Në Kosovë ka nisur fushata zgjedhore,  në rrjetin social ka nisur ahengu!

Folklor dynja!

Kanë kaluar 15 vjet nga vdekja e Rugovës dhe lidërshipi aktual i LDK-së ka bashkëqeverisur kryesisht me Hashim Thaçin,

duke ndarë pushtetin, privilegjet, duke shpërdorur emrin e Rugovës dhe elektoratin e LDK-së!

Prej kur Rugova është larguar nga kjo botë, kasta në krye të LDK-së sa herë ka shkruar në zgjedhje aq herë e ka mashtruar elektoratin.

Zgjedhje pas zgjedhjesh prej 2007, e udhëhequr nga një kastë titistësh të korruptuar, LDK-ja e ka humbur elektoratin ose më saktë të thuhet  është se elektorati i LDK-së nuk i ka votuar.

Zgjedhje pas zgjedhjesh i kanë premtuar elektoratit të LDK-së se, nëse ky elektorat u jep votën, ata e nxjerrin Hashimin në opozitë.

Por ne kemi parë me sytë e ballit se LDK-ja hyri në koalicion me Hashim Thaçin që në zgjedhjet e 2007 e deri më 2020!

Po të mos merrte vendim Gjykata Kushtetuese, do të ishin bashkë edhe sot e kësaj dite!

Ashtu e kishin llogaritur!

Por ja vjen një moment që llogaritjet e pista nuk iu dalin!

Tani kastës së Isa Mustafës i duhet të llogaritë se prej 2007, ata kanë ndarë krevatin me Hashimin, duke nëpërkëmbur çdo lloj morali, për hir të privilegjeve dhe përfitimeve personale.

Ju kujtohet zgjedhja e Hashim Thaçit me 61 vota president i Kosovës – me votat e LDK-së?

Ju kujtohet kur deputetë të LDK-së e trafikuan votën e elektoratit të LDK-së për kolltuket e ambasadoreve, duke votuar Hashimin president?

Ju kujtohet si Isa Mustafa, figura më e degraduar e politikës në Kosovë, në çdo fushatë zgjedhore ka shpërdorur familjarët e Rugovës, ka shpërdorur figurat e nderuara të LDK-së?!

Ju kujtohet se Isa Mustafa prej 11 vitesh e ka drejtuar LDK-në me klanin e tij me grusht të hekurt si një diktator i korruptuar!

Ju kujtohet kur në zgjedhjet e 2019 e kandidoi Vjosa Osmanin për kryeministre dhe kur e rrëzoi qeverinë e Albin Kurtit pas 52 ditësh, nxori nga xhepi njërin nga servilët e tij, Avdullah Hotin!

Ju kujtohen yesmen-ët e tij në foltoret e parlamentit të Kosovës se si villnin kundër Vjosa Osmanit, ndërsa puthnin dorën e skllavopronarit të tyre Isa Mustafa?

Ju kujtohen trimat e Isës se si e rrëzuan një qeveri për 52 ditë ndërsa kanë qeverisur me Hashim Thaçin për 16 vjet?

Ju kujtohen emër për emër këta profiterë postesh pa asnjë lloj kontributi, që e kthyen Parlamentin e Kosovës një pronë private të Isa Mustafës dhe Hashim Thaçit, duke rrënuar parimet elementare të demokracisë dhe duke rrënuar reputacionin e LDK-së!

Lista aktuale e LDK-së është e mbushur me emra të komprometuar, me emra të konsumuar shterrshëm që në skenën politike të Kosovës njihen vetëm si probatimët e Isa Mustafës dhe të Hashim Thaçit, emra që kanë humbur faqen dhe fytyrën, sepse kanë luajtur me fatin e Kosovës dhe me interesat e popullit të Kosovës!

Tani ka ardhur momentumi të paguajnë çmimin!

Boll kanë vjedhur, boll kanë shpërdoruar pushtetin, boll e kanë mashtruar elektoratin Rugovist, boll e kanë tërhequr zvarrë të ardhmen e Kosovës! Boll e kanë lënë rininë e Kosovës pa të ardhme!

Dikush mund të pyesë, si është e mundur, që, pas serisë të veprimeve antidemokratike, lista e deputetëve të LDK-së në zgjedhjet e 2021 të mbetet e varur prej Isa Mustafës!

Aq e fortë është diktatura, grushti i hekurt i Isa Musfatës, Skënder Hysenit, Agim Veliut, Lutës me shokë!

Aq i fortë do të jetë edhe reagimi i elektoratit të LDK-së në këtë zgjedhje!

Do të votojë vetëm ata pak emra që kanë ruajtur integritetin personal të tyre!

Lista e deputetëve të LDK-së për zgjedhjet e 14 shkurtit 2021 ka fytyrën dhe identitetin e kastës së Isa Mustafës dhe elektorati i LDK-së kësaj kaste do t’i japë atë që meriton,

humbjen dhe largimin përfundimtar nga skena politike e Kosovës!

Kosova ka nevojë për një klasë të re politike, por kurrsesi jo më të klientëve të listës së Isa Mustafës!

Kush e do vërtetë LDK-në dhe Rugovizmin, nuk do të votojë për shumicën e listës që ka përpiluar e keqja e LDK-së që është është Isa Mustafa me kompani!

Kjo humbje e thellë mund të shërbejë si kauzë për reformimin e LDK-së,

që LDK-ja të ngrihet rishtas, në përputhje me idealet e atyre që e themeluan si një parti me vizion kombëtar-europianist dhe me demokraci të konsoliduar.

Largimi i kastës së Isa Musfatës do të jetë fitorja e parë e elektoratit të mashtruar të LDK-së nga kjo kastë e korruptuar.