Me ceremoni të lartë shtetërore, ministri i Mbrojtjes së Kosovës Armend Mehaj ka pritur në vizitë zyrtare ministrin e Mbrojtjes së Kroacisë, Mario Banozhiq, raporton Anadolu Agency (AA).

Takimi i dy ministrave në ambientet e Ministrisë së Mbrojtjes u pasua edhe me takimin e delegacionit kroat të ministrisë me përfaqësues nga Ministria e Mbrojtjes e Kosovës, ku pas takimit, u nënshkrua edhe Marrëveshja e Mirëkuptimit midis Kosovës dhe Kroacisë.

Ministri kosovar i Mbrojtjes, Armend Mehaj tha se dy popujt i bashkojnë sfidat e përbashkëta të ngjashme në të kaluarën, çka e ka forcuar dhe forcon miqësinë midis dy popujve edhe më shumë.

Miqësia e dy popujve, siç tha Mehaj, e ka pasur momentin kulmor në kontributin e kosovarëve në luftën në Kroaci, por, miqësia, për të mbetur e tillë, ai tha se nuk duhet t’i takojë vetëm historisë.

“Këtë miqësi e kurorëzojmë sot me nënshkrimin e marrëveshjes së bashkëpunimit midis dy ministrive tona, për mbrojtje dhe siguri. Me këtë hapen rrugët për bashkëpunim dhe hapen mundësitë më të ngushta sa i përket shkollimit, trajnimit të personelit ushtarak, zhvillimit të stërvitjeve të përbashkëta, mundësi për bashkëzbarkim në operacione dhe misione ndërkombëtare, bashkëpunim më të theksuar në fushën e mbrojtjes e gjithashtu edhe në fusha tjera”, tha Mehaj.

Ai theksoi se Kroacia gjithmonë ka treguar vullnet për ta ndihmuar Kosovën në çdo iniciativë, për çka tha se është mirënjohës dhe pret që bashkëpunimin ta vazhdojnë edhe në të ardhmen.

Ministri i Mbrojtjes së Kroacisë, Mario Banozhiq tha se takimi i sotëm me ministrin kosovar rikonfirmon marrëdhëniet e mira të dy vendeve.

Ai tha se bashkëpunimi i dy vendeve po vazhdon edhe brenda KFOR-it me praninë e oficerëve kroatë “në mënyrë që këtu të jetë jeta më e sigurt dhe stabile”.

“Kroacia si një shtet euro-atlantik mund t’i ofrojë ndihmë Kosovës në drejtimin e integrimit. Ne e përkrahim po ashtu anëtarësimin e Kosovës në institucione të ndryshme euroatlantike. Ne po ashtu e mbështesim transformimin e Forcës së Sigurisë së Kosovës në forcë të armatosur dhe kjo është pjesë e memorandumit të bashkëpunimit. Po ashtu ne ofrojmë bashkëpunim në fushën e shkollimeve dhe trajnimeve dhe do të vazhdojmë ta bëjmë atë”, tha Banozhiq.

Ai tha se dëshiron që bashkëpunimi në mes të Kroacisë dhe Kosovës të vazhdojë, e njëri nga faktorët e raporteve të mira sipas tij është edhe kujdesi kosovar për komunitetin kroat të cilët jetojnë në Janjevë.