Kreu i LSI ka dhene detajet per mediat, teksa kryeministri Rama eshte larguar pa dhene asnje deklarate.

“Dëshiroj të theksoj se qëllimi i këtij takimi ishte rritja e përpjekjeve për garantimin e paprekshmërisë së votës, një angazhim kryesor dhe i marrëveshjes së 22 Prillit, dhe i PS e LSI, dhe në këtë rast vullneti për të nisur një dialog pa kushte që tani me opozitën dhe drejtuesit e saj legjitimë.

Kështu kemi vendosur të vazhdojmë procedurat kushtetuese për zgjedhjen e presidentit të ri, por pa paraqitur asnjë emër, por pa mbështetur asnjë kandidaturë, pa dialoguar dhe për të arritur konsensusin dhe me opozitën dhe pse kjo maxhorancë ka gati 90 vota në Parlament.

Së treti, duke e kuptuar vështirësinë e opozitës për të patur besim sepse cështja e mosbesimit është evidente dhe kjo është arsyeja pse dialogu ende s’ka nisur, kemi vendoosur që ti drejtohemi zyrtarisht PPE, ku dhe PD është anëtare, që të asistojë sa më shpejt të jetë e mundur në këtë dialog në mënyrë që ky ngërc të marrë fund sa më shpejt dhe vendi të shkojë në zgjedhejt ë lira, demokrartike dhe procesi i integrimit dhe reformave të vijojë të jetë i suksesshëm”, tha Meta.

60 minuta nga nisja e takimit, ja çfarë po diskutohet mes Ramës e Metës

Takimi i shumëpritur mes dy aleatëve në qeverisje, Rames dhe Metës, nisi sot ne oren 10:10. Kane kaluar 60 minuta nga nisja dhe “Panorama” meson se garancia për një votë të lirë dhe për zgjedhje të lira e demokratike ka qenë tema e parë e hapur që po i vihet theksi më i madh në këtë tryezë.

Nis takimi Rama-Meta, kreu i LSI me dokumente në duar: Marrëveshja me PS-në ende…

“Marrëveshja e vjetër PS-LSI është ende në fuqi”. Kështu tha lideri i LSI para takimit me kryeministrin, i cili u fut në hotel Tirana me disa dokumente në duar.

Në një prononcim për mediat ai u shpreh: “Kjo është marrëveshja e vjetër që është ende në fuqi dhe ka një problem madhor por që duhet zgjidhur patjetër, dhe që ka angazhimin madhor të aleancës për Shqipërinë europiane për të garantuar paprekshmërinë e votës së lirë si themelin e bashkëjetesës sonë në një shtet e shoqëri europiane”.

Kreu i Kuvendit Ilir Meta mbërriti më herët, ndërsa kryeministri me 10 minuta vonesë nga orari zyrtar që ishte njoftuar. Meta shoqerohej nga Luan Rama, Klajda Gjosha dhe Petrit Vasili ndersa Rama nga Gramoz Ruci dhe Engjell Agaci.

Koalicioni e dialogu me PD, sot takimi Rama-Meta. Çfarë pritet të ndodhë

Kryeministri Edi Rama dhe kreu i Kuvendit, Ilir Meta, do të vendosin sot nëse do të rinovojnë edhe për një mandat të ri katërvjeçar koalicionin e tyre brenda të majtës.

Takimi mes dy bashkëkryetarëve të koalicionit qeverisës është përcaktuar të zhvillohet sot, në orën 10:00, në Hotel Tirana, ku Kryeministri Rama do të jetë i shoqëruar nga kreu i Grupit Parlamentar të PS-së, Gramoz Ruçi, ndërkohë që kryeparlamentari Meta në takim do të shoqërohet nga zv.kryetari i LSI-së, Petrit Vasili.

Burimet brenda maxhorancës theksojnë se diskutimet do të përfshijnë edhe zgjidhjen e ngërçit politik, miratimin e komisioneve të vetingut dhe zgjedhjen e kreut të ri të shtetit.

Takimi mes Ramës e Metës vjen dy ditë pasi kreu i PS-së i kujtoi partnerit kryesor të tij në koalicion se e majta ka humbur vetëm kur ka qenë e përçarë.

Optimist për vazhdimin e këtij bashkëpunimi politik ka qenë edhe kreu i LSI-së Meta, kur deklaroi se me Partinë Socialiste arritën të fitojnë edhe kur KQZ-ja ishte në duart e Berishës.

Por gjetja e një marrëveshjeje per të futur opozitën në zgjedhje, pritet të jetë një pikë e pazgjidhur mes palëve edhe sot kur kanë mbetur 4 ditë afat nga regjistrimi i koalicioneve në KQZ.

AFATET Takimin mes Ramës e Metës e bëjnë të detyrueshëm edhe disa afate ligjore që skadojnë javën e ardhshme.

PS-LSI janë regjistruar të dyja si subjekte politike në zgjedhjet e 18 qershorit, ndërkohë që e mërkura e javës së ardhshme përkon edhe me datën e fundit të regjistrimit të koalicioneve në zgjedhje.

E mërkura e 19 prillit përkon edhe me një tjetër çështje që do të diskutohet në takimin e sotëm mes Ramës e Metës, zgjedhjen e Presidentit.

Pas kërkesës së kreut të Grupit Parlamentar Socialist, Gramoz Ruçi, kreu i Kuvendit, Meta, ka përcaktuar 19 prillin si datën në të cilën Parlamenti do të zhvillojë raundin e parë për zgjedhjen e Presidentit. Kryeministri Rama ka deklaruar se emrin e ri të kreut të shtetit do ta përcaktojë pas bisedës me kreun e LSI-së, Meta, ndërkohë që ky i fundit ka deklaruar se do të kërkohet një emër konsensual, çfarë ka lënë të kuptohet se do të kërkojë edhe aprovimin e opozitës.

Plotësimi i kërkesave të opozitës pritet të jetë edhe një nga temat kryesore të diskutimit, pasi kreu i LSI-së, Meta, që pas darkës së 3 prillit te Pazari i Ri me Kryeministrin Rama, ka ofruar për zgjidhjen e ngërçit mandatet politike të LSI-së dhe ka kërkuar krijimin e një qeverie besimi. Kjo tezë përkrahet nga Rama, i cili ka deklaruar se është i gatshëm të dialogojë me opozitën, por jo t’i japë asaj pushtetin në tavolinë.

Meta mesazh për Ramën: Koalicioni PS-LSI fiton, por duhet Qeveri besimi

Kryetari i Parlamentit, Ilir Meta, konfirmoi dje vazhdimin e koalicionit me Partinë Socialiste, duke thënë se kjo aleancë fitoi në vitin 2013 kundër qeverisë “Berisha” dhe tashmë e ka më të lehtë fitoren.

“Duke qenë të bindur se koalicioni PS-LSI, që fitoi përpara 4 vitesh në kushte shumë të vështira bindshëm, dhe fitoi 84 mandate – sepse një e humbi në Lundër për 15 vota, por nuk ka problem – fitoi kundër qeverisë së Berishës, fitoi kur KQZ-së ju ndryshua përbërja në mënyrë antikushtetuese dhe kur ju la e gjithë KQZ-ja Partisë Demokratike dhe kryeministrit të asaj kohe z. Berisha, natyrisht në një klimë jo të lehtë në terren, sidomos në shumë zona të vendit. Kështu që unë besoj që sot një koalicion i tillë e ka akoma më të thjeshtë për të fituar dhe për t’u rikonfirmuar në zgjedhjet më të qeta, më demokratike, më normale që mund të ndodhin në vend. Mos harrojmë pastaj që një faktor tjetër, faktori PDIU që ishte në koalicion me Berishën tani është në një pozicion tjetër e kështu në vijim. Ndaj nuk duhet parë si çështje force, se kush është më i fortë dhe kush e tërheq litarin më fort në këtë situatë”, u shpreh ai.

Por Meta, gjatë mbledhjes së Këshillit Drejtues Kombëtar të LSI-së, tha se Edi Rama nuk është thjesht kryeministër i PS, por i të gjithë Shqipërisë.

Sipas tij, Rama duhet të garantojë besim në zgjedhje.

“Unë nuk them që Edi Rama të japë dorëheqjen nga kryeministër. Kur them qeveri besimi, nënkuptoj që nuk ekziston një besim real, i përgjithshëm në zgjedhjet e lira dhe të ndershme. Ne formalisht mund ta themi këtë gjë. Unë nuk jam kryetar i Parlamentit thjesht të shumicës. Kjo është gjëja më e lehtë. Po të ishte kështu, e kishim nxjerrë me kohë opozitën nga Parlamenti, e kishim nxjerrë në rrugë, nëpër çadra me kohë. Unë jam kryetari i Parlamentit të të gjithëve dhe do të përpiqem aq sa jam. Kuptohet që edhe i LSI-së jam, edhe i këtij koalicioni jam. Edi Rama nuk është kryeministër vetëm i PS-së, as vetëm i këtij koalicioni. Është kryeministër i Shqipërisë dhe ka detyrim kushtetues të garantojë dhe të ofrojë besim për zgjedhje të lira e të ndershme. Nuk duhet të ftojë vetëm formalisht për dialog, por duhet të jetë edhe i përmbajtur, në mënyrë që të mos i japë shkak palës tjetër për të vazhduar, për të përshkallëzuar dhe ajo një retorikë të papranueshme, duke folur dhe për arrestime e për gjëra të tjera. Ne si LSI nuk jemi me këtë e me atë. Ne jemi këtu për t’i dhënë fund politikës bardhezi në Shqipëri”, u shpreh dje Meta.

KONFLIKTI

Duke folur për marrëdhëniet e tij si ish-kryeministër në kohë që PD ishte në opozitë, Meta tha se asokohe pranoi të lërë mandatin e tij për shkak të konfliktit me Fatos Nanon.

“Nuk ka pasur ndonjë kryeministër në Shqipëri që të jetë sjellë, le të themi, ‘më keq’, më ashpër se unë me Sali Berishën, kur nën frymëzimin e tij janë sulmuar institucionet. Por më vjen keq t’ua kujtoj kur më tha dikush që ‘ti thua që jap mandatin e kryetarit të Kuvendit andej, se ti nuk je kryeministër’. Dhe është një analist shumë i njohur e kritik edhe ndaj meje, por edhe realist, edhe shpërthyes. Dhe i thashë, ‘po ti e mban mend përse e kam dhënë unë dorëheqjen nga kryeministër pas zgjedhjeve në 2001-shin?’.

‘Po ja, tha, kishit ato sherret me Nanon’. ‘Po, i thashë, por për çfarë i kishim sherret? Dhe ai sherri ishte ky, që në ato zgjedhje maxhoranca e asaj kohe mori 3-4 mandate më shumë se 60% që duheshin për Presidentin. Dhe Nano në të drejtën e tij donte që të bëhej President, patjetër. Por ne kishim një Rezolutë të Parlamentit Europian pas zgjedhjeve, e cila njohu legjitimitetin e zgjedhjeve të qeverisë dhe të maxhorancës qeverisëse. Por nuk e njohu legjitimitetin e shumicës për të zgjedhur Presidentin bazuar në votat që kishte marrë dhe nuk u shkel as ligji, as Kodi Zgjedhor. Thjesht u bë një manovër në raundin e dytë, në Dushk, prandaj ngeli fenomeni i Dushkut edhe sot e kësaj dite’”, tha dje Meta.