Pasditen e së hënës, pak para se të mbyllej afati, Vetëvendosje dorëzoi ankesë 20 faqe ndaj votimit duke e akuzuar Lidhjen Demokratike të Kosovës se ka organizuar dhe manipuluar me votat me postë.

Përfaqësuesit e Vetëvendosjes thonë se është votuar në emër të personave të tjerë dhe kjo dallohet pasi ngjyra dhe stilolapsi i shfrytëzuar është i njëjtë, ashtu sikurse edhe data e dërgimit të zarfeve.

“Që nga faza e regjistrimit të votuesve ku shumë votues, qindra votues, janë regjistruar vetëm në një numër telefoni deri te plotësimi i fletëvotimeve, dërgimi i tyre ka qenë komplet manipulim, organizim kriminal, i njerëzve të lidhur me LDK-në dhe të angazhuar nga LDK”, tha për A2 CNN, Blerim Sallahu nga Lëvizja Vetëvendosje.

Po ashtu, edhe votat e disa kandidatëve për deputetë të LDK-së të cilët morën mijëra të tilla në votime me postë por më pak në qendrat e votimit në Kosovë dhe në ambasada, u përmenden si arsyetime për manipulim.

“Ne kemi kërkuar nga PZAP fillimisht të anulohen 18 mijë e 933 vota të LDK-së të kontaminuara të ardhura në formë të manipuluar; Kemi kërkuar rivotim të sërishëm të votimit me postë dhe; Kemi kërkuar që kaniddatët të cilët kanë marr vota pakrahasimisht më shumë në postë sesa në vendvotime në Kosovë të largohen nga lista”, shtoi Sallahu.

Përpos Lëvizjes Vetëvendosje, PZAP ka konfirmuar se ankesa ndaj rezultatit përfundimtar ka pranuar edhe nga Partia Demokratike e Kosovës.

PZAP, sipas ligjit, duhet të sjellë një vendim mbi ankesën 96 orë nga parashtrimi i saj. Nëse pala është e pakënaqur atëherë mund ta ankimojë në Gjykatën Supreme. sn