Kreu i ri i grupit Parlamentar të LSI-së, Luan Rama ka mbajtur sot një konferencë për mediat nga selia e Kuvendit ku ka folur për shkarkimin e ministrit Manjani.

Ai tha se mes tij dhe Ramës ka patur një konflikt dhe se mazhoranca gjendej përballë dy rrugëve. Sipas tij njëra të çonte në shkarkimin e kryeministrit dhe tjetra të ministrit.

“Konflikti kishte agravuar deri në atë pikë sa kishim vetëm dy rrugë. O largohej kryeministri, ose largohej ministri.

Por tani e rëndësishme është që të vijojë qeverisja”, ka thënë Luan Rama.

PYETJE-PERGJIGJE

Si ju duket marrja e një posti të tillë dhe çfarë komenti për shkarkimin e z. Manjani?

Nuk kam asnjë koment për të bërë, vetëm më lejoni të shpjegoj që është e vërtetë që në raportet e bashkëpunimit dhe të komunikimit midis Kryeministrit dhe Ministrit të Drejtësisë ka ekzistuar një situatë problematike, e cila për fat të keq është agravuar ditë pas dite derisa mbërritëm një zgjidhje që kishte vetëm dy rrugëkalime.

Njëri ishte të shkarkonim Kryeministrin ose të shkarkohej ministri. Pranuam zgjedhjen dhe zgjidhjen e Kryeministrit për të dëshmuar edhe një herë tjetër që Lëvizja Socialiste për Integrim është e vendosur të bashkëpunojë me shumë seriozitet dhe në partneritet të plotë për të krijuar klimë bashkëpunimi, bashkëqeverisje dhe mirëkuptimi për ecurinë e mëtejshme të reformave të integrimit evropian të vendit.

A do të ketë largime të tjera z. Rama?

LSI-ja do të vazhdojë të kontribuojë me shumë seriozitet dhe me shumë përkushtim për të normalizuar edhe raporte të kësaj natyre dhe për të bërë funksionale gjithnjë e më mirë në të mirë të qytetarëve qeverisjen e vendit. Vendi ka nevojë për qeverisje rezultative, për qeverisje demokratike dhe për qeverisje që sjell produkt.

Vendin e z. Manjani e ka zënë në z. Vasili, i cili ka qenë po aq kritik ndaj policisë…

Nuk ka lidhje fare kritika, sepse kritika është një forcë zhvillimi. E rëndësishme është që qeverisja të shkojë më tej dhe të gjejmë atë çfarë është e përbashkët në funksion të mirëqeverisjes.