Suksesi i Gianni De Biasit me Kombëtaren Shqiptare vazhdon të bëjë bujë përtej Adriatikut. Nëpërmjet kualifikimit të kuqezinjve në finalet e Euro 2016, drejtuesi i stolit siguroi një vend mes teknikëve italianë më të suksesshëm nëpër botë.

Gazeta “Corriere della Sera” i ka kushtuar një artikull special trajnerëve me titullin “Nga Giani deri te De Biasi, teknikët italianë që po fitojnë jashtë vendit”. Në vlerësimin për strategun kuqezi, kualifikimi i tij me Shqipërinë përshkruhej “i pabesueshëm”. Aty citohej edhe 60-­vjeçari që e cilësonte “arritjen më të madhe në karrierë”, madje më lart se ngjitja me Modenan nga Seria C në elitën e futbollit italian.

Klasifikimi special përfshin suksese nga futbolli, te volejbolli e basketbolli, për të vazhduar me sporte si çiklizmi apo hokeji. Por, interesant është fakti se emri i De Biasit renditet përkrah disa prej personazheve më të rëndësishëm të futbollit italian, nisur nga Giovanni Trapattoni. 76­-vjeçari është ndoshta trajneri italian më i suksesshëm i të gjitha kohërave. Tituj kampionë në Gjermani, Portugali dhe Austri por edhe trajner i përfaqësueses italiane dhe i Irlandës, shkruan “Super Sport”.

Në renditje ndodhet edhe Fabio Capello. 69-­vjeçari është një ekspert i klubeve, duke triumfuar me Milanin, Juventusin, Romën dhe Real Madrid. I pafat në punën me ekipet përfaqësuese, fillimisht me Anglinë dhe më pas me Rusinë, ku gjithmonë është kualifikuar në Kupën e Botës, por pa i ndihmuar skuadrat të shkëlqejnë. De Biasi ndodhej edhe përkrah një emri si Marcello Lippi. Kampion i Serisë A me Juventusin dhe kampion bote me Italinë. Në karrierën jashtë vendit ka punuar në Kinë: dy vjet me Guangzhou, duke koleksionuar tre tituj dhe një Champions aziatike. Nuk mund t’i mungonte listës edhe Sergio Scariolo. Trajneri italian më i suksesshëm në basketboll, që prej vitit 1990 në stolin e Spanjës ka fituar tre tituj Europianë dhe një medalje argjendi në Lojërat Olimpike. De Biasi, më herët ka folur edhe për “Reuters”, ku tha se Shqipëria nuk i trembet asnjë përfaqësuese në Kampionatin Europian të Francës. “Ne jemi ajo lloj skuadra që mund t’u shkaktojë probleme çdo skuadre tjetër, sepse kemi zemër të madhe në lojë. Fuqia e jonë është grupi”, deklaroi trajneri shqiptaro­italian.