Apeli i Gjykatës së Posaçme Kundër Korrupsionit dhe Krimit të Organizuar (GJKKO), ka dhënë vendimin pasditen e kësaj të enjte (18 dhjetor 2025) për zv/kryeministren Belinda Balluku, e cila kishte ankimuar masat e sigurisë të caktuara ndaj saj nga shkalla e parë.

Apeli ka lënë në fuqi masën e ndalimit për të dalë jashtë vendit për Ballukun, ndërsa sa i takon masës ndaluese që lidhet me pezullimin nga funksionet zyrtare, Apeli ka vendosur ta pezullojë shqyrtimin e kësaj pike deri sa Gjykata Kushtetuese të shprehet në themel për këtë rast.

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Miliana Muça, sot më datë 18.12.2025, vendosi:

Miratimin e vendimit nr. 118, datë 19.11.2025 dhe vendimit nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, përsa i përket caktimit dhe vazhdimit të masës së sigurimit personal me karakter shtrëngues “Ndalimi i daljes jashtë shtetit”, të parashikuar nga neni 233 i K.Pr.Penale, në lidhje me ankimin e ankueses Belinda Balluku.

2. Pezullimin e shqyrtimit gjyqësor të çështjes nr.86 (61007-00414-87-2025), datë regjistrimi 11.12.2025, përsa i përket shqyrtimit të ankimit të ankueses Belinda Balluku. ndaj vendimeve nr. 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që ajo ka kundërshtuar caktimin dhe vazhdimin e masës së sigurimit personal me karakter ndalues “Pezullimi i ushtrimit të një detyre a shërbimi publik”, të parashikuar nga neni 242 i K.Pr.Penale, deri në zgjidhjen me vendim përfundimtar nga Gjykata Kushtetuese të çështjes së regjistruar për gjykim në atë gjykatë,- thuhet në vendimin e Apelit.

Ndërkohë sa i takon dy vartësve të Ballukut, Gentian Gjyli dhe Erald Elezi, Apeli ka vendosur të mos ndryshojë masat e sigurisë ndaj tyre, pra do vijojnë të mbeten në arrest shtëpie.

SPAK me prova të reja për Ballukun/ Detajet nga seanca me dyer të mbyllura në Apelin e GJKKO-së

Gjatë seancës së sotme, prokurorët se SPAK kanë kërkuar lënien në fuqi të vendimit të shkallës së parë përfshirë edhe pezullimin nga detyra të Belinda Ballukut me arsyetimin se Kushtetuesja ka pezulluar vetëm efektet jo masën në vetvete.

Po të njëjtat burime konfirmojnë se prokurorët Dritan Prençi dhe Dorina Bejko kanë paraqitur prova të reja, përfshirë ato dërguar Kuvendit që rëndojnë pozitat e numrit dy të qeverisë Rama.

Nga ana tjetër avokatët e Ballukut kanë kërkuar pushimit e gjykimit sa i takon masës së pezullimit me argumentin se për të është shprehur Gjykata Kushtetuese.

Dosja Balluku/ Akuza për kërcënime ndaj gjyqtarëve dhe prokurorëve

Kryedemokrati, Sali Berisha ka deklaruar se kryeminisitri Edi Rama ka kërcënuar prokurorët dhe gjyqtarët në lidhje me dosjen “Balluku”.

Referuar deklaratave të Ramës i cili sulmoi gjyqësorin duke e quajtur vendimin për Ballukun si “precedent të rrezikshëm” dhe “aventurë të gjyqësorit”, Berisha thotë se ky është sipas tij një akt mafioz.

Ai ka përmendur edhe një deklaratë të bërë nga Rama më herët e cila përkoi me seancën në GJKKO për vlerësimin e masës së sigurisë ndaj Belinda Ballukut, zv.kryeministre dhe ministre e Infrastrukturës.

Rama publikoi një citat të ish-prokurorit amerikan Robert H. Jackson, por Berisha e interpretoi këtë si një mesazh kërcënues për gjyqtarin dhe prokurorin që trajtojnë çështjen. Sipas tij, kryeministri ka përdorur një mënyrë simbolike për të ushtruar presion ndaj drejtësisë.

Sipas Berishës, kryeministri Edi Rama me citatin e publikuar ka kërcënuar haptas me vdekje gjyqtarin dhe prokurorin që ka dhënë vendimin për Belinda Ballukun.

“Kur prokurori kërkon njeriun përpara krimit, drejtësia vdes; dhe kur një pushtet hyn në territorin e një tjetri, Kushtetuta demokratike nuk merr më frymë, por mbytet.”

Citimi i këtij paragrafi, ndërkohë që Lubi Balluku me peshën e 90 milion eurove të vjedhura së bashku me Ramën, nisej për në sallën e gjyqit, ishte një kërcënim madhor me vdekje për ata që kanë vendosur pezullimin e bashkëvjedhëses së tij, zv/kryeministres. Ky është kërcënim me vdekje i zyrtarëve në detyrë nga njeriu që për pushtetin e tij është i gatshëm të kryejë çdo krim. Ky nuk është kërcënim për pezullimin e Ballukut, por drejtpërdrejt kërcënim me vdekje, sepse në aferën e Tunelit të Llogarasë dhe afera të tjera, Rama është Hajduti i Parë, Lubia vjen fill pas tij.”,- u shpreh kryedemokrati.

SPAK kërkon arrestimin e Ballukut/ Sot mblidhet Këshilli i Mandateve

Prokuroria Speciale SPAK, i kërkoi dy ditë më parë, Parlamentit heqjen e imunitetit të zëvendëskryeministres dhe Ministres së Infrastrukturës dhe Energjitikës, Belinda Balluku.

Paraditen e së martës në zyrën e kreut të Kuvendit mbërriti zyrtarisht kërkesa për leje për dhënie autorizimi për arrestimin e Ballukut.

Në një njoftim zyrtar, duke iu referuar bazëz ligjore prokuroria dha argumentet se: “… në kuadër të procedimit penal nr. 136 të vitit 2025, ka paraqitur kërkesë për dhënien e autorizimit nga Kuvendi i Republikës së Shqipërisë për arrestimin/ heqjen e lirisë së deputetit/ ministrit/ zëvendëskryeministrit: Belinda Balluku”.

Nga momenti i mbërritjes së kërkesës, mazhoranca nuk humbi kohë, duke njoftuar anëtarët e komisionit se mbledhja do të mbahet ditën e nesërme ( e premte 19 dhjetor 2025).

Kështu ditën e nesërme, në Këshillin e Rregullores dhe Mandateve në Kuvend, pritet të shqyrtohet kërkesa e SPAK për heqjen e mandatit të Ballukut, që do të sillte lejimin e arrestimit të saj.

Akuzat ndaj Belinda Ballukut

Më 31 tetor të këtij viti, Prokuroria Speciale SPAK i komunikoi zyrtarisht akuzën e “shkeljes së barazisë së pjesëmarrsve në tendera ose ankande publike”, zëvendëskryeministres dhe ministres së Infrastrukturës dhe Energjitkës, Belinda Balluku, për çështjen e tenderit të Tunelit të Llogarasë.

Vetëm 20 ditë më pas, më 20 nëntor me kërkesë të SPAK, Gjykata Kundër Korrupsionit dhe Krimit të Organizuar (GJKKO), vendosi masën “pezullim nga detyra dhe ndalim për daljen jashtë vendit”, ndaj Ballukut.

Masa shtrënguese, sipas SPAK, u mor pas hetimeve dhe dyshimit se përveç tenderit të Tunelit të Llogarasë, Balluku dhe tre vartës të saj, anëtarë të komisionit të vlerësimit të ofertave kanë paracaktuar fituesit edhe në Lotin 4 të Unazës së Madhe në Tiranë.

Vendimi i GJKKO-së u ankimua nga kryeministri Rama në Gjykatën Kushtetuese me arsyetimin se ky vendim binte ndesh me Kushtetutën për ndarjen e pushteve, pasi sipas tij të drejtën për pezullim, shkarkim apo emërim të një anëtari kabineti e ka kryeministri.

Gjykata Kushtetuese më 12 dhjetor mori vendimin për ta shqyrtuar çështjen në themel më 22 janar, ndërsa njëkohësisht rrëzoi vendimin e pezullimit nga detyra.

Tashmë në kërkesën për masën e arrestit SPAK ka referuar edhe shtatë raste të tjera të dyshimit për shkelje të barazisë në tendera të ministres Balluku, që lidhen me shtatë lotet e Unazës së Madhe./Boldnews.al

Prokuroria e Posaçme njoftoi të martën për goditjen e një grupi të dyshuar kriminal në krye të Agjencisë Kombëtare të Shoqërisë së Informacionit, AKSHI, duke vendosur 8 persona nën akuzë për një seri veprash penale, mes të cilëve edhe drejtoreshën e kësaj Agjencie, Mirlinda Karçanaj.

Sipas hetimit, Ergys Agasi, një personazh kontrovers dhe biznesmeni Ermal Beqiraj krijuan një grup të strukturuar kriminal për manipulimin e tenderave të AKSHI-it, duke përdorur dhunë dhe pengmarrje. Ndërsa Agasi dhe Beqiraj I shpëtuan arrestimit, janë nën masën arrest shtëpie si pjesë e këtij grupi kriminal dy krerët e kësaj agjencie, drejtoresha Mirlinda Karçanaj dhe zv.drejtoresha Hava Delibashi.

Ngjarja ka ngritur shqetësime për cënim të Sigurisë Kombëtare, pasi kjo agjenci është një prej institucioneve më sensitive në vend.

AKSHI menaxhon thuajse të gjithë sistemin e qeverisjes digjitale përmes E-Albania, përfshi dhe të ashtuquajtën ministrja “Diella” e krijuar me Inteligjencë Artificiale. AKSHI menaxhon sisteme dhe të dhëna që konsiderohen pjesë e infrastrukturës kritike kombëtare, çka e bën funksionimin e këtij institucioni një provë lakmusi për stabilitetin dhe besueshmërinë e administratës publike. Në këtë aspekt, ndikimi I punës së agjencisë nga një grup kriminal ka ngritur shqetësime mbi kufirin mes korrupsionit administrativ dhe cenimit të Sigurisë Kombëtare.

Sipas ekspertëve të sigurisë, kur një institucion që administron infrastrukturë digjitale kritike kapet nga interesa kriminale, shteti humbet kontrollin mbi informacionin që garanton funksionimin, vendimmarrjen dhe sigurinë e tij.

“AKSHI është një institucion që menaxhon infrastrukturën digjitale kritike të vendit dhe, për këtë arsye, çdo devijim serioz në mënyrën se si funksionon ai përbën rrezik për sigurinë kombëtare,” tha Arjan Dyrmishi, drejtor ekzekutiv i Qendrës për Studimin e Demokracisë dhe Qeverisjes.

“Fakti që drejtues të kësaj agjencie dyshohen se kanë bashkëpunuar me një grup të strukturuar kriminal, duke manipuluar procedura prokurimi dhe duke përdorur dhunë për të ndikuar rezultatet, tregon që është vënë në rrezik jo vetëm integriteti i tenderëve, por vetë integriteti dhe sovraniteti digjital i shtetit,” theksoi ai.

Rreziku merr një dimension edhe më konkret në këndvështrimin e ish-kreut të Forcës Detare, Artur Meçollari, i cili thotë se të dhënat kritike që përpunon AKSHI mund të jenë sot në duart e kompanive që kanë mirëmbajtur sistemet duke fituar tenderat, të cilët, nga hetimi, dalin se janë diktuar nga një grupi kriminal.

“Një nga filtrat, i cili pengon rënien në dorë të këtyre të dhënave të grupeve kriminale është besueshmëria e kompanive kontraktore që garanton AKSHI,” tha Meçollari për BIRN, duke shtuar se “nëse këto kompani, të cilat janë nën akuzë nga Prokuroria si grup i strukturuar kriminal, kanë qenë të pajisur me çertifikatë sigurie nga DSIK, çështja është edhe më e rëndë, pasi vë në diskutim të gjithë sistemin e sigurisë kombëtare”.

AKSHI konsiderohet infrastrukturë kritike kombëtare për shkak të informacionit që zotëron dhe përpunon dhe kjo është arsyeja, sipas Meçollarit, që një pjesë e procedurave tenderuese janë klasifikuar si sekrete.

“Zotërimi nga grupet kriminale i këtyre të dhënave krijon mundësi për tregtimin e tyre në tregun e zi për qëllime përfitimi dhe që mund të bien në duart e  grupeve kriminale ndërkombëtare ose shteteve jo dashamirëse apo armike të Shqipërisë,” paralajmëroi më tej ai.

Ekspertët besojnë se korrupsioni në tenderat publikë në një agjenci të tillë shtetërore është një indicie e drejtpërdrejtë për cënimin e sigurisë kombëtare, një akt që ka treguar se institucionet përgjegjëse për mbrojtjen e saj nuk kanë reaguar në kohë ose janë kompromentuar.

Sipas Dyrmishit, rasti ekspozon dobësi serioze strukturore brenda AKSHI-t; një dështim të thellë të kontrollit dhe mbikëqyrjes; mungesë kontrolli efektiv mbi drejtuesit dhe mekanizma të brishtë dhe lehtësisht të manipulueshëm të prokurimeve publike. Përdorimi i dhunës “ për t’u mbyllur gojën atyre që dalin kundër”, e bën sipas Dyrmishit edhe më të rrezikshme situatën.

“Në një institucion të tillë që menaxhon sisteme kritike, kjo klimë frike e bën sigurinë operacionale jo funksionale, pasiqë vendimet merren për të garantuar funksionimin e skemës kriminale, jo për të mbrojtur shërbimet dhe të dhënat shtetërore,” tha Dyrmishi.

Rezultatet e hetimeve të deritanishme, sipas Dyrmishit, tregojnë se depërtimi i krimit të organizuar në drejtimin e institucionit  ka sjellë pasoja që nuk janë vetëm ligjore apo morale,  por kanë prekur drejtpërdrejt funksionimin e shtetit, besimin e qytetarëve dhe sigurinë kombëtare në kuptimin e saj modern: garantimin e sovranitetit, mirëqenien dhe stabilitetin e vendit.

Për ish-drejtuesin e Forcave Detare, Meçollari, rasti ngre gjithashtu pikëpyetje për funksionimin e institucioneve të tjera, kur sipas tij,  fakti që hetimi është iniciuar dhe çuar përpara nga SPAK “tregon se hallka të tjera të sistemit të sigurisë kombëtare nuk kanë funksionuar siç duhet, si SHISH, DSIK, Policia Kriminale, etj”.

“Pasiviteti i shtetit në çështje të tilla sensitive për të dhënat personale të qytetarëve, të dhënat e biznesit dhe sigurisë kombëtare, ka inkurajuar shkelësit e ligjit të jenë të pacënueshëm dhe të veprojnë lirshëm në bashkëpunim me elementët e korruptuar brenda sistemit. SPAK-u e bëri detyrën dhe shumë mirë,” shtoi më tej Meçollari.

Hetimet për tenderat e AKSHI-it duket se do të testojnë kufijtë mes përgjegjësisë penale, dështimeve institucionale dhe debatit politik mbi mekanizmat shtetërorë që duhet të garantojnë të dhënat jetike të qytetarëve dhe ato shtetërore.

Mazhoranca është mjaftuar me përshëndetjen e aksionit të SPAK pa marrë përgjegjësi dhe akte llogaridhënie. “Unë gëzohem sa herë që SPAK-u realizon operacione,” deklaroi të enjten për mediat kreu i grupit parlamentar të Partisë Socialiste, Taulant Balla.

Por për opozitën, ngjarja nuk mund të kalojë si një aksion rutinë i Prokurorisë, por duhet të shërbejë për një llogaridhënie dhe nxjerrje të përgjegjësive për institucionet shtetërore që duhet të garantojnë sigurinë e vendit.

“Siguria kombëtare ka rënë, jo thjesht kompromentuar,” tha Erald Kapri, anëtar i komisionit parlamentar për Çështjet e Brendshme dhe Mbrojtjen si përfaqësues i Partisë Mundësia

Ai sugjeron që deputetët e opozitës në këtë komision të kërkojnë seancë dëgjimore urgjente me Shërbimin Informativ Shtetëror, Ministren e Brendshme, ndërsa konsideron të nevojshme thirrjen e Këshillit për Sigurinë Kombëtare si dhe pezullimin e çdo veprimtarie nga personat nën akuzë.

“Ende ka procedura të hapura tenderimi nga AKSHI, çka flet qartë për kaosin qeveritar dhe drejtuesit e akuzuar janë ende në detyrë,” i tha Kapri BIRN, duke shtuar se ai deputet do të këmbëngulë në ndërhyrjen e partnerëve ndërkombëtarë, NATO dhe BE.

“Që të marrim garanci nga partnerët, pasi qeveria e ka humbur besueshmërinë,” thekon ai.

Edhe Klevis Balliu, deputet I Partisë Demokratike dhe anëtar i komisionit parlamentar që merret me çështje të sigurisë kombëtare, e quan rastin  si alarmant dhe “cënim të rëndë të sigurisë kombëtare”.

“Kur një institucion kaq kritik shndërrohet në mjet shërbimi për kartele kriminalë dhe interesa familjare të pushtetit, atëherë rrezikohen drejtpërdrejt siguria shtetërore, ekonomike dhe personale e qytetarëve,” tha Balliu për BIRN, duke shtuar se “përballë kësaj situate, opozita do të veprojë me të gjitha mjetet kushtetuese dhe parlamentare për të rikthyer ligjshmërinë dhe përgjegjësinë”./BIRN

Kryedemokrati Sali Berisha, nga podiumi i tubimit festiv në Kavajë për 35-vjetorin e themelimit të degës së Partisë Demokratike, u bëri ftesë të gjithë qytetarëve që më 22 dhjetor të mblidhen në Tiranë për të rrëzuar qeverinë e Edi Ramës.

Ndërsa nënvizoi se historia i thërriste për herë të dytë kavajasit që të rrëzonin diktaturën e radhës, kryetari i selisë blu theksoi se qeveria qëndronte në pushtet bashkë me kryeministrin e saj, për shkak se nuk ngriheshin ata në protesta.

“Qytetarë dhe qytetare të Kavajës, historia ju thërret përsëri, thërret të gjithë shqiptarët që të ngrihemi për të përmbysur diktaturën e dytë. Edi Rama qëndron në pushtet jo se ka fuqi e mbështetje, por se nuk ngrihemi ne! Por ne do ngrihemi, qytetarë të lirë, se nuk pranojmë kurrë një regjim si ky”, u shpreh ai në fjalën e tij.

Duke iu kthyer akuzave për vjedhje dhe aferat skandaloze të zyrtarëve të lartë, ai përmendi emrin e Ergys Agasit, për dosjen e AKSHI-t ku ka 6 të pandehur deri tani nga SPAK, mes tyre edhe drejtoresha Mirlinda Kërçanaj, ai denoncoi se ishin bërë 50 mln euro transaksione jashtë vendit.

“Një emër që keni dëgjuar ditët e fundit, Ergys Agasi, i larguar apo jo, vetëm me një transaksion jashtë shtetit, ka vjedhur 50 mln euro shqiptarëve. Vjedhjet e tyre janë të pafundme e do marrin atë që meritojnë. Ndaj ftoj qytetarët e Kavajës të jenë në krye të lëvizjes së tyre”, tha lideri i opozitës.

Në fund Berisha i bëri thirrje të gjithë qytetarëve që më 22 dhjetor të mblidheshin në Tiranë për të rrëzuar regjimin, njëlloj si më 22 shkurt 1991.

“Vetëm një ditë s’kam për ta harruar, 20 shkurtin e vitit 1991, se mos diktatori ua bllokonte rrugën e s’do vinin dot. Janë gdhirë gjithë natën e kanë mbërrit në Tiranë për t’ju bashkuar të gjithë shqiptarëve atje. Ndaj duke ju falënderuar nga këtu, para të gjithë qytetarëve e qytetareve të Kavajës, ju ftoj të nisim betejën tonë pa kthim, fitoren e Partisë Demokratike, fitoren e Shqipërisë. Gëzuar”, përfundoi kryedemokrati fjalën e tij.

Më pas ceremonia kaloi në momente festive me prerjen e tortës nga vetë kryedemokrati Berisha, dhe trokitjen e gotave mes mbështetësve demokratë.

Bashkimi Evropian (BE) ka vendosur t’i heqë të gjitha masat ndëshkuese ndaj Kosovës deri në fund të muajit të ardhshëm, duke ia mundësuar vendit të përfitojë miliona euro ndihmë financiare qysh në fillim të vitit 2026, njoftuan zyrtarë nga të dyja palët të mërkurën vonë.

Vendimi vjen pasi u bë kalimi i pushtetit lokal në mënyrë paqësore në veriun e banuar me shumicë serbe, pasi ishin pikërisht tensionet në këtë pjesë të Kosovës që shtynë bllokun të vendoste masa ndëshkuese ndaj saj verën e vitit 2023.

Ishte presidentja e Kosovës, Vjosa Osmani, ajo që njoftoi e para se BE-ja vendosi t’i heqë të gjitha masat deri në fund të janarit, gjatë samitit të bllokut me vendet e Ballkanit Perëndimor të mërkurën në Bruksel.

“Gjatë bisedimeve intensive me partnerët tanë u mor vendimi që të gjitha masat t’i hiqen Kosovës, ku një pjesë e madhe i hiqet sot, kurse pjesa tjetër në fund të janarit”, tha Osmani të mërkurën vonë në Facebook.

Osmani, e cila e përfaqësoi Kosovën në samit, shtoi se “rrjedhimisht, edhe fondet do të zhbllokohen, një pjesë shumë e madhe menjëherë e një pjesë tjetër në fund të janarit”.

Ndërkohë, presidentja e Komisionit Evropian, Ursula von der Leyen, shkroi më pas në X se BE-ja po i heq masat pasi kalimi i pushtetit lokal në veri pas zgjedhjeve të fundit lokale u zhvillua në mënyrë paqësore.

“Falë kësaj, kam kënaqësinë të njoftoj se po ecim përpara me heqjen e masave ndaj Kosovës”, shkroi ajo.

Ajo shtoi se blloku po planifikon 216 milionë euro ndihmë financiare për Kosovën dhe se synon që t’ia ndajë asaj 205 milionë euro qysh në fillim të vitit 2026.

BE-ja veçse i kishte hequr gjysmën e masave në fillim të kësaj jave, por nuk ishte e qartë se ato do të hiqeshin plotësisht pas një muaji, pasi thuhej se vende si Franca dhe Italia, të mbështetura nga Spanja, Hungaria dhe Sllovakia, nuk kishin vullnet për heqjen e të gjitha sanksioneve.

Zyrtarët në Kosovë kanë kërkuar me këmbëngulësi vazhdimisht nga BE-ja t’u japë fund masave ndëshkuese, të cilat i shkaktuan vendit dëme në vlera milionëshe.

Ata argumentonin se gjendja në veri ishte shtensionuar tashmë pas zvogëlimit të pranisë së Policisë në ndërtesat komunale, pjesëmarrjes së serbëve në zgjedhjet e sivjetshme dhe kalimi i pushtetit tek serbët lokalë në mënyrë paqësore.

Këto masa ndëshkuese i kishin kushtuar Kosovës rreth 613.4 milionë euro në projekte të pezulluara ose të shtyra për afat të pacaktuar. Për shkak të kalimit të afateve, 7.1 milionë euro janë humbur tërësisht, sipas një analize të Institutit për Studime të Avancuara – GAP.

Sektorët më të prekur përfshijnë mjedisin, me 350 milionë euro, energjinë me 114 milionë euro, digjitalizimin me rreth 57 milionë euro, dhe kulturën me 15 milionë euro.

Prej këtyre fondeve, rreth 218 milionë euro kanë qenë për projekte në kuadër të Instrumentit para-anëtarësimit (IPA II dhe IPA III), dhe rreth 395 milionë euro për projekte në kuadër të Kornizës për Investime të Bashkimit Evropian për rajonin e Ballkanit Perëndimor (WBIF).

Kryetari i Partisë Demokratike, Sali Berisha duke folur në mbledhjen e Këshillit Kombëtar, ka deklaruar se Edi Rama i ka ‘kohërat e numëruara’ dhe se nuk ekziston asnjë forcë, brenda apo jashtë vendit, që mund ta shpëtojë atë nga përballja me opozitën shqiptare.

Në fjalën drejtuar anëtarëve të Këshillit Kombëtar, Berisha e përshkroi situatën si të rrezikshme, por njëkohësisht vendimtare, duke bërë thirrje për një mobilizim të përgjithshëm qytetar dhe opozitar, për protesta të qëndrueshme dhe rezistencë në të gjitha format.

Sipas tij, me synimin e vetëm rrëzimin e regjimit dhe rikthimin e Kushtetutës, ligjit dhe të drejtës së votës së lirë për shqiptarët.

Pjesë nga fjala e kreut të PD, Sali Berisha:

Miqtë e mi, të gjitha këto na faktojnë se në çfarë situate jemi, sa e rrezikshme është, duhet ta pranojmë, është e rrezikshme situata, por për të gjithë ata idealistë, ata guximtarë, që duan të kontribuojnë për veten, fëmijët, të ardhmen e tyre, ka vetëm një rrugë, përballja gjer në fitore me këtë kalbësirë, të aftë të kryejë çdo krim.

Të aftë të marrë çdo vendim.

Të aftë të bëjë gjithçka për të mbijetuar.

Ndaj dhe të nderuar anëtare dhe anëtarë të Këshillit Kombëtar.

Në qoftë se ndonjëherë ka qenë ora e thirrjes për ne, kjo është ora e thirrjes për çdo idealist, për çdo atdhetar, për çdo shqiptar.

U tejkalua çdo lloj vije, çdo lloj standardi.

Ish-koordinatori për banda i Edi Ramës, merr peng për t’i hapur rrugën kunatit të familjes.

Nuk shkohet më tutje, do qëndrojmë tek këto.

Se ju kudo që shkoni, këta nuk bëjnë gjë tjetër veçse vjedhin pasuritë e qytetarëve.

Ndaj dhe thirrja ime është të spostohemi në një orbitë të re.

Po, kërkohet të operojmë në një orbitë të re.

Dhe kjo është orbita e përballjes me këtë regjim.

Është thirrje për çdo njërin prej nesh për guxim, për kreativitet, për të gjitha format e rezistencës dhe lëvizjes, dhe u garantoj se në mënyrën më të pashmangshme, fitorja është e PD, fitorja është e opozitës, fitorja është e shqiptarëve.

Asgjë nuk do na ndalë ne pa rikthyer Kushtetutën, ligjin, të drejtat e shqiptarëve për votën e lirë dhe ndëshkuar këtë organizatë kriminale, të papërmbajtur në vjedhjen e shqiptarëve.

Ju e morët vesh, na thoni tani këtu, prokuroria dërgon në parlament kërkesën për heqjen e imunitetit dhe arrestimin e Lubisë.

Prisni. Prokuroria ka dërguar me qindra dokumente, ligji dhe vetë prokurori, ato ua adreson si kryetarit dhe çdo deputeti të parlamentit.

Edi Rama urdhëron Niko Peleshin dhe ai i ndryn në kasafortë, fillimisht i mashtron, u thotë përfaqësuesve tanë se e ka kërkuar prokurori. Sigurisht se ato janë sekret, por nuk mund të jenë kurrë për anëtarët e Këshillit të Mandateve.

Po pse janë sekret?

Se aty del Rama.

Se aty del Rama me të gjithë porositë e tij.

Se ata kaluan nga tuneli i Llogarasë, tek lotet.

Tek lotet është Rama me mesazhet.

Plus që janë filmime të tjera, fjalë të tjera.

Ju e shihni se ata janë një grup llumi, që vetëm zyrtarë nuk mund të quhen ata.

Dhe tani kërkojnë t’i fshehin.

Na thoni ju, çfarë duhet të bëjmë ne?

Si mund t’u mbahet deputetëve dokumentet, vetëm e vetëm se Edi Rama është i zhytur gjer në veshë.

Kështu që jemi pra… shikoni çfarë akti provokativ. Rrezikohet të mos na japin dokumentet.

Duan t’i mbajnë duke fshehur vjedhjet.

Duan t’i mbajnë duke fshehur krimin.

Atëherë është populli, janë qytetarët që duhet të flasin.

Ose të shtrijmë qafën, po jo kurrë nuk e bëjmë atë.

Ndaj, të nderuar anëtarë të Këshillit Kombëtar, këto ditë që kanë mbetur, jeni të lutur, u kërkoj të angazhoheni në takime intensive me qytetarët.

Është koha e guximtarëve, mos e harroni këtë.

Dhe çdonjëri që thotë se si t’ia bëjmë se ky nuk po më vjen, i them në radhë të parë hajde ti vetë, jep shembull personal, ai që nuk vjen, lëre mënjanë, shko gjej tjetrin që vjen.

Është koha e guximtarëve.

Mos harroni se kjo qeveria nuk u reziston kurrë 3 mijë apo 5 mijë burrave dhe grave, djemve që vendosin të zënë sheshin para kryeministrit dhe të mos e lëshojnë atë gjer sa të ikë ky.

Ata që i rrëzuan, i kanë rrëzuar autokratët, por i kanë rrëzuar me protesta të qëndrueshme.

Tani, kemi bërë çdo gjë, nuk ka qenë e lehtë, ka qenë shumë e vështirë. Imagjinoni ju lobingjet e Mogherinave kundër nesh, imagjinoni ju se çfarë efekti kanë patur.

Por një mirënjohje të pakufishme ndaj partive simotra, të cilat e kuptuan se qëndrimi ndaj PD ishte i pabazuar dhe nga tetori i vitit 2024, gjer më 5 dhjetor, kanë miratuar 7 rezoluta në mbështetjen tonë.

Natyrisht janë mbështetje e fuqishme, por ato janë letër në qoftë se ne nuk ngrihemi.

Agjenda jonë duhet të jetë protestë, protestë dhe vetëm protestë.

Në të gjitha format.

Kudo. Brenda dhe jashtë Shqipërisë.

Degët tona, kudo që janë, do të angazhohen në protesta të fuqishme kundër këtij regjimi, pranë organizatave ndërkombëtare.

Protesta të fuqishme kundër kleptokracisë dhe narkoshtetit shqiptar.

Edi Rama i ka kohërat e numëruara.

Forcë në botë që ta shpëtojë nga PD dhe opozita shqiptare nuk ka

SPAK sot deklaron se biznesmeni Gerond Meçe është marrë peng, për shkak se u fut në garë, duke prishur përllogaritjet për paracaktimin e tenderave.

Por Gerond Meçe rezulton se ishte një prestanome për llogari të Armand Frangut, baxhanakut të kryeministrit të vendit. Madje, kompanitë e hapura nga ai dhe Armand Frangu kanë lënë gjurmë të mjaftueshme se ku kanë përfunduar të paktën 53 milionë euro e mbi 800 transaksione të AKSHI-t në favor të kompanive të tyre.

Armand Frangu, baxhanaku i kryeministrit Edi Rama, sipas të dhënave të siguruara nga QKB, rezulton aksioner në 2 kompani, B360 e bashkëthemeluar me Gerond Meçe dhe SIRMA, e themeluar në vitin 2017 me ortak kompaninë SIRMA Inc, ku Armand Frangu ka në zotërim 45% të aksioneve. Të dyja këto kompani kanë si objekt shërbimet IT.

Emisioni PLUG analizoi të dhënat e këtyre kompanive dhe punonjësit e tyre, ku gjenden edhe gjurmët e para të lidhjeve të kompanive të Gerond Meçes dhe Armand Frangut, për të faktuar më pas nëse Frangu ka përfituar para publike nëpërmjet ABS.

Për këtë na vjen në ndihmë profili në LinkedIn i punonjëses Gloria Avramushi.

Gloria Avramushi ka përfunduar studimet bachelor në vitin 2017 dhe menjëherë ka filluar punë pranë kompanisë SIRMA, ku aksioner është Armand Frangu.

Në LinkedIn, zonjusha Avramushi detajon disa nga projektet që ajo ka pasur ndër vite si punonjëse, ndër të cilat:

Një projekt është ai i “Certificates of Professional Competence” nga Drejtoria e Transportit Rrugor. Sipas LinkedIn, SIRMA ka ndërtuar sistemin software për lejet e drejtimit. Ky projekt është zbatuar në periudhën shkurt 2019 – mars 2020. Nga të dhënat e mbledhura, rezulton se pikërisht kompania ABS ka fituar tenderin e zhvilluar nga AKSHI në vitin 2018: tenderi “Plotësimi i sistemeve të lejedrejtimit” me vlerë 187 milionë lekë.

“Time Attendance”, po nga AKSHI, është një tjetër projekt i zhvilluar në periudhën tetor 2018 – prill 2019.

“Document Management System (Save the Children Albania)” është një tjetër projekt i fituar në dhjetor të vitit 2017. Ky projekt për këdo nuk do të përbënte interes pasi është një marrëdhënie midis subjekteve private, por për PLUG do të ishte një tjetër lidhje mes Armand Frangut dhe Gerond Meçes.

Deri tani shihet qartë se Armand Frangu ka përfituar fonde publike përmes ish-ortakut Gerond Meçe. Kjo lidhje është faktuar edhe më parë midis kompanive ABS dhe B360, ku sipas bilanceve marrin dhe japin shërbime njëra-tjetrës që nga themelimi. Nuk dihet nëse kjo është një marrëdhënie miqsh apo komshinjsh, pasi të ekspozuar përballë konfliktit të interesit, shkresërisht rezultojnë me biznese të ndara.

Një tjetër lidhje e fortë mes bizneseve të Armand Frangut dhe Gerond Meçes është edhe vendndodhja e bizneseve. Edhe pse të ndarë në letra, bizneset që i lidhin ata mes tyre janë në të njëjtën adresë. Kompanitë e Frangut dhe Meçes, në periudha të ndryshme, kanë deklaruar të njëjtën adresë: Njësia Bashkiake nr. 2, Rruga “Papa Gjon Pali II”, Pallati 11, por në apartamente të ndara.

Më 29 prill 2015, kompania Advanced Business Solutions, e njohur shkurt si “ABS”, shtoi adresën Rruga “Papa Gjon Pali II”, Shkalla 1, Kati i 5-të, Apartamenti 13. Kjo adresë ka qenë funksionale deri më 8 qershor 2022.

Më 4 dhjetor 2012, kompania B360 vendosi adresën: Rruga “Papa Gjon Pali II”, Pallati 11/1, Apartamenti 11. Kjo adresë ka qenë përdorur deri më 27 prill 2017.

Kompania Artificial Intelligence Business Solutions, shkurt AIBS, ka pasur si adresë të themelimit rrugën “Papa Gjon Pali II”, Pallati 11/1, Hyrja 1, Apartamenti 19, në Tiranë.

Kompania SIRMA, e themeluar në vitin 2017, ka pasur si adresë fillestare Rrugën “Papa Gjon Pali II”, Pallati 11, Apartamenti 11, në Tiranë.

Sipas disa të dhënave që emisioni PLUG mundi të mblidhte në kaq pak kohë, rezulton se në vitin 2016 lidhet kontrata me objekt “Rritja e sigurisë fizike dhe digjitale në shkollat e arsimit të mesëm, ndërtimi i platformës multidimensionale të komunikimit”.

Autoriteti kontraktues: AKSHI.

Ofrues i shërbimit: bashkimi i operatorëve FIRST, ABS dhe INFOSOFT.

Vlera e kontratës: mbi 4 milionë dollarë me TVSH.

Gjatë investigimit të kësaj kontrate, PLUG konstatoi një shkelje sa skandaloze aq edhe korruptive.

Në nenin 38.2 të kontratës “Personat e autorizuar për ndjekjen e kontratës” listohen punonjësit e ngarkuar për të ndjekur ecurinë si për palën AKSHI ashtu edhe për palën ABS. Për AKSHI, e dyta në listë është shtetasja Ermonela Kajo.

PLUG investigoi më tej dhe mundi të siguronte një dokument të AKSHI-t ku zonja Ermonela Denaj (Kajo) rezulton të jetë jo specialiste, jo shefe sektori, por Drejtore e Drejtorisë së Sistemeve e-Gov.

Veç pozicionit drejtues pranë AKSHI-t, Ermonela Denaj-Kajo rezulton të jetë edhe kunata e Gerond Meçes, përfituesit më të madh të tenderave të këtij institucioni.

Nga të dhënat e siguruara në gjendjen civile rezulton se Gerond Meçe është i martuar me shtetasen Elinda Meçe (Kajo). Kjo e fundit, prej vitit 2020, mban detyrën e dekanes së Universitetit Politeknik të Tiranës. Bashkëshortja e Gerondit ka tre motra, një ndër to është dhe shtetasja, drejtoreshë në AKSHI, zonja Ermonela Denaj (Kajo).

Shihet qartë që miqësia apo komshillëku në biznes i Gerond Meçes me Armand Frangun krijon mjaft lehtësira, duke të emëruar kunatën drejtoreshë në AKSHI dhe më pas duke të dhënë miliona euro tendera, të cilat i kontrollon po kunata drejtoreshë.

Në nenin 6 të kontratës, të firmosur mes AKSHI-t dhe bashkimit të operatorëve, përcaktohen Praktikat Korruptive, Konflikti i Interesit dhe Kontrolli i Procesverbaleve. Sipas këtij neni dhe nenit 26 të Ligjit të Prokurimit Publik, do të duhej minimalisht të deklarohej konflikti i interesit midis pronarit të kompanisë ABS, Gerond Meçe, dhe Drejtoreshës Ermonela Denaj-Kajo, e cila duhet të monitoronte zbatimin e kontratës nga kunati i saj.

Nuk dihet nëse Ermonela Kajo është emëruar aty me ndikimin e Armand Frangut për të arritur aty ku thotë edhe Ahmetaj, që në institucionin e AKSHI-t për çdo tender vendos ai.

Kjo do të duhet të hetohet nga SPAK, por një gjë është e sigurt: kontratat e kompanisë ABS janë në konflikt të pastër interesi, ndërsa emisioni Plug do t’i drejtohet zyrtarisht me kërkesë Agjencisë Kombëtare të Shoqërisë së Informacionit për procedurat tenderuese të kompanive ABS dhe FIRST.

Për të faktuar lidhjen mes shtetasit Gerond Meçe dhe Armand Frangu, i rikthehemi edhe njëherë projekteve të detajuara në LinkedIn të punonjëses së kompanisë SIRMA, Gloria Avramushi. Për periudhën dhjetor 2017–2019, kompania SIRMA ka zhvilluar sisteme për organizatën jofitimprurëse “Save the Children Albania”.

Shefe finance në këtë OJF është shtetasja Erka Meçe, bashkëshortja e shtetasit Elvis Meçe dhe kunatë e shtetasit Gerond Meçe.

Kjo do të ishte një rastësi e madhe, por dyshimet shtohen pasi kompania SIRMA kishte vetëm pak muaj që ishte themeluar dhe me zero eksperiencë në tregun vendas, ndërsa “Save the Children Albania” është një OJF e themeluar prej vitit 1999 dhe me një eksperiencë të gjatë.

Adresa të njëjta, bashkëpunim, i njëjti staf dhe familjarë në institucionet shtetërore që u japin tendera janë të dhëna që forcojnë dyshimet se kjo nuk është thjesht një rastësi, por i takon SPAK-ut të zbardhë këto lidhje, që vetëm nga investigimi i drejtoreshës së AKSHI-t, Ermonela Denaj-Kajo, faktohet abuzimi me tenderat e fituara nga këto kompani që në total përllogariten në 53 milionë euro.

Emisioni PLUG investigoi edhe akuzën e ish-numrit dy të qeverisë për ngritjen e një zinxhiri kompanish që synimin e vetëm kanë pasur justifikimin e shpenzimeve për milionat e marra nga AKSHI. Kompania AIBS është themeluar në shkurt të vitit 2020 me ortak të vetëm shtetasin Gerond Meçe. Sipas të dhënave të bilanceve të deklaruara në QKB, që në momentin e themelimit AIBS deklaron një xhiro prej 177 milionë lekësh dhe 171 milionë lekë fitim. Në vitin 2021 xhiroja deklarohet rreth 198 milionë lekë dhe 177 milionë lekë fitim. Në vitin 2022 xhiroja rritet në 311 milionë lekë, nga të cilat 301 milionë deklarohen fitim, dhe në vitin 2023 xhiroja është 262 milionë lekë me 185 milionë lekë fitim.

Xhiro e kompanisë AIBS

Viti | Xhiro | Fitim

2020 | 177.621.000 | 171.126.000

2021 | 197.965.000 | 177.014.000

2022 | 311.253.000 | 301.528.000

2023 | 262.722.000 | 185.468.000

Total | 949.561.000 | 835.136.000

Pra, e thënë më qartë për publikun, Gerond Meçe fiton tendera publikë në vlerën 53 milionë euro me kompaninë ABS. Më pas, rreth 10 milionë euro nga këto para ia faturon sërish vetes te kompania AIBS. Meqë kjo kompani nuk ka çfarë shpenzimesh reale të deklarojë për punimet fiktive, raporton në Tatime dhe QKB një normë fitimi prej 80 për qind, duke e bërë kompani unike në treg sa i përket fitimit të lartë.

Dyshimi që ky xhirim dhe fitim prej 10 milionë eurosh është totalisht fiktiv ngrihet edhe nga punonjësit e të dy kompanive, të cilët rezultojnë të jenë të njëjtët. Gerond Meçe është pronari dhe i punësuar si te AIBS ashtu edhe te ABS. Elinda Meçe (gruaja e pronarit) rezulton e punësuar në tre pozicione: AIBS, ABS dhe dekane universiteti. Elvis Meçe (vëllai i pronarit) është i punësuar si te AIBS ashtu edhe te ABS. E njëjta skemë punësimi është përdorur edhe për punonjësit Iva Tarelli, Aneta Deliu, Vanjela Pine, Ibrahim Smoqi, Jorgjis Sollaku, Hariet Bani dhe Miltiadh Dine.

Pra, i njëjti pronar themelon dy kompani: me njërën fiton tenderat e AKSHI-t me çmime shumë të larta dhe, për të rritur shpenzimet, themelon kompaninë e dytë me të cilën rrit shpenzimet fiktivisht me rreth 10 milionë euro. Për ta bërë sa më të besueshme skemën, regjistron 10 punonjës që në fakt punojnë te kompania kryesore që merr tenderat.

SPAK hyri në kopshtin privat të Edi Ramës, te AKSHI. Por mbetet për t’u parë nëse prokurorët do të kenë guximin t’u tregojnë shqiptarëve se kush janë përfituesit faktikë të miliona eurove nga tenderat e AKSHI-t, apo do të mbetet gjithçka te biznesmenët prestanome. E për këtë me vlerë është edhe audio-përgjimi, ku sipas atyre që e kanë dëgjuar, Gerond Meçe deklaron se çdo tender në këtë institucion paracaktohet nga Linda Rama, apo nëse do të arrijnë të garantojnë dëshmitarë si Daniel Shima për të zbardhur deri në fund aferat korruptive të kopshtit privat të Edi Ramës.

/Emisioni PLUG