Oh, pranverë e hidhur!Kisha menduar se ky vit nuk do të ishte si vite të tjerë më parë , që na morën shumë të dashur…, ikën pa kthim dhe lanë pas kujtimet…

Por jo…, sapo marrim vesh lajmin e trishtë : Eshtë shuar Shaban Murati, njeriu i të vërtetave të guximshme, dijetari që nuk rreshti së lexuari, studiuesi dhe eruditi i gjeopolitikës rajonale, europiane e më gjerë…

Një jetë me kontribute dhe arritje, punë të shkruara, që vlejnë në jetë të jetëve. Në diplomaci duhet kultura historike, filozofia e institucioneve, etika e komunikimit, intuita e ndërhyrjes, argumenti i parashikimeve,dinjiteti i ballafaqimit…

Shaban Murati i kishte të gjitha, siguruar me punën dhe zotësinë, me investimet dhe përgjegjshmërinë prej atdhetari. Fiket një njeri institucion…

Çdo lloj heshtjeje do të ishte e turpshme…

Ne nuk kemi ambasadorë të kalibrit të tij, sepse askush si ai nuk ka studime aq të thella për Ballkanin, në fokusin e historisë së marrëdhënieve ndërshtetërore. Sa herë e lexoja, më pëlqente ta cilësoja “ Milan Shuflai”i kohëve moderne. Shpesh komunikonim në linjë private dhe fjalët e tij ishin mendim i peshuar, ndjenja të sinqerta dhe respekt prej gentelmeni…

Lamtumirë, mik i respektuar…!

Sa shumë punë le, sa boshllëk krijove me ikjen!

Në faqet e kohës duhet të shkruhet:” Një erudit, nga sot, është në faqet e librit që la pas… Ai flet mençurisht edhe në amshim…”

Miku yt, Përparim

P.Kabo, 14 shkurt, 2025.