DITA E VERËS

I vogël kur isha, nëna më lante sytë  me lule,

Në direkë dyersh i vinim

Si të vetmet pekule

Pas dimrit,kur ende ngrinim.

Atëhere nuk e dija ç`ishte Ditë e Verës,

Aroma  mes fraqit futet në damar të ditës,

Me nanën time të largët si Zanë të Çermenikës…

THJESHTËSI TIRANIZUESE

Të pasurit nuk shesin mend,

Pangopësia e tyre s`është e furtuntë

Ajo  është e untë…

Mjerane ajo; zgafellë erëndotur,

Ndihet kudo e përdorur…

Në thjeshtësinë e tyre të palodhur…

Prej frakut europian e qëllimit human,

Pa na rrahur veshët me tam tam

E gjithnjë  duke na i kujtuar

Për të  menduar për ta

Mendja  në mulli bosh duhet bluar…

ARA E FJALËS

Ara e fjalës në letër

Dhe  plug i penës…

Zejet më të vjetra

Mes së vërtetës e gënjeshtrës.

Lërues të tjerë para nesh

 letrën shtrinë,

Fjalët mbinë e s`mbinë…

Letra pranon çdo fjalë.

Po kush mund të mbijë,

Kush mund të rritet

Dhe drithë kush mund të japë

Si mund ta gjesh vallë?…

SHELG

Shelg i ëmbël

Degët përpëlit

Në cirka valësh

Prej gojës së përroit

Që  kënd nuk habit.

Ishe ti i ëmbël

Apo takimi nën ty,

Sy i hënës vëngër

Kallaiste përbri

Statujën e pritjes

Që ardhja e shkrin…

Ç`ikte nëpër natë

Ç`vinte tek unë

Trokashkë e shelgut

E shkruante mbi ujë..

Shelg i ëmbël

S`kishte hidhësi,

Hidhësinë e tij

E ndjej tani…