Ish- deputeti i PD-së, Eduard Selami me anë të një statusi në profilin e tij në “Twitter” ka shpallur kandidaturën për kryetar të Partisë Demokratike. Selami shkruan: Demokrate te nderuar, me ndjenje përgjegjësie dhe synim për t’i rikthyer se bashku PD, lavdinë e merituar, shpall kandidaturën për Kryetar!
Selami është një ndër kritikët e kryetarit të PD­-së Basha. Ai nuk u përfshi në listat e PD­-së për deputetë.

Kujtojmë që zgjedhjet për kryetar te partisë demokratike mbahen në korrik. Shpallja e kandidaturës nga Selami vjen pas deklaratës të së martës për mediat të kryetarit të PD-së Lulzim Basha, duke njoftuar se kishte vendosur që të ngrijë funksionin e kryetarit të PD-së dhe duke nisur procesin e zgjedhjes së kryetarit të ri, por nuk deklaroi dorëheqjen nga posti.
Basha bëri me dije hapjen e garës për kreun e ri të Partisë Demokratike, duke sqaruar se për shkak të ngrirjes së të gjitha funksioneve të tij në parti, detyrën e kryetarit ja u ka deleguar dy nënkryetarëve të partisë, raporton BalkanWeb.
“Ngrij të gjitha funksionet e mia në PD dhe ia delegoj dy nënkryetarëve. Me këtë i hap rrugë nisjes së garës për kryetar brenda Partisë Demokratike. Gjeja më e lehtë për mua do ishte të largohesha. Por e di se ça ka ndodhur. Jam i vendosur të mbajë përgjegjësi, jo duke ikur, jo duke braktisur demokratët, por duke luftuar për ta dhe me ta”, – tha Basha.