FRYMEZIMI

.
Ju fëmijë, doni të dini:
Ç’është talenti, frymëzimi?
Eshtë një natë e tërë pa gjumë,
Eshtë një cërkëz, që bëhet lumë;

.
Eshtë një lumë i turbulluar
Në zemër e shpirt duhet kulluar,
Të zbresë i qetë në fusha e pyje
Lumë i kthjellët dashurie…

.
MATEMATIKA

.
Ju duket e vështirë?…
Matematika është e thjeshtë:
Mjafton pakëz dëshirë,
Mjafton pakëz vullnet;

.
Ju duket ndoshta prozaike,
E thatë, e ftohtë, pa frymëzim?
Ju dhuron ajo çaste magjike
Në çdo formulë, çdo vërtetim;

.
Nga një shprehje e ngatërruar
Me shkronja e shifra për çudi,
Pas thjeshtimesh të menduar,
Ju merrni fjalën dashuri;

.
Ka dhe plot paradokse,
Sofizma u thonë gjithësesi,
Për një gabim thjesht logjik,
Ju del bualli baraz mi”!…

.
QENGJAT

.
Rendin qëngjat në lëndinë,
Hanë trifil e trëndelinë,
Lënë kullotën e kërcejnë
Dhe nga unë kokën e kthejnë;

.
S’ndiejnë lodhje, nuk djersijnë,
Për mësimë s’duan t’ia dinë,
Mbi vizatimin nga natyra
Më shkelin lulet ngjyra-ngjyra;

.
Kur unë librin mbi trungje lë,
Vijnë nuhasin një nga një,
Me hundë e prekin, blegërijnë,
Kërcejnë pupthi vetëtimë;

.
Po kur nis unë recitimin,
Herë Çajupin e herë Naimin
Vijnë ngadalë e më rethojnë,
Me sytë e ëmbël më shikojnë;

.
Rrinë të heshtur si idiotë,
U vishen bebëzat me lotë,
Për ta fshehur mallëngjimin
Me mua nisin ligjërimin…

.
RREZJA E DIELLIT

.
Ah, moj rreze dielli,
Sa e bukur je!
Plisat ngroh e shkrin,
Syri bën hare!

.
Nga luginat zbon
Mugun errësirën
Te pikë e vesës shfaq
Ylberin shumëngjyrësh!

.
Edhe zogjtë i zgjon
Në fole nga ëndërrat,
Gjethen e përshkon
Posi shpirtin kënga!

.
Dhe atje te lumi
Lot e qesh me valën
me krehrin tënd i kreh
Nimfën, shtojzavallën!

.
Po hëna e bukur
Pse rri kaq e zbetë
Në cep të qiellit strukur
Si vejushë e shkretë?…

.
LUME I DASHURISE

.
Lumë i pastër dashuria,
Lumë që s’kthehet,
Lumë që s’ngrin
Gjersa detin e arrin;

.
E vetme një rrëkezë
S’e arrin dot detin kurrë…
Unë dhe ti
Me dashuri,

.
Të bëhemi një lumë!
Kalon fusha edhe male
Rrjedh e rrjedh përherë
Ky lumë i dashurisë;

.
E vetme një rrëkezë
S’e arrin dot detin kurrë…
Unë dhe ti
Me dashuri,

.
Të bëhemi një lumë!
Dhe thellohet e zgjerohet
Lumë i dashurisë
Gjersa detit i bashkohet!