Mbi 6 mijë emigrantë janë shpëtuar në dy ditët e fundit, në Detin Mesdhe kanë thënë zyrtarët e Bashkimit Evropian dhe të flotës italiane.

Roja bregdetare italiane ka thënë se rreth 3 mijë persona janë shpëtuar më 6 maj, pothuajse numër i njëjtë i emigrantëve të shpëtuar më 5 maj.

Roja bregdetare ka thënë se flota italiane, agjencia e BE-së, Frontex dhe disa organizata joqeveritare kanë marrë pjesë në operacionet e shpëtimit.

Disa prej emigrantëve të shpëtuar janë dërguar në Itali, ndërkaq 730 emigrantë, në një anije të Mjekëve pa Kufi, janë nisur po ashtu drejt brigjeve italiane.

Roja bregdetare libiane i ka thënë agjencisë Associated Press se ka shpëtuar 170 emigrantë më 6 maj por nuk ka mundur që të shpëtojë më shumë emigrantë për shkak të mungesës së burimeve.

Italia dhe Libia kanë bashkëpunuar në përpjekjet për të shpëtuar emigrantët, të cilët po marrin rrugën e rrezikshme detare për të arritur në Evropë.

Ogranizata ndërkombëtare për Emigrantë, ka thënë se 43,490 emigrantë kanë arritur në Evropë përmes detit, që prej 26 prillit.

Zyrtarët thonë se rreth 1 mijë emigrantë kanë vdekur këtë vit, ndërkaq mbi 4 mijë e 500 emigrantë, kanë vdekur ose konsiderohen të zhdukur dhe ka frikë se janë mbytur më 2016.

Presidenti i Komisionit Evropian, Jean Claude Juncker, tha në një konferencë në Itali se “anglishtja është duke humbur rëndësinë në Evropë”.

Pas tensioneve me Britaninë, për shkak të negociatave për daljen e saj nga BE-ja, Juncker tha se do ta mbajë fjalimin në Firence në frëngjisht.

“Ngadalë, por me siguri, anglishtja po e humb rëndësinë në Evropë. Franca po ashtu mban zgjedhje”, tha ai, duke shpjeguar përse ka zgjedhur të flasë frëngjisht.

Juncker e cilësoi vendimin e Britanisë për të lënë BE-në si “tragjedi”.

Komentet e tij për gjuhën janë përcjellë me të qeshura dhe duartrokitje.

“Do të negociojmë në mënyrë të drejtë me miqtë britanikë, por mos të harrojmë se nuk është BE ajo që po braktis Britaninë, por Britania po braktis BE-në dhe këtu është dallimi”, tha Juncker.

Kryeministrja britanike, Theresa May, ka akuzuar disa zyrtarë evropianë se po bëjnë përpjekje të ndërhyjnë në zgjedhjet parlamentare në Britani, të cilat do të mbahen më 8 qershor.

Bashkimi Evropian ka 24 gjuhë zyrtare.

Para se t’i bashkohej Britania më 1973, frëngjishtja ishte gjuha kryesore në BE.

Kandidatët për president të Francës u përplasën në një debat televiziv, të mërkurën mbrëma, duke fyer dhe kritikuar njëri-tjetrin për çështje si: anëtarësia në Bashkimin Evropian, lufta kundër terrorizmit dhe marrëdhëniet me Rusinë.

Debati u zhvillua derisa sondazhet e opinionit nxirrnin kandidatin e qendrës, Emmanuel Macron, në kryesim të fortë, me 20 përqind, përballë kandidates së ekstremit të djathtë, Marine Le Pen.

Le Pen përmendi rolin e Macronit si ish-bankier investues, tha se favorizon “uberizimin” e ekonomisë dhe “globalizimin e egër”.

“Zgjedhja politike që duhet të bëjë populli francez është e qartë. Macron është kandidat i globalizimit të shfrenuar, i ‘uberizimit’ të shoqërisë, pasigurisë, brutalitetit social, luftës së secilit kundër secilit”, tha Le Pen.

Macron kritikoi politikën e saj për të braktisur euron, duke e cilësuar si plan “të rrezikshëm” dhe “fatal”.

“Vizioni im është të ndërtojmë një euro të fuqishme, të ndërtojmë politika të fuqishme evrpiane, me të cilat do të ngrihemi për interesat e Francës”, tha Macron.

Shkëmbimet kanë kaluar edhe në personale: Macron e quajti Le Penin “parazite” dhe “priftëreshë e frikës”, ndërsa Le Pen e quajti atë “bankier të vetëkënaqur”.

Le Pen tha se Macron nuk brengoset për ekstremizimin islamik dhe se ai do ta lejojë Bashkimin Evropian të udhëheqë me Francën.

“Çfarëdo që ndodh, Franca do të udhëhiqet nga një grua: ose unë, ose zonja Merkel”, tha Le Pen duke iu refereuar kancelares gjermane.

Macron tha se politikat e Le Penit për përjashtimin e migrantëve dhe myslimanëve do të ishin në interes të terroristëve, do t’i kthenin francezët kundër njëri-tjetrit dhe do të çonin në “luftë civile”.

Dy kandidatët dallojnë shumë edhe në marrëdhëniet me Rusinë.

Macron tha se do të bëjë përpjekje të punojë me presidentin rus, Vladimir Putin, për të zgjidhur çështje rajonale si konfliktet në Siri dhe Ukrainë, porse përtej kësaj, nuk beson se Franca dhe Rusia ndajnë të njëjtat “vlera dhe prioritete”.

Le Pen, e cila ka bërë fushatë për riafrim me Rusinë, tha se është politikania me pozicionin më të mirë për të biseduar me Rusinë, Shtetet e Bashkuara nën presidentin Donald Trump, ose Britaninë, e cila po përgatitet të largohet nga Bashkimi Evropian.

“Nuk kemi arsye të jemi në Luftë të Ftohtë me Rusinë”, tha Le Pen.

Rrethi i dytë i zgjedhjeve presidenciale në Francë do të mbahet më 7 maj.

Përgatiti: Valona Tela

Autoritetet e rendit në Paris thanë se një polic është vrarë dhe dy të tjerë janë plagosur nga të shtënat në bulevardin Champs-Elysees.

Një sulmues po ashtu u vra nga policia, mbrëmjen e së enjtes.

Presidenti i Francës, Francois Hollande, tha se është i bindur se sulmi “është i lidhur me terrorizmin”.

Grupi militant Shteti Islamik tha se një prej “luftëtarëve” të tij ka kryer sulmin, raporton agjencia e lajmeve Reuters.

“Ekzekutuesi i sulmit në zonën Champs-Elysees, në qendër të Parisit, është Abu Jusuf al-Beljiki dhe ai është një luftëtar i Shtetit Islamik”, tha agjencia e lajmeve Amaq, e lidhur me grupin ekstremist.

Prokurori i Parisit, Francois Molins, më vonë tha se “identiteti i sulmuesit është i njohur dhe është verifikuar”.

“Nuk do ta zbuloj atë, sepse hetimet dhe bastisjet tashmë janë duke u zhvilluar”, tha Molins.

Pamjet televizive tregojnë makina të policisë dhe helikopterë mbi bulevardin Champs-Elysees.

Autoritetet u bënë thirrje njerëzve që të shmangin zonën ku ndodhi sulmi, ndërsa nisën hetimet anti-terrorizëm.

Autoritetet po ashtu thanë se kanë nisur kërkimet në shtëpinë e sulmuesit të vrarë në lindje të Parisit, i cili ishte i njohur për shërbimet e sigurisë.

“Oficerët u sulmuan qëllimisht”, tha zëdhënësi i ministrisë së Brendshme të Francës, Pierre-Henry Brandet, për kanalin e lajmeve BFMTV.

Mijëra trupa dhe policë të armatosur janë vendosur nëpër pikat kryesore turistike, si bulevardi Champs Elysees dhe caqet e tjera potenciale si ndërtesat qeveritare dhe lokacionet fetare.

Trump: “Duket si një tjetër sulm terrorist”

Presidenti i Shteteve të Bashkuara, Donald Trump, reagoi dhe tha se është “e tmerrshme” ajo që po ndodh në botë.

“Para së gjithash, ngushëllime për popullin e Francës. Po ndodh sërish. Është një gjë e tmerrshme. Është një gjë shumë e tmerrshme ajo çfarë po ndodh në botë sot. Duket si një tjetër sulm terrorist. Çfarë mund të thuash? Thjesht, nuk përfundon kurrë. Duhet të jemi të fortë, duhet të jemi vigjilentë dhe e kam thënë këtë për kohë të gjatë”, tha Trump.

Franca është në gjendje të jashtëzakonshme, për shkak të sulmeve terroriste në territorin e saj, të cilat, qysh në vitin 2015, kanë lënë të vrarë mbi 230 njerëz.

Të shtënat, të enjten mbrëma, ndodhën në të njëjtën ditë kur kandidatët për president të Francës bënë apelet e fundit te votuesit.

Rrethi i parë i zgjedhjeve presidenciale në Francë do të mbahet të dielën.

Përgatiti: Valona Tela

Autoritetet gjermane kanë thënë se kanë arrestuar një person me shtetësi gjermane dhe ruse, nën dyshimin se ka kryer sulmin me bombë të javës së kaluar, ndaj autobusit të një ekipi të futbollit.

Prokurorët federalë kanë thënë se personi i arrestuar, i identifikuar si 28-vjeçari Sergej W., është arrestuar më 21 prill në afërsi të qytetit jugperëndimor të Tuebbingen dhe është akuzuar për tentim vrasje, kryerje të shpërthimit dhe për lëndime të rënda trupore.

Tre bomba shpëthyen pranë autobusit të ekipit Borussia Dortmund, jashtë qytetit të Dortmundit më 11 prill, teksa lojëtarët ishin nisur drejt stadiumit për të zhvilluar një lojë në Ligën e Kampionëve. Nga këto shpërthime u lëndua një futbollist dhe një zyrtar policor.

Prokurorët kanë thënë se i dyshuar shpresonte që të shkaktojë rënien e çmimit të aksioneve të ekipit të futbollit.

Franca tha se ka arrestuar dy persona për planifikim të një “sulmi të dhunshëm” në prag të zgjedhjeve presidenciale.

Ministri i Brendshëm i Francës, Matthias Fekl, tha se “dy personat e radikalizuar, të lindur në vitin 1987 dhe 1993, kanë shtetësi franceze” dhe se janë arrestuar sot në qytetin Marsej.

Fekl tha se siguria rreth zgjedhjeve dhe kanidatëve është përforcuar.

Rrethi i parë i votimeve do të mbahet më 23 prill.

Kandidatja e ekstremit të djathtë, Marine Le Pen, dhe kanidati i qendrës, Emmanuel Macron, kryesojnë sondazhet.

Kandidatja e ekstremit të djathtë për presidente të Francës, Marine Le Pen, tha se do të pezullojë gjithë emigrimin e ligjshëm në Francë.

Le Pen tha në një tubim se dëshiron të ndalojë “një situatë të çmendur dhe të pakontrolluar”.

Më pas, shtoi ajo, Franca do të vendosë “rregulla shumë më drastikë” për migrimin, “më të arsyeshëm, më njerëzorë dhe më të menaxhueshëm”.

Sondazhet e opinionit e nxjerrin Le Penin në garë të ngushtë me kandidatin e qendrës, Emmanuel Macron.

Rrethi i parë i zgjedhjeve presidenciale në Francë mbahet të dielën.

Gjermania i ka bërë thirrje qeverisë turke që të angazhohet për “dialog me të gjitha partitë politike dhe forcat e shoqërisë civile në vend”, pas “rezultatit të ngushtë në referendumin, që tregon se sa e ndarë është shoqëria turke”.

Kancelarja gjermane Angela Merkel dhe ministri i Jashtëm, Sigmar Gabriel, në një deklaratë të përbashkët, kanë thënë se qeveria gjermane respekton të drejtën e popullit turk për të vendosur për Kushtetutën e tyre.

Por dy liderët gjermanë kanë thënë gjithashtu se presidenti turk, Recep Tayyip Erdogan bartë “përgjegjësi të madhe”, për hapat e mëtejshëm të shtetit.

Ata kanë theksuar edhe shqetësimet e shprehura nga OSBE-ja, më herët gjatë javës së kaluar, lidhur me dyshimet se nëse kushtet për votim ishin të drejta. Merkel dhe Gabriel kanë thënë se Turqia, që është anëtar i OSBE-së dhe vend kandidat për anëtarësim në Bashkimin Evropian, duhet të marrë parasysh këto shqetësime.

NATO-ja e ka aktivizuar një batalion të ri shumëkombësh në Poloni, afër kufirit me Kaliningradin e Rusisë, derisa presidenti i Polonisë, ka vlerësuar se ky ishte “një moment historik”, për vendin e tij.

Zyrtarët thanë dje se batalioni ishte stacionuar afër vendit Orzyzh, 60 kilometra nga kufiri me Kaliningradin, që është një territor rus i ndarë nga Rusia, në Detin Baltik.

Kjo njësi do të jetë nën komandën e Shteteve të Bashkuara dhe do t’i ketë afro 1 mijë ushtarë, përfshirë pjesëtarët nga Rumania dhe Britania, ndërsa pritet që ushtarët nga Kroacia do të bashkohen më vonë.

Aleanca veriatlantike po e forcon praninë e saj në pjesën lindore të Evropës, për t’i siguruar aleatët në periudhën e një vetëbesimi të rritur të Rusisë, pas aneksimit ilegal të Krimesë së Ukrainës dhe mbështetjes së Moskës për separatistët në pjesën lindore të Ukrainës.

Ministri i Jashtëm gjerman, Sigmar Gabriel, e fillon sot vizitën e tij dyditëshe në Serbi dhe Kosovë, për të diskutuar lidhur me rritjen e tensioneve në raportet ndërmjet dy palëve.

“Ne shohim se disa plagë të së kaluarës ende janë të thella dhe ende i mbajnë tensionet e larta”, tha sot Sigmar Gabriel, para se të nisej për në Beograd.

Ai theksoi se do të angazhohet zëshëm në “mbështetje të zhvillimit demokratik dhe sundimit të ligjit” në të gjitha vendet e rajonit.

Kosova e banuar me popullatë shumicë shqiptare, në vitin 2008 e ka shpallur pavarësinë dhe është njohur nga 114 shtete anëtare të Kombeve të Bashkuara. Por Serbia dhe aleati i saj, Rusia, nuk e kanë njohur shtetësinë e Kosovës.

Aktualisht, tensionet ndërmjet Serbisë dhe Kosovës dhe ndërmjet institucioneve qendrore të Kosovës dhe minoritetit serb brenda Kosovës, janë ende të larta.

Gjatë turneut të filluar sot, ministri i jashtëm gjerman, Sigmar Gabriel, do ta vizitoj edhe Shqipërinë më 16 të këtij muaji.

Duke u shprehur për perspektivën e integrimit të vendeve të Ballkanit Perëndimor në Bashkimin Evropian, zoti Gabriel theksoi se do tu thotë liderëve të rajonit se “rruga kah BE-ja mbetet e hapur, nëse ju i zgjedhni reformat dhe progresin e jo ndarjet dhe ngecjen”.

Autoritetet e Gjermanisë thonë se tri eksplodime kanë ndodhur dje afër autobusit ku gjendeshin futbollistët e ekipit, Borusia Dortmund.

Shefi ekzekutiv i klubit, Hans-Joachim, tha se mbrojtësi spanjoll i ekipit, Marc Bartra, është lënduar dhe ishte dërguar në spital.

Bashkëlojtarë të tij u thanë mediave zvicerane se ai ishte “goditur nga copat e xhamave të thyer”.

Policia tha se indikimet e para janë se ky ishte “sulm me pajisje serioze eksploduese”.

Në fotografitë e autobusit nga vendi i ngjarjet shihen dritaret e thyera të autobusit.

Një letër, me të cilën merret përgjegjësia, është gjetur afër vendit të eksplodimeve, ka thënë prokurorja, Sandra Leucke, por pa dhënë detaje të tjera.

Incidenti ka ndodhur në vendin Hoeshten, afër qytetit Dortmund, derisa ekipi ishte nisur për takimin gjysmëfinal të Kupës së Kampionëve kundër Monakos.

Ndeshja është shtyrë për sot, ka njoftuar klubi.

Dhjetëra mijëra njerëz kanë marshuar dje rrugëve të kryeqytetit Budapest në Hungari, për të protestuar kundër legjislacionit të ri, i cili mund ta detyroj një unviersitet të financuar nga miliarderi amerikan, George Soros, që të largohet nga Hungaria.

Demonstruesit kanë kërkuar nga presidenti i Hungarisë, Janos Ader, që të mos e nënshkruajë një legjislacion lidhur me këtë çështje dhe ta dërgoj atë në Gjykatën Kushtetuese.

Më 4 prill, parlamenti i Hungarisë e ka miratuar këtë ligj, i cili kërkon që universitetet e jashtme në Hungari ta kenë kompleksin e tyre dhe në vendet e tyre të origjinës të kenë kurse të ngjashme.

Shumë persona në Hungari mendojnë se ky legjislacion e ka në shënjestër Universitetin e Evropës Qendrore (CEU) në Budapest, të cilin qeveria nacionaliste e kryeministrit, Viktor Orban, e sheh si qendër të fuqishme të opozitës liberale.

Sipas legjislacionit, CEU do të mund të detyrohej të mos pranonte studentë në vitin 2018 dhe përfundimisht të mbyllej në vitin 2021.

Policia e Suedisë tha sot se një person i arrestuar për “dyshim për krim terrorist”, po ashtu, është i dyshur se ishte shofer i kamionit, që dje u përplas në turmën e njerëzve në pjesën qendrore të Stokholmit, duke i vrarë katër vetë dhe plagosur 15 të tjerë.

“Ne konsiderojmë se personi i arrestuar është i dyshuar se e kishte kryer” sulmin, tha zëdhënësi i policisë në Stokholm, Lars Bystrom.

Ky person ishte arrestuar dje në një lagje veriore të Stokholmit.

Radioja publike suedeze dhe gazeta, Aftonbladet, kanë raportuar se i dyshuari në paraburgim është një person 39 vjeçar me origjinë nga Uzbekistani.

Duke cituar burime policore, transmetuesi suedez, SVT, ka raportuar se ishte arrestuar edhe një person tjetër, por policia nuk ka bërë komente lidhur me këtë çështje .

Autoritetet e Stokholmit thanë sot herët në mëngjes se gjashtë persona të plagosur janë liruar nga spitali, ndërsa tetë vetë të tjerë dhe një fëmijë, ende mbeten në spital.

Parlamenti Evropian e ka miratuar liberalizimin e vizave për shtetasit e Ukrainës.

Në votimin e sotëm për këtë masë ishin 521 ligjvënës evropianë, 75 ishin kundër, ndërsa 365 të tjerë abstenuan.

Që kjo masë të bëhet e plotfuqishme nevojitet që edhe vendet anëtare të Bashkimit Evropian ta miratojnë atë.

Ambasadorët e shteteve anëtare të BE-së pritet që këtë marrëveshje ta miratojnë në mbledhjen e 26 prillit në Bruksel, derisa burime të BE-së i kanë thënë Radios Evropa e Lirë se ministrat e shteteve anëtare të BE-së, pastaj më 11 maj, do ta vërtetojnë vendimin e ambasadorëve.

Diplomatët thanë se presin që regjimi i udhëtimit pa viza për shtetasit e Ukrainës do të bëhet i plotfuqishëm në mes të muajit qershor.

Ambasadorët e vendeve të NATO-s dhe të Rusisë janë mbledhur në selinë e aleancës në Bruksel, për sesionin e parë të Këshillit NATO-Rusi për vitin 2017.

Bisedimet e sotme pritet të përqendrohen në konfliktin në lindje të Ukrainës, situatën e sigurisë në Afganistan dhe mënyrat për reduktimin e rreziqeve ushtarake në Evropë.

“Për mua, ky është një hap i rëndësishëm drejt gjërave më të parashikueshme, drejt transparencës më të madhe, e cila është veçanërisht e nevojshme tani, kur kemi rritje të aktivitetit ushtarak përgjatë kufijve tanë”, tha sekretari i përgjithshëm i NATO-s, Jens Stoltenberg.

Sesioni i Këshillit NATO-Rusi pason tri mbledhje të ngjashme vitin e kaluar.

Ai vjen një ditë para takimit të ministrave të Jashtëm të aleancës, ku do të marrë pjesë edhe Sekretari amerikan i Shtetit, Rex Tillerson.

NATO ka pezulluar gjithë bashkëpunimin praktik me Rusinë pasi Moska ka aneksuar Krimenë në vitin 2014, porse kanalet politike kanë mbetur të hapura përmes Këshillit.

Sulmues të paidentifikuar raportohet se kanë hapur zjarrë në konsullatën e Polonisë në qytetin veriperëndimor Lutsk në Ukrainë, mëngjesin e sotëm.

Nga sy sulm është dëmtuar çatia e konsullatës dhe janë thyer xhamat.

Duke cituar dëshmitarë nga vendi i ngjarjes, portali Volyn24 ka raportuar se incidenti ka ndodhur në orët e hershme të 29 marsit, menjëherë pas mesnatës.

Nga ky incident nuk raportohet për të lënduar.

Policia në vendin e ngjarjes ka gjetur një granata hedhës, raporton një televizion ukrainas.

Ministri i Jashtëm i Ukrainës, Pavlo klimkin ka shprehur indinjatën e tij për këtë sulm, duke e quajtur “akt të shëmtuar i atyre që kundërshtojnë miqësinë tonë me Poloninë”.

Klimikin po ashtu ka shkruar në Tëitter se autoritetet ukrainase janë të përkushtuara për të gjetur dhe dënuar sulmuesit.

Ndaj gruas së kandidatit për president të Francës, Francois Fillon kanë filluar hetime zyrtare nën dyshimet për keqpërdorim të fondeve publike.

Ky vendim vjen dy javë pasi nisën hetimet ndaj Fillon. Ai dyshohet se ka paguar gruan dhe fëmijët e tij, qindra mijëra euro nga paratë publike, për dekada me rradhë për punë, që ata mund të mos i kenë kryer.

Penelope Fillon po hetohet për dyshimet për pjesëmarrje në shpërdorimin e fondeve publike dhe disa vepra të tjera të ngjashme.

Fillon, ish-kryeministër, ka mohuar akuzat. Ai është kandidati i parë francez për president, që zyrtarisht është nën hetime.

Deri kohët e fundit, Fillon ishte kandidati favorit për të fituar zgjedhjet. Por tani ai është prapa kandidates të ekstremit të djathtë, Marine Le Pen dhe Emmanuel Marcon.

Raundi i parë i zgjedhjeve presidenciale në Francë do të mbahet më 23 prill.

Prokurorët gjermanë thonë se kanë arrestuar një ish komandant të dyshuar të talibanëve, që besohet se ka marrë pjesë në sulmin ku u janë vrarë ushtarë amerikanë dhe afganë.

Zyra e Prokurorit federal ka thënë se qytetari afgan, i identifikuar vetëm si Abdullah P., 30-vjeçar, është arrestuar në shtetin e Bavarisë më 23 mars, nën dyshimin se është pjesëtar i organizatës terroriste dhe për tentim vrasje.

Në deklaratën e Zyrës së Prokurorit thuhet se i dyshuari besohet se i është bashkuar talibanëve më 2002 dhe ka qenë komandant më 2004.

Sipas autoriteteve gjermane, ai është përfshirë në misione kundër luftëtarëve të huaj dhe afganë, përfshirë edhe në sulmin ndaj konvojit ushtarak ku u vranë 16 ushtarë amerikanë dhe afganë.

Akoma nuk është e qartë se në cilin vit ka ndodhur ky sulm.

Prokurorët gjermanë kanë shtuar se ai ishte larguar nga njësia e tij luftarake më 2008. Më 2009 ai kishte ikur në Pakistan, ndërkaq më 2011 ka ardhur në Gjermani si emigrant.