Lideri i AAK-së, Ramush Haradinaj, në një prononcim për KTV-në, ka thënë se i vjen keq për ngjarjet që ndodhën pas përfundimit të protestës.

“Na vjen keq që një numër i të rinjve u nxitën që të eskalojë protesta. Dua që të rinjtë t’i largojnë këto veprime të dhunshme dhe të shpërndahen pasi protesta ka përfunduar disa orë më parë”, ka thënë Haradinaj.

“Përgjegjësia e jonë është që të kundërshtojmë këta liderë dhe t’i themi jo “Zajednicës” dhe demarkacionit. Nuk duam që qytetarët të rrezikojnë sigurinë e dikujt as të qytetarëve as të policisë”, ka shtuar më tej ai.

“Durimi i popullit po humbet dhe nuk kanë kohë që Mustafa e Thaçi të manovrojnë. Ky është alarm i fundit për Qeverinë. Nuk kam vazhduar të marr pjesë pas mbylljes së protestës, por shprehim keqardhje për eskalimin e protestës”, u shpreh Haradinaj.

Ndërkaq, ai tha se nesër, përmes një konference për media, subjektet opozitare do t’i falënderojnë “edhe policinë e Kosovës dhe qytetarët”.