Kancelarja gjermane, Angela Merkel është përulur me nderime para gjashtë milionë hebrenjve në Izrael, të vrarë nga nazistët dhe ka thënë se Gjermania mban përgjegjësi për të luftuar antisemitizmin dhe të mos harrojë kurrë Holokaustin, transmeton Reuters.

Ajo ka nisur takimet në mes të delegacionit të Qeverisë Gjermane dhe asaj Izraelite me një vizitë në vendin përkujtimor të Holokaustit në Izrael, Yad Vashem.

“Pothuajse 80 vjet më parë, në natën e 9 nëntorit, hebrenjtë në Gjermani janë përballur me urrejtje dhe dhunë të paimgjinueshme. Kjo është përcjellur me krime të pashembullta kundër civilëve në formë të Shoahs”, ka thënë ajo duhet përdorur shprehjen hebreje për Holokaustin.

“Gjermania ka përgjegjësi për të kujtuar këto krime dhe për të luftuar antisemitizmin, ksenofobinë, urrejtjen dhe dhunën”, është shprehur ajo.

Merkel ka arritur në Izrael të mërkurën për një vizitë 24 orëshe, në kuadër të takimeve vjetore në mes të ministrave gjermanë dhe atyre izraelitë.

Partia e konservatore e kancelares Merkel është nën presion nga nacionalistët dhe e djathta ekstreme në Gjermani, të cilët janë zemëruar pas vendimit të saj për të pranuar më shumë se 1 milionë azilkërkues më 2015 në Gjermani.

BRUKSEL – Steve Bannon, ish këshilltari i presidentit të SHBA-ve Donald Trump, me gjasë do të jetë një kandidat për të trazuar kontinentin evropian me lëvizjen “The Movement” me të cilën ka planifikuar të bashkojë partitë ekstreme të krahut të djathtë në Bashkimin Evropian (BE).

Bannon, i cili është një nga ish drejtuesit e internet faqes së lajmeve të ekstremit të djathtë Breitbart, e cila ringjalli sërish trendin e “nacionalizmit” në sferën ekonomike gjatë periudhës së detyrës së tij shtatë mujore në kohën e Trumpit në SHBA, synon të bashkojë partitë e djathta ekstreme në BE përpara zgjedhjeve për Parlamentin Europian (PE) në majin e ardhshëm.

Pritet që Bannon përpara zgjedhjeve të PE-së më 23-26 maj 2019 të zhvillojë një sërë vizitash intensive nga muaji nëntor për të kërkuar mbështetje ndaj lëvizjes “The Movement”.

– Përpiqet të tërheqë anëtarë me premtimin e fondeve dhe ndihmës për hulumtime

Lëvizjen e tij Bannon e ka ndërmarrë bashkë me Mischael Modrikamen liderin e Partisë Popullore të ekstremit të djathtë në Belgjikë. Modrikamen i cili lëvizjen e ka regjistruar në muajin janar, krahas punëve administrative ai shoqëron Bannon në udhëtimet e tij në Evropë.

Lëvizja për partitë e ekstremit të djathtë që anëtarësohen në të, në qendrën që do të formohet në Bruksel krahas anketimeve dhe zhvillimit të hulumtimeve pa pagesë premton të japë edhe rekomandime në çështjen e zhvillimit të fushatave politike.

Pavarësisht se ende nuk nuk është deklaruar qartë burimi, në të njëjtën kohë për grupet që do të anëtarësohen në lëvizje parashikohet të transferohen fonde nga donatorët “Evropianë dhe Amerikanë”. Modrikamen, pretendon se aktualisht janë mbledhur “shuma serioze” nga donatorët.

– Qëllimi është bashkimi i të djathtës ekstreme

Me projektin e tij të ri Bannon ka në objektiv fillestar PE-në. Duke deklaruar se synon të formojë një “super grup” të përbërë nga të djathtët ekstremë kundër partive tradicionale brenda PE-së, Bannon në këtë mënyrë kërkon të marrë një të tretat e Parlamentit i cili ka 751 vende.

Duke mbrojtur idenë e tij se tashmë partitë populiste në Evropë “janë zgjuar”, Bannon ka tërhequr vëmendjen me deklaratën e tij se “Zgjedhjet e ardhshme në maj kanë një rëndësi kyçe”.

Lëvizja u jep përparësi koncepteve të tilla me të cilët të djathtët ekstremë zhvillojnë politikë nëpërmjet si sovraniteti kombëtar, kufijtë e fortë, migrimi i kufizuar dhe lufta kundër radikalizmit.

– Kundërshtari i ri i Soros-it

Në anën tjetër kur shikohen deklaratat dhe politikat që ndjek Bannon shihet se objektivi i tij kalon përtej zgjedhjeve të Parlamentit.

Duke theksuar se ai synon të krijojë “infrastrukturën e një lëvizjeje populiste globale”, Bannon duket se e ka identifikuar veten si një rival ndaj biznesmenit amerikan me origjinë hungareze George Soros, që mbështet liberalizimin në shkallë globale.

Bannon e ka përshkruar si një “person shumë inteligjent, por i djallëzuar” Soros-in i cili ka shpenzuar rreth 32 miliardë dollarë që nga viti 1984 për të mbështetur ‘demokracitë liberale‘ në Evropë nëpërmjet Institutit të Shoqërisë së Hapur. Ai beson se do të jetë një kundërshtar i fortë duke mbështetur me lëvizjen e tij një rrymë e cila është plotësisht në të kundërt në Evropë.

– Bisedimet që nga Le Pen e deri tek Salvini

Bannon, i cili herë pas here ka zhvilluar biseda sekrete me zyrtarët e partisë ekstreme të së djathtës në Evropë për të mbledhur mbështetje, ai ka gjithashtu një listë të gjerë të vizitave.

Në një fjalim ku Bannon ka ndarë të njëjtën skenë në kongresin e partisë me Marine Le Pen lideren e të djathës ekstreme në Francë, ka thënë: “Lërini t’u thonë racistë, armiq të të huajve. Mos u kushtoni vëmendje, këto përshkrime i mbani si medalje nderi”.

Po ashtu në mesin e atyre personave që Bannon ka formuar kontakte të afërta ndodhen edhe zyrtarë të partisë së ekstremit të djathtë “Vëllezërit e Italisë” dhe partisë La Liga e Matteo Salvini-t i cili është zëvendëskryeministri dhe ministri i Brendshëm i Italisë i cili ka njoftuar hapur se do të japë mbështetje për “The Movement”.

Ndërkohë pretendohet se Bannon dhe Modrikamen në muajin shtator me një xhet privat janë takuar fshehurazi edhe me kryeministrin e Hungarisë, Viktor Orban.

Banon i cili zhvillon bisedime duke përfituar edhe nga rryma kundër BE-së e cila forcohet në Poloni, në të njëjtën kohë dihet që ai ka edhe një marrëdhënie të afërt edhe me Nigel Farage ish liderin e partisë së djathtë ekstreme Partisë së Pavarësisë së Mbretërisë së Bashkuar (UKIP) në Britani të Madhe si dhe me zyrtarë të partisë ekstreme të djathtë Alternativa për Gjermaninë (AfD).

– Krizat e BE-së përbëjnë një mundësi për Bannon

Në anën tjetër vendimi i Britanisë së Madhe për largimin nga BE-ja, mos gjetja ende e një zgjidhjeje për krizën e emigrantëve dhe pikëpyetjet në rritje në lidhje me bashkimin financiar, krijojnë një atmosferë krize në të gjithë BE-në.

Problemet në kontinent shkaktojnë rritjen e pashmangshme të partive ekstreme të krahut të djathtë, të cilat gjithnjë e më shumë e vënë në dyshim efektivitetin e BE-së në vende të tilla si Hungaria, Polonia, Franca, Suedia, Holanda, Gjermania, Austria dhe Italia.

Megjithëse konceptet e të djathtës ekstreme dhe nacionalizmit në Evropë sjellin me vete kujtime të këqija të viteve 1930, është e nevojshme që të mos injorohet fakti që Bannon ka kaluar në veprim në kohën e duhur në të gjithë BE-në dhe gjithashtu nuk duhet të neglizhohet mundësia e tij për të qenë i suksesshëm.

Është e paqartë se cilat janë motivet dhe forcat në sfondin e Bannon që kërkon të ushqejë lëvizjen nacionaliste në rritje në Evropë dhe zjarrin opozitar në BE. Disa qarqe mendojnë se pas përpjekjeve për të ndarë Unionin qëndron Trump, të cilët nuk injorojnë qëllimin e presidentit të SHBA-ve për të fituar interes komercial nga BE-ja e fragmentuar.

Ndërsa ata që janë në idenë se Trump nuk ka potencial për të bërë një llogari të tillë “të hollësishme” dhe afatgjate, mendojnë se veprimi i Bannon ka për qëllim vetëm një revoltë të re ideologjike kundër demokracisë liberale të Sorosit.

Lëvizja e re Bannon, e cila pavarësisht se ka një bazë të papërcaktuar dhe që është e dukshme që merr mbështetje nga lobet e forta të SHBA-ve, pritet të sjellë shtysë të re në ndarjen e politikës evropiane tashmë të brishtë për shkak të migracionit të parregullt, trazirave ekonomike dhe ndryshimeve të tjera konjukturale. aa

BRUKSEL – Parlamenti Evropian (PE) sot ka nisur një projekt që synon luftimin e islamofobisë.

Në këtë projekt të inicuar, i cili financohet nga Komisioni Evropian (KE), morën pjesë një numër ekspertësh dhe profesorë universitetesh që trajtojnë çështjet e islamofobisë dhe racizmit

Të pranishmit u bënë thirrje vendeve anëtare të BE-së dhe vendimmarrësve politikë që të luajnë një rol më aktiv në luftën kundër islamofobisë dhe të forcojnë procedurat ligjore në lidhje me këtë çështje.

Projekti i titulluar “Lufta kundër islamofobisë” do të zgjasë gjithsej dy vjet.

Projekti do të analizojë narrativat dominante anti-myslimane në tetë shtete anëtare të BE-së, Francë, Gjermani, Belgjikë, Çeki, Hungari, Portugali, Greqi dhe Britani të Madhe.

Projekti, ndër të tjera, do të hetojë edhe atë se në çfarë mënyre myslimanët paraqiten si “kërcënim” dhe si ndërtohen “shtete gjithëpërfshirëse”. aa

Një gjykatë në Francë ka udhëruar lideren e ekstremit të djathtë, Marine Le Pen t’iu nënshtrohet testeve psikiatrike, në kuadër të hetimeve që kanë nisur, pas shpërndarjes së fotografive në të cilat shihen mizoritë e grupit militant, Shteti Islamik (IS).

Le Pen ka publikuar në Twitter kërkesën e gjykatës, duke e cilësuar “të çmendur”.

Ajo ka publikuar disa fotografi më 2015, duke përfshirë një viktimë të IS-it me kokë të prerë.

Asaj i është hequr imuniteti si anëtare e parlamentit dhe mund të ndëshkohet me dënim apo burgim.

Si lidere e asaj që është quajtur Fronti Kombëtar, Le Pen është mundur nga Emmanuel Macron në raudin e dytë të zgjedhjeve presidenciale.

Që nga ajo kohë, politikania ka tentuar të ngrihet sërish, derisa partia e saj ka ndryshuar emrin në Marshi Nacionalist, në mënyrë që të distancohet nga shenjat e racizmit.

Sipas një dokumenti të publikuar nga vetë ajo, gjyqtari ka kërkuar që përmes testeve të vlerësojë nëse ajo ka probleme mendore, apo “nëse është në gjendje të kuptojë pyetjet dhe të përgjigjet”.

Le Pen në anën tjetër e ka vlerësuar kërkesën “të çmendur” dhe se sipas saj “regjimi është duke nisur të bëhet i frikshëm”.

Mirëpo prokurorët i kanë thënë gazetës, Le Parisien se kërkesa është pjesë e procedurave të rregullta.

Le Pen ishte përballur me pakënaqësi kur kishte postuar fotografitë, pasi një gazetar kishte bërë krahasim në mes të IS-it dhe partisë së tij.

Rasti kundër saj është i lidhur me ligjin francez, i cili kundërshton qarkullimin e “mesazheve të dhunshme, të cilat nxisin pornografi dhe terrorizëm, apo të cilat dëmtojnë rëndë dinjetetin njerëzor” dhe të cilat mund të shihen nga të miturit.

Gjermania ka vënë në përdorim trenin për pasagjerë Coradia iLint, që është i pari i parë në botë, që për karburant do të përdorë hidrogjenin, i cili shndërrohet në energji elektrike si forcë tërheqëse e trenit.

Lajmi është konfirmuar nga kompania ndërkombëtare franceze Alstom, e cila thotë se treni emeton vetëm avull dhe ujë të kondenzuar me nivel të ulët të zhurmës, që e bën paqësor ndaj ambientit.

“Treat ‘Coradia iLint’, do të operojnë në udhëtimin 100 kilometërsh mes qyteteve Cuxhaven, Bremerhaven, Bremervorde dhe Buxtehude, me çka do të zëvendësojnë trenët dhe autobusët e kompanisë gjermane EVB”, thuhet në njoftimin e Alstom e cila bën të ditur se treni i ri do të bashkëmenaxhohet nga ata dhe kompania gjermane EVB.

“iLint është i veçantë nga shkaku i kombinimit të elementeve të ndryshme inovative: shndërrimi i energjisë së pastër, ruajtje fleksibile të energjisë në bateritë dhe menaxhim të mençur të fuqisë dhe energjisë së disponueshme”, thuhet më tej.

Përveç kësaj, treni i projektuar për operim në linjat jo të elektrizuara, bën të mundur një transport të pastër të qëndrueshëm të trenave, njëkohësisht duke siguruar performancë të nivelit të lartë.

Treni mund të qarkullojë me një shpejtësi maksimale prej 140 kilometra në orë. aa

Komisionerja Evropiane e Transportit, Violeta Bulc njoftoi se Bashkimi Europian do të ndalojë ndryshimin e orës dy herë në vit në të gjithë kontinentin, duke filluar që nga Tetori 2019.

Bulc tha se të gjitha vendet anëtare të Bashkimit Europian duhet të vendosin deri në prill të vitit 2019 nëse do të qëndrojnë përgjithmonë në zonën kohore verore apo dimërore.

Në Europë, shtetet ndryshojnë akrepat 60 minuta përpara të dielën e fundit të marsit, ndërsa në tetor i kthejnë akrepat 60 minuta prapa.

Sipas BE-së, të gjitha vendet anëtare duhet të kenë të njëjtën zonë kohore dhe t’i jepet fundit praktikës së ndryshimit.

Eurokomisionerja e Transportit deklaroi se duhet të gjendet një konsensus mes vendeve anëtare të Parlamentit Europian.

Ka qenë Komisioni Europian që kërkoi mosndryshimin e orës, pas një studimi të bërë online ku rezultatet treguan se 80% e të anketuarve nuk ishin dakord me ndryshimin e orës.

Praktika e ndryshimit të orës daton që prej Luftërave Botërore, ndërsa në vitin 1996 u bë ligj nga BE.

“Nuk mund të besosh në Zot dhe të jesh mafia. Kush është mafioz nuk jeton si i krishterë, sepse blasfemon me jetën, emrin e Zotit që është dashuria” ishte ky mesazhi i Papa Franceskut.

Ati i Shenjtë këtë herë iu drejtua mafias me një fjalim të mbajtur në Palermo, në nder të priftit Don Pino Puglisi të vrarë në vitin 1993 nga grupi mafioz Cosa Nostra.

Papa u prit në Palermo nga 40 mijë njerëz. “Unë jam i lumtur të gjej veten në mesin tuaj, dielli i Sicilisë është i bukur!”. Papa mbajti një fjalim të gjatë me besimtarët në Piazza Armerina.

Kancelarja gjermane Angela Merkel, tha se sanksionet e Bashkimit Evropian ndaj Moskës do të vayhdojnë deri në arritjen e një armëpushimi në Ukrainë, nën marrëveshjen e Minskut.

“Para implementimit të marrëveshjes së Minskut, ose është zhvilluar progress, ne nuk do të konsiderojmë heqjen e sanksioneve ndaj Rusisë”, tha Merkel.

“Kthimi i paqes dhe integritetit territorial të Ukrainës është caku ynë”.

Sanksionet ndaj Rusisë ishin vendosur për shkak të mbështetjes ndaj separatistëve të forcave të qeverisë ukrainase në një luftë që la më shumë se 10,300 persona të vrarë që nga prilli i vitit 2014.

Sanksionet ishin rritur ndaj Moskës për rrethimin dhe aneksimin e Gadishullit të Krimesë.

Edhe Shtetet e Bashkuara kanë vendosur sanksione të njëjta.

BERLIN – Një studim i ri zbuloi se sulmet kibernetike dhe spiunazhi industrial kanë shkaktuar humbje prej 43 miliardë euro (50 miliardë dollarë) për kompanitë gjermane në dy vitet e fundit.

Shoqata dixhitale gjermane Bitkom sot tha se 68 për qind e kompanive gjermane janë bërë viktimë e sulmeve kibernetike, sabotimit, vjedhjes së të dhënave ose spiunazhit.

“Shumë kompani gjermane janë liderë të tregut në mbarë botën që i bën ata shumë tërheqës për kriminelët”, tha kryetari i Bitkom, Achim Berg, në një konferencë për media në Berlin.

Sipas studimit të Bitkom, në rreth 63 për qind e incidenteve, punonjësit e tanishëm ose të mëparshëm të kompanive ishin të përfshirë në sulmet kibernetike ose spiunazhit industrial.

Në 29 për qind të incidenteve, besohet se hakerët që kanë hobi atë kanë qenë përgjegjës për sulmet, ndërsa shërbimet e huaja të zbulimit u identifikuan në 11 për qind të rasteve.

Spanja do të vazhdojë procedurat e shitjes së 400 bombave me lazer në Arabinë Saudite, ka njoftuar ministri i Jashtëm spanjoll, Josep Borrell, ndonëse në fillim shteti i tij kishte dilema për rolin e sauditëve në luftën në Jemen.

“Vendimi është që këto bomba do të shiten në kuadër të kontratës së vitit 2015, që është nënshkruar nga Qeveritë e mëparshme”, ka thënë Borrell për Radion Onda Cero, transmeton Reuters.

Grupe për të drejtat e njeriut, përfshirë Amnesty International kanë dënuar shitjen e armëve të Perëndimit në Arabinë Saudite dhe tek aleatët e saj, në luftën për të cilën Kombet e Bashkuara kanë thënë të ketë lënë të vdekur më shumë se 10,000 persona dhe 8.4 të tjerë i ka përballur me uri ekstreme.

Disa ministra qeveritarë kanë punuar në këtë çështje për një javë dhe kontrata është rishikuar tri herë nga komisioni përgjegjës për shitjen e armëve, andaj sipas Borrell ata “nuk kanë gjetur asgjë për të mos shitur ato”.

I pyetur nëse Spanja ka pranuar ndonjë dokument që siguron se ato armë nuk do të përdoren kundër popullsisë në Jemen, ministri spanjoll ka thënë se bombat godasin shënjestrat me “precizitet të jashtëzakonshëm” brenda një metre.

Vendimi për ndalimin e shitjes së armëve pati ngritur shqetësime lidhur me kontrata tjera të nënshkruara me vendet e Gjirit Arab.

Mirëpo, ministria e Mbrojtjes ka thënë muajin e kaluar se Qeveria Socialiste aktuale, e cila ka nisur së qeverisuri në muajin qershor, nuk ka shitur kurrë armë, të cilat mund të përdoren kundër civilëve.

Parlamenti Evropian votoi me shumicë votash rekomandimin e Komiteti për liritë qytetare, drejtësi dhe çështje të brendshme, për liberalizimin e vizave për Kosovën.

Raportuesja për vizat në Parlamentin Evropian Tanja Fajon, gjatë prezantimit të rekomandimit tha se qytetarët e Kosovës e meritojnë votën pro, pasi institucionet e Kosovës i kanë përmbushur gjitha kriteret për liberalizimin e vizave.

Ajo tha se sot votohet për mandatën e dialogut tripalësh mes Parlamentit, Komisionit dhe Këshillit të Ministrave.

Pas këtij votimi të Parlamentit Evropian konfirmohet mandati për fillimin e bisedimeve me vendet anëtare të BE-së, në mënyrë që Kosovës t’i liberalizohen vizat. Bisedimet në emër të Parlamentit Evropian do t’i udhëheqë, Tanja Fajon, raportuese për vizat në Parlament.

Ndërkaq, menjëherë pas votimi përmes një postimi në Twitter, Fajon tha se qytetarët e Kosovës janë edhe një hap më afër udhëtimit pa viza në Evropë.

“Përpjekjet vazhdojnë me qeveritë e vendeve të BE-së dhe nuk do të ndalem derisa të liberalizohen vizat”, ka shkruar Fajon.

Radio Evropa e Lirë mëson se takimi i parë i grupit punues do të mbahet më 17 shtator.

Pasi të përafrohen bisedimet në kuadër të grupit punues, pastaj çështja kalon në nivel të ministrave të Brendshëm të Bashkimit Evropian, të cilët vendosin për këtë përmes votimit me një shumicë të kualifikuar.

Komisioni Evropian më 18 korrik të këtij viti, vendosi se Kosova i ka përmbushur gjitha kriteret dhe i rekomandoi Bashkimi Evropian të liberalizojë vizat për qytetarët e Kosovës.

Kosova është vendi i vetëm në Ballkanin Perëndimor, qytetarët e së cilës nuk gëzojnë të drejtën e lëvizjes së lirë në zonën e Shengenit.

BRUKSEL – Presidenti i Komisionit Evropian (KE), Jean-Claude Juncker, dëshiron që të forcojë rojën bregdetare të Bashkimit Evropian(BE) dhe Zyrën evropiane për azil me qëllim që të përmirësojë mbikëqyrjen e kufijve të jashtëm dhe të përshpejtojë deportimin e emigrantëve jolegal.

Juncker të mërkurën në Parlamentin Evropian në Strasburg tha se “kufijtë e jashtëm duhet të mbrohen në mënyrë efikase”.

Ai shtoi se Komisioni Evropian propozon që një korpus i përhershëm për shërbimin e kufirit dhe të rojës bregdetare të numërojë 10.000 persona, duke përfshirë rojet dhe ekspertët e migracionit

Forcat tërësisht do të ishin operativ deri në vitin 2020, ndërsa sipas Junckerit për këtë Bashkimi Evropian duhet të ndajë rreth 2.2 miliarder euro.

Mbetet që vendet anëtare të BE-së të aprovojnë propozimin. Shumë kombe shprehën shqetësimin për shkak të faktit se kufijtë e tyre i kontrollojnë nëpunës të vendeve tjera, madje edhe nëse bëhet fjalë për partnerët evropianë.

– “Idlibi duhet të jetë një shqetësim i thellë për ne”

Juncker duke folur mbi krizën që vazhdon në Siri, tha se “Idlibi duhet të jetë një shqetësim i thellë për ne. Nuk mund të heshtim përballë kësaj fatkeqësie njerëzore e cila është e qartë se do të përjetohet në një periudhë të afërt”.

Pasi ka theksuar se kriza e Sirisë është provë se po vendoset gjithnjë e më shumë në objektiv rregulli ndërkombëtar të cilin evropianët e kanë përfituar që nga Lufta e Dytë Botërore, Juncker tha se “Aleancat e djeshme ndoshta nuk do të jenë aleancat e sotme”.

“Ka ardhur koha për sovranitetin e Evropës. Është koha të marrim në dorë fatin tonë”, deklaroi Juncker duke shtuar se BE-ja nuk është një ishull i mbyllur brenda saj përkundrazi ajo është një kontinent i hapur dhe i mbushur plot me paqe që vazhdon marrëdhëniet me fqinjët e saj.

Ndër të tjera duke nënvizuar se paqja në Evropë është mundësuar falë BE-së, Juncker tha se “BE-ja është garantuese e paqes”.

Duke përmendur lëvizjet e të djathtës ekstreme që janë rritur kohët e fundit në BE, Juncker tha: “T’i themi jo nacionalizmit që refuzon dhe urren të tjerët”.

Juncker ka dhënë informacione edhe në lidhje me aktivitetet për emigrimin dhe refugjatët. Sipas tij, që nga viti 2020 do të fillojnë detyrën njësitë bregdetare dhe të mbrojtjes së kufirit të përbërë nga 10 mijë persona.

“Duhet të formohen kanale migrimi të rregullta. Kemi nevojë për migrantë të kualifikuar”, tha Juncker duke shtuar se kanë zvogëluar me 80 për qind migrimet e ardhura nga Mesdheu.

– Pagesat në euro në vend të dollarit

Juncker nënvizoi se është e papranueshme që të bëhen pagesat me dollarë amerikanë për energjinë e eksportuar nga BE-ja e cila arrin një shifër prej 300 miliardë euro në vit.

Ai tha se vetëm 2 për qind e energjisë importohet nga SHBA-ja. “Euro duhet të jetë një mjet aktiv i sovranitetit të Evropës. Komisioni deri në fund të këtij viti do të ndajë inciativat me qëllim për të forcuar rolin ndërkombëtar të euros”, potencoi Juncker.

BRUKSEL – Komisioni i Bashkimi Evropian (KE), propozoi që t’i jepet fund ndryshimit të orës në muajt veror dhe dimëror të shteteve anëtare të BE-së.

Kryetari i KE-së, Jean-Claude Juncker, në adresimin e tij, njoftoi rreth propozimit të rregullativës së ndryshimit të aplikimit të orës verore dhe dimërore që është duke u zbatuar aktualisht.

Sipas kësaj, shtetet anëtare të BE-së, që nga viti 2019 nuk do të zbatojë orën verore dhe do të kalojë në një llogari të vetme. Vendet anëtare në prill të vitit 2019 do të vendosin për një llogaritje të vetme, verore ose dimërore.

Ata që do të zgjedhin llogaritjen verore ndryshimin e fundit të detyruar do ta bëjnë më 31 mars 2019, ndërsa ata që do të zgjedhin llogaritjen dimërore ndryshimin e fundit do ta bëjnë më 27 tetor 2019.

Që të dekretohet rregullorja duhet të miratohet nga Këshilli i BE-së dhe Parlamenti Evropian (PE).

Në 28 shtete anëtare të BE-së me rregulloren e bërë në vitin 1981, çdo vit e diela e fundit të muajit mars akrepat janë shtyrë një orë përpara, ndërsa të dielën e fundit të tetorit akrepat një orë pas.

PE në muajt e kaluar kishte pranuar vendimin që parasheh t’i jepet fund ndryshimit të orës në mbarë BE-në.

Në sondazhin e bërë nga KE, në datat 4 korrik-16 gusht për orën verore kishin marrë pjesë 4,6 milionë persona. 84 për qind të qytetarëve ishin kundër llogaritjes së ndryshme për verën dhe dimrin. aa

Bashkimi Evropian duhet të jetë unik sa i përket anëtarësimit të Ballkanit Perëndimor në të kundërtën të tjerët do ta marrin mbi vete për t’ia formësuar atij një mjedis më të afërt, ka thënë presidenti i Komisionit Evropian, Jean-Claude Juncker.

Ballkanin Perendimor nuk duhet t’a lëmë pas dore, nuk duhet ta neglizhojmë këtë rajon pasi të tjerët do të rrisin ndikimin e tyre, ka deklaruar Junker në fjalimin e tij për gjendjen në BE para Parlamentit Evropian.

“ Njëherë e përgjithmonë duhet të gjejmë unitetin kur bëhet fjalë për Ballkanin Perendimor” iu tha eurodeputetëve, presidenti i Komisionit Evropian.

Junker ka theksuar se BE-ja nuk duhet të ndalë përpjekjet për ndërtimin e një Evrope të bashkuar, duke vënë theksin te fakti se Evropa mund të sjellë stabilitet siç ka bërë deri tash me procesin e zgjerimit të saj.

Rreth 1 milion persona kanë dalë në rrugët e Barcelonës për të shënuar “Ditën Kombëtare” të Katalonjës, si dhe për të treguar mbështetje për pavarësi.

Festimet vjetore janë organizuar për herë të parë prej tentimeve të dështuara të Katalonjës për t’u ndarë nga Spanja tetorin e kaluar.

Mijëra protestues të veshur me bluza të kuqe dhe duke valëvitur flamuj me ngjyrë të kuqe dhe verdhë, kanë mbajtur edhe mbishkrime mbështetëse.

Presidenti katalan, Quim Torra dhe paraardhësi i tij, Carles Puigdemont, i cili ka ikur në Belgjikë, pas dështimit të pavarësisë, u kanë bërë thirrje banorëve të protestojnë.

Torra ka thënë në fund të takimit se “ne po fillojmë një marsh të pafund”.

Festimet shënojnë ditën kur Barcelona është pushtuar nga ushtarët e Mbretit Filipe V më 1714, prandaj tetë vjetët e fundit janë përdorur për të përmendur pavarësinë në këtë ditë.

Këto njëherësh janë festimet e para prej kur Katalonja ka mbajtur referendumin për pavarësi më 1 nëntor të vitit të kaluar dhe ka shpallur pavarësinë në mënyrë të njëanshme më 27 tetor.

Gjykata Kushtetuese e Spanjës e ka konsideruar më pas këtë hap joligjor.

STOCKHOLM – Kryeministri i Suedisë, Stefan Lofven, deklaroi se ka ndërmend të mbajë postin edhe përkundër faktit se partia e tij e majtë shënoi rezultatin më të dobët në zgjedhjet e djeshme të përgjithshme.

Lofven, i cili në vitin 2014 solli Partinë Socialdemokrate në pushtet tha se “rezultatet e zgjedhjeve janë ende të paqarta”, por e pranoi se formimi i qeverisë së ardhshme mund të marrë kohë.

Zgjedhjet në Suedi, sondazhi nxjerr në epërsi Socialdemokratët

Ai tingëllonte i padisponueshëm, por gjithashtu me vendosmëri kur iu drejtua mbështetësve se “tani u mbetet partive politike të bashkëpunojnë me përgjegjësi dhe të formojnë një qeveri të fuqishme”.

Rezultatet paraprake të zgjedhjeve të së dielës tregojnë se partia e Lofven ka fituar 28,1 për qind të votave, që paraqet humbjen e 13 ulëseve në Parlament.

Duke iu përgjigjur rritjes së mbështetjes të Demokratëve Suedezë të ekstremit të djathtë, të cilët mund të kenë 14 deputetë më shumë në përbërjen e re, Lofven tha se “Partia me rrënjë në nazizëm kurrë nuk do të ofrojë asgjë të përgjegjshme përveç urrejtjes”.

“Duhet të kemi përgjegjësi morale. Ne duhet të mbledhim të gjitha forcat e mira në vend. Nuk do të dëshpërohem, por do të organizohemi”, tha Lofven.

PARIS – Një kishë shekullore në qytetin Logwy në verilindje të Francës është nxjerrë në shitje me një çmim prej 190 mijë euro me arsyetimin se ka mbetur e zbrazët.

Sipas radios lokale France Bleu Lorraine, është vendosur shitja e kishës Katolike Saint-Jules, e cila është ndërtuar gjatë viteve 1911-1913.

Më tej thuhet se shpenzimet e kishës me vite të tëra janë plotësuar nga biznesmenët e rajonit por që gjatë viteve të fundit kisha ka mbetur e zbrazët. Pas mosinteresimit të biznesmenëve dhe mos shkuarjes së besimtarëve të krishterë, njoftohet se nuk është arritur që të përmbushen shpenzimet minimale të kishës. Ndërkaq bëhet e ditur se kryepeshkopata në Nancy ka filluar procesin për shitjen e kishës.

Objekti historik është nxjerrë në shtije me një çmim prej 190 mijë eurosh dhe është njoftuar se ajo mund të përdoret si një vendbanim të llojit papafingo ose si apartamente të shumta që mund të përdoret si nikoqir i aktiviteteve të shumta.

Gjithashtu bëhet e ditur se gjatë viteve të fundit në rajonin Lorraine në kufirin mes Belgjikës dhe Luksemburgut ka rënë interesimi për kishën, duke shtuar se një numër i madh i kishave hasin në vështirësi në përmbushjen e nevojave minimale dhe të shpenzimeve të riparimit për shkak të mosinteresimit ndaj tyre. aa

BRUKSEL – Përfaqësuesja e Lartë për Politikë të Jashtme të Bashkimit Evropian (BE), Federica Mogherini, tha se vazhdojnë vështirësitë në procesin e dialogut Beograd-Prishtinë.

Mogherini zhvilloi takime ndaras me presidentin e Kosovës, Hashim Thaçi dhe me atë serb Aleksanda Vuçiç, të cilët gjendeshin në Bruksel për të marrë pjesë në procesin e dialogut Beograd-Prishtinë.

“Vazhdojnë vështirësitë. Besoj në angazhimin e plotë të të dy presidentëve për të vazhduar procesin dhe për të arritur në muajt e ardhshëm në një marrëveshje ligjërisht të detyrueshme për normalizimin gjithëpërfshirës të marrëdhënieve, në përputhje me ligjin ndërkombëtar” tha Mogherini në një deklaratë me shkrim.

Ajo shtoi se para Asamblesë së Përgjithshme të Kombeve të Bashkuara (OKB), sërish do të takohet me Thaçin dhe Vuçiçin në Bruksel.

Ndërkohë, Drejtori i të ashtuquajturës Zyra për Kosovën që funksionon brenda qeverisë së Serbisë, Marko Gjuriç, në një deklaratë të mëparshme, kishte theksuar se Vuçiç ka anuluar takimin me Thaçin dhe kishte pohuar se nuk ka kushte për zhvillimin e dialogut me Prishtinën.

Ndërsa Vuçiç, më parë kishte urdhëruar ushtrinë, pastaj i kërkoi policisë dhe Agjencisë së Informacionit dhe Sigurisë (BIA), që të ndërprejnë tërë komunikimin me policinë e Kosovës, KFOR-in dhe çdo përfaqësues shqiptar dhe ndërkombëtar që vepron në territorin e Kosovës

Siç mësoi Radio Televizioni i Serbisë, Vuçiç këtë e urdhëroi për shkak të informatave se Prishtina nuk e lejon atë gjatë vizitës së tij në Kosovë, të planifikuar më 8 dhe 9 shtator të vizitojë Ujmanin, për shkak të cilës vizita e tij në Kosovë është vënë në pikëpyetje. aa

Ushtria e Shteteve të Bashkuara është duke rritur prezencën e saj në Evropë, duke shtuar 1 500 trupa shtesë në kuadër të forcave të saj në Gjermani, transmeton AP.

Ushtria ka thënë të premten se trupat e reja pritet që disa aktivitete të nisin këtë vit, derisa trupat ushtarake me familjet e tyre duhet të vendosen në jug të Gjermanisë deri në shtator të vitit 2020.

Ambasadori i Shteteve të Bashkuara, Richard Grenell, ka thënë se ata do të rrisin numrin e trupave, pavarësisht se tani janë 33 000 të tillë në Gjermani për të treguar se SHBA-ja është “e vendosur në fuqizimin e aleancës transatlantike dhe premtimi i presidentit amerikan, Donald Trump për të rritur kapacitetet amerikane të mbrojtjes nënkupton aleancë më të fuqishme sot”.

Në kuadër të këtyre njësiteve përfshihen një brigadë e artilerisë, dhe dy sisteme të raketave në Grafenwoehr, një batalion i mbrojtjes raketore me rreze të shkurtër në Ansbach dhe disa sisteme tjera në Hohenfels dhe Baumholder.

GJENOVË – Deri në tetor 2019, në nëntor më së voni, Gjenova do të ketë një urë të re mbi lumin Polcevera. Kjo u njoftua nga Presidenti i Rajonit të Ligurias dhe Komisioneri për Emergjencë Giovanni Toti në prezantimin e projektit të mbikalimit të ri në Genovë të arkitektit Renzo Piano, duke zëvendësuar urën e rrëzuar Morandi.

“Morandi e re nuk mund të jetë një urë normale, duke pasur parasysh dhimbjen që ka shkaktuar, ne duam të ndërtojmë një simbol për të ardhmen e qytetit. Projekti Piano përfaqëson esencën e Ligurias të pasur me domethënie, do të ndërtohet shpejt”, shpjegoi ai.

“Kjo urë duhet të jetojë një mijë vjet dhe duhet të jetë prej çeliku”, tha arkitekti. “Natyrisht, në këtë projekt ka diçka të një anijeje, sepse ka diçka nga Gjenova”. ansa

BRUKSEL – Komisioneri Evropian për Buxhet dhe Burime Njerëzore, Gunther Oettinger deklaroi se disa anëtarë dëshirojnë të dobësojnë ose ta rrënojnë Bashkimin Evropian.

Gjatë një fjalimi në një aktivitet të zhvilluar nga Unioni i Organizatave të Shoqërisë Civile Federale Gjermane, Oettinger foli në lidhje me rreziqet ndaj BE-së.

“Për mendimin tim projekti i BE-së ndodhet përballë një ‘rreziku vdekjeprurës’. Disa shtete në Evropë përpiqen ta dobësojnë, madje ta rrënojnë projektin”, theksoi Oettinger, duke pretenduar se këto shtete janë qeveritë e Polonisë, Hungarisë, Rumanisë dhe Italisë.

Po ashtu duke kritikuar edhe vendin e tij Gjermaninë, Oettinger tha se qeveria e Berlinit nuk ka treguar entuziazëm të mjaftueshëm për BE-në, sa i përket çështjes së buxhetit. aa

Presidenti i Komisionit Evropian, Jean-Claude Juncker, shprehu “mbështetje të plotë” për arritjen e një marrëveshjeje ndërmjet Kosovës dhe Serbisë, si “kusht për sigurimin e paqes afatgjate në Ballkanin Perëndimor dhe për hapjen e perspektivës për anëtarësim në BE”.

Këto komente, Juncker i bëri në një bisedë telefonike me presidentin e Kosovës, Hashim Thaçi, thuhet në një komunikatë për media të Presidencës.

Sipas së njëjtës, Thaçi dhe Juncker kanë biseduar për procesin e liberalizimit të vizave, perspektivën evropiane të Kosovës dhe për fazën e fundit të dialogut për normalizimin e marrëdhënieve ndërmjet Kosovës dhe Serbisë.

Thaçi tha se lëvizja e lirë për qytetarët e Kosovës duhet të vijë shpejt dhe “t’i jepet fund izolimit të Kosovës”.

Ministri për Evropën i Gjermanisë, Michael Roth, paralajmëroi të hënën Kosovën dhe Serbinë se ndryshimi i kufirit të tyre nuk do të zgjidhë asnjë problem dhe tha se e ardhmja e rajonit është multietnike, multifetare dhe multikulturore.

“Të dashur miq në Kosovë dhe Serbi, rishkrimi i kufijve nuk do të zgjidhë asnjë problem. Një veprim i tillë do të hapte Kutinë e Pandorës të armiqësive etnike. E ardhmja e Ballkanit Perëndimor është thjesht multietnike, multifetare dhe multikulturore. E bashkuar në diversitet, kjo është Evropa”, tha Roth në një postim në Twitter.

​

Ideja për ndryshimin e kufijve është shpalosur nga presidentët e Kosovës dhe Serbisë, Hashim Thaçi dhe Aleksandar Vuçiq, si mundësi për zgjidhjen e mosmarrëveshjeve midis dy vendeve.

Ajo është kundërshtuar në disa raste edhe nga kancelarja gjermane, Angela Merkel, e cila ka thënë se Berlini i mbështet të gjitha bisedimet që çojnë kah normalizimi i marrëdhënieve midis Kosovës dhe Serbisë, porse “modifikimi i kufirit mund të ketë pasoja për Ballkanin“.

BRUKSEL (AA) – Hoteli nostalgjik në Bruksel, i cili është konceptuar në formë të trenit, me vagonë 30 tonësh, që janë vendosur në çatinë ose në brendi të hotelit, mysafirëve të saj u ofron ndjenjën e udhëtimit me tren të viteve 1950.

Belgu Nicolas Kervyns, themeluesi i hotelit dhe pronari i projektit, thotë se që nga fëmijëria ka qenë i dashuruar pas trenave. Ai tha se mysafirët e hotelit janë kryesisht udhëtarë që duan të flenë në vagonë, që janë përdorur për dekorimin e hotelit, që dikur kanë ecur binarëve të Evropës.

Duke theskuar se për realizimin e projektit janë shpenzuar mbi 3,5 milionë euro, Kervyns thekson se mysafirët në hyrje mirëpriten në suitën e hotelit e cila është dekoruar sipas modelit të sportelit për shitjen e biletave të trenit.

– Ndër mysafirët e parë, ministri belg me gruan e tij

Gjatë ecjes brenda hotelit mund të vërehen gjëra të pazakonta, si valixhe të vjetra të ndonjë princi belg, biletë të rrjetit hekurudhor që datojnë nga viti 1900, pjesë të ndryshme të trenave të vjetër dhe mure, ku artistët të inspiruar nga trenat kanë bërë vizatimet e tyre.

“Autoritetet nga komuna ishin shumë të befasuar kur u thashë se dua të vendos vagonë që peshojnë disa ton në këtë ndërtesë të vjetër”, tregon Kervyns, duke shtuar se ndër mysafirët e parë ishte ministri i dikurshëm i Tregtisë me gruan e tij.

Sipas tij, çdo imtësi në hotel është mbledhur dhe sjellë nga pjesë të ndrsyhme të botës. Kervyns shton se motivimi i tij më mi madh është kur i sheh njerëzit të mahnitur dhe të gëzuar sapo hyjnë në hotel.

– Udhëtimi në kohë, përmes dhomave deri tek vagonët

Restoranti, pushimoret dhe dhomat e hotelit, plotësisht janë dekoruar me gjëra nga trenat nostalgjik. Kështu që ecja nëpër korridore të jep ndjenjën e udhëtimit në kohë, duke ofruar ndjenjën se ndodhesh në ndonjë stacion treni në vitet 1950.

Hoteli, dhomat e të cilit janë dizajnuar sipas vagonëve me krevat, ka shtretër dhe ulëse që montohen dhe të cilat kujtojnë trenat, ndërsa bateritë e vjetra shërbejnë si garderobë për rrobat.

BERLIN (AA) – Presidenti i Komisionit Evropian, Jean-Claude Juncker deklaroi se dëshiron të heqë praktikën e ndryshimit të orës e cila bëhet dy herë në vit në Bashkimin Evropian, gjatë verës dhe dimrit.

Juncker në një deklaratë për televizionin gjerman ZDF vuri në dukje se për një kohë të gjatë vazhdojnë diskutimet për kohën e kursimeve të ditës, ku rikujtoi se për këtë çështje është bërë një sondazh në BE.

Ai tha se në përgjigjet e dhëna është kërkuar që të kalohet vazhdimisht në praktikën e kohës së verës. “Dhe kështu do të bëhet”, tha ai.

Sipas tij, se duhet të respektohen rezultatet e sondazhit tha se “Njerëzit e duan këtë dhe ne do ta bëjmë”.

Juncker tha se ai do të jetë i pari që do të tregojë një qëndrim të tillë në Komisionin e BE-së dhe se sot do të vendoset për këtë çështje.

Ai po ashtu shtoi se pas KE-ë edhe vendet anëtare dhe Parlamenti Evropian duhet të marrin vendim për këtë çështje.

Praktika e kohës së kursimit

Sipas një rregulloreje të vitit 1981 në 28 shtete të BE-së çdo vit të dielën e fundit të muajit mars akrepat e orëve lëvizin një orë përpara ndërsa të dielën e fundit të muajit tetor kthehen një orë prapa.

Shefja e politikës së jashtme të Bashkimit Evropian, Federica Mogherini, tha se ajo do të mbështeste shkëmbimin e territoreve midis Kosovës dhe Serbisë nëse dy vendet shmangin çdo përpjekje për të krijuar shtete etnikisht homogjene.

“Cilido që të jetë rezultati i dakorduar në mënyrë reciproke, do ta ketë mbështetjen tonë, me kusht që ai të jetë në përputhje me të drejtën ndërkombëtare”, tha Mogherini.

Ajo i bëri këto komente në një konferencë për media në Vjenë, pas një takimi midis ministrave të jashtëm të Bashkimit Evropian dhe homologëve të tyre ballkanikë.

Ideja për korrigjim të kufijve është shpalosur nga presidentët e Kosovës dhe Serbisë, Hashim Thaçi dhe Aleksandër Vuçiq, si mundësi për zgjidhjen e problemeve të tyre.

Mogherini është ndërmjetësuese e dialogut midis tyre, i cili pritet të vazhdojë javën e ardhshme.

Papunësia në Eurozonë ka rënë në nivelin më të ulët që nga faza më akute e krizës financiare botërore, një dekadë më parë.

Agjencia për statistika e Bashkimit Evropian, Eurostat, tha të premten se norma e papunësisë në korrik ka qenë 8.2%.

Shifra është më e ulta qysh në nëntor të vitit 2008, kur papaunësia ka marrë hov pas kolapsimit të bankës së investimeve në SHBA, Lehman Brothers.

Papunësia ka arritur kulmin prej 12.1% në vitin 2013, kur kriza, së paku për Eurozonën, është shndërruar në krizë të borxhit qeveritar, e përqendruar kryesisht në Greqi.

Eurostat tha se 16.82 milionë njerëz kanë qenë të papunë në Eurozonë në muajin korrik, 82,000 më pak se muajin paraprak.

BRUKSEL (AA) – Bashkimi Evropian (BE) bëri të ditur se në bisedimet tregtare me SHBA-të ka shprehur gatishmëri për të hequr tarifat ndaj të gjitha produkteve industriale, përfshirë edhe automobilat.

“Thamë se BE-ja është e gatshme për të zbatuar zero tarifa ndaj të gjitha mallrave industriale, natyrisht, nëse edhe SHBA zbaton një gjë të tillë. Andaj, kjo do të jetë në baza reciproke”, tha Cecilia Malmström, Komisionerja Evropiane Përgjegjëse për Tregti, në një mbledhje të komitetit tregtar të Parlamentit Evropian.

Malmström tha se bisedimet me SHBA-në nuk janë zhvilluar për të rifilluar Marrëveshjen e Partneritetit Transatlantik të Tregtisë dhe Investimeve (TTIP), por ajo që është synuar ka qenë një “marrëveshje tregtare më e kufizuar”.

“Nëse edhe SHBA bën të njëjtën gjë, ne jemi të gatshëm të ulim në zero madje edhe tarifat ndaj automobilave”, theksoi më tej Malmström, duke shprehur bindje se marrëveshja e mundshme do të ishte dobiprurëse për të dyja palët.

Ndryshe, Brukseli dhe Washingtoni aktualisht janë duke zhvilluar bisedime të natyrës përgatitore për të përcaktuar kornizat e një marrëveshjeje të mundshme në të ardhmen.

Edhe pse në mbledhjen e javës së kaluar në Washington u diskutua edhe për zbatimin e zero tarifave ndaj automjeteve, SHBA refuzoi propozimin e BE-së.

BERLIN – Një Turqi e qëndrueshme, e begatë dhe demokratike është në interesin e Gjermanisë, tha Ulrike Demmer, zëdhënësja e kancelares Angela Merkel.

Duke iu përgjigjur pyetjeve të gazetarëve gjatë një konference të rregullt për media në Berlin, zv/zëdhënësja e qeverisë Ulrike Demmer nuk konfirmoi ose mohoi lajmet e fundit të medias që pretendonin se Gjermania mund të ndihmojë Turqinë për të parandaluar një krizë financiare.

“Qeveria federale është duke ndjekur nga afër zhvillimet në Turqi. Një Turqi e qëndrueshme, e begatë dhe demokratike është në interesin tonë”, tha Demmer.

Disa media elektronike evropiane njoftuan të martën se Gjermania është duke shqyrtuar mënyrat për të ndihmuar Turqinë dhe pohuan se opsionet përfshinin një ndihmë të koordinuar evropiane, ndihmë bilaterale ose kredi specifike për projekte nga bankat zhvillimore të kontrolluara nga shteti.

Javën e kaluar, zëdhënësja e qeverisë gjermane tha se Berlini nuk është duke planifikuar ndihmë financiare bilaterale për momentin.

Zv/zëdhënësja e qeverisë nuk pranoi të komentonte në mënyrë të detajuar nëse qeveria ka ndryshuar qëndrimin e saj, por tha se nuk ka ndonjë përditësim në lidhje me këtë çështje.

Demmer tha gjithashtu se duhet të pritet realizimi i bisedimeve të ardhshme të nivelit të lartë midis qeverive gjermane dhe turke.

“Siç e dini, përgatitjet po vazhdojnë. Para vizitës së presidentit Erdoğan, ministri i Financave do të takohet me homologun e tij këtu”, tha Demmer, duke shtuar se nuk mund t’i parashikojë bisedimet.

Presidenti turk, Recep Tayyip Erdoğan, do të realizojë një vizitë kyçe në Gjermani më 28-29 shtator.

Para vizitës, ministri turk i Financave, Berat Albayrak, pritet të takojë homologun e tij gjerman, Olaf Scholz, në Berlin më 21 shtator.

Ministri i Jashtëm gjerman, Heiko Maas, gjithashtu është planifikuar të vizitojë Turqinë javën e ardhshme për bisedime mbi raportet ekonomike dhe politike dhe çështjet ndërkombëtare.

Të martën, Maas kritikoi sanksionet e presidentit amerikan Donald Trump dhe politikën e tij të presionit ekonomik ndaj Turqisë.

“Sigurisht, ne evropianët kemi një interes të madh nga një zhvillim i qëndrueshëm ekonomik në Turqi”, tha ai.

Gjermania është partneri kryesor ekonomik dhe tregtar i Turqisë dhe më shumë se 7.500 kompani gjermane janë aktive në Turqi. Në vitin 2017, vëllimi i tregtisë dypalëshe arriti në 37.6 miliardë euro. aa