3 javë përpara fundit, pikërisht në ndeshjen më të rëndësishme të futbollit shqiptar, në derbin e kryeqytetit, Tirana thyen rivalët e përjetshëm dhe feston matematikisht titullin kampion. Bardheblutë i bëjnë një mbyllje fantastike këtij sezoni ku dominuan çdo rival, në çdo formë. Tifozët festojnë me të drejtë titullin e 26-të në histori, për më tepër kundër Partizanit, pasi i thyen edhe në derbin e katërt sezonal me rezultatin 2-1.

Feston dhe Orges Shehi, titullin e tij të parë në karrierë si trajner. Sfida nisi “zjarr’ me të kuqtë që ishin më kërkues, por Tedi Cara shpërdoroi një rast të pastër që në minutën e 7-të. Në të 20-tën, Xhuljano Skuka, ylli i ri i Partizanit, realizojë një gol fantastik, një koordinim perfekt, një gol me roveshatë që solli festë te tifozët e kuq, e shijoi në maksimum edhe trajneri Mehmeti.

Tirana përjetoi “makthet” e 3 sfidave të fundit, por për të “zgjuar” ambientin bardheblu mendoi “bomberi” i tyre, Taulant Seferi. Sulmuesi i dha fund “letargjisë” në derbi, kontroll dhe finalizim plot klas në minutën e 27-të duke rikthyer baraspeshën në “Elbasan Arena”.

Skuka sërish në limitet e pjesës së parë, solli pështjellim në zonën e Bekaj por gardiani bardheblu u tregua reflektiv dukë shmangur një rast të rrezikshëm. Të shtyrë nga ethet e titullit, Tirana e nis pjesën e dytë në mënyrë fatastike. Me topin e parë në këmbë, Totre realizon një perlë, një super gol nga distanca që përmbys rezultatin dhe afron bardheblutë me titullin kampion.

Skuka kalon këdo që i del përpara, në ndërhyrjen e dytë të Hoxhallari rrëzohet në zonë, gjyqtari Hamiti fillimisht akordon penallti por më pas me ndihmën e VAR anulon gjithçka, duke sjell ndërprerjen e derbit për pak minuta. Partizani nuk kishte forcë e as fat të rikthehej sërish në lojë, të paktën të shtynte festën e Tiranës, por ishte e shkruar që rivalët e tyre të përjetshëm të festonin titullin kampion pikërisht në derbi, një “skenar” perfekt që e bën edhe më të bukur këtë titull të 26-të në histori.

(BalkanWeb)