Parisi është Paradis
në çdo stinë
në dimër e verë
edhe kur qielli
heshtur loton
prej vrerit të grisë
edhe kur deliron
prej dehjes
në pranverë

Parisi është Paradis
nën diell apo hënë
kur Sena
qan e qesh
e fshehur
në errësirë
apo kur
shfryn
gjithë zjarr e epsh
në ag a mugëtirë

Parisi është Paradis
në çdo jetë
që ikë e vjen
prej dashurisë
një ah apo një oh
prej mrekullisë

një epigram i Apolinerit *
apo një dëshirë
çmendake
e gjithë poetëve
të njerëzisë
si e Sezar Vajehos **
që u vjen të vdesin
e të rilindin rishtas
e rishtas
në Paris

28.03.2016

* Guillaume Apollinaire, një nga poetët më të mëdhenj francezë të fillim shekullit XX, i famshëm edhe për epigramet e tij

** César Vallejo, poet peruvjan ka vdekur në Paris, ashtu si e ka shkruar në poezinë e tij, Guri i zi mbi një gur të bardhë, që nis me vargun “Do të vdes në Paris”.  Thomas Merton e ka quajtur César Vallejo-n “poeti më i madh universal pas Dantes”