Librin tim të parë

Me dy kapëse teli si fletore shkolle

Dhe,vjershat e një tetëmbëdhjetëvjeçari

N’ato pak faqet e tij,

Munda ta shoh e ta prek

Veçse disa muaj

Pasi doli nga shtypi …

Për fat,

Kur u kujtuan se duhej ndaluar

Ishin shitur gjithë kopjet,

Siç shiteshin rëndom

Librat në komunizëm…

S’iu gëzova dot librit tim të parë

Qoftë dhe një ditë të vetme…

Librit tim që, i parë mbeti

Plot dy dekada,

Gjersa mbërriti Viti Nëntëdhjetë…

Asnjë herë s’e mohova librin tim të parë,

Siç deklaruan n’intervista televizive,

Apo në kafene,pranë gotës së rakisë

Poetët komunistë për librin e tyre të parë,

Me t’u shembur diktatura…

Asqë donin t’ua përmendje më debutin letrar,

Gjithë shkrepje duartrokitjesh dhe bubullima brohoritjesh

Për sukseset e Partisë

Në ndërtimin e Shqipërisë,

Formatimin e Njeriut të Ri

Dhe, luftën ndaj socialimperializmit…

Të mjerët !

Ç’pandehin,se sot bëjnë namin,

Ata që në rini s’ishin të sinqertë

E madje s’e kishin për gjë

Të rekrutoheshin spiunë ?

S’e mohova librin tim të parë,

Ndonëse prej tij më hoqën të drejtën e botimit

Dhe,jeta më mori për dreq.

Gjer dhe në gjyq dola prej tij

Dhe për pak

Sa s’më mbyllën në burg …

Libri im i parë,

Piketa ime e parë e njëmendtë në letërsi,

Me gjashtëdhjetë faqe,

Kapur me grepça teli si fletore shkolle :

Tekefundit

Eshtë ai që është…

Libri im i parë prej dy mijë kopjesh ;

Sot,në shtypsh njëqind

Ke shtypur shumë…

Dy kopje sot kam prej tij,

Njera relikte e vërtetë,

Ashtu e dhunuar anëve,faqe më faqe

Me shkrimin e imët mezitëlexueshëm

Si prej gjysmanalfabeti

Të drejtorit të Shtëpisë Botuese,

Që mbante emrin

E Shenjtit Naim Frashri.

Eh,redaktor i librit tim ,

A e dije ç’nder po më bëje

Kur rrëmbeve këtë kopje – dokument

Nga zyra hermetike

E drejtorit tënd ?

Me gjuhën e një eksperti hetuesie

Më kritikonte ai drejtor vjershë pas vjershe

Për mbizotërim të frymës dekadente

Dhe tema të qëmtuara ,sipas tij,

Në këndvështrimin e një snobi…

Ku është rritur ky autor,pyeste në mbyllje,

Në Shqipëri,apo në Perëndim ?

Si u tregove sylesh dhe,lejove

Të kalonte ky libër,i turrej pastaj,

Drejtori redaktorit përgjegjës;

S’të ra në sy ty dhe recensentëve

Q’i mbajmë me honorare

Se,në libër s’gjendej gjëkundi

Fjala Parti

Emri Enver ?

Megjithatë,drejtor,aparatçik i trembur

Libri im në fillim u prit me entuziazëm,

Ndryshe krejt nga ç’shkarravite ti

Në margjinat e faqeve;

Ndryshe krejt dhe nga sulmet ideologjike

Të kritikëve

Që prisnin të nisnin stazhin e kandidatit të Partisë…

Ende sot e shfletoj me ëndje

Librin tim

Që vajta dhe e titullova Përshëndetje !

Ishte i parakohshëm për ju, që u turrët ta mbysni

Ju, fatalisht të paqytetërueshmit folklorizantë,

Që banonit në fshat,në qyteza të humbura,

Apo,fare mirë,edhe mes Tiranës ;

Ishte i paarritshëm libri im për ju

Qoftë n’ide dhe konceptim.

Ju,të gërryerit nga smira

Që kohën kurrë s’e kapët…

Për një tetëmbëdhjetëvjeçar,

Sa shumë telashe ,sa shumë

Libri im i parë !

Kur dole ti

Isha n’ishullin e Sazanit

Po e thashë,të shtiva në dorë

Muaj më pas…

Eprorët e mi s’e motivonin dot

Dhënien e lejes për të tërhequr një libër,

Për më tepër,një marinari që kish refuzuar

Të ndiqte akademinë ushtarake …

Libri i parë me kapëse teli,

Dhe,fletë të zverdhura

Si të pergamenëve,

Vjershat më t’arrira ,

Sidomos të kritikuarat

Që ngërthehen në gjashtëdhjetë faqet e tua

Ende i ribotoj,paçka që ndodh

Të pëlqehen më shumë se të rejat…

 2018