Komisioni Evropian vlerëson se Kosovës dhe Serbisë duhet t’iu jepet hapësirë që të merren vesh për përmbajtjen e marrëveshjes për normalizimin e marrëdhënieve, tha zëdhënësja e Komisionit, Maja Kocijançiç.
Në një konferencë për gazetarët në Bruksel, Kocijançiq tha se BE-ja, si ndërmjetësuese e dialogut, nuk mund t’i komentojë elementet e mundshme të marrëveshjes, porse do të vazhdojë të punojë në mënyrë intensive me të dyja palët për arritjen e një ujdie gjithëpërfshirëse dhe të qëndrueshme, e cila do të mbështetet nga bashkësia ndërkombëtare.
Kocijançiq theksoi se “zgjidhja e përhershme nënkupton zgjidhje të qëndrueshme dhe reale, në përputhje me të drejtën ndërkombëtare”.
E pyetur nga gazetarët nëse BE pranon ndryshimin e kufijve, shkëmbim të territoreve dhe territore të pastra etnike, Kocijançiq tha se nuk dëshiron të futet në spekulime dhe detaje “në këtë fazë të fundit të dialogut”.
Papa Françesku ka refuzuar të përgjigjet ndaj pretendimeve të një ish-diplomati të Vatikanit, peshkopit, Carlo Maria Vigano, i cili i ka kërkuar të dorëhiqet.
Peshkopi Vigano e ka akuzuar Papën për mbulim të akuzave rreth abuzimeve seksuale nga një kardinal amerikan.
Papa është pyetur për akuzat nga gazetarët teksa ishte duke u kthyer në Romë, pasi vizitës së tij në Irlandë.
Ai ka thënë se nuk do të flasë as edhe një fjalë për letrën 11 faqëshe të peshkopit Vigano.
“Po e them sinqerisht sepse me duhet ta them këtë për ju”, ka thënë ai kur është pyetur për letrën “dhe për të gjithë ata që janë të interesuar: Lexoni me kujdes dokumentin dhe gjykoni personalisht.
“Unë nuk do të flas asgjë për këtë. Mendoj se deklarata flet vetë”.
Letra është publikuar derisa Papa ishte duke mbajtur një fjalim për abuzimet seksuale nga priftërinjtë gjatë një vizite në Irlandë.
Ky dokument ka ngritur dyshime nëse Papa është duke u përballur me sulme të koordinuara nga tradicionalistët në hierarkinë katolike.
“Ju keni kapacitet të mjaftueshëm për të krijuar përfundime”, u ka thënë Papa gazetarëve.
“Kur të kalojë koha dhe të keni përfundimet, ndoshta do të flas”, është shprehur ai.
BERLIN – Gjermania planifikon të formojë Agjenci të Sigurisë Kibernetike e mbështetur nga Ministritë e Brendshme dhe të Mbrojtjes për të zhvilluar armët e saj kibernetike.
Siç raporton gazeta ekonomike gjermane Handelsblatt, me agjencinë që do të formohet synohet të lehtësohet përshtatja e vendit në teknologjitë e re në sigurinë kibernetike dhe mundësimin e zhvillimit të armëve të saj kibernetike.
Agjencia që do të formohet do të marrë si shembull Agjencinë e lidhur me Departamentin Amerikan të Mbrojtjes amerikane për Projekte Kërkimore të Mbrojtjes së Avancuar (DARPA).
Planifikohet që në fillim të ketë buxhet prej 15 milionë euro me 20 deri në 30 punonjës, ndërsa për një kohë të shkurtër 100 punonjës dhe 50 milionë euro buxhet.
Ushtria gjermane Bundewehr në aspektin e sigurisë kibernetike është e varur në softueret ushtarake amerikane, ndërsa me agjencinë e re qeveria do të zvogëlojë burokracinë ushtarake, ndërsa synon të rrisë aktivitetet për hulumtim dhe zhvillimin në sigurinë kibernetike.
Agjencia gjithashtu do të bashkëpunojë me botën shkencore dhe të biznesit. aa
Futbollisti Cristiano Ronaldo ka thënë se ka qenë i lehtë transferimi i tij nga ekipi i Real Madridit në Juventus, teksa ai synon të bëhet lojtari i dytë që fiton trofeun në Ligën e Kampionëve në tri klube të ndryshme.
“Dua të fitoj Ligën e Kampionëve me Juventusin dhe do të bëjë gjithçka për ta fituar atë”, ka thënë portugezi 33 vjeçar, në një intervistë për transmetuesin, DAZN.
Ronaldo ka fituar pesë tituj në Ligën e Kampionëve, katër sa ishte në klubin, Real Madrid dhe një sa ishte pjesë e Manchester United.
Një tjetër titull do të bashkonte atë me holandezin, Clarence Seedorf, i cili është lojtari i vetëm që ka fituar trofe evropianë me tri klube të ndryshme.
Seedorf ka fituar titullin evropian katër herë me ekipet si: Ajax, Real Madrid dhe dy herë me Milanin në vitet 1995 dhe 2007.
“Ne do të fokusohemi me pjesëtarët tjerë të ekipit, mirëpo pa u obsesionuar. Ne do të shkojmë hap pas hapi dhe do të shohim nëse do të ndodhë këtë vit, tjetrin apo tjetrin në rradhë”, është shprehur ai.
Juventus në anën tjetër, ka ngritur kupën në Ligën e Kampionëve dy herë, më 1985 dhe 1996.
Çekët dhe sllovakët shënojnë të martën 50-vjetorin prej kur tanket sovjetike kanë shtypur lëvizjen demokratike reformuese të njohur si “Pranvera e Pragës”.
Lëvizja, e cila në atë kohë ishte në rritje e sipër dhe drejtohej nga lideri i Partisë Komuniste, Alexander Dubcek, kishte synim të vendoste përmes reformave demokratike, “një fytyrë njeriu në socializëm” për të luftuar regjimin totalitar.
Mirëpo në natën mes 20-21 gushtit të vitit 1968, ushtarët sovjetikë, të mbështetur nga forcat bullgare, hungareze, polake dhe ata të Gjermanisë Lindore, i kanë dhënë fund lëvizjes në fjalë.
Rreth 50 çekë dhe sllovakë janë vrarë në një ditë të vetme, derisa numri total i viktimave të pushtimit sovjetik ka arritur në 402, bazuar në historianë.
Ushtari i fundit sovjetik është larguar nga ky territor vetëm më 1991, dy vjet pas Revolucionit të Kadifenjtë, i cili ka larguar rregullin komunist.
“Qytetarët tanë kanë kundërshtuar kategorisht pushtimin. Mirëpo edhe tani, një pjesë e publikut rus vazhdon ta mendojë pushtimin si ‘ndihmesë ndërkombëtare”, ka thënë Tomasz Peszynski, activist nga iniciativa qytetare pro-evropiane, “Pulsi i Evropës”.
Kjo organizatë ka qenë vetëm një në mesin e shumë organizatave tjera që kanë protestuar të hënën para ambasadës ruse në Pragë, duke mbajtur pankarta me mbishkrimin “Nuk do të harrojmë kurrë”, “Ndaleni imperializmin rus” dhe “Liria qëndron tek e vërteta”.
Një fëmijë duke marrë vaksinën kundër fruthit. Fotografi nga arkivi
Më shumë se 41.000 fëmijë dhe të rritur janë infektuar me fruth në gjashtë muajt e parë të 2018, duke çuar në 37 vdekje.
Sipas Organizatës Botërore të Shëndetësisë (OBSH), rastet e fruthit kanë shënuar një rekord në Evropë.
Në Francë, Gjeorgji, Itali, Rusi, Serbi dhe Ukrainë, janë shënuar mbi 1000 infeksione të fëmijëve dhe të rriturve këtë vit. Derisa Ukraina ka shkallën më të lartë të fruthit në Evropë, me më shumë se 23,000 njerëz të prekur.
Vdekjet që vijnë nga ky infeksion janë raportuar nga të gjitha vendet e lartcekura, derisa në Serbi raportohet se numri i të vdekurve është 14. Krahasuar me vitet paraprake, këtë vit numri i të infektuarve është rritur shumë. Në 2017 kishte 23.927 raste të infektimit, ndërsa në vitin 2016 u regjistruan 5.273.
Organizata Botërore e Shëndetësisë u bënë thirrje vendeve evropiane që të ndërmarrin masa, pasi ekspertët thonë se rritja e infeksioneve lidhet me rënien e numrit të njerëzve që vaksinohen.
Historiani dhe gjeopolitikani francez Alexis Troude mendon se raundi i ardhshëm i dialogut ndërmjet Beogradit dhe Prishtinës do të jetë vendimtar, ndërsa marrëveshja përfundimtare, sipas informatave të tij, do të duhej të arrihet në Paris më 11 dhe 12 nëntor, në ceremonitë e festimit të 100-vjetorit të fitores së forcave aleate kundër Gjermanisë në Luftën e Parë Botërore.
“Nuk përjashtohet që ai moment simbolik t’i sjellë Beogradit klimë të volitshme për marrëveshje, të paktën për disa detaje. S’do të ishte asgjë e parëndomtë nëse Serbia në momentin e fundit, siç ka ndodhur gjatë historisë, ia del të arrijë zgjidhje të volitshme”, ka thënë Troude për “Novosti të Beogradit.
Kjo marrëveshje e supozuar do të mund të jetësohej, sipas mendimit të tij, pranverën e ardhshme, para zgjedhjeve për përbërjen e re të Parlamentit Evropian.
Troude, i cili është drejtor i Departamentit për Studime Ballkanike pranë Akademisë Ndërkombëtare Gjeopolitike në Paris, mendon se hapësira manovruese e Serbisë për zgjidhjen e çështjes së Kosovës është tepër e vogël, ndërsa presioni i Bashkimit Evropian dhe Shteteve të Bashkuara të Amerikës në gjashtë muajt e fundit ka qenë tepër i madh, raporton Express.
Ai është pesimist se Serbia do të mund ta fitonte Asociacionin e Komunave Serbe si minimum që është caktuar me Marrëveshjen e Brukselit.
“NATO në terren de fakto i përkrah autoritetet kosovare, ndërsa në planin ndërkombëtar gjithashtu ekziston përkrahje e madhe nga BE dhe NATO. Shqiptarët i fituan të gjitha dhe s’kanë interes për të dhënë çfarëdo qoftë. Janë të vendosur që të shkojnë deri në fund”, thotë Troude.
I pyetur çka do të mundte Serbia, në rrethana të këtilla të pavolitshme, të fitonte gjatë negociatave, ai thotë se do të ishte sukses sikur ta fitonte veriun e Kosovës.
“Por, në anën tjetër, jam shumë më tepër optimist kur bëhet fjalë për Republika Srpskan. Pikërisht për shkak të zhvillimit të situatës lidhur me Kosovën shoh hapësirë që RS edhe më shumë të afrohet me Serbinë. Nëse serbët fitojnë pak ose asgjë në rajonin e vet historik, atëherë dera drejtpërdrejt, si pasojë e kësaj, mbetet e hapur për përshpejtimin e ndarjes së BeH-së. Nëse shqiptarët e bëjnë atë që mendojnë se mund ta bëjnë në Kosovë, s’ka arsye që këtë të mos e bëjnë edhe serbët në BeH”, thotë Troude.
Një auditim ndaj qeverisë franceze ka dalë me përfundimin se 840 ura franceze kanë dëmtime shumë serioze dhe kërcënojnë shembjen.
Presidenti francez Emmanuel Macron ka premtuar një infrastrukturë të re, por presioni është rritur pas kolapsit të një ure në Gjenova të Italisë që la të vdekur 43 persona.
Auditimi i publikuar të dielën nga gazeta ditore Journal du Dimanche, deklaroi se nga 12,000 ura në Francë, çdo e treta ka nevojë për riparim dhe 7 për qind apo 840 ura janë në rrezik të shembjes.
Ministrja e Tranportit, Elisabeth Borne deklaroi se mirëmbëjtja e urave është prioritet i yni.
VATIKAN – Vatikani dënon në mëyrë kategorike abuzimin seksual të fëmijëve, njoftoi drejtori i zyrës për shtyp të Vatikanit, Greg Burke, lidhur me daljen në pah të abuzimit seksual të më shumë se një mijë fëmijëve nga priftërinjtë katolikë në Pensilvani të SHBA-ve.
“Në lidhje me raportin e ndarë me opinioni publik në Pensilvani ka vetëm dy fjalë me të cilat mund të shprehen ndjenjat përballë këtyre krimeve të tmerrshme: turp dhe keqardhje”, është shprehur Burke në një deklaratë me shkrim.
“Vatikani dënon në mëyrë kategorike abuzimin seksual të fëmijëve. Gjetjet në raport janë krim dhe nga ana morale ato duhet të dënohen. Sjellje të tilla janë tradhëti ndaj sigurisë së viktimave duke i privuar ato nga dinjiteti dhe besimi”, ka shtuar Burke, duke vënë theksin se Vatikani e ka shqyrtuar me seriozitet të madh raportin e punimeve të jurisë në Pensilvani.
Duke theksuar se kisha duhet të nxjerrë mësime nga e kaluara dhe se duhet të japin llogari abuzuesit dhe personat që heshtin ndaj këtyre ngjarjeve, Burke ka tërhequr vëmendjen se shumica e abuzimeve të përmendura në raport kanë ndodhur që para fillimit të viteve 2000.
Po ashtu, Burke ka bërë të ditur se pas vitit 2002, pothuajse nuk ka pasur aspak raste dhe se abuzimi i priftërinjve kundrejt fëmijëve ka rënë në mënyrë drastike pas reformave të kishës në SHBA.
Sipas Burke, Papa Françesku ka theksuar se edhe te kisha, edhe tek i gjithë komuniteti duhet të jepet çdo përpjekje për formimin e mjediseve të sigurta për fëmijët dhe të rriturit e pambrojtur.
Papa ndodhet pranë vitkimave dhe kisha dëshiron t’i dëgjojë ata për të çrrënjosur këtë tmerr tragjik që ka shkatërruar jetën e personave të pafajshëm, ka shtuar gjithashtu Burke.
Më shumë se një mijë fëmijë të abuzuar seksualisht
Kryeprokurori i Pensilvanisë në SHBA, Josh Shapiro, pas një hetimi dyvjeçar doli me deklaratë për arritjen e një gjetjeje se abuzimet seksuale kundjret fëmijëve janë fshehur “sistematikisht” nga klerikë të lartë të kishës në Pensilvani dhe Vatikan.
Ndërkaq, juria hetuese ka theksuar se mbi 300 priftërinj kanë abuzuar me fëmijët që nga mesi i viteve 1950, duke akuzuar qindra priftërinj të kishës katolike romake për abuzim me më shumë se një mijë fëmijë.
Duke tërhequr vëmendjen se shumica e viktimave të abuzuar kanë qenë fëmijë meshkuj, Juria njoftoi se kanë hasur raste të abuzimeve nga më të ndryshmet, përfshirë edhe përdhunimet.
BRUKSEL – Sheshi Grand Place në Bruksel, i cili ndodhet në Listën e Trashëgimisë Botërore të UNESCO-s, është mbuluar nga një qilim gjigant lulesh i cili këtë vit është përgatitur me motive meksikane.
Qilimi i cili këtë vit për herë të parë u përgatit me temë latine në sheshin e famshëm turistik është krijuar në bashkëpunim me rajonin meksikan Guanajuato, i cili njihet për artin e qilimave tradicionalë të luleve.
Qilimi gjigant do të mund të vizitohet nga 16 deri më 19 gusht, ndërsa për përgatitjen e tij janë përdorur mbi 500 mijë lule, edhe atë lule dahlia dhe lulja e famshme begonia belge.
Për përgatitjen e qilimit të gjatë 75 metra dhe të gjerë 24 metra, janë angazhuar 100 punëtorë meksikanë dhe belg vullnetarë të cilët kanë filluar punën në orët e mëngjesit dhe brenda tetë orëve përfunduan qilimin i cili krijoi pamje magjepsëse në shesh.
Sheshi Grande Place shtrohet me qilim lulesh me motive latine
Sheshi Grand Place në Bruksel, i cili ndodhet në Listën e Trashëgimisë Botërore të UNESCO-s, është mbuluar nga një qilim gjigant lulesh i cili këtë vit është përgatitur me motive meksikane. Qilimi i cili këtë vit për herë të parë u përgatit me temë latine në sheshin e famshëm turistik është krijuar në bashkëpunim me rajonin meksikan Guanajuato, i cili njihet për artin e qilimave tradicionalë të luleve. ( Dursun Aydemir – Anadolu Agency )
Qilimi i luleve me motiv të zogut, bretkosës dhe diellit, që reflektojnë pasurinë kulturore të rajonit Guanajuato, thuhet të jetë qilimi me motive më gjithëpërfshirëse që kur ka filluar aktivitete në vitin 1971.
Dhjetëra mijëra turistë pritet të vizitojnë sheshin Grand Place në kuadër të aktivitetit i cili do të zgjasë deri më 19 gusht. Për çmim prej gjashtë eurosh, qilimi do të mund të shihet edhe nga ballkoni i godinës historike të bashkisë e cila gjendet në këtë shesh.
Ndryshe, aktiviteti i qilimave prej lulesh nisi në vitin 1971 në Grand Place dhe që nga viti 1986 organizohet në çdo dy vite, ndërsa në të përdoren kryesisht lule begonia të kultivuara në qytetin belg Gent. Belgjika është prodhuesi më i madh i begonias, lule me ngjyra e cila u zbulua në Amerikën Jugore në shekullin 17.
Para dy viteve, në sheshin historik të Brukselit u shtrua qilim me motive japoneze, ndërsa në vitin 2014 qilim turk në përkujtim të përvjetorit të 50-të të migrimit të turqve në Belgjikë.
Kryeministri i Italisë, Giuseppe Conte ka shpallur gjendje të jashtëzakonshme për periudhë prej 12 muajsh, në rajonin Liguria, në përgjigje ndaj shembjes së një ure në Gjenovë.
Ai gjithashtu tha se do të ndajë 5 milionë euro shtesë nga fondet qendrore dhe do t’ia dhurojë këtij rajoni.
Qeveria rajonale ka kërkuar veprime të menjëhershme pas shembjes së urës gjatë ditës së martë, ku mbetën të vdekur 39 persona.
Ekipet e shpëtimit kanë pak shpresë se mund të gjejnë të mbijetuar të tjerë nën gërmadhat e urës Morandi, ku pothuajse 40 makina kanë rënë nga një lartësi prej 45 metrash, pas shembjes së një pjese të urës.
Ende nuk dihet shkaku i shembjes së urës. Autoritetet në Gjenovë kanë shpallur dy ditë zie, pas kësaj tragjedie.
Shtetet e Bashkuara do të dyfishojnë numrin e marinsave në Norvegji, ka njoftuar ministria e Mbrojtjes së këtij vendi, transmeton Reuters.
Planet për rritje të numrit të trupave në Norvegji nga 330 në 700 si dhe bartjen e disa prej tyre afër kufirit me Rusinë kanë nxitur reagim të ashpër nga Moska, e cila i ka cilësuar planet “qartazi armiqësore”.
Qeveria në Oslo, e shqetësuar pas vendimit të Rusisë për të aneksuar Krimenë më 2014, ka insistuar se prezenca në rritje e trupave amerikane ka vetëm qëllime të stërvitjes dhe nuk duhet të interpretohet si përshkallëzim ushtarak.
Marinsat ishte planifikuar të largoheshin nga Norvegjia në fund të këtij viti, pasi trupat e parë kishin arritur në këtë shtet më 2017 për t’u stërvitur rreth luftimeve në kushte të motit të ftohtë.
Ata përbëjnë trupat e parë të pozicionuar në Norvegji nga Lufta e Dytë Botërore.
Ministrja e Jashtme norvegjeze, Ine Eriksen Soereide, u ka thënë më herët gazetarëve se vendimi nuk nënkupton krijim të bazës së përhershme amerikane dhe se nuk shënjestron Rusinë.
Zv.ministri italian i Transportit, Edoardo Rixi, ka njoftuar se ura Morandi do të shembet plotësisht
ROMË – Do të shembet plotësisht ura Morandi në qytetin Genova të Italisë e cila u rrëzua dje pjesërisht, ku si pasojë humbën jetën 35 persona.
Sipas lajmit të agjencisë italiane të lajmeve, ANSA, zv.ministri italian i Transportit, Edoardo Rixi, ka njoftuar se ura Morandi do të shembet plotësisht.
“Do të shkaktojë rezultate negative për trafikun dhe do të shkaktojë probleme për qytetarët dhe kompanitë, por ura Morandi duhet të shembet në tërësi. Gjithashtu një urë nuk mund të shembet nga rrufetë apo stuhitë, në këtë ngjarje duhet të gjendet përgjegjësi”, është shprehur Rixi.
Nga shembja në të dyja korsitë e urës Morandi e cila ka një lartësi rreth 100 metra, ku u rrëzuan shumë automjete dhe se disa prej tyre kanë mbetur nën rrënoja, kanë humbur jetën 35 persona, në mesin e të cilëve 3 prej tyre janë fëmijë të moshave 8,12 dhe 13 vjeç.
Në tragjedinë ku janë plagosur edhe 15 persona të cilët 12 prej tyre në gjendje të rëndë bëhet e ditur se ka persona të humbur dhe se janë në vazhdim punimet e kërkim-shpëtimit nën rrënoja edhe në shtratin e lumit.
Theksohet se sot do të vizitojnë Genova, kryeministri i Italisë, Giuseppe Conte, zëvendëskryeministri dhe ministri i Brendshëm, Matteo Salvini, zëvendëskryeministri dhe ministri i Zhvillimit Ekonomik, Punës dhe Politikës Sociale, Luigi Di Maio dhe ministri i Transportit, Danilo Toninelli.
Në një deklaratë nga bashkia e Genovas theksohet se ka rrezik edhe për shembjen e pjesëve të tjera të urës, ku për këtë arsye janë evakuuar 440 persona në 11 ndërtesa përreth urës. Kjo shifër mund të rritet edhe më tej për shkak të evakuimeve që janë në vazhdim.
Mendohet se ura mund të jetë shembur si pasojë e një problemi struktural, por që mund të kenë ndikuar edhe shirat intensivë dhe stuhia. Një nga dëshmitarët ka shpjeguar se ura ka rënë pas goditjes nga rrufeja.
Ura Morandi kalon mbi vendet tregtare, fabrika, disa vendbanime, linjës së trenit Gjenova-Milano dhe një lumi. aa
Italia po përballet me një tragjedi, pasi mëngjesin e sotëm “ura Morandi” u shemb, duke i marrë jetën dhjetëra personave.
Aktualisht konfirmohet se dhjetëra persona kanë humbur jetën, mes tyre edhe një fëmijë, si edhe disa të tjerë janë plagosur.
Mediat italiane konfirmojnë se fatkeqësisht bilanci i viktimave do të rritet.
Por, një tragjedi e tillë mund të shmangej, nëse do të niste më parë për rikonstruktimin e urës.
“Affaritaliani” bën me dije se që më 2014 flitej për gjendjen “jo të mirë” të urës, si edhe në muajin maj të këtij viti u njoftua ristrukturimi i saj.
“Prej kohësh konsiderohej me rrezik kalimi në atë urë, për shkak të trafikut të madh që kishte çdo ditë, si edhe kostot shumë të larta të mirëmbajtjes. Struktura e saj i përket viteve ’60-të dhe ishte duke u punuar mirëmbajtjen e saj, teksa ishte vendosur një vinç-urë për të lejuar punimet” cilësohet në artikull.
Në 3 maj të këtij viti, “Autostrade per L’Italia” kishte njoftuar rikonstruksionin e urës, teksa kostot arrinin në 20 milion euro.
Ajo kishte publikuar edhe procesin e aplikimit për kompanitë nënkontraktore, të interesuara për projektin e rikonstruksionit të urës, teksa aplikimet duhet të përfundonin më 11 qershor 2018.
Por tani është tepër vonë. Një tragjedi e cila mund të ishte parandaluar, nëse do të shqyrtohej saktë gjendja e urës.
Policia është përplasur me dhjetëra mijëra protestues antiqeveritarë në mbarë Rumaninë.
Një turmë mes 30 mijë e 50 mijë personash, përfshi edhe shumë të riatdhesuar, morën pjesë në protestat mbarëkombëtare, sipas asaj që theksojnë mediet vendase.
Disa prej protestuesve në kryeqytetin rumun, Bukuresht, hodhën shishe dhe pllakat e rrugës kundrejt efektivëve të policisë, ndërsa këta të fundit u kundërpërgjigjën me përdorimin e gazit lotsjellës, sprait djegës e madje edhe hedhëseve të ujit.
Rreth 100 protestues iu nënshtruan kujdesit të nevojshëm shëndetësor, sikurse edhe 10 policë morën ndihmën e parë sipas shërbimeve të emergjencave. Një grup protestuesish u përpoqën të çanin rrethimin dhe të hynin në ndërtesën qeveritare në Bukureshtit, por u zmbrapsën nga kordoni i sigurisë së policisë.
Disa të tjerë mbanin flamuj rumunë e atë të Bashkimit Europian, teksa thërrisnin slogane të ndryshme e u binin daulleve. Protestuesit kërkuan dorëheqjen e qeverisë, pasi kundërshtojnë përpjekjet e perceptuara prej tyre për dobësimin e sistemit të drejtësisë, përpjekje këto nga socialdemokratët (PSD) në pushtet, sikurse edhe për pagat e ulëta dhe korrupsioni i shtrirë gjerësisht në vend.
Protesta kundër partisë në pushtet PSD janë zhvilluar prej muajsh në Rumani. Në korrik, presidenti Klaus Iohannis miratoi shkarkimin e prokurores antikorrupsion, Laura Codruta Kovesi, e cila po udhëhiqte hetimet ndaj politikanëve lokalë e qendrorë për ryshfete. Presidenti Iohannis ishte vënë nën një presion gjithnjë e në rritje nga qeveria e PSD-së për të pranuar shkarkimin e saj.
Rreth 150 mijë shtetas rumunë u mblodhën në Bukuresht vitin e kaluar, pasi qeveria kaloi një dekret që do të mund të lironte të burgosurit e dënuar mbi akuza për korrupsion. Shumë shtetas rumunë të tjerë kanë ardhur nga emigracioni për t’iu bashkëngjitur protestave.
Sipas Bankës Botërore, rreth çereku i popullsisë së Rumanisë – afro 3-5 milionë banorë, – jetojnë dhe punojnë jashtë vendit, duke kthyer mbrapsht në vendlindje rreth 5 miliardë dollarë, në një nga vendet më pak të zhvilluara të Bashkimit Europian.
Një zgjidhje e përhershme nënkupton një zgjidhje realiste, e qëndrueshme dhe e mundshme, në pajtueshmëri me të drejtën ndërkombëtare, e mbi të cilën Prishtina dhe Beogradi duhet të kenë pajtueshmëri, ka deklaruar sot në Bruksel zëdhënësi i Komisionit Evropian, Carlos Martin.
I pyetur nëse Komisioni Evropian mbështet qëndrimin e presidentit të Serbisë, Aleksandër Vuçiç, për ndarje ndërmjet shqiptarëve dhe serbëve në Kosovë, ai ka thënë se gjatë takimit të nivelit të lartë, Vuçiq dhe presidenti i Kosovës, Hashim Thaçi, kanë pasur “bisedime intenzive dhe produktive mbi kornizën e marrëveshjes për normalizimin e plotë të marrëdhënieve dhe se janë pajtuar për intensifikimin e punëve’.
Martin ka shtuar gjithashtu se më 18 korrik, “Vuçiq dhe Thaçi kanë shqyrtuar përparimin e arritur dhe janë pajtuar të takohen sërish në fillim të shtatorit”.
“Dialogu i ndërmjetësuar nga Bashkimi Evropian për synim ka nxitjen e arritjes së një bashkëpunimi të përhershëm mes të dyja palëve dhe t’ju ndihmojë atyre të arrijnë përparim në rrugën e tyre drejt Evropës”, ka thënë zoti Martin.
BRUKSEL – Dyzet e tre për qind e foshnjave në Bashkimin Evropian (BE) në vitin 2016 kanë lindur nga marrëdhënie jashtëmartesore, treguan të dhënat e fundit të Zyrës Evropiane të Statistikave (Eurostat).
Të dhënat e Eurostatit treguan rritje për 15 për qind të foshnjave të lindura jashtë martesës krahasuar me shifren e vitit 2000.
Vendet që kanë spikatur me numrin më të madh të foshnjave të lindura nga marrëdhëniet jashtëmartesore janë Franca (60 për qind), Bullgaria (59 për qind), Sllovenia (59 për qind), Estonia (56 për qind), Suedia (55 për qind), Danimarka (54 për qind), Portugalia (53 për qind) dhe Holanda (50 për qind).
Në këto shtete, numri i foshnjave të lindura jashtë martese ka tejkaluar atë të foshnjave që lindin nga marrëdhëniet martesore.
Nga ana tjetër, si vende me numrin më të vogël të foshnjave jashtëmartesore janë radhitur Greqia, Kroacia dhe Qiproja Greke. Në këto shtete, 80 për qind e foshnjave kanë lindur nga marrëdhëniet martesore.
Presidenti i Turqisë, Recep Tayyip Erdogan do të takohet me homologun gjerman, Frank-Walter Steinmeier dhe kancelaren gjermane, Angela Merkel, gjatë vizitës zyrtare në Gjermani më 28 dhe 29 shtator, ka njoftuar sot Presidenca gjermane.
Erdogan do të pritet nga Steinmeier me nderime ushtarake, përpara se të marrë pjesë në nj banket, që do të organizohet natën e 28 shtatorit, ka njoftuar Presidenca, duke mos dhënë më shumë detaje.
Agjenda e bisedimeve mes Erdoganit dhe Merkelit ende ka mbetur që të negociohet “në konsultim të ngushtë” me lidershipin turk, njoftuan zyrtarët gjermanë.
Marrëdhënies mes Berlinit dhe Ankarasë janë përkeqësuar që prej se Parlamenti gjerman më 2016, njohu si gjenocid, vrasjet masive të armenëve nga otomanët.
Anëtarët e komunitetit kurd në Gjermani, kanë paralajmëruar protesta gjatë vizitës së Erdoganit në shtetin gjerman, për të shprehur pakënaqësitë e tyre lidhur me trajtimin e minoritetit kurd në Turqi.
Gjeorgjia është organizatorja e një stërvitje ushtarake në shkallë të gjerë me pjesëmarrjen e mijëra trupave të NATO-s. Manovrat e koduara “Noble Partner” që po zhvillohen në një bazë pranë kryeqytetit Tbilisi, përkojnë me dhjetë vjetorin e ndërhyrjes së Rusisë në Gjeorgji.
Në manovrat e sivjetshme marrin pjesë mijëra trupa nga NATO ndërsa afrohet dhjetë vjetori i luftës së Gjeorgjisë me Rusinë. Kjo është hera e katërt që NATO zhvillon stërvitje ushtarake në shkallë të gjerë. Kapiteni Mathias Sturmer është komandant i kompanisë gjermane.
“Detyra e kompanisë time tokësore të blinduar ishte që të siguronim perimetrin përreth objektivit në unison me forcat amerikane, ukrainase, gjeorgjiane dhe lituaneze. Në këtë mënyrë faza tjetër e operacionit do të kurorëzohej me sukses.”
Manovrat dy javore të gushtit përkojnë me 10 vjetorin e ndërhyrjes së Rusisë në Gjeorgji dhe konfliktit të shkurtër që pasoi. Rusia vazhdon të mbajë trupa dhe të mbështesë territorin që pushtoi, duke njohur shtetet seperatiste, Osetia e Jugut dhe Abkhazia. Shavlego Tabatadze është Gjeneral Brigade i forcave gjeorgjiane.
“Ushtarët amerikanë dhe gjermanë drejtuan një sulm të simuluar ndaj forcave gjeorgjiane. Manovrat e koduara “Noble Partner” janë të katërtat e këtij lloji që zhvillohen me forcat e armatosura gjeorgjiane, me ushtritë evropiane dhe amerikane. Synimi është mbështetja dhe përmirësimi i kapaciteteve të vendeve pjesmarrëse dhe atyre rajonale si dhe gatishmëria dhe ndërveprimi gjatë operacionit shumë-kombësh të trajnimit”.
Sëbashku me trupat amerikane prej mbi 1 mijë ushtarësh, Shtetet e Bashkuara dërguan 12 autoblinda luftarake, pesë tanke Abrams dhe nëntë helikopterë. Në këto manovra morën pjesë edhe forca ushtarake të vendeve që nuk janë anëtare të NATO-s si Ukraina, Armenia dhe Azerbajxhani.
Ura, e cila tërheq vëmëndjen e vizitorëve, sikur edhe Kulla e Eiffelit, ka një vlerë të veçantë për të dashuruarit dhe çiftet e posa martuara, për të cilët organizohen turne të veçanta
PARIS – Administrata e qytetit të Parisit, ka hequr drynat e dashurisë, të vendosur tek ura e famshme e artit, “Pont des Arts”.
Drynat e vendosur tek ura për këmbësorë e cila ndodhet shumë pranë katedrales Notre-Dame, u hoqën nga punëtorët e administratës së qytetit.
Autoritetet e Parisit, ndërmorrën një vendim të tillë nga frika se drynat mund të shkaktojnë dëm, pasi në parmakët mbi urë, nuk ka patur vend të lirë.
Ura, e cila tërheq vëmëndjen e vizitorëve, njëjtë sikur edhe Kulla e Eiffelit, ka një vlerë të veçantë për të dashuruarit dhe çiftet e posa martuara, për të cilët organizohen turne të veçanta.
Vizitorët shkruajnë emrat e tyre në dryna tashmë të varur në urë, ose vendosin një dry të ri, ndërsa çelësin e hedhin në lumin Sena. Ata besojnë se dashuria e tyre do të qëndrojë e mbyllur fort përgjithmonë, veprim të cilin e dokumentojë me një foto çasti. aa
Në deklaratën me shkrim nga Kompania që bën menaxhimin e Kullës Eifel, është njoftuar se greva e cila ka filluar dje në orët e mbrëmjes vazhdon edhe sot
PARIS – Një ndër simbolet e Francës, Kulla Eiffel, ka mbyllur dyert e saj për shkak të grevës së punonjësve.
Në deklaratën me shkrim nga Kompania që bën menaxhimin e Kullës Eiffel, është njoftuar se greva e cila ka filluar dje në orët e mbrëmjes vazhdon edhe sot.
Më tej në deklaratë është bërë e ditur se punonjësit kanë marrë vendim për grevë duke u arsyetuar në dendësinë e tepërt të vizitorëve që kanë blerë bileta prej më parë dhe me kohë të caktuar.
Vitin e kaluar Kullën e Eiffelit kanë vizituar 6,2 milionë persona, ndërsa është lokacioni i tretë turistik më i vizituar në Francës, pas muzeut Louvre dhe Pallati i Versajës.
Kulla e cila çdo ditë qëndron hapur mes orës 09.00 dhe 00.45, me ndryshimet e bëra në kohët e fundit ishte paraparë që një pjesë e ashensorëve të vendosen në përdorim vetëm për poseduesit e biletave të shitura nga interneti.
Punonjësit duke treguar se kjo shkakton ngarkesa të mëdha, pretenduan se shpesh herë mes vizitorëve dhe punonjësve ndodhin tensione. aa
Derisa Evropa është mbërthyer nga një valë e të nxehtit, parashikuesit e motit thonë se rekordi i të gjitha kohërave mund të thyhet në ditët në vazhdim.
Rekordi aktual në Evropë është 48 gradë Celsius, i regjistruar në Athinë, në korrik të vitit 1977.
Temperaturat janë në rritje në Spanjë dhe në Portugali dhe parashikuesit e motit thonë se mund të vazhdojnë të rriten, duke thyer rekordet kombëtare dhe rekordin 41-vjeçar në Evropë.
Shërbimi kombëtar meteorologjik në Spanjë lëshoi një paralajmërim së paku deri të dielën, duke thënë se vala e të nxehtit do të jetë “veçanërisht e fortë dhe e qëndrueshme në jugperëndim”.
Grupi i paralajmërimit të motit në Evropë, Meteoalarm, lëshoi paralajmërime të kuqe, që nënkuptojnë rrezik për jetën, për pjesën më të madhe të Portugalisë jugore dhe për provincën Badajoz në Spanjë.
Papa Françesku i ndryshoi mësimet e kishës katolike në lidhje me dënimin me vdekje, duke thënë se ndëshkimi i tillë është gjithmonë “i papranueshëm” sepse e “sulmon” dinjitetin e natyrshëm të të gjithë njerëzve.
Vatikani tha se Papa e miratoi ndryshimin në Katekizmin e Kishës Katolike, që është mësimi zyrtar i këtij institucioni.
Më herët, katekizmi thoshte se Kisha nuk e përjashton mundësinë e dënimit me vdekje “nëse ajo është mënyra e vetme e mundshme për të mbrojtur efektivisht jetën e njerëzve përballë agresorit të padrejtë”.
“Dënimi me vdekje është i papranueshëm pasi është sulm mbi paprekshmërinë dhe dinjitetin e personit”, thuhet në tekstin e ri.
Në një letër shoqëruese që shpjegon ndryshimin, kreu i Zyrës së Doktrinës së Vatikanit tha se zhvillimi i doktrinës katolike mbi dënimin me vdekje nuk bie në kundërshtim me mësimet e mëparshme, porse është një evolucion.
Presidenti i Sllovakisë, Andrej Kiska, tha se ngritja e një baze lokale për një grup të motoristëve rusë, të afërt me Kremlinin, paraqet rrezik sigurie për këtë vend të Bashkimit Evropian dhe NATO-s.
Anëtarët e grupit, të quajtur “Ujqërit e Natës”, u kanë ndihmuar trupave ruse të aneksojnë Gadishullin e Krimesë nga Ukraina në vitin 2014 dhe nuk janë thjesht “adhurues të padëmshëm të motorëve”, tha Kiska, duke i bërë thirrje Qeverisë sllovake të marrë masa për ta asgjësuar kompleksin e tyre në qytetin Dolna Krupa, rreth 60 kilometra në verilindje të Bratisllavës.
Ujqërit e Natës janë të njohur për promovimin e nacionalizmit rus dhe besnikërinë ndaj presidentit rus, Vladimir Putin.
“Ujqërit e Natës janë mjet i një regjimi që mori pjesë në uzurpimin e një territori të një vendi fqinj [të Sllovakisë], në aneksimin e pjesëve të Ukrainës, në kundërshtim me të drejtën ndërkombëtare”, tha Kiska.
Në reagim ndaj deklaratës së tij, zyra e shtypit e Qeverisë sllovake tha se asnjë veprim nuk do të ndërmerret pa një hetim nga Zyra e Prokurorit të Përgjithshëm dhe policia.
Policia ka thënë më herët se është duke monitoruar aktivitetet e grupit, porse deri më tani nuk ka parë asgjë të paligjshme.
BERLIN – Organizatat ekstreme djathtiste gjermane kanë përpiluar “disa lista armiqësore” në të cilat janë mbi 35.000 emra dhe adresa, thuhet në përgjigjen e Ministrisë së Punëve të Brendshme ndaj pyetjes së Bundestagut.
Nga MPB thonë se listat janë gjetur në disa aksione dhe hetime policore të drejtuara kundër organizatave të ekstremit të djathtë gjatë 7 viteve të fundit.
Grupi neonazist “Nëntoka Nacional Socialiste” (NSU) ka mbledhur adresa dhe numra telefoni të 10.000 personave, derisa nuk është zbuluar në vitin 2011, theksuan nga MPB-ja gjermane ndaj pyetjes së Parlamentit.
Grupi ekstrem djathtist “Nordkreuz”, i cili u zbulua madje vitin e kaluar, ka përpiluar listë me të dhënat e 25.000 personave, theksojnë nga Ministria.
Rrjeti terrorist djathtist, të cilin e themeloi togeri 28 vjeçar i ushtrisë gjermane Franc A. po ashtu ka përpiluar disa lista me objektiva potenciale në të cilat janë 32 emra.
Partia e Majtë opozitare kritikoi pushtetin për shkak të ruajtjes në fshehtësi të listave duke mos informuar mbi këtë individët, emrat e të cilëve u potencuan në listat e ekstremistëve djathtistë.
Martina Renner, deputete e Partisë së Majtë, akuzoi Qeverinë se po injoron kërcënimin në rritje të organizatave terroriste djathtiste. aa
MYNIH – Në aeroportin e Mynihut në Gjermani sot janë anuluar rreth 200 fluturime, ndërsa dy terminale u evakuuan plotësisht nga aeroporti, pasiqë një grua e paidentifikuar kaloi zonën e kontrollit të sigurisë.
Mediat lokale raportojnë se gruaja ka kaluar zonën e terminalit 2 dhe pastaj u zhduk. Lidhur me këtë kanë filluar hetime disa orëshe ndërsa policia nuk konsideronte se gruaja paraqet “rrezik ekstrem”.
Mijëra pasagjerë u evakuuan ndërsa vonesa kanë pësuar 60 fluturime.
Pas hetimeve disa orëshe, terminalet u rihapën duke krijuar radhë të gjata. aa
Pamje nga Kisha e Shën Pjetrit në Vatikan. Fotografi nga arkivi.
Njëri nga kardinalët më të shquar të Kishës Katolike ka dhënë dorëheqje, pas publikimit të një skandali për abuzim seksual.
Papa Françesku, përmes një deklarate njoftoi sot se ka pranuar dorëheqjen e kardinalit Theodore McCarrick, ish-kryepeshkop në Uashington.
Dorëheqja vjen pas raportimeve muajin e kaluar se zyrtarët e kishës amerikane kishin pranuar se McCarric kishte abuzuar seksualisht një adoleshent. Kjo ngjarje kishe ndodhur rreth 50 vjet më parë. Që prej asaj kohe janë paraqitur edhe akuza të tjera.
Dorëheqja e këtij kardinali po ashtu vjen në kohën kur Vatikani po përballet edhe me një skandal tjetër seksual në Kili.
Mediat kanë raportuar se McCarrick është kardinali i parë që ka humbur titullin e tij nga Kisha Katolike.
Peshkopët që kanë qenë të përfshirë në skandalet e abuzimeve seksuale, kanë njollosur reputacionin e Kishës Katolike në mbarë botën për dekada me radhë.
Kryeministrja britanike Theresa May ka diskutuar për Brexit-in me kreun e Austrisë kancelarin Sebastian Kurz, i cili aktualisht mbanë presidencën e Bashkimit Evropian.
Kancelari Kurz thotë se shpreson të gjejë një “zgjidhje” deri në tetor.
Kurz gjithashtu tha “nga këndvështrimi ynë, është e rëndësishme të shmangim Brexit-in”, ai shtoi “unë shpresoj se ne mund të jemi të suksesshëm dhe të gjejmë një zgjidhje deri në tetor”.
Të dy liderët diskutuan për “shumë sfida të përbashkëta që i kanë”. Kurz ftoi May-n të ndjekë shfaqjen “Flauti magjik” e Mozartit, në festivalin e Salzburgut.
Zjarret që kanë përfshirë shumë pjesë të Europës, me rastet më të këqija në ditët e fundit në Greqi, nuk kanë kursyer as Italinë. Një alarm portokalli është lëshuar në Sardenjë për shkak të zjarreve përgjatë gjysmës së ishullit.
Alarmi u lëshua nga Sistemi Rajonal i Mbrojtjes Civile, ndërkohë që ishulli italian po përgatitet të përballojë zjarre si ato që tashmë kanë krijuar një gjendje të jashtëzakonshme në Suedi dhe Greqi.
Gjysma e ishullit tani është nën vëzhgim të veçantë për shkak të alarmit të nivelit të lartë. Zona e rrezikut përfshin autostradën 131, që shtrihet nga veriu në jug të ishullit. Kjo do të thotë që do të preken zona edhe nga ato që janë të njohura për turistët si La Maddalena, Olbia dhe San Teodoro, si dhe Ozieri në Nuoro.
Oristano, Medio Campidano dhe Cagliari janë gjithashtu të prekur nga alarmi, ndërsa pjesa tjetër e ishullit aktualisht është vendosur në paralajmërim të verdhë (duke sinjalizuar rrezikun mesatar). Alarmi ndjek dy raporte të zjarreve që shpërthyen në La Maddale na, me ekipet zjarrfikëse që kanë nxituar në zjarrin e nisur në një shtëpi në ndërtim e sipër dhe një zjarr tjetër në Bari Sardo.
Në zonën e Cagliari-t një zjarr i madh nisi dhe u shpërnda në periferi të qytetit Elmas. Flakët u nxitën nga erërat e forta dhe shkatërroi të mbjellat, pasi arriti një ndërtesë të braktisur. Sipas të dhënave të Sistemit Europian të Informacionit të Zjarrit Pyjor (EFFIS) të Komisionit Europian, që nga fillimi i vitit deri më 23 korrik në gadishull janë djegur 3,859 hektarë tokë, që është e barabartë me 5,400 fusha futbolli.
Lajmi nga Italia vjen ndërkohë që zjarret kanë nisur nëpër Europën Veriore, duke shkaktuar shkatërrimin e pyjeve dhe peizazheve të bukura.
Një valë e nxehtë ka shkaktuar që temperatura në Suedi të rritet në mbi 30° C, e pazakontë në këtë vend, me rekordet më të larta ndër dekada, ndërsa vendi është përfshirë edhe nga thatësira.
Suedia kërkoi ndihmë ndërkombëtare pas shkallës së gjerë të përhapjes së zjarrit. Vendet në BE dhe EEA janë përgjigjur.
LONDËR – Ministrja franceze për Çështje evropiane, Nathalie Loiseau, ka deklaruar se nuk është tepër vonë për Mbretërinë e Bashkuar të ndryshojë mendimin e saj për largimin nga Bashkimi Evropian (BE).
Duke folur në programin “Today” të radios BBC, Loiseau tha se nëse Britania e Madhe do të votonte në një referendum të dytë për të qëndruar në BE, blloku nuk do ta kundërshtonte rezultatin.
“Gjithmonë kemi thënë se dera do të mbetet e hapur dhe se ne nuk do të ishim ata që dëshironim të ndahemi nga Mbretëria e Bashkuar. Ishte populli britanik që vendosi të largohej nga BE”, tha Loiseau.
Kur u pyetën nëse kjo do të thoshte se Britania do të qëndronte “me kushtet e njëjta” si më parë, Loiseau tha se, “Sigurisht. Ashtu si çdo anëtar i BE-së, ne kemi një bindje, që është se statusi më i mirë i mundshëm është anëtarësimi, statusi më fitimprurës”.
Ministrja franceze tha se një skenar pa marrëveshje do të ishte keq për Evropën dhe Britaninë. Megjithatë, ajo shtoi se BE gjithashtu besonte se pa marrëveshje do të ishte më mirë se një marrëveshje e keqe.
“Ne të gjithë do të vuajmë, më e keqja do të ishte për Britaninë, por ne jemi të përgatitur për një skenar pa marrëveshje, sepse deri më tani ne nuk kemi parë përparim të rëndësishëm në lidhje me marrëveshjen e tërheqjes që do të na lehtësonte nga ky shqetësim, që do të mund të ishte pa marrëveshje”, tha ajo.
Komentet e ministres Loiseau mbi politikën e dyerve të hapura të BE-së do të jenë një lajm i mirë për aktivistët dhe përkrahësit e një referendumi të dytë ose “votimi të popullit”.
Në muajt e fundit ka pasur thirrje në rritje për një referendum të dytë dhe vrulli për një “votim të popullit” ka qenë vazhdimisht në rritje.
Politikanët e lartë si Anna Soubry, ish-ministre e kabinetit, Chuka Ummina, deputete laburiste, si dhe Vince Vable, kreu i partisë Liberal Demokratike, kanë mbështetur thirrjet për një referendum të dytë nëse dhe kur një marrëveshje të jetë e siguruar nga Londra dhe Brukseli.
Shifrat e tjera publike që bëjnë thirrje për një “votim të popullit” përfshijnë ish-yllin e futbollit, Gary Lineker, i cili ka shpehur mbështetje të fuqishme për fushatën për të qëndruar në BE, kundërshtimin e tij ndaj Brexit-it dhe mënyrën se si qeveria po i trajton negociatat.
Në fillim të këtij muaji, kryeministrja britanike, Theresa May, zyrtarizoi planin e saj të Brexit-it, që do të shihte Britaninë të ndiqte një “libër të përbashkët rregullash” me BE-në mbi tregtinë, duke i dhënë fund lirisë së lëvizjes punës.
Plani i kryeministres May është ndeshur me kritika të ashpra, me ministrat e lartë që japin dorëheqje nga kabineti i saj dhe BE duke e quajtur të papërshtatshëm. aa
STOCKHOLM – Suedia ka zhvilluar një metodë interesante për të shuar zjarret pyjore të cilat vazhdojnë për dy javë rresht.
Siç raporton gazeta “Aftonbaldet”, avionët luftarakë të llojit JAS-39 të Forcave Ajrore, kanë intervenuar me bombë ndaj zjarreve në qytezën Arvdalen ku automjetet zjarrfikëse nuk mund të arrijnë me anë të predhave të drejtuar të llojit GBU-49.
Zëdhënësi i Ministrisë së Mbrojtjes, Anders Persson, në deklaratën për gazetën tha se bombat e hedhura nga një lartësi prej 3.000 metrash duke krijuar një presion dhe asgjësuar oksigjenin në atë zonë ka shuar zjarrin në një zonë të caktuar.
“Prova e parë ishte e suksesshme. Në zjarret pyjore që do të ndodhin mund të përdoret kjo metodë”, tha ai.
Ndërkohë, Zyra Suedeze e Mbrojtjes Civile njoftoi se nga zjarret brenda një jave është shkatërruar pyll prej 25 mijë hektarësh. Supozohet se zjarri ka shkaktuar dëm prej 900 milionë krona suedeze (rreth 875 mijë euro).
Sipas televizionit shtetëror SVT, për shuarjen e zjarreve që kanë shpërthyer në 83 pika dhe ende vazhdojnë në 20 lokacione është kërkuar ndihmë nga vendet evropiane.
Franca, Gjermania, Danimarka, Polonia, Italia, Lituania, Portugalia dhe Norvegjia i dolën në ndihmë Suedisë e cila po përjeton një nga periudhat më të thata në historinë e saj.
Në mbarë vendin është ndaluar ndezja e zjarreve në piknik dhe zgarës deri më 30 gusht, ndërsa ata që nuk do ta respektojnë ndalesën mund të dënohen me burgim deri në 2 vite. aa
BERLIN – Ish-lideri katalonjas Carles Puigdemont paralajmëroi se të shtunën do të braktisë Gjermanisë dhe do të udhëtojë në Belgjikë.
Puigdemont sot në Berlin iu adresua gazetarëve duke paralajmëruar se pas shpërnguljes në Belgjikë do të vazhdojë me aktivitetet politike.
Këtë vendim Puigdemont e mori pasi Gjykata Supreme e Spanjës shfuqizoi fletarrestin ndërkombëtar për arrestimin e tij nën akuzat për “rebelim” dhe “shpërdorim të pronës publike”.
Më parë gjykata gjermane refuzoi kërkesën për ekstradimin e Puigdemont në Spanjë me paralajmërim se kjo megjithatë është e mundur pas akuzave për “shpërdorim të fondeve publike”.
Puigdemont u arrestua në Gjermani në fund të muajit mars, ndërsa në fillim të muajit prill u lirua. Spanja e ngarkon atë dhe 12 bashkëpunëtorët e tij, e ngarkon për “rebelim” dhe “keqpërdorim të fondeve publike” gjatë tentimit për shpalljen e pavarësisë së Katalonjës vitin e kaluar. aa
Udhëheqësi i Ujqërve të Natës, Aleksandr Zaldostanov.
Autorë: Yaroslav Shimov, Alan Crosby
Në prag të 50-vjetorit të pushtimit të Çekosllovakisë së atëhershme nga Pakti i Varshavës, një nga grupet që fuqishëm mbështet Kremlinin, ka ngritur një kamp të stilit ushtarak pranë kryeqytetit të Sllovakisë – vend anëtar i NATO-s.
Klubi i motoristëve Ujqërit e Natës, anëtarët e të cilit ishin në krye të pushtimit rus të Krimesë, ndërsa nga mediat janë quajtur “Engjëjt e Putinit”, ka ngritur selinë në një ish-bazë ushtarake në Dolna Krupa, rreth 60 kilometra në verilindje të Bratisllavës.
Ky veprim i klubit, i njohur për promovimin e nacionalizmit rus, për urrejtje ndaj homoseksualëve dhe feministëve dhe për besnikëri ndaj Kremlinit, duket se ka për qëllim zbulimin e një ane të errët dhe anti-perëndimore të këtij vendi të Bashkimit Evropian, i cili ka elemente të konsiderueshme të ekstremit të djathtë dhe rusofile.
Grupi, i cili është goditur me sanksione nga Perëndimi për shkak të mbështetjes së separatistëve pro-rusë në lindje të Ukrainës, është formuar në Sllovaki muajin e kaluar.
“Ata kanë ardhur për të irrituar demokratët dhe për të rekrutuar njerëz që janë në gjendje të shtënë mbi Ukrainën”, tha Jan Budaj, politikan opozitar në Sllovaki dhe nënshkrues i Kartës 77 të epokës komuniste.
“Ata po sjellin një mesazh që për qëllim ka prishjen e BE-së dhe shpërbërjen e NATO-s”, tha Budaj.
Me murin e zi, të lartë 2 metra dhe me tela gjemborë në krye, që rrethon objektin, pak kush e di se çfarë ndodh brenda.
Por, gjykuar nga fotografitë e bëra me dron, atje ka tanke, automjete të blinduara dhe pajisje policore.
Sipas gazetës Hospodarske Noviny, dega lokale e Ujqërve të Natës udhëhiqet nga Jozef Hambalek, i cili, siç shkruan ky medium, zotëron pronën dhe është i afërt me ish-ministrin e Brendshëm sllovak, Robert Kalinak. Asnjëri prej tyre nuk ka bërë komente publike për bazën.
Hambalek thuhet se dëshiron të hapë një muze ushtarak në kompleks.
Por, pajisjet ushtarake thuhet se janë në pronësi të Ministrisë së Mbrojtjes, e cila ka pezulluar Millosllav Çapalloviqin, kreun e Institutit të Historisë Ushtarake, për lejen që pajisjet t’i jepen me qira Hambalekut.
“Qartazi, kreu i Institutit të Historisë Ushtarake, Millosllav Çapalloviq, nuk ka arritur të kontrollojë tërësisht sfondin e kësaj shoqate të qytetarëve dhe kështu ka tejkaluar kompetencat e tij”, tha zëdhënësja e Ministrisë së Mbrojtjes, Danka Capakova.
‘Përtej kufijve’
Policia tha se ka monitoruar aktivitetet e grupit, porse, deri tani, nuk ka parë asgjë të paligjshme.
Ministria e Jashtme shprehu shqetësim, duke thënë se “aktivitetet e anëtarëve të grupit duhet të monitorohen dhe vlerësohen me kujdes”.
Jaroslav Nagy, drejtor i Institutit të Sllovakisë për Politikat e Sigurisë, paralajmëroi kundër qasjes së butë ndaj kësaj çështjeje.
“Kjo është përtej kufijve të lejuar… Veprimet e tyre janë parë gjithmonë si propagandë”, tha Nagy për Shërbimin e Rusisë të Radios Evropa e Lirë.
Udhëheqësi i Ujqërve të Natës, Aleksandr Zaldostanov, është parë shpesh në publik me presidentin rus, Vladimir Putin, dhe është i njohur për deklaratat e tij të ashpra nacionaliste.
Udhëheqësi i Ujqërve të Natës, Aleksandr Zaldostanov, dhe presidenti rus, Vladimir Putin. Krime, 2017.
Ai e ka udhëhequr grupin në disa udhëtime provokuese në të kaluarën, përfshirë udhëtimin në Berlin në Ditën e Fitores dhe ndezjen e qirinjve në Katin, ku Josez Stalini thuhet se ka urdhëruar ekzekutimin e dhjetëra mijëra oficerëve polakë gjatë Luftës së Dytë Botërore.
Në muajin mars, edhe pse pa Zaldostanovin, dhjetëra Ujqër të Natës kanë marrë pjesë në një turne që e kanë quajtur “Ballkani rus”.
Në Sllovaki, grupi Iniciativa Studentore u shpreh i shqetësuar me situatën dhe thirri protestë për më 27 korrik.
“U bëjmë thirrje të gjithë qytetarëve që të vijnë dhe të kundërshtojnë një objekt të tillë në territorin tonë, si dhe të tregojnë se siguria e vendit tonë nuk është vjedhur”, tha Timothy Lauko nga Iniciativa Studentore.
Italia ka hedhur poshtë kritikat se po ndjek politika të ashpra ndaj emigracionit, pas protestave para Ministrisë së Brendshme italiane me thirrjet se autoritetet italiane janë përgjegjëse për vdekjen e refugjatëve në det. Roma nuk lejon organizata joqeveritare, apo anije të shoqatave humanitare të zbarkojnë refugjatë në portet e saj. Siç njofton korrespondenti Henry Ridgewell, shifrat e sapo-publikuara tregojnë se politikat e reja italiane kanë rezultuar në uljen e numrit të refugjatëve të mbërritur në Itali, ndërkohë që Spanja është bërë destinacioni numër një për emigrantët që futen në territorin e Bashkimit Evropian.
Protestuesit u mblodhën të mërkurën para Ministrisë së Brendshme në Romë, duke përdorur bojë të kuqe për të ilustruar akuzat e tyre se qeveria italiane i kishte duart e lyera me gjakun e refugjatëve të vdekur.
Protestat lidhen me gjetjen në det të hapur të një anijeje të shkatërruar refugjatësh, nga një shoqatë humanitare spanjolle në ujërat e Libisë. Në anijen e shkatërruar ishin trupat pa jetë të një gruaje dhe një fëmijë; një grua tjetër u shpëtua gjallë. Shoqatat akuzojnë rojen bregdetare libiane se i kishte braktisur refugjatët:
“Kjo është pasojë e drejtpërdrejtë e pengimit të punës së shoqatave humanitare për të shpëtuar jetë në Mesdhe. Ky është rezultati,” thotë Oscar Caps, drejtor i shoqatës “Proactiva Open Arms”.
Qeveria italiane, një koalicion mes partisë së ekstremitë të djathtë Liga e Veriut dhe lëvizjes populiste Pesë Yjet, ka bllokuar qasjen e anijeve humanitare në portet italiane.
Në fillim të javës Italia u imponoi pesë vendeve të tjera evropiane të strehonin 450 emigrantë të shpëtuar në det, pasi Roma nuk pranoi fillimisht t’i lejonte të zbarkonin në porte italiane. Ministri i brendshëm italian shkruante në Twitter: Qeverisja koherente dhe pa-kompromis jep rezultat”.
“Unë synoj t’i shpëtoj të gjithë. T’i shëroj të gjithë. T’i ushqej të gjithë. Por nuk dua të lejoj që të gjithë të vijnë në Itali,” tha Ministri i Brendshëm, Matteo Salvini.
Shifrat e publikuara nga agjencia e BE-së për Kufijtë, Frontex, tregojnë se tre mijë refugjatë përdorën korridorin detar drejt Italisë dhe Maltës muajin e kaluar, ose 87% më pak se në qershor 2017.
“Shifrat kishin rënë shumë edhe nën qeverinë e mëparshme si rezultat i disa marrëveshjeve mes Italisë dhe Libisë. Në fakt numri i refugjatëve që mbërrinin në Itali kishte rënë shumë. Tani politika që ndalon zbarkimin e refugjatëve nga anije të organizatave humanitare po e thellon këtë rënie. Për më tepër, ka rezultuar në një fitore të fortë politike për Ligën e Veriut, sidomos nga fakti që disa vende të tjera evropiane po detyrohen të pranojnë refugjatët që mbërrijnë në Itali,” thotë Luigi Scazzieri i Qendrës për Reforma Evropiane.
Kombet e Bashkuara thonë se një në shtatë refugjatë që është përpjekur të kalojë Mesdheun është mbytur që kur Italia mbylli portet për anijet humanitare. Ky qëndrim i prerë ka ulur numrin e refugjatëve, por me një kosto të lartë fatale. BE-ja po përpiqet të gjejë një zgjidhje, thotë zoti Scazzieri.
“Idetë që po diskutohen aktualisht janë aplikimet për azil jashtë territorit të BE-së, forcimi i rolit të Frontex-it, si dhe ndarja e barrës mes anëtarëve të BE. Ndërkohë që vazhdojnë diskutimet, vazhdon edhe paqartësia mbi ndikimin e politikave italiane”.
Spanja tani ia ka kaluar Italisë si vendi që pranoi numrin më të madh të refigjatëve në qershor me 6400 vetë. Por nuk ka gjasa që Spanja të bëhet një destinacion kryesor.
“Që Spanja të bëhet destinacion kryesor, refugjatët duhet të nisen nga Maroku, por ky nuk është një shtet thuajse i dështuar si Libia,” thotë zoti Scazzieri.
Në total numri i imigrantëve të paligjshëm që u futën në BE në gjysmën e parë të 2018-tës arriti në mbi 60 mijë vetë, duke shënuar një rënie prej afro 50% krahasuar me numrin e regjistruar një vit më parë.
Gjykata Supreme e Spanjës e tërhoqi urdhër-arrestin evropian kundër ish-presidentit të Katalonjës, Carles Puigdemont, dhe pesë ndihmësve të tij që mbeten jashtë vendit.
Një gjykatë në Gjermani konstatoi më herët se Puigdemont nuk mund të ekstradohet për t’u përballur me akuzat e Spanjës për rebelim, për shkak të shtytjes së tij për pavarësinë e Katalonjës.
Rebelimi është akuza më serioze që është ngritur kundër Puigdemont.
Por, akuzat kundër gjashtë separatistëve katalanas mbeten, çfarë do të thotë se ata ende përballen me arrestim nëse kthehen në Spanjë.
Gjykata rajonale në Shlesvih-Hollstajn në Gjermani tha se Puigdemont mund të ekstradohet për akuzën e keqpërdorimit të fondeve publike, por jo për rebelim apo për kryengritje.
Gjykatësi i lartë spanjoll, Pablo Llarena, tha se duke vepruar kështu, gjykata gjermane tregoi një “mungesë angazhimi” me rastin dhe shkeli rregullat e urdhër-arrestit.
Ai e akuzoi atë për minimin e kompetencave të gjykatës supreme spanjolle.
Spanja e nxori të jashtëligjshëm referendumin e pavarësisë të mbajtur në Katalonjë më 1 tetor. Ajo po ashtu e konsideron të paligjshme deklaratën pasardhëse të Katalonjës për pavarësi.
I përballur me arrestimin në Spanjë, Puigdemont iku në Belgjikë dhe më pas u zhvendos në Gjermani, ku po lufton kundër ekstradimit.
Plani i Investimeve për Evropën, i njohur gjithashtu si “Plani Juncker”, pritet të mobilizojë 335 miliardë dollarë investime shtesë në të gjithë Evropën.
“Kjo shumë është më tepër se synimi fillestar prej 315 miliardë eurosh të vendosura në vitin 2015 kur u lançua Fondi Evropian për Investimet Strategjike (EFSI), duke ndihmuar në mbylljen e boshllëkut të investimeve të lënë si rezultat i krizës ekonomike dhe financiare”, tha Komisioni Evropian përmes një deklarate me shkrim.
Kreu i Komisionit Evropian, Jean-Claude Juncker tha se EFSI ishte vendosur për të krijuar mbi një milion vende pune dhe të rrisë Produktin e Brendshëm Bruto (PBB) të bllokut 28-anëtarësh të Bashkimit Evropian (BE) me 1 për qind deri në vitin 2020.
“Ne kemi financuar projekte që pa EFSI-në nuk do të ishin të mundshme dhe të gjitha pa krijuar borxhe të reja. Dy të tretat e investimeve vijnë nga sektori privat”, tha Juncker.
Kreu i grupit të Bankës Evropiane të Investimeve (EIB), Werner Hoyer, tha se shumë njerëz e konsiderojnë “Planin Juncker” si fitues dhe nuk ka kthim prapa nga ajo.
“Tani kemi çelësin që burimet e pakta publike të arrijnë më shumë për ekonominë e Evropës dhe për qytetarët e saj, duke grumbulluar investime private”, tha Hoyer. aa
