*Mbërrin eskorta e ministrit Kotzias, shoqëruesit grekë filmojnë protestën

*Idrizi: Fyese të thuash se çështja çame nuk ekziston, Kotzias të thotë nëse jemi apo jo vend mik

*Kreu i shoqatës “Çamëria”: Do vijojmë protestat derisa zëri ynë të dëgjohet

TIRANE– Ministri i Jashtëm grek Nikos Kotzias ka nisur sot në Tiranë një vizitë dyditore, ku pritet të takohet me përfaqësues të lartë të politikës shqiptare. Por ai është pritur me protesta nga shoqata “Çamëria”, anëtarë të së cilës janë mbledhur para Ministrisë së Jashtme.

Para kësaj godine vihet re një prani e shtuar e forcave të policisë për të siguruar mbarëvajtjen e protestës.

Protestuesit kanë bllokuar dy trotuaret e rrugës dhe trotuaret në krah të MPJ dhe në krah të lumit Lana.

“Çamëri nëna jonë na prit”, “Hiqni ligjin e luftës”, janë disa nga pankartat që mbajnë në duar protestuesit.

Një ditë më parë, ka patur edhe një reagim të shoqatës “Çamëria”.

“Ministria e Jashtme Greke vijoi me qëndrimin absurd se çështja çame nuk ekziston. Nesër, në orën 8:30 të mblidhemi përpara Ministrisë së Jashtme të Shqipërisë me moton “Unë jam shqiptar i Çamërisë, unë ekzistoj”, gjatë takimit mes ministrave të Jashtëm te dy vendeve!”, deklaron shoqata.
MBËRRIN ESKORTA E MINISTRIT KOTZIAS, SHOQËRUESIT FILMOJNË PROTESTËN
Ka qenë ora 10:14 minuta kur eskorta e ministrit të Punëve të Jashtme greke, Kotzias, është futur në ambientet e Ministrisë së Punëve të Jashtme shqiptare. Ka qenë homologu i tij, Bushati ai që ka pritur ministrin Kotzias. Sakaq, shoqëruesit e ministrit grek kanë ndalur në ambientet e ministrisë ndërsa kanë filmuar dhe bërë fotot. Ndërkohë, jashtë institucionit mori fjalën kreu i PDIU-së, ndërsa protestuesit brohorisnin njerëzi ‘Drejtësi, drejtësi”.PRECIPITON SITUATA, PROTESTUESIT KËRKOJNË TË BLLOKOHET RRUGA
Ka pasur një percipitim të situatës, teksa ka nisur të flasë zoti Abaz Hado, në kohën kur ka nisur të lexojë deklaratën. Sipas gazetares së ‘News24’ Marsela Karapanço, ka pretendime se një punonjës i policisë ka shtyrë deputeten Mesila Doda, duke rritur kështu tensionin në protestë. Sakaq, në protestë ka prezencë të madhe të forcave policore.

MINISTRI BUSHATI SHKON TEK PROTESTUESIT TAKON IDRIZIN
Ministri i Jashtëm, Ditmir Bushati ka dalë në ambientet e Jashtme të ministrisë, ndërsa ka takuar kreun e PDIU-së, Shpëtim Idrizi. Ministri ka dalë për të qetësuar disi turmën, e më pas është larguar brenda institucionit të tij.

IDRIZI: FYESE TE THUASH SE ÇESHTJA ÇAME NUK EKZISTON, KOTZIAS TË THOTË NESE JEMI APO JO VEND MIK
Kreu i PDIU, Shpëtim Idrizi, i është bashkuar mëngjesin e sotëm protestës së shoqatës “Çamëria” para godinës së Ministrisë së Jashtme, në pritje të vizitës së ministrit të Jashtëm grek. Idrizi tha për “News24” se është fyese të thuhet se çështja çame nuk ekziston.

“Derisa të gjejmë gjuhën e bashkëpunimit. Unë sot jam këtu si anëtar i shoqatës “Çamëria”. Greqia të na tregojë se çfarë çështjes ekzistojnë për çështjen shqiptare dhe të shohim çfarë duhet bërë. Besoj se kjo kohë ka marrë fund, shteti shqiptar është një vend sovran dhe anëtar i NATO-s. Jo çdo gjë që thotë Athina është e ligjshme. Shihni se çfarë ka bërë shtypi grek dje për qëndrimin e ministrit të Jashtëm. Nuk pashë një reagim që të thonte dikush, kjo është axhenda e Athinës. Ne kemi axhendën tonë, shoqata Çamëria ka axhendë e saj, shteti shqiptar po ashtu. Kotzias duhet të ndajë një gjë, Shqipëria është një vend mik, apo është një vend armik. Çështja e shqiptarëve të Çamërisë është çështja e të gjithë shqiptarëve”, tha Idrizi.

Nga ana tjetër kreu i PDIU-së, theksoi se është e papranueshme që për të ushtarët e grek të rënë në krye të detyrës, kur ata erdhën si pushtues në Shqipëri po ndërtohen varrë dhe për shqiptarët e Çamërisë jo. “Do zgjidhja me kënaqësi të isha pranë gjyshërve të mi këtu pas meje. Marrëdhëniet mes Greqisë dhe Shqipërisë nuk janë vetëm çështja çame, por dhe çështje të tjera. Edhe për çështjet. Është e papranueshme se si për të rënët grekë, që erdhën si pushtues, po bëhen varreza, ndërsa për shqiptarët e Çamërisë nuk ka varre.”, pohoi Idrizi. Ndër të tjera ai theksoi se nuk ka një ftesë zyrtare nga ministri i Jashtëm Bushati për takimin e nesër tek godina Iliria, ndërsa tha se nuk i duhet një i tillë pasi është takim akademik. “Për nesër nuk e bën axhendën zoti Kotzias e as Bushati. Por është një takim akademik. T’ja lëmë ditës së nesërme”, pohoi Idrizi.

KREU I SHOQATËS ÇAMËRIA: DO VIJOJMË PROTESTAT, DUAM QE ZËRI YNË TË DËGJOHET
Duke folur për “News 24” kreu i shoqatës “Çamëria”, Abaz Hado tha se ata do të vijojnë protestat derisa zëri i tyre të dëgjohet.
“Do vijojmë protestat, pasi ndaj çamëve është kryer gjenocid. Duhet që zëri ynë të dëgjohet, kërkojmë të drejtat tona. Të drejtat tona janë në bazë të konventës evropiane. Të drejtat tona janë të drejta universale, duam barazi. Ministri Bushati duhet të tregojë barazi në trajtimin e problemeve. Për Shqipërinë nuk ka konventë të realizuar”, tha Hado.

AXHENDA E TAKIMEVE
Ditën e sotme, ministri grek Kotzias do takojë në Tiranë ministrin e Jashtëm të Shqipërisë, Ditmir Bushati, pas së cilës të dy ministrat do të bëjnë deklarata të përbashkëta për shtyp.

Më pas zyrtari i lartë grek do pritet nga Presidenti i vendit Bujar Nishani, si dhe do të takohet më pas me Kryepeshkopin e Tiranës, Durrësit dhe gjithë Shqipërisë, Anastas Janullatos.

Të martën, më 7 qershor, Kotzias do të jetë folësi kryesor në një eveniment të organizuar nga Universiteti i Tiranës për rëndësinë e marrëdhënieve shqiptaro-greke për të ardhmen evropiane të rajonit.

Ministri i Jashtëm do të takohet këtë ditë edhe me liderin e opozitës, Lulzim Basha, si dhe me përfaqësues të minoritetit grek në Shqipëri. Ditë më parë mediat paralajmëruan se çështje të nxehta si marrëveshja për detin, ligji i luftës, apo çështja e pazgjedhur e pronave do të jenë në fokusin e kësaj vizite.

“Kathimerini” shkroi se Kotzias do të mbërrijë në Tiranë me një paketë propozimesh për zgjidhjen e çështjeve të mbetura pezull mes dy vendeve si ndarja e Zonës Ekonomike Ekskluzive mes dy vendeve, problemet e pronësisë, si dhe nxjerrja e eshtrave të rreth 11.000 ushtarëve grekë të cilët u vranë gjatë luftës italo-greke në vitet 1940-1941 në territorin shqiptar. Sipas gazetës, pjesë e propozimeve do të jetë edhe kërkesa për mbrojtjen e të drejtave të minoritetit grek në Shqipëri.