Shqipëria është një nga vendet që ka njohur një rritje të ndjeshme të numrit të turistëve.

Por një gjë e tillë nuk do jetë pa kosto, raporton media gjermane ‘Merkur’.

Eksperti i Ballkanit dhe operatori i një agjencie turistike, zvicerani Marco Wipfli sheh një të ardhme të errët për vendin tonë.

Sipas tij, çmimet do rriten masivisht.

Wipfli beson se arsyeja e rritjes së madhe të turizmit janë kryesisht çmimet e ulëta.

Por së shpejti kësaj mund t’i vijë fundi. Wipfli pret që çmimet në Shqipëri të “rriten masivisht” në vitet e ardhshme.

Sipas medias gjermane, apartamentet më të lira në jug të vendit, të cilat ishin 25 deri në 30 euro për natë në vitin 2023, kushtonin nga 100 deri në 120 euro në muajt e verës të vitit 2024.

“Bumi turistik jo vetëm që mund të rrisë çmimet, por edhe të sjellë me vete sfida për infrastrukturën dhe mbrojtjen e mjedisit. Ndërtimi i një aeroporti të ri pranë lumit Vjose, një nga lumenjtë e fundit të egër në Europë, po shkakton polemika. Ambientalistët po kritikojnë ashpër projektin, në të cilin është përfshirë kompania gjermane Munich Airport International GmbH (MAI),” shkruan gazeta. sn