Dje mediat shqiptare publikuan intervistën që Presidentja e Republikës së Kosovës Atifete Jahjaga kishte dhënë tek Morgenmagazinë për televizionin gjerman ZDF. Po ashtu gazeta gjermane Die Welt bënte një koment ironizues, ku gazetarja pyeste dhe presidentja vijonte të fliste për çfarë ishte përgatitur. Titulli i Die Welt ishte ‘Präsidentin redet, worüber sie will’ – “Presidentja flet për çfarë do ajo” – ose po të përkthehej edhe ironia brënda titullit që ishte shumë implicite – do të kishim “Presidentja flet për çfarë ia do asaj qejfi”, kur dihet se ajo ishte e detyruar t’i përgjigjej pyetjeve të Moderatores Anja Heyde.

Moderatorja kërkonte të dinte shkaqet e ikjeve masive, ku, sipas statistikave, brenda disa muajve Kosovën e kanë lënë rreth 80 mijë vetë, pasi aty papunësia shkon në 45 %, korrupsioni është galopant, prandaj investitorët ikin, kriminelët ia mësyjnë e popullit nuk i mbetet gjë tjetër veç ta braktisë vendin.

Në një situate të tillë a nuk është përgjegjës shteti i Kosovës ?

Por presidentja fliste për tjetër gjë, veç jo për ato që interesohej gazetarja.

Ishin mediat gjermane që iu bënë jehonë pyetjeve të papërgjigje deri tek fikja e sinjalit, ndërsa Jahjaga vijonte ligjëratën e saj pa lidhje. Ishin mediat gjermane që folën për plagët e Kosovës dhe që e ironizuan Jahjagën. Ndërsa mediat shqiptare nuk bënë gjë tjetër veçse e ritransmetuan dhe përkthyen çfarë ndodhi tek Morgenmagazin dhe çfarë kishte shkruar Die Welt. Mediat shqiptare kryen veç detyrën. Ashtu sikur këto media botuan edhe deklaratën për shtyp nga Zyra e Presidentes së Republikës së Kosovës, ku kjo zyrë “shpreh habinë dhe shqetësimin e saj me mënyrën e trajtimit që i është bërë Presidentes në një numër mediash pas kësaj interviste“. Habi dhe shqetësim i pabazë. Habinë dhe shqetësimin ta kishin me ZDF-në dhe Die Welt.

Më tutje në këtë deklaratë shkruhet se „presidentja Jahjaga gjatë gjithë kohës ka dëgjuar vetëm përkthyesin dhe jo moderatoren dhe se në asnjë moment presidentja Jahjaga nuk ka pasur mundësi të dëgjojë intervenimet e moderatores. Ne këto kushte dhe me mënyrën si është zhvilluar biseda presidentja nuk ka patur mundësi të dëgjojë pyetjet shtesë të parashtruara nga moderatorja e ZDF.”

Sipas Zyrës të Presidentes po merret vesh se intervista paska shkuar ashtu si shkoi për shkak të një difekti teknik, të cilin ne gazetarët po e marrim si të qenë, vetëm me një kusht, që zyra e Presidencës t’i kërkojë ndjesë mediave shqiptare, sepse ne gazetarët shqiptarë nuk bëmë gjë tjetër veç botuam dhe emetuam atë që u dha nga ZDF dhe u shkruajt nga Die Welt. Mediat shqiptare emetuan dhe botuan pa censurë atë që dhanë dy media me reputacion dhe kredibilitet të një vendi demokratik si Gjermania.

Opinioni shqiptar, duke mos ditur se çfarë ka ndodhur, ka patur të drejtë që të jetë skandalizuar me qëndrimin e Presidentes, sepse, sikur pretendohet vetë në deklaratë ajo nuk ka dëgjuar moderatoren, por përkthyesen, ndërsa ne të tjerët dëgjonim edhe moderatoren, edhe përkthyesen, edhe Presidenten Jahjaga.

Por meqë puna ka vajtur kështu sikur pretendohet në deklaratë, Zyra e Presidentes të mos u kërkojë llogari mediave shqiptare, por ZDF-së dhe Die Welt. Deri tani Zyra e Presidentes nuk i ka drejtuar asnjë deklaratë ZDF-së dhe Die Welt-it. Sepse nëse ZDF-ja nuk ka krijuar kushte për zhvillimin e intervistës, atëhere përgjegjshmërinë e ka ZDF-ja, ashtu si edhe Die Welt, pasi kësisoj është dëmtuar jo vetëm imazhi i Presidentes Jahjaga, por po ashtu kemi një dizinformim.

Opinioni dhe mediat do ta besojnë Institucionin e Presidentes të Republikës të Kosovës, kur të shohin të botuar edhe deklaratën e Zyrës së Presidentes drejtuar ZDF-së dhe Die Welt-it, dhe po ashtu edhe reagimin e ZDF-së dhe Die Welt. Sepse, nëse vërtetohet se ZDF-ja nuk ka plotësduar kushtet për intervistë me Presidenten Jahjaga, atëherë ky do të jetë një skandal i madh i ZDF-së dhe duhet t’i kërkojnë ndjesë edhe zonjës Jahjaga, edhe publikut shqiptar e gjerman.

Ndërsa i pajustifikuar mbetet nervozizmi i Jahjagës me mediat shqiptare që krijon një paralelizëm me indiferencën e Jahjagës ndaj pyetjeve të Anja Heyde. Sepse politikanët shqiptarë janë mësuar vetëm me gazetari klienteliste-puthadore dhe jo me gazetari të vërtetë nga ajo që i vë politikanët me shpatulla për muri, se ia tregon opinionit dhe popullit të vërtetat që politikanët i fshehin.

Presidentja Jahjaga deri tani konsiderohet si një nga politikanet e pakta në Kosovë pa histori korrupsioni, por nga ana tjetër nuk ka as histori si luftuese e korrupsionit.