Kryeministri Edi Rama do të thyejë të nesërmen heshtjen lidhur me akuzat e ngritura ndaj Ministrit të Brendshëm Fatmir Xhafaj dhe audio-përgjimit të publikuar nga PD ku thuhet se është vëllai i tij Agron Xhafaj dhe një trafikant droge.

Këtë gjë e ka paralajmëruar vetë shefi i qeverisë përmes një statusi në Facebook, ku thekson se do të flasë nesër përpara Grupit Parlamentar të PS-së për situatën e krijuar.

“Jemi të gjithë njësoj?JO, s’kemi qenë asnjëherë të gjithë njësoj e s’do jemi kurrë njësoj!Nesër në 11.00 përpara Grupit Parlamentar, qëndrimi im për situatën e krijuar me Ministrin e Brendshëm dhe ecurinë e përpjekjes diplomatike drejt objektivit historik të çeljes së negociatave.” thekson Rama

Kujtojmë se opozita ka kërkuar dorëheqjen e Xhafajt deri të enjten, duke pretenduar se Ministri ka marrë në mbrojtje vëllain e tij për shkak të pushtetit politik që ka.

Ndërkohë që po këtë të martë, dy deputetët e PS-së Taulant Balla dhe Erjon Braçe shkuan në zyrën e Ministrit të Brendshëm, por pa dhënë detaje se çfarë u bisedua.

Më herët, qeveria ka kërkuar nga Prokuroria të nisë verifikimet për audio-përgjimin, ndërsa ka shtuar se ndaj Ministrit ka përgjegjësi morale nëse akuzat vërtetohen.