Lodhun

mi tokë ngulë kâmë

nji plak prej motit zbardhë,

e, gjurmët e jetës tuj njehë, aj lshon nji gjâmë:

nji plak prej motit zbardhë,

mi tokë ngulë kâmë

lodhun.

N’at udhë

s’i ra me ndie

t’i thotë kush fjalë dhime

n’gojë kush s’e xen, s’përmendet emni i ti:

t’i thotë kush fjalë dhime

s’i ra me ndie

n’at udhë.

Verbue

aj i pa fè,

dishmoi se ç’zemër kishte:

mizuer me vedi e me tjerë mi dhè:

dishmoi se ç’zemër kishte:

aj i pa fè

verbue.

Vetun

përkulun shtatit,

nen peshë t’dhimve t’veta

kalon edhe e përcjellë përbindshi i mkatit:

nen peshë t’dhimve t’veta,

përkulun shtatit

vetun.

T’falem!

qe, vjen nji Fmi,

ma i kandshëm se prendvera;

Sa drandofillet shtrojnë rrugën e ti!

ma i kandshëm se prendvera

qe, vjen nji Fmi

t’falem.

Eja,

agimi ndritë

mi ata dy sy t’kthielltë;

sheklli i trazuem me t’knaqun asht tuj t’pritë:

mi ata dy sy t’kthielltë

agimi ndritë:

eja.

Uli,

Zot, mnit qi shtohen

udhën e marë gatoje

e idhujt e ksajë botë ti bân qi t’nxehen:

udhën e marë gatoje

Zot, mnit qi shtohen

uli.

Pagja

flamuri i bardhë

Zot, t’shtiellet m’tana komet

Mretnija e jote n’ket shkreti tuj ardhë,

Zot, t’shtiellet m’tana komet

flamuri i bardhë

pagja!

Kqyrni!

Krygja m’tokë ngulet

e des për t’gjithë i Drejti,

e, pagja ka’ uron, me rrajë, qe mkati zhgulet;

e des për t’gjithë i Drejti,

Krygja m’tokë ngulet

kqyrni!

Krishti,

ngallnimi jonë:

Dashtni e Fe bashkue!

Lum kush i ndjek: do t’gzojë aj me Tenzonë,

Dashtni e Fe bashkue,

ngallnimi i jonë:

Krishti!