Me 80 vota për dhe 11 kundër Kuvendi i Kosovës ratifikoi marrëveshjen për shënimin e kufirit me Malin e Zi. Marrëveshja u votua nga partitë në pushtet dhe Lidhja Demokratike e Kosovës në opozitë ndërsa kundër saj votuan Grupi i Pavarur i Deputetëve, grup ky i dalë nga Lëvizja Vetëvendosje.

Ratifikimi i marrëveshjes pasoi ndërprerjen e seancës për katër herë me radhë pasi deputetët e lëvizjes Vetëvendosje hodhën gaz lotsjellës për të penguar ratifikimin e saj.

Policia e Kosovës ka bërë të ditur se tashmë ka ndaluar pesë deputetë të lëvizjes Vetëvendosje të dyshuar për hedhjen e gazit lotsjellës.

Seanca për votimin e marrëveshjes pasoi debatin prej rreth nëntë orësh të një dite më parë, në përpjekje për t’i dhënë fund një periudhe më shumë se dy vjeçare të përplasjeve e mospajtimeve të thella ndërmjet subjekteve politike të ndara rreth rrjedhojave të kësaj marrëveshjeje.

Marrëveshja për kufirin me Malin e Zi, kishte ndarë skenën politike në vend për gati tre vjet.

Presidenti i Kosovës, Hashim Thaçi, në një postim në rrjetin social Facebook tha se parlamenti i dha fund paqartësisë së panevojshme politike rreth vijës kufitare me Malin e Zi.

Ambasadori amerikan në Prishtinë Greg Delawie përshëndeti ratifikimin e marrëveshjes për shënimin e kufirit me Malin e Zi.

“Ky është lajm me të vërtetë i mrekullueshëm, parlamenti i Kosovës bëri gjënë e duhur dhe në emër të vendit tim dua të falenderoj të gjithë ata deputetë që në mënyrë demokratike kanë votuar për marrëveshjen për shënimin e kufirit me Malin e Zi”, tha ai.

E nënshkruar në fund të gushtit të vitit 2015, marrëveshja tashmë është ratifikuar nga parlamenti i Malit të Zi.

Ratifikimi i kësaj marrëveshjeje pritet t’i hapërrugën liberalizimit të vizave për qytetarët e Kosovës ndërsa ishte edhe një nga kushtet që Kosova duhet të përmbushte drejt rrugës së saj drejt integrimeve evropiane. za