Presidenti i Komisionit Evropian, Jean Claude Juncker ka shprehur dyshimet mbi aftësinë e Rumanisë për të marrë mandatin presidencial të udhëheqjes së Bashkimit Evropian, që ndryshohet çdo gjashtë muaj.

Juncker është cituar më 29 dhjetor në mediat gjermane duke thënë se Rumania është “teknikisht e përgatitur mirë”.

“Por besoj se Qeveria në Bukuresht ende nuk e ka kuptuar se çfarë do të thotë të udhëheqësh shtetet e BE-së”, shtoi ai.

Rumania do të udhëheq presidencën e Bashkimit Evropian nga 1 janari, për herë të parë që nga anëtarësimi në vitin 2007 në bllok.

Juncker shtoi se presidenca e Bashkimit Evropian “kërkon vullnet për të dëgjuar të tjerët. Kam dyshime mbi këtë”.

Ai po ashtu, vuri në dyshim kapacitetin e shtetit për të mbajtur unitetin, për shkak të problemeve të brendshme politike.

“Duhet të ketë unitet në shtëpi për të fuqizuar unitetin në Evropë gjatë mandatit”, tha Juncker.

Në nëntor, presidenti i Rumanisë, Klaus Iohannis, tha se vendi i tij nuk është i gatshëm për të përmbushur këtë detyrë.

Ai iu referua një situate ku përfshihet lideri i Partisë Social Demokrate, Liviu Dragnea, i cili e pati të pamundur të zgjidhet kryeministër për shkak të akuzave për mashtrim në zgjedhje.

“Ne jemi të përgatitur dhe besoj se mund t’ia dalim”, tha Iohannis më 21 dhjetor.

Gjermania do të kundërshtonte fuqishëm çdo lëvizje për të vendosur raketa të reja bërthamore në Evropë, nëse traktati kyç i kontrollit të armëve të periudhës së Luftës së Ftohtë do të hiqet, tha Ministri i Jashtëm gjerman Heiko Maas për agjencinë DPA.

“Në asnjë rrethanë Evropa nuk do të bëhet një skenë për një debat riarmatosje. Vendosja e raketave të reja të mesme do të përballet me rezistencë të gjerë në Gjermani,” tha ai.

Shtetet e Bashkuara kanë kërcënuar se do të tërhiqen nga Traktati i Forcave Bërthamore me Rreze të Ndërmjetme Veprimi i vitit 1987, i cili ndalon Moskën dhe Uashingtonin që të vendosin në Evropë raketa tokësore me gamë të shkurtë dhe të mesme veprimi.

Mali Etnës në Itali, vullkani më i lartë dhe më aktiv i Evropës, shpërtheu të hënën, duke liruar një sasi të madhe hiri në qiell si dhe duke shkaktuar mbylljen e aeroportit Catania në Sicili.

Rreth 130 dridhje të tokës ndodhën, më e fuqishmja prej 4.0 shkallë të Rihterit, njoftoi Instituti Kombëtar për Gjeofizikë i Italisë.

Nuk ka raportime për ndonjë të plagosur.

Vullkani i lartë 3330 metra mund të shperthejë disa herë gjatë vitit duke hedhur lavë dhe hiri të lartë mbi ishullin mesdhetar. Shpërthimi i fundit i madh ishte në vitin 1992.

KOPENHAGË – Parlamenti i Danimarkes ka miratuar projektligjin për dërgimin e emigrantëve në ishullin e shkretë Lindholm.

Në kuadër të debatit për buxhetin për vitin e ardhshëm, parlamenti danez miratoi projektligjin për ndërtimin e “exit qendrës”, gjegjësisht qendrës për riatdhesim të emigrantëve.

Ligjin e mbështetën partitë në pushtet, liberale dhe konservatore, si dhe ajo radikale djathtiste Partia Popullore.

Qendra për emigrantë me kapacitet deri në 125 persona do të hapet në vitin 2021.

Plani i Qeverisë daneze që emigrantët t’i mbledhë në ishullin e shkretë me sipërfaqe prej shtatë hektarëve hasi në mospëlqim të ashpër në opinion dhe shkaktoi protesta në disa qytete të mëdha të këtij vendi. Tubimet i mbështetën shumë organizata joqeveritare, përfshirë ActionAid Denmark, Amnesty International dhe Save the Children.

Bëhet fjalë për një ishull që më parë është përdorur si poligon për testimin e sëmundjeve infektive të kafshëve të kryer nga Universiteti Teknik i Danimarkës. aa

Pas votimit të tri projektligjeve që ndërlidhen me transformimin e FSK-së, Kosova nga sot e ka ushtrinë e saj. Forca të Armatosura.

Ministri gjerman i shtetit për punë të jashtme, Niels Annen, thekson në Bundestag se Gjermania nuk e vë në dyshim të drejtën e Kosovës për Ushtri të rregullt.

Qeveria Gjermane ka ritheksuar qëndrimin e saj ndaj procesit të krijimit të Ushtrisë së Kosovës. Duke iu përgjigjur me shkrim të mërkurën (12.12.18) në Bundestag pyetjes së deputetes së Majtë (Die Linke), Sevim Dağdelen, ministri i shtetit për punë të Jashtme, Niels Annen, (SPD), tha ndër të tjera se “Gjermania e ka njohur Kosovën dhe nuk e vë në pikëpyetje të drejtën parimore të Kosovës për forca të rregullta”.

Por Annen shtoi gjithashtu edhe se “qeveria federale është e mendimit, se transformimi i Forcës së Sigurisë së Kosovës nuk duhet të jetë i nxituar dhe të vijojë në një proces inkluziv. Këtu hyn sidomos përfshirja e pakicës serbe të Kosovës dhe konsultimi i ngushtë me partnerët, siç janë NATO dhe shtetet aleate të NATO-s.”

Deputetja e së Majtës krahas qëndrimit të Gjermanisë, donte të dinte edhe se sa ishte në dijeni qeveria gjermane se SHBA-ja e ka dhënë pëlqimin e saj për shndërrimin pa ndryshim kushtetute të Forcës së Sigurisë së Kosovës, në një ushtri të rregullt, qysh në fund të shtatorit 2018, pas vizitës së presidentit të Kosovës Hashim Thaçi dhe kryeministrit Ramush Haradinaj në SHBA dhe takimit me ministrin amerikan të mbrojtjes James Mattis nga fundi i shtatorit në Prishtinë. Deputetja e majtë iu referua në pyetjen e saj raportimeve të Deutsche Welles dhe AFP.

Annen u përgjigj se më 13 shtator 2018, Ambasada Amerikane në Prishtinë kishte thënë se “momenti i parashtrimit të pakos ligjore për transformimin e FSK-së nuk ishte caktuar në marrëveshje me SHBA-në”. Annen tha gjithashtu “se qeveria gjermane nuk është në dijeni se për çfarë është folur në takimet e bëra nga fundi i shtatorit”. Ai iu referua raportimeve të medias kosovare, sipas të cilave SHBA-të e mbështesnin krijimin e Ushtrisë së Kosovës.

Parlamenti i Kosovës pritet të miratojë nesër (14.12.18) pakon ligjore për transformimin e Forcës së Sigurisë së Kosovës, e paraparë deri tani vetëm për të ndërhyrë në raste katastrofash, në një ushtri të rregullt të armatosur. /DW/

Eurodeputeti gjerman, Markus Ferber, ka deklaruar se korrupsioni, mosbesueshmëria, moszbatueshmëria e ligjeve nga udhëheqësit kosovarë po pengon liberalizimin e vizave për qytetarët e Kosovës.

Ai theksoi se elita politike e Kosovës është duke përdorur standarde të dyfishta me popullin e tyre, duke i punësuar familjarët e tyre dhe pjesën tjetër e kanë anashkaluar.

Deputeti është i bindur se lufta kundër korrupsionin nuk mund të vijojë me persona, të cilët janë pjesë dhe përgjegjës të kësaj veprimtarie të paligjshme.

Ai renditi shumë ministra të Qeverisë Haradinaj që janë të korruptuar dhe kane dosje në gjykata, megjithatë vazhdojnë ta udhëheqin vendin.

Markus Ferber theksoi se Parlamenti Evropian është i vetmi institucion evropian, i cili zyrtarisht ka njohur Republikën e Kosovës dhe ka dhënë dritën e gjelbër për liberalizimin e vizave.

BERLIN – Ministria e Punëve të Brendshme e Gjermanisë bën të ditur se është forcuar kontrolli i kufirit pas sulmit të së martës në mbrëmje në Strasburg, por se në vend nuk është ngritur niveli i rrezikut nga sulmet.

Zëdhënësja e Ministrisë së Brendshme, Eleonore Petermann, tha se nuk ka arsye për t’i mbajtur njerëzit larg tregjeve të Krishtlindjeve në Gjermani. Ajo tha se Tregu i Krishtlindjeve në Berlin ishte objekt i sulmit dy vjet më parë.

Petermann dhe Ministria e Drejtësisë kanë thënë se autoritetet gjermane nuk kanë informacion për lidhjet mes sulmuesit të dyshuar, i cili më parë ishte në burg në Gjermani për grabitje dhe DEASH-it.

I dyshuari u dënua në Gjermani në vitin 2016, ndërsa një vit më vonë u deportua në Francë. Megjithatë, Petermann theksoi se liria e tij e lëvizjes në Bashkimin Evropian i ishte është pamundësuar.

Presidenti francez Emmanuel Macron ka premtuar një rritje minimale të pagave dhe koncesioneve tatimore në përgjigje të protestave të dhunshme për javë me radhë

Franca ka parë katër fundjava protestash të dhunshme kundër rritjes së taksave të karburantit, kostove të jetesës dhe çështjeve të tjera.

Gjatë një konference për shtyp drejtuar kombit, Macron tha se zemërimi i protestuesve ishte “i thellë dhe në shumë mënyra i ligjshëm”.

Paga minimale do të rritet me 100 euro në muaj nga 2019, tha ai.

Një rritje e planifikuar e taksave për pensionistët me të ardhura të ulëta do të anullohet, ndërkohë që punëdhënësve do t’u kërkohet të paguajnë një bonus për punonjësit, shtoi ai.

Shumë njerëz ishin të pakënaqur me kushtet e jetesës dhe mendonin se “nuk u dëgjuan”, tha ai.

“Unë di që disa prej jush janë lënduar nga fjalët e mia,” tha Macron.

BRUKSEL – Gjykata Evropiane e Drejtësisë vendosi që Britania mund të revokojë njëanshëm procesin (Brexit) për largimin nga Bashkimi Evropian(BE).

Gjykata Evropiane e Drejtësisë me qendër në Bruksel, e cila është gjykata më e lartë në BE, ka dhënë vendimin në lidhje me padinë e ngritur kundër procesit Brexit të Britanisë.

Gjykata ka vendosur se Britania mund të tërheqë në mënyrë të njëanshme njoftimin e saj për largimin nga BE.

“Gjykata, kur një shtet anëtar nga Bashkimi Evropian i njofton Këshillit të BE-së qëllimin e tij për t’u tërhequr nga Bashkimi Evropian, ka vendosur që shteti anëtar në fjalë është i lirë që të anulojë këtë njoftim në mënyrë të njëanshme”, thuhet në vendim. aa

Ministri i Jashtëm i Francës i bëri thirrje Presidentit amerikan Donald Trump të dielën, që të mos ndërhyjë në politikën franceze, pas mesazheve të zotit Trump në Twitter lidhur me protestat në Paris.

“Ne nuk merremi me politikën e brendshme amerikane dhe duam të njëjtën gjë në këmbim”, tha Ministri i Jashtëm, Jean-Yves Le Drian në televizionin LCI.

“Unë dhe presidenti francez i themi Donald Trumpit: mos u merr me vendin tonë”, tha ai.

Zoti Le Drian po reagonte ndaj mesazheve në Twitter të Presidentit Trump të dielën, ku ai shkruante se ajo që po ndodhte në Francë ishte e trishtueshme.

“Ndoshta është koha që t’i jepet fund Marrëveshjes qesharake dhe jashtëzakonisht të shpenzueshme dhe t’u kthehen njerëzve paratë në formën e taksave më të ulëta? Shtetet e Bashkuara e ka bërë këtë me kohë dhe është i vetmi vend ku çlirimi i gazeve të dëmshme, ra vitin e kaluar”, shkruante presidenti.

Afro 2 mijë vetë u arrestuan të shtunën në gjithë Francën, në raundin e fundit të protestave të “jelekëve të verdhë”.

Policia franceze përdori gazin lotsjellës kundër protestesve, të cilët u mblodhën në Paris për të protestuar kundër taksave të larta dhe kostos së lartë të jetesës në vend. Policia tha se të paktën 10,000 vetë protestuan të shtunën në Paris dhe 1,000 prej tyre janë arrestuar pas përleshjeve me forcat e rendit. Autoritetet franceze thanë se 135 njerëz janë plagosur, përfshirë 17 policë, në protestat e zhvilluara në Paris. Protesta të ngjashme janë zhvilluar edhe në Belgjikë dhe Holandë.

Në prirtje të javës së katërt të protestave të dhunshme, Franca mbylli Kullën Eiffel dhe disa zona të tjera turistike dhe mobilizoi dhjetëra mijëra forca të sigurisë.

Dritaret dhe dyert e shumë dyqaneve në Paris janë mbuluar me materiale mbrojtëse për të shmangur shkatërrimin dhe plaçkitjet.

Më shumë se 89,000 policë janë dislokuar në mbarë Francën për të parandaluar protestat e dhunshme, një rritje e konsiderueshme në krahasim me fundjavën e kaluar, kur në mbarë vendin ishin dislokuar 65,000 policë për vënë nën kontroll protestat, në të cilat u plagosën më shumë se 130 njerëz.

Megjithatë, prania e madhe e policisë nuk parandaloi njerëzit nga përpjekjet për t’iu bashkuar marshimit të sotëm drejt pallatit presidencial.

‘“Ne jemi këtu për t’i shprehur Makronit pakënaqësinë tonë. Nuk kam ardhur këtu për të thyer gjëra sepse unë kam katër fëmijë që janë të frikësuar më këtë që po ndodh. Unë dua që ata të jenë të sigurt. Megjithatë, unë dua të jem këtu që të them mjaft më, kjo duhet të ndalet”, thotë protestuesja Myriam Diaz.

Lëvizja e “Jelekëve të Verdhë” nuk ka një udhëheqës të qartë, dhe protestat e kaluara kanë tërhequr ekstremistë të cilët kanë hedhur gjëra të forta në dejtim të policisë. Ministri i Brendshëm francez, Christophe Castaner u bëri atyre thirrje për qetësi.

“U bëj thirrje ‘jelekëve të verdhë’që duan të sjellin një mesazh të paqes që mos të shkojnë me njerëzit e dhunshëm. Ne e dimë se njerëzit e dhunshëm janë të fortë vetëm atëherë kur fshihen prapa protestuesve të grupit ‘jelekët e verdhë’, një veprim që pengon punën e forcave të sigurisë”.

Që nga fillimi i trazirave në nëntor, si reagim ndaj rritjes së taksës së karburantit, katër njerëz kanë humbur jetën.

Ndërsa Pesidenti Macron hoqi dorë nga rritja e taksës së karburantit, protestuesit kanë bërë kërkesa të reja për trajtimin e çështjeve të tjera ekonomike që po dëmtojnë punëtorët, pensionistët dhe studentët.

Presidenti amerikan, Donald Trump e quajti ditën e sotme në Paris, shumë të trishtueshme.

“Ndoshta është koha që t’i jepet fund Marrëveshjes qesharake dhe jashtëzakonisht të shpenzueshme dhe t’u kthehen njerëzve paratë në formën e taksave më të ulëta? Shtetet e Bashkuara e ka bërë këtë me kohë dhe është i vetmi vend ku çlirimi i gazeve të dëmshme, ra vitin e kaluar”, shkruante ai në Twitter.

Protesta të ngjashme, që duket se janë frymëzuar nga lëvizja ‘jelekët e verdhë’, u zhvilluan sot edhe në Belgjikë dhe Holandë. Qindra protestues u përleshën me policinë gjatë një përpjekje për të hyrë në ndërtesën e Parlamentit Evropian në Bruksel. Protestuesit bënë thirrje për doreheqjen e Kryeministrit të Belgjikës, Charles Michel.

HEIDELBERG – Heidelberg është një nga qytetet e rralla në Gjermani i kursyer nga bombardimet gjatë luftërave, ndërsa arkitektura e tij mesjetare, lumi Neckar dhe kështjella, sot tërheqin vizitorë nga mbarë bota.

Bëhet fjalë për qytetin e pestë më të madh në Gjermani, ndërsa është një nga qendrat e rëndësishme kulturore dhe financiare në Evropë dhe njihet për nga historia e pasur, kulturore dhe trashëgimia natyrore.

I vendosur në krahinën Baden-Wurttemberg, qytet i recituar në shumë këngë, ndërsa me universitete me histori shumë vjeçare, si dhe sektorë shkence, mjekësi dhe makineri, Heidelberg vendoset në pozitën e një nga qendrat më të njohura në Evropë.

Në pjesën e lumit Neckar, që qytetin e ndan në të vjetër dhe të ri, janë ndërtuar shumë ura, mes të cilave veçohet ura Carl-Theodor, e gjatë 200 metra, ndërsa e gjerë shtatë metra. Kjo urë, është një nga simbolet e qytetit.

Në rrjedhë janë punimet në disa pjesë të urës, ndërsa kjo nuk pengon shumë çifte që të vijnë tek ura dhe të vendosin dry në shenjë të dashurisë.

Kështjella Heidelberg, e vendosur në kodër, është një nga destinacionet e preferuara të shumë turistëve, ndërsa edhe arkitektura është kënaqësi për vizitorët dhe shumë specialistë.

Interesim për qytetin është treguar nga shumë mendimtarë, përfshirë Johann Wolfgang von Goethe, Friedrich Hegel, Max Weber dhe të tjerë. aa

BERLIN – Pasardhësja e kancelares gjermane Angela Merkel, në krye të partisë më të fortë të qendrës së djathtë në Gjermani, pas fitores sot u përpoq të konsolidojë pushtetin e saj, duke vendosur konservatorin e ri në pozitën kyçe menaxhuese, me çka bën përpjekje të ndërtojë ura me rivalët e saj.

Annegret Kramp-Karrenbauer (56), një aleate e Merkelit, e cila qëndronte afër pozicionit të saj të qendrës, të premten u zgjodh kryetare e Unionit Kristian Demokrat (CDU).

Ajo fitoi Friedrich Merz, ish kundërshtarin e Merkelit dhe ministrin aktual të Shëndetësisë, Jens Spahn, i cili u eliminua në raundin e parë të votimit.

Kramp-Karrenbauer sot tregoi se dëshiron t’u japë fund përçarjeve të mëtejme, duke u dhënë një mbështetje të fuqishme konservatorëve dhe anëtarëve të rinj. Ajo nominoi 33-vjeçarin Paul Ziemiak, liderin e forumit rinor të CDU-së për Sekretar të Përgjithshëm, që është një pozicion që mban përgjegjësi për strategjinë e përditshme të partisë dhe një funksion që ajo e ka mbajtur deri në zgjedhjen si kryetare.

“Kjo parti nuk është e ndarë. Të gjithë kemi për detyrë të punojmë për unitetin e partisë”, tha Kramp-Karrenbauer në kongresin e partisë.

Ziemiak anon ka e djathta nga kryetarja e re dhe konsiderohet si miku i Spanh dhe vjen nga i njëjti rajon si Merz.

Merkel planifikon të vazhdojë detyrën si kancelare deri në fund të mandatit të saj. Zgjedhjet e ardhshme nuk pritet të mbahen para vitit 2021, por është e paqartë nëse koalicioni i saj me socialdemokratët e majtë do të zgjasë aq gjatë.

Kramp-Karrenbauer është favorite që të jetë kandidate për kancelare në zgjedhjet e ardhshme. aa

BERLIN – Kandidatja e preferuar e kancelares gjermane Angela Merkel, Annegret Kramp-Karrenbauer, ka fituar garën për udhëheqjen e partisë në pushtet Unioni Kristian Demokratik (CDU).

Në një garë të ngushtë, politikanja konservatore 56-vjeçare fitoi 517 vota nga delegatët e CDU-së, në një kongres të partisë në Hamburg.

Rivali i saj kryesor, Friedrich Merz, një kritik i hapur i politikës liberale të Merkelit ndaj refugjatëve, siguroi 482 vota.

Më herët gjatë ditës, Kramp-Karrenbauer u bëri thirrje delegatëve të CDU-së të jenë më të guximshëm dhe të sigurt për të trajtuar sfidat e shekullit të 21-të, për të forcuar Bashkimin Evropian dhe për të mbrojtur “rendin ndërkombëtar të bazuar në rregulla”.

Merz, nga ana e tij, kritikoi politikën e “dyerve të hapura” të Merkelit për refugjatët dhe bëri thirrje për një “fillim të ri” në CDU, me një strategji të re për çështje të ndryshme politike.

Ai premtoi të rikthejë votuesit e CDU-së që kanë kaluar në partinë e ekstremit të djathtë, Alternativa për Gjermaninë (AfD).

Merkel, e cila udhëhoqi kristian-demokratët për 18 vjet, njoftoi në tetor se nuk do të kandidojë për postin e kryetares pas humbjeve të mëdha të partisë së saj në zgjedhjet rajonale.

Megjithatë, Merkel ka theksuar se do të mbetet kancelare deri në përfundimin e mandatit të saj në vitin 2021. aa

Presidenti i Serbisë, Aleksandar Vuçiq, tha se vizita e presidentit të Francës, Emmanuel Macron, e planifikuar për këtë javë në Beograd, është anuluar për shkak të trazirave në Francë.

Vuçiq tha se ka biseduar me Macronin dhe se ai “e ka lutur që vizita të shtyhet për disa javë”.

“E di se sa e vështirë është të realizohen reforma të përgjegjshme ekonomike”, tha Vuçiq në një konferencë shtypi në Beograd.

Që disa fundjava, Lëvizja “Jelekët e verdhë” organizon protesta në Francë, në kundërshtim të rritjes së paralajmëruar të çmimit të karburanteve, në kuadër të disa masave për mbrojtjen e mjedisit.

Por, protestat janë shndërruar në zemërim të përgjithshëm ndaj politikave të Macronit.

Të shtunën, në përleshjet midis protestuesve dhe policisë janë plagosur mbi 260 vetë, në mesin e tyre 81 pjesëtarë të forcave të sigurisë.

BRUKSEL – Për shkak të protestave të “jelekëve të verdhë” në Paris, është anuluar vizita e presidentit të Komisionit Evropian (KE) Jean-Claude Juncker në Francë, e planifikuar për nesër.

Siç mësohet nga burimet e KE-së, Juncker pritej që nesër t’i adresohej Kuvendit Kombëtar të Francës, por programi në fjalë është anuluar për shkak të seancës së “jelekëve të verdhë” në Kuvend.

Juncker planifikohej të ketë një darkë me presidentin e Francës, Emmanuel Macron dhe të takohet me kryetarin e Kuvendit Richard Ferrand, ndërkaq edhe këto programe janë shtyrë.

Protestat në Francë filluan më 17 nëntor për shkak të rritjes së çmimit të karburantit me 20 për qind brenda një viti, duke u organizuar nën emrin “jelekët e verdhë”. Protestat më pas u shndërruan në trazira, me kërkesa më të gjera ndaj presidentit Macron dhe qeverisë franceze.

Në incidentet që ndodhën gjatë protestave, deri tani 2 persona e kanë humbur jetën, ndërsa 1.043 persona në mesin e të cilëve 222 pjesëtarë të forcave të sigurisë janë plagosur si dhe 1.424 të tjerë janë ndaluar. aa

Sipas një raporti nga Zyra e statistikave të Bashkimit Evropian (BE), rreth 25 për qind e popullsisë në bllokun 28-anëtarësh ka vuajtur nga aftësi të kufizuara afatgjata që nga fundi i vitit 2017.

Sipas institucionit statistikor Eurostat, kjo pjesë e popullsisë ndjeu disa kufizime të rënda në kryerjen e aktiviteteve të përditshme për një periudhë prej gjashtë muajsh ose më gjatë.

“Në vendet anëtare të BE-së në vitin 2017, përqindjet më të ulta të aftësive të kufizuara afatgjata të vetëvlerësuara u raportuan në Maltë (12 për qind) dhe në Suedi (13 për qind), ndërsa më të larta në Letoni (41 për qind), Slloveni (36 për qind) dhe në Estoni (35 për qind)”, njofton Eurostat, duke shtuar se nga kjo shifër gratë përbëjnë 27 për qind dhe meshkujt 22 për qind.

Dita ndërkombëtare e personave me aftësi të kufizuara që nga viti 1992 ka kontribuar në ngritjen e vetëdijes për personat me aftësi të kufizuara.

Sipas Bankës Botërore, ushqimi i dobët, edukimi dhe kujdesi shëndetësor, kushtet e pasigurta të punës, ndotja e mjedisit si dhe mungesa e qasjes në ujë të sigurt dhe higjienë janë shkaqet kryesore që sjellin në aftësi të kufizuar.

“Paaftësia mund të rrisë rrezikun e varfërisë, nëpërmjet mungesës së mundësive për punësim dhe edukim, paga më të ulta dhe rritje të kostos së jetesës me aftësi të kufizuara”, tha Banka Botërore. aa

HAGË – Protestat e “jelekëve të verdhë”, që fillimisht nisën në Francë kundër rritjes së çmimeve të karburantit, janë përhapur edhe në qytete të ndryshme të Holandës.

“Jelekët e verdhë” organizuan protesta në qytete si Haga, Nijmegen, Maastricht, Alkmaar, Leeuwarden dhe Groningen.

Rreth 200 protestues u tubuan para parlamentit holandez në Hagë.

Një grup protestuesish u urdhëruan të shkonin në drejtim të Shesiht Malieveld nga ana e policisë për shkak të mosmarrjes së lejes për të protestuar, kurse një grup tjetër insistuan të mbanin marsh përreth parlamentit.

Policia paralajmëroi protestuesit që nuk zbatuan urdhrin për të shkuar në shesh, duke thënë se do të merreshin masa ndaj atyre nëse nuk heqin jelekët e verdhë dhe nuk i japin fund protestës.

Protestuesit këmbëngulën të mos shkojnë në shesh, por hoqën jelekët dhe i dhanë fund protestës afër parlamentit.

Në protestat në mbarë vendin policia ka arrestuar katër persona për fyerje ndaj policisë dhe kamuflim duke hequr jelekët.

Protestat e jelekëve të verdhë filluan në Francë për shkak të rritjes së karburantit për 20 për qind brenda një viti.

Dje protestat për herë të parë u përhapën edhe në Belgjikë, ku protestuesit vërshuan edhe para instutcioneve të Bashkimit Evropian (BE). Protestat e djeshme në Bruksel u shoqëruan me incidente. aa

Qeveria gjermane iu përgjigjet disa pyetjeve të deputetëve të partisë populiste të djathtë, AfD-mbi Shqipërinë, rolin e saj në rajon dhe kriminalitetin e shqiptarëve në Gjermani. 

Qeveria Gjermane është e mendimit se Shqipëria luan parimisht një rol pozitiv në rajon. Dhe se në Shqipëri nuk ka aktivitete ose parti që e mbështesin idenë e bashkimit me Kosovën. Këtë ajo e vë në dukje në një përgjigje ndaj një kërkese të vogël të deputetëve Markus Frohnmaier, Dietmar Friedhoff dhe grupit parlamentar “Alternativë për Gjermaninë” (AfD),  që e ka redaksia e Deutsche Welle-s. “Në Shqipëri ekziston konsensus mbipartiak për anëtarësinë në NATO, integrimin në BE, për një shtet demokratik dhe kushtetues dhe për mirëkuptim në politikat rajonale”, thuhet ndër të tjera në dokument.

Partia djathtiste i ka shtruar pyetjet duke u nisur nga vizita e ministrit Heiko Maas në Tiranë, në shtator të këtij viti, dhe deklaratat e tij atje, ku e kishte vlerësuar ndër të tjera Shqipërinë edhe si garante të paqes në rajon.

Përgjegjësi edhe përtej rajonit

“Në qeverisjen e kryeministrit Edi Rama ka pasur afrim me Republikën e Serbisë, sidomos në vazhdën e procesit të Berlinit. Në vitet 2014 dhe 2015 janë shkëmbyer dy vizitat e para reciproke në nivel kryeministrash që nga vitet 1940. Në vitin 2015 dy kryeministrat e dy vendeve hodhën idenë për krijimin e një organizate bashkëpunimi rajonal për të rinjtë, e cila filloi punën në vitin  2017 me seli në Tiranë”, thuhet më tej në dokument.

“Qeveria shqiptare bën përpjekje për marrëdhënie të fqinjësisë së mirë. Pyetjet e hapura në raportet me Greqinë po bisedohen në mënyrë konstruktive që prej vitit 2017. Shqipëria i ka mbështetur të gjitha vendimet e marra në politikat e përbashkëta të jashtme dhe të sigurisë. Prej vitit 2009 Shqipëria është anëtare e NATO-s. Dhe për vitin 2020 synon të  marrë në dorë kryesinë e radhës së OSBE-së, duke u rrekur kështu të marrë përgjegjësi përtej kufijve rajonalë”, argumenton më tej qeveria gjermane.

Bashkëpunimi me Kosovën

AfD bën pyetje edhe lidhur me idenë e bashkimit etnik të shqiptarëve, ose siç  quan ajo “Shqipëria e Madhe”.”Shqipërinë dhe Republikën e Kosovës i lidhin marrëdhënie të ngushta bilaterale. Shqipëria e sheh gjuhën dhe kulturën shqipe si një pikë kontakti për bashkëpunimin ndërkufitar, sidomos me Kosovën”, përgjigjet Ministria e Jashtme.

Sipas informacioneve të qeverisë federale gjermane, në Shqipëri, nuk ka parti politike që mbështesin bashkimin e gjithë shqiptarëve etnikë në një shtet. “Në Kosovë është lëvizja opozitare „Vetevendosje” e vetmja që e mbron këtë ide. Kushtetuta e Kosovës megjithatë e përjashton mundësinë e bashkimit me një shtet tjetër. Qeveria federale e ka bërë të qartë disa herë se ajo nuk mbështet ndryshime territoriale në Ballkan mbi bazën e kritereve etnike.”

E pyetur rreth deklaratave të kryeministrit shqiptar Edi Rama në prill 2018 në lidhje me mundësinë e bashkimit me Kosovën, nëse mbyllen portat e BE-së, qeveria përgjigjet: “Në Shqipëri, sikurse edhe në vende të tjera të rajonit, diskutohen vazhdimisht alternativat e mundshme, në rast se nuk do të ketë anëtarësim në BE.  Nga ana tjetër është e qartë se Shqipëria synon anëtarësimin në BE dhe po bën reformat e nevojshme për të”, përgjigjet qeveria. Gjithashtu, qeveria gjermane thotë se nuk është në dijeni për aktivitete “nacionalistësh shqiptarë” në Mal të Zi dhe Greqi.

Krimet kryesore: vjedhjet, droga dhe trafikimi

Pyetjes në lidhje me ekstremistë shqiptarë në Gjermani, qeveria i përgjigjet se nuk di që të ketë struktura ose tubime ekstremiste shqiptarësh në Gjermani. Por pranon se ndër anëtarët dhe simpatizantët e organizatave islamiste të gatshme  për dhunë që veprojnë në Gjermani ka edhe individë me shtetësi shqiptare.

E pyetur për kriminalitetin e shtetasve nga Shqipëria dhe nga Kosova në Gjermani, Ministria e Jashtme  i referohet të dhënave të Entit Federal të Kriminalistikës, sipas të cilit për vitin 2017 krimet kryesore të bëra nga shtetasit shqiptarë kanë qenë krimet e pronës, të lëndëve narkotike dhe të trafikimit. Nga 572 procedura hetimore të zhvilluara në këtë vit, 21 kanë qenë kundër grupeve të dominuara nga shtetasit shqiptarë, ndërsa 12 nga shtetasit e Kosovës. Kundër këtyre të fundit janë bërë hetime kryesisht për krime me lëndë narkotike, falsifikime dhe krime të pronës. Numri i shtetasve shqiptarë  në hetim për krime të organizuara në vitin 2017 ka qenë 214, kurse ai shtetasve nga Kosova 195, nga gjithsej 8317 persona në hetim.

E pyetur se a financohen aktivitete ekstremiste shqiptare nga krimi i  organizuar, qeveria gjermane përgjigjet se nuk është në dijeni. Së fundi, deputetët e AfD-së pyesin se sa është shuma e ndihmave për të cilat do të ketë nevojë Shqipëria si anëtare e BE-së? Qeveria gjermane përgjigjet se kjo shumë mund të llogaritet vetëm kur Shqipëria t’i ketë përmbyllur me sukses të gjithë kapitujt e negociatave të anëtarësimit.

“Alternativa për Gjermaninë”  zë vetëm 12,6 përqind të vendeve në Bundestag, por, për shkak të qeverisë së koalicionit të madh mes CDU/CSU dhe SPD, është partia kryesore e opozitës. E krijuar në vitin 2013, AfD është e përfaqësuar në të gjitha parlamentet e landeve. Ajo është e vetmja parti e Bundestagut gjerman që është kundër anëtarësimit të vendeve të Ballkanit në BE. Në tetor ajo doli me një propozim që në vend të perspektivës së anëtarësimit shteteve të Ballkanit Perëndimor t’u ofrohet mundësia e krijimit të një Unioni të Ballkanit Perëndimor. DW

Parlamenti Evropian miratoi të enjten rezolutën për Serbinë, në të cilën theksohet se janë bërë përparime në reformat ekonomike, por se është më rëndësi thelbësore, të arrihen rezultate të prekshme në reformat në drejtësi, luftën kundër korrupsionit dhe lirinë e mediave.

Rezoluta mirëpret “angazhimin e vazhdueshëm të Serbisë në rrugën e saj drejt anëtarësimit në Bashkimin Evropian”.

Gjithashtu eurodeputetët përshendësin përpjekjet që janë bërë për të normalizuar marrëdhëniet me Prishtinën.

“Çdo marrëveshje mbi normalizimin e raporteve do të jetë e pranueshme vetëm nëse pajtohen të dyja palët dhe nëse ajo ruan stabilitetin në rajon dhe të drejtën ndërkombëtare” thuhet në rezolutë.

Sa i përket idesë për ndryshim të kufijve, Parlamenti Evropian, thekson se “shtetet etnikisht të pastra nuk duhet të jenë qëllim i rajonit” përderisa potencohet struktura shumetnike e Kosovës dhe Serbisë.

Dokumenti i jep rëndësi themelimit të asosacionit të komunave me shumicë serbe në Kosovë dhe zbatimit të gjitha marrëveshjeve ndërmjet dy vendeve përfshirë edhe atë për energjinë.

BERLIN – Zbulohet se 73 për qind e gjermanëve i konsiderojnë “të këqija” ose “shumë të këqija” marrëdhëniet mes SHBA-ve dhe Gjermanisë.

Sipas një anketimi të kryer në shtator nga instituti amerikan Pew Research Center dhe Fondacioni gjerman Körber, 73 për qind e gjermanëve i konsiderojnë “të këqija” ose “shumë të këqija” marrëdhëniet mes SHBA-ve dhe Gjermanisë. Ndërkohë që norma në fjalë vitin e kaluar ka qenë 56 për qind.

Po sipas anketës, 70 për qind e amerikanëve theksohet se i vlerësojnë si “mirë” ose “shumë mirë” marrëdhëniet mes dy vendeve.

Theksohet se 7 nga 10 amerikanë dëshirojnë të punojnë ngushtë me Gjermaninë, ndërsa vetëm 41 për qind e gjermanëve dëshirojnë të punojnë ngushtë me SHBA-të. Gjermanët pas SHBA-ve vërejnë “shumë të rëndësishme” marrëdhëniet me Francën, Rusinë, Britaninë dhe Kinën.

Po ashtu 58 për qind e amerikanëve dëshirojnë më pak bashkëpunim me Rusinë, ndërsa 69 për qind e gjermanëve dëshirojnë më shumë bashkëpunim me Moskën.

Sipas studimit, shkalla e njerëzve që deklaruan se përfitojnë në tregtinë e lirë është 68 për qind në Shtetet e Bashkuara të Amerikës, ku kjo normë në Gjermani ka mbetur në 53 për qind.

Ndërkohë 51 për qind e amerikanëve kundërshtojnë zbatimin e tarifave penalizuese ndaj Gjermanisë dhe vendeve evropiane. Ndërsa 78 për qind e gjermanëve mbështesin kundërpërgjigjen ndaj tarifave doganore amerikane.

Në kuadër të anketimit theksohet se 72 për qind e gjermanëve duan një politikë që është më e pavarur nga politika e jashtme e SHBA-ve dhe 65 për qind e amerikanëve duan që të punohet më ngushtë me Evropën në politikën e jashtme. aa

Komisioneri për Zgjerim në Bashkimin Europian, Johanes Hahn, gjatë një takim me zyrtarë të vendeve të rajonit, ka deklaruar se mes Kosovës dhe Serbisë duhet ta arrihet një marrëveshje.

“Duam një marrëveshje mes Kosovës dhe Serbisë”.

Gjithashtu në fjalën e tij, Hahn shtoi se: Shqipëria ka bërë progres në implementimin e reformës në drejtësi.

Të pranishëm në takim janë dhe McAllister, Kukan, Fajon, Fleckenstein.

OVIEDO – Pas një kërcënimi që bëri me veto ndaj marrëveshjes së Brexitit dhe bojkotit të Samitit të sotëm të BE-së, kryeministri spanjoll, Pedro Sanchez, njoftoi mbrëmë se do të mbështesë marrëveshjen për Brexitin.

Sanchez kishte kërkuar më herët të bëhet e qartë marrëveshja për tërheqjen e Britanisë së Madhe lidhur me të ardhmen e Gjibraltarit, megjithatë, njoftoi se ka arritur një marrëveshje me BE-në dhe Britaninë e Madhe.

“Sapo Britania të largohet nga BE-ja, marrëdhëniet politike, juridike dhe gjeografike midis Gjibraltarit dhe BE-së do të kalojnë përmes Spanjës”, tha Sanchez në një fjalim televiziv.

Pas bisedimeve të rënda, por të frytshme në javët e kaluara për të qartësuar të ardhmen post-Brexit të Gjibraltarit, tha Sanchez, “jam i lumtur që kam pranuar një deklaratë të Komisionit Evropian dhe Këshillit Evropian, dhe një konfirmim të shkruar nga Britania se e ardhmja e territorit britanik në anën jugore të Spanjës bëhet një çështje dypalëshe”.

Gjibraltari që ka një popullsi prej rreth 30.000 banorësh i’u bashkëngjit Britanisë nga Spanja nën Traktatin e Utrehtit të vitit 1713, megjithëse që nga atëherë kanë vazhduar pretendimet spanjolle mbi rajonin.

Nga viti 1968 deri në vitin 1985, një vit para se të bashkohej me BE-në, Spanja imponoi një bllokadë duke ndërprerë për banorët e Gjibraltarit qasjen në kufirin tokësor dhe komunikim.

Pjesa dërmuese e banorëve të Gjibraltarit e konsiderojnë veten britanikë. Në një referendum të mbajtur në vitin 2002, me pyetjen “nëse Spanja ose Britania e Madhe duhet të ketë sovranitetin mbi territorin, 98.5 për qind votuan për të mbetur nën sundimin britanik. aa

Në Francë, Ministri i Brendshëm Christophe Castaner akuzoi sot të djathën ekstreme për nxitjen e akteve me dhunë dhe të përleshjeve të protestuesve me policinë në Paris.

Marine Le Pen, Kryetarja e Partisë së Asamblesë Komnbëtare, që më parë njihej si Fronti Kombëtar, në fillim të javës, iu bëri thirrje protesteusve që të shkonin drejt Bulevardit kryesor të Parisit, Champs-Elysées, megjithëse autoritetet kishin ndaluar zhvillimin atje të demonstratave.

Ministri i Brendshëm francez i bëri këto komente ndërsa policia përdori gazin lotsjellës dhe pompat e ujit për të shpërndarë qindra demonstrues të zemëruar, të mbledhur sot në Paris për të protestuar kundër bllokadave në rrugë, nën udhëheqjen e shoferëve të makinave që kundërshtojnë rritjen e taksave për karburantin dhe drejtimin e vendit nga Presidenti Emmanuel Macron.

Në protestat e zhvilluara në mbarë Francën ditët e fundit u përfshinë 23 mijë vetë, 5 mijë ndër ta vërshuan në Bulevardin Champs-Elysees. Minsitri i Brendshëm u tha gazetarëve se protesta është dobësuar.

Për të vënë nën kontroll demonstruesit e zemëruar u dërguan mijëra policë. Gjatë një jave me demonstrata, ku protesteusit mbanin në duar parrulla me fjalët “Vdekje taksave”, dy vetë humbën jetën dhe qindra njerëz pësuan lëndime.

Situata politike në Francë shihet si një tregues i pakënaqësive ndaj Presidentit Macron, i cili akuzohet për indiferencë ndaj vështirësive të jetës për francezët e thjeshtë.

Sebastian Kurz i cili gjatë vizitës së tij të fundit i dha përkrahje idesë së Thaçit për korrigjim të kufijve dhe shkëmbimit të territoreve ndërmjet Kosovës dhe Serbisë, thotë se në Ballkan duhet të prishen barrierat dhe jo të krijohen bllokada të reja.

“Më vjen keq që Kosova ka vendosur tarifa për produktet nga Serbia dhe Bosnja e Hercegovina. Austria mbështet bashkëpunimin rajonal të Ballkanit Perëndimor dhe marrëveshjet rajonale të tregtisë së lirë CEFTA, nga e cila përfiton i gjithë rajoni. Ne duhet të prishim barrierat në vend se të shpikim të reja”, ka shkruar Kurz në një reagim në Twitter.

Ich bedauere, dass d #Kosovo auf Produkte aus Serbien & Bosnien-Herzegowina Zölle eingeführt hat. Ö setzt auf regionale Zusammenarbeit am Westbalkan u auf das regionale Freihandelsabkommen CEFTA, das d gesamten Region nützt. Wir müssen Barrieren abbauen, anstatt neue zu erfinden.
— Sebastian Kurz (@sebastiankurz) November 23, 2018

Taksën për produktet serbe e kanë kundërshtuar edhe liderët politik në Serbi dhe gjithashtu edhe Bashkimi Evropian.

Sot në veri të Mitrovicës gjithashtu është organizuar një protestë nga serbët që jetojnë atje dhe është kërkuar që të largohet një taksë e tillë./GazetaExpress/

MADRID – Spanja do të vendosë veto ndaj marrëveshjes Brexit midis Britaisë dhe Bashkimit Evropian (BE) nëse nuk bëhet ndryshim në statusin e Gjibraltarit, territor britanik jashtë shtetit, tha kryeministri spanjoll Pedro Sanchez.

“Pas bisedës sime me Theresa May, qëndrimet tona mbeten shumë të largëta”, shkroi Sanchez në rrjetin social Twitter.

“Qeveria ime gjithmonë do të mbrojë interesat e Spanjës. Nëse nuk ka ndryshime, ne do të vendosim veto ndaj Brexit”, ka shtuar Sanchez.

Gjibraltari, territor britanik jashtë shtetit me një popullsi prej rreth 30.000 banorësh, iu dorëzua Britanisë nga Spanja nën Traktatin e Utrehtit të vitit 1713, por pretendimet spanjolle mbi këtë rajon kanë vazhduar. Në referendumet e vitit 1967 dhe 2002, popullata e vendit kundërshtoi gjerësisht propozimet për t’u qeverisur nga Madridi.

Sanchez më herët ka thënë se Spanja do të votojë kundër marrëveshjes pasi nuk është e kënaqur me pjesën e saj që ka të bëjë me marrëdhëniet e ardhshme të Gjibraltarit me BE-në.

Spanja ka kërkuar të ketë fjalën e fundit mbi çdo marrëveshje në të ardhmen në lidhje me këtë vend.

Sipas rregullave të BE-së, marrëveshja mund të kalojë me shumicën e vendeve të BE-së dhe jo me miratimin e të gjitha vendeve, kështu që Spanja nuk mund të frenojë marrëveshjen e vetme.

Të enjten, May tha se ka biseduar me Sanchez dhe se është “e bindur se të dielën do të jemi në gjendje të pajtohemi për një marrëveshje për të gjithë familjen e Britanisë, duke përfshirë edhe Gjibraltarin”.

Britania dhe udhëheqësit e BE-së nga 27 vende anëtare do të mblidhen për një raund të fundit bisedimesh në Bruksel në samitin e posaçëm të Brexit-it të dielën.

Më 13 nëntor, May finalizoi marrëveshjen e Brexit-it prej 585 faqesh që kabineti i saj ra dakord të mbështesë.