“Ajo që ndodhi është një plagë për institucionet, edhe sepse policia nuk ishte e përgatitur”, por “institucionet rezistojnë”: kështu komenton gazetari amerikan Andrew Spannaus mbi sulmin ndaj Kapitolit të mërkurën në Uashington.

“Askush nuk shkoi me të vërtetë pas Donald Trumpit në pamundësinë e tij për të pranuar rezultatin e zgjedhjeve”: afërsisht 150 deputetë që votuan kundër ratifikimit të rezultateve elektorale të dy shteteve, duke sjellë pretendimet e protestuesve në sallë, nuk e bënë “ngaqë e ata e duan Trumpin, por sepse ata po e kërkojnë elektoratin e tij. Ka senatorë që tashmë po mendojnë për vitin 2024”, thotë Spannaus, “të cilët dëshirojnë të konfirmojnë pikën e kthesës së partisë republikane, populiste në aspektin ekonomik, duke menduar se duhet të jetë partia e klasës ekonomike. Trumpi është mposhtur dhe ai gjithashtu ka pranuar se duhet të largohet, por beteja hapet për të vjelë atë që unë mendoj se është trashëgimia e tij më interesante “.

Sa për Joe Biden, sipas Spannaus “ai gjithashtu do të ketë një shumicë në Senat falë fitores së dy kandidatëve në Xhorxhia dhe për këtë arsye do të jetë në gjendje të paktën të përpiqet të zbatojë programin e tij elektoral. Ai do të duhet ende të kërkojë një bashkëpunim dypartiak dhe ngjarjet e djeshme i japin atij një hapësirë, një mundësi për të zvogëluar pak përçarjen me një pjesë të partisë Republikane “.

Në krahasim me Trumpin, “i pazoti për të qenë i përgjegjshëm kur bie ndesh me instiktet dhe interesat e tij”, Biden “ka treguar përgjegjësi më të madhe dhe ka konfirmuar arsyen pse fitoi: ai nuk është Donald Trumpi, ai di të shprehë ndjeshmëri dhe kjo është thelbësore. Por fjalët nuk do të zgjasin shumë, tani ai do të duhet të gjejë një mënyrë për të kapërcyer jo vetëm pabarazitë në përgjithësi, por edhe hendekun politik midis fraksioneve të ndryshme të vendit “./voal