Një gjykatës federal në SHBA, urdhëroi administratën e Presidentit Donald Trump të ndalojë përkohësisht përpjekjet për të mbyllur “Zërin e Amerikës”, duke ndaluar qeverinë të shkarkojë 1,300 gazetarë dhe punonjës të tjerë të shërbimit amerikan të lajmeve, të cilët u pezulluan papritur nga puna, gjatë këtij muaji.

Gjykatësi i Distriktit të SHBA-së, J. Paul Oetken, deklaroi se administrata Trump nuk mund ta mbyllë Zërin e Amerikës dhe programet e saj të tjera, si radio, që ishin miratuar dhe financuar nga Kongresi. Tërheqja e fondeve për këto programe do të kërkonte miratimin e Kongresit, tha gjykatësi.

Oetken nuk kërkoi që “Zëri i Amerikës” të rinisë transmetimet, por urdhri i tij bëri të qartë se punonjësit nuk duhet të shkarkohen deri sa procedurat e mëtejshme gjyqësore të mund të përcaktojnë nëse mbyllja ishte “arbitrare dhe e papërgjegjshme” dhe në shkelje të ligjit federal.

“Kjo është një fitore e vendimtare për lirinë e shtypit dhe amendamentin e Parë, dhe një dënim i ashpër ndaj një administrate që ka treguar mosrespekt për parimet që përcaktojnë demokracinë tonë,” tha Andrew Celli, një avokat i paditësve.

Agjencia Amerikane për Media Globale, e cila mbikëqyr Zërin e Amerikës, Radio Europa e Lirë dhe mediat e tjera të financuara nga qeveria, nuk kanë reaguar për këtë vendim, shkruan Reuters.

Agjencia i kishte thënë sindikatave se po planifikonte të largonte 623 punonjës të Zërit të Amerikës, një numër që “e pengon plotësisht” çdo përpjekje për të rinisur transmetimet në nivelin që ishte parashikuar nga Kongresi, sipas dokumenteve gjyqësore të depozituara nga paditësit.

Zëri i Amerikës u themelua për të luftuar propagandën naziste në kulmin e Luftës së Dytë Botërore dhe është rritur në një transmetues ndërkombëtar mediatik, duke operuar në më shumë se 40 gjuhë dhe duke përhapur narrativat e lajmeve të SHBA-së në vende që nuk kanë një shtyp të lirë.

Si grup, Agjencia Amerikane për Media Globale punësoi rreth 3,500 punonjës me një buxhet prej 886 milionë dollarësh në vitin 2024, sipas raportit të saj të fundit për Kongresin.

Gazetarët e Zërit të Amerikës dhe sindikatat e tyre paditën Agjencinë Amerikane për Media Globale, drejtorin e saj të përkohshëm Victor Morales dhe Këshilltarin Special Kari Lake javën e kaluar, duke thënë se mbyllja e shërbimit shkelte të drejtat kushtetuese të punonjësve për lirinë e fjalës, të garantuara nga amendamenti i Parë.

Padia e punonjësve të Zërit të Amerikës është një nga katër sfida të hapura ndaj përpjekjes së administratës Trump për të mbyllur programet e medias të financuara nga qeveria. Sfida të tjera janë ngritur nga Radio Europa e Lirë, një grup i ndarë i punonjësve të Zërit tëAmerikës dhe përfituesi i granteve Open Technology Fund.

Agjencia Amerikane për Media Globale ka argumentuar se nuk ka shkelur ligjet që rregullojnë funksionimin e Zërit të Amerikës. Agjencia tha në dokumentet gjyqësore se kishte zvogëluar operacionet në një “minimum ligjor” duke rinisur transmetimet në Kubë dhe duke rikthyer 33 punonjës në Zyrën e Transmetimit të Kubës./REUTERS Panorama