Fotografi ilustruese

Dhjetëra njerëz janë vrarë pasi një veturë ka goditur turmën në qytetin Muenster të Gjermanisë, kanë raportuar mediat gjermane.

“Janë dhjetëra të vdekur dhe me gjasë në mesin e tyre është edhe i dyshuari”, ka thënë një zëdhnës i policisë.

Policia lokale ka shkruar në Tëitter se zyrtarët policorë kanë dalë në vendin e ngjarjes dhe u kanë bërë thirrje qytetarëve që të shmangin qendrën e qytetit, në mënyrë që makinat dhe ekipet e emergjencës të mund t’iu dalin në ndihmë të lënduarve.

Ende nuk është e qartë nëse kjo ngjarje është incident apo sulm.

Carles Puigdemont. 6 prill, 2018

Ish-lideri katalan, Carles Puigdemont ka thënë se shpreson që mund të jetojë në Beligjikë, pasi të kenë përfunduar procedurat ligjore në Gjermani.

Ai është liruar nga arresti në Gjermani të premten.

“Dëshira ime është të kthehem në Belgjikë, por pasi të kenë përfunduar procedurat ligjore këtu në Gjermani”, u ka thënë ai gazetarëve në Berlin.

Puigdemont është liruar nga një burg në Gjermani, pasi ka paguar 75 mijë euro për lirimin e tij me kusht, derisa të merret vendimi për ekstradimin në Spanjë.

Spanja akuzon Puigdemontin për rebelim dhe shpërdorim të fondeve publike lidhur me referendumin e paautorizuar për pavarësinë e Katalonjës në tetor të vitit 2016.

Kancelarja gjermane, Angela Merkel, do të udhëtojë në Shtetet e Bashkuara për të takuar presidentin, Donald Trump, tha Shtëpia e Bardhë.

Zëvendësi i sekretarit për media, Hogan Gidley, e konfirmoi vizitën e Merkelit në javët e ardhshme, por nuk dha datë të saktë.

Megjithatë, një zyrtar i lartë amerikan i tha agjencisë Reuters se vizita pritet të realizohet më 27 prill.

Presidenti i Francës, Emmanuel Macron, pritet të takojë Trumpin në Uashington tre ditë para vizitës së Merkelit.

Takimet do të zhvillohen pak kohë para 12 majit, afatit që ka caktuar Trump për përmirësimin e marrëveshjes bërthamore me Iranin, të nënshkruar nga SHBA-ja dhe fuqitë e tjera botërore.

Gjermania, Franca dhe nënshkrueset e tjera i kanë bërë thirrje SHBA-së që të mbetet në marrëveshje.

Me paktin e vitit 2015, Teherani është pajtuar të frenojë aktivitetet bërthamore në këmbim të lehtësimit të sanksioneve ndërkombëtare kundër tij.

Trump ka thënë se Teherani është duke shkelur “frymën” e marrëveshjes me hedhjen e vazhdueshme të raketave balistike dhe me mbështetjen e militantëve në rajon.

Presidenti amerikan ka kërcënuar se do të tërhiqet nga marrëveshja nëse ajo nuk përmirësohet.

Një gjykatë gjermane hodhi poshtë “rebelimin” si arsye për të ekstraduar ish-liderin e Katalonjës, Carles Puigdemont, dhe urdhëroi lirimin e tij me kusht.

Gjykata në qytetin Shlesvih-Hollshtajn tha se ai ende mund të përballet me akuzat për korrupsion në Spanjë dhe se ka pezulluar ekstradimin e tij, por nuk e ka përjashtuar atë.

Puigdemont është arrestuar në Gjermani muajin e kaluar, pasi Spanja ka lësuar urdhërarrest evropian për të.

Spanja i ka akuzuar separatistët katalanas për referendumin për pavarësi, të mbajtur në tetor.

Ministri i jashtëm i Hungarisë mohoi akuzat se qeveria e tij është raciste, por tha se nuk pranon që një shoqëri multikulturore është më e mirë se ajo homogjene. Komentet e tij kanë nxitur reagime nga organizatat për të drejtat e njeriut, përfshirë Komisionerin e OKB-së për të drejtat e njeriut.

Ministri i Jashtëm hungarez Péter Szijjártó i tha të mërkurën Zërit të Amerikës në Organzatën e Kombeve të Bashkuara, se vendi i tij nuk e pranon se multikulturalizmi është në vetvete një vlerë.

“Ne nuk e pranojmë që multikulturalizmi do të ishte më i mirë sesa një shoqëri homogjene, për shembull. Ne mendojmë se një vend, ose shoqëria e tij janë ata që vendosin nëse e konsiderojnë atë si një vlerë”.

Ministri i Jashtëm Szijjártó shtoi se Hungaria ka qenë “një shoqëri homogjene e bashkuar hungareze, e krishterë ” për 1100 vjet dhe e konsideron “këtë si vlerë”.

Komentet e tij ishin gjithashtu një përgjigje ndaj komenteve qortuese të Komisionerit të Lartë të OKB-së për të drejtat e njeriut muajin e kaluar, ku ai akuzonte kryeministrin hungarez Viktor Orban se ishte një njeri “racist” dhe “ksenofob”, sepse Orban, tha ai, nuk dëshiron që Hungaria të jetë “shumëngjyrëshe”.

Emigracioni ka qenë një çështje e rëndësishme elektorale në disa zgjedhje të fundit evropiane, përfshirë Hungarinë. Këtë të dielë, hungarezët do të votojnë në zgjedhjet e përgjithshme dhe Kryeministri Orban dhe partia e tij e krahut të djathtë, Fidesz, pritet të dalë fituese dhe të vazhdojë të qëndrojë në pushtet.

Ish-lideri i Katalonjës, Carles Puigdemont u ka bërë thirrje mbështetësve të tij të vazhdojnë rrugëtimin derisa ai është duke u përballur me ekstradim nga Gjermania, për shkak të rolit të tij në referendumin e Katalonjës për pavarësi.

I kërkuar në Spanjë për kryengritje dhe rebelim, Puigdemont ka folur për herë të parë prej kur është ndaluar përmes një fletë-arresti evropian.

Ai u ka thënë mbështetësve të tij se Spanja është duke vepruar në mënyrë “autoritare”.

Përkrahësit e idesë për pavarësi kanë marshuar në Berlin duke kërkuar lirimin e tij.

Gjyqatarët kanë 60 ditë për të konsideruar kërkesën për ekstradim.

Puigdemont ka folur përmes një audio-mesazhi të incizuar nga politikani i së majtës, Diether Dehm, i cili e ka vizituar në burgun në qytetin Neumünster.

“Përmes këtij mesazhi dua të them se ne duhet të vazhdojnë, duhet ta vazhdojmë rrugën tonë, të mbrojmë të drejtat tona, të drejta që janë njohur nga Kombet e Bashkuara përmes së cilave ne kemi të drejtë të vendosim për të ardhmen tonë”, ka thënë ai.

Një ortodoks, një budist e dy myslimanë, ndërmjet 12 të burgosurve, të cilëve Papa Françesku u lau sot pasdite këmbët, gjatë meshës së Darkës së Mbrame, kremtuar në burgun romak “Regina Coeli”. Në orën 16.00, në sheshin e rrumbullakët brenda burgut, në rrugën Lungara 29, ashtu si shën Gjon Pali II në vitin 2000, i Lumi Pali VI më 1964 e shën Gjoni XXIII në vitin 1958, Ati i Shenjtë kremtoi meshën për më se 600 të burgosur, 65% të rinj të huaj.

Papa e kupton shpirtin e të burgosurve

“E ndjejnë si mik me zemër të madhe, të aftë të kuptojë edhe shpirtin e të burgosurve”, nënvizon kapelani i burgut të Trasteveres, atë Vittorio Trani, i cili zgjodhi ata, që Papa u lau këmbët në ritin e së Enjtes së Madhe, në kujtim të gjestit të Krishtit për apostujt. Atë Trani i zgjodhi duke pasur parasysh kombësinë e fenë për t’i mundësuar vërtet gjithë botës së vuajtur të burgut të përfaqësohej në këtë përqafim me Papën. Vizita e Françeskut në burgun romak, përveç kremtimit eukaristik, ishte edhe takim me të burgosurit e sëmurë në infermierinë e strukturës, si edhe me ata të Seksionit VIII, që vuajnë dënime për krime me natyrë seksuale, ose kanë nevojë për mbrojtje të veçantë nga sulme të mundshme të të burgosurve të tjerë.

Homelia e Papës

“Larja e këmbëve. Këmbët, në atë kohë, laheshin nga skllevërit”, u tha Papa të burgosurve në homeli. “E Jezusi deshi ta bënte këtë shërbim, për të na dhënë shembullin si duhet t’i shërbejmë njëri-tjetrit”. Pastaj, kujtoi dishepujt, që i patën kërkuar Jezusit një vend të rëndësishëm, njëri në të djathtë e tjetri në të majtë të Tij. Deshën të komandonin.

“Kush komandon – bëri një paralelizëm me krerët e politikanët e sotëm, Papa – duhet të shërbejë. Kreu juaj duhet të jetë shërbëtori juaj. Jezusi e përmbys zakonin historik, kulturor të kohës – edhe këtë të epokës së sotme…”

Jezusi rrezikon, sepse na do

Sa luftra e vrasje do të ishin shmangur, nëse krerët e politikanët e sotëm do ta kishin parasysh këtë gjë, vijoi Papa. Jezusi u jep rëndësi të mënjanuarve e pikërisht për ta kujtuar si u përul për t’u bërë shërbëtor i të tjerëve, Papa shkoi sot në mes të të burgosurve, edhe ata, konsideruar të fundmit e shoqërisë:

“Sot, jam mëkatar si ju, por përfaqësoj Jezusin. Sot, jam ambasador i Jezusit. Sot, kur të përkulem mbi secilin prej jush, mendoni: “Jezusi rrezikoi në këtë njeri, në këtë mëkatar, që të vijë tek unë e të më thotë se më do”. Ky është shërbimi, ky është Krishti: nuk na braktis kurrë; nuk lodhet kurrë së na faluri”.

Asnjë dënim të mos përjetohet pa shpresë

Pasi përfundoi mesha, Papa dëgjoi përshëndetjen e falenderimin e një të burgosuri e pati një këshillë të fundit për të gjithë të dënuarit:

“Ҫdo dënim duhet të ketë parasysh horizontin e shpresës. Prandaj, dënimi me vdekje nuk është as njerëzor, as i krishterë. Ҫdo dënim duhet t’i hapet shpresës, integrimit, qoftë edhe për ta përdorur përvojën e jetuar në të mirë të njerëzve të tjerë. Ujin e ringjalljes, vështrimin e ri, shpresën… këto ju uroj”.

Në vitin 2013, ndër të miturit e Casal del Marmo

Papa Françesku kremtoi meshën “in Coena Domini” me të burgosurit edhe në vitin 2013, më 2015 e vitin e kaluar. Është traditë, të cilën e ndjek që nga koha kur ishte kryeipeshkëv i Buenos Ajresit. Më 28 mars 2013, vetëm dy javë pas zgjedhjes, shkoi në burgun për të mitur në Casal del Marmo, gjithnjë në Romë. E pati thënë:

“Ta ndihmojmë njëri-tjetrin: këtë na mëson Jezusi e këtë bëj edhe unë. Dhe e bëj me zemër, sepse e kam për detyrë. Si prift dhe si ipeshkëv duhet të jem në shërbimin tuaj”.

Në Don Gnocchi, lau këmbë nga e gjithë bota

Të Enjten e Madhe të vitit 2014, më 17 prill, Papa Françesku viziton qendrën rehabilituese romake “Zoja e Provanisë Hyjnore” e Fondacionit “don Gnocchi” dhe u lan këmbët paraplegjikëve të çdo moshe, etnie e feje. Nga Osvaldinjo, 16 vjeçari i Kepit të Gjelbërt, në karrige me rrota pas një zhytjeje të pafat në det, tek Hamed, 75 vjeçari mysliman nga Libia, me dëmtime të mëdha neurologjike pas një aksidenti rrugor. Atyre dhe rreth 500 vetëve jashtë kishës, Papa u kujton trashëgiminë e Krishtit:

“Ai është Zot e u bë shërbëtor, shërbëtori ynë. Kjo është trashëgimia. Edhe ju duhet të jeni shërbëtorë të njëri-tjetrit. Ai e bëri këtë udhë për dashuri: edhe ju duhet të duheni e të jeni shërbëtorë në dashuri”.

Në Rebibbia: Jezusi na do të gjithëve

Në vitin 2015, më 2 prill, Papa Bergoglio kthehet në një burg, kësaj radhe në atë të Rebibbia-s. Kur mbërrin përshëndet e puth një e nga një 300 të burgosurit, që e prisnin për meshën e darkës së Mbrame.

“Dashuria e Jezusit për ne nuk ka kufi – nënvizon në homeli – gjithnjë e më shumë, gjithnjë e më shumë. Nuk lodhet së dashuri. I do të gjithë aq, sa jep jetën për secilin prej nesh: …për ty, për mua, për atë tjetrin atje… për secilin, me emër e mbiemër. Dashuria e Tij është kështu: personale”.

Ndër emigrantët e Castelnuovo di Porto

Më 13 prill 2016, Ati i Shenjtë shkon në Qendrën për azilkërkuesit në Castelnuovo di Porto, në portat e Romës. E presin 900 refugjatë e vullnetarë. Vetëm pak ditë më parë, Isis pati realizuar një atentat të tmerrshëm në Bruksel. E Papa, duke akuzuar fabrikuesit e trafikantët e armëve, që duan gjak e jo paqe, shpjegon larjen e këmbëve, duke bërë thirrje për vëllazërim:

“Sot, në këtë çast, kur do të bëj gjestin e Jezusit, që u lan këmbët të 12-ve, të gjithë ne bëjmë një gjest vëllazërimi e të gjithë ne themi: ‘Jemi të ndryshëm, kemi kultura e fe të ndryshme, por jemi vëllezër e duam të jetojmë në paqe”.

Në burgun e Palianos: shërbëtor për dashuri

Vitin e kaluar, më 16 prill, Papa Françesku shkon në një burg jashtë Romës, në Paliano, në provincën e Frozinones. Ndër të 12-ët e larjes së këmbëve, edhe një shqiptar. Papa u kujton se Jezusi, duke qenë kreu i Kishës, diti të bëhej skllav për ne e të na dojë deri në fund:

“Ka një përmbysje rolesh: ai, që duket më i madhi, duhet të bëjë punën e skllavit, por për të mbjellë dashuri. Nëse ju mund të ndihmoni, të bëni ndonjë shërbim, këtu në burg, për një shoqe a një shok, bëjeni. Sepse kjo është dashuri, kjo do të thotë t’u lash këmbët. E të jesh shërbëtor i të tjerëve”.

Polonia ka nënshkruar një marrëveshje në vlerë prej 4.75 miliardë dollarësh, për të blerë sistemin e mbrojtjes raketore Patriot nga Shtetet e Bashkuara, me qëllim që të mbrohet nga lëvizjet agresive të Rusisë në rajon.

Presidenti Andrzej Duda ka thënë se kjo marrëveshje historike për Poloninë dhe forcat e saj të armatosura.

“Janë shumë para, por ne e dimë nga eksperienca jonë se siguria nuk ka çmim”, ka thënë Duda.

Sistemi Patriot është i pajisur me teknologji që përdoret nga NATO dhe trupat amerikane në Poloni, ka thënë presidenti polak.

Rumania po ashtu ka nënshkruar një marrëveshje 3.9 miliardë dollarëshe vitin e kaluar për sistemin e mbrotjes raketore Patriot.

Kundërshtarët dhe mbështetësit e pavarësisë së Katalonisë nga Spanja organizuan në grupe të ndara sot protesta në Barcelonë, pas arrestimit të ish-udhëheqësit katalonas Carles Puigdemont në Gjermani.

Partia katalonase Asambleja Kombëtare dhe e majta radikale CUP u kanë bërë thirrje mbështetësve të tyre të dalin në rrugë dhe të mbështesin Puigdemont.

Ish-kreu i parlamentit të Katalonisë u arrestua sot nga policia gjermane afër kufirit me Danimarkën, sipas një fletarresti ndërkombëtar të lëshuar nga Spanja. Policia gjermane njoftoi se arrestimi ishte bërë, pasi Puigdemont do të largohej nga Gjermania drejt Danimarkës.

Fotografi ilustruese

Shumë njerëz në lindje të Evropës janë hutuar nga pamja e borës me nuanca të ngjyrës së portokalltë, transmeton BBC.

Fotografitë e borës janë postuar në rrjetet sociale nga Rusia, Bullgaria, Ukraina, Rumania e Moldavia.

Meteorologët kanë thënë se ky fenomen është shkaktuar nga rëra e shkretëtirave të Saharës dhe është përzier me borë dhe shi.

Sipas tyre kjo gjë mund të ndodhë një herë në pesë vjet, pasi koncentrimi i rërës është më i lartë se zakonisht.

Disa njerëz janë ankuar se kanë shijuar rërë në gojën e tyre.

Shumë persona që kanë shkuar në disa komplekse afër Soçit në Rusi kanë dërguar fotografi të skenave të rralla të ngjyrës së borës.

VOAL – Carles Puigdemont arrestohet nga policia gjermane, në kufirin mes Danimarkës dhe Gjermanisë.

Lideri separatist katalan, ndaj të cilit është lëshuar një urdherarrest evropian, po largohej nga Danimarka, ku kishte ardhur prej Finlandës.

Puigdemont u arrestua nga policia rrugore e Schleswig-Holstein.

Avokati tha se Puigdemont po mbahet në kushte të mira në një stacion policor të Gjermanisë, duke shtuar se ai ka bërë përgatitjet e nevojshme juridike.

Gjykata e Lartë Spanjolle, ditën e premte lëshoi urdhërarrest evropian për Puigdemontin dhe katër politikanë të arratisur.

Procesi

Pas shpalljes së pavarësisë së njëanshme më 27 tetor të vitit 2017 në Katalonjë, autoritetet spanjolle filluan hetime ndaj Puigdemont, i cili së bashku me katër ish-ministra kishte ikur në Belgjikë.

Në zgjedhjet e mbajtura më 21 dhjetor pas vendimit të qeverisë qendrore, partitë separatiste me diferencë të vogël fituan shumicën për formimin e qeverisë.

Kryetari i Parlamentit të Katalonjës, Roger Torrent, rishpalli kandidat për president të rajonit kreun e shkakruar Puigdemont, duke njoftuar mbajtjen e një votimi më 30 janar.

Mirëpo pas vendimit të Gjykatës Kushtetuese të Spanjës se Puigdemont mund të jetë president vetëm nëse merr pjesë personalisht, në vend të tij si kandidat u propozua njëri nga liderët e shoqërisë civile katalonjase në burg, Jordi Sanchez. Por, pas refuzimit të kërkesës së Sanchez-it për lirim, u propozua Jordi Turull.

Parlamenti i Qeverisë Autonome të Katalonjës më 22 mars, tre muaj pas zgjedhjeve të parakohshme u mblodh për zgjedhjet presidenciale.

Në seancë u diskutua kandidimi i separatistit Jordi Turull, emri i të cilit vjen në plan të parë pas Puigdemont-it dhe liderit në burg të shoqërisë civile katalonjase, Jordi Sanchez.

Pak kohë para seancës njëra nga partitë separatiste CUP bëri të ditur se nuk do ta mbështesë Turull-in për shkak se programi i tij qeveritar nuk parasheh formimin e një shteti të pavarur. Turull nuk arriti të marrë votat e nevojshme për t’u zgjidhur.

Politikanët separatistë katalonjas, në mesin e të cilëve është edhe Puigdemont, akuzohen për “rebelim kundër shtetit” për shkak të rolit të tyre në referendumin e paligjshëm dhe shpalljen e njëanshme të pavarësisë së Katalonjës.

Ish-lideri i Katalonjës, Carles Puigdemont është larguar nga Finlanda para se autoritetet e këtij vendi ta arrestonin atë.

Kryeministri finlandez, Mikko Karna, ka thënë se Puigdemont ka konfirmuar se ka arritur në Belgjikë.

Fletë-arresti nga Spanja për ndalimin e tij ishte kërkuar të premten, një ditë pasi Puigdemont ka arritur në Finlandë.

Në rast se kthehet në Spanjë, Puigdemont mund të dënohet me 25 vjet burgim për akuzat e rebelimit dhe organizimit të referendumit joligjor vitin e kaluar.

Puigdemont ishte nisur në ekzil të vetë-imponuar në Belgjikë, vitin e kaluar, pasi parlamenti i Katalonjës bëri një deklaratë simbolike të pavarësisë nga Spanja.

Aktualisht gjendja në Katalonjë është shumë e tensionuar pasi liderët e kësaj zone kanë braktisur planet për të emëruar një president të ri, pas arrestimit të kandidatit të fundit.

Të premten, gjyqtari i Gjykatës Supreme në Spanjë, Pablo Llarena ka kërkuar që 25 persona të gjykohen për rebelim dhe mosbindje ndaj shtetit.

Në mesin e tyre është edhe Puigdemont.

Kompania ajrore portugeze, TAP, ka kërkuar falje për bllokimin e më shumë se 100 pasagjerëve në aeroportin e Shtutgardit, në jugperëndim të Gjermanisë, pasi njëri nga fluturimet është anuluar në minutin e fundit meqë bashkëpiloti ishte i dehur, transmeton AP.

Vetëm pak minuta para se të realizohej fluturimi i kompanisë portueze TAP drejt Lisbonës, një punëtor i aeroportit ka vërejtur se kopiloti nuk ka ecur si duhet dhe ka mbajtur erë alkooli.

Ai ka njoftuar autoritetet e aeroportit, të cilat kanë vendosur që të anulojnë fluturimin.

Ende nuk është bërë e ditur nëse kopiloti 40 vjeçar është ndaluar nga autoritetet e sigurisë.

Agjencia e lajmeve dpa ka thënë sot se të gjithë 106 pasagjerët do të mund të udhëtojnë drejt Lisbonës në ditën e hënë.

Polici francez që dha vetën për një peng tek i armatosuri që zuri pengje në një supermarket dje në Francë, ka vdekur nga plagët e marra.

Arnaud Beltrame, 45 vjeçar, “ra si hero” dhe tregoj “guxim të jashtëzakonshëm”, ka thënë presidenti i Francës, Emmanuel Macron.

Beltrame ndihmoi që t’i jepej fund të armatosurit që kishte mbytur tri pengje në një komunë të vogël në jug të Francës.

25 vjeçari, Redouane Lakdim, u qëllua për vdekje pas një rredhimi disa orësh.

Duke lajmëruar vdekjen e oficerit policor në Twitter, ministri i Brendshëm i Francës, Gerard Coollomb tha se “ai vdiq për vendin e tij”.

“Franca kurrë nuk do ta harrojë heroizmin e tij, trimërinë dhe sakrificën”.

Më herët, vet Macron njoftoi se Beltrame po vuan nga plagët e marra dhe po lufton me jetën në spital.

16 njerëz u lënduan në total, dy seriozisht, në këtë ngjarje që Macron e quajti akti i terrorizimit islamik.

Lakdim thuhet të ketë kërkuar lirimin e Salah Abdeslam, figura kryesore që u zu pas sulmit të 13nëntorit në Paris kur mbetën të vdekur 130 njeëz.

Një person – që besohet të jetë partner i Lakdim – është arrestuar në lidhje me ngjarjen e djeshme.

Pamje pas shpërthimit në një uzinë kimike në Çeki

Pesë nga gjashtë personat e vrarë në shpërthimin në një uzinë kimike në Çeki janë nga Rumania, ka njoftuar Ministria e Jashtme në Bukuresht.

“Numri i shtetasve rumunë të vrarë në këtë tragjedi është rritur në pesë”, ka thënë kjo Ministri.

Incidenti ka ndodhur më 22 mars në qytetin Kralupy-nad-Vltavou, 30 kilometra në veri të Pragës.

Kombësia e viktimës së gjashtë ende nuk është bërë publike.

Ndërkaq, dy persona janë dërguar në spital dhe raportohet se njëri prej tyre ka “lëndime të rënda në fytyrë”, ndërkaq i lënduari i dytë ka plagë të shkaktuara nga djegia.

Uzina kimike ishte pjesë e një kompleksi të grupit kimik çek Unipetrol.

Shpërthimi ndodhi teksa po pastroheshin rezervuarët, kanë njoftuar shërbimet e emergjencës.

Tashmë kanë nisur hetimet lidhur me këtë shpërthim.

VOAL – Gjyqtari i Pablo Llarena i gjykatës supreme spanjolle ka akuzuar zyrtarisht për rebelim dhe paditi ish-presidentin Carles Puigdemont dhe 12 të tjerë katalanasit kryesorë pro-pavarësisë. Në mesin e tyre edhe kandidati presidencial Jordi Turull, ish-zëvendës president i rajonit Oriol Junqueras, i ish-presidenti i Parlamentit Carme Forcadell, dhe lideri i ERC Marta Rovira i cili të premten ka refuzuar të paraqitet përpara gjykatës njoftoi se ai do të largohet nga vendi.

Të trembëdhjetë separatistët duhet t’i përgjigjen përpjekjes për të shpallur pavarësinë e rajonit nga Spanja. Ata rrezikojnë 30 vjet burg.

Puidgemont, Junqueras dhe pesë ish-këshilltarë të tjerë gjithashtu akuzohen për përvetësim për shpenzimet e bëra për referendumin e 1 tetorit.

Pesë ish-anëtarët e tjerë të qeverisë katalane do të duhet gjithashtu t’i përgjigjen shpërdorimit të fondeve publike dhe mosbindjes. Një krim gjithashtu u akuzua kundër pesë ish-anëtarëve të zyrës presidenciale të parlamentit dhe politikanëve të tjerë duke përfshirë edhe Anna Gabriel rishfaqur në Gjenevë.

ATS

VOAL – PARIS, 23 MARS – Avokati i Nicolas Sarkozy, Thierry Herzog, njoftoi të enjten në mikrofonët e RTL-së qëllimin për të apeluar kundër masës së provës kundër klientit të tij, i hetuar që nga e mërkura për “ korrupsion pasiv, financim ilegal dhe marrjen e fondeve publike libiane “.
“Për çfarë arsyeje kjo liri është urdhëruar – pyeti Herzog – në Francë ekziston një shkallë e dyfishtë e juridiksionit. Sarkozy ka të drejtë të apelojë dhe do të apelojë dhe do të shohim se çfarë do të thonë gjykatësit hetues”.
Sipas asaj që është mësuar, masa kufizuese e imponuar ndaj ish-presidentit të republikës e ndalon, ndër të tjera, të takojë disa nga bashkëpunëtorët e tij të ngushtë, përfshirë ish-sekretarin e përgjithshëm të Eliseut, Claude Gueant, të përfshirë në historinë e burimeve libiane.

Gjykatësit francezë kanë ngritur aktakuzë nga ish-presidentit Nicolas Sarkozy për korrupsion dhe financim të paligjshëm të fushatës, në lidhje me dyshimet se ai ka marrë fonde nga diktatori i ndjerë libian, Muammar Qaddafi për fushatën e tij më 2007, kanë thënë zyrtarët.

Akuzat vijnë pasi Sarkozy për dy ditë është marrë në pyetje nga policia anti-korrupsion në Nanterre, në veriperëndim të Parisit. Gjyqtarët hetues janë duke hetuar mbi dyshimet se regjimi i Qaddafit në mënyrë të fshehur i ka dhënë Sarkozyt 50 milionë euro për fushatë.

Kjo shumë është dyfishi i shumës së lejuar për financim të fushatës në Francë.

Sarkozy, 63-vjeç, ishte president i Francës nga vitit 2007 deri më 2012.

Ai vazhdimisht ka mohuar këto akuza.

Ish-presidenti i Francës, Nicolas Sarkozy, po merret në pyetje për të dytën ditë me radhë, në lidhje me akuzat se fushata e tij zgjedhore më 2007 ka marrë fonde nga regjimi i diktatorit të ndjerë libian, Muammar Qaddafi.

Pasi ka kaluar natën në shtëpi, Sarkozy është kthyer në stacionin e policisë në Nanterre, në veriperëndim të Parisit, për t’u marrë në pyetje nga zyrtarët e policisë anti-korrupsion.

Hetimi gjyqësor ka nisur në vitin 2013, pasi ueb-faqja franceze e lajmeve Mediapart ka publikuar akuzat e biznesmenit francezo-libanez, Ziad Takieddine, se ai ka transferuar 5 milionë euro nga ish-shefi i inteligjencës së Qaddafit, Abdullah Senussi, te shefi i fushatës së Sarkozysë.

Sarkozy, 63 vjeç, i cili ka qenë president nga viti 2007 deri më 2012, ka mohuar vazhdimisht çdo keqbërje.

“BE duhet të hapë negociatat me Shqipërinë në qershor.” Thirrja e fortë është bërë nga Shefja e Politikës së Jashtme në Bashkimin Europian, Federica Mogherini duke folur në Parlamentin Europian, ku në qendër të diskutimit është Shqipëria dhe reformat e ndërmarra

Zyrtarja e lartë italiane tha se pret që Komisioni Europian të japë një “rekomandim të pakushtëzuar” për negociatat e pranimit të fillojë në “dy deri në tre muaj” të ardhshëm.

“Aderimi do të ishte i dobishëm jo vetëm për arsye ekonomike, por edhe për “pajtimin” e rajonit të Ballkanit”, tha ajo duke shtuar se “ Shqipëria ende mund të mos jetë gati për t’u bashkuar me bllokun prej 28 anëtarësh, por se ka bërë gjëra të pabesueshme në procesin e reformës në vitin e kaluar apo më shumë.”

“Ajo që unë shoh, megjithatë, është një vendosmëri e madhe dhe përkushtim, një ndjenjë e ‘të qënurit evropiane. Është kjo dëshirë dhe aspirata të jetë pjesë e BE-së, kjo energji Evropa ka nevojë aq shumë, veçanërisht në dritën e tendencave aktuale politike. Ajo na kujton se për çfarë është BE-ja.” theksoi zyrtarja e lartë italiane

Mogherini, gjithashtu foli me entuziazëm për progresin e bërë deri më tani, duke përmendur reformën gjyqësore dhe politikat e punëve të jashtme si shembuj kryesor.

“Sa i përket rezultateve që ka arritur në procesin e reformës, veçanërisht në reformën e drejtësisë dhe në politikën e jashtme, Shqipëria ka bërë gjëra të pabesueshme gjatë vitit të kaluar dhe po ecën në drejtimin e duhur. Ne jemi 100% në të njëjtën anë. ”

Ndërkohë nga ana e tij, Kryeministri Edi Rama, e cilësoi “qesharake” tendencën për ta etiketuar vendin e tij si një “kryeqytet kriminal” rajonal.

Ai pranoi se kishte ende probleme për t’u adresuar në lidhje me krimin e organizuar, korrupsionin dhe ndërtimin e institucioneve, por se vendi tani ishte gati të fillonte bisedimet e pranimit në BE.

“Nuk po themi se jemi gati për pranim sot dhe as nuk kërkojmë ndonjë dhuratë apo kënaqësi që është e pamerituar. Ne po themi vetëm se ka ardhur koha për të hapur bisedimet sepse e meritojmë. Një nga një kemi bërë çfarë na është kërkuar, jo sepse na është kërkuar nga Brukseli, por sepse është e mirë për vendin dhe gjeneratën e ardhshme. Skeptikët duhet të kuptojnë se hapja e bisedimeve nuk do të krijojë probleme të reja potenciale dhe se BE ka nevojë për Ballkanin ashtu siç Ballkani ka nevojë për BE”. u shpreh Kryeministri

Shqipëria është një kandidate zyrtare për anëtarësim në BE që nga qershori 2014 dhe është në axhendën aktuale për zgjerimin e ardhshëm. Shqipëria aplikoi për anëtarësim më 28 prill 2009.

Ndërkohë që Brukseli ka nënvizuar disa herë vendosmërinë për të pranuar Ballkanin në BE, brenda vitit 2025.

Ish-presidenti francez Nikolas Sarkozi ndodhet në paraburgim për t’u marrë në pyetje lidhur me akuzat se ai ka marrë fonde nga udhëheqësi i Libisë, Muammar Gaddafi.

Policia është duke hetuar parregullësitë lidhur me financimin e fushatës së tij presidenciale në vitin 2007. Sarkozi është pyetur edhe më parë në lidhje me këtë çështje. Sipas burimeve gjyqësore shkruan BBC, ish presidenti po ndodhet në Nanterre, një zonë periferike e Parisit perëndimor.

Në vitin 2013 në Francë u hap një hetim në lidhje me pohimet se fushata e tij kishte përfituar fonde të paligjshme nga Gadafi, ndërsa Sarkozi i ka mohuar këto akuza. Sipas burimeve në pyetje është marrë edhe një prej ish ministrave të Sarkozi Brice Hortefeux.

Pretendimet erdhën nga një biznesmen francezo-libanez, Ziad Takieddine dhe disa ish zyrtarë të regjimit të Gaddafit./

Burimi: BBC

Ministrat e Jashtëm të Bashkimit Evropian dënuan fuqishëm helmimin e një ish-agjenti rus në Britani dhe thanë se e kanë marrë “shumë seriozisht” vlerësimin e Londrës se Moska qëndron prapa sulmit.

Britania dhe aleatët e saj kanë fajësuar Moskën për sulmin kundër Sergei Skripalit dhe vajzës së tij, Yulia, më 4 mars, në Sallsbëri të Anglisë.

Dy viktimat mbeten në gjendje kritike për jetën.

“Bashkimi Evropian e merr seriozisht vlerësimin e Mbretërisë së Bashkuar se Federata Ruse, sipas të gjitha gjasave, është përgjegjëse”, thanë përmes një deklarate 28 ministrat e Jashtëm të BE-së.

“BE-ja shpreh solidaritet të pakufizuar me Mbretërinë e Bashkuar, përfshirë përpjekjet e saj për t’i sjellë përgjegjësit e këtij krimi para drejtësisë”, thuhet në deklaratë.

Kremlini, në anën tjetër, përsëriti se Britania duhet të dëshmojë përfshirjen e Rusisë në helmimin e Skripalit dhe të vajzës së tij ose të kërkojë falje.

“Herët ose vonë, këto akuza të pabaza do të duhet të marrin përgjigje”, tha zëdhënësi i Kremlinit, Dmitry Peskov.

NATO-ja do të nisë zhvendosjen e selisë së saj në Bruksel, pas disa vonesave të shkaktuara nga problemet teknike.

Zhvendosja e personelit prej rreth 4,000 vetash do të marrë 12 javë kohë, thanë zyrtarët.

Ndërtesa e re është pranë selisë ekzistuese të aleancës, e cila do të vazhdojë të shfrytëzohet gjatë periudhës së tranzicionit.

NATO ka thënë se objekti i ri do të ofrojë hapësirë për 1,500 anëtarë të stafit të aleancës, 1,700 pjesëtarë të stafit ushtarak ndërkombëtar dhe civil, 600 pjesëtarë të agjencive të NATO-s dhe rreth 500 vizitorë në ditë.

Kosotoja fillestare e shpenzimeve për selinë e re ka qenë 750 milionë euro, por shpenzimet aktuale janë rreth 1.17 miliardë euro.

Zhvendosja e selisë ka qenë e paraparë të bëhet në janar, por është shtyrë për shkak të problemeve të lidhura me teknologjinë e internetit.

Policët britanikë qëndrojnë në afërsi të vendit ku ka ndodhur sulmi me agjent nervor ndaj ish-spiunit rus

Ministri i Jashtëm çek Martin Strionicky ka hedhur poshtë sot akuzat e Moskës se agjenti nervor, që është përdorur kundër ish-spiunit rus Sergei Skripal dhe vajzës së tij Yulia në Britani, ka ardhur nga Republika Çeke.

Zëdhënësja e Ministrisë së Jashtme ruse, Maria Zakharova i ka thënë sot televizionit Rossiya 24 se ka shumë gjasa që burimi i agjentit nervor, i tipit Noviçok, të jetë në Britani, Republikën Çeke, Sllovaki, Suedi ose Shtetet e Bashkuara, transmeton agjencia Reuters.

Rusia ka dëbuar 23 diplomatë rusë, në kundërpërgjigje ndaj masave të ndërmarra nga Londra, e cila e akuzon Kremlinin se qëndron prapa sulmit me agjent nervor.

“Ne hedhim poshtë këto pretendime mbi origjinin e agjentit nervor, prentendime këto që nuk qëndrojnë”, ka shkruar ministri Stropnicky në Twitter.

“Kjo është formë standarde e manipulimit të informacionit, përmes mesazheve shumë spekulative të cilat po prezantohen dhe nuk mund të provohen nësa janë të sakta”, ka shkruar tutje ai.

Ndërkaq, ministrja e Mbrojtjes së Çekisë, Karla Slechtova, në një postim në Twitter ka thënë se është “absurde” të mendohet se agjenti nervor, që është përdorur për të helmuar ish-spiunin rus, të ketë origjininë në Republikën Çeke.

Ministri i Brendshëm i Gjermanisë, Horst Seehofer, tha se beson se “Islami nuk i përket” vendit të tij.

Në një intervistë për gazetën Bild, Seehofer tha se Gjermania “është e formësuar nga krishterimi” dhe se ajo nuk duhet të heqë dorë nga traditat e veta.

Seehofer po ashtu premtoi se do të rrisë dëbimet e azilkërkuesve të refuzuar.

Komentet e tij janë në kundërshtim me qëndrimin e kancelares gjermane, Angela Merkel.

Më shumë se një milion emigrantë kanë arritur në Gjermani pasi Merkel ka hapur dyert për azilkërkuesit sirianë në vitin 2015.

Kryeministri hungarez, Viktor Orban në marshin e mbajtur sot në Budapest.

Dhjetëra mijëra mbështetës të kryeministrit të Hungarisë, Viktor Orban kanë marshuar sot në përkrahje të tij, duke shpresuar se ai do ta fitojë edhe një tjetër mandat në zgjedhjet e 8 prillit që mbahen në këtë vend.

Atyre u janë bashkuar edhe mijëra mbështetës të partisë konservatore PiS, që udhëheq në Poloni.

Sikur partia polake ashtu edhe partia Fidesz e Orbanit po përballen me Bashkimin Evropian pasi kanë mendime të ndara për emigrimin si dhe për lëvizjet rreth rritjes së kontrollit në gjykata dhe media.

Organizatorët kanë dërguar me autobusë protestuesit polakë dhe ata hungarezë drejt Budapestit, për të marshuar në ditën e cila përkon edhe me revolucionin e vitit 1848 në këtë shtet.

Orban dhe kryeministri polak, Mateusz Moraëiecki udhëheqin qeveri konservatore, nën presionin e Brukselit për shkak të refuzimit që të pranojnë migrantë sipas sistemit të kuotave.

Mbështetësit e të dyja partive kanë ecur në rrugët e Budapestit duke bartur banerë me slloganet “Hungaria e mbron Evropën” dhe “Ne jemi me ty Viktor”.

Orban ka thënë në marsh se armiqtë, “dëshirojnë të na e marrin shtetin”.

Kryeministri sllovak, Robert Fico ka thënë se ai është i gatshëm për t’u dorëhequr nëse presidenti pranon që koalicioni aktual të vazhdojë qeverisjen pa mbajtur zgjedhje të parakohshme, transmeton BBC.

Fico ka thënë se ai është gati të prezantojë një kandidat për kryeministër nga partia e tij.

Deklarata e tij vjen pas skandalit të shkaktuar nga vrasja e gazetarit sllovak, Jan Kuciak dhe të dashurës së tij, Martina Kusnirova.

Kuciak ishte duke hetuar korrupsionin qeveritar kur është vrarë.

“Sot kam ofruar dorëheqjen time te presidenti i republikës”, ka thënë Fico në një konferencë për media.

“Nëse presidenti pranon, jam i gatshëm të dorëhiqem nesër”, ka shtuar ai. /Rel

Banka Kombëtare e Hungarisë (MNB) ka njoftuar se do të sjellë në shtëpi rreth 3 tonë rezerva ari nga Londra.

Vendimi për riatdhesimin e rezervave të arit, gjithsej me vlerë 33 miliardë forintë hungarezë (130 milionë dollarë amerikanë), u shpjegua për arsye të sigurisë, në rast të ndonjë krize të mundshme gjeopolitike.

Tërheqja e rezervave të arit është një thuajse një tendencë ndërkombëtare, pasi ruajtja jashtë vendit konsiderohet e rrezikshme nga shumë banka qendrore, duke përfshirë ato austriake, gjermane dhe holandeze. Kohët e fundit ata kanë vendosur të riatdhesojnë rezervat e tyre të arit.

Banka qendrore e Hungarisë ka ruajtur rezervat e arit që nga themelimi i saj në 1924. Shuma u rrit vazhdimisht deri në Luftën e Dytë Botërore. Shuma më e madhe e arit të mbajtur ishte rreth 65-70 ton në fillim të viteve 1970.

Banka më pas vendosi të ulë rezervat e arit në nivelin më të ulët të mundshëm dhe të investojë në borxhin sovran të vendit.

Në fillim të vitit 2010, tendenca për të mbajtur rezervat jashtë vendit ka ndryshuar përsëri dhe bankat qendrore kanë filluar të grumbullojnë arin si një përgjigje të mundshme ndaj një krize financiare.

SHBA dhe Gjermania janë aktualisht mbajtësit më të mëdhenj në botë të arit. Hungaria ka një nga sasitë më të vogla të metaleve të çmuara krahasuar me vendet e tjera të Evropës Qendrore. Që nga viti 1992, aktiviteti i Budapestit ka mbetur i qëndrueshëm pasi MNB nuk ka blerë ose shitur asnjë nga rezervat e saj të arit.