Eksportet e gazit natyror në Evropë nga Rusia dhe Norvegjia arritën nivele rekorde në vitin 2017, njoftoi të mërkurën shërbimi i pavarur të naftës dhe gazit Rystad Energy.

Në vitin 2017, eksporti rus në Evropë, përfshirë edhe Turqinë, arriti në 194 miliardë metra kub (mmk), ndërsa eksportet e Norvegjisë në Evropë arrinin në 122 miliardë metra kub, sipas një analize të kryer nga Rystad Energy.

Në përputhje me analizën, eksportet e gazit natyror të Rusisë u rritën në 194 mmk për më shumë se 15 mmk nga viti në vit, ndërkohë që Norvegjia ka rritur eksportet e saj me 9 mmk, duke arritur në 122 miliardë metra kub.

“Eksportet e tyre të larta kanë ofruar furnizim serioz për Evropën dhe janë një tregues se strategjia e ndjekur nga Rusia dhe Norvegjia ka qenë për të ruajtur pjesën e tyre të tregut, duke përfituar konsumatorët evropianë, pasi çmimet në Evropën Veriperëndimore kanë mbetur mjaft të qëndrueshme. Kjo gjithashtu ka mbajtur furnizimet e reja amerikane të LNG-së jashtë rajonit, duke mundësuar që gazi amerikan të plotësojë kërkesën në rritje në Azi dhe Amerikën Latine, citohet të ketë thënë Carlos Torres-Diaz, zëvendëspresidenti për tregjet e gazit në Rystad Energy.

Ndërkohë që të dy vendet kanë shfaqur tendenca të rritjes që nga viti 2014, ndërsa sipas studimit të kompanisë me seli në Oslo, thuhet se Rusia do të forcojë më tej pozitën e saj dominuese, ndërkohë që prodhimi norvegjez është gati të bjerë në vitet e ardhshme.

Sa i përket prodhimit të gazit rus, Torres-Diaz komentoi se me ngritjen e impiantit Yamal LNG dhe me përfundimin e tubacionit “Power of Siberia”, eksportet në Azi pritet të rriten.

Për më tepër, ai theksoi se rritja e prodhimit, së bashku me vazhdimin e projekteve të tubacionit të Gazprom-it, Rrjedha Veriore-II dhe Rrjedha Turke, lë potencial të madh për rritjen e eksporteve për dominimin rus të tregut Evropian.

Përveç kësaj, kompania pret një rënie prej 10 miliardë metër kub deri në vitin 2020 të prodhimit vjetor nga disa fusha kryesore të gazit në Norvegji, krahasuar me nivelet e vitit 2017. Megjithatë, kjo do të kompensohet pjesërisht nga rritja prej 8.6 mmk në prodhimin e parashikuar të gazit në të njëjtën periudhë nga fillimi i fushës se gazit Aasta Hansteen, që ndodhet 300 kilometra nga toka, në veriperëndim të Sandnessjoen në qarkun Nordland në Norvegji. Poashtu, prodhimi në vendet e tjera evropiane pritet të vazhdojë uljen.

Rystad Energy është një kompani e pavarur kosulence e naftës dhe gazit që ofron bazat e të dhënave globale, konsultime strategjike dhe kërkimit të produkteve.

Hoteli Galeria, i cili ndodhet në Bratislavë, tërheq vëmendjen me pamjen e saj avangarde, ndërsa duket edhe si një galeri arti

BRATISLAVË – Hotelet në mbarë botën përpiqen të gjejnë mënyra të ndryshme për të tërhequr vizitorë, për çka edhe garojnë në ofrimin e shërbimeve më të mira, por hoteli Galeria në Bratislavë të Sllovakisë, ka vendosur të shkojë një hap më tej dhe të lidhë artin me arkitekturën dhe turizmin.

Ky hotel, i cili është ideal për ata që duan ngjyra të ndezura, tërheq vëmendjen me pamjen e saj avangarde dhe duket edhe si një galeri arti. Mysafirët kanë rastin të akomodohen në dhomat e larmishme me mundësinë e shfrytëzimit të shërbimeve të shumta.

Si pjesa e jashtme ashtu edhe ajo e brendshme e hotelit risjellin veprat e piktorëve, themelues të drejtimeve të artit të famshëm të cilat edhe sot e kësaj dite tërheqin vëmendjen dhe janë tema të bisedave të shumta.

Hoteli nuk është interesant vetëm për ata që merren me artin, hotelerinë apo arkitekturën, por edhe fotografinë dhe marketingun, kurse vizitorëve u ofrohet një eksperiencë e paharrueshme. aa

Respektimi i të drejtave të njeriut dhe i ligjshmërisë ndërkombëtare, paqja në Lindjen e Mesme dhe statusi i Jeruzalemit, mikpritja e emigrantëve dhe kushtet e katolikëve në Turqi : këto janë temat kryesore të takimit së Papës Françesku me presidentin e Republikës turke,  Recep Tayyp Erdogan, i cili u prit në audiencë në Vatikan.

Të respektohet ligji ndërkombëtar

Gjatë bisedës, Ati i Shenjtë dhe presidenti i Turqisë, njofton Salla e Shtypit e Vatikanit, “u ndalën mbi gjendjen në Lindjen e Mesme, veçanërisht mbi statusin e Jeruzalemit, duke vënë në dukje nevojën e promovimit të paqes dhe të qëndrueshmërisë në rajon, përmes dialogut dhe negociatave, në respektin për të drejtat e njeriut dhe për ligjshmërinë ndërkombëtare”.

Në bisedime, edhe marrëdhëniet Vatikan-Turqi dhe gjendja e bashkësisë katolike

Gjatë atyre, që nota vatikanase i quan “bisedime të përzemërta”, u përmendën “marrëdhëniet dypalëshe ndërmjet Selisë së Shenjtë dhe Turqisë, si edhe u fol për gjendjen në vend, për kushtet e bashkësisë katolike, për impenjimin në mikpritjen e refugjatëve të shumtë dhe për sfidat e lidhura me të”.

Pas audiencës me Papën Françesku, presidenti Erdogan bisedoi edhe me Sekretarin e Shtetit të Vatikanit, kardinalin Pietro Parolin dhe me atë për Marrëdhëniet me Shtetet, imzot Paul Richard Gallagher./Radio Vatikani

VATIKAN (AA) – Presidenti i Turqisë, Recep Tayyip Erdoğan dhe Papa Françesku gjatë takimit të tyre në Vatikan biseduan mbi rëndësinë që administratës amerikane t’i bëhet me dije për vendimin e gabuar të saj mbi Kudsin, transmeton Anadolu Agency (AA).

I shoqëruar nga një delegacion zyrtarësh të lartë shtetërorë në vizitë zyrtare në Vatikan, presidenti i Turqisë Erdoğan sot në Pallatin Apostolik në Vatikan zhvilloi takim kokë më kokë me liderin shpirtëror të katolikëve, Papa Françeskun.

Sipas burimeve presidenciale, në takimin i cili thuhet se ka kaluar në një atmosferë maksimalisht miqësore, Erdoğan dhe papa kanë këmbyer mendime në lidhje me Kudsin, refugjatët, zhvillimet në Lindjen e Mesme me në krye Sirinë, terrorizmin dhe marrëdhëniet mes pjesëtarëve të feve të ndryshme.

Në takim, presidenti i Turqisë dhe papa kanë theksuar nevojën për ruajtjen e statusit të Kudsit, ashtu siç përcaktohet në rezolutat e OKB-së dhe të drejtën ndërkombëtare.

Erdoğan ka falënderuar papën për mesazhet e tij në lidhje me Kudsin, ndërkohë që edhe papa ka shprehur vlerësime pozitive për përpjekjet e presidentit Erdoğan në lidhje me Kudsin dhe ndihmat e dedikuara për refugjatët.

Erdoğan gjithashtu e ka informuar papën në lidhje me operacionet kundërterroriste të Turqisë në Siri.

Në takim është thënë se është e gabuar që terrorizmi të asocohet me fetë, duke u theksuar nevoja për luftë të përbashkët kundër ksenofobisë dhe islamofobisë.

Në këtë drejtim, palët kanë shprehur nevojën për distancim nga retorika provokuese e cila Islamin e asocon me terrorizmin.

Presidenti i Turqisë ka shpjeguar se në Turqi i japin rëndësi bashkëjetesës në paqe mes njerëzve të të gjitha feve, përfshirë edhe katolikëve, duke theksuar se si shembull konkret i këtij vullneti, Turqia së fundmi ka riparuar 14 kisha dhe një sinagogë.

Në fund, Erdoğan dhe Papa Françesku kanë theksuar se është e mundur të hedhen hapa të përbashkët për ndërtimin e paqes dhe stabilitetit rajonal dhe mobilizim të komunitetit ndërkombëtar për përfilljen e dramave humanitare, ndërsa kanë ngelur dakord për t’i vazhduar kontaktet edhe në të ardhmen.

Presidenti turk, Recep Tayyip Erdogan, foto nga arkivi

Presidenti turk, Recep Tayyip Erdogan, pritet të takohet me Papa Françeskun gjatë ditës së sotme, në vizitën e parë të një lideri turk në Vatikan në 59 vjet.

Zyra e Erdoganit ka thënë përmes një deklarate se të dy do të bisedojnë për statusin e Jerusalemit, marrëdhëniet Turqi-Vatikan, për Sirinë, krizën e refugjatëve, terrorizmin, ksenofobinë dhe islamofobinë.

Autoritetet italiane kanë vënë ndalim për protesta në qendër të Romës, gjatë vizitës së Erdoganit dhe 3,500 policë janë vënë në detyrë.

Papa dhe Erdogan janë takuar për herën e fundit më 2014, pas vizitës së papës në Turqi.

Marrëdhëniet në mes të Turqisë dhe Vatikanit kanë qenë të tensionuara nga qershori i vitit 2016, kur papa Françesku e kishte cilësuar “gjenocid”, vrasjen e armenëve nga dora e trupave otomane gjatë Luftës së Parë Botërore.

Ankaraja kundërshton përdorimin e termit gjenocid për të përshkruar këto vrasje dhe ka reaguar duke akuzuar papën për shpërndarje të “gënjeshtrave”.

Ministri i Jashtëm gjerman, Sigmar Gabriel, foto nga arkivi

Nuk vihet në pyetje se Gjermania është përgegjësja e vetme për Holokaustin, ka thënë ministri i Jashtëm gjerman, Sigmar Gabriel, pas reagimeve me të cilat po përballet Polonia fqinje për legjislacionin e saj kontradiktor për Holokaustin.

“Nuk ekziston as dyshimi më i vogël për atë se kush ka qenë përgjegjës për kampet e përqendrimit, kush ka vepruar aty dhe ka vrarë miliona hebrenj evropianë, ata janë gjermanët”, ka thënë Gabrial, sipas ministrisë së Jashtme të këtij vendi.

“Këto vrasje masive të organizuara, janë kryer nga shteti jonë dhe askush tjetër”, ka thënë ai.

“Bashkëpunëtorët individual nuk e ndryshojnë atë fakt”.

Senati polak ka miratuar më 1 shkurt amendamentet legjislative për të rregulluar fjalorin lidhur me Holokaustin dhe krime të tjera të periudhës naziste.

Ky projekligj duhet të nënshkruhet nga presidenti, Andrzej Duda, i cili ka paralajmëruar mbështetje.

Shtetet e Bashkuara, Izraeli, Ukraina dhe shtete tjera kanë kritikuar ashpër këtë projektligj, sipas së cilit çdokush që akuzon Poloninë apo qytetarët e saj për bashkëpunim në krimet naziste, mund të ndëshkohet me burgim deri në tri vjet.

Kritikët kanë thënë se kjo mund t’i lejojë qeverisë të kundërshtojë raste në të cilat bashkëpunimi i polakëve kanë qenë i vërtetur dhe kjo do të frenonte fjalën e lirë apo studimet që janë të lidhura me Holokaustin.

Polakët kanë luftuar me vite kundër përdorimit të frazës “Kampet polake të vdekjes”, pasi konsiderohet se Polonia ka qenë më së paku përgjegjëse për vdekjet e personave aty.

Këto kampe janë ndërtuar nga nazistët kur kanë marrë kontrollin mbi Poloninë më 1939.

Një 28 vjeçar italian goditi me armë dhe plagosi gjashtë emigrantë afrikanë të shtunën në një incident që zgjati dy orë, duke terrorizuar një qytet të vogël në Italinë qendrore, ku një nigerian u arrestua disa ditë më parë për vrasjen e tmerrshme të një të riu.

I dyshuari i sulmit, me lidhjet politike të krahut të djathtë, kishte një flamur italian të lidhur rreth qafës së tij pasi u arrestua disa orë më pas në qytetin e Maceratit. Autoritetet e identifikuan atë si Luca Traini, një 28 vjeçar, pa precedent të mëparshëm.

Traini kishte garuar për këshillin e qytetit me partinë Liga Veriore që ka pikëpamje anti-emigracionit, në zgjedhjet lokale të vitit të kaluar në Corridonia, konfirmoi partia, por kandidati i saj për kryetar komune humbi garën. Agjencia e lajmeve ANSA citoi miqtë e tij të thoshin se Traini kishte qenë më parë i lidhur me partitë ekstremiste italiane, si partia neo-fashiste Forza Nuova dhe CasaPound.

Ndërsa sulmi i dhunshëm po ndodhte në Macerata në rajonin qendror Marche të Italisë, policia u tha banorëve të qëndronin brenda dhe urdhëroi ndalimin e transportit publik për të kufizuar numrin e viktimave. Të shtënat e tilla të dhunshme janë të rralla në Itali dhe zakonisht lidhen me mafian jugore italiane.

Pyotr Levashov gjatë seance gjyqësore në Spanjë, foto nga arkivi

Spanja ka ekstraduar për në Shtetet e Bashkuara një qytetar rus, i cili është akuzuar nga autoritetet amerikane për zhvillimin e fushatave të krimeve kibernetike, duke përfshirë përdorimin e viruseve dhe aktivitete tjera të ngjashme.

Pyotr Levashov, 37 vjeçar ishte arrestuar në muajin prill, derisa ishte në pushime me familjen e tij në Barcelonë, ndërsa më vonë është paraqitur para një gjykate federale në Connecticut, duke u deklaruar i pafajshëm për akuzat e krimeve kibernetike, duke përfshirë vjedhjen e identitetit dhe konspiracinë.

Policia Kombëtare në Spanjë ka thënë se zyrtarët i kanë dorëzuar Lavashovin marshallëve amerikanë më 2 shkurt.

Prokurorët kanë thënë se ai ka vepruar përmes rrjetit, “Kelihos,” për infektimin e kompjuterëve, dhe instalimin e viruseve të ndryshme në këto pajisje.

Avokatët e të akuzuarit kanë thënë se ai është i pafajshëm dhe rasti është i motivuar politikisht.

Rusia ka luftuar në mënyrë agresive për të kthyer Levashov në vendlindje.

Moska është ankuar vazhdimisht për ndalimin e qytetarëve rusë jashtë vendit, duke akuzuar zyrtarët amerikanë për “kidnapimin e tyre”.

Autoritetet amerikane kanë thënë se duke kërkuar ndalimin në vendet e tjera kanë vepruar në mënyrë ligjore duke dërguar kriminelët e dyshuar para drejtësisë.

Ekstradimi është miratuar në muajin tetor nga Gjykata Kombëtare e Spanjës pasi ka kundërshtuar kërkesën e ekstradimit nga Moska.

Ambasada ruse në Uashington nuk është përgjigjur në kërkesat për të komentuar këtë rast.

Pamje nga një senacë e parlamentit polak

Senati i Polonisë e ka miratuar legjislacionin kundërthënës, me të cilin rregullohet të shprehurit për Holokaustin, i cili ka për qëllim ta mbrojë imazhin e Polonisë. Ky legjislacion u miratua përkundër vërejtjeve nga Shtetet e Bashkuara dhe zemërimit nga ana e Izraelit.

Ky legjislacion, i miratuar mbrëmë vonë me 57 vota për dhe 23 kundër, e dy abstenime, parasheh dënim me burg deri në tri vjet, për çdokend që kampeve të koncentrimit të Gjermanisë naziste u referohet si “kampet polake të vdekjes” ose e akuzon Poloninë për bashkëpunim me krimet e nazistëve.

Ky legjislacion tash pritet të nënshkruhet nga presidenti i Polonisë, i cili e ka mbështetur atë.

Shtetet e Bashkuara dhe Izraeli kanë kërkuar nga Varshava që të hidhet poshtë ky legjislacion, duke thënë se ai e kufizon lirinë e të shprehurit dhe kërkimet shkencore.

Izraeli, po ashtu, ka thënë se legjslacioni paraqet përpjekje për mohimin e involvimit polak në vrasjet e hebrejve nga nazistët gjermanë.

Angelina Jolie dhe Jens Stoltenberg gjatë konferencës së sotme për shtyp në Bruksel

Ylli i Hollivudit, Angelina Jolie, njëherësh e dërguar speciale e Kombeve të Bashkuara për refugjatë, ka thënë se shfrytëzimi i dhunimit si “mjet lufte” nuk duhet të pranohet dhe ka kërkuar që NATO-ja ta merr udhëheqjen në zmbrapsjen e krimeve kundër grave në zonat e konflikteve.

Aktorja Jolie ka folur së bashku me sekretarin e përgjithshëm të NATO-s, Jens Stoltenberg, pas bisedimeve të sotme me të në selinë e aleancës perëndimore ushtarake në Bruksel.

“Ne sot kemi folur për rolin potencial të NATO-s në ndihmën e krijimit të përgjegjësisë më të madhe globale dhe zmbrapjes nga krimet kundër femrave në zonat e luftës, për ta shtuar përfaqësimin e grave në ushtritë dhe për ta forcuar stërvitjen dhe doktrinën për ta bërë NATO-n lider global ushtarak në këtë fushë”, tha Angelina Jolie.

“Dhuna kundër grave dhe fëmijëve, veçanërisht dhuna seksuale, është një veçori në rritje e konfliktit dhe e pasigurisë në gjithë botën”, tha Jolie dhe ka shtuar se “akoma, përdorimi i dhunimit si mjet lufte ishte shikuar si një ngjarje e paevitueshme e konfliktit dhe si krim më i vogël dhe problem shumë i vështirë ose shumë i dhimbshëm për shoqëritë për ta diskutuar”.

Jolie dhe Stoltenberg thanë se ata mund ta vizitojnë Afganistanin për të diskutuar për çështjen e abuzimit seksual të vajzave dhe djemve në këtë vend të shkatërruar nga lufta.

Pas skandalit të përhapur në Gjermani, për mënyrën e testimeve të gazrave të automjeteve me naftë tek njerëzit dhe kafshët, Volkswagen ka marrë përgjegjësinë e plotë .

Shefi ekzekutiv i VW, Matthias Mueller, tha se prodhuesi gjerman i makinave kishte “marrë pasojat e para” për testet.

Ai tha se testimi i kafshëve ishte “i gabuar … joetik dhe i pështirë”, raportoi “Spiegel Online”.

VW ka pezulluar lobuesin e saj kryesor Thomas Steg, i cili pranoi se kishte dijeni për eksperimentin e bërë me majmunët, i cili u zhvillua në Neë Meksiko më 2014-ën.

Steg u shpreh se: “Ajo që ndodhi, kurrë nuk duhet të ketë ndodhur, më vjen shumë keq ” dhe mori “përgjegjësi të plotë”.

Mediat gjermane raportojnë se prodhuesit gjermanë të automjeteve kishin financuar një kompani të quajtur EUGT, për të studiuar ndikimin e tymrave të makinave në shëndetin e njeriut.

EUGT është financuar nga Volkswagen, Daimler (prodhuesi i Mercedes-Benz) dhe BMW për të kryer këtë studim.

Mirëpo, sipas shtypit gjerman, kompania EUGT ka përdorur njerëz dhe majmunë për të testuar ndikimin negativ të tymrave të automjeteve në shëndet.

Prodhuesit gjermanë të automjeteve kanë dënuar mënyrën e këtij studimi, duke thënë se nuk kanë qenë në dijeni të metodave që kishte përdorur EUGT.

Kurt Volker (djathtas) dhe Vladislav Surkov

Sugjerimet e Shteteve të Bashkuara për vendosjen e një misioni të Kombeve të Bashkuara në pjesën lindore të Ukrainës, që është përfshirë nga lufta, duket se është i zbatueshëm dhe Rusia do ta studiojë atë me kujdes, është cituar nga mediat ruse, këshilltari i Kremlinit, Vladislav Surkov, pas takimit me kolegun amerikan, Kurt Volker.

Surkov dhe Volker janë takuar dje në Dubai.

Volker deri tash nuk ka bërë komente për këtë takim, por është paralajmëruar se do ta ketë një bisedë telefonike me media për ditën e hënë.

Prej prillit të vitit 2014, nga lufta ndërmjet forcave të qeverisë së Ukrainës dhe separatistëve të mbështetur nga Rusia, të cilët i kanë nën kontroll pjesë të rajoneve lindore, Luhansk dhe Donjeck, janë vrarë më se 10,300 vetë.

Marrëveshjet e armëpushimt të shpallura si pjesë e Marrëveshjeve të Minskut, pajtueshmëritë e shtatorit të vitit 2014 dhe shkurt të vitit 2015 për zgjidhje të konfliktit, kanë dështuar të respektohen.

Presidenti prorus, Milos Zeman, është rizgjedhur president i Çekisë edhe për një mandat pesëvjeçar.

Rezultatet zyrtare pas numërimit të 96.87% të fletëvotimeve tregojnë se Zeman ka fituar me 51.95% të votave, ndërsa rivali i tij proevropian, Jiri Drahos, i ka fituar 48.04%. Zoti Drahos e ka pranuar disfatën.

Zeman, 73 vjeçar, prej vitit 2013 është president i Çekisë, që është në masë të madhe funksion ceremonial.

Ai ka shkaktuar kundërthënie duke shprehur pikëpamje kundër migrantëve, pastaj me denigrim të myslimanëve dhe përmirësim të raporteve me presidentin e Rusisë, Vladimir Putin, në kohën kur shumë në Evropë kanë shprehur shqetësim për përzierjen e Moskës në punët dhe në zgjedhjet perëndimore.

Zeman, po ashtu, synon marrëdhënie më të afërta me Kinën.

“Dëshiroj ta uroj fituesin e zgjedhjeve, Milos Zeman”, i tha Jiri Drahos, 68 vjeçar, masës së mbështetësve të vet.

Drahos dikur ishte kryetar i Akademisë së Shkencave të Çekisë.

Papa Françesku i ka cilësuar lajmet e rreme si djallëzore, duke u thënë gazetarëve dhe përdoruesve të rrjeteve sociale që të nxjerrin në pah “taktikat gjarpërore” manipulative, të cilat po krijojnë ndasi në interesat politike dhe ekonomike, transmeton Reuters.

“Lajmet e rreme janë shenjë e qasjeje jotolerante dhe janë aty për të shpërndarë arrogancë dhe urrejtje”, ka thënë ndër të tjera Papa.

Ky dokument është publikuar pas disa mujsh debate në atë, se sa kanë ndikuar lajmet e rreme në zgjedhjet presidenciale të vitit 2016 në Shtetet e Bashkuara dhe zgjedhjen e presidentit amerikan, Donald Trump.

“Shpërndarja e lajmeve të rreme mund të avancojë qëllime specifike, të ndikojë në vendimet politike dhe t’iu shërbejë interesave ekonomike”, është thënë në deklaratën e Papa Françeskut.

VOAL – Presidenti i Parlamentit katalan, Roger Torrent, shpalli se do të paraqesë emrin e Carles Puigdemont si kandidat për president të Katalonjës.

Emri i Puigdemont, i mbështetur nga fronti indipendentist që e ka shumicën absolute, është emri i vetëm që është lakuar gjatë konsultimeve mes grupeve politike ditëve të fundit, ka saktësuar Torrent. Sesioni i zgjedhjes së presidentit të ri katalan është parashikuar brenda 31 janarit.

Presidenti i deritanishëm, në azil në Bruksel, ka arritur të hënën në Kopenaghen për  të marrë pjesë në një debat në Universitet. Gjykata Supreme spanjolle ka refuzuar kërkesën për të riaktivizuar mandatin e arrestit evropian ndaj politikanit. Kryeministri Mariano Rajoy ka kërcënuar se do të vazhdojë ta zgjasë mbikqyrjen e Kataonjës nëse Puigdemont do të jetë në mërgim.

Lideri indipendentist, i cili duhet ta formojë qeverinë e re katalane, ka thënëse do të “qeverise nga Brukseli, por jo nga burgu”.

Nëntë vetë, përfshirë dy zjarrfikës, janë vrarë nga stuhia e djeshme në pjesën veriore të Evropës, e cila e ka bllokuar edhe trafikun ajror dhe hekurudhor.
Nga stuhia kanë vdekur gjashtë vetë në Gjermani, dy holandezë dhe një person në Blegjikë.
Kjo stuhi me emrin, Friederike, i ka dëmtuar edhe shkollat dhe objektet e tjera në shtetin lindor gjerman, Thueringia, raporton agjencia AFP.
Policia gjermane tha se shpejtësia e erës në disa rajone, kishte arritur edhe 203 kilometra në orë.

VOAL – Moti me stuhi, që po mbretëron nga e mërkura në shtete të ndryshme të Evropës Veriore, ka shkaktuar deri tani dy viktima në Hollandë, tre në Gjermani dhe një në Belgjikë. Shumë dëme kanë pasur transportet dhe popullsia.

Në Gjermani, për shkak të uraganit “Friederike”, trafiku hekurudhor i linjave të largëta është ndërprerë në gjithë territori. Ndërkohë janë të ndaluar të gjithë trenat në Vestfalinë e Sipërme Renane dhe në Saksoninë e Ulët.

Në gjendje alarmi është edhe Belgjika, Irlanda e Veriut, Skocia, Anglia Veriore transportet janë vështirësuar për shkak të borës. Shkollat janë mbyllur në shumë zona.

AMSTERDAM – Stuhi të fuqishme kanë mbërthyer Holandën këto ditë duke shkaktuar kaos në shumë qytete.

Madje edhe aeroporti i Amsterdamit ka pezulluar të gjitha fluturimet, po ashtu edhe shërbimi hekurudhor është jashtë funksionit.

Instituti Mbretëror i Meteorologjisë Holandeze lëshoi një kod të kuq, paralajmërimi më i ashpër i motit, për pjesë të mëdha të vendit të enjten dhe tha se fuqia e erës arriti në 140kph.

Gjithashtu zyrtarët u kanë bërë thirrje njerëzve të qëndrojnë nëpër shtëpi. Videot e mëposhtme tregojnë se si i ka marrë era njerëzit në rrugë.

“Pranimi në Bashkimin Evropian nuk është gjë e lehtë”, ka thënë sot presidenti i Komisionit Evropian, Jean-Claude Juncker.
Zoti Juncker, duke folur në seancën plenare të Parlamentit Evropian në Strasburg, theksoi se “dëshiron tu tregojë shteteve në Ballkan se cilat janë pritjet” e Bashkimit Evropian nga vendet e Balkanit Perëndimor.
Në këtë kuadër ai theksoi:
“Hyrja në Bashkimin Evropian nuk është gjë e lehtë. Ajo nuk bie nga qielli. Duhet të punohet për këtë gjë. Po ashtu, dëshiroj të them në mënyrën më miqësore: të gjitha kontestet kufitare, të cilat ekzistojnë ndërmjet vendeve të Ballkanit Perëndimor, duhet të zgjidhen para anëtarësimit”, tha Jean-Claude Juncker, i cili në fund të muajit shkurt dhe fillim të marsit e viziton rajonin e Ballkanit Perëndimor.

Në kumtesën e organizatës “Save the Children” thuhet se kjo shifër në vitin 2016 ishte 25.840

ROMË – Më shumë se 15.730 fëmijë të pashoqëruar vitin e kaluar kanë mbërritur në Itali përmes detit, bën të ditur organizata “Save the Children”.

Nga organizata thonë se fëmijët kanë ardhur në Itali të vetëm, pa shoqërues të anëtarëve të familjes ose mbikëqyrjen e një të rrituri.

Më tej theksohet se kjo shifër në vitin 2016 ishte 25.840.

Po ashtu në deklaratë thuhet se më shumë se 380 fëmijë presin për strehim në Itali dhe se për 79 prej tyre nuk është gjetur strehim, pavarësisht se kërkesat e tyre u miratuan.

Ndërkaq, 151 fëmijë presin për miratim nuk dihet identiteti i 154 fëmijëve të tjerë.

Logoja e kompanisë franceze, Lactalis, foto nga arkivi

Kompania franceze e qumështit, Lactalis, ka deklaruar që më shumë se 12 milionë kuti të qumështit për foshnje janë tërhequr nga tregu në 83 vende të botës, pas shqetësimeve se mund të jenë prishur nga bakteria salmonella.

Shefi ekzektutiv i kompanisë, Lactalis, Emmanuel Besnier, ka konfirmuar për skandalin e kontaminimit për një media franceze.

Produktet janë tërhequr nga tregu prej muajit dhjetor, që kur bakteria është identifikuar në një fabrikë në veriperëndim të Francës.

Revista e përjavshme, Le Journal du Dimanche, ka thënë se 35 foshnje janë diagnostikuar me bakterien salmonella në Francë, një në Spanjë dhe një rast i mundshëm në Greqi.

Javën e kaluar, ministri i Ekonomisë, Bruno Le Maire, ka thënë se çdo produkt që ende ka mbetur nëpër dyqane duhet të largohet menjëherë.

Thirrja për largim vlen për produktet e kompanive, Picot, Milumel, dhe Taranis.

Bakteria salmonella mund të shkaktojë barkqitje, të vjella dhe dehidrim.

Mund të jetë shumë e rrezikshme për foshnjat.

Lactalis, është një nga prodhuesit më të mëdhenj të produkteve të qumështit.