Ka qenë fundnëntori i vitit 1979. Pikërisht, më datën 30 nëntor 1979. Nëse jam kaq i saktë, mos kujtoni se e kam kujtesën aq brisk, por është një datë që nuk kam se si ta harroj.  Unë si maturant i 50-vjetorit të Normales së Elbasanit (pra në vitin 1959), kisha një ftesë nominale për 70-vjetorin e Normales. Normalja është hapur më 1 dhjetor 1909 dhe, për të festuar më 1 dhjetor 1979, u nisa nga Fieri  ku punoja dhe banoja qysh më 30 nëntor. Mbrrita  në Elbasan dhe adresa ku do akomodoheshin qe hoteli “Skampa”. Sa tregova ftesën, iu luta recepsionistit që t’më gjente një dhomë teke. E kërkoja dhomën teke, jo pa qëlllim. Një mikun tim nga Fieri, pikërisht në një dhomë dyshe, ai,”tjetri” ia kishte vjedhur portofolin dhe kishte çarë ferrën. Por “teket” ishin zënë dhe më gjeti si me atë thënien: kur s’kam pulën, ha  dhe sorrën. Sado që nuk më pëlqeu kjo dhoma dyshe, ashtu siç bëri prifti që kërceu nga belaja, pagova paratë dhe shkova tek dhoma.  Dola Elbasanit se më kish marrë malli dhe xhin- xhan nuk  pashë sikur dhe ndonjë nga bashkëshokët  e mi të dikurshëm.  Ca më keq e ndjeva veten se edhe asnjë nga  bashkëshokët e mi në Fier nuk pati  ndonjë ftesë të tillë. Prita ca aty në hollin e hotelit duke  menduar se do vijë ndonjë i ftuar nga rrethet e tjera, si nga Lushnja, Kavaja apo dhe nga  Shijaku që kish një numër të madh nxënësish nga bashkëshokët  e mi. Askush. I vetmi ngushëllim imi se aty, ngjitur me dhomën time, në një dhomë dyshe zunë vend, Myzafer Trebeshina dhe Gori Bërdalli. Myzaferi kish qenë maturant i vitit 1942 dhe Gori në vitet ’50-të. U ulëm ca kohë të  tre dhe aty, Myzaferi, më tregoi se kish qenë dhe komunist normalist dhe jo vetëm kaq, por zëvendës sekretar organizate. Mua nuk më rri goja rehat dhe e pyeta:- Ju zëvendës,po kush qe sekretari? U “përtyp” paksa, po, kur më pa, që ngulmoja, më tha:- Fadil Hoxha!