LIBRARIA NE BULEVARD

( Dy poezi nga libri Moda e Varfërisë )

Te kjo librari e vogël ndanë bulevardit,

Libra ka gjithfarësh,

Gjer dhe kryeveprat e nobelistëve të lauruar së fundmi…

Rreth shitësit që rri në karrige,pranë derës,

Tek bën fresk me gazetë ditëve të nxehta,

Çdo herë gjen dy – tre të papunë,

Që e mbajnë me muhabet…

Sakaq vijnë klientë që blejnë llotaritë e radhës ,

secilën nga një dyzinë,

Ndonëse e dinë mirëfilli se janë të manipulura

Dhe, fituesi është paracaktuar ;

Pastaj ndalin të tjerë që blejnë cigare

Tek e ndezin një me nervozizëm që në derë

Të librarisë së vogël, ndanë bulevardit

Më të madh të Shqipërisë.

Librat radhitur pas xhamave të ndotur

Zverdhen e gufohen sipas tekave të motit,

Sepse përherë më rrallë ndodh t’i blejnë.

Zotërinj,

Pa llotaritë,pa fotokopjuesen e dokumenteve

dhe,pa cigaret…

Librarinë prej kohësh do ta kisha mbyllur ;

Ato,ato më mbajnë gjallë,

Shpjegon shitësi me indinjatë.

Askush s’e fajëson shitësin në bulevard,

Kohës fajin ia hedhin të gjithë,

Por shih ! M’u ndërmend Çehovi,

Tek rrëfen fatin e një librarie në provincë :

Shitësin e përkorë,ata që i hynin brenda ,

Ndonëse librat në rafte i shihnin,

E pyesnin :

A shisni litar,

Sallo derri,

Vajguri,

A shisni… ?

Sipas porosisë së rreptë të gruas së tij,

Me mallrat e konsumit të gjerë,

Librat çdo ditë i zëvendësoi ai

Dhe,bëri prokopi…

Ah,librari e vogël në trotuar

Aty te bulevardi i madh…

                                                       2015

PIRAMIDA

Sa lehtësisht iu futën ta tjetërsojnë

Piramidën – muze të Enver Hoxhës !

Kish nisur të rrënohej ajo,

Ashtu, mbetur pa dyer e pa dritare,

Pa mermerin Pentelikon,që i ndriste

pjerrësitë e mureve …

Pllakat rrëzëllitëse të tij i rropën me nguti

Politikanët tanë rrugaçë dhe hajdutë,të zbritur

nga thellësitë rurale

Dhe,

Mveshën me to vilat luksoze në bregdet ;

Me ç’u teproi,ujdisën në Sharrë

Varret e t’afërmëve…

Përreth Piramidës zotëruese

Po ngrihen objekte të tjerë,

Anekse plotësues të saj,

Sepse,mos harroni,

Aty

Qendra e Teknologjisë dhe Inovacionit

Do të hapet,

Me gjasë m’e madhja në Rajon…

Qytetarët e s’ardhmes,

Makineritë mendore do të shohin ,

Racën e robotëve

Me vullnet dhe status të njëjtë me të njerëzve ;

Inteligjenca e tyre artificiale

Do t’i argëtojë dhe njëherësh

Do t’i trembë vizitorët,

A thua se vërtet alienët

Janë ulur në Tokë…

Sa lehtësisht iu futën ta shkatërrojnë dhe

ta ringrejnë të tjetërsuar

Piramidën e Enverit !

Shumëkush kur kalon në bulevard,

Mund t’u hedhë një sy punimeve që s’ndalin…

Eh,iku diktatori ,mund t’arsyetojë,

Çdo gjurmë e tij më në fund u fshi :

Gjëkundi s’janë më librat e tij,

Ata në shkollë më nuk studiohen,

Rresht për rresht e fjalë për fjalë.

Në bibliotekë më askush s’t’i ofron ;

Mermeri i monumenteve të tij u copëtua,

Siç u copëtua dhe bronzi i tyre

q’u shit për skrap…

Madje dhe shtëpia e tij në Bllok,

N’atë lagjen e ndaluar

Pak metra tutje Piramidës,

Ku ai jetoi dhe vdiq,

S’u bë asnjë herë muze ;

Nipat e pronarëve të saj të ligjshëm,

Me ta shtënë në dorë,

E kthyen në kafene…

Bukur kështu,

Qartë dhe shtruar,

Por pas kaq vitesh në liri,

Nostalgjia për diktaturën ka nisur të vlojë,

Ajo nostalgjia fatale,që s’të lë kurrsesi

Të marrësh një mësim të vyer nga historia,

Tek zhdramatizon e romantizon çdo krim e masakër…

Ca më shumë se vetë të moshuarit,

Brezat e rinj,

Ata që nuk jetuan vitet e diktaturës,

I duan filmat e saj,

Këngët e saja,teatrin e saj,

Poezinë e  saj …

Ç’janë këta shkrimtarët e sotëm,shfryjnë,

Këta kineastë, ç’janë,

Pale këta aktorë dosido dhe

këta këngëtarë…

Ç’patët me diktaturën

Ju ,etërit tanë ;

Përse e përmbysët vallë ?

Sa lehtësisht në bulevard

Piramida e Enverit

Po tjetërsohet konceptualisht ;

Robotë me vullnet të hekurt

Dhe,personalitet si të njerëzve,

Atje do t’ekspozohen…

                                                          2021