Parlamenti Evropian shprehu të enjten shqetësim të thellë për shkeljet e të drejtave të njeriut të punëtorëve vietnamezë në Serbi, dhunën kundër protestuesve mjedisorë dhe ndikimin në rritje të Kinës në vend. Eurodeputeti francez, Thierry Mariani, në emër të grupit të djathtë Identiteti dhe Demokracia, i kritikoi BE-në për qëndrimin e saj ndaj Serbisë.

Përveç kritikave ndaj autoriteteve serbe për përpjekjet për të shtypur protestat, mosrespektimin e standardeve evropiane të drejtave të punës dhe afërsinë me Kinën, disa ligjvënës evropianë kritikuan gjithashtu hapjen e kapitujve të rinj të negociatave për afrimin e Serbisë në BE në rrethanat e krijuara.

Eurodeputetët paralajmëruan gjithashtu për shkelje të drejtave të njeriut të rreth 500 punëtorëve vietnamezë në kantierin e ndërtimit të fabrikës Linglong në pronësi kineze në Zrenjanin.

Punëtorëve vietnamezë thuhet se iu morën pasaportat dhe u detyruan të jetonin në kushte çnjerëzore.

Prandaj, ligjvënësit evropianë paralajmëruan se Serbia po i jep Kinës dhe industrialistëve kinezë gjithnjë e më shumë privilegje ligjore në vend, edhe kur ato janë në kundërshtim me ligjet e BE-së, dhe shprehën shqetësimin për ndikimin në rritje të Kinës në Serbi dhe në Ballkanin Perëndimor.

Tonino Picula, eurodeputeti kroat nga socialistët (S&D) dhe njëri nga bashkautorët e propozim rezolutës, tha në një debat në Parlamentin Evropian se “në Serbi nuk janë të pakta rastet e ndikimeve të jashtme përmes investimeve të dyshimta që nuk janë në përputhje me ato evropiane, e të cilat rezultojnë me punë të detyrueshme”, transmeton Index.hr.

“E gjithë kjo me mbështetjen e drejtpërdrejtë të strukturave qeverisëse që krahasojnë protestuesit mjedisorë me fashistët, ndërsa huliganët e mbrojtur nga policia mbrojnë muralet për kriminelët e dënuar për krime të luftës”, shtoi Picula, duke treguar se çfarë është thënë edhe në amendamentin e tij në propozimin e rezolutës.

“Vendimi i Komisionit Evropian për hapjen e një grupi negociatash mjedisore me Serbinë pas sulmeve të dhunshme të huliganëve të Vuçiçit ndaj protestuesve nuk e ndihmon besueshmërinë e BE-së”, tha Picula.

Viola von Cramon – Taubadel nga të Gjelbrit, gjithashtu bashkëautore e propozimit të rezolutës, tha se protestat në Serbi nuk kishin të bënin vetëm me mbrojtjen e mjedisit dhe ligjin e referendumit, por edhe me luftën kundër korrupsionit të përhapur dhe theksoi se BE nuk duhet të bëjë kompromis me standardet për vendet që hyjnë në BE.

Deputeti kroat Tomislav Sokol, në emër të Partisë Popullore Evropiane, tha se situata aktuale tregon faktin se “Presidenti Vuçiç kurrë nuk ka qenë realisht besnik ndaj ideve dhe vlerave evropiane”.

“Protestat paqësore shoqërohen me incidente dhe provokime, konflikte sporadike, shtytje dhe përleshje të shkaktuara nga grupe provokatorësh dhe përkrahësve të qeverisë, me mungesë të dukshme të policisë me uniformë. Është e qartë se Partia Progresive Serbe në pushtet kërcënon të drejtat politike dhe liritë civile. në Serbi”, paralajmëroi Sokol.

Eurodeputeti francez Thierry Mariani, në emër të grupit të djathtë Identiteti dhe Demokracia, kritikoi BE-në për qëndrimin e saj ndaj Serbisë.

“Komisioni i kërkon Serbisë dispozita që nuk janë në marrëveshje të tjera”, tha ai.

“Serbia e ka humbur Kosovën dhe ky parlament e njeh Prishtinën. Të gjithë investitorët ndërkombëtarë, rusë, kinezë e të tjerë, ju doni të jenë në vartësi të Brukselit, nuk po e mbroni konkurrencën e ndershme në BE”, komentoi Mariani.

Mariani kërkoi që të zhvillohet një dialog i ndershëm me Serbinë dhe që BE “të mos ndjekë ideologjinë e saj në vendet e treta”. bw

RFE/RL

Përfaqësuesit e Parlamentit Evropian më 15 dhjetor, vonë në mbrëmje votuan raportin për bashkëpunim në luftën kundër krimit të organizuar në Ballkanin Perëndimor. Me këtë dokument, po ashtu, kërkohet që shtetet e rajonit t’i hapin arkivat e ish-Jugosllavisë.

Në dokumentin e miratuar, eurodeputetët u bënë thirrje qeverive të shteteve të rajonit që t’i shtojnë përpjekjet në drejtim të reformave në fushën e sundimit të ligjit dhe luftës kundër korrupsionit dhe krimit të organizuar.

Për këtë raport votuan 531 eurodeputetë, ndërsa 48 ishin kundër dhe 117 abstenuan.

Në raportin e miratuar thuhet se shtetet e Ballkanit Perëndimor janë “shtete të prejardhjes, destinacionit dhe transitit me qenie njerëzore dhe shërbejnë si korridore transiti për emigrantët e refugjatët, por po aq janë edhe zona për shpëlarje të parave dhe tregti me armë zjarri”.

Në dokument, ndër tjerash, thuhet që “deputetët e Parlamentit Evropian, të vetëdijshëm për akuza për lidhjet ndërmjet figurave të larta politike dhe grupeve të krimit të organizuar, nëpërmes këtij raporti, theksuan nevojën që të çrrënjosen lidhjet politike dhe administrative me krimin e organizuar përmes masave të qarta të mbrojtjes nga korrupsioni dhe me ndjekje efikase penale të rasteve të korrupsionit të profilit të lartë”.

“Lidhjet ndërmjet krimit të organizuar, politikës e biznesit ekzistonin edhe para shpërbërjes së Jugosllavisë dhe vazhduan deri në fund të konflikteve në vitet ’90, derisa deputetët e Parlamentit Evropian dënuan mungesën e qartë të vullnetit të autoriteteve përgjegjëse në rajon që të hapin arkivat e ish-Jugosllavisë dhe dosjet t’u kthehen qeverive nëse ato duan”, shkruhet në dokument.

Po ashtu, theksohet nevoja që shtetet e Ballkanit Perëndimor të bashkëpunojnë dhe të këmbejnë informatat e inteligjencës me shtetet anëtare të Bashkimit Evropian dhe partnerët ndërkombëtarë.

Autori i dokumenti, deputeti evropian, Lukas Mandl, pas miratimit të këtij raporti deklaroi se krimi i organizuar dëmton besimin e qytetarëve ndaj institucioneve të tyre publike.

“Andaj, kjo paraqet pengesë të madhe për shoqëritë në Ballkanin Perëndimor që të zhvillojnë shtetet dhe ekonomitë e tyre. Bashkimi Evropian nuk mund të përdorë krimin e organizuar si arsyetim për shtyrjen e procesit të zgjerimit, por duhet të qëndrojë krahas popujve të Ballkanit Perëndimor në luftën e tyre kundër krimit të organizuar”, porositi Mandl.

Deputetët e Parlamentit Evropian me këtë raport të miratuar u pajtuan që lufta kundër krimit të organizuar dhe integrimi në Bashkimin Evropian janë procese të cilat fuqizohen mes vete, duke i bërë thirrje Bashkimit Evropian që të përshpejtojë procesin e integrimit.

Në këtë kontekst, meqë izolimi nxit aktivitetet kriminale, deputetët e Parlamentit Evropian po ashtu i bënë thirrje Këshillit që pa shtyrje të mëtutjeshme të miratojë liberalizmin e vizave për Kosovën.

Faktorët kryesorë që shoqëritë e Ballkanit Perëndimor i bëjnë të ndjeshme, sipas raportit, janë mungesa e mundësive për punësim, korrupsioni, dezinformatat, elementet e kapjes së shtetit, pabarazia dhe përzierja e regjimeve jodemokratike siç janë Rusia dhe Kina.

Në përputhje me këtë, sipas eurodeputetëve, Bashkimi Evropian do të duhej që t’i përkrahte këto përpjekje nëpërmes ndihmës financiare dhe bashkëpunimit praktik.

Solange d’ANGELY dhe jeta e saj

Solange d’Angely është e bija e francezit Robert d’Angely, i cili si të ishte një Rilindas shqiptar i vërtetë iu përkushtua gjuhës shqipe. Robert d’Angely u martua me vajzën shqiptare që quhej Maria. Ajo ishte e bija e doktor Josif Bënjës nga Përmeti dhe frut i dashurisë së tyre ishte Solange d’Angely.

Në moshën 20 vjeçare, Solange u diplomua në degën “fizikë-kimi-biologji” në Fakultetin e Shkencave në Paris. Dhe në 1953, ajo u regjistrua në vitin e parë në Fakultetin e Mjekësisë në Paris,falë rezultateve të shhkelqyera fitoi bursë studimi. Më 26 tetor 1965, ajo përfundoi me sukses Fakultetin e Mjekësisë të Universitetit të Parisit shoqëruar me certifikatën e studimeve me specialitet pediatrinë, e cila i dha asaj statusin e specialistit në pediatri.

Më 8 qershor 1966, ajo mbrojti tezën e saj mbi “Apneat e foshnjave të parakohshme” dhe në të njëjtën ditë mori diplomën shtetërore të doktorit të mjekësisë.

Solange d’ANGELY dhe Shqipëria e saj

Më 15 qershor 1971, Dr. Solange d’Angely erdhi në Shqipni me nanën e saj, Maria Bënja, e cila u kthye për herë të parë në vendin e saj të lindjes, të cilën ajo nuk e kishte parë që nga viti 1924. Nanë dhe bijë u prekën shumë nga situate e Shqipërisë së asaj kohe. Por vetëm në vitin 1991, me ranien e diktaturës komuniste, Dr Solange d’Angely vendosi të rikthehej me ide të qarta, me një përkushtim prej idealisteje për tí dhuru vendit amë energjinë e saj të mbledhun ndër vite, në pamundësi për me e dhanë, atë ndihmë që veçanërisht fëmijët e vegjël të sëmurë kishin nevojë.

Në vitin 1991, ajo themeloi shoqatën e parë humanitare, e cila u qujt “Bashkëpunimi Arsimor dhe Mjekësor për Fëmijët e Shqipërisë” me akronim CEMPEA. CEMPEA synonte të jepte kontribut në fushat: e shëndetit, arsimit dhe trajnimit, për të përmirësu kushtet e jetesës së fëmijëve në Shqipëri.

Po në këtë vit, Dr. Solange d´Angely organizoi “Ditët e para Pediatrike Franko-Shqiptare” në Tiranë (Shqipëri), nën mbikëqyrjen e Këshillit të Evropës dhe në bashkëpunim me pediatrinë shqiptare si dhe të ndihmesës së pakufi të atashesë së kulturës në Ambasadën Franceze në Tiranë zonjës Evelyne Noygues .

D´Angely, shumë shpjet u bë aktorja kryesore në organizimin e kongreseve pediatrike, të cilat ndoqën njëra -tjetrën nga viti 1992- 2007 për të promovua mjekësinë, forcu shkëmbimet mes kolgëve francezë me ato shqiptarë. Gjithashtu CEMPEA, në drejtimin e Dr. Solange d´Angely, arriti të mbledhë dhe bashkojë energjitë e partnerëve të shumtë për të shpërndarë ndihma humanitare me ilaçe dhe pajisje mjekësore, rroba dhe qumësht, nga 1992 -1996.

Kjo grua e fuqishme, me një personalitet të admirueshëm dhe të besueshëm që kishte krijuar ne shoqërinë e lartë franzeze, në rrethet intelektuale, te profesorët e mjeksisë si dhe në rrjetet administrative, kjo grua me zemër të madhe, organizon pritjen e fëmijëve shqiptarë në spitalin De Paris për vite të tëra, duke fillu nga viti 1993- 2004, për kujdes të specializuar që nuk mund t’ju ofrohej në Shqipëri.

Në të njëjtën kohë, vizionarja Dr. Solange d´Angely, nëpërmjet CEMPEA, vokumin e mungesës së specialiteteve në mjeksinë shqiptare, arrin ta plotësojë duke siguruar mundësi trajnimi të disa pediatërve shqiptarë në Francë në fushat e gjenetikës molekulare dhe të biologjisë, reumatologjisë, pediatrisë dhe imunologjisë.

E ndër arritjet e saj më të mëdha, që mjeksia dhe populli shqiptar i përulet është se siguroi mbështetjen vendimtare në lidhje me ekzaminimin që në paralindje të diagnozës të beta-talaseminë, sëmundjes gjenetike që prek 10% të popullsisë në Shqipëri, si dhe arriti në bashkëpunim me autoritete shqiptare të përurojë të parin laborator të biologjisë molekulare dhe gjenetikës, brenda qendrës spitalore universitare (CHU) të “Nëna Tereza” në Tiranë në vitet 2005.

Kontributi madhështor i Dr. Solange d´Angely nuk njeh pengesa as kufinj të ndarë mes tokave shqiptare, nga viti 2007 ajo udhëhoqi projektin në mbështetje të fëmijëvë nga Shqipëria dhe Kosova me patologji komplekse duke iu mundësuar prindërve të tyne të merrnin shërbim të specializuar nga profesionistë francezë të kujdesit shëndetësor.

E emëruar me dekret në Gazetën Zyrtare franceze, më 1 Janar 2010, Dr .Solange d’Angely u dekorua me Kryqin e Kalorësit të Legjionit të Nderit franceze nga Profesor Gérard Lenoir, më 5 maj 2010, për iniciativën e saj qytetare në fushat e shëndetësisë, arsimit , aksion social dhe humanitar.

Asnjë nga Presidentë shqiptarë nuk u kujtua tí dekorojë kësaj misionareje urdhër mirënjohjeje.

Porse të gjithë ne I përulemi kësaj zonje të klasit francez e me zemër shqiptare, tani 88-vjeçare Solange d’Angely të shijojë pushimin e merituar të rrethuar nga familja dhe miqtë, rrethuar dhe me mirënjohjen tonë të thellë, por të pamundur deri më tani edhe institucionalisht.

RFE/RL

Gjermania dëboi dy diplomatë rusë pasi një gjykatë në Berlin shpalli fajtor një shtetas rus për vrasjen e një militanti çeçen më 2019 në Berlin, pas urdhrit të marrë nga Moska.

Ministrja e Jashtme gjermane, Annalena Baerbock tha më 15 dhjetor se ambasadori rus në Gjermani, Sergei Nechayev është njoftuar për dëbimin e diplomatëve.

Përfshirja ruse në vrasjen e Tornike Kavtarashvili më 2019 ishte “shkelje e rëndë e ligjeve gjermane dhe sovranitetit të Gjermanisë”, tha Baerbock.

Gjykata në Berlin tha se autori i vrasjes së Kavtarashvili ishte 56-vjeçari Vadim Krasikov, i njohur edhe me emrin Vadim Sokolov.

Vraja e Kavtarashvili në Berlin kishte përkeqësuar raportet mes Rusisë dhe Gjermanisë. Por gjykata tha se vendimet e saj nuk janë ndikuar nga raportet politike midis Berlinit dhe Moskës.

Krasikov dyshohet se është agjent i shërbimit sekret rus, FSB.

Prokurorët thanë se Moska e kishte urdhëruar vrasjen sepse Kavtarashvili, që njihej edhe si Zelimkhan Khangoshvili, ishte komandant i separatistëve në Kaukazin Verior në periudhën ndërmjet vitit 2000 dhe 2004.

Presidenti rus, Vladimir Putin, e kishte cilësuar Khangoshvilin si “bandit” dhe terrorist.

Prokurori federal, Nikolaus Forschner gjatë gjykimit argumentoi se nuk ishte e rëndësishme nëse viktima ishte terrorist, pasi ai kishte qenë azilkërkues në Gjermani që prej vitit 2016 dhe sipas prokurorit, Khangoshvili nuk paraqiste rrezik që do të justifikonte vrasjen e tij.

Forschner e akuzoi udhëheqjen ruse për “shpërfillje të sundimit të ligjit” dhe shkelje të sovranitetit të Gjermanisë.

Ambasada ruse në Gjermani tha se vendimi i gjykatës ishte “i motivuar politikisht” dhe ky vendim do të komplikojë edhe më shumë raportet mes Rusisë dhe Gjermanisë.

Bruksel

Franca do të bëjë publike 15 vite përpara nga data e caktuar një pjesë të arkivave zyrtare shtetërore lidhur me Luftën Algjeriane për Pavarësi, transmeton Anadolu Agency (AA).

Ministrja e Kulturës, Roselyne Bachelot në një deklaratë për BFMTV tha se 15 vite përpara datës së caktuar do të hapin arkivat lidhur me hetimet gjyqësore të policisë dhe xhandarmërisë në luftën 1954-1962 në Algjeri.

Duke mbrojtur idenë e saj se të vërtetat historike në fjalë janë manipuluar, Bachelot tha se kanë arritur në këtë vendimmarrje për të parandaluar shtrembërimet dhe për t’u përballur me çështjen.

Në pyetjen nëse vendimi për hapjen e arkivave mund të rezultojë me mundësinë e zbulimit të veprimeve torturuese të ushtrisë së Francës në Algjeri, ministrja franceze tha se pranimi i kësaj do të jetë në dobi të Francës.

Presidenti francez, Emmanuel Macron në një deklaratë në muajin mars premtoi hapjen e rrugës për të arritur qasje në arkivat e fshehta më të vjetra se 50 vite lidhur me Luftën e Algjerisë për Pavarësi.

Në anën tjetër ka tërhequr vëmendjen se deklaratat e ministres së Kulturës janë bërë dy ditë pas vizitës zyrtare që ministri i Jashtëm Jean-Yves Le Drian zhvilloi në Algjeri.

Marrëdhëniet mes dy vendeve u tensionuan pasi Macron pretendoi se historia e Algjerisë nuk është e bazuar në të vërteta, se ajo është ndërtuar mbi armiqësinë ndaj Francës dhe pas cilësimit të dominimit Osman në vend si “kolonializëm”.

Deklaratat e Macron-it u pritën me reagime të shumta në Algjeri si nga pala zyrtare ashtu edhe nga pala civile.

Londër

RFE/RL

Autoritetet franceze më 8 dhjetor kanë liruar një burrë saudit të cilin e arrestuan gabimisht një ditë më parë nën dyshimet se ishte i përfshirë në vrasjen e gazetarit, Jamal Khashoggi, në Stamboll para tre vjetësh.

Khaled al-Otaibi u arrestua nga policia kufitare franceze në aeroportin e Parisit, Charles-de-Gaulle më 7 dhjetor para se të udhëtonte në Riad.

Ai u vendos në paraburgim dhe pritej të paraqitej në gjykatë më 8 dhjetor.

Sidoqoftë, al-Otaibi është liruar sepse autoritetet franceze kuptuan që e kishin ngatërruar personin pas njoftimit të Ambasadës saudite në Paris, e cila njoftoi se “personi i arrestuar nuk kishte fare të bënte me rastin e Khashoggit”.

Më pas Prokuroria në Paris po ashtu njoftoi se pas verifikimeve është konstatuar se i arrestuari nuk ishte personi i kërkuar për vrasjen e gazetarit saudit.

Khashoggi, kritik i madh i Qeverisë saudite i cili jetonte në SHBA ishte vrarë në tetor të 2018-s pasi hyri në Konsullatën saudite në Stamboll për të rregulluar disa dokumente personale në mënyrë që të martohej.

Sipas zyrtarëve turq, një njësi speciale saudite ishte duke e pritur për ta vrarë. Trupi i tij asnjëherë nuk u gjet.

Vrasja kishte shkaktuar zemërim global dhe dëmtoi dukshëm imazhin e Arabisë Saudite dhe sundimtarit të saj Princit Muhammad bin Salman.

Deri tani tetë persona janë dënuar për vrasjen e gazetarit, nga Gjykatata saudite në vitin 2019. Pesë prej tyre u dënuan me vdekje por më pas dënimet u ndryshuan në 20 vjet burgim, derisa tre të tjerë u dënuan me nga 7 deri në 10 vjet burgim.

Edhe në Turqi filloi gjykimi në mungesë i 20 personave nga Arabia Saudite për këtë vrasje. 6 persona më pas u liruan.

VOAL – Në Gjermani, epoka e Merkelit përfundon sot (e mërkurë), me zgjedhjen dhe betimin e socialdemokratit Olaf Scholz, i cili merr detyrën nga Bundeskanzlerin dhe bëhet kancelari i ri i Republikës Federale të Gjermanisë. Olaf Scholz u zgjodh nga Bundestagu me 395 vota. Kanë votuar 707 deputetë.

Socialdemokrati 63-vjeçar do të udhëheqë koalicionin e ashtuquajtur “semafor” (i përbërë nga SPD, të Gjelbrit dhe Liberalët) pas fitores së zgjedhjeve të 26 shtatorit. Pas 16 vitesh në qeveri, Unioni (CDU-CSU) do të shkojë në opozitë.

Një duartrokitje e gjatë me ovacione e përshëndeti Angela Merkelin në Bundestag në fillim të seancës parlamentare.

Pas zgjedhjeve në Bundestag, Scholz do të shkojë te Presidenti Federal Frank Walter Steinmeier në Bellevue Castle për takim. Seanca parlamentare do të rifillojë në orën 12.00 për betimin e Bundeskanzler-it, i cili me ekzekutivin e ri (16 ministra) do të kthehet më pas nga krye i shtetit. sda-eb

Është arrestuar në Francë një nga personat e dyshuar për vrasjen e gazetarit saudit Jamal Khashoggi.

Mediat franceze raportojnë se ai u arrestua në aeroportin Roissy, afër Parisit.

Sipas raportimeve, personi i arrestuar po bëhej gati të hipte në aeroplan për të shkuar në Riad.

Personi i arrestuar sipas mediave franceze, ka qenë pjesë e Gardës Mbretërore të Arabisë Saudite. Ai besohet të jetë i përfshirë në vrasjen e gazetarit saudit.
Khashoggi është vrarë teksa ka qenë duke vizituar konsullatën saudite në Stamboll, në tetor të vitit 2018, dhe trupi i tij është copëtuar.

Gazetari 59-vjeçar ka qenë këshilltar i Qeverisë saudite dhe i afërt me familjen mbretërore, mirëpo më 2017 ka kërkuar azil në Shtetet e Bashkuara. rel

Kryeministri Kurti dhe kryediplomati evropian, Josep Borell s’janë pajtuar për zbatimin e marrëveshjes së Asociacionit të Komunave me Shumicë serbe. Kurti në konferencën e përbashkët me Borell tha se Asociacioni është në shërbim të Beogradit teksa Borell tha se s’pajtohet me Kurtin që Gjykata Kushtetuese nuk e mundëson zbatimin e marrëveshjes për Asociacioni, raporton Gazeta Express.

Kryeministri Kurti tha se Asociacioni do t’i shërbejë Beogradit më shumë se sa qytetarëve serbë.

“Të gjitha zgjidhjet që vijnë nga lart për të kënaqur politikanët e caktuar s’janë demokratike e unë jam demokrat dhe besoj se kapitujt e ardhshëm mes Kosovës dhe Serbisë s’duhet të jenë për të shpëtuar lëkurën e një politikani por t’i shërbejnë popullit dhe kam frikë se ky Asociacion është në shërbim të Beogradit shumë më shumë se sa ndonjë qytetari serb të Kosovës të cilëve u shërbej poaq si kryeministër i kësaj republike”, tha Kurti.

Pyetjes së njëjtë të gazetarëve në konferencë iu përgjigj edhe Shefi i Politikës së Jashtme, Josep Borell.

Borell tha se s’pajtohet me kryeministrin Kurti se Gjykata Kushtetuese e pamundëson zbatimin e Asociacionit, duke thënë se Asociacioni duhet të zbatohet sepse është marrëveshja më e rëndësishme.

“Nuk pajtohem me juve kur thoni se Gjykata Kushtetuese e bën të pamundshme implementimin e marrëveshjes së Asociacionit që është lidhur nga përfaqësuesit e të dy palëve në pajtim me normat ndërkombëtare për lidhjen e marrëveshjeve dhe në kuadër të dialogut dhe më vjen keq kryeministër më duhet t’ju kërkojë për implementimin e kësaj marrëveshje. E di se ka marrëveshje të pa implementuara nga të dyja palët por kjo është më e rëndësishmja”, tha ai.

Borell tha gjithashtu se është demokrat poashtu por që s’i shërben asnjë politikani, duke ia përkujtuar kryeministrit Kurti se dialogu është i vetmi forum për zgjidhjen e çështjeve.

“Më lejoni të them se edhe unë jam demokrat dhe nuk jam këtu për të shërbyer cilindo politikan nga cilado anë. Ajo çfarë ka ndodhur me tabelat e veturave ka dëshmuar se dialogu është i vetmi forum për të zgjidhur të gjitha çështjet e hapura. Do të doja që ju të merrni parasysh rëndësinë e këtij dialogu për të tejkaluar vështirësitë për Kosovën për integrim të plotë në bashkësinë ndërkombëtare”, tha ai.

Kryeministri i Kosovës, Albin Kurti gjatë takimit me shefin e diplomacisë evropiane, Josep Borrell në Bruksel.

RFE/RL

Shefi i diplomacisë evropiane, Josep Borrell, më 7 dhjetor, ka thënë se Asociacioni i komunave me shumicë serbe duhet të themelohet.

Në një konferencë të përbashkët për media në Bruksel, kryeministri i Kosovës, Albin Kurti, tha se Asociacioni i shkon për shtati vetëm Beogradit, por jo edhe qytetarëve serbë në Kosovë. Ai shtoi se Gjykata Kushtetuese e Kosovës e ka vlerësuar marrëveshjen për Asociacionin si marrëveshje jokushtetuese.

Megjithatë, Borrell insistoi se kjo ishte njëra prej marrëveshjeve të arritura në Bruksel mes Kosovës dhe Serbisë dhe si e tillë duhet të respektohet.

“Nuk pajtohem që Gjykata Kushtetuese (e Kosovës) vendosi pengesa në zbatimin e kësaj marrëveshjeje. Por, kjo (marrëveshje) u arrit ndërmjet përfaqësuesve të dy qeverive dhe në kuadër të dialogut. Kështu që, më vjen keq, por na duhet të kërkojmë zbatimin e kësaj marrëveshjeje”, tha Borrell.

Në anën tjetër kryeministri i Kosovës, Albin Kurti tha se janë 33 marrëveshje që janë arritën në Bruksel, por Beogradi insiston në zbatimin e vetëm njërës, atë të Asociacionit.

“Kur Gjykata Kushtetuese e shpalli jokushtetuese këtë marrëveshje, asnjë serb në Kosovë nuk ka protestuar. Andaj duhet të kemi dialog nga i cili përfitojnë qytetarët e jo politikanët”, tha Kurti.

Borrell tha se është i vetëdijshëm që ka edhe marrëveshje të tjera të arritura, të cilat nuk zbatohen, por marrëveshja për Asociacionin e komunave me shumicë serbe është më e rëndësishmja.

“Tashmë kemi thënë që themelimi i Asociacionit është pjesë e marrëveshjes së Brukselit. Kjo marrëveshje u arrit me pajtimin e palëve dhe presim të zbatohet e respektohet nga të gjithë. Kjo çon drejt normalizimit të raporteve dhe këtë sot ia kam thënë edhe kryeministrit Kurti”, tha Borrell.

Kryeministri Kurti po ashtu ka thënë se Qeveria e Kosovës mbetet e angazhuar në dialogun me Serbinë me qëllim dhe përkushtim që të arrihet marrëveshja finale ligjërisht e obligueshme dhe të normalizohen raportet mes Prishtinës e Beogradit.

Në Bruksel, të martën është mbajtur takimi i katërt i Këshillit të Stabilizim Asociimit ndërmjet Kosovës dhe Bashkimit Evropian.

Delegacionin e Kosovës e udhëheq kryeministri, Albin Kurti, kurse në atë të BE-së do të jetë shefi i politikës së jashtme të bllokut evropian, Josep Borrell dhe komisionari për Zgjerim, Oliver Varhelyi.

Këshilli i Stabilizim Asociimit është formuar në bazë të Marrëveshjes së Stabilizim Asociimit (MSA) mes Kosovës dhe Bashkimit Evropian dhe në të analizohet zbatimi i kësaj marrëveshjeje nga të dy palët.

Marrëveshja e Stabilizim Asociimit është marrëveshja e parë kontraktuale dhe e vetmja ndërmjet Kosovës dhe Bashkimit Evropian, e cila ka hyrë në fuqi më 1 prill të vitit 2016 dhe e cila synon të mbështesë përpjekjet e Kosovës për forcimin e demokracisë dhe shtetin e së drejtës.

Berlin

Banka Qendrore Evropiane (ECB) ka bërë të ditur se kartëmonedhat euro do të kenë një pamje të re në vitin 2024, respektivisht ky do të jetë ri-dizajnimi i parë i tillë në më shumë se dy dekada, transmeton Anadolu Agency (AA).

Sipas njoftimi nga ECB-ja, një grup tematik këshillimor me një ekspert nga çdo vend i euro-zonës do të paraqesë një listë të ngushtë me pamje të reja në këshillin drejtues.

“Kartëmonedhat euro janë këtu për të qëndruar. Ato janë një simbol i qartë dhe i dukshëm që ne qëndrojmë së bashku në Evropë, veçanërisht në kohë krizash dhe ka akoma një kërkesë të fortë për to”, tha Christine Lagarde, presidentja e ECB-së.

Modelet aktuale të kartëmonedhave euro bazohen në një pamje të “moshës dhe stilit”, të përfaqësuara nga dritare, dyer dhe ura.

Lagarde tha se pamja e kartëmonedhave do të ri-shqyrtohet për t’i bërë ato më të lidhura me evropianët e të gjitha moshave dhe prejardhjeve.

Papa Françesku takon emigrantët në ishullin grek, Lesbos. 5 dhjetor 2021.

RFE/RL

Papa Françesku e ka përshkruar neglizhencën e Evropës ndaj emigrantëve si “përmbytje të qytetërimit”, teksa ka folur para azilkërkuesve që gjenden në ishullin grek, Lesbos.

Gjatë vizitës në kampin Mavrovouni më 5 dhjetor, Ati i Shenjtë tha se disa në Evropë “ngulmojnë ta trajtojnë problemin (e emigrantëve) si një çështje që nuk iu takon atyre”.

Kjo sjellje, sipas Papës, “dënon me vdekje” të gjithë ata që gjendet në këtë situatë.

Kampi që vizitoi Papa ka 2,300 azilkërkues nga Afganistani, Siria, Iraku dhe shtetet e tjera dhe është epiqendra e një vale të emigrantëve, të cilët në vitet e fundit po tentojnë të hyjnë në Evropë.

Papa për herë të fundit kishte vizituar Lesbosin më 2016, kur ky ishull ishte pika kyçe e hyrjes në Evropë të mbi 1 milion personave që kishin ikur nga luftërat në Siri dhe Irak. Ai tha se që atëherë, “pak ka ndryshuar sa i përket çështjes së migrimit”.

Papa Françesku ka zhvilluar një vizitë pesëditore në Qipro dhe Greqi dhe vizita e tij është dominuar nga çështja e emigrantëve.

Çështja e emigrantëve së fundmi ka rritur tensionet mes Bashkimit Evropian dhe Bjellorusisë.

BE-ja e akuzon liderin autoritar bjellorus, Alyaksandr Lukashenka se po përdorë emigrantët si pjesë e “luftës së tij hibride”, për t’iu kundërpërgjigjur sanksioneve që blloku evropian ka vendosur ndaj Minskut për shkak të shtypjes së protestave ndaj Lukashenkas, pas zgjedhjeve të kontestuara presidenciale të vitit 2020.

Amsterdam

VOAL – Ish-kancelari austriak Sebastian Kurz largohet nga politika. Lajmin e parashikuar nga Kronen Zeitung e ka konfirmuar i interesuari në një konferencë për shtyp të mbajtur në orën 11:30 të ditës së enjte.

I dërrmuar nga hetimi i sondazheve të pilotuara, të cilat do të ishin paguar pjesërisht nga qeveria, Kurz ia kishte lënë karrigen e kreut të Ekzekutivit Alexander Schallenberg, duke mbetur megjithatë lider i partisë popullore OEVP dhe duke u bërë kryetar grupi në Parlament. Sekretari i ri i OeVP tani mund të bëhet ministri i brendshëm Karl Nehammer.

Megjithatë, nuk do të kishte qenë aq hetimi ndaj tij që e shtyu në këtë hap, sesa lindja e një fëmije: “Kjo hap një kapitull të ri në jetën time. Dua t’i kushtoj më shumë kohë familjes”, deklaroi ai. përballë mediave duke pranuar se “flaka e entuziazmit është shuar pak”.

Duke folur për akuzat kundër tij, 34-vjeçari Kurz tha se ai nuk ishte “as një shenjt dhe as një kriminel”. “Do të demonstroj pabazueshmërinë e akuzave të ngritura ndaj personit tim, edhe nëse do të më duhet të pres vite”, përfundoi ai pa lënë vend për pyetjet e gazetarëve. rsi-eb

Ministri i Jashtëm ukrainas, Dmytro Kuleba.

RFE/RL

Ukraina ka thënë se do t’i kërkojë NATO-s që të rrisë bashkëpunimin ushtarak me Kievin dhe të përgatisë sanksione ekonomike në kuadër të masave për të parandaluar sulmet e Rusisë ndaj këtij shteti.

Liderët e aleancës veriatlantike do të zhvllojnë të mërkurën, 1 dhjetor, takimin e dytë në Letoni, ndërkohë që rriten shqetësimet për prezencë ushtarake ruse afër kufirit ukrainas.

“Ne besojmë se nëse bashkojmë forcat, nëse veprojmë në mënyrë të koordinuar, ne do të mund të pengojmë presidentin rus, Vladimir Putin dhe të demotivojmë atë nga zgjedhja e skenarit më të keq, që është operacioni ushtarak”, ka thënë ministri i Jashtëm ukrainas, Dmytro Kuleba, pasi është nisur për të biseduar me homologët e NATO-s në kryeqytetin e Letonisë, Rigë.

Ministri i Jashtëm i Danimarkës, Jeppe Kofod, ka thënë se çfarëdo operacioni ushtarak që do të mund të rrezikonte sovranitetin e Ukrainës, do të ketë pasoja të rënda, dhe se shteti i tij do të jetë i gatshëm për t’u përgjigjur me sanksione të ashpra.

Komentet e Kofodit kanë qenë në linjë me paralajmërimet e Sekretarit amerikan të Shtetit, Antony Blinken dhe të ministrave tjerë të Jashtëm të bllokut të NATO-s, të cilët në ditën e parë të takimit, të zhvilluar më 30 nëntor, kanë thënë se Rusia do të paguajë çmim të shtrenjtë për çfarëdo agresioni ushtarak kundër Ukrainës.

Moska, në anën tjetër, i ka tërhequr vërejtjen NATO-s, që të mos kalojë “linjën e kuqe”.

Ukraina – e cila synon të bëhet anëtare e NATO-s, hap që është kundërshtuar ashpër nga Moska – ka thënë se Rusia është duke mbajtur mijëra trupa dhe pajisje të rënda afër kufirit të përbashkët, situatë që ka rritur shqetësimet për pushtim të mundshëm.

Rusia, e cila ka aneksuar Gadishullin ukrainas të Krimesë më 2014 dhe përkrah separatistët që luftojnë kundër Kievit në luftën që ka lënë të vdekur më shumë se 13,200 njerëz në shtatë vjetët e fundit, ka hedhur poshtë sugjerimet se është duke planifikuar sulm dhe fajëson Ukrainën dhe përkrahësit e Perëndimit se janë duke nxitur tensione.

Bashkimi Evropian i ka bërë thirrje Serbisë që ta rishqyrtojë vendimin e saj për refuzimin e vizitës së katër ministrave të Kosovës në Luginën e Preshevës.

Zëdhënësi i Bashkimit Evropian, Peter Stano ka deklaruar se Prishtina dhe Beogradi duhet t’i zbatojnë të gjitha marrëveshjet e nënshkruara më herët për normalizimin e marrëdhënieve të dy shteteve.

“Ne presim që Serbia dhe Kosova t’i zbatojnë plotësisht të gjitha marrëveshjet e së kaluarës, duke përfshirë këtu edhe marrëveshjen për vizitat zyrtare. Vizitat zyrtare janë një pjesë e rëndësishme e normalizimit të marrëdhënieve pasi ofrojnë një mundësi për më shumë ndërveprim dhe komunikim mes palëve”, ka deklaruar Stano.

“Sipas marrëveshjes, të gjitha vizitat duhet të kryhen në një mënyrë që të çojnë përpara procesin e normalizimit ose të kontribuojë në punën e përgjithshme në kontekstin e procesit të dialogut të lehtësuar nga Bashkimi Evropian”, ka thënë ai.

Stano deklaron se vizita e ministrave të Kosovës ishte njoftuar në përputhje me marrëveshjen dhe është dashur të lejohet.
“Vizita e ministrave të Kosovës ishte njoftuar në mënyrë adekuate në përputhje me marrëveshjen dhe prandaj është dashur të lejohet të zhvillohet. I bëjmë thirrje Serbisë të rishqyrtojë vendimin e saj dhe të lejojë që të bëhen vizita zyrtare që plotësojnë kushtet e mësipërme”, ka thënë Stano për KlanKosova.

Ishte ministri i Infrastrukturës, Liburn Aliu, që e bëri të ditur se kjo vizitë nuk u lejua nga shteti serb të shtunën. Sipas tij, kërkesa për vizitë në Medvegjë, Bujanoc dhe Preshevë u refuzua pa arsye.

“Vizita jonë, nga autoritetet në Beograd, u refuzua, pa asnjë arsyetim pak para nisjes së delegacionit tonë. Në harmoni me procedurat dhe marrëveshjen në Bruksel, ne kemi bërë kërkesë të rregullt me datë 24 nëntor, duke prezantuar edhe agjendën e vizitës. Refuzimi na është bërë sot në orën 07:13. Në përgjigjen negative të marrë përmes zyrës sonë ndërlidhëse në Beograd, nuk shprehet asnjë arsye, për refuzimin”.

“Agjenda e aktivitetit të planifikuar, përfshinte vizitën, në datat 27 dhe 28 nëntor, në të tre komunat e banuara me shqiptarë dhe takime me kryetarët e komunave, përfaqësuesit në parlament, në nivelin lokal dhe me krerët e subjekteve politike.

Refuzimi i kërkesës është pengim i hapur për të ndihmuar qytetarët e diskriminuar shqiptarë në Preshevë, Medvegjë dhe Bujanoc”,ka shkruar Aliu.
Bashkë me të në Luginë kishte për të shkuar ministrja e Arsimit, Arbërie Nagavci, ministri i Kulturës, Hajrullah Çeku dhe ministri i Financave, Hekuran Murati.

Zyra evropiane e statistikave (Eurostat) ka bërë të ditur se vendet anëtare të bllokut evropian gjatë vitit 2020 ka prodhuar 284 milionë tonë kimikate apo 1 për qind më shumë krahasuar me vitin 2019, transmeton anadolu Agency (AA).

“Konsumimi i këtyre produkteve arriti në 302 milionë tonë, duke reflektuar një rritje prej 1 për qind krahasuar me vitin 2019”, tha Eurostat, duke shtuar se pandemia COVID-19 nuk shkaktoi asnjë ulje në këtë fushë.

Rreth 221.4 milionë tonë kimikate të rrezikshme për shëndetin u prodhuan vitin e kaluar, ndërsa sasia e prodhuar e kimikateve të rrezikshme për mjedisin ishte 78.8 milionë tonë.

Po ashtu, tregojnë të dhënat e Eurostat, u konsumuan rreth 230.1 milionë tonë kimikate të rrezikshme për shëndetin dhe 79.8 milionë tonë kimikate të rrezikshme për mjedisin.

Kryeministri i Polonisë, Mateusz Morawiecki, tha se aleatët e NATO-s “duhet të zgjohen” përballë përpjekjeve ruse për të destabilizuar rajonin.

Në një intervistë për BBC-në, Morawiecki tha se ngjarjet e fundit tregojnë se Kremlini dhe aleatët e tij duan “ta ndryshojnë sistemin gjeopolitik” dhe “ta përçajnë Bashkimin Evropian”.

Morawiecki përmendi këtu rritjen e pranisë ruse pranë kufirit me Ukrainën, rritjen e çmimeve të gazit dhe krizën me migrantë në kufirin midis Polonisë dhe Bjellorusisë.

Ai i bëri komentet në prag të një takimi të ministrave të NATO-s, që pritet të mbahet gjatë ditës së martë.

NATO, e cila është aleanca më e fuqishme e mbrojtjes në botë, dhe udhëheqësit e BE-së e kanë akuzuar Bjellorusinë së voni për orkestrimin e krizës me migrantë në kufirin e saj me Poloninë.

Morawiecki tha se “nuk është tepër vonë për të vepruar”, por shtoi se mund të jetë vonë pas disa muajsh.

“Gjëra të këqija mund të ndodhin në Ukrainë, për shembull; ose, mund të ketë një problem tjetër të madh me migracionin në të gjithë Evropën”, tha Morawiecki.

Ai tha se beson se “autor” i krizës me migrantë është udhëheqësi i Bjellorusisë, Alexander Lukashenka, por, sipas tij, “ai e ka sponsorin e tij, ai e ka drejtorin e tij” në Kremlin – duke iu referuar kështu presidentit rus, Vladimir Putin.

“Të gjitha pjesët e enigmës së bashku paraqesin një pamje jo shumë të mirë”, tha Morawiecki.

Ministrat e Jashtëm të NATO-s, përfshirë sekretarin amerikan të Shtetit, Anthony Blinken, takohen të martën në Riga të Letonisë për bisedime. rel

Gruaja e parë e cila u zgjodh në postin e kryeministres në Suedi, Magdalena Andersson është riemëruar në post, më 29 nëntor pasi që mosmiratimi i buxhetit në Parlament e detyroi të jep dorëheqje vetëm pak orë pas emërimit javën e shkuar.

Ajo dha dorëheqje të enjten e shkuar pasi koalicioni i saj kolapsoi.

Deputetët suedezë e përkrahën sërish udhëheqësen e partisë Social-Demokrate, Magdalena Andersson me shumicë të ngushtë gjatë votimit të ri të hënën më 29 nëntor.

Tani detyra e Andersson do të jetë të udhëheq qeverinë njëpartiake deri në zgjedhjet parlamentare të shtatorit 2022.

Në votimin e së hënës, 349 deputetët e Parlamentit suedez votuan për Andressonin ndërkaq 75 abstenuan. 173 votuan kundër.

Nën sistemin politik suedez për t’u emëruar kryeministre asaj i duhej shumica e thjesht e votave.

Ish-kampionia suedeze në not nga Universiteti i Upsalas, Andresson e nisi karrierën politike në vitin 1996 si këshilltare e kryeministrit të atëhershëm, Goran Persson.

Shtatë vjetët e shkuara i kaloi si ministre e Financave para se të bëhej udhëheqëse e Social-Demokratëve në fillim të nëntorit. rel

Një varkë me 99 emigrantë diktohet nga një organizatë humanitare larg bregut të Libisë (16 nëntor 2021)

Fotografia e Sharbat Gulas, e vitit 1984.

Sharbat Gula, e njohur si “Vajza Afgane” me sy të gjelbër, e cila është shfaqur në ballinën e revistës National Geographic më 1985, është evakuuar në Itali, ka thënë Qeveria italiane.

“Shtetasja afgane, Sharbat Gula ka arritur në Romë”, ka thënë Zyra e kryeministrit, Mario Draghi, më 25 nëntor.

Qeveria italiane ka thënë se u është përgjigjur kërkesave nga organizatat joqeveritare “që ajo të udhëtojë në Itali, në kuadër të programit të zgjedhur për evakuim të shtetasve afganë dhe planit qeveritar për t’i pranuar dhe integruar ata”.

Me shikimin e saj shpues dhe një mbulesë të kuqe në kokë, Gula është kthyer në refugjaten më të famshme të Afganistanit, kur fotografi amerikan, Steve McCurry, i ka bërë një foto në një kamp të Pakistanit më 1980, e cila më pas ishte publikuar në ballinën e revistës National Geographic.

Gula ka arritur në një kamp në Pakistan më 1980 si jetime gjatë pushtimit sovjetik në Afganistan.

Identiteti i saj është zbuluar më 2002, pasi McCurry është kthyer në atë rajon dhe e ka kërkuar.

Më 2016 ajo është dëbuar në Afganistan, pasi Pakistani ka thënë se ajo ka mashtruar me dokumente identifikimi.

Në muajin shtator, Italia ka thënë se ka evakuuar pothuajse 5,000 afganë, pasi talibanët kanë marrë pushtetin në muajin gusht.

Bashkudhëheqësja e Partisë së Gjelbër në Gjermani, Annalena Baerbock.

RFE/RL

Partia e Gjelbër në Gjermani ka bërë të ditura planet për emërime nëpër ministri, teksa përgatitet për të qenë pjesë e Qeverisë për herë të parë në 16 vjet.

Pas dy muajve negociata prej mbajtjes së zgjedhjeve federale, Social-Demokratët e qendrës së majtë (SPD), Partia e Gjelbër dhe Demokratët e Lirë, kanë arritur marrëveshje për koalicion qeveritar.

Në një adresim para anëtarëve të partisë më 24 nëntor, një zyrtar i lartë i Partisë së Gjelbër, Michael Kellner, ka thënë se bashkudhëheqësi i tij, Robert Habeck do të udhëheqë “super ministrinë” duke bërë bashkë, ekonominë, energjinë dhe mbrojtjen e klimës.

Ai po ashtu pritet të jetë nënkancelar i Gjermanisë.

Kancelari i ri gjerman pritet të jetë Olaf Scholz nga SPD, i cili do të zëvendësojë kancelaren, Angela Merkel, pas formimit të Qeverisë në fillim të muajit dhjetor.

Bashkudhëheqësja e Partisë së Gjelbër, Annalena Baerbock, pritet të jetë gruaja e parë në pozitën e Ministres për Punë të Jashtme.

Ajo ka dhënë shenja se do të jetë më e vendosur kundër shteteve me regjime autoritare sikurse Kina dhe Rusia, duke i vënë të drejtat e njeriut në qendër të diplomacisë.

Voal.ch – Mbyten 27 emigrantë në La Mansh – Po kalonin kanalin mes Francës dhe Anglisë me gomone, e cila u përmbys.

Tragjedia detare ne ngishticen mes Anglise dhe Frances, ku humben jeten te pakten 27 emigrante ka shkaktuar termet politik ne te dyja vendet te cilet po flasin me njera-tjetren per te arritur nje zgjidhje, qofte edhe te perkohshme, per nje problem qe duket se do jete afatgjate, nese nuk riadresohet teresisht ndryshe qasja nga Britania, por edhe partneret evropian, ne kushtet e epokes post-Brexit.

Dëshmitarët tregojnë se midis viktimave ka fëmijë dhe një grua shtatzanë.

Kjo është tragjedia më e rëndë e regjistruar në këtë zonë deti që nga viti 2018.

Presidenti francez Emmanuel Macron tha se “Franca nuk do të lejojë që Kanali të bëhet varrezë” dhe kërkoi një takim urgjent të ministrave europianë për të gjetur një zgjidhje të përbashkët. Nga ana e tij, kolegu britanik Boris Johnson tha se ishte “i tronditur dhe i pikëlluar” dhe mbajti një takim ndërministror të krizës në mbrëmje./rsi.ch/eb

RFE/RL

Qeveria sllovake ka kërkuar falje zyrtarisht për sterilizimet e detyrueshme të grave rome nëpër dekada.

Koalicioni qeveritar ka lëshuar një deklaratë të mërkurën, duke dënuar shkeljet e të drejtave të njeriut ndër vite dhe u ka kërkuar falje personave të prekur, ka raportuar agjencia shtetërore e lajmeve, TASR.

Numri i saktë i sterilizimeve nuk dihet, mirëpo të paktën mijëra gra janë prekur nga ai vendim, ka thënë përfaqësuesja qeveritare e komunitetit rom, në faqen e saj zyrtare.

Sipas Qeverisë, sterilizimet e detyrueshme janë kryer në periudhën 1966-1989, me qëllim të zvogëlimit të numrit të foshnjave të lindura në mesin e këtij komuniteti.

Por edhe pas rënies së komunizmit, Qeveria e ka pranuar se grave rome u është bërë presion – në mënyrë të paligjshme – nëpër klinika që të sterilizohen pasi kanë pasur fëmijë.

Qeveria në këtë rast ka folur për periudhën 1990-2004.

Organizatat për të drejta të njeriut dhe Këshilli i Evropës kanë kërkuar tash e një kohë që Sllovakia të pranojë shkeljet sistematike të të drejtave të komunitetit rom dhe që t’i kompensojë viktimat.

Komisionarja për të Drejta të Njeriut në Këshillin e Evropës, Dunja Mijatoviq, e ka mirëpritur këtë kërkim-falje, duke e konsideruar hap të rëndësishëm.

Megjithatë, ajo ka përmendur edhe nevojën e krijimit të një mekanizmi për kompensim sa më shpejt që është e mundur.

Berlin

Berlin