Mungesa e energjisë elektrike në disa pjesë të qytetit shkaktoi turma të mëdha në njërin prej aeroporteve më të frekuentuar në Evropë

AMSTERDAM – Për shkak të mungesës së energjisë elektrike në aeroportin ndërkombëtar “Schiphol” në Amsterdam janë anuluar dhe shtyrë për disa orë një numër i madh i fluturimeve.

Mungesa e energjisë elektrike në disa pjesë të qytetit shkaktoi turma të mëdha në njërin prej aeroporteve më të frekuentuar në Evropë.

Autoritetet sot urdhëruan mbylljen e rrugëve dhe linjës hekurudhore drejt aeroportit në periferi të kryeqendrës holandeze.

Në ueb faqen e aeroportit njoftohet se sistemi kompjuterik për paraqitje sërish është në funksion, por paralajmëruan pasagjerët që të kontrollojnë radhën e fluturimit.

Siç theksuan në aeroport, në periudhën prej orës 09:00 deri në orën 11:00 do të ulet kapaciteti i fluturimeve ardhëse, si dhe disa fluturime janë anuluar.

Kompania kombëtare energjetike holandeze Tennet njoftoi se është duke hetuar shkakun e mungesës së energjisë elektrike. aa

“Evropa po humb fuqinë në skenën botërore, po mendojmë se jemi padroni i botës, por në të vërtetë ne harrojmë që ne jemi një pjesë e vogël dhe e dobët e universit”, ka deklaruar Juncker

BRUKSEL – Presidenti i Komisionit Evropian (BE), Jean-Claude Juncker, tha se “Evropa po humb fuqinë në skenën botërore, po mendojmë se jemi padroni i botës, por në të vërtetë ne harrojmë që ne jemi një pjesë e vogël dhe e dobët e universit”.

Juncker ka folur për gazetën holandeze “Trow” ku bëri deklarata në lidhje me ekonominë e BE-së, situatën demografike dhe marrëdhëniet me Rusinë.

Ai ka theksuar se Evropa dhe Rusia duhet të fokusohen se si të formojnë sërish lidhjet duke lënë pas retorikën e Luftës së Ftohtë, duke shtuar: “Shoku im Putin, pavarësisht se askush nuk ka guximin të shprehet sot ‘shoku im Putin’ ne jemi shokë që prej shumë vitesh”. Sipas tij, Rusia është më shumë se një fuqi rajonale dhe tha se “duhet të mësojmë të flasim si të barabartë me rusët”.

Gjithashtu ai ka theksuar se siguria e Evropës nuk mund të ndërtohet pa Rusinë.

– “Si evropianë mendojmë se jemi padronë të botës”

“Evropa po humbet fuqinë në skenën botërore, po mendojmë se jemi padroni i botës, por në të vërtetë ne harrojmë që ne jemi një pjesë e vogël dhe e dobët e universit”, ka deklaruar Juncker.

Pasi ka tërhequr vëmendjen se Evropa ka rënë si një fuqi ekonomike dhe ka humbur fuqinë e saj demografike, Juncker tha: “Jemi të pranishëm nga pikëpamja kulturore, por nuk jemi dominues. Për këtë arsye unë i ftoj të gjithë që të jenë më modestë dhe të dëgjojnë pjesën tjetër të botës”.

“BE-ja nuk është një union kristian”, tha ai duke shtuar se kristianizmi ka ofruar kontribute të mëdha për zhvillimin e Evropës. “Në territoret tona jetojnë edhe myslimanë. Ata do të vazhdojnë të kenë vend në territoret tona për sa kohë që ata zbatojnë rregullat tona”, tha Juncker. aa

Qeveria suedeze ka përgatitur një projektligj sipas të cilit parashihet leje qëndrimi në vend për rreth 9 mijë refugjatë të rinj nga Afganistani, me kushtin për të vazhduar shkollimin

STOCKHOLM – Qeveria e Suedisë ka përgatitur një projektligj sipas të cilit parashihet leje qëndrimi në vend për rreth 9 mijë refugjatë të rinj nga Afganistani, me kushtin për të vazhduar shkollimin.

Televizioni shtetëror suedez SVT njoftoi se gjatë krizës së refugjatëve në vitin 2015, në këtë vend kanë arritur 20 mijë emigrantë të pashoqëruar. Shteti ka dhënë azil për 11.000 prej tyre të cilët ishin nën moshën 18 vjeç, ndërsa pjesa tjetër prej 9 mijë që ishin të moshës mbi 18 vjeç, asokohe nuk fituan azil.

Qeveria e Suedisë ka vendosur për të ndihmuar emigrantët tjerë të rinj nga Afganistani, duke përgatitur një projekt-ligj, sipas të cilit 9 mijë afganë të rinj marrin leje qëndrimi, por me kusht që të vazhdojnë shkollimin e tyre.

Kryetarja e Partisë Liberale në pushtet, Annie Loof, deklaroi se partia e saj mbështeti projekt-ligjin dhe se do ta mbështeste atë gjatë votimit në parlament.

Megjithatë, deklarata e saj për mbështetjen e projektligjit në fjalë ka hasur në reagime të qarqeve raciste dhe ekstreme të krahut të djathtë.

Kështu, në rrjetet sociale u shfaq një fotografi e Loof me shami në kokë dhe nën të shkruante: “Shumica e 9 mijë afganëve janë terroristë, banditë dhe vrasës, popull i Suedisë zgjohu”.

Kryeministri suedez, Stefan Löfven dhe ministri i Arsimit të Suedisë, Gustav Fridolin reaguan ashpër ndaj këtyre pretendimeve.

“Jam shumë i zhgënjyer nga kërcënimet drejtuar Loof. Çfarëdo që të bëhet, Loff është një person e cila është shumë mirë e njohur për të gjithë. Me një qëndrim njerëzor ajo zgjedh një rrugë të vështirë në politikën suedeze”, tha Fridolin. aa

Komisioni Evropian, publikoi masat për të rritur investimet dhe forcimin e konkurrencës në fushën e inteligjencës artificiale në shtetet anëtare

BRUKSEL – Komisioni i Bashkimit Evropian (BE), njoftoi se deri në vitin 2020 do të investojë 1.5 miliardë dollarë në programet e hulumtimit dhe zhvillimit në fushën e inteligjencës artificiale.

Komisioni Evropian, publikoi masat për të rritur investimet dhe forcimin e konkurrencës në fushën e inteligjencës artificiale në shtetet anëtare.

Sipas kësaj BE-ja nga programi Horizon 2020, të cilën e krijoi për të mbështetur kërkimet shkencore, projektet e zhvillimit dhe inovacionit, do të realizojë një investim prej 1.5 miliardë dollarë në fushën e inteligjencës artificiale.

Me këtë burim do të mbështetet zhvillimi i inteligjencës artificiale në sektorët e rëndësishëm si transport dhe shëndetësi.

Ndërkohë, në shtetet anëtare të BE-së në fushën e inteligjencës artificiale në vit ndahen burime prej gjithsej 4 miliardë dollarë, ndërsa kjo shifër në SHBA kalon 20 miliardë dollarë. aa

Këshilli ministror i shtetit vendosi që nga 1 qershori, në pjesët hyrëse të institucioneve publike në këtë shtet të varet kryqi

BERLIN – Në shtetin jugor gjerman të Bavarisë është vendosur detyrimi i varjes së kryqit në institucione publik.

Këshilli ministror i shtetit vendosi që nga 1 qershori, në pjesët hyrëse të institucioneve publike në këtë shtet të varet kryqi.

Kryeministri i Shtetit të Bavarisë nga Partia Unioni Kristian-Social (CSU), Markus Söder, tha se kryqi përtej një simboli fetar është “vula kulturore” e shtetit të Bavarisë.

“Kryqi nuk është një simbol që i përket një feje”, deklaroi, duke shtuar se vendimi i marrë nuk përfshin ndërtesat e institucioneve të qeverisë federale.

Vendim i qeverisë së shtetit shkaktoi reagime të shumta.

Të Gjelbërtit, Partia e Majtë dhe Partia e Lirë Demokratike kritikuan vendimin në fjalë, duke thënë se në vend të simboleve, në politikat ditore duhet të vendoset toleranca dhe dashuria.

Reagime kanë pasuar edhe në mesin e përdoruesve të rrjeteve sociale.

“Unë e dija se shteti dhe kisha janë të ndarë nga njëra-tjetra”; “Sa keq! Unë mendoja se kemi lënë prapa Mesjetën”, ishin disa nga reagimet në rrjetet sociale.

Shteti i Bavarisë edhe më parë ka sjellur detyrimin për vendosjen e kryqit në shkollat shtetërore dhe në sallat e gjykatave.

Ministri i Brendshëm i Gjermanisë, Horst Seehofer, më parë ka deklaruar se “Islami nuk i përket Gjermanisë”, duke tërhequr reagime nga kancelarja gjermane Angela Merkel, e cila ka kritikuar këtë deklaratë duke thenë tha se edhe muslimanët dhe feja e tyre Islami i përkasin Gjermanisë. aa

Në vitin 2015 në Belgjikë kishin humbur 277 fëmijë refugjatë, 284 në vitin 2016, ndërsa vitin e kaluar ky numër është rritur në 618

BRUKSEL – Sipas të dhënave të publikuara nga organizata joqeveritare Child Focus, vitin e kaluar në Belgjikë janë humbur 618 fëmijë refugjatë të pashoqëruar.

Sipas Child Focus, organizatë e cila kryen hulumtime mbi fëmijët e humbur dhe të abuzuar seksualisht në Belgjikë, krahasuar me vitet e kaluara në vitin 2017 kishte një rritje serioze në numrin e fëmijëve refugjatë të humbur.

Child Focus thekson se në vitin 2015 ishin humbur 277 fëmijë refugjatë, 284 fëmijë në vitin 2016, ndërsa vitin e kaluar ky numër është rritur në 618.

Organizata shpreh shqetësimin se fëmijët refugjatë janë kapur nga abuzuesit.

Duke u shprehur se “këto shifrja janë një pjesë e vogël i një problemi shumë të madh”, zyrtarët e Child Focus thonë se po përpiqen që fëmijët t’i drejtojnë në qendrat e refugjatëve, por që këta fëmijë në masë të madhe po ikin me dëshirë që të kalojnë në shtetet tjera. aa

ETA, përgjegjëse për vrasjen e mbi 800 njerëzve, përfshirë policë, politikanë dhe biznesmenë, muajin e ardhshëm do të njoftojë zyrtarisht shpërbërjen e saj

MADRID – Organizata paramilitare baske ETA, sot tha se ndjen keqardhje për vuajtjet që ka shkaktuar, në kohën e fushatës së saj të armatosur për pavarësinë e Baskisë nga Spanja, ndërkohë që premtoi se kurrë nuk do t’i kthehet dhunës.

Në një njoftim të botuar nga të përditshmet baske “Beria” dhe “Gara”, ETA pranon fajin për dhimbjet e shkaktuara gjatë fushatës së saj të armatosur, ndërkohë që shpreh përkushtimin për tejkalimin përfundimtar të pasojave të konfliktit dhe mospërsëritjen e tij.

“Me të vërtetë ndjemë keqardhje”, thuhet në kumtesë.

Transmetuesi publik bask, ETB, publikoi se organizata ETA, përgjegjëse për vrasjen e mbi 800 njerëzve, përfshirë policë, politikanë dhe biznesmenë, muajin e ardhshëm do të njoftojë zyrtarisht shpërbërjen e saj.

Pas mbi katër dekada të sulmeve me autobomba, dhe armë tjera, përfshirë rrëmbimet, ETA në vitin 2011 hoqi dorë nga fushata e dhunshme, ndërsa në vitin e kaluar dorëzoi armët. aa

Organizata terroriste në fjalë, do të shpallë vendimin më 5 maj, gjatë një eventi në qytetin francez Bayonne

MADRID – Grupi separatist bask ETA planifikon në fillim të muajit të ardhshëm të njoftojë shpërbërjen e tij, pasi paraprakisht vitin e kaluar, pranoi një armëpushim dhe braktisjen e armëve.

Agjencia spanjolle e lajmeve EFE, shkruan se organizata terroriste në fjalë do të shpallë vendimin më 5 maj, gjatë një eventi në qytetin francez Bayonne.

E themeluar në vitin 1959, përmes luftës së armatosur ETA u përpoq të arrijë themelimin e shtetit të pavarur të Baskisë, i cili do të shtrihej në veri të Spanjës dhe jugperëndim të Francës.

ETA akuzohet për vrasjen e të paktën 800 njerëzve dhe për rrëmbimin e dhjetëra të tjerëve.

Organizata e cila në prill të vitit 2017 njoftoi braktisjen e armëve, është në listat e organizatave terroriste në BE-së dhe SHBA.

Gjithsej 228 persona të akuzuar për pjesëtarë të ETA-s ndodhen në burgjet e Spanjës, ndërkohë që 52 të tjerë në burgjet e Francës dhe një tjetër në Portugali.

Përkundër shpërbërjes së ETA-s, të dënuarit nuk pritet të lirohen nga burgjet. aa

Keukenhof tërheq jo vetëm përfaqësuesit e botës së biznesit të kopshtarisë, por edhe fotografë dhe admirues të tjerë të luleve çdo vit me koncepte të ndryshme

AMSTERDAM – Qyteti Keukenhof i Holandës llogaritet si kopshti më i madh i tulipanit në botë, ndërsa këtë vit vizitorët priten me temë “Romancë në lule”.

E vendosur jo shumë larg qytetit të Lisse, Keukenhof tërheq jo vetëm përfaqësuesit e botës së biznesit të kopshtarisë, por edhe fotografë dhe admirues të tjerë të luleve çdo vit me koncepte të ndryshme. Parku mori emrin sipas kështjellës Keukenhof.

Ngjarja për shkak të jetëgjatësisë së shkurtër të tulipanit do të jetë e hapur nga fundi i marsit deri në mesin e muajit të pestë, ndërkaq edicioni i këtij viti do të zgjasë deri më 13 maj.

Fokusi i parkut është në pothuajse 7 milionë copë lule, që mundëson një numër kompanish të prezantojnë katalogë te tyre të gjallërisë. Rreth 500 kultivuesve kanë mundësinë të ekspozojnë një gamë të gjerë lulesh.

Ekipi i ekspertëve përpiqet të sigurojë për të gjithë ekspozuesit një hapësirë të veçantë që plotëson nevojat e tyre.

Rreth 20 fermerëve në vitin 1949 u lindi ideja për të organizuar një manifestim në formën e ekspozimit të luleve, e cila ishte një sinjal për ngjarjen në Keukenhof në formën e parkut të pranverës.

Për publikun u hap në vitin 1950 dhe menjëherë shënoi sukses të madh, kur u vizitua nga rreth 236,000 njerëz. Këtë vit organizohet edicioni i 69-të, kurse organizatorët presin një numër të madh vizitorësh edhe kësaj radhe. aa

“Nëse i largojmë këto shtete nga perspektiva e BE-së, do t’i përjetojmë përsëri ngjarjet që i përjetuam në vitet 1990. Nuk dua që Ballkani Perëndimor të kthehet përsëri në luftë”

STRASBURG – Presidenti i Komisionit Evropian, Jean-Claude Juncker, është shprehur se shtetet e Ballkanit Perëndimor nuk duhet të largohen nga perspektiva e BE-së, dhe paralajmëroi se ne të kundërtën paraqitet rreziku i kthimit në vitet 1990.

Juncker mbajti një fjalim në Asamblenë e Përgjithshme të Parlamentit Evropian (PE), e cila po vazhdon në Strasburg.

Pas fjalimit të presidentit të Francës, Emmanuel Macron, në Asamblenë e Përgjithshme, fjalën e mori Juncker, i cili vlerësoi fjalët e Macron-it për të ardhmen e BE-së dhe për “sovranitetin evropian”.

Duke rikujtuar se BE në vitin 2003 ka dhënë premtime për shtetet e Ballkanit si perspektiva e së ardhmes, Juncker thotë se “Unë nuk jam naiv, jam në dijeni të problemeve. Jam në dijeni të përpjekjeve që duhet të tregojnë shtetet e Ballkanit Perëndimor. Nëse i largojmë këto shtete nga perspektiva e BE-së, do t’i përjetojmë përsëri ngjarjet që i përjetuam në vitet 1990. Nuk dua që Ballkani Perëndimor të kthehet përsëri në luftë”.

Duke iu drejtuar Macronit me fjalët “Franca e vërtetë u rikthye”, Juncker thotë se është i kënaqur nga afrimi i Gjermanisë dhe të Francës.

“Por BE-ja nuk përbëhet vetëm nga Franca dhe Gjermania. BE-ja ka 28 anëtarë. Nesër do të bëhemi 27 (Brexit). Në mënyrë që ky motor të vazhdojë të punojë, nevojitet bashkëpunimi edhe me të tjerët”.

Shtetet si Serbia dhe Mali i Zi nga Ballkani Perëndimor po i vazhdojnë negociatat për anëtarësim në BE.

Përfaqësuesja e Lartë e Bashkimit Evropian (BE) për Politikë të Jashtme dhe Siguri, Federica Mogherini në muajin shkurt kishte prezantuar strategjinë për Ballkanin Perëndimor, ku kishte theksuar se “Viti 2025 nuk është datë e anëtarësimit, por një perspektivë e vërtetë për Ballkanin”. aa

“SHBA-të me të cilët u bashkuam në operacion e kuptojnë plotësisht se misioni ynë në Siri nuk është vetëm për të luftuar me DEASH (ISIS), por ai përfshin edhe përgjegjësitë humanitare dhe ndërtimin e paqes”

PARIS – Presidenti francez, Emmanuel Macron, tha se nuk ka pikëpamje të ndara mes vendit të tij dhe SHBA-ve në çështjen e objektivave dhe mbrojtjes së pranisë ushtarake në Siri.

Në një konferencë të përbashkët për shtyp në rezidencën presidenciale Elysee pas takimit me kryeministren e Zelandës së Re, Jacinda Ardern, Macron ka theksuar se që nga fillimi koalicionit ndërkombëtar në Siri ka patur qëllimin e luftës kundër DEASH-it.

“Ajo që Shtëpia e Bardhë ka mbrojtur është pozicioni që ne kemi qenë duke mbrojtur që nga fillimi. Nuk ka pikëpamje të ndara mes Shteteve të Bashkuara të Amerikës dhe Francës. Edhe unë nuk thashë se SHBA dhe Franca do të qëndronin në Siri për qëllime ushtarake për një kohë të gjatë. Kam arsye të them se SHBA-të me të cilët u bashkuam në operacion e kuptojnë plotësisht se misioni ynë në Siri nuk është vetëm për të luftuar me DEASH, por ai përfshin edhe përgjegjësitë humanitare dhe ndërtimin e paqes. Ne në Siri kemi vetëm një armik dhe ai është DEASH-i”.

Pasi ka rikujtuar se Asadi kryen operacione të papranueshme kundër popullit me pretekstin e DEASH-it, dhe se ai nuk zbaton vendimet e Këshillit të Sigurisë së Kombeve të Bashkuara (KS-OKB), Macron tha se “Në këtë kuadër legjitim Franca, SHBA-ja dhe Britania kanë kryer ndërhyrje”.

Macron ka shtuar se Franca ka tre përparësi në rajon, të cilat janë lufta kundër terrorizmit, dërgimi i ndihmave humanitare dhe vendosja e armëpushimit si dhe përgatitjen e një zgjidhjeje politike gjithëpërfshirëse për të ardhmen e Sirisë.

Në një program televiziv mbrëmë Macron ishte shprehur se “10 ditë më parë presidenti amerikan, Donald Trump, ishte shprehur se do të tërhiqte ushtarët nga Siria. Ne bindëm amerikanët që të qëndronin në Siri. Në të njëjtën kohë kemi siguruar që operacioni të ishte i kufizuar vetëm me qendrat për prodhimin e armëve kimike”.

Ndërsa zëdhënësja e Shtëpisë së Bardhë, Sarah Sanders, në lidhje me deklaratën e Macron kishte theksuar se “Presidenti Trump është i qartë në çështjen se dëshiron që ushtarët amerikanë të kthehen në shtëpitë e tyre në kohën më të shpejtë”. aa

“Nëse duam të jemi në unitet, duhet të pranojmë lirinë e fesë dhe besimit”, ka theksuar Macron, duke bërë të ditur se sot ka 4.5 deri në 6 milionë qytetarë myslimanë francezë

PARIS – Presidenti francez, Emmanuel Macron, është shprehur se “nëse duam të jemi në unitet, duhet të pranojmë lirinë e fesë dhe besimit”.

Macron i është përgjigjur pyetjeve të gazetarëve në një program special të publikuar nga BFMTV dhe Mediapart. Ai pyetjes në lidhje me myslimanët dhe mbulesën në vend, i është përgjigjur se kryesisht feja islame është përhapur në Francë pas emigrimeve dhe lëvizjeve të popullsisë.

“Për Francën kryesisht kjo fe konsiderohet e re. Historikisht Franca ka patur lidhje me katolikët, protestantët dhe hebraikët. Shumë nga bashkatdhetarët tanë kanë frikë nga ky fenomen i ri. Nëse duam të jemi në unitet, duhet të pranojmë lirinë e fesë dhe besimit”, ka theksuar Macron, duke bërë të ditur se sot ka 4.5 deri në 6 milionë qytetarë myslimanë francezë.

Më tej Macron ka nënvizuar se kjo frikë është ushqyer për shkak të rrymave radikale dhe se kjo nuk paraqet Islamin e vërtetë.

Pyetjes “Çfarë ndieni kur përballeni me një grua të mbuluar?”, Macron i është përgjigjur “e respektoj dhe gjithashtu ndaj kësaj duhet të tregohet respekt edhe në Francë.”

Ai duke vënë në dukje se nuk është pro një rregullimi ligjor që do të sillte ndalimin e shamive në Francë, Macron ka përmendur ndryshimet e mënyrës së jetesës tradicionale franceze me fenë islame.

Në lidhje me çështjen e pjesëmarrjes së nënave të mbuluara bashkë më fëmijët e tyre në aktivitetet dhe shëtitjet e shkollave, që në një kohë në Francë u bë temë diskutimesh, presidenti Macron u shpreh: “Nëse ato janë qytetarë, nuk janë punonjës apo me detyrë në shkollë, ata mund t’i vendosin shamitë e tyre të mbulesës sepse shkolla është laike, shoqëria nuk është laike”. aa

BARCELONË – Më shumë se 100 000 mbështetës të pavarësisë së Katalonjës sot protestojnë nëpër rrugët e Barcelonës duke kërkuar lirimin e liderëve separatistë, të cilët gjendet në paraburgime para gjykimit.

Demonstratat e sotme i organizuan grupe që angazhohen për pavarësimin e Katalonjës, lëvizja qytetare Kuvendi Popullor Katalanas (ANC) dhe Omnium, kryetarët e të cilëve janë mes nëntë separatistëve që momentalisht janë në burg dhe presin gjykimin me rastin e referendumit të vitit të kaluar për shkëputjen e rajonit spanjoll.

Dy sindikata kryesuese të punëtorëve në Spanjë mbështesin protestën krahas ankesave të disa anëtarëve të tyre të cilët nuk dëshirojnë pavarësimin e Katalonjës.

Lëvizja për shkëputjen e këtij rajoni të pasur e sjelli Spanjën deri te kriza më e thellë institucionale gjatë disa dekadave të fundit. Partitë që angazhohen për pavarësinë e Katalonjës përbëjnë shumicën në parlamentin rajonal edhe pas zgjedhjeve të dhjetorit. aa

PARIS – Sipas një studimi në Francë, 81 për qind e grave janë të ekspozuara ndaj ngacmimeve fizike ose verbale në rrugë apo në transportin publik.

Instituti i Hulumtimit të Opinionit Publik Francez (IFOP) ka publikuar rezultatet e hulumtimit të kryer më 26-29 janar me pjesëmarrjen e 2 mijë grave mbi moshën 15-vjeçare në kuadrin e javës ndërkombëtare kundër ngacmimeve seksuale në hapësirat publike.

Sipas hulumtimit, 81 për qind e grave janë të ekspozuara ndaj ngacmimeve fizike ose verbale në rrugë apo në transportin publik.

Ndër të tjera theksohet se 38 për qind e grave janë sulmuar seksualisht në transportin publik. Kjo përqindje është 21 për qind në rrugë. Ndërsa 44 për qind e grave mendojnë se sulmuesi i ndjek ata gjatë udhëtimit. 32 për qind e grave që morën pjesë në anketim raportuan për ngacmime dhe sulme fizike dhe 8 për qind janë shprehur se janë përballur me përdhunime.

Ministria franceze e Punëve të Brendshme në një raport të publikuar në muajin dhjetor njoftoi se çdo vit mesatarisht 220,000 të rritur në vend janë përballur me veprën e sulmit dhe përdhunimit seksual dhe se 86 për qind e këtyre personave nuk kanë kryer kallëzim penal dhe se 40 për qind e këtyre që janë ankuar janë tërhequr nga padia e tyre. aa