Në Tiranë, studiues dhe studentë të letërsisë nderuan figurën dhe veprën e Martin Camajt me rastin e 25 vjetorit të ndarjes nga kjo botë.

Shtëpia botuese Onufri botoi veprën e plotë të shkrimtarit dhe gjuhëtarit Camaj, i cili la pas një vepër të gjerë e cilësore, por për paradoks, ai ende njihet pak në Shqipëri.

Shtëpia botuese Onufri dhe Universiteti i Mynihut Ludvig Maksimilian organizuan në Tiranë një takim letrar kushtuar shkrimtarit dhe studiuesit të njohur shqiptar Martin Camaj.

Në këtë mbrëmje letrare morën pjesë botues dhe studiues nga Shqipëria, Kosova, Italia, Gjermania.

Vepra e plotë e tij u botua me rastin e 25 vjetorit të vdekjes, ndërsa kolegë e studiues të shumtë nga disa shtete vlerësuan krijimtarinë e tij shkencore në gjuhësi dhe atë letrare në poezi e prozë.

Si drejtues i katedrës së albanologjisë në Universitetin Maximilian të Mynihut, profesor Martin Camaj la pas një vepër të gjerë shkencore mjaft të vlefshme për gjuhësinë shqiptare.

Ai shkroi po ashtu vëllime me poezi dhe proza, të cilat tani po i kthehen lexuesit shqiptar falë redaktimeve profesionale të disa kolegëve, ish-studentëve dhe miqve të tij.

Studjuesi dhe përkthyesi Hans-Joachim Lanksch në këtë takim tha midis të tjerave se “Martin Camaj ishte i mirë si buka. Ai ishte një mrekulli, por vepra e Martin Camajt nuk njihet mirë në Shqipëri, kjo gjë më trishton bile më shokon.”