Polici Berhan Bajrakurtaj është liruar nga qelia, pas një vendimi që u mor nga Seksioni për të Mitur në Gjykatën e Shkallës së parë në Shkodër.

Gjatë seancës për rivlerësim mase për Bajrakurtajn, Gjykata vendosi masën e sigurisë “Detyrim paraqitjeje”, duke bërë që ai të lihet i lirë. Edhe në këtë seancë, polici Berhan Bajrakurtaj, i cili akuzohet për ngacmim seksual të një 15-vjeçareje në Njësinë Gruemirë, ka mohuar këto akuza duke i quajtur si shpifje.

Portalet publikuan një video-skandal të policit. Pretendimet e personit që ka bërë denoncimin janë se Berhan Bajrakurtaj ka ngacmuar seksualisht vajzën e saj 15- vjeçare, nxënëse në shkollën 9-vjeçare të Gruemirës. Pas arrestimit të policit dhe deri më tani, denoncuesi mbeti anonim dhe askush nuk ka shkuar në Polici për të denoncuar Berhan Bajrakurtajn. Në këto kushte, nga momenti i arrestimit dhe deri më tani, në Gjykatë nuk është vërtetuar se polici në fjalë ka ngacmuar seksualisht ndonjë vajzë 15- vjeçare.

EFEKTIVI

Vetë polici Berhan Bajrakurtaj, para Gjykatës, por edhe gjatë marrjes në pyetje, ka mohuar akuzat ndaj tij ndërsa ka pranuar se videot janë të tijat, por thjesht ato video janë bërë në banesën e tij jashtë orarit të punës dhe se nuk ia ka dërguar asnjë personi siç pretendohet. Edhe kësaj here, Berhan Bajrakurtaj ka deklaruar se celularin e tij pak ditë më përpara e ka pasur në një servis celularësh, ndërsa ka pohuar gjithashtu se nuk ka ditur që ta përdorë edhe aq mirë dhe se dikush ka abuzuar me telefonin e tij. Polici ende nuk e ka idenë se si mund të kenë dalë videot nga celulari i tij, ndërsa mohon kategorikisht se ka bërë ngacmime ndaj ndonjë vajze të mitur. Sipas policit, e gjithë kjo ngjarje është stisur për ta dëmtuar atë qoftë në punën e tij, por edhe në familje dhe se është e qëllimshme.

GJYKATA

Më 14 shkurt të këtij viti, Gjykata e Shkallës së Parë në Shkodër shpalli moskompetencën dhe ia kaloi çështjen Seksionit për të Mitur brenda kësaj Gjykate. Në masën e rivlerësimit nga Seksioni për të Mitur, avokati mbrojtës Xhelal Bajraktari, por edhe prokurori i çështjes Vat Staka, kërkuan masën “Detyrim paraqitjeje”, duke qenë se ndaj policit Bajrakurtaj nuk ka prova të mjaftueshme për ta lënë në “Arrest me burg”. Kërkesë që u pranua nga Gjykata, edhe për faktin se deri tani ende nuk është identifikuar denoncuesi anonim.