve gjatë luftës në Kosovë dhe ka theksuar se këto të dhëna janë më të sakta deri më tash.

Kandiq ka themeluar Qendrën për të Drejtën Humanitare në vitin 1992 për të dokumentuar shkeljen e të drejtave të njeriut që janë bërë gjatë luftërave në ish Jugosllavi.

Dy kongresmenë amerikanë kanë nominuar Kandiq për çmimin Nobel për Paqe për vitin 2018.

Portali propagandistik rus në gjuhën serbe “Sputnik” ka publikuar një video-parodi të intervistës së kryeministrit të Kosovës Ramush Haradinaj për televizionin serb Hepi.

Intervista origjinale e Haradinajt për televizionin serb shkaktoi reagime të shumta në Serbi. Ndër ata që shprehën revoltën ishte edhe presidenti serb Aleksandër Vuçiç, i cili tha se s’e kupton se si, përderisa asnjë medium kosovar nuk dëshiron ta dëgjojë se ç’ka për të thënë ai, një televizion serb bën intervistë me Haradinajn. Në këtë intervistë Haradinaj foli edhe për fenë, duke cekur se në të kaluarën shqiptarët kanë qenë katolikë, gjë që shkaktoi reagime të shumta edhe nga islamistët në Kosovë.

Vetëm brenda një harku kohor prej 10 ditësh pushtetarët abuzuan dy herë me vlerat e lirisë, përkatësisht me gjakun e dëshmorëve të lirisë sonë, dhe atë me dy figurat më markante të luftës çlirimtare të vijës institucionale, Agim Ramadani dhe Sali Çekaj të rënë poashtu në betejën më të lavdishme dhe kuptimplote, të thyerjes së kufirit shqiptaro-shqiptarë.
Brenda këtij 10 ditshi u thye dy herë LDK-ja nën bekimin e pseudo-veteranëve, gjeneralëve të (turpëruar) graduar dhe drejtuesve të këtij subjekti të nënshtruar nga pushtetarët aktualë!
Përderisa Sali Çekaj rrugët me Serbinë i ndau 28 vite më parë, janë liderët shtetëror të Kosovës po kërkojnë me çdo kusht ribashkimin e tyre!
Serbia, falë liderëve të korruptuar dhe tejinkriminuar shtetërorë, përveq rehabilitimit të plotë për krimet e bëra në Kosovë, mbase një ditë mund të bejë edhe padi kundër Kosovës për krime kundër serbëve, pasi që pala kosovare për 19 vjet rresht nuk arriti të ngritë asnj padi kundër Serbisë për gjenocidin e kryer në Kosovë!

Nderim apo hipokrizi!?

E kam thënë dhe po e përserisë prapë, liderëve shetërorë që i shkojnë në pëqafim Vuçiqit e Daçiqit është dashur t’u ndalohet pjesëmarrja në manifestimet përkujtimore të dëshmorëve të lirisë sonë, e assesi t’u lejohet të llomotitin si gramafona të prishur dhe të derdhin lot krokodili për të rënët në betejat e lavdishme!
Të nderosh pjestarët e një formacioni ushtarak dhe në anën tjetër të mohosh ekzistencën e atij formacioni, është njësojë sikur të flasësh për luftën e të mos njohësh heronjët e saj dhe anasjelltas!
Ata që mohojnë ekzistencën e FARK-ut, e kanë të vështirë t’i nderojnë dhe respektojnë pjestarët e saj! Kjo u dëshmua edhe në Akademinë Përkujtimore për heroin Sali Çekaj. Në momentin kur djali i heroit, Hysen Sali Çekaj foli me pietet të lartë për FARK-un, shpërthyen duartrokitjet e gjata nga të pranishmit në sallë, po citoj: “Ndonëse, në asnjë menyrë nuk duam si familje, të ndahem nga principi jonë i hekurt, që mos të perzihem në çështjet, sidomos politike, nuk di si duhet të ndihem unë, nena, motrat kur ndëgjojmë, ne televizionet e Kosovës, nga njerëz të pa skrupult që na thonë që pjestart e FARK-ut qenkan strehur “neper therra” e “neper hotele” gjatë luftës!
Si paska atëherë mundesi që Sali Çekaj, i cili, edhe në prezencë të familjarëve tonë, ka deklaruar haptas se ishte ushtar i UÇK-se nën Komanden e FARK-ut dhe Ministrisë së Mbrojtjes së Kosovës, të këtë gjetur vdekjen nga plumbi serb në rras të Kosharës?!”, përfundon citati.

Të vetmit që mbetën të hutuar dhe qëndruan të strukur, ishin presidenti Thaçi dhe kryeministri Haradinaj, të cilët u ndanë si “dy dele të zeza” në mesin e qindra pjesmarrëseve në sallë, duke e përcjellur në heshtje momentin më kulmor të kësaj Akademie Përkujtimore!

Në këtë rast, pashmangshem shtrohet pyetja; “Pse ishin aty Hashim Thaçi e Ramush Haradinaj, kur i pengon heroizmi i betejës më të lavdishme të luftës çlirimtare nën komandën e FARK-ut, e cila rezultoj me thyerjen përfundimtare të kufirit shqiptaro-shqiptarë”?!
Kjo përveq imoralitetit, e dëshmon se këta dy lider politikë nuk e kanë as një fije respketi për të vdekurit dhe akoma më pak për të gjallët, për nënat, baballarët, vllëzërit dhe motrat, gratë e veja dhe fëmijët jetim të dëshmorëve të Betejës së Kosharës.
Sikur të kishin pasur vetëm pak ndërgjegje dhe respekt për dëshmorët e Betejës së Kosharës, së paku një herë për këto 19 vjet do duhej të kishin vizituar familjet e dëshmorëve dhe invalidëve të kësaj beteje të lavdishme të luftës çlirimtare.
Kjo është dëshmia më e mirë se injorimi i betejave të lavdishme të drejtuara nga oficierët e karrierës dhe intelektualët më të spikatur është zavendësuar qëllimshëm me figura të improvizuara të betejave të humbura, gjë e cila ka çuar në tjetërsimin e vlerave të luftës çlirimtare!
Megjithatë, për “ruajtjen” e balancit në Akademinë Përkujtimore për heroin Sali Çekaj, ishte përkujdesur bashkëluftëtari i Sali Çekaj, Agimit Ramadani e Xhemajl Fetahaj, komandanti Hysen Berisha i cili në fjalimin e tij edhe pse “rrugëtoi” nëpër ngjarje historike, nuk gjeti “kohë” të permend as për një moment ekzistencën e FARK-ut!
Pjesë nga fjalimi i tij, po citoj:”Përpjekjet e Sali Çekaj për Republikën e Kosovës, shtet i pavarur e sovran kishin filluar vite më parë. Deçanit ia kishte dhuruar Statutin e Komunës nacionale moderne, mbështetur në Kushtetutën e Kaçanikut.
Po me të njëjtin intensitet po punonte dhe po vepronte në krijimin e kapaciteteve të armatosura për një luftë çlirimtare të cilën Sali Çekaj e kishte si opsion jashtë kancelarik, bazuar po në Kushtetutën e Kaçanikut”. Këta ishin të vetmit rreshta fundamental për Sali Çekaj të potencuar nga komandant Hysen Berisha!

FARK-u shpëton Republikën e Kosovës nga aneksioni i ri serb

Nuk është krejt gjë e parëndësishme emërtimi dhe përmbajta e ushtrisë së ardhshme të Kosovës. Përkundrazi në këtë rast emërtimi e përcakton përmbajtjen dhe ardhmërinë e shtetit të Kosovës.
FAK-u, Kosovën e përcakton vetëm si një territor të papërcaktuar apo “koloni” të Serbisë sipas rezolutës 1244 të OKB-së të administruar nga ndërkombëtarët.
Ndërsa FARK-u , si forcë mbrojtëse e Republikës së Kosovës, vulosë përfundimisht sovranitetin dhe integritetin territorial të shtetit,…nesër do të zavëndëson KFOR-in, EULEX-in dhe organizatat tjera mbrojtëse dhe administruese ndërkombëtare në Kosovë.
Përderisa FAK-u mund të jetë vetëm një mjet në duart e ndërkombëtarëve, për përdorimin e pjestarëve të saj në luftërat e ndryshme në vendet aziatike, në emër të forcave “paqeruajtëse”, ku bijtë më të mirë të kombit tonë do të bien “kurban” për interesa të fuqive të mëdha, pa i bërë nderë vendit dhe kombit të vet!
Projekti i Rugovës për shtetin e Kosovës, çdo herë ka qenë pëngesë e armiqëve, pushtuesve verior të vendit tonë, çarqeve ndërkombëtare dhe i disa mjeranëve apo më mirë të themi i injorantëve politik në Kosovë.
Ideja e presidentit historik Ibrahim Rugova, arkitetktit të shtetit tonë për FARK-un, ishte ide pragmatike, i cili në projektin shtetndërtues të Kosovës, pas afatit të paraparë (të protektoratit trevjeqar ndërkombëtar),….fatin e sigurisë së vendit ta merrë në dorë FARK-u, ushtria e Kosovës e mbështetur me logjistikë ushtarake nga forcat e NATO-s dhe SHBA-të.
Me transformimin e FSK-së në FAK do të kënaqen në radhë të parë orekset e Beogradit dhe Brukselit, përmes të cilit Kosova nuk do të njihet si Republikë e pavarur por vetëm si territor i mbikëqyrur ndërkombtarisht, i cili Kosovën e dërgon në “FUCKS EVERYONE”, duke ruajtur sovranitetin e Serbisë mbi Kosovë sipas Rezolutës 1244 të Këshillit të sigurimit të OKB-së.
Pak qytetarë të Kosovës e dinë se bisedimet në Bruksel nuk nuk janë duke u zhvilluar mes dy shteteve të barabarta, shkaku i gënjeshtrave të liderëve shtetëror, këtyre mjeranëve politik që për interesa personale (përfitime materiale) pranuan të ulen në bisedime jo si palë të pabarabarta por me Fusnotë * sipas Rezolutës 1244, duke shkelur mbi interesat e popullit dhe shtetit të Kosovës, duke shkelur mbi gjakun e mijëra dëshmorëve të lirisë.
A ka gënjeshtër më të madhe, a ka mjerim dhe tradhëti më të madh politik se kjo; të thuhet se po bisedojmë si dy shtete të pavarura, kur Serbia nuk na njehë dhe as që e ka ndërmend t’na pranoj si shtet, dhe të pranohet Brukseli si ndërmjetësues dhe palë negociuese njëkohësisht, i cili poashtu nuk e njehë ekzistencën e shtetit tonë, i cili në emër të “neutralitetit” ndaj statusit të Kosovës është duke e ndihmuar rikthimin e Serbisë në Kosovë.
Rikthimi i Serbisë në Kosovë nuk ka “brina” siq thotë populli, por nga fillimi i biesdimeve në Bruksel e deri në ditët e sotme, ka ndodh shtrirja gjeografike dhe politike e Serbisë jo vetëm në veri, por edhe në brendi të Kosovës.
Serbia është bërë vendimarrëse për të gjitha zhvillimet në Kosovë; për zgjedhjet, për decentralizimin etnik, trashëgiminë kulturore, për sistemin e drejtësisë, demarkacionin, asociacionin, gjykatën speciale e deri në bllokimin e formimit të ushtrisë së Kosovës.
Së fundmi, Panairi i Përgjithshëm Ndërkombëtar “Prishtina 2018”, i organizuar nga Oda Ekonomike e Kosovës (OEK), përveqse shpërfaqi realitetin e hidhur të krijuar në Kosovë, është argumenti më i fuqishëm i cili dëshmon kahet e gabuara të politikës kosovare në 10 vjetshin e fundit dhe jo vetëm kaq!